Éfezu

Paulo nia surat

ba sarani sira iha

Éfezu

Paulo hahuu nia surat

¹ Surat nee hosi hau, Paulo. Maromak rasik mak foti hau sai Nai Kristu Jesus nia apostolu. Hau hakerek surat nee ba imi, Maromak nia povu iha sidade Éfezu. Imi laran ida ho Kristu Jesus i fiar metin nafatin ba Nia.+ 1:1 Apostolu sira nia Istoria (Atos, Kisah) 18:19-21; 19:1

² Hau harohan ba ita nia Aman Maromak ho Nai Jesus Kristu, para hatudu Sira nia laran diak ba imi, i foo paz ho hakmatek ba imi.

Nai Maromak hatudu Nia laran diak liu hosi Jesus Kristu

³ Mai ita hahii Nai Maromak! Nia mak ita nia Nai Jesus Kristu nia Aman. Nia foo ona bensaun bar-barak hosi lalehan mai ita, tanba ita laran ida ona ho Kristu.

⁴ Molok Nai Maromak halo mundu, Nia hili tiha ona ita sai Kristu nia ema. Nia hakarak atu ita moris ho laran moos iha Nia oin, i livre hosi sala. Maromak hadomi ita. ⁵ Nee mak Nia desidi ona hori uluk kedas atu foti ita sai Nia oan. I Jesus Kristu mak halo Nia desizaun nee sai realidade. Nee hotu tuir Maromak nia hakarak rasik, i halo Nia laran haksolok. ⁶ Mai ita hahii Nia! Tanba Nia hatudu ona Nia laran diak la-halimar mai ita, liu hosi Nia Oan doben.

⁷ Kristu nia raan fakar too mate tanba ita. Liu hosi Nia Oan nia mate, Maromak hamoos tiha ona ita nia sala. Nunee ita livre ona. Ho ida nee Maromak hatudu Nia laran osan mean mai ita.+ 1:7 Kolose 1:14⁸ Tanba Nia hadomi teb-tebes ita, Nia mos loke ita nia neon para ita bele kompriende di-diak Nia hakarak. ⁹ Uluk Nai Maromak seidauk foo hatene Nia hakarak hotu ba ema. Maibee agora, Nia hatudu ona Nia planu mai ita. Nia desidi ona hori uluk atu Jesus Kristu halao planu nee. ¹⁰ Nia planu mak nee: bainhira too ona nia tempu, Maromak sei halo buat hotu-hotu iha lalehan ho iha rai hamutuk ida deit, i Kristu mak sei ukun hotu-hotu.

¹¹ Maromak halao buat hotu-hotu tuir Nia hakarak. Hori uluk kedas Nia hili ona ita sai Nia ema hodi sai neon ida laran ida ho Kristu. ¹² Nia halo nunee atu ami ema Judeu nebee fiar uluk ba Kristu, bele foti aas Nai Maromak nia naran. Nia boot teb-tebes!

¹³ Imi nebee laos ema Judeu mos rona ona Kristu nia Liafuan Diak, hodi fiar ba Nia. Liafuan nee loos, i lori salvasaun ba imi.

Bainhira imi fiar ba Kristu, Maromak mos foo Nia Espiritu Santu ba imi, tuir Nia promesa uluk. Espiritu Santu nee hanesan sinal ida katak, imi Kristu nia ema. ¹⁴ Tanba Maromak foo ona Nia Espiritu Santu ba ita, mak ita laran metin katak, aban-bainrua Nia sei foo tan buat hotu-hotu nebee Nia promete ona, i sei hasai Nia povu hosi sira nia sala hotu. Foti aas Nai Maromak nia naran. Nia boot teb-tebes.

Paulo halo orasaun ba sarani sira iha Éfezu

¹⁵ Maun-alin sira, hau rona dehan, imi fiar metin ba Nai Jesus i hadomi Maromak nia povu hotu. Dezde hau rona nunee, ¹⁶ hau sempre foo agradese ba Nai Maromak tanba imi, i sempre temi imi nia naran bainhira hau halo orasaun ¹⁷ ba Maromak. Nia mak ita nia Nai Jesus Kristu nia Maromak. Nia mak ita nia Aman, i Nia boot teb-tebes. Hau husu atu Nia haraik Nia Espiritu ba imi, para loke imi nia neon i hatudu Maromak ba imi para imi bele konhese Nia diak liu tan. ¹⁸ Hau husu ba Maromak atu foo naroman ba imi para imi bele kompriende buat hotu-hotu nebee Maromak promete ona atu foo. Imi hein ho laran metin atu simu buat sira nee tanba Nia bolu ona imi sai Nia ema. Hau mos harohan atu imi kompriende katak, bensaun nebee Maromak promete ona atu foo ba Nia povu nee boot teb-tebes.

