II Timóteo
Paulo nia surat segundu
ba Timóteo
1Paulo hahuu nia surat
1 Timóteo nebee diak.
Kumprimentus hosi hau, Paulo. Nai Maromak hili ona hau sai Nai Kristu Jesus nia apostolu, i haruka hau baa foo sai kona ba moris rohan la iha. Nia promete atu foo moris nee ba ema nebee fiar ba Kristu Jesus.
2 Timóteo, o hanesan hau nia oan rasik, nebee hau hadomi. Hau harohan atu ita nia Aman Maromak ho Kristu Jesus ita nia Nai, hatudu Sira nia laran diak ba o, hadomi o, i foo paz ba o.+ 1:2 Apostolu sira nia Istoria (Atos, Kisah) 16:1
Paulo agradese ba Nai Maromak
3 Loron-kalan hau halo orasaun ba o, hodi foo agradese ba Nai Maromak. Hau serbi Nia ho laran moos, hanesan mos hau nia bei-ala sira. 4 Hau hanoin fali uluk, kuandu ita fahe malu, o nia matan been turu. Agora hau hakarak loos hasoru o, tanba bainhira hau haree fali o, hau sei haksolok teb-tebes.
5 Hau hanoin fila fali o nia fiar ho laran tomak ba Nai Jesus. Fiar nee hosi kedas o nia avoo feto Lóide ho o nia inan Eunice.+ 1:5 Apostolu sira nia Istoria (Atos, Kisah) 16:1 I hau laran metin katak agora o mos fiar hanesan sira.
Timóteo tenki uza kbiit nebee Maromak foo
6 Uluk, bainhira hau tau liman ba o nia ulun hodi halo orasaun, Maromak foo kbiit ba o hodi halo Nia servisu. Tanba o fiar teb-tebes ba Jesus, agora hau foo hanoin fali ba o para uza kbiit nee ho di-diak. 7 Tanba Nai Maromak nia Espiritu nebee Nia foo mai ita, la halo ita tauk-teen. Maibee Nia foo poder mai ita, halo ita hadomi ema, i ajuda ita atu domina aan. 8 Tanba nee, la bele moe konta kona ba ita nia Nai Jesus. I la bele moe kona ba hau, maski hau dadur hela iha kadeia tanba hau serbi Nai Jesus. Maibee o tenki prontu simu terus hanesan hau, para bele foo sai Novidade Diak. I Maromak sei foo forsa ba o atu aguenta iha terus nee.
9 Nai Maromak mak salva ona ita,
i bolu ona ita sai Nia ema para ita moris ho laran moos.
Nia halo hanesan nee,
laos tanba ita hatudu hahalok diak ruma.
Maibee, Nia salva ho bolu ita tuir Nia planu rasik,
tanba Nia hakarak hatudu Nia laran diak mai ita.
Molok Nai Maromak halo mundu nee,
Nia desidi ona atu haruka Kristu Jesus mai,
para hatudu Nia laran diak mai ita.
10 Agora, Kristu Jesus nebee salva ita, mai tiha ona,
i ita haree ona Nia laran diak mai ita.
Mate nia poder, Nia halo rahun tiha ona!
I Nia foo sai liu hosi Nia Novidade Diak katak Nia loke dalan ba ita
atu moris nafatin tinan ba tinan ho Nai Maromak.
11 Nee mak Novidade Diak. I Nai Maromak foti hau sai Jesus Kristu nia apostolu, para foo sai i hanorin Novidade Diak nee.+ 1:11 1 Timóteo 2:712 Tanba nee mak hau terus iha kadeia. Maibee hau la moe, tanba hau konhese Kristu i fiar ba Nia. I hau hatene lo-loos katak Nia sei kuidadu Nia Novidade Diak nebee Nia tau ona iha hau nia kabaas, too Nia fila fali mai hosi lalehan. 13 Kaer metin hanorin loos nebee o simu ona hosi hau. Fiar ba Jesus nafatin i hadomi ema seluk, tanba o laran ida ona ho Kristu Jesus. 14 Defende di-diak hanorin nebee loos. Lia loos nee hanesan osan mean nebee Nai Maromak foo ona ba o para o kuidadu. I Espiritu Santu, nebee hela iha ita nia laran, sei ajuda o.
