1 Timóteo
Paulo nia surat primeiru
ba Timóteo
1Paulo hahuu nia surat
1 Timóteo nebee diak.
Kumprimentus hosi hau, Paulo, Jesus Kristu nia apostolu. Nai Maromak ho Kristu Jesus mak foti hau. I Kristu Jesus halo ita laran metin katak Nai Maromak salva ona ita.
2 Timóteo, o hanesan hau nia oan rasik, tanba hau hatudu dalan para o fiar ba Kristu Jesus. Hau harohan atu ita nia Aman Maromak ho Kristu Jesus ita nia Nai, hatudu Sira nia laran diak ba o, hadomi o, i foo paz ba o.+ 1:2 Apostolu sira nia Istoria (Atos, Kisah) 16:1
Kuidadu ho hanorin falsu
3 Foin dadauk, bainhira hau atu sai hosi sidade Éfezu baa iha provinsia Masedónia, hau husu o hela nafatin iha Éfezu, hodi bandu ema sira nebee hanorin la loos, atu la bele hanorin tan buat nebee sala. 4 Ema sira nee lakon tempu konta ai knanoik nebee la iha folin, i dada lia kona ba bei-ala sira bara-barak. Buat sira nee so halo ema istori malu deit, i la ajuda ema fiar ba Maromak para sira bele halo tuir Nia hakarak.
5 Hau foo hanoin ba o hanesan nee, atu sarani sira bele moris hadomi malu. Atu hadomi malu lo-loos, ita tenki laran moos, hatene saida mak diak ho saida mak aat, i fiar tebe-tebes ba Nai Maromak.
6 Maibee iha mestri balu husik ona buat sira nee, hodi koalia fali buat nebee la iha folin. 7 Sira hatudu aan dehan sira matenek nain kona ba lei nebee Nai Maromak foo ba Moisés, maibee sira la kompriende buat nebee sira hanorin.
8 Ita hatene katak lei nee diak, naran katak ita uza tuir Maromak nia hakarak. 9 Lei nee laos hakerek foo ba ema nebee moris loos ona. Maibee foo ba ema sira nebee kontra lei, moris kontra Maromak, fila kotuk ba Maromak, sempre halo buat aat, la tuir Maromak nia hakarak, la respeita Maromak, i oho-door ema too oho sira nia inan-aman rasik. 10 Lei nee foo ba ema nebee halo sala seksual, ba ema nebee halo hahalok homo-seksual, ba sira nebee naok ema ba faan, ba bosok-teen sira, ba ema nebee jura falsu, ho sira nebee halo saida deit mak kontra hanorin nebee loos. 11 Hanorin loos nee mai hosi Nai Maromak nia Novidade Diak, nebee Nia entrega mai hau. Nai Maromak nee boot tebe-tebes i diak la-halimar.
Agradese ba Nai Maromak tanba Nia laran diak
12 Hau agradese ba Kristu Jesus ita nia Nai, tanba Nia foo fiar ho forsa mai hau hodi foti hau halao Nia servisu. 13 Nia foti hau, maski uluk hau hatete aat Nia i halo terus ema nebee tuir Nia, hodi sama sira too rai. Jesus la kastigu hau, tanba tempu nebaa hau seidauk fiar ba Nia i la hatene saida mak hau halo.+ 1:13 Apostolu sira nia Istoria (Atos, Kisah) 8:3; 9:4-514 Maibee ita nia Nai Kristu Jesus hatudu Nia laran diak mai hau la sukat. Nee mak hau bele fiar metin ba Nia, hadomi Nia i hadomi mos ema seluk.
15 Ita rona ona dehan, “Kristu Jesus mai iha mundu nee para salva ema sala nain.” Liafuan nee loos duni; ita tenki simu ho laran tomak. Hosi ema sala nain hotu-hotu, hau mak aat liu. 16 Maski nunee Nai Maromak la kastigu hau. Tan Nia hakarak uza hau hodi hatudu Kristu Jesus nia pasiensia boot liu mai hau. Bainhira sira haree nunee, sala nain sira seluk mos bele fiar ba Nia hodi moris nafatin ho Nia tinan ba tinan.
17 Mai ita hotu-hotu hahii Nai Maromak!
Nia mak Liurai
nebee ukun tinan ba tinan nafatin.
Nia moris rohan la iha;
Nia nunka mate.
Ema la bele haree Nia ho matan.
So Nia deit mak Maromak;
la iha tan seluk!