¹⁹ Hau harohan atu imi bele hatene Maromak nia kbiit. Nia kbiit nee makaas teb-tebes, boot liu hotu-hotu. Hodi kbiit nee mak Nia tulun ita nebee fiar ba Nia. Hodi kbiit ida nee mos ²⁰ Nia halo Kristu moris fali hosi mate, i foti Nia tuur iha Nai Maromak nia sorin loos iha lalehan.+ 1:20 Salmus (Mazmur) 110:1²¹ Kristu boot liu buat hotu-hotu iha lalehan ho rai. Nia boot liu nai ulun sira, autoridade sira, ho espiritu bo-boot sira hotu. Nia naran aas liu see-see deit mak kaer ukun, laos deit sira nebee ukun agora, maibee mos sira nebee sei ukun aban-bainrua. ²² Nai Maromak halo buat hotu-hotu hakruuk ba Kristu, i foti Kristu sai Ulun hodi ukun buat hotu-hotu, atu nunee Nia bele tulun ema sira nebee fiar ba Nia.+ 1:22 Salmus (Mazmur) 8:6²³ Kristu mak Ulun, i ita sarani sira hanesan Nia isin lolon. Ita simu ita nia moris tomak hosi Kristu, nunee mos Kristu foo moris ba buat hotu-hotu iha lalehan ho rai.+ 1:23 Kolose 1:18

Nai Maromak salva ita tanba Nia laran diak

¹ Uluk, kona ba moris espiritual, imi mate tiha ona, tanba imi kontra Nai Maromak nia lei i halo sala oi-oin. ² Iha tempu nebaa imi moris tuir mundu nia hakarak, i tuir diabu nia boot nia hakarak. Diabu nia boot mak ukun espiritu aat sira, i nia mak agora servisu hela iha ema sira nebee lakohi tuir Nai Maromak. ³ Uluk ita hotu moris nunee. Ita halo buat aat saida deit mak ita kaan atu halo, i tuir deit ita nia hakarak ho hanoin nebee aat. Tanba nee Maromak atu kastigu ona ita, hanesan mos Nia atu kastigu ema aat sira seluk.

⁴ Maibee Maromak hanoin teb-tebes ita i hadomi loos ita. ⁵ Maski ita hanesan mate tiha ona tanba ita nia sala, maibee Nia halo moris fali ita hamutuk ho Kristu. Tanba deit Maromak nia laran diak mak Nia salva ita.+ 2:5 Kolose 2:13⁶ Maromak halo moris fali ita hamutuk ho Jesus Kristu Jesus i foti ona ita tuur hamutuk ho Nia iha lalehan. ⁷ Maromak halo nunee para iha tempu oin mai, ema bele haree Nia domin ida nebee boot liu hotu-hotu, i bele hatene Nia laran diak nebee Nia hatudu mai ita liu hosi Kristu Jesus. ⁸ Bainhira imi fiar ba Kristu, Nai Maromak salva imi. Nia halo nunee, tanba Nia laran diak, laos tanba imi nia diak. Salvasaun nee, Nia foo saugati deit, ⁹ laos tanba imi nia hahalok diak. Entaun imi ida la bele gaba aan.+ 2:9 Tito 3:5¹⁰ Ita Nai Maromak nia liman fatin. I Kristu Jesus foo moris foun mai ita para ita bele halao buat nebee diak iha ita nia moris loro-loron. Buat diak sira nee, Maromak prepara tiha ona ba ita hori uluk kedas.

Kristu halo ita sai ida deit

¹¹ Imi nebee laos ema Judeu, imi hatene, uluk ema Judeu sira la konsidera imi tanba imi la sunat tuir sira nia lei relijiaun.+ 2:11 Ema Judeu sira halo serimonia sunat ba labarik mane hotu-hotu bainhira sira halo loron walu. Nee sinal ida hodi hatudu katak labarik nee Maromak nian, i tama ona ba Maromak nia povu. Afinal sunat nee, ema mak halo iha isin lolon deit; nee la muda ema nia laran. ¹² Iha tempu nebaa, imi dook hosi Kristu. Imi hanesan ema lao rai, la iha direitu atu halo parte iha Nai Maromak nia povu Israel, i la tama iha promesa nebee Maromak halo ba sira. Imi hela iha mundu nee, la iha relasaun ida ho Maromak, i esperansa ba moris rohan-laek mos la iha. ¹³ Maski iha tempu nebaa imi dook hosi Maromak, maibee agora imi laran ida ho Kristu Jesus. Nunee Maromak halo ona imi besik malu ho Nia, tanba Kristu Jesus nia raan fakar too mate ba imi.

