João nia surat terseiru
1João hahuu nia surat
1 Surat nee hosi hau, nudar responsavel sarani sira nian.+ 1:1 Apostolu sira nia Istoria (Atos, Kisah) 19:29; Roma 16:23; 1 Korintu 1:14
2 Belun Gaiu mak hau hadomi teb-tebes, hau harohan ba Maromak atu buat hotu-hotu lao diak; hau husu para o nia isin forti nafatin hanesan mos o nia relasaun ho Maromak forti. 3 Hau nia laran haksolok teb-tebes, tanba sarani balu mai konta dehan, o kaer metin lia loos, i moris tuir nafatin buat nebee Nai Maromak hanorin. 4 Bainhira hau rona katak hau nia oan sira moris tuir lia loos, ida nee mak halo hau nia laran haksolok liu.
Gaiu ajuda ema nebee lori Jesus nia hanorin
5 Belun, o sempre ajuda maluk sira nebee mak lao haleu hodi haklaken Maromak nia liafuan, nee hatudu katak o serbi Nai Maromak ho diak. Maski o seidauk konhese sira, maibee o simu sira ho diak. 6 Sira balu mai konta ba sarani sira iha nee kona ba o nia domin ba sira. Agora hau husu ba o atu foo ajuda nafatin buat nebee mak sira presiza iha dalan, tanba ajuda nee halo haksolok Nai Maromak nia laran. 7 Sira nee lao haleu hodi Jesus Kristu nia naran. Maibee ema sira nebee mak la fiar, la foo suporta ba sira. 8 Entaun ita mak tenki suporta sira, atu nunee ita mos servisu hamutuk ho sira hodi foo sai lia loos.
Moris tuir ezemplu nebee diak
9 Hau haruka ona surat ba sarani sira iha nebaa, maibee Diótrefes hakarak ukun iha igreja, i lakohi rona hau. 10 Tanba nee bainhira hau too iha nebaa, hau sei konta sai Diótrefes nia hahalok aat nee, para sarani sira hotu hatene katak nia gosta koalia aat ami. I laos nee deit, maibee ita nia maluk sira baa iha nebaa, Diótrefes lakohi simu. Sarani sira seluk atu simu maluk sira nee, maibee Diótrefes bandu i hasai sarani sira nee hosi igreja.
11 Belun, la bele halo tuir ema nia hahalok aat, maibee halo tuir nafatin ezemplu nebee diak. See mak halo buat diak, nia Nai Maromak nia ema. Maibee see mak halo buat aat, nia seidauk konhese Nai Maromak.
12 Kona ba Demétriu, nia ema ida ke diak. Nia moris loos. Ema hotu-hotu gaba nia, ami mos gaba, i o hatene katak ami la bosok.
João taka nia surat
13 Iha buat barak mak hau hakarak hatete ba o, maibee hau hanoin diak liu la bele liu hosi surat. 14 Hau hakarak atu la kleur tan ita hasoru malu, para ita bele koalia.
15 Hau harohan para Nai Maromak foo paz ho hakmatek ba o. Ita nia maluk sira iha nee foo kumprimentus. Hatoo mos hau nia kumprimentus ba hau nia maluk sarani sira ida-ida iha nebaa.