Mai ita hahii i foti aas Nia naran
tinan ba tinan nafatin.
Amen.
18 Hau nia oan Timóteo. Buat nebee hau haruka o halo nee, tuir lo-loos lia tatoli nebee uluk Nai Maromak hatoo ba Nia ema kona ba o nia servisu. Se o tuir Nia lia tatoli nee, entaun o sei luta nafatin hanesan funu nain diak ida. 19 Fiar metin ba Kristu, i kuidadu o nia aan para sempre halo buat nebee loos. Tanba iha ema balu hatene saida mak loos, maibee lakohi halo tuir. Too ikus, sira fila kotuk ba Maromak. 20 Hosi sira nee, nain rua mak Himeneu ho Alexandre. Nee mak hau entrega ona sira ba Satanás, para sira bele aprende atu la bele hatete aat tan Nai Maromak.
2Hanorin kona ba orasaun
1 Hau husu boot atu imi halo orasaun ba ema hotu-hotu. Harohan atu Maromak tau matan ba sira i tulun sira. Agradese mos ba Nia. 2 Halo orasaun ba liurai sira ho ema hotu-hotu nebee kaer ukun, atu ita bele moris hakmatek ho dame, hodi adora Maromak i halo tuir Nia hakarak. 3 Orasaun hanesan nee diak. Nee halo haksolok Nai Maromak, nebee salva ita. 4 Nia hakarak atu ema hotu-hotu hetan salvasaun, i kompriende buat nebee mak loos. Mak nee:
5 So iha Maromak mesak ida deit.
I so iha Ema ida deit mak bele halo dame entre ita ema ho Nai Maromak.
Ema nee mak Kristu Jesus.
6 Nia foo Nia Aan hodi selu kotu ita nia tusan
hodi foo liberdade mai ita.
Ida nee mak liafuan diak nebee Nai Maromak agora foo sai mai ita ema. 7 I Nai Maromak hili ona hau sai Nai Jesus nia apostolu, hodi baa foo sai Novidade Diak ba sira nebee laos ema Judeu, i hanorin Maromak nia lia loos ba sira atu sira mos fiar ba Nai Jesus. Hau Jesus nia apostolu duni; hau la bosok.+ 2:7 2 Timóteo 1:11
8 Bainhira sarani sira halibur malu halo orasaun iha nebee-nebee, hau foo atensaun ba mane sira tenki diak malu. La bele hirus malu, la bele istori malu. Kuandu imi halo orasaun, imi nia laran tenki moos.
9 Nunee mos hau foo atensaun ba feto sira, hatais halo di-diak. Lalikan hatudu aan para ema fihir imi. Lalikan halo fuuk sai moda oi-oin, ka hatais hena nebee folin karu, ka uza osan mean osan mutin rebo-rebo.+ 2:9 1 Pedro 3:310 Diak liu imi preokupa halo diak ba ema seluk. Nee mak serve ba feto nebee dehan, “Hau adora Nai Maromak.” 11 Bainhira ema hanorin Nai Maromak nia liafuan, imi feto sira tenki see tilun hodi rona i hakruuk ba hanorin nee. La bele bis-bisi malu ka halo estrundu. 12 Tuir hau, feto la bele manda mane ka hanorin fali sira. Diak liu nonook deit. 13 Tan Nai Maromak halo uluk Adão, depois foin halo Eva.+ 2:13 Hahuu (Jénesis, Kejadian) 2:7; 2:21-2214 I laos Adão mak monu ba Satanás nia lia bosok. Maibee Eva mak monu, i kontra Nai Maromak nia lei.+ 2:14 Hahuu (Jénesis, Kejadian) 3:1-615 Maibee bele nunee mos, feto sira bele hetan salvasaun liu hosi hetan oan.+ 2:15 Liafuan “Feto sira bele hetan salvasaun liu hosi hetan oan”, nia signifikadu laduun klaru. Naran katak sira fiar nafatin ba Kristu, sempre hadomi ema seluk, moris ho laran moos, i hatene aan.
