Surat ba ema
Ebreu
1Maromak nia Oan Jesus boot liu profeta sira hotu
1 Uluk, Nai Maromak koalia fila-fila ba ita nia bei-ala sira liu hosi Nia profeta, ho dalan oi-oin.+ 1:1 a: Ema Ebreu mak ema Israel.2 Maibee ohin loron, mundu besik remata ona, Maromak koalia ba ita liu hosi Nia Oan rasik. Hori uluk liu Maromak foo fiar ba Nia Oan hodi halo lalehan ho rai, i Nia promete katak aban-bainrua Nia Oan mak sei simu buat sira nee hotu. 3 Maromak nia Oan hanesan lo-loos Maromak, Nia hatudu sai Maromak nia kbiit ho naroman lalehan nian, i Nia liafuan iha kbiit boot. Hodi Nia liafuan nee Nia tane nafatin buat hotu-hotu iha lalehan ho rai. Nia mak loke dalan para Maromak bele hamoos ema nia sala. Hotu tiha Nia sae ba lalehan hodi tuur iha Nai Maromak Aas Liu nia sorin loos.
Maromak nia Oan boot liu anju sira
4 Nunee Nai Maromak foti Nia Oan aas liu Nia anju sira hotu. I fatin nebee mak Nia foo ba Nia Oan mos aas liu anju sira nia fatin. 5 Nai Maromak hatete ba Nia Oan nunee:
“O Hau nia Oan.
Ohin loron Hau deklara katak Hau nee O nia Aman.”+ 1:5 Salmus (Mazmur) 2:7
Nia mos dehan,
“Hau nee Nia Aman,
Nia mak Hau nia Oan.”+ 1:5 2 Samuel 7:14; 1 Krónikas (Tawarikh) 17:13
Maibee Nai Maromak nunka koalia nunee kona ba anju sira.
6 Bainhira Nai Maromak haruka Nia Oan mane boot mai iha mundu, Nia dehan,
“Hau nia anju sira hotu tenki adora Nia.”+ 1:6 Deutoronómiu (Ulangan) 32:43; Lucas 2:13-14
7 Maibee kona ba anju sira, Maromak dehan,
“Hau nia anju sira nee Hau nia atan.
Hau haruka sira hanesan anin i hanesan ahi lakan.”+ 1:7 Salmus (Mazmur) 104:4
8 Maibee ba Nia Oan, Maromak dehan,
“O nee Maromak, O sei ukun tinan ba tinan.
O sempre ukun O nia reinu ho lo-loos.
9 O haksolok bainhira ema halo buat diak,
i hakribi hahalok nebee aat.
Tanba nee Hau, O nia Maromak, foti O aas liu O nia maluk sira,
i kose mina ba O nia ulun hodi halo O nia laran haksolok.”+ 1:9 Salmus (Mazmur) 45:7-8
10 Nai Maromak mos dehan ba Nia Oan nunee:
“Nai, hori uluk liu O halo mundu nee,
lalehan nee O nia liman fatin.
11 Buat sira nee hotu aban-bainrua sei lakon, maibee O iha nafatin.
Buat sira nee sei sai bosan hanesan faru tuan.
12 O sei lulun hanesan faru bosan,
i sei troka fali hanesan ema troka faru foun.
Maibee O nunka muda,
i O nia moris sei la remata.”+ 1:12 Salmus (Mazmur) 102:26-28
13 Nai Maromak dehan tan ba Nia Oan nunee:
“Mai tuur iha Hau nia sorin loos
too Hau halo O nia inimigu sira taka rabat iha O nia ain okos.”
Maibee Nai Maromak nunka koalia nunee ba Nia anju sira.+ 1:13 Salmus (Mazmur) 110:1
14 Entaun anju sira nee see? Sira nee espiritu nebee serbi Nai Maromak. I Nia haruka anju sira nee mai tulun ema nebee mak atu hetan salvasaun.
2Kaer metin lia loos kona ba salvasaun
1 Tanba nee, ita tenki kaer metin liu tan lia loos nebee ita rona tiha ona, para ita la bele lao sala dalan. 2 Uluk anju sira hatoo Maromak nia lia menon ba ita nia bei-ala sira. Buat nebee mak anju sira hatoo nee loos, i see mak kontra, nia simu kastigu tuir nia hahalok. 3 Saa tan salvasaun nebee mak Nai Jesus foo. Salvasaun nee boot teb-tebes, i see mak la interese, nia sei la sees hosi Maromak nia kastigu. Tanba dalan salvasaun nee Nai Jesus rasik mak foo sai uluk, i ema sira nebee mak rona hatudu mai ita katak Nia liafuan nee loos. 4 Nai Maromak mos halo milagre ho sinal oi-oin nebee halo ema admira. I Nia foo Nia Espiritu ba ema hodi foo kbiit oi-oin ba sira, tuir Nia hakarak. Nia halo buat sira nee hotu para hatudu mai ita katak Jesus nia liafuan nee loos duni.
Nai Jesus sai ema para salva ita
5 Agora ita koalia kona ba mundu foun nebee mak sei mai. Mundu foun nee laos foo ba anju sira mak ukun. 6 Iha Livru Sagradu dehan,
“Nai Maromak, ami ema kriatura nee see loos, too Ita Boot interese ami?
Ami ema kbiit-laek nee see loos, too Ita Boot tau matan mai ami?
7 Ita Boot halo ami kiik liu uitoan anju sira,
Ita Boot foo fatin aas ba ami i foti aas ami nia naran.
8 Ita Boot halo buat hotu-hotu hakruuk mai ami.”+ 2:8 Salmus (Mazmur) 8:5-7
Tuir liafuan nee, Maromak foti ita ema para ukun buat hotu-hotu. Nee dehan katak, buat hotu-hotu tenki hakruuk ba ita ema. Agora ita seidauk haree nunee iha ita nia moris. 9 Maibee ita haree ona iha Jesus nia moris. Durante Jesus moris iha mundu nee, Nia kiik liu uitoan anju sira, i agora Nai Maromak foo tiha ona fatin aas ba Nia hodi foti aas Nia naran, tanba Nia terus too mate iha ita hotu nia fatin. Nunee Nia hatudu sai Maromak nia laran diak.
10 Nai Maromak halo lalehan ho rai, buat hotu-hotu nebee iha, iha tanba Nia. Nia mak desidi katak Jesus tenki terus, i liu hosi Nia terus nee, Maromak halo Nia serve atu loke dalan ba ita ema hodi simu salvasaun. Maromak nia desizaun diak teb-tebes. Nunee Jesus lori ema barak hamutuk ho Nia ba iha naroman lalehan nian.
11 Bainhira Jesus hamoos ema ida nia sala, ema nee sai Maromak nia oan. Nunee Jesus ho ema sira nebee Nia halo moos ona nee, hotu-hotu Aman ida deit. Nee mak Jesus la moe bolu ita dehan, ita nee Nia alin. 12 Nia dehan ba Nai Maromak,
“Hau sei koalia sai ba Hau nia alin sira kona ba Ita Boot nia diak.
Hau sei hananu hahii Ita Boot iha sira nia leet.”+ 2:12 Salmus (Mazmur) 22:23
13 Jesus mos dehan,
“Hau sei laran metin nafatin ba Nai Maromak.”
Nia dehan tan,
“Hau mak nee, Hau hamutuk ho Maromak nia oan sira nebee mak Nai Maromak foo ona mai Hau.”+ 2:13 Isaias (Yesaya) 8:17; 18
14 Maromak nia oan sira nee iha isin ho raan. Nunee Jesus rasik mos sai ema hanesan ho ita ema kriatura para Nia bele mate, i liu hosi Nia mate, Nia bele halo lakon tiha ida nebee mak ukun mate; nee mak diabu nia boot. 15 I Jesus mos foo liberdade ba ema sira nebee tauk mate durante sira nia moris tomak, too sira sai hanesan fali atan ba tauk nee. 16 Jesus laos tulun anju sira, maibee Nia tulun ita nebee mak mai hosi Abraão nia jerasaun. Nee klaru. 17 Tanba nee, Jesus tenki sai hanesan lo-loos Nia maluk sira, para Nia bele sai nai lulik boot ida nebee hadomi ho kompriende teb-tebes ita hodi serbi Nai Maromak ho laran tomak. Nia foo Nia aan hanesan sakrifisiu para Maromak bele hamoos ita ema nia sala. 18 Nia rasik terus bainhira hetan tentasaun. Tanba nee Nia bele tulun ita bainhira ita mos hetan tentasaun.
3Nai Jesus boot liu Moisés
1 Maun-alin sira, Maromak hili ona imi atu moris ho laran moos, i hili mos imi atu tama iha lalehan. Imi tenki hanoin klean kona ba Jesus. Ita rekonhese ona katak Nia mak Nai Maromak nia apostolu, i Nia mak ita nia nai lulik boot. 2 Bainhira Nai Maromak haruka Jesus mai, Jesus halo tuir lo-loos Nai Maromak nia hakarak, hanesan mos Moisés uluk halo tuir Nai Maromak nia hakarak hodi serbi Nai Maromak nia povu hotu.+ 3:2 Númerus (Bilangan) 12:73 Maibee Jesus mak serve atu simu respeitu liu fali Moisés. Ita bele kompara ho ema nebee halo uma, ema seluk gaba liu ema nee duke sira gaba uma nebee mak nia halo. 4 Uma ida-idak, ema mak halo, maibee buat hotu-hotu nebee iha, Nai Maromak mak halo. 5 Moisés halo tuir Maromak nia hakarak hodi serbi Maromak nia povu nudar atan ida iha Maromak nia uma laran. I nia koalia kona ba buat nebee mak Nai Maromak atu foo sai aban-bainrua. 6 Maibee Jesus Kristu halo tuir Maromak nia hakarak hodi toma konta Maromak nia uma laran nudar Maromak nia Oan rasik. I ita nee Nia familia uma laran, naran katak ita kaer metin ita nia fiar i laran metin nafatin ba promesa nebee Maromak foo ona mai ita.
