Mga Ipiyalteg it Ampuꞌan nga si Jesus it ki Juan (Apocalipsis)
Mga Ipiyalteg
Pauꞌnang Sugi-sugid
Kat timpu ngayti ni Juan nga simnurat it itung kasuratan, talagang magꞌereꞌeret nay pakuriꞌ it mga Romano kat mga magpamayaꞌ it Ampuꞌan nga si Jesus. Aypaꞌ tiyaꞌeg it Ampuꞌan si Juan nga sumurat ka ipataban duꞌun it kasubung ya nga mga magpamayaꞌ, isaꞌun kemseg i pagsarig baw pamayaꞌ nira, maski pagꞌatkaytiyen na ngayti sira.
Sunud-sunud i belag-belag nga mga alimbawa kat kasuratan ngaytu, mga bagay pasar it ki Jesus nga ipiyalteg it ki Juan it subuk pagtagaynepen ya. Makuriꞌ nga masepsepan in unuy pagpaꞌiguꞌan it mga alimbawa ngaytu temed uliꞌan-uliꞌan it muꞌsa, ega lulugud-lugudun si Jesus ngaytu. Kanya talagay Ampuꞌang Diyus ka Diyus Amaꞌ baw Anak, sang kagina-ginawaan sira. Kat kamataynen ni Jesus, inindaꞌeg ya si Satanas nga pagbayaꞌen it mga mararaꞌe-raꞌet baw mabut i aldaw nga talagang maꞌawaꞌ sira, ka iduꞌun it panrigaan it kanira. Duꞌun betanganan sira it egay pateng nga panriga nga egay kaskedan.
Ta kayti, kumpur magpakilagpit it ki Jesus ngaytu, maski sang unuy kadakulat pakuriꞌ it kanira, kaꞌilangan teꞌteꞌ i pagsarig baw pamayaꞌ nira, ka in atkayan siguradung kasagpun sira duꞌun it ega basta-bastang kagayenan duꞌun it Ampuꞌan asan it baꞌguun nay banwa.
11Itung mga magsusurat nga magbebtang situt kasuratan ngaytu, mga bagay nga ipiyaꞌrut it Ampuꞌang Diyus it ki Jesu-Cristo pasar it ipiyabetang-betang nga mabut asat pagdadarapaꞌen, ka ipalteg ya nat mga magsirbi it kanya. Muꞌsa ngaytu ipiyalteg nga matuud ni Jesu-Cristo it ki Juan nga manigsirbi ya, ka may tiyaꞌeg yang anghil ya nga palteg kaytu. 2Talagang pamatuud tu ni Juan it muꞌsa nga naltegan ya nga ipiyalteg it kanya nga ampang it Ampuꞌang Diyus nga ipiyamatuud ni Jesu-Cristo. 3Aypaꞌ dedemdemen mi tu! Magkasagyay in siyu nga magbasa duꞌun it katingpedan it mga magpamayaꞌ it kasuratan ngaytung ampang nga garing duꞌut Ampuꞌang Diyus. Baw magkasagya gasiꞌ i iyan magpagneg basta pagsunudun yay kumpur pagꞌaaten. Sabap adeꞌdeng lamang i timpu nga magꞌabut i mga itu ngaytu.
Pangumusta ni Juan duꞌut mga pagsuratan ya baw pagbantug yat Ampuꞌang Diyus
4Aku nga si Juan i magsurat asat imyu, mga gurupu it mga magpamayaꞌ baw magsarig it Ampuꞌan kat pitung rugar nga sakep it Asia. Ipagpanalangin ku nga sana asat imyu nga pirmi i ildaw baw kaꞌimbengan it nakem nga ipagbegay it Diyus Amaꞌ, baw Ampuꞌan nga si Jesu-Cristo baw Espiritu Santo.1:4 Maat it Ginirego, pitung Espiritu. Takaꞌ kat ampang it Ampuꞌang Diyus, basta rumiru pitu, esa-esay ireg sugiden, kumplitu. Ta Espiritu Santo ngaytu, egay maski unu nga kurang ya. Kumplitung-kumplitu talaga. Diyus Amaꞌ ngaytu, egen it egay kaskedan, ka garing it tagnaꞌ paꞌ may kanya na, pati kayti baw seked it kaꞌnu-kaꞌnu may kanya ga lamang. Baw Espiritu Santo ngaytu, tuluꞌ tu kanya it Ampuꞌang Diyus ngayting magꞌaꞌdung duꞌun it araꞌdungan ya kat pagkaꞌadiꞌ. 5Kanya ngaytung si Jesu-Cristo, purus kamatuudan i kumpur ipagpamatuud ya. Iti, inggen kanyat Ampuꞌang Diyus it paꞌuliꞌ. Talagang kanya i piyakamataꞌas kat muꞌsang egnen paꞌ it paꞌuliꞌ. Baw kanya ngaytu i magbebegbeg it maski siyung magsasakep nga subuk mga adiꞌ situt sinirungat langit.
Sana bantugun tami si Jesu-Cristo, nga magraras talaga it aten. Sabap kat kamataynen ya, nga ipiyaturuꞌ yay duguꞌ ya, ipiyaliꞌwan ya na kita kat panguripen it kasalaꞌan. 6Binwat ya paꞌ kita nga bilang sasirduti, ka sirbiyan tami nay Ampuꞌang Diyus nga Amaꞌ ya. Baw mabut talaga nga magꞌadiꞌ tami nga bilang mga kaꞌibaan ya duꞌun it kaꞌadiꞌan ya. Eeꞌ baꞌ, bantugun kanya nga pirmi, baw magmatanyag talagay keseg it guna ya seked it kaꞌnu-kaꞌnu. Kamatuudan tu!
7Dedemdemen mi tu, mabut kanya nga subuk mangindelangan it kunum. Talagang maltegan tu it muꞌsang katataawan, pati mga nagꞌimatay it kanya. Ta sabap it kanya ngaytu, sumgaw i muꞌsang bangsat taw situt sinirungat langit, ka matantuwan na niray panriga. Talagang matkaytuytu nga matuud.
8Maat it Ampuꞌang Diyus, “Akuy uꞌna it muꞌsa baw aku naga i kat sinauryan. May aku naga garing it tagnaꞌ paꞌ, baw seked it kaꞌnu-kaꞌnu may aku paꞌ. Talagang egay kasbung it guna ku.”
Nagpakikita si Jesu-Cristo it ki Juan
9Talagang aku nga si Juan, sulsug mi kat pamayaꞌ baw kaꞌibaan mi naga it pagpakuriꞌan sabap it pamayaꞌ tami it ki Jesus. Baw esa aku nagang sinakepan it kaꞌadiꞌan ya, baw kasubung mi it temeꞌteꞌ it pagsunud it ki Jesus ngaytu. Idiyuꞌlung aku duꞌun it pulaw nga pagpangaranat Patmos,1:9 Patmos ngayti, dekeyeng pulaw nga pagduꞌlungan it mga Romano it mga pirisu nira. ka yay ukuman it aken sabap it pangadal kut ampang it Ampuꞌang Diyus baw pamatuud kut mga bagay pasar it ki Jesus. 10Iyan kaꞌsa, nga aldaw nga pagkilalaen tami nga ipagsamba tamit Ampuꞌang Diyus, kat pabetang-betang it Espiritu Santo, sakaliꞌ nga nagsipat i banwa. Sakaling may nagnegan ku kat talikudan ku nga ayun nga panggaꞌmarang dadakulaꞌ nga subuk pagꞌeypan nga taburi. 11Magꞌaat i pagꞌaaten, “Kaꞌilangan nga isurat mu kat magkaluu-lulun nga pagsuratan in unu nga bagay nga maltegan mu, bawnga ipataban muytu kat pitu ngaytung karugaran nga may magpamayaꞌ it Ampuꞌan, nga duꞌun it Efeso, Esmirna, Pergamo, Tiatira, Sardis, Filadelfia baw duꞌun it Laodicea.”
12Pagkagneg ku, limningaw aku, ka in siyuy magpakisugid ngaytit aken. Naltegan ku, pitung titidawan nga magtitindeg i dadaꞌtunan nira nga purus bulawan i binwat. 13Baw magtitindeg duꞌun it piyagtenga-tengaꞌan it mga titidawan ngayti i subuk Taga Langit nga Ipiyanganak it Taw, magpapakay it pasaꞌkil i kasagyad baw kat deꞌgan ya may maglilikus nga bulawan nga sambut. 14Kaputiꞌ it buꞌuk ya subuk namukaꞌ na nga langeb, baw iyan mata ya, atnat sugu it apuy. 15Magsinggat i mga aꞌay ya subuk pirmirang tumbaga nga tiyunaw baw piyakintab. Gaꞌmaran ya subuk bugasꞌas it dakulang kensad. 16May pagseskelen it iwanan nga alima ya nga pitung kabituꞌunan, baw may magliꞌwan duꞌun it baꞌbaꞌ ya nga atnang panare-tarem it basiꞌ nga limbak tarem. Baw iyan rupa ya, ereꞌeret nga kabibisaraꞌ, ka subung it aldaw in nakasakay nat ugtuwan.
17Pagkalteg kut kanya ngayti, simnuꞌsub aku na duꞌut aꞌay ya. Ega nakariꞌe-riꞌeng aku ka subuk ega nay giginawa ku. Temed tiyapal ya aku it iwanan nga alima ya baw inaat ya, “Ayaw kat iꞌlam. Aku i uꞌnat muꞌsa baw aku nagay kat sinauryan. Talagang kat pamegbeg ku i muꞌsa. 18Egen aku talaga it ega basta-bastang kaꞌgenan. Matuud natay aku temed egen aku naga kayti. Ega naytuy kaskedan it kaꞌgenan ku ngaytu. Talagang kat pamegbeg ku nay keseg it kamataynen baw rugar nga pagꞌaꞌanuꞌan it mga miyatay.
19Aypaꞌ isurat muy mga bagay nga naltegan mu na baw mga bagay nga maltegan mu paꞌ, nga pagpaꞌulugan it muꞌsa ngaytu, mga nagꞌabut na kayti baw iyan mga magꞌabut paꞌ asan it pagdadarapaꞌen. 20Kayti ipatantu kut imu i pagpaꞌulugan it naltegan mu nga pitung kabituꞌunan nga pagseskelen it iwanan nga alima ku baw pitu ngaytung titidawan nga magtitindeg i dadaꞌtunan nira nga purus bulawan i binwat. Iyan pitu ngaytu nga bituꞌun, ladawan tu it pitu nga taraꞌgen nga magpamaalaꞌ it mga magpamayaꞌ duꞌun it pitu ngaytung karugaran. Baw itu, pitu ngaytung titidawan, itu naga, mga magpamayaꞌ duꞌun it pitu ngaytung karugaran.”
2Kusugiden ni Jesus duꞌun it mga magpamayaꞌ it kanya nga duꞌut Efeso
1Bawnga inaat yat aken, nga magꞌaat, “Ituy ibtang mu asat surat nga ipataban mu duꞌun it manigpamaalaꞌ it mga magpamayaꞌ it aken duꞌut Efeso. Aaten mu nga, ‘Ituy ipagkusugid it iyan kanya nga may sekel ngaytu kat iwanan nga alima ya nga pitung kabituꞌunan, kanya ngaytung magpanaw kat piyagtenga-tengaꞌan it pitung titidawan nga magtitindeg i dadaꞌtunan nira nga purus bulawan i binwat. 2Urut ku talaga i buwat mi nga mga magpamayaꞌ asan. Magpaꞌres kamu it paꞌres banar baw teꞌteꞌ talagay pamayaꞌ mi it kamatuudan. Talagang magkaltegan ku nga ega pagpasaleꞌsegen mi i magbuwat it maraꞌe-raꞌet asan it imyu. Siyukda-sukdanan mi i iyan mga magpaꞌapu-apustul asan, baw natantuwan mi nga magpaꞌapu-apustul sira nga matuud. 3Magkaꞌrutan ku gasiꞌ nga teꞌteꞌ kamu kat pamayaꞌ baw pagsagkaꞌen mi it magayen i nakem in pagpakuriꞌan kamu sabap it pamayaꞌ mi ngaytut aken. Daꞌkamu magkaskedan.
4Temed may bagay naga nga magkaꞌiway ku it imyu. Magdekeyeꞌ nay pagmaꞌal mit aken kayti, ega na subung it tagnaꞌ ngayti. 5Sana demdemen mi naga i kadakulat pagmaꞌal mit aken iyan baꞌgu kamu paꞌ nga nagpasakep it aken. Bawnga pikiren mi kayti in sang unu nay kakurangan ya, isaꞌun masinguliꞌan mi i itu ngaytu. Kaꞌilangan, iyan siꞌ i buwaten mi, subuk buwat mi ngaytit tagnaꞌ. Ka basta daꞌkamu magsinguliꞌ it kamatuudan, talagang asanen ku kamu ka awaꞌen kuy titidawan mi, pati magtitindeg nga dadaꞌtunan ya asat puwistuꞌ ya. Bibasen ta nayan kamu. 6Temed may bagay naga nga pagsagyaan kut imyu, adat mi nga subuk aken nga pagꞌisgan i mga maraꞌway nga pagbuwaten it mga Nicolaita.2:6 Mga Nicolaita nga paꞌaaten, esang gurupu it mga taw kat timpu paꞌ ni Juan, nga magpaneꞌag-teꞌag it beken nga mga magpamayaꞌ kat panulduꞌ nga magꞌaat nga, maski taawan nat Ampuꞌang Diyus, mapakay naga nga pagsumbayaꞌen i kumpur kubwaten nira nga pamakun duꞌun it ega asawa nira. Baw mapakay gasiꞌ nga magsirbi it mga pagbete-beteꞌen nga diyus nga pagsirbiyan it mga egay pamayaꞌ it Ampuꞌang Diyus.
7Aypaꞌ it pagꞌargan it talinga, ipagpagneg, kaꞌilangan pagnegan mit magayen i pagꞌaaten ngaytu, nga ipagpatantu it Espiritu Santo kat mga magpamayaꞌ baw magsarig it aken. Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, begayan ku kanyat pudir nga makakaꞌen it buwaꞌ it kayu nga magbegay it kaꞌgenan, nga duꞌun it kalu-kalulwakan it Ampuꞌang Diyus.’ ”2:7 Basaen i duꞌut Genesis kapitulu 2 baw kapitulu 3 pasar it kayu ngaytu.
Kusugiden ni Jesus duꞌun it mga magpamayaꞌ it kanya nga duꞌut Esmirna
8“Itu gasiꞌ i ibtang mu kat surat nga ipataban duꞌun it manigpamaalaꞌ it mga magpamayaꞌ it aken nga duꞌut Esmirna. Aaten mu nga, ‘Ituy ipagkusugid it iyan kanya nga uꞌna it muꞌsa baw kat sinauryan naga, kanya nga lamang natay temed nagꞌegen nagat paꞌuliꞌ. 9Talagang magkaltegan kuy mga paglabayen mi ka pagpakuriꞌan kamu. Urut ku nagay kakuriꞌ mi. Temed yay matuud, pasar it kamanggadan nga garing it aken, manggaden kamu talaga. Baw magkaltegan ku gasiꞌ i mga taw nga magbete-beteꞌ nga mga taawan ku sira, temed panibabaꞌ ga lamang tut aken. Ka yay matuud, sang siraan yan nga magsirbi it ki Satanas. 10Ega na iꞌlaman mi i mga pakuriꞌ nga magꞌadeꞌdeng na nga labayen mi. Eeꞌ baꞌ, kat buwat-buwat ni Satanas may mapirisu yan it imyu ka pagsukda-sukdanan i pamayaꞌ mi. Kaꞌilangan sagkaꞌen mi i pakuriꞌ ngaytu seledan it sang pulung aldaw. Teꞌteꞌan mi lamang aku maski maat ikagtas nat ginawa mi, ka siguradu yan nga ibgay kut imyu i tumbas nga kaꞌgenan nga egay kaskedan.
11Aypaꞌ it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu nga ipagpatantu it Espiritu Santo kat mga magpamayaꞌ baw magsarig it aken. Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, talagang ega na labayen yay ikadwang kamataynen, nga egay kaskedan nga kakuriꞌan.’”
Kusugiden ni Jesus duꞌun it mga magpamayaꞌ it kanya nga duꞌut Pergamo
12“Ituy ibtang mu duꞌun it surat nga ipataban duꞌun it manigpamaalaꞌ it mga magpamayaꞌ it aken nga duꞌut Pergamo. Aaten mu nga, ‘Ituy ipagkusugid it iyan kanya nga magseskel it atnang panare-tarem it basiꞌ nga limbak tarem. 13Talagang magkaꞌrutan kuy kabetangan mi, nga pagtataꞌidan mi ngayan, pagsasakpan ni Satanas. Takaꞌ lamang atkayan, talagang teꞌteꞌ i pamayaꞌ mit aken. Daꞌkamu magpangindiꞌ it pagsarig mit aken, maski tagnaꞌ ngayan nga pagꞌimatay it ki Antipas nga matuud nga manigsirbi ku nga nanindeg it aken maski ikiyagtas na it ginawa ya, asan it rugar mi ngayang pagsasakpan ni Satanas.
14Temed may pirang mga bagay nga magkaꞌiway ku asat imyu. May pira it imyu asan nga magsunud paꞌ it pangadal ni Balaam nga timnulduꞌ it ki Balak it tagnaꞌ paꞌ nga ipakursud i mga Israelita isaꞌun magkasalaꞌan sira. Ta sabap it itiꞌen ngayti, kimnaꞌen nay mga Israelita it karniꞌ nga ipagsalisi duꞌun it mga pagbete-beteꞌen nga diyus. Unupat minwat na sira it mga mararaꞌway nga buwat duꞌun it ega asawa nira. 15May pira gasiꞌ asat imyu nga magsunud it mga ipagpangadal it mga Nicolaita.2:15 Basaen i paꞌyag duꞌun it birsikulu 6 it kapitulu ngaytu. 16Aypaꞌ ka, kaꞌilangan nga magsinguliꞌ sira baw indiꞌan i mga kasalaꞌan nira ngaytu. Ka in daꞌga, asanen ku yan kat madaliꞌ nga timpu ka puuꞌun kuy mga taw ngayan it basiꞌ ngaytu nga magliꞌwan kat baꞌbaꞌ ku.2:16 Basiꞌ ngaytu nga paꞌaaten, ampang ya nga may guna. Basaen i duꞌut Genesis kapitulu 1, Juan 11:38-44 baw Efeso 6:17.
17Ta it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu nga ipagpatantu it Espiritu Santo kat mga magpamayaꞌ baw magsarig it aken. Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, siguradung may ibgay kut kanya nga magꞌaꞌareg sinit langit nga ega paꞌ magkaltegan it taw, iyan manna nga ipagkaꞌgen it egay kaskedan. Begayan ku gasiꞌ kanya it maputiꞌ nga batu nga pagsusuratan it esang ngaran nga baꞌgu nga egay maski siyung makaꞌrut, in daꞌga iyan lamang nga nabgayan kayan.’ ”
Kusugiden ni Jesus duꞌun it mga magpamayaꞌ it kanya nga duꞌut Tiatira
18“Ituy ibtang mu asat surat nga ipataban duꞌun it manigpamaalaꞌ it mga magpamayaꞌ it aken duꞌut Tiatira. Aaten mu nga, ‘Ituy ipagkusugid it iyan kanya nga Anak it Ampuꞌang Diyus, nga subuk sugut apuy i mata ya baw mga aꞌay ya, magsinggat nga subung it piyakintab nga tumbaga. 19Talagang magkaꞌrutan kuy mga pagbuwaten mi, baw magkaꞌrutan ku gasiꞌ i pagmaꞌal baw pagsarig mit aken. Magkaltegan ku nagay pagsirbi baw paneꞌteꞌ mi. Urut ku gasiꞌ nga muꞌsa ngaytu, dakulaꞌ pay pagbuwaten mi kayti it buwat mit tagnaꞌ, iyan baꞌgu kamu paꞌ nga namayaꞌ it aken.
