2 Tesalónika
Paulo nia surat segundu
ba sarani sira iha Tesalónika
1Paulo hahuu nia surat
1 Surat nee hosi hau, Paulo, ho hau nia kolega Silas+ 1:1 Lian Gregu orijinal dehan ‘Silvano’. Nee Silas nia naran seluk. Haree Apostolu sira nia Istoria ( Atus , Kisah ) 15:22. ho Timóteo.
Ami hatoo kumprimentus ba sarani sira iha sidade Tesalónika. Imi laran ida ho ita nia Aman Maromak ho Nai Jesus Kristu.+ 1:1 Apostolu sira nia Istoria (Atos, Kisah) 17:12 Ami husu para Sira hatudu Sira nia laran diak ba imi, i foo paz ba imi.
Jesus sei fila mai hodi tesi lia ba ema hotu
3 Maun-alin sira, ami sempre agradese ba Nai Maromak dehan, “Nai, obrigadu ba sarani sira iha Tesalónika!” Tenki nunee duni, tanba imi nia fiar ba Kristu aumenta ba beibeik, i imi mos hadomi malu liu tan. 4 Nee mak ami konta ba sarani sira iha nebee-nebee kona ba imi. Ami konta ho haksolok dehan, maski ema hanehan i halo terus imi, maibee imi pasiensia i fiar metin nafatin ba Nai Jesus.
5 Nee hotu hatudu katak, Nai Maromak sei tesi lia ho loos. Nunee, Maromak nudar Liurai Boot sei konsidera imi serve duni atu sai Nia reinu. Tanba imi serbi Liurai nee mak imi terus nunee. 6 La bele tauk, Maromak sempre tesi lia ho loos. Loron ida Nia sei halo terus fali ema nebee halo terus imi. 7 Nia sei foo kamaan ba imi nebee terus, ho mos ba ami.
Buat sira nee sei sai duni bainhira Nai Jesus mosu mai hosi lalehan ho Nia anju sira mesak forsa-forsa deit. 8 Sira sei tuun mai ho ahi lakan boot. I Jesus sei foo kastigu ba ema sira nebee lakohi hatene Nai Maromak i lakohi halo tuir Nai Jesus Kristu nia Novidade Diak. 9 Nia sei foo kastigu todan ba sira too tinan ba tinan hodi soe sira dook hosi Nai Jesus nia oin. Nunee sira la haree tan ona buat furak nebee Jesus halo ho Nia poder.+ 1:9 Isaias (Yesaya) 2:1010 Buat sira nee sei akontese bainhira Jesus fila mai. Nia povu sei foti aas Nia naran, i ema hotu-hotu nebee fiar ba Nia sei adora Nia. Imi mos sei halo parte, tanba imi simu ona Nai Maromak nia Novidade Diak, nebee uluk ami foo sai ona ba imi.
11 Nee mak ami harohan ba imi loron-kalan, atu Nai Maromak, nebee bolu imi sai Nia ema, bele konsidera imi serve duni atu tuir Nia. Imi nia fiar ba Jesus halo imi hakarak halo buat nebee diak. Ami husu atu Nai Maromak foo kbiit ba imi atu bele halo duni buat diak sira nee hotu. 12 Nunee, ema sei foti aas Nai Jesus nia naran tanba imi. I Nia mos sei foti aas imi nia naran. Buat sira nee hotu sei sai nunee, tanba ita nia Maromak ho ita nia Nai Jesus Kristu sira nia laran diak.
2Ema ida aat liu sei mai uluk, foin Nai Jesus fila mai hosi lalehan
1 Maun-alin sira, agora ami foo hatene ba imi kona ba Nai Jesus Kristu fila fali mai, i Nai Maromak sei halibur ita hamutuk ho Jesus.+ 2:1 1 Tesalónika 4:15-172 Bainhira ema bosok imi dehan Jesus Kristu mai tiha ona, lalika hakfodak ka laran susar lailais. Maski sira dehan Espiritu Santu mak foo sai ba sira ka sira rona tutan hosi ema, ka dehan sira simu surat hosi ami, la bele fiar. 3 Keta husik ema lohi imi. Tan ema aat ida sei mosu uluk, foin Nai Jesus mai. Ema nee sei dada ema bara-barak hamriik hodi kontra makaas Nai Maromak. Nia kontra Maromak, lulik sira ho buat hotu-hotu nebee ema adora. Too nia mos baa tuur iha Nai Maromak nia uma kreda boot, hodi foti nia aan boot liu hotu-hotu dehan, “Hau mak Maromak!” Too ikus nia sei tama infernu.+ 2:3-4 Daniel 11:36; Ezekiel (Yehezkiel) 28:2
