Filipi

Paulo nia surat

ba sarani sira iha sidade

Filipi

Paulu hahuu nia surat

(Apostolu sira nia Istoria (Atos, Kisah) 16:12)

¹ Surat nee hosi Paulo ho Timóteo, Kristu Jesus nia atan.

Ami haruka surat nee ba Maromak nia povu iha sidade Filipi nebee laran ida ho Jesus Kristu, ba responsavel sarani sira, ho mos ba ema nebee ajuda responsavel sira.

² Ami harohan ba ita nia Aman Maromak ho Nai Kristu Jesus, para hatudu Sira nia laran diak ba imi, i foo paz ho hakmatek ba imi.

Paulo halo orasaun ba sarani sira iha Filipi

³ Hau sempre agradese ba Nai Maromak bainhira hau hanoin imi. ⁴ Hau sempre halo orasaun ba imi ho laran haksolok, ⁵ tanba hosi loron primeiru imi simu Maromak nia Liafuan Diak too agora, imi ajuda hau hodi foo sai Liafuan Diak nee. ⁶ Nai Maromak hahuu ona halo servisu diak iha imi. I hau laran metin katak, Nia sei kontinua nafatin too Nia servisu nee hotu iha loron nebee Kristu Jesus fila fali mai hosi lalehan.

⁷ Hau senti nunee, tanba imi iha hau nia laran. Maromak foo fiar ba imi atu servisu hamutuk ho hau. Bainhira Hau defende Nia Liafuan Diak hodi hatudu ba ema katak Liafuan nee loos, imi sempre halo parte iha servisu nee. Bainhira hau iha dadur laran mos, imi halo parte nafatin. ⁸ Nai Maromak rasik hatene katak, hau hakarak teb-tebes atu haree imi, i hau hadomi imi hanesan Kristu Jesus mos hadomi imi.

⁹ Hau halo orasaun ba Nai Maromak para imi nia domin ba malu bele buras ba beibeik. Hau mos husu atu Nia aumenta beibeik matenek ba imi hodi halo imi hatene saida mak loos, saida mak sala. ¹⁰ Nunee imi bele hili saida mak diak hodi moris loos i livre hosi sala too Kristu fila fali mai. ¹¹ Ho Jesus Kristu nia tulun, imi sei hatudu hahalok diak iha imi nia moris tomak. Hodi nunee, ema sei foti aas Nai Maromak nia naran hodi hahii Nia.

Paulo nia terus halo ema barak fiar ba Kristu

¹² Maun-alin sira, hau hakarak atu imi hatene katak, maski ema halo susar hau, maibee hau nia terus nee halo ema barak liu tan fiar ba Nai Jesus nia Liafuan Diak. ¹³ Seguransa sira iha rezidensia ulun boot sira nian ho ema sira seluk iha nee mos hatene dehan, hau dadur hela tanba serbi Jesus Kristu.+ 1:13 Apostolu sira nia Istoria (Atos, Kisah) 28:30¹⁴ Tanba hau iha dadur laran mos sarani sira barak liu mak laran metin ba Nai Jesus. Agora sira brani liu, i la tauk tan atu foo sai Maromak nia liafuan.

¹⁵ Iha duni ema balu foo sai kona ba Kristu ho hanoin nebee diak, maibee iha mos balu halo nunee tanba sira laran moras hau i hakarak para ema tuir deit sira. ¹⁶ Sira nebee ho hanoin diak, sira foo sai kona ba Kristu tanba sira hadomi hau. Sira hatene katak, Maromak tau hau iha fatin nee para defende Liafuan Diak.

¹⁷ Maibee sira nebee laran moras hau, sira foo sai kona ba Kristu para buka naran deit, laos ho objetivu nebee diak. Sira hanoin atu foo todan liu tan mai hau iha kadeia nee.

¹⁸ Maibee husik deit ba. Ema atu hanorin ho laran moos ka la moos, la buat ida, naran katak sira hanorin kona ba Kristu. Ida nee mak halo hau nia laran haksolok.

