Efeso

Surat ni Pablo duꞌun it Mga Magpamayaꞌ nga Taga Efeso

Efeso

Pauꞌnang Sugi-sugid

Efeso ngaytu, dakulaꞌ tu nga siyudad. Ituy piyakamataꞌas nga siyudad duꞌun it prubinsiya it Asia. Duꞌun i piyatindegan it mabakas baw mabantug nga templo nga papagsambaan nirat kanira nga pagsambaen nga pagpangaranat Diana (Mga Binwat 19:27).

Si Pablo i nakapatindeg it mga magpamayaꞌ duꞌut Efeso ngaytu, baw nakapangadal kanya duꞌun it seladat duwang taꞌun (Mga Binwat 19:1-20 baw 20:17-38).

Iyan isiyurat ni Pablo i surat ya ngaytu pagpipirisuun kanya, siguru duꞌut Roma (kapitulu 3:1 baw 4:1 baw 6:20). Kat iting timpu isiyurat yay itung surat, baw iyan surat ya duꞌut mga taga Colosas, baw gasiꞌ surat ya duꞌut ki Filemon. Ipiyataban yay tulu ngaytu kat alima ni Tiquico, duwa ni Onesimo (Colosas 4:7-9, Filemon 10-12, Efeso 6:21-22). Ikaꞌpat nga isiyurat ya kat iting timpu, surat ya duꞌut mga taga Filipos. Taꞌun nga pagsurat ya it mga itu ngaytu, siguru mga 61 A.D.

Situt surat ya ngaytu, ipagpanulduꞌ ni Pablo nga magꞌesa-esa talaga i muꞌsang mga magpamayaꞌ, Judio u daꞌga, sabap it pakilagpit nirat ki Cristo. Si Cristo ngaytu i piyakaꞌulu nira, sira i subuk bilug ya (kapitulu 1:22-23 baw 4:15-16). Subung gasiꞌ sirat buwat-buwat it balay nga si Cristo i inunayan nga piyakpetan it kanira (kapitulu 2:20-21). Baw gasiꞌ, sang siraan nga mga magpamayaꞌ i subuk asawaen ni Cristo (kapitulu 5:25-32).

Esa gasing mabeꞌgat nga ipagpanulduꞌ ni Pablo sikaytu, mga magpamayaꞌ, paribasay naꞌyagan na sira pasar it pangaꞌgenan nga pagsagyaan it Ampuꞌang Diyus, kaꞌilangan uyun duꞌun i pangaꞌgenan nira. Sana limbas na nira i tagnang pangaꞌgenan nga maraꞌe-raꞌet baw baꞌgu na talagay adat nira, nga pagguruun i adat it Ampuꞌan. Baw isaꞌun malabanan nirat magayen i muꞌsang pangakal ni Satanas may siyangpit ni Pablo nga subuk pangabal nga ipiyagꞌildaw it Ampuꞌang Diyus kat muꞌsang mga inanak ya.

¹Mga sulsug namen kat pamayaꞌ nga asan it Efeso, wayan i surat ku, aku nga si Pablo, nga esang apustul ni Cristo Jesus kat pabetang-betang it Ampuꞌang Diyus. Pagsuratan ku kamu nga maglalagpit nat ki Cristo, kamu nga ipiyapinpin it Ampuꞌang Diyus nga mga taawan ya na, nga magsarig baw magpamayaꞌ nga matuud it ki Cristo Jesus ngaytu. ²Ipagpanalangin ku nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus nga Amaꞌ tami baw Ampuꞌan nga si Jesu-Cristo.

Iyan kagayenang ildaw nga mapisiꞌ kat pakilagpit it ki Cristo

³Uꞌnang masugid ku, magayen, bantugun tami nga pirmi i Ampuꞌang Diyus, kanya nga Ampuꞌan baw Amaꞌ it Ampuꞌan tami nga si Jesu-Cristo ka, sabap it pakilagpit tami it ki Cristo, inildawan ya na kita it muꞌsa ngaytung ega basta-bastang kagayenan.1:3 Maat it Ginirego, “espirituwal nga panlangit nga kagayenan.” Atkaytung kagayenan nga paꞌaaten, alimbawa, ipiyasinsiya i mga kasalaꞌan tami, inanak tami it Ampuꞌang Diyus, ipiyapinpin ya na kita nga mga taawan ya na, baw beken paꞌ. ⁴Pakilagpit ta ngaytut ki Cristo, kat pikir naytu nga lagi it Ampuꞌang Diyus parabir giyuna ya i langit baw banwa. Aypaꞌ, talagang garing paꞌ it tagnaꞌ, piniliꞌ ya na kitang lagi nga makaꞌalaid tang banar kat muꞌsang kasalaꞌan baw makaꞌadap ta duꞌut kanya it egay maꞌiway yat aten. ⁵Kat kadakulat raras yat aten, talagang ipiyasiguru ya nga, kita, magbaraꞌ nga mga anak ya sabap it buwaten ni Jesu-Cristo ngaytu. Talagang ituytu i pabetang-betang yang lagi baw kaꞌirgan ya. ⁶Aypaꞌ ega nay kaskedan it pagbantug tat kanya sabap it ega basta-basta ngaytung ildaw ya nga ibinggay yat begay-matag, nga maꞌaten sabap it binwat ni Jesu-Cristo nga pagmaꞌa-maꞌalen ya nga banar. ⁷Ka sabap it duguꞌ nga ipiyaturuꞌ ni Jesus ngaytu, ribri tami na kat panriga it Ampuꞌang Diyus sabap it mga kasalaꞌan tami. Napasinsiya nat aten i muꞌsa. Talagang egay kasbung it kaꞌildaw ya ngaytu ⁸nga ipiyagꞌatag-atag yat aten it egay pateng. Binggayan ya paꞌ kita nga magkaꞌrutan tami i mga pabetang-betang ya baw magkasepsepan tat magayen in unu may unu i mga kaꞌulugan nira. ⁹Ka kayti, paribasa it ituy kaꞌirgan ya, ipiyaꞌrut ya na i pabetang-betang ya nga, kaꞌlay ngaytu, ipagtagu-taguꞌ ya paꞌ, iyan pabetang-betang nga ipatuman ya duꞌun it ki Cristo. ¹⁰Ka in maꞌbut nay ipiyagtirminu ya nga timpu, muꞌsa nga giyuna kat langit baw kat banwa, ipaꞌalima ya nat ki Cristo nga kat pamegbeg ya na i muꞌsa.

