1 Tesalónika

Paulo nia surat primeiru

ba sarani sira iha Tesalónika

Paulo hahuu nia surat

¹ Surat nee hosi hau, Paulo, ho hau nia kolega Silas+ 1:1 Lian Gregu dehan ‘Silvano’. Nee Silas nia naran seluk. Haree Atus ( Kisah ) 15:22. ho Timóteo.

Ami hatoo kumprimentus ba sarani sira iha sidade Tesalónika.+ 1:1 Apostolu sira nia Istoria (Atos, Kisah) 17:1 Imi laran ida ho Aman Maromak ho Nai Jesus Kristu.

Ami husu Nai Maromak hatudu Nia laran diak ba imi, i foo paz ba imi.

Sarani Tesalónika sira fiar nafatin ba Jesus

² Ami sempre halo orasaun ba imi hotu, hodi agradese ba Nai Maromak dehan, “Nai, obrigadu ba sarani sira iha Tesalónika!” ³ Ami sempre hatoo ba ita nia Aman Maromak katak, imi servisu makaas tanba imi fiar ba Nai Jesus, i badinas ajuda ema seluk tanba hadomi sira. I bainhira ema halo terus imi, imi aguenta nafatin ho pasiensia tanba imi laran metin ba Nai Jesus.

⁴ Maun-alin sira, ami hatene Nai Maromak hadomi imi, i Nia hili ona imi sai Nia povu. ⁵ Tanba uluk, ami baa foo sai Nai Maromak nia Novidade Diak ba imi, laos ho liafuan deit, maibee ho poder hosi Espiritu Santu, i ami fiar metin katak Novidade Diak nee loos duni. Imi mos hatene katak ami moris iha imi nia leet so hodi halo diak ba imi. ⁶ Nunee imi moris tuir ami nia ezemplu, i tuir ezemplu Nai Jesus nian. Maski ema halo terus imi, maibee imi simu Novidade Diak ho laran haksolok, tanba Espiritu Santu foo ksolok ba imi.+ 1:6 Apostolu sira nia Istoria (Atos, Kisah) 17:5-9

⁷ Nunee imi sai ezemplu ba sarani sira hotu iha provinsia Masedónia ho Akaia. ⁸ Tan Maromak nia Novidade Diak namkari ona hosi imi iha Tesalónika too iha Masedónia ho Akaia. Laos nee deit. Maibee ema iha nebee-nebee deit hatene ona kona ba imi nia fiar ba Nai Maromak. Nunee ami la presiza konta tan. ⁹ Tanba ema sira nee rasik konta dehan, uluk imi simu ami ho laran tomak. Imi husik tiha hotu imi nia lulik sira hodi serbi ho adora Maromak nebee loos i moris. ¹⁰ Sira mos konta dehan, imi hein hela Nai Maromak nia Oan Jesus fila mai hosi lalehan. Uluk, ema oho tiha Nia, maibee Nai Maromak halo Nia moris fali. I Nai Jesus mak sei salva ita bainhira Nai Maromak foo kastigu ba ita ema iha loron ikus.

Paulo nia servisu iha Tesalónika

¹ Maun-alin sira, imi hotu hatene, uluk ami hamutuk ho imi iha Tesalónika, ami nia servisu la saugati. ² Imi mos hatene, bainhira ami seidauk baa iha nebaa, ema iha sidade Filipi halo terus ho hatete aat ami. Maibee Maromak foo brani mai ami para bele foo sai Nia Novidade Diak ba imi, maski ema barak kontra makaas.+ 2:2 Apostolu sira nia Istoria (Atos, Kisah) 16:19-24; 17:1-9³ Ami foo sai Novidade Diak nee, laos lori doutrina nebee sala ka ho intensaun aat, i laos para bosok ema. Lae! ⁴ Nai Maromak foo ona fiar mai ami para hatoo Novidade Diak ba imi. Ami laos atu halo kontenti ema nia laran, maibee atu halo kontenti Nai Maromak, tan Nia mak hatene ami nia laran.

