Hebreo

Surat nga Pakseg it Pamayaꞌ it Mga Hebreo

Hebreo

Pauꞌnang Sugi-sugid

Itung kasuratan, ega magsugid in siyuy tagsurat kaytu, u in siyuy pagsuratan, basta lamang mga Hebreo. Hebreo i esang pangaran it mga Judio (Exodo 2:11 baw 3:18). Aypaꞌ mga Judio i siyuratan it tagsurat it kasuratan ngaytu. Temed in basaen tami, maꞌyag nga iyan mga pagsuratan ya, kat pabetang ya, naꞌlay nang magpamayaꞌ baw magsarig it Manriribri nga si Jesus. Aypaꞌ, mga Judio nga namayaꞌ nat ki Jesus i pagpaꞌiguꞌan it ampang ngaytung Hebreo, nga siyuratan it itu ngaytung kasuratan.

Uliꞌan-uliꞌan it kasuratan ngaytu, si Jesus, subrang mataꞌas it muꞌsa, mataꞌas pat mga prupitaꞌ it tagnaꞌ, mataꞌas pat mga anghil, baw mataꞌas pat maski si Moises. Baw sabap it kamataynen ya, kanya i magpapaꞌgen it Baꞌgung Pakiꞌupakat nga subraꞌ pang magayen it uꞌna ngayting pakiꞌupakat it Ampuꞌang Diyus kat mga Judio. Kat uꞌna ngayting pakiꞌupakat, duguꞌ it mga ramu-ramu lamang i ipagꞌangut it kapasinsiyaan it kasalaꞌan. Temed in duguꞌ it ramu-ramu lamang ngayti, ega talaga ikapisiꞌ it kapasinsiyaan duꞌut Ampuꞌang Diyus. Ladawan lamang ti it buwaten ni Jesus, ka duguꞌ ni Jesus nga ipiyaturuꞌ ya, nga yay keseg it Baꞌgu ngaytung Pakiꞌupakat, iyan i subraꞌ nga may kapulusan. Ka Anak kanya it Ampuꞌang Diyus, baw egay sadili ya nga kasalaꞌan. Kat pamayaꞌ baw pagsarig it kamataynen ya ngayti, yay ikapisiꞌ it taw it kamatuudan nga kapasinsiyaan it kasalaꞌan nira.

Ta, maski na maat naꞌlay nang magpamayaꞌ baw magsarig it ki Jesus i mga Hebreo ngaytu nga pagsuratan, barang kupangindiꞌ na kat kadakulat pakuriꞌ it kanira. Aypaꞌ subuk siyulag it tagsurat i pamayaꞌ nira, ka ipiyademdem yat kanira in unuy napulus it pamayaꞌ baw pagsarig it mga taw it tagnaꞌ nga ega nangindiꞌ maski sang unuy kadakulat kakuriꞌan nga magkalabayan nira. Sana, kita, atkayan naga.

Ega masbungan it mga anghil i kataꞌas it Anak it Ampuꞌang Diyus

¹Iyan timpu paꞌ it mga kagiyaringanan tami, iyan mga kusugiden it Ampuꞌang Diyus it kanira, ipiyaꞌampang yat mga prupitaꞌ kat belag-belag nga timpu baw belag-belag gasiꞌ nga pabetang-betang ya. ²Temed kayti, kat aten na ngaytu nga timpu, mismu Anak ya na i magtataban it ampang ya nga miyabut situt aten. Anak ya ngaytu i ipiyatindeg ya nga tumagpuꞌun it muꞌsang bagay baw egay beken nga piyaguna yat muꞌsang mga paryaman nga magkaltegan ta in daꞌga Anak ya naga ngaytu. ³Duꞌun it Anak ya subuk magsingkar i kabantugan it Ampuꞌang Diyus sabap in magꞌuꞌunu i Ampuꞌang Diyus, atkayan nagay Anak ya ngaytu. Kat keseg it ampang it Anak ya ngaytu, kanya na i magꞌaꞌalima baw magtaban it muꞌsang bagay. Pagkabwat yat panlimpiyuꞌ it kasalaꞌan it taw, miyadung na kanya duꞌun it iwanang ayun it landaw nga gunaan nga Ampuꞌang Diyus nga duꞌun it langit. ⁴Aypaꞌ kayti, binggayan na kanya it kabantugan nga subrang magayen pat kabantugan it mga anghil. Kamatuudan, ipiyakilala na kanya nga egay kasbung nga Anak it Ampuꞌang Diyus, ega desang anghil. ⁵Sabap, garing paꞌ it tagnaꞌ, egay maski esa nga anghil nga inaat it Ampuꞌang Diyus nga magꞌaat,

“Kayti, ipagpatandaꞌ ku nga Anak kuytu ikaw. Akuy Amaꞌ mu.”1:5 Awit 2:7.

Baw egay maski siyung anghil nga pagpaꞌiguꞌan yat ampang ya ngaytung magꞌaat,

“Garing kayti matanyag nga aku talaga i Amaꞌ ya, baw kanya, Anak ku nga talaga.”1:5 2 Samuel 7:14, 1 Cronica 17:13.

⁶Baw ta, yan adeꞌdeng na nga palampudun na it Ampuꞌang Diyus situt banwa i Anak yang egay kasbung, maat siꞌ i inaat ya,

“Talagang dapat kanya nga sambaen it muꞌsang mga anghil ku.”1:6 Deuteronomio 32:43.

⁷Ta, sabap gasit mga anghil inaat ya gasiꞌ,

“Kat pagsirbi it mga anghil it aken magkabwat ku sira nga subuk deres u subung it deleg it apuy.”1:7 Awit 104:4.

⁸Temed kat Anak ya ngaytu maat i inaat ya,

“Ikaw, Ampuꞌang Diyus, i magꞌadiꞌ it egay kaskedan.

Magꞌadiꞌ ka nga purus kataldengan nga magayen i ipapanaw mu.

⁹Muꞌsang buwat nga magayen, pagsagyaan mu nga banar. Temed iyan buwat nga maraꞌe-raꞌet, talagang pagraꞌwayen mu.

Aypaꞌ ka, aku nga Ampuꞌang Diyus mu, binggayan ku ikaw it ega basta-bastang kataꞌasan baw kasagyaan nga subraꞌ paꞌ it muꞌsang mga kaꞌibaan mu.”1:8-9 Awit 45:6-7.

¹⁰Maat pay beken nga inaat it Ampuꞌang Diyus kat Anak ya,

“Puꞌun-puꞌun it banwa ikaw, Ampuꞌan, i giyaringan.

Atnaga i kalayawan it langit, ikaw talaga i nagguna.

¹¹Mabut i aldaw nga muꞌsa ngaytu, maꞌiriꞌ tu nga muꞌsa. Temed ikaw, maneꞌteꞌ ka it seked it kaꞌnu-kaꞌnu. Sira, lumagi-lagi nga subung it abel.

¹²Kat aldaw ngayan subuk lulunun mu sira nga subung it gulamen. Talagang magantiyan sira nga subuk mga pakayan nga ega na magkagamit.

Temed ikaw, maneꞌteꞌ nga egay pagꞌugadan. Daꞌka gumurang u matay.”1:10-12 Awit 102:25-27.

¹³Temed talagang maski kaꞌsa egay maski esa nga anghil nga inaat ya,

“Kayti madung ka na sinit iwanan ku nga ayun seked it, iyan mga kalaban mu, paꞌampuꞌun ku na nga tutungtungan mana sira it aꞌay mu.”1:13 Awit 110:1.

¹⁴Aypaꞌ unuy pagꞌargan it mga anghil? Daꞌga baꞌ, mga anghil ngaytu, mga manigsirbi duꞌun it Ampuꞌang Diyus? Egaytu magkaltegan tami temed, muꞌsa sira ngaytu, mga pagtaꞌgen ya nga magtabang it kumpur ipiyabetang-betang ya nga begayan it karibriyan.

Kaꞌilangan, ega luga-lugaꞌen i karibriyan ngaytung ega basta-basta

¹Aypaꞌ, kayti, dapat tang ipakagat it maꞌingget kat nakem tami i kamatuudan nga ipiyangadal it aten isaꞌun daꞌtami rumarad. ²Iyan mga urdin it Ampuꞌang Diyus nga ipiyaꞌampang yat mga anghil2:2 Kat pasepsep it mga Judio it tagnaꞌ, iyan ipiyapanaw it Ampuꞌang Diyus i mga urdin ya, mga anghil i siyarigan ya (Deuteronomio 33:2). it iti tagnang timpu, talagang natantuwan na nga ega lulugud-lugudun. Ka daꞌga baꞌ siyu-siyu nga limnaban kaytu ka ega siyunud, talagang tumbas nga panriga i natanggap nira, ka yay bagay it atkayang pagbuwaten. ³Ta, in atkayan, siguradung daꞌtami makapalagyu in baliwalaꞌen tami paꞌ i karibriyan ngaytung ega basta-basta. Ampuꞌan nga si Jesus i uꞌnang nagpaꞌyag it karibriyan ngaytu bawnga, iyan mga nakagneg it kanya, ipiyagpamatuud nira gasit aten. ⁴Pati Ampuꞌang Diyus, ipiyagpamatuud ya gasiꞌ i panulduꞌ nira kat dakel-dakel nga mga tandaꞌanan nga kalililuꞌang bagay nga ipiyabwat yat kanira, baw kat mga kakayaan gasiꞌ nga begay it Espiritu Santo kat in siyu-siyu i ireg it Ampuꞌang Diyus ngaytu.

Nagbalyung taw si Jesus kat ikaribri it katataawan

⁵Ta, sangpiten ku siꞌ i banwa ngaytu nga magdadarapaꞌ. Kat pabetang-betang it Ampuꞌang Diyus egaytu mga anghil i mamaalaꞌ kat banwa ngaytung paꞌaaten. ⁶Talagang ega, sabap ipiyamatuud nang lagi duꞌun it esang kasuratan it tagnaꞌ nga magꞌaat,

“Unuytuy taw ngaytu situt banwa ka pagdedemdemen mu, Ampuꞌang Diyus?

Taw lamang sira temed pagtatarimaen mu nga pirmi.

⁷Kat dekeyeꞌ ngaytung timpu ipiyababaꞌ muy taw nga mababaꞌ paꞌ sira it mga anghil.

Temed ipiyabetang-betang mu nga mabut i aldaw nga ipataꞌas muy katataawan baw begayan it subrang kabantugan.

⁸Ka ipiyakarguꞌ mu nat kanira i pamaalaꞌ it muꞌsang bagay.”2:6-8 Awit 8:4-6.

Ta, daꞌga in atkayan, talagang egay maꞌped? Karguꞌ nat taw i muꞌsa.2:8 Genesis 1:26-28. Temed kayti, ega paytu maat miyabut. ⁹Temed itu na talaga i miyabut. Kat dekeyeꞌ nga timpu binwat gasiꞌ si Jesus nga mababaꞌ pat mga anghil isaꞌun, kat kadakulat ildaw it Ampuꞌang Diyus it aten, lumabay si Jesus it kamataynen nga tanggungun ya i kasalaꞌan tami nga muꞌsa nga mga taw. Temed lamang ipiyabetang kanya it atkayan, yan nagang binggayan kanya it kabantugan baw pagkamataꞌas sabap it kamataynen ya ngayti.

¹⁰Paribasay muꞌsang bagay, ipiyabetang-betang it Ampuꞌang Diyus baw kat ikabantug ya i muꞌsa ngaytu, talagang mapakay nga ipiyabetang-betang ya nga si Jesus ngaytu, sumagkaꞌ it dakulang kakuriꞌan. Ka sikayan kiyumplitu ni Jesus i kumpur kaꞌilangan yang buwaten isaꞌun dakel nga taw nga inanak it Ampuꞌang Diyus i mataban ya kat ega basta-bastang kabantugan. Si Jesus lamang i piyanggaringan it karibriyan baw kanya i magpanguꞌnaan it kanira kat karibriyan nira ngaytu. ¹¹Sabap iyan Amaꞌ ni Jesus ngaytu nga maglimpiyuꞌ it mga taw kat mga kasalaꞌan nira, Amaꞌ naga gasiꞌ it mga taw ngaytu nga paglimpiyuꞌun ya. Aypaꞌ daꞌna ipagꞌeyaꞌ ni Jesus nga taꞌwagen ya sira nga mga sulsug ya. ¹²Ka magꞌaat i ipiyasurat yat tagnaꞌ,

“Talagang ituturan kut mga sulsug ku i kagayen mu.

Kat piyagꞌada-adapan it kadaklan it taw nga magsamba it imu kumantaꞌ aku it pagbantug kut imu.”2:12 Awit 22:22.

¹³Maat pay beken nga ipiyasurat ya,

“Pati aku, sumarig akung pirmi it tabang it Ampuꞌang Diyus.”2:13 Isaias 8:17.

Baw maat pay paꞌugdun ya,

“Wayni aku, baw kaꞌibaan ku i beken ngayning mga bilang anak it Ampuꞌang Diyus nga ipiyasakep yat aken.”2:13 Isaias 8:18.

¹⁴Ta paribasay taw i mga anak ngayti nga paꞌaaten, nga may isi, duguꞌ baw kaskedat ginawa, aypaꞌ ka si Jesus, nagbalyu nga taw naga isaꞌun mapakay nga matay gasiꞌ kanya. Sabap, duꞌun it kamataynen ya diyaꞌeg ya si Satanas, nga riyanggaꞌ ya i pamegbeg yat taw, nga yay magtaban it kanira duꞌun it kamatayneng panriga nga egay kaskedan. ¹⁵Aypaꞌ, kat itu ngaytung binwat ya, ipiyaliꞌwan ya na kita kat iꞌlam tat kamataynen. Ka garing it pagtaw ta situt banwa, subuk uripen tat iꞌlam it kamataynen ngaytu. ¹⁶Simpri egaytu mga anghil i pagtabangen ya kaytu in daꞌga kita nga magpamayaꞌ it kanya, kita nga subuk mga tungtung-inapuꞌ ni Abraham. ¹⁷Aypaꞌ, isaꞌun katabang kanya nga matuud, kiyaꞌilangan yang magbalyu nga taw isaꞌun makasbung kanya it aten nga mga sulsug ya kat muꞌsa nga magkapasaran. Ka in atkayan, in duꞌun kanyat adapan it Ampuꞌang Diyus nga magbuwat it buwat it Piyakamataꞌas nga Sasirduti, maꞌildaw kanyang banar it aten baw ega talagay kurang it pagsirbi ya duꞌun sabap, kat kamataynen ya, binwat yay panalisi nga ikapasinsiya nga matuud it kasalaꞌan it mga taw. ¹⁸Baw paribasay kanya nakuriꞌan baw talagang siyukdanan ni Satanas in unu makapakursud ya, aypaꞌ talagang magkatabangan ya kita in pagsukdanan ta gasiꞌ i aten.

