Filipos

Surat ni Pablo duꞌun it Mga Magpamayaꞌ nga Taga Filipos

Filipos

Pauꞌnang Sugi-sugid

Iyan mga magpamayaꞌ it ki Jesu-Cristo duꞌut Filipos ngaytu i uꞌnang gurupu nga ipiyatindeg ni Pablo duꞌun it Europa, duꞌun it prubinsiya it Macedonia nga sakep it mga Romano. Mabasa duꞌun it Mga Binwat 16:6-40 in magꞌuꞌunu ipiyatindeg ni Pablo i itung gurupu it magpamayaꞌ.

Iyan isiyurat ni Pablo i ituꞌun ngaytu nga surat, pagpipirisuun kanya (kapitulu 1:7 baw 1:13), siguru duꞌut Roma (Mga Binwat 28:16-31). Kat iting timpu, maat it beken nga mga mapipikir, isiyurat ya gasiꞌ i surat ya duꞌut mga taga Efeso, baw mga taga Colosas, baw iyan surat ya duꞌut ki Filemon. Taꞌun nga pagsurat ya it mga itu ngaytu, siguru mga 61 A.D.

Iyan pagpipirisuun paꞌ ngayti si Pablo may miyabut nga esang taw nga pagpangaranan it ki Epafrodito. Iting taw, taga Filipos, nga piyapaꞌaduꞌun nirat ki Pablo isaꞌun matabangan ya si Pablo kat in unuy kaꞌilangan ya. May taban gasiꞌ ni Epafrodito nga ipagtabang it mga taga Filipos it ki Pablo. Pagꞌabut ya, simpri itiyuturan yat ki Pablo i baritaꞌ pasar it mga taga Filipos ngayti. Maat ya gasiꞌ nga may magpangadal duꞌut Filipos it ega matuud, ka ipagpaliꞌwan nira nga kaꞌilangan sumunud gasiꞌ it mga urdin ni Moises isaꞌun maribri.

Ta, yan duꞌun si Epafrodito it ki Pablo, simnarut it maꞌget. Maski gimnayen naga, naꞌrutan ni Pablo nga nalibeg i pikiran it mga taga Filipos sabap it sarut ngayti ni Epafrodito. Aypaꞌ napikir ni Pablo nga paꞌuliꞌen ya na. Baw isiyurat yay itung kasuratan nga, siguru, tiyaban na ni Epafrodito it miyuliꞌ duꞌun it Filipos.

Kat surat ya ngaytu, piyasalamatan nga banar ni Pablo i kadakulat tabang it kanya it mga taga Filipos. Tiyaldeng ya gasiꞌ i kamaliꞌ nga panulduꞌ it beken duꞌun sabap it dalan it karibriyan. Ipiyademdem yat kanira nga kamatuudang pamayaꞌ baw pagsarig it ki Cristo i ikaribri it taw, ega maat pagsunud ta it mga urdin ni Moises. Baw isiyurat ya gasiꞌ i pasar it kabetangan ya nga maat, maski pagpipirisuun kanya, masagya nagay nakem ya, baw subraꞌ nga magpanlekep i Magayeng Baritaꞌ.

Dakel pay isiyurat ni Pablo kat ikseg it pamayaꞌ it mga taga Filipos, temed yay subrang magayen, iyan inaat ya ngaytu duꞌut kapitulu 2:5-11 pasar it ega basta-bastang palulus it nakem ni Cristo Jesus, nga sana guruun tami gasiꞌ.

¹Mga pagmaꞌalen nameng mga sulsug kat pamayaꞌ nga asan it Filipos, wayan i surat namen, aku nga si Pablo baw si Timoteo, nga mga manigsirbi ni Cristo Jesus. Pagsuratan namen kamu nga maglalagpit nat ki Cristo Jesus ngaytu, kamu nga mga ipiyapinpin it Ampuꞌang Diyus nga mga taawan ya na, pati mga manigpamaalaꞌ mi baw mga katabang nira. ²Ipagpanalangin ku nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus nga Amaꞌ tami baw Ampuꞌan nga si Jesu-Cristo.

Mga pagpasalamatan baw ipagpanalangin ni Pablo sabap it mga taga Filipos

³Talagang dakulaꞌ nga pasalamat ku duꞌun it Ampuꞌang Diyus ku kada mademdeman ku kamu. ⁴Yay matuud, pirmi nga pagsangpiten ku kamung muꞌsa kat panalangin, baw kada ipagpanalangin ku kamu, masagyay nakem ku, ⁵sabap talagang dakulay tabang mi kat buwat ngaytu nga magpangadal it Magayeng Baritaꞌ pasar it ki Cristo, garing it pagtanggap mi seked kayti na ngaytu. ⁶Tabang mi ngaytu, tandaꞌ it piyapuꞌnan na it Ampuꞌang Diyus i kagayenan nga kubwaten ya kat nakem mi. Baw pagsisiguruun ku nga ipasigi ya seked it kumplitu na, kat aldaw it pamaꞌuliꞌ situ ni Cristo Jesus.

