1 Pedro
Pedro nia surat primeiru
1Pedro hahuu nia surat
1 Surat nee hosi hau, Pedro, nudar Jesus Kristu nia apostolu.
Hau hakerek surat nee ba imi hotu nebee mak Nai Maromak hili tiha ona. Imi sai ema lao rai, namkari iha fatin-fatin iha rai Pontus, Galásia, Kapadósia, Ázia ho mos Bitínia. Hori uluk kedas Aman Maromak hili tiha ona imi atu sai Nia ema para imi moris tuir Jesus Kristu nia hakarak. Jesus hisik Nia raan ba imi hodi hamoos imi nia sala. I Maromak nia Espiritu halo imi sai ema nebee moris loos.
Hau harohan para Nai Maromak loron ba loron hatudu Nia laran diak ba imi, i foo paz ho hakmatek ida ke boot teb-tebes ba imi.
Ita laran metin katak Nai Maromak sei foo salvasaun mai ita
3 Mai ita hahii Nai Maromak! Nia mak ita nia Nai Jesus Kristu nia Aman, i Jesus mos adora Nia. Nai Maromak hadomi teb-tebes ita, too Nia foo moris foun mai ita. Ita bele simu moris foun nee tanba Nia halo moris fali ona Jesus Kristu hosi mate. Nunee agora ita moris ho esperansa ida nebee metin 4 hodi hein atu simu rikusoin nebee mak Maromak prepara ona ba ita iha lalehan. Riku-soin nee nunka mohu, nunka dodok, i nunka menus. 5 Tanba imi nia fiar ba Nai Maromak, Nia sei kuidadu nafatin imi hodi Nia kbiit too imi simu salvasaun nebee Maromak prepara tiha ona atu hatudu sai bainhira mundu nee remata.
6 Tanba nee imi nia laran haksolok, maski iha imi nia moris agora imi laran susar tanba tenki hasoru tentasaun oi-oin, maibee tentasaun nee la kleur ida. 7 Imi hetan tentasaun nee para bele hatudu katak imi fiar metin duni ba Nai Maromak. Imi nia fiar nee bele kompara ho osan mean. Osan mean nee too loron ida sei aat. Maski la dura, maibee ita koko ho ahi. Saa tan imi nia fiar. Imi nia fiar folin aas liu fali osan mean. Nee mak Nai Maromak husik imi hasoru tentasaun para koko imi nia fiar nee. Se imi fiar nafatin, entaun aban-bainrua bainhira Jesus Kristu fila fali mai hosi lalehan iha ema hotu-hotu nia oin, Maromak sei gaba imi, respeita imi i foti aas imi nia naran.
8 Maski imi nia matan seidauk haree Jesus, maibee imi hadomi Nia. Maski imi seidauk haree Nia mos, imi fiar Nia. Imi nia laran haksolok liu too imi la hatene atu koalia oinsaa, 9 tanba liu hosi imi nia fiar nee imi hetan ona salvasaun.
10 Nai Maromak nia profeta sira uluk foo sai ona katak Nai Maromak atu hatudu Nia laran diak ba imi. Sira buka tu-tuir para bele hatene diak liu tan oinsaa mak Nai Maromak atu salva imi. 11 Iha momentu nebaa, Kristu nia Espiritu hela iha sira nia laran i foo hatene katak, aban-bainrua Kristu sei hetan terus mak foin Nai Maromak foti aas Nia. Entaun profeta sira buka hatene bainhira loos mak buat sira nee atu akontese i atu akontese oinsaa. 12 Kristu nia Espiritu foo hatene ba sira katak, buat nebee sira foo sai nee, laos sira mak atu haree, maibee imi mak sei haree. Liafuan Diak nebee profeta sira foo sai nee, ikus mai imi mos rona hosi ema seluk. Sira nee simu kbiit hosi Maromak Nia Espiritu hosi lalehan para haklaken Nia Liafuan Diak nee ba imi. Afinal anju sira mos hakarak teb-tebes atu hatene buat sira nee.