¹⁴ Uluk ami ema Judeu ho imi nebee laos Judeu odi malu; nee hanesan moru ida haketak ita. Maibee agora Kristu rasik halo ita dame malu ona. Liu hosi Nia mate, Nia halo rahun tiha moru nee hodi halo ita hotu sai povu ida. ¹⁵ Uluk, lei relijiaun Judeu ho nia regra bara-barak haketak ema Judeu hosi ema seluk. Maibee ho Kristu nia mate, Nia halo sistema lei nee la vale ona, atu nunee ema Judeu ho ema nebee laos Judeu hamutuk laran ida ho Nia. Ho nunee Kristu halo povu rua nee sai povu ida nebee moris iha dame nia laran.+ 2:15 Kolose 2:14¹⁶ Entaun Kristu mate iha krus halo povu rua nee sai ida deit, i halo ita mos dame malu ho Nai Maromak, tanba Kristu harahun tiha ona buat hotu-hotu nebee uluk halo ita odi malu.+ 2:16 Kolose 1:20¹⁷ Kristu mai iha mundu foo sai kona ba dame. Nia foo sai nunee ba imi nebee uluk dook hosi Maromak, ho mos ba ami ema Judeu nebee besik Nia.+ 2:17 Isaias (Yesaya) 57:19¹⁸ Kristu loke ona dalan ba ita hotu too ba iha Nai Maromak nia futar oin. Atu ita ema Judeu ka ema nebee laos Judeu, ita hotu bele hakbesik aan ba Maromak tanba Nia Espiritu Santu nia tulun.

Kristu nia povu hanesan uma santu ida ba Maromak

¹⁹ Entaun, maski uluk imi hanesan ema lao rai nebee la halo parte iha Nai Maromak nia povu, maibee agora imi sai ona ema rai nain hamutuk ho Nia povu sira seluk. I imi mos sai ona Maromak nia familia uma laran. ²⁰ Nee hanesan Nai Maromak harii uma ida. Kristu Jesus hanesan fatuk prinsipal liu iha uma nee. Depois Nia apostolu sira ho profeta sira nebee tatoli Nia liafuan, mak hanesan fatuk nebee Maromak hada uluk. Depois Nia hada mos imi hamutuk iha fatuk sira nee nia leten. ²¹ Tanba Kristu sai uma nee nia huun, mak uma nee hamriik metin, i sae ba beibeik, too sai uma santu ida para ita nia Nai hodi hela. ²² Entaun, tanba imi laran ida ona ho Kristu, Maromak hada mos imi nebee laos Judeu hamutuk ho Nia ema sira seluk para ita hotu sai Maromak nia Espiritu nia hela fatin.

Paulo lori Nai Jesus nia Liafuan Diak ba ema nebee laos Judeu

¹ Hau, Paulo, agora dadauk dadur hela iha komarka tanba hau halao servisu nebee Kristu Jesus foo mai hau. Servisu nee mak foo sai Nia Liafuan Diak ba imi nebee laos ema Judeu. ² Imi rona ona katak, Nai Maromak foo fiar mai hau halo servisu nee ba imi tanba Nia laran diak mai hau. ³ Nia foo sai ona Nia planu segredu mai hau, hanesan hau hakerek tiha ona ituan iha leten. ⁴ Bainhira imi lee ona ida nee, imi bele kompriende Nai Maromak nia planu kona ba Jesus Kristu, tuir buat nebee Nia foo sai ona mai hau. ⁵ Uluk segredu nee seidauk foo sai ba ema ida. Maibee agora Maromak foo sai ona liu hosi Nia Espiritu ba Jesus nia apostolu sira ho Maromak nia profeta sira nebee tatoli Nia liafuan. ⁶ Segredu nee mak nee: se ema nebee laos Judeu fiar ba Maromak nia Liafuan Diak, entaun sira sei simu bensaun nebee Maromak foo ba Nia oan sira, hanesan mos ema Judeu. Sira ho ema Judeu hamutuk sai povu ida. Nee hanesan sira halo parte iha isin lolon ida deit. I sira simu mos buat nebee Maromak promete ona ba Nia povu tanba sira laran ida ho Kristu Jesus.

