ƐFƐSUS TIMA

ƐFƐSUS TIMA TƆN

¹Min waa, Pɔɔl, naa Koosa fun lisi di mu ya Yesu Kristo nitumi, mu la sɔbi tɔn nɔ a nyɛ Koosa nara ma naa nyɛn Ɛfɛsus ni.

Ma gbanko la tiŋ Yesu Kristo nɛnɛ.

²Ya kunyan Koosa awa ya kunyan Yesu Kristo kisuŋi ma aa kinyɛ ma bara sɔɔna.

Chenani Koosa Fun Nyɛ Kristo Suŋi Ya

³Koosa naa ya ya kunyan Yesu Kristo nyana, waa funɛ kpa o papaha a naa nyɛn ya wa un bambaan ni a nyɛ ya, domi ya wa Yesu Kristo ya nibɛgimnɛ. Ma nyɛ ya pɛgi Koosa chenani o fun tum chen ni. ⁴O fun te lisi ya a nyɛ o titi ni Yesu Kristo daha ka o fun a naami tɛɛnɛ nɔ maga, chen ni ya zi kotiu a ya bambi chaan tima ba naa o vɛ na ba galimsa o suwachak ni.

⁵Domi o la daŋni ya daha, o fun piin ya o tutɔ chen saha ti o nyɛ ya burgi o bisa Yesu Kristo daha. Chen nyɛ o tuha sɔɔni kinkan. ⁶Koosa funɛ suŋi yau a kaali chenani o daŋni. Ma nyɛ ya pɛgi un o funɛ kpa o be daŋni a nyɛ ya yɔri chen. ⁷Yesu Kristo funɛ sou ya daharɛ, chen ni o zi kotiu a la ya nyuuna a nyɛ ya a gil ya tum tagna a nyɛ ya. Yɛrɛ o zen mak Koosa suŋi ya, ⁸a kaali kina maga. A li o zima ni kinkan, ⁹o funɛ lisiu saha digi di o zi kpa Yesu Kristou a tum o tuma hali o wa peti.

O fun a tiŋ o tutɔ ti a biksi ya o wu sogle nama wɛ. ¹⁰Saha naa o fun lisi chen wa tel, o zi lagmi kin nawara maga o fun a naamiu, buudaha kina awa tɛɛnɛ nɔ maga kina, a nyɛ Yesu Kristo di a maga koora.

¹¹Koosa tiŋ o tutɔrɛ a li o tum maga ni. O fun te lisi ya a nyɛ o titi ni, a zi naami tɛɛnɛ nɔ maga, chen ni ya wa Yesu Kristo zi ya nibɛgimu. ¹²Ma nyɛ ya naa te kpak bambi bɛgim Yesu Kristo ni, pɛgi Koosa naa kpak jirima kinkan.

¹³Ba funɛ wa biksi ma Koosa laaboor weri naa ya wuti wɛ, ma fun a nu ba biksi ti, ka Koosa fun a yisi ma a li ma tum tagna ni ma tiŋ un. Chen saha ti ma se funɛ su Yesu Kristo. Chendaha Koosa fun kpa o siim weri naa o fun vɔu di o nyɛ ma a dani ma. ¹⁴Koosa nyɛ o siim weri tirɛ ya o purigiri bɔɔli. Chendaha ya zim di o zi la ya nyuunau a nyɛ ya hali o wa peti a chi o funɛ vɔu chen. Ma nyɛ ya pɛgi un nan daha.

