PITA TE TEL TƆN
11Mu waa, Pita, naa ya Yesu Kristo nitumi, la sɔbi tɔn nɔ a nyɛ ma naa nyɛn Pɔntus, Galesia, Kapadosia, Azia awa Baitinia pulumsi ni.
Ma ya hɔɔrawa tɛɛnɛ nɔ maga ni. Koosa funɛ lisi ma a nyɛ o titi ni. 2O funɛ ya ya kunyana Koosa tutɔrɛ saha digi o fun lisi ma chen. O siim weri ti waligi ma di ma burgi o nibin were, chen ni ma zi tiŋ Yesu Kristo nɔu. O sou chɛl ti la zi chaksi ma tum tagnau a li ma ni.
Koosa suŋi ma a nyɛ ma bara sɔɔna aa gbaari.
Ma Kpak Bambi Bɛgim A Li Kin Naa Koosa Zi Nyɛ Ma Ni.
3Koosa naa ya ya kunyan Yesu Kristo nyana, funɛ ɔm ya siki kinkan. Chendaha ma nyɛ ya pɛgi un saha maga. O funɛ lɛli Yesu Kristo a li o sou ni, a kpa o mi fali ti a nyɛ ya. Chendaha ya kpak bambi bɛgim, 4di wuzu digi ya zi la kiwere naa o fun kpa a chiŋsi o dɛ niu a li o tɔhɔn ni. A wa zi kut chɔk dooni. 5Koosa kpa o kpok a nyini ma naa se su un. O funɛ piin saksiu di o yisi ma a li ma tum tagna ni hali a wa peti. Tɛɛnɛ nɔ maga siili saha wa tel, o zi wa ya chenu gbampulim ni.
6Ma nyɛ ma tusa sɔɔni kin nama daha. Lalaknɔ sintana la zaamsi ma a li wu kurgɛ ni, chen ni ma tusa zi chɔku wuzu bilɛ. 7Nibinsa yaa kpa salmau a du din ni di o burgi kiweri. Chen vɛɛna, Koosa nyɛ sintana zaamsi ma, chen ni o zi biksi di ma se suuli naa ma kpak un ni, chen ya wutirɛ. Ma se suuli ti Koosa wati, o kaali salma naa la zi wa chɔku. Saha naa Yesu Kristo wa bur wa nara suwachak ni, Koosa tuha zi sɔɔniu wa ya ni ka o zi nyɛ ya o jirima awa o chaani kinkan. 8Ma ha wa na un, amaa maa daŋni unu ka ma se su un. Chendaha Koosa piin nyɛ ma tu sɔɔna hali a la gali. 9Ma se un daha, o zi wa yisi mau a li ma tum tagna ni hali a wa peti.
10Saha digi Koosa witinsa funɛ biksi nara chenani o zi suŋi ma a ya chen. 11Koosa siim weri naa funɛ nyɛn ba ni, fun a biksi ba di wuzu digi Kristo zi wa namsiu a sou a si a li o sou ni a na jirima kinkan a li Koosa wati. Ba funɛ lisi kin nama wɛ a kpaŋi a dɛu saha naa Kristo zi wa wa. 12Koosa siim weri ti gbanko wa fun biksi o witinsi ta di ba wa tum a nyɛ ba titi nɛɛ, amaa ba tum a nyɛ ma nɛɛ. Koosa fun a tum o siim weri ti a li o tɔhɔn ti ni di o kpa o kpok ti a nyɛ ba naa funɛ wa biksi ma Koosa laaboor weri ti wɛ. O witinsi ta funɛ sɛm o laaboor weri ti wɛu a daŋni ma zim un. Hali Koosa malaikasa daŋni ba zim o laaboor weri ti munu.
Ma Kpak Tu Chaana A Li Ma Tuma Maga Ni
13Adaha ma saksi chenani ma lisi a ya bambe tima a kpak bambi bɛgim a li chenani Koosa zi wa suŋi ma. O be Yesu Kristo wa bur wa nara suwachak ni, Koosa zi ya chenu. 14Saha naa ma fun zɛ zim un, ma funɛ tiŋ ma tutɔ daŋnirɛ. Ma ta tiŋ chen lalaknɔ, amaa maa tiŋ Koosa nɔ nɛnɛ. 15Waa ya tu chaan tiina. Chendaha o fun a lisi ma gbanko di ma kpak tu chaana a li ma tum maga ni a nyɛ un. 16Ba fun a sɔbi a li Koosa sɛm tɔn ti ni di o ŋɔ,
“Mu ya tu chaan tiinnɛ.
