Galacia

Surat ni Pablo duꞌun it Mga Magpamayaꞌ nga Taga Galacia

Galacia

Pauꞌnang Sugi-sugid

Iyan mga taga Galacia nga magpamayaꞌ it ki Cristo, ega lamang sang karugaran i paꞌaaten in daꞌga dakel, ka malayaw nga rugar i Galacia ngaytu. Kat pasepsep it beken nga mapipikir nga taw, iyan i pagpaꞌiguꞌan ni Pablo it ampang “Galacia”, mga lansangan nga Iconio, Listra, Derbe, baw Antioquia nga sakep it Pisidia. Itung mga rugar, siyakep ni Pablo, duwa ni Bernabe, kat uꞌnang panaw nira nga nanulduꞌ it Magayeng Baritaꞌ pasar it ki Cristo (Mga Binwat kapitulu 13 baw 14). Dakel nga taga iti ngayting mga rugar i namayaꞌ it panulduꞌ nira. Temed, pagkagaring na Pablo, may miyabut gasiꞌ nga mga Judio nga magpanlibeg it pikiran it mga namayaꞌ ngayti, ka ipagpaliꞌwan nira nga daꞌsira maribri in pamayaꞌ na lamang ngaytit ki Cristo. Kaꞌilangan kunuꞌ nga sunudun naga i mga urdin ni Moises nga ipiyaskel yat kanira nga mga Judio. Ipagsugid nira gasiꞌ nga ega kamatuudan i pangadal ni Pablo, pagbuwat-buwaten ya na lamang.

Aypaꞌ pagkabaritaꞌ ni Pablo it atkayti, piyatabanan yat itu na ngaytung surat i mga magpamayaꞌ duꞌun it Galacia ngayti, isaꞌun maꞌrutan nira in unu talaga i kamatuudan nga garing duꞌut Ampuꞌang Diyus pasar it iting mga bagay. Maseked-seked talaga i pademdem ni Pablo it kanira nga egay beken nga ikaribri it taw, kamatuudan nga pagsarig baw pamayaꞌ it kamataynen ni Jesu-Cristo ka, sabap it binwat ni Jesus ngaytu, maribri ta kat panriga it Ampuꞌang Diyus sabap it mga kasalaꞌan ta, maski ega nakasunud it kaꞌustuꞌan it mga urdin ni Moises. Ituy uliꞌan-uliꞌan it itung surat.

Kat muꞌsang surat nga ipiyataban ni Pablo duꞌut mga taw nga namayaꞌ it pangadal ya kat mga rugar nga piyanawan ya, ituꞌun i uꞌna. Taꞌun nga pagsurat ya kaytu, mga 50 A.D., nga sang puluꞌ may pitu nga taꞌun garing it pagꞌuliꞌ ni Jesus duꞌun it langit.

^1-2Mga magpamayaꞌ it ki Cristo nga asan it Galacia, wayan i surat ku, aku nga si Pablo nga esang apustul, nga ega taw-tiyaw na lamang i nagpiliꞌ u nagpatindeg it aken kat pagkaꞌapustul ku, in daꞌga mismu si Jesu-Cristo baw Amaꞌ ta nga Ampuꞌang Diyus nga minggen it paꞌuliꞌ it ki Jesu-Cristo ngaytu. Muꞌsang mga sulsug ta kat pamayaꞌ nga kaꞌibaan ku sini, magkumusta it imyu.

³Ipagpanalangin ku nga sana asat imyu nga pirmi i ildaw baw kaꞌimbengat nakem nga ipagbegay it Ampuꞌang Diyus nga Amaꞌ tami baw Ampuꞌan nga si Jesu-Cristo, ⁴kanya nga isiyalisi yay bilug ya kat aten nga mga kasalaꞌan isaꞌun mabilwat ya kita kat pamegbeg it karaꞌe-raꞌetan nga magsasakep it banwa kat timpu ngaytu. Binwat ya ngaytu, pabetang-betang nagat Ampuꞌang Diyus nga Amaꞌ tami. ⁵Sana bantugun ta kanya it egay kaskedan. Kamatuudan tu.

Iyan matuud nga Magayeng Baritaꞌ

⁶Talagang pagdaꞌgen aku in unuka yanay karway mi mangganti it pabetang-betang ngaytu it Ampuꞌang Diyus, kanya nga nagpanakem it imyu nga pasakep it ildaw ya nga ipiyatantu yat imyu kat binwat ngaytu ni Cristo. Ka nakumbinyu kamu nga paꞌugad duꞌun it beken nga maat Magayeng Baritaꞌ. ⁷Temed ta, yan talagay matuud, esa-esay Magayeng Baritaꞌ. Ega naytuy beken. Iyan miyabut ngayan asat imyu nga maat manigpangadal sira, magpanlibeg lamang yan it pikiran mi. Pagpaꞌresan nira nga magantiyan i Magayen ngaytung Baritaꞌ pasar it ki Cristo. ⁸Temed ta, yay matuud, in siyuy mangadal asat imyu it belag kat ipiyangadal namen ngayan, talagang kaꞌilangan rigaen kanyat Ampuꞌang Diyus it panriga nga ega pateng, maski kami nga mga apustul, u esa nang anghil nga garing duꞌut langit. ⁹Ka daꞌga baꞌ nakaꞌaat namen na baw kayti, pagsaꞌupun ku siꞌ, nga in may mangadal asat imyu it belag kat ipiyangadal namen ngaytu nga Magayeng Baritaꞌ nga piyamayaꞌ mi, dapat rigaen kanyat Ampuꞌang Diyus it panriga nga ega pateng.

¹⁰Ta sikayan daꞌga baꞌ maꞌyag nga ega iyan i pagꞌangaden ku, basta lamang sagyaan it mga taw i panulduꞌ ku. Ega maat atkayan, in daꞌga yay ipagpadaꞌeg ku kat nakem ku, masagyaan akut Ampuꞌang Diyus. Ka in yapay pagpaꞌresan ku, masagyaan akung pirmi it taw, ta daꞌga maꞌaat nga taw nay pagsirbiyan ku, ega na si Cristo?

Pamatuud ni Pablo nga Ampuꞌang Diyus i garing it panulduꞌ ya

¹¹Ka talagang ipagpamatuud ku kayti, mga sulsug ku kat pamayaꞌ, nga ega taw-tiyaw i garing it Magayen ngaytung Baritaꞌ nga ipagpanulduꞌ ku. ¹²Eeꞌ baꞌ, egaytu tiyanggap ku u itiyulduꞌ it aken it taw, talagang mismu si Jesu-Cristo na i nagpaꞌyag it aken kaytu.

¹³Siguru urut mi naga in magꞌuꞌunuy pangaꞌgenan kut tagnaꞌ, iyan magsunud aku pat rilihiyun namen nga mga Judio. Talagang pagtiꞌsen ku nga banar i mga taawan it Ampuꞌang Diyus nga magpamayaꞌ it ki Jesu-Cristo ngaytu ka ireg ku nga maꞌawaꞌ sirang muꞌsa. ¹⁴Baw talagang maraꞌang i magkasbung it aken nga kaꞌebay-ebayan ku nga mga Judio kat pagpasakep it rilihiyun namen ngaytu, paribasay eꞌget nga banar i panindeg kut unu-unu nga kaꞌugaliꞌan it mga kamagugurangan namen. ¹⁵Temed kat kaꞌildaw it Ampuꞌang Diyus it aken, piniliꞌ ya nang lagi aku parabir aku ipiyanganak baw ipiyatindeg ya aku nga manigsirbi it kanya.