Pɔɔl Fun Sumi Koosa A Nyɛ Ba

¹⁵Mu funɛ nu chenani ma se su ya kunyan Yesu awa chenani maa daŋni Koosa nara maga. ¹⁶Mu pɛgi Koosa a yaa sumi un saha maga ma daha, ¹⁷chen ni naa ya ya kunyan Yesu Kristo nyana a kpak jirima kinkan, o zi kpa o zimau a nyɛ ma a biksi ma a biksi ma o titi wɛ gbampulim ni, chen ni ma zi zim unu nɛnɛ. ¹⁸Mu sumi unu di ma lise zi la o wutiu, chen ni ma zi kpak bambi bɛgim a li chenani o fun yir ma ni a zim di kin nawara o fun vɔu di o kpa nyɛ o nara ni zenu kinkan. ¹⁹Mu gbanko sumi unu di ma zim o kpok naa o fun kpa a nyɛ ya naa se su un ni kinkan. Kpok naa ya kpak nan awa kpok kinkan, ²⁰naa o fun kpa a lɛli Yesu Kristo a li o sou ni a kansi o nihɛɛ bar kani ni a li o tɔhɔn ti ni, ya kibɛgimnɛ. ²¹Yesu Kristo nyɛn dooni lalaknɔ a dɔ siim kpoka awa kpok maga a naa nyɛn Koosa tɔhɔn ti ni awa tɛɛnɛ nɔ maga ni awa tɛɛnɛ nɔ naa la wa nan ni. ²²Koosa funɛ nyɛ o ya kina maga koora awa ba naa tiŋ un nyuhu tiina. ²³Ba waa chi o bara. Waa la su kina maga, amaa see ba wa gbaariu a su a peti.

Koosa Piin Nyɛ Ya O Mi Faliu

¹Saha digi ma yaa funɛ tum tum tagniwa a vɛ tiŋ Koosa nɔ. Ma funɛ chi nisitɛwa. ²Ma yaa funɛ tiŋ tɛɛnɛ nɔ maga nyinbaan taginnɛ awa siim tagna koora. Waa dɔ tɛɛnɛ nɔ tima ba naa maga vɛ tiŋ Koosa nɔ. ³Saha digi ya maga funɛ tiŋ chene. Lise tagna a naa funɛ nyɛn ya bambe ni awa ya titi daŋnɛ nyɛ ya yaa funɛ tum tum tagna damata. Chendaha Koosa fun na paan a du ya ni. Chenani o funɛ daŋni di o wa lɛrgi ya diŋsa awa tɛɛnɛ nɔ tim maga diŋsa funɛ ya kibɛgimnɛ.

⁴Amaa Koosa daŋni ya kinkan a kpak ya siki hali a kaali a maga, ⁵a fun wa na ya ka ya yaa chi nisitɛ ya tum tagni ta daha. O fun yisi ya a li ya tum tagna ni di ya tiŋ un o lɛli ya a li ya sou ni a chi chenani o fun lɛli Yesu Kristo chen. Koosa funɛ suŋi yau kinkan a la gali chen ni. ⁶O fun a lɛli Yesu Kristo a li o sou ni di o zini a zu Koosa tɔhɔn ti. Domi o funɛ nyɛ ya wa Yesu Kristo ya nibɛgimnɛ, o chi ya wa un piin nyɛn dooni. ⁷Koosa funɛ ya chen maga a nyɛ ya a biksi ba naa maga nyɛn o tɔhɔn ti ni awa ba naa nyɛn tɛɛnɛ nɔ maga ni, chenani o funɛ daŋni ya kinkan a la gali a tum Yesu Kristo di o wa suŋi ya. O biksi nɔ nyɛnu hali saha naa vɛ kpak bɔ. ⁸Koosa funɛ suŋi ma ma se su un, chen ni o zi yisi mau a li ma tum tagna ni. Ma wa kikoti a ya chen a nyɛ ma titi ni. Chenani o tum a nyɛ ma ya o papaha ti. ⁹Chendaha ma vɛ kpak nyinbaan a daŋni sɔn. ¹⁰Koosa fun nyɛ ya wa Yesu Kristo ya nibɛgim, chen ni ya zi tum tum wereu a nyɛ un. O funɛ lisi yau saha digi di ya tum nan a nyɛ un.

