GALESIA TIMA

GALESIA TIMA TƆN

¹Min waa, Pɔɔl, la sɔbi tɔn nɔ a nyɛ ma. Nara wa fun lisi min di mu ya nitumi, amaa Yesu Kristo awa ya kunyana Koosa naa lɛli un a li o sou ni, funɛ lisi min. ²Mu wa ya niinbisa ba naa maga nyɛn bar nɔ, zaami ya dɔŋtima ma naa maga lagmi dooni aa jɛɛmi Koosa a li Galesia pulum ni.

³Ya kunyan Koosa awa ya kunyan Yesu Kristo kisuŋi ma aa kinyɛ ma bara sɔɔna.

⁴Kristo funɛ tiŋ ya kunyan Koosa tutɔrɛ a sou ya daha, chen ni o zi kotiu a yisi ya a li lalaknɔ wu tagna saha ni. ⁵Ma nyɛ ya pɛgi Koosa naa kpak jirima kinkan hali saha naa vɛ kpak bɔ, chen daha. Ami.

Koosa Laaboor Weri Ya Kibɛgim Duŋduŋnɛ

⁶Mu funɛ nuu di ma wa tiŋ Koosa naa funɛ yir ma, awa Kristo naa suŋi ma, a vusi. Ma buru a tiŋ biksi digi lalaga. O jɛri minu kinkan. ⁷Nara bɔnɛ funɛ chɛrgi Koosa laaboor weri tiu Kristo wɛ a wa muksi ma saha maga. O laaboor weri ti ya kibɛgim duŋduŋnɛ. Digi wa bu toli. ⁸Koosa malaikasi ta digi zi wa li o tɔhɔn tiu koo min wa biksi ma laaboor weri naa kurgɛɛ a li Koosa laaboor weri naa ya piin biksi ma chen, Koosa zi na ya galimsau a ta ya yɔri. ⁹Mu funɛ te ŋɔ ma nanu. Lalaknɔ mu bur a ŋɔ mau. Nandigi biksi laaboor weri ti ka o kur a li Koosa laaboor weri naa ma fun a la nɔɔni di o ya wutirɛ, Koosa zi na o galimsau a ta un yɔri.

¹⁰Ma lisu di muu daŋni mu ya nara lɛmlɛmnɛɛ? Aai. Mu daŋni mu sɔɔni Koosa duŋduŋ tuharɛ. Mu daŋni mu ya nara lɛmlɛm, mu wa ya Kristo tumtumna.

Chenani Koosa Fun Lisi Pɔɔl O Ya O Nitumi

¹¹Mu niinbisa, mu daŋni mu ŋɔ ma wu digirɛ. Nibinsa wa fun naami laaboor weri naa mu fun biksi ma chen. ¹²Nandigi wa fun a biksi min hali tama. Yesu Kristo titi funɛ kpa un a biksi min gbampulim ni.

¹³Ma zimu di saha digi mu funɛ tiŋ Koosau a chi Ju tim ta, mu fun a muksi Yesu nitiŋɛ ta kinkan. Mu wa fun a kpak ba siki a la daŋni mu chɔk ba maga. ¹⁴Mu funɛ tiŋ chenani Ju tim ta tiŋu nɛnɛ a kaali ba naa nyuuna mak dɔŋa. Mu se funɛ sɛriu kinkan di mu wa tiŋ mu nawaalsi ta nyinbaan.

¹⁵Amaa Koosa funɛ te lisi min di mu ya o tumtumna ka ba zi lul min. O funɛ te yir a suŋi min, ¹⁶a nyɛ mu wa zim o be Yesu ti gbampulim ni, chen ni mu zi la biksi ba naa vɛ ya Ju timau o laaboor weri ti wɛ. Mu wa fun lagmi nandigi ni di o ŋɔ min chenani mu zi tum, ¹⁷amaa mu fun vaan kaali Arabia pulum. Mu wa fun la di mu la na ba naa funɛ piin ya Yesu nitumɛ ta a li Jɛrusalɛm ni. Mu funɛ nyɛn Arabia ni peti, mu fun bur a kaali Damaskus. ¹⁸Bunsa tora gantɛl ni, mu fun kaali Jɛrusalɛm di mu la na Pita, a nyɛn o wati wuzu fidanyuu, ¹⁹Yesu nitumɛ ta maga ni, mu funɛ pu Jems naa ya ya kunyan ti niinbe, duŋduŋnɛ.

²⁰Chenani mu sɔbi nan ya wutirɛ. Koosa ya mu sɛhɛra tiina mu wara suni wɛ.