⁷ Nai Maromak hatudu Nia laran diak mai hau hodi hili hau foo sai Nia Liafuan Diak. I Nia foo Nia kbiit mai hau para halao servisu nee. ⁸ Hosi Maromak nia ema hotu-hotu, hau mak kiik liu. Maski nunee, Maromak foo fiar mai hau para foo hatene ba ema nebee laos Judeu, kona ba bensaun boot nebee Jesus Kristu foo mai ita. Nia bensaun nee, ita sukat la too. ⁹ Desde Nai Maromak halo mundu, Maromak nia planu nee segredu hela. Maibee agora Nia haruka hau esplika ba ema hotu-hotu kona ba oinsaa mak Nia atu halao Nia planu. ¹⁰ Bainhira Maromak nia povu hamutuk sai ida deit, espiritu bo-boot sira nebee kaer ukun mos sei haree, i sei hatene katak, Maromak nia matenek klean teb-tebes. ¹¹ Nai Maromak sei halo buat sira nee hotu tuir planu nebee Nia desidi tiha ona molok Nia halo mundu. I Nia foo planu nee ba ita nia Nai Jesus Kristu mak halao. ¹² Ita nebee fiar ona ba Kristu Jesus, i laran ida ho Nia, la bele tauk atu hakbesik aan ba iha Maromak nia futar oin, tanba odamatan sempre nakloke ba ita.

¹³ Tanba nee hau husu ba imi, maski hau hetan terus tanba hau serbi imi nebee laos Judeu, maibee keta laran susar. Tanba hau nia terus nee lori diak ba imi.

Paulo halo orasaun ba sarani sira iha Éfezu

¹⁴ Bainhira hau hanoin Maromak nia planu furak nee, hau hakneak hodi halo orasaun ba Aman Maromak. ¹⁵ Nia mak Aman ba familia hotu-hotu iha lalehan ho rai. ¹⁶ Maromak nia kbiit boot teb-tebes, i Nia diak la-halimar. Nunee Hau harohan atu Nia Espiritu foo kbiit ba imi hodi hametin imi nia laran. ¹⁷ Hau harohan atu Jesus Kristu hela metin iha imi nia laran, tanba imi fiar ba Nia.

Hau mos halo orasaun para domin sai huun ba imi nia moris. Ho nunee imi sai hanesan ai huun nebee hamriik metin tanba nia abut tama klean ba rai.+ 3:17 Kolose 2:7¹⁸ Se nunee, imi hamutuk ho Maromak nia povu sira hotu, bele kompriende Kristu nia domin, maski ita ema nunka bele kompriende. Tanba Nia domin nee boot teb-tebes, luan teb-tebes, klean teb-tebes, i aas teb-tebes. Hau halo orasaun atu imi bele hatene lo-loos Kristu nia domin nee, atu nunee imi bele hatudu Maromak nia diak ho Nia domin iha imi nia moris tomak.+ 3:18-19 Kolose 1:19; 2:9-10

²⁰ Nai Maromak nia kbiit makaas teb-tebes. Nia bele halo liu fali saida deit mak ita husu ba Nia. Nia kbiit nee, ita hanoin la hetan. Hodi Nia kbiit boot nee mak Nia servisu iha ita nia laran. ²¹ Mai ita foti aas Nia naran, tanba Nia kbiit nebee Nia hatudu ba Nia povu liu hosi Kristu Jesus. Mai ita hahii Nia, hosi jerasaun ba jerasaun, too tinan ba tinan. Amen.

Kristu nia povu sai ida deit

¹ Hau dadur hela tanba serbi ita nia Nai. Nunee hau husu boot atu imi bele moris tuir Maromak nia hakarak, tanba Nia bolu ona imi sai Nia ema. ² Imi tenki moris haraik aan, laran maus, pasiensia ba malu, i hadomi malu. Se ema ruma halo sala hasoru imi, lalika halo ba lia.+ 4:2 Kolose 3:12-13³ Espiritu Santu foo ona unidade ba imi. Nee duni hakaas aan atu moris iha dame nia laran, para imi nia unidade nee bele metin nafatin. ⁴ Ita hamutuk halo parte iha isin lolon ida deit. Ita hotu simu ona Maromak nia Espiritu, i Espiritu nee ida deit. Maromak bolu ona ita hotu sai Nia ema, entaun ita nia esperansa ba aban-bainrua mos hanesan. ⁵ Ita nia Nai ida deit; ita nia fiar ida deit, i ita hotu simu batizmu ida deit. ⁶ Nai Maromak ida deit; Nia mak ita hotu nia Aman. Nia ukun ita hotu-hotu, halao Nia servisu liu hosi ita hotu-hotu, i hela iha ita hotu nia laran.