Ya Wa Kristo Ya Nibɛgimnɛ

¹¹Ba funɛ lul ma a li ba naa vɛ ya Ju tim nɛɛ. Ju tim ta yir ma ba naa ba vɛ teŋsi. Ba ka yir ba titi ba naa ba teŋsi. Ma lisi chenani ma fun nyɛn saha digi. ¹²Chen saha ti ma wa Yesu Kristo wa fun ya nibɛgim. Ma funɛ ya hɔɔrawa a vɛ lagmi Ju tima ba naa Koosa fun lisi a nyɛ o titi ni. Ba wa fun gur ma lagmi ba naa wa Koosa kpak nɔ bɛgim a li o vɔwɛ ta o fun kpa nyɛ ba chen. Chenani ma yaa nyɛn wuzu kam, ma wa fun zim Koosa a vɛ koti a kpak bambi bɛgim a li un ni. ¹³Ma funɛ nyɛn bar boli nee. Yesu Kristo fun sou di o kpa ma a wa dugli. ¹⁴Ju tima awa ba naa vɛ ya Ju tima wa kpak wu digi wa dɔŋ ni. O chi chechepure purige ba dɔŋ ni ba ya dɔma. Yesu Kristo funɛ sou ya daha, o chi o funɛ zak chechepure tire a lɔ a nyɛ Ju tima awa ba naa vɛ ya Ju tima ya nɔ bɛgim. ¹⁵O fun nyɛ chiksɛ naa Koosa fun nyɛ Ju tim ta ni chen peti, chen ni o zi lagmi Ju tim ta awa ba naa vɛ ya Ju tima ba burgi lul bɛgim o wati. Ba wa zi bu ya dɔma. ¹⁶Yesu Kristo funɛ sou a li o daakakli ti ni, o fun lagmi ba dɔŋ ni a nyɛ ba wa Koosa ya nɔ bɛgim. O fun kpa chenani ba fun te ha dɔŋa a yo ta. ¹⁷Yesu Kristo funɛ wa, o fun biksi nara Koosa laaboor weri naa nyɛ nibinsa kpak bara sɔɔna wɛ. O fun biksi Ju tima ba naa funɛ piin zim un. Ma naa vɛ ya Ju tima wa fun zim Koosa, Yesu Kristo funɛ biksi ma chen gbankou. ¹⁸Yesu Kristo funɛ sou a nyɛ ya chen daha, Koosa fun kpa o siim weri bɛgim a nyɛ ya naa ya Ju tima awa ma naa vɛ ya Ju tim ni. Waa nyɛ ya nyinbaan di ya wa ya kunyana Koosa suwachak.

¹⁹Ma naa vɛ ya Ju tima, wa bu ya hɔɔra. Ma wa Koosa nara lagmi dɔŋ ni a li Koosa walɛ ni. ²⁰Koosa nara chi dɛrɛ o sa. O witinsa ba naa funɛ nyɛn saha digi, awa o nitumɛ ba naa funɛ te biksi ba, ba chi dɛ ti zɛchik piilire. Yesu Kristo titi ya dɛ barmɔgli buŋkul. Lalaknɔ ma gbanko ya dɛ ti bar digirɛ. ²¹Koosa funɛ kpa ya a gbaari Yesu Kristo ni a sa dɛ ti o wer Koosa wati o nyɛn. ²²Koosa siim weri ti nyɛ ma gbaari ba naa wa Yesu Kristo ya nibɛgim ni a burgi dɛ naa Koosa nyɛn chen bar digi.

Chenani Pɔɔl Fun Tum A Nyɛ Ba Naa Vɛ Ya Ju Tim Ni

¹Chendaha muu sumi Koosa ma daha. Domi mu funɛ biksi ma naa vɛ ya Ju tima di ma tiŋ Koosa, ba fun kpak min a tɔ dɛ. ²Ma wa fun zim di Koosa funɛ kpa o kina a naa la zi suŋi ma a du mu nin nee? ³Koosa funɛ te kpa o tutɔ ti a sogli a zi kpa un a li gbampulim a biksi min. Mu funɛ piin sɔbi nan wɛu tama a nyɛ ma. ⁴Ma bukoo a karimi tɔn naa mu fun sɔbi a nyɛ ma chen, ma zi zim chenani mu zim Yesu Kristo wu sogle mun wɛu. ⁵Saha digi hali lalaknɔ Koosa wa fun biksi o wu sogle ta mun. Amaa lalaknɔ o kpa au a li gbampulim a nyɛ o siim weri ti biksi o witinsi ta awa o nitumɛ ba naa o fun lisi a nyɛ o titi ni. ⁶Ma nyɛ mu biksi ma a muna. Ba naa vɛ ya Ju tima nyɛ ba se su Koosa laaboor weri ti, ba wa Ju tim ta ya nɔ bɛgim a bɔni Koosa papaha naa o fun vɔu di o nyɛ Ju tim ta ni chen. Ba wa Yesu Kristo ya nibɛgimnɛ a zi la kin naa maga Koosa fun vɔu di o nyɛ ba naa se su Yesu Kristo ni.