¹⁶Ta, yan ipiyakilala ya nang banar kat nakem ku i anak ya, ka isaꞌun kapangadal ku i pasar it kanya duꞌun it mga taw nga ega Judio, ega talagay siyabut ku nga maski siyu. ¹⁷Ega na maat naꞌaduꞌun aku pat Jerusalem nga patulduꞌ it mga uꞌna ngaytit aken nga mga apustul, in daꞌga napanaw aku nang lagi it nagpaꞌArabia,1:17 Arabia ngaytu, maraꞌang pagtedagat uran, aypaꞌ maraꞌang gasiꞌ i taw. Ituy esa gasing puriba nga ega itiyuldut ki Pablo it taw i Magayeng Baritaꞌ. bawnga nagpaꞌuliꞌ aku naga duꞌut Damasco. ¹⁸Tulung taꞌun i nagtaꞌlib bawnga nagpaJerusalem aku, ka pakikita akut ki Pedro. Sang puluꞌ may limang aldaw i kaꞌlay ku duꞌun it kanya. ¹⁹Kat iting timpu nakitaan ku gasiꞌ si Santiago nga ariꞌ it Ampuꞌan. Duwa lamang ngayti i nakitaan ku nga apustul. Ega nay beken.

²⁰Talagang, kat panleteg it Ampuꞌang Diyus, ipagpamatuud ku nga kamatuudan i ipagsurat ku ngaytu asat imyu.

²¹Garing aku duꞌun it Jerusalem ngayti nangalaid aku siꞌ, duꞌut mga prubinsiya it Siria baw Cilicia. ²²Kat iting timpu daꞌku paꞌ kilala it mga maglalagpit it ki Cristo kat paꞌari-aring rugar duꞌun it Judea. ²³Nabaritaꞌan nira lamang nga, iyan dati nga magtiꞌes it kanira ka isaꞌun mapakuriꞌan sira sabap it pamayaꞌ nirat ki Cristo, kayti magpangadal na it pamayaꞌ ngaytu nga kuranggaꞌen ya ngaytit tagnaꞌ. ²⁴Aypaꞌ ka biyantug niray Ampuꞌang Diyus sabap it pagbaꞌgu yat nakem ku.

Egay naꞌiway it beken nga mga apustul it mga ipagpanulduꞌ ni Pablo

¹Ta, pagtaꞌlib it sang puluꞌ baw epat nga taꞌun naꞌaduꞌun aku sit Jerusalem, duwa kami ni Bernabe. Piyabayaꞌ ku gasiꞌ si Tito. ²Naꞌaduꞌun aku ka yay ipiyanakem it aken it Ampuꞌan, isaꞌun katuturan ku kat mga magpamayaꞌ duꞌun in unuy ipagpangadal ku nga Magayeng Baritaꞌ duꞌut mga piyanawan nameng babanwaan it mga taw nga ega Judio. Aypaꞌ pagꞌabut namen ngayti duꞌut Jerusalem, nagtiꞌmes daꞌan i mga pagkilalaen nga matataꞌas nga magpamaalaꞌ it mga magpamayaꞌ duꞌun, bawnga ipiyaꞌyag ku nay muꞌsa duꞌut kanira. Mga magpamaalaꞌ ngayti daꞌan i piyaꞌyagan ku isaꞌun masiguru ku nga paꞌuyunan nira i ipagpangadal ku. Ka in ega paꞌuyunan nira, barang limiꞌwan nga egay kakapulusan it buwat ku ngayti nga magpangadal duꞌun it mga taw nga ega Judio. ³Ta, subuk piyaꞌuyunan nira naga i pangadal ku ka iyan iba namen ngayting si Tito, maski Griego kanya, ega nareges nirat paturiꞌ, ⁴maski na maat ipagpaliꞌwan it beken nga paturiꞌan kanya. Mga magpaliꞌwan ngaytit atkayti, mamagbete-beteꞌ nga kasubung tami nga magpamayaꞌ arit ega. Ka yay antap it nakem nira, subuk baklayan niray karibriyan tami, nga liꞌwan tami na kat pagsunud it mga urdin ni Moises sabap maglalagpit tami nat ki Cristo Jesus. Ireg nira ipaꞌuripen tami siꞌ kat mga urdin ngayti. ⁵Temed daꞌkami nagpaꞌuyun it maski dekeyeꞌ it ipagpaliꞌwan nira ngayti, ka isaꞌun ega maragiꞌan it ega matuud i kamatuudan nga Magayeng Baritaꞌ, baw ega mateꞌag-teꞌag kamu.

⁶Ta, subung it inaat ku, iyan mga magpamaalaꞌ it mga magpamayaꞌ duꞌut Jerusalem, egay naꞌiway nira kat ipagpangadal ku. Egay tiyaldeng nira. (Maski maat pagkilalaen sira nga mataꞌas, ega yan magkalibegan it pikir ku, sabap urut ku nga, iyan Ampuꞌang Diyus, ega pagsagyaan ya i esang taw in sabap lamang it kat liꞌwan nga kabetangan ya.) ⁷Mga magpamaalaꞌ ngayti, kinilala nira nga in magꞌuꞌunu ipiyakarguꞌ it Ampuꞌang Diyus it ki Pedro i pamaalaꞌ it pangadal it Magayeng Baritaꞌ kat mga Judio, atkayan naga, aku na mismu i piyakarguꞌan ya it pamaalaꞌ it pangadal it Magayeng Baritaꞌ kat mga taw nga ega Judio. ⁸Baw in magꞌuꞌunu inildawan si Pedro it Ampuꞌang Diyus it kakayaan kat katengdanan yat kanya, iyan nagay ipiyagꞌildaw yat aken kat aken gasiꞌ ngaytu nga katengdanan. ⁹Aypaꞌ, iyan mga pagkilalaen nga piyakapagbayaꞌen it mga magpamaalaꞌ duꞌut Jerusalem, nga si Santiago, si Pedro baw si Juan, iyan namuyaan nira nga kat keseg it ildaw it Ampuꞌan it aken, dakulay paglapusan it pangadal ku kat mga taw nga ega Judio, tiyanggap nira kami ni Bernabe baw napakay sira nga kaꞌuyutan kami na nira nga mga manigbuwat it buwaten it Ampuꞌan. Ta piyagꞌupa-upakatan namen nga ipasigi namen nay amen nga pangadal duꞌun it mga taw nga ega Judio. Iyan kabilug namen nga mga Judio, yanay kanira. ¹⁰Iyan lamang i ipiyakiꞌupakat nirat amen, nga iyan gasiꞌ i pagpaꞌresan ku nga kubwaten, nga ega pabaya-bayaꞌan namen i mga kukurangen.

