2 PITA

PITA BILƐ TIINA TƆN

¹Mu waa, Simɔn Pita, naa ya Yesu Kristo tumtumna awa o nitumi, min la sɔbi tɔn nɔ a nyɛ ba naa se su Yesu Kristo a chi ya se su un chen.

Ya se suuli ti kaalɛɛ. Waa ya wuti tiina. Chendaha ya se suuli ti awa ma se suuli naa ma kpak un ya kibɛgim. O gbanko ya Koosa a fun yisi ya a li ya tum tagna ni.

²Lalaknɔ ma zim Koosa awa ya kunyan Yesu. Chendaha Koosa zi suŋi ma a kinyɛ ma bara sɔɔna aa gbaari.

Koosa Funɛ Lisi Ma A Nyɛ O Titi Ni

³Waa funɛ yir ya di o wa ya bɔni o jirima awa o chaani kinkan awa chenani o bambi du a fun kpa o kpok awa kin naa maga ya daŋni a nyɛ ya, chen ni ya zi kotiu a tum tum were a tiŋ un nɛnɛ. O ya chene a li chenani ya zim un ni. ⁴O vɔwɛ zenu kinkan a kaali kina maga. Ya wa la o kin naa o fun a vɔu di o nyɛ ya chen, ma zi kotiu a chɔ li ma titi daŋnɛ a naa la chɔk tɛɛnɛ nɔ tim maga, a wa bɔni chenani Koosa duu. ⁵Kin nama daha, ma nyɛ ma se sɛri a gbaari chenani ma se su Koosa. Ma ya nibin were a zim o tutɔ, ⁶a ya bambe tima a kidi ma namsi, a tiŋ un nɛnɛ, ⁷a ya nibin were ma dɔŋtima wati a kidaŋni ba. ⁸Ma tum tum were nama a gbaari, a zi nyɛ chenani ma zim ya kunyan Yesu Kristo bukoo zenu a gbaari. ⁹Amaa nara vɛ tum chen, ba chi nyulumiwa ba naa vɛ na nyinbaannɛ a vɛ koti a tiŋ nɛnɛ. O funɛ sugli chenani Koosa fun gil o tum tagna a nyɛ unu.

¹⁰Mu niinbisa, Koosa fun lisi ma a yir ma. Chendaha ma nyɛ ma se sɛri a gbaari, chen ni ma zi a kpaku nɛnɛ. Ma kpak chen nɛnɛ, ma wa zi kut nyuksi o nyinbaan ti, ¹¹ka ya kunyan Yesu Kristo zi la ma du koor naa nyɛnɛɛ hali saha naa vɛ kpak bɔ, ni. Waa funɛ yisi ma a li ma tum tagna ni maa tiŋ un.

¹²Mu zimu di ma piin zim kin nama wɛu ka ma kpak o wuti naa ma la chen ma bambe ni nɛnɛ, amaa mu daŋni ma lisi a wɛu. ¹³Amaa mu ha vɛɛn nyɛn bar nɔ nan, o deŋlu di mu sɔbi tɔn nɔ a nyɛ ma, chen ni ma zi bukoo kilisi a wɛu. ¹⁴Mu zimu di o wa zi vusi ka mu sou a chi chenani ya kunyan Yesu Kristo fun ŋɔ min chen. ¹⁵Mu wa sou, mu tɔn nɔ zi nyɛ ma nyinbaanu maa lisi kin nama maga wɛ.

Mu Funɛ Na Kristo Jirima Kinkan Wa Mu Se Ni

¹⁶Ya funɛ biksi ma chenani ya kunyan Yesu Kristo zi wa bur wa wa o kpok ni, ya wa fun a ŋɔ mura naa kpak nɛharɛ a nyɛ ma. Ya funɛ ŋɔ ma chenani ya fun na o zenu awa o kpok ti kinkanu wa ya se ni. ¹⁷Ya wa un funɛ nyɛn bi nyuha ni, ya kunyana Koosa fun nyɛ un jirima awa chaani kinkan a nyɛ ta li o bar chaani a ŋɔ, “Mu be daŋni nɛɛnɛ. Waa ya min lɛmlɛm kinkan.” ¹⁸Ya wa un funɛ nyɛn dooni, ya fun nu ta ti ka o li buudaha ni.