Ita tenki moris loos
13 Tanba nee, matan moris neon nain hodi kompriende di-diak buat sira nee hotu. Imi tenki matan moos. I hein ho laran metin nafatin atu Maromak hatudu Nia laran diak ba imi bainhira Jesus Kristu fila fali mai iha ema hotu-hotu nia oin. 14 Imi tenki rona di-diak Nai Maromak, hanesan labarik ida rona nia inan-aman. La bele halo tuir fali imi nia hakarak aat uluk nian bainhira imi seidauk konhese Nai Maromak. 15 Nia bolu ona imi atu sai Nia ema, i Nia nee laran moos. Nunee iha imi nia moris tomak, imi mos tenki moris ho laran moos. 16 Tanba iha Livru Sagradu hakerek nunee: “Imi tenki moris ho laran moos, tanba Hau laran moos.”+ 1:16 Levítiku (Imamat) 11:44-45; 19:2; 20:7
17 Bainhira imi halo orasaun, imi bolu Nai Maromak imi nia Aman. Ida nebee imi bolu Aman nee sei tesi ema hotu-hotu nia lia tuir ida-idak nia hahalok, Nia la fihir ba ema. Tanba nee imi tenki hamtauk ho respeita Nia iha imi nia moris nudar ema lao rai iha mundu nee.
18 Uluk imi moris tuir dalan nebee mak imi nia bei-ala sira hatudu hela ba imi, i dalan nee la iha folin. Maibee imi hatene katak Kristu selu kotu ona hodi hasai imi hosi imi nia moris ida uluk nee. Nia laos selu imi nia moris nee ho buat ruma nebee too ikus sei mohu, hanesan osan mean ka osan mutin. 19 Maibee Nia selu ho Nia raan rasik. Nia raan nee folin karun teb-tebes! Kristu mate hanesan bibi malae oan nebee ema oho hodi halo sakrifisiu ba Nai Maromak. Nia sai sakrifisiu ida ke moos loos, sala uitoan mos la iha.
20 Uluk liu, molok Nai Maromak halo mundu nee, Nia hili tiha ona Kristu atu selu kotu imi. Agora, mundu besik atu remata ona, foin Nai Maromak haruka Kristu mai para tulun imi. 21 Liu hosi Kristu mak imi fiar ba Nai Maromak. Tanba Maromak halo moris fali ona Kristu hosi mate hodi foti aas Nia, atu ita fiar ba Nia, i laran metin ba Nia promesa.
22 Imi hamoos ona imi nia aan hodi hatudu imi nia domin lo-loos ba maluk sarani sira, tanba imi moris tuir buat nebee mak loos. Agora hau husu atu imi hadomi malu nafatin ho fuan ho laran, 23 tanba imi hetan ona moris foun. I moris foun nee, laos mai hosi ema nebee la kleur tan sei mate, maibee hosi Nai Maromak, imi nia Aman nebee moris tinan ba tinan. Moris foun nee imi hetan liu hosi Maromak nia liafuan, tanba Nia liafuan nee iha nafatin too tinan ba tinan hodi foo moris ba ita ema. 24 Iha Livru Sagradu dehan nunee:
“Ema hotu-hotu hanesan duut.
Sira nia furak hanesan ai funan nebee moris iha rai fuik.
Duut sei namlaik, nia funan sei monu ba rai.
25 Maibee Nai Maromak nia liafuan iha nafatin.”
Nia liafuan nee mak Liafuan Diak nebee ema foo sai tiha ona ba imi.+ 1:25 Isaias (Yesaya) 40:6-8
2Jesus Kristu hanesan fatuk prinsipal
1 Tanba nee, soe tiha hahalok aat hotu-hotu! La bele bosok, la bele koalia oin ida hahalok oin seluk, la bele laran moras ba ema, i la bele hatete aat ema seluk. 2 Hanesan bebee ida nebee foin moris hamrook atu susu, nunee mos imi tenki hamrook ba Nai Maromak nia liafuan. Tanba Nia liafuan hanesan susu been diak nian ba imi nia klamar, halo imi loron ba loron buras ba beibeik, too imi hetan salvasaun. 3 Tanba imi senti ona Ita nia Nai nia laran diak.+ 2:3 Salmus (Mazmur) 34:10
4 Jesus Kristu hanesan fatuk isin nebee moris. Ema lakohi simu fatuk nee, maibee Maromak hili Nia i konsidera Nia folin teb-tebes. Imi hakbesik ona ba Jesus Kristu. 5 Nunee imi ida-ida mos hanesan fatuk isin nebee moris, i Maromak hada dadauk imi hotu too imi hamutuk sai uma ida para Nia Espiritu hela. Maromak mos halo imi sai hanesan nai lulik nebee moris ho laran moos hodi foo sakrifisiu espiritual ba Nia. I sakrifisiu nee Nia simu ho haksolok, liu hosi Jesus Kristu. 6 Tanba iha Livru Sagradu Nai Maromak dehan,
“Haree ba! Hau tau hela fatuk ida
iha sidade Siaun.