Onesiforu ajuda Paulo dala barak
15 O hatene katak Fígelu ho Hermójenes ho sira seluk nebee hela iha provinsia Ázia+ 1:15 Provinsia Ázia nee agora mak Turkia loro-monu. fila kotuk husik hela hau. 16 Maibee Onesiforu lae. Nunee hau harohan ba Nai Maromak para hatudu Nia laran diak ba Onesiforu ho nia familia tomak. Tanba nia mai vizita hau beibeik iha kadeia, hodi hametin hau nia laran. Nia la moe maski hau ema dadur. 17 Uluk, bainhira nia foin too iha sidade Roma nee, nia buka hau tuun-sae too hetan. 18 O rasik hatene, uluk hau sei iha sidade Éfezu mos, nia ajuda hau barak iha nebaa.
Husu boot, bainhira Jesus Kristu fila mai atu foo justisa ba ita ema, Nia sei foo desizaun diak ida ba Onesiforu.
2Ita tenki tuir Kristu hanesan soldadu diak ida
1 Oan Timóteo mak hau hadomi, Kristu Jesus hatudu Nia laran diak hodi foo forsa mai ita. Nunee, sai forti ba! 2 Uluk hau hanorin iha ema barak nia oin, o mos iha. Buat nebee o rona hosi hau nee, o tenki foo tutan ba ema nebee o fiar, para sira mos bele hanorin fali ba ema seluk.
3 Nudar Kristu Jesus nia soldadu diak ida, o tenki aguenta iha terus laran, hanesan mos ami. 4 Soldadu nebee halo dadauk funu, nia la hanoin tan atu halo servisu seluk. Tanba nia hakarak halo kontente nia komandante.
5 Nunee mos, bainhira tuir jogu ida, tenki tuir regulamentu jogu nee nian. Se lae, la manaan premiu.
6 Haree mos ba toos nain. Nia servisu mate aan, nunee nia mak tenki hetan uluk rezultadu toos nian. 7 Hanoin di-diak ezemplu hirak nee. I Nai Maromak sei halo o kompriende buat sira nee hotu.
8 Hanoin beibeik kona ba Jesus Kristu, liurai David nia Jerasaun. Nia mate, maibee Nai Maromak halo moris fali ona. Ida nee mak Novidade Diak nebee hau hanorin. 9 Tanba hau foo sai Novidade Diak nee mak hau hetan terus, too ema kesi tan hau ho korenti hanesan fali ema nebee halo krimi. Maibee Nai Maromak nia liafuan, ema ida la bele kesi. 10 Tanba nee hau prontu simu terus hotu-hotu, para ema sira nebee Maromak hili ona bele fiar ba Kristu Jesus i hetan salvasaun. I Nai Maromak sei foti aas sira too tinan ba tinan. 11 Liafuan tuir mai loos duni; nee mak ita bele simu ho laran tomak:
“Se ita mate hamutuk ho Kristu,
ita mos sei moris hamutuk ho Nia.
12 Se ita aguenta iha terus laran,
ita mos sei kaer ukun hamutuk ho Nia.
Se ita nega Nia,
Nia mos sei nega ita.+ 2:12 Mateus 10:33; Lucas 12:9
13 Maski ita la foo laran ba Kristu,
maibee Nia foo laran nafatin mai ita.
Tanba Nia mak hanesan nee duni.”
Atan diak nebee Maromak simu
14 Foo hanoin beibeik ba sarani sira kona ba buat sira nee. Hatete ba sira hodi Nai Maromak nia naran, la bele istori malu kona ba liafuan. Hahalok hanesan nee la iha folin, i so halo susar deit ema nebee rona. 15 Hakaas aan servisu di-diak, para Nai Maromak bele rekonhese o nudar Nia atan diak ida. I hanorin lo-loos Nai Maromak nia liafuan nebee loos. Nunee o sei la moe, tanba o servisu ho diak. 16 Hadook aan hosi koalia la huun la dikin nebee kontra Nai Maromak nia liafuan. Tan ema nebee koalia hanesan nee sei dook ba beibeik hosi Maromak. 17 Sira nia liafuan hanesan kanek dodok nebee aumenta ba beibeik. Himeneu ho Filetu sira nia koalia hanesan nee lo-loos! 18 Sira nain rua hanorin dehan, ema sira nebee mate, moris fali tiha ona. Nunee sira sees tiha hosi lia loos, i estraga ema balu nia fiar.
