KƆLƆSƐ TIMA

KƆLƆSƐ TIMA TƆN

¹Min, Pɔɔl, naa Koosa fun lisi di mu burgi Yesu Kristo nitumi, la sɔbi tɔn nɔ a nyɛ ma.

²Mu wa ya niinbe, Timoti, zaami ya dɔŋtima ma naa ya Koosa nara a li Kɔlɔsɛ ni aa tiŋ Kristo nɛnɛ.

Ya kunyan Koosa kisuŋi ma a kinyɛ ma bara sɔɔna.

Pɔɔl Fun Zaami Koosa Ba Daha

³Saha maga ya yaa sumi Koosau a nyɛ ma. Waa ya ya kunyan Yesu Kristo ti nyana. Saha maga ya yaa zaami unu kinkan. ⁴Ya funɛ nuu di ma se su Yesu Kristo a la daŋni Koosa nara nɛnɛ. Chendaha yaa zaami un chen. ⁵Ma funɛ te nu Koosa laaboor weri naa ya wuti, Ɛpafras fun biksi ma di ma kpak bambi bɛgim di wuzu digi Koosa zi wa kpa kiwere naa o fun kpa chiŋsi o tɔhɔn ti ni chenu a nyɛ ma. Chendaha ma se su Yesu ka maa daŋni nara kinkan. ⁶Koosa laaboor were tirɛ ba kpa a mɔɔli bar damata ni a gbaari. Nara kinkan se funɛ su Koosa, ba bur a tum tum were o daha. Saha naa ma se fun te lɛli a zim di Koosa funɛ suŋi mau, o gbanko fun nyɛ ma se su un, chen ni ma zi tum tum wereu. ⁷Ɛpafras funɛ biksi ma laaboor weri ti. O wa ya waa ya Kristo tumtumsa. Oo tum Kristo tumwa wa wuti ni a nyɛ ya. Yaa daŋni unu kinkan. ⁸Waa funɛ sɛm ya chenani Koosa siim weri ti suŋi ma di maa daŋni Koosa nara.

⁹O funɛ sɛm ya ma wɛ, ya yaa sumi Koosau aa nyɛ ma di o zi nyɛ ma wa zim o wɛu nɛnɛ a lɛli ma se di ma zim o tutɔ ti, a kpa o zima a nyɛ ma. ¹⁰Ya daŋni ma zim nannɛ, chen ni ma zi tiŋu a chi chenani ya kunyan ti daŋni a sɔɔni o tuha saha maga, a tum tum were nɛnɛ a zim Koosa a gbaari, ¹¹a kpak kpok kinkan a li o kpok zen ti ni. Ma kpak o kpok ti, ma zi kotiu a kpak kanyita wɛ maga ni. Ma wa na namsi, ma zi kotiu a di un wa tu sɔɔn ni, ¹²aa kizaami ya kunyana Koosa. Waa nyɛ ya nyinbaan di ya wa zu o tɔha naa la chaani, chen ni ya wa o nara zi wa di o kin nawara o fun vɔu di o nyɛ yau. ¹³O fun a yisi ya a li sintana naa nyɛn birsi ni, nin awa kpok ni, a kpa ya a la du o be daŋni koor ti ni. ¹⁴A li o be daŋni ti ni, Koosa funɛ la ya nyuuna a nyɛ ya a gil ya tum tum tagna a ta.

Chenani Kristo Bambi Du

¹⁵Kristo bambi chi Koosa naa ya vɛ koti a naali, bambire. O be bɛgim ti zenee a kaali kina maga. ¹⁶Koosa fun nyɛ o naami kin nawara maga nyɛn tɛɛnɛ nɔ maga awa buudaha ni, kin naa ya na awa a naa ya vɛ naali, siim maga awa kpok maga, a magwa o fun a naami a nyɛ o titi ni. ¹⁷Waa funɛ te a nyɛn kina maga ni. O kpok ti daha, a nama maga ha vɛɛn nyɛn hali wa zinan. ¹⁸Waa ya ba naa tiŋ un chen, nyuhu tiina. Ba naa tiŋ un chen chi o barawa. Waa nyɛ ba o mi fali ti. Koosa funɛ te lɛli un a li o sou ni, chen ni o duŋduŋ la zi te kina maga suwachak. ¹⁹Yesu ya Koosa titi. O funɛ ya o tutɔrɛ o wɛ maga fun a nyɛn Yesu ni. ²⁰Koosa fun a nyɛ o be ti fun sou a li daakakli ti ni di o chɛl li, chen ni kin nawara maga nyɛn tɛɛnɛ nɔ maga awa buudaha ni wa Koosa zi kotiu a ya nɔ bɛgim a kpak bara sɔɔna.