¹¹Pakilagpit tami it ki Cristo ngaytu i pagpanggaringan it ildawan ta it karibriyan gasiꞌ kat pagdadarapaꞌen. Garing it tagna-tagnaꞌ paꞌ piniliꞌ ya kita nga lagi nga ildawan ya it kagayenan ngaytu. Sigun nagaytu kat pabetang-betang ya, kanya nga magpabetang-betang it muꞌsa uyun kat magayen nga paꞌiguꞌ-iguꞌ nga kaꞌirgan ya. ¹²Baw itu gasiꞌ i pabetang-betang ya nga mangaꞌgenan tami kat ikabantug it kabantugan ya, kami nga uꞌnang tingled i inawar duꞌun it ki Cristo nga begayan it kagayenan ngaytu kat pagdadarapaꞌen, ¹³baw kamu gasiꞌ, nga bilang sunud it amen it nagpalagpit it ki Cristo. Kayti, uyut kamu gasiꞌ it itu ngaytu sabap, iyan nagnegan mi i kamatuudan pasar it ki Cristo, iyan Magayen ngaytung Baritaꞌ nga magkabgay it karibriyan, piyamayaꞌ mi talaga. Aypaꞌ ka piyapasaruman kamu gasiꞌ it Ampuꞌang Diyus it Espiritu Santo nga isiyanggup ya garing pat tagnaꞌ, ka yay bilang markaꞌ yat imyu nga imandaꞌan it talagang mga taawan ya na kamu. ¹⁴Itu, Espiritu Santo ngaytu, kanyay keseg it isiyanggup ya ngaytut aten, nga kasiguruwan it talagang mabut nga matanggap tami i kakumplituwan it karibriyan ta ngaytu. Aypaꞌ kayti bantugun tami kanya, kanya nga ega babasta-bastaen i kabantugan ya.

Pasalamat ni Pablo baw panalangin ya pasar it mga taga Efeso

¹⁵Aypaꞌ ka, garing it nabaritaꞌan ku i pasar it pagsarig baw pamayaꞌ mi it Ampuꞌan nga si Jesu-Cristo, baw iyan raras mi it mga sulsug mi kat pamayaꞌ, ¹⁶talagang ega magkatupu-tupus i pasalamat ku duꞌun it Ampuꞌang Diyus sabap it imyu, baw pagsangpiten ku gasiꞌ kamu nga pirmi kat panalangin ku. ¹⁷Ka pagꞌangutun ku duꞌun it Amaꞌ tami nga mabantug, kanya nga Ampuꞌang Diyus it Ampuꞌan tami nga si Jesu-Cristo, nga kat keseg it Espiritu Santo nga magsasarum kat bilug mi, sana begayan ya kamu nga subraꞌ kamung kumaꞌrut baw kasepsep isaꞌun makilalaan mi nga banar i adat baw mga pabetang-betang ya. ¹⁸Sana paꞌyagen yang banar i mga pikiran mi isaꞌun maꞌrutan mit magayen i kagayenan ngaytu nga pagsisiguruun tami nga yay ipiyabetang-betang ya nga ibgay yat aten. Ka talagang ega basta-basta i kabantugan it kagayenan nga magꞌaꞌareg kat muꞌsa nga piniliꞌ baw ipiyapinpin ya ngaytu nga mga taawan ya. ¹⁹Ipagpanalangin ku gasiꞌ nga sana ipatantu yat imyu i kadakulat ega basta-bastang guna ya nga ipagpalabay yat aten nga mga magpamayaꞌ. Ipiyalteg yat aten i keseg it guna ya ngaytung egay kasbung ²⁰iyan inggen ya si Cristo it paꞌuliꞌ baw piyaꞌdung ya duꞌun it mabantug nga puwistuꞌ nga kat iwanan ya nga ayun nga duꞌut langit. ²¹Sikayan naꞌrutan ta nga subraꞌ talaga i kataꞌasan ni Cristo ngaytu kat kataꞌasan it maski unu pang beken nga magpamegbeg baw may pudir duꞌut lawang.1:21 Pagpapuntuꞌan kaytu, mga anghil, iyan magagayen nga mga anghil baw iyan maraꞌe-raꞌet nga kimnuntraꞌ it Ampuꞌang Diyus. Mga maraꞌe-raꞌet ngaytu, dakel-dakel na i panaꞌwag it kanira, nga subung it liꞌyen, panyaꞌen, tandayag, balbal, baw beken paꞌ. Maski magpataꞌwag nga diwata i mga itu ngaytu, temed yay matuud maraꞌe-raꞌet nga muꞌsa nga magpandayaꞌ it aten nga taw. Maski unu nga pagtaꞌwagan it taw situt sinirungat langit, subraꞌ nga mabantug si Cristo ngaytu, ega lamang kayting timpu, pati kat pagdadarapaꞌen nga mabaꞌgu i banwa baw langit. ²²Talagang ipiyabegbeg it Ampuꞌang Diyus it ki Cristo i muꞌsang bagay. Kanyay piyakaꞌulu nira nga ipiyagbegay it Ampuꞌang Diyus kat muꞌsang mga magsarig baw magpamayaꞌ it kanya. ²³Sabap kabilangan it mga magpamayaꞌ ngaytu, subuk bilug ya, nga pangumplitu1:23 Ituy mga kaꞌalimbawaan it itu ngaytu. Si Cristo i subuk lalaki nga mangasawa, kita i subuk babay nga asawaen ya (Mga Ipiyalteg 21:9). Beken gasiꞌ, si Jesus i subuk puꞌun baw tangkayan it luwak nga ubas, kita i subuk mga sanga ya (Juan 15:5). Esa gasiꞌ, si Jesus i subuk manigꞌeper, kita i subuk mga tupa nga pagꞌeperan ya (Juan 10:14-15). Beken paꞌ gasiꞌ, si Cristo i piyakaꞌulu, kita i subuk bilug ya (Colosas 1:18). Kat muꞌsa ngaytung kaꞌalimbawaan, kita i pangumplitu it kanya. it kanya, kanya nga kaꞌustuꞌang kakumplituwan it muꞌsang-muꞌsa.