19 Maibee Nai Maromak nia povu fiar metin nafatin, hanesan uma nia riin nebee la nakdoko. Iha riin nee hakerek dehan, “Maromak hatene Nia ema sira.” Hakerek mos katak, “See mak dehan nia tuir Nai Maromak, tenki fila kotuk ba buat aat.”+ 2:19 Númerus (Bilangan) 16:5
20 Iha ema riku sira nia uma, iha bikan oi-oin. Balu halo ho osan mean ka osan mutin. Iha mos balu halo hosi ai ka hosi rai. Bikan diak nian, uma nain uza ba festa. Maibee bikan nebee laduun diak, sira uza hodi tau foer. 21 Nunee mos ho ema. See mak hadook aan hosi buat nebee aat, nia hanesan bikan diak sira nee, i Maromak sei uza nia ba servisu nebee diak. Tanba nia laran moos ona, serve para nia Nain bele uza, i prontu halo buat diak saida deit.
22 Timóteo, halai sees hosi buat aat nebee foin-sae sira balu gosta halo. Hakaas aan atu moris loos. Fiar nafatin ba Maromak, hadomi sarani sira i haree malu di-diak. Ema sira nebee adora Maromak ho laran moos, sempre halo hanesan nee, i o mos tenki moris hanesan sira. 23 Bainhira ema diskuti malu kona ba buat nebee la iha folin, o lalika tama iha laran. Tan so halo ema istori malu deit. 24 Nai Maromak nia atan la bele istori malu ho ema, maibee tenki laran diak ba ema hotu, hatene hanorin ema, i pasiensia ba ema nebee halo problema. 25 Ema nebee kontra nia, nia tenki koriji ho laran maus, tanba dala ruma Maromak bele halo sira husik sira nia sala, i bele ajuda sira simu hanorin nebee loos. 26 Nunee sira nia hanoin bele sai loos fali, i sira bele halai sai hosi Satanás nia liman, nebee kaer tiha ona sira hodi obriga sira halo tuir nia hakarak.
3Ema nia hahalok aat iha loron ikus
1 Timóteo, hanoin di-diak. Iha loron ikus, susar barak sei mosu. 2 Ema sei hadomi deit sira nia aan rasik, i matan fuan naklosu deit ba osan. Sira foti aan, la konsidera ema seluk, gosta hatete aat ema, la rona ba sira nia inan-aman, la hatene foo obrigadu, i la respeita Nai Maromak. 3 Sira la hatene hadomi ema, i lakohi foo perdaun ba ema. Sira konta aat ema nia vida, la domina aan, gosta halo violensia, i nunka gosta buat nebee diak. 4 Sira faan sira nia kolega ba ema aat, la hanoin naruk, i foti aan dehan boot. Sira la hadomi Nai Maromak, maibee hanoin mak goza deit. 5 Iha ema nia oin sira hatudu jeitu hanesan ema nebee fiar ba Maromak. Maibee bainhira Maromak hakarak foo poder ba sira para moris loos, sira lakohi. La bele liga sira.
6 Sira balu finji baa tama iha ema nia uma. Too iha uma laran, sira bosok feto balu nebee monu lalais ba lia falsu. Feto sira nee laran la hakmatek tanba sira halo sala barak ona, i sira sempre halo tuir sira nia hakarak aat oi-oin. 7 Sira gosta rona hanorin foun, maibee nunka hatene nebee mak loos i nebee mak sala. 8 Uluk Janes ho Jambres kontra Moisés.+ 3:8 Antigu testamentu la koalia kona ba Janes ho Jambres. Maibee iha matenek nain Biblia nian balu dehan, karik sira nain rua nee ema matenek hosi Ejiptu nebee kontra Moisés momentu nia lori povu Israel sai hosi Ejiptu. Lee istoria nee iha livru Ézodu (Keluaran) 7:11. Hanesan nee mos mestri sira nee kontra hanorin nebee loos. Sira nia hanoin sai aat tiha ona, i saida mak sira fiar nee la vale buat ida. 9 Maibee la kleur, ema sei la fiar tan mestri falsu sira nee. Tanba ema hotu sei hatene dehan, sira beik-teen. Hanesan mos uluk akontese ba Janes ho Jambres.
