1 JƆN

JƆN TE TEL TƆN

Yesu Kristo Ya Miisa Maga Tiina

¹Min waa, Jɔn, la sɔbi tɔn nɔ a biksi ma nandigi wɛ. Waa funɛ nyɛn dooni a li piili ti ni, a ya miisa maga tiina. Ya funɛ koti a nu o tau a na un awa ya se ni a nyini un a kpa ya nisa a gbaŋsi un. O funɛ biksi ya Koosa wɛu. ²Koosa funɛ kpa miisa maga tiin ti a tum tɛɛnɛ nɔ maga ni. Ya funɛ na unu, a ya o sɛhɛra tima a la ŋɔ ma Koosa mi fali naa vɛ kpak bɔ wɛ. Waa funɛ nyɛn Koosa ni saha maga, ka o fun kpa un a biksi ya. ³Ya daŋni ya biksi ma kin naa maga o yarɛ ya fun na a nu, chen ni ya wa ma zi lagmiu a li sɛm nan ni. Ya wa Koosa awa o be Yesu Kristo ya maga kpak nɔ bɛgimnɛ. ⁴Ya daŋni ma tu sɔɔniu kinkan. Chendaha ya sɔbi nan wɛ a nyɛ ma.

Koosa Chi Fitinne Aa Chaani

⁵Nannɛ Yesu fun biksi ya o titi wɛ ka ya gbanko biksi ma. Koosa chi fitinne aa chaani. Birsa tama wa to un ni. ⁶Ya ŋɔɛɛ di ya wa un ya nibɛgimnɛ ka ya tum birsa tuma, ya suni wɛwa. Ya wa tiŋ wuti nyinbaan. ⁷Amaa ya nyɛ ya tusa chaani a chi chenani Koosa tuha chaani chen, ya wa ya dɔŋtima zi kpak nɔ bɛgimu ka Koosa be Yesu chɛl zi yisi ya doŋ magau a li ya ni.

⁸Ya sɛmɛɛ di ya wara tum tum tagna, yaa mur ya titirɛ. Ya wa kpak wuti. ⁹Amaa ya la nɔɔni di ya tum tum tagniwa, Koosa zi gil au a nyɛ ya a yisi ya doŋ maga a li ya ni. Ya zimu di o zi ya chenu a nyɛ ya domi o ya wuti tiinnɛ ka o tum maga gbanko deŋli. ¹⁰Ya sɛmɛɛ di ya ha wa tum tum tagna, ya yir Koosa nusun tiinnɛ. Ya wa zim o chiksɛ ta.

Chenani Yesu Kristo Suŋi Ya Kinkan

¹Mu bisa, mu sɔbi nannɛ a nyɛ ma, chen ni ma zi ɔm ma tum tagnau. Amaa ya nandigi tum tum tagna, ya kpak naa la zi sumi ya kunyana Koosa a nyɛ yau. Waa ya Yesu Kristo naa ya tu chaan tiin ti. ²O funɛ sou ya tum tagna daharɛ, chen ni o zi koti a yisi yau a li Koosa paan ni. O wa fun sou ya tum tagna duŋduŋ daharɛ. O funɛ sou tɛɛnɛ nɔ tim maga tum tagna gbanko daharɛ.

³Yaa tiŋ Koosa nɔ sɛma maga, ya sir zim di ya zim unu. ⁴Nar ŋɔɛɛ di o zim Koosau, amaa o wa tiŋ o nɔ sɛma, o suni wɛwa. O wa kpak wuti. ⁵Nar tiŋ o nɔ, waa sir a daŋni un nɛnɛ. Yaa tiŋ chen, ya sir zi zimu di ya wa un ya nibɛgimnɛ. ⁶Nar ŋɔ di o nyɛn Koosa nɛɛ, o tiŋ un a chi o be Yesu funɛ tiŋ un chen.