Iyan mga maglalagpit it ki Cristo, binggayan nat baꞌgung kaꞌgenan

¹Talagang kamu katꞌesa, kaꞌalimbawaan mi, subuk patay kat panleteg it Ampuꞌang Diyus kat kadakulat mga kasalaꞌan mi nga kuntraꞌ kat kaꞌirgan ya. Egay maski unu nga magpangbit kat nakem mi in pasar it pagkilala it kanya. ²Egay beken nga pagragaen mi it tagnaꞌ ngayti, karaꞌe-raꞌetan situt banwa ngaytu. Sabap kat iting timpu pagsasakpen kamu paꞌ it pagbayaꞌen it mga maraꞌe-raꞌet, sira nga magpupudir duꞌut lawang, iyan mga magpanlud baw daꞌga nga magbebegbeg it mga taw kayti nga magkuntraꞌ it Ampuꞌang Diyus. ³Yay matuud, tagnaꞌ, atkayan nagay adat tami nga muꞌsa ka pagsunudun lamang i singkadan tang adat nga maraꞌe-raꞌet. Pagsumbayaꞌen i maraꞌe-raꞌet nga kaꞌirgan it bilug baw in unu nga kat pikiran. Aypaꞌ kat adat tami ngayti it tagnaꞌ, kaꞌuyutan tami talaga kat mga taw nga rigaen it Ampuꞌang Diyus, ka egay beken nga tumbas it aten nga taw nga makasalaꞌan. ⁴Temed ta, talagang bastanting-bastanti i kaꞌildaw ngaytut Ampuꞌang Diyus baw subray basta i raras ya it aten. ⁵Sabap maski subuk patay ta nang patay sabap it kasalaꞌan tami, subuk ipiyaꞌuyut ya na kita it ki Cristo nga inggen yat paꞌuliꞌ, nga begayan tami na it kaꞌgenang egay kaskedan. Talagang sabap lamang it ildaw ngaytut Ampuꞌang Diyus maribri tami kat panriga yat tagnang pangaꞌgenan ta. ⁶Baw iyan piyaꞌuliꞌ ya si Cristo Jesus duꞌut langit nga piyaꞌdung duꞌut mabantug nga puwistuꞌ, subuk ipiyaꞌuyut ya gasiꞌ kita it kanya, nga kayti subuk magꞌaꞌdung tami gasiꞌ nga iba ya duꞌun it piyaꞌdungan ngaytit kanya duꞌut langit.2:6 Subuk uyut tami sabap it pakilagpit tat ki Cristo ngaytu, baw talagang mabut i aldaw nga duꞌun ta nang matuud, magsasagpun. ⁷Binwat yaytu i atkaytu ka isaꞌun, garing kayti seked it kaꞌnu-kaꞌnu, ipatanyag ya i egay kasbung nga kabastantiyan it ildaw ya ngaytu nga ibinggay yat aten it begay-matag kat binwat ngaytu ni Cristo Jesus. ⁸Talagang kaꞌildaw ngaytut Ampuꞌang Diyus, yanayan i puꞌun it naribri tami na kat panriga yat kasalaꞌan tami, sabap it pagsarig baw pamayaꞌ tami it ki Cristo. Baw maski pagsarig baw pamayaꞌ ta ngaytu, ipagbegay yat aten, egaytu maat kitay garing. ⁹Aypaꞌ ega makapalandi-landi it maski siyu nga, sabap it kagayen it sadili yang buwat i karibriyan ya ngaytu. ¹⁰Sabap iyan pagbaꞌgu it adat ta kayti, Ampuꞌang Diyus i garing kaytu. Ipiyalagpit ya kita duꞌut ki Cristo Jesus baw biyaꞌgu ya i pangaꞌgenan tami isaꞌun gamiten ta na kat buwat nga magayen, nga ipiyagꞌareg yang lagi it aten garing paꞌ it tagnaꞌ.

Mga maglalagpit it ki Jesus, subuk sang kadugu-duguꞌan na.