Kristu foo knaar oi-oin atu Nia povu sai forti

⁷ Maski ita hotu ida deit, maibee Kristu fahe kbiit mai ita ida-idak para bele halao Nia servisu. ⁸ Nee tuir buat nebee hakerek tiha ona iha Livru Sagradu dehan,

“Bainhira Nia sae ba iha fatin aas,

Nia lori inimigu sira nebee Nia hadau iha funu laran,

i Nia fahe prezenti oi-oin ba ema.”+ 4:8 Salmus (Mazmur) 68:18

⁹ Liafuan “Nia sae” nee dehan saida? Nee dehan katak, uluk Nia tuun tiha ona mai iha mundu, iha fatin nebee kraik liu. ¹⁰ Ida nebee tuun mai nee, Nia duni mak sae fila fali ba lalehan, iha fatin nebee aas liu hodi ukun buat hotu-hotu iha lalehan ho rai. Nia nee mak Kristu.

¹¹ Kristu mak foo kbiit ba Nia ema, atu sira halao servisu nebee Nia fahe ba sira. Nia foti balu sai Nia apostolu. Balu Nia foti sai Nia profeta para tatoli Nia liafuan, balu sai ema nebee foo sai Nia Liafuan Diak ba ema nebee seidauk rona, i balu fali sai bibi atan ho mestri hodi tau matan ba Nia povu i hanorin sira. ¹² Nia foti sira nee para sira bele prepara Maromak nia povu atu ita hotu-hotu halao Nia servisu. Ho nunee ita hotu, nudar Kristu nia isin lolon, sai forti ba beibeik, ¹³ too ita hotu neon ida laran ida fiar ba Maromak nia Oan i konhese di-diak Nia. Too ikus ita laos hanesan labarik tan, maibee sai boot ona, too ita sai hanesan lo-loos Kristu. ¹⁴ Entaun, ita nia fiar la nakdoko ona hanesan laloran nebee anin huu ba-mai. Ema bosok-teen mai inventa tuun-sae hanorin buat nebee la loos mos, ita la tuir, ita la monu ba sira nia lia bosok. ¹⁵ Maibee ita so koalia buat nebee loos hodi hatudu domin ba malu. Se ita halo nunee, neineik-neineik ita sai hanesan Kristu iha ita nia moris tomak. Kristu nee mak ita nia Ulun. ¹⁶ I ita hanesan Nia isin lolon. Kuandu ema nia liman-ain sira nee ida-idak halo tuir nia knaar rasik, entaun isin lolon nee forti ba dadauk. Nunee mos Kristu nia povu. Kristu halo ita hotu sai ida. Se ita hadomi malu i ida-idak halao nia knaar, mak ita hamutuk boot ba dadauk i sai forti.+ 4:16 Kolose 2:19

Husik tiha moris uluk nian hodi moris tuir Kristu

¹⁷ Rona di-diak saida mak hau atu hatete agora, tanba hau koalia hodi Nai Jesus nia naran. Imi la bele moris tan hanesan ema nebee la konhese Nai Maromak. Tanba sira nia hanoin arbiru deit. ¹⁸ Sira nia neon nakukun tiha ona. Sira moris dook hosi Maromak, tanba sira ulun toos, i lakohi hatene Maromak nia dalan. ¹⁹ Sira la iha ona moe. Nee mak sira nia moris hanesan animal. Sira foo sira nia aan ba hahalok aat, i sempre hakarak atu halo sala tan.

²⁰ Maibee bainhira imi aprende kona ba Kristu, imi nunka aprende atu moris aat hanesan nee! ²¹ Tanba hau hatene katak, ema nebee uluk hanorin imi kona ba Kristu, hanorin buat nebee mak loos. ²² Uluk imi hakarak halo buat aat oi-oin, i imi nia hakarak nee lohi imi, too estraga imi nia aan. Maibee ema nebee hanorin imi kona ba Kristu, sira haruka imi husik tiha imi nia moris uluk nee,+ 4:22 Kolose 3:9²³ i foo fatin ba Nai Maromak para Nia halo foun imi nia neon ho laran. ²⁴ Nia halo ona imi sai ema foun, para imi moris loos ho laran moos, hanesan Maromak.+ 4:24 Hahuu (Jénesis, Kejadian) 1:26; Kolose 3:10; Roma 12:1-2

²⁵ Nee duni, la bele bosok tan. Imi koalia ba malu, tenki koalia loos, tanba ita hotu halo parte iha isin lolon ida.+ 4:25 Zacarias 8:16²⁶ Se imi hirus, keta husik hirus nee lori imi ba sala, i la bele rai hirus too loro matan monu,+ 4:26 Salmus (Mazmur) 4:4²⁷ atu nunee imi la foo fatin ba diabu.