¹⁹Adaha sɛm naa Koosa witinsa fun sɛm saha digi, a ya wuti sɛmwa. O lawa maa nu au nɛnɛ. Ba sɛma chi fitina naa la chaani birsa nɛɛ hali Yesu Kristo wa bur wa. O fitin ti zi wa chiŋi a bar chiŋi niu a nyɛn ma bambe ni. ²⁰O lawa ma zimu nɛnɛ di chenani Koosa witinsi ta fun sɔbi a li Koosa sɛm tɔn ti ni wa fun li ba titi nɛɛ. ²¹Koosa witinsi ta sɛma wa fun li nibinsa watɛɛ, amaa Koosa siim weri ti funɛ kpa o sɛma a nyɛ ba di ba kpa a biksi nara.

Chenani Nara Bɔnɛ Daŋni Ba Mur Ma

(Juud 4-13)

¹Witinsa ba naa funɛ vɛ zim Koosa, fun wa biksi Ju tima saha digi. Nibiksɛ ba naa vɛ zim un gbanko zi lagmi ma niu a sogli a biksi ma. Ba biksi naa vɛ ya wuti a la chɔk, wa tɔ ya kunyana naa siwɛɛ ba daha. Chendaha Koosa zi wa chɔk bau lalaga. ²Nidamata zi wa tiŋ bau aa tum chɔkumsi tuma, chen ni nara zi chɔk Koosa wuti nyinbaan ti sɔnu. ³Nibiksɛ ba naa ya se tima, zi biksi ba titi murau a nyɛ ma, a na nyɔɔra a li ma ni. Amaa Koosa wa zi vusi a wa di ba sɛria a na ba galimsa a ta ba yɔri.

⁴O funɛ kpa o malaikasa ba naa funɛ tum tum tagna, bɔnɛ a du din dam ni. Waa funɛ nyɛ ba kpa ba a ta birsa bar nyɛni ni hali saha naa Koosa wa wa di o di tɛɛnɛ nɔ tim maga sɛria. ⁵Tɛɛnɛ nɔ tima ba naa funɛ nyɛn saha digi aa tum tum tagna kinkan, o fun a kpa ni a su tɛɛnɛ nɔ maga ba siti. O fun a yisi Nowa di o ŋɔ nara tima ni di ba bur aa tum tum were. Ni ti funɛ wa su, o wa nara banɔpɛ duŋduŋ funɛ nyaŋi a fosi. ⁶Koosa fun kpa din a du Sɔdɔm awa Gamɔra nara ba naa funɛ tum tum tagna kinkan saha digi, ni di ba maga siti. O funɛ daŋni o biksi ba naa la tum tum tagniwa chenani o zi wa ya a nyɛ ba. ⁷Baal digi funɛ nyɛn doon ba yir un Lɔt. Nara tima chɔkumsi tuma fun a muksi un kinkan, domi o funɛ ya nibin werire. Chendaha Koosa fun yisi un a li ba wati. ⁸Wuzu kam o yaa fun a nau a la nu nara tima tum tagna a naa nyɛ o bambi wi kinkan, wɛ. ⁹Koosa zim chenani o yisi ba naa la tiŋ un nɛnɛ a li ba namsi niu. O gbanko zimu chenani o chiŋsi ba naa la tum tum tagna hali saha naa o wa wa di o di tɛɛnɛ nɔ tim maga sɛria a lɛrgi ba diŋsa. ¹⁰O zi lɛrgi ba naa la tiŋ ba titi daŋnɛ aa vɛ tiŋ o nɔ, diŋsau hali a vɛ weri. Nibiksɛ na kpak ba bambewa a zer ba titi.