Fatuk nee folin boot teb-tebes,
i Hau hili fatuk nee para sai fatuk ida nebee prinsipal liu iha sidade nee.
See mak fiar ba Nia
sei la moe.”+ 2:6 Isaias (Yesaya) 28:16
7 Fatuk nee mak Jesus Kristu. Nia folin boot ba imi nebee fiar Nia. Maibee ba ema nebee la fiar, Livru Sagradu hakerek dehan,
“Fatuk ida nebee badaen sira lakohi uza hodi halo uma,
agora sai fali fatuk nebee prinsipal iha uma nee.”+ 2:7 Salmus (Mazmur) 118:22
8 I hakerek mos nunee:
“Fatuk nee halo ema sidi,
i halo sira monu.”+ 2:8 Isaias (Yesaya) 8:14-15
Sira sidi iha fatuk nee tanba sira lakohi rona Nai Maromak nia liafuan. I Nai Maromak mos desidi nanis ona atu sira sai nunee.
9 Maibee imi nee laos nunee. Imi nee Nai Maromak hili tiha ona hodi sai Nia povu. Imi hanesan nai lulik nebee mak serbi liurai. Imi hanesan nasaun ida nebee moris loos. Imi Maromak nia povu. Maromak hili imi nunee para imi bele konta sai buat diak nebee mak Maromak halo tiha ona ba imi. Tanba Nia mak bolu imi sai hosi nakukun hodi tama ba iha Nia naroman ida nebee furak teb-tebes.+ 2:9 Ézodu (Keluaran) 19:5-6; Isaias (Yesaya) 43:20, 21; Deutoronómiu (Ulangan) 4:20; 7:6; 14:2; Tito 2:14; Isaias (Yesaya) 9:210 Uluk imi laos Nai Maromak nia povu, maibee agora imi sai tiha ona Nia povu. Uluk imi seidauk hatene Maromak nia domin, maibee agora imi hatene ona.+ 2:10 Hoseia 2:23
Hakaas aan para moris loos
11 Maluk doben sira, imi nee ema lao rai deit, imi hela iha mundu nee la kleur ida. Tanba nee hau husu atu imi hadook aan tiha hosi imi nia hakarak nebee aat, tanba imi nia hakarak aat sempre halo funu hasoru imi nia aan. 12 Imi tenki hakaas aan para moris loos iha jentiu sira nia oin. Nunee, se sira duun matak imi, sira bele haree deit imi nia hahalok diak, i bainhira Jesus fila fali mai hosi lalehan, jentiu sira nee sei foti aas Nai Maromak nia naran.
Hakruuk ba ukun nain sira
13 Ita nia Nai Jesus hakarak imi tenki hakruuk ba ukun nain hotu-hotu iha mundu nee. Imi tenki hakruuk ba liurai, tanba nia mak ukun nain nebee boot liu. 14 Hakruuk mos ba ukun nain sira seluk, tanba liurai foti sira para kastigu ema nebee mak halo aat i gaba ema nebee mak hahalok diak. 15 Tanba Nai Maromak hakarak para imi halo buat nebee diak, atu ema beik-teen sira nebee mak la hatene buat ida, la iha liafuan ida atu koalia hasoru imi. 16 Imi simu ona liberdade hosi Maromak. Nunee imi tenki moris hanesan ema nebee livre ona. La bele uza imi nia liberdade nee hodi taka fali imi nia hahalok aat, maibee moris hanesan Maromak nia atan. 17 Hatudu respeitu ba ema hotu-hotu, hadomi imi nia maluk sarani sira, hamtauk Nai Maromak, i respeita liurai.