20Temed ituy pagꞌisgan ku, in unuka pagpalugtan mi si Jezebel,2:20 Subung tu it babay ngaytit tagnaꞌ nga pagpangaranan it ki Jezebel, nga maraꞌe-raꞌet talagay adat. Basaen i duꞌut 1 Mga Adiꞌ 21:1-25. iyan babay ngayan nga maat pagtaꞌgen it Ampuꞌang Diyus, arit ega. Talagang kat pangadal ya pagteꞌag-teꞌagen yay mga magsirbi it aken asan. Ipagpakursud ya kat buwat nga maraꞌway duꞌun it ega asawa nira, baw pagꞌidek-ideken ya paꞌ sira nga kumaꞌen it mga pangaꞌen nga ipagsalisi duꞌun it mga pagbete-beteꞌen nga diyus. 21Binggayan ku na kanyat rugar nga magsinguliꞌ baw indiꞌan i mga maraꞌway ngaytu nga pangaꞌgenan ya, temed talagang pagtemden ya na nga ega indiꞌan ya. 22Aypaꞌ rigaen ku na kanya. Manarakiten yan kanya. Pati mga taw ngayan nga kaꞌibaan ya kat maraꞌway ngayting mga pagbuwaten. Makuriꞌ talagay ipalabay kut kanira basta ega singuliꞌan baw indiꞌan niray mga karaꞌe-raꞌetan ngayan nga pamagbuwaten nira. 23Pangimatayen ku gasiꞌ i mga anak ya nga lupaw. Sikayan maꞌrutan it muꞌsang magpamayaꞌ nga aku i manigrikisaꞌ it kaꞌirgan baw in unuy kat nakem it taw. Talagang tumbasan kuy kada esat imyu uyun kat mga pagbuwaten mi.
24Temed itu nagay iꞌaat kut iyan beken asat imyu nga taga Tiatira nga ega naga simnunud it maraꞌe-raꞌet ngaytu nga ipagpangadal ni Jezebel baw ega naga nanlebes it mga kepetan ya nga garing duꞌut ki Satanas, ega pabeꞌgaten kuy pagsunud mit mga urdin. 25In daꞌga itu na lamang i ipagꞌurdin kut imyu. Teꞌteꞌan mi i pamayaꞌ baw pagsarig mit aken seked it mabut aku.
26Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, baw magsunud nga pirmi it kaꞌirgan ku seked it umur, ibgay kut kanya i pamegbeg nga subung it tiyanggap ku nga ibinggay it aken it Amaꞌ ku, iyan pamegbeg it muꞌsang bangsa.
27“Mamegbeg kanya it ega basta-bastang pamegbeg nga subuk may titiꞌkul ya nga basiꞌ.
Subuk perdaken ya sira nga subung it pagbuwaten it manigbuwat it dakut.”2:27 Awit 2:9. Atkaytu i buwaten kat mga katataawan nga kumpur ega magpasakep it Ampuꞌang Diyus.
28Ibgay ku gasiꞌ it kanya i buntatalaꞌ.2:28 Timpu paꞌ it mga Romano, mga ladawan it bituꞌun ngaytu i kanira nga tandaꞌanan it mandadaꞌeg. 29Aypaꞌ it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu nga ipagpatantu it Espiritu Santo kat mga magpamayaꞌ baw magsarig it aken.’ ”
3Kusugiden ni Jesus duꞌun it mga magpamayaꞌ it kanya nga duꞌut Sardis
1Bawnga maat yat aken, “Ituy ibtang mu kat surat nga ipataban mu duꞌun it manigpamaalaꞌ it mga magpamayaꞌ it aken duꞌut Sardis. Aaten mu nga, ‘Ituy ipagkusugid it iyan kanya nga magpupudir it Espiritu Santo baw magseskel it pitu ngaytung bituꞌun. Talagang magkaltegan kuy mga pagbuwaten mi. Pagkilalaen kamu nga maat egen, arit yay matuud, patay, ka talagang egay kamatuudan it pamayaꞌ mit aken. 2Sulag! Paksegen mi i pamayaꞌ mi isaꞌun ega maꞌawaꞌ it langkuy, ka talagang malubay na. Namuyaan ku nga talagang kurang i pagsirbi mi kat panleteg it Ampuꞌang Diyus ku. 3Demdemen mi i nagnegan mi nga panulduꞌ nga ipiyagpangadal asat imyu. Iyan ngayan i kaꞌilangan mi nga sunudun. Singuliꞌan mi baw indiꞌan i karaꞌe-raꞌetan mi. Ka in ega masulag kamu, paꞌasan aku nga subung it mananakaw nga ega magkaꞌru-kaꞌrutan in kaꞌnu. Talagang ega magkaꞌrutan mi in kaꞌnuy pangabut ku.
4Temed may pira naga asan it Sardis nga maꞌintur, nga ega naga nakakursud duꞌun it mga mararaꞌway nga pagbuwaten. Talagang magkapakay sira nga kaꞌibaan ku duꞌun it kaꞌadiꞌan ku nga magpapakay it maputiꞌ.
5Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, siguradung papakayan ku kanya it pakayan nga maputiꞌ baw ega buraen kuy ngaran ya kat pagsuratat mga pagbegayan it kaꞌgenan nga egay kaskedan. Baw ipamatuud ku kat adapan it Amaꞌ ku baw mga anghil ya nga pagkilalaen ku talaga kanya nga aken nayan. 6Aypaꞌ it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu nga ipagpatantu it Espiritu Santo kat mga magpamayaꞌ baw magsarig it aken.’ ”
Kusugiden ni Jesus duꞌun it mga magpamayaꞌ it kanya nga duꞌut Filadelfia
7“Ituy ibtang mu kat surat nga ipataban mu duꞌun it manigpamaalaꞌ it mga magpamayaꞌ it aken duꞌut Filadelfia. Aaten mu nga, ‘Ituy ipagkusugid it iyan kanya nga talagang kamatuudan baw alaid kat maski unu nga kasalaꞌan, kanya nga magseskel it gunsiꞌ it adiꞌ nga si David ka pagbebgayan it pudir duꞌun it kaꞌadiꞌan it Ampuꞌang Diyus. Aypaꞌ basta inabri ku, egay tanda-tandaꞌ nga makasiradu. Ta basta nasiradu ku mana gasiꞌ, talagang ega gasiꞌ i makaꞌabri. 8Talagang maꞌyag it aken i kabetangan baw adat mi. Ka maski ega dakulaꞌ i kaya mi ka daꞌkamu dakel, temed pagteꞌteꞌan mi naga aku baw pagsunudun mi i panulduꞌ ku. Aypaꞌ ka may inabriyan ku nga salakwatan nga masledan mi nga egay maski siyu nga makasiradu kaytu. 9Pagnegan mit magayen i iꞌaat kut imyu. Paꞌadapen kut imyu i mga taw ngayan asan nga maꞌambut ka magbete-beteꞌ nga mga taawan ku sira temed yay matuud, sang siraan yan nga magsirbi it ki Satanas. Pasaluduꞌun ku nga manluud sira kat adapan mi. Sikayan maꞌrutan nira nga talagang pagmaꞌalen baw pagrarasan ku kamu. 10Sabap it siyunud mi i urdin ku nga temeꞌteꞌ maski pagpakuriꞌan, talagang tatarimaen ku kamu isaꞌun ega maꞌilang, pagꞌabut it timpu nga makuriꞌan i muꞌsang taw situt sinirungat langit ka sukdanan ku na sira.
11Talagang mabut aku kat madaliꞌ nga timpu. Inturun mi nga, iyan pamayaꞌ mi it kamatuudan baw pagsunud mi it kaꞌirgan it Ampuꞌang Diyus, ega mateꞌag-teꞌag, isaꞌun ega masalaud i tumbas kut imyu, in daꞌga matanggap mi talaga. 12Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, siguradu nga buwaten ku kanya nga bilang esang unayen nga arigi kat Templo it Ampuꞌang Diyus ku. Talagang ega maꞌawaꞌ-awaꞌ kanya duꞌun seked it kaꞌnu-kaꞌnu. Iꞌunay kut sumurat kat bilug ya i ngaran it Ampuꞌang Diyus ku baw ngaran gasiꞌ it siyudad nga baꞌgung Jerusalem,3:12 Ireg sugiden kaytu, ipasiguru kanya nga makaꞌuyut duꞌut iting siyudad. gumaring ngaytu duꞌun it langit, nga ipalampud it Ampuꞌang Diyus. Iꞌunay ku gasit sumurat kat bilug ya i baꞌgung ngaran ku ka taawan ku na kanya. 13Aypaꞌ it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu nga ipagpatantu it Espiritu Santo kat mga magpamayaꞌ baw magsarig it aken.’ ”
Kusugiden ni Jesus duꞌun it mga magpamayaꞌ it kanya nga duꞌut Laodicea
14“Ituy ibtang mu duꞌun it surat nga ipataban mu duꞌut manigpamaalaꞌ it mga magpamayaꞌ it aken duꞌun it Laodicea. Aaten mu nga, ‘Ituy ipagkusugid it iyan kanya nga magngangaran it Kamatuudan, kanya nga talagang egay pagbaꞌgu ka purus kamatuudan i ipagsugid ya, kanya naga nga manigpamegbeg it muꞌsang giyuna it Ampuꞌang Diyus. 15Ega talagay ipaꞌlam it aken kat muꞌsang mga buwat mi. Daꞌkamu naga magpakikuntraꞌ it aken temed ega gasiꞌ tulanged i pamayaꞌ mi, in daꞌga ereꞌeret na nga mataꞌbang. Sana tulanged i pamayaꞌ mit aken, ka talagang ega magkapakay ku i pamayaꞌ nga egay kamatuudan, nga kat munung na lamang. Sabagay talagang dakulaꞌ i iseg ku kat mga taw nga egay pamayaꞌ, temed subraꞌ pay iseg ku kat magbete-beteꞌ ngaytu. 16Ta, it pagraꞌwayen ku kamu, isuka ku na lamang subung it danum kat baꞌbaꞌ nga kababaruꞌbuꞌ it laway. 17Maat mi, manggaden kamu, baw bastanti nay muꞌsa. Egay maski unu nga kakurangan. Takaꞌ ega magkaꞌrutan mi nga yay matuud, kaꞌildaw-ildaw kamu, miskin kamu nga egay kaya mi. Beleg kamu baw lebas kamu nga taw. 18Aypaꞌ kayti ituy ipagsasar kut imyu. Kaꞌilangan nga malang kamu sinit aken it bulawan nga pirmira ka tiyunaw duꞌut apuy, isaꞌun magmanggaden kamu nga matuud. Malang kamu gasiꞌ sinit aken it maputiꞌ nga pakayan, isaꞌun daꞌkamu na maglelbas, ega na kaꞌeyaꞌ-eyaꞌ. Baw malang kamu gasiꞌ it ubaꞌubat it mata isaꞌun makalteg kamu.
19Kumpur pagmaꞌalen ku, pagpadisiran ku sirat magayen. Pagsabatan kuy mga kamaliꞌ nga pagbuwaten nira baw pagtaldengen ku sira. Aypaꞌ kaꞌilangan tingled i nakem mi. Singuliꞌan mi baw indiꞌan mi nay kasalaꞌan mi it kayti nga lagi. 20Ka wayni aku na. Subung it magtitindeg aku asat salakwatan, magpaꞌungaꞌ-ungaꞌ nga pasleden. Ka in siyu-siyuy sumambung, nga mabri it talaꞌep ya ka pasleden ya aku, daꞌnay kasasawan it pagꞌiba-iba namen.
21In siyu-siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, begayan ku kanyat pudir nga katimbang ku na kat pagkaꞌadiꞌ ku. Subung nagat aken, ka inindaꞌeg ku nay muꞌsa ngaytu, aypaꞌ kayti duwa kami na magꞌAmaꞌ i magꞌadiꞌ kat pagkaꞌadiꞌ ya. 22Aypaꞌ it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu, nga ipagpatantu it Espiritu Santo kat mga magpamayaꞌ baw magsarig it aken.’ ”
4Ipiyalteg i mga mamagbantug it Ampuꞌang Diyus duꞌut langit
1Pagkatupus it iti ngayti, belag siꞌ nga subuk pagtagaynepen i ipiyalteg it aken. Ka sakaling may naltegan ku duꞌun it langit nga esang salakwatan nga pagꞌaꞌabriyen. Saꞌup ku siꞌ nga nagnegan i gaꞌmaran ngayti nga subuk tingeg it taburi. Maat siꞌ it aken, “Mapyat ka sini, ka ipalteg kut imu i mga bagay nga ipiyagpabetang-betang nga magꞌabut.” 2Sakaliꞌ nga subuk tiyaban aku it Espiritu Santo it padibwat. Iyan duꞌun aku nat langit, may naltegan ku nga esang araꞌdungan it adiꞌ nga may magꞌaꞌdung naga duꞌun. 3Talagang magsinggat i magꞌaꞌdung ngayti subung it singgat it ega basta-bastang pagminaꞌen nga mga batu nga pagpangaranat haspe baw kornalina. Palinibut it araꞌdungan ngayti, may buluntung nga magsinggat nga subung it singgat it paꞌaateng esmeralda. 4May duwang puluꞌ baw epat nga araꞌdungan, nga subung it araꞌdungan ngaytit adiꞌ, nga maglilibut it iti ngayti nga araꞌdungan. Teptep it magꞌaꞌdung nga mga magugurang. Mapuputiꞌ i mga pakayan nira baw teptep sirat kuruna nga bulawan kat ulu nira. 5Subuk maggaring na duꞌut araꞌdungan ngaytit adiꞌ i magdeleg nay kilat, nga pagdenganen it pamsar it duldug nga daꞌna pateng. Kat adapan nga ayun it araꞌdungan ngayti may mga magdedleg nga pitung tidaw, mga itu ngaytu, ladawan it Espiritu Santo. 6Duꞌun gasit sarungaan it araꞌdungan ngayti, may naltegan ku nga subuk dagat nga kaꞌaat ka pirmira nga salamin, nga ereꞌeret nga kasanaw.
Duꞌun it umid it araꞌdungan ngayti, tagasangbat kat kada kantu ya, i epat nga mga may ginawa naga nga giyuna, nga mataan nang muꞌsa i bilug, pabuktut-pasarungaan mata na. 7Iyan sangbat nga giyuna nga may ginawa, subuk leon i pangunguluwan ya. Iyan ikadwa, subuk tudu nga bakaꞌ. Ikatlu, subuk panrurupaan it taw. Baw iyan ikaꞌpat, subuk pangunguluwan it agila in maglalayug. 8Tagꞌeꞌenem i elad it epat ngayti nga giyuna nga may ginawa, baw ta yanayti mata nang muꞌsa i bilug nira, pati kat sirib it mga elad nira. Talagang egay tatantanan it baꞌbaꞌ nirat delem-aldaw it pagbantug nga magꞌaat,
“Ega babasta-bastaen baw talagang alaid kat muꞌsang kasalaꞌan i Ampuꞌang Diyus nga landaw nga gunaan.
Garing it tagnaꞌ paꞌ may kanya na. Pati kayti baw seked it kaꞌnu-kaꞌnu may kanya ga lamang.”
9Mamagbantug sira, magbegay it paggalang baw pasalamat nira it magꞌaꞌdung ngayti duꞌut araꞌdungan it adiꞌ, iyan egen ngaytit egay kaskedan. Ta mintras magbantug sira, 10iyan duwang puluꞌ baw epat ngayting mga magugurang, kanirang buwat mamagpanluud nga magtetꞌem i rupa duꞌut adapan it araꞌdungan ngayti, ka pagsambaen nira gasiꞌ i magꞌaꞌdung ngayti duꞌun, kanya nga egen it egay kaskedan. Baw ipagdaꞌtun nira gasiꞌ kat adapan ya i mga kuruna nira, nga yay pamatuud nira nga kanya i piyakamataꞌas nga magꞌadiꞌ it muꞌsa. Yanay pagꞌampa-ampangen nira,
11“Ampuꞌang Diyus namen, bagay talaga it imu nga bantugun ka, galangen baw kilalaen nga gunaan.
Sabap ikaw i nagguna it muꞌsang bagay, baw ta uyun kat kaꞌirgan mu giyuna mu sira, baw piyatinir mu.”
5Kiyawaꞌ it Uꞌuybun It Tupa i kasuratan nga pagluulunun
1Naltegan ku gasiꞌ i esang kasuratan nga pagluulunun, pagseskelen it iwanang alima it magꞌaꞌdung ngayti duꞌun it araꞌdungan it adiꞌ. Pabali-bali ya may surat baw pitu i papaꞌnget ya.5:1 Itu, papaꞌnget ngaytu nga paꞌaaten, duway kaꞌargan ya. Ka ega desang ipagpaꞌnget, in daꞌga pagꞌiꞌimandaꞌanan tu it in siyu nga magtatagpuꞌun. Aypaꞌ maꞌaat nga papaꞌnget nga pangingimandaꞌan. 2Baw naltegan ku gasiꞌ i esang ega basta-bastang anghil nga magpanggaꞌmaran it dadakulaꞌ, nga magꞌaat, “Siyu talagay mapakay nga miriꞌ it papaꞌnget ngaytu baw mukaꞌ it kasuratan ngaytung pagluulunun?” 3Temed egay magkaparagan duꞌut langit, situt sinirungat langit u kat pagꞌabutan it mga miyatay, nga mapakay nga mukaꞌ baw lemteg it mga magbebtang duꞌun nga magsusurat. 4Pagkamuya ku kayan, siminggaw aku it ega pateng. Nasgawan ku, ega ngayti i magkaparagan nga mapakay mukaꞌ.
5Miyampang i sang kataawan nga magugurang, maat yat aken, “Ayaw ka nat sugaw. Letganan muy mandadaꞌeg ngaytu nga garing kat mga tungtung-inapuꞌ ni Juda, matanug ngaytung tungtung-inapuꞌ ni David. Kanya i nakaꞌindaꞌeg it mararaꞌe-raꞌet, aypaꞌ kanya i mapakay nga miriꞌ it pitu ngaytung papaꞌnget baw mukaꞌ it kasuratan ngaytu nga pagluulunun.”
6Ta sakaliꞌ nga may naltegan ku nga esang Uꞌuybun It Tupa, nga magtitindeg duꞌun it piyagtengaꞌan it mga magugurang ngayti baw araꞌdungan ngaytit adiꞌ nga paglilibutun it epat ngayting may ginawa nga giyuna. May mga barnaꞌ na nga magpamatuud nga naꞌimatay nay iti nga Uꞌuybun It Tupa. Pituy tanduk ya baw pituy mata nga iti, ladawan it Espiritu Santo nga tiyaꞌeg it Ampuꞌang Diyus nga lemkep situt sinirungat langit. 7Minlep kanya ngayting paꞌaaten nga Uꞌuybun It Tupa duꞌun it magꞌaꞌdung ngayti duꞌun it araꞌdungan it adiꞌ, ka kiyawaꞌ ya nay pagluulunun ngayti nga kasuratan nga pagseskelen it iwanang alima it magꞌaꞌdung ngayti. 8Pagkawaꞌ yat iti ngayti, namagpanluud baw itinꞌem i rupa it epat ngayting may ginawa nga giyuna baw duwang puluꞌ may epat ngayting mga magugurang, nga kada esat kanira may sekel nga turugtugun nga alpa, baw magseskel gasiꞌ it karung nga bulawan nga magpupnuꞌ it kamangyan. Iti ngayti nga paꞌaaten, mga panalangin it mga taawan it Ampuꞌang Diyus. 9Kimnantaꞌ sirat baꞌgung kalasit kantaꞌ, nga magꞌaat,
“Ikaw talagay mapakay nga kumawaꞌ it pagluulunun ngayan nga kasuratan baw mawaꞌ it mga papaꞌnget ya.
