Santiago

Surat ni Santiago

Santiago

Pauꞌnang Sugi-sugid

Tagsurat kaytu, si Santiago nga manigpamaalaꞌ it mga magpamayaꞌ it ki Jesu-Cristo duꞌun it Jerusalem it tagnaꞌ paꞌ. Siyuratan ya, muꞌsang mga taawan it Ampuꞌang Diyus nga magpamayaꞌ nat ki Cristo kat paꞌari-aring rugar. Ipagpatantu yat kanira i adat nga magꞌuyun kat matuud nga maglalagpit nat ki Cristo ngaytu. Dakel-dakel nga mga alimbawa i giyamit ya kat surat ya ngaytu isaꞌun maꞌyagan nga banar i ipagsasar baw ipagpaꞌimbanda yat kanira.

Ipagpaꞌyag ni Santiago i pasar it mga sukdan it pamayaꞌ. May ipagsasar ya gasiꞌ kat mga manggaden baw mga makukuriꞌ, baw sabap it karaꞌe-raꞌetan nga magkabwat it dilaꞌ. Baw may beken paꞌ nga panulduꞌ ya.

Temed yay ipagpaꞌyag nga banar situ, panulduꞌ nga egay kapulusan it pamayaꞌ nga pakimatuud lamang, nga egay uyut nga magagayeng pagbuwaten nga magpamatuud it maglalagpit nang matuud it ki Cristo.

¹Aku nga si Santiago, nga manigsirbi it Ampuꞌang Diyus baw Ampuꞌan nga si Jesu-Cristo, i tagsurat kaytu. Ipagpaꞌabut ku i aken nga pangumusta kat muꞌsang piniliꞌ it Ampuꞌang Diyus nga taawan ya, nga natari-tariwanak na kat paꞌari-aring rugar.

Sagyaan i mga kakuriꞌan sabap kemseg i pamayaꞌ

²Mga sulsug ku kat pamayaꞌ, sana sumagya kamu naga it ega alang-alang in pagꞌabutun it dakel-dakel na nga kakuriꞌan, ka sukda-sukdan tu it pamayaꞌ baw pagsarig mi it Ampuꞌang Diyus. ³Sabap magkaꞌrutan ta na nga in pagsukdanan i pamayaꞌ ta, basta daꞌta padaꞌeg, liꞌwan ya subrang kemseg i pamayaꞌ ta ngaytu, nga teꞌteꞌ na talaga. ⁴Baw kaꞌilangan nga papaꞌres i pamayaꞌ ta nga magpaneꞌteꞌ nga mapaꞌgen, isaꞌun sagyaan tami nga banar it Ampuꞌang Diyus, nga ega nay kakurangan it kagayen it adat ta.

⁵Temed in may asan it imyu nga abutun it kurang i kasepsep it in unuy magayeng buwaten, kaꞌilangan mangut kanya duꞌun it Ampuꞌang Diyus, ka siguradu nga begayan kanya, ega maat dalaꞌan ya. Ka maꞌatag i Ampuꞌang Diyus. Pagbegayan yay kumpur magꞌangut it kasepsep ngaytu. ⁶Temed gasiꞌ in mangut duꞌun it kanya, kaꞌilangan siguruun ya nga tanggapen ya i pagꞌangutun ya ngaytu, ega maat magduwa-duway kat pikir. Sabap in atkaytuy kat pikir, kabilangan, subung kanya it langeb nga ipagdedeg it deres it maski ari nga ayun. ⁷Ta atkayan nga taw, ega siguruun ya nga ibgay it Ampuꞌang Diyus it kanya i maski unu nga pagꞌangutun ya kat panalangin, ⁸sabap it adat ya ngayti nga pabaꞌgu-baꞌgu i pikir it in unu sarigan ya i Ampuꞌang Diyus u daꞌga. Atkayan nga taw, ega magkasarigan kat maski unu nga pagbuwaten ya.

⁹Iyan sulsug kat pamayaꞌ nga raꞌyat situt banwa, magayen sagyaan yay kataꞌasan ya kat panleteg it Ampuꞌang Diyus nga miniliꞌ it kanya. ¹⁰Temed iyan manggaden, magayen sagyaan ya in ipakilala it kanya nga egay kapulusan it kamanggadan ya ngayti kat panleteg it Ampuꞌang Diyus. Ka yay matuud, subung kanya lamang it bura-burak nga madaliꞌ abutun it kamataynen. ¹¹Daꞌga baꞌ, iyan dikut, magpanluyus in masgaꞌ nga masgaꞌ i init? Ta in nanluyus mana, matagar nay burak ya nga magpagayen it kanya nga pagletganan. Ta atkayan i kabilangan it manggaden ngaytu. Mabut talagay matay kanya, maski maat magkasasaw paꞌ it mga kubwaten ya nga panulus.