²¹Saha digi ma wa fun a zim Koosa a la tum tum tagna a la lisi lise tagna. Chendaha ma fun a ya o dɔma. ²²Amaa lalaknɔ Koosa be ti sou daha, Koosa wa ma fun ya nɔ bɛgim, chen ni wuzu digi Kristo zi wa kpa mau a du Koosa suwachak ni, ma wa zi wa kpak galimsa o wati a ya tu chaan tima. ²³Amaa o lawa maa tiŋ wa wutiu a nyɛ ma se su un nɛnɛ, chen ni kundɔŋ wa to a la zi bur ma gantɛl, a kpak bambi bɛgim a li chenani ma fun te nu Koosa laaboor weri ti chen.

Chenani Pɔɔl Fun Biksi Yesu Nitiŋɛ

²⁴Min ya o laaboor weri naa ba kpa aa biksi bar damati ni, tumtumna. Mu chiŋɛ ma bar chiŋi ni a namsi lalaknɔ ma daha, amaa mu tu sɔɔniu. Kristo funɛ nyɛn tɛɛnɛ nɔ maga ni, o fun a namsi kinkan o nitiŋɛ ba naa chi o bara chen daha. Mu namsu a gbaari un ni. ²⁵Koosa nyɛ mu tum a nyɛ o nitiŋɛ ta ni, chen ni mu zi suŋi bau kinkan. Waa funɛ nyɛ mu ya chen tumtumna a ŋɔ di muu biksi o laaboor weri ti maga hali a wa peti. ²⁶O laaboor weri ti funɛ sogliu nara wati saha digi. Amaa lalaknɔ Koosa funɛ kpa unu a li gbampulim a nyɛ o nara zim un. ²⁷O funɛ ya o tutɔrɛ o biksi o wu sogli nɔ mun a nyɛ o nara ni. Waa sir ya wu weri kinkan ba naa vɛ ya Ju tim chen wati. Nan ya o wu sogli ti. Kristo ti nyɛn ma ni. Chendaha ma kpak bambi bɛgim di wuzu digi Koosa zi wa kpa a li o jirima niu a nyɛ ma. ²⁸Kristo wɛ duŋduŋnɛ ya yaa biksi nara. Yaa kpami nara maga a biksi ba awa zima maga, chen ni ba zi wa ya nibin wereu kinkan, domi ba wa Kristo ya nibɛgimnɛ. ²⁹Chendaha mu si sɛri mu tum ni ka mu kpaŋi kinkan. Kristo la nyɛ min o kpok ti kinkan, chen ni mu zi kotiu a tum chen.

¹Mu daŋni ma zimu chenani mu baga nyɛn ma awa Laodisia tima wa ba naa vɛ zim min. ²Mu kpaŋi mu titiu di mu kpami ma maga, chen ni ma zi ya nibɛgimu domi maa daŋni dɔŋau a zim Koosa wu sogli mun nɛnɛ a ta beeli. O wu sogli ti ya Kristo. ³Koosa zima awa nɛha maga nyɛn Kristo ni.

⁴Mu biksi ma nan, chen ni nandigi wa kpa sɛm naa chi wuti a sɛm ma, o wa zi koti a mur ma. ⁵Mu wa ma bol wa dɔŋau, amaa mu baga nyɛn di ma maga se su Kristo kinkan ka maa tiŋ o nyinbaan aa kpak un nɛnɛ. Ma ya chen, mu tuha zi sɔɔniu.

Kristo Fun Kpa O Mi Fali Ti A Nyɛ Ya

⁶Ma fun la nɔɔni di Yesu Kristo ya ma kunyana. Chendaha maa tiŋ un nɛnɛ. ⁷Ma nyɛ ma bambe kpak Yesu nɛnɛ a nyɛ ma se su un a gbaari, a chi chenani Ɛpafras fun te biksi ma chen. Maa zaami Koosa kinkan saha maga.

⁸Biksi bɔnɛ nyɛn doon ba yir zima. Nara bɔnɛ biksi a, amaa a ya yɔrirɛ. O ya nibinsa zimarɛ ba la alizin tagna wati. Adaha ma ta nyɛ ba wa kpak ma a muri. A nama wa li Kristo wati. ⁹Chenani Koosa du nyɛn Kristo bara nɛɛ. ¹⁰Kristo ya kina maga kpok tiina. Ma wa un ya nibɛgimnɛ. Chendaha ma kpak o mi fali ti.

