Galásia

Paulo nia surat

ba sarani sira iha

Galásia

Paulo hahuu nia surat

¹ Hau Paulo, ho maluk sarani sira hotu nebee hamutuk ho hau iha nee, haruka surat nee ba sarani sira iha fatin-fatin iha provinsia Galásia.

Hau Nai Jesus nia apostolu. Laos ema kriatura ruma mak hili hau hodi halao servisu nee, maibee Jesus Kristu ho Aman Maromak mak hili. Kristu nee mak Maromak promete kedan hori uluk atu haruka mai. Nia mate maibee Aman Maromak halo Nia moris fali ona.

³ Ami harohan ba ita nia Aman Maromak ho Nai Jesus Kristu, para hatudu Sira nia laran diak ba imi, i foo paz ho hakmatek ba imi. ⁴ Kristu foo-Aan ba mate hodi hamoos ita nia sala i hasai ita hosi buat aat iha mundu nee. Nia halo nunee tuir ita nia Aman Maromak nia hakarak. ⁵ Mai ita foti aas Nai Maromak nia naran tinan ba tinan! Amen, loos duni!

Nusaa mak imi tuir fali hanorin nebee la loos?

⁶ Hau admira! Nusaa mak bele sai nunee! Maromak bolu ona imi atu hatene Nia laran diak. Maibee imi fila kotuk lalais deit ba Nia, hodi tuir fali hanorin seluk ⁷ nebee la loos. Tuir lo-loos, Nai Jesus nia Liafuan Diak ida deit, la iha tan seluk. Maibee agora iha ema balu mai bobar Nia Liafuan tuun-sae, halo imi la hatene atu tuir loos dalan ida nebee.

⁸ Kuidadu! See-see deit mak hanorin la hanesan ho Liafuan Diak nebee uluk ami hanorin ba imi, Nai Maromak sei foo kastigu ba nia tinan ba tinan nafatin. Maski ami rasik ka, anju hosi lalehan mos, sei hetan kastigu. ⁹ Ami hatete tiha ona, agora hau repete dala ida tan: se iha ema ruma hanorin fali oin seluk, la tuir Liafuan Diak nebee uluk imi simu tiha ona nee, Maromak sei kastigu nia tinan ba tinan nafatin.

¹⁰ Hau koalia hanesan nee, atu ema bele gaba hau ka? Lae! Hau hakarak atu halo haksolok Maromak nia laran, laos atu halo haksolok ema nia laran. Se hau buka atu ema gaba hau karik, entaun hau la serve sai Kristu nia atan.

Jesus Kristu rasik mak hatudu Liafuan Diak ba Paulo

¹¹ Maun-alin sira, hau foo hatene lo-loos ba imi katak, Nai Jesus nia Liafuan Diak nebee hau hanorin nee, laos inventa. ¹² Hau laos simu hosi ema, laos ema mak hanorin hau, maibee Jesus Kristu rasik mak hatudu mai hau.

¹³ Imi rona ona kona ba hau nia moris uluk, bainhira hau sei tuir relijiaun Judeu. Iha tempu nebaa, hau halo sarani sira terus liu, i hakaas aan para halo rahun sira.+ 1:13 Apostolu sira nia Istoria (Atos, Kisah) 8:3; 22:4-5; 26:9-11¹⁴ Hau foo neon ho laran tomak hodi estuda relijiaun Judeu nian i halo tuir, liu fali ema Judeu sira seluk nebee idade hanesan hau. Hau mak badinas liu halo tuir ita nia bei-ala sira nia lisan ho lei relijiaun hotu.+ 1:14 Apostolu sira nia Istoria (Atos, Kisah) 22:3

¹⁵ Maski nunee, Nai Maromak desidi atu hatudu Nia oan Jesus mai hau. Bainhira hau sei iha hau nia inan nia kabun laran, Nia hatudu ona Nia laran diak mai hau hodi hili hau atu baa foo sai Liafuan Diak kona ba Jesus ba ema nebee laos Judeu. Bainhira Nia hatudu Nia Oan mai hau, hau la baa husu ema seluk nia hanoin.+ 1:15-16 Apostolu sira nia Istoria (Atos, Kisah) 9:3-6; 22:6-10; 26:13-18¹⁷ Hau mos la baa iha sidade Jerusalém atu hasoru malu ho Jesus nia apostolu sira seluk nebee Nia foti uluk ona. Maibee hau baa kedas iha rai Arabi. Hotu tiha hau fila fali mai iha sidade Damasku.