⁷Koosa funɛ kpa o kpok tiu a nyɛ min di mu burgi o tumtumna a biksi nara o laaboor weri ti wɛ. O funɛ suŋi minu kinkan hali a la gali. O funɛ ya o papaharɛ. ⁸Min ya bichɛla a kaali o nara maga, amaa o funɛ lisi minnɛ di mu la biksi ba naa vɛ ya Ju tima o laaboor weri ti wɛ. O laaboor weri ti biksi ya Yesu Kristo wu were damata naa vɛ kpak peti wɛ. ⁹Koosa gbanko funɛ lisi min di mu biksi nara maga nyinbaan naa Koosa tutɔ ti tiŋ. Waa funɛ naami kina maga, a kpa o tutɔ ti a sogli o piili ni, ¹⁰a kpa a li gbampulim lalaknɔ, chen ni Koosa nitiŋɛ ta zi biksi siim kpoka awa kpok a naa maga nyɛn o tɔhɔn ti niu chenani o zima ti tum a kurgi. ¹¹Koosa funɛ tiŋ o tutɔrɛ a li o piili ti ni a kpa du ya kunyana Yesu Kristo nin ni di o tum un. ¹²Domi ya se su un ka ya wa un ya nibɛgim, ya kpak bambe a vɛ ɔmi di ya la Koosa suwachaku. ¹³Mu namsi bar nɔu ma daha, amaa mu wara daŋni ma tusa chɔk chen daha. Ma ka nyɛ mu namsi nɔ nyɛ ma jirima a nyɛ ma kpak bambe.

Chenani Kristo Daŋni Ya Hali A La Gali

¹⁴Kin nama daha muu sumi ya kunyan Koosa ma daha. ¹⁵Ba naa maga nyɛn o tɔhɔn ti ni awa ba naa se su un tɛɛnɛ nɔ maga ni, waa ya ba nyana. ¹⁶Koosa kpak jirima awa chaani kinkan. Chendaha muu sumi unu di o nyɛ o siim weri ti lisi a li o kpok ti ni a du ma bambe ni, ¹⁷chen ni Yesu Kristo zi nyɛn dooniu a gbaari ma se su un daha. O kpok ti nyɛn ma ni nɛnɛ, ma gbanko zi daŋni unu awa dɔŋ ni a gbaari, ¹⁸chen ni ma wa Koosa nara maga zi kotiu a zim chenani Yesu Kristo daŋni ya a kaali a maga. ¹⁹Mu daŋni ma wa zim chenani Yesu Kristo daŋni ya chenu. O daŋni yau hali ya vɛ koti a zim a la peti, amaa mu daŋni o daŋni ti siu ma ni, chen ni ma zi weru o chi Koosa wer chen.

²⁰Koosa kpok naa nyɛn ya ni kote a nyɛ ya tum tuma a nyɛ un a kaali chenani ya vɛ lisi a ŋɔ un di o suŋi ya ya tum. ²¹O nitiŋɛ ta wa Yesu Kristo naa ya ba nyuhu tiina, zi nyɛ un jirimau hali saha naa vɛ kpak bɔ. Ami.

Ya Chi Kristo Barawa

¹Mu waa naa ba fun tɔ dɛ ya kunyan ti daha, mu sumi mau di ma tiŋ chenani deŋlee wa ma tiŋ. Koosa funɛ yir ma di ma tiŋ chen. ²Ma ya jɛrgɛ tima a kpak dɔŋ wa kanyita saha maga. Maa suŋi dɔŋa, chen ni nara zi zimu di maa daŋni dɔŋau. ³Koosa siim weri ti funɛ nyɛ ma ya nɔ bɛgimu wa dɔŋ ni a nyɛ ma bara sɔɔna. Maa kpaŋi saha maga a kiya dɔŋa chen. ⁴Koosa siim weri ti ya nibɛgimnɛ. Ba naa maga se su Yesu, ba ya nibɛgimnɛ. Koosa gbanko funɛ lisi ma di chenani ma kpak bambi bɛgim un ni ya kibɛgimnɛ. ⁵Ya kunyan ti ya nibɛgimnɛ ka chenani ya se su un ya kibɛgim. Chenani ba kpa ni a chaksi ya, o ya kibɛgimnɛ. ⁶Koosa titi naa dɔ ya a nyɛn ya ni a nyɛ ya tum tuma a nyɛ un, o ya nibɛgimnɛ.