¹¹Talagang panawun it pikir mi i tagnaꞌ nga kabetangan mi. Paribasay ega Judio kamu baw ega tiyuriꞌan aypaꞌ, pabetang it mga Judio it imyu, timawaꞌ nga ega mga taawan it Ampuꞌang Diyus. Sira kunuꞌ i mga taawan ya ka panaꞌwag it kanira, Mga Turiꞌ. Temed pagturiꞌ nira ngaytu, kat liꞌwan lamang it bilug nira, nga binwat lamang it taw.2:11 Iyan pagturiꞌ nga pagsagyaan it Ampuꞌang Diyus, kat seled, nga nakem tami i subuk tiyuriꞌan. Basaen i duꞌut Roma 2:28-29 i paꞌyag ni Pablo it in magꞌuꞌunu subuk turiꞌan i nakem. ¹²Demdemen mi nga kat timpu ngayting itiꞌen magbeblag kamu it ki Cristo. Daꞌkamu kaꞌuyutan kat mga Judio, nga sira i mga taawan it Ampuꞌang Diyus nga pagꞌildawan ya. Baw ega sakep kamu it mga pakiꞌupakat yat kanira nga magsugid it ega basta-bastang sanggup ya.2:12 Sanggup ngaytu nga paꞌaaten, karibriyan nga taban ni Jesu-Cristo. Talagang tagnaꞌ paꞌ ngayti egay kagayenang pagꞌina-inawaren mi, baw egay uru-urut it paꞌaaten ngaytung Ampuꞌang Diyus. ¹³Temed kayti, it maglalagpit kamu nat ki Cristo Jesus, ega na subung pat tagnaꞌ ngayti nga alaid kamu paꞌ kat Ampuꞌang Diyus. Kayti, kat keseg it duguꞌ ngayti ni Cristo nga ipiyaturuꞌ ya, ipiyaꞌadeꞌdeng kamu na.

¹⁴Talagang, sabap it ki Cristo ngaytu, magkagayen tami na, kami nga mga Judio baw kamu nga ega Judio. Inesa-esa ya na kita ka piyaraw ya na i pagkuntra-kuntraꞌen tami nga yanay magkaꞌarbeng it aten, nga daꞌga ipagkapagꞌiba-iba tami. ¹⁵Paribasay ipiyasalisi ya i sadili ya nga bilug, sikayan inawaꞌ ya na i dalan ngaytit pagsunud it mga urdin ni Moises, mga urdin nga magsugid it muꞌsang adaten kat rilihiyun namen nga mga Judio. Ta it atkayan nagbaraꞌ na nga subuk sang kaduguꞌan lamang kat panleteg it Ampuꞌang Diyus i muꞌsang magpamayaꞌ it ki Cristo, maski unuy bangsa nira. Inabriyan ya talaga i dalan it pagkagayen. ¹⁶Ka sabap it kamataynen ya ngayti duꞌun it krus, tiyabtab ya na i pagkuntraꞌ it mga Judio baw mga bangsa nga ega Judio. Surubung nga piyapaꞌuliꞌ ya sira duꞌun it Ampuꞌang Diyus baw binwat nga subuk sang kabilu-bilugan na. ¹⁷Limnampud kanya situt banwa ka ipiyangadal yat katataawan in magꞌuꞌunu makanira i matuud nga kaꞌimbengan it nakem, kamu nga mga ega Judio nga paꞌaateng alaid kat Ampuꞌang Diyus, baw kami nga mga Judio nga adeꞌdeng it kanya. ¹⁸Ka sabap it ki Cristo ngaytu, surubung tami na kayti nga pagtanggapen it Diyus Amaꞌ in magpatpad tami duꞌun it kanya kat tabang it Espiritu Santo nga magsasarum situt bilug tami nga muꞌsa.

¹⁹Aypaꞌ ega na subung kamu it dayuꞌan u belag pang bangsa nga ega mga taawan it Ampuꞌang Diyus, in daꞌga kabanwa kamu na it mga taawan ya ngaytu nga piniliꞌ baw ipiyapinpin ya kat beken nga taw situt sinirungat langit. Kaꞌuyutan kamu paꞌ it mga anak ya kat seled it pamalay-balay ya. ²⁰Kabilangan it aten nga mga magpamayaꞌ, subuk balay nga may inunayan. Si Cristo Jesus i inunayan ngaytu nga kanya i magbegay it ega basta-bastang kabakdan i balay. Iyan mga apustul baw mga prupitaꞌ ya, sira i subuk mga arigi it balay ngaytu. Baw kamu na i subuk mga buwat-buwat yang beken. ²¹Si Cristo i piyakpetan it muꞌsang mga buwat-buwat ngaytu. Nakapagkabit-kabiten sira talagat magayen baw, sabap it pakilagpit nira it Ampuꞌan ngaytu, sigi nga magdakulaꞌ i balay ngaytu, magbaraꞌ nang mabakas nga papagsambaan. ²²Baw sabap it pakilagpit mit ki Cristo, magkakabit kamu na gasiꞌ i imyu duꞌun, kaꞌuyutan it beken ngaytu nga buwat-buwat. Kitang muꞌsa i pagbuwaten ni Cristo nga magayeng pagtataꞌidan it Ampuꞌang Diyus kat pagpasarum it Espiritu Santo situt bilug ta.

