TƐSALƆNIKA BILƐ TIMA TƆN
11Mu waa, Pɔɔl, awa Sailas wa Timoti zaami mau.
Min, Pɔɔl, la sɔbi tɔn nɔ a nyɛ ma naa tiŋ Yesu a li Tɛsalɔnika ni. Ya kunyan Koosa awa ya kunyan Yesu Kristo dɔ ma.
2Ba suŋi ma a kinyɛ ma bara sɔɔna.
Ya Kunyana Wa Wa, O Zi Di Nara Sɛriau
3Mu niinbisa, ya yaa zaami Koosau ma daha saha maga. O weru di yaa zaami un chen, domi ma se suuli gbaariu kinkan ka maa daŋni dɔŋa. 4Chendaha ya yaa ŋɔ Yesu nitiŋɛ doonani maga ya nyɛn di ma ya ya jirima narawa. Hali nara namsi ma kinkan, ma se ha vɛɛn su Koosau kinkan ka maa di ma namsi.
5Koosa wa wa di o wa di tɛɛnɛ nɔ tim maga sɛria wa wuti, o zi wa ŋɔ di ma wa zu o koor ti, domi namsi naa ma namsi nan daha. 6-7Koosa ya wuti tiina. Ya kunyan Yesu awa o malaikasa ba naa chi di a kpak kpok, wa li Koosa tɔhɔn ti a wa, o zi nyɛ ma namsi ti awa ya namsi petiu a kpa namsi ti a du ba naa la namsi ma chen ni. 8Ba naa vɛ zim Koosa awa ba naa se vɛ su o laaboor weri ti ya kunyan Yesu wɛ, Koosa zi wa lɛrgi ba diŋsau a ta ba yɔri. 9Koosa wa yisi ba a li o bar nyɛni awa o jirima zen ti ni, ba zi wa namsiu a ta yɔri hali saha naa vɛ kpak bɔ. 10A wuzu naa ya kunyan ti kaa wa bur wa, ba naa maga se su un zi nyɛ un jirimau kinkan. Ma gbanko zi wa nyɛn dooniu a ya chen, domi ma se funɛ su Koosa laaboor weri naa ya fun wa biksi ma chen.
11Chendaha ya yaa sumi un ma daha. Waa funɛ lisi ma di ma la o mi fali ti. Yaa sumi unu di o nyɛ ma o kpok ti yaa tiŋ o mi fali ti nɛnɛ. Ya vɛɛn a sumi unu di o suŋi ma ma kitum tum were a naa maga ma daŋni ma tum hali a wa peti, domi ma se su un. 12Ma tiŋ chen nɛnɛ, ya kunyan Yesu sɔn ti zi na jirimau ma daha, ka ma gbanko kaa na jirima, domi ma wa un ya nibɛgimnɛ. Ya Koosa awa ya kunyan Yesu Kristo kisuŋi ma ma nyɛn chen.
2Tum Tagna Tiina Naa La Zi Wa Wɛ
1Mu daŋni mu bu ŋɔ mau lalaknɔ saha naa ya kunyan Yesu wa bur wa ka ya wa un wa lagmi wɛ. Mu niinbisa, mu sumi mau di, 2nara ŋɔ ma di ya kunyan ti piin bur wau, ma ta nyɛ o jɛri ma a li ma lise ni a ta nyɛ ba sɛma kimuksi ma. Nara nama ŋɔ ma di ba ya Koosa witinsiwa akoo ba karimɛ tɔnnɛ a ŋɔ di min sɔbɛɛ, ma ta nu ba sɛm ta. 3Ma fiɛŋ ma nyɛ nara kimur ma, domi tum tagna tiina la zi wa te a wa. Tɛɛnɛ nɔ tima ba naa vɛ zim Koosa hali a wuzu ti, zi wa siu aa tiŋ tum tagna tiin ti. O saha wa peti, Koosa zi kpa unu a du din dam ni. 4Tum tagna tiin nɔ zi wa ŋɔu di kinkin naa nibinsa jɛɛmi ya yɔrirɛ, a ŋɔ di o ya nibin zenne a kaali ba maga. Hali o zi la zu Koosa bar jɛɛmi damau a kani a ŋɔ di o ya Koosarɛ.
5Ma wa lisi saha naa mu fun nyɛn ma wati chenn? Mu funɛ ŋɔ ma a nama maga wɛu. 6Lalaknɔ wu digi nyɛ a vɛ yaali, ka ma zim chen kin ti. Koosa wa lisi wu digi ti, tum tagna tiin ti zi wau. 7Nibinsa piin sogli a vɛ Koosa. Chen kin ti tɔ ba nyinbaan di ba vɛ Koosa gbampulim ni chen, hali o saha wa tel o kaali. 8Doone tum tagin tiin ti zi na nyinbaan a wa. Ya kunyan Yesu wa bur wa, o zi wa kpa o kpoku awa o jirima wa o hiisa a hiisa a du un niu o sou. 9Tum tagin tiin ti wa wa, o zi kpa sintana kpoku a tum tum zene awa alaazibu tuma kinkan, 10di o mur nara ba naa Koosa zi wa na ba galimsa a ta ba yɔri. O zi wa na ba galimsa chenu, domi ba wara daŋni wuti ti, chen ni o fu zi kotiu a yisi ba a li ba tum tagna ni ba tiŋ un. 11Chendaha Koosa zi nyɛ sintana kpa o kpok tiu a tum tum tagna, chen ni ba se zi su kinkin naa ya nusunau. 12Ba naa maga vɛ nyɛ ba se su wuti ti amaa a ka nyɛ ba tusa sɔɔni tum tagna tumi ni, Koosa zi di ba sɛriau a na ba galimsa.