Aguenta iha terus laran hanesan Jesus Kristu
18 Atan sira, hakruuk ba imi nia patraun, i respeita sira. La bele hakruuk deit ba patraun nebee mak laran diak i ibun midar. Maibee hakruuk mos ba patraun nebee mak siak-teen. 19 Tanba se ema kastigu imi maski imi la sala, i depois imi aguenta ho pasiensia nafatin tanba imi hanoin Maromak, entaun imi nia hahalok nee halo haksolok Maromak nia laran. 20 Se karik imi halo sala mak ema baku, i imi simu terus nee ho pasiensia, imi manaan saida? Maibee se imi hetan terus tanba halo buat diak, depois imi aguenta, ida nee mak halo haksolok Maromak nia laran. 21 Maromak bolu imi para moris nunee, tanba Kristu mos terus ba imi. Nunee Nia sai ezemplu atu imi lao tuir nia ain fatin. 22 Iha Livru Sagradu hakerek nunee:
“Nia nunka halo sala.
Liafuan bosok nunka sai hosi Nia ibun.”+ 2:22 Isaias (Yesaya) 53:9
23 Bainhira ema tolok Nia, Nia la hataan. Bainhira ema halo Nia terus, Nia la ameasa atu halo aat fali sira. Maibee Nia entrega Nia Aan ba Nai Maromak nia liman, tanba Maromak mak tesi lia ho lo-loos.+ 2:23 Isaias (Yesaya) 53:724 Kristu rasik mak lori ita nia sala iha ai krus leten para ita bele livre hosi sala hodi moris loos. Nia kanek nee mak kura ona imi.+ 2:24 Isaias (Yesaya) 53:625 Uluk imi hanesan bibi malae nebee mak lao sala dalan. Maibee agora imi fila fali ona ba imi nia Bibi Atan, i Nia mak tau matan ba imi.
3Lia menon ba feen-laen
1 Hanesan ita hotu tenki hakruuk ba ita nia ukun nain sira, nunee mos imi feen sira tenki hakruuk ba imi nia laen. Nunee se imi nia laen sira la fiar ba Maromak nia liafuan karik, sira bele haree imi nia moris nebee hatudu laran moos ho respeitu. Too ikus sira mos bele fiar, laos hosi imi nia liafuan, maibee hosi imi nia hahalok nee.+ 3:1-2 Éfezu 5:22; Kolose 3:18
3 Imi feto sira nia furak laos hosi buat nebee mak imi tau ba imi nia isin lolon, hanesan hadia fuuk tuir modelu oi-oin deit, tara osan mean, ka hatais ropa folin karun.+ 3:3 1 Timóteo 2:9-104 Maibee buat nebee mak halo imi feto sira sai furak mak imi nia laran. Feto nebee laran maus ho kalma, sira nee mak furak ba nafatin, i Maromak mos foo folin ba sira nia hahalok nee. 5 Feto sira nebee uluk moris ho laran moos hodi laran metin ba Maromak, sira nia furak mos nunee. Sira hakruuk ba sira nia laen, 6 hanesan Sara. Nia rona nia kaben Abraão hodi respeita nia too bolu nia “patraun”. Imi mos sai hanesan Sara nia oan, se imi halo buat nebee mak loos i la tauk buat ida.+ 3:6 Hahuu (Jénesis, Kejadian) 18:12
7 Nunee mos imi laen sira. Imi tenki uza matenek oinsaa mak atu moris hamutuk ho imi nia feen. Hatudu imi nia respeitu ba sira tanba imi kompriende katak sira nia forsa la hanesan imi nian, i imi hamutuk sei simu moris rohan-laek tanba Maromak nia laran diak ba imi. Halo nunee para Maromak rona nafatin imi nia orasaun.+ 3:7 Éfezu 5:25; Kolose 3:19
Hadomi malu, i prontu simu terus tanba halo buat diak
8 Agora hau husu para imi hotu neon ida laran ida, hadomi imi nia maluk sarani sira, hatudu laran maus ba malu i haraik aan. 9 Se ema ruma halo aat ba imi, la bele halo aat fali ba sira. Se ema ruma hatete aat imi, la bele hatete aat fali sira, maibee harohan atu Nai Maromak halo buat diak ba sira. Tanba Nai Maromak bolu imi atu halo nunee para imi mos hetan bensaun hosi Nia. 10 Iha Livru Sagradu hakerek dehan,
“Ema nebee mak buka moris diak,
i buka moris naruk,
nia tenki kuidadu nia ibun para la bele koalia aat,
i la bele koalia bosok.