¹¹Ju tima yaa fun teŋsi dɔŋ barau, di ba biksi nara di Koosa dɔ ba. Amaa lalaknɔ ma wa Kristo ya nibɛgimnɛ. Waa funɛ yisi ma a li ma tum tagna ni. Nan chi o funɛ teŋsi mau. ¹²Ba funɛ chaksi ma wa ni ni, chen funɛ chi ma wa Kristo lagmi sou. Ba fun a lagmi ma a sogli. Koosa fun a lɛli Kristo o sou ni. Ba funɛ chaksi ma chen gbanko funɛ chi Koosa a lagmi a lɛli ma wa Yesu a li ma sou ni. Ma se funɛ su a li chenani o tum a nyɛ un ni. Chendaha o fun tum a nyɛ ma chen. ¹³Saha digi ma funɛ ya ba naa vɛ ya Ju timwa a vɛ zim Koosa. Ma tum tagna funɛ nyɛ ma chi nibin sitɛ. Lalaknɔ Koosa funɛ lɛli mau a li ma sou ni a chi chenani o fun lɛli Kristo chen. Waa funɛ gil ya tum tagna maga a nyɛ ya. ¹⁴Chiksɛ naa ya fun chɔk awa tum tagna naa ya fun tum ka Koosa fun sɔbi a a du o tɔn ni, o fun duŋni a a ta. O chi o funɛ kpa au a kpaasi mari Kristo daakakli ti ni. ¹⁵Yesu funɛ sou a li o daakakli ti ni, o fun a chɔk alizin tagna maga kpok a fun kpa a a li gbampulim, chen ni nara zi wa zimu di a ya yɔrirɛ lalaknɔ.

¹⁶Nandigi ŋɔ di maa di diwe digirɛ a la nyɔ kinyɔɔli digi a vɛ tiŋ wuzu zene awa pɛn falɛ wuzu zene awa hiisi wuzuna a na ma galimsa, ma ta nu ba wati. ¹⁷Kin nama wa bu ya kibirige. Kristo kin nawara ya wuti chiŋɛ a bar chiŋi ni lalaknɔ. ¹⁸Ma ta nyɛ nandigi wa ŋɔ di o lawa maa tiŋ a chi chenani oo tiŋu, chen ni ma wa zi wa na papaha naa Koosa kaa wa kpa nyɛ ma. O ŋɔ di ma ya nibin jɛɛgɛ a kinyɛ malaikasa jirima. O na kinawa a chi o deesi. Chendaha o ŋɔ di o zimu a kaali ma. O yir o titi nibin zen, amaa oo tiŋ chenani o gantɛl tuha kina wɛ durɛ. ¹⁹O wara tiŋ Kristo naa ya ya nyuhu tiina. Ya waa ya o bara luk pɛksa a la na kpok awa suŋi a li un ni. O wa ya ya nibɛgimnɛ ka yaa bi a chi chenani Koosa daŋni yaa bi.

O Chi Koosa Funɛ Lɛli Ya A Li Ya Sou Ni

²⁰O chi ma wa Kristo funɛ sou. Chendaha ma wa tɛɛnɛ nɔ maga zima wa kpak wu digi wa dɔŋ ni. Tɔ. Yɛrɛ maa tiŋ tɛɛnɛ nɔ maga zima ti a chi ma wa tɛɛnɛ nɔ tim maga ha vɛɛn ya nibɛgim? Yɛrɛ maa tiŋ nibinsa chiina, ²¹a la ɔm di ma gbaŋsi kibɔnɛ a lɛmsi bɔnɛ aa di? ²²Chiina awa chiksɛ na nibinsa fun naami ka maa tiŋ a nan, a ya yɔrirɛ. ²³Chenani ba daŋni ba nyɛ malaikasa jirima a kilisi di ba ya nibin jɛɛgɛwa a kimuksi ba bara kinkan, nyɛ nara lisi di ba kpak zimau. Kin nama wa zi nyɛ ba gil ba tutɔ daŋnɛ.

¹Koosa funɛ lagmi lɛli ma wa Kristo a li ma sou ni. Chendaha ma nyɛ ma bambe kilisi Koosa tɔhɔn ti kina wɛ. Kristo kanɛ Koosa nihɛɛ bar kani ni dooni. ²Ma kpa ma lise maga a du Koosa tɔhɔn ti kin ta ni. Ma ta kpa ma lise maga a du tɛɛnɛ nɔ maga kina ni. ³O chi ma funɛ sitiu. Lalaknɔ Koosa funɛ tɔ o mi fali naa maa nyɛn Kristo ni a chiŋsi. ⁴Saha naa Kristo naa nyɛn ma ni, wa bur wa tɛɛnɛ nɔ maga, ma wa un zi wa lagmi dɔŋ niu a bɔni o jirima awa o chaani kinkan.

