1 TƐSALƆNIKA TIMA

TƐSALƆNIKA TE TEL TIMA TƆN

¹Min, Pɔɔl, awa Silvenus wa Timoti zaami ma naa tiŋ ya kunyan Yesu chenu a li Tɛsalɔnika ni. Mu waa, Pɔɔl, la sɔbi tɔn nɔ a nyɛ ma. Ya kunyan Yesu Kristo ti awa ya kunyan Koosa dɔ ma.

Waa la zi suŋi ma a nyɛ ma bara sɔɔna.

Ma Se Su Koosa Nɛnɛ

²Yaa zaami Koosau saha maga a la sumi un ma daha. ³Yaa ŋɔ ya kunyan Koosau chenani maa tum o tuma domi ma se su un. Maa tumu hali a wa ku, domi maa daŋni unu kinkan aa tiŋ un wa kanyita ni. ⁴Mu niinbisa, ya zimu di Koosa daŋni mau a fun lisi ma a nyɛ o titi ni. ⁵Domi ya funɛ te wa biksi ma Koosa laaboor weri ti wɛu, o wa fun ya ya sɛma duŋduŋnɛ ya biksi ma. Koosa siim weri ti funɛ kpa o kpok ti a du un ni. Chendaha ma nidigi vɛ beeli. Ma funɛ na chenani ya nyɛni maga duu a la biksi ma. Ma daha ya fun nyɛn chen, ⁶ka ma fun a tiŋ ya awa ya kunyan ti. Domi ma funɛ la nɔɔniu Koosa laaboor weri ti ni, nara funɛ muksi ma kinkan, amaa Koosa siim weri ti funɛ nyɛ ma tusa sɔɔniu kinkan. ⁷Chendaha ba naa maga se su Yesu a nyɛn Masɛdonia pulum awa Girik tim pulum ni, funɛ tiŋu a chi chenani maa tiŋ chen. ⁸Ma waa funɛ kpa Yesu laaboor weri ti a wa ŋɔ ba o wɛ, ba naa nyɛn bawu maga ni funɛ nu ma wɛu di ma se su Koosa. Ya wa bur a daŋni ya sɛm kinkan. ⁹Saha naa ya fun wa ma wati chen, ma funɛ la ya a duu a nu ya sɛma. Nara maga ŋɔ yau chenani ma gil vuga jirima nyɛɛli a burgi a tiŋ Koosa naa ya wuti tiina awa miisa tiina. ¹⁰Lalaknɔ maa tum o tumwa a la pɔ o be Yesu naa kaa wa li Koosa tɔhɔn ti ni a bur wa. Koosa funɛ lɛli unu a li o sou ni. Waa ya naa la zi yisi ya a li chenani Koosa zi na paan a du ya a lɛrgi ya diŋsa ni.

Chenani Ya Wa Ma Nyɛn Tɛsalɔnika Ni

¹Mu niinbisa, ma titi zimu di ya funɛ nyɛn ma wati, ya tusa funɛ sɔɔni awa chenani ya tumu. ²Ma zim chenani Filipai tima fun te tum tum tagna a du ya ni a la pini ya kinkan ka ya zi wa pu ma Tɛsalɔnika ni. Ya funɛ nyɛn ma wati, ba naa funɛ nyɛn dooni ha vɛɛna muksi yau kinkan, amaa Koosa funɛ nyɛ ya o kpoku ya kpak bambi a ŋɔ ma o laaboor weri ti wɛ. ³Laaboor weri naa ya funɛ sɛm ma a la sumi ma di ma nu, o maga funɛ ya wutirɛ. Ya wara daŋni ya suni wɛ di ya mur ma a kidaŋni nyɔɔra ma daha. ⁴Ya sɛm sɛm naa Koosa daŋni ya sɛmnɛ domi waa funɛ lisi ya. Waa funɛ kpa o laaboor weri ti a du ya nisi ni, chen ni ya zi kotiu a biksi nara. Ya wara daŋni di nibinsa tusiwa sɔɔni, amaa ya daŋni Koosa tuhurɛ sɔɔni. O zim chenani ya bambe lisi duu. ⁵Ma zim nɛnɛ di ya funɛ biksi ma chen, ya wa funɛ pɛgi ma wa ya nyina nɛɛ a la mur ma. Ya wa funɛ mur narawa di ya la kina. Koosa ya ya sɛhɛra tiina kin nama ni. ⁶Ya wa funɛ daŋni sɔniwa ma wati koo nandigi wati. ⁷Ya fu daŋni ya kpak kpok ma wati, ya fu zi koti a kpak unu domi ya ya Kristo nitumɛ tawa. Ya funɛ nyɛn ma wati, ya funɛ kpak kanyitau dɛɛsi ma a chi nihaan yaa dɛɛsi o be chen. ⁸Domi ya funɛ daŋni mau kinkan, o wa fun ya di Koosa laaboor weri ti duŋduŋnɛ ya funɛ daŋni ya kpa a nyɛ ma. Hali ya funɛ daŋni ya kpa ya titi miisarɛ a nyɛ ma. ⁹Mu niinbisa, ma lisi chenani ya funɛ tum saha maga hali a wa ku, chen ni ya zi kotiu a biksi ma Koosa laaboor weri ti a ta bu muksi ma diwe daha.