⁵ Imi mos hatene katak, ami nunka kos-kose imi, saa tan hakfodak ba osan hanesan ema balu nebee matan naklosu ba osan maibee finji lae. Tebes. Nai Maromak mak ami nia sasin katak ami nunka halo hanesan nee. ⁶ Ami servisu laos atu imi ka see-see deit gaba ami. ⁷ Tuir lo-loos ami, nudar Kristu nia apostolu, iha direitu hanesan ema boot. Maibee ami hatudu ami nia laran maus iha imi nia leet, hanesan inan ida tau matan ba nia oan nurak. ⁸ Tanba ami hadomi teb-tebes imi, ami prontu hatoo Nai Maromak nia Novidade Diak ba imi. Laos nee deit, maibee ami nia moris mos entrega tomak ba imi.

⁹ Maun-alin sira, imi hatene, bainhira ami foo sai Novidade Diak ba imi, ami servisu makaas atu bele sustenta ami nia aan rasik. Tan ami lakohi foo todan ba imi. ¹⁰ Imi hotu sai sasin, nunee mos Maromak, katak kuandu ami sei hamutuk ho imi nebee fiar ba Jesus, ami laran moos, moris loos, i livre hosi sala. ¹¹ Imi hatene katak ami tau matan ba imi ida-idak, hanesan aman ida tau matan ba nia oan rasik. ¹² Ami hametin imi nia laran, i husu beibeik ho laran tomak ba imi atu moris loos hodi halo haksolok Nai Maromak nia laran. Tan Nia mak liurai boot, nebee bolu imi sai Nia reinu hodi simu respeitu hamutuk ho Nia.

¹³ Iha tan buat ida nebee halo ami sempre foo agradese ba Nai Maromak. Nee mak bainhira ami foo sai Novidade Diak ba imi, imi rona i simu liafuan nee, laos nudar ema nia liafuan, maibee nudar Nai Maromak nian. Liafuan nee mos ajuda imi sarani sira moris tuir Maromak nia hakarak.

¹⁴ Maun-alin sira, imi nia maluk iha imi nia rain rasik halo terus imi tanba imi tuir Jesus. Nunee imi sai hanesan sarani sira iha provinsia Judeia nebee fiar ba Kristu Jesus. Sira nia maluk Judeu sira iha nebaa mos halo terus sira tanba sira fiar ba Kristu Jesus.+ 2:14 Apostolu sira nia Istoria (Atos, Kisah) 17:5

¹⁵ Ema Judeu balu uluk oho tiha Nai Maromak nia profeta balu nebee foo tutan Nia Lia Tatoli. Sira mos oho Nai Jesus. Agora sira buka dalan atu duni sai tan ami. Sira sai inimigu ba ema hotu, i Nai Maromak la gosta liu sira nia hahalok.+ 2:15 Apostolu sira nia Istoria (Atos, Kisah) 9:23, 29; 13:45, 50; 14:2, 5, 19; 17:5, 13; 18:12¹⁶ Sira buka taka dalan, atu ami la bele foo sai tan Maromak nia Novidade Diak ba ema nebee laos Judeu. Ema Judeu sira nee lakohi atu Maromak salva ema seluk. Nunee sira nia sala aumenta ba beibeik too demais liu ona. Ikus liu Nai Maromak mos hirus, i atu kastigu ona sira.

Paulo hakarak hasoru tan sarani sira iha Tesalónika

¹⁷ Maun-alin sira, uluk ami tenki sees aan hosi imi, maibee lalais deit. Maski ita dook malu, ami hanoin imi nafatin. Tanba ami hanoin loos imi, ami buka dalan oi-oin atu baa haree fali imi. ¹⁸ Ami hakarak fila ba imi, i hau koko ona dala ida-rua, maibee Satanás sempre taka dalan. ¹⁹ Ami hakarak haree fali imi, tanba bainhira Nai Jesus fila fali mai hosi lalehan, imi mak sei halo ami haksolok ho laran metin iha Nia oin. Tanba imi sai hanesan premiu nebee hatudu katak ami manaan tiha ona. ²⁰ Loos duni! Ami haksolok liu tanba imi hatudu katak ami nia servisu iha folin.