Chendaha ma kpak tu chaana.”
17Maa sumi Koosa, ma yir un mu nyana. Wuzu digi o zi wa di nibinsa maga sɛriau a li ba tuma ni. O wara daŋni bɔnɛ aa gil bɔnɛ. Chendaha wuzuna a naa kaɛɛ nan, ma nyɛ un jirima kinkan. 18-19Ma lisi saha naa ma funɛ tiŋ ma nawaalsa nyinbaan naa funɛ ya yɔri chen, Koosa wa fun kpa salma akoo aniita a naa la zi wa chɔk, a la ma nyuuna a nyɛ ma di ma burgi aa tiŋ un. O ka fun a tum Kristo tɛɛnɛ nɔ maga ni di o wa sou o chɛl li. Koosa fun kpa chɛl weri ti a la ma nyuuna a nyɛ ma. Kristo funɛ chi piisibe werire naa Ju tima yaa fun kpa a la kɔrigi chene. 20O funɛ te lisi Kristore a zi naami tɛɛnɛ nɔ maga. Tɛɛnɛ nɔ maga siili saha wa dugli, Koosa fun tum un di waa tum nan a nyɛ ma. 21Kristo funɛ sou a li o daakakli ti ni, Koosa fun lɛli un a li o sou ni a kpa o jirima awa o chaani kinkan a du un ni. O daha ma se su Koosau ka ma kpak bambi bɛgim un ni.
22Ma funɛ nu Koosa laaboor weri naa ya wuti chen, ma fun a chaksi ma tusa a li ma tum tagna ni a tiŋ un, chen ni ma fun piili a daŋni ma dɔŋtima a li bambe ni. Maa daŋni ba kinkan ma bambe ni. 23Koosa sɛma nyɛnu hali saha naa vɛ kpak bɔ. A wa zi kut chɔk. Koosa fun a kpa o mi fali ti a nyɛ ma a daha. 24Ba fun a sɔbi a li Koosa sɛm tɔn ti ni a ŋɔ,
“Nibinsa maga chi kɔsawa a kpak bunɔɔta a chi kɔsa yeligisa.
Yeligisa yaa looriu.
Kɔsa ka hul.
25Amaa Koosa sɛma zi nyɛnu hali saha naa vɛ kpak bɔ.”
Kin nama ya o laaboor weri naa ba fun wa biksi ma chen.
2Yesu Kristo Chi Koosa Buŋkullɛ
1Kin nama daha, ma kpa ma tum tagna maga a ta. Ma ta suni wɛ a nyɛ dɔŋ ni a ta kpak handɔta a du dɔŋ ni a ta pini dɔŋ zoma. 2O lawa ma chi bichɛl pilimsa ba naa la daŋni ba numa ilwa. Saha maga o lawa maa daŋni Koosa biksiu, chen ni o zi kotiu a suŋi ma ma bi. O lawa ma biu, chen ni wuzu digi Koosa zi wa yisi mau a li ma tum tagna ni hali a wa peti. 3Ma zimu di Koosa funɛ suŋi ma.
4Ma wa dugli ya kunyan ti wati. O chi buŋkul naa Koosa fun lisi di o ya kizen a li o dam ni, amaa nisalɛ funɛ vɛ unu a ta. O kpa o mi fali ti a nyɛ ma. 5Ma naa kpak o mi fali ti, chi buŋkula a naa Koosa kpa sa o dam ti, chen ni o zi kotiu a nyɛn dooni. Ma chi ba naa funɛ ya o kɔkɔɔrsa saha digi, a kpa ma titi a nyɛ Koosa ni Yesu Kristo daha. 6Ba fun a sɔbi a li Koosa sɛm tɔn ti ni di o ŋɔ,
“Mu funɛ lisi buŋkul zenu naa mu kpa sa dɛ koŋa ni a li Jɛrusalɛm ni.
Ba naa maga se su Kristo,
o wa zi buti ba.”
7Waa ya nizen kinkan a li ba naa se su un ni. Amaa ba funɛ sɔbi ba naa vɛ un chen wɛu a li Koosa sɛm tɔn ti ni a ŋɔ,
“Buŋkul naa nisalɛ vɛ a ŋɔ di o ya yɔrirɛ,
waa ya buŋkul zen a kaali a maga.
