TIMOTI BILƐ TIINA TƆN
11Mu waa, Pɔɔl, naa Koosa fun lisi di mu ya Yesu Kristo nitumi a tum di mu la ŋɔ nara ni o miisa naa o piin kpa nyɛ ya wɛ, domi ya wa Yesu Kristo ya nibɛgimnɛ.
2Mu la sɔbi tɔn nɔ a nyɛ mu be daŋni Timoti naa si funɛ su Yesu a li mu biksi ni. Ya kunyana Koosa awa ya kunyan Yesu Kristo suŋi hin a kpak hin siki aa nyɛ hin bara sɔɔna.
Pɔɔl Fun Zaami Koosa Timoti Daha
3Min la tum Koosa tuma awa tuha bɛgim ni a chi chenani mu nawaalsa fun tum chen. Mu yaa sumi Koosa a la zaami un i daha nha awa dusum. 4Mu lisu chenani i fun li mu watiu ka i tuha chɔku kinkan. Mu daŋni mu bu na hinu kinkan, chen ni i zi nyɛ mu tuha sɔɔniu hali a la gali. 5Mu lisu di i niina, Yunis, awa i naha, Lois se su Yesu wuti ni. Mu zimu di i gbanko si su unu a chi ba. 6Chendaha mu daŋni i lisi saha naa mu fun wa kpa mu nisa a sak hin ni, ka Koosa kpa o papaha a nyɛ hin chen. Ta tɔ un, amaa kitum un nɛnɛ. 7Siim weri naa Koosa fun kpa nyɛ ya chen, o wa nyɛ ya ɔm wa bambi kpaki ni, amaa o nyɛ ya o kpok ti, chen ni ya zi kotiu a daŋni nara a ya bambi tima.
8Ta nyɛ hiisa kpak hin a li chenani i ŋɔ nara ni ya kunyan ti wɛ. Ta nyɛ hiisa gbanko kpak hin a li chenani ba tɔ min dɛ Kristo wɛ daha. Kpa kpok naa Koosa nyɛ hin aa saksi a na namsi o laaboor weri ti daha. 9Koosa funɛ yir ya di ya ya o titi nara a fun yisi ya a li ya tum tagna ni yaa tiŋ un. O wa fun ya chen di ya ya nibin werewa daha. Ya wa Yesu Kristo ya nibɛgimnɛ. Chendaha o funɛ ya Koosa tutɔrɛ a li o piili ni o suŋi ya chen. 10Doone o fun tum o be Yesu Kristo di o wa lisi ya a li ya tum tagna ni yaa tiŋ un. Nan biksi ya di o ya Koosa tutɔrɛ o suŋi ya. Kristo funɛ sou a li o daakakli ti ni, o fun a nyaŋi sou. Waa funɛ kpa Koosa laaboor weri naa funɛ sogli chen a biksi ya o mi fali naa vɛ kpak bɔ, wɛ.
11Koosa fun lisi min di mu ya o nitumi a la biksi nara o laaboor weri ti wɛ. 12Chendaha ba fun kpak min a la tɔ dɛ ka mu namsi nan. Amaa mu ha vɛɛn kpak bambi kpoku, domi mu zim naa mu si suu. Mu zimu di o zi il o kin nawara o fun kpa a du mu nin ni hali saha naa o wa bur wa. 13I funɛ nyɛn mu wati, mu fun a biksi hin Koosa wuti wɛ di ii tiŋ un. Lalaknɔ kpak mu wuti biksi nɔ nɛnɛ. Nyɛ i si yaa su Yesu Kristo aa kidaŋni nara nɛnɛ, domi o wa ya ya nibɛgimnɛ. 14Koosa siim weri naa nyɛn ya ni nan, zi kpa o kpoku a nyɛ hin di i kpak Koosa papaha naa o fun kpa a du i nin ni chen nɛnɛ.
15I zimu di ba naa maga funɛ nyɛn mu wati a li Azia pulum ni kaalu a ka min. Hali nara balɛ naa ba yir Figɛlus awa Hɛmɔjɛnis, ba gbanko funɛ kaaliu. 16Ɔnɛsifɔrɔs funɛ kpami minu bu damata. Chendaha mu sumi ya kunyan ti di o kpak o walɛ siki. O wa kpak hiisa a du min ni domi ba funɛ kpak min a tɔ dɛrɛ daha. 17O funɛ wa tel Room, o fun vaan piili a dɛu mu bar nyɛni hali a wa na min. 18I gbanko zimu nɛnɛ a li chenani o fun suŋi min kinkan a li Ɛfɛsus ni. Ya kunyan ti wa bur wa, o zi kpak un sikiu kinkan.
