Tito

Paulo nia surat ba

Tito

Paulo hahuu nia surat

¹ Tito mak hau hadomi.

Surat nee hosi hau, Paulo, Nai Maromak nia atan ho Kristu Jesus nia apostolu. Nai Maromak haruka hau tulun ema sira nebee Nia hili ona atu sai Nia povu, para sira bele fiar metin liu ba Nia. Maromak mos haruka hau hanorin lia loos ba sira atu sira hatene moris tuir Nia hakarak. ² Nunee, sira bele laran metin katak, iha loron ida sira sei moris hamutuk ho Maromak too tinan ba tinan. Nai Maromak promete buat nee nanis kedas molok Nia halo mundu nee, i Nia nunka bosok. ³ Too ona tempu nebee Nai Maromak desidi, Nia foo sai dehan, Nia hakarak salva ema sala nain sira para moris hamutuk ho Nia. Nunee Nia mos foo orden mai hau atu baa foo sai Novidade Diak nee.

⁴ Tito, o hanesan hau nia oan rasik, tanba ita nain rua fiar ba Jesus Kristu. Hau harohan ba Aman Maromak ho Jesus Kristu nebee salva ita, para Sira hatudu Sira nia laran diak ba o i foo paz ba o.+ 1:4 2 Korintu 8:23; Galásia 2:3; 2 Timóteo 4:10

Kritéria ba responsavel sarani sira

⁵ Iha tempu liu ba nee, hau husik hela o iha rai Kreta, para halo remata buat nebee sei falta iha nebaa, i foti responsavel sira hodi toma konta sarani sira iha vila ida-idak. La bele haluha buat nebee mak hau hatete tiha ona ba o, ⁶ katak ema nebee atu sai reponsavel sarani sira nian tenki hanesan tuir mai nee: Nia tenki livre hosi sala. Nia tenki foo laran ba nia kaben. Nia oan sira mos tenki fiar ba Jesus Kristu. Sira la bele naran foer hanesan ema nakar-teen ka ema nebee lakohi rona nia inan-aman. ⁷ Responsavel sarani sira nian toma konta Maromak nia servisu. Nee duni nia tenki livre hosi sala. La bele hakarak manaan mesak deit. Nia la bele nervozu-door, lanu-teen, baku-door ema, i matan la bele naklosu ba osan. ⁸ Nia tenki simu bainaka iha uma ho laran tomak, i gosta halo buat nebee diak. Tenki ema kalma, moris loos, laran moos i hatene domina aan. ⁹ Nia tenki kaer metin Nai Maromak nia liafuan loos, nebee uluk ita hanorin ona ba nia. Nunee nia bele hanorin tutan lia loos hodi tulun ema halo tuir Maromak nia hakarak, i koriji ema nebee mak hanorin la loos.+ 1:9 1 Timóteo 3:2-7

Tito tenki kontra ema nebee hanorin la loos

¹⁰ Tan iha ema barak kontra hanorin nebee loos. Liu-liu ema Judeu nebee tuir ona Kristu maibee dehan, atu hetan salvasaun, tenki sunat. Sira koalia nar-naran deit hodi bosok ema. ¹¹ Bandu tiha sira para la bele hanorin tan. Tanba sira harahun uma kain barak ho sira nia hanorin sala nee, i sira so buka osan deit. ¹² Uluk matan-dook ida hosi sira nia rai Kreta koalia kona ba nia ema rasik dehan,

“Ema Kreta sira mesak bosok-teen,

laran aat, baruk-teen, i so moris para foo haan kabun deit.”

¹³ Ema Kreta nunee duni! Tanba nee, o tenki hatete makaas ba sira katak sira sala, para sira bele soe tiha liafuan falsu hodi fiar metin ba lia loos. ¹⁴ Nunee sira la bele rona tan ema Judeu sira nia ai knanoik, i la bele tuir tan regra hosi ema nebee fila kotuk ba lia loos.

¹⁵ Ba ema nebee laran moos, buat hotu-hotu diak. Maibee ba ema nebee aat i la fiar ba Nai Jesus, la iha buat ida mak diak, tanba sira nia hanoin aat ona i sira la hatene ona saida mak diak, saida mak aat. ¹⁶ Mestri falsu sira nee dehan, konhese Nai Maromak, maibee sira nia hahalok hatudu katak sira la konhese Nia. Sira koalia oin ida, hahalok oin seluk. Ema sira nee hahalok aat. Sira lakohi halo tuir Nai Maromak nia hakarak, i la bele halo buat ida nebee diak.

Hanorin loos para ema bele moris loos

¹ Maibee Tito, o la bele hanesan mestri falsu sira. O tenki foo tutan hanorin nebee loos. ² Hanorin katuas sira atu domina aan, i hatene aan, para ema bele respeita. Sira tenki fiar metin ba Maromak, hadomi ema seluk ho laran tomak, i pasiensia iha terus nia laran.

³ Nunee mos ho ferik sira. Hatete ba sira para moris nudar ema nebee respeita Nai Maromak. Sira la bele konta aat ema nia vida, i la bele buka deit atu hemu tua. Maibee sira tenki hanorin buat nebee diak. ⁴ Nunee sira hanorin ho hatudu ezemplu diak ba alin feto maluk sira atu hadomi sira nia laen ho sira nia oan, ⁵ domina aan, moris loos, badinas kaer servisu uma laran nian, laran diak, i hakruuk ba sira nia laen. Se sira moris nunee, maka la iha ema ida atu hatete aat Maromak nia liafuan.

⁶ Nunee mos, hatete beibeik ba mane foin-sae sira atu domina sira nia aan.