8Buŋkul nɔ la zi mo nibinsi naŋgere ba chel,”
domi ba vɛu di ba wa zi nu Koosa laaboor weri ti. Koosa tutɔ funɛ ya chen.
9Amaa Koosa funɛ lisi mau a li birsi ni a wa di o titi bar chaani kinkan ni. Ma chi o koorsiwa awa o kɔkɔɔrsi tawa. O funɛ lisi mau a nyɛ o titi ni di ma ŋɔ nara ni o alaazibu tuma wɛ. 10Saha digi o wa fun dɔ ma, amaa lalaknɔ o dɔ mau. O wa fun a ɔm ma siki saha digi, amaa ma la unu lalaknɔ.
Ma Nyɛ Koosa Awa Kaŋkoorsa Awa Nara Maga Jirima
11Mu bi daŋnɛ, ma naa ya hɔɔra a li tɛɛnɛ nɔ maga ni, mu sumi mau di ma kpa ma tutɔ daŋnɛ a ta. Ya tutɔ daŋnɛ awa chenani Koosa daŋni yaa tiŋ, a chɔ aa du dɔŋ nɛɛ. 12O lawa ma kpak sɔn were ba naa vɛ zim Koosa watiu, chen ni ba wa fiksi ma di ma tum tum tagna, ba zi wa na ma tum were duŋduŋu. Koosa wa wa di o wa di tɛɛnɛ nɔ tim maga sɛria, nifiksi nama zi pɛgi unu ma daha.
13-14Ma kpak ya kunyan ti sɔn. Chendaha maa tiŋ kaŋkoorsa awa koorsa ba naa maga tiŋ ba gantɛl, nɔ. O vɔti bau di ba lɛrgi ba naa la tum tum tagna diŋsa a kipɛgi ba naa la tum tum were. 15O ya Koosa tutɔrɛ ma kpa ma tum were aa tɔ womna ba naa vɛ zim chenani ma tiŋi nɔ sɛma. 16Ma ya nibin hiisewa, amaa ma gbanko ya Koosa yosiwa. Ma ta tum tum tagna aa sogli domi ma ya nihiise daha. 17Maa daŋni ma dɔŋtima ba naa se su Yesu, a kinyɛ Koosa awa koorsi ta nyuhu tiina Siiza awa nara maga jirima.
Chenani Kristo Fun Namsi Ma Daha
18Ma tumtumsa, ma nyɛ ma kunyama wa jirima kinkan aa tiŋ ba nɔɔna. Ma kunyama ya jɛrgɛ akoo ba ya tu haasa timwa, ma nyɛ ba jirima aa kitiŋ ba chen ni. 19Ba kpak tu haasa a nyɛ ma na namsi, ma di un ka Koosa sɔɔni ma tusa. 20Ma tum galimsa awa tum tagna ka nara wa tuksi ma a daha ka ma di a, ba zi pɛgi mauu? Ma ka na namsi ma tum were daha ka ma di a, Koosa zi sɔɔni ma tusau. 21Koosa funɛ yir mau di ma ya chen. Kristo titi funɛ namsiu ma daha a biksi ma chenani ma zi tum a chi o funɛ tum chen. 22O wa fun kut a tum tum tagin. O wa fun suni wɛ a nyɛ nara ni. 23Ba funɛ pini o zoma a vɛ weri, o wa fun bur a pini ba zoma. Ba funɛ nyɛ o namsi, o wa fun a hɔɔsi ba, amaa o funɛ kpa o titu a du Koosa naa la di nara maga sɛria wa wuti ni nin ni. 24Kristo funɛ sou a li o daakakli ti ni, o fun kpa ya tum tagna a du o titi ni, chen ni ya wa zi bu tum tum tagna, amaa ya zi tum tum wereu. O chɔɔra funɛ nyɛ ma na alaafɛu. 25Ma funɛ chi piisi nyuksɛwa. Lalaknɔ ma funɛ burgiu a wa Kristo naa chi ma nigbaŋi, wati. Waa la nyini ma siimsa.