3Kritéria ba responsavel sarani sira
1 Ita baibain rona dehan, “Ema nebee hakarak sai responsavel ba sarani sira, nia hakarak halo servisu ida ke iha valór.” Liafuan nee loos duni; ita tenki simu ho laran tomak. 2 Responsavel sarani nian tenki ema diak, nebee povu respeita. Nia tenki moris loos ho feen ida deit. Nia tenki hatene aan, domina aan, naran diak, simu bainaka iha uma ho laran tomak, i hatene hanorin. 3 Responsavel sarani nian la bele lanu-teen, i la bele liman kamaan baku ema, maibee tenki laran diak i gosta dame. Nia la bele matan fuan naklosu ba osan. 4 Nia tenki hatene eduka nia familia, i nia oan sira tenki respeita i rona ba nia. 5 Tanba se nia la hatene eduka nia familia uma laran, oinsaa mak nia bele tau matan ba Maromak nia povu?
6 La bele foti ema nebee foin fiar ba Nai Jesus sai responsavel. Se lae, nia bele foti aan dehan nia mak diak liu. Nunee, Maromak bele kastigu nia hanesan uluk Nia kastigu Satanás. 7 Responsavel tenki naran diak iha komunidade nia leet. Tanba se ema nebee laos sarani la respeita nia, sira bele hatete aat nia, too nia mos monu ba Satanás nia lasu.+ 3:7 Tito 1:6-9
Kritéria ba ema nebee kaer knaar ajuda Maromak nia povu
8 Nunee mos ho ema nebee kaer knaar ajuda Maromak nia povu. Nia mos tenki ema nebee naran diak, la bele bosok-teen, la bele hemu tua barak, i la bele matan fuan naklosu ba osan. 9 Nia tenki laran moos i kaer metin lia loos nebee Maromak hatudu mai ita. 10 Bainhira atu foti ema ida kaer knaar ajuda Maromak nia povu, haree di-diak lai nia moris oinsaa. Se ema la hatudu liman ba nia, foin bele foti nia.
11 Nunee mos nia feen+ 3:11 Liafuan Gregu iha nee bele dehan ‘nia feen’. Bele mos ‘feto’. Iha ema balu dehan, iha nee Paulo koalia kona ba feto nebee kaer knaar ajuda Maromak nia povu. Maibee se nunee, lian Gregu baibain uza liafuan seluk. (Haree Roma 16:1) tenki naran diak, domina aan, i la bele konta ema nia vida. Ema seluk mos konfia nia.
12 Ema nebee kaer knaar ajuda Maromak nia povu tenki moris loos ho feen ida deit. Nia mos tenki hatene hanorin nia oan sira ho nia ema uma laran tomak. 13 Sira nebee serbi sarani sira ho diak, ema sei respeita loos sira. Nunee sira sei brani liu tan koalia kona ba sira nia fiar ba Kristu Jesus.
Fiar nebee loos
14 Timóteo, hau hein katak la kleur tan, hau baa haree o. Maski nunee, hau hakerek surat nee ba o. 15 Nunee se hau demora karik, surat nee bele foo hanoin ba o katak, Maromak nia oan sira tenki moris oinsaa. Maromak nee mak Maromak moris. I Nia povu hanesan uma riin+ 3:15 Lian Gregu dehan ‘riin ho alsesu’. Alsesu ho lian Indonézia katak ‘fundasi’. nebee hamriik metin hodi apoia Maromak nia hanorin nebee loos.
16 Segredu nebee Maromak foo sai ona mai ita kona ba Jesus Kristu, diak teb-tebes. Segredu nee mak nee:
Jesus Kristu fila aan sai ema.
Maromak nia Espiritu hatudu katak, Jesus nee loos duni.
Maromak nia anju sira mos haree Nia.
Nai Maromak hasae ona Nia ba lalehan hodi foti aas Nia naran.
Ema foo sai kona ba Nia too iha nasaun-nasaun.
Iha mundu tomak, ema fiar ona ba Nia.
4Kuidadu ho mestri falsu
1 Maromak nia Espiritu foo hatene mo-moos mai ita katak, iha loron ikus, sarani balu sei husik tiha sira nia fiar ba Kristu, hodi tuir fali espiritu bosok-teen, ho diabu sira nia hanorin. 2 Iha mos mestri balu hanorin nunee. Sira bosok-teen, koalia oin ida, hahalok oin seluk. Tanba sira halo sala beibeik, agora sira la hatene ona saida mak diak, saida mak aat. 3 Sira hanorin dehan ema la bele kaben, i dehan hahaan balu lulik, la bele haan. Maski Nai Maromak halo hahaan sira nee hotu, para ema nebee fiar ba Kristu i hatene lia loos bele haan. Naran katak ita haan, foo agradese ba Nai Maromak. 4 Buat hotu-hotu nebee Nai Maromak halo, diak. Nunee la iha hahaan ida mak ita bele dehan lulik. Hotu-hotu ita bele haan ho laran ksolok, hodi agradese ba Nai Maromak. 5 Tanba liu hosi Nai Maromak nia liafuan ho mos ita nia orasaun, buat sira nee hotu la lulik.