Subraꞌ pat ki Moises si Jesus ngaytu

¹Aypaꞌ kayti, mga kasulsugan ku nga subung nat ipiyapinpin it Ampuꞌang Diyus, kamu nga ipiyabetang-betang ya nga makaꞌistar duꞌut langit kat pagdadarapaꞌen, magayen in panawun it pikir mi si Jesus ngaytu. Kat kamatuudan nga pagpamayaꞌnen tami, kanya i ipiyaꞌasitu it Ampuꞌang Diyus, baw kanya i Piyakamataꞌas nga Sasirduti nga magpanindeg it aten. ²Talagang siyunud yat kamatuudan i muꞌsa nga ipiyagꞌintergaꞌ it Ampuꞌang Diyus it kanya nga buwaten. Subung nagat ki Moises. Kat pamaalaꞌ ni Moises it pamalay-balay3:2 Mapakay nga pamalay-balay ngaytu nga paꞌaaten, mga Israelita it tagnaꞌ nga piyapanguꞌnaan it Ampuꞌang Diyus it ki Moises. it Ampuꞌang Diyus, siyunud ya gasit kamatuudan i katengdanan ya. ³Temed si Jesus ngaytu, subraꞌ paꞌ i kabantugan ya it kabantugan ni Moises. Ka simpri subraꞌ pat kabantugan it esang balay i kabantugan it tagbuwat it balay ngayti. ⁴Urut tami nga muꞌsa nga basta may balay, simpri may nagbuwat it balay ngayti. Temed may tagbuwat it muꞌsa, Ampuꞌang Diyus. ⁵Talagang, si Moises, magayen i pagsirbi ya kat pamalay-balay it Ampuꞌang Diyus. Temed, kabilangan ya, manigsirbi lamang kat pamalay-balay ngayti. Ta, yan buwat ya, desa lamang nga ladawan it mga bagay nga ipaꞌrut it Ampuꞌang Diyus kat pagdadarapaꞌen. ⁶Temed si Cristo ngaytu, kamatuudan gasiꞌ i pagsirbi ya, takaꞌ ega lamang manigsirbi kanya kat pamalay-balay it Ampuꞌang Diyus in daꞌga pagbayaꞌen, ka Anak kanya it Tagbalay. Ta kita na ngaytu i paꞌaaten nga pamalay-balay it Ampuꞌang Diyus in seklen tat maꞌingget baw ega ipagꞌeyaꞌ tami i pagsunud tat kanya, baw ipagꞌunay tat masagyang-masagya i pagꞌinawar tami it muꞌsa nga isiyanggup yat aten.

⁷Aypaꞌ, kayti, dedemdemen tami i ipiyagsasar ngayan it Espiritu Santo ngayang magꞌaat,

“Kayti, basta nagnegan mi i ipagꞌaat it Ampuꞌang Diyus,

⁸ega sana padsenen mi i ulu mi nga subung it binwat it mga kagiyaringanan mi nga kiyuntraꞌ baw siyukda-sukdanan nira kanya duꞌun it rugar nga kapupuyangtan.

⁹‘Talagang,’ maat it Ampuꞌang Diyus, ‘pirmi nga pagsukda-sukdanan nira aku, lamang seledan nat epat nga pulung taꞌun, nagpasar kat mata nira i guna ku nga ipagtabang kut kanira.

¹⁰Aypaꞌ ka naꞌisgan ku na sira, ka namuyaan ku nga pirmi sirang magpablag it aken.

Talagang lamwat sira nga pirmi nga pagpasngelan i dalan nga ipagtulduꞌ kut kanira.

¹¹Aypaꞌ ka, kat kadakulat iseg ku it kanira, isiyumpa ku nga talagang daꞌsira makapapaꞌna kat pudir ku duꞌun it rugar ngayti nga isiyanggup kut kanira.’”3:7-11 Awit 95:7-11.

¹²Aypaꞌ, mga kasulsugan, magꞌintur kamu nga pirmi isaꞌun sana egay maski siyu it imyu i may adat nga maraꞌway, nga ega tingled i nakem ya kat pamayaꞌ ya. Ka iyan nay tumaban it kanya it mangindiꞌ it Ampuꞌang Diyus nga egen it egay kaskedan. ¹³Ta kayti, it abri pay dalan it karibriyan, iyan i magayen nga buwaten mi, aldaw-aldaw paksegen i pamayaꞌ baw pagsarig it esa may esa, isaꞌun egay maꞌakalan it kasalaꞌan nga papuꞌnan it demsen nay ulu mi. ¹⁴Sabap, kita ngaytu, kaꞌiba-iba na ni Cristo basta seked it umur, maneꞌteꞌ nga mapaꞌgen i kasiguruwan ta nga kamatuudan i mga bagay pasar it ki Cristo ngaytu nga pagpamayaꞌnen ta garing it tagnaꞌ paꞌ.

¹⁵Ipademdem ku sit imyu i magbebtang ngayan duꞌut kasuratan it tagnaꞌ nga magꞌaat,

“Kayti, basta nagnegan mi i ipagꞌaat it Ampuꞌang Diyus, ega sana padsenen mi i ulu mi nga subung it binwat nira ngayan nga kiyuntraꞌ nira kanya.”3:15 Awit 95:7-8.

¹⁶Ka siyuytuy mga taw ngaytu nga paꞌaateng kimnuntraꞌ it Ampuꞌang Diyus maski nagnegan nira i ipiyagꞌaat ya? Daꞌga baꞌ kapuꞌsaan it mga taw ngayang nakalꞌid duꞌut Egipto kat pagpanguꞌna ni Moises? ¹⁷Ta siyu gasiꞌ i inisgan ngaytut Ampuꞌang Diyus it seledan it epat nga pulung taꞌun? Daꞌga baꞌ iyan namagbuwat it kasalaꞌan aypaꞌ simnari sirat patay duꞌun it rugar nga kapupuyangtan? ¹⁸Baw ta, siyu gasiꞌ i pagpaꞌiguꞌan ya it isiyumpa ya ngaytu nga magꞌaat, “Talagang daꞌsira makapapaꞌna kat pudir ku duꞌun it rugar ngayti nga isiyanggup kut kanira”? Daꞌga sira ngayti nga ega namagsunud it mga ampang ya i pagpaꞌiguꞌan? ¹⁹Aypaꞌ kayti magkaꞌrutan tami na nga daꞌsira nakasled duꞌun it rugar ngayti nga isiyanggup it kanira sabap it lamwat sirang ega magpamayaꞌ it Ampuꞌang Diyus.

Sana daꞌta makasbung it mga taw it tagnaꞌ nga ega nakapapaꞌna kat pudir it Ampuꞌang Diyus

¹Takaꞌ maski atkayan, magsisigi paytu i ipiyagsanggup ngaytut Ampuꞌang Diyus nga, kitang mga taw, makaꞌuyut nga makapapaꞌna kat pudir ya. Temed kaꞌilangan nga magꞌintur tami isaꞌun egay maski siyu it aten nga makbesan it isiyanggup ya ngaytu. ²Sabap kita, kaꞌlay ngaytu, pagtulduꞌan tami it Magayeng Baritaꞌ nga garing duꞌut Ampuꞌang Diyus, subung nagat mga taw ngaytit tagnaꞌ. Temed sira, egay napulus nira it mga ipiyaꞌrut it kanira ka ega talaga piyamayaꞌ nira. ³Ka kita lamang nga magsarig baw magpamayaꞌ it Ampuꞌang Diyus i makaꞌuyut nga makapapaꞌna kat pudir ya. Ka pisiꞌen ta na lamang duꞌun it inampang ya ngayti nga magꞌaat,

“Kat kadakulat iseg kut kanira isiyumpa ku nga talagang daꞌsira makapapaꞌna kat pudir ku duꞌun it rugar ngayti nga isiyanggup kut kanira.”4:3 Awit 95:11.

Sayang ka, garing it pagguna it Ampuꞌang Diyus it banwa, magpapaꞌna kanya nga magꞌelat it mabagiꞌan ya i katataawan it kagayenan duꞌun it kapaꞌnaan ya ngayti. ⁴Sabap magbebtang gasiꞌ duꞌun it sang bagiꞌ nga kasuratan it tagnaꞌ i pasar it ikapitung aldaw. Ka maat, kat ikapitung aldaw, nagpapaꞌna i Ampuꞌang Diyus kat muꞌsang mga paggunaen ya ka nakumplitu ya nay muꞌsa.4:4 Genesis 2:2. ⁵Kapaꞌnaan ngaytu, naꞌiguꞌ siꞌ it iti nga ipiyasurat ya nga magꞌaat, “daꞌsira makapapaꞌna kat pudir ku duꞌun it rugar ngayti nga isiyanggup kut kanira.”4:5 Awit 95:11.

⁶Aypaꞌ maꞌyag nga iyan mga uꞌnang nakagneg it Magayen ngaytung Baritaꞌ pasar it kapaꞌnaan kat pudir it Ampuꞌang Diyus, ega nakaꞌuyut sira sabap it kasutil nira. Temed maski atkayan, ireg it Ampuꞌang Diyus nga may makaꞌuyut it kapaꞌnaan nga ipagꞌareg ya kat katataawan. ⁷Aypaꞌ, kat timpu it adiꞌ nga si David, maski nagtaꞌlib nay naꞌlay na nga timpu garing it timpu it mga taw ngayting ega nakaꞌuyut, ipiyaꞌrut it Ampuꞌang Diyus nga may timpu paꞌ kat timpu ngayti ni David nga kaꞌuyut i taw it kapaꞌnaan ya. Kamatuudan, siyangpit ni David i ampang “kayti” kat ampang nga ipiyasurat it Ampuꞌang Diyus it kanya nga magꞌaat,

“Kayti, basta nagnegan mi i ipagꞌaat it Ampuꞌang Diyus, ega sana padsenen mi i ulu mi.”4:7 Awit 95:7-8. Puntuꞌ it ampang ngaytu ni David, in ega padsenen nira i ulu nira, kaꞌuyut sira nga kapapaꞌna kat pudir it Ampuꞌang Diyus. Ituytu i pagpaꞌiguꞌan it tagsurat it Hebreo ngaytu nga maski kayti, atkayan naga.

⁸Itu, kapaꞌnaan ngaytu kat pudir it Ampuꞌang Diyus, ega lamang tu kapaꞌnaan duꞌun it rugar ngayti nga tiyabanan ni Josue it mga Israelita. Ka in beteꞌ iti na lamang nga rugar i pagpaꞌiguꞌan simpri, it nagtaꞌlib nay naꞌlay na nga timpu, unuka sumangpit paꞌ it timpu nga makaꞌuyut i mga taw? ⁹Ta, kat mga bagay ngaytu, sana nasiguru ta nga may kapaꞌnaan paꞌ kat pagdadarapaꞌen, nga subung it kapaꞌnaan it Ampuꞌang Diyus kat ikapitu ngayting aldaw, pagkaguna yat muꞌsa. Itung kapaꞌnaan, pagꞌargan kaytu, mga taawan it Ampuꞌang Diyus, kumpur mga magpamayaꞌ baw magsarig it kanya. ¹⁰In siyu-siyuy nakaꞌuyut na kat itung kapaꞌnaan, magpaꞌna na kat sadili ya nga buwat, subung nagat Ampuꞌang Diyus nga, pagkaguna yat muꞌsa, nagpapaꞌna na. ¹¹Aypaꞌ paꞌres tami nga makaꞌuyut it kapaꞌnaan ngaytu, isaꞌun daꞌtami makasbung it beken ngayting mga Israelita nga nariga-riga lamang sabap it ega namagsunud it mga inaat it Ampuꞌang Diyus.

¹²Sabap, iyan ampang it Ampuꞌang Diyus, ega lulugud-lugudun. Dakulay magkabwat ya. Kaꞌaat ka egen talaga baw matarem. Kabilangan ya, subraꞌ pang matarem it basiꞌ nga limbak tarem. Pagtaꞌseben ya i pati nakem baw pikiran it taw. Aypaꞌ maski unu nga pagꞌantapen u pagkubwaten it taw, pagkutkutun nga banar it ampang ya ngaytu. ¹³Talagang egay magkataguꞌ duꞌun it Ampuꞌang Diyus. Muꞌsang bagay, maꞌyag kat panleteg ya, baw kanya i panubagan tami nga muꞌsa kat muꞌsang mga binwatan ta.

Si Jesus ngaytu, Piyakamataꞌas nga Sasirduti nga egay kasbung

¹⁴Iyan talaga i magayen, subrang ipapaꞌgen tami i pagpakimatuud baw pamayaꞌ tami it ki Jesus. Ka kanya i Anak it Ampuꞌang Diyus baw nagbaraꞌ kanya nga Ega Basta-bastang Piyakamataꞌas nga Sasirduti tami duꞌut langit, nga magpanindeg nga pirmi it aten duꞌun it adapan it Ampuꞌang Diyus. ¹⁵Itu, Ega ngaytu Basta-basta nga Sasirduti tami, magkasanguꞌan ya kitang banar kat mga kalubayan ta nga magtaban it aten duꞌut kasalaꞌan, sabap kanya, naglabay nagat muꞌsang mga sukdan nga magꞌabut it aten nga taw. Temed kanya, ega nagkasalaꞌan. ¹⁶Aypaꞌ kayti, magayen daꞌtami na paꞌinte-intereꞌ, madap nga lagi duꞌun it Ampuꞌang Diyus, ka maski mataꞌas kanya nga magbebegbeg it muꞌsa, maꞌildaw kanya nga banar. Baw masiguru tami nga kat timpu nga kaꞌilangan tami i tabang ya, ibgay yat aten i ildaw ya ngaytu nga pagꞌangutun tami kat panalangin.

¹Situt aten nga mga Judio, kada piliꞌen i Piyakamataꞌas nga Sasirduti tami, kat mga taw naga i pamiliꞌan it kanya. Baw ipagrumra it kanya nga pagpanindegan ya i mga taw kat mga bagay nga ipiyabetang-betang it Ampuꞌang Diyus, mga bagay nga ipagsamba nga pasalamat duꞌun it kanya baw ipagꞌangut it kapasinsiyaan it kasalaꞌan. ²Ta, paribasay kanya, taw lamang gasiꞌ nga pirming pagdaꞌgen it mga kasalaꞌan nga kubwaten ya, madaliꞌ ya magkasanguꞌan i mga magkasalaꞌan baw magkateꞌag-teꞌag ka egay uru-urut nirat magayen baw daꞌga. ³Baw paribasay magkasalaꞌan kanya gasiꞌ, dapat kanya nga magbuwat it panalisi nga ipagꞌangut it kapasinsiyaan it sadili yang mga kasalaꞌan, atnaga i kasalaꞌan it mga taw. ⁴Itu, ega basta-basta ngaytung katengdanan nga Piyakamataꞌas nga Sasirduti, ega maat mapakay nga matanggap it maski siyu kat sadili ya lamang nga kaꞌirgan. Sabap Ampuꞌang Diyus tu i magpiliꞌ it kanya, subung naga it ki Aaron it tagnaꞌ.

⁵Ta atkayan naga, ega maat si Cristo i nagpataꞌas it sadili ya kat katengdanan ya nga Piyakamataꞌas nga Sasirduti, in daꞌga Ampuꞌang Diyus naga i giyaringan kaytu. Ka maat i inampang ya duꞌun it kanya nga ipiyasurat yat tagnaꞌ,

“Kayti, ipagpatandaꞌ ku nga Anak kuytu ikaw. Akuy Amaꞌ mu.”5:5 Awit 2:7.

⁶Baw maat pay beken nga inaat ya duꞌun it beken nga bagiꞌ it kasuratan,

“Ikaw, magsasirduti ka it egay katupusan, nga subung it mataꞌas nga pagkasasirduti ni Melquisedec.”5:6 Awit 110:4.