¹⁸ Liu tiha tinan tolu, foin hau baa iha Jerusalém hodi hasoru malu ho Pedro.+ 1:18 Paulo temi Pedro nia naran Kefas . Nee Pedro nia naran ho lian Aram. I hau hela ho nia durante loron sanulu resin lima.+ 1:18 Apostolu sira nia Istoria (Atos, Kisah) 9:26-30

¹⁹ Iha momentu nebaa, hau mos hasoru Nai Jesus nia alin, Tiago. Maibee hau la haree Nai Jesus nia apostolu sira seluk, so sira nain rua deit. ²⁰ Buat nebee hau hakerek nee, loos duni. Hau la bosok, Maromak hatene.

²¹ Depois hau baa iha provinsia Síria ho Silísia. ²² Iha tempu nebaa, Kristu nia povu iha fatin-fatin iha provinsia Judeia seidauk konhese hau. ²³ Sira rona deit ema konta dehan, “Ema ida nebee uluk halo terus ita nee mak agora foo sai fali Liafuan Diak kona ba Kristu. Maski uluk nia hanehan ita atu obriga ita fila kotuk ba Kristu.” ²⁴ I sira hahii Nai Maromak, tanba Maromak muda ona hau nia moris.

Nai Jesus nia apostolu sira seluk simu Paulo nia hanorin

¹ Liu tiha tinan sanulu resin haat, hau baa fali Jerusalém, hamutuk ho Barnabé. Ami lori mos Tito.+ 2:1 Apostolu sira nia Istoria (Atos, Kisah) 11:30; 15:2² Hau baa tanba Nai Maromak mak haruka. Iha nebaa hau hasoru malu ho nai ulun sarani sira hodi konta fali ba sira Liafuan Diak nebee mak durante nee hau foo sai ba ema nebee laos Judeu. Hau koalia ho nai ulun sira deit, atu sira bele tetu di-diak hau nia hanorin nee loos ka lae. Tanba se sira la simu karik, entaun hau nia servisu saugati deit.

³ Nai ulun sira simu hau nia liafuan ho diak. Sira simu mos Tito. Maski nia ema Gregu, laos ema Judeu, maibee sira la obriga nia sunat.+ 2:3 Ema Judeu sira halo serimonia sunat ba labarik mane hotu-hotu bainhira sira halo loron walu. Nee sinal ida hodi hatudu katak labarik nee Maromak nian, i tama ona ba Maromak nia povu.⁴ Iha duni ema balu hakarak obriga nia para sunat tuir ema Judeu sira nia lei relijiaun. Ema sira nee finji fiar ba Jesus hodi tama iha sarani sira nia leet. Kristu Jesus foo ona liberdade mai ita, maibee ema sira nee hakarak hadau fali liberdade nee, hodi halo ita sai atan fali ba lei relijiaun Judeu nian. Nee mak sira atu obriga Tito para sunat. ⁵ Maski nunee, maibee ami nunka halo tuir, para imi bele fiar nafatin Liafuan Diak nebee imi simu hosi ami. Tanba Liafuan nee mak loos.

⁶ Nai ulun sira nee hanesan ema boot iha sarani sira nia oin. Maibee mai hau, atu boot ka kiik, hau la interese, tanba Maromak la haree ba ida nee. Bainhira hau hatoo hau nia hanorin ba sira, sira simu ho diak, i la aumenta liafuan ida.+ 2:6 Deutoronómiu (Ulangan) 10:17⁷ Laos nee deit, sira mos rekonhese katak Nai Maromak foo fiar ona mai hau para foo sai Liafuan Diak ba ema nebee laos Judeu, hanesan mos Nia foo fiar ba Pedro lori Liafuan Diak ba ema Judeu. ⁸ Sira haree katak Nai Maromak foo kbiit ba Pedro hodi halao nia servisu nudar Nai Jesus nia apostolu ba ema Judeu. Nunee mos Nia foo kbiit mai hau nudar Nia apostolu ba ema nebee laos Judeu. ⁹ Tiago, Pedro,+ 2:9 Paulo temi Pedro nia naran Kefas . Nee Pedro nia naran ho lian Aram. ho João rekonhese katak, Nai Maromak foo ona knaar nee mai hau. Sira nain tolu nee, sarani sira respeita nudar ulun boot igreja nian. Sira kaer liman ho hau ho Barnabé, hanesan sinal katak, ami hotu laran ida. Sira konkorda para ami lori nafatin Liafuan Diak ba ema nebee laos Judeu, i sira mak lori ba ema Judeu. ¹⁰ So buat ida deit mak sira husu mai ami, atu ami tulun ema kiak sira iha Jerusalém. I hau mos hakarak duni halo nunee.

