2 JƆN

JƆN BILƐ TIINA TƆN

¹Mu waa, nihɛɛ, la sɔbi tɔn nɔ a nyɛ nihaan naa Koosa fun lisi a nyɛ o titi ni awa o bisa ba naa mu daŋni kinkan.

Mu duŋduŋ laata la daŋni ma chen, amaa ba naa maga zim Koosa wuti, ba daŋni ma chene, ²domi wuti naa nyɛn ya maga bambe ni. Wuti ti zi kut nyɛnu hali a vɛ peti.

³Mu zaami mau. Ya kunyana Koosa awa o be Yesu Kristo zi suŋi ya magau a kiɔm ya siki a nyɛ ya bara sɔɔna, chen ni ya zi tiŋ wuti tiu nɛnɛ aa kidaŋni dɔŋa.

O Lawa Ya Tiŋ Koosa Wuti Biksiu A Kidaŋni Dɔŋa

⁴Mu tuha sɔɔnɛu kinkan domi mu funɛ na ka i bisi ta bɔnɛ tiŋ wuti ti a chi chenani ya kunyana Koosa fun ŋɔ di ya tiŋ chen. ⁵Adaha mu sumi hinu ii tiŋ Koosa chiksɛ naa ya fun nu a li o piili ti ni chen. O wa ya chiksi falirɛ. O ŋɔ di o weru wa yaa daŋni dɔŋau, ⁶aa kitiŋ o nɔ. O chiksi naa ŋɔ ya di o lawa yaa daŋni dɔŋau, ma gbanko funɛ nu o wɛu a li o piili ti ni.

⁷Lalaknɔ nusun tima kinkan nyɛnɛɛ. Ba wa la nɔɔni di Yesu Kristo funɛ wa tɛɛnɛ nɔ maga a wa burgi nibine. Ba naa vɛ la nɔɔni chen, ba ya nusun timwa a ya o dɔma. ⁸Ma nyini ma titi nɛnɛ, chen ni ma wa zi wa chel a chɔk ya tuma. Ma ya chen, ma zi wa na papaha naa Koosa kaa wa kpa nyɛ ma wuzu digiu.

⁹Nandigi kpa wu digi a gbaari chenani ya fun biksi ma Kristo wɛ chen, Koosa wa to chen tiin ni. Ma kpak chenani ya funɛ biksi ma Kristo wɛ chen, Koosa awa o be Yesu zi nyɛn ma niu. ¹⁰Nandigi wa ma wati a wa gbaari chenani ya fun biksi ma Kristo wɛ chen, ma ta la un amaa ma ŋɔ un di o la. Ma ta tiŋ un li ta nyinbaan ni. ¹¹Ba naa nyɛ un jirima, chen tima gbanko ya tum tagin nitumɛwa a chi un.

Jɔn Mak Tɔn Nɔ Bar Nɔwa

¹²Mu kpak wu damatiwa a kaa ŋɔ ma, amaa mu wa zi sɔbi a a dau lalaknɔ. Mu daŋni mu wa ma watɛɛ, chen ni ya zi koti a na dɔŋau a sɛm a wɛ. Doone ya maga tusa zi sɔɔni hali a wa peti.

¹³Ma towe bisa naa Koosa fun lisi a nyɛ o titi ni chen, ba zaami mau.