⁷Si Jesus ngaytu, iyan situ paꞌ kanya ngayan it banwa, magpanggagaꞌuy kanya talaga nga uyut i luwaꞌ kat mga panalangin ya duꞌun it Ampuꞌang Diyus. Ka Ampuꞌang Diyus lamang i makaribri it kanya duꞌun it kamataynen. Baw talagang tiyubag i mga panalangin ya sabap nagpalulus kanya nga banar kat kaꞌirgan it Ampuꞌang Diyus. ⁸Maski na maat, kanya, Anak it Ampuꞌang Diyus, temed kat mga kakuriꞌan nga siyagkaꞌ ya, natantuwan ya nga banar in unu talaga i kaꞌulugan it kamatuudan nga pagsunud it muꞌsang kaꞌirgan it Amaꞌ ya. ⁹Ta paribasay nasunud ya i muꞌsa it egay kakurangan, nagbaraꞌ na kanya nga piyanggaringan it karibriyan nga kaꞌgenang egay kaskedan, nga ibgay yat muꞌsa nga may kamatuudan nga pagsunud it kanya. ¹⁰Sabap ipiyatindeg kanya it Ampuꞌang Diyus it katengdanan nga Piyakamataꞌas nga Sasirduti, nga subung it mataꞌas nga pagkasasirduti ni Melquisedec.

Kaꞌilangan, iyan namayaꞌ na, ega mangindiꞌ it Ampuꞌang Diyus

¹¹Dakel tuy masugid ku pasar it pagkasasirduti ni Jesus baw ni Melquisedec temed ta, makuriꞌ na nga ipaꞌyag it imyu ka subuk diminsen nay ulu mi. ¹²Ka sana kayti, it naꞌlay na nga magpamayaꞌ kamu, mga manigtulduꞌ kamu na it panulduꞌ nga garing duꞌut Ampuꞌang Diyus. Temed ta, it seked kayti kaꞌilangan paꞌ nga tulduꞌan kamu it mga uꞌna-uꞌnang ipagpangadal nga ampang ya. Sana yanay bagay it imyu, madsen na nga pangaꞌen, temed ta, it seked kayti, gatas paꞌ i kaya mi nga kaꞌnen. ¹³Iyan taw nga subung pat waꞌwaꞌ, ka yapay pangaꞌgenan ya gatas, ega pay uru-urut ya it buwat nga magayen baw maraꞌe-raꞌet. ¹⁴Temed iyan madsen ngaytu nga pangaꞌen, nga ireg sugiden, mga ararem nga ipagpangadal, kat mga atur nay pikir. Itung mga taw, talagang ubas na kat pagpiliꞌ it buwat nga magayen, baw pagkilala baw pandaꞌga it buwat nga maraꞌe-raꞌet.

¹Aypaꞌ ega na mga uꞌna-uꞌna ngayti nga ipagpangadal pasar it ki Cristo i tegelan tat madal in daꞌga iyan na nga megay it dakulaꞌ nga kasepsep. Ega madungagan i kasepsep mi in mga uꞌna-uꞌna ngayting ipagpangadal lamang i pirmi nga pagsaꞌu-saꞌupun. Ka sana maꞌyag nat imyu i pangadal nga ega maꞌaten i karibriyan kat pagsarig tat mga magagayeng pagbuwaten tami, in daꞌga kat pagsarig baw pamayaꞌ ta lamang it Ampuꞌang Diyus. ²Maꞌyag gasiꞌ siguru it imyu i pangadal pasar it pagbawtis baw beken nga ipagkalimpiyuꞌ kat panleteg it Ampuꞌang Diyus, baw pangadal pasar it panapal,6:2 Tagnaꞌ, adat it mga Judio, pagtapalen niray ulu it ramu-ramu nga ipagpanalisi nira, ka ipagpatindak na duꞌun i mga kasalaꞌan nira (Levitico 1:4). Esa gasiꞌ, in magpatindeg sira it esang taw kat katengdanan ya, pagtapalen gasiꞌ (Mga Bilang 27:18, Deuteronomio 34:9). Baw kat timpu it mga apustul, pagtapalen i taw in pagpagayenen i sarut, u in ipagꞌintergaꞌ duꞌut Ampuꞌan kat buwaten ya. pasar it pagꞌegen it paꞌuliꞌ it mga miyatay na, baw pasar it pangukuman nga panrigang egay kaskedan. ³Sana, in palugtan kamu it Ampuꞌang Diyus, padakulaꞌen ku nay kasepsep mi kat pangadal it beken paꞌ nga mga bagay.

⁴Naꞌaat ku, “in palugtan kamu,” sabap urut it Ampuꞌang Diyus in siyu may siyuy ega na magpaneꞌteꞌ it kanya. Ta magꞌuꞌunu paꞌ mapasinguliꞌ baw mapapaꞌuliꞌ it sumaꞌup duꞌun it Ampuꞌang Diyus i iyan nga namagpangindiꞌ na? Ka tagnaꞌ, naꞌyagan na sira pasar it matuud nga dalan, nakalabay na sira it ega basta-bastang ildaw nga garing duꞌut langit, baw kaꞌuyutan na gasiꞌ sira it piyasaruman it Espiritu Santo. ⁵Talagang natantuwan nira i kagayen it muꞌsang inampang it Ampuꞌang Diyus, baw nalabayan nira gasiꞌ i guna ya nga ipalteg ya kat timpu nga magꞌaꞌabut. ⁶Ta, bawnga nangindiꞌ sira, lamang nalabayan nira nay mga muꞌsa ngaytu. In atkayan talagang ega nayan mapakay nga pasinguliꞌen sira it sumaꞌup baw papaꞌuliꞌen, sabap subuk binwat nira siꞌ nga ipiyagransang duꞌut krus it sadili nirang alima i Anak it Ampuꞌang Diyus, baw ipiyagyagyag i kaꞌeꞌyaꞌan ya.

⁷Kaꞌalimbawaan ya kaytu, lugtaꞌ. In pirmi nga pagtedagen it uran baw magpanggayen i muꞌsang ipagluwak, sagyaan it tagpuꞌun ka dakulay pakinabang. Ta siyu-siyu i subuk lugtaꞌ ngaytu, sagyaan baw ildawan it Ampuꞌang Diyus. ⁸Temed ta, in beteꞌ purus ilamunun baw mga luwak nga madugi i magtubuꞌ duꞌun, ka ega inasikasu i ipiyagluwak, simpri panumpaan nat tagpuꞌun baw suriban ya na ka egay kapulusan. Atkayan gasiꞌ, sumpaan baw rigaen it Ampuꞌang Diyus i muꞌsang taw nga magpasbung it lugtaꞌ ngaytu.

⁹Mga pagmaꞌalen ku nga kasulsugan, maski na maat magkaꞌampang kuy atkaytu takaꞌ pagsisiguruun ku nga ega atkayan i mabetangan mit imyu in daꞌga yay tanggapen mi, mga piyakamagayeng bagay nga itumbas yat muꞌsa nga iribri ya. ¹⁰Ka talagang mataldeng i Ampuꞌang Diyus. Ega lipaten ya i mga binwatan mi baw pagmaꞌal mit kanya nga ipiyalteg mi, baw seked kayti ipagpalteg mi paꞌ, kat pagsirbi mit mga kasubung mi nga magpamayaꞌ it ki Jesus. ¹¹Temed yay kaꞌirgan ku nga kada esat imyu i magpaꞌres it atkaytu nga pagbuwaten seked it pamaꞌuliꞌ situ it Ampuꞌan, isaꞌun subraꞌ nga mapaꞌgen i kasiguruwan mi it muꞌsa nga pagꞌiꞌinawaren tami nga mga magpamayaꞌ it kanya. ¹²Aypaꞌ magayen, ega garusan mi i pamayaꞌ mi. Iyan i guruun mi, mga taw nga ega magkaskedan kat pagsarig baw pamayaꞌ nirat Ampuꞌang Diyus, ka iyan i siguradu nga ikatanggap it mga isiyanggup ya.

Basta Ampuꞌang Diyus i simnanggup, ega basta-basta

¹³Demdemen mi i sanggup it Ampuꞌang Diyus duꞌun it ki Abraham. Kat iting sanggup simnumpa paꞌ kanya kat sadili yang ngaran. Ka siyu na lamang paꞌ i sangpiten ya nga mataꞌas nga kasubrat kanya, in daꞌga ega na? ¹⁴Maat i isiyanggup ya, “Siguradu i ipagsanggup ku nga ildawan ku ikaw nga banar baw padaklen ku nga padaklen i mga tungtung-inapuꞌ mu.”6:14 Genesis 22:16-17. ¹⁵Talagang ega naꞌyawan si Abraham it elat. Piyaꞌbut yang banar seked it nagꞌabut i isiyanggup ngaytit kanya.6:15 Pagpatay ni Abraham ega paꞌ dakel i mga tungtung-inapuꞌ ya temed, kat guna it Ampuꞌang Diyus, may anak ya naga baw apuꞌ na nga duwa. Aypaꞌ, parabir kanya natay, nagpapuꞌun nat abut i isiyanggup ngaytit kanya. ¹⁶Mga taw, in pagpapaꞌgenen nira i mga pagꞌampangen, magsumpa sira kat ngaran it iyan nga mataꞌas paꞌ it kanira, baw ta, sabap it nanumpa na, duꞌun na i kaꞌbusan it sugi-sugid. ¹⁷Ta atkayan naga, iyan simnanggup i Ampuꞌang Diyus it ki Abraham, piyapaꞌgen ya it sumpa. Binwat yay atkaytu ka ireg ya, matantuwan nga banar it mga tumanggap it ipagsanggup ya nga ega magbaꞌgu-baꞌgu i kanyang mga inampang. ¹⁸Basta simnanggup i Ampuꞌang Diyus baw nanumpa paꞌ kanya, talagang siguradu i pagtuman ka ega mapakay nga mambut kanya. Aypaꞌ piyasagya nang banar i nakem tami, kita nga nagpaꞌimbeng duꞌut kanya, isaꞌun inawaren tat nakaꞌunay nga inawar i kagayenang isiyanggup ya. ¹⁹Kabilangan it pagꞌinawar ta ngaytu nga nakaꞌunay, subuk mapaꞌgen nga pamundu it kiyarurwa ta, isaꞌun ega maꞌilang. Ka egay beken nga pagpupunduwan in daꞌga duꞌun it adapan it Ampuꞌang Diyus, nga kabilangan ya duꞌun it Subraꞌ Na nga Ega Na Babasta-bastaeng Seled it Templo, duꞌut sang bali it maglilingeb nga kurtinaꞌ. ²⁰Miyuꞌna it aten duꞌun si Jesus baw kayti magpanindeg it aten duꞌut adapan ngayti it Ampuꞌang Diyus. Ka, si Jesus ngaytu, kanya na i ipiyatindeg nga Piyakamataꞌas nga Sasirduti it egay katupusan nga subuk mataꞌas nga pagkasasirduti ni Melquisedec.

Kataꞌasan it sasirduti nga si Melquisedec

¹Ka ituꞌun, si Melquisedec ngaytu, adiꞌ tu duꞌun it Salem it timpu paꞌ ni Abraham, baw sasirduti paꞌ it Ampuꞌang Diyus nga Subrang Piyakamataꞌas. Kanya na ngaytu i simnusmu it kana Abraham nga mamagꞌuliꞌ na i garing miyusig it mga adiꞌ nga nanrumpak. Pagkasusmu yat ki Abraham miyampang kanyat ampang nga paꞌildaw isaꞌun ildawan si Abraham ngayti it Ampuꞌang Diyus. ²Bawnga binwat ni Abraham, ibinggay yat ki Melquisedec ngayti i ikasang puluꞌ nga bagiꞌ it kumpur narangpas ya duꞌut piyakibunuꞌan ya ngayti nga mga adiꞌ nga inusig nira. (Ta ngaran ngaytu nga Melquisedec, may kaꞌulugan ya. Ireg nga sugiden “adiꞌ nga magbegay it kataldengan.” Baw ngaran ngaytung Salem, ireg nga sugiden “kaꞌimbengan.” Aypaꞌ, paribasay adiꞌ si Melquisedec duꞌut Salem, kaꞌulugan ya, “adiꞌ nga magbegay it kaꞌimbengan.”) ³Egay magkasangpit nga pasar it inaꞌ baw amaꞌ ni Melquisedec ngaytu u kaduguꞌan nga piyanggaring-garingan ya. Ega gasiꞌ nakasurat i pasar it pagpanganak it kanya u kamataynen ya. Kabilangan ya, subung it Anak it Ampuꞌang Diyus ka subuk egay katupusan it pagkasasirduti ya.

⁴Ta kayti, pakapikiren mi in sang unu kabantug kanya, nga lamang si Abraham, piyakamabantug nga piyanggaring-garingan tami temed ibinggay yat ki Melquisedec ngayti i ikasang puluꞌ nga bagiꞌ it mga magayeng bagay nga narangpas ya duꞌun it mga adiꞌ ngayti nga piyakibunuꞌan ya. ⁵Garing it timpu ni Moises, iyan mga tungtung-inapuꞌ ni Levi, nga siray pagpamiliꞌan it mga magsasirduti, piyalugtan it mga urdin it Ampuꞌang Diyus nga tumanggap it ikasang puluꞌ nga bagiꞌ it mga piyakarigaan it mga Israelita. Pagbuwaten niray atkayan maski mga kabilug nira i mga Israelita ngayti, ka esa-esay puꞌun nira nga si Abraham. ⁶Ta, si Melquisedec ngaytu, ega uyut duꞌut mga tungtung-inapuꞌ ngaytu ni Levi, temed binggayan kanya it ikasang puluꞌ nga bagiꞌ nga garing duꞌun it ki Abraham. Bawnga piyatdekan ya paꞌ it ampang nga paꞌildaw si Abraham ngaytu, kanya nga siyanggupan it Ampuꞌang Diyus. ⁷Talagang urut tang muꞌsa nga iyan magpatdek it ampang nga paꞌildaw, subrang mataꞌas kanya it taw nga pagpatdekan ya. ⁸Waytu paytu, iyan mga tungtung-inapuꞌ ni Levi nga magpisiꞌ it ikasang puluꞌ nga bagiꞌ duꞌut mga Israelita, may kamataynen nirat kanira. Temed si Melquisedec ngaytu nga timnanggap it ikasang puluꞌ nga bagiꞌ garing duꞌut ki Abraham, subuk egen kanyat egay kaskedan ka ega nakasurat duꞌut kasuratan i pasar it kamataynen ya. ⁹Aypaꞌ maꞌaat ta nga maski si Levi ngayti, nga kanyay puꞌun it mga magtanggap it ikasang puluꞌ nga bagiꞌ duꞌut mga Israelita, kat alima ni Abraham subuk nagbegay gasiꞌ it ikasang puluꞌ nga bagiꞌ duꞌun it ki Melquisedec. ¹⁰Sabap maski ega paꞌ ipiyanganak si Levi ngaytu it pagsusmu ngayti ni Melquisedec it ki Abraham, temed apuꞌ-tuꞌud ni Levi si Abraham ngayti.