Paulo siak Pedro tanba sees aan hosi ema nebee laos Judeu

¹¹ Depois iha loron ida, Pedro mai iha sidade Antiókia, hau siak nia iha sarani sira nia oin, tanba nia atitude la loos. ¹² Bainhira Pedro foin too mai, nia kontenti haan hamutuk ho sarani sira nebee laos Judeu. Maibee kuandu Tiago nia kolega Judeu sira too mai, Pedro sees aan tiha hosi sira nebee laos Judeu, i lakohi haan hamutuk tan ho sira. Nia tauk nia maluk Judeu sira nee, tanba sira hanorin dehan, Kristu nia ema tenki kaer metin ema Judeu sira nia lei relijiaun hotu, i tenki moris haketak aan hosi ema nebee laos Judeu.+ 2:12 Lian Gregu bolu Tiago nia kolega sira nee ‘grupu sunat nian’. Ema sira nee hanorin dehan, sarani sira tenki sunat tuir lei relijiaun Judeu nian i tenki kaer metin lei nee tomak. Sira mos hanorin dehan, ema Judeu la bele haan hamutuk ho ema nebee laos Judeu.

¹³ Ema Judeu sira seluk mos komesa halo tuir Pedro nia hahalok finjidu nee, too Barnabé mos halo tuir i lakohi haan tan ho ema nebee laos Judeu. ¹⁴ Bainhira hau haree sira la tuir ona Nai Jesus nia Liafuan Diak nebee loos, hau siak Pedro iha sira hotu nia oin dehan, “Irmaun moris mai ema Judeu. Maibee irmaun rasik la moris ona tuir lei relijiaun Judeu nian. Nusaa mak agora ita hakarak obriga ema nebee laos Judeu, atu sira tuir fali lei nee hotu?”

¹⁵ Loos duni, hau ho Pedro moris mai ema Judeu. Ami ema Judeu uluk kedas hatene Maromak nia lei; ema nebee laos Judeu la hatene. ¹⁶ Maibee agora ami hatene katak, la iha ema ida mak Maromak simu tanba nia tuir lei relijiaun. Nai Maromak simu ema tanba nia fiar ba Kristu Jesus, laos tanba halo tuir lei nee. Nee mak ami mos fiar ba Kristu, para Maromak bele simu ami.+ 2:16 Salmus (Mazmur) 143:2; Roma 3:20, 22

¹⁷ Ami fiar katak Maromak simu ami tanba ami fiar ba Kristu. Maibee too ikus ema Judeu balu foo sala mai ami dehan, ami halo sala tanba la tuir ona lei relijiaun. Se nunee, Kristu mak halo ami sala ka? Lae liu! ¹⁸ Hau husik tiha ona sistema lei relijiaun nian, entaun hau la bele kaer fali. Se hau kaer fali mak hau sala. ¹⁹ Uluk, hau hakaas aan halo tuir lei relijiaun Judeu nian, para Maromak bele simu hau. Maibee hau la bele halo tuir lei nee hotu. Tanba nee mak agora hau husik tiha regra sira nee hotu para hau bele foo hau nia moris tomak ba Maromak. ²⁰ Bele dehan, hanesan hau mate tiha ona iha krus hamutuk ho Kristu. Agora laos hau mak moris tan, maibee Kristu mak moris iha hau. Durante hau moris iha mundu nee, hau laran metin deit ba Nai Maromak nia Oan. Nia hadomi teb-tebes hau, too foo nia Aan hodi mate iha hau nia fatin. ²¹ Nai Maromak simu hau tanba Nia laran diak. Hau lakohi fila kotuk ba Nia laran diak nee. Tanba se karik Nai Maromak simu ita tanba ita halo tuir lei relijiaun, entaun nee dehan katak, Kristu nia mate la iha folin.

Nai Maromak simu ita tanba ita fiar ba Jesus Kristu

¹ Imi ema Galásia, imi beik-teen liu! Keta ema lohi imi karik! Uluk hau foo hatene mo-moos tiha ona ba imi kona ba Jesus Kristu nia mate iha krus. ² Agora hataan took mai. Tanba saa mak Nai Maromak foo Nia Espiritu Santu ba imi? Nia foo tanba imi tuir lei relijiaun ka? Laos! Nia Espiritu tuun ba iha imi tanba imi fiar Liafuan Diak nebee imi rona ona. ³ Entaun nusaa mak imi beik demais nunee?! Fo-foun imi moris tuir Espiritu Santu. Maibee agora imi hakarak lao too rohan ho imi nia kbiit rasik. ⁴ Imi hetan terus barak ona tanba imi fiar ba Kristu. Keta halo be imi nia terus nee hotu sai saugati deit. ⁵ Nai Maromak foo Nia Espiritu Santu ba imi, i halo milagre iha imi nia leet. Imi hanoin Nia halo nunee tanba imi halo tuir lei relijiaun ka? Lae! Nia halo nunee, tanba imi fiar ba Liafuan Diak nebee imi rona tiha ona.