Sabap naꞌimatay ka, baw sabap it kamataynen mu ngayan nga ipiyaturuꞌ i duguꞌ mu, may subuk inalang mu na nga mga taw kat muꞌsang mga bangsa, maski siyuy piyanggaring-garingan nira baw maski unu nga ampang i ampang nira.
Kayti mga taawan na sirat Ampuꞌang Diyus. 10Binwat mu sira nga bilang sasirduti isaꞌun kapagsirbi na sirang muꞌsa it Ampuꞌang Diyus tami.
Binwat mu gasiꞌ sira nga mga adiꞌ isaꞌun kapamegbeg na sira duꞌut sinirungat langit.”
11Ta pagkalteg ku siꞌ, sakaliꞌ nga nagnegan ku nga nanggaꞌmaran nay liyaksaꞌ-laksaꞌ na nga mga anghil nga ega na mabilang i kadakel nira. Palinibut sirat araꞌdungan ngaytit adiꞌ, mga may ginawa ngayti nga mga giyuna, baw mga magugurang ngayti nga duwang puluꞌ may epat. Mamagrasun na gasiꞌ. 12Pagꞌubsu-ubsun niray gaꞌmaran nira it mamagbantug nga magꞌaat,
“Uꞌuybun ngaytut Tupa nga ipiyagtas yay ginawa ya, kanya talaga i mapakay nga tumanggap it pagbantug, nga bantugun i guna, kamanggadan, ega basta-bastang kasepsep baw kakayaan ya.
Kaꞌilangan talaga nga kanya i paggalangen baw pagbantugun.”
13Bawnga nagnegan ku nga namagbantug nay muꞌsang giyuna nga kat langit, kat sinirungat langit, pati duꞌut dagat, baw kat pagꞌabutan it mga miyatay. Talagang muꞌsang mga giyuna nga maski ari, daꞌgay-daꞌga mamagbantug, nga magꞌaat,
“Bantugun baw galangen it egay katupusan i magꞌaꞌdung asat araꞌdungan it adiꞌ baw Uꞌuybun ngaytut Tupa, sabap it kadakulat kabantugan nira baw guna nga egay kasbung.”
14Ta iti, epat ngayti nga may ginawa nga mga giyuna, siging saꞌu-saꞌup nirat “Matuud! Atkayan talaga!” Bawnga iti, duwang puluꞌ may epat ngayti nga mga magugurang, namagpanluud sira ka simnamba.
6Iniriꞌ nat paꞌaaten ngayting Uꞌuybun It Tupa i mga papaꞌnget
1Ta naltegan ku nga iniriꞌ nat paꞌaaten ngayting Uꞌuybun It Tupa i esang papaꞌnget it kasuratan ngayti nga pagluulunun. Dengan it nagnegan ku nga miyampang i esa ngayting may ginawa nga giyuna. Miyampang kanya nga atnat pamsar it duldug i kadadakulaꞌ. Maat ya, “Daliꞌ na!” 2Pagleteg ku, naltegan kuy esang kabayuꞌ nga maputiꞌ. Magseskel it panaꞌ i magsasakay baw binggayan kanyat kuruna nga tandaꞌ it mandadaꞌeg. Bawnga napanaw na kanya isaꞌun ipasigi yay pandaꞌeg ya situt sinirungat langit.
3Pagkaꞌanu kayti, ikadwa siꞌ nga papaꞌnget i iniriꞌ it paꞌaaten ngayting Uꞌuybun It Tupa. Bawnga nagnegan ku nga inaat it ikadwa gasiꞌ ngayting may ginawa nga giyuna, maat ya, “Daliꞌ na!” 4Sakaliꞌ siꞌ nga may nanliꞌwan nga esang kabayuꞌ nga madarag nga banar. Binggayan i magsasakay it iting kabayuꞌ it kakayaan nga ikapapuꞌun it magbunuꞌ-bunuꞌun i muꞌsang taw kat sinirungat langit ka magꞌima-imatayen na. Madaꞌun nga karis i ibinggay it kanya.
5Isiyunud siꞌ nga iniriꞌ it paꞌaaten ngayting Uꞌuybun It Tupa i ikatlung papaꞌnget it kasuratan ngayti. Ikatlu siꞌ ngayti nga may ginawa nga giyuna i nagnegan ku nga miyampang, nga magꞌaat, “Daliꞌ na!” Pagleteg ku, kabayuꞌ siꞌ nga maꞌitem i naltegan ku. Magseskel it timbangan i magsasakay duꞌun. 6May nagnegan ku nga ampang nga sinraꞌan duꞌun it pagꞌaꞌanuꞌan it epat ngayting may ginawa nga giyuna, nga magꞌaat, “Sang lataꞌ lamang nga arina it tirigu i maꞌalang it tangdan it sang aldaw nga urnal. Subung naga tulung lataꞌ lamang i maꞌalang nga arina it sebaba it iyan nagang kantidad. Temed ega pakurangan muy lana it olibo baw irimnun nga letes it buwaꞌ it ubas!”
7Ikaꞌpat siꞌ nga papaꞌnget i iniriꞌ it paꞌaaten ngayting Uꞌuybun It Tupa. Iyan siꞌ i nagnegan ku nga miyampang, ikaꞌpat ngayti nga may ginawa nga giyuna. “Daliꞌ na!” maat ya. 8May kabayuꞌ siꞌ nga naltegan ku nga malasiꞌ i pamilug ya. Ngaran it magsasakay it itiꞌen, si Kamataynen. Magꞌikug-ikug nagat kanya, si Basad. Ibinggay it kanira i pudir nga mangimatay it ikaꞌpat nga bagiꞌ it katataawan situt sinirungat langit, nga pangimatay ngayti, magbunuꞌ-bunuꞌun, puyanget, panalakep baw sariyen it imatay it maꞌiꞌiseg nga ramu-ramu.
9Bawnga ikalima siꞌ ngayti nga papaꞌnget i iniriꞌ it paꞌaaten ngayting Uꞌuybun It Tupa. Sakaliꞌ nga naltegan ku duꞌun it sirib it papangantengan i mga kiyarurwa it iyan mga inimatay sabap it pamatuud nira it ampang it Ampuꞌang Diyus baw panindeg nirat kamatuudan ya ngaytu. 10Nagnegan ku nga imbus niray gaꞌmaran nirat gimnaꞌuy nga magꞌaat, “Agalen namen, alaid ka talaga kat muꞌsang kasalaꞌan baw purus kamatuudan i imu. Kapira pay kaꞌlay it elatan namen? Kaꞌnu mu paꞌ betanganan it ukuman baw rigaen i mga taw duꞌut sinirungat langit nga minimatay it amen?” 11Bawnga naltegan ku nga binggayan it mapuputiꞌ nga pakayan i kada esat kanira. Baw nagnegan ku nga inaat it kanira, “Magpaꞌna-paꞌna kamu na daꞌan it ega maꞌlay nga timpu, mintras ega paꞌ nakumplitu i bilang it mga sulsug mi kat pamayaꞌ, nga kaꞌibaan mi nga magsirbi it Ampuꞌang Diyus, sira nga pangimatayen gasiꞌ nga subung it imyu.”
12Bawnga naltegan ku, iniriꞌ siꞌ it paꞌaaten ngayting Uꞌuybun It Tupa i ikaꞌnem nga papaꞌnget. Unupat yimnegyeg i banwa it daꞌnay pasubrang keseg. Bawnga nagpintut nay aldaw. Ta, yan bulan, atnat duguꞌ it pandara-darag. 13Baw iyan mga bituꞌun, nasari nat kaꞌulug, subung na lamang it magpandag nga buwaꞌ it kayu nga bukul paꞌ in pagpesagen it masbeg nga deres. 14Ta, yan langit, nagsipat na lamang ka nalulun nga subuk papil. Iyan mga bukid, naꞌawaꞌ na kat mga pagꞌaꞌanuꞌan nira. Atnaga i mga pulaw.
15Namagpatataguꞌ duꞌun it mga kubkub baw duꞌut mga indelangat mga batu nga duꞌut mga bukid i mga adiꞌ situt banwa, mga matataꞌas nga dugut taw, mga pagbayaꞌen it mga sundaluꞌ, mga manggaden, mga taw nga ega babasta-bastaen, talagang muꞌsat taw, egay naꞌped. Pati mga raꞌyat, uripen baw ega uripen, nagpatataguꞌ nga muꞌsa. 16Pagsekaten nat mga katataawan ngayti i mga bukid baw mga batu nga magꞌaat, “Sigi, taburan mi na kami, isaꞌun malingeb kami, nga daꞌna maltegan it magꞌaꞌdung ngayan asat araꞌdungan it adiꞌ, baw isaꞌun gasiꞌ ega na masalapuꞌ namen i iseg it paꞌaaten ngayang Uꞌuybun It Tupa. 17Sabap natantuwan namen nga naꞌbut nay ega basta-basta ngaytung aldaw nga ipalbaw na niray iseg nira. Ta, siyuy makasagkaꞌ kayan?”
7Inimandaꞌanan i mga Israelita nga manigsirbi it Ampuꞌang Diyus
1Ta pagkatupus it mga iti ngayti, may naltegan ku nga epat nga mga anghil nga mamagtitindeg kat epat nga kantu it banwa ngaytu. Pagsasabaren niray epat nga matat deres isaꞌun daꞌga daꞌan meyep situt sinirungat langit, ega dersan i dagat, pati talun. 2Baw siꞌ nga may naltegan ku nga miyabut nga esang anghil nga garing kat lebatan. Taba-taban ya i pangingimandaꞌan it Ampuꞌang Diyus, kanya nga egen it egay kaskedan. Giyaꞌuyan yay epat ngayti nga mga anghil nga binggayan it Ampuꞌang Diyus it pudir nga manranggaꞌ situt banwa baw kat dagat. 3Maat ya, “Ega mi daꞌan ranggaꞌen i lugtaꞌ, dagat baw talun. Elaten mi nga maꞌimandaꞌanan i peges it mga manigsirbi it Ampuꞌang Diyus tami.” 4Bawnga nagnegan ku i kapuꞌsaan it naꞌimandaꞌanan, sang gatus baw epat nga puluꞌ may epat nga ribu. Mga tungtung-inapuꞌ siraytu it sang puluꞌ may duwa ngaytung mga anak it kiyaꞌapuꞌ-apuꞌan nira nga si Israel. 5-8Sabap kat kuyunang mga tungtung-inapuꞌ ni Juda, sang puluꞌ may duwang ribu. Subung nagay ki Ruben, ki Gad, ki Aser, ki Neftali, ki Manases, ki Simeon, ki Levi, ki Isacar, ki Zabulon, baw kana Jose duwa ni Benjamin.
Daꞌna mabilang nga kadakel it taw i duꞌun it adapan it Ampuꞌang Diyus gimnaring na kat muꞌsang bangsa
9Iyan natupus nay sabap it iting bagay, iyan siꞌ i naltegan ku, dakel nang dakel nga pagtaw. Daꞌna mabilang it maski siyu. Iting mga taw, nanggaring-garing kat kada ampang baw bangsa. Mamagtitindeg sira kat adapan it magꞌaꞌdung ngayti kat araꞌdungan it adiꞌ baw kat adapan it paꞌaaten ngayting Uꞌuybun It Tupa. Mamagpapakay sirang muꞌsa it maputiꞌ baw may sekel nira nga palakpak it subuk badangan. 10Baw nagnegan ku nga derengan sira nga nanggaꞌmaran it dadakulaꞌ nga magꞌaat,
“Mabantug i Ampuꞌang Diyus ngaytu kat pagkaꞌadiꞌ ya.
Mabantug i Uꞌuybun It Tupa.
Ka sira ngaytuy garing it karibriyan.”
11Naltegan ku nay muꞌsang mga anghil nga magtitindeg, maglilibut it araꞌdungan ngaytit adiꞌ, mga magugurang ngayti baw epat ngayting may ginawa nga giyuna. Kiminleb sira kat sarungaan it araꞌdungan ngayti ka siyamba niray Ampuꞌang Diyus nga magꞌaꞌdung duꞌun. 12Magꞌaat i inampang nira,
“Kamatuudan tu!
Mabantug ka nga Ampuꞌang Diyus namen.
Dapat kang bantugun, pasalamatan baw galangen it egay katupusan, sabap ikaw i may kasepsep nga ega basta-basta, ikaw i may guna baw kakayaan nga ega masbungan.
Kamatuudan tu!”
13Bawnga iningkut akut sang kataawan ngayti nga magugurang. Maat ya, “Siyu yan nga mga taw i mamagpapakay-pakay ngayan it mapuputiꞌ? Ari yan i piyamaggaringan nira?”
14Katubag aku, maat ku, “Tabing galang it imu, taꞌway. Ega magkaꞌrutan ku in ari piyamaggaringan kayan. Siguru ikaw yan i magꞌuꞌrut.”
Maat ya siꞌ it aken, “Sira ngayan, iyan i nakalabay it dakulaꞌ talagang kakuriꞌan, temed maski atkayan, daꞌsira nangindiꞌ, naneꞌteꞌ i pamayaꞌ nira. Talagang linimpiyuꞌ nira baw piyaputiꞌ it duguꞌ it paꞌaaten ngaytung Uꞌuybun It Tupa i mga pakayan nira ngayan.7:14 Ireg sugiden kaytu, naꞌawaꞌ i mga kasalaꞌan nira. 15Aypaꞌ, sabap it iti ngayti, duꞌun sira it adapan it araꞌdungan ngaytut Ampuꞌang Diyus kat pagkaꞌadiꞌ ya. Magsirbi sirat kanya it delem-aldaw situt langit ngaytung bilang Templo ya. Baw kanya ngayan nga magꞌaꞌdung situt araꞌdungan ngaytut adiꞌ i tumaraꞌna it kanira. 16Daꞌna yan sira makabatit getem baw kuꞌinum. Daꞌna kaꞌilangan nga pablad paꞌ sira it init it aldaw u makuriꞌan sira it maski unu paꞌ nga maꞌinit. 17Sabap kanya ngaytung paꞌaaten nga Uꞌuybun It Tupa nga situt tepad it araꞌdungan ngaytut adiꞌ, kanya ngaytuy marigra nat kanira. Talagang tabanen ya na sira duꞌun it pagtumbudan it danum nga magbegay it kaꞌgenan. Baw daꞌnay tumuruꞌ nga luwaꞌ kat mga mata nira ka subuk panisen nat Ampuꞌang Diyus, ka awaꞌen ya nay kasmek nira.”
8Yapay iniriꞌ nay ikapitu ngayti nga papaꞌnget
1Iyan ikapitu na ngayti nga papaꞌnget i iniriꞌ it paꞌaaten ngaytung Uꞌuybun It Tupa. Seledan it tengat uras egay riꞌe-riꞌeng duꞌun it langit. 2Pagkatupus it itiꞌen, naltegan ku nga piyamgayan it taburi i iyan pitung kaꞌanghilan nga mamagtitindeg duꞌun it adapan it Ampuꞌang Diyus. 3Bawnga may miyabut gasiꞌ nga esang anghil nga may taban ya nga bulawan nga bebtangan it kamangyan. Timnindeg kanya duꞌun it sarungaan nga ayun it papangantengan it kamangyan nga duꞌun it sarungaan it araꞌdungan ngaytit adiꞌ. Naltegan ku, binggayan kanyat dakulang kamangyan ka antengen ya duꞌun it papangantengan ngayti nga bulawan, dengan it iꞌapyat yay mga panalangin it mga taawan it Ampuꞌang Diyus. 4Ta minsag na duꞌut adapan it Ampuꞌang Diyus i tabuk it kamangyan ngayting pagseskelen it anghil, baw nakaꞌbut na i mga panalangin it mga taawan it Ampuꞌang Diyus duꞌun it kanya. 5Pagkatupus kayti, minsiꞌ it mga baga i anghil ngayti duꞌun it papangantengan, nga ibintang ya duꞌun it bebtangan ngaytit kamangyan seked it punuꞌ na. Bawnga itindag ya situt banwa. Sakaling nanduldug it dadakulaꞌ na nga pamsar, simnari nat kilat baw yimnegyeg nay lugtaꞌ.
Pitu ngayti nga taburi
6Bawnga nagpagayen-gayen i pitu ngayting kaꞌanghilan isaꞌun alistu na sira nga meyep it pitu ngayting kataburiyan nga ibinggay it kanira.
7Pagꞌeyep it uꞌnang anghil it kanya ngayting taburi, miyuran, takaꞌ magtedag, yilu nga subuk deset batu baw apuy nga may uyut nga duguꞌ. Naꞌanteng i ikatlung bagiꞌ it banwa baw ikatlung bagiꞌ it talun baw muꞌsang dikut.
8Pagꞌeyep siꞌ it ikadwa ngayting anghil it kanya ngayting taburi, may itindag duꞌun it dagat nga kaꞌaat ka dakulaꞌ nga bukid nga may uyut nga sugut apuy. Nagbarang duguꞌ i ikatlu nga bagiꞌ it dagat. 9Natay i muꞌsang betang it ikatlu ngayting bagiꞌ it dagat. Namagkaranggaꞌ gasiꞌ i ikatlung bagiꞌ it mga sarakayan nga pandagat.
10Pagꞌeyep it ikatlu ngayting anghil it kanya ngayting taburi, may naꞌulug nga dakulang bituꞌun nga gimnaring duꞌut langit. Atnang panugu-sugu, nga atnat apuy nga pagdersan. Tindagan ya, ikatlung bagiꞌ it mga danum baw mga tumbud. 11Ngaran it bituꞌun ngayti, Mapaꞌit, baw miyaꞌit nga matuud i ikatlung bagiꞌ it danum ngayti. Dakel nga taw nga natay, pagkaꞌinum nira kayti.
12Pagꞌeyep siꞌ it ikaꞌpat ngayting anghil it kanya gasiꞌ ngayti nga taburi, naꞌiguꞌ i ikatlung bagiꞌ it aldaw, bulan baw mga bituꞌun. Aypaꞌ ka nagsipat i ikatlung bagiꞌ it mga eyag nira. Diminlem i ikatlung bagiꞌ it aldawun baw ega gasiꞌ i minyag kat ikatlung bagiꞌ it delemen.
13Pagkatupus kayti, may naltegan ku nga esang agila nga maglalayug kat lawang. Nagnegan ku nga pagdadakulaꞌen ya nang gaꞌuy nga magꞌaat, “Makuriꞌ talagang banar i mabetangan it muꞌsa nga magtataꞌid kat sinirungat langit, pagꞌeyep it tulu paꞌ ngayang naꞌped nga mga anghil it kanira ngayan nga mga taburi.”