¹¹Iyan ibinggay it Ampuꞌang Diyus i mga urdin ya duꞌut mga Israelita, si Aaron baw beken nga mga tungtung-inapuꞌ ni Levi i riyumraan ya nga tumaban it mga taw kat mga pagbuwateng ipagꞌangut it kapasinsiyaan it kasalaꞌan. Temed, kat pagkasasirduti nira ngayti, egaytu ikaꞌawaꞌ it kasalaꞌan it mga taw. Ka in beteꞌ magkaꞌawaꞌ talaga i kasalaꞌan it mga taw kat pagkasasirduti na Aaron simpri ega na kaꞌilangan nga patindeg it beken paꞌ nga sasirduti nga pagkasasirduti ya, subung it ki Melquisedec, nga belag it pagkasasirduti ni Aaron. ¹²Ta, in biyaꞌgu i pagkasasirduti, simpri ega mapakay nga ega biyaꞌgu gasiꞌ i mga urdin pasar it pagkasasirduti ngaytu. ^13-14Kamatuudan, iyan Ampuꞌan tami nga si Jesus nga pagpaꞌiguꞌan ku ngaytu, egaytu kat kuyunang mga tungtung-inapuꞌ ni Levi nga yay pagpamiliꞌan it mga magsasirduti it tagnaꞌ. Urut tami nga muꞌsa nga si Jesus, kat kuyunang mga tungtung-inapuꞌ ni Juda. Itu nga kuyunan, ega siyangpit ni Moises iyan ipiyaꞌyag ya in siyu i mapakay nga buwateng sasirduti. Ega talagay maski esa nga nagsasirduti kat kuyunang mga tungtung-inapuꞌ ni Juda.

Pagkasasirduti ni Jesus, bagay it aten nga mga kaꞌilangan, subung nagat pagkasasirduti ni Melquisedec

¹⁵Pagbaꞌgu ngaytut Ampuꞌang Diyus it dalan it kataldengan kat panleteg ya, minyag nang banar iyan timnindeg nay beken nga sasirduti nga subung it ki Melquisedec na ngaytu. ¹⁶Itu nga sasirduti, ega maat nagbaraꞌ kanya nga sasirduti sabap lamang natuman yay magbebtang duꞌut urdin tami nga mga Judio pasar it in unu nga duguꞌ it taw i mapakay nga buwateng sasirduti. Ega atkayan in daꞌga nagbaraꞌ si Jesus nga sasirduti kat keseg it ginawa ya nga egay kabugtuꞌan, ka nandaꞌeg it kamataynen. ¹⁷Sabap ituy ipagpamatuud it kasuratan pasar it kanya,

“Ikaw, magsasirduti ka it egay katupusan nga subung it mataꞌas nga pagkasasirduti ni Melquisedec.”7:17 Awit 110:4.

¹⁸Ta daꞌga, in atkayan, maꞌyag na nga nagantiyan nay tagnaꞌ ngayting dalan nga ipagꞌaat it mga urdin ka egay keseg ya u pakinabang nga mawaꞌ it kasalaꞌan it taw? ¹⁹Sabap egay napataldeng kat panleteg it Ampuꞌang Diyus it itung dalan. Temed, sabap it baꞌgu ngaytu nga dalan nga binwat ya, ega na basta-basta i pagꞌiꞌinawaren tami ka magkapatpad tami na duꞌun it Ampuꞌang Diyus it ega nay kakasalaꞌan kat panleteg ya.

²⁰Waytu paꞌ i puriba nga subrang magayen i baꞌgu ngaytung dalan. Ka iyan binwat si Jesus nga sasirduti, simnumpa pay Ampuꞌang Diyus nga nagpatindeg it kanya. Ega simnumpa kanya iyan ipiyatindeg i beken nga mga sasirduti it tagnaꞌ. ²¹Temed pagpatindeg it ki Jesus maat pay Ampuꞌang Diyus it kanya,

“Aku nga Ampuꞌang Diyus kayti i magsumpa baw ega magꞌugad-ugad i pikir ku. Ikaw, magsasirduti ka it egay katupusan.”7:21 Awit 110:4.

²²Aypaꞌ, sabap it keseg it sumpa ngaytu, si Jesus talaga i kasiguruwan ta it subraꞌ nang magayen nga pakiꞌupakat it Ampuꞌang Diyus it aten.

²³Itu pay masugid ta, tagnaꞌ ngayti dakel na nga mga sasirduti nga nagsubli-subliyen. Sabap it kamataynen, iyan i ega ipagkasigi it pangatengdanan nira. ²⁴Temed, si Jesus ngaytu, egen tu it egay kaskedan, aypaꞌ ega naytu magantiyan u masubliyan i pagkasasirduti ya ngaytu it seked it kaꞌnu-kaꞌnu. ²⁵Aypaꞌ, sabap it muꞌsa ngaytu, kayang-kaya ya nga iribri it kaꞌustuꞌang karibriyan i muꞌsa nga, kat keseg it pamayaꞌ nirat binwat ya, magpasakep duꞌut Ampuꞌang Diyus. Magkapanindegan ya sirang pirmi ka egen kanya it egay kaskedan.

²⁶Kanya i Piyakamataꞌas nga Sasirduti nga bagay talaga it aten nga kaꞌilangan. Ka alaid nga pirmi i nakem ya kat muꞌsang kasalaꞌan. Ega talagay karaꞌe-raꞌetan nga magpangbit kat nakem ya, baw egay maski unu nga magkaꞌiway it kanya. Dakulay piyagbelagan it kanya baw aten nga makasalaꞌan baw kayti, binggayan na kanyat Ampuꞌang Diyus it piyakamataꞌas nga pudir duꞌun it langit. ²⁷Talagang ega subung kanya it beken ngaytu nga magkataꞌwag naga nga Piyakamataꞌas nga Sasirduti it tagnaꞌ. Ka sira, aldaw-aldaw magbuwat sirat panalisi nga ipagꞌangut it kapasinsiyaan it kasalaꞌan, uꞌna daꞌan i sadili nirang kasalaꞌan bawnga kasalaꞌan gasiꞌ it beken nga taw. Temed, si Jesus ngaytu, kaꞌsa lamang binwat yay sadili ya nga bilang salisi nga ipagꞌangut it kapasinsiyaan it kasalaꞌan it taw. Ega na kaꞌilangan nga saꞌupun u dungagan paꞌ. ²⁸Kat mga urdin ni Moises, kat mga taw i pamiliꞌan it kada Piyakamataꞌas nga Sasirduti, maski makasalaꞌan sira ka taw naga. Temed pagtaꞌlib it naꞌlay nga timpu garing it pagbegay it mga urdin duꞌut ki Moises, simnumpa i Ampuꞌang Diyus, nga Anak ya nga si Jesus i riyumraan ya nga Piyakamataꞌas nga Sasirduti. Ka nasunud ni Jesus it egay kakurangan i muꞌsang ipiyabetang-betang it Ampuꞌang Diyus kat ikaribri it taw. Aypaꞌ kanya i Piyakamataꞌas nga Sasirduti nga magpanindeg it aten it kaꞌustuꞌan it egay kaskedan.

Ega basta-bastang Piyakamataꞌas nga Sasirduti si Jesus, ka kanyay pagpaꞌulugan it baꞌgung pakiꞌupakat

¹Itu bay kaꞌulugan it pagsugiden ku ngaytu, talagang kumplitu kat muꞌsa i Piyakamataꞌas nga Sasirduti nga magpanindeg it aten. Binggayan na kanyat ega basta-bastang pudir duꞌut langit, nga magꞌaꞌdung na kanya duꞌun it iwanang ayun it Ampuꞌang Diyus nga Piyakamataꞌas nga Adiꞌ. ²Magbuwat kanyat buwat it Piyakamataꞌas nga Sasirduti duꞌun it matuud nga papagsambaan nga duꞌut langit, nga ega taw lamang i nagbuwat in daꞌga talagang Ampuꞌang Diyus.

³Talagang, katengdanan it kada Piyakamataꞌas nga Sasirduti, magbuwat it ipagpasalamat baw panalisi nga ipagꞌangut it kapasinsiyaan it kasalaꞌan. Aypaꞌ ka, itu ngaytung Piyakamataꞌas nga Sasirduti tami, ega mapakay nga egay kanya gasiꞌ nga buwaten nga ipagꞌangut it kapasinsiyaan. ⁴In situt banwa lamang, ega mapakay kanya nga magsasirduti sabap, kanya, ega kat kuyunang mga tungtung-inapuꞌ ni Levi, nga sira lamang i mapakay nga muwat it mga bagay ngayti nga ipagsamba nga ipiyagꞌaat it mga urdin ni Moises. ⁵Temed, pagsirbi nira ngaytu, bilang ladawan lamang it duꞌun it langit. Sabap iyan ipagkupatindeg na ni Moises i magkapuru-purun nga papagsambaan, maseked-seked talaga nga inaat it Ampuꞌang Diyus it kanya nga kaꞌilangan ibayaꞌ nga banar it pabetang-betang nga ipiyalteg it kanya duꞌun it Bukid it Sinai.8:5 Exodo 25:40. ⁶Temed iyan pagsirbi ngaytu nga ipiyaskel it ki Jesus, talagang subraꞌ pang magayen it pagsirbi ngaytit mga sasirduti situt banwa. Sabap kanya i nagpapaꞌgen it subraꞌ nga magayen nga pakiꞌupakat it Ampuꞌang Diyus kat katataawan. Ka ungaytu, mga isiyanggup it Ampuꞌang Diyus kat baꞌgu ngaytung pakiꞌupakat, subraꞌ pang magayen it mga isiyanggup kat tagnaꞌ ngayti.

⁷Ka in beteꞌ egay kurang kat tagnaꞌ ngayti nga pakiꞌupakat, ta unuka kaꞌilangan pay baꞌgu ngaytu? ⁸Temed yay kurang, pagsunud it mga taw it mga urdin kat tagnaꞌ ngayting pakiꞌupakat. Dakulay naꞌiway it Ampuꞌang Diyus duꞌut kanira, aypaꞌ ka magsusurat i inaat ya nga magꞌaat,

“Mabut i aldaw nga pakiꞌupakat aku siꞌ it baꞌgu nga pakiꞌupakat kat mga Israelita ngaytu, baw kat mga tungtung-inapuꞌ ngaytu ni Juda.8:8 Pagpatay it adiꞌ nga si Solomon nabagiꞌ i mga Israelita, ka nagraraꞌet sira. Juda i ipiyangaran nirat sang bagiꞌ, nga siray mga tungtung-inapuꞌ it duwa ngayang anak ni Jacob, nga si Juda baw si Benjamin. Iyan mga tungtung-inapuꞌ it sang puluꞌ ngayting anak nga beken ni Jacob, piyangaranan nirat Israel (1 Mga Adiꞌ 12:1-24). Aypaꞌ, magꞌaat i ituꞌun situt kapitulu 8:8 ngaytu nga, sabap it baꞌgu ngaytung pakiꞌupakat it Ampuꞌang Diyus duꞌut kanira, mapakay na nga magkagayen sira sing muꞌsa duꞌun it kanya.

⁹Nga itu ngaytu nga pakiꞌupakat, ega na subung it pakiꞌupakat ku ngayti it mga kagiyaringanan nira, iyan ipiyaliꞌwan ku na sira kat pagkaꞌuripen nira duꞌun it Egipto.

Ka lamang atkayan, ega inintindi nira i pakiꞌupakat ku ngayti. Aypaꞌ ka piyabaya-bayaꞌan ku na sira.

¹⁰Ituꞌun siꞌ i ipakiꞌupakat ku it mga Israelita kat pagdadarapaꞌen.

Mga urdin ku, idawaꞌ ku na kat ulu nira baw ipatdek ku nang banar kat nakem nira.

Sakpen ku sira it ega basta-bastang pagsakep it kamatuudang Ampuꞌan, baw ipabetang ku sira nga mga taawan ku nga pagꞌarigraen ku nang banar.

¹¹Ega na maat kaꞌilangan paꞌ nga itulduꞌ it maski siyu it mga kabanwa ya, u iꞌaat ya pat mga sulsug ya nga magꞌaat, ‘Kaꞌilangan nga kilalaen mu i Ampuꞌang Diyus.’

Sabap aku, makilalaan nira na nga muꞌsa, ega nay piniliꞌan, mataꞌas nga duguꞌ baw raꞌyat.

¹²Sabap ipasinsiya ku nat kanira i karaꞌe-raꞌetan nira baw talagang lipaten ku na i mga kasalaꞌan nira.”8:8-12 Jeremias 31:31-34.

¹³Ta, it ipiyatindeg nat Ampuꞌang Diyus i pakiꞌupakat ngaytu nga baꞌgu, daꞌga baꞌ ireg sugiden, ipagpabetang ya na nga ega nay magkaꞌargan it uꞌna ngayting pakiꞌupakat? Ta daꞌga maski unu nga bagay nga ega nay magkaꞌargan ka maglagi-lagi na, ega maꞌlay maꞌawaꞌ na?

Uꞌnang pakiꞌupakat, ega iti i mapisiꞌan it taw it kapasinsiyaan it kasalaꞌan

¹Ta kat tagnaꞌ ngayting pakiꞌupakat may mga urdin naga nga pagsunudun it mga taw kat pagsamba nira, baw may balay nga yay papagsambaan nira situt banwa. ²Papagsambaan ngayti, balay nga magkapuru-purun baw dinwang bagiꞌ i seled ya. Iyan sang kaseledan, tiyaꞌwag nga Ega Basta-bastang Seled. Duꞌun kaytit iting seled i titidawan, lamisaan, baw tinapay nga ipagpasalamat nira duꞌut Ampuꞌang Diyus. ³Iyan ikadwang seled nga duꞌun it sang balit kurtinaꞌ, pagtaꞌwagen nga Subraꞌ Na nga Ega Na Babasta-bastaeng Seled. ⁴Duꞌut iting seled i papangantengan it kamangyan baw Kaban it Pakiꞌupakat, nagsubung nga pamagluulupan it bulawan. Esa nga magbebtang duꞌun it Kaban ngayti i pagbebtangan it manna. Bulawan nga binwat i pagbebtangan. Duꞌun gasiꞌ magbebtang it Kaban ngaytit Pakiꞌupakat i sungkud ni Aaron nga timnunas, baw duwa ngayting dapiꞌpis nga batu nga pagsusuratan it mga urdin it Ampuꞌang Diyus. ⁵Duꞌun it sagpaw it Kaban ngayti may duwa nga pagpangaranan it Kerubin. Iti, katandaꞌ it ega talaga basta-basta i kabantugan it Ampuꞌang Diyus. Pagꞌuꞌlungan it mga elad nira i pagpangaranan gasiꞌ it Magkaꞌangutan it Ildaw nga Kapasinsiyaan.9:2-5 Pasar it mga siyangpit ngaytu, basaen i duꞌut Exodo 26:31-33, Exodo 25:10-39, Exodo 16:33-34, Mga Bilang 17:8-10, baw Deuteronomio 10:3-5. Temed mga itu ngaytu, ega naytu ipaꞌyag ku kayti it tumubi-tubi.