Ba wara nyɛ o malaikasi ta wa jirima, amaa ba ka pini ba zomwa. ¹¹Koosa malaikasa ba naa kpak kpok kinkan a kaali nibiksɛ ta kpok, ba wara fiksi akoo a pini ba Koosa suwachak ni. ¹²Amaa nara nama chi sela zenewa a naa nyɛn dooni nara zi kpaksi a kpu. A wara lisi a chi nibinsa. Kin nawara ba vɛ zim a munwa, ba pini. Chendaha Koosa gbanko zi chɔk bau a chi sel na chɔk chen. ¹³Ba funɛ nyɛ nidamata namsiu. Chendaha Koosa zi nyɛ ba na namsiu. Ba tusa sɔɔniu baa tum tum tagna a su chenani ba bara daŋni nara maga suwachak ni. Ma wa ba lagmɛɛ a di diwe, ba yaa ya chene a nyɛ hiisa kpak ma. ¹⁴Saha maga ba dɛu nihaana a daŋni ba, chen ni ba wa ba zi tum chɔkumsi tumau. Baa tum tum tagniwa a vɛ puŋi. Ba kpa ba naa vɛ kpak kpok a mo ba lo. Ba ya se timwa kinkan. Chendaha Koosa fun ŋɔ nɔ a nyɛ ba. ¹⁵Ba vɛu di ba wa zi tiŋ Koosa wuti nyinbaan ti a vɛ zim doonani ba laali. Ba chi Belam, Bɔsɔ be, naa funɛ nyɛn saha digirɛ, a la daŋni malɛ naa o na a li o tum tagna daha. ¹⁶Amaa kokum fun wa ŋɔ un a chi nibine ta a burgi o nyuha di o gil o galɛŋ tuma.

¹⁷Nibiksɛ nama chi bugul hulɛwa awa dobaala nawara vɛ kpak dooni. Koosa zi wa kpa bau a du birsa bar nyɛni naa o kpa chiŋsi ba kinkan, niu. ¹⁸Ba sɛma la biksi ya di ba ya womniwa a la daŋni sɔna. Saha maga ba yaa sɛm sɛm lɛmawa a nyɛ nara ni a mur ba di baa tum chɔkumsi tuma. Nara nama piili di ba tiŋ Koosa nyinbaan ti a gil ba naa la tum tum tagna. ¹⁹Nibiksɛ ta la biksi nara di ba naa nuɛɛ a tiŋ ba, ba lisi ba a ta, amaa ba titi ya tum tagna a naa la chɔk ba, yosiwa. Kinkin naa nyaŋi nibine, nyɛ o burgi kin ti yoma. ²⁰Nara wa zim ya kunyan Yesu Kristo a nyɛ o yisi ba a li tɛɛnɛ nɔ tim maga tiŋi ni ka ba burgi a zu tɛɛnɛ nɔ tim tum tagna ni a nyaŋi ba, chenani ba nyɛn taginɛɛ a kaali chenani ba fun nyɛn. ²¹Ba funɛ te wa zim Koosa wuti nyinbaan ti a vɛ Koosa chiksɛ ta a li a gantɛl ni. Ba fu vɛ wa zim o wuti nyinbaan ti, chen fu bɔɛɛ. ²²Chenani ba fun tum biksi ya di jɛɛgɛ ta ya wutirɛ. Ya ŋɔ, “Vaha yaa ok, a bur la di un. Kurchu naa ba sɔ ni, yaa bur a la chɔ vɛrɛ ni.”