2Timoti Chi Yesu Kristo Lanjimarɛ
1Mu be, ya wa Yesu Kristo ya nibɛgimnɛ. Chendaha Koosa la zi suŋi hin i kpak kpok. 2I funɛ nu ka muu biksi nara bu damata. I gbanko tiŋ mu nɔ sɛma aa kibiksi ba naa ya wuti tima ba zi kotiu a la biksi ba dɔŋtima.
3I chi Yesu Kristo lanjimarɛ. Adaha i saksi a na namsi o daha. 4Lanjima la laal ni, o yaa gil o kina magau a ta gantɛl ni. O yaa daŋni o tuma sɔɔni o nyuhu tiina tuhau. 5Nar awa o dɔŋtima chɔ chɔchɔha a daŋni o di, o lawa o tiŋ ba nihɛɛti nɔu. 6Niparɛ naa la tum kinkan a li o ŋmaha ni, o zi na kiparɛ naa ba te kum chenu. 7Kilisi chenani mu sɛm hin nan. Koosa zi suŋi hinu ii zim mu sɛm ta muna.
8Kilisi Yesu Kristo naa funɛ ya koor Devid lul be, a si a li o sou ni. Mu yaa ŋɔ nara niu Koosa laaboor weri ti wɛ, o wɛwa mu yaa ŋɔ ba. 9Koosa laaboor weri ti daha ba fun kpak min a la tɔ dɛ di mu namsi a chi tum tagna nitumi. Amaa ba wa koti a kpa o laaboor weri ti a tɔ dɛ. 10Chendaha mu di mu namsi maga, chen ni Koosa zi wa yisi ba naa o fun lisiu a li ba tum tagna a kpa o jirima zen naa vɛ kpak bɔ a nyɛ ba. Ya wa Yesu Kristo ya nibɛgimnɛ. Chendaha Koosa koti a ya chen. 11Ba funɛ sɛm wutirɛ,
“Ya wa un siwɛɛ,
wuzu digi ya wa un zi nyɛnu.
12Ya di ya namsi maga,
wuzu digi ya wa un zi wa ya koorsau.
Ya vɛ un,
o gbanko zi vɛ yau.
13Ya vɛ ya wuti tima,
o waa ya wuti tiinnɛ saha maga.
O wa koti a vɛ o titi.”
Kpaŋi I Titi A Kitum Koosa Tuma Nɛnɛ.
14Kibiksi kin nama a nyɛ Yesu nitiŋɛ ta ni aa kitɛ ba nin Koosa suwachak ni di ba ta di dɔŋa wa amɔrɛ yɔri yɔri. Ba naa la di amɔrɛ chen ni, ba sɛma zi nyɛ ba naa la nu a chen bur Koosa tiŋi niu. 15Kpak un i bambi ni aa kitum Koosa tuma nɛnɛ, chen ni o wa zaamsi hin a peti, o zi ŋɔ di i kpaŋi i titiu. I biksi Koosa laaboor weri ti a nyɛ nara ni wa wuti ni, i wa zi wa na hiisa. 16Ta lagmi ba naa yaa biksi womsi mura a naa vɛ ya Koosa wɛ, a nyɛ nara ni. Ba naa la biksi chen ni, duŋni narawa a li Koosa wati a gbaari. 17Chenani ba yaa biksi nara chi chɔ naa la di nibine barawa. Nara balɛ naa ba yir Haiminius awa Failitus, nyɛn ba ni. 18Nara balɛ na funɛ gil Koosa wuti nyinbaanu a nyɛ ba naa se su Kristo bɔnɛ bur o tiŋi ni, domi ba biksiu di ya piin siu a li ya sou ni. 19Amaa Koosa laaboor weri ti chi dam zɛchikrɛ. O kpoku kinkan. Chendaha nandigi wa kiziigi un. O funɛ sɔbiu a sak zɛchik ti ni,
“Ya kunyan ti zim ba naa o dɔu.”
O gbanko funɛ sɔbiu a sak,
O gbanko funɛ sɔbiu a sak,
“Ba naa maga ŋɔɛɛ di ya kunyan ti dɔ ba,
ba gil ba tum tagna aa tiŋ un.”