⁶Ta, yan naꞌayus nay muꞌsa it atkayti duꞌun it papagsambaan nira, iyan mga sasirduti, aldaw-aldaw semled sira duꞌun it uꞌna ngayting seled nga Ega Basta-bastang Seled, ka magbuwat sirat kanirang pagbuwaten. ⁷Temed duꞌun it ikadwa ngayting seled nga subrang piyakamataꞌas, yagay magkasled, Piyakamataꞌas lamang nga Sasirduti, baw kaꞌsa lamang it sang taꞌun. Basta semled kanya, ega mapakay nga egay taban ya nga duguꞌ it ramu-ramu nga isiyalisi nga ipagꞌangut it kapasinsiyaan duꞌun it Ampuꞌang Diyus. Uꞌnay mga kasalaꞌan yat kanya, bawnga kasalaꞌan it katataawan nga ipagpabetang it kanira maski egay uru-urut nira pasar it kasalaꞌan ngayti.9:7 Kat pasepsep it beken, kasalaꞌan ni Adan duꞌut Eden i pagpaꞌiguꞌan kaytu. Ka, sabap it iting kasalaꞌan, ipagpabetang na nga nagkasalaꞌan i muꞌsang taw, lamang egay uru-urut it taw pasar it kasalaꞌan ngayti, ka ega sira mismu i nakabwat. Temed ipagpabetang nat aten nga muꞌsa ka si Adan i puꞌun it muꞌsang taw (Roma 5:12-19). ⁸Kat atkayti nga kaꞌayusan talagang maꞌyag nga ipagsugid it Espiritu Santo nga tagnaꞌ, basta sakep paꞌ sira it mga urdin it uꞌnang pakiꞌupakat, ega talaga mapakay semled i taw duꞌut adapan it Ampuꞌang Diyus. Sabap kat tagnaꞌ ngayting papagsambaan nira, ega magkasled i mga taw duꞌun it Subraꞌ Na nga Ega Na Babasta-bastaeng Seled. ⁹Iti ngayti, ladawan lamang ti. Iyan i pagpapuntuꞌan ya, kayti na ngaytu nga timpu. Ka iyan mga bagay ngayti nga pagbuwaten duꞌun nga ipagpasalamat baw ipagpanalisi nga ipagꞌangut it kapasinsiyaan, ega naga maat magkapataldeng it mga magsamba ngayti. Mabeꞌgat paꞌ kat nakem nira i binwat nirang mga kasalaꞌan. ¹⁰Sabap buwat nira ngayting atkayti, iyan lamang i pagpaꞌiguꞌan, mga bagay-bagay sabap it bilug it taw, nga subuk pangaꞌen, pagꞌimnun, baw paglimpiyuꞌ. Mga itu ngaytu nga urdin, magpapanaw tu seked it ega paꞌ ipiyatindeg it Ampuꞌang Diyus i baꞌgung pakiꞌupakat ya nga subrang magayen.

Subrang may kapulusan it baꞌgung pakiꞌupakat, sabap maꞌal nga duguꞌ ni Cristo i keseg ya

¹¹Temed ta, kayti, ipiyalampud na si Cristo, baw ipiyatindeg kanya nga Piyakamataꞌas nga Sasirduti it subraꞌ pang magayen ngaytung pakiꞌupakat. Duꞌun i pagsirbiyan yat kanya it Ega Babasta-bastaeng Papagsambaan nga egay kasbung. Itung Papagsambaan, subrang mabantug it papagsambaan nirat tagnaꞌ ka ega lamang taw i minwat baw ega situt banwa ngaytu in daꞌga duꞌun talagat langit. ¹²Si Cristo ngaytu, kaꞌsa lamang kanya siminled duꞌun it Subraꞌ Na nga Ega Na Babasta-bastaeng Seled nga duꞌut langit. Tamaꞌ na i kaꞌsa ngayti. Baw ega duguꞌ it mga kambing u uꞌuybun nga bakaꞌ i taban ya nga ipagꞌangut it egay katupusan nga kapasinsiyaan, in daꞌga talagang sadili ya nga duguꞌ, nga iti talagay ipiyagtanggung ya it kasalaꞌan tami nga mga taw isaꞌun maribri tami it egay katupusan. ¹³Tagnaꞌ, iyan duguꞌ it mga kambing baw mga tudu nga bakaꞌ baw abu it inanteng nga dumaraga paꞌ nga bakaꞌ, ipagwaswas kat mga taw nga ipagpabetang nga ega limpiyuꞌ kat panleteg it Ampuꞌang Diyus, ka ipaglimpiyuꞌ it kanira.9:13 Mga Bilang 19:1-18. Ta kat atkaytung buwat buwaten sira nga limpiyuꞌ na kat panleteg it Ampuꞌang Diyus, nga inawaꞌan na it in unuy ega ipagkasamba nira, maski kat liꞌwan lamang it bilug i paglimpiyuꞌun ngaytu. ¹⁴Ta in atkayan, subraꞌ nga may kapulusan it duguꞌ ni Cristo nga piyaturuꞌ ya! Sabap kat keseg it Espiritu Santo nga egay kamataynen ipiyagbegay ya i ginawa ya, kanya nga egay maski unu nga maꞌiway u kakurangan kat panleteg it Ampuꞌang Diyus. Duguꞌ ngaytu ni Cristo i magkalimpiyuꞌ it nakem tami kat muꞌsang karaꞌe-raꞌetan nga binwat, nga yay magtaban it taw kat kamatayneng panriga nga egay kaskedan. Aypaꞌ kayti, pagsirbiyan ta nat masagyay nakem i Ampuꞌang Diyus nga egen it egay kaskedan.

¹⁵Aypaꞌ ka, kat keseg it duguꞌ nga ipiyaturuꞌ ya, piyapaꞌgen na ni Cristo i baꞌgu ngaytung pakiꞌupakat. Kamataynen ya ngayti i ipiyagribri yat taw kat panriga it Ampuꞌang Diyus it mga kasalaꞌan nira, iyan sakep paꞌ sira it uꞌna ngayting pakiꞌupakat. Aypaꞌ kumpur piyanakman it Ampuꞌang Diyus nga pasakep it kanya, makatanggap na sira it kagayenang egay kaꞌawaꞌan nga isiyanggup ya. ¹⁶Ta, pan-gun pasar it panunubliyen i esang mapisiꞌan tat kaꞌalimbawaan it ituꞌun ngaytu, nga ega mapisiꞌ i kagayenang isiyanggup it Ampuꞌang Diyus in ega piyaturuꞌ ni Cristo i duguꞌ ya. Ka basta may pan-gun nga pasar it panunubliyen, kaꞌilangan nga matantuwan i kamatuudan nga natay na i nan-gun ngayti. ¹⁷Sabap maꞌyag nga subuk egay kapulusan ya mintras egen paꞌ kanya. May kapulusan mana in patay na kanya. ¹⁸Ta atkayan naga, iyan ipiyatindeg i uꞌna ngayting pakiꞌupakat, egay keseg ya in egay duguꞌ it mga inimatay nga ramu-ramu. ¹⁹Ka iyan nakapaꞌyag na ni Moises duꞌut kadaklan it mga taw i kaꞌyagan it kada urdin, minsiꞌ na kanyat duguꞌ it bakaꞌ baw kambing, duguꞌ nga may ragiꞌ na nga danum. Miyanu gasiꞌ it bulbul it tupa nga liyuuꞌ it madarag, idiyuꞌun yat pungru-pungru it isopo, bawnga itiyaꞌen duꞌut duguꞌ ngayti, ka wiyaswasan ya i kadaklan it taw baw pagsusuratan yat mga urdin ngaytit Ampuꞌang Diyus. ²⁰Dengan i inampang ya nga magꞌaat, “Itu i duguꞌ nga magpapaꞌgen it pakiꞌupakat ngaytut Ampuꞌang Diyus nga ipagpasunud yat imyu.”9:20 Exodo 24:8. ²¹Inanuꞌan ya gasiꞌ it duguꞌ i balay ngayting papagsambaan baw muꞌsang mga kagamitan in magsamba. ²²Ka sigun kat inaat it mga urdin, subuk egay beken nga ipaglimpiyuꞌ it maski unu kat panleteg it Ampuꞌang Diyus in daꞌga duguꞌ. Ta, atkayan naga, egay kaꞌawaꞌan it kasalaꞌan kat panleteg ya in daꞌgay ipaturuꞌ nga duguꞌ.9:22 Levitico 17:11.

Maꞌawaꞌ nang banar i kasalaꞌan it taw sabap it kamataynen ni Jesus

²³Ta, it atkayti, kat pagsamba it mga taw it tagnaꞌ, nga ladawan lamang it kamatuudang pagsamba duꞌun it langit, ega mapakay nga ega paglimpiyuꞌun nira i muꞌsang bagay it duguꞌ it mga ramu-ramu nga ipagpanalisi. Temed, iyan ipaglimpiyuꞌ nga panalisi nga bagay it kamatuudan ngaytung pagsamba duꞌun it langit, kaꞌilangan subraꞌ pang kagayen it mga ramu-ramu ngayti. ²⁴Sabap, si Cristo, ega maat duꞌun i sinledan ya it Ega Basta-bastang Seled it Templo ngayti situt banwa, nga taw lamang i minwat baw ladawan lamang it matuud nga papagsambaan, in daꞌga talagang langit i sinledan ya. Ta kayti, duꞌun na kanyat adapan it Ampuꞌang Diyus, magpanindeg it aten. ²⁵Baw ega gasiꞌ maat siminled kanya duꞌut langit isaꞌun pirming ipagpaturuꞌ ya i duguꞌ ya, subung it Piyakamataꞌas nga Sasirduti it mga Judio, nga taꞌun-taꞌun semled duꞌun it Subraꞌ Na ngayti nga Ega Na Babasta-bastaeng Seled, nga may taban ya nga duguꞌ it mga ramu-ramu nga piyaturuꞌ. ²⁶Ka in beteꞌ kaꞌilangan ni Cristo nga ipaturuꞌ nga pirmi i duguꞌ ya daꞌga baꞌ, ubus matay, matay kanya garing paꞌ it pagkaguna it banwa? Temed ega atkayan in daꞌga, kayti, kat timpu ngaytu it katumanan it muꞌsa ngayti nga pagbuwaten it tagnaꞌ, kaꞌsa lamang limnampud kanya situt banwa nga parawun na i kasalaꞌan it taw. Ipiyagparaw ya, sadili yang duguꞌ nga ipiyaturuꞌ it kaꞌsa ngayti. ²⁷Subung nagat kamataynen it taw. Kat pabetang-betang it Ampuꞌang Diyus talagang mabut nga mabugtuꞌ i ginawa it kada esa, temed kaꞌsa lamang tu mabut. Bawnga ukuman na i elaten. ²⁸Ta, atkayan naga, kaꞌsa lamang gasiꞌ binwat si Cristo nga panalisi, isaꞌun matanggung ya i kasalaꞌan it katataawan. Baw paꞌuliꞌ naga kanya situ, takaꞌ ega na maat isaꞌun tumanggung it kasalaꞌan it taw, in daꞌga mamisiꞌ manat kumpur magpaꞌbut it kanya, ka timpu nat kakumplituwan it karibriyan nira.

¹Iyan mga urdin nga ipiyaꞌalimat Ampuꞌang Diyus duꞌun it mga Judio, egaytu ikapisiꞌ it mga magagayeng bagay nga magꞌaꞌabut. Iyan mga bagay nga magkapisiꞌ it urdin, bilang aninu lamang it magꞌaꞌabut ngaytu. Ka iyan mga ramu-ramu nga ipagpanalisi nira it taꞌun-taꞌun, nga ipagꞌangut it kapasinsiyaan, egaytu magkaparaw it kasalaꞌan it mga magpandangep ngaytu duꞌut Ampuꞌang Diyus. ²Ka in beteꞌ talagang magkaꞌawaꞌ nay kasalaꞌan nira kat atkaytu nga mga panalisi, ta simpri ega na mabeꞌgat paꞌ kat nakem nira i mga kasalaꞌan nga nabwat nira. Baw daꞌga baꞌ ega na kaꞌilangan nga manalisi paꞌ it sumaꞌup? ³Takaꞌ iyan bay kamatuudan ya, itu ngaytung mga panalisi, magpademdem lamang it mga taw it mga kasalaꞌan nira it taꞌun-taꞌun. ⁴Sabap, duguꞌ ngaytut mga bakaꞌ nga tudu baw duguꞌ it mga kambing, egaytu magkaꞌawaꞌ it mga kasalaꞌan.

⁵Aypaꞌ ka iyan adeꞌdeng nay uꞌnang pamaꞌasitu ni Cristo it banwa, maat ya duꞌun it Amaꞌ ya,

“Ega duguꞌ it mga ramu-ramu nga ipagpanalisi, u beken paꞌ nga ipagbegay, i naꞌirgan mu in daꞌga aken ngaytu nga duguꞌ nga ipaturuꞌ.

Aypaꞌ ka piyabaraꞌan mu na aku it bilug it taw.

⁶Talagang ega magkasagyaan mu i mga ramu-ramu nga pagꞌantengen, nga ipagꞌangut it kapasinsiyaan it kasalaꞌan.10:5-6 Maski ipiyabetang-betang it Ampuꞌang Diyus i mga iti ngayti ega pagsagyaan ya in yay seked, magpanalisi sira nga magꞌangut it kapasinsiyaan it kasalaꞌan, temed alaid kat nakem nira i pagsunud it kaꞌirgan ya, ka pagsumbayaꞌen nagang pirmi i sadili nirang kaꞌirgan.

⁷Bawnga maat ku, ‘Wayni aku na.

Talagang sunudun ku i muꞌsang kaꞌirgan mu, ikaw nga Ampuꞌang Diyus ku, sigun kat magbebtang duꞌun it kasuratan sabap it aken.’”10:5-7 Awit 40:6-8.

⁸Ta, may pagpapuntuꞌan it ampang ya ngaytu. Uꞌna maat ya nga ega magkasagyaan it Ampuꞌang Diyus i mga ipagbegay nira baw mga ramu-ramu nga pagꞌantengen, nga ipagꞌangut it kapasinsiyaan it kasalaꞌan, maski na maat yay magbebtang duꞌun it mga urdin. ⁹Bawnga maat ya, “Wayni aku na. Sunudun ku i muꞌsang kaꞌirgan mu.” Aypaꞌ ka maꞌyag nga inawaꞌ nat Ampuꞌang Diyus i tagnaꞌ ngayti nga pagsalisi it ramu-ramu nga ipagꞌangut it kapasinsiyaan, ka giyantiyan na it kamataynen ngaytu ni Cristo. ¹⁰Ta, kat kaꞌirgan ngayti it Ampuꞌang Diyus, linimpiyuꞌ tami na kat mga kasalaꞌan tami sabap it kaꞌsa ngayti nga kamataynen ni Jesu-Cristo, nga ipiyasalisi ya i sadili ya nga bilug.

¹¹Kat tagnaꞌ ngayting dalan it pagsamba, duꞌun magtitindeg i mga sasirduti ka magbuwat sirat katengdanan nira. Talagang aldaw-aldaw iyan nagay pagbuwaten nira, magsalisi it ramu-ramu nga ipagꞌangut it kapasinsiyaan it kasalaꞌan. Temed ta, yay matuud, ega nagaytu ipagkaparaw it kasalaꞌan i iti ngayti nga mga panalisi. ¹²Temed si Cristo ngaytu, talagang kaꞌsa lamang binwat yay atkayti ngayti nga ipagpanalisi it kasalaꞌan. Kaꞌsa ngayti, talagang tamaꞌ na it seked it kaꞌnu-kaꞌnu. Kamatuudan, pagkabwat ya, ta, miyadung na kanya duꞌun it iwanang ayun it Ampuꞌang Diyus. ¹³Duꞌun kanya magꞌelat it timpu nga, iyan mga kalaban ya, paꞌampuꞌun na nga tutungtungan mana it aꞌay ya. ¹⁴Talagang kumplitu i binwat ni Jesus sabap, kat keseg it kaꞌsa ngayting pagsalisi it sadili ya nga bilug, binwat ya nga mataldeng it egay kaskedan kat panleteg it Ampuꞌang Diyus i kumpur paglimpiyuꞌun ya kat kasalaꞌan.