²¹Mu funɛ li Jɛrusalɛm ni, mu fun gba Siiriya pulum awa Silisia pulum. ²²Chen saha ti maga, Yesu nitiŋɛ ba naa nyɛn Judia pulum ni, wa fun pu min. ²³Ba funɛ nu di mu ya naa funɛ nyɛ ba namsi kinkan a la daŋni mu dusi Koosa laaboor weri ti a ta, ba fun ŋɔ dɔŋ ni, “Baŋa ya baal nɔ burgi a suŋi ya nan?” ²⁴Ba fun a pɛgi Koosa mu daha.

Pɔɔl Awa Nitumɛ Fun Bɔni Koosa Tuma

¹Bun fidanaasi gantɛl ni, min, Barnabas awa Taitus fun bur a kaali Jɛrusalɛm. ²Koosa titi funɛ biksi min di ya la dooni. Ya wa Yesu nitiŋɛ ba naa nyɛn dooni, nihɛɛta fun wa lagmi dɔŋ ni ya duŋduŋ. Mu fun ŋɔ ba chenani mu fun biksi ba naa vɛ ya Ju tima Koosa laaboor weri ti wɛ. Mu wara daŋni ba lisi di tum naa mu tum a nyɛ Koosa ni chen ya yɔrirɛ. ³Taitus naa funɛ nyɛn mu wati, funɛ ya Girik timwa, amaa ba wa fun muksi un di ba teŋ un. ⁴Nara ba naa funɛ ŋɔ di ba ya Yesu nitiŋɛwa, bɔnɛ funɛ daŋni di ba teŋ un, amaa ba funɛ suniu. Ba fun a sogli a zu di ba na chenani ya tiŋ Yesu a ta nyɛ ba teŋsi ya, domi ya wa Yesu Kristo ya nibɛgimnɛ. Ba daŋni ya burgi ba yosiwa. ⁵Ya wa ba wa fun la nɔɔni hali tama, chen ni ya zi kotiu a kpak Koosa laaboor weri naa ma piin nu wuti.

⁶Ba naa funɛ chi nihɛɛti ta dooni fun la nɔɔni di chenani mu biksi ba naa vɛ ya Ju tima ya wutirɛ. Ba wa fun kpa biksi digi a gbaari mu biksi ti ni. Mu baga wa fun to di ba wa ya nihɛɛti ta koo ba laata. Koosa wara di ya sɛria a li ya bara nɛɛ. ⁷Ba funɛ zimu di Koosa funɛ kpa o laaboor weri ti a du mu nin ni a nyɛ ba naa vɛ ya Ju tim ni. O gbanko funɛ kpa o laaboor weri ti a du Pita nin ni a nyɛ ba naa ya Ju tim ni. ⁸Koosa fun kpa o kpok ti a nyɛ Pita ni di o ya o nitumi a la biksi ba naa ya Ju tima. Koosa gbanko funɛ kpa o kpok ti a nyɛ min di mu ya o nitumi a la biksi ba naa vɛ ya Ju tima. ⁹Jems, Pita awa Jɔn ba naa chi nihɛɛti ta, funɛ zimu di Koosa suŋi minu di muu tum o tuma chen ni, ba fun la nɔɔni di ya wa ba ya nibɛgimnɛ. Ba wa ya gbanko fun la nɔɔniu di ba zi la biksi ba naa ya Ju timau. Ya ka zi la biksi ba naa vɛ ya Ju timau. ¹⁰Ba gbanko fun ŋɔ ya di ya suŋi fara tima ba naa ya Yesu nitiŋɛ ta a nyɛn doon pulum ti ni. Mu piin kpak unu mu bambi ni di ya ya chen. Ya wa ba funɛ sɛm peti, ya fun li dooni a kaali Antiɔk.

Pɔɔl Fun Zulimi Pita Antiɔk Ni

¹¹Wuzu bilɛ Pita fun wa dooni. O funɛ nyɛn doon chene, mu fun a fiksi un gbampulim ni di mu na o galimsau. ¹²Pita wa o dɔŋtima ba naa vɛ ya Ju tima, bɔnɛ funɛ te lagmi dɔŋ ni di ba di diwe. Amaa ba naa Jems fun tum, bɔnɛ funɛ wa, Pita wa ba wa fun bu lagmi dɔŋ ni a di diwe. Ba naa Jems fun tum chen la daŋni ba teŋsi Yesu nitiŋɛ ba naa vɛ ya Ju tima chen. ¹³Ba dɔŋtima ba naa funɛ ka a ya Ju tim ta, funɛ na chenani Pita fun tumu, ba tiŋ un. Hali Barnabas wa o dɔŋtima ba naa vɛ ya Ju tima, fun vɛ di o wa ba wa zi lagmi a di diwe. ¹⁴Mu funɛ na ka ba vɛ tiŋ chenani Koosa laaboor weri ti biksi ya wuti, mu fun ŋɔ Pita ni ba maga suwachak ni, “I ya Ju tima, amaa i nyɛnu a chi ba naa vɛ ya Ju tima. Yɛrɛ ii daŋni i muksi ba naa vɛ ya Ju tima di ba nyɛn a chi Ju tim nyɛnɛɛ?”