Manigsirbi si Pablo it Ampuꞌang Diyus kat ikagayen it mga taw nga ega Judio

¹Aypaꞌ sabap it muꞌsa ngaytung ituꞌun, sigi talagang panalangin ku pasar it imyu, aku nga si Pablo nga pagpipirisuun sabap it pagsirbi ku it ki Cristo Jesus kat ikagayen mi nga taw nga ega Judio. ²Siguru pagꞌuꞌrutan mi na i katengdanan ku ngaytu nga ipiyakargut Ampuꞌang Diyus it aken nga manigpangadal aku kat mga bangsa nga ega Judio it pasar it kaꞌildaw ya. ³Nabaritaꞌan mi siguru nga may subuk ilimbaw nat Ampuꞌang Diyus it aken nga esang tagu-taguꞌ nga pabetang-betang ya. (Subung nat nakapaꞌyag ku na nga lagit dekeyeꞌ kat nakasurat ku na, ⁴nga in basaen mi mamuyaan mi in sang unuy kasepsep ku it tagu-taguꞌ ngaytung paꞌiguꞌ-iguꞌ pasar it ki Cristo.) ⁵Itung paꞌiguꞌ-iguꞌ, ega ipiyaꞌrut it Ampuꞌang Diyus kat mga taw it tagnang mga timpu temed kayti, kat tabang it Espiritu Santo nga ipiyapasarum ya duꞌun it bilug nira, ipiyatantu ya na kat mga piniliꞌ ya nga apustul baw prupitaꞌ. ⁶Ta, ituytu i pabetang-betang ngaytung paꞌaaten, nga iyan mga taw nga ega Judio, kat pagtanggap nirat Magayen ngaytung Baritaꞌ, kasbung na sirat mga Judio nga may kabagiꞌan nat ildaw ngaytung subray basta nga garing duꞌut Ampuꞌang Diyus. Kakabit gasiꞌ sira it sang kabilu-bilugan nga bilug ni Cristo Jesus, baw sabap it pakilagpit nirat kanya, sira gasiꞌ i tumanggap it muꞌsang isiyanggup it Ampuꞌang Diyus nga kagayenan.

⁷Talagang kat kaꞌildaw it Ampuꞌang Diyus it aken baw kat keseg it guna ya, binwat ya aku nga manigsirbi ya kat pangadal ku it Magayen ngaytung Baritaꞌ. ⁸Kalililuꞌan talagaytu ka maski piyakatimawaꞌ nga taawan it Ampuꞌang Diyus, akuy timawaꞌ pat kanya. Takaꞌ maski atkayan, kat kadakulat ildaw ya, napakay ya naga aku nga binggayan it itung buwaten, nga ipangadal ku duꞌun it mga taw nga ega Judio i pasar it kagayenan nga magkapisiꞌ duꞌun it ki Cristo, kagayenan nga bastanting-bastanti baw ega pagtaꞌseben it pikiran. ⁹Baw ipiyakarguꞌ ya gasit aken i buwat nga ipaꞌyag ku kat muꞌsang taw in magꞌuꞌunu matuman ya i pabetang-betang ya nga garing pat ega pay banwa ipagtagu-taguꞌ ya, kanya nga nagguna it muꞌsa. ¹⁰Ka iyan mga magpamegbeg baw may pudir duꞌut lawang,3:10 Siguru, iyan mga magagayeng anghil lamang i pagpapuntuꞌan kaytu ka maꞌal it kanira i mga atkaytu nga bagay (Lucas 15:10, 1 Pedro 1:12, Mga Ipiyalteg 5:11-12). in maltegan nira i pagꞌesa-esa it mga bangsat taw nga magsarig baw magpamayaꞌ nat ki Jesus, matanyag it kanira i kasepsep it Ampuꞌang Diyus it muꞌsang bagay baw kagayen it mga pabetang-betang ya. ¹¹Mga pabetang-betang ya ngaytu, garing pat ega pay banwa, baw ipagpatuman kayti it ki Cristo Jesus nga Ampuꞌan tami. ¹²Sabap it pakilagpit tami it ki Cristo ngaytu, nga ituy liꞌwan it pamayaꞌ tat kanya, magkaꞌadap tami na duꞌut Ampuꞌang Diyus ka ega nay maski unu nga lesa. Magkadiritsu ta na duꞌut kanya i maski unu nga kusugiden it masagyay nakem tami nga ega nay pagpangangaliꞌan. ¹³Aypaꞌ pagꞌangut-angutun kut imyu nga ega ikaranggat pamayaꞌ mi i mga kakuriꞌan nga paglabayen ku sabap it imyu, ka ipagsugid ku nga kat ikabantug mi tu.

Mga ipagpanalangin ni Pablo kat ikagayen it mga taga Efeso

¹⁴Aypaꞌ, sabap it ega basta-basta ngaytung ildaw it Ampuꞌang Diyus nga Amaꞌ tami, talagang ipagpanluud ku na duꞌun it kanya, ¹⁵kanya nga piyakaꞌAmaꞌ it muꞌsang mga inanak ya, kat langit na baw situ pat banwa, nga pagpangaranan nat pamalay-balay ya.3:15 Kapitulu 2:19. ¹⁶Ipagpanalangin ku duꞌut kanya nga garing kat kadakulat kabantugan ya nga egay kaꞌbusan, sana begayan ya kamut kaksegan it nakem, nga magꞌeꞌget talagay pamayaꞌ mi kat tabang it magsasarum nga Espiritu Santo. ¹⁷Baw gasiꞌ nga, sabap it pagsarig baw pamayaꞌ mi ngaytu, manakenaꞌ si Cristo asan it nakem mi. Ipagpanalangin ku gasiꞌ nga subuk maggagamut baw magrurugsuk i kararas baw pagmaꞌal mi, ¹⁸isaꞌun sang kamuwan it muꞌsang mga taawan it Ampuꞌang Diyus i begayan it Ampuꞌan nga matantuwan mi nga banar in sang unu nga ega babasta-bastaen baw kabantug i raras ni Cristo it aten. ¹⁹Baw sana subraꞌ nga malabayan mi baw taꞌseben i nakem mi sabap it raras ya ngaytu, lamang ega ngaytu magkatangked-tangked it taw i kapuꞌsaan ya, isaꞌun makumplituwan kamu it kakayaan nga ikaguru it muꞌsang ipagpaguru it Ampuꞌang Diyus it imyu nga adat ya.