¹⁵Magpamatuud gasiꞌ situt aten i Espiritu Santo pasar it itu ngaytu. Ka daꞌga baꞌ ipiyasurat yay atkaytu nga magꞌaat,

¹⁶“‘Pagꞌabut it timpu, itu i baꞌgung pakiꞌupakat nga ipakiꞌupakat kut kanira,’ maat it Ampuꞌang Diyus.

‘Talagang idawaꞌ ku na kat ulu nira i mga urdin ku ngaytu, baw ipatdek ku na gasiꞌ kat nakem nira.’”10:16 Jeremias 31:33.

¹⁷Baw dungag pang inaat yay atkaytu,

“Talagang ega na demdemen ku paꞌ i mga kasalaꞌan baw karaꞌe-raꞌetan nira.”10:17 Jeremias 31:34.

¹⁸Ta, paribasay magkaꞌawaꞌ nang banar i kasalaꞌan kat binwat ngayti ni Cristo, aypaꞌ ka ega na kaꞌilangan nga manalisi paꞌ it ramu-ramu nga ipagꞌangut it kapasinsiyaan.

¹⁹Aypaꞌ kayti, mga kasulsugan, mapakay tami na nga subuk semled it ega nay pagꞌaliꞌan ta duꞌun it Subraꞌ Na ngayting Ega Na Babasta-bastaeng Seled, kat keseg it duguꞌ ni Jesus nga ipiyaturuꞌ ya. ²⁰Sabap, kat pagsalisi ya it bilug ya, binwatan ya na kita it baꞌgung dalan nga maglalapus na duꞌun it sang bali it kurtinaꞌ, isaꞌun talagang kaꞌbut tami na duꞌun it adapan it Ampuꞌang Diyus. Naꞌawaꞌ nay maglilingeb ngayti nga kurtinaꞌ, nga ladawan it bilug ya nga inimatay. ²¹Si Jesus na ngaytu i Sasirduti tami nga daꞌnay kasbung, nga yanay magpamaalaꞌ duꞌun it pamalay-balay it Ampuꞌang Diyus. ²²Aypaꞌ ka ayaw ta nat pangangaliꞌ, in daꞌga madap tami na duꞌun it adapan it Ampuꞌang Diyus it ega lugud-lugud lamang, in daꞌga kamatuudan, baw mapaꞌgen i pagsarig baw pamayaꞌ tami it kanya. Sabap yanay magdadaꞌeg kat nakem tami, nga limpiyuꞌ tami na kat muꞌsang kasalaꞌan, ka subuk piniꞌtikan ni Jesus it duguꞌ ya, baw subuk inugasan ya na kita it danum nga ega basta-basta. ²³Kaꞌilangan nga papaꞌgenen tami i pagꞌinawar tami it mga magagayeng bagay nga isiyanggup it Ampuꞌang Diyus it aten, iyang mga bagay nga ipagpamatuud tami nga pirmi. Daꞌtami magduwa-duwa sabap egaytu maꞌakal i simnanggup ngaytu. ²⁴Baw magayen, paꞌresan tami nga sulagen i pikir it kada esa kat raras it esa may esa, baw kat mga buwat gasiꞌ nga magayen. ²⁵Kaꞌilangan gasiꞌ nga ega beteꞌ buwaten ta nga papanemdeman i pagtingped tami nga sumamba it Ampuꞌang Diyus, nga subuk adat it mga beken. In daꞌga iyan i magayen, pirmi nga paksegen i pamayaꞌ it esa may esa, subraꞌ na kayti nga subuk pagsisiguruun ta na nga magꞌadeꞌdeng nay pamaꞌuliꞌ it Ampuꞌan situt banwa nga mangukuman.

Kaꞌilangang-kaꞌilangan maneꞌteꞌ, ega mangindiꞌ

²⁶Ka in talagang timindek na kat nakem tami i kamatuudan pasar it kamataynen ni Jesus, temed baliwalaꞌen tami paꞌ ka temden siꞌ nga ipasigi i pagbuwat ta it kasalaꞌan, ega na talagay beken nga ipagsalisi nga ikapasinsiya it kasalaꞌan tami. ²⁷In daꞌga, iyan na lamang i elaten tat magpanguripeꞌpey, pangukuman it Ampuꞌang Diyus nga subuk tablaꞌ i apuy nga mansur it muꞌsa nga magkuntraꞌ it kanya. ²⁸Ka daꞌga basaꞌan, in siyu-siyu i miyaliwalaꞌ it maski mga urdin ngayti ni Moises it tagnaꞌ, talagang ega pagpasinsiyaan, pagꞌimatayen, in ipamatuud i buwat ya it duwa u tulung sistigu? ²⁹Ta in atkayan, subraꞌ nga mabeꞌgat i pagꞌangutun nga panriga it taw nga gimniꞌek-giꞌek lamang it Anak it Ampuꞌang Diyus, baw dimniyampaꞌ it Espiritu Santo nga nagpanakem it kanya sabap it ildaw it Ampuꞌang Diyus. Talagang dakulay turubagen ya ka biyaliwalaꞌ yay ega basta-bastang duguꞌ nga keseg it pakiꞌupakat it Ampuꞌang Diyus it kanya, nga iyan i ikalimpiyuꞌ it kanya kat kasalaꞌan ya. ³⁰Sabap ega elam it aten i kakayaan it kanya nga miyaat,

“Akuy Manigꞌukuman it taw. Aku manay baalaꞌ meles.”10:30 Deuteronomio 32:35.

Baw magsusurat gasiꞌ,

“Siguradung ukumanan it Ampuꞌang Diyus i mga taawan ya.”10:30 Deuteronomio 32:36.

³¹Talagang ega lulugud-lugudun in betanganan kat ukuman nga panriga it Ampuꞌang Diyus, kanya nga egen it egay kaskedan.

³²Dedemdemen mi siꞌ i tagnaꞌ, iyan baꞌgu kamu pang naꞌyagan it kamatuudan ngaytu. Daꞌga baꞌ naneꞌteꞌ kamu maski pagꞌapisen nga banar it dakel nga kakuriꞌan? ³³Ka in sumang kaꞌanu pagdiyampaꞌen kamu baw pagpakuriꞌan paꞌ kat adapan it kadaklan it taw. Sumang kaꞌanu gasiꞌ magpanabang kamu it mga kaꞌibaan mi nga pagpakuriꞌan nat atna. ³⁴Ega iniꞌlaman mi nga tabangen i in siyu it imyu i pagpipirisuun, baw iyan nga nalabayan mi nga inagaw i mga kusas mi masasagya kamu ga. Sabap urut mi na nga subraꞌ paꞌ nga magayen baw magpaneꞌteꞌ i kamanggadan nga magꞌaꞌareg it imyu kat pagdadarapaꞌen. ³⁵Aypaꞌ kayti yay magayen, ega ugaden mi i pagsunud mi it ki Cristo, nga pagpanindegan mi it may pagmaꞌiseg it nakem. Ka talagang nakasiguru i ega basta-bastang panunumbas it pagsunud mi ngaytu. ³⁶Kaꞌilangan nga temeꞌteꞌ kamu isaꞌun masunud mi nga banar i kaꞌirgan it Ampuꞌang Diyus. Bawnga in atkayan matanggap mi i isiyanggup ya. ³⁷Sabap subung nagat magbebtang ngayan duꞌut kasuratan, nga magꞌaat,

“Dekeyeꞌ mana nga timpu, ega na maꞌlay, iyan magꞌaꞌabut ngayan, mabut na yan. Ega paꞌatrasu.

³⁸Takaꞌ iyan taawan ku nga ipagpabetang ku na nga mataldeng, yay magdadaꞌeg kat nakem ya, pamayaꞌ baw pagsarig yat aken.

Temed in mangindiꞌ kanya siguradu nga ega na sagyaan ku.”10:38 Habacuc 2:3-4.

³⁹Temed kita, ega uyut duꞌut mga magpangindiꞌ ngayti nga maꞌilang kat pagdadarapaꞌen, ka aten, teꞌteꞌ i pamayaꞌ baw pagsarig tat Ampuꞌang Diyus. Aypaꞌ, kita, maribri ta talagay aten.

Dakulay mapisiꞌ ta duꞌut pagsarig baw pamayaꞌ it mga taw it tagnaꞌ

¹Ta kayti, iyan pamayaꞌ baw pagsarig ngaytu, iyan i ikapisiꞌ tat egay kaꞌugadan nga kasiguruwan nga kamatuudan i mga bagay nga pagpaꞌbutun, maski ega paꞌ naltegan. ²Talagang, mga taw it tagnaꞌ, egay beken nga ikiyasagyat Ampuꞌang Diyus it kanira in daꞌga kat pamayaꞌ baw pagsarig nira ngaytut kanya.

³Ka pamayaꞌ tami it inaat it Ampuꞌang Diyus i ikiyasepsep ta nga, banwa ngaytu baw muꞌsang mga paryaman, giyuna ya kat keseg it ampang ya lamang.11:3 Genesis kapitulu 1. Magsugid tu nga mga bagay nga magkaltegan, egaytu gimnaring kat mga bagay nga magkaltegan naga, in daꞌga giyuna lamang.

⁴Ka panawun it pikir mi i mga taw it tagnaꞌ nga siyagyaan it Ampuꞌang Diyus. Alimbawa si Abel. Sabap it pamayaꞌ ni Abel ngayti it Ampuꞌang Diyus nagbuwat kanya it panalisi nga pasalamat nga ipiyabetang it Ampuꞌang Diyus nga subraꞌ pang magayen it ki Cain nga pasalamat.11:4 Genesis 4:1-5. Aypaꞌ, ipiyamatuud it Ampuꞌang Diyus nga, si Abel ngayti, mataldeng nga taw. Kamatuudan, tiyanggap ya i kanya nga pasalamat. Kayti, maski maat naꞌlay na nga patay si Abel ngayti, dakulay ipagtulduꞌ it aten it pamayaꞌ yat Ampuꞌang Diyus.

⁵Ta, sabap gasiꞌ it keseg it pamayaꞌ, si Enoc, ega miyatay. Ipiyagꞌugad na lamang kanya it Ampuꞌang Diyus duꞌun it ikadwang kaꞌgenan.11:5 Genesis 5:24. Talagang ega na nakita-kitaan kanya ka ipiyagꞌugad nga matuud. Ka inaat naga duꞌun it kasuratan nga talagang, si Enoc, pagsagyaan nga pirmi it Ampuꞌang Diyus, aypaꞌ ka ipiyagꞌugad na lamang kanya. ⁶Temed talagang ega mapakay nga sagyaan it Ampuꞌang Diyus i taw nga egay pamayaꞌ it kanya. Sabap maski siyu nga maat kupaꞌildaw it Ampuꞌang Diyus, kaꞌilangan nga magpamayaꞌ kanya nga may Ampuꞌang Diyus talaga. Baw kaꞌilangan gasiꞌ nga magpamayaꞌ kanya nga tumbasan it Ampuꞌang Diyus i kumpur magpaꞌres tumulus in magꞌuꞌunu makilalaan nira kanya nga banar.

⁷Ta, si Noe gasiꞌ, paribasay magayen i pamayaꞌ ya, piyakimatuud yang banar i sasar it Ampuꞌang Diyus sabap it ega basta-bastang ukuman nga magꞌaꞌabut, maski ega pay nagpasar kat mata ya. Aypaꞌ, uyun gasiꞌ it inaat it Ampuꞌang Diyus, minwat kanya it dakulang masakayan nira, isaꞌun maribri sira nga sang anakan.11:7 Genesis 6:9 seked it 8:22. Sabap it pamayaꞌ ya ngayti ipiyabetang kanya nga mataldeng kat panleteg it Ampuꞌang Diyus, baw sikayan gasiꞌ minyag nga dapat nga ukumanan i muꞌsa ngayting taw nga beken situt sinirungat langit ka daꞌsira namayaꞌ it inaat it Ampuꞌang Diyus.

⁸Ta, sabap gasiꞌ it pamayaꞌ baw pagsarig ya it Ampuꞌang Diyus, siyunud ni Abraham i inaat it Ampuꞌang Diyus it kanya nga paꞌugad duꞌun it ipasadilit kanya nga rugar. Talagang ega diyaꞌga ya maski egay uru-urut ya pasar it rugar ngayti nga paꞌaduꞌunan ya.11:8 Genesis 12:4. ⁹Kat keseg it pamayaꞌ baw pagsarig ya nanaꞌidan kanya nga subung it dayuꞌan lamang duꞌun it rugar nga iti na i isiyanggup it kanya it Ampuꞌang Diyus. Balay nga pagꞌiꞌistaran ya, magkapuru-purun lamang, atnaga si Isaac baw si Jacob nga timnanggap gasiꞌ it sanggup it Ampuꞌang Diyus nga atkayti naga. ¹⁰Ka iyan talagay pagꞌeꞌlaten ni Abraham nga maꞌistaran ya, iyan ega basta-bastang siyudad duꞌun it langit nga magꞌuꞌunay ka Ampuꞌang Diyus i nagpabetang-betang.

¹¹Sabap gasiꞌ it pamayaꞌ baw pagsarig nira it Ampuꞌang Diyus nanganak naga na Abraham, duwa ni Sara, maski gurang na sirang gurang baw si Sara, ega magpanganak nga babay.11:11 Genesis 18:1-15 baw 21:1-2. Ka yay kat pikir ni Abraham, purus kamatuudan i kat Ampuꞌang Diyus, nga ega mapakay nga ega tumanen ya i isiyanggup ngaytit kanya. ¹²Aypaꞌ ka maski esa-esa si Abraham ngaytu, baw kaꞌaat ka patay na kanya kat kagurang ya, temed kanyay liniꞌwanan it tungtung-inapuꞌ nga ega mabilang, nga subung nat kadakel it bituꞌun duꞌut langit baw atnat igis duꞌut baybayan.

¹³Sira ngaytung siyanggupan,11:13 Paꞌaaten kaytu, si Abraham, duwa ni Sara, si Isaac, baw si Jacob. seked it aldaw nga natay sira teꞌteꞌ talagay pamayaꞌ nirat inaat it Ampuꞌang Diyus. Ka maski ega nagꞌabut kat timpu nira i mga isiyanggup yat kanira temed atnat magkalawag na nira baw pagpaꞌbutun nira it masagyay nakem. Talagang natantuwan nira nga sira, dumadayuꞌ lamang baw subung lamang sira it magpangintataawan situt banwa. ¹⁴Ta it atkayan i kasepsep nira, maꞌyag nga sigi pay paꞌbut nirat pirmaminting banwa nga mataꞌidan nira. ¹⁵Baw ega lamang banwa ngayti nga giyaringan nira i pagpaꞌiguꞌan nira kaytu, ka in atkayan may timpu paꞌ nga ikapaꞌuliꞌ nira naga duꞌun. ¹⁶Temed ega, in daꞌga subraꞌ pang magayen nga banwa i pagpaꞌbutun nira, nga egay beken, langit tuy paꞌaaten ngaytu. Aypaꞌ talagang ega ipagꞌeyaꞌ it Ampuꞌang Diyus nga mataꞌwag kanya nga kanirang Ampuꞌan, sabap talagang inargan ya sira it pirmaminting banwa nga mataꞌidan nira.