O Lawa Yaa Tiŋ Koosa Chiksi Faliu

⁷Mu bi daŋnɛ, o wa ya chiksi falirɛ mu sɔbi a nyɛ ma nan. O ha vɛɛn ya kibuni naa ma fun nu a li o piili ti ni chene. ⁸Amaa o vɛɛn ya chiksi falirɛ, domi lalaknɔ birsa saha kaalu, ka chaani saha ka wa di o wa chiŋi o bar chiŋi ni. Yesu wa ma tiŋ chiksi fali nɔwa.

⁹Nar ŋɔɛɛ di o nyɛn bar chaani nɛɛ a ha o dɔŋtima, o ha vɛɛn nyɛn birsa nɛɛ. ¹⁰Amaa naa la daŋni o dɔŋtima, o waa nyɛn bar chaani ti nɛɛ. Kundɔŋ wa to dooni a la zi nyɛ o chel. ¹¹Naa ha o dɔŋtima, o nyɛn birsa nɛɛ. O wa zim doonani oo la. Birsa ti tɔ o sewa ka o burgi nyulum.

¹²Bichɛsa, mu sɔbi nannɛ a nyɛ ma, domi Koosa funɛ gil ma tum tagna a nyɛ mau Yesu daha. ¹³Nibahɛɛta, mu sɔbi nannɛ a nyɛ ma domi ma waa piin zim naa funɛ nyɛn dooni a li piili ti niu. Bunɔɔna, mu sɔbi nannɛ a nyɛ ma domi ma funɛ nyaŋi sintanau.

¹⁴Nibahɛɛta, ma waa piin zim naa funɛ nyɛn dooni a li piili ti niu. Bunɔɔna, mu sɔbi nannɛ a nyɛ ma domi ma kpak kpoku a vɛɛn kpak Koosa sɛma ma bambe gbanko ni. Chendaha ma fun nyaŋi sintana.

¹⁵Ma ta daŋni di ma tiŋ chenani tɛɛnɛ nɔ tim maga tiŋ. Maa daŋni tɛɛnɛ nɔ tim maga kina, ya kunyana Koosa daŋni ti wa to ma bambe ni. ¹⁶Kin nawara nibinsa bara daŋni awa kin nawara ba se daŋni awa kin nawara ba daŋni ba kpak a na sɔn, a nama wa ya ya kunyana Koosa kina. A ya tɛɛnɛ nɔ tim maga kinawa. ¹⁷Tɛɛnɛ nɔ maga awa kin nawara nara daŋni, a maga wa zi vusi, amaa naa tiŋ Koosa tutɔ, waa la zi wa na o mi fali naa vɛ kpak bɔ.

Yesu Dɔm Zen Wɛ.

¹⁸Mu bisa, tɛɛnɛ nɔ maga siili saha duglɛu. Ma funɛ nu di Yesu dɔm zen zi wa wau chen saha ti. Amaa Yesu dɔm damata piin liu a wa. Chendaha ya zim di tɛɛnɛ nɔ maga siili saha ti duglɛu. ¹⁹Ba bɔnɛ funɛ nyɛn ya wati, amaa ba wa fun ya ya walɛ. Ba fu funɛ ya ya walɛ, ba fu zi nyɛn ya watiu. Amaa chenani ba chɔ a li ya wati chen, biksi di ba wa ya ya walɛ.

²⁰Amaa Koosa funɛ kpa o siim weri ti a du ma bambe niu ka ma maga kpak zima. ²¹Mu sɔbi tɔn nɔwa a nyɛ ma, o wa ya di ma wa zim wuti ti. Ma zim wuti ti nɛnɛ, ma zi zim di nusuna wara li un ni.

²²Naa vɛ la nɔɔni di Yesu ya Kristo naa Koosa fun tum chen, o ya nusun tiinnɛ. Naa vɛ Koosa awa o be Yesu, o ya Kristo dɔmnɛ. ²³Naa vɛ la nɔɔni di Yesu ya Koosa be, o gban vɛ Koosau. Naa la nɔɔni wa Koosa be wɛ, o vɛɛn zim o kunyana Koosau.