²⁸ Ema nebee naok-teen, la bele naok tan ona. Maibee nia tenki servisu makaas ho nia liman rasik hodi sustenta nia aan ho mos hodi foo tulun ba ema kiak sira.

²⁹ Bainhira imi koalia, la bele koalia liafuan aat. Maibee koalia deit liafuan diak nebee ema presiza rona, para hametin sira nia laran. Liafuan hanesan nee sei ajuda sira.

³⁰ La bele halo tristi Nai Maromak nia Espiritu Santu. Tanba Maromak foo Nia Espiritu nee ba imi hanesan marka ida hodi hatudu katak, imi nee Maromak nia ema. I Nia Espiritu mos halo imi laran metin katak, too loron ikus, Maromak sei salva imi.

³¹ La bele ona rai odi ba ema. La bele hirus. La bele hakilar ema. La bele istori malu. La bele hatete aat ema. I la bele halo buat aat saida deit. ³² Maibee imi tenki hadomi malu, i halo diak ba malu. Imi tenki foo perdaun ba malu, hanesan Nai Maromak mos foo ona perdaun ba imi liu hosi Kristu nia mate.+ 4:32 Kolose 3:13

Moris tuir Maromak nia ezemplu

¹ Imi Nai Maromak nia oan doben. Nee duni moris tuir Nia ezemplu. ² Hadomi malu, hanesan mos Kristu hadomi ita, too Nia foo Aan ba mate hodi troka ita. Ho Nia mate nee Nia sai hanesan sakrifisiu morin nebee halo haksolok Nai Maromak.+ 5:2 Ézodu (Keluaran) 29:18; Salmus (Mazmur) 40:6

³ Imi Nai Maromak nia ema. Nee duni, la bele halo sala seksual. Atu hanoin deit hahalok foer sira nee mos, la bele. La bele kaan ema nia sasaan. ⁴ La bele tolok, ka koalia nar-naran, ka konta liafuan aat, tanba buat sira nee la serve atu Maromak nia ema koalia. Maibee foo agradese ba Maromak. ⁵ Hanoin di-diak! Ema nebee halo sala seksual ka kaan sasaan, sira sei la halo parte iha Kristu ho Maromak nia reinu. Tanba sira adora buat sira nee hanesan fali sira nia maromak.

⁶ Karik ema ruma lohi imi dehan sala sira nee la buat ida, keta fiar. Tanba hahalok aat sira nee halo Maromak hirus teb-tebes hodi kastigu ema nebee la tuir Nia hakarak. ⁷ Nee duni, la bele liga ema nebee moris hanesan nee.

⁸ Uluk imi moris iha nakukun laran. Maibee agora, imi laran ida ho Nai Jesus i tama ona iha naroman. Nee mak imi tenki moris hanesan ema nebee moris iha naroman. ⁹ Ema nebee moris iha naroman, nia sei halo buat diak, moris loos, i koalia loos. ¹⁰ Hakaas aan buka hatene oinsaa mak imi bele halo haksolok Nai Maromak nia laran. ¹¹ La bele halo parte iha hahalok nakukun nian; hahalok aat nee la iha folin ida. Tanba buat nebee sira halo sub-subar nee, aat teb-tebes; ita atu koalia mos, ita moe. Maski nunee, imi tenki foo hanoin ba sira katak hahalok nee sala. ¹³ Ita bele foti ezemplu hosi ahi: se ita leno buat nebee iha nakukun laran, maka ema bele haree buat sira nee mo-moos, ¹⁴ tanba naroman halo buat hotu-hotu sai klaru. Iha kanta ida dehan,

“Imi nebee dukur, hadeer ona ba,

imi nebee mate, moris fali ona ba.

I Kristu sei foo naroman ba imi.”

Husik Espiritu Santu domina imi

¹⁵ Tanba nee, kuidadu di-diak imi nia moris. La bele moris hanesan ema beik, maibee tenki uza matenek. ¹⁶ Ohin loron ema barak halo buat aat. Nee duni, kuandu iha oportunidade saida deit para halo diak ba ema, halo ona ba.+ 5:16 Kolose 4:5¹⁷ Keta beik-teen, maibee hakaas aan atu kompriende saida mak Nai Jesus hakarak.