¹⁷Kat kadakulaꞌ gasit pamayaꞌ yat Ampuꞌang Diyus ega dimnaꞌga si Abraham iyan siyukda-sukdanan kanya nga imatayen nga ibgay duꞌut Ampuꞌang Diyus i anak ya nga si Isaac.11:17 Genesis 22:1-19. Ega diyaꞌga ya maski paeꞌesa-esang anak ya si Isaac ngayti baw kanya i pagpaꞌiguꞌan it isiyanggup ngaytit Ampuꞌang Diyus it kanya nga magꞌaat,

¹⁸“Asat ki Isaac i liꞌwanan it bangsa ngayang taꞌwagen nga tungtung-inapuꞌ mu.”11:18 Genesis 21:12b.

¹⁹Sabap magtetdek kat nakem ni Abraham i pagsarig ya nga maski maat matay na si Isaac, egnen nagat Ampuꞌang Diyus. Baw maski ega naga natabusan ya nga imatayen ka siyabar naga it Ampuꞌang Diyus, kaꞌaat ka talagang subuk nagꞌegen mana si Isaac ngayti.

²⁰Ta, si Isaac gasiꞌ, sabap it pamayaꞌ yat isiyanggup it Ampuꞌang Diyus, piyatdekan ya i bilug it mga anak ya nga si Jacob baw si Esau it paꞌildaw nga ampang kat pagdadarapaꞌen nira.11:20 Genesis 27:1-40.

²¹Atkayan naga, sabap it pamayaꞌ ya it inaat it Ampuꞌang Diyus, parabir natay si Jacob piyatdekan ya gasiꞌ it ampang nga paꞌildaw i duwa nga apuꞌ ya nga anak ni Jose.11:21 Genesis 48:1-20. Baw maski magtataꞌgen mana si Jacob ngayti it sungkud ya, simnamba ga lamang kanya it Ampuꞌang Diyus.

²²Ta, sabap gasiꞌ it pamayaꞌ baw pagsarig ya duꞌun it Ampuꞌang Diyus, iyan adeꞌdeng na matay si Jose naꞌampang ya naga nga kalꞌid naga duꞌut Egipto i mga Israelita ngayti baw ipiyan-gun ya nagang tabanen nagay tuꞌlang ya in limꞌid na sira.11:22 Genesis 50:24-25.

²³Ta, sabap gasiꞌ it kadakulat pamayaꞌ baw pagsarig nirat Ampuꞌang Diyus, iyan mga giyaringan ni Moises, ega miniꞌlam sira nga kuntraꞌen niray urdin it adiꞌ duꞌut Egipto. Iyan namuyaan nira nga ega basta-bastang taw i anak nira ngayti, pataguꞌ nga impet nira it seledan it tulung bulan.11:23 Exodo 2:1-10.

²⁴Bawnga yan ustuꞌ nang taw si Moises ngayti, maski magayen i kabetangan ya ka inanak it anak it adiꞌ ngayti, temed sabap gasiꞌ it pamayaꞌ ya it Ampuꞌang Diyus, tiyananan ya naga i iting kagayenan. ²⁵Yanagay liyabi ya, makaꞌuyut naga kanya it mga kabilug ya nga mga taawan it Ampuꞌang Diyus maski pakuriꞌan, ega gat pasaga-saga it kasalaꞌan nga magkapisiꞌan it kasagyaan lamang nga ega magpaneꞌteꞌ. ²⁶Ka, kat pikir ya, maski unu nga kakuriꞌan i malabayan ya kat alima it beken sabap it pamayaꞌ ya it Manriribri nga ipalampud it Ampuꞌang Diyus kat pagdadarapaꞌen, yay subraꞌ pang magayen it kamanggadan nga mapisiꞌ ya duꞌun it Egipto. Iyan talagay ipiyatdek ya kat nakem ya, ega basta-basta nga itumbas it Ampuꞌang Diyus it kanya kat pagdadarapaꞌen.

²⁷Sabap gasiꞌ it kadakulat pamayaꞌ baw pagsarig ya it Ampuꞌang Diyus, liminꞌid kanya duꞌut Egipto it ega pagꞌiꞌlaman yay iseg it adiꞌ. Ega talaga limnubay i pamayaꞌ baw pagsarig ya ngayti ka, kat nakem ya, subung talagat pagleltegan yang pirmi i Ampuꞌang Diyus, maski ega magkaltegan.11:24-27 Exodo 2:11 seked it 12:42. ²⁸Sabap gasiꞌ it pamayaꞌ ya it inaat it Ampuꞌang Diyus, ipiyagꞌurdin ni Moises nga paꞌidan it duguꞌ i mga salakwatan it mga balay nira isaꞌun ega imatayen it Anghil nga Mamumuuꞌ i mga panganay nirat kanira nga mga Israelita. Baw garing it iting aldaw ipiyapanaw ya i Pistaꞌ it Tiyaꞌliban.11:28 Exodo 12:1-30.

²⁹Ta, mga Israelita gasiꞌ, sabap it pamayaꞌ nira it Ampuꞌang Diyus, nakadipag sira duꞌut dagat ngayting pagpangaranan it Madarag, nga piyanawan nira, nanuꞌu-tuꞌugan. Temed iyan mga taga Egipto na i dimnipag, napuꞌsa sirat kalmes.11:29 Exodo 14:1-31.

³⁰Sabap gasiꞌ it pamayaꞌ it mga Israelita ngayti duꞌun it Ampuꞌang Diyus, miyamlad i kutaꞌ it siyudad it Jerico, pagkatupus it linibut nirat pitung aldaw.11:30 Josue 6:1-21. ³¹Baw si Rahab, iyan babay nga taga Jerico ngayti nga ega magayen i adat ka bilug ya i ipagpanulus ya, paribasay namayaꞌ kanya it Ampuꞌang Diyus piyaꞌapyat ya duꞌut balay ya baw inistimar yat magayen i mga sunda. Aypaꞌ ega nakaꞌuyut kanyat inimatay nga kaꞌibaan it mga kabanwa ya nga ega nagpasakep it Ampuꞌang Diyus.11:31 Josue 2:1-22 baw 6:22-25.

³²Ta, subuk ega na mapaꞌabwatay ku paꞌ nga sugi-sugid ka talagang kurangen aku it timpu in tuturanen ku paꞌ i sabap it ki Gedeon, si Barac, si Samson, si Jefte, si David, baw sabap it ki Samuel baw mga prupitaꞌ. ³³Nga mga itu ngaytung mga taw, sabap it keseg it pamayaꞌ baw pagsarig nirat Ampuꞌang Diyus, dakulaꞌ talagay nabwat nira. Dakel i mga kaꞌadiꞌan nga piyamagdaꞌeg nira. Purus kataldengan i ipiyapanaw nira kat mga sinakepan nira baw natanggap nira i isiyanggup it Ampuꞌang Diyus it kanira. Iyan beken, napageget nira i baꞌbaꞌ it maski leon. ³⁴May ega nagated it maski magdidigalang nat panugu-sugu i apuy, baw naribri pay beken kat tarem it basiꞌ. Maski malulubay i beken, binggayan it Ampuꞌang Diyus it ega basta-bastang keseg isaꞌun mapiyandaꞌeg sira kat pagbunuꞌan, nga piyapalagyu niray dadaklan nga sundaluꞌ it beken nga bangsa nga magpanrumpak it kanira. ³⁵Sabap gasiꞌ it pamayaꞌ baw pagsarig duꞌun it Ampuꞌang Diyus, may mga babay nga nakanira naga i mga pagmaꞌa-maꞌalen nira nga miyatay na, ka inggen it paꞌuliꞌ.11:35 1 Mga Adiꞌ 17:19-24 baw 2 Mga Adiꞌ 4:18-37.

Iyan beken gasiꞌ miyataꞌmis nira pay matay kat pakuriꞌ it kanira, ega gat mangindiꞌ sira, ka urut nira nga egnen naga sira it paꞌuliꞌ baw begayan pat subrang piyakamagayen nga kaꞌgenan ka ega na matay. ³⁶May beken gasiꞌ nga pagdiyampaꞌen baw pagripdasan it pagbubwaten nga panriripdas. May pagpipirisuun gasiꞌ nga pagkakadinaan paꞌ. ³⁷May inimatay it pagbuntalan it batu, may paglagadiꞌen nga pagbegsangen, may pagbunuꞌun. May mga yamanay pakayan nira, kulit it tupa baw kambing. Talagang makuring-makuriꞌ sira, pagꞌintirmisen paꞌ baw ipagpabetang paꞌ it ega magayen. ³⁸Talagang subuk ega na bagay it taw nga atkaytuy kagayen it pamayaꞌ i banwa ngaytu nga makasalaꞌan. Ka iyan beken mamagluꞌug-luꞌug na duꞌun it kabubukidan baw mga rugar nga kapupuyangtan. May magpatataguꞌ na duꞌun it mga bulauꞌ baw duꞌut mga kakukubkuban.

³⁹Itu nga mga taw, talagang siyagyaan nga banar it Ampuꞌang Diyus i kakseg it pamayaꞌ baw pagsarig nirat kanya. Temed maski atkayan, ega natuman ya kat timpu nira i isiyanggup ya. ⁴⁰Ka subraꞌ pang magayen nga pagtuman i ipiyabetang-betang ya nga ega paꞌ tumanen ya seked it ega paꞌ naꞌbut i aten ngaytung timpu. Aypaꞌ kayti, sira baw kita, sang tamiyan na i katanggap it ega basta-bastang kagayenan nga isiyanggup ya.

Kaꞌilangan maneꞌteꞌ i pagsunud tat Ampuꞌan maski unuy magꞌabut

¹Ta kayti, in ipaꞌalimbawa tat kuntis i kaꞌgenan ta, kadakel it mga taw ngaytit tagnaꞌ nga mapaꞌgen i pamayaꞌ baw pagsarig nira it Ampuꞌang Diyus, nakalungbaꞌ na sira kat kanirang pagꞌabutun baw kayti, subuk maglilibut it aten ka mamagpanleteg. Aypaꞌ, kaꞌilangan indiꞌan tami na i kasalaꞌan u maski unu nga bagay nga subuk magbaer u magsimber it aten baw paꞌere-eres tami nga ayawun i aten nga palagyuun. ²Kaꞌilangan, subuk ega lisuꞌun i seyek tami duꞌun it ki Jesus, nga kanya i nagpalteg it aten nga muꞌsa in magꞌuꞌunu i kaꞌustuꞌan baw egay kasbung nga pagsarig baw pamayaꞌ duꞌun it Ampuꞌang Diyus. Biyaliwalaꞌ ya lamang i kadakulat kaꞌeyaꞌan it kamataynen ya duꞌut krus ka yay ipagpadaꞌeg ya nga pirmi kat nakem ya, ega basta-bastang kasagyaan nga makanya duꞌun it langit. Ta kayti, magꞌaꞌdung na kanya kat iwanang ayun it araꞌdungan it pagkaꞌadiꞌ it Ampuꞌang Diyus. ³Eeꞌ baꞌ, panawun talaga it pikiran mi si Jesus ngaytu, in sang unu i siyagkaꞌ ya nga pakikuntraꞌ it kanya it mga makasalaꞌan. Pikir-pikiren mi kanya isaꞌun daꞌkamu manlubay baw maskedan kat pagsunud mi it kanya.

⁴Kamu ngaytu, ega paꞌ nalabayan mi nga kat ikiyagtas it ginawa mi i paglaban mi it karaꞌe-raꞌetan. ⁵Subuk nalipatan mi na i inaat ngaytit tagnaꞌ it Ampuꞌang Diyus it imyu nga mga anak ya, nga bilang pakseg it nakem mi. Maat ya ngaytu,

“Anak, ipabetang mu nga ega lulugud-lugudun in pagtaldengen ka it Ampuꞌang Diyus.

Ega manlubay ka in pagꞌabutun ka it panaldeng ya ngaytu.

⁶Sabap talagang pagtaldengen it Ampuꞌang Diyus i muꞌsa nga pagrarasan ya.

Baw kat panaldeng ya ngaytu subuk pagrigaen ya i mga ipagpabetang ya na nga mga anak ya.”12:5-6 Kawikaan 3:11-12.

⁷Aypaꞌ sagkaꞌen mi lamang i maski unu nga kakuriꞌan nga magꞌabut it imyu, sabap kat ikataldeng mi yan. Itu ngaytu, magpakilala nga, pabetang nat Ampuꞌang Diyus it imyu, mga anak ya na. Ka aring anak i ega pagtaldengen it giyaringan ya? ⁸Ta it matuud nga pagtaldengen it Ampuꞌang Diyus i muꞌsa nga mga anak ya, simpri in ega atkaytuy buwaten it imyu, daꞌga baꞌ ireg sugiden, daꞌkamu mga anak ya nga matuud, in daꞌga subuk mga lupaw kamu lamang? ⁹Daꞌga baꞌ paggalangen tami i amaꞌ ta situt banwa in ega pagpabaya-bayaꞌan ya lamang i buwat tang ega magayen in daꞌga pagtaldengen ya? Aypaꞌ subraꞌ nga pasakep tat panaldeng it Ampuꞌang Diyus nga naꞌAmaꞌ tami sabap it pamayaꞌ ta, ka in atkayan, liꞌwan ya, magꞌega basta-basta i kaꞌgenan ta. ¹⁰Iyan panaldeng it mga giyaringan ta, seked lamang it ustuꞌ tami nang taw, baw sigun kat in unuy pasepsep nira nga ikagayen ta nga mga anak. Temed panaldeng it Ampuꞌang Diyus, kat ikagayen tami nga matuud isaꞌun mangaꞌgenan ta nga alaid nang banar kat muꞌsang kasalaꞌan nga subung it kanya. ¹¹Talagang basta uras na nga pagtaldengen ya kita ngaytu, daꞌta masagya, ka makuriꞌ it aten. Temed in nagtaꞌlib na, basta piyalulusan tami, subraꞌ nga tumaldeng i pangaꞌgenan tami, nga yay tumaban it aten it nakem nga subrang maꞌimbeng.

¹²Aypaꞌ ka ayaw kamu it pagsukuꞌ u lumubay in daꞌga pakula-kulaꞌsi kamu naga kat pagsunud mi. ¹³Baw inturun nga kat dalan it kamatuudan i pirmi mi nga pagpanawan, isaꞌun ega mangindiꞌ i mga mamagꞌalang-alang paꞌ, in daꞌga magmapaꞌgen i pamayaꞌ nira.