⁷Simpri, atkayan i pabetang kut imyu sabap talagang pagmaꞌalen ku kamu nga banar. Sabap kat kabetangan ku ngayni nga pagpipirisuun, baw kat buwat ta ngaytu nga magpanindeg baw magpamatuud it Magayeng Baritaꞌ, surubung tami nga pagtabangen it ildaw it Ampuꞌang Diyus. Baw pagbagiꞌan mi aku it tabang nga ipagꞌildaw yat imyu. ⁸Magkaꞌrutan tu it Ampuꞌang Diyus nga dakulaꞌ talagang iwas kut imyu. Yay matuud, pagmaꞌal kut imyu, agen-agen nat pagmaꞌal ni Cristo Jesus it imyu.

⁹Magsisigi nga ipagpanalangin ku duꞌun it Ampuꞌang Diyus nga dumakulaꞌ pang dumakulaꞌ i imyu nga pagmaꞌal, baw kumaꞌrut kamung banar, nga kamatuudan i kasepsep mi, ¹⁰isaꞌun magkatantuwan mi in unuy magayen baw daꞌga, nga iyan i piliꞌen mi nga pirmi, purus magayen. Ta daꞌga in atkayan, pagpaꞌuliꞌ ni Cristo, limpiyuꞌ kamu kat panleteg ya nga egay maski unu nga maꞌiway ya? ¹¹Baw mamuyaan kat pangaꞌgenan mi nga mataldeng i adat mi, kat ikabantug it Ampuꞌang Diyus. Temed kagayen ngaytu it adat mi, mapakay lamang tu kat tabang ni Jesu-Cristo.

Kagayenan nga tiyanaꞌan it pagpipirisuun si Pablo

¹²Mga sulsug ku kat pamayaꞌ, ireg ku nga maꞌrutan mi nga nabetangan ku ngaytu, dakulang tabang kat ikalkep it Magayen ngaytung Baritaꞌ. ¹³Ka natantuwan it muꞌsang mga sundaluꞌ baw beken paꞌ sini nga ikiyapirisu ku, sabap it pagsirbi kut ki Cristo. ¹⁴Baw subung naga i kadaklan it mga sulsug ta kat pamayaꞌ sini. Aypaꞌ, kayti, subrang nagmapaꞌgen i pamayaꞌ baw pagsarig nira it Ampuꞌan. Ega lamang desang nagmapaꞌgen, in daꞌga nagmaꞌiseg pay nakem nira nga ipangadal i ampang it Ampuꞌang Diyus it egay pagꞌiꞌlaman nira.

¹⁵Sabagay iyan beken sini, ipagpangadal nira naga i pasar it ki Cristo ngaytu, temed magkataban lamang it inggit baw pakidaꞌeg. Temed iyan beken nga magpangadal, egay maski unu nga antap it nakem nira nga maraꞌe-raꞌet. ¹⁶Talagang ipagpangadal nira si Cristo ngaytu kat kadakulaꞌ it pagmaꞌal nira, sabap urut nira nga aku, ipiyasiguru kat panindeg it Magayen ngaytung Baritaꞌ. ¹⁷Temed kat beken ngayan, talagang ipagpangadal nira si Cristo it ega tingled duꞌut kanya i nakem nira, ka may antap it nakem nira nga ega magayen. Ipagpalandaw-landaw nira i kanira nga pasepsep, ka iyan talagay kat nakem nira, madungagan i kakuriꞌan ku mintras kat pirisuwan aku. ¹⁸Temed ta, ega pagbalyen ku yan i pamagbuwaten nira ngayan nga atkayan. Magkasagya aku ga. Ka maski magayen u ega magayen i kat nakem nira, basta ipagpangadal i pasar it ki Cristo.