¹⁰Ma waa ya ya sɛhɛra tima. Koosa gbanko ya ya sɛhɛra tiina. Ya nyɛni kpa la ma wati funɛ deŋliu a wer kinkan. Nandigi wa fun koti a na ya galimsa. ¹¹Ya funɛ dɛɛsi ma a chi chenani nyama dɛɛsi ba bisa chen. ¹²Ya funɛ belimi mau a la kpami ma a ŋɔ ma di ma tum tum naa la zi sɔɔni Koosa tuha. Waa ya naa funɛ yir ma di ma wa zu o koor ti. O wa ma zi wa bɔni o jirima awa o chaaniu wuzu digi.

¹³Ya gbanko yaa zaami Koosau domi ya funɛ a wa ma wati a fun ŋɔ ma Koosa sɛma, ma funɛ nuu a la nɔɔni di a ya wutiu. A wa fun ya nibinsa sɛmwa amaa Koosa titi sɛmwa. O kpa o sɛma aa du ma naa se su un di aa tum ma ni. ¹⁴Mu niinbisa, kin nawara funɛ ya Koosa nitiŋɛ ba naa funɛ nyɛn Judia pulum ni a tiŋ Yesu Kristo chen, chen vɛɛna ya ma doon gbanko chen ni. Ma titi nara funɛ muksi ma kinkan a chi Ju tima funɛ muksi Yesu nitiŋɛ ta a li Judia pulum ni. ¹⁵Ju tim ta funɛ kpu ya kunyan Yesu, ka ba bɔnɛ fun kpu Koosa witinsi ta. Ba bɔnɛ fun bukoo a namsi ya kinkan a duŋni ya a ta. Nara nama wa fun sɔɔni Koosa tuha. Ba ya nara maga dɔmwa. ¹⁶Ba funɛ daŋni ya gil Koosa laaboor weri ti a ta sɛm kinyɛ ba naa vɛ ya Ju tim ni, domi ba nuɛɛ, Koosa fu zi koti a yisi bau a li ba tum tagna ni. Chen funɛ ya ba tum tagin a kaali ba tum tagna maga. Lalaknɔ Koosa na paanu kinkan a du ba ni a zi wa ta ba yɔri.

Ya Kpak Unu Ya Bambe Ni Di Ya Bu Wa Na Ma

¹⁷Mu niinbisa, ya waa wara, ba funɛ waligi yau a li ma ni, ya wa fun koti a na dɔŋa wuzu bilɛ. Amaa ya ha funɛ vɛɛn a lisi ma wɛu. Ma wɛ funɛ nyɛn ya bambe niu ka ya funɛ kpaŋi kinkan di ya wa na ma. ¹⁸O wa ya di bu bɛgimnɛ mu waa, Pɔɔl, funɛ kpaŋi di mu bur wa ma wati, amaa sintana funɛ tɔ ya nyinbaanu. Ya fun vɛ koti a waali. ¹⁹Amaa ma duŋduŋ ya ya jirima nara a nyɛ ya tusa sɔɔni a nyɛ ya kpak bambi bɛgim, domi saha naa ya kunyan Yesu wa bur wa, ya zi wa a di nyusumu o suwachak ni ma daha. ²⁰Wuti ma waa ya ya jirima nara a nyɛ ya tusa sɔɔni kinkan.