La bele ulun toos kontra Nai Maromak
7 Tanba nee mak imi tenki halo tuir buat nebee Espiritu Santu dehan,
“Ohin loron, se imi rona Nai Maromak nia liafuan,
8 la bele ulun toos
hanesan imi nia bei-ala sira uluk kontra Nai Maromak
hodi koko Nia iha rai fuik maran”.
9 Maromak dehan,
Durante tinan haat-nulu nia laran sira haree Hau nia milagre,
maibee sira koko Hau nafatin.
10 Tanba nee mak Hau hirus sira hodi dehan,
‘Ema sira nee sempre fila kotuk mai Hau,
i lakohi rona Hau nia liafuan.’
11 Hau hirus too Hau jura dehan,
‘Ema sira nee sei la tama iha Hau nia fatin deskansa.’ ”+ 3:11 Salmus (Mazmur) 95:7-11
12 Nunee maun-alin sira, kuidadu! Keta halo be imi balu nia laran sei hakarak halo sala i lakohi fiar Nia too fila kotuk ba Maromak Moris. 13 Maibee foo hanoin ba malu loro-loron, para imi la bele monu ba sala hodi tuir fali lia bosok i nunee sai ulun toos kontra Maromak. Agora mak tempu atu foo hanoin ba malu, tanba agora sei tama hela iha tempu nebee Espiritu Santu bolu ‘ohin loron’. 14 Ita sai ona laran ida ho Jesus Kristu, naran katak ita kaer metin nafatin ita nia fiar hosi huun too rohan. 15 Hanesan ohin hatete tiha ona iha leten:
“Ohin loron, se imi rona Nai Maromak nia liafuan,
la bele ulun toos
hanesan imi nia bei-ala sira uluk kontra Nai Maromak.”+ 3:15 Salmus (Mazmur) 95:7-8
16 See mak rona Nai Maromak nia liafuan maibee kontra fali nee? Sira nee mak ita nia bei-ala sira nebee Moisés rasik foin lori sai hosi rai Ejitu iha tempu nebaa. 17 Durante tinan haat-nulu nia laran Nai Maromak hirus see? Nia hirus ita nia bei-ala sira tanba sira halo sala, too sira mos mate iha rai fuik maran. 18 Momentu nebaa Maromak jura dehan, “Ema sira nee sei la tama iha Hau nia fatin deskansa.” Nia koalia kona ba see? Nia koalia kona ba ema sira nebee mak lakohi halo tuir Nia.+ 3:18 Númerus (Bilangan) 14:1-3519 Nunee ita hatene ona katak, sira la bele tama iha fatin deskansa nee, tanba sira lakohi fiar ba Nai Maromak.
4See mak fiar Nai Maromak sei hetan deskansa hamutuk ho Nia
1 Maromak promete ona atu Nia povu bele tama ba iha Nia fatin deskansa, i Nia promesa nee sei vale nafatin. Maibee kuidadu! Keta halo be hosi imi, balu la konsege tama iha nebaa. 2 Tanba ema foo sai tiha ona Nai Maromak nia liafuan diak ba ita, hanesan mos uluk ema foo sai ba ita nia bei-ala sira. Maibee liafuan nebee sira rona nee la iha folin ba sira, tanba sira la fiar. 3 Ita nebee fiar Maromak nia liafuan bele tama iha fatin deskansa nee. Maibee kona ba ema nebee la fiar, Nai Maromak hatete,
“Hau hirus too Hau jura dehan,
‘Ema sira nee sei la tama iha Hau nia fatin deskansa.’ ”
Nai Maromak jura nunee, afinal uluk kedas Nia prepara tiha ona fatin deskansa nee bainhira Nia remata halo lalehan ho rai.+ 4:3 Salmus (Mazmur) 95:114 Iha Livru Sagradu hakerek nunee kona ba deskansa nee: “Too loron hitu, bainhira Nai Maromak nia servisu hotu ona, Nia mos deskansa.”+ 4:4 Hahuu (Jénesis, Kejadian) 2:25 Maibee iha liafuan ohin nee, Nai Maromak bandu dehan, “Ema sira nee sei la tama iha Hau nia fatin deskansa.”+ 4:5 Salmus (Mazmur) 95:11
6 Nee dehan katak, ema nebee uluk rona Maromak nia liafuan diak maibee la halo tuir, sira la bele tama ba fatin deskansa nee. Maski sira la tama, maibee sei iha ema seluk mak bele tama. 7 Tanba nee mak liu tiha tinan barak nia laran, Maromak foo sai dehan Nia hili fali tempu seluk para ema bele tama iha Nia fatin deskansa. Tempu nee mak ‘ohin loron’. Maromak foo sai kona ba tempu nee liu hosi liurai David, hanesan hau foin temi dadauk nee:
“Ohin loron, se imi rona Nai Maromak nia liafuan,
la bele ulun toos.”+ 4:7 Salmus (Mazmur) 95:7-8
8 Uluk bainhira Josué lori ita nia bei-ala sira tama ba rai nebee mak Maromak promete ba sira, Josué la konsege foo deskansa lo-loos ba sira iha nebaa. Nee mak Maromak koalia fali kona ba tempu seluk.+ 4:8 Deutoronómiu (Ulangan) 31:7; Josué 22:49 Nunee ita hatene katak Maromak prepara ona tempu seluk para Nia ema sira deskansa, hanesan Nia mos deskansa iha loron hitu. 10 Ema nebee tama ona hodi deskansa hamutuk ho Nai Maromak, nia para ona hosi nia servisu, hanesan mos Maromak para hosi Nia servisu.+ 4:10 Hahuu (Jénesis, Kejadian) 2:211 Tanba nee, mai ita hakaas aan nafatin atu tama ba iha deskansa nee. Keta halo be iha balu monu tanba halo tuir fali ita nia bei-ala sira nebee mak lakohi rona Nai Maromak.
12 Tanba Nai Maromak nia liafuan moris i makaas teb-tebes. Nia liafuan kroat, borus too ita nia laran, hanesan surik ida oin-kotuk kroat hotu bele sona borus too haketak ita nia ruin ho uat hotu. Nia liafuan nee iha kbiit tama liu ba ita nia fuan ho laran hodi tetu ita nia hanoin ho ita nia hakarak hotu. 13 Iha lalehan ho rai la iha buat ida mak bele subar hosi Nai Maromak. Ba Nia, buat hotu-hotu nakloke, Nia haree borus hela. Too loron ida ita tenki hataan iha Maromak nia oin kona ba buat hotu-hotu nebee mak ita halo.
Jesus nai lulik boot ida nebee diak teb-tebes
14 Nee duni ita tenki kaer metin ita nia fiar. Tanba ita iha nai lulik boot ida nebee diak teb-tebes, Nia tama tiha ona too iha Nai Maromak nia oin. Nia mak Jesus, Maromak nia Oan. 15 Ita nia nai lulik boot nee kompriende liu ita, Nia hatene katak ita ema nee fraku. Nia hatene tulun ita tanba uluk Nia rasik hasoru tentasaun oi-oin hanesan mos ita. Maski nunee, Nia nunka monu ba sala. 16 Entaun mai ita brani hakbesik aan ba Nai Maromak. Nia mak ukun buat hotu-hotu, i Nia sempre hatudu Nia laran diak mai ita. Se ita hakbesik ba Nia, Nia sei hatudu domin mai ita hodi tulun ita iha tempu susar nia laran.
51 Bainhira Maromak hili ema ida atu sai nai lulik boot, Nia sempre fihir ema ida hosi povu nia leet hodi foti nia sai povu nia reprezentante iha Maromak nia oin. Nai lulik boot hasae povu nia oferta ba Maromak i oho animal nebee mak povu lori hanesan sakrifisiu para hamoos sira nia sala. 2 Se ema ruma la hatene dalan nebee loos, i lao sees hosi dalan nee, nai lulik boot iha pasiensia ho ema nee, tanba nia rasik mos ema nebee fraku. 3 Nia rasik mos monu ba sala, nunee nia tenki oho animal hodi halo sakrifisiu, laos deit ba ema seluk nia sala, maibee mos ba nia sala rasik.+ 5:3 Levítiku (Imamat) 9:7
4 La iha ema ida bele foti nia aan rasik sai nai lulik boot, maibee Nai Maromak mak foti nia, hanesan uluk Nia foti Arão.+ 5:4 Ézodu (Keluaran) 28:15 Jesus Kristu mos nunee. Nia laos foti Nia Aan rasik sai nai lulik boot, maibee Nai Maromak mak foti Nia para kaer kargu boot nee. Maromak dehan,
“O Hau nia Oan.
Ohin loron Hau deklara sai katak Hau nee O nia Aman.”+ 5:5 Salmus (Mazmur) 2:7
6 Iha fatin seluk Maromak mos dehan,
“O sai nai lulik too tinan ba tinan,
O hanesan nai lulik Melkizedek uluk.”+ 5:6 Salmus (Mazmur) 110:4
7 Bainhira Jesus sei moris iha mundu nee, Nia harohan ho tanis hakilar ba Nai Maromak, tanba Nai Maromak mak bele salva Nia hosi mate. I Nai Maromak rona Nia orasaun, tanba Jesus haraik aan hodi hakruuk ba Maromak.+ 5:7 Mateus 26:36-46; Marcos 14:32-42; Lucas 22:39-468 Jesus nee Nai Maromak nia Oan rasik. Maski nunee Nia aprende rona Nai Maromak liu hosi Nia terus. 9 Nee mak Nia serve atu sai salvador hodi salva ema nebee mak halo tuir Nia hakarak para sira bele hetan moris rohan-laek. 10 I Nai Maromak foti Nia para sai nai lulik boot hanesan Melkizedek uluk.
Keta fila kotuk ba Jesus Kristu
11 Sei iha buat barak mak hau hakarak koalia kona ba Kristu ho Melkizedek, maibee hau atu esplika ba imi susar, tanba imi ulun fatuk toos. 12 Tuir lo-loos, imi sai ona mestri hodi hanorin ema seluk. Maibee buat baziku hosi Maromak nia liafuan mos, imi seidauk hatene, imi presiza nafatin ema seluk atu hanorin imi. Imi hanesan fali bebee nebee sei susu deit, i seidauk bele haan. 13 Ema nebee sei susu deit, nia hanesan labarik kiik-oan, nia seidauk hatene saida mak diak, saida mak aat.+ 5:13 1 Korintu 3:214 Maibee hahaan toos ita bele foo deit ba ema nebee boot, nee dehan katak ema nebee hatoman aan tetu buat hotu-hotu too hatene lo-loos ona saida mak diak, saida mak aat.