²⁰Aypaꞌ, kaꞌilangan, talagang bantugun tami i Ampuꞌang Diyus ngaytu, kanya nga magkabwat it bastanting-bastanti baw subrang-subraꞌ kat muꞌsa nga pagꞌangutun ta duꞌut kanya, u kat maski pagpikiren ta, sigun kat guna ya ngaytu nga paglabayen ta kat pangaꞌgenan tami. ²¹Eeꞌ baꞌ, bantugun kanya it egay kaskedan seked it kaꞌnu-kaꞌnu sabap it kabantugan ya nga magkamuyaan kat kumpur mga taawan ya baw magkamuyaan gasiꞌ duꞌun it ki Cristo Jesus. Kamatuudan tu.

Mga magpamayaꞌ it ki Cristo, magꞌesa-esa nga subuk sang kabilu-bilugan

¹Aypaꞌ, kayti, aku nga pagpipirisuun na sabap it panindeg baw pagsirbi ku it Ampuꞌan, ipagbenge-bengel ku nga banar nga mangaꞌgenan kamu nga uyun duꞌun it ipiyabetang-betang it Ampuꞌang Diyus nga pangaꞌgenan it mga taawan ya. ²Iyan bay magayen nga ugaliꞌen mi, mapiyababaꞌ kamu baw mapiyalulus, nga ega makusked it kasalaꞌan it mga maꞌiba mi asat imyu, in daꞌga pagsagkaꞌen mi it magayen i nakem sabap it raras mit kanira. ³Paꞌresan mi nga banar i pagꞌurunyun nga ipagbegay it Espiritu Santo nga kat ikaꞌimbeng it pakiꞌiba-iba mi. Ka daꞌga baꞌ tiningled kamu na kat panleteg it Ampuꞌang Diyus? ⁴Sabap kita, subuk sang kabilu-bilugan lamang, baw esa-esa i Espiritu Santo nga magsasarum situt bilug ta. Subung naga, esa-esay kagayenang pagꞌiꞌinawaren ta kat pagdadarapaꞌen, kita nga piyanakman it Ampuꞌang Diyus nga pasakep it kanya. ⁵Baw gasiꞌ esa-esay Ampuꞌan nga pagsarigan ta. Kanya lamang i mapakay nga sarigan it taw. Baw esa-esa lamang i pagpapuntuꞌan it pagbawtis ta. ⁶Pati Ampuꞌang Diyus, nga Amaꞌ tami nga muꞌsa, esa-esa talaga kanya. Kanyay magpamegbeg it muꞌsang magpamayaꞌ, duꞌun kanya magsasarum kat kanirang muꞌsa, baw paggamiten ya sirang muꞌsa kat pagtuman it mga pabetang-betang ya.

⁷Temed ega maat surubung tang muꞌsa kat kakayaan ka kada esat aten, inildawan ni Cristo it in unu nga kakayaan i napikir ya nga bagay it aten. ⁸Ka subung it magbebtang ngayan duꞌun it kasuratan nga magꞌaat,

“Iyan miyuliꞌ kanya duꞌun it piyakadibwat na nga banar, piyabayaꞌ ya i muꞌsang mga kalaban ya nga bilang ipiyagparayag-rayag ya, kamatuudan it diyaꞌeg ya sira. Baw may ipiyagꞌildaw yat katataawan nga begay ya.”4:8 Awit 68:18.

⁹Ta paribasay inaat ngayan nga miyuliꞌ kanya duꞌun it piyakadibwat, daꞌga baꞌ ireg sugiden sikayan, naꞌasitu kanya daꞌan it denaꞌ ngaytu? ¹⁰Baw iyan limnampud nga naꞌasitut banwa, kanya naga i miyapyat duꞌun it liyaknibat langit isaꞌun makabgay ya i ikakumplitu it muꞌsa. ¹¹Ta yan beken nga ipiyagꞌildaw ya, mga apustul. Iyan beken, mga prupitaꞌ. Mga beken gasiꞌ, mga manigpanaw nga magpangadal it Magayeng Baritaꞌ kat mga taw nga ega paꞌ namayaꞌ. Baw iyan mga beken gasiꞌ, mga manigpamaalaꞌ baw manigpangadal kat mga namayaꞌ na. ¹²Ta muꞌsa ngaytu, ipiyagꞌildaw it Ampuꞌan isaꞌun matulduꞌan nira i kadakel it mga magpamayaꞌ it muꞌsa nga kaꞌilangan nira kat kanya-kanyang pagsirbi it Ampuꞌan. Ta, in sarungaen it magayen it kada esa i pagsirbi nira ngaytu, kitang muꞌsa, nga subuk bilug ni Cristo, kemseg nang kemseg ¹³seked it urunyun tami nga muꞌsa kat pagsarig, pamayaꞌ, baw pagkilala tat ki Jesus nga Anak it Ampuꞌang Diyus. Eeꞌ baꞌ, seked it subuk ustuꞌ tami na nga mga taw nga nakaꞌbut na kat ega basta-bastang kakumplituwan nga natantuwan ta duꞌun it ki Cristo ngaytu. ¹⁴Ka ireg it Ampuꞌan nga daꞌta na subung it mangaꞌwaꞌ nga magkataban it duꞌun-sini nga panulduꞌ, nga subung sirat sakayan nga maglultaw lamang nga ipagtingbeꞌ-tingbet langeb baw ipagpirpir it deres. Magayen daꞌta na maluku it panulduꞌ it mga taw nga ega magayen i antap it nakem nira ka subung sirat magpangapaꞌ lamang it in siyuy maꞌakalan nira. ¹⁵In daꞌga iyan bay magayen, mangaꞌgenan tang pirmi uyun kat kamatuudan nga garing duꞌut Ampuꞌang Diyus, nga pagmaꞌal baw kararas tami i magpadisir it aten. Ka in atkayan subraꞌ nang manggayen i pagꞌustuꞌ tami, kita nga subuk bilug ni Cristo, nga kanyay ulu. ¹⁶Kat pamegbeg ya, mga buwat-buwat it bilug ngaytu, magsugpa-sugpaten it magayen baw magꞌesa-esa sabap it mga ipagkabit it kanira. Baw ta, in kada esat aten, nga kitay mga buwat-buwat ngaytu, in magsarunga na it kanya-kanyang katengdanan kat bilug ngaytu, egay beken kemseg baw manggayen i muꞌsang bilug kat keseg it raras it esa may esa.