3Chenani Nibaala Awa Ba Haanasa Zi Lagmi Nyɛn
1Nihaana, ma gbanko kitiŋ ma baalasa nɔɔna, chen ni ba bɔnɛ se vɛ su Koosa laaboor weri ti, ba zi daŋni ba burgiu a tiŋ un chenani maa tum daha. Ba wa zi burgi a tiŋ un ma sɛm daha, 2amaa ma tu chaana awa chenani ma nyɛ un jirima daha. 3Ma ta daŋni ma vɔti ma nyuksa a kilaari salma kina awa gar were di ma di tula. 4Chenani ma bambe du kaali kin nama maga. Chendaha maa ya nihaan jɛrgɛ. Wuzu digi ma salma kin ta awa ma gar were ta zi wa chɔku, amaa ma ka ya jɛrgɛ, o wa zi chɔk. Chenani maga ma du Koosa wati kaali kin naa maga ma kpak. 5Nihaana ba naa funɛ nyɛn saha digi chen, bɔnɛ fun tiŋ Koosa nyinbaan a kpak bambi bɛgim un ni a tiŋ ba baalasa nɔɔna. Chendaha ba fun a di tula o suwachak ni. 6Nihaan digi funɛ nyɛn doon. Ba yir un Sara. Waa funɛ di tula chen ni. O fun a tiŋ o baal Abraham nɔ aa yir un o kunyana. Maa tum tum were a vɛ ɔm wu digi, ma waa chi o lul bisa.
7Nibaala, ma wa ma haanasa lagmi nyɛn nɛha ni. Ma kpok kaali ba kpok. Chendaha maa nyɛ ba jirima. Ma wa ba piin la Koosa mi fali ti. Ma vɛ ya chen, ma sumi zi tɔu.
Ma Zi Namsiu Ma Tum Were Daha
8Ma nyɛ mu lagmi a nama a ŋɔ ma. Maa kpak nɔ bɛgim wa dɔŋ ni a li kina maga ni. Ma ya niinbisiwa. Chendaha maa daŋni dɔŋa kinkan a ya jɛrgɛ aa kpak dɔŋa wa siki. 9Nara tum tum tagna a nyɛ ma, ma ta bur tum tum tagna a nyɛ ba. Ba pini ma zoma a vɛ weri, ma ka ta bur pini ba zoma. Ma ŋɔ ba di Koosa la zi suŋi ma. Koosa funɛ lisi ma a nyɛ o titi ni, o fun a vɔu di ma ya chen, o zi suŋi mau. 10Ba fun a sɔbi a li Koosa sɛm tɔn ti ni a ŋɔ,
“Naa maga la daŋni o nyɛn wa tu sɔɔna,
o ta sɛm sɛm tagna a ta suni wɛ a nyɛ nara ni,
11a gil o tum tagna aa kitum tum were,
chen ni o kpak un o bambi ni a kpak nɔ bɛgim awa nara ni saha maga.
12Koosa la nyini ba naa la tum tum were a la nu ba sumi,
amaa o yaa burgi o gantɛlu a chak ba naa la tum tum tagna.”
13Ma yaa kpak un ma bambe ni a tum tum were kinkan, anti la zi muksi ma? 14Hali maa namsɛɛ di ma tum were daha, yɛrɛ ma tusa kaa wa sɔɔni? Chenani nibinsa zi wa ya ma, ma ta nyɛ hansura akoo muksi wa kpak ma. 15Ma nyɛ ma kunyan Kristo naa nyɛn ma ni, jirima. Waa ya tu chaan tiina. Nara pɛɛsi ma chenani ma kpak bambi bɛgim un ni, ma saksi a ŋɔ ba saha maga. 16Amaa ma doso a nyɛ ba jirima a ya jɛrgɛ ba wati. Ma kpak tuha kibɛgim awa Koosa ni, chen ni nara pini ma tum were a naa maa tum a nyɛ Kristo ni, zoma, hiisa zi kpak ba naa sɛm chenu. 17O ya Koosa tutɔrɛ ma namsi ma tum were daha, waa bɔɛɛ wa ma namsi ma tum tagna daha. 18Kristo titi funɛ sou bu bɛgimnɛ ma tum tagna daha, chen ni o zi kpa mau a la Koosa wati. Naa funɛ ya tum were nitumi, waa funɛ chiŋi ya naa ya tum tagna nitumɛ bar chiŋi ni. Ba funɛ kpu o barawa, amaa Koosa siim weri ti funɛ lɛli unu a li o sou ni, 19a nyɛ o fun sɛm siimsi naa ba fun tɔ dɛ chen. 20Siimsi nama wa fun tiŋ Koosa nɔ. Ba funɛ nyɛnu saha naa Nowa fun kɔɔri o arŋa saha digi chen. Chen saha ti Koosa kpak ba kanyita, amaa ni funɛ wa su, o fun a yisi nara mɛnasa duŋduŋ ni ti ni. 21Ni naa funɛ wa su Nowa saha ti chen chi chenani nara kpa nire a chaksi ma. Ba wara chaksi ma bara dɔŋwa, amaa maa sumi Koosa wa tu bɛgim, waa la zi yisi ma a li ma tum tagna ni maa tiŋ un. Koosa lɛlɛ Kristo a li o sou ni. Chendaha o koti a ya chen. 22O fun lɛli Kristo a zini kaali o tɔhɔn ti a nyɛ o kani o nihɛɛ bar kani ni a dɔ o malaikasi ta maga awa o kpok tima.