61 Entaun ita tenki lao ba oin hodi aprende buat nebee klean liu. La bele aprende fila-fila lisaun primeiru kona ba Kristu. Tuir loos imi la presiza tan ona buat baziku nebee mak hanorin ita para husik ita nia sala nebee lori ita ba mate, i hanorin ita atu fiar ba Maromak, 2 imi la presiza tan hanorin kona ba batizmu, kona ba tau liman ba ema para Maromak foo bensaun, hanorin kona ba Maromak sei halo moris fali ema mate, ho hanorin kona ba aban-bainrua Maromak sei tesi ema hotu-hotu nia lia hodi desidi, see mak bele hetan moris rohan-laek, i see mak la hetan. Buat sira nee imi la presiza aprende fila-fila. 3 Maibee mai ita muda ba hanorin nebee klean liu, naran katak Maromak foo dalan.
4 Tanba ema nebee fiar ona ba Kristu, se karik too ikus sira fila kotuk ba Nia, entaun ita atu lori sira husik fali sira nia sala, la bele ona. Tanba sira hetan ona naroman hosi Nai Maromak, sira koko ona bensaun lalehan nian, i sira simu ona Espiritu Santu. 5 Sira hatene hosi sira nia esperiensia moris katak Nai Maromak nia liafuan furak teb-tebes. Nai Maromak nia kbiit nebee mak Nia sei hatudu iha tempu ikus mos, sira senti tiha ona. 6 Se karik too ikus sira fila kotuk ba Kristu, entaun ita atu halo sira husik sira nia sala hodi fila fali ba Maromak, la bele ona. Tanba sira hanesan prega mate fila fali Nai Maromak nia Oan iha krus, i halo ema hatete aat Nia iha ema barak nia oin. Sira nia hahalok nee mos lori terus ba sira nia aan rasik.
7 Ita bele kompara ema ho rai. Bainhira rai simu beibeik udan been, i depois foo rezultadu diak ba toos nain, Maromak mos foo bensaun ba rai nee. 8 Maibee se rai nee nia rezultadu mak ai tarak deit, entaun la iha folin. Maromak sei foo malisan ba rai nee, too ikus sunu motuk tiha.+ 6:8 Hahuu (Jénesis, Kejadian) 3:17-18
9 Maluk doben sira, maski hau koalia nunee, maibee hau fiar metin katak imi laos ema nebee fila kotuk ba Kristu, imi sei halo buat nebee mak diak tanba Maromak salva tiha ona imi. 10 Nai Maromak nee sempre halo buat nebee mak loos. Nia sei la haluha imi nia kolen ho imi nia domin ba Nia, tanba hori uluk too agora, imi tulun Maromak nia povu, nee hatudu katak imi mos hadomi Maromak. 11 Ami hakarak atu imi ida-idak hatudu nafatin imi nia domin nee too rohan, atu nunee imi bele laran metin katak, imi sei hetan buat nebee mak Nai Maromak promete tiha ona atu foo ba imi. 12 Ami lakohi atu imi sai baruk-teen. Maibee imi tenki halo tuir ema sira nebee mak uluk fiar metin ba Nai Maromak hodi hein nafatin ho pasiensia too sira hetan buat nebee mak Maromak promete ona atu foo ba sira.
Maromak nia promesa sei la muda
13 Uluk bainhira Maromak halo promesa ba Abraão, Nia halo mos juramentu para hametin Nia promesa nee. La iha ida mak boot liu Maromak. Tanba nee Nia la jura hodi naran seluk, maibee jura hodi Nia naran rasik. 14 Nia jura dehan, “Hau, Nai Maromak, sei foo bensaun ba o, i Hau sei halo o nia jerasaun sai barak teb-tebes.” 15 Entaun Abraão hein ho pasiensia, i too ikus hetan duni buat nebee mak Maromak promete ba nia.
16 Bainhira ema jura, nia baibain temi ida nebee boot liu nia, para ema hatene katak nia sei halo tuir duni buat nebee nia promete ona, i nunee ema la presiza diskuti tan.+ 6:16 Hahuu (Jénesis, Kejadian) 22:16-1717 Nunee mos ho Nai Maromak. Nia hakarak para ema nebee simu Nia promesa nee, hatene mo-moos katak buat nebee Nia promete ona sei la muda. Tanba nee, Nia hametin Nia promesa ho juramentu. 18 Nia promesa ho Nia juramentu nee sei la muda, tanba Maromak la hatene bosok. Nunee Nia halo juramentu nee para ita nebee buka mahon ona iha Nia bele laran metin ba Nia promesa nee. 19 Nunee ita nia laran hakmatek i la nakdoko tan. Tanba ita tama tiha ona iha Maromak nia prezensa, hanesan nai lulik boot sira tama liu hosi kortina too iha Fatin nebee Lulik Liu.+ 6:19 Levítiku (Imamat) 16:220 Jesus mak loke dalan ba ita atu tama iha nebaa, tanba Nia tama uluk ona hodi harohan ba ita. Nia sai ona ita nia nai lulik boot too tinan ba tinan, hanesan Melkizedek uluk.+ 6:20 Salmus (Mazmur) 110:4
7Melkizedek boot liu nai lulik sira hosi Levi nia jerasaun
1 Melkizedek nee liurai sidade Salém, i nia mos nai lulik hodi serbi Nai Maromak Aas Liu. Iha loron ida, Abraão baa halo funu hasoru liurai nain haat, i nia mak manaan. Bainhira Abraão iha dalan atu fila fali ba uma, liurai Melkizedek hasoru nia hodi foo bensaun ba nia. 2 Hotu tiha, buat hotu-hotu nebee Abraão hadau hosi nia inimigu sira, nia foo parte ida hosi parte sanulu ba Melkizedek. Naran Melkizedek nee katak “liurai nebee moris loos.” I liurai Salém katak “liurai nebee lori dame.” 3 La iha ema ida hakerek kona ba Melkizedek nia inan-aman ho nia bei-ala sira, la iha ema ida hakerek nia loron moris ho loron mate. Nia hanesan Maromak nia Oan, tanba nia nai lulik too tinan ba tinan.
+ 7:3 Hahuu (Jénesis, Kejadian) 14:17-20
4 Hanoin took! Melkizedek nee ema boot duni, too ita nia bei-ala Abraão foo ba nia, sasaan parte ida hosi parte sanulu. 5 Liu tiha tinan barak, lei Moisés nian foo sai katak, Levi nia jerasaun mak bele sai nai lulik, i nai lulik sira nee mak iha direitu atu simu oferta parte ida hosi parte sanulu hosi povu. Afinal nai lulik sira ho povu sira seluk maun-alin, tanba sira hotu mesak Abraão nia jerasaun.+ 7:5 Númerus (Bilangan) 18:216 Maibee Melkizedek nee laos mai hosi Levi nia jerasaun. Maski nunee Abraão foo sasaan parte ida hosi parte sanulu ba nia. Melkizedek mos foo bensaun ba Abraão. Afinal Abraão nee uluk simu tiha ona Nai Maromak nia promesa. 7 Ita hotu hatene katak, ema nebee foo bensaun nee, boot liu ema nebee simu.
8 Nai lulik sira hosi Levi nia jerasaun simu oferta parte ida hosi parte sanulu, maibee too ikus sira mate. Melkizedek mos simu oferta hanesan, maibee tuir Livru Sagradu nia moris nafatin. 9 Ita bele dehan katak, bainhira Abraão foo oferta ba Melkizedek, Levi mos foo nia parte. 10 Tanba maski nia seidauk moris iha momentu nebaa, maibee bele konsidera katak, nia bei-ala Abraão foo mos Levi nia parte.
Nai Jesus sai nai lulik hanesan Melkizedek
11 Tuir lei Moisés nian, nai lulik sira tenki mai hosi Levi nia jerasaun. Nai lulik boot primeiru mak Arão. Nai lulik sira hosi Levi nia jerasaun nee la iha kbiit atu halao buat hotu tuir Maromak nia hakarak. Nee mak ita presiza tan nai lulik ida oin seluk, nai lulik ida nebee hanesan Melkizedek, i laos hanesan Arão. 12 Se troka sistema nai lulik nian nunee, entaun lei relijiaun mos tenki troka.
13 Nai lulik ida oin seluk nebee ita temi nee mak ita nia Nai Jesus. Ita hotu hatene katak, Jesus hosi Judá nia jerasaun, laos hosi Levi nian. Ema hosi Judá nia jerasaun nee nunka serbi iha altar nudar nai lulik, i Moisés mos nunka dehan sira bele sai nai lulik. 15 Entaun bainhira Nai Jesus sai nai lulik hanesan Melkizedek, nee hatudu mo-moos katak lei relijiaun muda tiha ona. 16 Nai Jesus sai nai lulik, laos bazeia ba lei Moisés nian nebee dehan tenki Levi nia jerasaun mak bele sai nai lulik. Maibee Nia sai nai lulik tanba Nia iha kbiit atu moris tinan ba tinan. 17 Iha Livru Sagradu hakerek kona ba Nia nunee:
“O sai nai lulik tinan ba tinan,
O hanesan nai lulik Melkizedek uluk.”+ 7:17 Salmus (Mazmur) 110:4
18 Ho nunee Maromak kansela tiha lei relijiaun ida tuan, tanba lei nee fraku i la iha kbiit atu tulun ema, 19 tanba la bele halo ema moris loos. Maibee agora ita hetan ona esperansa boot liu, atu nunee ita bele hakbesik ba Nai Maromak.