⁶ Hanoin took ema Judeu sira nia bei-ala Abraão. Iha Livru Sagradu hakerek dehan, “Nia fiar ba Maromak, nee mak Maromak simu nia hodi deklara katak nia sala moos tiha ona.”+ 3:6 Hahuu (Jénesis, Kejadian) 15:6; Roma 4:3⁷ Imi tenki kompriende di-diak buat nee: ema nebee fiar ba Maromak, nia mak sai hanesan Abraão nia oan. ⁸ Maromak nia liafuan foo hatene nanis ona dehan, Maromak sei simu mos ema nebee laos Judeu, naran katak sira fiar ba Nia. Tanba hori uluk kedas Nia hatete ona Liafuan Diak ba Abraão dehan, “Ema iha nasaun hotu-hotu iha mundu sei hetan bensaun tanba o.”+ 3:8 Hahuu (Jénesis, Kejadian) 12:3⁹ Nee duni Maromak foo bensaun ba ema hotu nebee fiar ba Nia, hanesan mos Nia foo ba Abraão tanba nia fiar.

¹⁰ Ema nebee fiar aan katak Maromak sei simu nia tanba deit nia moris tuir lei relijiaun, ema nee hetan malisan. Tanba iha Livru Sagradu hakerek dehan, “Ema nebee mak la kumpri hotu lei relijiaun, nia hetan malisan.”+ 3:10 Deutoronómiu (Ulangan) 27:26¹¹ La iha ema ida mak bele kumpri lei nee tomak. Nunee la iha ema ida mak Nai Maromak simu tanba nia moris tuir lei relijiaun. Nee klaru! Tanba hakerek ona dehan, “Ema tenki fiar ba Nai Maromak mak foin Maromak simu nia i foo moris rohan-laek ba nia.”+ 3:11 Habakuk 2:4

¹² Se ema depende ba lei relijiaun, nia la laran metin ba Maromak. Tanba iha Livru Sagradu hakerek dehan, “Ema nebee kaer metin lei relijiaun, nia moris preokupa deit ho lei nee.”+ 3:12 Levítiku (Imamat) 18:5

¹³ Maibee Jesus Kristu foo nia Aan hodi hasai ita hosi ita nia sala. Nunee Nia hasai ita hosi lei relijiaun nia okos, para lei nee la bele lori malisan mai ita. Hanesan nee Nia rasik simu fali ita nia malisan. Tanba iha Livru Sagradu hakerek dehan, “Ema nebee mate iha ai riin, nia hetan malisan.”+ 3:13 Deutoronómiu (Ulangan) 21:23¹⁴ Bainhira Jesus Kristu foo liberdade mai ita, bensaun nebee Nai Maromak uluk foo ba Abraão, tuun mos ba ema nebee laos Judeu. Nunee se ita fiar ba Kristu Jesus, ita bele simu Nai Maromak nia Espiritu Santu nebee Nia promete tiha ona.

Nai Maromak kaer metin nia promesa

¹⁵ Maun-alin sira, agora hau hakarak foo ezemplu hosi ita nia moris loro-loron. Se ema nain rua hakerek surat akordu ida, depois sira asina tiha, surat nee vale ona. Ema ida la bele kansela, i la bele aumenta tan liafuan ruma ba iha surat nee. ¹⁶ Nunee mos bainhira Nai Maromak halo promesa ba Abraão ho nia jerasaun. Iha momentu nebaa, Nai Maromak laos dehan “Hau halo promesa nee ho o nia jerasaun sira”, tanba Nia la foo promesa nee ba ema barak. Maibee Nia foo ba Abraão nia jerasaun ida deit, nee mak Kristu.+ 3:16 Biblia ho lian Gregu hakerek dehan, Maromak halo promesa ho Abraão nia ‘fini’. Nee dehan katak, nia jerasaun. Haree mos iha Hahuu (Jénesis, Kejadian) 12:7.¹⁷ Buat nebee hau hakarak hatete mak nee: Nai Maromak halo promesa uluk ho Abraão. Liu tiha tinan atus haat tolu-nulu, foin Nia hatuun lei relijiaun liu hosi Moisés. Maibee Maromak la kansela Nia promesa ida uluk nee.+ 3:17 Ézodu (Keluaran) 12:40¹⁸ Se karik Maromak foo bensaun ba ita tanba ita tuir lei relijiaun, entaun ita la simu ona bensaun tuir Maromak nia promesa. Maibee laos hanesan nee! Maromak foo bensaun ba Abraão tanba Nia promete tiha ona atu foo.+ 3:18 Roma 4:14

¹⁹ Entaun, Maromak foo lei relijiaun atu halo saida? Nia foo lei relijiaun hodi hanorin katak, ita ema nee sala nain. Nia hakarak atu lei nee vale too deit Abraão nia Jerasaun ida nee too mai, Ida nebee temi tiha ona iha Maromak nia promesa nee.