¹⁸ La bele tua lanu. Se lae, tua nee mak domina fali imi too imi halo buat aat oi-oin. Maibee husik Espiritu Santu mak domina imi. ¹⁹ Bainhira imi koalia ba malu, temi liafuan hosi hananu oi-oin, hanesan hosi livru Salmus, kanta nebee Espiritu Santu foo, ho hananu seluk nebee adora Maromak. Hananu hahii Nai Maromak ho laran tomak. ²⁰ Iha situasaun saida deit, sempre agradese ba Aman Maromak ba buat hotu-hotu hodi ita nia Nai Jesus nia naran.+ 5:20 Kolose 3:16-17

Ita tenki hakruuk ba malu

²¹ Imi hotu-hotu tenki hakruuk ba malu tanba imi respeita Kristu.

Feen ho laen

²² Imi feen sira, hakruuk ba imi nia laen, hanesan mos imi hakruuk ba Nai Jesus. ²³ Tanba laen nudar ulun ba nia feen, hanesan mos Kristu mak Ulun ba Nia povu. Nia povu hanesan Nia isin lolon, i Nia mak salva sira.+ 5:23 Kolose 3:18; 1 Pedro 3:1²⁴ Kristu nia povu hakruuk ba Nia. Nunee mos, feen sira tenki hakruuk ba sira nia laen iha buat hotu-hotu.

²⁵ Imi laen sira mos tenki hadomi imi nia feen, hanesan Kristu hadomi Nia povu, too Nia entrega Nia Aan ba mate iha sira nia fatin,+ 5:25 Kolose 3:19; 1 Pedro 3:7²⁶ para halo sira moris ho laran moos. Bainhira sira halo tuir Nia liafuan i simu batizmu, Kristu hanesan fasi sira nia laran ho bee halo moos. ²⁷ Kristu halo nunee para Nia povu sai hanesan feto-raan ida ke kapaas teb-tebes iha Nia oin, nebee la iha foer ka noda i la namkurut ida, maibee laran moos i livre hosi sala.

²⁸ Nunee mos, laen sira, imi tenki hadomi imi nia feen hanesan imi hadomi imi nia isin lolon rasik. See mak hadomi nia feen, nia hadomi nia aan. ²⁹ La iha ema ida odi nia aan, maibee nia foo haan i kuidadu di-diak, hanesan Kristu mos kuidadu Nia povu, ³⁰ tanba ita hanesan Nia isin lolon. ³¹ Iha Nai Maromak nia Livru Sagradu hakerek dehan, “Tanba nee, mane tenki husik nia inan-aman, para baa moris laran ida ho nia kaben, i sira nain rua sai ona ida.”+ 5:31 Hahuu (Jénesis, Kejadian) 2:24³² Liafuan nee klean teb-tebes, i tuir hau haree, hatudu mos ba Kristu ho Nia povu. ³³ Nee duni, laen ida-idak tenki hadomi nia feen hanesan nia hadomi nia aan rasik. I feen ida-idak mos tenki respeita nia laen.

Oan ho inan-aman

¹ Oan sira, nudar ema nebee tuir Nai Jesus, imi tenki rona imi nia inan-aman, tanba hahalok ida nee mak loos.+ 6:1 Kolose 3:20² Nai Maromak nia ukun fuan ida dehan, “O tenki respeita o nia inan-aman.” Maromak mos foo promesa dehan, “Se o halo nunee, o sei moris diak i hetan vida naruk.” Hosi ukun fuan sanulu, too ida nee mak Maromak foin foo promesa ba ema nebee halo tuir.+ 6:2-3 Ézodu (Keluaran) 20:12; Deutoronómiu (Ulangan) 5:16

⁴ Inan-aman sira, la bele hanehan imi nia oan sira halo sira hirus. Maibee tau matan di-diak ba sira, i hanorin sira desde kiik kedas para tuir Nai Maromak nia dalan. Se sira halo sala, hatudu dalan loos ba sira.+ 6:4 Kolose 3:21

Atan ho patraun

⁵ Atan sira, imi tenki halo tuir orden nebee imi nia patraun iha mundu nee foo ba imi. Imi tenki respeita sira, rona sira, i servisu ba sira ho laran, hanesan imi serbi ba Kristu rasik. ⁶ La bele servisu hodi buka oin deit. Maibee bainhira patraun la haree tu-tuir mos, imi tenki servisu ho laran, tanba ida nee mak Nai Maromak nia hakarak. ⁷ Halo imi nia servisu ho haksolok, hanesan imi serbi ba Nai Jesus, laos ba ema deit. ⁸ Keta haluha katak, atu atan ka laos atan, aban-bainrua Nai Maromak sei selu ema nebee halo buat diak.+ 6:8 Kolose 3:22-25