11 Nia tenki fila kotuk ba buat aat
hodi halo buat nebee diak.
Nia tenki hakaas aan atu moris dame malu ho ema hotu-hotu,
i buka nafatin dame too hetan.
12 Tanba Nai Maromak tau matan ba ema nebee mak moris loos,
Nia see tilun ba sira nia orasaun.
Maibee Nai Maromak kontra ema nebee mak halo aat.”+ 3:12 Salmus (Mazmur) 34:12-17
13 Se imi hakaas aan halo buat nebee diak, ema atu halo aat imi ka? 14 Maibee bele mos akontese. I se imi halo duni buat nebee loos mak ema halo terus imi, entaun imi sorti boot. Se nunee, la bele tauk ema i la bele hanoin barak.+ 3:14 Mateus 5:1015 Respeita ho tauk mak Kristu, tanba imi tau tiha ona Kristu iha imi nia laran nudar imi nia Nai.
Se ema ruma husu imi, tanba saa mak imi laran metin ba Nai Maromak, imi tenki prontu hataan. Maibee hataan ho liafuan mamar ho respeitu.+ 3:15 Isaias (Yesaya) 8:12-1316 Imi nia laran tenki moos. Karik ema balu koalia aat imi hodi kritika buat diak nebee mak imi halo tanba imi tuir Kristu. Maibee se imi halo diak nafatin, too ikus sira rasik moe ba sira nia liafuan nee. 17 Se Nai Maromak hakarak para ita hetan terus tanba halo buat diak, ida nee diak liu duke hetan terus tanba halo buat aat.
18 Kristu mate dala ida deit
tanba ita ema nia sala.
Ida nebee moris loos mate ba sala nain sira
para lori imi ba Nai Maromak.
Nudar ema nebee iha isin ho raan, ema oho tiha Nia,
maibee Maromak nia Espiritu halo moris fali Nia.
19 Maromak nia Espiritu mos foo kbiit ba Kristu hodi baa foo sai Nai Maromak nia liafuan ba matebian sira nebee sei dadur hela. 20 Sira nee mak uluk lakohi halo tuir Nai Maromak nia liafuan iha Noé nia tempu. Bainhira Noé halo roo boot, Nai Maromak hein ho pasiensia para ema sira nee hakribi sira nia sala, maibee sira lakohi arepende. Too ikus bee sae, i ema nain walu deit mak hetan salvasaun iha roo laran.+ 3:20 Hahuu (Jénesis, Kejadian) 6:1—7:2421 Bee boot nee hanesan ezemplu kona ba batizmu, tanba agora nee batizmu mak foo salvasaun ba imi. Bainhira imi simu batizmu, bee nee laos atu hasai foer iha imi nia isin, maibee bee nee signifika katak, imi harohan para Nai Maromak hamoos imi nia neon ho laran. Batizmu nee bele foo salvasaun ba imi tanba Jesus Kristu moris fali ona hosi mate. 22 Agora Nia sae tiha ona ba lalehan hodi tuur iha Nai Maromak nia sorin loos. I anju sira ho espiritu bo-boot sira nebee kaer ukun, sira hotu-hotu hakruuk ba Nia.