Eeꞌ baꞌ, pagsagyaan ku yan, baw pasigi aku nga sumagya, ¹⁹sabap pagsisiguruun ku nga, kat mga panalangin mi baw kat tabang it Espiritu Santo nga piyapasubli ni Jesu-Cristo situt aten, kat ikagayen ku lamang i nabetangan ku ngayni. ²⁰Baw pagꞌiꞌinawaren ku gasing banar nga egay maski unu nga mabwat ku nga ikaꞌeyaꞌ ku. In daꞌga, pagꞌangutun ku nga subrang magmaꞌiseg i nakem ku kayti, subung it kaꞌlay ngaytu, isaꞌun matay maꞌgen aku, subraꞌ nga kat ikabantug ni Cristo. ²¹Sabap kat aken lamang, mintras egen aku paꞌ tingled i muꞌsang kaꞌgenan baw inawar ku duꞌun it ki Cristo. Baw ta, in matay aku, kagayenan i liꞌwan ya ka duꞌun aku nat kanya. ²²Temed in kaꞌirgan nagat Ampuꞌang Diyus nga paꞌlayen aku naga isaꞌun makasigi naga i buwat ku ngaytu, magayen gasiꞌ, ka dakel pay makapakinabang. Aypaꞌ ega isugid ku in ari manggid i magayen ku, matay na u paꞌlayen paꞌ. ²³Ka subung it magkawayni-wayni na i pikir ku. Sabap ire-ireg ku na i matay isaꞌun kapasagpun aku na duꞌun it ki Cristo, ka yay subrang magayen pat pangaꞌgenan ku ngaytu kayti. ²⁴Temed gasiꞌ, kaꞌilangan mi nga paꞌlayen aku paꞌ. ²⁵Magkaꞌrutan ku naga yan. Aypaꞌ ka pagsisiguruun ku nga paꞌlayen aku naga, nga iba mi paꞌ situt banwa ngaytu, isaꞌun matabangan ku kamu it ikseg it pamayaꞌ baw pagsarig mi it Ampuꞌan, baw isaꞌun magsisigi i kasagyaan mi kat pamayaꞌ mi ngaytu. ²⁶Ta, daꞌga in beteꞌ kaliꞌwan aku sinit pirisuwan, subraꞌ nga dumakulaꞌ i pasalamat baw pagbantug mi it ki Cristo Jesus, beken it magkita-kitaen tami siꞌ?

²⁷Takaꞌ maski unuy magkabetangan ku sini, talagang ipagbenge-bengel kut imyu nga mangaꞌgenan kamu uyun kat Magayen ngaytung Baritaꞌ pasar it ki Cristo, isaꞌun kapaꞌasan akut imyu u daꞌga, nga mabaritaꞌan ku lamang, masiguru ku nga esa-esay kat nakem mi, nga urunyun kamu nga pagpanindegan mi i Magayen ngaytu nga Baritaꞌ. ²⁸Ega iꞌlaman mi i mga magkuntraꞌ ngayan it imyu, ka basta pagsagkaꞌen mit magayen i nakem i pakuriꞌ nirat imyu, magpamatuud nayan nga, uyun kat pabetang-betang it Ampuꞌang Diyus, maꞌulug sira kat ukuman nga kamataynen nga egay kaskedang panriga, baw iyan kamu, nakasiguru nay karibriyan mi. ²⁹Ka ega lamang ipiyagꞌildaw it Ampuꞌang Diyus it imyu nga sumarig baw mamayaꞌ it ki Cristo, in daꞌga ipiyagꞌildaw ya gasiꞌ nga lumabay kamu it kakuriꞌan sabap it pamayaꞌ mi ngaytu. ³⁰Ka siguru ega paꞌ nalipatan mi i kadakulaꞌ it pakuriꞌ ngayan it aken it maꞌiba mi,1:30 Mga Binwat 16:16-24 baw siguru magkabaritaꞌan mi na gasiꞌ i sini ngayni nga mga kakuriꞌan ku. Ta kayti, kamu na gasiꞌ i magkalabay it atkaytu nga pagpakuriꞌan.

Adat ni Jesu-Cristo i guruun tami

¹Ta unu, pakilagpit mit ki Cristo, magkabgay it imyu it pagkesgan it nakem mi? Unu, magkapasagya it imyu i kadakulat raras ya ngaytu? Unu, pagsasaruman baw pagtabangen kamu na nga matuud it Espiritu Santo? Unu, magkaꞌildaw kamu, nga may magpangbit na kat nakem mi nga kutabang kamu it beken? ²Ta it magkalabayan mi i muꞌsa ngaytu, aypaꞌ ka pasagyaen mi aku nga banar nga talagang urunyun kamu nga esa-esay kat nakem baw pikir mi nga muꞌsa, baw magsigraras kamu it esa may esa. ³Kaꞌilangan, egay buwaten mi nga maski unu nga bagay nga, antap it nakem mi, ipagpadaꞌeg i sadili u patuꞌgud lamang. In daꞌga, iyan i magayen, mapiyababaꞌ kamu, baw subraꞌ pat paggalang mit sadili mi i paggalang mi it maꞌiba mi. ⁴Ka iyan talagay magayen, sanguꞌan mi nga pirmi i kabetangan it masigkataw mi, nga yay pagpikiren mi, in unuy kat ikagayen nira, ega lamang desang imyu nga ikagayen.