¹²Magkasagya talaga i taw nga magpaneꞌteꞌ nga matuud kat pamayaꞌ ya it Ampuꞌang Diyus, maski pagꞌabutun kanya it mga kakuriꞌan nga sukda-sukdan it pamayaꞌ ya ngaytu. Ka basta temeꞌteꞌ, siguradu yan nga tanggapen ya i tumbas nga kaꞌgenan nga egay kaskedan, ka iyan i isiyanggup it Ampuꞌang Diyus kat muꞌsang may pagmaꞌal it kanya.

¹³Baw in abutun it sukdan i esang namayaꞌ na, dapat nga ega pikiren ya nga pagsukdanan kanya it Ampuꞌang Diyus nga maat ipagpakursud ya kat kasalaꞌan. Sabap Ampuꞌang Diyus ngaytu, alaid talaga kanya kat muꞌsang kasalaꞌan, aypaꞌ simpri ega kupakursud kanya it maski siyu. ¹⁴Yay matuud, in kakursud i esang taw, egay beken nga ikiyakursud ya, nadaꞌgan kanya it sadili ya nga kaꞌirgan nga maraꞌway nga siyumbayaꞌ ya, aypaꞌ ka narayak kanya duꞌun it kasalaꞌan. ¹⁵Ka basta sumbayaꞌen i sadiling kaꞌirgan nga maraꞌway, liꞌwan ya kasalaꞌan na. Baw in nakaꞌsi manay kasalaꞌan, egay beken nga tanaꞌan ya, kamataynen nga egay kaskedang panriga.

¹⁶Mga pagmaꞌalen nga mga sulsug ku kat pamayaꞌ, ega ambutan mi i sadili mi. ¹⁷Ampuꞌang Diyus i puꞌun it muꞌsang kagayenan, baw purus magayen i ipagbegay ya. Ega talagay kakurangan it ildaw nga magpanggaring duꞌun it Amaꞌ ta ngaytu nga gimnuna it muꞌsang mga mamagꞌeyag duꞌun it langit. Mga giyuna ya ngaytu, magꞌugad-ugad i eyag nira, temed Ampuꞌang Diyus, talagang ega magꞌugad-ugad i adat yat kanya. ¹⁸Baw uyun kat kaꞌirgan ya, binwat ya kita nga mga anak ya na kat pamayaꞌ tamit kamatuudan nga ipiyangadal it aten, isaꞌun makasiguru tami nga taawan ta na talaga it Ampuꞌang Diyus, nga ipagpabetang ya nga pirmira kat muꞌsang giyuna ya.

Ega desang pagpagnegan, in daꞌga pagsunudun i ampang it Ampuꞌang Diyus

¹⁹Dedemdemen mi tu, mga pagmaꞌaleng sulsug ku kat pamayaꞌ. Paꞌubasan mi i pagneg nga magayen, baw mikir it magayen parabir mampang, baw ega basta-basta mangiseg. ²⁰Sabap iyan iseg it taw, egay lapusan ya nga mataldeng kat panleteg it Ampuꞌang Diyus. ²¹Aypaꞌ iyan i magayen, indiꞌan mi nay muꞌsang buwat nga mararaꞌway baw adat mi nga maraꞌe-raꞌet. Bawnga mapiyalulus kamu nga pasakep it Ampuꞌang Diyus baw pagpagnegan mit magayen i ampang ya, ka iyan i ikaribri mi.

²²Temed in yay seked ya, desang pagpagnegan mi i ampang ya, ka ega pagsunudun mi, pagꞌambutan mi na lamang i sadili mi. Kaꞌilangan talaga nga pagsunudun tami. ²³Sabap iyan desa nga magpagneg it ampang ngaytu it Ampuꞌang Diyus, temed ega naga pagbuwaten i kumpur pagꞌaaten, subung lamang kanya it esang taw nga magpanalamin, ²⁴nga lamang naltegan ya na i aꞌayusun kat bilug ya, piyataꞌnan ya lamang. Ta it ega naga inayus ya nga lagi, unupat nalipatan ya na. ²⁵Temed talagang ildawan i iyan taw nga pagꞌineꞌteꞌen ya nga banar i muꞌsang mga ipiyagꞌurdin nga kaꞌirgan it Ampuꞌang Diyus, nga ampang ya ngaytu, egay kakurangan baw magkabgay it karibriyan. Ildawan kanya basta ega desang pagpagnegan lamang nga basta natupus nalipatan, in daꞌga pasigi nga pagsunudun ya. Ka in atkayan, tabangen kanya it Ampuꞌang Diyus kat muꞌsang pagbuwaten ya.