Nai Jesus boot liu nai lulik sira hosi Levi nia jerasaun
20 Uluk bainhira Maromak foti Levi nia jerasaun para sai nai lulik, Nia la halo juramentu ho sira. Maibee bainhira Maromak foti Jesus sai nai lulik, Nia jura dehan,
“Hau, Nai Maromak, jura tiha ona,
i sei la muda Hau nia promesa:
O sai nai lulik tinan ba tinan.”+ 7:20-21 Salmus (Mazmur) 110:4
22 Tanba Maromak jura nunee, Jesus halo ita nia laran metin katak Maromak sei kumpri duni Nia promesa ida nebee diak liu nee.
23 Iha tan diferensa ida. Nai lulik sira seluk barak, tanba sira mate husik hela sira nia servisu, i nunee troka fali nai lulik foun. 24 Maibee Jesus moris tinan ba tinan, nunee la iha ema ida atu troka Nia. 25 Tanba nee Jesus iha kbiit atu salva see deit mak buka Maromak liu hosi Nia. Nia bele salva sira agora i too tinan ba tinan, tanba Nia moris nafatin hodi harohan ba Nai Maromak atu tulun sira.
26 Jesus nee nai lulik boot nebee mak diak liu. Ita presiza teb-tebes nai lulik ida hanesan nee, tanba Nia ema ida nebee santu, livre hosi sala, buat aat ida mos la iha. Maromak haketak ona Nia hosi ema sala nain sira hodi foti Nia ba iha fatin aas liu iha lalehan. 27 Nai lulik sira seluk tenki oho animal lor-loron halo sakrifisiu. Sira hasae uluk sakrifisiu atu hamoos sira nia sala rasik, hotu tiha mak foin hasae fali sakrifisiu para hamoos povu nia sala. Maibee Jesus entrega Nia Aan para sai sakrifisiu dala ida deit. Nee too ona para Maromak hamoos ema hotu-hotu nia sala too tinan ba tinan.+ 7:27 Levítiku (Imamat) 9:728 Ema nebee sai nai lulik boot tuir Moisés nia lei, sira ema nebee iha frakeza. Maibee ikus mai, Maromak jura hodi foti Nia Oan sai nai lulik boot, i Nia Oan nee sempre halo tuir Maromak nia hakarak.
8Ita nia nai lulik boot Jesus lori promesa foun
1 Buat nebee ohin ita koalia nee nia pontu prinsipal mak nee: Agora ita iha ona nai lulik boot nebee diak liu, Nia tuur hela iha Nai Maromak nia sorin loos iha lalehan hodi kaer ukun.+ 8:1 Salmus (Mazmur) 110:12 I Nia halao Nia servisu hanesan nai lulik boot iha tenda orasaun nebee Nai Maromak rasik mak harii, laos ema mak harii.
3 Nai lulik boot hotu-hotu tenki hasae oferta ho sakrifisiu ba Nai Maromak. Nee mak Jesus mos tenki hasae buat ruma hanesan sakrifisiu. 4 Se karik Jesus agora iha mundu, entaun Nia la bele sai nai lulik, tanba iha tiha ona nai lulik para foo oferta ho sakrifisiu ba Nai Maromak tuir lei Moisés nian. 5 Nai lulik sira nee halao sira nia servisu iha tenda orasaun, maibee tenda orasaun ida iha mundu nee hanesan lalatak ka kopia deit. Tenda orasaun lo-loos mak iha lalehan. Tanba nee, bainhira Maromak haruka Moisés halo tenda orasaun, Nia foo hanoin dehan, “Kuidadu di-diak atu halo tenda orasaun nee tuir lo-loos modelu nebee Hau hatudu ona ba o iha foho leten.”+ 8:5 Ézodu (Keluaran) 25:406 Maibee servisu nebee Jesus simu aas liu fali nai lulik hotu-hotu iha mundu. I Maromak nia promesa nebee mak Jesus lori mai ita mos diak liu fali Maromak nia promesa ba ita nia bei-ala sira.
7 Se karik promesa uluk nee bele halo ita dame malu ho Nai Maromak, entaun Maromak la presiza halo tan promesa foun. Maibee presiza duni, 8 tanba Maromak hatene katak povu la moris tuir Nia hakarak. Nee mak Nia dehan,
“Rona mai!
Hau, Nai Maromak, mak hatete:
Iha tempu oin mai Hau sei halo promesa foun
ho povu Israel hamutuk ho povu Judá.
9 Promesa nee la hanesan ho promesa
nebee uluk Hau halo ho sira nia bei-ala sira.
Momentu nebaa Hau kaer sira nia liman
hodi lori sira sai hosi rai Ejitu.
Maibee sira la halo tuir sira nia promesa mai Hau.
Nee mak Hau husik tiha sira.
10 Agora Hau, Nai Maromak, foo sai katak,
promesa nebee Hau sei halo ho povu Israel mak nee:
Hau sei tau Hau nia lei iha sira nia neon,
i sei hakerek Hau nia ukun fuan iha sira nia laran.
Hau sei sai sira nia Nai Maromak,
i sira sei sai Hau nia povu.
11 Sira sei la presiza tan hanorin sira nia maluk ka sira nia maun-alin
atu konhese Nai Maromak,
tanba sira hotu-hotu, hosi kiik too boot,
sei konhese Hau.
12 Hau sei hamoos sira nia sala hotu,
i sei la hanoin tan sira nia hahalok aat.”+ 8:12 Jeremias (Yeremia) 31:31-34
13 Bainhira Maromak koalia kona ba Nia promesa foun, nee dehan katak, Nia promesa tuan la vale ona. I buat nebee tuan i la vale ona, la kleur tan sei lakon.
9Ita nia sakrifisiu la bele hamoos ita nia laran
1 Bainhira Maromak halo Nia promesa ida uluk ho ita nia bei-ala sira, Nia foo ho regra kona ba oinsaa atu adora Nia, i oinsaa atu harii fatin ida para adora Nia. 2 Entaun sira harii tenda orasaun, fahe ba kuartu rua. Kuartu ida iha oin naran Fatin Lulik. Iha kuartu nee iha ahi-oan riin ida ho meza ida para tau paun hodi oferese ba Nai Maromak.+ 9:2 Ézodu (Keluaran) 26:1-30; 25:23-40
3 Iha tan kuartu ida iha kotuk naran Fatin nebee Lulik Liu. Kuartu nee taka ho kortina boot.+ 9:3 Ézodu (Keluaran) 26:31-334 Iha Fatin nebee Lulik Liu nee iha altar osan mean hodi sunu ai been morin. Iha mos kaixoti promesa nian, nia liur-laran taka tomak ho osan mean. Iha kaixoti nee nia laran iha sanan osan mean. Sanan nee paun manaa mak iha laran. Iha kaixoti laran nee iha mos Arão nia ai tonka nebee uluk dikin fali ona, ho mos fatuk belar rua. Iha fatuk nee hakerek Nai Maromak nia ukun fuan.+ 9:4 Ézodu (Keluaran) 30:1-6; 25:10-16; 16:33; Númerus (Bilangan) 17:8-10; Ézodu (Keluaran) 25:16; Deutoronómiu (Ulangan) 10:3-55 Iha kaixoti nia leten, iha estatua rua hanesan anju nebee iha liras. Anju rua nee hatudu Maromak Kbiit Nain nia prezensa. Sira nia liras nakloke hela hodi taka kaixoti nia matan. Iha fatin nee mak Nai Maromak hamoos ema nia sala. Maibee agora laos tempu atu koalia klean liu kona ba buat sira nee.
6 Buat sira nee hotu tau tuir nia fatin. Depois nai lulik sira lor-loron tama ba iha kuartu oin hodi halo sira nia servisu.+ 9:6 Númerus (Bilangan) 18:2-67 Maibee so nai lulik boot deit mak bele tama ba iha Fatin nebee Lulik Liu, i nia so bele tama tinan ida dala ida. Bainhira nia tama, nia tenki lori animal nia raan hodi oferese ba Maromak, para husu perdaun ba nia sala rasik ho mos ba povu sira nia sala nebee mak sira rasik la hatene tuir.+ 9:7 Levítiku (Imamat) 16:2-348 Ho buat sira nee, Maromak nia Espiritu Santu hatudu mai ita katak, durante tenda orasaun nee sei iha, dalan seidauk nakloke ba ita ema atu bele tama ba Fatin nebee Lulik Liu. 9 Buat sira nee foo hanoin mai ita nebee moris agora katak, oferta ho sakrifisiu nebee ema foo ba Maromak la bele halo kamaan sira nia laran, tanba sira hanoin nafatin sira nia sala. 10 Tanba regra kona ba oferta ho sakrifisiu so koalia kona ba isin lolon nian deit, hanesan haan-hemu ho serimonia hamoos aan. Maski nunee maibee regra sira nee lao nafatin too Nai Maromak hatuun Nia promesa foun.
Nai Jesus sai sakrifisiu nebee diak liu
11 Maibee agora, Kristu mai tiha ona. Kristu nee mak Ema nebee Maromak promete ona hori uluk kedas atu haruka mai. Nia sai ona nai lulik boot hodi halo buat diak mai ita. Nia halao nia knaar hanesan nai lulik iha tenda orasaun ida nebee aas liu ho diak liu. Tenda orasaun nee laos iha mundu, nee katak laos ema mak halo. 12 Nai lulik boot sira seluk tama ba iha Fatin nebee Lulik Liu tinan ida dala ida, lori bibi nia raan ka karau nia raan. Maibee Kristu tama dala ida deit, lori Nia raan rasik. Ho Nia raan nee Nia hasai tiha ita hosi ita nia sala too tinan ba tinan.
13 Tuir lei Moisés nian, ema nebee halo sala la bele tama iha uma kreda hodi adora Nai Maromak. Maibee se nai lulik hisik nia ho bibi nia raan ka karau nia raan, ka ahu-kdesan hosi karau inan tunu, ema nee konsidera moos fali.+ 9:13 Levítiku (Imamat) 16:15-16; Númerus (Bilangan) 19:9, 17-1914 Se animal nia raan bele halo ema moos fali, saa tan Kristu nia raan! Tanba ho Espiritu rohan-laek nia tulun, Kristu foo Nia Aan ba Maromak nudar sakrifisiu ida ke santu. Nee mak Nia raan hamoos ita nia laran para ita livre hosi hahalok nebee mak lori ita ba mate, atu nunee ita bele adora Maromak Moris.