Nai Jesus nia atan diak
6 Timóteo, hanorin buat sira nee hotu ba sarani sira. Se o halo nunee mak o serbi Kristu Jesus nudar nia atan ida nebee diak. Durante nee o halo tuir hanorin nebee loos, i simu Nai Maromak nia liafuan nebee halo ita fiar ba Nia, hanesan ema haan hahaan nebee diak hodi halo isin sai forti. 7 Hadook aan hosi ai knanoik falsu nebee la ajuda ema atu moris tuir Maromak nia dalan. Diak liu treinu o nia aan di-diak para moris tuir Maromak nia hakarak iha o nia moris tomak.
8 Ema dehan, treinu halo isin forti iha valór, maski laduun. Maibee treinu aan para moris tuir Maromak nia hakarak iha valór boot liu, tanba ajuda ema moris agora iha mundu nee, ho mos aban-bainrua iha mundu seluk.
9 Liafuan nee loos duni; ita tenki simu ho laran tomak. 10 Ita servisu makaas i hakaas aan liu tan, tanba ita laran metin ba Nai Maromak nebee moris. Nia mak salvador ba ema hotu-hotu, liu-liu ba ita nebee fiar ba Jesus.
11 Hanorin buat sira nee hotu, i haruka ema halo tuir. 12 Keta husik ema ida la konsidera o tan deit o foin-sae. O tenki hatudu ezemplu diak ba ema sarani sira, liu hosi o nia koalia, o nia hahalok, o nia domin, o nia fiar ba Jesus Kristu, ho o nia moris loos. 13 Durante hau seidauk too baa, o tenki foo aan hodi lee Maromak nia liafuan ba sarani sira, hanorin di-diak sira, i foo hanoin ba sira para halo tuir.
14 Uluk responsavel sarani sira harohan hodi tau liman ba o nia ulun. Momentu nee, sira foo tutan Maromak nia lia menon kona ba o nia knaar, i Maromak mos foo kbiit ba o para o bele halo knaar nee ho diak. Agora, uza lo-loos kbiit nee. 15 Halo buat sira nee hotu ho badinas, ho laran tomak, para ema bele haree katak o lao ba oin. 16 Kuidadu para o sempre moris loos, i sempre hanorin buat nebee loos. Kontinua hanesan nee nafatin, mak Maromak sei hasai o hosi buat aat, i nunee mos ema nebee rona o.
5Timóteo tenki konsidera sarani sira hanesan nia familia
1 La bele siak mane sira nebee idade liu o. Maibee foo hanoin ba sira ho respeitu, hanesan ba o nia aman rasik. I konsidera mane foin-sae sira hanesan o nia maun-alin rasik. 2 Nunee mos ho feto sira. Koalia ho sira nebee idade liu o hanesan ho o nia inan rasik. I konsidera feto foin-sae sira hanesan o nia feton. O nia laran tenki moos ba sira.
Kona ba feto faluk sira
3 Sarani sira tenki respeita ho tau matan ba feto faluk sira nebee la iha familia atu haree sira. Maibee se feto faluk ida iha oan ka bei-oan, entaun sira iha obrigasaun atu tau matan ba nia, hodi selu nia kolen. Nunee sira hatudu katak sira serbi Nai Maromak. I sira mos halo kontenti Maromak nia laran. Maibee feto faluk nebee mesak, la iha tan ema ida atu tau matan ba nia, nia so laran metin deit ba Nai Maromak. Loron-kalan nia harohan husu tulun ba Maromak. Sarani sira tenki tau matan ba faluk sira hanesan nee.
6 Maibee feto faluk nebee hakarak goza deit, nia hanesan ema nebee mate tiha ona, maski nia sei moris.
7 Haruka sarani sira halo tuir regra sira nee, para ema la bele foo sala ba sira.
8 Maibee see mak la haree nia familia rasik, liu-liu nia familia uma laran, hatudu katak nia husik ona nia fiar ba Nai Maromak. Nia aat liu fali ema nebee la fiar ba Kristu.