²⁴Ma ta suglɛ biksi naa ma fun te nu chen. Ma nyɛ chen nyɛn ma bambe ni, ma wa ya kunyana Koosa awa o be Yesu zi ya nibɛgimu. ²⁵Ya kunyan ti fun vɔu di o zi nyɛ ya o mi fali naa vɛ kpak bɔu.

²⁶Mu sɔbi tɔn nɔwa a nyɛ ma a ŋɔ ma ba naa la daŋni ba mur ma ma li Yesu wɛ ni. ²⁷Koosa funɛ kpa o siim weri ti a du ma bambe ni. Chendaha nara wa biksi ma a gbaari o biksi ti ni, o ya yɔrirɛ. Koosa siim weri ti ya naa la zi biksi ma kina maga nyinbaan. O biksi maga ya wutirɛ. Nusuna wa to un ni. Adaha ma nyɛ ma wa Yesu ya nibɛgim a chi chenani Koosa siim weri ti fun a biksi ma chen.

²⁸Mu bisa, maa ya chen. Yesu wa bur wa, hansura wa zi wa kpak ya. Hiisa gbanko wa zi wa kpak ya, chen ni ya wa zi wa chɔ li o wati chen saha ti. ²⁹Ya zimu di Yesu wɛ maga deŋlu. Chendaha ya zim di ba naa maga tuma deŋlee, ba ya Koosa bisiwa.

Koosa Yir Ya O Bisa

¹Ma lisi chenani ya kunyana Koosa daŋni ya kinkan. Hali o yir ya o bisa. Ba naa la tiŋ tɛɛnɛ nɔ tim maga nyinbaan, wa zim un. Chendaha ba vɛ zim ya. ²Mu bi daŋnɛ, ya ya Koosa bisawa lalaknɔ. Chenani ya zi wa du wuzu digi, Koosa ha wa biksi ya. Amaa Yesu wa bur wa, ya zi wa du a chi unu. Ya se zi wa na unu wuzu digi a chi chenani o du chen. ³Adaha ba naa maga kpak chen bambi bɛgim, ba zi kpak unu ba bambe ni di ba ya tu chaan tima a chi chenani Yesu ya tu chaan tiin chen.

⁴Ba naa maga la tum tum tagna, ba chɔk Koosa chire. Tum tagna maga ya Koosa chire. ⁵Ma zimu di Yesu funɛ wau di o wa yisi nara tum tagna maga a ta. O wa tum tum tagin hali tama. ⁶Ba naa maga wa Yesu ya nibɛgim, ba tum tum tagin, ba tusa wa yaa sɔɔni tum tagin ti daha. Ba naa maga yaa tum tum tagna, ba tum chene domi ba wa zim un.

⁷Mu bisa, ma ta nyɛ nandigi mur ma. Ba naa maga la tum tum were, ba ya tu chaan timawa a chi Yesu. ⁸Ba naa maga la tum tum tagna, ba ya sintana bisiwa. Sintana funɛ tum tum tagnau a li piili ti ni hali wa zinan. Chendaha Koosa fun nyɛ o be wa tɛɛnɛ nɔ maga a wa chɔk sintana tuma.

⁹Ba naa maga ya Koosa bisa, ba tum tum tagin, ba tusa wa yaa sɔɔni tum tagin ti daha. Koosa fun kpa o mi fali ti a du ba ni di ba ya o bisa. Chendaha ba tusa wara sɔɔni. ¹⁰Chene ma zi zim ba naa ya Koosa bisa awa ba naa ya sintana bisa. Ba naa vɛ tum tum were awa ba naa vɛ daŋni ba dɔŋtima, ba wa ya Koosa bisa.

O Lawa Yaa Daŋni Ya Dɔŋ Timau

¹¹Ya te lagmi Koosa laaboor weri naa ma fun nu dɔŋ ni, o wu birigi ya di yaa daŋni ya dɔŋtima. ¹²Ma ta wa chi Keen naa funɛ ya sintana be chen a kpu o niinbe. Ma zim kinkin naa nyuhu ni o fun kpu o niinbe tiuu? O funɛ tum tum tagniwa ka o niinbe ti ka tum tum were. Chendaha o fun kpu un.