⁷Yesu Kristo yaa suŋi yau di ya kaa suŋi ya dɔŋtima. ⁸Ba funɛ sɔbiu a li Koosa sɛm tɔn ti ni a ŋɔ,

“Yesu Kristo funɛ nyaŋi sintana,

o wa ba naa ba fun tɔ dɛ zini a zu Koosa tɔhɔn ti.

O funɛ wa tel dooni,

o fun kpa o papaha a nyɛ o nitiŋɛ ta ni.”

⁹Nyini a na chenani ba fun sɔbi di o zini a zu Koosa tɔhɔn tiu. O mun ya di o funɛ te li doonee a tu wa di o wa nyɛn tɛɛnɛ nɔ maga ni. ¹⁰O saha funɛ wa peti tɛɛnɛ nɔ maga ni, o fun bur a zini a kaali Koosa nihɛɛ bar kani di o su kin naa maga Koosa fun naami. ¹¹O funɛ lisi a li o papaha ti ni a nyɛ o nitiŋɛ ta ni, o fun nyɛ ba bɔnɛ ŋɔ nara o wɛ, bɔnɛ nyini o nitiŋɛ ta, bɔnɛ ka biksi ba o wɛ, ¹²chen ni o nara ba naa maga chi o bara zi zimu chenani ba zi tum ba tumau a nyɛ dɔŋ ni, a kpak un nɛnɛ a gbaari. ¹³Ya se su Koosa be a gbaari a wa zim un nɛnɛ, ya maga zi kpak nɔ bɛgimu wa dɔŋ ni. Ya ya chen, ya zi mak nibaalau a burgi a chi chenani Yesu Kristo wer a peti chen. ¹⁴Saha ti wa tel, ya wa zi bu chi ba naa se vɛ su un nɛnɛ. Ba chi arŋa naa peha viigire. Nibiksɛ ba naa vɛ zim Koosa yaa wa mur ba a daŋni ba yisi ba a li wuti tiŋi nyinbaan ni. Nibiksɛ ta yaa kpak un ba bambe ni di ba tum tum tagna maga hali a wa na chenani ba daŋni. ¹⁵O lawa ya mak nibaalu, chen ni ba wa zi bu muksi ya. Yesu Kristo ya ya nyuhu tiina. Ma nyɛ yaa daŋni dɔŋa a kisɛm dɔŋa wa wuti. Ya ya chen a gbaari, ya zi chi unu. ¹⁶Ya chi o bara luk pɛksiwa. Waa nyɛ o bara kpok a li boma naa chomse ya ni. Ya maga tum nɛnɛ a la daŋni dɔŋa aa tiŋ un nɛnɛ a gbaari, o bara zi na alaafɛu.

Koosa Daŋni Ya Tum Tum Were A Nyɛ Un

¹⁷Domi ma wa ma kunyan ti ya nibɛgim daha, mu daŋni mu ŋɔ ma di ma ta nyɛni a chi ba naa vɛ zim Koosa nyɛni. Chenani ba lisi ya yɔrirɛ, ¹⁸ka ba se fun vɛ lɛli. Ba se kpoka wa fun nyɛ ba zim Koosa. Chendaha o vɛ koti a kpa o mi fali ti a nyɛ ba. ¹⁹Saha maga ba yaa tum chɔkumsi tuma awa doŋ tumwa aa ya se tima. Ba galɛ hiisa naali niu.

²⁰Chen laata ba fun biksi ma di maa tiŋ Yesu Kristo. ²¹Ba funɛ wa biksi ma o wɛ, ba funɛ ŋɔ o wuti tiu a nyɛ ma. Ma fun nu a la nɔɔni aa tiŋ un. ²²Adaha lalaknɔ ma kpa ma gantɛl tuha wɛ a ta. A waa funɛ nyɛ maa tiŋ ma tutɔ daŋnɛ a kpa ma du nyinbaan naa ma zi chɔk ni. ²³O lawa ma nyɛ Koosa kpa ma bambe liseu a burgi a kifalɛ a gbaari. ²⁴Ma suwachak tuha wɛ a naa Koosa fun kpa a nyɛ ma, a waa la zi nyɛ ma wa chi un. Koosa ya wuti tiina awa tu chaan tiina a la tum tum were saha maga.