Ipiyatantu ni Pablo duꞌut Antioquia nga ega talaga kat pagsunud it kaꞌurdinan tumaldeng i taw kat panleteg it Ampuꞌang Diyus

¹¹Ta yan nakaꞌuliꞌ kami na duꞌut Antioquia nagbisitaꞌ it amen si Pedro. Temed miyabut nga may kamaliꞌ nga binwat ya duꞌun, aypaꞌ ega mapakay nga ega tiyaldeng ku i binwat ya ngayti. ¹²Ka yapa-yapaꞌ pagsunudun yay adat nameng magpamayaꞌ duꞌun nga maski Judio u daꞌga, magkaraꞌnen it sang kamiyan. Egay pagbidaꞌen. Temed iyan may miyabut na nga mga Judio nga garing duꞌut mga pagpamaalaꞌan ni Santiago duꞌut Jerusalem, miniꞌlam si Pedro nga barang dalaꞌan nira kanya, aypaꞌ ega na magpakikaꞌen kanya duꞌun it mga magpamayaꞌ nga ega Judio. Pagliꞌyan ya na. Ka mga miyabut ngayti, kaꞌuyutan sirat mga taw nga magꞌaat, kaꞌilangan nagang paturiꞌ i mga taw nga ega Judio, maski namayaꞌ na sirat ki Cristo. ¹³Ta it atkayti, maski mga beken nga sulsug kat pamayaꞌ nga mga Judio, magguru na gasiꞌ it buwat ya ngayti. Pati si Bernabe, nakabaya-bayaꞌ nat paꞌisti-isti nira ngayti.

¹⁴Ta yan namuyaan ku nga daꞌsira magpangaꞌgenan uyun kat kamatuudan nga Magayeng Baritaꞌ, inaat ku si Pedro kat adapan nirang muꞌsa, “Ta ikaw, maski manengteng ka nga Judio, temed inindiꞌan mu na i pagsunud it mga kaꞌurdinan kat rilihiyun tami nga mga Judio. Aypaꞌ unuka ipagpasunud mu paꞌ it mga taw nga ega Judio? ¹⁵Ka kita, Judio tami nga manengteng, nga magkilala it Ampuꞌang Diyus, ega subuk mga taw nga ega Judio nga egay pagkilala nira it Ampuꞌang Diyus ngaytu. Temed it namayaꞌ tami nat ki Cristo, ¹⁶nasepsepan tami na nga ega kat pagsunud it taw it mga urdin ipabetang kanya nga mataldeng kat panleteg it Ampuꞌang Diyus, in daꞌga kat kamatuudang pamayaꞌ baw pagsarig ya it binwat ni Cristo Jesus. Aypaꞌ, maski kita ngaytu nga mga Judio, paribasay nakasepsep nat itu ngaytu, namayaꞌ tami na it ki Cristo Jesus. Ka natantuwan tami na nga pamayaꞌ baw pagsarig tami ngaytu it binwat ni Cristo i ikapisiꞌ tat maꞌawaꞌ i kasalaꞌan tami kat panleteg it Ampuꞌang Diyus, ega maat sadili tang pagsunud it mga urdin. Ka ega talagay maski siyu nga ipabetang it Ampuꞌang Diyus nga mataldeng sabap it pagsunud yat mga urdin, ka egay magkasunud it kaꞌustuꞌan. ¹⁷Temed, kita nga magsarig nat binwat ni Cristo isaꞌun tumaldeng kat panleteg it Ampuꞌang Diyus, in beteꞌ ipabetang tami nga makasalaꞌan it mga kabilug tang mga Judio, sabap ega na pagsunudun tay mga kaꞌurdinan kat nasulagan tami nga rilihiyun, daꞌga nangangaꞌulugan nga manigpabetang-betang it kasalaꞌan si Cristo? Temed talagang ega magꞌaꞌatkayan. ¹⁸Takaꞌ in tiyananan ta na i dalan ngaytu nga pagsunud it mga urdin, ka natantuwan ta na nga ega itiꞌen i ikaribri it taw, bawnga paꞌuliꞌan ta siꞌ, ta yanay kasalaꞌan nga matuud.

¹⁹Kat paꞌres kut pagsunud it mga urdin it rilihiyun tami nga mga Judio natantuwan ku na nga palan, maski sang unuy paꞌres ku, ega ipagkapisiꞌ it tumaldeng kat panleteg it Ampuꞌang Diyus. Aypaꞌ ka, inindiꞌan ku nay pagsunud kut mga urdin ngayti. Baw pagpaꞌresan ku nay pangaꞌgenan nga uyun nga pirmi kat kaꞌirgan it Ampuꞌang Diyus, ka subuk natay aku na nga uyut ni Cristo duꞌut krus. ²⁰Ta kayti, maski egen aku paꞌ ngaytu, pagkilalaen ku nga subung it ega na akuy egen in daꞌga si Cristo na i egen kat bilug ku. Ka ega na aken nga kaꞌirgan i pagsunudun ku, in daꞌga kaꞌirgan ya na. Aypaꞌ mintras situ aku pat banwa, magpangaꞌgenan aku kat keseg it pamayaꞌ baw pagsarig ku it kanya nga Anak it Ampuꞌang Diyus, kanya nga nagpagtas it ginawa ya kat kadakulat raras ya it aken. ²¹Talagang ega mabaliwalaꞌ ku i ildaw ngaytut Ampuꞌang Diyus. Ka in taw, magkaꞌawaꞌan it kasalaꞌan duꞌun it pagsunud it kaꞌurdinan, daꞌga egay kapulusan it kamataynen ngaytu ni Cristo?” Yay inaat kut kana Pedro duꞌut Antioquia.

Unu talaga i magkapisiꞌan it karibriyan? Pagsunud it kaꞌurdinan u pamayaꞌ baw pagsarig it ki Cristo?

¹Unu, pagꞌengel-engelen kamu na nga taga Galacia? Barang magpulpug kamu na! Diyaꞌeg aku talaga in unuka magpasasaw kamut mga magpanlibeg ngayat pikiran mi it tiyaꞌseb kamu nang banar it pagpatalandagan it kamataynen ngaytu ni Jesu-Cristo duꞌut krus. ²Kayti ituy ipagpapikir kut imyu it magayen, unu piyasaruman kamu it Espiritu Santo sabap it siyunud mi i mga urdin kat rilihiyun it mga Judio u sabap it piyagnegan mi nat magayen baw piyakimatuud mi nga banar i Magayen ngaytung Baritaꞌ pasar it ki Cristo? ³In daꞌga pagkaꞌengel-engel mi na, in ega nakapapuꞌun kamu puyrat tiyabang it Espiritu Santo, ta magꞌuꞌunu mangarampus kamu in panadili? ⁴Unu, pabaraꞌen mi na nga egay kakapulusan it muꞌsang nalabayan mi? Sana ega atkayan. ⁵Ta yan piyapasarum it Ampuꞌang Diyus i Espiritu Santo kat bilug mi, u iyan minwat kanya it mga kalililuꞌang bagay asat imyu, unu baꞌ, binwat yaytu sabap it siyunud mi i mga urdin ngaytit mga Judio u sabap it piyagnegan mi baw piyamayaꞌ i Magayen ngaytung Baritaꞌ?