²⁶Dedemdemen mi tu, nga maski yanay kat nakem it taw, matuud i pagsunud ya it Ampuꞌang Diyus, temed ega paꞌ magkapuꞌgunan ya i dilaꞌ ya, yay matuud, egay kapulusan it pagsunud ya ngaytu. Desang pagꞌambutan ya i sadili ya. ²⁷Temed iyan taw nga pagsunud ya, talagang magkapakay baw pagsagyaan it Amaꞌ tami nga Ampuꞌang Diyus, ega paglilipaten ya i mga taw nga magkakuriꞌan, nga subung it mga ilu-ilu baw mga babay nga balu, in daꞌga pagtabangen ya. Baw pagꞌinturun yay sadili ya, nga ega maduraꞌitan it karaꞌe-raꞌetan nga pagbuwaten it katataawan situt sinirungat langit.

Dapat nga maꞌildaw tami, nga egay pagbidaꞌen nga taw

¹Mga kasulsugan ku, ta sana kat pamayaꞌ mi it mabantug nga Ampuꞌan tami nga si Jesu-Cristo, ega na adaten mi i may pagbidaꞌen nga taw. ²Alimbawa, magtingped kamu, may semled nga esang taw nga magsisiꞌsing it bulawan baw magpapakay it atnang gayen. Baw may sang kataawan nga semled nga pakayan ya, magkatambelan nay tambel. ³Kayti ega nagsubung i istimar mi it kanirang duwa. Ka iti lamang, mabakas ngayti i pakayan, i istimaren mit magayen, nga aaten mi, “Bilaꞌ, kayni kay imu madung it ining araꞌdungan.” Itiꞌen, ega ngayti, tibabaꞌen mi nga aaten mi, “Sikayan ka lamang i imu timindeg,” u “Asan na lamang it daꞌtag i adungan mu.” ⁴Talagang pagbidaꞌen mi na in atkayan pay pangistimar mi. Kamaliꞌ nga kamaliꞌ i pabetang mi it masigkataw mi.

⁵Ka panawun it pikir mi, mga pagmaꞌalen ku nga sulsug kat pamayaꞌ. Daꞌga ba piniliꞌ it Ampuꞌang Diyus i mga makukuriꞌ situt sinirungat langit, nga siray magmanggaden kat pamayaꞌ baw makaꞌuyut duꞌun it kaꞌadiꞌan nga isiyanggup ya it muꞌsang kamatuudan i pagmaꞌal it kanya? ⁶Temed pagtibabaꞌen mi lamang i mga makukuriꞌ. Daꞌga baꞌ mga manggaden ngaytu i magpakuriꞌ it imyu? Daꞌga baꞌ manu-manu idimanda nira kamu? ⁷Baw daꞌgaꞌ baꞌ sira gasiꞌ i magtibabaꞌ it mabantug nga ngaran it Ampuꞌan ta nga si Jesu-Cristo?

⁸Talagang magayen i pagbuwaten mi in pagsunudun mi i mataꞌas nga ipiyagꞌurdin it Ampuꞌang Diyus nga isiyurat duꞌun it kasuratan ngayang magꞌaat,

“Rarasan mu i masigkataw mu it subung nagat raras mu it sadili mu nga bilug.”2:8 Levitico 19:18b.

⁹Temed in mga manggaden lamang i paggalangen mi baw iyan makukuriꞌ pagtibabaꞌen mi na, kasalaꞌan mi naga yan. Ta, urdin ngaytu nga riyanggaꞌ mi, magpamatuud it makasalaꞌan kamu na. ¹⁰Ka in ranggaꞌen it esang taw i maski sang kabagiꞌan na lamang it mga urdin ngaytu, ipabetang kanya it Ampuꞌang Diyus nga makasalaꞌan na, maski maat pagsunudun ya i muꞌsang mga beken. ¹¹Ka alimbawa, ipiyagꞌurdin it Ampuꞌang Diyus nga magꞌaat,

“Kuydaw ka it pamakun duꞌun it ega asawa mu.”2:11 Exodo 20:14.

Baw kanya naga i nagꞌurdin nga,

“Kuydaw ka it pangimatay it masigkataw mu.”2:11 Exodo 20:13.

Ta, daꞌka nga matuud magpamakun, temed in beteꞌ mangimatay ka, simpri makasalaꞌan ka na, ka riyanggaꞌ mu nagay urdin.

¹²Temed sabap it maꞌildaw i Ampuꞌang Diyus, ipiyagꞌurdin ya gasiꞌ nga in magꞌuꞌunu maribri tami kat kasalaꞌan. Ta it ukumanan tami uyun kat urdin ya ngaytu, kaꞌilangan nga maꞌintur kamung banar kat adat mi baw pangangampangan mi nga maꞌildaw kamu gasiꞌ i imyu. ¹³Sabap iyan ega magkaꞌrut mildaw it masigkataw ya, ega gasiꞌ paltegan kanya it ildaw in ukumanan na kanya it Ampuꞌang Diyus. Temed iyan maꞌildaw, egay dapat iꞌlaman ya asan it ipagꞌukuman na ngayan.