Iyan baꞌgu nga pangaꞌgenan duꞌun it ki Cristo

¹⁷Ta kayti, it Ampuꞌan i nagpakarguꞌ it aken it katengdanan ku, aypaꞌ ituy ipagꞌaat kut imyu nga ipagbenge-bengel ku na nga kuydaw kamu na mangaꞌgenan nga subung paꞌ it mga taw nga egay kila-kilala nirat Ampuꞌang Diyus, nga egay kapulusan it pamagpikiren nira. ¹⁸Talagang madlem i pasepsep nira. Kat kadsen it ulu nira egay maski unu nga uru-urut nira pasar it kamatuudan. Maꞌyag nga ega kanira i pangaꞌgenan nga ipagbegay it Ampuꞌang Diyus. ¹⁹Ka piyaꞌubasan nirang banar i pagsumbayaꞌ it kaꞌiꞌirgan nga mararaꞌway it egay maski unu nga pagsupil it sadili. Iyan na talagay pagsarungaen nirang pirmi, karaꞌe-raꞌetan nira ngaytu. Egay paꞌna.

²⁰Temed kamu, pagpamayaꞌ mit ki Cristo, nasiguru mi nga ega atkayan i pangaꞌgenan nga magkapakay ya. ²¹Ka talagang nabaritaꞌan kamu pasar it kanya baw tiyulduꞌan kamu nagat magayen it kamatuudan nga garing duꞌut kanya. (Pagsisiguruun ta nga, basta kanya i garing, purus kamatuudan.) ²²Aypaꞌ, subung nat ipiyagtulduꞌ it imyu pasar it pangaꞌgenan mi nga maraꞌway, indiꞌan mi na. In subuk marignaꞌ nga pakayan, lebasen mi na. Sabap in pangaꞌgenan mi paꞌ ngaytu nga maraꞌway i pagsunudun, pagꞌakalan kamu lamang. Ka tanud mi kasagyaan i liꞌwan it pagsumbayaꞌ mit kaꞌiꞌirgan mi nga maraꞌway, arit subuk magrunut lamang i pangaꞌgenan mi. ²³Kaꞌilangan mabaꞌgu na i nakem baw pikiran mi. ²⁴Eeꞌ baꞌ, it limbas mi na i tagnang pangaꞌgenan nga maraꞌway, sana iyan siꞌ i pakayen mi, pangaꞌgenan nga talagang nabaꞌgu nat Ampuꞌang Diyus, pangaꞌgenan nga bilang ladawan it kamatuudang pagkamataldeng ya baw adat ya nga alaid kat muꞌsang kasalaꞌan.

²⁵Ta, it atkayti na, magayen indiꞌan mi nay sugi-sugid nga egay matuud ya. Kaꞌilangan, muꞌsang ipagsugid ta kat maꞌiba ta, purus kamatuudan. Ka daꞌga baꞌ magkakabit tami nga muꞌsa kat sang kabilu-bilugan?

²⁶In beteꞌ may maꞌisgan mi, pataꞌliben mi lamang isaꞌun daꞌkamu na maꞌulug kat kasalaꞌan sabap it iseg mi ngayti. Baw ega pagdedemdemen mit maꞌlay, in daꞌga awaꞌen mi na kat nakem mi it ega paꞌ semdep i aldaw. ²⁷Ka in pakaꞌlayan mi, mabgayan mit rugar si Satanas baw rayaken ya kamu duꞌun it kasalaꞌan.

²⁸Iyan taw nga magtakaw i adat ya, kaꞌilangan indiꞌan ya na baw ipaturuꞌ ya nay liꞌnget ya kat in unu nga buwaten nga magayen, isaꞌun may ikatabang ya paꞌ kat in siyu nga may kakurangan.

²⁹Kaꞌilangan gasiꞌ ega na liꞌwanan i mga baꞌbaꞌ mi it pangarampangen, in daꞌga purus magagayen nga ipagmapaꞌgen it pamayaꞌ it beken baw makatabang it kanira kat in unu nga kaꞌilangan nira.

³⁰Paꞌalaidan mi na i maski unu nga buwat nga magkasmekan it Espiritu Santo nga ipiyapasarum it Ampuꞌang Diyus kat bilug mi, kanya nga pagpangaranat Santo ka alaid kanya kat muꞌsang kasalaꞌan.4:30 Esang puntuꞌ it ampang ngaytu nga “santo”, alaid kat muꞌsang kasalaꞌan. Dedemdemen mi nga Espiritu Santo ngaytu i subuk markaꞌ it Ampuꞌang Diyus it imyu nga kariꞌgenan mi it, kamu, maribri kat panriga ya sabap it kasalaꞌan mi in maꞌbut nay ipiyagtirminu nga aldaw.