Bainhira Maromak foo lei relijiaun ba ema Judeu sira, Nia foo ba Nia anju mak entrega fali ba Moisés para foo tutan ba povu. ²⁰ Maibee bainhira Nia halo promesa ho Abraão, Nia foo laos liu hosi ema seluk. Maromak rasik mak koalia ba nia. Nee hatudu katak, Maromak nia promesa boot liu lei relijiaun.

Lei relijiaun hanorin kona ba ema nia sala

²¹ Karik imi hanoin katak, Maromak nia lei relijiaun kontra fali Nia promesa. Lae liu! Se karik ita ema bele kumpri hotu lei nee, maka Maromak bele simu ita i foo moris mai ita. Maibee la iha lei ida mak ita bele kumpri hotu. ²² Iha Livru Sagradu hakerek dehan, sala kesi metin ema hotu-hotu iha mundu. Nee duni, so ema nebee fiar ba Jesus Kristu deit mak bele simu buat nebee Nai Maromak promete tiha ona.

²³ Uluk, Jesus Kristu seidauk mai, lei relijiaun kesi metin hela ami ema Judeu, halo ami hanesan ema dadur. Maibee bainhira Jesus mai, Maromak foo sai katak, se ami fiar ba Kristu mak ami hetan liberdade. ²⁴ Nunee, lei relijiaun eduka ami too Kristu mai. Maibee bainhira Nia mai, ami fiar ba Nia hodi moris diak malu fali ho Maromak. ²⁵ Nee mak agora, ita fiar ona ba Kristu, ita la presiza tan atu lei relijiaun eduka ita.

Ema nebee fiar ba Kristu sai Maromak nia oan

²⁶ Agora imi hotu-hotu sai ona Nai Maromak nia oan, tanba imi fiar ba Kristu Jesus. ²⁷ Imi sarani ona atu sai ida deit ho Kristu, i agora imi moris tuir Nia ezemplu, bele dehan hanesan imi falun aan ho Kristu nia hahalok. ²⁸ Imi hotu-hotu nebee fiar ba Kristu Jesus sai ona ida. Nunee, atu imi ema Judeu ka laos ema Judeu, atan ka laos atan, mane ka feto, hanesan deit.

²⁹ Imi Kristu nia ema. Nunee imi mos sai ona Abraão nia jerasaun, i imi sei simu bensaun nebee mak Nai Maromak promete ona ba nia.+ 3:29 Roma 4:13

¹ Hau foo ezemplu ida tan. Bainhira aman ida mate, nia oan iha direitu atu simu nia rikusoin. Maibee se nia oan nee tinan seidauk too, nia seidauk bele simu, maski rikusoin hotu-hotu aban-bainrua sai ninian. Nia sei hanesan atan, ² i ema seluk mak tau matan ba nia ho nia sasaan sira nee too tempu nebee mak nia aman desidi tiha ona.

³ Nunee mos ho ita. Bainhira Jesus seidauk mai, ita mos hanesan labarik nee. Ita sei hakruuk ba lisan mundu nee nian, hanesan atan. ⁴ Maibee too nia tempu, Nai Maromak haruka Nia Oan mai. Iha feto ida mak tuur ahi Maromak nia Oan nee, i nia Oan moris tuir lei relijiaun Judeu nian. ⁵ Nia mai atu foo liberdade ba ema hotu-hotu nebee moris iha lei relijiaun nia okos, para ita mos bele sai Maromak nia oan.

⁶ Imi sai ona Nai Maromak nia oan, tanba nee mak Maromak mos haruka Nia Oan nia Espiritu mai tama iha imi nia laran. I Espiritu nee halo imi bolu Nai Maromak, “Apaa doben”. ⁷ Entaun agora imi laos atan ona, maibee imi sai ona Nai Maromak nia oan. Nunee imi iha direitu simu rikusoin hotu-hotu nebee Nia promete ona ba Nia oan sira.+ 4:7 Roma 8:15-17

Paulo preokupa ho sarani sira iha Galásia

⁸ Uluk bainhira imi seidauk konhese Nai Maromak, imi sai atan hodi adora buat nebee laos Maromak. ⁹ Maibee agora, imi konhese ona Nai Maromak. (Tuir loos hau dehan, Nai Maromak mak konhese imi.) Entaun nusaa mak imi hakarak fila fali baa tuir tradisaun mundu nian, maski tradisaun nee fraku, i la bele salva ita? Imi hakarak hakruuk fali ba buat sira nee hodi sai fali atan ka? ¹⁰ Hau rona dehan, imi halao serimonia tuir loron, fulan, loron boot, ho tinan, ho objetivu atu Nai Maromak simu imi. ¹¹ Nee halo hau hanoin barak! Keta halo be hau hanorin imi durante nee, saugati deit.