⁶Demdemen mi si Abraham. Kamatuudan i pagsarig baw pamayaꞌ yat Ampuꞌang Diyus, aypaꞌ kinilala kanya nga mataldeng.3:6 Genesis 15:6. ⁷Ta atkayan naga, ipagpasepsep kut imyu nga in siyuy may atkaytung pagsarig baw pamayaꞌ, kabilangan ya, kaꞌanakan ni Abraham. ⁸Baw paribasay ipiyabetang-betang nga lagit Ampuꞌang Diyus nga sabap it pagsarig baw pamayaꞌ it mga taw nga ega Judio kilalaen ya sira nga mataldeng, ipiyaꞌrut yat ki Abraham i Magayeng Baritaꞌ nga magbebtang duꞌut kasuratan nga magꞌaat,

“Garing it imu maꞌildawan i muꞌsang bangsat taw situt sinirungat langit.”3:8 Genesis 12:3b, 18:18 baw 22:18.

⁹Aypaꞌ in siyuy magsarig nga matuud it Ampuꞌang Diyus, subung it ki Abraham, kaꞌuyutan nagat ki Abraham nga tumanggap it kumpur isiyanggup it Ampuꞌang Diyus.

¹⁰Takaꞌ iyan muꞌsa nga pagsunud nirat mga urdin kat rilihiyun it mga Judio i pagpaꞌresan nira isaꞌun maribri, pagsasakpan sirat panriga it Ampuꞌang Diyus. Sabap magbebtang duꞌun it kasuratan nga magꞌaat,

“Siguradung rigaen it Ampuꞌang Diyus i ega magsunud it kaꞌustuꞌan it muꞌsang mga urdin nga magbebtang situt kasuratan ngaytu.”3:10 Deuteronomio 27:26a.

¹¹Ta daꞌga maꞌyag nga in atkayan, egay maski esa nga pagkilalaen it Ampuꞌang Diyus nga mataldeng in sabap it pagsunud yat mga urdin, in daꞌga sabap it pagsarig baw pamayaꞌ yat Ampuꞌan. Sabap magꞌaat i magbebtang duꞌut kasuratan,

“Iyan taawan ku nga ipagpabetang ku na nga mataldeng, yay magdadaꞌeg kat nakem ya, pamayaꞌ baw pagsarig yat aken.”3:11 Habacuc 2:4b.

¹²Temed iyan magsarig it pagsunud yat mga urdin, nangalaid na kat dalan it pagsarig it binwat ni Cristo. Ta maꞌyag tu nga egay kapulusan palan. Ka magꞌaat siꞌ i duꞌut kasuratan nga iyan magsunud it mga urdin, kaꞌilangan sunudun it kaꞌustuꞌan kat muꞌsang kaꞌgenan ya.3:12 Levitico 18:5. ¹³Temed kayti, ipiyagribri ta na ni Cristo kat panriga it Ampuꞌang Diyus, panriga yat mga ega ngaytu magkasunud it kaꞌustuꞌan i mga urdin. Ka imbis kita, si Cristo ngaytu i riniga it Ampuꞌang Diyus sabap it kasalaꞌan tami, subung nagat magsusurat nga magꞌaat,

“Siyu-siyu nga pangimatay it kanya, ipaggantung duꞌun it kayu nga ipagrugsuk, naꞌiguꞌ it isiyumpa it Ampuꞌang Diyus nga panriga.”3:13 Deuteronomio 21:23b.

¹⁴Ipiyasalisi ni Jesu-Cristo i sadili ya isaꞌun, iyan kagayenan nga isiyanggup it Ampuꞌang Diyus duꞌun it ki Abraham, matanggap gasiꞌ it mga taw nga ega Judio, baw isaꞌun, sabap it pamayaꞌ baw pagsarig tat kanya, pasaruman tang muꞌsa it Espiritu Santo nga isiyanggup ya.

Ega naparaw it urdin i isiyanggup it Ampuꞌang Diyus

¹⁵Mga kasulsugan, paꞌalimbawaan kuy esang adat tami. Basaꞌan basta napirmaꞌan mana i esang piyagꞌupakatan, ega na maꞌaat it maski siyu nga egay kuwintaꞌ. Ega na gasiꞌ mabwat nga dungagan paꞌ u ginisan, puyrat upakaten sit sumaꞌup. ¹⁶Ta kayti, iyan isiyanggup it Ampuꞌang Diyus it ki Abraham it tagnaꞌ, nga garing it kanya maꞌildawan i muꞌsang taw, kat sangbat lamang nga kaꞌanakan ni Abraham ngaytu i katumanan ya. Ka ega ireg sugiden matuman kat dakel nga kaꞌanak-anakan ya, in daꞌga sangbat tu i pagpaꞌulugan, si Cristo lamang. ¹⁷Ituytu i ipagpasepsep kut imyu. Garing it timpu it pakiꞌupakat it Ampuꞌang Diyus it ki Abraham, nga duꞌun ipiyagꞌunay yay sanggup yat kanya, may epat nga gatus baw tulung puluꞌ nga taꞌun bawnga ipiyaskel it Ampuꞌang Diyus it ki Moises i mga urdin ya. Ta it naꞌlay nang ipiyagꞌunay it Ampuꞌang Diyus, daꞌga maꞌyag nga ega naparaw it urdin i upakat baw sanggup ngayti? ¹⁸Ka in maꞌaten i ildaw it Ampuꞌang Diyus sabap lamang it pagsunud tat mga ipiyaskel ya ngayting urdin, unuy kapulusan it mga sanggup ya? Temed, subung nagat ki Abraham ngayti, maꞌaten lamang sabap it keseg it sanggup it Ampuꞌang Diyus, ega sabap it pagsunud tat kaꞌurdinan ngayti.

In unuka ipiyaꞌrut it Ampuꞌang Diyus i mga urdin ya

¹⁹Ta daꞌga in atkayan, unuka ibinggay pat Ampuꞌang Diyus i mga urdin ya? Unuy kapulusan nira? Ta, itu ngaytu, ipiyaꞌrut ya i mga urdin ya ngaytu isaꞌun maꞌyagan it mga taw i in unu may unu i kasalaꞌan nga pagbuwaten nira kat pangaꞌgenan nira. Pagsasakpan i mga taw it mga urdin ngaytu seked it mabut na i paꞌaaten ngayting kaꞌanakan ni Abraham, nga duꞌut kanyay katumanan it sanggup. Iyan ibinggay it Ampuꞌang Diyus i mga urdin ya, mga anghil baw si Moises i bilang suruꞌan ya. ²⁰Temed iyan ibinggay yay sanggup yat ki Abraham, egay giyamit it Ampuꞌang Diyus nga suruꞌan. Kanya mismu i simnanggup, kamatuudan it mataꞌas pat mga urdin i sanggup ya.