¹³Mu niinbisa, ba naa la tiŋ tɛɛnɛ nɔ tim maga nyinbaan ha ma, ma ta nyɛ chen jɛri ma. ¹⁴Chenani yaa daŋni dɔŋa biksi ya di Koosa funɛ lisi ya a li sintana nin ni a nyɛ ya o mi fali ti. Ba naa maga vɛ daŋni ba dɔŋtima, sintana ha vɛɛn dɔ ba. ¹⁵Ba naa ha ba dɔŋtima, o chi ba ya nara nikpuulɛwa. Ma zimu di nara nikpuuli wa kpak Koosa mi fali naa vɛ kpak bɔ, ti. ¹⁶Chenani Yesu fun sou ya daha biksi ya wuti daŋni. O weru wa yaa daŋni ya dɔŋtima chenu, hali a sou ba daha. ¹⁷Ma ya kin tima a na ma dɔŋtima ka ba namsi ka ma vɛ di ma wa zi suŋi ba, yɛrɛ Koosa daŋni ti kaa nyɛn ma ni? ¹⁸Mu bisa, ya ta daŋni ya dɔŋtima wa ya sɛma duŋduŋ ni. Ma nyɛ yaa daŋni ba wa wuti ni a tum tum were a nyɛ ba.

Koosa Daŋni Ya kpak Bambeu O Suwachak Ni

^19-20Yaa ya chen, ya zimu di yaa tiŋ chenani Koosa daŋni ya tiŋnɛ. Chenani yaa tiŋ un nyɛ ya tusa chɔk, o zi zim ya bambe niu domi o zenu a kaali ya a zim kina maga. ²¹Mu bi daŋnɛ, ya zimu di yaa tiŋ chenani o daŋni ya tiŋi, ya zi kpak bambi kpokau o suwachak ni. ²²Ya sumi un kundɔŋ, o zi nyɛ yau, domi yaa tiŋ o nɔ sɛmwa a la tum tum naa la sɔɔni o tuha. ²³Nannɛ ya zi tum a sɔɔni o tuha. O lawa ya nyɛ ya se su o be Yesu Kristou a kidaŋni dɔŋa a chi chenani o fun ŋɔ ya chen. ²⁴Ba naa maga tiŋ Koosa nɔ sɛma, nyɛn un ni ka o ka nyɛn ba ni. Ya zimu di nan ya wutirɛ, domi waa funɛ kpa o siim weri ti a du ya ni.

Chenani Ya Zim Di Koosa Siim Weri Nyɛn Nara Ni

¹Mu chɛn daŋnɛ, nara ŋɔɛɛ di ba ya Koosa witinsiwa a sɛm wa o kpok ni, ma ta nyɛ ma se su ba lalaga. Witinsa ba naa ya nusun tima, kinkan piin pisiu a kaali bawu maga ni. Chendaha maa doso ba ni. ²Nannɛ ma zi ya a zim Koosa witinsa ba naa kpak Koosa siim weri ti. Naa la nɔɔni di Yesu ya Kristo a la nɔɔni di o funɛ wa tɛɛnɛ nɔ maga a chi nibine, chen tiina kpak Koosa siim weri tiu. ³Naa vɛ la nɔɔni Yesu wɛ nan ni, Koosa siim weri ti wa to un ni. O ya Kristo dɔmnɛ. Ma funɛ nu di chen tima zi wa tɛɛnɛ nɔ magau. Ba piin wau.