4Ma Funɛ Bur Tum Tagna Nyinbaan Niu Di Ma Tiŋ Koosa
1Kristo funɛ nyɛn tɛɛnɛ nɔ maga ni, o funɛ namsiu kinkan. Chendaha ma gbanko kisaksi ma lise ma zi namsiu. Chenani ma namsi zi suŋi mau ma gil ma tum tagna awa ma titi daŋnɛ, 2a kitiŋ Koosa tutɔ wuzuna naa kaɛɛ ni. 3Saha digi ma wa ba naa funɛ vɛ zim Koosa, funɛ lagmi dɔŋ ni. Chenani ma funɛ tum tuma a chi ba, chen saha ti funɛ magu. Ma funɛ tum chɔkumsi tuma a la daŋni ma titi daŋnɛ ka ma wa ma chɛnsa lagmi a di diwe a la nyɔ sin di ma dɛɛsi aa la nyɛ vursa wa jirima yɔri yɔri. 4O jɛri ba naa vɛ zim Koosau lalaknɔ di ma wa ba wa lagmi a tum ba tum tagna kinkan. Chendaha baa pini ma zoma. 5Koosa wa wa di o wa di ba naa kpak miisa awa ba naa sitɛɛ sɛria, o zi pɛɛsi ba chenani ba tumu. 6Chendaha Koosa fun nyɛ nara kpa o laaboor weri ti a nyɛ ma ni. Waa la di nara maga sɛria. Chendaha ba siti. Ma bɔnɛ fun siti, amaa ba siimsa kpak miisau a chi Koosa.
Ma Kpak Un Ma Bambe Ni Di Ma Tiŋ Koosa Nɛnɛ
7Tɛɛnɛ nɔ maga siili saha duglɛu. O lawa ma ya bambe timau, chen ni ma zi koti a sumi Koosa wa nɛha niu. 8O ya wu birigirɛ di ma kpak si sɛm a daŋni dɔŋa kinkan. Yaa daŋni dɔŋa kinkan ka ya dɔŋtima tum tum tagna a du ya ni, o wa zi muksi ya. 9Ma la dɔŋa aa du dɔŋ damsi ni a ta zulimi. 10Koosa funɛ kpa o papaha kurgɛu a nyɛ ba naa la tiŋ un ni. Ma dɛu kinkin naa o fun nyɛ ma chen a kpa un aa suŋi ma dɔŋtima. Ma maga ya chen, Koosa zi suŋi mau wu damata ni. 11Naa kpak Koosa papaha ti a kaa ŋɔ nara ni o wɛ, ma nyɛ o sɛm sɛm ta wa si sɛm ni. Naa kpak Koosa papaha ti a kaa tum a nyɛ o dɔŋtima ni, ma nyɛ o kpa Koosa kpok ti a tum nɛnɛ a nyɛ ba. Ya ya chen, Koosa zi na pɛgiu a li ya tum maga ni Yesu Kristo sɔn daha. Koosa zi kpak kpoku awa jirima kinkan hali saha naa vɛ kpak bɔu. Ami.
Chenani Nibinsa Zi Namsi Ma Yesu Daha
12Mu bi daŋnɛ, ma ta nyɛ o jɛri ma di ma namsi kinkannɛ lalaknɔ. 13Ma waa la namsi a chi Kristo funɛ namsi. Chendaha ma nyɛ ma tusa sɔɔni. O wa bur wa, ka nara na o jirima awa o chaani kinkan, ma tusa zi wa sɔɔniu hali a la gali. 14Nara pini ma zoma maa tiŋ Kristo daha, ma gbanko nyɛ ma tusa sɔɔni. Nan biksi ma di Koosa funɛ kpa o siim weri naa kpak o jirima kinkan a du ma bambe ni. 15Ma zimu di ma ta kpu nara a ta ŋmɛɛli a ta tum tum tagna a ta zu nara wɛ ni. O wa ya Koosa tutɔrɛ maa namsi kin nama daha. 16Amaa ma ya Yesu Kristo nitiŋɛ. Maa ka saksi ma namsi o daha a ta nyɛ hiisa kpak ma. Maa zaami Koosa di maa tiŋ Kristore.