¹² Maun-alin sira, hau husu boot atu imi livre hosi buat sira nee, hanesan mos hau. Tanba hau moris livre ona hosi lei relijiaun Judeu, hanesan mos imi nebee laos ema Judeu. Uluk, bainhira ita sei hamutuk, imi la halo buat aat ida mai hau. ¹³ Imi hotu hatene, fo-foun hau baa foo sai Nai Jesus nia Liafuan Diak ba imi, hau hamutuk ho imi tanba hau nia saude laduun diak. ¹⁴ Maski hau nia kondisaun nee foo todan ba imi, maibee imi la hakribi hau. Imi simu hau hanesan fali Nai Maromak nia anju ida. I liu tan, imi simu hau hanesan imi simu Kristu rasik Jesus. ¹⁵ Iha tempu nebaa imi hotu haksolok teb-tebes. Nusaa mak agora imi la haksolok tan? Hau hatene, iha momentu nebaa imi hadomi teb-tebes hau, too imi prontu hasai imi nia matan fuan atu foo mai hau. ¹⁶ Maibee agora imi konsidera hau hanesan fali imi nia inimigu tanba hau koalia ba imi buat nebee mak loos ka?

¹⁷ Ema lohi-door sira nee hakaas aan dada imi para tuir sira, laos atu halo diak ba imi. Sira hakarak halo imi dook tiha hosi ami, hodi tuir fali sira ho laran tomak. ¹⁸ Imi halo buat ruma ho laran tomak, nee diak, maibee imi tenki iha objetivu nebee mak diak. Entaun, atu hau hamutuk ho imi ka dook hosi imi mos, hakaas aan halo nafatin buat nebee mak diak.

¹⁹ Hau nia oan doben sira, agora hau esforsa aan ho terus dala ida tan ba imi, hanesan feto nebee kanotak moras atu tuur ahi. I hau sei esforsa aan nafatin, too imi nia laran sai hanesan Kristu. ²⁰ Maibee agora, hau la hatene atu halo saida tan. Tuir loos hau hakarak atu baa koalia rasik ho imi, atu hau la bele koalia makaas hanesan nee.

Komparasaun kona ba Hagar ho Sara

²¹ Se imi hakarak hakruuk ba ema Judeu sira nia lei relijiaun karik, diak liu imi kompriende lai, lei nee dehan saida loos. ²² Iha Livru Sagradu hakerek dehan, Abraão iha oan mane nain rua, ida hosi nia atan feto Hagar, ida hosi nia kaben Sara nebee ema livre.+ 4:22 Hahuu (Jénesis, Kejadian) 16:15; 21:2²³ Atan nee hetan oan tanba ema kriatura nia hakarak. Maibee nia kaben nebee livre nee hetan oan tanba Nai Maromak promete ona nunee ba Abraão.

²⁴ Feto nain rua nee, ita bele kompara ho promesa rua nebee Nai Maromak halo ho ema. Promesa ida, Nia halo ho Moisés iha foho Sinai, bainhira Nia hatuun lei relijiaun ba ema Judeu sira. Ema sira nebee moris iha lei nia okos, sira mos sai atan hanesan Hagar. ²⁵ Nunee Hagar kompara ho foho Sinai iha rai Arabi. I nia mos bele kompara ho ema Jerusalém nebee agora dadauk moris hanesan atan iha lei nee nia okos.

²⁶ Maibee ita nebee fiar ba Kristu, sai hanesan ita nia inan Sara. Ita sai livre hanesan nia tanba ita la moris ona iha lei relijiaun nia okos. Nunee ita pertense ona ba Jerusalém foun iha lalehan. ²⁷ Kona ba Sara ho Jerusalém foun, iha Livru Sagradu hakerek dehan:

“Feto sira nebee nunka mais iha oan,

haksolok ona ba!

Feto sira nebee la senti kanotak moras tuur ahi,

haklalak ona ba!

Feto nebee nia lain husik hela,

sei hetan oan barak liu fali feto nebee iha lain.”+ 4:27 Isaias (Yesaya) 54:1

²⁸ Maun-alin sira, imi sai ona Nai Maromak nia oan, tanba Maromak mak promete nunee. Entaun imi hanesan Sara nia oan Isac, tanba nia mos moris mai tuir Maromak nia promesa. ²⁹ Iha tempu nebaa, Abraão nia oan nebee moris mai tanba ema nia hakarak, bainhira boot ona, nia halo terus fali Isac, maski Isac nee moris mai tanba Maromak nia Espiritu nia hakarak. Agora dadauk mos ema nebee moris iha lei nia okos halo terus ema nebee moris livre.+ 4:29 Hahuu (Jénesis, Kejadian) 21:9³⁰ Maibee iha Livru Sagradu hakerek dehan, “Duni sai tiha atan feto nee ho nia oan. Tanba atan nia oan la iha direitu simu nia aman nia rikusoin. So oan hosi nia kaben nebee livre mak iha direitu.”+ 4:30 Hahuu (Jénesis, Kejadian) 21:10

³¹ Entaun, maun-alin sira, ita laos atan nee nia oan, maibee ita hanesan oan hosi Abraão nia kaben nebee livre.