20Kidamata nyɛn sal zen ni. Ba kpa aniita awa salmasiwa a kɔɔri bɔnɛ a kpa daasa awa choha a kɔɔri bɔnɛ. Ba kpa aniita awa salma kin tau a chiŋsi a pɔ wuzu zene wuzu. Ba ka kpa daasa awa choha kin tau a tum tuma wuzu kam. 21Ba naa maga gil ba tum tagna, ba chi aniita awa salma kin nawara ba kpa chiŋsi a pɔ wuzu zene chene. Ba saksi ba titiu di ba tum tum were a nyɛ un. 22Ta tiŋ i titi daŋni a chi ba naa ya bunɔɔna, amaa kpak un i bambi ni a tum tum were kinkan a nyɛ i si su Yesu aa kidaŋni nara awa bara sɔɔni ni. Kilagmi ba naa kpak bambi chaanɛ a la sumi Koosa di o suŋi ba. 23Ta lagmi nibin womni ba naa yaa di dɔŋa wa amɔrɛ kin nawara ba vɛ zimi wɛ. I zimu di ba yaa di amɔrɛu hali o wa peti dɔŋ yooli ni. 24Ya kunyan ti tumtumna fiɛŋ o daŋni yo. O lawa o ya jɛrgiu a koti a biksi nara nɛnɛ awa kanyita ni. 25Saha naa o wa burgi womna nibiksɛ na nyuuna, o ta na paan a du ba ni. Ami Koosa zi nyɛ ba nyinbaanu di ba gil ba tum tagna a bur tiŋ un a wa zim o wuti ti. 26Ba ya chen, ba zi bur wa ba nɛsa niu a koti a chɔ a li sintana naa funɛ kpak ba a mo ba lo di ba tiŋ o nɔ ni.
3Tɛɛnɛ Nɔ Maga Siili Saha Wɛ
1Kinu mu sɛma. Tɛɛnɛ nɔ maga saha wa dugli o peti, o zi wa bɔmu kinkan nara wati. 2Nara zi wa nyɛn dooniu a kpak si a kidaŋni malɛ a zer ba titi aa ya diŋ vɛ nuulisi tima. Ba zi wa pini nara zomau a kivɛ ba nyama awa ba numa nɔɔna a ta zaami nara aa vɛ tiŋ Koosa. 3Ba zi vɛ ba dɔŋtimau a ya bambi kpok tima a ya tuha sa tima a chɔk ba sɔna a kitum chi garaŋzur tuma aa du ba ni. Ba zi ha tum wereu, 4a li nara gantɛl a ya wu zene tima aa lisi di ba ya nibin zenewa. Ba zi ya kidaŋni ba titi daŋnɛu a kaali chenani ba fu zi daŋni Koosa. 5Ba zi jɛɛmi Koosa wa ba nyina niu aa vɛ kpak o kpok ti. Ta lagmi ba naa la tum chen ni. 6Ba bɔnɛ la zu damsa a mur nihaana ba naa vɛ kpak nɛha. Ba banchisa la yaali ba tum tagna daha. Hali ba titi daŋnɛ la lɛrgi ba di ba ya chen. 7Nihaan nama yaa kpaŋi di ba buksi wu digi, amaa ba ka wa fun koti a zim un nɛnɛ. 8Nibiksɛ nama burgi ba gantɛlwa a chak Koosa wuti ti a chi nara balɛ naa ba funɛ yir Janis awa Jambrɛs, burgi ba gantɛlwa a chak Mosis saha digi. Nibiksɛ nama ya lise tagin timwa a nyuksi Koosa nyinbaan. 9Ba wa zi wa na nyɔɔra kinkan a li ba tum ni. Nara maga zi wa zimu di nibiksɛ na gbanko ya womniwa a chi ba funɛ zim di Janis awa Jambrɛs ya womniwa saha digi.
Ta Bur Gantɛl A Li Koosa Wuti Nyinbaan Ni
10Amaa i chau chenani muu biksi nara nɛɛ awa chenani mu nyɛni du wa chenani mu kpak un a li mu bambi ni di muu tiŋ Koosa. I gbanko zimu di mu si yaa su Koosau ka mu daŋni mu dɔŋtima awa kanyita ni wa chenani mu di mu namsi. 11I gban zimu chenani mu dɔma muksi minu kinkan a li tɔsi a naa ba yir Antiɔk, Ikonium awa Listira ni, ka mu di namsi dooni. Amaa Koosa funɛ bu wa lisi minu a li mu namsi maga ni. 12Nibinsa zi yaa wa muksi ba naa la daŋni ba tiŋ Koosa nɛnɛ, domi ba wa Yesu Kristo ya nibɛgim. 13Amaa nimurɛ ba naa la tum tum tagna zi wa tumu aa gbaari. Ba wa la mur nara awa ba titi. 14Amaa ii ka tiŋ Koosa nyinbaan wuti ti. I zimu nɛnɛ ba naa funɛ te biksi hin o wɛ chen, di i si su un kinkan. 15I gban funɛ zim Koosa sɛm tɔn tiu a li i bichɛsi ni. Waa funɛ koti a nyɛ i si su Yesu Kristo, chen ni o zi yisi hinu a li i tum tagna ni. 16Koosa titi fun nyɛ ba naa funɛ sɔbi a li o sɛm tɔn ti ni saha digi chen di ba sɛm ta ya wutiu. O nitiŋɛ ta koti a kpa o sɛm tɔn ti a biksi nara o wuti ti wɛ. Ba gbanko koti a biksi ba chenani baa tum tum tagna awa chenani ba zi gil a a kitum tum were, 17chen ni o tumtumsa zi saksiu di ba tum tum were maga.