⁵Eeꞌ baꞌ, kaꞌilangan nga pasbung kamu it ki Cristo Jesus kat palulus it nakem ya.

⁶Ka maski kanya, Ampuꞌang Diyus nga matuud, temed ega talaga kiyayliyan ya i kabantugan baw pudir it pagkaDiyus ya ngaytu.

⁷Ka subuk inilkas ya i mga itu ngaytu. Nagbalyung taw kanya, baw ega lamang taw in daꞌga ipiyabetang ya i sadili ya nga manigsirbi it katataawan.

⁸Kamatuudan, pagmangintaw ya situt banwa, nagpababaꞌ kanya baw masunud nga banar it kaꞌirgan it Diyus Amaꞌ, maski ikiyagtas it ginawa ya.

Eeꞌ baꞌ, maski kamataynen nga ipagransang duꞌun it krus, ega talaga diyaꞌga ya.

⁹Aypaꞌ ka ipiyataꞌas kanya it Diyus Amaꞌ, nga binggayan kanya it kabantugan nga talagang ega masbungan.

Baw ipiyagꞌildaw it kanya i pangaran nga piyakamataꞌas it muꞌsa,

¹⁰isaꞌun kat pangaran ngaytu it kanya, panluudan si Jesus it muꞌsang giyuna, mga kat langit, situt banwa, baw kat pagꞌaꞌanuꞌan it mga miyatay. Ega talagay maꞌped. Manluud it kanya nga muꞌsa.

¹¹Baw kapuꞌsaan ngaytu, pamatuud sira nga si Jesu-Cristo ngaytu, Ampuꞌan talaga kanya, kat ikabantug gasiꞌ it Diyus Amaꞌ.

Kaꞌilangan nga masunud tami it kaꞌirgan it Ampuꞌang Diyus

¹²Aypaꞌ itu nay ipagbenge-bengel kut imyu, mga pagmaꞌalen ku nga mga sulsug kat pamayaꞌ. Katꞌesang asan aku ngayat imyu, magayen i pagsunud mi it kaꞌirgan it Ampuꞌang Diyus. Ta kayti, nga daꞌku na asan, dapat nga subrang paꞌresan mi i pagsunud mi ngaytu. Kaꞌilangan nga talagang masunud kamu it may kamatuudang paggalang nga may iꞌlam mi it Ampuꞌang Diyus, isaꞌun makumplitu i muꞌsang kubwaten ya kat pangaꞌgenan mi, nga panribri yat imyu. ¹³Sabap Ampuꞌang Diyus ngaytu i magpanakem it imyu it makusunud baw magbegay it imyu it kakayaan nga mabwat mi i kaꞌirgan ya.

¹⁴Temed ta, ega buwaten mi it magkaregesan lamang, nga may pakibatir baw pakidaꞌeg. In daꞌga, sumunud kamu it magayen i nakem, ¹⁵isaꞌun egay magkaꞌiway kat pangaꞌgenan mi baw egay antap it nakem mi nga ega magayen. In daꞌga, mga anak kamu na it Ampuꞌang Diyus nga magkasagyaan ya, nga egay magkasaway it beken, maski magtetengaꞌ-tengaꞌ kamu kat mga taw nga yanay paglabiyen, karaꞌe-raꞌetan, baw kamaliꞌ i muꞌsang pagpikiren nira. Sana magꞌeꞌyag kamu nga bilang tidaw nira ka kabilangan mi, mga bituꞌun nga magsinggat-singgat duꞌun it langit, ¹⁶mintras ipagpanuturan mi it kanira i ampang it Ampuꞌang Diyus nga magkabgay it kaꞌgenan nga egay kaskedan. Baw basta ipasigi mi i muꞌsa ngaytu, talagang masagyaan ku nga banar kat aldaw it pamaꞌuliꞌ ni Cristo, ka ituy magpamatuud nga ega nasalaud na lamang i paꞌres ku asat imyu. ¹⁷Eeꞌ baꞌ, maski ikagtas it ginawa ku i paꞌres ku sabap it imyu, talagang ega daꞌgaen ku, basta kat ikagayen it pamayaꞌ baw pagsirbi mit Ampuꞌang Diyus. Masagyang-masagya aku ga, ka urut ku nga mabgayan ku gasiꞌ kamu it kasagyaan kat pamayaꞌ mi. ¹⁸Ta kamu, atkayan naga, sumagya kamu. Pakiꞌuyut kamut kasagyaan ku ngaytu.