Paulo sira haruka Timóteo ba Tesalónika

¹ Uluk ami la konsege baa vizita imi. Too ikus, ami la aguenta hein tan ona, i desidi haruka Timóteo baa. Maibee hau ho Silas hela deit iha sidade Atena. Timóteo nee ami nia maluk sarani, nebee servisu hamutuk ho ami ba Nai Maromak hodi foo sai Jesus Kristu nia Novidade Diak. Ami haruka nia baa hametin imi nia laran, atu imi fiar metin liu tan ba Nai Maromak,+ 3:1-2 Apostolu sira nia Istoria (Atos, Kisah) 17:15³ i la bele nakdoko bainhira ema halo terus imi. Imi hatene katak terus nebee ema halo mai ita, nee Maromak nia planu. ⁴ Tan uluk, bainhira ita sei hamutuk, ami foo hanoin fila-fila ba imi dehan, ema sei halo terus ita. I agora sai nunee duni.

⁵ Momentu nebaa, hau hakarak duni atu hatene, imi sei fiar nafatin ba Jesus ka lae. Nunee bainhira hau la aguenta tan ona, hau haruka Timóteo ba imi hodi buka hatene lo-loos. Tan hau preokupa, keta halo be Satanás intenta ona imi atu fila kotuk ba Nai Jesus. Se nunee, servisu boot nebee uluk ami halo nee saugati deit.

Timóteo lori informasaun hosi sarani sira iha Tesalónika

⁶ Agora Timóteo fila fali ona hosi Tesalónika. Nia konta mai ami dehan, imi fiar nafatin ba Kristu i hadomi malu nafatin, halo ami mos haksolok. Nia mos dehan, bainhira imi konta tuir kona ba ami, imi sempre kontenti, i imi hakarak atu hasoru ami, hanesan mos ami hakarak hasoru imi.+ 3:6 Apostolu sira nia Istoria (Atos, Kisah) 18:5

⁷ Maun-alin sira, maski ami iha nee senti todan tanba hetan terus oi-oin, maibee buat nebee Timóteo konta nee halo ami senti kamaan. Tanba ami hatene ona katak imi fiar metin nafatin ba Nai Jesus. ⁸ Ami nia moris iha folin duni tanba imi hamriik metin nafatin ho Nia.

Paulo halo orasaun ba sarani sira iha Tesalónika

⁹ Ami agradese barak ba Nai Maromak ho laran haksolok, tanba imi fiar nafatin ba Nia. ¹⁰ Loron-kalan ami halo orasaun ba Nai Maromak ho laran tomak, para ami bele hasoru fali imi, hodi hanorin buat nebee mak imi sei presiza para bele fiar metin liu tan.

¹¹ Ami harohan ba ita nia Aman Maromak ho Jesus Kristu ita nia Nai, atu loke dalan para ami baa hasoru tan imi. ¹² Ami mos husu ba Nai Jesus para halo imi hadomi malu liu tan i hadomi liu tan ema hotu-hotu, hanesan mos ami hadomi imi. ¹³ Ami husu para Maromak hametin imi nia laran. Nunee bainhira Nai Jesus fila fali mai ho povu hotu-hotu, imi bele hamriik iha ita nia Aman Maromak nia oin ho laran moos i livre hosi sala.