²⁵O chi ma maga ya Yesu Kristo bara luk pɛksiwa. Chendaha ma ta suni wɛ a nyɛ dɔŋ ni. Ma ka sɛm wuti sɛma a nyɛ ma dɔŋtim ni. ²⁶Ma na paan a du nandigi ni, ma ta kpa chen a du ma tusi ni a vusi. ²⁷Ma ta nyɛ sintana wa nyinbaan o nyɛ maa tum tum tagna. ²⁸Ma ya ŋmɛɛrsa, ma gil ŋmɛɛli. Ma la di ma bara wilim ni, chen ni ma zi kotiu a lisi ma kina tuhu ni a suŋi fara tima. ²⁹Ma ta sɛm nɔ tagna a nyɛ dɔŋ ni, amaa ma nyɛ ma sɛm maga suŋi a kpami ba naa maga la nu a. ³⁰Ma vɛ tiŋ chenani mu sɛm nan, ma zi chɔk Koosa siim weri ti tuhau. Waa ya Koosa daana ma ni, hali saha naa Koosa zi wa la ma nyuuna a nyɛ ma. ³¹Ma kpa ma paan awa ma tu haasa awa chenani ma tɛsi a la zulimi dɔŋa a la chɔk dɔŋ sɔna a ta. ³²Ma ka ya jɛrgɛ nara a kpak dɔŋa wa siki saha maga. Yesu Kristo siwi daha, Koosa fun gil ma tum tagna a nyɛ ma. Chendaha ma gbanko gil a nyɛ dɔŋ ni.

Yaa Tiŋ A Chi Ba Naa Nyɛn Nha Ni Chen Tiŋ

¹Ma ya Koosa bi daŋnɛwa lalaknɔ. Ma kpak unu ma bambe ni di maa chamsi un. ²Yesu Kristo funɛ sou ya daha, chen chi chenani Ju tim ta fun kpa kin a nawara sɔɔra weree awa sela a kɔɔri kɔɔra a nyɛ Koosa ni. Yesu Kristo fun sɔɔni Koosa tuha kinkan a biksi ya di o daŋni yau. Ma nyɛ ma nara daŋni te ma suwachak a chi un.

³Ma ya Koosa narawa lalaknɔ. O wa deŋli wa maa sɛm dɔŋa sakaal tuma awa doŋ tuma a daŋni ma ya se tima wɛ. ⁴O gbanko wa wer di ma sɛm nɔ tagna awa womsi sɛma a kizɔ wa a ni. Maa ka zaami Koosa saha maga. ⁵Wuti ba naa maga la tum sakaal tuma awa doŋ tuma a la daŋni ba ya se tima wa zi su Koosa awa o be Yesu Kristo koor ti. Se tima chi nibinsa ba naa la nyɛ vursa wa jirimarɛ.

⁶Ma ta nu nara womsi sɛma a nyɛ ba mur ma. Ba wara tiŋ Koosa nɔ. Chendaha o na paan a du ba ni a zi wa lɛrgi ba diŋsa. ⁷Ma ta lagmi ba naa la sɛm chen ni. ⁸Ma funɛ vɛ te zim Koosa, ma funɛ nyɛn birsi nee, amaa lalaknɔ ma wa Yesu Kristo ya nibɛgimnɛ, ma nyɛn nha nɛɛ. Chendaha maa tiŋ a chi ba naa nyɛn nha ni chen tiŋ. ⁹Ba naa nyɛn nha ni yaa tum tum werewa a nyɛ Koosa ni saha maga a ya nibin were a la sɛm wuti sɛma. ¹⁰Ma kpak un ma bambe ni a zaamsi ma tuma a nee a zi sɔɔni ya kunyan ti tuhau. ^11-12Ma ta lagmi ba naa la tum tum yɔrisa birsi ni. Chenani ba tum a sogli nyɛ ya na hiisarɛ. Ma kpa ba tum tagna a li gbampulim, ¹³chen ni nha zi chaani a niu ka nara zim chenani ba yaa tum. ¹⁴Doonani nha nyɛn, birsa wa dugli dooni. Nandigi funɛ ŋɔ,

“Ma naa la chɔ birsi ni nan,

ma si a li ma sou ni,

chen ni Yesu Kristo zi chaani ma niu.”

¹⁵Maa doso ma nyɛni ni. Ma ta tiŋi a chi womna, amaa maa tiŋ a chi ninɛɛgɛ. ¹⁶Nidamata tum tum tagniwa lalaknɔ. Ma ka nyini nyinbaan a tum tum were saha maga. ¹⁷Ma ta chi womna, amaa ma dɛu chenani Koosa daŋni ma tum a nyɛ un.