Si Timoteo i ipiyabayaꞌ it ki Epafrodito nga miyuliꞌ duꞌut Filipos

¹⁹Temed ireg ku sana, basta kaꞌirgan it Ampuꞌan nga si Jesus, nga ega maꞌlay mapapaꞌasan kut imyu si Timoteo, isaꞌun makasagya aku in matantuwan ku nga banar i kabetangan mi asan. ²⁰Talagang egay kasbung it kanya ngaytu kat pakiꞌuyun yat mga pagpikiren ku, baw dakulaꞌ gasiꞌ nga raras ya it imyu. ²¹Ka kadaklan it mga beken, iyan lamang i pagsarungaen nirang pirmi, sadili nirang kaꞌirgan, ega maat mga bagay nga ikasagya ni Jesu-Cristo. ²²Temed si Timoteo ngaytu, urut mi na i kadakulaꞌ baw kagayen it tabang yat aken kat pangadal ku it Magayen ngaytung Baritaꞌ. Talagang kasunud ya baw tabang ya it aken, kaꞌaat ka ipiyagrasyaꞌ ku kanya. ²³Aypaꞌ yay napikir ku, kanyay papaꞌasanen kut imyu basta nasiguru ku na i mabetangan ku sini. ²⁴Takaꞌ pagsisiguruun ku naga nga, ega maꞌlay, kapaꞌasan aku nagat imyu kat tabang it Ampuꞌan.

²⁵Ta, si Epafrodito, nga sulsug tami kat pamayaꞌ nga piyapaꞌasini mi ngayan nga timnaban it tabang mit aken baw tumabyang it aken kat buwaten ku sini, talagang dakulaꞌ nga banar i tabang yat aken. Baw matuud nga, maski dakel i magpakikuntraꞌ, magayen kanyang iba-iba ku kat panindeg it Magayeng Baritaꞌ. Temed pagpikiren ku nga kaꞌilangan paꞌuliꞌen ku na asan. ²⁶Sabap pagꞌildawun na kanya it imyu nga muꞌsa baw dakulaꞌ talagay kasusa ya, ka urut ya nga nasusa kamu pagkabaritaꞌ mit nanarakiten ngayan kanya. ²⁷Talagang matuud nga simnarut kanya it maꞌget sini nga ngari-ngari na. Temed kat ildaw it Ampuꞌang Diyus, gimnayen naga kanya. Baw ildaw gasiꞌ it aken, nga ega naga madungagan i magkasmekan ku. ²⁸Aypaꞌ ka ireg ku na gasiꞌ nga makaꞌuliꞌ kanya asan, sabap urut ku nga sumagya kamung banar pagꞌabut ya asat imyu. Ta aken, sabap it kasagyaan mi ngaytu, magnisan gasiꞌ i magkasmekan ku. ²⁹Aypaꞌ pagꞌabut ya asan, istimaren mi kanyat magayen it masagyay nakem mi, ka manigsirbi kanya it Ampuꞌan. Dapat nga galangen mi i atkaytung mga taw. ³⁰Ka si Epafrodito ngaytu, ipinirinda ya na talagay bilug ya. Unuka ega aaten ku it, sarut ya ngaytu, ega nay pasubrang eget kat paꞌres ya lamang it buwaten ngaytu ni Cristo, baw iyan tiyaꞌgan mit kanya nga sabap it kutabang mit aken.

Ega pagsunud it mga urdin i italdeng tami

¹Ta kayti, mga sulsug ku kat pamayaꞌ, sumagya kamu nga banar kat keseg it pakilagpit mi it Ampuꞌan. Talagang ega maat magkaꞌyawan aku it kasusurat asan it imyu pasar it itu nga mga bagay, ka mga itu ngaytu, ikagayen mi tu talaga.

²Magꞌintur kamu kat mga taw ngayang karaꞌe-raꞌetan i pagbuwaten. Kabilangan nira, subuk mga bunglun nga kuꞌaged. Ka ipagpadaꞌeg nira nga basta ega paturiꞌ, nga yay ipiyagꞌurdin it kanira nga mga Judio, ega naga maribri kamu. ³Temed yay matuud, ega sira in daꞌga kita i matuud nga mga taawan it Ampuꞌang Diyus. Ka aten nga pagsamba it Ampuꞌang Diyus, kat tabang tu it Espiritu Santo nga magsasarum situt bilug tami. Baw talagang pagsagyaan tami si Cristo Jesus, nga kanya talagay pagsarigan tami, ega maat mga pagbuwaten it taw nga subuk pagsunud it mga urdin.