I hau sei haksolok nafatin, ¹⁹ tanba hau hatene katak, ho imi nia orasaun mai hau, i Jesus Kristu nia Espiritu nia tulun, too ikus Maromak sei salva hau. ²⁰ Hau hakarak ho laran metin atu hau brani nafatin foo sai kona ba Kristu, hanesan mos uluk, atu nunee hau la bele moe. Atu hau moris ka, hau mate, la buat ida. Naran katak Maromak uza hau hodi foti aas Kristu nia naran.

²¹ Hau hanoin nunee: se hau moris, entaun moris ba Kristu, i hau bele halo servisu ida ke iha folin. Maibee se hau mate, hau sorti liu tan, tanba hau bele husik mundu nee hodi baa moris hamutuk ho Kristu. Nee mak hau la hatene atu hili ida nebee loos. ²⁴ Maibee imi sei presiza hau iha nee, entaun diak liu hau hela lai iha mundu. ²⁵ Entaun hau laran metin katak, hau sei moris i sei hela ho imi nafatin, para tulun imi atu fiar metin liu tan ba Maromak ho laran haksolok. ²⁶ Nunee imi sei foti aas Jesus Kristu nia naran, tanba Nia mak loke dalan atu hau bele baa haree fali imi.

Moris loos nafatin

²⁷ Bele halo nusaa mos, imi tenki moris tuir lo-loos Kristu nia Liafuan Diak. Nunee, se hau rasik baa vizita fali imi ka rona deit hosi ema mos, hau bele hatene katak, imi hamriik metin ho neon ida laran ida. I hau bele hatene katak, imi hotu servisu makaas para ema seluk mos fiar Kristu nia Liafuan Diak nee. ²⁸ Bainhira ema kontra imi, la bele tauk sira. Imi nia brani nee hatudu ba sira katak, Nai Maromak rasik sei salva imi maibee sei halo lakon tiha sira. ²⁹ Maromak nee diak teb-tebes. Nia loke ona dalan ba imi para fiar ba Kristu. Laos nee deit, maibee Nia mos bolu imi atu terus tanba tuir Nia. ³⁰ Imi nia luta hanesan ho hau nia luta. Uluk imi haree hau terus ba Kristu, i agora mos imi rona dehan hau hasoru nafatin situasaun hanesan nee.+ 1:30 Apostolu sira nia Istoria (Atos, Kisah) 16:19-40

Ita tenki haraik aan hanesan Jesus Kristu

¹ Imi laran metin tanba imi sai ona ida ho Kristu. Imi nia laran hakmatek tanba Kristu hadomi imi. Imi lao hamutuk ho Maromak nia Espiritu. Imi laran diak ba malu, i hadomi malu. ² Imi moris nunee, halo hau nia laran haksolok. Agora hau husu atu imi hanoin ida deit, i hadomi malu ho neon ida laran ida atu nunee hau bele haksolok liu tan. ³ La bele halo saida deit hodi buka naran. La bele foti aan, maibee tenki haraik aan hodi konsidera ema seluk diak liu fali imi. ⁴ La bele servisu deit ba imi nia interese privadu, maibee imi ida-idak mos tenki haree ba ema seluk nia interese.

⁵ Imi nia haraik aan hanesan Kristu Jesus.

⁶ Nia Maromak.

Maski nunee Nia prontu husik Nia pozisaun nudar Maromak.

⁷ Nia husik tiha buat hotu-hotu

hodi sai ema

i moris hanesan atan.

⁸ Nia sai tiha ema,

Nia haraik Aan

hodi moris tuir Nai Maromak nia hakarak too mate.

Maski ema oho Nia iha krus hanesan fali ema aat ida mos,

Nia simu.

⁹ Tanba nee, Nai Maromak foti aas Nia liu buat hotu-hotu,

i foo ba Nia, naran ida nebee boot liu naran hotu-hotu.