⁷ Tito, o tenki halo diak ba ema iha buat hotu-hotu, hodi sai ezemplu diak ba foin-sae sira. Hanorin ho laran; la bele hanorin oin ida, halo oin seluk. Keta halimar ho o nia servisu nee. ⁸ Kuandu o hanorin, o tenki uza liafuan nebee loos, para ema la bele foo sala ba o. Nunee ema sira nebee kontra o, sei moe, tanba sira la iha razaun atu hatete aat ita.

⁹ Hanorin atan sira atu hakruuk ba sira nia patraun. Sira tenki hakaas aan halo haksolok patraun nia laran, la bele koalia hasoru nia, ¹⁰ i la bele naok nia sasaan. Maibee sira tenki hatudu katak, patraun bele foo fiar tomak ba sira. Ho nunee ema seluk nebee haree atan sira nia moris nee, sei foo valór ba ita nia hanorin kona ba Nai Maromak, ita nia Salvador.

¹¹ Agora Maromak hatudu ona Nia laran diak ba ema hotu-hotu hodi loke dalan ba salvasaun. ¹² Tanba Nai Maromak nia laran diak, Nia hanorin ita tenki soe tiha hahalok aat ho mundu nia hakarak aat hotu. Durante ita sei moris iha mundu, ita tenki domina aan, moris loos, i halo tuir Nai Maromak nia hakarak. ¹³ Agora ita hein hela ho laran metin Jesus Kristu sei fila fali mai ho naroman nabilan. Jesus mak ita nia Maromak Boot tebe-tebes, nebee salva ita. ¹⁴ Nia foo aan ba mate hodi hasai ita hosi sala hotu-hotu, i halo ita laran moos, para sai Nia povu rasik, nebee sempre hakarak halo buat diak.+ 2:14 Salmus (Mazmur) 130:8; Ézodu (Keluaran) 19:5; Deutoronómiu (Ulangan) 4:20; 7:6; 14:2; 1 Pedro 2:9

¹⁵ Nee duni hanorin buat sira nee hotu ba sarani sira, i hatete beibeik ba sira para halo tuir. See mak halo sala, o tenki hatete dehan, “Nee sala”. Keta husik ema la respeita o, tanba o iha direitu atu koriji sira.

Moris nudar kristaun

¹ Foo hanoin fali ba sarani sira atu hakruuk ba nai ulun sira. Sira tenki tuir lei, i sempre prontu atu halo buat diak. ² La bele hatete aat ema i la bele istori malu. Hatudu laran maus ho laran diak ba ema hotu.

³ Tan uluk, bainhira ita seidauk konhese Nai Jesus, ita beik-teen hela, i fasil atu ema bosok ita. Ita lakohi rona Nai Maromak, i ita hakarak aat saida deit, ita halo ona. Ita nia moris nakonu ho hanoin aat, laran moras ema, i odi malu.

⁴ Maski ita nia hahalok aat nunee mos, Nai Maromak ita nia Salvador hatudu Nia laran diak ho domin mai ita. ⁵ Nia salva ita laos tanba ita halo buat diak ruma, maibee tanba Nia hadomi ita. Liu hosi nia Espiritu Santu, Nia hamoos tiha ona ita nia sala i halo foun ita nia moris, hanesan ita foin moris fila fali. ⁶ Tanba Jesus Kristu salva ona ita, Nai Maromak foo Nia Espiritu Santu mai ita hanesan bee ida fakar too nakonu resin. ⁷ Tanba Jesus nia laran diak, mak Nia dehan, “Ema nee nia sala la iha tiha ona.” Nunee ita sai Nia oan, i laran metin katak aban-bainrua ita sei moris hamutuk ho Nia tinan ba tinan nafatin. Ida nee mak ita nia rikusoin. ⁸ Hau nia liafuan sira nee loos duni.

Buat nebee hau hanorin nee diak, i iha folin ba ema hotu. Nee duni hau husu atu o hatete fila-fila buat sira nee ba ema sira nebee fiar ba Maromak, atu sira hotu-hotu hakaas aan halo diak ba ema. ⁹ Hadook aan hosi diskusaun sira nebee la huun la dikin. Lalikan dada lia kona ba ida-idak nia huun, ka istori malu kona ba lei relijiaun Judeu nian. Buat sira nee hotu la iha folin ida, so halo lakon tempu deit. ¹⁰ Se iha ema ruma fahe sarani sira, foo hanoin makaas ba nia too dala rua. Se nia halo nafatin nunee, lalika liga tan nia. ¹¹ Ema hanesan nee hanoin aat ona, i nia hahalok rasik hatudu katak nia sala.

Paulo taka nia surat

¹² Hau atu haruka Artemas ka Tíkiku baa hasoru o iha rai Kreta. Bainhira nia too iha nebaa, hakaas aan baa lalais hasoru hau iha sidade Nikópolis. Tan hau desidi ona atu hela iha nebaa durante tempu rai malirin.+ 3:12 Apostolu sira nia Istoria (Atos, Kisah) 20:4; Éfezu 6:21-22; Kolose 4:7-8; 2 Timóteo 4:12¹³ Hakaas aan atu ajuda advogadu Zenas ho nia kolega Apolo, nebee atu baa rai dook, para sira la bele falta buat ida iha dalan.+ 3:13 Apostolu sira nia Istoria (Atos, Kisah) 18:24; 1 Korintu 16:12¹⁴ Ita nia maluk sarani sira tenki aprende hakaas aan halo diak ba ema, hodi ajuda ema nebee susar. Ho nunee sarani sira nia moris sei la saugati.

¹⁵ Tito, ami hotu iha nee hatoo ami nia kumprimentus ba o. Hatoo mos kumprimentus ba ita nia maluk sarani sira nebee hadomi ami.

Hau harohan ba Maromak atu hatudu Nia laran diak ba imi hotu.

Hau nia liafuan too iha nee deit.

Hosi hau,

Paulo