Ega balalaꞌan i ildaw it Ampuꞌang Diyus u pasngelan i ampang ya

¹⁴Kaꞌilangan paꞌresan mi i pagꞌurunyun nga kat ikaꞌimbeng it pakiꞌiba-iba mi it masigkataw mi, baw paꞌalaidan mi na i kasalaꞌan. Sabap mga maꞌiꞌireg it kasalaꞌan, daꞌsira makapasagpun duꞌun it Ampuꞌan kat pagdadarapaꞌen. ¹⁵Asikasuun mi i pamayaꞌ it esa may esa isaꞌun egay maski siyu it imyu nga subuk magkatuduꞌ kat ildaw ngaytu it Ampuꞌang Diyus. Ka in may atkayan, yay tumaban it kanya it mangindiꞌ. Ka kabilangan it taw nga atkaytuy buwat ya, dikut nga kaꞌiꞌilu i buwaꞌ. Ta, in pataꞌnan lamang kanya nga kemseg simpri, dakel i matindakan nga maguluy ulu nira, ka subuk maꞌilu it kaꞌiꞌilu ya. ¹⁶Magꞌintur kamu gasiꞌ nga egay asat imyu nga mapiyamakun kat ega asawa ya. Baw sana egay maski siyu it imyu nga ega magꞌintindi it mga bagay nga ega basta-basta kat panleteg it Ampuꞌang Diyus, subung it ki Esau nga, pudir ya kat pagkapanganay, itiyukar yat sang pinggan lamang i pangaꞌen. ¹⁷Daꞌga baꞌ magkaꞌrutan mi nga, pagkaꞌanu kayan, pagꞌangutun ya naga duꞌut amaꞌ ya nga ipatdek naga duꞌut bilug ya i ampang nga paꞌildaw nga talagang kat panganay? Temed diyaꞌga na kanya sabap it ega na mabaꞌgu pat amaꞌ ya i naꞌampang ya na, maski sang unu paꞌ i reges ni Esau baw luwa-luwaꞌ ya.

¹⁸Subung nagat inaat ku, paꞌalaidan mi na i muꞌsang kasalaꞌan sabap, aten ngaytung dalan nga ipagkaꞌadap tami duꞌun it Ampuꞌang Diyus, ega subuk dalan it mga Israelita it tagnaꞌ, nga may magkaltegan it mata baw magkagnegan it talinga nira. Ka iyan duꞌun sirat Bukid it Sinai may magdidigalang nga sugut apuy, ereꞌeret nga kadleman, baw sebeg it deres nga atnat bagyu. ¹⁹May tingeg it taburi baw panggaꞌmaran it miyampang. Pagkagneg it mga taw it panggaꞌmaran ngayti, pagꞌangutun nira nga ega na pakisugidan sira it iti ngayti. ²⁰Sabap talagang iniꞌlaman nira i pagꞌaaten it magꞌampang ngayti nga magꞌaat, “Maski siyu nga kasalya it temegday situt bukid ngaytu, abir kung ayep, talagang imatayen it pagbuntalan it batu.”12:20 Exodo 19:12-13. ²¹Talagang ipagkapanriꞌsu nat tiꞌdun i magkalawag duꞌut bukid ngayti. Aypaꞌ ka, pati si Moises, nakaꞌampang na nga magꞌaat, “Magyegyeg aku na baytut iꞌlam.”12:21 Deuteronomio 9:19.

²²Temed kita, iyan i piyatpadan tamit aten, Mungsuꞌ it Sion,12:22 Mungsuꞌ it Sion i pangaran nirat esang mungsuꞌ duꞌun it siyudad it Jerusalem. Adeꞌdeng it Sion i piyatindegan ni Solomon it Templo, nga yay subuk pagtataꞌidan it Ampuꞌang Diyus situt banwa (Joel 3:21b). nga yay siyudad it Ampuꞌang Diyus nga egen it egay kaskedan, iyan Jerusalem nga duꞌun it langit nga pamagtataꞌidan it ega magkabilang i kadakel it mga anghil nga magsamba it kanya it masagyang-masagya. ²³Aten nga piyatpadan, pagtingpedan it muꞌsa nga ipagpabetang it Ampuꞌang Diyus nga mga panganay ya,12:23 Kat panleteg it mga Judio, ega basta-basta i kabetangan it mga panganay nga lalaki. Alimbawa in patay nay amaꞌ baw subliyen nat mga anak i mga kusas ya, dubli i kat panganay nga lalaki nga subliyen (Deuteronomio 21:17). Aypaꞌ, kita nga inanak nat Ampuꞌang Diyus sabap it pamayaꞌ tat Anak ya nga si Jesus, pabetang yat aten, ega lamang anak in daꞌga panganay paꞌ. nga maglilistaꞌ i mga ngaran nira duꞌun it langit. Nakapatpad tami na duꞌun it Ampuꞌang Diyus nga Manigꞌukuman it muꞌsang taw, baw duꞌut kadaklan it mga magpamayaꞌ nga miyatay na nga, lamang ega pay panlangit nga bilug, temed binggayan nat kakumplituwan it kanirang karibriyan. ²⁴Talagang aten nga piyatpadan, si Jesus, nga kanya i nagpapaꞌgen it Baꞌgu ngaytung Pakiꞌupakat, baw duguꞌ ya nga subuk ipiniꞌtik yat aten. Yay subrang may kapulusan, subraꞌ paꞌ it duguꞌ ngayti ni Abel nga magꞌangut lamang it kablesan.

²⁵Aypaꞌ magꞌintur kamu nga ega pasngelan mi i ampang it Ampuꞌang Diyus. Ka iyan ega simnunud it ampang ya nga garing duꞌut Bukid it Sinai it tagnaꞌ, ega talaga nakaribri sira it panriga. Ta, subraꞌ na kayti in pasngelan tami i ampang ya nga taban ni Jesus nga ipiyalampud ya nga garing duꞌut langit. ²⁶Iyan miyampang i Ampuꞌang Diyus duꞌut Bukid it Sinai ngayti, yimnegyeg i lugtaꞌ it keseg it gaꞌmaran ya. Temed kayti ipagpamatuud ya nga mabut i aldaw nga payegyegen ya siꞌ i ega lamang desang lugtaꞌ, in daꞌga pati langit gasiꞌ, subung nagat inaat ya it tagnaꞌ.12:26 Haggai 2:6. ²⁷Ta, kat mga ampang ya ngaytu, maꞌyag nga kat iting aldaw, muꞌsa ngaytung bagay nga maat payegyegen, talagang maꞌawaꞌ. Ka lamang giyuna it Ampuꞌang Diyus, kat pabetang-betang ya, egaytu manupusan. Buwaten yaytu isaꞌun yanay maneꞌteꞌ nga paganti, mga bagay nga ega na ngaytuy kaꞌawaꞌan.

²⁸Ta, kaꞌadiꞌan ya ngaytu, iyan i egay kaꞌawaꞌan. Aypaꞌ, paribasay may kaꞌuyutan tay aten it kaꞌadiꞌan ngaytu, kaꞌilangan seklen tat maꞌingget i ildaw ngaytut Ampuꞌang Diyus it aten, isaꞌun kasirbi tat kanya it pagsirbi nga magkasagyaan ya, pagsirbi nga may iꞌlam nga paggalang it kanya. ²⁹Sabap, kanya nga Ampuꞌang Diyus tami, in magpanriga, kabilangan ya subuk apuy nga magpangansur.

Mga pirang munaꞌaw nga dapat ugaliꞌen it mga magpamayaꞌ

¹Kaꞌilangan nga ipasigi mi nga magsigraras kamu it esa may esa nga subung it sang sulsugan. ²Ega mi lipa-lipaten nga pagpaꞌapyaten mi kat balay mi i taga belag nga rugar. Ka may nakabwat naytu it atkaytu, ta palan mga anghil i napaꞌapyat nira. ³Kaꞌilangan tabangen mi i mga kaꞌibaan mi nga pagpipirisuun. Sanguꞌan mi sira nga subung bat pagpipirisuun kamu gasiꞌ i imyu. Atkayan naga i maski siyung beken nga pagpakuriꞌan sabap it pamayaꞌ nira, ka subung kamut sang kabilu-bilugan.

⁴Kaꞌilangan gasiꞌ, ega kalabtaꞌen mi i pagꞌasawa ngaytu, in daꞌga galangen talaga. Sabap siguradu nga betanganan ya it ukuman i muꞌsa nga magpamakun kat taw nga ega asawa nira.13:4 Pagpaꞌiguꞌan kaytu, umbay nga duwa, u may asawa na it sang kataawan, u may asawa na nirang duwa. Pakyaw na. ⁵Kaꞌilangan mangaꞌgenan kamu it ega kupagmanggad. Iyan i magayen, pagsagyaan mi na i kumpur magkaparagan mi, ega pagkudungagan nga pirmi. Sabap waytuy inaat it Ampuꞌang Diyus, maat ya,

“Talagang ega pablagan u tananan ku kamu it seked kaꞌnu-kaꞌnu.”13:5 Deuteronomio 31:6c.

⁶Aypaꞌ ipagpamatuud tami it may pagmaꞌiseg it nakem i itu nga inaat,

“Iyan Ampuꞌang Diyus, iyan na i magtabang it aken.

Daꞌga nay maiꞌlaman ku, ka unu pay mabwat it masigkataw kut aken?”13:6 Awit 118:6-7.

⁷Magayen gasiꞌ, dedemdemen mi i uꞌnang mga magpamaalaꞌ it imyu, nga mga tagnang manigpanuturan asat imyu it ampang it Ampuꞌang Diyus. Panawun it pikir mi i magayen nga liyapusan it pangaꞌgenan nira baw sana guruun mi i kagayen it kanirang pamayaꞌ. ⁸Si Jesu-Cristo ngaytu nga piyamayaꞌ nira, ega talagay pagꞌugadan ya. In magꞌuꞌunu kanya it tagnaꞌ, atkayan naga kayti baw seked it kaꞌnu-kaꞌnu. ⁹Aypaꞌ ayaw kamut pateꞌag-teꞌag it dakel-dakel nga mga panulduꞌ nga magꞌalaid kat dalan it kamatuudan. Magayen in pirmi nga pagpaksegen tay pamayaꞌ ta duꞌun it ildaw it Ampuꞌang Diyus, ega maat duꞌun it pagsunud it mga urdin sabap it pangaꞌen. Egay napulus it mga taw nga magsunud it mga iti ngayti.

¹⁰Kita nga magpamayaꞌ it ki Jesus, kamataynen ya duꞌut krus i ipagkapasinsiya it kasalaꞌan tami. Temed sira nga magsalisi pat ramu-ramu nga ipagꞌangut it kapasinsiyaan it kasalaꞌan, talagang egay uyu-uyut nirat kapasinsiyaan nga mapisiꞌ duꞌut krus ngayti. ¹¹Ka, kamataynen ngaytu ni Jesus, ipiyagladawan it tagnang pagbuwaten it Piyakamataꞌas nga Sasirduti, nga pagtabanen ya duꞌun it Seled ngayti nga Ega Basta-Basta i duguꞌ it mga ramu-ramu nga ipagpanalisi it kasalaꞌan, temed iyan bilug it mga ramu-ramu ngayti nga piyadguꞌ, pagtabanen duꞌun it liꞌwan it pagbabalay-balayan nira, ka duꞌun i pagꞌantengan. ¹²Ta atkayan naga, inimatay si Jesus duꞌun it liꞌwan it kutaꞌ it siyudad it Jerusalem isaꞌun, kat pagturuꞌ ngayti it sadili ya nga duguꞌ, malimpiyuꞌ ya i katataawan kat mga kasalaꞌan nira. ¹³Aypaꞌ ka elpen tami kanya ngayti nga subuk duꞌun it liꞌwan it pagbabalay-balayan it mga Judio, ka paꞌuyut tami it mga pakuriꞌ baw kaꞌeyaꞌan ngayti nga siyagkaꞌ ya.13:13 Siguru, ituy puntuꞌ it mga ampang ngaytu. Mga Judio nga magsarig nat kamataynen ni Jesus, nga iyan i ikaribri it kanira, kaꞌilangan indiꞌan na talagay rilihiyun nira ngaytit tagnaꞌ, baw sagkaꞌen i maski unu nga pakuriꞌ it kanira sabap it pangindiꞌ nira ngayti. ¹⁴Sabap ega situt banwa ngaytu i pirmamintiꞌ nga babanwaan tami, in daꞌga iyan ega basta-bastang siyudad kat pagdadarapaꞌen. Ituy pagpaꞌbutun tami.

¹⁵Aypaꞌ kayti, paribasay si Jesus ngaytu i egay kasbung nga Piyakamataꞌas nga Sasirduti tami, kaꞌilangan magbantug tami it Ampuꞌang Diyus it egay kaskedan. Yay ipagsamba nga pasalamat nga bagay it mga taw nga magpasakep nga matuud it kanya, ega maat mga ramu-ramu nga ipagpanalisi. ¹⁶Baw magayen gasiꞌ, ega lipa-lipaten tami i mga buwat nga magayen baw adat nga mapiyanabang tami it beken, sabap ituy esa gasing pagsamba nga pagsagyaan it Ampuꞌang Diyus.

¹⁷Baw gasiꞌ iyan i magayen, pasakep kamu it mga magpamaalaꞌ it imyu baw sunudun mi i mga munaꞌaw nirat imyu. Ka sira, iyan i katengdanan nira, magtatarima nga pirmi it pamayaꞌ mi isaꞌun ega maꞌilang i kiyarurwa mi. Tubagan nira duꞌut Ampuꞌang Diyus in pabaya-bayaꞌan nira i katengdanan nira ngaytu. Ta, simpri in pagsunudun mi sira it magayen nga pagsunud, masasagya yan sira nga magpangatengdanan. Temed in pagpataꞌbangen mi i nakem nira ka ega pagꞌintindiyen mi sira, ega naga kat ikagayen mi yan.

¹⁸Ega lipaten mi kami kat mga panalangin mi. Ka egay kat nakem namen nga pagbuwaten nameng ega tamaꞌ. Baw talagang ireg namen nga magpangaꞌgenan kami nga pirmi it egay maꞌiway kat panleteg it Ampuꞌang Diyus. ¹⁹Subrat muꞌsa pagꞌangutun ku nga pirmi mi aku nga ipagpanalangin nga sana makapaꞌuliꞌ aku naga asat imyu it madaliꞌ.

²⁰Iyan duguꞌ nga ipiyaturuꞌ it Ampuꞌan ta nga si Jesus, iyan i magpapaꞌgen it Baꞌgu ngaytung Pakiꞌupakat nga egay kaskedan. Aypaꞌ inggen si Jesus it paꞌuliꞌ it Ampuꞌang Diyus baw nagbaraꞌ kanya nga ega Basta-bastang Manigꞌeper it mga tupa, sira nga magpamayaꞌ it kanya. Ampuꞌang Diyus ngaytu i puꞌun it kaꞌimbengan it nakem, baw ipagpanalangin ku nga ildawan ya kamu ²¹it muꞌsa nga pagkaꞌilanganen mi isaꞌun, kat tabang ni Jesu-Cristo, iyan i pirmi nga mabwat mi, kaꞌirgan ya, baw magbaraꞌ kamung mga taw nga magkasagyaan ya. Aypaꞌ bantugun ta kanya it egay katupusan. Kamatuudan tu.

²²Pangiyaꞌpusan, pagꞌangutun ku, mga kasulsugan, nga sana ega maskedan kamut pagneg it panulduꞌ ku ngaytu, ka ega naga piyaꞌabwatay ku nga banar.

²³Ireg ku gasing maꞌrutan mi nga nakaliꞌwan na kat pirisuwan i sulsug tami nga si Timoteo. Ta in beteꞌ mabut kanyat semkad pabayaꞌen ku kanya pagpaꞌasan ku it imyu.

²⁴Ikumusta mi kami kat mga magpamaalaꞌ mi baw kat muꞌsang mga kasulsugan. Kamu asan, pagkumustaen kamu it mga kasulsugan mi kat pamayaꞌ sinit Italia.

²⁵Pangiyaꞌpusan nga banar, ipagpanalangin ku nga sana asat imyu nga muꞌsa i ildaw it Ampuꞌang Diyus.