Chenani Kristo Mi Fali Nyinbaan Du

⁵Ma kpa ma tum tagna a ta. Ma ta kpa ma bara aa tum chɔkumsi tuma, a ta tum sakaal tuma koo tum tum tagna ma lisi tagna daha. Ma gbanko ta chi kidɔŋtima. Kidɔŋtim maga chi ba naa yaa nyɛ vursa wa jirima chene a ya yɔrirɛ. ⁶Koosa na paanu a du ba naa la ya chen tim ni. Wuzu digi o zi wa lɛrgi ba naa vɛ tiŋ o nɔ diŋsau. ⁷Ma wa ba naa vɛ tiŋ Koosa nɔ funɛ lagmi, ma gbanko funɛ tum tum tagnau a chi a.

⁸Amaa lalaknɔ ma gil a magau. Ma ta na paan a du nara ni. Ma ta chɔk ma dɔŋtim sɔna a ta pini dɔŋ zoma a ta sɛm sɛm tagna, ⁹awa nusuna a nyɛ dɔŋ ni. Ma funɛ piin kpa ma gantɛl tuha kina wɛu a ta. Chendaha ma ta tum chen. ¹⁰Lalaknɔwa ma kpak ma suwachak tuhu kin a naa Koosa fun kpa a nyɛ ma. A chi o titi kinawa. Waa la kɔɔri a saha maga, chen ni ma zi kotiu a zim un hali o wa peti. ¹¹Ba naa kpak Koosa suwachak tuhu kina wɛ, ba wara zim di digi ya Ju timwa ka digi ka vɛ yaali. Ba wara zim di digi teŋu ka digi ka vɛ teŋi. Ba wara zim di digi ya hɔɔrrɛ ka digi ka vɛ yaali. Ba wara zim di digi ya yomne ka digi ka vɛ yaali. Baa zimu di Kristo kaali kina maga. Waa nyɛn o nitiŋɛ ta maga wati.

¹²Ma ya Koosa narawa. O fun a lisi ma a nyɛ o titi ni a la daŋni ma kinkan. Ma kpak dɔŋa awa siki a kikɔɔri dɔŋa sɔna a ya jɛrgɛ tima a kpak kanyita a du nara ni, ¹³aa kisuŋi ba. Ma wa ma dɔŋtima vɛ dɔŋa, ma gil a nyɛ ba. Ya kunyan ti funɛ gil ma tum tagnau a nyɛ ma. Chendaha ma gbanko gil ma dɔŋtima tum tagna a nyɛ ba. ¹⁴Maa daŋni dɔŋa a kaali kina maga. Maa daŋni dɔŋa, ma zi kotiu a tum kin nama maga. ¹⁵Ma nyɛ Kristo nyɛ ma bara sɔɔna a dɔ ma. Koosa fun a yir ma di ma maga kpak o bara sɔɔna, chen ni ma wa un zi ya bar bɛgimu. Nan daha maa zaami Koosa saha maga. ¹⁶Ma nyɛ Kristo sɛma nyɛn ma bambe ni nɛnɛ a kpa o zima a biksi dɔŋa a kikpami dɔŋa a lɔ boola naa Koosa siim weri ti nyɛ ma, a kipɛgi Koosa aa kizaami un kinkan. ¹⁷Kin naa maga maa ya awa chenani maga ma sɛm, ma nyɛ a maga li ya kunyan Yesu sɔn ti ni a kizaami ya kunyan Koosa o sɔn ti gbanko daha.

Chenani Ya Maga Zi Lagmi Nyɛn

¹⁸Nihaana, o deŋlu wa maa tiŋ ma baalasa nɔɔna domi ma ya Yesu nitiŋɛwa.

¹⁹Nibaala, maa daŋni ma haanasa nɛnɛ a ta kpak tu haasa a du ba ni.

²⁰Bichɛsa, maa tiŋ ma nyama awa ma numa nɔɔna a li kina maga ni, chen ni ma zi sɔɔni ya kunyan ti tuhau.

²¹Nyama awa numa, ma ta yaa kitɛsi ma bisa chen ni ba tusa zi chɔku.

