Filemon

Surat ni Pablo duꞌun it ki Filemon

Filemon

Pauꞌnang Sugi-sugid

Si Filemon ngaytu, matuud tu nga magkilala it Ampuꞌan. Kaꞌuyutan kanya it mga magpamayaꞌ nga taga Colosas. Agalen kanya gasiꞌ it esang uripen nga pagpangaranan it ki Onesimo. Temed may esang aldaw nga miyalagyu si Onesimo ka naskedan na it pagkaꞌuripen ya.

Alaid i naꞌbut ya ka nakaꞌbut it esang siyudad nga duꞌun i pagpipirisuwan it ki Pablo sabap it pangadal yat Magayeng Baritaꞌ. Siguru, iti, siyudad it Roma (Mga Binwat 28:16). Kat pabetang-betang it Ampuꞌang Diyus nakitaan ni Onesimo si Pablo, baw sabap it pangadal ni Pablo namayaꞌ it ki Jesus si Onesimo ngayti. Talagang nabaꞌgu i adat ya, nagbaraꞌ kanya nga pagmaꞌaleng manigtabang ni Pablo duꞌun it pirisuwan.

Ta, it atkayti, napikir ni Pablo nga kaꞌilangan nga paꞌuliꞌen si Onesimo duꞌut piyalagyuwan ya ngayting agalen ya nga si Filemon. Aypaꞌ, surat ngaytu ni Pablo duꞌut ki Filemon, pagꞌangutun yay dakulang pasinsiya ni Filemon it uripen ya ngayti nga piyaꞌuliꞌ naga ni Pablo duꞌun it kanya. Sana tanggapen ya nga ega desang piyasinsiya nga uripen in daꞌga ipabetang nga sulsug na kat pamayaꞌ. Yay uliꞌan-uliꞌan it surat ngaytu. Taꞌun nga pagsurat ya kaytu, siguru mga 61 A.D.

¹Pagmaꞌalen nameng iba-iba nga si Filemon, nga kasubung namen nga manigbuwat it buwaten it Ampuꞌan, wayan i surat namen, aku nga si Pablo, nga pagpipirisuun sabap it pagsirbi kut ki Cristo Jesus, baw sulsug ta kat pamayaꞌ nga si Timoteo. ²Pagsuratan namen gasiꞌ i sulsug tami kat pamayaꞌ nga si Apia, baw si Arquipo nga magayeng iba-iba ku kat panindeg it Magayeng Baritaꞌ maski dakel i magpakikuntraꞌ. Baw kadakel it mga magpamayaꞌ nga mamagtingped asat balay mu, pagkumustaen namen naga.

³Ipagpanalangin ku nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus nga Amaꞌ tami baw Ampuꞌan ta nga si Jesu-Cristo.

⁴Kada ipagpanalangin ku ikaw, pirmi aku nga magpasalamat duꞌun it Ampuꞌang Diyus ku, ⁵sabap magkabaritaꞌan ku i pagsarig baw pamayaꞌ mu it Ampuꞌan nga si Jesus, baw raras mu it muꞌsang mga kasubung mu nga taawan it Ampuꞌang Diyus. ⁶Ipagpanalangin ku nga, liꞌwan it pamayaꞌ mu ngaytut ki Cristo, magsisigi kang numakman kat maꞌiba mu, isaꞌun subraꞌ nga makilala mu i muꞌsang kagayenan nga maꞌaten kat pakilagpit tami it ki Cristo ngaytu. ⁷Pagmaꞌaleng sulsug kat pamayaꞌ, talagang kiminseg i nakem namen baw simnagya kami nga banar pagkabaritaꞌ namen it raras mu it mga maꞌiba mu, ka dakel kunuꞌ i mga taawan it Ampuꞌang Diyus nga napasagya muy nakem nira.