91Ta, inyepan nat ikalima ngayting anghil i kanya ngayting taburi. May naltegan ku nga subung it esang bituꞌun nga natdag situt banwa nga garing duꞌut langit. Ibinggay it kanya i gunsiꞌ it malgeb nga malgeb nga siwang nga egay pagꞌabu-abutun. 2Bawnga inabriyan it paꞌaaten ngayting bituꞌun i siwang ngayti. Timnindeg i tabuk nga subuk epal it tabuk nga maggaring duꞌun it pira-pirang kaꞌumaan i siyuriban. Aypaꞌ ka diminlem i aldaw baw lawang sabap it tabuk ngayti.
3Sakaliꞌ nga may nanliꞌwan nga dakel nga mga apan, nga duꞌun nat tabuk ngayti i paggaringan. Nanlekep na sira situt banwa. Binggayan sirat kakayaan nga pakuriꞌ it katataawan nga subung it kat bangkunawa. 4Takaꞌ ipiyagbenge-bengel it kanira nga ega ranggaꞌen niray mga dikut, mga kayu u maski unu nga mga luwak. Iyan lamang, mga taw nga egay imandaꞌan it Ampuꞌang Diyus kat mga peges nira i pakuriꞌan it mga apan ngayti. 5Takaꞌ ega naga ipagpaꞌimatay it kanira i mga taw ngayti, in daꞌga pagpakuriꞌan lamang sira it seledat limang bulan. Mabatiꞌan nirang pedes, subung it pedes it bangkunawa. 6Seledan it limang bulan ngaytu, talagang pagtulusun nat itung mga taw i kamataynen, temed subuk ega magkaparagan nira. Ka maski sang unu nay ireg nirat matay na sira, temed alaid it kanira i kamataynen ngaytu.
7Mga apan ngayti, pamimilugan nira, kaꞌaat ka mga mamagꞌaꞌalistu na nga kabayuꞌ nga pagsakayan it magpakibunuꞌ. Pamagkukurunaan i mga ulu nira it subung it bulawan nga kuruna. Mga rupa nira, subuk panrurupaan it taw. 8Buꞌukan sira nga subuk pamuꞌuk it mga babay. Mga nipen nira, subuk nipen it maꞌiseg nga leon. 9Pamagluulupan i mga deꞌgan nira it subuk panluulup nga basiꞌ. Tingeg it mga elad nira in magpangengrab, subuk durigeseꞌ it gulung it dakel nga pagguyudun nga sarakayan it magpakibunuꞌ baw rambak it mamagguyud ngayting mga kabayuꞌ nga magdarugpaꞌ nat kalaban. 10May mga ikug nira nga subung it pangikug it bangkunawa nga may seged. Duꞌun nat ikug nira ngayti i garingan it ikakuriꞌ ngaytit mga taw it seledan it limang bulan. 11Adiꞌ it mga iti ngayti, esang anghil nga magpamaalaꞌ duꞌun it siwang ngayting piyakamalgeb. Ngaran ya in kat Hinebreo nga ampang, si Abadon. In kat Ginirego nga ampang, si Apolion.9:11 Iti nga anghil, ega na kaꞌuyutan it mga anghil nga mga taraꞌgen it Ampuꞌang Diyus, in daꞌga kaꞌuyutan na it mga maraꞌe-raꞌet. Ireg sugiden it duwa ngaytung ngaran, Manigranggaꞌ.
12Nagtaꞌlib nay uꞌna ngayting ega basta-basta nga kakuriꞌan. Temed may duwa paꞌ nga sumunud.
13Bawnga ikaꞌnem siꞌ ngayting anghil i minyep it kanya ngayting taburi. Nakagneg akut esang gaꞌmaran nga duꞌun i sinraꞌan it epat nga kantu it papangantengan ngayting bulawan i binwat, nga duꞌun it sarungaan it Ampuꞌang Diyus. 14Inaat it nanggaꞌmaran ngayti i ikaꞌnem ngayting anghil nga may taburi, nga maat ya, “Uꞌbadan mu nay epat ngayang pamagbabayukun nga mga anghil nga duꞌun it tambing it danum ngayang dakulaꞌ nga Eufrates.” 15Ta, piyalpasan nay epat ngayting paꞌaaten nga mga anghil nga alistu na, ka talagang ipiyabetang-betang it Ampuꞌang Diyus i ega lamang taꞌun baw bulan in daꞌga aldaw baw uras paꞌ nga pangimatayen na niray ikatlung bagiꞌ it taw situt sinirungat langit. 16Ipiyagsugid it aken i kapuꞌsaan it mga sundaluꞌ nirang magsasakay it kabayuꞌ in magpakibunuꞌ. Duwang gatus nga laksaꞌ sirang muꞌsa.
17Atkaytuy pamimilugan it mga kabayuꞌ baw mamagsasakay duꞌun, nga ipiyalteg it aken kat subuk pagtagaynepen ku ngayti. May mga luulup it deꞌgan it mamagsasakay ngayti nga subuk panun-guwan it apuy, indilibelen nga subung it sapiro baw makunit nga subung it asupri. Subuk pangunguluwan it leon i ulu it mga kabayuꞌ ngayti, baw pagliꞌwanan i mga baꞌbaꞌ nirat apuy, tabuk baw asupri. 18Ta namagpatay nga matuud i ikatlung bagiꞌ it mga taw sabap it tulu ngaytung panalakep, nga apuy, tabuk baw asupri ngayti nga magliꞌwan kat baꞌbaꞌ it mga kabayuꞌ ngayti. 19Talagang kakayaan it mga kabayuꞌ ngayti, duꞌun nat baꞌbaꞌ nira, baw duꞌut mga ikug nira nga subung it dukul nga may ulu nga yanayti, ipagtundaꞌ nira nga ipagpakuriꞌ.
20Temed lamang atnakayti, iyan naꞌped naga nga mga taw nga ega natay it iting panriga nga ipiyamatay, daꞌsira naga nangindiꞌ it pagsirbi nirat diwata. Baw daꞌsira gasiꞌ nangindiꞌ it pagsamba nirat mga pagbete-beteꞌen nira nga mga diyus nga pamagbuwaten nira, mga ladawan nga yay binwat, bulawan, pirak, tumbaga, batu baw kayu, nga ega naga magkalteg, magkagneg u magkapanaw. 21Talagang ega sininguliꞌan it mga taw ngayti i mga pamagbuwaten nira nga pangimatay, panamayaꞌ, pamakun duꞌun it ega asawa nira baw panakaw.
10Pasar it dekeyeng kasuratan
1Pagkatupus kayti, may naltegan ku siꞌ nga ega basta-bastang anghil nga talagang makseg. Magpapasalu kanya nga garing duꞌun it langit. Pagbubuꞌtungan kanyat kunum baw may buluntung duꞌut ulu yang ayun. Magsingkar nay rupa ya nga subung it aldaw baw subung it magtitindeg nga apuy i mga kapusuꞌan ya. 2May pagseskelen ya nga dekeyeꞌ nga kasuratan nga pagbubukaꞌen. Iwanan nga aꞌay ya, itiyungtung ya duꞌun it dagat. Iyan gibang nga aꞌay ya, situt lugtaꞌ magtutungtung. 3Gimnaꞌuy kanya, nga atnat ngarawngaw it leon i gaꞌmaran ya. Pagkagaꞌuy ya, subuk tiyubag kanyat duldug ka kapitu mamsar, nga bilang magꞌampang. 4Pagkagneg ku kayti, ikusurat ku sana. Temed nakagneg akut ampang nga garing duꞌut langit nga magꞌaat, “Itagu-taguꞌ muy inaat it pitu ngaytung pamsar it duldug. Ega isurat mu.”
5Bawnga pagleteg ku siꞌ duꞌun it anghil ngayti nga magtutungtung i sang baling aꞌay ya duꞌun it dagat baw sang bali situt lugtaꞌ, ipiyatindeg yay iwanan nga alima ya. 6Ka simnumpa kanya kat ngaran it Ampuꞌang Diyus nga egen it egay kaskedan, kanya nga gimnuna it langit baw banwa baw dagat, baw muꞌsang betang nira. Maat i nagnegan ku nga isiyumpa ya, “Ega nay elaten. Tumanen nay muꞌsa. 7Ka basta inyepan it ikapitu ngayang anghil i taburi yat kanya, buwaten nayat Ampuꞌang Diyus i mga pabetang-betang ya nga ipagtagu-taguꞌ ya it kaꞌlay ngaytu, nga subung nat ipiyagꞌaat ya ngayan it mga prupitaꞌ nga manigsirbi yat tagnaꞌ paꞌ.”
8Pagkatupus kayti, nagnegan ku sit sumaꞌup i ampang ngayti nga garing duꞌut langit. Magpakisugid sit aken nga magꞌaat, “Patpad ka duꞌun it anghil ngayti nga magtutungtung duꞌun it dagat baw kat lugtaꞌ, ka angutun muy pagseskelen ya ngayan nga pagbubukaꞌen nga kasuratan.”
9Ta, minlep aku na duꞌun it anghil ngayti. Inangut ku nay kasuratan ngayti. Maat yat aken, “Iya, wayni na. Kawaꞌen mu baw kaꞌnen mu. Asat bibig mu, subung yan it taꞌmis it deges it putyukan, temed mapaꞌit yan in natlen na.” 10Egay beken, kiyawaꞌ ku nay kasuratan ngayti baw isiyubuꞌ ku na. Talagang mataꞌmis nga matuud nga subung it deges, temed iyan natlen ku na, mapaꞌit nay suruk-surukan ku. 11Bawnga maat ya sit aken, “May ipalteg pat imu nga kaꞌilangan nga isurat mu, nga baraꞌan it kadakel nga mga bangsa pati mga adiꞌ nira, taw nga belag-belag i ampang baw pagtataꞌidan nirang mga rugar.”
11Pasar it duwang manigpamatuud
1Ta, pagkatupus it iti ngayti, binggayan akut esang anghil it tatakes nga subung it sungkud. Maat yat aken, “Mapanaw ka, ka taksen muy Templo nga pagsambaan mi it Ampuꞌang Diyus duꞌun it Jerusalem. Taksen mu gasiꞌ i papangantengan asan baw bilangen muy kadakel it mamagsamba. 2Takaꞌ ega taksen muy pagkakaliputputan ngayang piyakakamaꞌyagan ya, ka ibinggay nayan it mga taw nga ega magkilala it Ampuꞌang Diyus. Talagang parignaꞌen niray ega basta-basta ngayang siyudad nga piniliꞌ it Ampuꞌang Diyus, ka taꞌad-taꞌadan nayan nira seledan it epat nga puluꞌ baw duwang bulan, 3nga yay sang ribu baw duwang gatus baw enem nga pulung aldaw. Temed may papaꞌasanen ku yan nga duwang manigpamatuud ku, nga mamagpapakay it maꞌerep nga tandaꞌ it kasmek. Ta, seledat mga aldaw ngaytu, sigi yan nga pangadal nira it pasar it Ampuꞌang Diyus baw ampang ya nga kaꞌilangan nga magsinguliꞌ i taw.”
4May siyangpit it esang prupitaꞌ it tagnaꞌ nga duwang puꞌun nga olibo.11:4 Zacarias kapitulu 4. Ta yay pagpapuntuꞌan ya kayan, duwa ngaytung manigpamatuud. Baw esa gasing kabilangan nira, duwang titidawan nga magtitindeg i dadaꞌtunan nira, nga magtitindeg duꞌun it adapan it Ampuꞌang Diyus, kanya nga magbebegbeg it muꞌsang banwa. 5Basta yan may kupasakit it kanira, may apuy yan nga limiꞌwan kat baꞌbaꞌ nira, nga iti i magꞌanteng it mga kalaban nira ngayti. Sabap yay ipiyabetang-betang nga kamataynen it in siyuy kugated it duwa ngaytu. 6Begayan sira it pudir baw kakayaan nga subuk isiradu i langit, isaꞌun ega muran mintras timpu nga ipagpangadal niray ampang it Ampuꞌang Diyus. Begayan sira gasiꞌ it pudir nga pabaraꞌen nga duguꞌ i danum, baw magpapanaw it maski unu nga kalasit salakep situt banwa basta nga maꞌirgan nira.
7In maꞌbut nay timpu nga seked it kaꞌlay it pangadal nira ngaytu, may limiꞌwan na nga garing duꞌut piyakamalgeb ngayting siwang nga siyang nga kumakaꞌen nga ramu-ramu ka pakibunuꞌ it kanira. Daꞌgen i mga manigpamatuud ngaytu, mapatay sira it iti ngayti. 8Bawnga muntulan i mga bilug nira nga patay na duꞌun it karsadaꞌ it ega ngayti basta-bastang siyudad, nga tagnaꞌ duꞌun kayti iriyansang duꞌun it krus i Ampuꞌan nirang si Jesus. Ta iti, siyudad ngaytit Jerusalem, pagpangaranan gasiꞌ it Sodoma baw Egipto, sabap it mga adat it taga duꞌun nga talagang subung nat mararaꞌe-raꞌet nga adat it taga Sodoma baw Egipto ngayti it tagnaꞌ paꞌ. 9Seledan it tulung aldaw baw tengaꞌ, mga bilug nira ngayting mamagbubuntul, siging asa it mga katataawan nga gumaring kat muꞌsang mga bangsa, maski siyu i piyanggaring-garingan nira baw maski unu nga ampang i ampang nira. Ega ireg it mga katataawan ngayti nga ilbeng. 10Sumagya i mga taw situt sinirungat langit sabap it miyatay nay duwa ngayting manigpamatuud. Magkasagyaan na sira baw mamagbega-begayen nat mga bagay nga begay lamang, sabap it naꞌawaꞌ nay duwa ngayti nga minggay it kanira it kakuriꞌan.
11Temed nagtaꞌlib i tulung aldaw ngayti baw tengaꞌ, ipiyagꞌuliꞌ siꞌ it Ampuꞌang Diyus duꞌut mga miyatay ngayti i ginawa nira. Egay beken, nagbangun na sira, langkuy it timnindeg. Ta, namagkelas i atay it kumpur namagkalteg it kanira. 12Bawnga may nagnegan nirang dadakulang ampang nga garing duꞌun it langit, nga magꞌaat, “Daliꞌ kamu nang duwa. Mapyat kamu na sini.” Aypaꞌ mintras pagsesyekan sirat mga kalaban nira ngayti, nangunragiꞌ nat kunum i duwa ngayti, ka namagpatibung na duꞌut langit.
13Bawnga sakaling yimnegyeg nay lugtaꞌ it ereꞌeret nga keseg, aypaꞌ ka gimnesneb i ikasang pulung bagiꞌ it siyudad ngayti. Pitung ribu i kadakel it taw nga natay. Iyan naꞌped nga mga taw, namagꞌiꞌlam na sirang ereꞌeret. Biyantug na niray Ampuꞌang Diyus nga duꞌun it langit. 14Nagtaꞌlib nay ikadwa ngayting ega basta-bastang kakuriꞌan. Temed sumunud nat madaliꞌ i ikatlu.
Yapay eyep it ikapitu ngayting anghil it kanya nga taburi
15Inyepan nat ikapitu ngayting anghil i kanya ngayting taburi. Bawnga may nagnegan ku nga mamagꞌampang it dadakulaꞌ nga duꞌun it langit, nga magꞌaat,
“Muꞌsang katataawan nga kat pudir it simnakep it kanira kat sinirungat langit, kayti sinakepan na sira it Ampuꞌang Diyus tami baw si Jesu-Cristo nga siyarigan ya.
Talagang magꞌadiꞌ kanya it egay katupusan.”
16Ta binwat siꞌ it duwang puluꞌ ngayti may epat nga mga magugurang nga magꞌaꞌdung duꞌun it mga araꞌdungan it may pudir nga kat adapan it Ampuꞌang Diyus, namagpanluud sira ka simnamba it kanya. 17Maat i inampang nira,
“Mabantug nga Ampuꞌang Diyus nga landaw nga gunaan, garing it tagnaꞌ paꞌ may ikaw nga lagi, baw seked kayti ngaytu egay pagꞌugadan mu.
Magpasalamat kami ka ipiyalteg mu i egay katupusan nga guna mu ka nagpapuꞌun ka na it magꞌadiꞌ.
18Talagang ereꞌeret nga iseg it iyan mga bangsa nga ega mamagkilala it imu.
Temed ta, naꞌbut nay timpu nga ipatantu mu nay imu nga iseg.
Naꞌbut nay timpu nga betanganan nat ukuman i mga miyatay, baw begayan nat tumbas i mga prupitaꞌ nga mga manigsirbi mu, baw muꞌsang mga taawan mu, kumpur may iꞌlam baw paggalang it imu, mataꞌas nga duguꞌ baw timawaꞌ.
Talagang kayti nay timpu nga pakuriꞌan mu nat ega basta-basta i iyan mamagpakuriꞌ kat sinirungat langit.”
19Ta, may miyabri nat salakwatan it Templo it Ampuꞌang Diyus duꞌun it langit, baw naltegan ku duꞌun it seled i Kaban it Pakiꞌupakat ya. Sakaling kimnilat baw nanduldug it dadakulaꞌ nga pamsar. Yimnegyeg i lugtaꞌ baw miyuran na, nga yay magtedag, dadakulaꞌ nga yilu nga subung it deset batu. Mga itu ngaytu, pamatuud it kabantugan it Ampuꞌang Diyus ngayti.
12Esang tandaꞌanan nga ipiyalteg pasar it pandaꞌeg it ki Satanas
1Simnunud siꞌ nga ipiyalteg it aken duꞌun it langit, kalililuꞌan nga tandaꞌanan. Ka naltegan kuy esang babay nga aldaw i pakayan ya. Pagtutungtungan yay bulan, baw pagkukurunaan i ulu yat sang puluꞌ may duwa nga kabituꞌunan. 2Magbebteng i babay ngayti baw pagsaꞌgidan na. Magkatingeg kanya sabap it sakit it pabsug. 3Bawnga esa paꞌ gasiꞌ nga tandaꞌanan i ipiyalteg it aken duꞌun it langit. Piyakadakulaꞌ nga subuk buwaya i pamilug nga pagpangaranan it dragon, nga madarag i bilug ya. Pitu magsangay ulu ya baw sang puluꞌ i tanduk ya. May kuruna it kada ulu ya ngayti. 4Pagleteg ku, kiyaut it ikug yay ikatlung bagiꞌ it mga bituꞌun bawnga iꞌinlug yang muꞌsa situt banwa. Bawnga binwat ya siꞌ, timnindeg kanya duꞌun it saru-sarungaan it babay ngayti nga pagsaꞌgidan, ka pagꞌapaꞌan yay sumakit i waꞌwaꞌ ka sangwapen ya.
5Egay beken, nanganak nay babay ngayti, sumakit, lalaki. Temed ega nasangwap it dragon sabap, kat pabetang-betang nagat Ampuꞌang Diyus, may simnibnut it madaragen ngayti ka tiyaban duꞌun it kanya ngayting magꞌaꞌdung duꞌun it araꞌdungan ya kat pagkaꞌadiꞌ. Ka iting waꞌwaꞌ, nakasiguru nga magꞌadiꞌ it muꞌsang bangsa it may kakayaan nga ega basta-basta. 6Ta, yan babay ngayti, binwat ya, miyalagyu duꞌun it rugar nga kapupuyangtan, duꞌut esang rugar nga ipiyagꞌareg nang lagi it Ampuꞌang Diyus it kanya, isaꞌun maꞌarigraan kanya duꞌun, it seledat sang ribu baw duwang gatus baw enem nga puluꞌ nga aldaw.
