Surat hosi
Judas
1Judas hahuu nia surat
1 Surat nee hosi hau, Judas, nudar Jesus Kristu nia atan ho Tiago nia alin.
Hau hakerek surat nee ba imi nebee Maromak bolu tiha ona para sai Nia ema. Aman Maromak hadomi imi i Jesus Kristu sempre kuidadu imi.
+ 1:1 Mateus 13:55; Marcos 6:32 Hau harohan para Nai Maromak loron ba loron hatudu Nia domin ba imi, i foo paz ho hakmatek ida ke boot teb-tebes ba imi.
Kuidadu ho ema bosok-teen sira
3 Maluk doben sira, tuir lo-loos hau hakarak teb-tebes hakerek ba imi kona ba salvasaun nebee mak ita hotu-hotu hetan ona. Maibee agora hau senti katak, hau tenki hakerek fali buat seluk hodi foo hanoin ba imi atu defende lia loos nebee Nai Maromak foo ona ba Nia povu. Lia loos nee Nia foo dala ida deit, i nunka muda.
4 Tanba iha ona ema balu tama sub-subar iha imi nia leet. Sira nee la interese Maromak, i fila lia tuun-sae kona ba Nia laran diak. Sira dehan, tanba Maromak nee laran diak, entaun ita bele halo sala saida deit konformi ita nia hakarak. Sira mos nega Jesus Kristu, afinal Nia mak ita nia Liurai ho ita nia Nai. Uluk liu Livru Sagradu hakerek tiha ona kona ba kastigu nebee mak sira sei hetan.
5 Imi hatene ona istoria nebee mak hau atu koalia, maibee hau hakarak foo hanoin fila fali ba imi:
Uluk Nai Maromak lori povu Israel sai hosi rai Ejitu. Maski Nia salva sira, maibee too ikus Nia halo rahun fali sira nebee mak la fiar ba Nia.+ 1:5 Ézodu (Keluaran) 12:51; Númerus (Bilangan) 14:29-30
6 Nunee mos anju nebee husik tiha sira nia knaar ho sira nia hela fatin. Maromak kesi metin sira ho korenti iha fatin nakukun laran hodi hein loron nebee Maromak tesi ema hotu-hotu nia lia.
7 I keta haluha povu sidade Sodoma ho Gomora, ho aldeia sira seluk nebee besik. Sira gosta halo sala seksual ho sala foer oi-oin deit. Too ikus Maromak kastigu sira iha ahi nebee nunka mate. Nee sai ezemplu ida hodi foo hanoin mai ita hotu.+ 1:7 Hahuu (Jénesis, Kejadian) 19:1-24
8 Nunee mos ho ema aat sira nebee tama iha imi nia leet nee. Sira halo sala hodi hafoer sira nia aan rasik, i dehan mehi mak foo sai ba sira para halo nunee. Sira lakohi rona see-see deit mak kaer ukun iha lalehan ka iha rai, too hatete aat Maromak nia anju sira. 9 Maibee anju sira nia boot Miguel rasik la brani halo hanesan nee ba sira. Bainhira Moisés foin mate, Miguel haksesuk malu ho diabu nia boot kona ba see mak atu hetan Moisés nia mate isin. Iha tempu nebaa Miguel la brani foo sala ba diabu hodi koalia aat nia. Miguel so dehan deit, “Nai Maromak sei kastigu o.”+ 1:9 Daniel 10:13, 21; 12:1; Apokalipse (Wahyu) 12:7; Deutoronómiu (Ulangan) 34:6; Zacarias 3:2
10 Maibee ema sira nee gosta hatete aat buat nebee mak sira la kompriende. Sira so hatene sira nia hakarak deit, hanesan fali animal nebee la iha neon. I hahalok nee mak halo rahun sira.