²¹Ta kayti, barang tanud mi kuntraꞌ na kat mga sanggup it Ampuꞌang Diyus i mga urdin ya ngaytu? Temed ega. Lamang nagbelag it puꞌun-sabap i mga urdin baw mga sanggup ngaytu. In beteꞌ may urdin nga magkapisiꞌan it kaꞌgenang egay kaskedan it mga mamagsunud kaytu, simpri yanay panggaringan it tumaldeng na i taw kat panleteg it Ampuꞌang Diyus, iti na, pagsunud it urdin ngayti. ²²Temed sabap it mga urdin ya ngayti, magkasepsepan tami i pagꞌaaten it kasuratan nga pagsasakpan it kasalaꞌan i muꞌsang taw situt sinirungat langit. Ta, basta nasepsepan nat taw i kadakulat kasalaꞌan nira, mapakay nang matuman i isiyanggup it Ampuꞌang Diyus nga maꞌawaꞌan it kasalaꞌan i kumpur sumarig baw mamayaꞌ it binwat ni Jesu-Cristo.

²³Iyan ega paꞌ miyabut si Cristo nga maat sarigan, subung tat pagpipirisuun it iti nga mga urdin, nga ega makaliꞌwan seked it timpu nga abriyen yay dalan it pagsarig baw pamayaꞌ it kanya. ²⁴Aypaꞌ, iyan mga urdin ngayti, iyan i subuk manigpadisir it aten nga magpatantu it aten it kadakulaꞌ it kasalaꞌan tami isaꞌun mandangep tami duꞌun it ki Cristo. Ka in mamayaꞌ baw sumarig tami it binwat ni Cristo ngaytu, tumaldeng tami na kat panleteg it Ampuꞌang Diyus. ²⁵Ta kayti it miyabut na si Cristo baw kat sakep ya na kita, daꞌtami na kat pamegbeg it dati ngayting manigpadisir it aten nga mga urdin.

²⁶Pati kamu nga ega Judio, mga anak na gasiꞌ it Ampuꞌang Diyus, nga maglalagpit nat ki Cristo Jesus sabap it pagsarig baw pamayaꞌ mi it kanya. ²⁷Baw kayti, muꞌsa asat imyu nga nagpabawtis nga yay katandaꞌ it maglalagpit na ngaytu it ki Cristo, subuk piyakay na si Cristo, nga ireg sugiden magpasbung nat kanyang adat. ²⁸Aypaꞌ ega nay piyagbelagan it mga Judio baw ega Judio, uripen baw ega uripen, u lalaki baw babay. Ka basta maglalagpit nat ki Cristo Jesus, inesa-esa tami nang muꞌsa. ²⁹Baw ta, in kamu, ki Cristo na, ipagpabetang kamu na nga mga kaꞌanakan ni Abraham nga pagsasakpan it muꞌsang kagayenan nga isiyanggup it Ampuꞌang Diyus it kanya.

¹Waytu paꞌ i paꞌalimbawaan ku. In beteꞌ may esang manggaden nga matay it semkad it dekeyeꞌ pay kamumugtungun nga anak ya. Iyan anak ya ngaytu, mabut i aldaw nga tumagpuꞌun kanya it muꞌsa kat pamalay-balay. Temed maski atkayan, mintras ega paꞌ ustuꞌ i idad ya, egay piyagbelagan it kabetangan ya baw kabetangan it mga uripen kat pamalay-balay ngayti. ²Sabap kat sakep kanya paꞌ it pamaalaꞌ it binggayan it amaꞌ ya it pamaalaꞌ kat seled it pamalay-balay seked it maꞌbut nay timpu nga ipiyagtirminu it amaꞌ ya nga kaya ya na nga mamegbeg. ³Atkayan naga, iyan ega paꞌ miyabut si Cristo, subung tami paꞌ it mangaꞌwaꞌ nga pagsasakpan pat mga ipagtulduꞌ nga malbaw pang pasepsep it banwa. ⁴Temed iyan naꞌbut nay ipiyagtirminu nga timpu, tiyaꞌeg it Ampuꞌang Diyus i Anak ya nga paꞌasitu. Nagbalyu kanya nga taw nga ipiyanganak it esang babay, baw nangaꞌgenan kanya kat pagpasakep it mga ipiyagꞌurdin it Ampuꞌang Diyus duꞌun it mga Judio, ⁵isaꞌun, kat kamataynen ya baw kaꞌustuꞌang pagsunud ya it muꞌsa ngayting ipiyagꞌurdin, makaparibri ya i katataawan kat panriga sabap it ega magkasunud nirat kaꞌustuꞌan i mga urdin ngayti. Ta it atkayan, maꞌaten na nga anaken tami it Ampuꞌang Diyus. ⁶Ta it paribasay mga anak ya na kita, aypaꞌ piyapasaruman ya gasiꞌ kita it Espiritu Santo, iyan Espiritu Santo nga ipiyangadal baw isiyanggup it Anak ya nga si Jesus. Aypaꞌ, kat panakem it Espiritu Santo ngaytu, mayaꞌngan nay dilaꞌ tami it tumaꞌwag it Ampuꞌang Diyus it Amaꞌ. ⁷Aypaꞌ kayti, daꞌkamu na mga uripen in daꞌga mga anak ya na talaga, nga siguradung tumanggap it kumpur ipagꞌareg ya nga kagayenan kat mga anak ya.

Pagsayangen ni Pablo nga banar i mga taga Galacia

⁸Iyan katꞌesa nga ega paꞌ pagkilalaen mi i Ampuꞌang Diyus nga kanyay kamatuudang Ampuꞌan, uripen kamu paꞌ it pagsirbi mi it mga pagtaꞌwagan mi nga egay kapulusan. ⁹Temed kayti, sabap it pagkilala it Ampuꞌang Diyus it imyu, pagkilalaen mi na kanyang banar. Ta it atkaytu na, unuka magpaꞌuripen kamu siꞌ it iyan dalan nga egay keseg baw egay kuwintaꞌ? ¹⁰Ka iyan siꞌ i pagpaꞌresan mi, iyan kat rilihiyun it mga Judio pasar it pagkilala it mga aldaw, mga bulan, mga taꞌun, baw beken pang timpu nga maat maꞌal, adimaat yay ikaribri it taw. ¹¹Talagang pagregnan ku kamu ka subuk, muꞌsang ipiyangadal ku asat imyu, magbaraꞌ na nga egay kapulusan.

¹²Asi-asi pat imyu, mga sulsug ku, pasbung kamu it aken, nga liꞌwan aku na kat pagsakep it mga urdin kat rilihiyun kut tagnaꞌ. Daꞌga baꞌ katꞌesa nagpasbung akut imyu nga ega Judio nga ega pagsasakpan it mga urdin namen ngayan? Ega maat may karat it nakem ku sabap it imyu. ¹³Ka magkademdeman ku naga i kagayen it pabetang mit aken kat tagnaꞌ ngayting paꞌasan kut imyu nga nangadal. Lamang magsarut aku kat iting timpu, ¹⁴baw talagang nakuriꞌan kamung banar sabap it panarakiten ku ngayti, takaꞌ ega naga saꞌan rinignaꞌan mi aku u biyalalaꞌan. Isan yan tiyanggap mi aku nga subung nat anghil it Ampuꞌang Diyus, baw subraꞌ paꞌ sikayan subung nat si Cristo Jesus na mismu. ¹⁵Talagang ipagpamatuud ku nga kat iting timpu, maski mata mi, in mapakay nga malwat mi lamang kat ikagayen ku, linwat mi na ka ibgay mit aken. Ta kasasagya mi katꞌesa ngayan, unu yan i atkayan ngayan nga nagꞌabut? ¹⁶Baw ta unu, kayti, ipabetang mi na aku nga kakuntraꞌ mi sabap it ipagsugid kut imyu i kamatuudan?