⁴Takaꞌ in beteꞌ may maribri sabap it mga pagbuwaten ya baw sabap it in unu kanyang duguꞌ it taw, talagang may aken nga ikapatuꞌgud sikayan. In pagpikiren it beken nga may ikapatuꞌgud nira pasar it itung mga bagay, subraꞌ aku na. ⁵Ka pagpanganak it aken, pagꞌikawalung aldaw tiyuriꞌan aku. Baw talagang manengteng akung Hebreo, esang matuud nga tungtung-inapuꞌ ni Israel, nga kat kuyunang mga tungtung-inapuꞌ ni Benjamin. Ta in kat pagsunud it mga urdin ni Moises i sugiden, talagang Pariseo aku. ⁶Ka kamatuudan, kat keseg it pagsunud ku it rilihiyun nameng mga Judio, tagnaꞌ pagtiꞌsen ku nga banar i mga magpamayaꞌ it Ampuꞌan. Ta in kat kasunud it mga urdin ni Moises, ega talagay magkaꞌiway it aken.

⁷Temed muꞌsa ngaytu nga pagsarigan kut tagnaꞌ, ka tanud ku ikaribrit aken, kayti ipagpabetang ku nga egay kapulusan, ka nagpakilagpit aku nat ki Cristo. ⁸Eeꞌ baꞌ, maski unu nga bagay, ipagpabetang ku nga talagang egay kuwintaꞌ in ipasbung it subray basta nga kagayen it kamatuudang pagkilala it ki Cristo Jesus nga Ampuꞌan ku. Aypaꞌ ka sabap lamang it kanya, tiyananan ku nay muꞌsa. Talagang ipagpabetang ku nga egay kakapulusan it muꞌsang mga bagay, isaꞌun maꞌaken i kaꞌustuꞌang pagkilala it ki Cristo, ⁹baw isaꞌun ipabetang aku it Ampuꞌang Diyus nga mataldeng kat panleteg ya sabap it pakilagpit kut ki Cristo. Kataldengan ngaytu, ega yay pagpanggaringan, sadili ku nga buwat nga pagsunud kut mga urdin, in daꞌga ipiyagꞌildaw tu it Ampuꞌang Diyus it aken sabap it pamayaꞌ baw pagsarig ku it ki Cristo. ¹⁰Talagang iyan nay pagꞌabaten ku kayti, makilalaan ku pang banar si Cristo, baw malabayan ku kat pangaꞌgenan ku i keseg it guna nga magpanggaring duꞌut kanya sabap it inggen kanya it paꞌuliꞌ. Ireg ku talaga nga makaꞌuyut aku it mga kakuriꞌan nga nalabayan ni Cristo, baw subuk makaꞌuyut aku gasiꞌ it kamataynen ya ka magpasbung akut kanya kat pagsunud yat kaꞌirgan it Ampuꞌang Diyus. ¹¹Ega basta-basta i paꞌres ku ngaytu, ka pagꞌiꞌinawaren ku nga makaꞌuyut aku gasiꞌ it egnen it paꞌuliꞌ kat kagayenan duꞌun it langit.

Ipasigi tami i paꞌres it pagsunud tami it kaꞌirgan it Ampuꞌang Diyus

¹²Ega maat natuman nay muꞌsa ngaytu kat pangaꞌgenan ku. Ega gasiꞌ maat nga daꞌga nay magkabwat ku nga kasalaꞌan. Temed talagang pagpaꞌresan ku nga banar nga mabwat ku i kumpur kaꞌirgan ni Cristo Jesus, sabap siyakep ya aku isaꞌun mapaꞌresan kuytu kat pangaꞌgenan ku. ¹³Mga sulsug ku kat pamayaꞌ, ega maat pagꞌaaten ku nga naꞌbut ku nay ustuꞌ nay pagsunud ku. Temed buwat ku kayti, ega na pirmi nga paglingawun kuy mga nabwat ku it tagnaꞌ, in daꞌga ayun na duꞌun it pagdadarapaꞌen i leteg ku, baw duꞌun it pagꞌabutun i patikeseg ku. ¹⁴Kabilangan ku, esang manigkuntis nga pagꞌubsu-ubsun yay keseg ya isaꞌun lamang mandaꞌeg, nga matanggap yay pirimyuꞌ. Ta aken, pagpaꞌresan kuy kapalangit isaꞌun matanggap ku duꞌun i tumbas nga ipiyabetang-betang it Ampuꞌang Diyus nga ibgay yat aken sabap it pakilagpit ku it ki Cristo Jesus.

¹⁵Sana atkaytu i pagpikiren it muꞌsa tami nga naꞌlay na nga namayaꞌ, nga nakasepsep na nga banar. Temed in may asan it imyu nga belag i kanira nga pasepsep kaytu, paꞌyagan sira yan it Ampuꞌang Diyus. ¹⁶Takaꞌ kaꞌilangan nga ipasigi tami i pagsunud it kumpur nasepsepan ta na.