¹⁰ Maromak halo nunee

atu kriatura hotu-hotu iha lalehan ho iha rai,

ema moris ho ema mate,

hakneak hodi adora Jesus.

¹¹ Hotu-hotu sei hatete, “Jesus Kristu mak Nai!”

Ho nunee sira foti aas Aman Maromak nia naran.+ 2:11 Isaias (Yesaya) 45:23

Ita tenki moris tuir Maromak nia hakarak

¹² Maluk doben sira, uluk hau sei hamutuk ho imi, imi sempre rona hau hodi halo tuir Maromak nia hakarak. Agora hau dook hosi imi mos, imi tenki hakaas aan liu tan atu moris nunee. Maromak salva tiha ona imi. Nee duni, esforsa aan ho tauk ho respeitu para tuir Nia hakarak, atu imi nia salvasaun bele too iha rohan. ¹³ Tanba Nai Maromak rasik servisu iha imi nia laran. Nia halo imi prontu atu tuir Nia hakarak, i foo mos kbiit ba imi atu bele halo tuir.

¹⁴ Imi halo saida deit, la bele murmura, i la bele istori malu. ¹⁵ Nunee, nudar Maromak nia oan, imi bele moris ho laran moos, livre hosi sala, buat aat ida mos la iha. Imi moris iha ema aat sira nia leet. Entaun imi tenki sai hanesan naroman hodi leno dalan ba sira, hanesan fitun iha lalehan.+ 2:15 Deutoronómiu (Ulangan) 32:5¹⁶ Hatoo ba sira, Maromak nia liafuan nebee foo moris. Se imi halo nunee, entaun aban-bainrua bainhira Jesus Kristu fila fali mai, hau nia laran sei haksolok, tanba hau nia servisu ho hau nia kolen la saugati.

¹⁷ Tanba imi fiar ba Kristu, imi mos serbi Maromak hodi entrega imi nia aan tomak sai hanesan sakrifisiu ba Nia. Se aban-bainrua ema oho hau tanba hau nia fiar karik, mak hau nia mate mos sai hanesan sakrifisiu ida hodi foo ba Nai Maromak.+ 2:17 Númerus (Bilangan) 28:7 Bele nunee mos, hau nia laran haksolok hamutuk ho imi. ¹⁸ Imi mos tenki haksolok hamutuk ho hau.

Paulo hakarak haruka Timóteo ba Filipi

¹⁹ Hau hein katak, la kleur tan Nai Jesus foo dalan atu hau haruka Timóteo baa iha imi. Bainhira fila fali mai, nia bele konta mai hau kona ba imi, hodi halo hau nia laran haksolok. ²⁰ Iha nee la iha ema seluk hanesan Timóteo. So nia deit mak iha interese teb-tebes ho imi. ²¹ Sira seluk so hanoin deit sira nia aan. Buat nebee Jesus Kristu hakarak, sira la interese. ²² Maibee imi rasik hatene, Timóteo servisu makaas hodi foo sai Nai Jesus nia Liafuan Diak. Nia servisu hamutuk ho hau, hanesan oan ida servisu ho nia aman. ²³ Nee duni hau hakarak hein too hau rona buat nebee mak atu akontese mai hau, depois mak hau haruka kedas nia ba imi. ²⁴ I Nai Jesus halo hau laran metin katak, la kleur tan, hau mos bele baa vizita imi.

