Judas

Surat ni Judas

Judas

Pauꞌnang Sugi-sugid

Itu, surat ni Judas ngaytu, sasar ya sabap it mga mamagbete-beteꞌ nga mga manigpangadal, nga maat kunuꞌ mamagpamayaꞌ gasiꞌ sirat Ampuꞌan nga si Jesu-Cristo, arit ega. Mga manigpaneꞌag-teꞌag lamang.

Ababaꞌ lamang tu i itu nga surat. Mga sugi-sugid nga isiyurat, magkasubung-subung it duꞌut ikadwang surat ni Pedro. Pagtulduꞌan it tagsurat i kumpur kabasa kaytu nga kaꞌilangan papaꞌgenen nira nga banar i pamayaꞌ nga magꞌuꞌunay duꞌun it kamatuudan nga ipiyatantu it Ampuꞌang Diyus. Baw beken, kaꞌilangan nga ilaban nira it pangadal nga kamaliꞌ i kamatuudan ngaytu.

¹Aku nga si Judas nga manigsirbi ni Jesu-Cristo baw sulsug ni Santiago i tagsurat kaytu. Pagsuratan ku kamu, nga mga ipiyapinpin it Diyus Amaꞌ isaꞌun mataawan ya na baw talagang pagrarasan ya, kamu nga pagtatarimaen nga pirmi ni Jesu-Cristo baw piyanakman nga pasakep it kanya. ²Ipagpanalangin ku nga sana bastanting-bastanti asat imyu i sanguꞌ nga tabang baw raras it Ampuꞌang Diyus, baw kaꞌimbengan it nakem nga ipagbegay ya.

Sasar pasar it mga magpangadal it kamaliꞌ

³Mga pagmaꞌalen, iyan talagay ireg ku nga ireg nga isurat nga ipataban asat imyu, pasar it karibriyan nga ipagꞌildaw na ngaytut aten nga magpamayaꞌ na. Temed tumbaw siꞌ kat nakem ku nga yay dapat isurat ku nga ipataban asat imyu, esa nga paꞌimbanda, nga kaꞌilangan ilaban mi i kamatuudan nga panulduꞌ nga pagpamayaꞌnen tami. Kamatuudan ngaytu, ipiyatantu na it Ampuꞌang Diyus kat mga taawan ya, baw ega talagay pagꞌugadan ya seked it kaꞌnu-kaꞌnu. ⁴Sabap may magraragiꞌ na asat imyu nga ega pagtaꞌseben it pikir mi i antap it nakem nira. Mga taw ngaytu, alaid talagay pagsunud nira kat kaꞌirgan it Ampuꞌang Diyus. Baw garing paꞌ it tagnaꞌ, magbebtang nang lagi duꞌut kasuratan i magꞌaꞌareg it kanira nga panriga. Sabap pagꞌinu-inuun nira kamu it ipagganti nirang pangadal nga kamaliꞌ pasar it ildaw it Ampuꞌang Diyus. Ka maat nira, basta namayaꞌ ta na, maski ega supilen tami i sadili, nga sumbayaꞌen i kaꞌiꞌirgan nga maraꞌway, ega naga yan maꞌunu i pakiꞌuyun tat Ampuꞌan, tutal maꞌildaw naga kanya. Baw talagang pagdaꞌgaen nira i pamegbeg ni Jesu-Cristo, ka ega pagkilalaen nira nga kanya lamang i Agalen baw Ampuꞌan tami.

⁵Aypaꞌ maski maat magkaꞌrutan mi nagaytu, ireg ku naga nga ipademdem it imyu nga, lamang ipiyagribri it Ampuꞌang Diyus i mga Israelita kat pagkaꞌuripen nira duꞌun it Egipto, temed piyuuꞌ ya nagay beken nga kaꞌibaan nira nga egay pamayaꞌ baw pagsarig it kanya. ⁶Dedemdemen mi gasiꞌ i iyan mga anghil nga daꞌsira naneꞌteꞌ kat ipiyabetang-betang it Ampuꞌang Diyus it kanira nga katengdanan. Daꞌga basaꞌan timnanan sira duꞌun it pagtataꞌidan nira nga sadili? Aypaꞌ ka ipiyabayuk sirat Ampuꞌang Diyus it kadina seked it kaꞌnu-kaꞌnu. Baw pinirisu ya sira duꞌun it kadleman seked it betanganan na sirat ukuman, pagꞌabut it ega basta-basta ngaytung aldaw nga ipangukuman. ⁷Dedemdemen mi naga gasiꞌ i nabetangan it mga taga Sodoma baw Gomorra baw mga katepadan nira nga mga lansangan, ka nagkasalaꞌan sira subung it mga anghil ngayti. Sabap nagpaꞌubas sira nang nagpaꞌubas it pamakun duꞌun it ega asawa nira, baw subraꞌ na nga maraꞌway na nga daꞌna ipiyagbanwa. Mga lansangan ngayti pati mga taga duꞌun, inanteng nga muꞌsa ka yay panriga it kanira. Ta iti ngayti, bilang sabar it aten, ka ladawan tu it apuy nga daꞌgay kapugdawan ya, nga siguradung panriga nga abutun it mga makasalaꞌan.