17Koosa saksi di o di tɛɛnɛ nɔ tim maga sɛriau lalaknɔ. O wa wa, o zi te di ba naa o dɔ chen sɛriau a zi di ba naa se vɛ su o laaboor weri ti chen. O piili ya ni, yɛrɛ o kaa du ba ni? 18Ba fun a sɔbi a li Koosa sɛm tɔn ti ni,
“O bɔmɛɛ di Koosa yisi nibin were,
yɛrɛ o zi du tum tagna nitumɛ ba naa vɛ zim un?”
19Chendaha ba naa tiŋ Koosa tutɔ a la na namsi lalaknɔ, o lawa baa tum tum were a kpa ba titi a du Koosa naa funɛ naami kina maga, nin niu. Waa ya wuti tiina.
5Ma Ya Jɛrgɛ Wa Dɔŋ Ni A Nyaŋi Sintana
1Mu daŋni mu sumi ma naa ya Yesu nitiŋɛ nihɛɛtau. Mu gbanko ya nihɛɛrɛ, a ya Kristo namsi sɛhɛra tiina. O wa bur wa, mu wa ma zi bɔni o jirima awa o chaani kinkanu. 2Ba naa la tiŋ Koosa chi o piisisiwa. Waa nyɛ ma ya ba nigbaŋɛ. Maa nyini ba nɛnɛ. Ma ta nyini ma na nyɔɔra a li ma tum ni, amaa maa kpak un ma bambe ni di ma tum tuma a nyɛ ba kinkan. O wa ya muksirɛ ma tum chen. Ma tutɔrɛ maa tum. Chene Koosa daŋni. 3Ma ta dɔ ba naa Koosa fun kpa a nyɛ ma aa biksi ba kpok, amaa ma titi tum o tuma a biksi ba chenani ba zi tum. 4Chen ni Kristo naa ya ya nigbaŋi nihɛɛ, wa bur wa, o zi wa bɔ ma chimu ka o zi wa kpa jirima naa vɛ chɔki a nyɛ ma.
5Nibaala, chen vɛɛna maa tiŋ ma nihɛɛta nɔɔna a ya jɛrgɛ tima. Ba fun a sɔbi a li Koosa sɛm tɔn ti ni,
“Koosa vɛ ba naa la zer ba titi,
amaa o suŋi ba naa ya jɛrgɛu.”
6Ma ya nibin jɛrgɛ a kpa ma bambe a du Koosa naa kpak kpok kinkan ni, chen ni o saha wa tel, o zi zer ma buudahau. 7Waa la nyini ma. Chendaha ma kpa ma muksi maga a du un ni.
8Ma dɔm sintana chi gbogumta naa la gba a la wire. O yaa dɛu nandigirɛ di o kpak a se. Chendaha ma ya bambi tima a kidoso aa il. 9Maa vɛ sintana. Maa nyɛ ma se ka su Koosa kinkan aa chiŋi wa bambi kpok ni. Ma zimu di ma niinbisa ba naa maga se su Koosa aa nyɛn bar damati ni, gbanko namsiu a chi ma. 10Ma namsi tama wa peti, Koosa naa la suŋi ma kina maga ni, zi kɔɔri ma kpoku kinkan. O funɛ yir mau di ma wa un bɔni o jirima naa vɛ kpak bɔ kinkan, domi ma wa Kristo ya nibɛgimnɛ. 11O kpok ti zi nyɛnu hali saha naa vɛ kpak bɔ. Ami.
Pita Mak Tɔn Nɔ Bar Nɔwa
12Silvenus naa ya mu dɔŋtiin wuti tiina, waa suŋi min mu sɔbi tɔn we nɔ a nyɛ ma. Mu tɔn nɔ ni, mu daŋni mu biksi mau a kpami ma di chenani Koosa suŋi ma, o ya wutirɛ. Ma kpak chenani o suŋi ma chen nɛnɛ.
13Yesu nitiŋɛ ba naa Koosa fun lisi a nyɛ o titi ni a li Room ni, zaami mau. Mu niinbe, Maak, gbanko zaami mau. 14Maa zaami dɔŋa nɛnɛ.
Koosa nyɛ ma maga bara sɔɔna domi ma wa Kristo ya nibɛgimnɛ.