4Ita tenki moris tuir Nai Maromak nia hakarak i prontu simu terus
1 Bainhira Kristu sei iha mundu, Nia hetan terus ho susar oi-oin. Entaun imi mos tenki prontu simu terus, tanba ema nebee mak terus iha nia moris, nia la halo tan sala. 2 Nunee, agora ba oin imi nia moris iha mundu nee sei tuir deit Nai Maromak nia hakarak, imi nia hakarak rasik imi la tuir tan ona. 3 Tanba uluk imi soe tempu barak hodi moris hanesan ema nebee la konhese Nai Maromak. Iha tempu nebaa imi moris la hatene moe, imi kaan atu halo sala seksual, imi sai lanu-teen, i halo festa hemu lanu too halo arbiru tuun-sae. Imi mos adora lulik, maski adora lulik nee halo Nai Maromak hakribi. 4 Agora ema nebee la konhese Maromak, sira la kompriende nusaa mak imi la halo tuir ona sira nia hahalok aat oi-oin nee, i sira hatete aat imi. 5 Maibee aban-bainrua sira tenki hataan iha Nai Maromak nia oin. Nia prontu atu tesi ema hotu-hotu nia lia, atu ema nebee mak mate tiha ona ka ema nebee mak sei moris. 6 Tanba nee mak uluk Jesus baa foo sai Liafuan Diak ba ema nebee mate tiha ona. Nunee maski nudar ema sira hetan kastigu iha mundu nee, maibee aban-bainrua sira nia klamar bele moris hamutuk ho Nai Maromak.
Uza di-diak kbiit nebee Nai Maromak foo
7 Mundu nee besik remata ona. Tanba nee imi tenki hanoin klean i domina aan para bele halo orasaun ho diak. 8 Importante liu tan mak imi tenki hadomi malu ho laran tomak. Tanba bainhira ita hadomi malu, ita hatene perdua ita nia maluk, maski nia halo sala barak hasoru ita.+ 4:8 Provérbiu (Amsal) 10:12; João 13:34-359 Simu ema seluk iha imi nia uma ho laran haksolok.
10 Nai Maromak foo kbiit ba imi ida-idak la hanesan. Uza di-diak kbiit nebee Nia foo ba imi nee hodi serbi ema seluk. 11 See mak hetan kbiit para koalia, nia tenki koalia liafuan hosi Maromak. I see mak hetan kbiit para serbi ema seluk, nia tenki serbi ho forsa tomak nebee nia hetan hosi Maromak. Se imi halo nunee, ema sei haree katak imi halo buat hotu-hotu tanba Jesus Kristu, i sira sei hahii Nai Maromak. Mai ita foti aas Nia naran too tinan ba tinan. Nia ukun la hotu la remata. Amen.
Terus tanba sai Kristaun
12 Maluk doben sira, agora dadauk imi terus hela, i terus nee koko imi. La bele hakfodak, i la bele hanoin dehan ema nebee fiar Nai Maromak sei la hetan terus. 13 Maibee haksolok ba, tanba imi bele hetan terus hanesan Kristu uluk mos terus. Se imi haksolok nunee, aban-bainrua bainhira ema hotu-hotu haree Jesus Kristu fila fali mai ho naroman lalehan nian, imi sei haksolok liu tan. 14 Bainhira ema hatete aat imi tanba imi fiar ba Kristu, imi sorti boot, tanba Espiritu naroman lalehan nian hela iha imi. Espiritu nee mak Maromak nia Espiritu. 15 Keta halo be imi terus tanba imi sai oho-door, ka naok-teen, ka halo buat aat saida deit, ka sai ema nebee mete ema nia moris. 16 Maibee se imi hetan terus tanba imi sai Kristaun, la bele moe. Diak liu imi hahii Nai Maromak tanba imi lori Kristu nia naran.
17 Tempu too ona atu Nai Maromak tesi ema nia lia. Nia sei foo justisa uluk ba Nia oan sira. Se ita mos hetan justisa, saa tan ema nebee mak lakohi rona Maromak nia Liafuan Diak! Sira nia kastigu sei todan. 18 Tanba iha Livru Sagradu hakerek dehan,
“Se ema nebee moris loos mos susar atu hetan salvasaun,
saa tan ema nebee la interese Maromak hodi moris iha sala nia laran!”+ 4:18 Provérbiu (Amsal) 11:31
19 Entaun se imi terus tanba Nai Maromak hakarak nunee, imi tenki halo nafatin buat nebee mak diak hodi entrega imi nia aan tomak ba Nia, tanba Nia mak imi nia Kriador i Nia sempre halo tuir Nia promesa.