Kin Naa Nyɛ Koosa Vɛ Na Nibine Galimsa

¹⁵Ba funɛ lul ya bɔnɛ Ju timwa. Ba wa fun lul ya ba naa vɛ ya Ju tima watɛɛ. Ju tim ta yir ba tum tagna nitumɛwa. ¹⁶Ya zimu di nar tiŋ Koosa chiksɛ ta duŋduŋ, chen tiina ha zi vɛɛn kpak galimsau o wati, amaa nar nyɛ o si su Yesu Kristo, Koosa wa zi bu na o galimsa. Ya se su Yesu Kristo. Ya wara tiŋ Koosa chiksɛ ta duŋduŋ. Chendaha o wa bu na ya galimsa. ¹⁷Lalaknɔ Koosa wa bu na ya galimsa, domi ya wa Kristo ya nibɛgimnɛ, chen biksi nara di ya funɛ te kpak galimsau o wati a la tum tum tagna. Chen gbanko biksi di ya Ju tim ta funɛ te kpak galimsau Koosa wati a la tum tum tagna, a chi ba naa vɛ ya Ju tima. Chen biksi di Kristo nyɛ ya tum tagna nitumɛɛ? Aai. ¹⁸Amaa mu bu biksi di nar tiŋ Koosa chiksɛ ta duŋduŋ di Koosa wa zi bu na o galimsa, chen biksi di mu chɔk o chiksɛ tawa. ¹⁹Mu tiŋ o chiksɛ ta duŋduŋ, mu wa kikoti a tiŋ a a peti, a na galimsa o wati. Mu wa bu tiŋ chen. Lalaknɔ mu nyɛn a nyɛ Koosa nɛɛ. O chi mu wa Kristo sowɛɛ a li o daakakli ti ni, ²⁰chen ni mu wa zi bu nyɛn, amaa Kristo kinyɛn min ni. Mu si su Koosa be naa la daŋni min a fun sou mu daha. Chene muu tiŋ lalaknɔ. ²¹Mu wara tɔ Koosa suŋi nyinbaan. Nar ka tiŋ Koosa chiksɛ ta duŋduŋ, chen ni Koosa wa zi bu na o galimsa, chen biksi di Kristo sou funɛ ya yɔrirɛ.

Koosa Chiksɛ Awa Ya Yesu Se Suuli Wɛ

¹Ma Galesia tima ya womniwa. Anti kpa o kpok a du ma ni di ma gil Koosa wuti nyinbaan? Ya wa fun wa biksi ma gbampulim ni chenani Yesu Kristo fun sou a li o daakakli ti nii? Ma wa fun la nɔɔni di ya sɛm ta ya wutirɛɛ? ²Mu daŋni mu pɛɛsi ma wu digirɛ. Koosa funɛ kpa o siim weri ti a nyɛ ma, ma funɛ tiŋ o chiksɛ ta hali a wa petiu koo ma funɛ nu o laaboor weri tiu a nyɛ ma se su unn? ³Ma ya womniwa kinkan. Ma funɛ te tiŋ a li Koosa siim weri ti kpok ni, amaa lalaknɔ maa daŋni ma tiŋu a li ma titi kpok ni hali a wa peti. ⁴Ma namsi maga ya yɔrirɛ ma watii? Mu kpak bambi di o wa ya yɔri. ⁵Koosa kpa o siim weri ti a tum tum zene a nyɛ ma, o ya chenu domi maa tiŋ o chiksɛwa hali a wa peti koo domi ma funɛ nu o laaboor weri ti a nyɛ ma se su unn?

⁶Ba fun a sɔbi a li Koosa sɛm tɔn ti ni a ŋɔ Abraham wɛ,

“O si funɛ su Koosa.

Chendaha Koosa wa fun na o galimsa o wati.”