41Mu chiŋe Koosa awa Yesu Kristo naa la zi wa di miisa tima awa nisitɛ sɛria a di o koor ti suwachak ni, 2Mu ŋɔ hinu di o lawa i biksi Koosa laaboor weri ti wɛ aa nyɛ nara ba naa la nu awa ba naa vɛ nuuli ni. I yaa la burgi ba naa la tum tum tagna nyuuna, aa kikpami ba a bur tiŋ Koosa nyinbaan. Saha maga ii biksi ba wa kanyita kinkan ni. 3Saha wau nibinsa zi vɛ wa nu Koosa wuti biksi ti, amaa ba zi wa tiŋ ba titi daŋnɛu a lagmi ba naa la zi wa biksi ba chenani ba daŋni aa gbaari. 4Ba zi wa buru a li Koosa wuti biksi ti ni, a kidaŋni baa nu mura. 5Amaa ii kpak o wuti ti nɛnɛ saha maga. I di namsi aa kibiksi Koosa laaboor weri ti wɛ a nyɛ nara ni aa kitum i tuma nɛnɛ a nyɛ un.
6Mu waa wara, saha naa mu zi wa sou duglɛu. 7Mu miisa chi chɔchɔharɛ. Mu kpaŋu a chɔ peti ka mu si ha vɛɛn su Koosa. 8Ya kunyan ti wa bur wa di o di ya sɛria wa wuti, o zi bɔ min mu chimu, domi mu tum tum werewa a nyɛ un. O zi wa ya chenu a nyɛ ba naa maga la daŋni un a la pɔ un di o bur wa.
Ta Vusi A Wa Kpami Min
9Kpaŋi i titi a bur wa mu wati lalaga. 10Dimas naa la daŋni tɛɛnɛ nɔ maga kina, funɛ gil minu a kaali Tɛsalɔnika. Krɛsɛns funɛ a gbau a kaali Galesia pulum. Taitus ka kaali Dalmesia pulum. 11-12Mu gbanko tum Tikikus Ɛfɛsus ni. Luk duŋduŋ nyɛn mu wati. I wa Maak kuwa mu wati, domi waa kote a suŋi min a li mu tum ni. 13I wa wa, i zer mu kuntu naa mu kpa ta Karpus wati a li Troas ni a kpa un kuwa, a pa mu tɔna gbanko. Doso a naa ya sela tɔna chen ni.
14Machɛrɛ naa ba yir Alɛzanda chen funɛ muksi min kinkan. Ya kunyan ti zi wa di o tum tagna sɛriau. 15Doso kinyini un, domi ya funɛ nyɛn dooni, o yaa fun vɛ ya biksiu wa kpok ni.
16Mu funɛ kok mu titi a li sɛria bar diili dɛ ti ni, nandigi wa fun chiŋi mu gantɛl ni. Mu si su di Koosa wa zi wa lisi chenani ba fun gil min. 17Amaa ya kunyan ti funɛ nyɛn mu watiu a kpa o kpok ti a nyɛ min, a fun nyɛ mu koti a sɛm Koosa laaboor weri ti wɛ a nyɛ ba naa vɛ ya Ju tim ni a lisi min a li bar tagin kinkan ni. 18O gbanko zi lisi minu a li tum tagin naa maga nibinsa zi wa tum a du min ni a nyɛ mu zu o koor naa nyɛn Koosa tɔhɔn ti ni. O la jirima kinkan hali saha naa vɛ kpak bɔ. Ami.
Pɔɔl Mak Tɔn Nɔ Bar Nɔwa
19Mu zaami Akwila awa Prisila. Mu gbanko zaami Ɔnɛsifɔrɔs walɛ. 20Ɛrastus fun kpalimi Kɔrint ni ka mu fun gil Trofimus a li Mailitus ni, domi o wa fun kpak alaafɛ. 21Kpaŋi i titi a wa ka wa saha wa tel.
Yubulus, Pudɛns, Linus, ya towe Klɔdia, awa ya dɔŋtima ba naa maga nyɛn bar nɔ, zaami hinu.
22Ya kunyan ti zi nyɛn i watiu.
Koosa kisuŋi ma maga.