15 Tanba nee Maromak foo fiar ba Kristu para lori Nia promesa foun mai ita ema. Nunee ema nebee Maromak bolu atu sai Nia povu bele simu buat hotu-hotu nebee Nia promete tiha ona atu foo, too tinan ba tinan. Ema nebee uluk moris iha promesa tuan nia okos mos sei simu buat sira nee hotu, tanba Kristu mate ona hodi hasai sira hosi sala nebee mak sira halo iha tempu nebaa.
16 Hau foo ezemplu ida: Se ema ruma hakerek surat deklarasaun ida hodi promete, see mak atu hetan nia rikusoin bainhira nia mate, entaun tenki hatudu katak ema nee mate tiha ona foin bele fahe nia rikusoin nee. 17 Tanba bainhira ema nee sei moris, promesa nebee mak nia hakerek iha surat nee seidauk halao. Nia mate tiha foin bele halao. 18 Nunee mos bainhira Maromak halo Nia promesa tuan ho ita nia bei-ala sira. Tenki ho raan hodi hatudu katak animal mate mak foin Nia promesa nee halao. 19 Iha tempu nebaa Maromak hatuun Nia promesa ho Nia lei dala ida liu hosi Moisés. Depois Moisés halibur povu Israel tomak hodi foo sai ba sira Maromak nia lei tomak. Nia foo sai tiha hotu, nia oho karau ho bibi hodi hasai nia raan, i kahur raan nee ho bee. Nia kesi bibi fulun mean iha ai hisop nia sanak, depois habokon ho raan nee hodi hisik ba livru nebee hakerek Maromak nia lei, i hisik mos ba povu. 20 Nia hisik raan nee hodi dehan, “Raan nee hanesan sinal katak Nai Maromak halo ona Nia promesa ho imi i haruka imi halo tuir Nia lei nee hotu.”+ 9:20 Ézodu (Keluaran) 24:6-821 Moisés mos hisik raan nee ba tenda orasaun ho mos ba sasaan hotu-hotu iha tenda laran nebee sira uza hodi adora Nai Maromak.+ 9:21 Levítiku (Imamat) 8:1522 Tanba tuir Maromak nia lei, kuaze buat hotu-hotu tenki hamoos ho raan. Atu hamoos ita ema nia sala mos, tenki fakar raan.+ 9:22 Levítiku (Imamat) 17:11
23 Sasaan sira nee hotu kopia deit tuir buat nebee mak iha lalehan. Atu hamoos buat sira nee para bele uza hodi adora Nai Maromak, tenki oho animal halo sakrifisiu. Maibee buat lalehan nian presiza sakrifisiu nebee diak liu tan. 24 Kristu la tama ba Fatin Lulik nebee ema mak halo, ida nebee kopia tuir deit lalehan nian, maibee Nia tama liu ba lalehan. I agora Nia iha hela Nai Maromak nia prezensa hodi husu tulun mai ita. 25 Nai lulik boot sira iha mundu tama ba iha Fatin nebee Lulik liu tin-tinan, lori animal nia raan, laos sira nia raan rasik. Maibee Kristu tama ba Fatin nebee Lulik Liu, lori Nia raan rasik. Nia la presiza foo Nia Aan ba mate fila-fila. 26 Tanba se karik Nia tenki foo Nia Aan fila-fila, nee dehan katak Nia terus hela deit komesa Nai Maromak halo mundu nee. Maibee laos nunee. Agora tempu ikus ona, Nia foo Nia Aan hanesan sakrifisiu dala ida deit hodi halakon ita nia sala. 27 Nudar ema, ita tenki mate dala ida deit, depois Nai Maromak tesi ita nia lia. 28 Kristu mos mate dala ida deit, hanesan sakrifisiu hodi hamoos ema barak nia sala. I Nia sei fila fali mai, laos atu kasu ita ema nia sala tan, maibee atu salva ema sira nebee mak hein hela Nia ho laran metin.+ 9:28 Isaias (Yesaya) 53:12
10Jesus Kristu mate dala ida deit halo ema livre hosi sala too tinan ba tinan
1 Lei Moisés nian la hatudu sai mo-moos buat diak nebee mak Maromak atu foo mai ita aban-bainrua. Lei nee so hatudu buat sira nee nia lalatak deit. Tuir lei nee dehan, ema nebee hakarak adora Nai Maromak, tin-tinan tenki oho animal hodi halo sakrifisiu. Maski ema barak badinas halo tuir, maibee sira nia laran la moos nafatin, tanba lei nee lalatak deit. 2 Se lei nee bele hamoos sira nia laran karik, entaun sira la presiza lori tan animal hodi halo sakrifisiu, tanba sakrifisiu nee bele hamoos ona sira nia sala hotu dala ida hodi halo sira senti kamaan fali. Maibee laos nunee. 3 Sakrifisiu nebee sira halo tin-tinan nee, so foo hanoin beibeik ba sira kona ba sira nia sala. 4 Tanba karau nia raan ka bibi nia raan nunka bele hamoos ema nia sala.
5 Tanba nee, bainhira Jesus Kristu mai iha mundu, Nia hatete ba Nai Maromak nunee:
“Ita Boot lakohi para ema lori oferta i oho animal sai sakrifisiu ba Ita Boot.
Nee mak Ita Boot foo isin lolon mai Hau atu Hau mak sai sakrifisiu.
6 Ita Boot nia laran la haksolok ho animal nebee ema tunu halo sakrifisiu,
Ita Boot la kontenti ho sakrifisiu nebee ema foo hodi husu perdaun.
7 Entaun Hau dehan,
‘Maromak, Hau mak nee.
Hau mai atu halo tuir Ita Boot nia hakarak,
hanesan hakerek ona kona ba Hau iha Livru Sagradu.’ ”+ 10:7 Salmus (Mazmur) 40:7-9
8 Primeiru Kristu dehan, “Ita Boot lakohi para ema lori oferta i oho animal sai sakrifisiu. Ita Boot lakohi simu animal nebee ema tunu halo sakrifisiu ka sakrifisiu nebee ema foo hodi husu perdaun. Buat sira nee hotu la halo Ita Boot nia laran haksolok.” Kristu dehan nunee maski lei Moisés nian haruka ema lori sakrifisiu sira nee hotu. 9 Depois Nia hatutan tan, “Hau mak nee, Hau mai atu halo tuir Ita Boot nia hakarak.” Nee dehan katak, Maromak halakon tiha lei tuan kona ba sakrifisiu hodi troka fali ho Kristu nia sakrifisiu. 10 Tanba Nai Maromak nia hakarak mak nee: Jesus Kristu tenki mate hanesan sakrifisiu dala ida deit, i liu hosi Nia sakrifisiu nee, Nia hamoos tiha ona ita nia laran too tinan ba tinan.
11 Loro-loron, nai lulik sira hamriik halao sira nia knaar hodi oho beibeik animal halo sakrifisiu. Afinal sakrifisiu sira nee nunka bele hamoos ema nia sala.+ 10:11 Ézodu (Keluaran) 29:3812 Maibee Kristu foo Nia Aan sai sakrifisiu dala ida deit. Nee too ona hodi hamoos ita nia sala too tinan ba tinan. Hotu tiha, Nia baa tuur iha Nai Maromak nia sorin loos. 13 Iha nebaa, Nia hein hela too Nai Maromak halo Nia inimigu sira taka rabat iha Nia ain okos.+ 10:13 Salmus (Mazmur) 110:114 Tanba liu hosi Nia sakrifisiu dala ida deit, Kristu hamoos Nia ema sira nia laran, halo sira sai livre hosi sala too tinan ba tinan.
15 Espiritu Santu mos foo hatene mai ita kona ba buat nee. Primeiru Nia dehan,
16 “Agora Hau, Nai Maromak, dehan,
promesa nebee Hau sei halo ho sira mak nee:
Hau sei tau Hau nia lei iha sira nia laran,
i sei hakerek Hau nia ukun fuan iha sira nia neon.”+ 10:16 Jeremias (Yeremia) 31:33
17 Depois Nia dehan tan,
“Hau sei la hanoin tan sira nia sala
ho sira nia hahalok aat hotu-hotu.”+ 10:17 Jeremias (Yeremia) 31:34
18 Se Nai Maromak hamoos tiha ona ita nia sala, entaun ita la presiza foo tan sakrifisiu para hamoos ita nia sala.
Mai ita hakbesik aan ba Nai Maromak
19 Maun-alin sira, ita brani tama ba iha Maromak nia prezensa iha Fatin nebee Lulik Liu, tanba Jesus nia raan fakar too mate mai ita. 20 Ho Jesus nia mate nee, Nia loke ona dalan foun liu hosi kortina nebee uluk taka hela Fatin nebee Lulik Liu nee, para ita bele tama liu ba laran hodi simu moris. 21 Ita iha nai lulik ida nebee diak teb-tebes hodi toma konta Nai Maromak nia uma laran tomak. 22 Tanba nee mai ita hakbesik aan ba Nai Maromak ho laran moos i fiar metin ba Nia. Tanba Jesus hamoos tiha ona ita nia laran, too ita la hanoin tan sala nebee uluk ita halo. Nee hanesan Nia fasi ita nia isin lolon hodi bee nebee moos.+ 10:22 Levítiku (Imamat) 8:30; 16:4; Ezekiel (Yehezkiel) 36:2523 Mai ita hein ho laran metin nafatin atu simu buat nebee Maromak promete ona atu foo mai ita, hanesan mos ita foo sai tiha ona ba ema seluk. Lalika duvida, tanba Maromak sempre halo tuir Nia promesa. 24 Mai ita foo hanoin ba malu ho dalan oi-oin atu ita hotu hatudu domin ba ita nia maluk hodi halo diak ba sira. 25 I mai ita badinas halibur hamutuk ho maluk sarani sira seluk. La bele halo tuir ema sira nebee mak lakohi halibur hamutuk ona. Maibee ita tenki foo hanoin ba malu para ita nia fiar sai metin liu tan, liu-liu tanba ita hatene katak loron besik ona atu Nai Jesus fila fali mai hosi lalehan.