⁷O lawa ma wa zimu di ba naa se su Koosa ya Abraham wuti bi lulɛwa. ⁸Koosa funɛ te biksi ba naa funɛ sɔbi a li o sɛm tɔn ti ni di o wa zi bu na ba naa vɛ ya Ju tima galimsa o suwachak ni, domi ba se zi wa su unu. Abraham funɛ te nu nan laaboor weri nɔ di,

“Koosa zi suŋi ba naa maga nyɛn tɛɛnɛ nɔ maga niu a chi nan o daha.”

⁹Abraham si funɛ su Koosa. Chendaha Koosa fun suŋi un chen. Ba naa maga se su Koosa, o zi suŋi bau a chi chenani o fun a suŋi Abraham chen.

¹⁰Ba naa la nyini Koosa chiksɛ ta tiŋi se ni aa tiŋ a nɔ, Koosa zi ŋɔ nɔu a nyɛ ba. Ba fun a sɔbi a li o sɛm tɔn ti ni a ŋɔ,

“Nar tim Koosa chiksɛ hali a wa peti a chel,

Koosa zi ŋɔ nɔu a nyɛ un.”

¹¹Ya zimu nɛnɛ di nar tiŋ Koosa chiksɛ ta duŋduŋ, Koosa ha zi vɛɛn na o galimsau. Ba fun a bukoo sɔbi a li Koosa sɛm tɔn ti ni,

“O wa zi bu na ba naa se su un galimsa,

a kpa o mi fali ti a nyɛ ba.”

¹²Amaa nibine naa la tiŋ Koosa chiksɛ ta, wa nyɛ o si su un. Ba fun bukoo sɔbi a li o sɛm tɔn ti ni,

“Nibine naa la tiŋ Koosa chiksɛ ta hali a wa peti,

Koosa zi kpa o mi fali tiu a nyɛ un o tiŋi ti daha.”

¹³Kristo funɛ sou, waa funɛ chiŋi doonani Koosa kaa ŋɔ nɔ a nyɛ ya bar chiŋi ni a la ya nyuuna a nyɛ ya. Ba fun bukoo sɔbi a li o sɛm tɔn ti ni a ŋɔ,

“Koosa zi ŋɔ nɔu a nyɛ naa ba yisi a tɛ daakakli ti ni.”

¹⁴Yesu Kristo fun la ya nyuuna a nyɛ ya nan ni, chen ni Koosa wa zi koti a na ba naa vɛ ya Ju tima galimsa o suwachak ni o daha. Chene o fun vɔu a nyɛ Abraham ni. Ya se su Yesu Kristo. Chendaha Koosa fun kpa o siim weri ti a du ya ni a chi chenani o fun vɔu di o nyɛ ya chen.

Chenani Koosa Fun Vɔu A Nyɛ Abraham Ni

¹⁵Mu niinbisa, mu daŋni mu ŋɔ mau a li ya nyɛni ni. Ma zim di nara balɛ ya nɔ bɛgim a la nɔɔni dɔŋ ni, nandigi wa kikoti a chɔk un koo ma gbaari. ¹⁶Ba fun bukoo sɔbi a li Koosa sɛm tɔn ti ni a ŋɔ,

“Koosa funɛ kpa o vɔwe a nyɛ Abraham awa o be luli ni.”

Ba wa fun sɔbi di o kpa a a nyɛ Abraham awa o bi lulɛ ni. O mun ya di o funɛ kpa a a nyɛ nibin bɛgim duŋduŋ nɛɛ. Chen tiina ya Kristo. ¹⁷Mu daŋni mu ŋɔ mau di Koosa awa Abraham funɛ ya nɔ bɛgimnɛ, ka Koosa fun vɔu di o zi dɛɛsi unu. Bun kɔksa naasi awa fumtora gantɛl ni, Koosa funɛ kpa o chiksɛ ta a nyɛ Mosis ni. A wa fun koti a chɔk chenani Koosa wa Abraham fun ya nɔ bɛgim awa o vɔwi ti. ¹⁸Nara la chenani Koosa fun vɔu chen domi ba waa la tiŋ o chiksɛ ta duŋduŋ, chen la zi chɔk o vɔwi naa o nyɛ Abraham ni a nyɛ o ya yɔri.

¹⁹Yɛrɛ Koosa fun kpa o chiksɛ ta a nyɛ Mosis ni a gbaari o vɔwi naa o fun piin kpa a nyɛ Abraham ni? Koosa funɛ ya chene, chen ni nibinsa zi zimu chenani tum tagna duu, hali saha naa Abraham be luli naa Koosa fun vɔu di o tum, fun wa. Koosa funɛ kpa o chiksɛ ta a nyɛ nara ni, o funɛ te kpa a a nyɛ o malaikasi ta nɛɛ. Ba fun a kpa a a nyɛ Mosis ni o ka fun kpa a a nyɛ nara ni. ²⁰Amaa Koosa funɛ kpa o vɔwi ti a nyɛ Abraham ni, o wa fun te kpa un a nyɛ malaikasi ta koo nandigi ni.