Moris nebee halo haksolok Nai Maromak

¹ Maun-alin sira, ami husu ba imi atu moris halo haksolok Nai Maromak, tuir ami hanorin ona ba imi. Loos, imi moris tuir ona nunee, maibee tanba ita Nai Jesus nia ema, ami husu atu imi hakaas aan liu tan. ² Imi hatene ona saida mak ami hanorin ba imi hodi Nai Jesus nia naran. ³ Nai Maromak nia hakarak nunee: Moris ho laran moos. La bele halo sala seksual ho see-see deit. ⁴ Ida-idak tenki domina nia aan rasik+ 4:4 Lian Gregu dehan “tenki domina nia aan rasik”. Tuir matenek nain Biblia nian balu, Paulo iha nee soe lia hodi hatudu ba ema nia feen, laos sira nia aan. Se nunee, ita bele tradus “tenki moris loos ho nia feen rasik”. i la bele halo sala, para ema bele respeita imi. ⁵ Ida-idak tenki konsidera nia feen; la bele ulun bulak hanesan ema nebee la konhese Nai Maromak. ⁶ La bele book maluk sarani nia kaben. Nai Maromak sei foo kastigu ba ema nebee halo sala sira nee. Buat sira nee ami foo atensaun fila-fila ba imi hori uluk kedas. ⁷ Tan Nai Maromak bolu ona ita, laos atu moris tuir hahalok foer sira nee, maibee atu moris ho laran moos. ⁸ Nee duni, see mak lakohi tuir hanorin nee, nia laos deit fila kotuk mai ami, maibee nia fila kotuk ba Nai Maromak, nebee foo Nia Espiritu Santu mai ita.

⁹ Ami la presiza hakerek tan ba imi kona ba oinsaa hadomi maluk sarani sira, tan Nai Maromak rasik hanorin ona imi atu hadomi malu. ¹⁰ Imi hadomi ona maluk sarani sira hotu iha provinsia Masedónia. Nee diak. Maibee agora, maun-alin sira, ami husu atu imi hadomi liu tan. ¹¹ Hakaas aan atu imi moris hakmatek. La bele baa mete ema nia moris. Servisu ho imi nia liman rasik hodi sustenta imi nia familia. Buat sira nee, ami hanorin ba imi hori uluk kedas. ¹² Se imi moris nunee, imi sei la tane liman ba ema seluk, i ema nebee la fiar ba Kristu sei respeita imi.

Nai Jesus sei fila mai hosi lalehan

¹³ Maun-alin sira, ami hakarak imi hatene di-diak kona ba sarani sira nebee mate tiha ona. Nunee, bainhira ema sarani ruma mate, imi la bele laran susar demais hanesan ema seluk nebee hanoin dehan ema mate sei la moris fali. ¹⁴ Ita hatene katak Jesus mate tiha ona, depois Nai Maromak halo Nia moris fali. Nunee, ita mos fiar katak Nai Maromak sei halo moris fali Nai Jesus nia ema hotu-hotu nebee mate tiha ona, hodi halibur sira hamutuk ho Jesus.

¹⁵ Iha nee ami foo tutan Nai Jesus nia Liafuan rasik. Ema balu hanoin katak, bainhira Nai Jesus fila fali mai, ita nebee sei moris hela sei hasoru Nia uluk, mak foin sira nebee mate tiha ona. Nee la loos! ¹⁶ Nai Jesus sei fila fali mai hosi lalehan hodi foo orden ho lian makaas. Ema sei rona anju sira nia boot ida nia lian, ho Maromak nia korneta lian. Depois Kristu nia ema nebee mate tiha ona sei moris fila fali, ¹⁷ mak foin Maromak foti sae sira hamutuk ho ita nebee sei moris hela, para hasoru Nai Jesus iha kalohan. I ita sei moris hamutuk ho Nai Jesus tinan ba tinan nafatin.+ 4:17 1 Korintu 15:51-52

¹⁸ Nee duni, foo hanoin ba malu kona ba Nai Jesus nia Liafuan sira nee, hodi hametin imi ida-idak nia laran.

Ita tenki prontu simu Nai Jesus fila fali mai

¹ Maun-alin sira, ami la presiza hakerek ba imi, saa loron mak Nai Jesus sei fila. ² Tanba imi hotu hatene mo-moos katak, Nia mai derepenti deit, hanesan naok-teen mai iha kalan boot.+ 5:2 Mateus 24:43; Lucas 12:39; 2 Pedro 3:10³ Bainhira ema dehan, “Buat hotu diak i hakmatek hela,” maka iha tempu nee duni sira hetan dezastre, hanesan mos feto isin rua nebee derepenti deit kanotak moras atu tuur ahi. Kuandu buat sira nee mosu ona, ema atu sees mos la biban.