9 Bainhira halo lista feto faluk sira, hili deit ema hanesan tuir mai nee: nia tinan 60 ba leten, i uluk moris loos deit ho nia kaben. 10 Ema rekonhese nia hanesan ema ida ke sempre halo diak ba ema seluk. Nia tau matan ba nia oan sira ho diak, simu bainaka iha nia uma ho laran tomak, serbi sarani sira ho haraik aan, ajuda ema nebee iha susar laran, i sempre prontu halo buat di-diak deit.
11 La bele hatama feto faluk foin-sae sira ba iha lista faluk sira nian. Tanba keta halo be sira hakarak deit mak kaben fali, too la foo ona laran tomak ba Maromak, tuir sira promete ona ba Jesus Kristu. 12 Nunee ema bele foo sala ba sira tanba sira la kumpri ona sira nia promesa uluk ba Maromak. 13 Feto faluk foin-sae sira bele mos sai baruk-teen, hodi tama uma sai uma. Laos nee deit, sira mos bele konta ema nia vida, mete ema nia problema, i koalia buat nebee la serve atu koalia. 14 Tanba nee, hau hanoin diak liu feto faluk foin-sae sira kaben fali, iha oan, i tau matan ba sira nia uma kain. Nunee ema nebee la gosta ita, la iha razaun atu hatete aat ita. 15 Tan iha feto faluk foin-sae balu sees ona hosi dalan loos hodi tuir fali Satanás.
16 Se feto sarani ida nia familia ruma faluk, nia mak tenki tau matan ba. La bele husik sarani sira seluk mak ajuda feto faluk nee. Nunee, sarani sira bele ajuda faluk sira nebee la iha ema ida atu haree.
Kona ba responsavel sarani sira
17 Responsavel sarani sira nebee halo servisu ho diak, merese para sarani sira respeita sira i selu sira nia kolen ho diak. Liu-liu sira nebee badinas hanorin sarani sira hodi foo hanoin ba sira para moris tuir. 18 Tanba iha Livru Sagradu dehan, “Se uza karau hodi sama hare, la bele kesi nia ibun, para nia bele haan.” Nunee mos, “See mak servisu, nia merese atu simu osan.”+ 5:18 Deutoronómiu (Ulangan) 25:4; Mateus 10:10; Lucas 10:7
19 Se ema nain ida foo sala ba responsavel sarani ruma, la bele rona lai. Tenki iha sasin rua ka tolu koalia hanesan, foin o rona hodi tetu.+ 5:19 Deutoronómiu (Ulangan) 17:6; 19:1520 Se nia halo sala duni, entaun koriji nia iha sarani sira nia oin, atu ema seluk la brani halo sala hanesan nia.
21 Bainhira koriji ema, la bele fihir ba ema nee see. Hau tau knaar nee ba o nia kabaas iha Nai Maromak ho iha Kristu Jesus nia oin. I anju sira nebee Maromak hili mos sai sasin.
22 La bele anxi tau liman foti ema ruma sai responsavel ba sarani sira. Maibee haree di-diak lai. Tanba se imi foti ema, i ema nee halo sala, imi mos sei lori todan. Kuidadu o nia aan para la bele sala.
23 Tanba o nia kabun moras beibeik, diak liu la bele hemu bee deit, hemu mos tua uitoan hanesan aimoruk.
24 Haree di-diak! Iha ema balu halo sala, seidauk lori ba justisa mos, ema hotu-hotu hatene tiha ona. Maibee iha ema balu halo sala, kleur mak foin ema hatene. 25 Nunee mos, bainhira ita halo buat diak, dala ruma ema hatene kedas. Se karik ema la haree mos, ikus mai ema sei hatene, tanba hahalok diak, atu subar mos la diak.
6Kona ba atan
1 Atan nebee sarani tenki respeita nia patraun, para ema seluk la bele hatete aat Nai Maromak ka koalia aat ita nia hanorin. 2 Se nia patraun mos fiar ba Kristu, patraun ho atan hanesan maun-alin. Maski nunee, atan nee tenki respeita nafatin nia patraun, i serbi nia diak liu tan, tanba nia serbi ema sarani ida nebee nia hadomi.
Hanorin falsu, ho rikusoin lo-loos
2b Timóteo, hanorin buat sira nee ba sarani sira, i hametin sira nia laran para halo tuir. 3 Ema balu hanorin buat nebee sala, la haan malu ho Nai Jesus Kristu nia Liafuan nebee loos. Sira nia hanorin la ajuda ema moris tuir Maromak nia hakarak. 4 Ema hanesan nee foti aan, maibee la kompriende buat ida. Sira nia moras aat ida mak gosta diskuti malu ho istori malu kona ba liafuan. Hahalok nee halo ema laran moras malu, tarata malu, hatete aat ema, ho deskonfia ema nar-naran deit. 5 Sira so hatene mak istori malu. Sira nia hanoin la loos ona, i sira la hatene ona saida mak loos. Sira hanoin dehan, hanorin kona ba Maromak bele halo sira sai riku.