7Ta, pagkatiwas kayti, nagkagira nay duꞌut langit. Nagpakibunuꞌ na Miguel12:7 Si Miguel ngaytu, anghil nga mataꞌas i katengdanan ya, esang pagbayaꞌen it mga anghil. baw kanya nga kaꞌibaan nga mga anghil, piyakibunuꞌan nira i dragon ngayti. Ta minles nagay dragon ngayti baw mga kimnampiꞌ it kanya nga mga anghil. 8Temed egay nabwat nira ka diyaꞌeg sira. Aypaꞌ daꞌsira na piyatinir duꞌun it langit. 9Egay beken, itindag na i dakulaꞌ ngayting dragon. Ta, dragon ngayti, kanyay nagpabaluy-baluy ngayan nga dukul12:9 Genesis kapitulu 3. it tagnaꞌ paꞌ baw garing sikayan, siging pandayaꞌ yat muꞌsang katataawan situt sinirungat langit. Ngaran yang sangbat, Manigbuꞌbug, baw esa gasiꞌ, si Satanas. Itindag na kanya situt banwa pati mga anghil ngayting kimnampiꞌ it kanya.12:9 Mga anghil ngayting kimnampiꞌ, yanay mga maraꞌe-raꞌet nayan nga paꞌaaten.
10Bawnga may nagnegan ku nga ampang nga dadakulaꞌ, maggaring duꞌun it langit, nga magꞌaat,
“Kiyumplitu na kayti i panribri it Ampuꞌang Diyus it mga taawan ya.
Ipiyalteg ya nay ega basta-bastang kakayaan ya it pagkaꞌadiꞌ.
Talagang ipiyalteg nat siyarigan ya nga Cristo i pudir ya.
Sabap inimugaw na duꞌun it langit si Satanas ngayting magbuꞌbug it mga kasulsugan tami kat pamayaꞌ.
Kaꞌlay ngaytu, ipagdimanda ya sira duꞌun it Ampuꞌang Diyus tami it delem-aldaw, temed kayti, ega na ka inimugaw na kanya.
11Diyaꞌeg si Satanas it mga kasulsugan tami ngayti kat keseg it ipiyaturuꞌ nga duguꞌ it paꞌaaten nga Uꞌuybun It Tupa baw kat pamatuud nirat kamatuudan pasar it kanya ngayting si Jesu-Cristo.
Ka ega talaga riyarasan niray ginawa nira, sabap lamang it pamayaꞌ nirat kanya.
12Aypaꞌ dakulaꞌ na talagay kasagyaan situt langit.
Sumagya kamung muꞌsa nga magtataꞌid situ.
Temed kumpur magtataꞌid asan it banwa baw dagat, talagang ega basta-bastang kakuriꞌan i labayen mi.
Kaꞌildaw-ildaw kamu ka piyaꞌasan na si Satanas ngaytu.
Timnalalu talagay iseg ya ka urut ya na nga dekeyeꞌ manay timpu yat kanya.”
13Ta pagkamuya it dragon ngayti it itindag na kanya situt banwa, inusig yay babay ngayting nanganak it laa-lalaki ngayti. 14Temed sakaling inildawan it Ampuꞌang Diyus i babay ngayti nga piyaꞌeladan ya it subuk elad it dakulang agila,12:14 Agila ngaytu, dakulang banar nga manu-manuk. Maꞌeladen nga subrat sang depa. isaꞌun makalayug nga paꞌaduꞌun it rugar nga kapupuyangtan. Duꞌun i taguꞌan it kanya isaꞌun maribri kanya duꞌun it dragon ngayti. Baw duꞌun kayti, arigraen kanyat magayen it Ampuꞌang Diyus seledat tulung taꞌun baw tengaꞌ. 15Pagkamuya it paꞌaaten ngayting dragon, simnupra kanyat danum nga miyakan-bakan, ka isaꞌun ibelbeg i babay ngayti. 16Takaꞌ tiyabang i babay ka miyukaꞌ i lugtaꞌ. Kaꞌaat ka, natlen nat kemlat it lugtaꞌ i danum ngayting isiyupra it dragon. Aypaꞌ ka ega naꞌunu i babay ngayti. 17Ta, kat kadakulaꞌ it iseg it dragon it babay ngayti, paꞌugadan ya nga giraen i beken nga mga tungtung-inapuꞌ it babay ngayti. Itung mga taw, sira nga mamagsunud nga banar it kaꞌirgan it Ampuꞌang Diyus baw ega mamagpangindiꞌ kat kamatuudan nga ipiyatantu it Ampuꞌan nga si Jesus. 18Binwat it dragon ngayti, naꞌaduꞌun na kanyat tambing it dagat.
13Kumakaꞌen nga ramu-ramu nga duwa i naltegan ni Juan
1Sumunud siꞌ, may naltegan ku nga naningdal nga garing duꞌun it dagat nga esang kumakaꞌen nga ramu-ramu nga siyang kat banwa. Pitu gasiꞌ magsangay ulu ya baw sang puluꞌ i tanduk ya, nga pagkukurunaan i kada tanduk ya ngayti. Baw teptep it ulu ya ngayti, yay magsusurat nga mga ngaran ya, nga kada sangbat ngaytu, talagang magtibabaꞌ it Ampuꞌang Diyus. 2Subung it dakulang pasla nga pagpangaranan it leopardo i pamilug it kumakaꞌen ngayting ramu-ramu nga naltegan ku. Aꞌay baw kukuꞌ ya, subung it pangaꞌay it maꞌiseg nga ramu-ramu kat talun nga pagpangaranan it oso. Pamaꞌbaꞌ ya, subung it pagbaꞌbaꞌ it leon. Ibinggay nat dragon ngayti i muꞌsang pudir ya baw pagkaꞌadiꞌ ya duꞌun it kumakaꞌen ngayti nga ramu-ramu, pati ega basta-bastang kakayaan ya. 3Pagleteg ku, may naltegan ku nga barnat pinilatan duꞌun it sangbat nga ulu, nga subung it bungad nga ipatay temed it minilat naga. Naliluꞌ i muꞌsang taw situt sinirungat langit. Nagpasakep na sira it kumakaꞌen ngayting ramu-ramu. 4Siyamba niray dragon ngayti sabap kanyay nagbegay it pudir it kumakaꞌen ngayting ramu-ramu. Siyamba nira gasiꞌ i ramu-ramu ngayti, ka maamaatan sira, “Ta, siyuy makasbung it kanya? Siyu pay makalaban kayan?”
5Sakaling nakaꞌampang i kumakaꞌen ngayti nga ramu-ramu nga lumandi-landi baw timibabaꞌ kanya it Ampuꞌang Diyus. Baw piyaꞌintulutan kanyat magꞌadiꞌ it pagsasakpan ya seledat epat nga puluꞌ may duwang bulan. 6Ta unupat sigi nga tinibabaꞌ ya nang matuud i Ampuꞌang Diyus baw langit nga pagtataꞌidan it Ampuꞌang Diyus ngaytu, pati kumpur duꞌun it langit. 7Piyaꞌintulutan gasiꞌ kanya nga giraen baw subuk daꞌgen yay mga taawan it Ampuꞌang Diyus. Binggayan kanyat pudir nga mamegbeg it muꞌsang bangsat taw nga maski unuy duguꞌ baw ampang nira. 8Aypaꞌ sambaen kanyat muꞌsang katataawan situt sinirungat langit, puyrat iyan mga taw nga, parabir giyuna i banwa, mamagsusurat na i mga ngaran nira duꞌun it pagsusuratan it mga ngaran it kumpur mabgayan it kaꞌgenan nga egay kaskedan. Itung kasuratan, pagꞌaꞌarigraen it paꞌaaten nga Uꞌuybun It Tupa nga inimatay it tagnaꞌ.
9Ta it pagꞌargan it talinga, ipagpagneg, kaꞌilangan pagnegan mit magayen i mga itu ngaytu. 10Kumpur piyabetang-betangan nga pirisuun, siguradung pirisuun naga yan. Baw kumpur piyabetang-betangan nga imatayen it tarep basiꞌ, ta atkayan naga, imatayen yan. Aypaꞌ ka mga taawan it Ampuꞌang Diyus, kaꞌilangan papaꞌgenen niray pamayaꞌ nira baw pagsarig it kanya ngaytu isaꞌun makateꞌteꞌ sira, maski sang unuy pakuriꞌ it kanira.
11Ta, may naltegan ku siꞌ nga esa sing kumakaꞌen nga ramu-ramu, nga kat lugtaꞌ i liniꞌwanan ya. Duway tanduk ya nga subung it pananandukan it uꞌuybun it tupa temed gaꞌmaran, subuk gaꞌmaran it dragon. 12Pagsarigan kanyat uꞌna ngayting kumakaꞌen nga ramu-ramu, aypaꞌ ka giyamit yay pudir baw kakayaan it uꞌna ngayti. Baw riyeges yay muꞌsang taw situt sinirungat langit nga sumamba it uꞌna ngayting ramu-ramu, nga lamang may bungad nga ipatay na temed it minilat naga. 13Talagang kalililuꞌang banar i mga binwat it ikadwa ngayting kumakaꞌen nga ramu-ramu, nga subuk nagpalampud kanyat apuy nga gimnaring duꞌut langit. Binwat yaytu kat matat kadakel. 14Diyayaꞌ yay muꞌsang mga taw situt banwa sabap duꞌun it pagbuwaten ya ngayting mga kalililuꞌang bagay nga ipagpabwat it uꞌna ngayting kumakaꞌen nga ramu-ramu. Ipiyagꞌurdin yat mga taw nga muwat it ladawan nga ipasbung it uꞌna ngayting ramu-ramu nga nabungadan it basiꞌ takaꞌ yanagayang nagꞌegen. 15Piyaꞌintulutan gasiꞌ i ikadwa ngayti nga kumakaꞌen nga ramu-ramu it paginawaen yay ladawan ngayting binwat. Ta egay beken, nakaꞌampang i binwat ngayti, baw isingkat ya nga pangimatayen i mga taw nga ega magsamba it kanya.
16Bawnga riyeges it kumakaꞌen ngayting ramu-ramu i muꞌsang taw, mataꞌas baw timawaꞌ, manggaden baw miskin, uripen baw ega. Riyeges sira nga piyaꞌimandaꞌanan i kat iwanang alima u peges nira. 17Talagang ega mapakay nga mangalang u paꞌalang i iyan nga egay markaꞌ nga ngaran it kumakaꞌen ngayting ramu-ramu u bilang nga iti nagay pagpaꞌiguꞌan.
18Ta, matantuwan lamang tu basta dakulay kasepsep. Ka mapakay nagang maꞌrutan it masepsep i ireg sugiden it bilang ngaytu nga ngaran nagat ramu-ramu ngayti i pagpaꞌiguꞌan. Sabap ngaran tu it lalaki i bilang ngaytu nga enem nga gatus baw enem nga puluꞌ may enem.
14Uꞌubyun It Tupa baw mga subuk inalang ya
1Pagleteg ku siꞌ, naltegan kuy paꞌaaten ngayting Uꞌuybun It Tupa, nga magtitindeg duꞌun it Mungsuꞌ it Sion. Kaꞌibaan ya, sang gatus baw epat nga puluꞌ may epat nga ribung kataawan. Magsusurat duꞌun it peges it mga taw ngayti i ngaran it Uꞌuybun It Tupa ngayti baw ngaran gasiꞌ it Ampuꞌang Diyus nga Amaꞌ ya. 2Bawnga may nagnegan ku nga ampang nga gimnaring duꞌut langit, nga atnat bugasꞌas it dakulang kensad baw subung nat dadakulang pamsar it duldug. Ampang ngayti nga nagnegan ku, kaꞌaat ka tugtug it mga manigtugtug it turugtugun nga alpa. 3Kadakel ngayti, nga sang gatus baw epat nga puluꞌ may epat nga ribu ngayting kataawan, magtitindeg na sira kat adapan it Ampuꞌang Diyus nga magꞌaꞌdung duꞌun it araꞌdungan ya kat pagkaꞌadiꞌ, baw kat adapan it epat ngayting may ginawa nga giyuna baw duwang puluꞌ may epat gasiꞌ ngayting mga magugurang. Nagnegan ku nga mamagkantaꞌ sira it baꞌgung kalasit kantaꞌ. Egay beken nga magkaꞌrut it iting kantaꞌ, in daꞌga iti lamang, kadakel ngayti nga, kat muꞌsang taw situt banwa, sira i napiliꞌ nga subuk inalang it paꞌaaten ngayting Uꞌuybun It Tupa isaꞌun mga taawan ya na. 4Mga taw ngayti, ega simnalya manriꞌe-riꞌeng it maski siyu nga babay.14:4 Simpri, egaytu ireg sugiden nga kasalaꞌan naga i adat nga ipiyagbanwa in nagꞌasawa na. Pirming pagpaꞌalimbawaan i mga taawan it Ampuꞌang Diyus, nga siray subuk inasawa it Ampuꞌang Diyus. Baw in mangindiꞌ sira nga sumamba na it beken kat pangaꞌgenan nira, kabilangan ya, namungad na sira it atay it Ampuꞌang Diyus (1 Mga Cronica 5:25, Ezekiel 6:9, baw Oseas 9:1). Aypaꞌ in ega nagkasalaꞌan kat panriꞌe-riꞌeng it maski unu nga babay, siguru ladawan tu it taw nga ega namungad it atay it Ampuꞌang Diyus, nga tingled i nakem ya kat pagsunud it kaꞌirgan it Ampuꞌang Diyus ngaytu. Mamagbaya-bayaꞌ sirang pirmi it paꞌaaten ngayting Uꞌuybun It Tupa. Talagang kat muꞌsang katataawan, napiliꞌ sira nga subuk inalang, nga sira, mga taawan na it Ampuꞌang Diyus. Baw kabilangan nira, subuk uꞌnang lutuꞌ nga tirigu nga ipagpasalamat duꞌun it Ampuꞌang Diyus baw Uꞌuybun ngaytit Tupa. 5Talagang maski kaꞌsa, daꞌsira miyambut, ega talagay masudi-sudi it kanira.
May tulu sing kaꞌanghilan nga miyampang
6May naltegan ku siꞌ nga esang anghil nga maglalayug duꞌut lawang. Taba-taban yay Magayeng Baritaꞌ pasar it karibriyan nga egay pagbaꞌguwan ya, ka ipangadal situt banwa kat muꞌsa nga mga bangsa, maski siyu i piyanggaring-garingan nira baw maski unu nga ampang i ampang nira. 7Miyampang kanyat dadakulaꞌ nga magꞌaat, “Galangen baw iꞌlaman mi i Ampuꞌang Diyus, baw bantugun mi i ega basta-bastang keseg it guna ya. Sabap naꞌbut nay timpu nga ukumanan ya nay muꞌsang mga taw. Kaꞌilangan nga sambaen mi i Ampuꞌang Diyus ngaytu nga nagguna it langit baw banwa, dagat baw muꞌsang mga pagtumbudan it danum.”
8Bawnga may simnunud nga ikadwang anghil. Miyampang gasiꞌ i itiꞌen nga ipaggaꞌu-gaꞌuy ya na, nga magꞌaat, “Riyanggaꞌ na bayan! Talagang riyanggaꞌ nay Babilonia, matanug ngayting siyudad.14:8 Basaen i paꞌyag duꞌun it Kapitulu 17:1. Ka siyudad ngayti, subuk babay nga nagpaꞌinum it muꞌsang bangsa it talagang maꞌiseg nga irimnun isaꞌun kapamakun sirat kanya it egay pateng.”
9Ipaggaꞌu-gaꞌuy gasiꞌ i ampang it ikatlung anghil nga simnunud it duwa ngayti. Maat ya, “In siyu-siyuy magsamba it kumakaꞌen ngayang ramu-ramu pati ladawan ya baw nagpamarkaꞌ it pangingimandaꞌan ya kat peges u alima ya, 10siguradu nga malabayan niray iseg it Ampuꞌang Diyus nga ipiyagꞌareg ya nga egay maski unu nga uyut nga ildaw. Pakuriꞌan sira talaga duꞌun it apuy nga may asupri, kat adapan it paꞌaaten ngaytung Uꞌuybun It Tupa baw mga anghil it Ampuꞌang Diyus. 11Iyan apuy ngayting magpakuriꞌ it kanira, talagang ega magpugda-pugdaw seked it kaꞌnu-kaꞌnu. Talagang delem-aldaw, egay kapaꞌnaan it kakuriꞌan it mga simnamba ngaytut kumakaꞌen ngayting ramu-ramu baw ladawan ya, baw namagpamarkaꞌ ngayti it pagꞌiꞌimandaꞌanan nga kanyang ngaran i pagpaꞌiguꞌan.” 12Aypaꞌ it atkayan i mabetangan nira ngayti, kaꞌilangan talaga nga kumpur mga taawan it Ampuꞌang Diyus nga mamagsunud it kaꞌirgan ya baw magpamayaꞌ nat ki Jesus, kaꞌilangan nga teꞌteꞌan nira kanya maski ikagtas nat ginawa nira.
13Bawnga nakagneg aku sit ampang nga gimnaring duꞌun it langit nga magꞌaat, “Isurat muy itu ngaytu. Garing kayti, makasagyang banar i sira nga seked it kamataynen ega nagpaꞌiwar-iwar it pakilagpit nirat Ampuꞌan.”
“Talagang matuud tu,” maat it Espiritu Santo, “makapaꞌna na sira kat paꞌres nira baw begayan sirat tumbas it mga binwatan nira.”
Kaygen nay kakaygen situt banwa
14Pagleteg ku siꞌ, may naltegan ku nga esang maputiꞌ nga kunum. Magsasakay duꞌun i subung it Taga Langit nga Ipiyanganak it Taw. May kuruna nga bulawan duꞌun it ulu ya baw magseskel kanyat gagapas nga yanay tarem. 15Bawnga may esa sing anghil nga singkat nga nanliꞌwan duꞌun it Templo duꞌut langit. Giyaꞌuyan yay magsasakay ngayti duꞌun it kunum, nga magꞌaat, “Sigi, gamiten mu nay gagapas mu ngayan. Gumapas ka na, ka lutuꞌ nay kaygen ngayan asat banwa.” 16Aypaꞌ egay beken, ikinimpay ya nay gagapas ngayting pagseskelen ya. Nagapas yang muꞌsa i kaygen situt banwa.
17Pagkatupus it itiꞌen, may esa sing anghil nga nanliꞌwan duꞌun it Templo nga duꞌut langit. May sekel ya gasiꞌ nga matarem nga gagapas. 18Bawnga nanliꞌwan siꞌ duꞌun i esa gasing anghil nga magpamaalaꞌ it apuy duꞌut papangantengan ngayti. Diyadakulaꞌ yay ampang ya nga inaat yay anghil ngayting magseskel it matarem ngayting gagapas, “Sigi, gamiten mu nay gagapas mu ngayan ka ranasen mu nay buwaꞌ it ubas kat muꞌsang ubasan asat banwa, ka iꞌnug nang muꞌsa.”
19Aypaꞌ ikinimpay it anghil ngayti i sekel ya ngayting gagapas. Riyanas ya nay muꞌsang buwaꞌ it ubas bawnga ibiyuntal na duꞌut dakulang kikilangan ka kilangen na. Temed yay pagpapuntuꞌan it kikilangan ngaytu, ega basta-bastang iseg it Ampuꞌang Diyus. 20Sabap kumpur ega magkilala it Ampuꞌang Diyus, riniga na sira duꞌun it liꞌwan it siyudad, nga bilang buwat ubas nga pagkilangen isaꞌun murus i letes. Ka miyurus nay duguꞌ nira, talagang liminyud seked it mga tulung gatus nga kilumitru i kiyalantayan baw mga sang mitru baw tengaꞌ i kaꞌararem.