Pakiꞌupakat ni Pablo pasar it ki Onesimo

⁸Ta it atkayti, maski may pudir ku nga semkat it imu nga muwat it in unuy dapat mu nga buwaten, sabap it esa akung apustul ni Cristo, ⁹temed, ega buwaten kuytu. In daꞌga sabap it raras mu ngaytu magpakiꞌupakat akut imu, aku nga si Pablo nga magurang na baw pagpipirisuun paꞌ sabap it panindeg ku it ki Cristo Jesus. ¹⁰Kayti pagꞌupakaten ta ikaw pasar it anak ku ngaytu kat pamayaꞌ nga si Onesimo. Subuk anak ku kanya ka lamang pagpipirisuun aku, piyamayaꞌ yay pangadal kut kanya pasar it ki Cristo. ¹¹Matuud, tagnaꞌ ngayti, si Onesimo ngaytu, egay pakinabang mu temed kayti, talagang may pakinabang1:11 Ireg sugiden it ngaran nga Onesimo, dakulay pakinabang. ta na nga duwa.

¹²Kayti pagpaꞌuliꞌen ku naga kanya asat imu, baw kat kadakulat pagmaꞌal kut kanya, kaꞌaat ka sadili kung bilug i pagpaꞌuliꞌen ku ngaytu. ¹³Sana pakaꞌlayen ku kanya sinit aken isaꞌun, mintras pirisu aku paꞌ sabap it pangadal ku it Magayeng Baritaꞌ, kanyay bilang begay mut aken nga manigtabang ku sinit pirisuwan. ¹⁴Temed ega buwaten kuy atkayan in daꞌga talagang ikaw i garing. Magayen ku, talagang buluntad i tabang mu, ega maat magkaregesan. ¹⁵Baw beken, barang nakablag kanyat imu it dekeyeꞌ nga timpu isaꞌun makaꞌuliꞌ siꞌ kanya nga mamirmiyan na kat pudir mu. ¹⁶Baw kayti, ega na desang uripen mu kanya in daꞌga maꞌal na nga sulsug mu kat pamayaꞌ. Talagang maꞌal nga maꞌal kanyat aken, temed pagmaꞌal ku ngaytu, simpri subraꞌ pay imu nga pagmaꞌal ka uripen mu kanya baw sulsug mu na kat pamayaꞌ it Ampuꞌan.

¹⁷Aypaꞌ, it talagang eꞌget i pagꞌurunyun ta kat pagpanindeg it Ampuꞌan, tanggapen mu si Onesimo ngaytu it masagyay nakem nga kat pabetang mu, aku na mismu i pagtanggapen mu. ¹⁸In may kamaliꞌ nga binwat ya kuntrat imu u in may utang ya asat imu, abunuwan ku na lamang kanya. ¹⁹Kamatuudan, isurat ku naytu kat sadili kung alima, Aku nga si Pablo i baalaꞌ mayad asan it imu. Temed magayen demdemen mu gasiꞌ nga utang mu nga nakem sinit aken i pagkakilala mu it ki Cristo, nga yay ikaribri mu. ²⁰Aypaꞌ, pagmaꞌalen kung sulsug kat pamayaꞌ, asi-asi pat imu, buwaten mu nagay pagꞌangutun ku ngaytu. Kat keseg it pagꞌurunyun ta nga namayaꞌ it ki Cristo pasagyaen mu i nakem ku. ²¹Pagsuratan ta ikaw sabap talagang pagsisiguruun ku nga ega daꞌgaen mu i ipagpakiꞌupakat ku ngaytut imu. Inawar ku nga subraꞌ paꞌ sikaytu i buwaten mu.

²²Paꞌugdun ku paꞌ, in mapakay gasit imu argan mu aku it mapaꞌabutan ku asan it balay mu. Ka pagꞌiꞌinawaren ku nga, kat keseg it mga panalangin mi, makaliꞌwan aku kat pirisuwan ngaytu nga makapaꞌuliꞌ aku naga asan it imyu.

Mga pangiyaꞌpusang pangumusta

²³Pagkumustaen ka ni Epafras, nga sulsug ta kat pamayaꞌ it ki Cristo Jesus, baw iba ku sinit pirisuwan ngayni. ²⁴Pati si Marcos, si Aristarco, si Demas, baw si Lucas, nga mga kasubung ku nga manigbuwat it buwaten it Ampuꞌan, magpangumusta gasit imu.

²⁵Ipagpanalangin ku nga sana taꞌsebeng banar i nakem mi it ildaw ngaytu nga maggaring duꞌun it Ampuꞌan nga si Jesu-Cristo.