⁴Mu bisa, Koosa dɔ ma a fun kpa o siim weri ti a nyɛ ma. O kpok naa nyɛn ma ni chen, waa kpok kaali Kristo dɔm kpok naa nyɛn ba ni. ⁵Witinsa ba naa ya nusun tima awa tɛɛnɛ nɔ tim maga ya nibɛgimnɛ. Chendaha ba nu ba sɛma, ⁶amaa Koosa ka dɔ ya. Ba naa maga zim un, ba waa la nu ya sɛma. Ba naa maga vɛ zim Koosa, ba wa zi nu ya sɛma. Chendaha ya zi zim ba naa ya wuti tima awa nusuna.

Koosa Ya Daŋni Tiina

⁷Mu chɛn daŋnɛ, ma nyɛ yaa daŋni dɔŋa. Daŋni li Koosa watɛɛ. Naa la daŋni o dɔŋtiina, waa ya Koosa be aa zim un. ⁸Koosa ya daŋni tiina. Chendaha naa vɛ daŋni o dɔŋtiina, o wa zim un. ⁹Koosa funɛ tum o be bɛgim tɛɛnɛ nɔ maga ni, chen ni ya zi kotiu a la o mi fali ti. Chen biksi ya chenani Koosa daŋni ya. ¹⁰Ya laata te a daŋni Koosa, amaa waa te o daŋni ya. O funɛ tum o beu di o wa sou a lisi ya a li Koosa paan ni. Chen biksi ya o wuti daŋni.

¹¹Mu chɛn daŋnɛ, Koosa daŋni ya nan, o weru di ya gbanko kidaŋni dɔŋa. ¹²Nandigi ha wa zin na Koosa. Amaa yaa daŋni dɔŋa, Koosa nyɛn ya watiu a la suŋi ya, chen ni ya zi daŋni unu aa gbaari.

¹³Ya zimu di o nyɛn ya watiu ka ya gbanko nyɛn un ni, domi o siim weri naa o fun kpa a nyɛ ya, waa kut nyɛn ya wati. ¹⁴Ya ya Koosa sɛhɛra timwa, domi ya funɛ na o be naa o fun tum a li tɛɛnɛ nɔ maga ni di o wa yisi ya a li ya tum tagna ni yaa tiŋ un. ¹⁵Naa la nɔɔni di Yesu ya Koosa bere, Koosa nyɛn tiin watiu ka o gbanko nyɛn Koosa ni. ¹⁶Ya zimu nɛnɛ di oo daŋni yau ka ya se su di waa ya daŋni tiina.

Naa la daŋni o dɔŋtiina nyɛn Koosa wati ka Koosa nyɛn un ni. ¹⁷Ya wa Yesu Kristo lagmi nyɛn ka o suŋi ya, chen ni ya zi daŋni unu hali o wa peti. O ya chene, chen ni ya wa zi wa kpak hansura a wuzu naa Koosa zi wa di tɛɛnɛ nɔ tim maga sɛria. ¹⁸Nandigi daŋni ya hali o wa peti, ya wa zi ɔm chenani o zi wa ya ya. Ya ɔm un, chen biksi di ya se wa su di o daŋni yau hali o wa peti.

¹⁹Ya daŋni unu domi waa te a biksi ya di o daŋni yau. ²⁰Nandigi ŋɔ di o daŋni Koosau a ha o dɔŋtiina, o ya nusun tiinnɛ. O vɛ koti a daŋni o dɔŋtiina naa oo na, yɛrɛ o kaa ya a daŋni Koosa naa o vɛ naali? ²¹Nannɛ Kristo fun biksi ya. Naa la daŋni Koosa, o lawa o daŋni o dɔŋtima gbankou.

Ya Kote A Nyaŋi Ya Tutɔ Daŋnɛu

¹Naa si su di Yesu ya Kristo naa Koosa fun tum chen, chen tiina ya Koosa bisi ta digirɛ. Ma daŋni nibine, ma zi daŋni o be ti gbankou. ²Ya daŋni Koosa aa tiŋ o nɔ, ya zimu di ya zi daŋni o bisi ta gbankou. ³Naa la daŋni Koosa zi tiŋ o nɔu. Chenani o daŋni ya tum wa bɔm. ⁴Ba naa maga ya Koosa bisa ka ba se su un nɛnɛ zi nyaŋi ba tutɔ daŋnɛu. ⁵Ba naa se su di Yesu ya Koosa bere duŋduŋ la zi ya chen.