15May pitung kaꞌanghilan nga tereped it taban nga salakep
1Pagleteg ku siꞌ duꞌut langit, naltegan ku, esa gasing tandaꞌanan nga kalililuꞌan nga banar. Ka may pitu nga kaꞌanghilan, magtataban sirat pitung kalasit panalakep. Itu ngaytu i kiyaꞌpusan nga mga panalakep, sabap itu nay pangiyaꞌpusan nga iseg it Ampuꞌang Diyus.
2May naltegan ku gasiꞌ nga subuk dagat nga kaꞌaat ka pirmirang salamin, nga kalaw-kalaw ya subuk sugut apuy. Naltegan ku gasiꞌ sira nga nandaꞌeg it kumakaꞌen ngayting ramu-ramu baw ladawan ya, ka ega siyamba nira baw ega nagpamarkaꞌ it bilang ngayti nga egay beken nga pagpaꞌiguꞌan, ngaran it taw nga ipiyagladawan nga ramu-ramu ngayti. Magtitindeg i muꞌsa ngayti duꞌun it tepad it atna ngaytit dagat nga salamin. Sekel niray mga turugtugun nga alpa nga ibinggay it Ampuꞌang Diyus it kanira. 3Pagkantaꞌen niray kantaꞌ ni Moises nga esang manigsirbi it Ampuꞌang Diyus it tagnaꞌ paꞌ, baw kantaꞌ it paꞌaaten ngayting Uꞌuybun It Tupa, nga magꞌaat,
“Ampuꞌang Diyus nga landaw nga gunaan, mabantug baw kalililuꞌan i mga buwat mu.
Ikaw nga Adiꞌ it muꞌsang bangsa, mataldeng baw kamatuudan i mga ipiyabetang-betang mu.
4Siyuy daꞌga miꞌlam it imu, Ampuꞌang Diyus?
Siyuy daꞌga pamatuud it kabantugan mu?
Ka ikaw lamang i alaid kat kasalaꞌan.
Muꞌsa talaga it mga bangsa, matingped baw sumamba it imu.
Sabap magkaltegan it muꞌsa i mataldeng nga mga ipiyabetang-betang mu.”
5Pagkatupus kayti, naltegan ku nga inabriyan duꞌut langit i ega basta-bastang seled it bilang Templo nga duꞌun talagay Ampuꞌang Diyus. 6Nanliꞌwan na duꞌun it Templo ngayti i pitu ngayting anghil nga tereped it taban nga salakep. Magpapakay sirat maputiꞌ nga pirmirang abel nga limpiyuꞌ nga banar baw sambut nga bulawan nga duꞌun it deꞌgan nira. 7Bawnga may ibinggay it kanira it esa kat mga may ginawa ngayti nga giyuna nga pitung kakarungan nga bulawan nga mamagpupnuꞌ it iseg it Ampuꞌang Diyus, kanya nga egen seked it kaꞌnu-kaꞌnu. 8Bawnga napnuꞌ i Templo ngaytit tabuk nga magpalteg it kabantugan baw guna it Ampuꞌang Diyus. Aypaꞌ ka egay maski siyu nga kasled duꞌut Templo ngayti seked it ega paꞌ naꞌubus i pitu ngayting kasalakepan nga taban it pitu ngayting kaꞌanghilan.
16Iliyamaꞌ nat mga anghil i rugud it mga karung nira
1Bawnga ega naꞌlay may garing duꞌun it Templo nga nagnegan ku nga dadakulang panggaꞌmaran nga magꞌaat duꞌun it pitu ngayting kaꞌanghilan, “Sigi, mapanaw kamu na, ka ilamaꞌ mi na duꞌun it banwa i rugud it pitu ngayang kakarungan nga iyan i iseg it Ampuꞌang Diyus.”
2Aypaꞌ napanaw i uꞌnang anghil, ka iliyamaꞌ ya na situt banwa i rugud it kanya ngayting pagseskelen nga karung. Ta pagkalamaꞌ ya kayti, iyan mga taw nga nagpaꞌimandaꞌan it markaꞌ ngaytit kumakaꞌen ngayti nga ramu-ramu baw simnamba it ladawan ya, piyamungadan na sira it maꞌengat-engat baw marignaꞌ nang pamungad.
3Bawnga iliyamaꞌ it ikadwang anghil duꞌut dagat i rugud it kanya ngayting karung. Ta, nagbalyung duguꞌ i dagat nga subung it maktul nga duguꞌ it taw nga patay na. Aypaꞌ ka natay i muꞌsang magginawa duꞌun.
4Sunud siꞌ, liyamaꞌan it ikatlu ngayting anghil it rugud it kanya ngayti nga karung, duꞌun it mga danum nga magburus baw duꞌun it mga pagtumbudan it danum. Nagbalyu gasiꞌ nga duguꞌ i kanya ngayti nga liyamaꞌan. 5Bawnga may nagnegan ku nga inaat it anghil nga manigpamaalaꞌ it mga danum, nga magꞌaat,
“Ikaw i Ampuꞌang Diyus nga egen.
Egen ka kayti baw kat katagnaꞌ-tagnaꞌan.
Talagang mataldeng ka, baw purus mataldeng i binwat mu ngaytung pagꞌukuman.
6Kat mga taw nga nagpaturuꞌ it duguꞌ it mga taawan mu baw duguꞌ gasiꞌ it mga prupitaꞌ, piyamgayan mu sirat duguꞌ nga imnun nira.
Talagang iyan i bagay it kanira.”
7Baw may nagnegan ku gasiꞌ nga ampang nga garing duꞌun it papangantengan ngayti, nga magꞌaat,
“Ampuꞌang Diyus nga landaw nga gunaan, talagang mataldeng baw kamatuudan i pangukuman mu.”
8Ikaꞌpat siꞌ ngayti nga anghil i limnamaꞌ it rugud it kanya ngayting karung. Aldaw i liyamaꞌan ya. Binggayan i aldaw it pudir nga subrang esben it singkar ya i mga taw. 9Ta unupat inseb nang matuud i katataawan, sabap it talagang subraꞌ na nga kasgaꞌ, aypaꞌ diniyampaꞌ niray Ampuꞌang Diyus nga nagpapanaw it mga kakuriꞌan ngayti. Talagang tinmed nira nga daꞌsira magsinguliꞌ baw mangindiꞌ it mga kasalaꞌan nira baw daꞌsira magbantug it Ampuꞌang Diyus.
10Pagkatupus kayti, iliyamaꞌ it ikalimang anghil i rugud it kanya gasing karung duꞌun it araꞌdungan it kumakaꞌen ngayting ramu-ramu kat pagkaꞌadiꞌ ya. Ta, diminlem nga lagi i kaꞌadiꞌan ya. Yay nabwat it mga taw, kakagat it mga bibig nira sabap it ega magkasagkaꞌan niray sakit it mga bungad nira. 11Diniyampaꞌ nira siꞌ i Ampuꞌang Diyus nga duꞌut langit sabap it paglabayen nira ngayting kakuriꞌan baw pamungad ngayti. Temed maski atkayti nay kabetangan nira, ega ga lamang nagsinguliꞌ baw inindiꞌan niray mga mararaꞌe-raꞌet nga pamagbuwaten nira.
12Bawnga iliyamaꞌ na gasit ikaꞌnem i rugud it kanya ngayting karung. Liyamaꞌan ya, duꞌun it Eufrates nga dakulang danum. Egay beken, napra i danum ngayti isaꞌun diri-diritsu i panaw it mga adiꞌ kat lebatan baw mga sundaluꞌ nira in manrumpak na. 13Bawnga naltegan ku nga may nanliꞌwan nga tulung mararaꞌe-raꞌet, sangbat duꞌun it baꞌbaꞌ it dragon ngayti, baw sangbat duꞌun it baꞌbaꞌ it kumakaꞌen ngayting ramu-ramu baw sangbat gasiꞌ duꞌun it baꞌbaꞌ it mapiyandayaꞌ nga prupitaꞌ. Tulu ngayting mararaꞌe-raꞌet, subuk baꞌak i pamilug nira. 14Iti nga mga mararaꞌe-raꞌet, manigpaliꞌwan it kalililuꞌang mga bagay. Baw binwat nira, limingkep sirat muꞌsang banwa, ka kiyukus niray muꞌsang mga adiꞌ nga lumaban it Ampuꞌang Diyus nga landaw nga gunaan in asan nat ega basta-bastang aldaw nga ipangukuman ya.
15“Pagneg kamu!” maat it Ampuꞌan nga si Jesu-Cristo. “Talagang manluꞌsut aku kat uras nga ega magkaꞌru-kaꞌrutan mi, nga subung it buwat it mananakaw. Aypaꞌ magkasagya i subuk magsusulag ka pagpaꞌbutun yay agalen ya. Baw ega paglelbasen yay pakayan ya isaꞌun, in mabut na, ega maglelbas baw kaꞌeyaꞌ-eyaꞌ nga sumusmu kanya.”
16Ta tiningped na it mga mararaꞌe-raꞌet ngayti i muꞌsa ngayting kiyukus nira nga mga adiꞌ, pati mga sundaluꞌ nira, duꞌun it rugar nga pagpangaranat Armagedon in kat Hinebreo nga ampang.
17Pagkatupus kayti, iliyamaꞌ nat ikapitu ngayting anghil i rugud it kanya ngayting karung. Kat lawang i liyamaꞌan ya. Bawnga miyampang it dadakulaꞌ i duꞌun it araꞌdungan ngaytit adiꞌ nga duꞌun it Templo duꞌut langit, nga magꞌaat, “Nagꞌabut nay kakumplituwan it pangukuman baw iseg it Ampuꞌang Diyus!” 18Bawnga sakaling nangilat baw nanduldug nat dadakulaꞌ nang pamsar baw yimnegyeg nay lugtaꞌ it yanay keseg. Itu na talagay piyakamakseg nga yegyeg it lugtaꞌ nga ega na namasaan it katataawan it yanaytuy kaꞌlay. Piyakamakseg na talaga. 19Aypaꞌ ka nabagiꞌ it tulung bagiꞌ bawnga naranggaꞌ na i matanug ngayting siyudad it Babilonia. Baw naranggaꞌ gasiꞌ i muꞌsang siyudad situt sinirungat langit. Ka tiyuman it Ampuꞌang Diyus i isiyanggup ya pasar it panriga yat mga taga Babilonia ngayti. Talagang piyalabay yang banar it ega basta-bastang iseg ya. Iseg ya ngayti, subung it sang basu nga ipiyuꞌsa yat paꞌinum it kanira. 20Nagsipat i muꞌsang pulaw. Gimnesneb i muꞌsang bukid. 21Bawnga miyuran it talagang dadakulaꞌ na, nga piꞌsang it yilu i magtedag nga mamagtimbang nat agen-agen it limang puluꞌ nga kilu i sang piꞌsang. Unupat pagsariyan nat tedag i mga taw. Aypaꞌ diniyampaꞌ niray Ampuꞌang Diyus sabap it iti ngayti, ka ereꞌeret talaga nga kakuriꞌan.
17Pasar it matanug nga babay nga magpanulus it bilug ya
1Pagkatupus it mga iti ngayti, minlep duꞌut aken i esa kat pitu ngayting mga anghil nga mamagseskel it karung. Miyampang kanya, nga maat ya, “Daliꞌ na, ka ipalteg kut imu in magꞌuꞌunu rigaen i babay nga matanug na nga magpanulus it bilug ya, nga yay pagpapuntuꞌan, matanug nga siyudad nga magtitindeg duꞌun it may dakel nga danum.17:1 Tandes it mga mapipikir, siyudad ngaytung paꞌaaten, nga pagpangaranan ni Juan it Babilonia asat birsikulu 5, yay pagpapuntuꞌan, siyudad it Roma. Ka timpu paꞌ ni Juan ngayting simnurat kaytu, pagsasakpen nat Roma i dakel nga bangsa. Baw talagang pagpakuriꞌan it mga Romano i mga magpamayat Ampuꞌang Diyus. Kamatuudan, dakel nga banar i inimatay nira. 2Talagang mga adiꞌ baw mga katataawan kat sinirungat langit, nagpadura-duraꞌit nang banar it adat ya ngaytung maraꞌway.”
3Bawnga kat pamegbeg it magsasarum it aken nga Espiritu Santo, tiyaban akut esang anghil duꞌut esang rugar nga kapupuyangtan. Naltegan ku duꞌun i esang babay nga magsasakay it madarag nga kumakaꞌen nga ramu-ramu nga pitu magsangay ulu ya baw sang puluꞌ i tanduk ya. Limbug nat surat i bilug it ramu-ramu ngayti. Yanay magsusurat, mga ampang nga ega basta-bastang pagtibabaꞌen i Ampuꞌang Diyus. 4Madarag i pakayan it babay ngayti baw talagang mabakas subuk pakayan it adiꞌ. Bulawan baw marerga nga mga pagminaꞌen nga batu baw ega basta-bastang baliꞌeg i rurug it bilug ya. May sekel ya nga bulawan nga iꞌimnan nga magpupnuꞌ it marignaꞌ baw mararaꞌway nang bagay kat adat ya ngayti nga atkayti.17:4 Kat ampang it Ampuꞌang Diyus, basta yay pagpaꞌalimbawaan, adat nga magpanulus it bilug u magpamakun duꞌun it ega asawa ya, yay pagpapuntuꞌan, pagsirbi it maski unu nga ganti it Ampuꞌang Diyus. 5Magsusurat duꞌun it peges yay esang ngaran nga may tagu-taguꞌ nga pagpaꞌulugan, nga magꞌaat, “Matanug nga Babilonia, nga inaꞌ it pamakun baw muꞌsang maraꞌway nga buwat situt sinirungat langit.” 6Naltegan ku nga maglalangu i babay ngayti. Iliyangu ya, duguꞌ it mga taawan it Ampuꞌang Diyus, mga taw nga inimatay sabap it panindeg baw pamayaꞌ nirat ki Jesus.
Pagkalteg kut kanya ngaytu, naliluꞌ aku talaga. 7Temed iningkut akut anghil ngayti, maat ya, “Unuka naliluꞌ ka? Kayti ipaꞌyag kut imu i kaꞌulugan it babay ngayan baw pagsasakayan ya ngayang kumakaꞌen nga ramu-ramu nga pitu magsangay ulu baw sang puluy tanduk. 8Iyan ramu-ramu ngayan nga naltegan mu, egen payan it tagnaꞌ temed kayti, patay na. Takaꞌ manliꞌwan nagaytu it sumaꞌup nga garing duꞌut piyakamalgeb ngayting siwang, ka tabanen duꞌun it dakulang karigaan nga egay katupusan. Ta, maliluꞌ i mga taw kat sinirungat langit nga ega mamagsusurat i mga ngaran nira duꞌun it pagsusuratan it mga ngaran it kumpur mabgayan it kaꞌgenan nga egay kaskedan, garing pat pagguna it banwa. Maliluꞌ sira pagkalteg nirat kumakaꞌen ngaytung ramu-ramu sabap tagnaꞌ egen paꞌ bawnga natay na, temed nanluꞌsut siꞌ.
9Talagang kaꞌilangan sikaytu kalumu it ulu baw kasepsep. Iyan pitu ngayang kaꞌuluwan, pitu yan nga kamungsuꞌan nga pagꞌaꞌdungan it babay ngayan.17:9 Piyatindegan it siyudad ngaytit Roma, pitu nagang kamungsuꞌan. 10Ipagladawan gasiꞌ tu sikaytu i pitung adiꞌ. Diyaꞌeg nay lima nga kaꞌadiꞌan. Iyan esa, magꞌadiꞌ paꞌ. Iyan ikapitu, ega paꞌ miyabut. Pagꞌabut ya, ega magtinir kanyat maꞌlay. 11Baw ta, yan kumakaꞌen ngayang ramu-ramu nga katꞌesa egen paꞌ temed kayti ngaytu ega na, kanyay ikawalu nga adiꞌ. Takaꞌ esa naga kanya kat pitu ngaytu. Bawnga in mabut siꞌ, tabanen kanya duꞌun it dakulang karigaan nga egay katupusan.
12Iyan sang puluꞌ ngayang tanduk ya nga naltegan mu, sang puluꞌ yan nga mga adiꞌ nga ega paꞌ nakapagꞌadiꞌ. Temed mamaalaꞌ sira nga iba it ramu-ramu ngaytu, lamang ega maꞌlay ka kaꞌaat ka seledat sang uras lamang. 13Esa-esa lamang tu i kat nakem it sang puluꞌ ngaytu, aypaꞌ ka ipasakep nirat kumakaꞌen ngaytung ramu-ramu i kakayaan nira baw pudir nira kat pagkaꞌadiꞌ. 14Ka giraen niray paꞌaaten ngaytung Uꞌuybun It Tupa, temed daꞌgen ya naga sira pati ramu-ramu ngayti. Sabap paꞌaaten ngaytu nga Uꞌuybun It Tupa, kanya i Ampuꞌan it muꞌsang mga agalen baw Adiꞌ it muꞌsang mga adiꞌ. Makaꞌuyut it pandaꞌeg ya ngaytu i mga piniliꞌ baw ipiyapinpin ya nga mga taawan ya nga masunud it kanya.”
15Maat pay beken nga inaat it anghil ngaytit aken, “Iyan naltegan mu ngayang mga danum nga duꞌun magꞌaꞌdung i babay ngayan, gandur yan it taw i ireg sugiden kayan, kat belag-belag nga bangsa, kaduguꞌ-duguꞌan baw ampang. 16Iyan sang puluꞌ ngayang katandukan nga naltegan mu gasiꞌ baw iyan ramu-ramu nga kumakaꞌen, isgan nira yan i babay ngayang magpanulus it bilug ya. Agawun niray muꞌsa nga mga kusas ya. Tananan nira kanya nga lebas na. Bawnga agden nira, baw iyan maꞌpedan, antengen nira. 17Ka ipiyanakem it Ampuꞌang Diyus it sang puluꞌ ngayti nga tumanen niray ipiyabetang-betang ya, ka magꞌurunyun sira baw ipabegbeg niray pudir baw kakayaan nirat ramu-ramu ngaytu seked it matuman i mga inampang it Ampuꞌang Diyus. 18Ta, yan babay ngayan nga naltegan mu, yay pagpapuntuꞌan, matanug yan nga siyudad nga magbebegbeg it mga adiꞌ kat sinirungat langit.”17:18 Tandes it mga mapipikir, Roma i paꞌaaten.
18Diyaꞌeg na i siyudad it Babilonia
1Pagkatupus kayti, naltegan ku nga may esa sing anghil nga magpapasalu garing duꞌun it langit. Mataꞌas nga banar i katengdanan ya. Minyag i muꞌsang banwa sabap it singkar it kabakas ya. 2Pagꞌubsu-ubsun yay gaꞌmaran yat maggaꞌuy, nga magꞌaat,
“Diyaꞌeg na! Diyaꞌeg na i matanug nga siyudad it Babilonia.
Kayti muꞌsang kalasit mga mararaꞌe-raꞌet i mangistaran duꞌun baw pugadan nat marignaꞌ baw mararaꞌway nga mga manu-manuk.
3Miyatkaytu sabap it karaꞌe-raꞌetan nga pagbuwaten it mga taga duꞌun.
Ka siyudad ngayti, subung it babay nga ipagpanulus yay bilug ya.
Piyaduraꞌitan yat maraꞌway nga pagbuwaten ya i muꞌsang bangsat taw situt sinirungat langit, pati mga adiꞌ nira.