Kin Naa Nyɛ Koosa Fun Nyɛ Nara O Chiksɛ

²¹Koosa chiksɛ ta awa o vɔwi ti yo dɔŋwaa? Aai. O chiksɛ ta fu nyɛ o koti a kpa o mi fali ti a nyɛ nibinsa ni, o fu wa zi na ba galimsa ba chiksɛ ta tiŋi daha. ²²Ba fun a sɔbi a li Koosa sɛm tɔn ti ni di tɛɛnɛ nɔ tim maga na galimsa ba tum tagna daha. Chendaha ba naa se su Yesu Kristo, la Koosa papaha naa o fun vɔu a nyɛ Abraham ni chen.

²³O chi Koosa chiksɛ ta funɛ te kpak ya wa tum tagna a tɔ dɛ hali Koosa fun wa biksi ya chenani ya se zi su Yesu. ²⁴Amaa Yesu Kristo funɛ wa, chiksɛ ta wa bur a il ya. Waa funɛ nyɛ ya se su un, chen ni Koosa wa zi bu na ya galimsa. ²⁵Lalaknɔ ya se su Yesu, waa ya ya kunyana. Koosa chiksɛ ta wa bu ya ya kunyana.

²⁶Chenani ma se su Yesu Kristo nyɛ ma ya Koosa bisa. ²⁷Lalaknɔ ma wa Yesu Kristo ya nibɛgimnɛ. Ma funɛ burgi chenani o duu. ²⁸Ma naa ya Ju tima awa ma naa vɛ ya Ju tima, ma naa ya yosa awa ma naa vɛ ya yosa, ma nibaala awa ma nihaana, ma maga ya nibɛgimnɛ, domi ma wa Yesu Kristo ya nibɛgimnɛ. ²⁹Kristo dɔ ma. Chendaha ma zi na kin naa maga Koosa fun vɔu a nyɛ Abraham bi lulɛ ni chenu.

¹Mu daŋni mu ŋɔ mau a gbaari. Bichɛla naa la zi wa dɔ o nyan kina, o nyana yaa fun a dɛɛsi unu a chi yoma. ²O nyan ti zi nyɛ nara kiil unu, hali saha naa o zi wa dɔ o nyan ti kina maga. ³Chen vɛɛna, wu damata awa chiksɛ funɛ te dɔ ya a nyɛ ya burgi a yosa ka ya zi wa zim Yesu Kristo. ⁴Amaa o saha funɛ wa tel, Koosa fun tum o titi be tɛɛnɛ nɔ maga ni. Nihaan digi funɛ lul o be. O fun bi aa tiŋ Koosa chiksɛ ta. ⁵O funɛ ya chene di o la nara ba naa chiksɛ ta dɔ, nyuuna a nyɛ ba, chen ni Koosa zi kotiu a kpa ba a burgi o titi bisa.

⁶Ma ya o bisiwa. Chendaha Koosa fun kpa o be siim weri ti a du ma bambe ni. Chen siim weri ti nyɛ ma yir Koosa ma kunyana. ⁷Lalaknɔ ma wa bu ya yosa, amaa ma ya Koosa bisiwa. Chendaha o zi kpa o kin nawara maga o fun vɔu chen a nyɛ mau.

O Fun Muksi Pɔɔl Kinkan Ba Daha

⁸Saha digi ma wa fun zim Koosa. Ma waa funɛ zaami a tiŋ kin naa chi a ya Koosarɛ. A wa ya Koosa hali tama. ⁹Lalaknɔ ma zim Koosa a ya o bisa ka o zim ma, yɛrɛ maa daŋni ma bur aa tiŋ chiina awa chiksɛ? Ma bur a daŋni ma ya a yosiwaa? ¹⁰Ma waa funɛ lisi pɛn bɔnɛ awa bun bɔnɛ a di ma wuzu zene a ni. ¹¹O muksi minu kinkan ma daha. Tum naa mu fun tum a nyɛ ma, chen ya yɔrirɛɛ?