¹⁷Mga sulsug ku kat pamayaꞌ, magꞌurunyun kamu nga guruun mi i aken nga pagsunud it kaꞌirgan it Ampuꞌang Diyus. Niidan mi sira asan nga atkaytu nagay kanira nga pagbuwaten ka pasbungan mi. ¹⁸Ka subung nat pirmi ngayang ipagꞌaat ku it imyu, nga kayti pagsaꞌupun ku siꞌ nga pagbayaꞌen nat luwaꞌ ku, nga dakel i magpangaꞌgenan it bilang mga kalaban it krus nga piyatayan ni Cristo, maski maat namayaꞌ na sirat kanya, ka pagtibabaꞌen niray kamataynen ya ngayti. Talagang egay pagbaꞌgu it adat nira. ¹⁹Temed nakasiguru nayan nga kamataynen nga egay kaskedang panriga i abutun nira. Itung mga taw, sadili nira nga bilug i piyakadiyus nira, ka pirmi nira nga pagsumbayaꞌen i maraꞌe-raꞌet nga kaꞌirgan it bilug nira. Ipagpatuꞌgud nira paꞌ i mga dapat sana nga eyaꞌan nira, baw ta, yanayan yay paglabiyen nira, mga bagay nga situt banwa. ²⁰Temed kita, kaꞌuyutan tami na it kaꞌadiꞌan it Ampuꞌang Diyus nga duꞌut langit, maski situ tami paꞌ it banwa, baw maseked-seked nga pagpapaꞌbutun tami i Ampuꞌan nga si Jesu-Cristo nga Manriribri, nga gumaring siꞌ duꞌun. ²¹Kanya i may guna nga ipagkasakep ya it muꞌsang mga bagay. Baw kat keseg it guna ya ngaytu, baꞌguun ya i bilug ta nga pandenaꞌ, ipasbung ya nat kagayen it kanyang bilug nga panlangit.

Mga pangiyaꞌpusang ipagbenge-bengel ni Pablo

¹Aypaꞌ mga pagmaꞌalen ku nga mga sulsug kat pamayaꞌ, maneꞌteꞌ kamu sana nga nakaꞌunay i pangaꞌgenan mi duꞌun it Ampuꞌan. Talagang ireg ku nga ireg nga makitaan ku siꞌ kamu, mga pagmaꞌalen ku. Dakulaꞌ i pasagya mit aken baw kamu i bilang tumbas it pangadal ku.

²Ta kamu gasiꞌ, Euodia duwa kamu ni Sintique, asi-asi paꞌ sana it imyu, magkagayen kamu na. Demdemen mi nga nagsulsug kamu kat pamayaꞌ mit Ampuꞌan. ³Baw ikaw, Susugus, nga matuud nga katabyang ku, may ipagpakiꞌupakat ku gasiꞌ it imu. Beteꞌ tabangen mu i duwang kababayan ngaytu nga magkagayen na sira. Ka sira ngaytu, dakulaꞌ talagay tabang nirat aken kat pangadal ku it Magayen ngaytu nga Baritaꞌ. Subung gasit ki Clemente baw beken paꞌ nga magtabang it aken. Talagang pagsisiguruun ku nga mamagsusurat nay mga ngaran nira duꞌun it pagsuratat mga ngaran it kumpur mabgayan it kaꞌgenan nga egay kaskedan.

⁴Baw ta, yanayan, pagsaꞌu-saꞌupun ku nga sumagya kamu nga pirmi. Talagang sagyaan mi i pakilagpit mit Ampuꞌan. ⁵Siguruun mi nga iyan i magkamuyaan it masigkataw mi, iyan magayeng adat mi nga mapiyalulus. Dedemdemen mi nga paꞌuliꞌ naga i Ampuꞌan it ega maꞌlay. ⁶Ega palibegan it pikiran mi i maski unu nga bagay, in daꞌga yay magayen, ipanalangin mi. Angutun mi it may pasalamat duꞌun it Ampuꞌang Diyus i muꞌsa nga pagkaꞌilanganen mi. ⁷Simpri in atkayan, maꞌimyu i kaꞌimbengan it nakem nga talagang ega basta-basta, nga kadakulat kagayen ya ega magkataꞌseb it pikiran it taw, sabap Ampuꞌang Diyus i pagpanggaringan. Ildawan ya nga maꞌimbeng i nakem baw pikiran mi kat pagsarig baw pakilagpit mit ki Cristo Jesus.