5Lia menon ba responsavel sarani sira
1 Agora hau hakerek ba responsavel sarani sira. Hau mos responsavel sarani hanesan imi. Hau rasik akompanha Kristu nia terus. I aban-bainrua bainhira ema hotu-hotu haree Kristu fila fali mai ho naroman lalehan nian, hau mos sei simu naroman lalehan nee. Hau husu ba imi responsavel sira, 2 tau matan di-diak ba ema nebee mak Nai Maromak entrega ona ba imi, hanesan bibi atan nebee tau matan ba nia bibi sira. Haree di-diak sira, laos tanba imi nia obrigasaun, maibee hosi imi nia laran, tuir Nai Maromak nia hakarak. Imi la bele servisu hanesan ema nebee mak hakarak manaan osan deit, maibee tenki servisu ho badinas hodi serbi sarani sira.+ 5:2 João 21:15-173 La bele foti aan hodi manda tuun-sae sarani sira nebee mak Nai Maromak foo ba imi atu tau matan. Maibee imi tenki sai ezemplu nebee diak para sira bele halo tuir. 4 Se imi halo nunee, aban-bainrua bainhira bibi atan sira nia Xefi fila fali mai, imi sei simu premiu naroman lalehan nian, i premiu nee dura ba nafatin.
Lia menon ba sarani sira
5 Nunee mos imi foin-sae sira, imi tenki hakruuk ba ferik-katuas sira. Sarani hotu-hotu la bele foti aan, maibee tenki haraik aan ba malu, tanba iha Livru Sagradu hakerek nunee:
“Nai Maromak kontra ema nebee mak foti aan,
maibee Nia hatudu Nia laran diak ba ema nebee mak haraik aan.”+ 5:5 Provérbiu (Amsal) 3:34
6 Tanba nee haraik aan ba Nai Maromak Kbiit Nain, para bainhira too iha nia tempu, Nia foti aas imi.+ 5:6 Mateus 23:12; Lucas 14:11; 18:147 La bele preokupa ba imi nia problema, maibee entrega hotu ba Nai Maromak, tanba Nia sempre tau matan ba imi.
8 Matan moris neon nain, tanba imi nia inimigu diabu nia boot hakarak estraga imi, hanesan leaun nebee mak lao baa-mai ho lian makaas hodi buka ema atu haan. 9 Imi tenki hamriik firmi hasoru nia hodi kaer metin imi nia fiar, tanba imi hatene katak imi nia maluk sarani sira iha mundu tomak mos hetan terus hanesan imi. 10 Maski agora imi terus, maibee la kleur tan Nai Maromak rasik sei halo imi diak fila fali. Nia sei foo forsa ba imi, i halo imi hamriik metin hodi aguenta nafatin. Tanba Nia sempre hatudu Nia laran diak ba ita ema i Nia rasik mak bolu imi atu simu Nia kbiit ho naroman lalehan nian too tinan ba tinan, hamutuk ho Kristu. 11 Maromak deit mak iha kbiit hodi ukun buat hotu-hotu too tinan ba tinan. Amen.
Pedro taka nia surat
12 Silas mak ajuda hau hakerek surat badak nee. Nia nee ita nia maluk sarani nebee hau konfia.+ 5:12 Liafuan Gregu dehan Silvano. Nee Silas nia naran seluk. Bele lee nia istoria iha Atos ( Kisah ) 15:22, 32-40. Hau hakerek surat nee ba imi para hametin imi nia laran, i foo sasin lo-loos kona ba Maromak nia laran diak. Hamriik metin ba, i la bele fila kotuk ba Nia laran diak nee.
13 Sarani sira hosi Babilónia foo kumprimentus ba imi. Nai Maromak hili sira hanesan mos Nia hili imi. Marcos mos foo kumprimentus. Hau haree nia hanesan hau nia oan rasik.+ 5:13 Apostolu sira nia Istoria (Atos, Kisah) 12:12; 25; 13:13; 15:37-39; Kolose 4:10; Filemon 24
14 Kumprimenta malu ho domin. Hau harohan para imi hotu nebee fiar ba Kristu bele moris iha paz ho hakmatek.