Kaer metin imi nia fiar
26 Ita hatene ona lia loos kona ba Jesus Kristu. Maibee se karik ita rasik desidi fila kotuk ba Nia hodi moris nafatin iha sala laran, entaun la iha tan sakrifisiu seluk mak bele hamoos ita nia sala. 27 Se ita fila kotuk ba Nia, ita so hein deit ho laran tauk atu Nai Maromak kastigu ita i ahi lakan boot haan motuk tiha ema hotu nebee kontra Maromak.+ 10:27 Isaias (Yesaya) 26:1128 Uluk, se ema ruma kontra lei nebee Nai Maromak foo ba Moisés, i ema nain rua ka tolu sai sasin, ema nee la hetan perdaun, nia tenki mate.+ 10:28 Deutoronómiu (Ulangan) 17:6; 19:1529 Saa tan ema nebee sama Nai Maromak nia Oan ba rai! Ema nee dehan katak Jesus nia raan la vale liu, maski Jesus nia raan nee sai sinal katak Maromak halo ona promesa foun ho ita, i raan nee mak hamoos tiha ona ema nee nia sala. Nia mos hatete aat Maromak nia Espiritu, afinal Nia Espiritu nee hatudu Maromak nia laran diak mai ita. Hanoin di-diak! Ema hanesan nee sei simu kastigu todan liu fali ema nebee kontra Moisés nia lei.+ 10:29 Ézodu (Keluaran) 24:830 Tanba ita hatene Nai Maromak rasik dehan nunee: “Hau mak iha direitu foo kastigu ba ema nebee halo aat. Hau sei halo aat ba sira tuir sira nia hahalok.” Nia mos dehan, “Hau, Nai Maromak sei foo justisa ba Hau Nia ema.”+ 10:30 Deutoronómiu (Ulangan) 32:35, 3631 Maromak nee moris tinan ba tinan. Atu monu ba Maromak nia kastigu nunee, todan teb-tebes.
32 Keta haluha tempu uluk, bainhira imi foin sai hosi nakukun hodi moris fali iha naroman nia laran. Iha tempu nebaa, imi hamriik metin maski imi hetan terus ho susar oi-oin. 33 Momentu nebaa ema koalia aat imi, i halo aat imi iha ema barak nia oin. Bainhira ema halo aat imi nia maluk sarani sira seluk, imi mos prontu terus hamutuk ho sira. 34 Imi hatudu imi nia laran diak ba ema dadur sira iha kadeia laran. I bainhira ema hadau imi nia sasaan, imi simu ho laran kontenti, tanba imi hatene katak, imi sei simu fali rikusoin nebee diak liu, i rikusoin nee sei dura too tinan ba tinan.
35 Entaun la bele husik imi nia fiar. Tanba se imi laran metin nafatin, Maromak sei foo premiu boot ba imi. 36 Aguenta ho pasiensia deit ba, atu nunee imi halo tuir nafatin Nai Maromak nia hakarak, i too ikus imi simu buat hotu-hotu nebee Nia promete ona ba imi. 37 Tanba iha Livru Sagradu hakerek ona dehan,
“La kleur tan, Ema ida nebee atu mai nee, sei too,
Nia sei la demora.
38 Hau nia ema sira nebee moris loos,
sira fiar mai Hau iha sira nia moris tomak.
Maibee ema nebee mak husik hela Hau,
Hau nia laran la gosta sira.”+ 10:38 Habakuk 2:3-4
39 Sira nebee husik hela Maromak, too ikus sei rahun. Maibee ita lae. Ita nee ema nebee fiar, i hetan salvasaun.
11Bei-ala sira nebee fiar ba Nai Maromak
1 Entaun fiar nee saida loos? Fiar ba Nai Maromak katak, ita laran metin nafatin ba buat nebee ita hein atu simu, i ita la duvida katak, buat nebee ita seidauk haree ho matan, iha duni. 2 Ita nia bei-ala sira nia fiar hanesan nee. Tanba nee mak Nai Maromak gaba sira.
3 Tanba ita fiar ba Nai Maromak mak ita bele kompriende katak, bainhira Maromak halo lalehan ho rai, Nia foo deit orden mak lalehan ho rai iha kedas. Nunee, buat nebee ita haree ho matan, Nia halo hosi buat nebee mak ita ema la bele haree.+ 11:3 Hahuu (Jénesis, Kejadian) 1:1; Salmus (Mazmur) 33:6; 9; João 1:3
4 Abel fiar ba Nai Maromak. Nee mak nia foo ba Maromak sakrifisiu ida nebee diak liu duke Kaín nian. Tanba Abel nia fiar mak Maromak simu nia sakrifisiu i konsidera nia ema ida nebee moris loos. Nunee, maski Abel mate kleur ona, maibee ita bele aprende nafatin hosi nia fiar.+ 11:4 Hahuu (Jénesis, Kejadian) 4:3-105 Enoke fiar ba Nai Maromak. Nee mak nia la mate, maibee Maromak foti sae nia ba lalehan. Ema buka nia mos la hetan, tanba Maromak lori ona nia. Molok Nai Maromak foti sae nia, Maromak dehan katak, Enoke ema ida ke halo haksolok Maromak nia laran.+ 11:5 Hahuu (Jénesis, Kejadian) 5:21-246 Se ita la fiar ba Nai Maromak, ita la bele halo haksolok Maromak nia laran. Tanba ita tenki fiar katak Maromak iha duni, i ita mos tenki laran metin katak Nia sei foo buat diak ba ema nebee buka Nia. Nee mak foin ita bele hakbesik ba Nia.
7 Noé fiar ba Nai Maromak. Nee mak bainhira Maromak foo hatene dehan, Nia atu halo rai nabeen, Noé mos rona. Maski Noé seidauk haree buat nee, maibee nia hakruuk ba Nai Maromak hodi halo roo para salva nia aan ho mos nia uma kain. Tanba nia fiar nee, Maromak konsidera nia ema ida nebee moris loos. Maibee ema sira seluk iha tempu nebaa hetan kastigu too mate mohu tanba sira la fiar ba Maromak hanesan Noé.+ 11:7 Hahuu (Jénesis, Kejadian) 6:13-228 Abraão fiar ba Nai Maromak. Nee mak nia halo tuir deit bainhira Maromak bolu nia i haruka nia baa iha rai nebee Maromak promete atu foo ba nia. Abraão baa deit, maski nia la hatene atu baa loos nebee.+ 11:8 Hahuu (Jénesis, Kejadian) 12:1-59 Too tiha rai nebee Maromak promete atu foo ba nia nee, nia fiar nafatin. Nee mak nia prontu moris hanesan ema lao rai hodi hela iha tenda okos deit. Maromak nia promesa nebee Abraão simu nee tuun mos ba nia oan Isac ho nia bei-oan Jacó, i sira mos moris hanesan ema lao rai nafatin.+ 11:9 Hahuu (Jénesis, Kejadian) 35:2710 Abraão hein ho pasiensia tanba nia laran metin katak, aban-bainrua nia sei hela iha sidade ida nebee hamriik metin tanba Nai Maromak rasik mak harii tuir Nia hakarak.
11 Tanba Abraão fiar ba Nai Maromak mak nia kaben Sara bele hetan oan, maski sira nain rua ferik-katuas liu ona, i desde uluk kedas Sara la bele hetan oan. Maibee too ikus sira hetan duni oan tanba Abraão fiar katak Maromak sei halo tuir Nia promesa.+ 11:11 Hahuu (Jénesis, Kejadian) 18:11-14; 21:212 Iha momentu nebaa Abraão nee katuas liu ona, maibee ikus mai nia jerasaun barak teb-tebes too ema sura la hatene, hanesan fitun iha lalehan ho rai henek iha tasi ibun.+ 11:12 Hahuu (Jénesis, Kejadian) 15:5; 22:17; 32:12
13 Ema sira nee fiar nafatin ba Nai Maromak too mate. Iha sira nia moris sira seidauk simu buat nebee Maromak promete ona ba sira. Maski nunee, maibee sira hein nafatin ho laran haksolok, hanesan ema nebee haree ona buat sira nee hosi dook. Sira dehan katak, sira hanesan ema rai liur ka ema lao rai deit iha mundu.+ 11:13 Hahuu (Jénesis, Kejadian) 23:4; 1 Krónikas (Tawarikh) 29:15; Salmus (Mazmur) 39:1314 Ema nebee koalia nunee hatudu katak sira buka nafatin rai ida hodi sai sira nia rain rasik. 15 Rai nebee sira husik ona nee, sira la hanoin tan ona. Se karik sira hanoin nafatin rai ida uluk nee, entaun sira bele fila fali baa hela iha nebaa. 16 Maibee sira nia hakarak mak rai ida nebee diak liu, fatin nee mak iha lalehan. Nee mak bainhira sira dehan, Maromak mak sira nia Nai, nee halo Nia laran haksolok, tanba Nia prepara tiha ona sidade ida ba sira iha lalehan. 17 Tanba Abraão fiar ba Nai Maromak mak bainhira Nai Maromak haruka nia oho nia oan Isac nudar sakrifisiu ba Maromak, Abraão prontu atu halo tuir.+ 11:17-18 Hahuu (Jénesis, Kejadian) 22:1-14 Isac nee Abraão nia oan mane mesak; i Maromak hatete ona ba nia dehan; “Liu hosi Isac mak o sei hetan jerasaun nebee Hau promete ona ba o.”+ 11:17-18 Hahuu (Jénesis, Kejadian) 21:12 Maski nunee, Abraão foo nia oan atu sai sakrifisiu ba Maromak, 19 tanba nia laran metin katak, Nai Maromak bele halo moris fali ema mate. I momentu nebaa, hanesan fali Abraão simu duni nia oan hosi mate, tanba Maromak salva tiha nia.