11 Sira sei terus! Tanba sira tuir Kaín nia dalan. Sira hakarak teb-tebes hetan osan, too monu ba sala hanesan Balaão. I hanesan Koré, sira rahun tanba kontra nai ulun sira.+ 1:11 Kaín oho nia alin rasik tanba laran moras ba nia. Balaão simu osan para lori ema Israel atu adora fali maromak falsu. I Koré lori ema barak kontra Moisés ho Arão, tanba nee Maromak oho nia.+ 1:11 Hahuu (Jénesis, Kejadian) 4:3-8; Númerus (Bilangan) 22:1-35; 16:1-35
12 Bainhira imi sarani sira halibur malu hodi haan-hemu hamutuk, ema sira nee mos haan hamutuk ho imi, maibee sira kaan-teen i la hatene moe. Nunee sira hanesan bibi atan nebee foo haan deit nia aan, i hanesan buat foer ida iha imi nia klaran.+ 1:12 Lian Gregu iha nee la klaru. Bele “buat foer”, bele mos “fatuk isin”. Sira hanesan kalohan nebee anin huu, maibee la foo udan. Sira hanesan ai nebee la foo fuan, maski too ona nia tempu. Ikus mai ai nee toos nain fokit sai tiha hamutuk ho nia abut too mate liu tiha. 13 Sira hatudu hahalok nebee halo moe deit ita, hanesan laloran boot nebee mak baku hasai nia furin iha bee leten. Sira hanesan fitun nebee lao la tuir dalan. Maromak prepara tiha ona fatin ida nakukun liu ba sira, para sira hela iha nebaa too tinan ba tinan.
14 Enoke foo sai hori uluk kedas kona ba ema hanesan nee. Se ita sura Adão nia jerasaun, Enoke tama ba jerasaun hitu. Nia dehan nunee: “Haree ba! Ita nia Nai mai ho Nia anju santu rihun ba rihun.+ 1:14 Hahuu (Jénesis, Kejadian) 5:18, 21-24
15 Nia mai atu tesi ema hotu-hotu nia lia. I Nia sei kastigu ema sira nebee mak la interese Maromak, tanba sala hotu-hotu nebee ema aat sira nee halo hasoru Maromak, ho liafuan aat hotu-hotu nebee sira koalia kontra Nia.”
16 Ema sira nee so hatene murmura i foo sala ba ema seluk. Sira moris tuir deit sira nia hakarak aat rasik. Sira gaba aan, i kos-kose ema seluk para halo tuir sira nia hakarak.
Lia menon
17 Maibee maluk doben sira, la bele haluha liafuan nebee ita nia Nai Jesus Kristu nia apostolu sira foo sai tiha ona ba imi. 18 Sira foo sai katak, bainhira mundu nee besik remata ona, sei iha ema nebee gosta goza Maromak nia povu, i moris tuir deit sira nia hakarak aat.+ 1:18 2 Pedro 3:319 Agora ema sira nee iha tiha ona. Sira nee halo imi fahe malu. Sira la iha Maromak nia Espiritu, maibee sira nia hakarak aat mak domina fali sira.
20 Maibee maluk doben sira, imi fiar ba Jesus Kristu. Agora hakaas aan atu hametin liu tan imi nia fiar, tanba imi nia fiar nee santu. Halo orasaun ho Espiritu Santu nia tulun. 21 Imi hein hela ita nia Nai Jesus Kristu atu hatudu Nia laran diak ba imi hodi lori imi ba moris rohan-laek. Durante imi hein, keta husik Maromak nia domin.
22 Imi tenki hadomi ema sira nebee mak fiar la metin, 23 i dada sai ema seluk hosi ahi laran para salva sira. Iha tan ema seluk mak imi tenki hadomi, maibee kuidadu. Maski imi hanoin sira, maibee imi mos tenki hakribi sira nia sala, too hakribi mos sira nia hena nebee foer tanba sira nia hahalok aat nee.
Hahii Nai Maromak
24 Mai ita hahii Nai Maromak!
Nia mak iha kbiit hodi kuidadu imi
para imi la bele monu.
Maromak forsa teb-tebes mak bele lori imi
ba iha Nia futar oin.
Imi sei haksolok boot,
imi nia sala uitoan mos la iha ona.
25 So Nia mesak deit mak Maromak,
Nia mak ita nia Salvador.
Mai ita hotu-hotu foti aas Nia naran Kristu.
liu hosi ita nia Nai Jesus
Maromak nee boot teb-tebes,
kbiit hotu-hotu Ninian,
Nia mak kaer ukun,
molok mundu nee iha,
agora,
i too tinan ba tinan nafatin.
Amen.