Chenani Yesu Kristo Sɛhɛrasa Tora Sɛm

⁶Yesu Kristo funɛ wa tɛɛnɛ nɔ maga, ba wa fun chaksi un wa ni duŋduŋnɛ. Ba funɛ vɛɛn a kpu unu a gbaari ka o chɛl li. Koosa siim weri naa ya wuti tiina, waa ya sɛhɛra a li o chaksi awa o kpuuli ti ni. ⁷Adaha sɛhɛrasa tora nyɛnɛɛ, ⁸siim weri ti, Yesu chaksi ti awa o chɛl ti. Sɛhɛrasa tora nama ya kibɛgimnɛ. ⁹Ya piinsa nu nara sɛhɛrau. Amaa Koosa be sɛhɛra ti ya kizenzen a kaali nibinsa sɛhɛra kinkan. ¹⁰Naa si su Koosa be ti, o be ti sɛhɛra nyɛn un ni, ka o zim o be ti wɛ nɛnɛ. Naa si vɛ su Koosa, waa la ŋɔ di Koosa ya nusun tiinnɛ, domi o wa la nɔɔni a du Koosa sɛhɛra awa o be ti wɛ ni. ¹¹Koosa sɛhɛra ti nɛɛnɛ. Waa funɛ kpa o mi fali naa vɛ kpak bɔ a nyɛ ya. Nan mi fali nɔ nyɛn o be ti nin ni. ¹²Naa wa Koosa be ti ya nibɛgim, waa kpak chen mi fali ti. Naa wa Koosa be ti vɛ ya nibɛgim, o wa kpak chen mi fali ti.

Koosa Funɛ Kpa O Mi Fali A Nyɛ Ya

¹³Mu sɔbi tɔn nɔ a nyɛ ma di ma naa se su Koosa be ti zi zimu di ma kpak Koosa mi fali naa vɛ kpak bɔu. ¹⁴Ya kpak bambe kpok di ya sumi un kin naa nyɛ o tuha sɔɔni, o zi nu ya watiu. ¹⁵Ya zim di o piin nu ya sɛmau, kin nawara ya sumi o wati, o zi nyɛ yau.

¹⁶Ma na ma dɔŋtima ka ba tum tum tagna naa Koosa zi vɛ lɛrgi ba diŋsau ba siti, ma sumi un ba gil ba tum tagna ka o kpa o mi fali ti a nyɛ ba. Ba duŋduŋnɛ mu ŋɔ ma, di ma sumi Koosa a nyɛ ba chen. Nara tum tum tagna naa Koosa zi wa lɛrgi ba diŋsau ba siti, ma ta sumi Koosa a nyɛ ba. ¹⁷Kin nawara vɛ deŋli ya wu tagniwa, amaa ma tum tum tagna bɔnɛ, Koosa zi lɛrgi ma diŋsau ma siti.

¹⁸Ya zimu di ba naa ya Koosa bisa chen, tum tum tagna, ba tusa wa zi sɔɔni. Koosa be ti la suŋi ba, chen ni sintana wa kikoti a la ba kpok.

¹⁹Ya zimu di ya ya Koosa bisiwa. Ba naa maga vɛ ya Koosa bisa, ba waa nyɛn sintana nin ni.

²⁰Ya zimu di Koosa be Yesu ti funɛ wa tɛɛnɛ nɔ maga di o wa lɛli ya sewa, chen ni ya zi zim naa ya wuti tiinau. Ya wa o be Yesu Kristo ti ya nibɛgimnɛ. Waa ya Koosa wuti. Waa la nyɛ ya o mi fali naa vɛ kpak bɔ.

²¹Mu bisa, ma doso ma ta nyɛ kundɔŋ wa lisi ma a li Koosa tiŋi ni.