Kaer metin hanorin nebee loos
10 Timóteo, o akompanha ona hau nia moris tomak. O hatene hau nia hanorin, hau nia moris oinsaa, i hau nia objetivu saida. O haree ona hau nia fiar ba Jesus Kristu, hau nia pasiensia, hau nia hadomi ba ema seluk, i oinsaa hau aguenta ho pasiensia iha terus laran. 11 O mos hatene katak ema hanehan hau i halo terus hau. O hatene saida mak sira halo mai hau iha sidade Antiokia, Ikóniu ho Listra. Maibee Nai Jesus hasai ona hau hosi terus ho susar sira nee hotu.+ 3:11 Apostolu sira nia Istoria (Atos, Kisah) 13:14-52; 14:1-7, 8-2012 Loos duni, ema hotu-hotu nebee fiar ba Kristu Jesus i hakarak moris loos tuir Maromak nia hakarak, ema sei halo terus sira. 13 Maibee ema aat ho ema bosok-teen sira sei sai aat ba beibeik. Sira bosok halo ema barak monu, afinal sira mos ema bosok.
14 Maibee o tenki kaer metin buat nebee o aprende tiha ona. O laran metin ona katak buat sira nee loos, tanba o hatene see mak hanorin ba o.+ 3:14 2 Timóteo 1:5; 2:215 Komesa o sei kiik, o hatene ona Livru Sagradu. Liu hosi Maromak nia liafuan nee, ita hatene katak, Maromak salva ita bainhira ita fiar ba Kristu Jesus. 16 Liafuan hotu-hotu iha Livru Sagradu, Nai Maromak rasik mak foo ba ema hakerek. Liafuan sira nee serve para hanorin lia loos, hatudu ema nia sala, koriji ema, ho eduka ema para moris loos. 17 Nunee Nai Maromak prepara Nia ema atu halo buat hotu-hotu nebee diak.
4Timóteo tenki halao nia servisu ho diak too remata
1 Kristu Jesus sei fila fali mai hosi lalehan hodi ukun hanesan liurai. I Nia sei foo justisa ba ema sira nebee sei moris ho sira nebee mate ona. Nunee, iha Nai Maromak ho Kristu Jesus nia oin, hau haruka o 2 foo sai Nai Maromak nia liafuan; iha tempu diak ka la diak mos, o tenki prontu. Koriji ema nebee sala, i bandu sira para la bele halo tan. Hametin ema nia laran. Halo buat sira nee hotu ho pasiensia, liu hosi hanorin Nai Maromak nia liafuan.
3 Tanba too loron ida, ema lakoi rona ona hanorin nebee loos. Maibee sira sei tuir deit sira nia hakarak rasik, hodi rona mestri bara-barak nebee hanorin halo haksolok deit sira nia laran. 4 Sira sei taka tilun ba ema nebee hanorin loos. Maibee sira see tilun fali hodi rona ai knanoik nebee la iha folin.
5 Timóteo, o la bele nunee. Iha situasaun saida deit, o tenki domina aan. Aguenta ho pasiensia iha terus laran. Baa foo sai Novidade Diak ba ema sira nebee seidauk konhese Jesus Kristu. Halao servisu hotu-hotu nebee Nai Maromak tau ona iha o nia kabaas.