⁴ Maun-alin sira, imi la moris iha nakukun laran. Nunee, imi sei la hakfodak bainhira Nai Jesus fila fali mai derepenti deit hanesan naok-teen tama uma iha tempu nebee ita la hatene. ⁵ Ita nebee fiar ba Jesus hanesan ema loron nian, nebee moris iha naroman. Ita laos hanesan ema kalan nian, nebee moris iha nakukun laran. ⁶ Nunee, ita la bele hanesan ema seluk nebee toba dukur hela. Maibee ita tenki matan moos i domina aan. ⁷ See mak atu toba, kalan mak toba. I see mak atu lanu, kalan mak lanu. ⁸ Maibee ita la bele nunee. Ita moris iha naroman laran, nee duni, ita tenki matan moos, fiar nafatin ba Jesus i hadomi malu. Fiar ho domin nee hanesan besi belar nebee tropas sira uza hodi taka sira nia hirus matan iha funu laran. Ita mos tenki laran metin nafatin katak Nai Jesus salva ita. Nee hanesan kapaseti nebee tropas sira taka ba ulun.+ 5:8 Isaias (Yesaya) 59:17; Éfezu 6:13-17

⁹ Nai Maromak hili ita laos atu kastigu, maibee atu salva ita, liu hosi Jesus Kristu ita nia Nai. ¹⁰ Tan Nia mate ona hodi troka ita. Nunee bainhira Nia fila mai, bele ita mate tiha ona ka sei moris hela mos, ita sei moris hamutuk ho Nia.+ 5:10 1 Tesalónika 4:13-18¹¹ Tanba nee, tulun malu atu fiar liu tan, ho hametin nafatin imi ida-idak nia laran, hanesan agora imi halo dadauk.

Paulo nia lia menon ba sarani sira

¹² Maun-alin sira, ami husu boot atu imi respeita responsavel sarani sira, nebee servisu makaas iha imi nia leet. Sira mos foo hanoin beibeik ba imi para la bele monu ba sala. ¹³ Respeita ho hadomi teb-tebes sira, tan sira servisu makaas ba imi. Haree malu di-diak.

¹⁴ Maun-alin sira, ami husu para imi foo hanoin ba ema baruk-teen sira tenki servisu. Foo aten brani ba sira nebee tauk. Ajuda sira nebee fraku. I pasiensia ba ema hotu-hotu.

¹⁵ La bele selu aat ho aat. Maibee sempre hakaas aan atu halo diak ba ema sarani sira ho mos ba ema hotu.

¹⁶ Haksolok beibeik ba. ¹⁷ Sempre halo orasaun. ¹⁸ Iha situasaun saida deit, agradese ba Nai Maromak. Tan Maromak hakarak ema hotu nebee tuir Nai Kristu Jesus halo nunee.

¹⁹ La bele hamate Espiritu Santu nia servisu. ²⁰ Se iha maluk sarani ida dehan, nia simu lia tatoli hosi Nai Maromak, la bele dehan, “Nee la vale!” ²¹ Imi tenki tetu di-diak liafuan nee hotu hodi hatene, mai hosi Nai Maromak ka lae. Se loos duni, tenki simu. ²² Maibee hadook aan hosi buat aat hotu.

Paulo taka nia surat

²³ Hau husu Maromak nebee foo paz, atu halo imi moris ho laran moos iha imi nia vida tomak. Hau husu para Nia halo imi nia isin ho klamar tomak livre hosi sala, too Nai Jesus fila fali mai. ²⁴ Nai Maromak nebee bolu ona imi sai Nia ema, sei halo imi hamriik iha Nia oin ho laran moos, tanba Nia sempre halo tuir Nia promesa.

²⁵ Maun-alin sira, halo orasaun mai ami.

²⁶ Rei malu hanesan maun-alin sarani.

²⁷ Hodi Nai Jesus nia naran, hau haruka imi lee surat nee ba maluk sarani sira hotu.

²⁸ Ami husu ita nia Nai Jesus Kristu hatudu Nia laran diak ba imi hotu.

Hau nia liafuan too iha nee deit.

Hosi hau,

Paulo