¹A saha ti mu funɛ pɔu hali a wa ku a vɛ nu ma laaboora, adaha mu fun la nɔɔni di mu ha kpalimi Atɛns ni mu duŋduŋ, ²a fun a tum mu niinbe Timoti ma wati. Mu wa un lagmi aa tum Koosa tuma a la ŋɔ nara ni Koosa laaboor weri ti Kristo wɛ. Mu funɛ tum Timoti di o wa kpami ma a suŋi ma di ma se su Yesu nɛmɛ. ³Ma ta bur gantɛl ba la muksi ma daha. Ma zimu di o ya Koosa tutɔrɛ di ba zi namsi ba naa tiŋ o nyinbaanu. ⁴Saha naa ya fun nyɛn ma wati, ya fun te ŋɔ ma di ba zi wa namsi mau. Chen fun wa ya a chi chenani ya fun piin ŋɔ ma chen. ⁵Saha naa ma wɛ fun wa muksi min kinkan, mu funɛ tum Timotiu ma wati di o wa na chenani ma du, a naa ma se ha vɛɛn su Yesu akoo ma se wa su un. Mu wa zim, ami sintana wa zaamsi mau ka ma tiŋ o nɔ ka ya tuma chɔk a ta yɔri.

⁶Timoti funɛ wa ma watiu a bur wa ya wati. Laaboor naa o fun wa a wa ŋɔ ya chen funɛ ya ya lɛmlɛmu kinkan. O funɛ ŋɔ yau chenani ma se su Yesu ka ma daŋni nara. O funɛ ŋɔ ya di ma ha vɛɛn a lisi ya wɛu nɛnɛ, a la daŋni ma na ya a chi chenani yaa daŋni ya na ma nan. ⁷Mu niinbisa, hali ya nyɛn muksi ni a la namsi nan, ma si suuli nyɛ ya tusa sɔɔniu ma daha. ⁸Ma kpak kpok a kitiŋ ya kunyan ti nɛnɛ, ya bambe zi kpoku ma daha. ⁹Ya wa zim chenani ya zi pɛgi Koosa. Ya waa sɛm ma wɛ o wati, ya tusa yaa sɔɔniu kinkan. ¹⁰Yaa sumi Koosau saha maga awa ba bambe ni di o nyɛ ya wa na ma bura, chen ni ya zi bukoo gbaari chenani ya fun piin biksi ma chenu a li Yesu nyinbaan tiŋi ti wɛ ni.

¹¹Ya kunyan Koosa awa ya kunyan Yesu wa nyɛ ya nyinbaan, ya zi wa ma watiu. ¹²Ya kunyan ti la zi suŋi ma maa daŋni dɔŋa kinkan awa nara maga a chi chenani yaa daŋni ma nan. ¹³Maa daŋni dɔŋa chen ni, Koosa zi nyɛ ma bambe kpoku, chen ni ya kunyan Yesu awa o walɛ maga a wa, ma zi wa kotiu a chiŋi ya kunyan Koosa suwachak ni awa tu chaana ka galimsa ta nyɛn ma ni.