Pamayaꞌ nga egay uyut nga buwat, ega nagay kapulusan ya

¹⁴Mga sulsug ku kat pamayaꞌ, talagang egay mapulus it esang taw, maski maat ya, “Aken, may pamayaꞌ ku na,” temed ega nagay pagbuwaten ya nga magpamatuud it kat Ampuꞌan na kanya. Yay matuud, atkayang kalasit pamayaꞌ, ega siguruun ya nga maribri kanya. ¹⁵Alimbawa, esang sulsug kat pamayaꞌ, lebas na kanya baw makuriꞌ na it magkakaꞌen. ¹⁶Ta kayti may esat imyu nga maat it kanya, “Masagya ka nayang muliꞌ. Sana pasamunsayaꞌ ka it pamakay baw pangaꞌen.” Temed ega naga tabangen mu kanya it kakurangan ya ngayti. Daꞌga ega nagay kapulusan it iti nga inampang mu? ¹⁷Ta atkayan naga yan, pamayaꞌ nga desang pakimatuud, nga egay uyut nga pagbuwaten nga ipagpamatuud, yay paꞌaaten nga patay nga pamayaꞌ.

¹⁸Temed barang may kupakibatir, nga magꞌaat, “Iyan beken, pamayaꞌ nga ipiyagꞌildaw it kanya, ega basta-bastang pagsarig yat Ampuꞌan. Iyan beken, ipiyagꞌildaw it kanya, magagayeng pagbuwaten.” Temed tubag ku kayan, “Egay beblagan it kamatuudang pamayaꞌ baw magagayeng pagbuwaten. Ipatantu mut aken nga in magꞌuꞌunu makilalaan ku nga may kamatuudan it pamayaꞌ mu ngayan nga egay pagbuwaten mu nga magpamatuud it kat Ampuꞌan ka na. Aken, mga pagbuwaten ku i magpamatuud it kamatuudan talagay pamayaꞌ ku.”

¹⁹Pagpamayaꞌnen mu kunuꞌ nga esa-esa lamang i Ampuꞌang Diyus. Magayen yan. Temed maꞌyag nga ega ipagkaribri in yay seked it pamayaꞌ, pakimatuud na lamang, sabap maski mga mararaꞌe-raꞌet, magpakimatuud sira gasiꞌ nga may Ampuꞌang Diyus ngaytu nga paꞌaaten, temed ta, magkapanguripeꞌpey sirat iꞌlam it magꞌaꞌareg it kanira nga panrigang egay kaskedan.

²⁰Unu, may kurang pat kasepsep asan? Unu, kaꞌilangan ku paꞌ nga ipaꞌyag nga ega talagay kapulusan it pamayaꞌ ya ngayan basta egay pagbuwaten ya nga magpamatuud it kat Ampuꞌan na kanya? ²¹Ka panawun it pikiran mi si Abraham nga kiyaꞌapuꞌ-apuꞌan tami. Daꞌga baꞌ ipiyagpabetang kanya nga mataldeng it Ampuꞌang Diyus sabap duꞌun it buwat ya, iyan siyunud yay inaat nga ibgay yat Ampuꞌang Diyus i anak ya nga si Isaac nga buwateng ipagsamba nga antengen duꞌun it papangantengan?2:21 Genesis kapitulu 22. ²²Duꞌun it iti ngayti, magkaltegan ta nga kat pamayaꞌ ni Abraham egay beblagan it pakimatuud baw mga pagbuwaten nga magpamatuud it pamayaꞌ ya ngayti. Iyan binwat ya ngayti i magpakilala nga egay kurang it pamayaꞌ ya it Ampuꞌang Diyus. ²³Aypaꞌ iyan binwat ya ngayti i ipagpamatuud it kasuratan ngayan nga magꞌaat,

“Piyamayaꞌ ni Abraham i inaat it Ampuꞌang Diyus. Aypaꞌ ka ipiyabetang kanya it Ampuꞌang Diyus nga taw nga mataldeng kat panleteg ya.”2:23 Genesis 15:6.

Baw panaꞌwag it kanya, Magayen nga iba-iba it Ampuꞌang Diyus.2:23 2 Cronica 20:7, Isaias 41:8. ²⁴Ta nasepsepan mi na nga ipagpabetang i esang taw nga mataldeng basta may pagbuwaten ya nga ipagpamatuud it maratuudan talagay pamayaꞌ ya. Ega maat sabap it pamayaꞌ nga desang pakimatuud lamang.

²⁵Atkayan naga si Rahab, iyan babay it tagnaꞌ paꞌ nga ipagpanulus yay bilug ya. Ka daꞌga baꞌ, iyan napikir ya nga pasakep it Ampuꞌang Diyus, masagya nga inistimar ya kat seled it pamalay-balay ya i duwang kataawan nga mga piyasunda it mga Israelita?2:25 Josue kapitulu 2. Bawnga imiyunaꞌaw ya pat kanira i dalan nga iyan i sunsunun nira isaꞌun makapalagyu. Ta sabap it mga binwat ya, nga pamatuud it kamatuudan i pamayaꞌ ya, ipiyabetang kanya it Ampuꞌang Diyus nga mataldeng kat panleteg ya.