Baw iyan mga manigdagang, nagmanggaden na sabap it adat it mga taga duꞌun nga kupisiꞌen nay subrang mababakas nga mga bagay.”
4Bawnga may nagnegan ku siꞌ nga miyampang nga beken nga garing duꞌun it langit nga magꞌaat,
“Paꞌalaid kamu asat kanya, mga taawan ku.
Ayaw kamut paꞌuyu-uyut it mga kasalaꞌan ya ngayan, isaꞌun daꞌkamu makaꞌuyut it panriga it kanya.
5Sabap talagang kasalaꞌan ya, magrarapat nat langit.
Talagang ega mapalipas it Ampuꞌang Diyus i mga karaꞌe-raꞌetan ya ngaytu.
6Ka in magꞌuꞌunuy pakuriꞌ yat beken, talagang belsen na kanya.
Baw ega desang belsen, in daꞌga duwang dubli i mabetangan ya.
Baw ipnuꞌun i iꞌimnan yat subraꞌ pang mapaꞌit, mapaꞌit pat ipagꞌareg yang ipagpaꞌinum ya, nga ireg sugiden, pasukdanen kanyat Ampuꞌang Diyus it ega basta-bastang iseg ya.
7Ka in magꞌuꞌunu nagpaꞌayaw-ayaw kanyat pagkasagyaan baw pagmataꞌas, atkayan nagay kadakulaꞌ it malabayan ya nga pakuriꞌ baw kasmek.
Sabap kat nake-nakem ya,
‘Talagang magꞌaꞌdung aku naytu kat pagkaꞌadiꞌ. Egaytu balu aku.
Seked it kaꞌnu-kaꞌnu, alaid talagat aken i masmekan.’
8Temed ta, sabap it patuꞌgud ya ngayti, derengan nga mabut it kanya it sang aldaw i mga panalakep, sarut, kasmek baw getem.
Bawnga siyudad ngayang pagpapuntuꞌan it babay ngaytu, ansurun it apuy.
Sabap landaw nga gunaan i Ampuꞌang Diyus nga magꞌukuman it kanya.
9Gumarwak talagat ega amang-amang i mga adiꞌ situt sinirungat langit nga nagpadura-duraꞌit it karaꞌe-raꞌetan baw maꞌingarum nga adat it mga taga Babilonia ngayti. Gumarwak sira nga makalawag it tabuk it magkaꞌanteng ngaytung siyudad. 10Timitindeg lamang sira duꞌun it alaid, sabap magꞌiꞌlam sira nga makaꞌuyut it kakuriꞌan ngayting panriga. Maamaatan sira,
‘Abaa, subrang makuriꞌ talagaytu! Talagang ipagkapangingiraꞌbut nang bagay.
Sabap seledan lamang it sang uras, nagꞌabut i panriga it mabantug baw matanug nga siyudad it Babilonia.’
11Ta sabap it nabetangan it siyudad ngayti, sumgaw gasiꞌ baw masmek i muꞌsang mga manigdagang situt banwa, sabap it ega nay malang it mga ipagdagang nira. 12Ega nay malang it bulawan baw pirak nira, mga marerga nga pagminaꞌen nga batu baw ega basta-bastang baliꞌeg nga rurug it bilug, baw mga pirmira nga abel, madalisi nga abel baw iyan liyuuꞌ it indilibel baw madarag. Daꞌnay mapaꞌalang nirat mabanglu nga kayu, baw kalasi-kalasing mga bagay nga yay binwat, marerga nga kayu, tanduk it elepante, tumbaga, basiꞌ baw pirmirang batu nga maputiꞌ. 13Ega nay malang it mga panraragiꞌ it pangaꞌen, baw kamangyan baw beken nga mga babangluun, irimnun nga letes it buwat ubas, lana it olibo, arina baw tirigu. Ega na makapaꞌalang niray mga bakaꞌ, tupa, kabayuꞌ baw sarakayan nga pagguyudun it kabayuꞌ. Pati mga ipagdagang nirang masigkataw nira nga ipagpaꞌuripen, ega na maꞌalang.
14Aaten it mga manigdagang ngayti, ‘Sayang talaga, ka ega nay muꞌsang mga magagayeng bagay nga pagrarasan it mga taga duꞌun. Talagang ega na maparagan nira pat sumaꞌup i kamanggadan baw kabakas it siyudad ngayti.’ 15Iyan nay buwaten it mga manigdagang ngayti nga nagmanggaden na kat iyan nga siyudad, ega na patpad, in daꞌga timitindeg na lamang duꞌun it alaid, ka magꞌiꞌlam sira nga makaꞌuyut it paglabayen ngayting kakuriꞌan. Talagang sumgaw sira baw masmek. 16Maat i aaten nira,
‘Abaa, subrang makuriꞌ talagaytu! Kaꞌiꞌiraꞌbut nay nagꞌabut ngaytu kat matanug ngaytung siyudad.
Tagnaꞌ ngayti, talagang mabakas i mga pakayan baw kasisilaw na nga rurug it bilug it mga taw duꞌun.
Ka pakayan nira, pirmirang abel, baw mga liyuuꞌ it indilibel baw madarag.
Baw rurug it bilug, mga bulawan baw marerga nga pagminaꞌen nga batu baw ega basta-bastang baliꞌeg.
17Talagang seledan lamang it sang uras, nagsipat na nga muꞌsa i mga iyan ngayan.’
Ta, duꞌun gasiꞌ it alaid, maglawa-lawag na lamang, i mga barugsakay baw mga pagbayaꞌen nira, baw mga manigpanakay, kumpur duꞌun it dagat i pangaꞌgenan baw panulus nira. 18Talagang sugawan niray magkaꞌanteng ngayting siyudad in malawag niray maggaring duꞌun nga tabuk. Maamaatan yan sira, ‘Talagang ega masbungan i kabantugan it itung siyudad.’ 19Egay beken, anuꞌan nirat kapu-kapu i mga ulu nira nga tandaꞌ it kadakulat kasmek nira. Baw mamagꞌampang i magsugaw nga magꞌaat,
‘Abaa, subrang makuriꞌ talagaytu! Talagang subrang makuriꞌ i nabetangan it matanug ngaytu nga siyudad.
Nagmanggaden i muꞌsang tagpuꞌun it mga barkuꞌ nga magtataban it dagangan situt siyudad ngaytu.
Temed seledan lamang it sang uras, nagsipat nay manggad ya baw kabakas ya.’
20Kamu nga duꞌun it langit, sagyaan mi nga banar i nabetangan ya ngaytu.
Kamu nga mga prupitaꞌ baw mga apustul baw beken nga taawan it Ampuꞌan, magkasagya kamu na.
Sabap binles nat Ampuꞌang Diyus i mga binwat it taga Babilonia ngayti nga binwat nirat imyu.”
21Bawnga may esa nga ega basta-bastang anghil nga minsiꞌ it sangbat nga batu nga dakulaꞌ nga banar. Ibiyuntal ya duꞌun it dagat dengan it miyampang kanya nga magꞌaat, “Atkaytuytu i keseg it panranggaꞌ it matanug nga siyudad it Babilonia. Talagang ega na maltegan pat sumaꞌup. 22Talagang ega na magnegan paꞌ duꞌun i gaꞌmaran it mangangantaꞌ, baw tugtug it mga manigtugtug it alpa, baw pagpatlaꞌ it mga pagꞌeypan nga plauta baw trompeta. Ega na gasiꞌ maltegan duꞌun i mga makakaꞌrut nga mga manigbuwat it maski unu nga pagbuwaten, baw ega na gasiꞌ magnegan i tingeg it mga gilingan. 23Talagang ega nay meyag duꞌun nga maski esa nga titidawan. Ega nay magnegang kasagyaan nga pagsadu it mga magꞌasawa. Ka rigaen i mga taga Babilonia ngayti sabap nagpataꞌas i mga manigdagang duꞌun. Talagang mga matatanug baw makekseg sira kat muꞌsang banwa. Baw tiyeꞌag-teꞌag nira i muꞌsang mga bangsa, aypaꞌ ka nagpadura-duraꞌit i katataawan it karaꞌe-raꞌetan nga kepetan it mga taga duꞌun. 24Rigaen i mga taga Babilonia sabap it mamuyaan duꞌun i ipiyaturuꞌ nirang duguꞌ, nga duguꞌ it inimatay nira nga mga prupitaꞌ baw beken nga mga taawan it Ampuꞌang Diyus, nga kumpur inimatay situt sinirungat langit.”
19Kasagyaan duꞌun it langit
1Pagkatupus siꞌ kayti, nagnegan kuy subung it inesa-esa nga gaꞌmaran it talagang dakel na nga dakel nga mga taw duꞌun it langit. Magꞌaat i ipaggaꞌu-gaꞌuy nira,
“Bantugun i Ampuꞌang Diyus tami!
Bantugun kanya nga Manriribri tami nga ega masbungan i kabantugan baw guna ya.
2Ka talagang mataldeng baw kamatuudan i pangukuman ya.
Inukumanan ya nay matanug ngayti nga babay nga magpanulus it bilug ya, kanya nga nagparaꞌe-raꞌet nang banar it katataawan kat sinirungat langit kat maraꞌway ngayting adat ya.
Inukumanan kanya it panriga sabap it pangimatay yat mga manigsirbi it Ampuꞌang Diyus.”
3Maat pay beken nga ipaggaꞌuy nira,
“Bantugun i Ampuꞌang Diyus!
Timindeg kat lawang it egay katupusan i tabuk it magkaꞌanteng ngaytu nga matanug nga siyudad.”
4Ta, yan duwang puluꞌ baw epat ngayti nga mga magugurang baw epat ngayti nga may ginawa nga giyuna, namagpanluud ka siyamba niray Ampuꞌang Diyus ngayting magꞌaꞌdung duꞌun it araꞌdungan ya kat pagkaꞌadiꞌ. Maat i inaat nira, “Kamatuudan tu. Bantugun i Ampuꞌang Diyus!”
5Bawnga may miyampang nga duꞌun i sinraꞌan, adeꞌdeng duꞌun it araꞌdungan ngaytit adiꞌ. Magꞌaat i inampang,
“Bantugun i Ampuꞌang Diyus tami, kamung muꞌsa nga manigsirbi ya, matataꞌas baw mga timawaꞌ, kamu nga may matuud nga iꞌlam nga paggalang mi it kanya.”
6Pagkaꞌanu siꞌ kayti, nakagneg aku siꞌ it dakel na nga mga taw nga magpanggaꞌmaran, nga subung nat bugasꞌas it dakulang kensad baw atnat dadakulang pamsar it duldug. Maat i pagꞌaaten nira,
“Bantugun i Ampuꞌang Diyus!
Sabap Ampuꞌang Diyus tami nga landaw nga gunaan, kanya i magbebegbeg it muꞌsa.
7Aypaꞌ ka sumagya tami it dakulang kasagyaan baw bantugun tami i keseg it guna ya.
Ka miyabut na nga subuk mangasawa nay paꞌaaten ngaytung Uꞌuybun It Tupa.19:7 Ireg sugiden kaytu, pisiꞌen na ni Jesus i muꞌsang nagpalagpit it kanya ka sagpunun ya na.
Nakaꞌalistu na i subuk asawaen ya ngayti.
8Ta, asawaen ya ngayti, piyapakayan nat pirmira nga abel nga maputiꞌ nga limpiyuꞌ nga banar.”
Iyan limpiyuꞌ nga pakayan ngaytu, yay paꞌaaten, mga mataldeng nga buwat it mga taawan it Ampuꞌang Diyus.
9Bawnga inaat akut anghil, “Isurat muytu. Magkasagya i piniliꞌ nga makaꞌuyut it paꞌaaten ngayting pagsadu it subuk pangasawa it paꞌaateng Uꞌuybun it Tupa.” Paꞌugdun ya paꞌ, “Matuud tu nga ampang it Ampuꞌang Diyus.”
10Pagkagneg ku, nanluud aku duꞌun it sarungaan it magpakisugi-sugid ngaytit aken, ka sambaen ku kanya. Temed maat yat aken, “Ayaw! Ega mu buwaten i atkayan. Kaꞌilangan Ampuꞌang Diyus lamang i sambaen mu. Ka aku, manigsirbi ya gasiꞌ subung it imu baw subung it mga sulsug mu kat pamayaꞌ, sira nga magpamatuud it panulduꞌ nga ipiyaꞌrut ni Jesus. Sabap kamatuudan ngayting ipiyaꞌrut ni Jesus, itu nay pagpatalandagan it ampang it mga prupitaꞌ.”
Nandaꞌeg i magsasakay it kabayuꞌ nga maputiꞌ
11Pagkatupus siꞌ kayti, miyabri i langit. May naltegan ku nga esang kabayuꞌ nga maputiꞌ. Iyan magsasakay duꞌun, pagpangaranan it Egay Pagbaꞌgu baw Kamatuudan. Mataldeng kanya mangukuman baw tamaꞌ i pagbuwaten ya nga pakilaban it mga kakuntraꞌ ya. 12Atnat magsugu nga apuy i mata ya. Baw pagkukurunaan kanyat dakel na nga kuruna. Magsusurat duꞌun it bilug yay esa gasiꞌ nga ngaran, temed kanya lamang i magꞌuꞌrut it ireg sugiden. 13Talpuk nat duguꞌ i pakayan ya. “Ampang it Ampuꞌang Diyus” i panaꞌwag it kanya.19:13 Juan 1:1. 14Magdadasun it kanya i kadakel it mga taawan ya duꞌun it langit. Sira i bilang mga sundaluꞌ ya. Magpapakay sirat limpiyuꞌ baw maputiꞌ nga pakayan baw mapuputiꞌ gasiꞌ nga mga kabayuꞌ i kanira nga pamagsasakayan. 15May magliꞌwan nga tarep basiꞌ duꞌun it baꞌbaꞌ ya.19:15 Efeso 6:17. Iti i gamiten ya nga ipasukuꞌ ya it katataawan nga ega nagpasakep it kanya. Bawnga magꞌadiꞌ kanya it may kakayaan nga ega basta-basta. Baw in magꞌuꞌunu pagkilangen i buwaꞌ it ubas duꞌun it kikilangan, atkayan nagay kaꞌigpit in pasukdanen ya i mga taw ngayti it ega basta-bastang iseg it Ampuꞌang Diyus nga landaw nga gunaan. 16Magsusurat duꞌun it pakayan ya baw duꞌun it paꞌa yay ampang nga magꞌaat, “Adiꞌ it muꞌsang mga adiꞌ baw Ampuꞌan it muꞌsang mga agalen.”
17Bawnga may naltegan ku siꞌ nga esang anghil nga magtitindeg duꞌun it aldaw. Giyaꞌuyan yay muꞌsang mga manu-manuk duꞌun it lawang. Maat ya, “Daliꞌ kamu na, matingped sinit dakulaꞌ ngayning pagkaraꞌnen it Ampuꞌang Diyus. 18Daliꞌ mi na. Kaꞌnen mi i isi it muꞌsang mga ega nagpasakep it Ampuꞌang Diyus. Kaꞌnen mi i isi it mga adiꞌ, mga sundaluꞌ baw mga pagbayaꞌen nira, pati mga kabayuꞌ nga pagsakayan nira. Kaꞌnen mi i isi it muꞌsang taw nga ega magkilala it Ampuꞌang Diyus, mga uripen baw daꞌga, timawaꞌ baw matataꞌas.”
19Bawnga naltegan ku siꞌ i kumakaꞌen ngayting ramu-ramu. Mga kaꞌibaan ya, mga adiꞌ situt sinirungat langit baw mga sundaluꞌ nira. Ka pakibunuꞌan nira i magsasakay ngayti duꞌun it kabayuꞌ nga maputiꞌ baw kanya ngayting kaꞌibaan. 20Temed nadakepan i kumakaꞌen ngayting ramu-ramu. Nadakepan gasiꞌ i mapiyangakal ngayting prupitaꞌ nga piyabwat it ramu-ramu ngaytit mga kalililuꞌang bagay. Iti na ngayting mga kalililuꞌang bagay i giyamit ya nga pandayaꞌ yat mga taw nga inimandaꞌanan it markaꞌ it kumakaꞌen ngayting ramu-ramu baw simnamba it ladawan ya. Ta unupat duwa ngayting nadakepan, egen sira nga ibiyuntal duꞌun it lapnaw it magdiklap-diklap nay sugut asupri. 21Egay beken, inimatay nay kadakel it mga sundaluꞌ nira it tarep basiꞌ ngayting magliꞌwan duꞌun it baꞌbaꞌ it magsasakay ngayti duꞌun it kabayuꞌ nga maputiꞌ. Talagang naꞌya-naꞌyawan i mga manu-manuk it kaꞌen it mga bilug it mga inimatay ngayti.
20Talagang egay mabwat ni Satanas, daꞌgen kanya
1Bawnga may naltegan ku siꞌ nga anghil nga mapapasalu nga garing duꞌun it langit. Magseskel kanya it dakulang rantay baw gunsiꞌ it siwang ngayting piyakamalgeb. 2Riyusuban yay dragon ngayti ka biyayuk ya, nga seledat sang ribu nga taꞌun ega uꞌba-uꞌbadan. Ta dragon ngayti, kanya i maraꞌe-raꞌet ngayting nagpabaluy-baluy nga dukul it tagnaꞌ paꞌ ka akalan ya si Eva.20:2 Genesis Kapitulu 3. Ngaran ya, Manigbuꞌbug baw si Satanas. 3Egay beken, ibiyuntal na kanya it anghil ngayti duꞌun it siwang, bawnga siniraduwan. Pagkasiradu, piyaꞌngetan it anghil isaꞌun ega kaliꞌwan si Satanas, nga kapandayaꞌ siꞌ it mga bangsa seked it ega paꞌ naꞌayaw i sang ribu ngayting taꞌun. Temed in maꞌayaw na, paliꞌwanen kanyat ega maꞌlay nga timpu.
4Sunud sing naltegan ku, may mga araꞌdungan it magꞌadiꞌ. Binggayan it pudir nga mangukuman i mga mamagꞌaꞌdung duꞌun. Duꞌun gasiꞌ i mga kiyarurwa it mga inimatay sabap it pamatuud nira it ki Jesus baw pangadal nira it ampang it Ampuꞌang Diyus. Talagang daꞌsira simnamba it kumakaꞌen ngayting ramu-ramu. Subraꞌ nay ladawan ya, talagang daꞌsira simnamba. Daꞌsira gasiꞌ nagpaꞌimandaꞌan it markaꞌ it ramu-ramu ngayti duꞌut peges nira u alima nira. Inggen i iting mga taw ka maꞌiba sira ni Cristo nga magꞌadiꞌ it seledan ngaytit sang ribung taꞌun. 5Ituy paꞌaaten nga uꞌnang pagꞌegen it mga miyatay. Egnen mana siꞌ i miyatay nga beken in matupus nay sang ribu ngaytung taꞌun. 6Magkasagya nga banar i mga piniliꞌ ngaytu nga makaꞌuyut it uꞌna ngaytung pagꞌegen it mga miyatay. Ka talagang daꞌsira makalabay it maski sang dekeyeꞌ nga kakuriꞌan nga paꞌaateng ikadwang kamataynen. In daꞌga, magbaraꞌ sira nga mga sasirduti it Ampuꞌang Diyus baw ni Cristo, baw kaꞌibaan ya sira nga magꞌadiꞌ it seledan ngaytit sang ribu nga taꞌun.