20 Isac fiar ba Nai Maromak. Nee mak bainhira nia katuas ona, nia foo hatene ba nia oan Jacó ho Esaú kona ba bensaun nebee mak sira atu simu aban-bainrua.+ 11:20 Hahuu (Jénesis, Kejadian) 27:27-29, 39-40
21 Jacó fiar ba Nai Maromak. Nee mak bainhira nia besik atu mate, nia harohan ba Maromak para foo bensaun ba nia oan José nia oan ida-idak. Depois Jacó hakruuk kaer ai tonka hodi adora Maromak.+ 11:21 Hahuu (Jénesis, Kejadian) 47:31—48:20
22 José fiar ba Nai Maromak. Nee mak bainhira nia atu mate, nia hatete katak, Nai Maromak sei lori povu Israel sai hosi rai Ejitu. I nia rai hela lia menon ba sira, para bainhira sira baa, tenki lori ho nia mate ruin.+ 11:22 Hahuu (Jénesis, Kejadian) 50:24-25; Ézodu (Keluaran) 13:19
23 Moisés nia inan-aman fiar ba Nai Maromak. Nee mak bainhira nia moris mai, sira subar nia durante fulan tolu, tanba sira haree katak sira nia oan nee oin kapaas loos. Sira la tauk atu kontra liurai Ejitu nia orden nebee dehan, se ema Israel nia oan moris mai mane, tenki oho kedas.+ 11:23 Ézodu (Keluaran) 2:2; 1:22
24 Moisés fiar ba Nai Maromak. Nee mak bainhira nia boot ona, nia lakohi atu ema konsidera nia hanesan liurai Ejitu nia bei-oan, maski liurai nia oan feto mak hakiak nia desde kiik.+ 11:24 Ézodu (Keluaran) 2:10-1225 Tuir nia hanoin, diak liu nia terus hamutuk ho Maromak nia povu Israel, duke iha tempu badak nia laran nia moris goza deit buat nebee mak la loos. 26 Iha tempu nebaa ema hatete aat nia tanba nia laran metin ba Kristu, Salvador nebee Maromak promete hori uluk ona atu haruka mai. Maibee Moisés konsidera terus ida nee folin liu fali rikusoin rai Ejitu nian tomak, tanba nia laran metin atu aban-bainrua Maromak foo fali buat nebee diak liu tan ba nia. 27 Tanba Moisés nia fiar mak bainhira nia sai hosi Ejitu, nia la tauk liurai nia hirus, tanba nia hanesan fali haree tiha ona Nai Maromak, maski ita ema la bele haree.+ 11:27 Ézodu (Keluaran) 2:15
28 Tanba Moisés nia fiar mak nia haruka povu Israel halo festa Paskua ba dala uluk. Nia haruka sira hisik bibi nia raan iha sira nia odamatan. Nunee anju nebee Maromak haruka atu oho oan mane boot sira hotu-hotu iha rai Ejitu, la tama baa oho ema Israel nia oan sira.+ 11:28 Ézodu (Keluaran) 12:21-30
29 Povu Israel fiar ba Nai Maromak. Nee mak sira lao hakur Tasi Mean hanesan fali sira lao iha rai maran. Tropas Ejitu sira koko atu duni tuir, maibee sira mout mate hotu iha tasi laran.+ 11:29 Ézodu (Keluaran) 14:21-31
30 Tanba povu Israel nia fiar mak sira lao haleu sidade Jerikó too loron hitu, i sidade nee nia moru mos rahun hotu.+ 11:30 Josué 6:12-21
31 Rahab, feto luroon iha sidade Jerikó, fiar ba Nai Maromak. Nee mak bainhira Israel nia espiaun sira too iha Jerikó, nia simu ho diak. Too ikus Maromak halo mate hotu ema Jerikó sira nebee lakohi rona ba Nia, maibee Nia salva Rahab tanba nia fiar.+ 11:31 Josué 6:22-25; 2:1-21
32 Hau sei bele koalia naruk tan kona ba ema seluk nebee fiar ba Nai Maromak. Maibee tempu la too atu konta hotu kona ba Gideão, Barak, Sansão, Jefté, David, Samuel, ho Nai Maromak nia profeta sira seluk.+ 11:32 Juis sira (Hakim) 6:11—8:32; 4:6—5:31; 13:2—16:31; 11:1—12:7; 1 Samuel 16:1—1 Liurai sira (Reis, Raja-raja) 2:11; 1 Samuel 1:1—25:133 Sira hotu fiar ba Nai Maromak. Nee mak sira balu manaan nasaun seluk, balu ukun nasaun ho lo-loos, i balu simu buat nebee Nai Maromak promete atu foo ba sira. Balu taka leaun nia ibun,+ 11:33 Daniel 6:1-2734 balu hamate ahi lakan boot, i balu konsege halai sai hosi ema nebee mak atu oho sira ho surik. Balu la iha forsa maibee Maromak foo forsa ba sira. Balu sai funu nain makaas too sira duni sai tropas inimigu nebee tama hosi rai liur.+ 11:34 Daniel 3:1-3035 Senhora balu simu fali sira nia maluk nebee mate, tanba Maromak halo moris fila fali.
Iha mos balu, ema halo terus too mate tanba sira fiar ba Nai Maromak. Sira lakohi nega Nai Maromak para ema hasai sira hosi terus nee, tanba sira laran metin katak, bainhira sira mate, sira sei simu fali moris ida nebee diak liu.+ 11:35 1 Liurai sira (Reis, Raja-raja) 17:17-24; 2 Liurai sira (Reis, Raja-raja) 4:25-3736 Balu ema tarata i baku ho sikoti. Balu ema kesi ho korenti hodi hatama ba kadeia laran.+ 11:36 1 Liurai sira (Reis, Raja-raja) 22:26-27; 2 Krónikas (Tawarikh) 18:25-26; Jeremias (Yeremia) 20:2; 37:15; 38:637 Balu ema tuda ho fatuk too mate, balu ema kadoo fahe ba rua, balu ema oho hodi surik. Balu lao lemo rai hatais bibi nia kulit, sira moris kiak rabat rai, ema halo sira terus ho susar.+ 11:37 2 Krónikas (Tawarikh) 24:2138 Sira lao lemo-lemo iha rai fuik maran i sae-tuun foho hodi hela deit iha fatuk kuak ho rai kuak. Ema fiar makaas hanesan nee, mundu nee la serve ba sira atu hela.
39 Maromak gaba ema sira nee hotu tanba sira nia fiar ba Nia. Maski nunee, maibee too sira mate mos, sira seidauk simu hotu buat nebee Maromak promete ona atu foo. 40 Nee tanba Maromak desidi atu halo buat nebee diak liu tan. Nia hakarak para sira tenki hein ita nebee moris agora mak foin bele simu hotu.
12Hakaas aan tuir Nai Jesus nia ezemplu
1 Entaun, oinsaa ho ita agora? Ita hanesan ema nebee halai taru. Ita nia bei-ala sira barak teb-tebes sai ona sasin kona ba fiar, i agora sira haleu hela ita hodi asisti. Tanba nee mai ita soe tiha buat todan saida deit mak halo ita halai la bele, liu-liu ita nia sala nebee kesi metin ita. Mai ita hakaas aan halai nafatin too rohan tuir dalan nebee Maromak hatudu ona ba ita. 2 Ita tenki hateke deit ba Jesus, tanba ita nia fiar mai hosi Nia, i Nia mak halo ita nia fiar sai metin too rohan. Bainhira Jesus terus iha krus, Nia aguenta ho pasiensia i la interese katak mate iha krus nee moe boot ida, tanba Nia hatene katak, Maromak sei halo Nia laran haksolok. I sai nunee duni. Agora Jesus tuur hela iha Nai Maromak nia sorin loos. 3 Hanoin di-diak, oinsaa Jesus aguenta bainhira ema aat sira kontra makaas Nia. Hanoin nafatin Nia ezemplu nee, para imi la bele lakon esperansa too sai baruk tiha.
Nai Maromak hanorin ita, hanesan aman hanorin nia oan
4 Imi luta ona hasoru buat aat, maibee seidauk luta too imi nia raan fakar. 5 Keta halo be imi haluha ona Maromak nia liafuan domin nebee bolu imi nee Nia oan. Nia dehan nunee:
“Hau nia oan,
bainhira Nai Maromak koriji imi,
la bele hanoin katak buat nee la iha folin ba imi,
la bele lakon esperansa
bainhira Nia kastigu imi.
6 Tanba Nai Maromak koriji ema nebee mak Nia hadomi,
i kastigu ema nebee mak Nia konsidera hanesan Nia oan.”+ 12:6 Jó (Ayub) 5:17; Provérbiu (Amsal) 3:11-12
7 Nunee, bainhira imi hetan terus ho susar, aguenta ho pasiensia ba. Tanba terus nee hatudu katak Nai Maromak hanorin imi hanesan aman ida hanorin nia oan. Aman sira hotu-hotu koriji sira nia oan. 8 Se Maromak la koriji imi hanesan mos Nia koriji ema sira seluk, nee dehan katak imi laos Maromak nia oan.
9 Ita baibain respeita ita nia aman sira iha mundu tanba sira koriji ita. Maibee ita nia Aman iha lalehan, ita tenki respeita liu tan hodi hakruuk ba Nia para ita bele hetan moris rohan-laek. 10 Ita nia aman sira iha mundu nee koriji ita iha tempu badak, tuir sira nia matenek deit. Maibee Nai Maromak koriji ita para tulun ita, atu ita bele moris ho laran moos hanesan Nia. 11 Bainhira Maromak koriji ita ka ema ruma koriiji ita, ita senti tristi, laos kontenti. Maibee se ita aprende ona hosi buat sira nee, too ikus ita nia laran hakmatek, tanba ita moris loos.