¹⁸Ma ta nyɛ sin dɔ ma. Ma ka nyɛ Koosa siim weri ti dɔ ma. ¹⁹Maa lɔ boola naa Koosa siim weri ti nyɛ ma aa kipɛgi Koosa ma bambe ni saha maga. ²⁰Ma kunyana Koosa tum tum damatau a nyɛ ma. Chendaha maa zaami un saha maga ya kunyan Yesu Kristo sɔn daha.

Chenani Baalasa Awa Ba Haanasa Zi Lagmi Nyɛn.

²¹Ma kpa ma bambe a lagmi dɔŋ ni, chen ni ma zi nyɛ Yesu Kristo wa jirimau.

²²Nihaana, ma la nɔɔni a nyɛ ma baalasi ni a chi chenani ma la nɔɔni a du Koosa ni chen. ²³Nibaal ya o haan nyuhu tiina, a chi chenani Yesu Kristo ya o nitiŋɛ ta nyuhu tiin chen. O funɛ yisi ba a li ba tum tagna ni chen. Ba waa chi o bara. ²⁴Yesu Kristo nitiŋɛ ta la nɔɔni a nyɛ un. Chen vɛɛna, o lawa nihaana kpa chenani ba tumu a la nɔɔni a nyɛ ba baalasi ni.

²⁵Nibaala, maa daŋni ma haanasa, a chi chenani Yesu Kristo daŋni ba naa la tiŋ un. Hali o fun sou ba daha. ²⁶O chi o funɛ kpa nire a chaksi ba a fiisi ba wa Koosa sɛm ni, chen ni ba zi kotiu a tum tum were a nyɛ un. ²⁷Yesu Kristo funɛ ya chene, di wuzu digi o zi kpa ba naa kpak o jirimau a ya bambi chaan tima a ya niwere a wa Koosa suwachak. O wa zi bu na ba galimsa. ²⁸Chenani Yesu Kristo daŋni o nitiŋɛ ta, nibaala gbanko kidaŋni ba haanasa chen. Nibaal kpa haan, ba yaa burgi nibɛgimnɛ. O daŋni o haan, o yaa duuti o titirɛ o daŋni chen. ²⁹Nandigi wa ha o titi bara. O daŋni un a kidɛɛsi un. Yesu Kristo gbanko daŋni o nitiŋɛ tau a la dɛɛsi ba. ³⁰Ba chi o bara luk pɛksiwa. Chendaha o daŋni ba kinkan chen. ³¹Ba fun sɔbi a li Koosa sɛm tɔn ti ni a ŋɔ,

“O weru di nibaal gil o nyana awa o niina a kpa haan,

chen ni o wa haan ti zi ya nibɛgimu.”

³²Mu zimu di nan bɔmu wa ma zim o mun. O biksi ya di Yesu Kristo awa o nitiŋɛ ta ya nibɛgimnɛ. ³³O gbanko biksi ya di nibaala kidaŋni ba haanasa a chi chenani baa daŋni ba titi ka nihaani ta kinyɛ ba baalasa wa jirima.

O Lawa Bichɛsa Tiŋ Ba Nyama Nɔɔnau

¹Bichɛsa, o weru di maa tiŋ ma nyama awa ma numa nɔɔna. ²Saha digi Koosa funɛ kpa o chiksɛ fidalɛ a nyɛ Ju tim nawaal Mosis ni. A kidigi ya,

“Maa nyɛ ma nyama awa ma numa wa jirima.”

Chiksi nɔwa Koosa fun te a kpa gbaari vɔwi ti ni. ³O vɔwi ti funɛ ŋɔ di,

“Ma nyɛ ba jirima chen,

ma zi na alaafɛu a kpak miisa ziŋi.”

⁴Nyama awa numa, ma ta kpa tu haasa a dɛɛsi ma bisa, chen ni ba zi na paanu a du ma ni. Ma dɛɛsi ba a kibiksi ba a chi chenani Yesu Kristo fun biksi ya chen.