Paulo hakarak haruka Epafroditu ba Filipi

²⁵ Uluk imi hili Epafroditu para mai tau matan ba hau. Durante nee nia sai hanesan hau nia alin ida hodi halao Maromak nia servisu hamutuk ho hau, i nia luta hamutuk ho hau hanesan funu nain ida. Maibee agora, hau hanoin hau tenki haruka nia fila fali ba imi. ²⁶ Tanba nia hanoin teb-tebes imi hotu-hotu, i nia mos preokupa hela ho imi tanba imi rona dehan nia moras. ²⁷ Loos duni, momentu nebaa, nia moras todan besik atu mate, maibee Nai Maromak hatudu Nia laran diak ba nia, i kura tiha nia moras. Hanesan nee Maromak mos hatudu Nia laran diak mai hau, para hau la bele tristi liu tan. ²⁸ Tanba nee mak hau hakarak liu tan haruka Epafroditu fila fali ba imi, para imi haree nia, imi sei haksolok, i hau mos laran hakmatek. ²⁹ Imi tenki simu nia ho haksolok teb-tebes, nudar imi nia maluk sarani. I imi mos tenki respeita ema hotu nebee hahalok hanesan nia. ³⁰ Tanba nia halao Kristu nia servisu too nia besik atu mate. Nia foo aan ba mate, para bele ajuda hau hodi imi nia fatin.

Nai Maromak simu ema tanba fiar ba Jesus Kristu

¹ Maun-alin sira, haksolok ba, tanba imi laran ida ona ho Nai Jesus. Maski hau hakerek fali buat nebee uluk hau hakerek tiha ona, maibee hau la baruk foo hanoin dala ida tan ba imi, atu imi keta monu ba ema nia liafuan bosok.

² Kuidadu ho asu sira nee - ema sira nebee halo buat aat hodi bosok dehan tenki sunat mak foin Maromak simu ita.+ 3:2 Ema Judeu sira halo serimonia sunat ba labarik mane hotu-hotu bainhira sira halo loron walu. Nee sinal ida hodi hatudu katak labarik nee Maromak nian, i tama ona ba Maromak nia povu.³ Afinal ita nee mak Maromak nia ema lo-loos. Ita mak adora Maromak hodi Nia Espiritu nia tulun. Ita foti aas Kristu Jesus nia naran, i ita la depende ba saida deit mak ita ema halo.

⁴ Se karik Maromak bele simu ita tanba ita nia hahalok ka ita nia huun, entaun hau rasik bele dehan, hau loos tiha ona. Karik ema seluk gaba aan kona ba buat sira nee, hau bele gaba aan liu fali nia. ⁵ Hau moris mai, iha loron walu ema sunat hau tuir lei relijiaun. Hau ema Ebreu isin, hosi suku Benjamim, hosi ema Israel. Uluk hau seidauk tuir Kristu, hau nudar ema grupu Farizeu badinas teb-tebes halo tuir lei relijiaun, ⁶ too la iha ema ida foo sala mai hau. Laos nee deit, iha tempu nebaa hau mos halo terus sarani sira, tanba hau hanoin ema sira nee soe tiha ona ita nia lei relijiaun.+ 3:6 Roma 11:1; Apostolu sira nia Istoria (Atos, Kisah) 8:3; 22:4; 23:6; 26:5, 9-11

⁷ Uluk hau hanoin dehan, buat sira nee folin boot mai hau. Maibee agora hau konsidera la iha folin ida, tanba hau tuir Kristu. ⁸ Ida nebee hau konsidera folin boot liu mak nee: Hau bele konhese Kristu Jesus hau nia Nai. Buat sira seluk, hau husik tiha ona, i konsidera hanesan lixu deit, para hau bele besik liu Kristu, ⁹ i bele laran ida ho Nia. Nai Maromak simu hau laos tanba hau tuir lei relijiaun, maibee tanba hau fiar ba Kristu. Tanba hau nia fiar mak Maromak simu hau.

¹⁰ Hau hakarak konhese Kristu liu tan. Hau hakarak para Maromak servisu iha hau nia laran ho kbiit ida nebee Nia uza hodi halo Kristu moris fali hosi mate. Hau hakarak halo parte iha Kristu nia terus. Kona ba mate mos, hau hakarak sai hanesan Nia. ¹¹ Tanba hau laran metin katak, aban-bainrua Nia sei halo moris fali hau hosi mate.