12 Tanba nee halo forti imi nia liman nebee mak fraku, i hametin imi nia ain tuur para la bele nakdedar. 13 Lao nafatin tuir dalan loos para imi nia belun sira nebee lao la diak keta sai aat liu tan, maibee bele hetan kura hodi lao ba oin nafatin.+ 12:13 Isaias (Yesaya) 35:3; Provérbiu (Amsal) 4:26
La bele fila kotuk ba Nai Maromak
14 Hakaas aan para moris dame ho ema hotu-hotu. I buka atu moris ho laran moos, tanba so ema nebee moris ho laran moos mak aban-bainrua bele haree Nai Maromak. 15 Foo korajen ba malu nafatin para ema ida hosi imi nia leet la bele dada aan hosi Maromak nia laran diak. Kuidadu para imi ida la bele sai hanesan ai abut ida nebee moruk hodi estraga ema nia moris too dada sira tuir fali dalan nebee la loos.+ 12:15 Deutoronómiu (Ulangan) 29:1816 Kuidadu para ema ida la bele halo sala seksual, ka moris la respeita Nai Maromak, hanesan Esaú. Uluk Esaú nee faan tiha nia direitu nudar oan mane boot para hetan deit hahaan bikan ida.+ 12:16 Hahuu (Jénesis, Kejadian) 25:29-3417 Imi hatene katak, too ikus Esaú hakarak atu simu bensaun nee hosi nia aman, maibee la bele ona. Maski nia husu ho tanis mos, nia la bele hetan fali buat nebee uluk nia soe ona nee.+ 12:17 Hahuu (Jénesis, Kejadian) 27:30-40
18 Imi mai ona iha Nai Maromak nia prezensa, maibee laos ona hanesan uluk bainhira Nai Maromak hatuun nia promesa ba povu Israel iha foho Sinai. Sira baa iha foho ida nebee ema bele haree ho matan. Iha foho Sinai nee nia tutun, ahi lakan boot ho anin boot, i nakukun falun metin foho nee. 19 Iha momentu nebaa sira rona korneta lian. Sira mos rona Maromak nia lian makaas teb-tebes, too sira husu ho tauk para la bele rona tan Maromak nia lian nee.+ 12:19 Ézodu (Keluaran) 19:16-22; 20:18-21; Deutoronómiu (Ulangan) 4:11-12; 5:22-2720 Tanba sira la aguenta ho orden nebee haruka sira dehan, “Ema ka animal nebee deit mak lao sama foho nee, tenki tuda mate.”+ 12:20 Ézodu (Keluaran) 19:12-1321 Buat nebee povu Israel haree nee, halo sira tauk teb-tebes too Moisés mos dehan, “Hau tauk ho nakdedar.”+ 12:21 Deutoronómiu (Ulangan) 9:19
22 Maibee agora imi mai iha Nai Maromak nia prezensa iha Jerusalém lalehan nian, iha foho Siaun, iha Maromak Moris nia hela fatin. Iha nebaa anju tookon ba tookon halibur malu ho haksolok. 23 Iha mos Maromak nia oan sira primeiru halibur hamutuk. Sira hotu nia naran hakerek ona iha lalehan. Imi mai ona iha Nai Maromak. Nia mak Juis nebee sei tesi ema hotu-hotu nia lia. Imi mai iha matebian sira nebee mak uluk moris loos. Agora Maromak halo sira sai moos liu ona, sala uitoan mos la iha. 24 Imi mai ona iha Jesus. Nia mak lori Nai Maromak nia promesa foun mai ita ema, i Nia raan fakar too mate hodi salva ita. Nunee Nia raan nee diak liu Abel nian, tanba Abel nia raan nee husu atu Nai Maromak foo kastigu.+ 12:24 Hahuu (Jénesis, Kejadian) 4:10
25 Tanba nee bainhira Nai Maromak koalia ba imi, see tilun di-diak hodi rona. Uluk Moisés hatoo Maromak nia liafuan iha mundu nee, maibee ita nia bei-ala sira lakohi rona. Nee mak Maromak kastigu sira, too sira halai la biban. Saa tan ita, se ita lakohi rona Maromak koalia mai ita hosi lalehan.+ 12:25 Ézodu (Keluaran) 20:2226 Iha Moisés nia tempu, Maromak nia lian makaas teb-tebes, halo rai nakdoko. Maibee agora Nia promete dehan, “Hau sei halo rai nakdoko tan dala ida. Laos deit rai, maibee lalehan mos sei nakdoko hotu.”+ 12:26 Ajeu (Hagai) 2:6
27 Liafuan “dala ida tan” hatudu katak, too ikus buat hotu-hotu nebee Maromak halo sei nakdoko too lakon tiha hotu. So buat nebee metin too tinan ba tinan mak sei hela.
28 Nee duni, mai ita agradese ba Nai Maromak, tanba Nia simu ita sai Nia reinu, i Ninia ukun la nakdoko. Mai ita adora Nia ho respeitu ho tauk tuir Nia hakarak. 29 Tanba ita nia Maromak hanesan ahi lakan boot nebee haan motuk too mohu.+ 12:29 Deutoronómiu (Ulangan) 4:24
13Moris halo haksolok Nai Maromak
1 Hadomi nafatin imi nia maluk sarani hanesan maun-alin. 2 Keta haluha simu ema oin foun iha imi nia uma. Tanba ema balu simu tiha bainaka oin foun, sira hanoin dehan ema baibain, afinal bainaka nebee sira simu nee anju.+ 13:2 Hahuu (Jénesis, Kejadian) 18:1-8; 19:1-33 Tau matan ba ema dadur sira, hanesan fali imi iha kadeia hamutuk ho sira. I hanoin mos ema nebee terus tanba ema halo aat sira, hanesan imi rasik mak hetan terus nee.
4 Ema hotu-hotu tenki respeita kazamentu. Feen-laen tenki foo laran ba malu. Tanba see mak halo sala seksual ho ema nebee laos nia feen ka laen, Nai Maromak sei kastigu nia.
5 La bele matan naklosu ba osan, maibee tenki kontenti ho buat nebee mak imi iha. Tanba Nai Maromak rasik dehan nunee:
“Hau sei la haluha imi,
Hau sei la husik imi mesak.”+ 13:5 Deutoronómiu (Ulangan) 31:6; 8; Josué 1:5
6 Tanba nee ita laran metin hodi dehan,
“Nai Maromak sempre tulun hau.
Nunee hau la tauk ida.
See mak bele halo aat hau?”+ 13:6 Salmus (Mazmur) 118:6
7 La bele haluha imi nia lider sira nebee uluk foo sai Nai Maromak nia liafuan ba imi. Hanoin buat diak nebee mak sira halo iha sira nia moris lor-loron, i halo tuir sira nia fiar. 8 Tanba Jesus Kristu nunka muda; Nia nafatin deit, hori uluk too ohin loron too tinan ba tinan.
9 Nunee se ema hanorin buat falsu oi-oin deit, keta halo tuir hodi sees fali hosi dalan loos. Atu hametin imi nia laran, tenki depende ba Maromak nia laran diak. La bele depende fali ba regra kona ba haan-hemu, tanba regra sira nee la ajuda ita.
10 Ita iha meza sakrifisiu ida, Jesus mak sai hanesan sakrifisiu iha meza nee nia leten. Maibee nai lulik sira nebee sei halo sakrifisiu nafatin iha tenda orasaun uluk nian, sira la bele aproveita Jesus nia sakrifisiu ida nee. 11 Tuir sistema uluk, nai lulik boot tin-tinan oho animal lori nia raan baa oferese iha Fatin nebee Lulik Liu, atu Maromak hamoos povu nia sala. Depois animal nee nia isin lori sai hosi povu nia hela fatin hodi sunu motuk iha liur.+ 13:11 Levítiku (Imamat) 16:2712 Nunee mos ho Jesus. Nia terus too mate laos iha sidade laran, maibee iha liur, para hodi Nia raan nee Nia hamoos povu nia sala. 13 Tanba Jesus mate iha liur, mai ita mos sai hosi sistema uluk nian hodi baa hamutuk ho Nia iha liur nebaa. I kuandu ema hatete aat ita hanesan mos sira hatete aat Nia, ita tenki simu. 14 Tanba iha mundu nee, la iha sidade ida nebee permanente ba ita atu hela. Maibee ita hein atu aban-bainrua bele hela iha sidade ida nebee permanente.
15 Nunee mai ita hahii beibeik Nai Maromak i sempre foti aas Nia naran tanba Jesus. Ida nee sai hanesan ita nia sakrifisiu ba Nai Maromak, tanba ita foo sai katak Maromak mak ita nia Nai. 16 La bele haluha halo buat diak ba ema seluk, i se sira presiza buat ruma, ajuda sira. Tanba hahalok nee mos hanesan sakrifisiu nebee ita foo ba Nai Maromak hodi halo haksolok Nia laran.
17 Imi tenki rona imi nia lider igreja hodi halo tuir buat nebee sira haruka. Tanba sira tau matan ba imi loron-kalan, i aban-bainrua sira tenki hataan ba Nai Maromak kona ba sira nia servisu nee. Se imi rona sira mak sira sei servisu ho laran haksolok. Se lae, sira nia laran tristi, i nee la diak ba imi.
18 Halo orasaun mai ami nafatin. Ami laran metin katak ami nia laran moos, i ami sempre hakarak atu halo buat nebee mak loos. 19 Hau husu liu-liu atu imi harohan para hau bele fila lalais ba imi.
Orasaun ho kumprimentus
20 Nai Maromak mak dame nain. Nia mak halo moris fali Nai Jesus hosi mate. Liu hosi Jesus nia mate nee, Maromak halo metin Nia promesa ho ita ema, i Nia promesa nee vale nafatin too tinan ba tinan. Liu hosi Nia mate mos Jesus agora sai ona Bibi Atan diak liu hodi tau matan ba Nia bibi sira. Nunee hau harohan 21 atu Maromak foo saida deit mak imi presiza atu imi bele halo tuir Nia hakarak. Hau mos harohan atu Nia servisu nafatin iha ita hotu nia laran liu hosi Jesus Kristu nia tulun, para ita sai ema nebee mak halo haksolok Nia laran. Mai ita foti aas Nia naran too tinan ba tinan nafatin. Amen.
22 Maun-alin sira, hau hakerek surat ida nee para hametin imi nia laran. Hau husu atu imi simu di-diak tanba surat nee la naruk ida.
23 Hau hakarak foo hatene ba imi katak ita nia maluk Timóteo sai tiha ona hosi komarka. Se nia too mai iha tempu badak, entaun hau sei lori nia baa vizita imi.
24 Hatoo hau nia kumprimentus ba imi nia lider sira hotu, ho mos ba Nai Maromak nia ema sira hotu-hotu. Maluk sira hosi Itália mos foo kumprimentus ba imi.
25 Hau harohan ba Maromak atu hatudu Nia laran diak ba imi hotu.