5 Nusaa?! Imi haluha tiha ka? Uluk hau sei hela hamutuk ho imi, hau hatete tiha ona kona ba buat sira nee.
6 Imi hatene saida mak sei tahan hela ema aat nee, para too nia tempu mak foin nia hatudu aan. 7 Agora forsa nakukun nian servisu sub-subar hela, halo ema kontra Maromak nia lei, tanba sei iha ida nebee tahan netik. Maibee iha loron ida, ema ida nebee tahan forsa nakukun nee sei husik liman hodi foo livre ba nia. 8 Depois mak foin ema haree mo-moos ema aat nee nia servisu. Maibee kuandu Nai Jesus fila mai ho Nia poder tomak, ema aat nee nia poder lakon kedas. Jesus huu deit, ema nee rahun kedas.+ 2:8 Isaias (Yesaya) 11:4
9 Maibee molok Nai Jesus mai, Satanás sei foo poder ba ema aat nee hodi halo milagre ho sinal oi-oin nebee halo ema admira, too ema hanoin nia uza Nai Maromak nia poder.+ 2:9 Mateus 24:2410 Ema aat nee sei halo buat oi-oin deit hodi bosok ema barak. Sira nebee monu ba bosok nee mak ema nebee lao dadaun tuir dalan mate nian. Tuir lo-loos Nai Maromak atu salva sira, maibee sira lakohi simu lia loos ho laran tomak. 11 Nee mak Nai Maromak halo sira hanoin la loos hotu, hodi fiar lia bosok nee. 12 Nunee Nai Maromak foo kastigu todan ba sira hotu nebee la fiar lia loos i gosta halo mak buat aat.
Sarani sira tenki fiar metin nafatin
13 Maun-alin sira nebee Nai Jesus hadomi. Ami sempre agradese ba Nai Maromak, tanba hori uluk kedas Nia hili nanis ona imi atu simu salvasaun. Nia salva imi liu hosi Nia Espiritu nebee halo imi moris ho laran moos, i liu hosi imi nia fiar ba lia loos. 14 Nai Maromak bolu imi liu hosi Novidade Diak nebee ami hatoo ona ba imi, para imi bele tuur iha fatin aas hanesan mos ita nia Nai Jesus Kristu.
15 Maun-alin sira, hamriik metin ba, i kaer metin nafatin liafuan sira nebee ami hatutan ona ba imi ka hakerek ona liu hosi surat.
16 Nai Maromak hadomi teb-tebes ita. Tan Nia laran diak, Nia sempre foo ksolok ho esperansa boot mai ita iha susar laran. Nunee, ami husu ba Jesus Kristu ita nia Nai, ho ita nia Aman Maromak, para hametin imi nia laran hodi tulun imi atu sempre halo buat nebee diak i koalia mos diak.
3Paulo sira husu sarani Tesalónika halo orasaun ba sira
1 Maun-alin sira, halo orasaun mai ami, para Nai Jesus nia Novidade Diak bele namkari lailais too iha fatin-fatin, i ema iha nebee-nebee bele respeita Novidade Diak nee, hanesan mos uluk imi simu. 2 Harohan mos para ami bele sai hosi ema aat sira nia liman laran. Tanba ema barak la fiar Novidade Diak nee.
3 Maibee Maromak sempre kumpri buat nebee mak Nia hatete tiha ona. Nia sei foo forsa ba imi, i kuidadu imi hosi aat nain. 4 Ami laran metin katak Nai Jesus ajuda hela imi para halo tuir buat nebee ami hatoo ona ba imi, i imi mos sei halo tuir nafatin.
5 Ami harohan para Nai Jesus halo imi kompriende liu tan katak Nai Maromak hadomi imi, i ajuda imi aguenta ho pasiensia iha terus laran, hanesan mos Kristu.
Ema hotu tenki halo servisu
6 Maun-alin sira, hau foo orden ba imi hodi Nai Jesus Kristu nia naran, imi la bele liga maluk sarani nebee baruk-teen. Sira la halo tuir buat nebee ami hanorin ona ba imi kona ba servisu. 7 Imi hatene katak imi tenki tuir ami nia ezemplu. Bainhira ami sei hela hamutuk ho imi, ami laos baruk-teen. 8 Ami servisu makaas loron-kalan, para la bele foo todan ba imi. I bainhira ema ruma foo hahaan mai ami, ami sempre selu. 9 Tuir loos ami iha direitu atu husu imi nia ajuda. Maibee ami lakohi, tanba ami hakarak hatudu ezemplu diak para imi mos bele halo tuir. 10 Iha tempu nebaa, ami rai hela regra ida ba imi nunee, “See mak lakohi halo servisu, la bele haan.”
11 Maibee agora ami rona dehan, imi balu baruk-teen, la halo servisu, i so mete deit ema nia vida. 12 Ami husu makaas i foo orden hodi Nai Jesus Kristu nia naran dehan, sira nee tenki halo servisu hodi foo haan sira nia aan rasik.
13 Maun-alin sira, imi la bele baruk halo buat nebee loos.
14 Se iha ema ruma mak lakohi halo tuir buat nebee mak ami hakerek iha surat nee, la bele liga nia, para halo nia moe. 15 Mais la bele konsidera nia hanesan inimigu, maibee foo hanoin ba nia hanesan imi nia maun-alin rasik.
Paulo taka nia surat
16 Hau harohan atu Nai Jesus foo paz ba imi iha situasaun saida deit. Tan Nia mak paz nia huun. I hau husu atu Nai Jesus sempre hamutuk ho imi.
17 Liafuan tuir mai nee, hau, Paulo, mak hakerek ho hau nia liman rasik: Kumprimentus . Hau halo hanesan nee iha hau nia surat hotu-hotu, para ema bele hatene katak surat nee hosi hau duni.
18 Hau husu ita nia Nai Jesus Kristu hatudu Nia laran diak ba imi hotu.
Hau nia liafuan too iha nee deit.
Hosi hau,
Paulo