Kaer metin liberdade nebee Kristu foo

¹ Kristu hasai ona ita hosi lei relijiaun nia okos, atu nunee ita bele moris livre. Neebee kaer metin imi nia liberdade nee, i keta husik ema halo imi sai atan fali.

² Rona mai! Hau Paulo mak koalia. Se imi simu sunat para bele diak malu ho Maromak, entaun Kristu nia mate la iha folin ba imi. ³ Hau hatete dala ida tan: See mak simu sunat tuir ema Judeu nia lei relijiaun, nia mos tenki halo tuir lei nee tomak. ⁴ Ema nebee hakaas aan moris tuir lei para Nai Maromak bele simu nia, ema nee moris haketak aan hosi Kristu hodi fila kotuk ba Nai Maromak nia domin. ⁵ Maibee Maromak nia Espiritu halo ita laran metin katak, Maromak sei simu ita tanba ita fiar ba Jesus Kristu. ⁶ Nunee, se ita laran ida ho Kristu Jesus, ita sunat ka la sunat, nee la iha buat ida. Importante mak nee: ita fiar ba Kristu, i hatudu fiar nee liu hosi hadomi ema seluk.

⁷ Uluk imi moris tuir dalan loos. See mak bosok imi hodi sees fali hosi dalan nee? ⁸ Lia bosok nebee imi rona nee, laos mai hosi Nai Maromak. Tanba Nia mak bolu imi sai Nia oan. ⁹ Ema dehan, “Fermentu ituan bele halo trigu sae makaas.” Nunee mos hanorin falsu, maski ituan deit, bele lori ema barak ba dalan sala.+ 5:9 1 Korintu 5:6¹⁰ Bele nunee mos, hau laran metin katak, imi sei la tuir sira nia hanorin falsu nee, tanba ita hotu laran ida ona ho Nai Jesus Kristu. I Nai Maromak sei kastigu see-see deit mak halo imi sai konfuzaun.

¹¹ Maun-alin sira, se karik hau hanorin nafatin katak, ema tenki sunat, entaun ema Judeu sei la halo hau terus hanesan agora nee, i hau nia hanorin kona ba Jesus nia mate iha krus mos, la halo sira hirus. ¹² Maibee ema nebee halo imi sai konfuzaun kona ba sunat, husik ba, sira halo liu tan too sira rasik kapa sira nia aan ba!

¹³ Maun-alin sira, Maromak bolu ona imi para sai ema nebee livre. Maibee keta hanoin katak, imi livre atu halo saida deit mak imi hakarak halo, lae. Imi tenki hadomi malu, i serbi malu. ¹⁴ Iha Livru Sagradu hakerek dehan, “O tenki hadomi o nia maluk, hanesan o hadomi o nia aan rasik.” Se imi halo tuir ukun fuan ida nee, nee dehan katak, imi halo tuir ona Maromak nia lei tomak.+ 5:14 Levítiku (Imamat) 19:18¹⁵ Maibee se imi lees malu i haan malu hela deit, mak imi sei haree. La kleur, imi rahun hotu.

Moris tuir Espiritu Santu, laos tuir ita ema nia hakarak

¹⁶ Buat nebee hau atu hatete ba imi mak nee: Imi tenki moris tuir Espiritu Santu nia hakarak. Se imi moris nunee, entaun imi sei la halo buat aat tuir imi nia hakarak rasik. ¹⁷ Tanba ita ema nia hakarak la haan malu ho Espiritu nia hakarak. I Espiritu nia hakarak la haan malu ho ita ema nia hakarak. Buat rua nee kontra malu. Tanba nee mak buat nebee imi hakarak halo, imi la bele halo.+ 5:17 Roma 7:15-23¹⁸ Maibee se imi moris tuir Espiritu Santu nia hakarak, mak imi la moris tan iha lei relijiaun nia okos.