²⁶Paꞌugdun paꞌ nga alimbawa ku, basta linꞌidan nat kiyarurwa i bilug, simpri patay na. Ta atkayan naga yan, pamayaꞌ nga desang pakimatuud ka egay ipagpamatuud nga buwat, talagang patay nga pamayaꞌ.

Dakulaꞌ nga karaꞌe-raꞌetan nga ipagpaliꞌwan it dilaꞌ

¹Mga sulsug ku kat pamayaꞌ, magayen in ega basta-basta magꞌireg i kadakel mi it katengdanan nga manigpangadal it ampang it Ampuꞌang Diyus. Sabap magkaꞌrutan mi na nga kami nga manigpangadal, subraꞌ kami nga ukumanan in ega pagsunudun namen i ipagpangadal namen ngaytu. ²Ka daꞌga, kita nga muꞌsa, pirmi naga nga magkamaliꞌ. Iyan lamang i talagang alaid na kat kasalaꞌan, taw nga ega magkamaliꞌ kat pangangampangan ya, ka kaya ya na nga masupil i sadili ya.

³Alimbawa kabayuꞌ, nga basta nabusalan i baꞌbaꞌ ya, magsunud it maski ari ireg ta nga papanawan it kanya. ⁴Atkayan naga i paglalayagan nga barkuꞌ. Maski talagang dakulaꞌ nga sakayan baw masbeg ga i deres nga magkapapanaw it kanya, temed magkabaring-baring it timunil it maski ari ireg ya nga padulungan sabap it timun ya, maski maat dekeyeꞌ nga bagay. ⁵Baw atkayan gasiꞌ i dilaꞌ it taw. Deke-dekeyeꞌ nga buwat-buwat it bilug, temed dakulaꞌ talagay magkabwat ya. Panawun it pikiran mi i dekeyeꞌ lamang nga apuy, nga basta nakatindeg i sugu ya, antengen ya i maski malayaw paꞌ nga talun.

⁶Ta, dilaꞌ ta, kabilangan ya, subuk apuy nga piyasgu ni Satanas it apuy ngayting egay kapugdawan ya. Dakulaꞌ talaga nga karaꞌe-raꞌetan nga ipagpaliꞌwan it dilaꞌ ta ngaytu, baw magkaduraꞌitan i muꞌsang bilug ta. Yay matuud, pati muꞌsang pangaꞌgenan ta, magkaranggaꞌ naga it dilaꞌ ta ngaytu. ⁷Daꞌga baꞌ muꞌsang kalasit ramu-ramu, daꞌgay-daꞌga magkapadisiran it taw? Ka may mga manu-manuk, sedaꞌ, mga ramu-ramu nga magpanaw baw maski mga magkambang i pamanaw nga piyagnek it taw. ⁸Temed in dilaꞌ ta, ega pay taw nga magkabegbeg it dilaꞌ ya. Dilaꞌ ngaytu, magsisigi i karaꞌe-raꞌetan ya. Maꞌaat ta nga kapapatay ka dalitan.

⁹Sabagay, dilaꞌ ta ngaytu i ipagbantug tami it Ampuꞌang Diyus nga Amaꞌ tami. Temed iyan na gasiꞌ i ipagpanumpa tami it beken nga surubung tami nga giyuna it Ampuꞌang Diyus nga ipiyasbung ya naga it sadili ya. ¹⁰Lamang esa-esay baꞌbaꞌ tami, duway magliꞌwan nga ampang, magbantug baw magpanumpa it maraꞌe-raꞌet. Mga sulsug ku kat pamayaꞌ, talagang ega mapakay i atkaytu ngaytu. ¹¹Ka unu, esa-esay tumbud, pagtumbudan it danum nga magayen baw mabaꞌlung? Simpri ega. ¹²Mga sulsug ku kat pamayaꞌ, talagang ega maat muwaꞌ it olibo i igos u muwaꞌ it igos i ubas. Baw ega gasiꞌ i masaꞌgeb nga danum nga mataꞌbang duꞌun it dagat.

Kasepsep nga garing duꞌun it Ampuꞌang Diyus

¹³Ta siyu manggid it imyu i makaꞌrut baw masepsep? Kaꞌilangan ipamatuud mi tu kat magayen nga adat mi, baw kat magagayen nga pagbuwaten mi it may kapalulusan nga magbayaꞌ it matuud nga kasepsep. ¹⁴Temed in iyan pay magdadaꞌeg kat nakem mi, ereꞌeret nga inggi-inggiten baw adat nga subrang ipagpadaꞌeg i sadili, ega yan aaten mi nga may kasepsep mi, ka ambut mi yan. ¹⁵Ka basta atkayan i kat nakem mi, kasepsep mi ngayan nga paꞌaaten, ega garing duꞌun it Ampuꞌang Diyus, in daꞌga pasepsep it taw lamang. Egaytu begay it Espiritu Santo, in daꞌga si Satanas i garing. ¹⁶Sabap in siyung taw nga maꞌinggit baw ipagpadaꞌeg ya i sadili, iyan gasiꞌ i buwat ya, kaguluwan baw muꞌsang kalasit buwat nga maraꞌe-raꞌet.

