Paulo nia surat ba
Filemon
1Paulo hahuu nia surat
1 Surat nee hosi hau, Paulo, hamutuk ho ita nia maluk sarani Timóteo. Hau dadur hela iha kadeia laran tanba hau tuir Kristu Jesus.
Ami hakerek surat nee ba ami nia belun diak Filemon, senhor halao Nai Maromak nia servisu hanesan ami. 2 Surat nee mos ba sarani sira nebee baibain halibur malu halo orasaun iha senhor nia uma, ho mos ba ami nia maluk feto Afia ho ami nia maluk luta nain Arkipu.+ 1:2 Kolose 4:17
3 Hau harohan ba ita nia Aman Maromak ho Nai Jesus Kristu, para hatudu Sira nia laran diak ba imi, i foo paz ho hakmatek ba imi.
Paulo agradese ba Maromak tanba Filemon
4 Senhor Filemon, bainhira hau halo orasaun, hau sempre temi ita nia naran, i foo agradese ba Maromak. 5 Tanba hau rona katak ita hadomi Maromak nia povu hotu i ita mos fiar lo-loos ba Nai Jesus. 6 Senhor nia fiar nee halo senhor moris neon ida laran ida ho sarani sira seluk. Hau harohan atu liu hosi imi nia domin nee, imi bele kompriende klean liu tan bensaun hotu-hotu nebee Maromak foo mai ita tanba ita laran ida ho Kristu. 7 Senhor hadomi Maromak nia povu hodi halo sira nia laran haksolok. Hahalok nee halo hau nia laran mos haksolok teb-tebes, i foo forsa mai hau.
Paulo husu Filemon simu fali nia atan Onésimu nebee uluk halai lakon
8 Tanba nee hau hakarak husu buat ida. Nudar Kristu Jesus nia apostolu, hau iha direitu atu manda senhor halo buat nebee mak loos. Maibee hau lakohi manda, so husu deit, tanba senhor hadomi Maromak nia povu. Hau mos katuas ona, i hau dadur hela iha kadeia laran tanba hau tuir Kristu Jesus. 10 Nee mak hau husu atu senhor simu fali ita nia atan Onésimu ho diak. Iha komarka nee nia sai hanesan hau nia oan rasik, tanba hau mak lori nia atu fiar ba Jesus.+ 1:10 Kolose 4:9
11 Uluk Onésimu nee la iha folin ba senhor, maibee agora nia iha folin, laos deit ba senhor, maibee iha folin mos mai hau.+ 1:11 Naran Onésimu katak ‘iha folin’.12 Hau hadomi teb-tebes nia, maibee la iha buat ida, agora hau haruka nia fila fali ba senhor.
13 Hau iha kadeia laran nee tanba hau foo sai Maromak nia Liafuan Diak. Tuir loos hau hakarak atu Onésimu hela nafatin ho hau para bele foo ajuda mai hau hodi senhor nia naran. 14 Maibee hau lakohi foti desizaun se senhor seidauk hataan. Hau hakarak atu tulun nebee ita foo mai hau sai hosi ita nia laran, laos tanba hau mak obriga.
15 Uluk Onésimu halai lakon tiha hosi senhor nia uma. Dala ruma Maromak husik nia halai sai iha tempu badak para agora nia bele fila fali baa hela metin ho senhor. 16 Uluk nia ita nia atan deit. Maibee agora nia fila fali, nia mos sai ita nia maluk sarani. Hau mos hadomi teb-tebes nia, maibee ita sei hadomi liu tan nia, tanba agora nia laos deit senhor nia atan, maibee nia mos tuir Nai Jesus hanesan ita.
17 Nee duni, se senhor konsidera hau nudar ita nia kolega servisu, entaun hau husu atu senhor simu Onésimu hanesan mos ita simu hau. 18 Se Onésimu uluk halo sala ruma hasoru senhor, ka nia iha tusan ruma, hau mak selu. 19 Hau hakerek ho hau nia liman rasik: Hau, Paulo, promete atu selu hotu Onésimu nia tusan ba Filemon . Maibee keta haluha katak, senhor nia tusan ba hau nee boot liu, tanba liu hosi hau mak ita hetan moris foun hosi Maromak.
20 Entaun belun, halo ida nee para ajuda hau, tanba ita nain rua laran ida ona ho ita nia Nai Jesus Kristu. Nunee ita sei halo hau nia laran haksolok.
Paulo taka nia surat
21 Hau hakerek surat nee ho kontenti tanba hau hatene katak senhor sei halo tuir, i sei halo liu fali buat nebee mak hau husu.
22 Iha tan buat ida. Prepara fatin ida mai hau, tanba hau hein katak Maromak sei rona imi nia orasaun hodi loke dalan atu hau bele baa fali haree imi.
23 Epafras dadur hela hamutuk ho hau tanba nia mos foo sai kona ba Kristu Jesus. Nia haruka kumprimentus ba senhor.+ 1:23 Kolose 1:7; 4:1224 Marcos, Aristarco, Demas, ho Lucas servisu hamutuk ho hau, i sira mos foo kumprimentus.+ 1:24 Apostolu sira nia Istoria (Atos, Kisah) 12:12; 25; 13:13; 15:37-39; 19:29; 27:2; Kolose 4:10; 4:14; 2 Timóteo 4:10, 11
25 Hau harohan atu Nai Jesus Kristu hatudu Nia laran diak ba imi hotu.