Ya Tum Tum Were, Ya Zi Sɔɔni Koosa Tuhau

¹Mu niinbisa, ya funɛ biksi mau chenani ma zi tiŋ Koosa di o tu kisɔɔniu. Chene maa tiŋ chen. Amaa ya sumi mau Yesu sɔn daha di ma bukoo tiŋ chen a gbaari. ²Ma zimu di ya kunyan Yesu kpok nyɛn chenani ya fun biksi ma chen ni. ³Koosa daŋni maa tum tum were duŋduŋnɛ a gil chɔkumsi tuma maga hali o wa peti. ⁴Ma nibaal maga, maa zim ma titi kpaki nɛnɛ a kilisi lisi were a kpa haan wa o nyinbaan. ⁵Ma ta daŋni nihaana yɔri yɔri a chi ba naa vɛ zim Koosa. ⁶Nandigi ta daŋni o dɔŋtiin haan, akoo fuksi un. Nar la ya nan, o tum tum taginnɛ a nyɛ un. Ya funɛ piin ŋɔ mau kin na wɛu a tɛ ma nin kinkan di ba naa la tum tum tagna nan, Koosa zi wa lɛrgi ba diŋsau a ta ba yɔri. ⁷Koosa wa fun lisi ya di ya tum chɔkumsa tuma, amaa o funɛ lisi yau di ya tum tum were. ⁸Adaha ba naa wa vɛ ya biksi nɔ, o wa vɛ chenani nibinsa fun biksi, amaa o vɛ chenani Koosa funɛ biksirɛ. Waa funɛ kpa o siim weri ti a du ma ni.

⁹O wara daŋni mu sɔbi ma chenani ma zi daŋni dɔŋa, domi Koosa titi funɛ piin biksi ma nanu. ¹⁰Ya zimu di maa daŋni Yesu nitiŋɛ ba naa maga nyɛn Masɛdonia pulum ni. Adaha ya sumi mau ma ha vɛɛn kitum chen a gbaari. ¹¹Ma kpaŋi ma titi aa tum ma tuma balimm. Ma ta zu ma dɔŋtima wɛ ni. Ma gbanko kidi ma bara wilim ni a chi chenani ya fun piin a biksi ma chen. ¹²Maa tiŋ nan ni, ba naa funɛ vɛ di se wa zi su Yesu chen, ba zi nyɛ ma jirimau. Ma wa zi nyini nandigi se ni di o nyɛ ma kundɔŋ.

Ya Kunyana Zi Bur Wau Lalaga

¹³Mu niinbisa, ya daŋni maa zim wutirɛ ba naa funɛ siti chen wɛ, chen ni ma tusa wa zi wa chɔk a chi ba naa vɛ kpak bambi bɛgim a li Yesu ni chen. ¹⁴Ya se su di Yesu funɛ sou ka Koosa lɛli un a li o sou ni. Chendaha ya se su di Koosa zi wa lɛli ba naa se funɛ su unu a sou a chi o funɛ lɛli Yesu chen. Saha naa o wa wa, o wa ba zi wa bur wau.

¹⁵Ya waa la biksi ma chenani ya kunyan ti fun a biksi ya. Wuzu digi ya kunyan ti zi wa bur wau. O wa wa, ya naa kpak miisa bɔnɛ wa zi wa te la a ka ba naa sowɛɛ. ¹⁶Wuzu digi nara zi wa nu ya kunyan ti tau awa Koosa malaikasa nyuhu tiin ta wa o kaabul kuuli. Ba zi na ya kunyan ti titi ka o li Koosa tɔhɔn ti a tu wa tɛɛnɛ. O zi te a lɛli ba naa maga se funɛ su unu a li ba sou ni. ¹⁷O zi vaan lagmi ya naa kaɛɛ a kpak miisa, chen ni ya maga zi siu a la zini dobaala ni a la pu ya kunyan ti dooni a nyɛn o wati hali saha naa vɛ kpak bɔ. ¹⁸Ma ŋɔ laaboor weri nɔ a nyɛ dɔŋ ni aa kibelimi dɔŋa.