O Lawa Yosa Tiŋ Ba Kunyama Nɔɔnau

⁵Yosa, maa nyɛ ma kunyama wa jirima kinkan aa tiŋ ba nɔɔna ma bambe ni, a chi chenani maa tiŋ Yesu Kristo. ⁶Yosi bɔnɛ yaa tum kinkannɛ a li ba kunyan se ni. O wa kaali, ba gil. Ma ta tum a chi ba. Ma lisi di Yesu Kristo dɔ ma lalaknɔ. Ma kpak un ma bambe ni aa tum chenani o daŋni maa tum saha maga. ⁷Maa tum ma tuma awa tu sɔɔni, domi ma wa tum a nyɛ nibinsa duŋduŋnɛ. Ma tum aa nyɛ Yesu Kristo nee. ⁸Ma zimu di ma ya nibin hiise akoo ma ya yosa a tum tum were a nyɛ un, o zi wa bɔ ma chimu.

⁹Kunyama, ma lisi di ma wa ma yosa kpak kunyana bɛgimnɛ ka o nyɛn Koosa tɔhɔn ti ni. Chendaha o lawa ma dɛɛsi ba nɛnɛ a ta hɔɔsi ba. Koosa wara daŋni bɔnɛ a kaali bɔnɛ.

Ma Kpa Koosa Kpok A Nyaŋi Sintana

¹⁰Domi ma wa ya kunyan ti ya nibɛgimnɛ, ma waa kotee a na kpok a li o kpok zen ti ni. ¹¹Ma nyini o kpok naa Koosa fun kpa nyɛ ma se ni, sintana wa zi koti a wa mur ma. ¹²Ya wara daŋni ya kpa Koosa kpok nɔ a chem nara. Ya ka daŋni un ya la chem siim kpoka awa kpok damata a naa la tum tum tagna kinkan awa ba naa maga vɛ zim Koosa a nyɛn buudaha ni. ¹³Ma kpak Koosa kpok ti nɛnɛ, chen ni sintana wa wa di o wa kpak ma, ma zi koti a nyaŋi unu hali o wa peti.

¹⁴Maa il. Maa sɛm dɔŋa awa wuti a kitum tum were, ¹⁵a kisaksi aa ŋɔ nara ni Koosa laaboor weri ti wɛ saha maga. Ba nu un, Koosa zi nyɛ ba bara sɔɔnau. ¹⁶Ma nyɛ ma se su Koosa kinkan saha maga, chen ni sintana wa wa, o wa zi koti a namsi ma. ¹⁷Koosa funɛ a yisi mau a li ma tum tagna ni maa tiŋ un. Maa kpak chen nɛnɛ, a nyɛ o siim weri ti suŋi ma maa sɛm o sɛma. A waa la zi nyɛ ma nyaŋi ma dɔma. ¹⁸Maa sumi Koosa kin nama daha saha maga, chen ni o zi suŋi mau. Ma nyɛ o siim weri ti kibiksi ma chenani ma zi sumi Koosa. Ma il nɛnɛ awa kanyita kinkan ni, aa kisumi un di o suŋi o nara maga. ¹⁹Ma gbanko kisumi Koosa mu daha, di o nyɛ mu bambi kpok mu biksi nidamata o laaboor weri ti wɛ. O laaboor weri nɔwa, o fun kpa sogli hali wa zinan o kpa un a li gbampulim ni. ²⁰Hali ba fun kpak min a tɔ dɛ, mu ha vɛɛn ya Koosa laaboor weri ti nitumirɛ. O deŋlu wa mu kpak bambi a biksi ba naa nyɛn bar nɔ o wɛ a ta kpa kundɔŋ a ta gantɛl ni.

Pɔɔl Mak O Tɔn Nɔ Bar Nɔwa

²¹Mu zim di ma daŋni ma nu chenani mu duu. Chendaha mu tum Tikikus ma wati. O ya ya niinbe daŋnirɛ a la tum ya kunyan ti tuma wa wuti ni. ²²O zi ŋɔ mau chenani ya naa maga nyɛn bar nɔ duu. O sɛma zi kpami ma bambeu.

²³Ya kunyan Koosa awa ya kunyan Yesu Kristo zi suŋi mau awa ma dɔŋtima maga di ma se su ba nɛnɛ, chen ni ma zi kpak nɔ bɛgimu a kidaŋni dɔŋa kinkan. ²⁴Koosa suŋi ba naa maga la daŋni ya kunyan Yesu Kristo awa daŋni naa vɛ kpak bɔ ni.