Ya Kunyana Funɛ Vɔwu Di O Bur Wa

¹Mu bi daŋnɛ, nɔnɔ ya tɔn bilɛ tiina mu sɔbi a nyɛ ma. Tɔna lɛ na tuha, mu daŋni maa lisi tu chaan kina wɛwa. ²Mu daŋni maa lisi sɛm naa Koosa witinsi ta fun sɛm saha digi wɛwa awa chenani ya kunyana naa funɛ yisi ya a li ya tum tagna ni yaa tiŋ un, fun a biksi o nitumɛ. Ba fun kpa chenani ba nu a wa biksi ma. ³O lawa ma zimu di tɛɛnɛ nɔ maga siili saha wa dugli, nibinsa ba naa yaa tiŋ ba tutɔ daŋnɛ, zi wau. Ba zi wa mɔmsi mau, ⁴a ŋɔ, “Ma kunyan ti wa fun vɔu di o zi bur wauu? Leene o ka? Saha naa Koosa fun naami tɛɛnɛ nɔ maga hali wa zinan, wu digi ha wa chɛrgi.” ⁵Ba vɛu di ba wa zi zim di saha digi Koosa funɛ sɛm sɛmwa a naami buudaha awa tɛɛnɛ nɔ maga. O fun nyɛ tɛɛnɛ si nii ni, ⁶a fun bu kpa ni ti a su tɛɛnɛ maga o chɔk. ⁷Lalaknɔ Koosa chiŋɛ buudaha awa tɛɛnɛ nɔ maga hali a wuzu naa o kaa di ba naa la tum tum tagna sɛria. O sɛria diili wa peti, o zi kpa dinu a chɔk a maga.

⁸Mu bi daŋnɛ, ma ta sugli di Koosa na wuzu bɛgimnɛ o chi bun tusuk bɛgimnɛ. O ka na bun tusuga o chi wuzu bɛgim. ⁹Nara bɔnɛ lisi di ya kunyan ti vusiu a vɛ tum chenani o fun vɔwi. O daŋni ma gil ma tum tagniwa aa tiŋ un, chen ni o wa zi wa chɔk ma. Chendaha o kpak ma kanyita.

¹⁰Ya kunyan ti wa wa, o kaa wa chi chenani ŋmɛɛr ya wa chene. Chen wuzu ti wa tel, o zi jimu a chi dinful. Buudaha zi wa nyigmiu ka din wa di tɛɛnɛ maga. ¹¹Wuzu digi buudaha awa tɛɛnɛ nɔ maga zi wa chɔku a chi chen, nibin baŋwa ma kaa wa chi? Ma ya tu chaan tima a kitiŋ Koosa nɛnɛ, ¹²a pɔ di ma na Koosa waali tɛɛnɛ nɔ maga sɛria diili a kpak un ma bambe ni di o wa lalaga. Chen wuzu ti din zi wa chɔk buudahau. ¹³Amaa Koosa funɛ vɔu di o zi naami buudaha fali awa tɛɛnɛu. Ba naa maga nyɛn a ni wa zi bu koti a tum tum tagna. Ya kpak un ya bambe ni di ya pɔ un o ya.

¹⁴Mu bi daŋnɛ, chenani ma ya chen, o lawa ma kpak se sɛmu awa tu chaan tima a kpak sɔn weri Koosa suwachak ni ka ma wa un kpak nɔ bɛgim. ¹⁵Ma lisi chenani ya kunyan ti nyɛ narawa nyinbaan lalaknɔ di ba gil ba tum tagna aa tiŋ un. Koosa funɛ kpa o zimarɛ a nyɛ ya niinbe daŋni Pɔɔl ni o fun sɔbi chen wɛ a nyɛ ma. ¹⁶O sɔbi kin nama wɛu a li o tɔna maga ni a nyɛ nara ni. O bɔmu di nara zim Pɔɔl biksi ti bɔnɛ mun. Chendaha ba naa vɛ zim Koosa a ya bambi bilɛ tima, bɔnɛ kpa un a chɛrgi o vɛ ya wuti ba biksi nara. Ba gbanko kpa Koosa sɛm tɔn ti a chɛrgi a biksi nara. Koosa zi wa chɔk bau.

¹⁷Amaa, mu bi daŋnɛ, ma piin zim kin nama wɛu. Maa il a ta nyɛ nibiksɛ ba naa la chɔk Koosa laaboor weri ti, wa mur ma a burgi ma Koosa wuti tiŋi ni ma chel ma bar kpok ni. ¹⁸Ma ka nyɛ ya kunyan Yesu Kristo suŋi ma ma wa zim un nɛnɛ aa gbaari. Ma nyɛ ya nyɛ naa funɛ yisi ya a li ya tum tagna ni, jirima kinkan hali saha naa vɛ kpak bɔ. Ami.