²²Yosa, maa tiŋ ma kunyama nɔɔna a li kina maga ni. Ma ta tum kinkan a li ba se duŋduŋ ni, amaa maa tum ma bambe ni saha maga, domi ma nyɛ ya kunyan Yesu jirimarɛ. ²³Ma wa tum a nyɛ nibinsi nɛɛ, amaa ma tum a nyɛ ya kunyan ti nɛɛ. Chendaha ma kpak un ma bambe ni a tum nɛnɛ saha maga. ²⁴Ma tum a nyɛ ya kunyana Yesu Kristo nee. Wuzu digi waa la zi wa bɔ ma ma chim a kpa kin nawara o fun kpa chiŋsi a nyɛ ma. ²⁵Ba naa la tum tum tagna, ba zi wa na bɔ tau a li ba tum tagna tumi ni. Koosa wa zi wa bɔ ba naa la tum tum tagna bɔnɛ a ka bɔnɛ.

¹Ma naa kpak yosa, ma ya nɛnɛ a nyɛ ba. Ma lisi di ma kunyan ti nyɛn a li Koosa tɔhɔn ti ni.

O Lawa Ya Yaa Kisumi Koosau

²Ma yaa kisumi Koosa a doso di ma zaami un saha maga. ³Maa sumi Koosa gbanko a nyɛ ya di o nyɛ ya nyinbaan ya sɛm nara ni o laaboor weri ti wɛ aa biksi ba o kisogli wɛ. O wu sogli ti ya Kristo. O laaboor weri ti daha ba fun tɔ min dɛ. ⁴Maa sumi un di mu zi biksi o laaboor weri tiu nɛnɛ a chi chenani deŋli wa mu biksi, chen ni ba zi nu mu biksi tiu nɛnɛ.

⁵Ma wa ba naa vɛ tiŋ Yesu, lagmi dɔŋ ni, ma lisi chenani ma zi tiŋ wa nɛha a li ba wati. Maa biksi ba Koosa nyinbaan saha maga. ⁶Maa doso chenani ma sɛm a nyɛ nara ni, chen ni ma sɛm maga zi weru a lɛm. Nar pɛɛsi ma wu digi, o lawa ma kotiu a ŋɔ un nɛnɛ.

Pɔɔl Mak Tɔn Nɔ Bar Nɔwa

⁷Tɔ. Ya bi daŋni, Tikikus, naa suŋi ya kinkan, zi ŋɔ ma mu wɛ magau. O wa ya ya ya kunyan ti tumtumsa. ⁸Chendaha mu fun a tum un ma wati di o ŋɔ ma ya wɛ a kpami ma. ⁹O wa Onisimus funɛ lagmi a la. Onisimus naa la suŋi ya kinkan, ya ma digirɛ. Yaa daŋni unu kinkan. Nara balɛ na zi ŋɔ mau chen naa maga funɛ ya bar nɔ.

¹⁰Ba fun tɔ min awa baal digi dɛ. O sɔn ya Aristakus. O wa Maak, Barnabas niinbe, zaami mau. Mu funɛ te ŋɔ ma Maak wɛu. O wa wa ma wati, ma la un du. ¹¹Jɔsua naa ba yir Jastus, gbanko zaami mau. Nara batora nama duŋduŋ ya Ju tima ba naa se su Yesu ka ba suŋi min kinkan a li Koosa koor ti tum ni a la belimi min.

¹²Ɛpafras gbanko ya ma digirɛ a zaami ma. O gbanko tum Yesu Kristo tumwa. O kpak unu o bambi ni a sumi Koosa a nyɛ ma saha maga di Koosa zi suŋi mau ma kpak nɛnɛ a zim o wɛ nɛnɛ hali o wa peti, chen ni ma wa zi beeli Kristo biksi ti, amaa ma zi koti a la nɔɔniu a tiŋ Koosa tutɔ ti maga. ¹³Min ya Ɛpafras sɛhɛra tiina di o tum kinkanu a nyɛ ma awa ba naa maga nyɛn Laodisia awa Hirapɔlɔs ni. ¹⁴Ya nibin daŋni luri tiina, Luk, awa Dimas gbanko zaami mau.

¹⁵Ma zaami Yesu nitiŋɛ ba naa nyɛn Laodisia awa ya towe Nimfa awa Yesu nitiŋɛ ba naa lagmi o dam ni chen a nyɛ ya. ¹⁶Ma wa karimi tɔn nɔ peti, ma kpa un a la nyɛ Yesu nitiŋɛ ba naa nyɛn Laodisia ni chen, chen ni ba gbanko zi karimi unu. Ba gbanko zi kpa tɔnu a nyɛ ma. Ma wa la un, ma karimi un nɛnɛ. ¹⁷Mu daŋni ma ŋɔ Arkipus ni di o lawa o tum tum naa Koosa fun kpa nyɛ un chenu a peti.

¹⁸Mu titi la sɔbi sɛm na bar nɔ a zaami ma. Maa lisi di mu ha vɛɛn tɔ dɛrɛ.

Koosa suŋi ma.