Koosa Funɛ Lisi Ya A Nyɛ O Titi Ni
13Mu niinbisa, ya yaa zaami Koosau ma naa o daŋni nan daha. Ma se funɛ su o wuti ti. Chendaha o fun te kpa o siim weri kpok ti a yisi ma a li ma tum tagna ni a nyɛ o titi ni. 14Ya funɛ wa biksi ma Koosa laaboor weri ti wɛ, o fun a yir ma, chen ni wuzu digi ma zi wa bɔni ya kunyan Yesu Kristo jirima awa o chaaniu kinkan. 15Mu niinbisa, chen daha, maa kpak nɛnɛ aa tiŋ wuti biksi naa ya fun biksi ma saha naa ya fun nyɛn ma wati awa chenani ya fun sɔbi tɔn ni a nyɛ ma.
16Ya kunyana Koosa la daŋni ya a fun suŋi ya, a kpami ya ya kpak bambi bɛgim un ni. 17O wa ya kunyan Yesu Kristo la kpami ma di ma tum tum were a kisɛm wu were duŋduŋ.
3Tɛɛnɛ Nɔ Maga Siili Saha Wɛ
1Mu niinbisa, maa sumi Koosa a nyɛ ya di ya koti a mɔɔli Koosa laaboor weri ti bawu maga ni, chen ni nidamata se zi su unu a chi chenani maa ya chen. 2Ma vɛɛn kisumi un di o yisi ya a li ba naa la tum tum tagna nisa ni, domi nara kinkan se wa su laaboor weri ti.
3Amaa ya kunyan ti ya wuti tiina. O zi kpa o kpoku a nyɛ ma a yisi ma a li tum tagna naa sintana tum a du ma ni. 4Ya kunyan ti nyɛ ya se su ma di ma zi tiŋ kin naa maga ya fun biksi mau a chi ma la tiŋ lalaknɔ nan.
5O suŋi ma ma daŋni Koosa nɛnɛ a kpa o kpok ti a nyɛ ma, chen ni ma zi kotiu a di ma namsi.
Ma Nyɛ Ma Se Sɛri Ya Kunyan Tum Ni
6Mu niinbisa, ya kunyan Yesu Kristo ŋɔ ya di ya ŋɔ ma kin nama wɛ. Ma ta nyɛ ma wa ba naa kpak zanyɛrka lagmi, domi ba wara tiŋ ya biksi ti. 7Ma titi zimu nɛnɛ chenani ya nyɛni fun du ma watiu. Ma gbanko kinyɛn chen. Ya wa ma funɛ nyɛn, ya wa fun kpak zanyɛrka. 8Ya ka funɛ tum nha wa dusumu kinkan, chen ni ya zi diu a li ya bara wilim ni. Ya wa fun a daŋni di ma suŋi ya wa diwe ni. Kin naa maga ma yaa fun a nyɛ ya, ya yaa bɔ a nyuuniu. 9O funɛ deŋliu wa ya ŋɔ ma di ma suŋi ya wa diwe ni, amaa ya bara wilim nee yaa di a la biksi ma chenani ma zi tiŋ. 10Ya funɛ nyɛn ma wati, ya yaa fun a ŋɔ mau di nara vɛ daŋni tum tumi, o wa lawa ba di diwe.
11Ya funɛ nu di ma bɔnɛ ya zanyɛrka timwa a la zu ba dɔŋtima wɛ ni. Chendaha ya sɔbi nan a nyɛ ma. 12Ya ŋɔ bau ya kunyana Yesu Kristo sɔn daha ba nyɛ ba se sɛrɛ ka ba di ba titi bara wilim aa kitum ba tuma balimm.
13Mu niinbisa, ma ta wa ku wa tum were tumi ni. 14Nandigi nyɛn dooni a vɛ daŋni o tiŋ chenani ya sɔbi tɔn nɔ nan, ma ta nyɛ o lagmi ma ni, chen ni o zi na hiisau. 15Ma ta ya un a chi o ya ma dɔmnɛ, amaa ma kpaŋi a burgi o nyuha o tiŋ nyinbaan ti a chi ma niinbe.
Pɔɔl Mak Tɔn Nɔ Bar Nɔwa
16Ya kunyana naa ya bara sɔɔn tiina, waa la zi nyɛ ma bara sɔɔna saha maga, a nyɛn ma wati.
17Min, Pɔɔl, zaami mau. Mu titi la sɔbi sɛm na. Mu tɔna maga ni nannɛ mu yaa sɔbi mu sɔn.
18Ya kunyana Yesu Kristo suŋi ma maga.