⁸Atkayan nagay itu nga mga taw nga nakasled asan it imyu. Sabap it mga panagaynep nira, ipagpakursud niray bilug kat kasalaꞌan. Masusutil sira nga ega magkilala it mga magpupudir. Baw pagtibabaꞌen paꞌ niray mga matataꞌas nga banar i kabantugan. ⁹Temed maski piyakapagbayaꞌen it mga anghil nga si Miguel, iyan pagsasaꞌran nira ni Satanas i bilug ni Moises, ega naga tiyemek-temek ya it ampang nga panibabaꞌ. In daꞌga iyan i inampang ya, maat ya, “Sana sardawun ka it Ampuꞌan.” ¹⁰Temed itu nga mga taw, pagtibabaꞌen niray in unu-unu nga ega magkasepsepan nira. Baw iyan mga bagay nga magkaꞌrutan nira, mga singkadan nga kaꞌiꞌirgan nga pagsumbayaꞌen nga subung it buwat it ramu-ramu nga egay nanakem, yanay ikaꞌilang nira.

¹¹Talagang ipagkapanriꞌsu nat tiꞌdun i mabetangan it itu nga mga taw, sabap ega piyasyangan nira i dalan it karaꞌe-raꞌetan nga siyunud ni Cain.1:11 Si Cain ngaytu, inimatay yay ariꞌ ya (Genesis 4:1-16). Subung gasiꞌ sirat ki Balaam,1:11 Pasar it ki Balaam, basaen i duꞌut Mga Ipiyalteg 2:14, Mga Bilang kapitulu 22 seked it kapitulu 24. ka basta lamang kapisiꞌ it pirak, marway mamagpakursud sirat beken kat kasalaꞌan. Masutil sira, subung it ki Core1:11 Pasar it ki Core, basaen i duꞌut Mga Bilang 16:1-35. nga nagpakidaꞌeg it ki Moises. Si Core ngayti, inukumanan kanyat panriga nga mabeꞌgat nga banar. Ta atkayan nagay itung mga taw, ka siguradung rigaen sirat ega makatindeg.

¹²Talagang itung mga taw, dakulaꞌ nga kaꞌeꞌyaꞌan mi in mamagpanragiꞌ sira it pagkaraꞌnen mi nga uyut i pagbuwateng Apunan. Sabap sira, magsari lamang it kaꞌen baw inum it egay uru-urut it eyaꞌ, adimaat mataldeng i pangaꞌgenan nira. Egay beken nga pagꞌintindiyen nira, sadili nira lamang. Talagang taw sira nga egay kapulusan, subung it mga kunum nga pagkaꞌaren it deres, aypaꞌ ka ega magkaꞌuran. Subung gasiꞌ sira it mga kayu nga ega mamagbuwaꞌ, maski timpu it pabubwaꞌ. Talagang ega lamang desang subuk siyalibut, in daꞌga laꞌun banar. Nabwar it nabaranban i pati gamut.

¹³Talagang mga taw ngaytu, buwal sira nga subung it langeb in mabakat i dagat. Siging pamkas ya, sigi nagang dagsaꞌ it buraꞌ-buraꞌ baw dikut. Atkayan naga sira, ka kaꞌeyaꞌan i liꞌwan it maraꞌway nga pamagbuwaten nira. Subung baꞌ sira talaga it bituꞌun nga nakalꞌag. Pagꞌaꞌargan sirat Ampuꞌang Diyus it rugar nga egay kaskedang kadleman.

