3 JƆN

JƆN ATORA TIINA TƆN

¹Mu waa, nihɛɛ, la sɔbi tɔn nɔ a nyɛ mu chɛn, Gaiyus, naa mu daŋni wuti.

²Mu chɛna, mu sumi Koosau di i na alaafɛ, chen ni i tuma zi weru. Mu zimu di ii tiŋ Koosa nɛnɛ, ³domi Yesu nitiŋɛ ta bɔnɛ funɛ wa a wa sɛm min di maa tiŋ wuti nyinbaanu awa ma bambi maga ni. Mu funɛ nu chen, mu tuha fun sɔɔni kinkan. ⁴Saha naa mu yaa nu di mu bisa tiŋ Koosa wuti nyinbaannɛ, o yaa sɔɔni mu tuhau kinkan a kaali kina maga.

Jɔn Fun Pɛgi Gaiyus

⁵Mu chɛna, o weru di i yaa kila Yesu nitiŋɛ ta a du aa kisuŋi ba. Ma wa zim ba bɔnɛ, amaa ma yaa la bau a la suŋi ba. Chenani maa tum nan, ma sir tiŋ Koosa nyinbaanu nɛnɛ. ⁶Ba funɛ sɛm i wɛu a nyɛ Yesu nitiŋɛ ba naa nyɛn bar nɔ ni. Ba funɛ pɛgi hinu a li chenani ii daŋni ba ni. Ba wa saksi di ba li, i suŋi ba ba li nyinbaan ti ni nɛnɛ, chen ni i zi sɔɔni Koosa tuhau kinkan. ⁷Yesu daha baa gba tɔsa nan. Ba wara daŋni ba naa vɛ zim Koosa nyɛ ba kundɔŋ. ⁸Chendaha o weru wa yaa suŋi nara timau. Yaa suŋi dɔŋa chen ni, ya wa ba la biksi nara Koosa wɛ.

Diɔtrifis Awa Dimitrius Wɛ

⁹Min funɛ sɔbi tɔn a nyɛ Yesu nitiŋɛ ba naa funɛ nyɛn i tɔhɔn ni, amaa Diɔtrifis wa fun la nɔɔni di o tiŋ mu nɔ. O daŋni o burgi ma nihɛɛrɛ. ¹⁰Mu wa wa, mu wa ma zi sɛm chenani o yaa fun a yo o nɔu a la sɛm sɛm tagna a du min ni. Amaa chen duŋduŋ laata ya wu tagna oo tum. O wa zi la Yesu nitiŋɛ ba naa yaa val a la wa o wati. Hali o wa zi nyɛ o chɛnsa bɔnɛ la ba du. Ba la ba, o yaa daŋni o duŋni ba a li Yesu nitiŋɛ ta wati.

¹¹Mu chɛna, ta tiŋ chenani o tiŋi. Kitum tum were nyinbaan. Naa la tum tum were, Koosa dɔ un. Amaa naa ka la tum tum tagna, Koosa wa dɔ un.

¹²Dimitrius ya nibin werire. Nara maga zimu di oo tiŋ Koosa wuti nyinbaannɛ nɛnɛ. Mu titi ŋɔɛɛ di o ya nibin werire ka i zim di mu sɛm ya wutirɛ.

Jɔn Mak Tɔn Nɔ Bar Nɔwa

¹³Mu kpak wu damatiwa a kaa ŋɔ hin, amaa mu wa zi sɔbi a a dau lalaknɔ. ¹⁴Mu kpak bambiu di mu wa na hin lalaga. Mu wa pu hin, ya zi sɛm kin nama wɛu.

¹⁵Koosa la zi nyɛ hin bara sɔɔna.

I chɛnsa ba naa nyɛn bar nɔ, zaami hinu. Zaami ya chɛnsa gbanko a nyɛ ya.