Hakaas aan nafatin too rohan

¹² Hau laos hatete katak, hau hetan ona buat sira nee ka hau moris loos ona. Maibee hau hakaas aan nafatin atu moris tuir Kristu Jesus nia hakarak, tanba ho objetivu nee mak Nia hili hau sai Nia ema. ¹³ Maun-alin sira, hau la hanoin katak hau too ona objetivu nee. Maibee buat nebee hau halo mak nee: hau haluha tiha buat nebee iha kotuk hodi halai makaas ba oin. ¹⁴ Hau hakaas aan ba oin nafatin too rohan para manaan premiu. Hau nia premiu mak nee: aban-bainrua Nai Maromak bolu hau tama iha lalehan, tanba Kristu Jesus mate mai hau.

¹⁵ Tuir loos ita hotu nebee abut metin ona iha Kristu, tenki hanoin hanesan nee. Maibee se imi balu iha hanoin ruma la hanesan maka Nai Maromak sei foo hanoin ba nia. ¹⁶ Bele halo nusaa mos, ita tenki halo tuir buat hotu nebee Maromak hatudu ona mai ita.

¹⁷ Maun-alin sira, imi tenki moris tuir hau nia ezemplu, i aprende di-diak hosi ema seluk nebee tuir ona ezemplu nebee hau foo.+ 3:17 1 Korintu 4:16; 11:1¹⁸ Hau hatete dala barak ona ba imi katak, iha ema barak moris hanesan Kristu nia inimigu, i la foo folin ba Nia mate iha krus. I agora hau foo hanoin tan ho matan been. ¹⁹ Too ikus Maromak sei halo lakon tiha ema sira nee. Sira so buka halo kontenti deit sira nia isin. Hahalok aat nebee sira halo, tuir loos halo ema moe, maibee sira tebe rai dehan, diak loos. Sira hanoin deit buat mundu nian.

²⁰ Maibee ita la bele nunee, tanba ita sai ona ema lalehan nian. Agora ita hein hela ita nia Salvador Nai Jesus Kristu tuun fila fali mai hosi lalehan. ²¹ Iha mundu nee, ita nia isin lolon fraku, i sei mate. Maibee bainhira Jesus Kristu mai, Nia sei troka tiha ita nia isin lolon fraku nee, sai fali forti ho furak teb-tebes hanesan Nia isin lolon rasik, i ita sei la mate tan. Nia bele halo ida nee tanba Nia iha kbiit hodi ukun buat hotu-hotu.

¹ Tanba nee, maun-alin doben sira, imi tenki hamriik metin ho Nai Jesus. Hau hakarak teb-tebes atu haree imi, tanba imi hanesan premiu ida hosi hau nia servisu, i imi halo hau nia laran haksolok.

Paulo nia lia menon

² Hau husu boot ba imi, Evódia ho Síntike, atu la bele istori malu tan, maibee tenki neon ida laran ida, tanba imi nain rua Nai Jesus nia ema. ³ Hau nia kolega servisu nebee hau konfia, hau husu o ajuda hela senhora nain rua nee para diak malu. Tanba uluk sira servisu makaas ajuda hau foo sai Maromak nia Liafuan Diak, hamutuk ho Clemente ho kolega sira seluk. Sira hotu nia naran, Maromak hakerek tiha ona iha lista ema moris rohan-laek nian.+ 4:3 Ema hotu-hotu nebee hetan moris rohan-laek hamutuk ho Kristu iha lalehan, sira nia naran hakerek iha lista iha Maromak nia livru ida. Haree Apokalipse (Wahyu) 20:12.

⁴ Loron-kalan haksolok deit ba, tanba imi Nai Jesus nia ema. Dala ida tan hau hatete: haksolok nafatin ba!