¹²Mu niinbisa, mu sumi mau di maa tiŋ a chi chenani muu tiŋ chen. Mu funɛ nyɛn ma wati, mu fun burgi a chi chenani ma du. Ma fun la min du nɛnɛ. ¹³Ma zimu di mu funɛ te wa biksi ma Koosa laaboor weri ti wɛ, mu bara wa fun lɛm. ¹⁴Mu wichɔɔrta fu zi duŋni mau wati, amaa ma wa fun vɛ min. Ma waa ka funɛ nyini min a chi mu ya Koosa malaikasi ta digi. Hali a vɛɛn chi mu ya Yesu Kristo titi. ¹⁵Ma tusa funɛ sɔɔni kinkan. Hali ma kpa ma bambe a nyɛ min. Baŋa ya? ¹⁶Mu funɛ biksi ma wa wuti ni. Chen nyɛ mu ya ma dɔm lalaknɔɔ?

¹⁷Nusun nibiksɛ tima kpak se sɛm di ba purigi ma a li min ni, chen ni ma zi vɛ mu biksi tiu aa tiŋ ba. ¹⁸O weru wa nar kpak si sɛmu wa wu were ni saha maga. Mu nyɛn ma wati koo mu wa to ma wati, chen ya wutirɛ. ¹⁹Mu bi daŋnɛ, mu chi nihaan naa la daŋni lulirɛ aa la wi ma daha. Mu daŋni kinkan di Kristo wa nyɛn ma ni hali o wa peti. ²⁰Mu gbanko daŋniu kinkan di mu wa nyɛn ma wati, chen ni mu zi kotiu a zim chenani mu zi wa nɔ ma. O muksi minu kinkan ma daha.

Chenani Hega Awa Sara Fun Biksi Ya

²¹Ma naa la daŋni di Koosa chiksɛ ta dɔ ma, maa lisi chenani a biksi ma. ²²Ya karimɛu a li Koosa sɛm tɔn ti ni di Abraham funɛ kpak bisa lɛwa. Yoma naa ba funɛ yir Hega chen, lul digi. Naa ka funɛ vɛ ya yom chen, lul digi. ²³Koosa funɛ vɔu vɔwiu a nyɛ naa vɛ ya yoma chen di o zi lul beu, amaa o wa fun vɔu vɔwi di yom ti zi lulu. ²⁴Nan la biksi ya wu digi. Saha digi Koosa awa Ju tim ta funɛ te ya nɔ bɛgimnɛ a li bi naa ba yir Sainai a li Arabia pulum ni. Nihaan naa funɛ ya yoma, o chi chenani ba fun ya dooni chene. Ba naa maga tiŋ chenani Koosa awa o nara fun ya chen wuzu ti, ba chi yosiwa. ²⁵Hega gbanko funɛ chi Ju tima ba naa Koosa chiksɛ ta dɔrɛ. Ba funɛ yir ba tɔ zen Jɛrusalɛm. Chendaha ba ya yosa, ²⁶amaa nihaan naa funɛ vɛ ya yom chen, o chi Jɛrusalɛm naa nyɛn Koosa tɔhɔn ti ni chene. Ya waa ya o bisa. ²⁷Ba funɛ sɔbiu a li Koosa sɛm tɔn ti ni a ŋɔ,

“Nihabari naa vɛ na wiili a lul be,

nyɛ i tuha sɔɔni hali a la gali.

Naa baal funɛ duŋni un,

waa la zi lul a kaali naa kpak baal.”

²⁸Mu niinbisa, ma waa ya Koosa bisa a chi chenani o fun vɔu chen. Nihaan naa vɛ ya yoma, funɛ lul be Koosa vɔwi ti daha. Ba funɛ yir un Aizik. ²⁹Chen saha ti yom ti be funɛ muksi naa vɛ ya yom chen be kinkannɛ, domi o funɛ lul un Koosa siim weri kpok ti daharɛ. Hali wa zinan, ba naa Koosa chiksɛ ta dɔ muksi ba naa la tiŋ Koosa o siim weri kpok ti daharɛ. ³⁰Ba fun bukoo sɔbi a li Koosa sɛm tɔn ti ni a ŋɔ,

“Nihaan yom ti be awa naa vɛ ya yom chen be wa zi bɔni ba nyana kina.

Chendaha ma duŋni nihaan yom ti awa o be ti a ta.”

³¹Mu niinbisa, ya zimu di ya wa ya naa vɛ ya yom chen bi lulɛwa. Ya waa ka ya nihaan yom ti bi lulɛ.

Kristo Funɛ Yisi Ma A Li Ma Yosi Ni

¹Kristo funɛ lisi yau a li yosi ni. Maa kpak chen nɛnɛ, a ta bu nyɛ nara kpak ma a ya yosa.

