João nia surat segundu
1João hahuu nia surat
1 Surat nee hosi hau, nudar responsavel sarani sira nian.
Senhora nebee Maromak hili, hau hakerek ba senhora ho mos ba senhora nia oan sira. Hau hadomi teb-tebes imi. Laos hau deit maibee ema hotu-hotu nebee hatene lia loos mos hadomi imi.+ 1:1 Tuir matenek nain Biblia nian balu, liafuan ꞌsenhora ho nia oan siraꞌ nebee João temi nee, hanesan naran kódigu ida hodi hatudu ba sarani sira iha sidade ida.2 Hau hadomi imi tanba lia loos nee moris ona iha ita hotu nia laran, i lia loos nee sei metin nafatin iha ita too tinan ba tinan.
3 Hau harohan atu ita nia Aman Maromak ho Nia Oan Jesus Kristu hatudu Sira nia laran diak ba ita hotu, hadomi ita, i foo paz ho hakmatek ba ita, para ita kaer metin lia loos i hadomi malu.
Hadomi malu i kaer metin lia loos
4 Hau haksolok teb-tebes, tanba hau rona katak senhora nia oan sira balu moris tuir lia loos, tuir duni buat nebee mak Aman Maromak haruka ita halo. 5 Entaun senhora doben, hau husu para ita hotu hadomi malu. Ukun fuan nee laos buat foun ida, imi simu tiha ona hori uluk kedas.+ 1:5 João 13:34; 15:12; 176 Domin lo-loos mak nee: Ita moris tuir Nai Maromak nia ukun fuan. I ukun fuan nebee mak imi rona hori uluk kedas mak nee: Imi tenki moris iha domin nia laran.
7 Ohin loron bosok-teen barak lao lemo-lemo lori lia falsu dehan, Jesus Kristu moris iha mundu nee, nia la iha isin ho raan. See mak koalia nunee, nia bosok-teen, i nia Kristu nia inimigu. 8 Kuidadu di-diak, keta rona ema sira nee, maibee kaer metin lia loos, para aban-bainrua imi bele simu bensaun hotu nebee mak Maromak atu foo ba imi. Se lae, ami nia servisu ba imi mos saugati deit. 9 Ema nebee la kaer metin Kristu nia hanorin, maibee halai sees fali, ema nee la hamutuk ho Nai Maromak. Maibee see mak kaer nafatin Kristu nia hanorin, nia laran ida ho Aman Maromak ho mos Nia Oan Jesus Kristu. 10 Nunee se karik ema ruma mai atu hanorin imi maibee sees fali hosi buat nebee mak Kristu hanorin, lalika simu ema nee iha imi nia uma, lalika liga sira. 11 Tanba se ita simu ema nunee, ita mos lori todan ba nia hahalok aat.
João taka nia surat
12 Iha buat barak mak hau hakarak hatete ba imi, maibee hau hanoin diak liu la bele liu hosi surat. Hau hakarak baa vizita imi, i koalia rasik ho imi atu ita hotu-hotu bele haksolok liu tan.
13 Nai Maromak mos hili ona senhora nia feto maluk iha nee, nia oan sira foo kumprimentus ba ita boot.