¹⁷Iti, mga taw ngayting magpanlibeg it pikiran mi, maat pagrarasan nira kamung banar. Temed ega magayen i antap it nakem nira. Ireg nira lamang nga ipaꞌalaid kamu it aken isaꞌun sira na lamang i pakimatuudun baw sagyaan mi. ¹⁸Sabagay ega naga yan maraꞌe-raꞌet i maat pagrarasan kamu, basta egay maraꞌe-raꞌet nga antap it nakem. Baw iyan pagraras mi ngaytit aken katꞌesa, sana ipasigi mi paꞌ maski daꞌku kaꞌadap mi. ¹⁹Kamuy subuk mga anak ku. Dakulay nalabayan ku nga kakuriꞌan katꞌesa, nga kaꞌaat ka subuk siyaꞌgidan aku, isaꞌun kasakit na i pamayaꞌ mit ki Cristo. Kayti atkayan naga, subuk daꞌku talaga magkabara-baraꞌ mintras ega paꞌ magꞌuꞌunay i pagsarig mit ki Cristo baw magpasbung kamu nang banar it adat ya. ²⁰Talagang ireg nga ireg ku nga maꞌadap ku siꞌ kamu, isaꞌun makapasiguru ku kamu kat kamatuudan, nga ega na kaꞌilangan ku nga mampang it mabeꞌgat. Sabap gulu talagay ulu ku sabap it imyu.

Piyaꞌalimbawaan si Agar baw si Sara

²¹Ta, ituy ingkut ku it imyu, kamu nga kupasakep pat mga urdin nga magsusurat duꞌun it kasuratan it tagnaꞌ, unu, daꞌkamu tiyaꞌseb it pagpaꞌiguꞌan it kasuratan ngayti? ²²Ka maat ngayan duꞌun, si Abraham, lalaki nga duwa i anak ya. Esay anak ya duꞌun it inasa-asawa yang uripen nga si Agar. Iyan esa, iyan i anak ya duꞌun it babay nga ega uripen, nga si Sara nga dati nga asawa ya. ²³Iyan anak ya ngayti duꞌun it uripen, nagbaraꞌ sabap it paꞌiguꞌ-iguꞌ it taw. Temed iyan anak ngayti duꞌun it ega uripen, nagbaraꞌ lamang sabap it isiyanggup it Ampuꞌang Diyus.

²⁴Esaytu nga alimbawa i itu nga kaꞌulugan. Si Agar baw si Sara, ladawan tu it duwa nga pakiꞌupakat it Ampuꞌang Diyus kat katataawan. Si Agar, ladawan kanya it pakiꞌupakat it Ampuꞌang Diyus nga ibinggay yay mga urdin duꞌun it Bukid it Sinai, ka kumpur pagsasakpan it mga urdin ngaytu, subung sirat uripen, subung nagat ki Agar baw anak ya. ²⁵Eeꞌ baꞌ, si Agar ngaytu, yay pagpaꞌulugan, Bukid it Sinai duꞌun it Arabia. Baw muꞌsa ngaytu, ladawan it siyudad it Jerusalem nga, kayti, pagꞌuꞌuripnen, iba it mga anak ya. Pagpapuntuꞌan kaytu, muꞌsang mamagsunud it rilihiyun it mga Judio, nga uripen paꞌ kat pagsunud nirat mga urdin ni Moises. ²⁶Temed si Sara nga ega uripen, kanyay bilang inaꞌ ta, ka ladawan kanya it iyan Jerusalem nga duꞌun it langit, nga pagpaꞌulugan kaytu, muꞌsang magsarig baw magpamayaꞌ it ki Cristo, kita nga liꞌwan na kat iting maat ipagkapisiꞌ it karibriyan, pagsunud ngaytit mga urdin ni Moises. ²⁷Subung tut magsusurat ngayan duꞌun it kasuratan nga magꞌaat,

“Sumagya ka, ikaw nga ega magpanganak nga babay.

Ikaw nga ega nakalabay it panganak it maski kaꞌsa, ipaggaꞌu-gaꞌuy mu na i kasagyaan mu.

Sabap maski piyablagan ka it asawa mu, subraꞌ pang dumakel i anak mu, subraꞌ paꞌ it kanya nga ega piyablagan it asawa ya.”4:27 Isaias 54:1.

²⁸Ta kayti, mga kasulsugan, kita nga magpamayaꞌ na it ki Cristo, kita na i mga anak it Ampuꞌang Diyus nga katumanan it isiyanggup ya, subung it ki Isaac ngayting anak ni Sara. ²⁹Takaꞌ subung nagat tagnaꞌ ngayting timpu nga, iyan ipiyanganak kat guna it Espiritu Santo, piyakuriꞌan it iti nga ipiyanganak sabap it paꞌiguꞌ-iguꞌ it taw, atkayan naga kayti. Ka mga inanak nat Ampuꞌang Diyus sabap it pamayaꞌ nirat ki Cristo, pagkuntraꞌen it mga pagꞌuꞌuripnen pat pagsunud nirat mga urdin ni Moises. ³⁰Temed maat i inaat duꞌun it kasuratan,

“Imugawun mu na i babay ngayan nga uripen, pati anak ya. Sabap anak ngayan it uripen, ega talaga mapakay nga manunubliyen nga ibat anak ngayan it ega uripen.”4:30 Genesis 21:10.

³¹Aypaꞌ, mga kasulsugan, dedemdemen mi nga ega anak tami it uripen. Yay bilang nanganak it aten, iyan ega uripen.

Kaꞌilangan maneꞌteꞌ nga ega siꞌ paꞌuripen it egay kapulusan nga dalan

¹Piyaliꞌwan tami ni Cristo kat pagkaꞌuripen tat kaꞌurdinan isaꞌun teꞌteꞌ nga daꞌta na uripen. Aypaꞌ kaꞌilangan panindegan mi na nga nakaliꞌwan kamu na. Eeꞌ baꞌ, talagang ayaw kamu nat paꞌuripen paꞌ it sumaꞌup.