⁹ Patraun sira, imi mos tenki haree imi nia atan sira ho diak, i la bele ameasa sira. Tanba imi hatene katak, sira ho imi iha Patraun ida deit iha lalehan, i Patraun nee la fihir oin.+ 6:9 Deutoronómiu (Ulangan) 10:17; Kolose 3:25; 4:1; Tiago (Yakobus) 5:4

Uza ekipamentu funu tomak nebee Nai Maromak foo

¹⁰ Hau nia liafuan ikus mak nee: sai forti ba! Tanba imi laran ida ho ita nia Nai, i Nia kbiit makaas teb-tebes foo forsa mai ita. ¹¹ Imi tenki uza ekipamentu funu nian kompletu nebee Maromak foo ba imi, para imi bele hamriik metin hodi hasoru diabu nia manobra. ¹² Tanba ita funu, laos hasoru ema. Maibee ita funu hasoru diabu bo-boot nebee ita la haree ho matan, hasoru espiritu aat oi-oin nebee ukun iha nakukun laran. ¹³ Nee duni, imi tenki uza ekipamentu funu nian tomak nebee Maromak foo. Nunee bainhira loron aat nee too mai, imi bele tuba rai metin. I kuandu imi funu hotu ona, imi sei hamriik metin nafatin.

¹⁴ Entaun, hamriik metin ba. Kaer metin lia loos; nee hanesan imi kesi sintu iha imi nia kanotak.+ 6:14 Kuandu tropas Roma sira atu baa funu, sira kesi sintu para sira nia hena luan nee la bele atrapalha sira. Moris loos; nee hanesan imi hatais besi iha hirus matan para defende aan.+ 6:14 Isaias (Yesaya) 11:5; 59:17¹⁵ Imi tenki prontu foo sai Liafuan Diak kona ba oinsaa bele dame malu ho Nai Maromak; nee hanesan imi tau sapatu tropas nian.+ 6:15 Isaias (Yesaya) 52:7¹⁶ Kaer metin nafatin imi nia fiar ba Nai Jesus; nee hanesan imi kaer besi kabelak hodi defende imi nia aan. Se imi fiar nafatin, entaun Satanás hana rama ahi ba imi, la borus, i ahi nee mate kedas. ¹⁷ Laran metin ba, katak Nai Maromak salva tiha ona imi; nee hanesan imi taka kapaseti besi. Kaer metin Nai Maromak nia liafuan, hanesan surik ida nebee Espiritu Santu foo ba imi.+ 6:17 Isaias (Yesaya) 59:17

¹⁸ Halo orasaun loron-kalan ho Espiritu Santu nia tulun. Iha situasaun saida deit, husu Maromak nia tulun. Matan moris neon moris nafatin, husu Maromak nia tulun, i sempre halo orasaun ba Maromak nia povu hotu-hotu. ¹⁹ Keta haluha halo orasaun mos mai hau, para bainhira hau loke hau nia ibun, Nai Maromak foo liafuan mai hau, atu hau bele foo sai segredu Liafuan Diak nian ho brani.+ 6:19 Kolose 4:4²⁰ Nai Jesus foti hau sai Nia embaixador para foo sai Liafuan Diak nee. Tanba nee mak agora hau dadur hela iha kadeia. Nee duni harohan mai hau, atu hau bele foo sai Nia Liafuan ho brani, tanba ida nee mak hau nia obrigasaun duni.

Paulo taka nia surat

²¹ Hau haruka irmaun Tíkiku ba imi, para konta buat hotu-hotu kona ba hau, atu imi bele hatene kona ba hau nia situasaun ho hau nia servisu. Tíkiku nee ita nia irmaun doben, i nia badinas halao Nai Jesus nia servisu.+ 6:21 Apostolu sira nia Istoria (Atos, Kisah) 20:4; 2 Timóteo 4:12²² Hau haruka nia ba imi, atu nia bele konta kona ba ami nia moris iha nee, i bele hametin imi nia laran.+ 6:22 Kolose 4:7-8

²³ Maun-alin sira, hau harohan ba ita nia Aman Maromak ho Jesus Kristu ita nia Nai, para Sira foo paz ho hakmatek ba imi, i tulun imi atu hadomi malu i fiar nafatin ba Kristu. ²⁴ Hau mos harohan atu Maromak hatudu Nia laran diak ba ema hotu-hotu nebee hadomi ita nia Nai Jesus Kristu ho domin ida nebee la iha rohan.