¹⁴Naꞌiguꞌ gasiꞌ sira it inaat ni Enoc nga ikapitu nang pagtungtung-pagꞌinapuꞌ garing it ki Adan. Maat ya it tagnaꞌ ngayting timpu, “Pagnegan mi tu. Siguradu nga mabut i Ampuꞌan, iba ya i ribu-ribu nga ega babasta-bastaen nga mga anghil ya. ¹⁵Betanganan ya nat ukuman i muꞌsang katataawan. Rigaen yay muꞌsa nga ega magkilala it kanya, sabap it muꞌsang mga binwat nirang karaꞌe-raꞌetan, nga binwat nira it alaid talaga kat nakem nira i kaꞌirgan it Ampuꞌang Diyus. Baw rigaen ya sira ngayti nga egay iꞌlam it kanya, sabap it muꞌsang mga inampang nira nga tibabaꞌ it kanya.” ¹⁶Talagang itung mga taw, magsarit iway, nga egay pagsagyaan nira kat mga beken. Pagsumbayaꞌen niray sadiling kaꞌirgan nga maraꞌe-raꞌet. Malalandi-landi sira baw uba-ubas na niray mangilut-ilut it maꞌiba nira, isaꞌun lamang mapisiꞌ niray in unu nga pagꞌirgan nira.

Paꞌimbanda baw mga munaꞌaw kat mga magpamayaꞌ

¹⁷Temed ipagbenge-bengel kut imyu nga mga pagmaꞌalen ku, dedemdemen mi i mga inampang it mga apustul it Ampuꞌan tami nga si Jesu-Cristo, nga in unuy isiyugid nirat imyu nga mabut. ¹⁸Ka daꞌga baꞌ ipiyagꞌaat nirat imyu, “Siguradu yan, nga in magdadarapaꞌ nay umur it banwa, may manluꞌsut nayan nga mga mamagsumbayaꞌ it sadiling kaꞌirgan nga kuntraꞌ kat kaꞌirgan it Ampuꞌang Diyus. Baw buwaten nira na kamu nga kasesleman sabap it pamayaꞌ mi.” ¹⁹Itu nga mga taw, siray panggaringan it ikaranggaꞌ it pagꞌurunyun baw pagꞌini-inibaen mi. Ka yay matuud, uripen sira nang banar it kaꞌirgan it bilug. Egaytu talaga pagsasaruman sira it Espiritu Santo.

²⁰Temed kamu, mga pagmaꞌalen ku, papaꞌgenen mi nga banar i pamayaꞌ mi nga magꞌuꞌunay duꞌun it kamatuudan nga ipiyatantu it Ampuꞌang Diyus. Baw manalangin kat keseg baw paꞌiguꞌ-iguꞌ it Espiritu Santo. ²¹Inturun mi i pangaꞌgenan mi, isaꞌun daꞌkamu kapaꞌalaid kat kararas it Ampuꞌang Diyus, mintras pagpaꞌbutun mi i kaꞌgenan nga egay kaskedan, nga ildaw it aten it Ampuꞌan tami nga si Jesu-Cristo.

²²Sanguꞌan mi baw tabangen i mga alab-alaben paꞌ kat pamayaꞌ. ²³Baw daliꞌan mi nagat milwat i iyan makatalpak duꞌun it apuy nga egay kapugdawan ya. Iyan beken, sanguꞌan baw tabangen mi naga sira, temed yanayan magꞌintur kamu, nga daꞌkamu maduraꞌitan it kasalaꞌan nira. Subuk rignaꞌan mi i pati pakayan nira nga talpuk na it maraꞌway nga pamagbuwaten nira, isaꞌun daꞌkamu matindakan.

Pangiyaꞌpusang ampang ya, pagbantug it Ampuꞌang Diyus

²⁴Dapat talaga nga bantugun i Ampuꞌang Diyus, kanya nga kayang-kaya ya talaga nga magtatarima it imyu isaꞌun daꞌkamu mateꞌag-teꞌag baw makakleb kat kasalaꞌan. Mapaꞌadap ya paꞌ kamu duꞌun it ega basta-bastang kabantugan ya it may dakulang kasagyaan, nga ega nay maꞌiway ya. ²⁵Eeꞌ baꞌ, bantugun kanya, kanya nga esa-esa lamang nga Ampuꞌang Diyus, nga Manriribri tami kat keseg it binwat it Ampuꞌan tami nga si Jesu-Cristo. Duꞌut kanya nga pirmi i kabantugan, ega masbungan nga kataꞌasan, ega basta-bastang pamegbeg baw guna, garing paꞌ it tagnaꞌ baw seked it kaꞌnu-kaꞌnu nga egay katupusan. Kamatuudan tu.