FAILIMƆN

FAILIMƆN TƆN

¹Mu waa, Pɔɔl, naa ba fun tɔ dɛ domi mu ya Yesu Kristo sɛhɛra tiinnɛ, awa ya dɔŋtiin, Timoti, zaami hinu.

Min, Pɔɔl, la sɔbi tɔn nɔ a nyɛ i waa hin Failimɔn ni. I wa ya tum Yesu Kristo tumwa. ²Ya gbanko zaami ya towe Afia, Arkipus awa ba naa la tiŋ Kristo a lagmi i dam ni chen. Arkipus gbanko tum Yesu Kristo tumwa kinkan.

³Ya kunyana Koosa awa ya kunyan Yesu Kristo suŋi ma maga a kinyɛ ma bara sɔɔna.

Failimɔn Funɛ Daŋni Koosa Nara Maga Kinkan

⁴Mu niinbe, Failimɔn, mu yaa sumi Koosau a la zaami un i daha. ⁵Nibinsa yaa ŋɔ minu di i si su ya kunyan Yesu kinkan ka ii daŋni ba naa maga tiŋ Koosa nyinbaan. Chendaha mu ya chen. ⁶Muu sumi Koosau di o nyɛ i wa zim kiwere a naa maga o fun kpa nyɛ ya chen wɛ a gbaari, chen ni i wa ba naa tiŋ Yesu zi kpak nɔ bɛgim dɔŋ niu hali o wa peti. I ya chen ni, i zi nyɛ Yesu jirimau. ⁷Mu niinbe daŋni, hin la kpami min a la nyɛ mu tuha sɔɔni kinkan, domi ii daŋni ba naa maga la tiŋ Koosa nyinbaannɛ a la kpami ba.

Pɔɔl Fun Sumi Failimɔn Di O Suŋi Un

⁸Domi Kristo dɔ min nan, mu zi kpak bambi kpoku a ŋɔ hin chenani i zi ya. ⁹Muu daŋni hinu. Chendaha mu sumi hin di i suŋi min. Kilisi di mu ya nibaalhɛɛrɛ ka ba fun kpa min la tɔ dɛ domi mu ya Yesu Kristo sɛhɛra tiinnɛ. ¹⁰Mu sumi hinu i yoma Onisimus daha. O chi mu bere mu wati, domi o si funɛ su Kristore a li mu biksi ti ni dɛ bar tɔɔli nɔ ni. ¹¹Saha naa Onisimus naa sɔn mun ya ‘nisuŋi’, fun nyɛn i wati, o funɛ ya yɔrirɛ. Lalaknɔwa o kaa tum chenani o sɔn ti mun du a nyɛ mu wa hin ni.

¹²Min la tum un di o bur la i wati. O chi mu tum mu titirɛ. ¹³Mu daŋni o nyɛn mu watɛɛ dɛ nɔ ni a chiŋi i bar chiŋi ni a suŋi min. ¹⁴Mu wara daŋni o nyɛn mu wati ka i vɛ nyɛ un nyinbaan. Mu wara daŋni mu muksi hin i suŋi min, amaa kitum i tutɔ.

¹⁵Kilisi chenani o chɔ a ka hin nan. I wa un wa fun nyɛn a ya tama. O wa bur wa, i wa hin zi lagmi nyɛnu hali saha naa vɛ kpak bɔ. ¹⁶Lalaknɔ o wa bu ya yoma kinkan. O ya ya niinbe daŋnirɛ. Mu daŋni unu kinkan. Lalaknɔ i zi daŋni unu a kaali min domi o ya i yomne ka o si su ya kunyana.

¹⁷I wa min lagmɛɛ a tum Koosa tuma. Chendaha i la un a du a chi chenani i la min chen. ¹⁸O chɔk i kundɔŋ akoo o pɛŋ i malɛ, ŋɔ min mu bɔ hin. ¹⁹Mu titi la sɔbi nan a nyɛ hin. O pɛŋ i malɛ, mu vɔu di mu zi bɔ hinu. Mu biksi ti funɛ nyɛ i si su Yesu Kristo. Chendaha o chi min dɔ hin. ²⁰Adaha, mu niinbe, kisuŋi min a chi chen aa kikpami min, domi ya maga tiŋ ya kunyana Kristore.

²¹Mu zim di i zi tumu a kaali chenani mu sumi hin chen. ²²Onisimus wa tel i wati, i kɔɔri dɛ a chiksi min. Mu kpak bambi bɛgimu di mu zi koti a wa ma watiu domi ma sumi Koosau a nyɛ min.

Pɔɔl Mak Tɔn Nɔ Bar Nɔwa

²³Ɛpafras naa nyɛn mu wati dɛ nɔ ni domi o si su Yesu Kristo, o zaami hinu. ²⁴Maak, Aristakus, Dimas awa Luk gbanko zaami hinu. Ba wa min la tum Koosa tuma.

²⁵Ya kunyan Yesu Kristo kisuŋi ma.