¹⁷Temed iyan may kasepsep nga garing duꞌun it Ampuꞌang Diyus, mangaꞌgenan kanya it alaid kat kasalaꞌan. Magayen nga pakiꞌiba-iba it masigkataw ya i kaꞌiꞌirgan ya. Nakman kanya baw mapiyalulus, maꞌildaw baw mapaꞌres kat mga buwat nga magayen. Tingled i nakem ya duꞌun it kataldengan baw ega mapiyaꞌisti-isti. ¹⁸Baw iyan mga magkabwat it dalan nga ipagkagayen, in pagpaꞌresan nira i magayen nga pakiꞌiba-ibat masigkataw nira, kataldengan i tanaꞌan ya.

Pasakep nga matuud duꞌun it Ampuꞌang Diyus

¹Ta ari pagpanggaringan it raꞌe-raꞌeten baw daꞌe-daꞌegen mi? Daꞌga baꞌ garing it sadili mi nga mga kaꞌiꞌirgan nga magdadaꞌeg kat nakem mi? ²May pagꞌirgan mi nga banar temed ega magkapisiꞌ mi. Aypaꞌ ka magꞌiseg kamu nga kuꞌimatay kamu na isaꞌun lamang maꞌimyu. Kaꞌirak mi it mga bagay nga ega magkapisiꞌ mi, yanay papuꞌnan it raꞌe-raꞌeten baw daꞌe-daꞌegen mi. Temed ta, unuka mapisiꞌ mi it ega magkaꞌrut kamu mangut duꞌun it Ampuꞌang Diyus? ³Baw maski mangut kamu, ega naga ibgay ya it imyu, sabap it ega magayen i antap it nakem mi, ka gamiten mi kat mga buwat nga uyun kat sadili mi lamang nga kaꞌiꞌirgan, ega maat kaꞌirgan it Ampuꞌang Diyus.

⁴Kamung mga taw, subung kamut pagꞌaꞌasawaeng babay nga barapakun, nga ega paglabiyen yay pagꞌasawa, ka atkayay buwat mi duꞌun it Ampuꞌang Diyus. Unu, ega magkaꞌrutan mi nga basta iyan i ragaen mi, mga bagay situt banwa ngaytu, pagkuntraꞌen mi i Ampuꞌang Diyus? Yay matuud, in siyu-siyu nga pagtemden ya nga ega kaꞌirgan it Ampuꞌang Diyus in daꞌga mga kaꞌiꞌirgan situt banwa i ragaen ya, egay beken, magkasiguru ya i sadili ya nga kakuntraꞌ it Ampuꞌang Diyus. ⁵Ka barang tanud mi nga egay kakapulusan it ipagpanulduꞌ ngayan duꞌun it ampang it Ampuꞌang Diyus, nga basta nakem it taw, maꞌireg nga maꞌireg seked it subraꞌ nay kaꞌinggit ya. ⁶Temed subraꞌ paꞌ kaytu i ildaw nga ipagbegay it Ampuꞌang Diyus. Aypaꞌ ka magsusurat kat kasuratan nga magꞌaat,

“Talagang pagkuntraꞌen it Ampuꞌang Diyus i mga mapiyataꞌas-taꞌas, temed dakulay ildaw nga ipagbegay ya kat mga mapiyababaꞌ.”4:6 Kawikaan 3:34.

⁷Aypaꞌ pasakep kamu nga matuud it Ampuꞌang Diyus. Iyan si Satanas, ega na pasaleꞌsegen mi, in daꞌga labanan mi kanya. Simpri in atkayay mamuyaan ya, paꞌalaid kanya talaga asan it imyu. ⁸Mandangep kamu duꞌun it Ampuꞌang Diyus ka siguradung sumambung kanya, nga ildawan ya kamu. Kamu nga mga makasalaꞌan, indiꞌan mi nay mga kasalaꞌan mi ngayan. Tingleden mi na duꞌun it Ampuꞌang Diyus i nakem mi nga magduwa-duwa paꞌ. ⁹Eeꞌ baꞌ, masmekan mi nga banar baw sugawan mi i mga kasalaꞌan mi. Gantiyan mit sugaw i kasesleman mi baw kasmek i kasagyaan mi. ¹⁰Pababaꞌ kamu baꞌ kat panleteg it Ampuꞌang Diyus. Sabap, iyan mapiyababaꞌ, ipataꞌas ya.