¹⁹ Imi hatene mo-moos ona, ema nebee halo aat tuir sira nia hakarak, sira nia hahalok oinsaa. Por ezemplu, halo sala seksual ho sala foer oi-oin too la hatene moe, ²⁰ adora lulik, kaer ai kulit aat, odi malu, istori malu, kaan ema nia sasaan, nervozu aat, buka diak deit ba nia aan rasik, forma grupu keta-ketak hodi la simu malu, ²¹ laran moras ema, lanu-teen, festa too halo arbiru tuun-sae, i buat aat selu-seluk tan. Uluk hau foo hatene tiha ona ba imi, agora hau foo hanoin dala ida tan: ema sira nebee moris hanesan nee, sira la bele tama Nai Maromak nia reinu.

²² Maibee se ita moris tuir Espiritu Santu nia hakarak mak Nia halo ita sai ema nebee hatene hadomi, laran haksolok, paz, pasiensia, laran diak, tulun ema, halo tuir buat nebee ita promete, ²³ laran maus, i domina aan. La iha lei ida mak bandu hahalok sira nee. ²⁴ See mak sai ona Kristu Jesus nia ema, nia la moris tan tuir nia hakarak nebee aat. Tanba hakarak aat ho hanoin aat hotu-hotu, nia prega tiha ona iha krus. ²⁵ Espiritu Santu foo ona moris foun mai ita, nunee ita tenki moris tuir Nia hakarak. ²⁶ Ita la bele foti aan, la bele sadik malu, i la bele laran moras malu.

Tulun malu

¹ Maun-alin sira, se ema sarani ida monu ona ba sala, entaun imi nebee mak moris tuir Espiritu Santu nia hakarak, tenki baa koalia di-diak ho nia hodi lori nia fila fali ba dalan loos. Maibee kuidadu imi nia aan, para la bele monu tuir nia. ² Se imi ruma hetan susar, imi tenki ajuda malu, i nunee imi halo tuir Kristu nia lei. ³ Se ema ruma foti aan dehan, nia diak liu ema seluk, afinal lae, nia bosok nia aan. ⁴ Neebee ema ida-idak tenki haree ba nia hahalok rasik. Se diak karik, kontenti ba. Maibee la bele kompara ho buat nebee ema seluk halo. ⁵ Tanba ema ida-idak tenki responsabiliza ba nia aan rasik.

⁶ See mak hanorin Maromak nia liafuan ba imi, keta haluha suporta nia ho buat nebee imi iha.

⁷ Keta bosok imi nia aan dehan Maromak la hatene buat nebee mak imi halo. Tanba buat nebee ema kuda agora, ida nee mak aban-bainrua nia sei kuu. ⁸ Nunee mos, buat nebee nia halo agora, aban-bainrua nia sei simu nia rezultadu. See mak halo aat tuir nia hakarak rasik, nia sei rahun. Maibee see mak moris tuir Maromak nia Espiritu nia hakarak, nia sei simu moris tinan ba tinan nafatin. ⁹ Nee duni la bele baruk halo buat nebee diak. Tanba too iha nia loron, ita sei simu rezultadu diak, naran katak ita halo diak nafatin. ¹⁰ Nunee, bainhira ita hetan oportunidade atu ajuda ema seluk, halo deit ba. Saa tan ita nia maluk sira nebee fiar ba Kristu.

Paulo taka nia surat

¹¹ Haree ba! Liafuan sira nee, hau rasik mak hakerek, ho letra bo-boot.

¹² Ema sira nebee hakarak obriga imi tuir sunat, sira mos fiar ba Jesus Kristu. Maibee sira buka oin para ema Judeu sira seluk bele simu sira. Sira tauk, se sira hanorin dehan, Nai Maromak mos simu ema nebee la tuir lei sunat, entaun ema Judeu bele halo terus sira. ¹³ Maski sira sunat ona mos, sira rasik la tuir lei relijiaun tomak. Mas sira hakarak atu imi sunat, para sira bele gaba aan dehan, imi halo tuir ona lei nee.

¹⁴ Maibee ba hau, hau lakohi gaba buat ida, hau so gaba deit kona ba Nai Jesus Kristu nia mate iha krus. Tanba Nia mate ona iha krus, maka buat mundu nian la iha tan folin mai hau. I tuir ema mundu nia hanoin, hau mos hanesan mate tiha ona. ¹⁵ Sunat ka la sunat, nee la importante. Maibee importante mak Maromak halo foun ona ita nia moris. ¹⁶ Ema hotu-hotu nebee tuir hau nia hanorin nee, sira sai ona Nai Maromak nia povu lo-loos. Maromak mos sei hatudu Nia laran diak ba sira i foo paz ho hakmatek ba sira.

¹⁷ Hau lakohi para ema halo tan problema ho hau. Tanba fitar sira iha hau nia isin nee hatudu katak hau serbi Jesus.

¹⁸ Maun-alin sira, hau harohan atu ita nia Nai Jesus Kristu hatudu Nia laran diak ba imi hotu. Amen.