6 Kona ba hau nia aan, hau nia loron mate besik ona. Hau hanesan tua kopu ida nebee fakar ba altar leten hanesan oferta ida ba Maromak.+ 4:6 Kuandu ema Judeu sira halo sakrifisiu iha uma kreda boot, iha serimonia ida mak tenki fakar tua ba iha meza sakrifisiu nia leten. Paulo kompara nia moris hanesan tua nebee fakar hotu hodi foo ba Maromak.7 Hau hakaas aan iha jogu laran too hotu ho diak. Hau halai taru too ona nia rohan. Hau kaer metin hau nia fiar ba Jesus Kristu too hau nia iis kotu. 8 Agora hau hein premiu nebee Nai Jesus prepara ona ba ema nebee moris loos. Ita nia Nai nee mak juis loos. I too iha loron nebee Nia tesi lia, Nia sei fahe premiu nee mai hau. Laos mai hau deit, maibee Nia mos sei foo ba ema hotu-hotu nebee ho laran tomak hein hela Nia atu fila mai.
Paulo hatoo lia menon
9 Timóteo, hakaas aan mai lalais haree hau. 10 Tan Demas husik tiha ona hau hodi baa iha sidade Tesalónika, tanba hadomi liu buat mundu nian. Kresente baa tiha ona provinsia Galásia, i Tito mos baa tiha ona rai Dalmásia.+ 4:10 Kolose 4:14; Filemon 24; 2 Korintu 8:23; Galásia 2:3; Tito 1:411 So Lucas deit mak sei hamutuk ho hau. O mai, lori ho Marcos, para nia bele ajuda hau halao hau nia servisu.+ 4:11 Kolose 4:14; Filemon 24; Apostolu sira nia Istoria (Atos, Kisah) 12:12; 25; 13:13; 15:37-39; Kolose 4:1012 Hau haruka ona Tíkiku baa iha sidade Éfezu.+ 4:12 Apostolu sira nia Istoria (Atos, Kisah) 20:4; Éfezu 6:21-22; Kolose 4:7-813 Bainhira o mai, lori ho hau nia faru manas nebee hau rai hela iha Karpu nia uma iha sidade Tróade. Lori mos hau nia livru, liu-liu livru nebee hakerek iha animal nia kulit.+ 4:13 Apostolu sira nia Istoria (Atos, Kisah) 20:6
14 Alexandre, badaen riti ida, halo ona buat aat barak mai hau. Maromak sei kastigu nia tuir nia hahalok.+ 4:14 1 Timóteo 1:20; Salmus (Mazmur) 62:12; Roma 2:615 O tenki kuidadu ho ema nee, tanba nia kontra makaas ita nia hanorin.
16 Bainhira hau primeira vés hamriik iha juis nia oin hodi defende hau nia aan, la iha ema ida mak ajuda defende hau. Sira hotu husik hela hau. Husu boot, Maromak la bele foo sala ba sira. 17 Bele nunee mos, Nai Jesus hamriik iha hau nia sorin hodi foo forsa mai hau, para hau bele foo sai Novidade Diak hotu. Nunee sira nebee laos ema Judeu mos bele rona. I Maromak mos hasai hau hosi liaun nia ibun. 18 Nai Maromak sei hasai hau hosi buat aat hotu. I Nia sei lori hau ho diak tama ba lalehan. Iha nebaa, Nia mak ukun.
Mai ita hotu-hotu foti aas Nai Maromak nia naran, too tinan ba tinan. Amen.
Paulo taka nia surat
19 Hatoo kumprimentus ba Priscila+ 4:19 Lian Gregu iha nee hakerek dehan ‘Prisca’. Nia naran seluk ‘Priscila’. ho nia kaben Akila. Nunee mos ba Onesiforu nia uma kain.+ 4:19 Apostolu sira nia Istoria (Atos, Kisah) 18:2; 2 Timóteo 1:16-1720 Erastu hela nafatin iha sidade Korintu. Hau husik hela tiha Trófimu iha sidade Miletu, tanba nia moras.+ 4:20 Apostolu sira nia Istoria (Atos, Kisah) 19:22; Roma 16:23; Apostolu sira nia Istoria (Atos, Kisah) 20:4; 21:2921 Hakaas aan mai too iha nee molok tempu malirin. Eubulu, Pudente, Lino, Cláudia, ho sarani sira seluk haruka kumprimentus ba o.
22 Hau harohan atu Nai Jesus hamutuk ho o nafatin, i Maromak hatudu Nia laran diak ba imi.
Hau nia liafuan too iha nee deit.
Hosi hau,
Paulo