²Ma nu mu sɛma. N waa, Pɔɔl, la ŋɔ ma di ma nyɛ nusun nibiksɛ nama teŋsi ma, Kristo ya yɔrirɛ ma wati. ³Mu bukoo ŋɔ mau di nandigi nyɛ ba teŋsi un, o lawa o bur a tiŋ Koosa chiksɛ maga hali a wa peti. ⁴Ma naa la kpaŋi ma titi di maa tiŋ Koosa chiksɛ ta, chen ni o wa zi bu na ma galimsa, ma waa la vɛ Kristo. Chendaha Koosa vɛ koti a suŋi ma hali tama. ⁵Ya titi kpak bambi bɛgim di wuzu digi Koosa wa zi bu na ya galimsa hali o wa peti. O funɛ kpa o siim weri kpok tiu a du ya ni di ya se su un. Chendaha ya koti a pɔ Koosa di o wa ya chen. ⁶Domi ya wa Kristo ya nibɛgimnɛ, Koosa baga wa to di nara teŋsi yau koo ba wa teŋsi. Amaa o ka daŋni kinkannɛ di ya se su un, chen ni ya zi daŋni dɔŋau.

⁷Ma funɛ tiŋ Koosa nyinbaanu nɛnɛ. Lalaknɔ ma nyɛ nusun nibiksɛ nama wa nyɛ ma buru a li o wuti ti tiŋi ni. ⁸Koosa naa funɛ yir ma, wa ya chen. ⁹Nandigi fun ŋɔ di ma kpa luri tama a du boroboro damata ni, o maga zi fuusiu. ¹⁰Domi ya wa ya kunyan ti ya nibɛgimnɛ, mu kpak bambiu di ma zi tiŋ mu sɛmau. Mu gbanko kpak bambiu di Koosa zi wa na ba naa la muksi ma galimsau a ta ba yɔri. Hali chenani ba mak.

¹¹Mu niinbisa, mu biksi di o lawa ba teŋsi ba naa la tiŋ Yesu, yɛrɛ Ju tim ta ha vɛɛn a muksi min kinkan? Mu biksi nara nan ni, ba wa zi muksi min. Mu zi kotiu a biksi nara di Kristo funɛ sou a li o daakakli ti ni a ta na muksi. ¹²Hali mu daŋni kinkan di ba naa la muksi ma, zi ya ba titi namugilisau.

¹³Mu niinbisa, Koosa funɛ yir ma di ma ta ya yosa. Amaa lalaknɔ o yisɛ mau, ma ta bu tiŋ ma titi daŋnɛ. Ma ka daŋni dɔŋa a kisuŋi dɔŋa. ¹⁴Koosa chiksɛ ta digi ya a koora a biksi ya di,

“Maa daŋni ma dɔŋtima a chi chenani maa daŋni ma titi.”

¹⁵Ma yaa na paan a du dɔŋ ni a la di dɔŋa wa amɔrɛ, ma doso. Wuzu digi ma zi wa chɔk dɔŋau.

Koosa Siim Weri Yo Ya Tutɔ Daŋnɛ

¹⁶Maa nu mu sɛma. Ma ta tiŋ ma titi daŋnɛ ta, amaa ma nyɛ Koosa siim weri ti kpa o kpok ti a nyɛ ma ma tiŋ un nɛnɛ. ¹⁷Ma tutɔ la yo chenani Koosa siim weri ti daŋni maa tiŋ. Chenani o siim weri ti daŋni ma nyɛn yo ma tutɔ daŋnɛ tau. O siim weri ti awa ma tutɔ daŋnɛ ya dɔmawa. Chendaha o bɔm ma wati di ma tum chenani maa daŋni. ¹⁸Koosa siim weri ti ya ma nyuhu tiina, Koosa chiksɛ ta wa bu ya ma nyuhu tiina.

¹⁹Ma zim chenani nara titi daŋnɛ duu. Saha maga baa tum sakaal tumwa awa chɔkumsi tuma. ²⁰Ba yaa nyɛ vursiwa jirimarɛ a la tum hiti tuma. Ba yaa ha dɔŋwa a la di dɔŋa wa amɔrɛ a na paan a du dɔŋ ni a kpak handɔta wa dɔŋa a ya se tima. Ba purigi dɔŋwa, ²¹a nyɔ sin a dɛɛsi a lagmi a di diwe kinkan a la tum tum tagna kinkan. Mu funɛ te tɛ ma ninu kin nama daha. Mu bukoo tɛ ba naa la tum tuma a chi nan ninu di ba wa zi wa zu Koosa koor ti.