⁵ Hatudu laran maus ba ema hotu-hotu, tanba Nai Jesus besik fila mai ona. ⁶ La bele preokupa kona ba saida deit. Maibee iha situasaun nebee deit, halo orasaun husu Nai Maromak nia tulun. I bainhira imi husu, keta haluha foo agradese ba Nia. ⁷ Kuandu imi halo nunee, mak Maromak sei halo imi nia laran hakmatek. Hakmatek nebee Nia foo nee, ita ema sukat la too. Ho hakmatek nee, Maromak sei kuidadu imi nia neon ho laran para imi la bele preokupa ona, tanba imi Kristu Jesus nia ema.

⁸ Entaun, maun-alin sira, imi tenki kuidadu di-diak imi nia hanoin. Hanoin beibeik kona ba buat nebee mak loos, ho buat nebee iha valór. Hanoin kona ba buat diak nebee halo haksolok Maromak nia laran ho buat furak nebee foo ksolok ba ema. Saida deit mak diak loos i saida deit mak ita bele gaba, nee mak imi tenki hanoin. ⁹ Halo tuir buat nebee imi aprende ona hosi hau, liu hosi hau nia koalia ka hau nia hahalok. Kuandu imi halo nunee mak Maromak sei akompanha imi, i foo laran hakmatek ba imi.

Paulo foo obrigadu ba sarani sira nia ajuda

¹⁰ Hau haksolok teb-tebes hodi hahii Nai Jesus, tanba dala ida tan imi ajuda hau. Hau hatene katak, uluk kedas imi hadomi hau, maibee kleur ona imi la iha oportunidade hodi tulun. ¹¹ Hau hatete nunee, laos tanba hau falta buat ruma, lae. Hau aprende ona moris kontenti ho buat nebee mak hau iha. ¹² Hau hatene ona moris iha susar nia laran, i hatene mos moris ho buat hotu-hotu kompletu. Hau aprende ona segredu nee: oinsaa bele moris ho kontenti iha situasaun saida deit. Atu kabun bosu ka kabun mamuk, atu iha buat barak ka iha deit uitoan, hau kontenti nafatin. ¹³ Hau bele simu buat hotu-hotu, tanba Kristu mak foo forsa mai hau.

¹⁴ Maski nunee, foin dadauk imi ajuda hau iha susar laran, nee buat diak ida. ¹⁵ Uluk mos, bainhira imi foin simu Nai Jesus nia Liafuan Diak, i hau sai hosi provinsia Masedónia, so imi iha sidade Filipi deit mak foo ajuda mai hau. Sarani sira seluk lae. Maibee imi hatene ona istoria nee. ¹⁶ Bainhira hau sei iha sidade Tesalónika mos, imi haruka osan mai hau dala rua hodi suporta hau.+ 4:16 2 Korintu 11:9; Apostolu sira nia Istoria (Atos, Kisah) 17:1¹⁷ Hau koalia hanesan nee, laos tanba hau hakarak atu imi foo tan. Maibee hau hakarak para Maromak foo bensaun ba imi, tanba imi nia laran diak. ¹⁸ Hau simu ona ajuda hotu-hotu nebee imi haruka mai hau liu hosi Epafroditu. Agora hau la falta buat ida, i sei iha resin tan. Imi nia tulun nee hanesan sakrifisiu morin ida nebee imi foo ba Maromak, i Nia simu ho laran haksolok.+ 4:18 Ézodu (Keluaran) 29:18

¹⁹ Hau nia Maromak riku teb-tebes. I Nia sei foo ba imi, buat hotu-hotu nebee imi presiza, tanba imi laran ida ho Kristu Jesus. ²⁰ Mai ita foti aas ita nia Aman Maromak nia naran, too tinan ba tinan! Amen.

Paulo taka nia surat

²¹ Hatoo hau nia kumprimentus ba ema hotu-hotu nebee tuir Kristu Jesus iha nebaa. Kumprimentus mos hosi maluk sarani sira nebee hamutuk ho hau, ²² ho mos sarani sira seluk iha sidade nee, liu-liu sira nebee servisu ba liurai boot César.

²³ Hau harohan atu Nai Jesus Kristu hatudu Nia laran diak ba imi hotu.