¹¹Mga sulsug ku kat pamayaꞌ, paꞌalaidan mi i adat nga pagdiya-diyampaꞌen. Sabap in siyu nga pagdiyampaꞌen ya i sulsug ya kat pamayaꞌ, nga bilang pagbetanganan yat ukuman, egay beken, pagtibabaꞌen yay urdin it Ampuꞌang Diyus. Ipagpabetang ya nga egay kapulusan it ipiyagꞌurdin nga magsigraras tami it esa may esa. Simpri basta pagtibabaꞌen muy urdin ngaytu, ega maꞌaat ka nga magsunud, in daꞌga pagpasaꞌliyan mu na, adimaat mataꞌas ka paꞌ it Ampuꞌang Diyus. ¹²Ka yay matuud, Ampuꞌang Diyus lamang i garing it urdin baw kanya lamang i mapakay nga Manigꞌukuman. Sabap kanya lamang i may pudir nga rimibri baw muuꞌ. Temed ikaw, siyu ka na nga magbetangan it ukuman kat masigkataw mu?

Ega talaga magayeng adat i mapiyasubraꞌ

¹³Pikiren mi tu i itu gasiꞌ nga sugi-sugid ku, kamu nga magꞌaat, “Kayting aldaw u dedelem paꞌaduꞌun kami it iti nga siyudad. Mga sang taꞌun i kaꞌlay namen duꞌun. Magnigusyuꞌ kami duꞌun isaꞌun dumakulay pirak.” ¹⁴Temed ta, ega paꞌ magkaꞌrutan mi in unuy mabetangan mi it kumadedelman. Sabap kaꞌgenan ta, subung lamang it tabuk nga timindeg, ega maꞌlay magsipat. ¹⁵Sana baꞌ, in magrima-rima kamu, pikiren mi daꞌan in unu, kaꞌirgan naga it Ampuꞌang Diyus. Yay magayen nga aaten mi, “In beteꞌ kaꞌirgan it Ampuꞌang Diyus baw ildawan yat magayen nagay ginawa, iti sana i magkapikir namen nga kubwaten u kupanawun.” ¹⁶Temed ta, malandi-landi kamu na baw mapiyasubraꞌ na it Ampuꞌang Diyus. Ega yan talaga magkapakay ya i atkayan ngayan. ¹⁷Aypaꞌ dedemdemen mi tu. Iyan taw nga magkaꞌrutan ya nay in unuy magayen, nga dapat ya nga pagbuwaten, temed ega yay pagbuwaten ya, kasalaꞌan ya naga yan.

Paꞌimbanda kat mga manggaden nga mapiyanrugi

¹Ta itu gasiꞌ i masugid ku pasar it imyu nga mga manggaden nga mapiyanrugi. Sana pikiren mi tu it magayen. Sumgaw kamu baw gumarwak kamu na it dadakulaꞌ sabap it mga kakuriꞌan nga mabut it imyu. ²Talagang kamanggadan mi nga magdadawaꞌ na lamang, mamagrunut na. Baw siyari nat ketket it tanga i magdadawaꞌ nga pakayan mi. ³Mga bulawan baw pirak mi, ega na mapakay nga ipagꞌalang sabap it subuk kiyarat na ka naꞌlay na nga magdadawaꞌ. Baw karat ngaytu i pamatuud it talagang ega magayen i adat mi ngaytu nga maꞌimet.

Baw yay matuud, ega desang kamanggadan ngaytu i rininut mi, in daꞌga iyan gasiꞌ, mabeꞌgat nga panriga duꞌun it apuy ngayti nga egay kapugdawan, in asan nat umur nat banwa. ⁴Ka ungaytu, mga tangdan nga ega ibinggay mi it mga piyakayeg mi duꞌun it mga uma mi, subuk magꞌesang. Magpangabang kuntraꞌ it imyu. Matuud nga magkaꞌbut duꞌun it Ampuꞌang Diyus nga landaw nga gunaan i mga panganin-anin it mga piyabwat mi ngaytu. ⁵Talagang nagpasamunsayaꞌ kamu na nga banar baw nagpaꞌayaw-ayaw na situt banwa. Temed yay kamatuudan, nagpasbung kamu nat ramu-ramu nga piyatabaꞌan nga egay uru-urut ya nga pagꞌargan it kanya, karniꞌen. ⁶Eeꞌ baꞌ, siyariyan mi nat betangan it ukuman baw pangimatay i mga taw nga mataldeng kat panleteg it Ampuꞌang Diyus, baw piyataꞌnan nira lamang kamu.