²Pagnegan mi tut magayen, aku nga si Pablo i magꞌaat it imyu, basta pasakep kamu it panulduꞌ ngayting paturiꞌ isaꞌun tumaldeng kat panleteg it Ampuꞌang Diyus, egay mapulus mi it kamataynen ni Cristo. ³Saꞌupun ku siꞌ i ipagꞌaat kut imyu nga in siyu-siyuy paturiꞌ paꞌ, ega naga tumaldeng kanya in ega masunud yat kaꞌustuꞌan i muꞌsang mga urdin nga ipiyaskel it ki Moises. ⁴Ka iyan magpaꞌres nga tumaldeng kat panleteg it Ampuꞌang Diyus sabap it pagsunud ya it mga urdin ngayti, talagang nakablag nat ki Cristo. Talagang diyaꞌga ya i ildaw it Ampuꞌang Diyus. ⁵Temed kita nga magsarig baw magpamayaꞌ it ki Cristo, kat panakem it Espiritu Santo, pagsisiguruun tami nga mabut i aldaw nga ipabetang tami it Ampuꞌang Diyus nga mataldeng kat panleteg ya. Aypaꞌ, pagpaꞌbutun tami nga banar i aldaw ngayan. ⁶In maglalagpit tami nat ki Cristo Jesus talagang ega nay kuwintaꞌ it pagturiꞌ ngaytu in naturiꞌan u ega. Iyan i ega matuduꞌ, kamatuudang pamayaꞌ baw pagsarig it ki Cristo ngaytu nga magkamuyaan kat kadakulat raras tat masigkataw ta.

⁷Katꞌesa magayen naga i pagsunud mi it dalan it kamatuudan. Ta siyuy miyabaꞌ it dalan ngaytu, nga kayti magpaski kamu na? ⁸Ega yan Ampuꞌang Diyus i garing kayan, ka kanyay magpanakem it imyu nga mamayaꞌ it kamatuudan ngaytu. ⁹In sigi pang pagpabuyug-buyugan mi i pangadal ngayti nga ega kamatuudan, subraꞌ pang rumanggaꞌ i pamayaꞌ mi. Ka daꞌga baꞌ, maski dekeyeꞌ nga ipagpaꞌalsa i ipagragiꞌ, magkapaꞌalsa ya i kumpur riyagiꞌan, maat it sambatan ta. ¹⁰Takaꞌ kat keseg it pakilagpit tami it Ampuꞌan, dakulang paniguru ku nga paꞌuyunan mi i pagꞌaaten ku ngaytut imyu. Baw iyan mga magpanlibeg it pikiran mi, maski siyu sira, pagsisiguruun ku nga rigaen talaga it Ampuꞌang Diyus.

¹¹Mga sulsug ku, ega pamayaꞌnen mi i ipagꞌaat it beken nga magꞌaat, maski aku, ipagpangadal ku naga kunuꞌ nga kaꞌilangan nagang paturiꞌ i mga taw isaꞌun maribri. Temed unu yan i kamatuudan, ka in ipagpangadal ku yan nga matuud, unuka pagpakuriꞌan aku paꞌ it seked kayti it mga kabilug ku nga mga Judio? Ka simpri in ipagpangadal ku nga kaꞌilangan paturiꞌ isaꞌun maribri, ega na ipagpangadal ku nga kamataynen lamang ni Cristo duꞌut krus i mapisiꞌan tat karibriyan, nga yay magkakleban it mga kabanwa ku ngayti. ¹²Talagang, iyan mga magpanasaw ngayan it imyu, magayen ega lamang desang paturiꞌ sira, paꞌimutuꞌ na!

Magayen, sumunud ta nga pirmi it padisir it Espiritu Santo isaꞌun maꞌindaꞌeg i sadiling kaꞌirgan nga maraꞌe-raꞌet

¹³Mga sulsug ku, kat pabetang-betang it Ampuꞌang Diyus, liꞌwan kamu na kat panguripen it mga urdin ngayti nga ipiyaskel it ki Moises. Temed maski atkayan na, ega pikiren mi nga mapakay nang sumbayaꞌen i maski unu nga maraꞌway nga kaꞌirgan it bilug, in daꞌga, kat kadakulat raras mi it maꞌiba mi, magsigsirbi kamu it esa may esa. ¹⁴Sabap muꞌsa ngaytung kaꞌurdinan nga garing duꞌut Ampuꞌang Diyus, uliꞌan-uliꞌan ya, “rarasan mu i masigkataw mu it subung nagat raras mu it sadili mu nga bilug.”5:14 Levitico 19:18b. ¹⁵Temed in magsari kamu it raꞌe-raꞌeten, baraꞌan ya, maranggaꞌ talaga i pagꞌini-inibaen baw maranggaꞌ gasiꞌ i maski unu nga ikapamatuud it may pamayaꞌ mi, subung nagat mga ramu-ramu nga magkaga-kagaten seked it natay sirang muꞌsa.

¹⁶Ta itu nay ipagꞌaat kut imyu, sumunud kamung pirmi it padisir it Espiritu Santo kat pangaꞌgenan mi. Ka in atkayan, ega na sumbayaꞌen mi i karaꞌe-raꞌetan nga kaꞌiꞌirgan nga singkadan mi. ¹⁷Sabap iyan mga singkadan tang kaꞌiꞌirgan nga maraꞌe-raꞌet baw mga kaꞌiꞌirgan nga ipagpanakem it Espiritu Santo it aten, magkukuntraꞌ sira nga pirmi. Talagang nagkalaban tu i duwa ngaytu. Aypaꞌ ka iyan mga kubwaten ta, ega naga magkatabusan. ¹⁸Temed in pagpadisiran tami na it Espiritu Santo, liꞌwan tami na kat pagpaꞌres it karibriyan kat pagsunud tami it mga urdin ni Moises.

¹⁹Ka maꞌyag it aten nga muꞌsa in unu may unu i liꞌwan it singkadan tang kaꞌiꞌirgan nga maraꞌe-raꞌet. Ka mga itu ngaytu, muꞌsang kalasit pamakun duꞌun it ega asawa ta, mga adat u pagpikiren nga maraꞌway baw pagsumbayaꞌ it kaꞌiꞌirgan nga maraꞌway it egay maski unu nga pagsupil it sadili. ²⁰Mga beken paꞌ, pagsirbi it maski unu nga ganti tat Ampuꞌang Diyus, panumpa kat masigkataw kat panggamit it kepetan nga pananamayaꞌ, pakikuntraꞌ, pakidaꞌeg, kaꞌimun, kaꞌiseg, ipagpadaꞌeg i sadili, adat nga magraraꞌet it magkampiꞌ-kampiꞌen, ²¹inggi-inggiten, kasagyaan nga pagpanggaringan it ereꞌeret nga palangu, baw mga beken paꞌ nga karaꞌe-raꞌetan nga atkaytu na ngaytu. Paꞌimbanda ku it imyu, subung naga it paꞌimbanda ku it tagnaꞌ, talagang ega makaꞌuyut duꞌun it kaꞌadiꞌan it Ampuꞌang Diyus i mamagbuwat it atkaytu nga mga bagay.