6 Loos duni, se ita moris halo haksolok Maromak nia laran, i ita kontenti ho buat nebee mak ita iha, ita sorti boot. 7 Tanba ita moris mai iha mundu nee, ita la lori buat ida. Ita mate mos, la lori buat ida. 8 Nunee, naran katak ita iha ai haan ho hena para hatais, ita kontenti ona ho ida nee.
9 Maibee ema nebee loron-kalan hanoin deit atu sai riku, monu ba tentasaun i monu ba lasu. Sira hakarak buat oi-oin nebee sala ho buat barak nebee bele estraga sira. Nee sei halo susar sira. 10 Ema nebee hanoin demais osan, prontu halo buat aat oi-oin. Iha ema balu buka demais osan, too sira husik tiha sira nia fiar. Nunee sira halo terus sira nia aan, hanesan sira rasik sona sira nia aan ho tudik.
Kaer metin o nia fiar
11 Timóteo, o Nai Maromak nia ema. Nunee, hadook aan tiha hosi buat aat sira nee hotu, i hakaas aan atu moris loos, tuir Maromak nia hakarak. Esforsa aan atu fiar nafatin ba Jesus Kristu, hadomi ema seluk, aguenta iha terus laran, i laran maus. 12 Luta para fiar metin ba Maromak i sempre halo tuir Nia Liafuan. Uluk bainhira o deklara iha ema barak nia oin katak o fiar ba Jesus Kristu, Maromak bolu o tama iha moris nebee rohan la iha. Agora, kaer metin moris nee. 13 Hau haruka o halo tuir Nai Maromak nia orden hotu, too ita nia Nai Kristu Jesus fila mai hosi lalehan. La bele kontra orden ida mos; nunee ema la bele foo sala ba o. Hau foo orden nee iha Nai Maromak nia oin. Nia mak foo moris ba buat hotu-hotu. Ho mos iha Kristu Jesus nia oin. Nia mak foo sasin lo-loos kona ba Nia Aan iha governador Póntius Pilatus nia oin.+ 6:13-14 João 18:37
15 Nai Jesus sei fila fali mai
iha loron nebee Nai Maromak desidi.
Nai Maromak nee boot teb-tebes i diak la-halimar.
Nia mak kaer ukun.
Nia mak liurai hotu-hotu nia Liurai,
ho nai hotu-hotu nia Nai.
16 So Nia deit mak nunka mate.
Nia moris iha naroman ida ke makaas liu,
halo ema nia matan la aguenta atu haree.
Ema ida seidauk haree Nia,
i la iha ema ida mak bele haree Nia.
Ema hotu-hotu respeita Nia.
Poder hotu-hotu iha Nia liman too tinan ba tinan nafatin!
Amen.
Kona ba ema riku
17 Haruka ema nebee riku ho sasaan mundu nian, la bele foti aan, i la bele laran metin ba sira nia rikusoin. Tan rikusoin sira nee hotu loron ida sei mohu. Haruka sira laran metin ba Nai Maromak. Tan Nia mak foo buat hotu-hotu mai ita too res-resin, atu ita bele moris haksolok. 18 Hatete ba sira para halo buat barak nebee diak hodi tulun ema seluk. Sira la bele karak, maibee tenki prontu foo buat nebee mak sira iha. 19 Nunee sira nia hahalok diak nee sai hanesan rikusoin ba loron ikus, para sira bele hetan moris lo-loos, nebee la iha rohan.
Paulo taka nia surat
20 Timóteo, kuidadu di-diak knaar nebee Nai Maromak tau ona iha o nia kabaas. Iha ema balu koalia la huun la dikin, i kontra Nai Maromak nia liafuan. Sira gaba aan dehan matenek, maibee lae. Lalikan diskuti malu ho sira. 21 Iha ema balu fiar ba sira nia liafuan bosok nee, too husik tiha sira nia fiar ba Nai Maromak.
Hau harohan ba Maromak atu hatudu Nia laran diak ba imi hotu.
Hau nia liafuan too iha nee deit.
Hosi hau,
Paulo