Kaꞌilangan in namayaꞌ na, magpaneꞌteꞌ, ega magkaꞌyawan

⁷Aypaꞌ kamu nga mga sulsug ku kat pamayaꞌ, sagkaꞌen mi lamang it magayen i nakem i mga kakuriꞌan mi ngaytu. Panawun it pikiran mi i manigꞌuma. Daꞌga baꞌ, ega magkaꞌyawan kanya mintras pagꞌeꞌlaten ya nga manggayen i buwaꞌ it piyakarigaan ya, baw uran nga patubuꞌ, pakseg, pabwaꞌ baw paꞌsi? ⁸Sana kamu atkayan naga, nga daꞌkamu gasiꞌ maꞌyawan, in daꞌga teꞌteꞌan baw iꞌunay mi i pamayaꞌ mi, sabap magꞌadeꞌdeng nay ipaꞌuliꞌ ngaytu it Ampuꞌan. ⁹Paꞌalaidan mi i adat nga pirming pagsitaren i maꞌiba mi, isaꞌun daꞌkamu mabetanganan it Ampuꞌang Diyus it ukuman. Sabap magꞌadeꞌdeng na talaga i pangabut it Manigꞌukuman ngaytu.

¹⁰Mga sulsug ku kat pamayaꞌ, sana pasbung kamu it mga prupitaꞌ it tagnaꞌ, nga manigpaꞌrut it mga taw it kusugiden it Ampuꞌang Diyus. Ka talagang ega magkaskedan sira it mga kakuriꞌan, in daꞌga pagsagkaꞌen nira it magayen i nakem. ¹¹Daꞌga baꞌ, pagꞌaaten ta nga magkasagya i magpaneꞌteꞌ kat pamayaꞌ ya? Siguru nagnegan mi na i pasar it paneꞌteꞌ ni Job baw kagayenan nga ipiyagꞌildaw it Ampuꞌang Diyus it kanya, iyan naꞌlay na nga paneꞌteꞌ ya ngayti. Ka Ampuꞌang Diyus, dakulaꞌ talagay pagmaꞌal baw ildaw ya.

Pangiyaꞌpusang panulduꞌ

¹²Ta kayti, mga sulsug ku kat pamayaꞌ, subrang ipagbenge-bengel kut imyu nga ega na magsumpa kamu. Ega na aaten mi nga “Sistigu ku i langit,” u “sistigu ku i banwa,” u maski unu pang beken nga idungag mi nga pangibet. Iyan bay magayen nga ampangen mi, in eeꞌ, eeꞌ. In ega, ega. Atkayan na lamang isaꞌun daꞌkamu mabetanganan it Ampuꞌang Diyus it ukuman.

¹³In beteꞌ siyu manggid it imyu i magkakuriꞌan, magayen nga buwaten ya, manalangin. Ta in may masagya, kumantaꞌ nga bantugun yay Ampuꞌan. ¹⁴Baw in siyu manggid it imyu i manarakiten, ipadaꞌak ya i mga magpamaalaꞌ it mga magpamayaꞌ, ka panalanginan nira kanya baw panisan it lana kat ngaran it Ampuꞌan. ¹⁵Talagang sambungan it Ampuꞌan i panalangin nga uyut i matuud nga pamayaꞌ baw pagsarig it kanya. Basta uyun kat pabetang-betang ya, pagayenen ya i magsarut ngaytu. Baw ipasinsiya paꞌ it kanya in nagkasalaꞌan. ¹⁶Aypaꞌ in may nabwat mi nga kasalaꞌan duꞌun it masigkataw mi, kaꞌilangan aminen mi duꞌun it kanya nga magꞌangut it pasinsiyaen. Bawnga magsigpanalangin kamu isaꞌun pagayenen kamu it Ampuꞌan. Ka talagang may paglapusan it panalangin it taw nga mataldeng kat panleteg it Ampuꞌang Diyus, nga dakulaꞌ nga banar i magkabwat it panalangin ngaytu. ¹⁷Dedemdemen mi tu, nga si Elias ngaytit tagnaꞌ paꞌ, taw naga nga subung ta. Iyan ipiyanalangin ya nga ega muran, daꞌga baꞌ tulung taꞌun baw tengaꞌ, egang matuud miyuran? ¹⁸Bawnga ipiyanalangin ya siꞌ nga muran na. Egay beken, miyuran, nga ikinseg siꞌ it mga luwak baw ibinwaꞌ.5:18 1 Mga Adiꞌ kapitulu 17 baw 18.

¹⁹Pangiyaꞌpusan nga makaꞌaat kut imyu, mga sulsug ku kat pamayaꞌ, in beteꞌ may esat imyu nga mateꞌag-teꞌag kat dalan it kamatuudan, baw may esa gasiꞌ nga kapaꞌuliꞌ it kanya, talagang magayen yan. ²⁰Ka ituy dedemdemen mi. In siyu-siyuy makapaꞌuliꞌ it esang makasalaꞌan nga nateꞌag-teꞌag kat kamatuudan, maꞌyag nga maparibri ya i taw ngayan kat kamataynen nga egay kaskedang panriga, baw mapasinsiya i muꞌsang mga kasalaꞌan ya.