²²Temed in magpasakep i taw kat pamegbeg it Espiritu Santo itu may itu i liꞌwan ya, kamatuudang raras it masigkataw, magꞌuꞌunay nga kasagyaan baw kaꞌimbengan it nakem, masagkaꞌ it kakuriꞌan it magayen i nakem, maꞌildaw, magayen i adat, magkasarigan nga banar, ²³mapiyalulus baw magkasupil nat sadili ya. Ta, in itung mga bagay, kat pangaꞌgenan tami na, unu pay kuntraꞌen it urdin? Daꞌga ega na? ²⁴Iyan mga maglalagpit it ki Cristo Jesus, subuk naꞌimatay na nira i singkadan nirang kaꞌiꞌirgan nga maraꞌe-raꞌet baw mga kaꞌiꞌirgan nirang maraꞌway. ²⁵Paribasay binggayan tamit Espiritu Santo it baꞌgung pangaꞌgenan, aypaꞌ sana pasakep tami nga pirmi kat pamegbeg ya it pangaꞌgenan ta ngaytu. ²⁶Kaꞌilangan ega na malandi-landi tami, mapiyanleꞌes-leꞌes, baw maꞌinggit it esa may esa.

Magtabang-tabangen it kakuriꞌan it esa may esa

¹Mga kasulsugan, in beteꞌ may esat imyu nga diyaꞌeg it esang kasalaꞌan kaꞌilangan, kamu nga magpasakep nga banar kat pamegbeg it Espiritu Santo, taldengen mi kanya. Temed buwaten mi tu it may dakulaꞌ nga kapalulusan. Baw magtitiyakap kamu naga nga pirmi, ka barang mabwa-mabway kamu siꞌ i madaꞌgan it sukdan ni Satanas. ²Baw yay magayen, magtabang-tabangen kamu it kakuriꞌan it esa may esa, sabap kat atkaytu nga pagbuwaten, iyan i masunud mi i ipiyagꞌurdin ni Cristo. ³Ka in beteꞌ pagpikiren it esang taw nga ega naga kaꞌilangan yang adaten i matiyabangen kanya it maꞌiba ya, pagꞌambutan ya lamang i sadili ya ka ipagpabetang ya i sadili ya nga mataꞌas, arit ega. ⁴Magayen, ineꞌteꞌen i sadili tang pagbuwaten. In masiguru ta na nga magayen na i aten nga buwat, ta yanay sagyaan. Ega maat iyan lamang i masagyaan, magkamuyaan nga sadiling buwat, magayen paꞌ it kat beken nga pamagbuwaten. ⁵Sabap iyan kagayenan nga ipagpabwat it Ampuꞌang Diyus it kada esat aten, kaꞌilangan kanya-kanya nga sadili nga pagsarungaen.

⁶Itu pay ipagꞌaat kut imyu, iyan mga manigpangadal nga magpangadal it imyu it ampang it Ampuꞌang Diyus, kaꞌilangan bagiꞌan mi sira it in unu-unu nga kagayenan i ipiyagꞌildaw it Ampuꞌang Diyus it imyu.

⁷Ega ambutan mi i sadili mi, ka ega pataꞌnan it Ampuꞌang Diyus nga tibabaꞌen kanya it maski siyu. Ka in unu i ilinwak it taw, iyan naga i kaygen ya. ⁸In siyuy magluwak it karaꞌe-raꞌetan, nga magsarit sumbayaꞌ it singkadan yang kaꞌiꞌirgan nga maraꞌe-raꞌet, egay beken nga kaygen ya, subuk rumunut i pangaꞌgenan ya baw kamataynen nga egay kaskedang panriga i abutan ya. Temed iyan magluwak it kagayenan, nga magsunud nga pirmi it padisir it Espiritu Santo it kanya, iyan i kanyang kaygen, kaꞌgenang egay kaskedan. ⁹Aypaꞌ ega maꞌyawan tami it mga magagayen nga pagbuwaten, ka pagꞌabut it timpu na, simpri may kaygen ta in daꞌta maskedan. ¹⁰Aypaꞌ, kada pagbegayan tat rugar, kaꞌilangan paꞌres tami it buwat nga magayen kat mga kaꞌibaan tami, subraꞌ na kat mga sulsug tami kat pamayaꞌ.

Pangiyaꞌpusan nga paꞌimbanda baw pangumusta

¹¹Ta, kat pangiyaꞌpusan ngaytu, aku na mismu i magsurat.6:11 Yay adat ni Pablo in pagsuratan yay mga magpamayaꞌ, ipasurat ya it katabang ya i kusugiden ya. Takaꞌ basta pangiyaꞌpusan na, kanya na mismu i sumurat, nga bilang katandaꞌ it kanya talaga i garing. Kamatuudan, dadakulaꞌ nay ipagsurat ku nga ritraꞌ.

¹²Iyan mga magpanreges it imyu it paturiꞌ, antap yan it nakem nira, tuꞌgudun sirat mga taw sabap it pagsunud nirat mga urdin it rilihiyun nira. Temed iyan talagay kat nakem nira nga magpanreges sira ngayan it imyu, magꞌiꞌlam it barang pakuriꞌan sirat mga kaꞌibaan nirang Judio in ipatindeg nira nga kamataynen lamang ni Cristo i ikapisit karibriyan, ega na pagsunud it mga urdin ni Moises. ¹³Temed maski iyan mga magpaturiꞌ, ega naga pagsunudun nirat kamatuudang pagsunud i mga urdin ngayti. Pagregesen nira lamang kamu it paturiꞌ isaꞌun tuꞌgudun sira sabap nakumbinyu nira kamu nga pasakep it kanirang dalan nga pagsunudun. ¹⁴Takaꞌ in aku, alaid nat aken i adat ngayang patuꞌgud. Ega talaga ipagpatuꞌgud ku i sadili ku in daꞌga iyan binwat ni Jesu-Cristo nga Ampuꞌan tami, nga tiyanggung ya i kasalaꞌan tami duꞌun it krus. Ka, sabap it kamataynen ya ngayti duꞌut krus, ipagpabetang ku na nga egay kuwintaꞌ it muꞌsang pagpaꞌresan situt banwa, nga maat yay ipagkatanggap it kanira it Ampuꞌang Diyus. Baw pabetang gasit banwa it aken kayti, taw nga egay kuwintaꞌ, ka pagbaliwalaꞌen ku nay mga bagay ngaytu nga pagpaꞌresan nira. ¹⁵Ka ega impurtantiꞌ in turiꞌ u ega i esang taw. Iyan i impurtantiꞌ, in nabaꞌgu nat Espiritu Santo i adat baw nakem ya. ¹⁶Kat muꞌsa nga magpangaꞌgenan uyun sikaytung mga bagay, ipagpanalangin ku nga asan it kanira nga pirmi i sanguꞌ nga tabang baw kaꞌimbengan it nakem nga ipagbegay it Ampuꞌang Diyus, ka sira ngaytu i mga matuud na nga mga taawan ya.

¹⁷Aypaꞌ, garing kayti, sana ega nay asat imyu nga pakuriꞌ it aken nga pasakep paꞌ it panulduꞌ nga kamaliꞌ. Sabap iyan i daꞌnay budlat it pinilatat bungad kat bilug ku, panindeg ku lamang it kamatuudan ngaytu, nga ipiyakarguꞌ ni Jesus it aken.

¹⁸Mga kasulsugan, ipagpanalangin ku nga sana taꞌseben nga banar i nakem mi it ildaw ngaytu nga ipagbegay it Ampuꞌan tami nga si Jesu-Cristo. Kamatuudan tu.