⁸Mga sulsug ku kat pamayaꞌ, pangiyaꞌpusan nga ipagbenge-bengel kut imyu, sana iyan i pirmi nga kat nakem mi, iyan mga bagay nga matuud baw paggalangen, mga mataldeng baw mga egay magkaꞌiway, mga bagay nga magayen baw pagdayawun it katataawan. Eeꞌ baꞌ, in unu nga mga bagay nga talagang magayen baw mabantug, iyan sana i pagpanawun nga pirmi it pikiran mi. ⁹Kaꞌilangan, buwaten mi nga pirmi i mga bagay nga naꞌrutan mi kat panulduꞌ ku, iyan nagnegan mi nga garing kat baꞌbaꞌ ku baw iyan namuyaan mi kat pangaꞌgenan ku. Baw Ampuꞌang Diyus nga puꞌun it kaꞌimbengan it nakem, kanyay iba mi nga pirmi.

Pasalamat ni Pablo kat natanggap ya nga tabang

¹⁰Talagang dakulaꞌ nga banar i kasagyaan ku baw pagpasalamatan ku duꞌun it Ampuꞌan i sabap it natanggap ku nga tabang mit aken. Natantuwan ku nga palan, kaꞌlay ngaytu, magsisigi nagay kutabang mit aken. Daꞌkamu lamang magkarugar. ¹¹Ega maat pagꞌaaten kuytu nga pagkurangen aku, aypaꞌ ka pagtulusan ta kamu it tabang mit aken. Ka yay matuud, naꞌubasan ku na nga maski unuy kabetangan ku, magkasagyaan ku na. ¹²Unuka ega aaten ku it nalabayan ku na i magkakurang baw magbastanti it kaꞌilangan? Piyaꞌubasan ku i adat nga magkasagya naga, maski unuy kabetangan ku, maski magkaꞌgen u magkagteman, pagbastantiyen baw pagkurangen. ¹³Iyan muꞌsa ngaytu, magkabwat ku sabap it keseg nga ipagꞌildaw ni Cristo it aken.

¹⁴Takaꞌ masagyang-masagya aku kat buwat mi ngaytu nga panabang mi it aken kat kakuriꞌan ku kayti. ¹⁵Siguru ega payan nalipatan mi nga tagnaꞌ ngayti nga baꞌgu kamu nga namayaꞌ it Magayen ngaytung Baritaꞌ, kamu lamang nga mga taga Filipos i mamagbegay it tabang, pagkagaring ku ngayan asan it Macedonia. Egay beken nga gurupu it mga magpamayaꞌ nga timnabang it aken, in daꞌga kamu lamang. ¹⁶Kamatuudan, iyan duꞌun aku it Tesalonica, magꞌaꞌabut-aꞌabut ga lamang i tabang mi it aken. ¹⁷Ega maat yay dakulaꞌ kat nakem ku, pirmi nga magkatanggap it ildaw mi ngaytu, in daꞌga yay ireg ku, ipasigi mi i buwat mi ngaytu nga bilang buwaꞌ it pamayaꞌ mi ka tumbasan kamu yan it Ampuꞌang Diyus. ¹⁸Ta kayti, it natanggap ku nay ipiyaduꞌlung mi it ki Epafrodito, magbastanti aku sit muꞌsa, ka subray basta naytu. Talagang kabilangan it mga tabang mi ngaytu, babangluun nga ipagsamba duꞌun it Ampuꞌang Diyus nga magkasagyaan ya, ka pagsagyaan ya talaga i buwat mi ngaytu. ¹⁹Baw pagsisiguruun ku nga Ampuꞌang Diyus ngaytu nga pagsirbiyan ku, ildawan ya gasiꞌ kamu nga ibgay ya i muꞌsang mga pagkaꞌilanganen mi, sabap it pakilagpit mit ki Cristo Jesus. Yay matuud, kanyay tagpuꞌun it muꞌsa, aypaꞌ simpri talagang subray basta i ipagbegay yat aten nga ildaw ya. ²⁰Dapat talaga nga bantugun it egay katupusan seked it kaꞌnu-kaꞌnu i Ampuꞌang Diyus nga Amaꞌ tami. Kamatuudan tu.

²¹Pagkumustaen ku i kada esa asan nga piniliꞌ it Ampuꞌang Diyus nga taawan ya na baw maglalagpit nat ki Cristo Jesus. Pagkumustaen kamu gasiꞌ it mga sulsug tami kat pamayaꞌ nga kaꞌibaan ku sini. ²²Pati muꞌsang mga beken nga sulsug tami kat pamayaꞌ sini, subraꞌ na sira nga kat pamalay-balay it Impiradur, magkumusta gasiꞌ it imyu. ²³Pangiyaꞌpusan nga sugi-sugid ku, ipagpanalangin ku nga sana taꞌseben nga banar i nakem mi it ildaw ngaytung ipagbegay it Ampuꞌan nga si Jesu-Cristo.