²²Amaa Koosa siim weri ti ka nyɛn ma ni, o zi nyɛ maa daŋni dɔŋau a kinyɛ ma tu sɔɔna awa bara sɔɔna saha maga. O zi nyɛ ma kpak kanyitau a tum tum were a nyɛ nara ni a ya nibin were a ya wuti tima, ²³a ya jɛrgɛ tima, aa ya bambe tima. Ma nyɛ o suŋi ma di ma nyɛn nan, nandigi wa fun sɔbi chiksɛ di ma gil tum were na maga. ²⁴Ba naa Yesu Kristo dɔ, ba funɛ kpa ba titi daŋnɛu a ta. ²⁵Koosa siim weri ti funɛ kpa o mi fali ti a nyɛ ya. Chendaha o lawa ya gbanko nyɛ o kpa o kpok tiu a nyɛ ya yaa tiŋ un nɛnɛ. ²⁶Ya ta daŋni sɔna a daŋni bara bora aa kidi handɔta a du dɔŋ ni.

Maa Suŋi Dɔŋa A Li Ma Tuma Maga Ni

¹Mu niinbisa, ma nidigi tum tum tagin, ma naa la tiŋ ya kunyan ti nɛnɛ ya jɛrgi o wati a kpaŋi a burgi o nyuha. Maa doso a ta cheli o chi un. ²Maa suŋi dɔŋa a li ma tuma maga ni. Ma ya chen, ma zi tiŋ chenani Kristo fun a biksi yau. ³Nar lisee di o ya nibin zenne a vɛ yaali, o mur o titirɛ. ⁴Maa zaamsi ma titi chenani maa tiŋ saha maga. Maa tiŋ nɛnɛ, chen weru. Ma ta kpa chenani maa tiŋi awa ma dɔŋtima tiŋi a lagmi dɔŋ ni a ŋɔ di maa tiŋu nɛnɛ. ⁵Nibine maga dɔ ba titi tumwa Koosa wati.

⁶Naa funɛ nu Koosa laaboor weri ti Kristo wɛ, o wa o nibiksɛ bɔni o kina.

⁷Ma ta mur ma titi. Nandigi wa kikoti a nyɛ Koosa ya wom. Chenani nibine tum, a zi bur wa o watiu. ⁸O tiŋ o titi daŋnɛ, a zi bur wa o watiu a chɔk un. O ka tiŋ chenani Koosa siim weri ti daŋni, a zi bur wa o watiu. Waa la zi kpa o mi fali naa vɛ kpak bɔ a nyɛ un hali o wa peti. ⁹Ma ta nyɛ ya tum tum were a kuuli. Ya kpak chen nɛnɛ, Koosa zi bɔ ya ya chimu. ¹⁰Ma nyɛ ya dɛu nyinbaan aa suŋi nara maga. O lawa ya te a suŋi ya dɔŋtima ba naa se su ya kunyan tiu.

Pɔɔl Mak O Tɔn Nɔ Bar Nɔwa

¹¹Ma na chenani kisɔbɛ naa zene mu titi sɔbi bar nɔ nan. ¹²Ba naa la daŋni sɔna nara suwachak ni, ba waa la daŋni ba muksi ma di ba teŋsi ma. Ba daŋni ba teŋsi ma chene, chen ni nandigi wa zi nyɛ ba na namsi. Ba wa la nɔɔni di chenani ma se su Kristo naa funɛ sou a li o daakakli ti ni, magu. ¹³Hali ba naa teŋsee tiŋ Koosa chiksɛ ta a chel. Ba daŋni ba teŋsi ma, chen ni ma waa la zi ya ba jirima nara. ¹⁴Mu daha, chenani ya kunyana Yesu Kristo fun sou a li o daakakli ti ni chen, chen ya mu jirima kin. Chendaha mu wa fun bukoo tiŋ chenani tɛɛnɛ nɔ tim maga tiŋ. Mu funɛ vɛ ba nyinbaanu. ¹⁵Koosa baga wa to di nara teŋsi dɔŋa koo ba wa teŋsi. O baga ka nyɛnu di o kɔɔri ma ma ya nibin falɛ. ¹⁶Ba naa maga la lisi nan, Koosa zi kpak ba sikiu a kinyɛ ba bara sɔɔna. Ba waa ya Ju tima ba naa Koosa dɔ wuti ni.

¹⁷Mu kpak funfukniwa mu bara ni. A wa biksi nara di mu ya Yesu tumtumnɛ. Chendaha nandigi ta bu gbaari mu namsi nɔ ni.

¹⁸Mu niinbisa, ya kunyan Yesu Kristo kisuŋi ma maga. Ami.