7Ta pagkatupus it sang ribu ngayting taꞌun, ipaliꞌwan siꞌ si Satanas duꞌut pagpipirisuwan ya ngayti. 8Unupat sublan ya siꞌ i buwat ya nga pandayaꞌ it katataawan. Lekpen yay muꞌsang mga bangsa situt sinirungat langit. Mangunkun kanyat ki Gog baw ki Magog, nga ireg sugiden, mga bangsa ngayti. Talagang kadakel it kunkunun ngaytu ni Satanas, subung nat igis duꞌun it baybayan. Tingpeden yay muꞌsa ngaytu ka pakibunuꞌ sira.
9Ta, mga kiyunkun ngaytu, nagsinabut na. Pagkatingped nira, liniputan niray pagmaꞌalen it Ampuꞌang Diyus nga siyudad nga pagtataꞌidan it mga taawan ya. Temed egay nabwat it mga limniput ngaytu ka may timindag nga apuy nga garing duꞌut langit, nga iti i miyanteng it kanira. 10Ta unupat iti, si Satanas ngayti nga dimnayaꞌ it kanira, itiyalpak na kanya duꞌun it maglalapnaw nga apuy nga magdiklap-diklap nay sugut asupri, nga tiyalpakan gasiꞌ it kumakaꞌen ngayting ramu-ramu baw mapiyandayaꞌ ngayting prupitaꞌ. Sang siraan i pakuriꞌan duꞌun it delem-aldaw it egay katupusan.
Magꞌukuman nay Ampuꞌang Diyus
11Pagkatupus siꞌ kayti, iyan siꞌ i naltegan ku, dakulaꞌ baw maputiꞌ nga araꞌdungan it adiꞌ baw kanya nga magꞌaꞌdung duꞌun. Baw sabap it magꞌaꞌdung na kanya ngayti duꞌun, nagsipat nay langit baw banwa, ega nay maltegan pat sumaꞌup. 12Bawnga sumunud siꞌ nga naltegan ku, muꞌsang mga miyatay na nga taw, mamagtitindeg sira duꞌun it sarungaan it araꞌdungan ngaytit adiꞌ. Mataꞌas baw mga timawaꞌ, duꞌun nga muꞌsa. Pagleteg ku, biyukaꞌ i mga kasuratan nga pagluulunun. Bawnga biyukaꞌ nay iyan sangbat nga pagsuratan it mga ngaran it kumpur mabgayan it kaꞌgenan nga egay kaskedan. Bawnga biyetanganan it ukuman i mga taw uyun kat kanya-kanyang binwat, iyan egen paꞌ, nga magsusurat duꞌun it mga kasuratan ngayti. 13Eeꞌ baꞌ, muꞌsa nga duꞌun it pagꞌaꞌanuꞌan it miyatay, pati mga miyatay duꞌut dagat, tiningped sirang muꞌsa ka betanganan it ukuman uyun kat kanya-kanya gasing nabwat. 14Pagkatupus kayti, itiyalpak na duꞌun it maglalapnaw ngayting apuy i kamataynen ngaytu baw rugar it mga miyatay. Ega nay kita-kitaen nga mga itu ngaytu, ka tiningled na duꞌun it maglalapnaw ngayting apuy nga iyan i ikadwang kamataynen. 15Baw iyan ega magsusurat i ngaran duꞌun it pagsuratan it mga mabgayan it kaꞌgenang egay kaskedan, itiyalpak na gasiꞌ duꞌun.
21In maꞌunu i baꞌgung Jerusalem
1Bawnga pagleteg ku, baꞌgu na nga langit baw baꞌgu na gasiꞌ nga banwa. Ega nay lagi-lagi ngaytung langit baw banwa. Ega na gasiꞌ i dagat. 2Bawnga iyan siꞌ i naltegan ku, ega na basta-bastang siyudad it Ampuꞌang Diyus, magpapasalu nga garing duꞌun it kanya nga duꞌut langit. Siyudad ngayting pagpangaranat Baꞌgung Jerusalem, nakasubung-subung nat kagayen it babay nga magpapakay-pakay ka sumusmu nat lalaki nga magpangasawa it kanya. 3Baw siꞌ nga may nagnegan ku nga panggaꞌmarang dadakulaꞌ nga duꞌun it araꞌdungan ngaytit adiꞌ i sinraꞌan, nga magꞌaat, “Kayti iyan pamalay-balay it Ampuꞌang Diyus, asan nat mga taw. Pakisagpun na kanyat kanira ka mga taawan ya na sira. Baw talagang kanya ngaytu i Ampuꞌang Diyus nira, nga maꞌiba-iba nira nang pirmi. 4Baw panisen nat Ampuꞌang Diyus ngaytu i mga luwaꞌ nira, nga ega na makasmek. Ega nay kamataynen, magkasgawan u maski unu nga sakit, ka nagtaꞌlib naytung muꞌsa i itung mga bagay.”
5Pagkatupus it iting ampang, miyampang i magꞌaꞌdung ngaytu duꞌun it araꞌdungan ya kat pagkaꞌadiꞌ. Maat ya, “Pagbaꞌguun ku na i muꞌsang bagay.” Bawnga maat ya it aken, “Isurat muytu i mga itu ngaytu, ka matuud tuy itung mga inaat, egay pagbaꞌguwan ya.”
6Baw maat pay beken nga inaat yat aken, “Kayti natuman naytung muꞌsa. Ka akuy uꞌna it muꞌsa baw aku naga i kat sinauryan. Aku i gimnuna it muꞌsa baw kat pudir ku i kaꞌbusan ya. In siyu nga pagbaꞌnekan, siguradu nga begayan ku kanyat danum nga egay bayad nga garing duꞌun it tumbud nga magbegay it kaꞌgenan. 7Siguradung tumbasan ku i iyan nga nakaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, ka aku nay Ampuꞌang Diyus ya baw kanya nayan i anak ku. 8Temed ta, talagang makuriꞌ nga banar i mabetangan it iyan magꞌiꞌlam mamayaꞌ, mga nangindiꞌ it pamayaꞌ, mga nagpasaga-saga it mga maraꞌway nga pagbuwaten, mga mangingimatay it masigkataw, mga mapiyamakun duꞌun it ega asawa nira, mga may kepetan nga pananamayaꞌ, mga magsirbi it diwata u maski unu nga ganti nirat Ampuꞌang Diyus, baw muꞌsa nga maꞌaꞌambut. Sira ngaytung muꞌsa, egay pagduwa-duwa nga italpak duꞌun it maglalapnaw nga magsugu nga asupri, nga iti nay paꞌaaten nga ikadwang kamataynen.”
9Ta, bawnga minlep duꞌun it aken i esa kat pitu ngayting mga anghil nga teptep ngaytit pagseskelen nga karung nga betang ya, kiyaꞌpusan nga pitung panalakep. Maat yat aken, “Paꞌasini ka, ka ipalteg kut imu i asawaen it paꞌaaten ngaytung Uꞌuybun It Tupa.” 10Egay beken, kat pamegbeg it magsasarum nga Espiritu Santo sinit aken, idiyuꞌlung aku it anghil duꞌun it siyagpawan it esang piyakamatindeg nga bukid. Ipiyalteg yat aken i Jerusalem, iyan ega basta-bastang siyudad it Ampuꞌang Diyus, nga magpapasalu nga garing duꞌun it langit, nga gimnaring duꞌun it Ampuꞌang Diyus. 11Talagang maꞌyag nga maꞌyag i siyudad ngayti, sabap it kabantugan it Ampuꞌang Diyus i magꞌeyag. Talagang magsinggat nga subung it marga nga pagminaꞌeng batu nga haspe, baw subuk pirmirang salamin. 12Maꞌpal baw abwatay i kutaꞌ ya baw may sang puluꞌ baw duwa nga puwirtaꞌan ya. Kada esang puwirtaꞌan may guwardiya nga anghil, baw gasiꞌ nga magsusurat duꞌun it kada puwirtaꞌan i esa it mga ngaran it sang puluꞌ may duwang anak ni Jacob nga yay mga kiyaꞌapuꞌ-apuꞌan it mga Israelita. 13Tagtutulu i puwirtaꞌan it kada kantu ya. Tulu i ayun kat lebatan baw tulu i kat sedpan nga ayun. Tulu i ayun kat sur baw tulu gasiꞌ i ayun kat nurti. 14Baw may sang puluꞌ baw duwa gasing batu i batu nga papaꞌgen it kutaꞌ it siyudad ngayti. Magsusurat gasiꞌ duꞌun i mga ngaran it sang puluꞌ may duwang apustul it paꞌaaten ngaytung Uꞌuybun It Tupa.
15Iyan anghil ngayti nga magpakisugi-sugid it aken, may sekel ya nga tatakes nga bulawan, ka taksen ya i siyudad ngayti, mga puwirtaꞌan ya baw kutaꞌ ya ngayti. 16Kuwadradu i siyudad ngayti. In sang unuy kaꞌalaid ya, yanagay kalayaw ya. Ta tiyakes it anghil i siyudad ngayti. Mga duwang ribu baw epat nga gatus nga kilumitru i kaꞌalaid it kada sang kantu. Atnagay kadibwat ya. 17Tiyakes gasiꞌ it anghil ngayti i kutaꞌ, mga enem nga puluꞌ may limang mitru, uyun kat panakes it taw ka atkayan nga tatakes i paggamiten it anghil ngayti. 18Marga ngayting pagminaꞌen nga batu nga haspe i ikiyutaꞌ, baw pirmirang bulawan i siyudad ngayti, magkalaw-kalaw nga subung it salamin. 19Pagpapagayenen it kalasi-kalasing pirmirang batu i papaꞌgen it kutaꞌ ngayti. Haspe i esa, ikadwa sapiro, kalsedonia i ikatlu, ikaꞌpat esmeralda, 20onise i ikalima, ikaꞌnem kornalina, krisolito i ikapitu, berilo i ikawalu, ikasiyam topasyo, krisopraso i ikasang puluꞌ. Ikasang puluꞌ baw esa hasinto, baw amatista i ikasang puluꞌ may duwa. 21Subung it mutyaꞌ it basek21:21 Mutyat basek ngaytu, talagang margaytu duꞌun it beken nga bangsa. Ribu talagay ipagkaꞌalang kaytu, basta pirmira. i sang puluꞌ may duwang puwirtaꞌan, kada esa sang batung mutyaꞌ i binwat. Pirmirang bulawan i mga karsadaꞌ it siyudad baw magkalaw-kalaw nga subung it salamin.
22Namuyaan ku nga egay Templo duꞌun it siyudad ngayti, sabap Ampuꞌang Diyus nga landaw nga gunaan baw paꞌaaten ngaytung Uꞌuybun It Tupa, duꞌun na nga pirmi, aypaꞌ ka duꞌun nat adapan nira i pagsambaan. Ega na kaꞌilangan nga muwat paꞌ it papagsambaan. 23Talagang ega na kaꞌilangan i aldaw u bulan nga megay it eyag duꞌun it siyudad ngayti, sabap kabantugan it Ampuꞌang Diyus i magꞌeyag duꞌun, baw paꞌaaten ngaytung Uꞌuybun It Tupa, yanay piyakatidaw. 24Eyagan i muꞌsang katataawan situt banwa it eyag ngaytu nga garing duꞌun it siyudad. Muꞌsang mga adiꞌ situt sinirungat langit, tabanen niray ipagkabantug it kanira duꞌun it siyudad ngaytu, ka ikabantug na it Ampuꞌang Diyus.
25Pirmi lamang nga abri i mga puwirtaꞌan it siyudad ngaytu sabap ega na maat demlem pay duꞌun. 26Talagang isled duꞌut siyudad ngayti i kamanggadan baw kabantugan it muꞌsang mga bangsa. 27Temed talagang ega makasled duꞌun i maski unu nga maraꞌway kat panleteg it Ampuꞌang Diyus, maski siyu nga magbuwat it kaꞌeyaꞌ-eyaꞌ u maski siyu nga maꞌambut, in daꞌga iyan lamang magsusurat i ngaran duꞌun it pagsuratat kumpur mabgayan it kaꞌgenan nga egay kaskedan, nga kasuratan ngaytu pagꞌaꞌarigraen it paꞌaaten ngaytung Uꞌuybun It Tupa.
221Ipiyalteg gasit aken it anghil i magburus nga danum nga magbegay it kaꞌgenan. Talagang maliꞌgaw nga maliꞌgaw subung nat pirmirang salamin. Magtumbud ti duꞌun it araꞌdungan it Ampuꞌang Diyus baw paꞌaaten ngaytung Uꞌuybun it Tupa kat pagkaꞌadiꞌ nira. 2Baw duꞌun nay burus ya it tengaꞌ it dakulang karsadaꞌ it siyudad ngayti. Padipag-dipag may magtutubuꞌ nga kayu nga magbegay gasiꞌ it kaꞌgenan. Bulan-bulan magbuwaꞌ i iting mga kayu, aypaꞌ ka sang puluꞌ baw duwang bisis it sang taꞌun may baꞌgung buwaꞌ nira. Baw mga daꞌun nira, ipagkagayen it katataawan isaꞌun egay magsarut. 3Talagang egay maparagan duꞌun nga maski unu nga siyumpaan it Ampuꞌang Diyus. Sabap yay rugar it araꞌdungan it Ampuꞌang Diyus baw paꞌaaten ngaytung Uꞌuybun it Tupa kat pagkaꞌadiꞌ nira. Baw buwat it muꞌsang mga taawan it Ampuꞌang Diyus ngayti, magsamba sira it kanya. 4Maltegan nira i rupa ya baw makasurat na kat mga peges nira i ngaran ya. 5Talagang ega nay delem duꞌun, aypaꞌ ega na kaꞌilangan nira pay mga titidawan. Ega na gasiꞌ kaꞌilangan niray eyag it aldaw ka Ampuꞌang Diyus nay meyag it kanira. Baw magꞌadiꞌ na sira it egay kaskedang pagꞌadiꞌ.
6Maat siꞌ it aken it anghil ngayti, “Talagang matuud i itung mga ampang nga nagnegan mu, egay pagbaꞌguwan. Ka iyan Ampuꞌang Diyus nga magpapasarum it Espiritu Santo kat mga prupitaꞌ ya, kanya naga i timnaꞌeg it anghil ya nga ipaꞌrut kat mga manigsirbi ya i mga bagay nga pabetang-betang ya nga magꞌabut kat madaliꞌ nga timpu.”
Talagang paꞌuliꞌ situ si Jesus
7“Kaꞌilangan pagneg kamu,” maat i inaat ni Jesus. “Talagang siguradu nga mabut aku kat ega naga maꞌlay nga timpu.” Aypaꞌ magkasagya i magsunud nga banar it muꞌsa ngaytung ipiyatantu na nga magbebtang situt itung kasuratan.
8Aku nga si Juan i nakagneg baw nakalteg it muꞌsa ngaytu. Bawnga pagkalteg ku, nanluud aku duꞌun it sarungaan it anghil ngayting nagpalteg it aken it itung mga bagay ka sambaen ku kanya. 9Temed maat i inaat yat aken, “Ayaw! Ega mu buwaten i atkayan. Iyan lamang, Ampuꞌang Diyus, i sambaen mu. Ka aku, manigsirbi ya gasiꞌ nga subung it imu, baw subung it mga sulsug mu kat pamayaꞌ nga mga prupitaꞌ baw muꞌsa nga mamagsunud nga banar it mga inaat nga mamagsusurat situt itung kasuratan.”
10Baw maat pay beken nga inaat yat aken, “Ega itaguꞌ mu in daꞌga ipaꞌrut muy mga bagay ngaytung ipiyalteg it imu nga isiyurat mu situt kasuratan ngaytu. Sabap ega naytu maꞌlay matuman nay mga itu ngaytu. 11Aypaꞌ it atkayan na, iyan mamagbuwat it maraꞌe-raꞌet pasigi lamang nga paraꞌe-raꞌet, ka yay pagkubwaten nira. Atnaga i maraꞌway i adat, sigi lamang nga paraꞌwayen nira. Temed iyan mga taawan it Ampuꞌang Diyus nga mamagbuwat it magayen, kaꞌilangan ipasigi nira lamang i magagayen ngaytung pamagbuwaten nira baw inturun nga alaid sira kat muꞌsang kasalaꞌan.”
12“Ka pagneg kamu,” maat ni Jesus. “Talagang ega na maꞌlay paꞌasan akut imyu. Taban ku yan i mga tumbas nga ipamgay ku it kada esa, uyun kat kanya-kanyang binwat. 13Sabap aku ngaytu i uꞌna it muꞌsa baw aku naga i kat sinauryan. Aku i gimnuna it muꞌsa baw kat pudir ku i kaꞌbusan nira. 14Magkasagya talaga sira nga pirmi nga maglimpiyuꞌ it mga pakayan nira, nga ireg sugiden, pagsinguliꞌan i kada kasalaꞌan isaꞌun maꞌawaꞌ. Ka mabgayan sirat pudir nga semled situt siyudad ngaytu baw kumaꞌen it buwaꞌ it kayu ngaytu nga magbegay it kaꞌgenan. 15Temed talagang ega makasled situt siyudad ngaytu i mga mararaꞌe-raꞌet i adat, mga may kepetan, mga mapiyamakun duꞌun it ega asawa nira, mga mangingimatay it masigkataw, mga magsirbi it diwata u maski unu nga ganti nirat Ampuꞌang Diyus, baw maꞌaꞌambut kat ampang baw buwat nira.
16Talagang aku nga si Jesus i timnaꞌeg it anghil ku ngaytu, isaꞌun kapatantu it imyu nga mga gurupu it mga taawan ku nga magpamayaꞌ it aken i itung mga bagay. Talagang liniꞌwanan ku, adiꞌ nga si David, ka matuud nga tungtung-inapuꞌ ya naga aku. Esa gasiꞌ nga panaꞌwag it aken, Magsinggat nga Buntatalaꞌ.”
17Pagꞌaaten it Espiritu Santo baw mga taawan it Ampuꞌang Diyus, sira nga subuk asawaen it paꞌaateng Uꞌuybun It Tupa, “Daliꞌ na!” Baw muꞌsa nga makagneg it itung mga bagay, kaꞌilangan maat gasiꞌ sira nga, “Daliꞌ na!” Melep sini i siyu-siyu nga pagbaꞌnekan. Misiꞌ lamang i iyan magꞌireg it danum ngaytu nga magbegay it kaꞌgenan. Egaytu kaꞌman bayadan.
Pangiyaꞌpusan ya na
18Ta ipagsasar kuytu kat maski siyu nga magkagneg it mga ipiyaꞌrut nga sugi-sugid nga magbebtang situt itung kasuratan. Ka in siyu nga dumungag it pagsugiden sikaytut itung kasuratan, idungag it Ampuꞌang Diyus kat panriga it kanya i mga salakep ngaytu nga magsusurat situ. 19Baw ta, in siyu gasiꞌ i giminis it mga ipiyaꞌrut nga sugi-sugid nga magbebtang situ, iriꞌan kanya gasit Ampuꞌang Diyus it pudir nga semled situt siyudad ngaytu baw kumaꞌen it buwat kayu nga magbegay it kaꞌgenan, nga nasangpit situt itung kasuratan.
20Talagang pagꞌaaten ni Jesus ngayting nagpamatuud it muꞌsa ngaytu, “Siguradu nga mabut aku it ega na maꞌlay.” Aypaꞌ yay tubag ku, “Sana mabut ka nang matuud, Ampuꞌan ku nga si Jesus!”
21Ipagpanalangin ku nga sana pirmi nga situt aten nga mga taawan ya i ildaw it Ampuꞌan tami ngaytu nga si Jesus.