Ma Saksi A Pɔ O Bur Waali

¹Mu niinbisa, o wara daŋni mu bu sɔbi saha naa kin nama zi wa ya wɛ a nyɛ ma. ²Ma titi yaa zim di a wuzu naa ya kunyan ti kaa wa bur wa, o waa chi chenani ŋmɛɛr yaa wa dusum chene. ³A saha naa nara yaa sɛm di alaafɛ nyɛnu ka ba vɛ ɔm kundɔŋ, muksi kinkan ya vaan wa pu ba lalaga. Ba nidigi wa zi li muksi ti ni. O zi jɛri bau a chi nihaan naa kpak lo. O wa kaa lul, wiili ti yaa jɛri unu. ⁴Mu niinbisa, ma zim a wuzu naa Yesu zi wa bur wau. Chendaha o wa zi jɛri ma a chi ŋmɛɛr. ⁵Ma maga chi fitin timwa aa tum gbampulim ni. Ya wa chi birsa tima a sogli aa tum. ⁶O wa werwa ya chɔ do a chi ba naa vɛ zim Yesu la chɔ do chen. Ma nyɛ ya si a si chiŋi a ta zɔɔli a chi ba naa nyɔ sin aa dɛɛsi. ⁷Dusum nɛ nara nyɔ sin aa dɛɛsi a la chɔ do. ⁸Ya chi fitin tima, ma ta nyɛ ya dɛɛsi chen. Ma nyɛ ya se suuli a kidaŋni nara a kpak bambi bɛgim di Koosa zi yisi yau a li ya tum tagna ni hali a wa peti. Ya ya chen ni, sintana wa zi nyaŋi ya. ⁹Koosa wa fun lisi ya di o na paan a du ya ni a ta ya yɔri, amaa o funɛ lisi yau di o yisi ya a li ya tum tagna ni hali a wa peti ya kunyan Yesu Kristo daha. ¹⁰O funɛ sou ya daharɛ chen ni o wa bur wa, ka ya maga ha vɛɛn nyɛn akoo a siti, ya zi wa kpak miisau a nyɛn o wati. ¹¹Nan daha, ma kpami dɔŋa aa kisuŋi dɔŋa a chi chenani ma piinsa ya.

Pɔɔl Mak Tɔn Nɔ Bar Nɔwa

¹²Mu niinbisa, yaa sumi mau di ma nyɛ ba naa ya kunyan ti fun lisi di ba ya ma nihɛɛta chen, wa jirima. Ba waa la tum o tuma kinkan ma wati a la nyini ma. ¹³Ma nyɛ ba jirima kinkan aa kidaŋni ba, domi tum naa baa tum nan daha. Ma la nɔɔni dɔŋ ni.

¹⁴Mu niinbisa, ya ŋɔ mau wuti ni, ma ŋɔ nibin yarɛ ni a kikpami ba, a kisuŋi ba naa la ɔm wa ba kpak bambi, a kisuŋi ba naa se suuli gbarɛgɛɛ, aa kpak nara maga wa kanyita. ¹⁵Ma ta tum tum tagin a bɔ tum tagin. Maa kpaŋi a tum tum were duŋduŋ aa nyɛ dɔŋ ni awa nara maga ni.

¹⁶Ma kut kpak tu sɔɔna kinkan, ¹⁷a kisumi Koosa saha maga, ¹⁸aa pɛgi un a li kin naa maga ya ma ni. Chene Koosa daŋni ma tum aa kitiŋ Yesu Kristo.

¹⁹Ma ta tɔ Koosa siim weri ti tuma. ²⁰Ma ta sɛm sɛm tagna a nyɛ laaboor naa Koosa witinsa ta sɛm a li o kpok ti ni chen. ²¹Ma nyini ba sɛma maga a nɛɛ a weru. A were ma kpak a. ²²Koosa siim weri ti kpok vɛ nyɛn ba sɛm ta ni, ma vɛ a.

²³Koosa naa la nyɛ ma bara sɔɔna, zi nyɛ maa tum tum wereu a gbaari. O zi kok ma awa ma lisi wa ma siimau a li wu tagna ni, chen ni a zi weru hali saha naa ya kunyan Yesu Kristo wa bur wa. ²⁴O waa naa funɛ yir ma di ma wa o wati, ya wuti tiina. Chendaha o zi kok ma.

²⁵Mu niinbisa, maa sumi Koosa a nyɛ ya gbanko ni, ²⁶a kizaami ya niinbisa maga nɛnɛ.

²⁷Mu kpak ya kunyan ti kpoku di mu ŋɔ ma ma karimi tɔn nɔ a nyɛ Yesu nitiŋɛ ba naa maga nyɛn dooni.

²⁸Ya kunyan Yesu Kristo kisuŋi ma.