³¹Aypaꞌ iyan talagay kaꞌilangan, awaꞌen mi na i muꞌsa ngaytu kat pangaꞌgenan mi, nakem nga makusakal, kaꞌiseg, pakitabug, baw masisigra nga ampang nga pandalaꞌ mit beken. Ayaw kamu nat pangampang-ampang it maꞌiba mi nga talagang kupanggated kamut kanira. Ibuntal mi na talagay muꞌsa ngaytu. ³²Baw itu nay magayen nga adaten mi, kaꞌilangan masakit kat nakem mi i makuring kabetangan it maꞌiba mi baw maꞌildaw kamu nat esa may esa. Magpasi-pasinsiyaen kamu gasit esa may esa nga subung it pagpasinsiya it Ampuꞌang Diyus it imyu sabap it pagsarig mi it kamataynen ni Cristo.

Kaꞌilangan, mga taw nga naꞌyagan na, uyun na duꞌun i pangaꞌgenan nira

¹Ta it kayti, kabilangan mi, mga anak kamu na it Ampuꞌang Diyus nga pagmaꞌalen ya, sana paꞌresan mi nga guruun mi naga kanya. ²Mangaꞌgenan kamu it pirming pagbegbegan it raras mi it maꞌiba mi. Pasbung kamut ki Cristo nga, kat kadakulat raras ya it aten, ipiyagtas yay ginawa ya, nga ipiyasbung yay sadili ya it piyakamabanglu nga panalisi nga pagsagyaan nga banar it Ampuꞌang Diyus.

³Temed, paribasay mga taawan kamu na it Ampuꞌang Diyus, kaꞌilangan rignaꞌan na talaga i mga atkaytu nga pagbuwaten, muꞌsang kalasit pamakun duꞌun it ega asawa mu, mga adat u pagpikiren nga maraꞌway, baw kaꞌirak it in unu-unu nga kusas nga magkapisiꞌ situt banwa. Sana maski pangbit, ega na mangbit kat nakem mi i mga itu ngaytu. ⁴Subung naga i mga maraꞌway baw kaꞌeyaꞌ-eyaꞌ nga pagrundingen u aaꞌgatan, baw mga ampang nga egay kakapulusan. Ega bagay it imyu i iyan ngayan, in daꞌga iyan nay pirmi nga magkabngaꞌan it baꞌbaꞌ mi, magpasalamat kamu duꞌun it Ampuꞌang Diyus. ⁵Ka pagsisiguruun ta nga egay uyu-uyut it kagayenan duꞌun it kaꞌadiꞌan ni Cristo baw Ampuꞌang Diyus i taw nga mapiyamakun duꞌun it ega asawa ya baw kanya nga maraꞌway i adat. Atnaga i taw nga maꞌirak it kusas nga magkapisiꞌ situt banwa, ka ega na Ampuꞌang Diyus i pagsambaen ya in daꞌga kusas lamang ngayti. ⁶Baw in siyu-siyu asat imyu i magsugid nga ega naga kamaliꞌ i atkaytung pagbuwaten, ega pakimatuudun mi, ka egay matuud it ampang nira ngayan. Yay matuud, muꞌsang magbuwat it mga itu ngaytung nasangpit ku, siguradu talaga nga abutun it iseg it Ampuꞌang Diyus. ⁷Aypaꞌ ayaw kamut paꞌuyu-uyut it kanira.

⁸Ka iti, tagnaꞌ ngayti, talagang kat kadleman kamu paꞌ ka egay pagkilala mi it Ampuꞌang Diyus. Temed kayti, kat kaꞌyagan kamu na sabap it pakilagpit mi it Ampuꞌan. Aypaꞌ mangaꞌgenan kamu na it pangaꞌgenan nga bagay kat mga taw nga naꞌyagan na. ⁹Sabap yay liꞌwan it magpangaꞌgenan ngaytu kat kaꞌyagan, purus kagayenan, kataldengan baw kamatuudan. ¹⁰Kat muꞌsang mga pagbuwaten mi, siguruun mi nga kasasagyaan it Ampuꞌan. ¹¹Ega na pabaya-bayaꞌ kamu kat mga taw nga magbuwat paꞌ it buwat it kadleman, mga buwat nga egay liꞌwanan ya nga kagayenan. Imbis nga pabaya-bayaꞌ, paꞌresan mi lamang i kagayenang buwat it kaꞌyagan isaꞌun makapalbaw mi nga karaꞌe-raꞌetan i kanira. ¹²Sabap kaꞌeya-eyaꞌ nang banar nga maski sangpiten na lamang i mga bagay nga pamagbuwaten nira ngaytu kat malingeb. ¹³Temed, sabap it magagayeng buwat mi, matanyag nga karaꞌe-raꞌetan i pagbuwaten nira. Sabap mga magagayen nga buwat i subuk eyag, baw basta may magꞌeyag, maꞌyagan nay muꞌsa. ¹⁴Subung tu it mga ampang ngayan nga magꞌaat,

“Masulag ka na, ikaw nga maꞌlek pay igaꞌ. Ikaw nga patay, magꞌegen ka na. Siguradu nga eyagan kang banar ni Cristo.”5:14 Ega maꞌyag in ari pinsiꞌan it mga ampang ngaytu. Maat it beken, garing duꞌun it Isaias 26:19 u Isaias 60:1. Maat siꞌ it beken, barang esang kantaꞌ nira.

¹⁵Aypaꞌ inturun mit magayen in magꞌuꞌunu kamu magpangaꞌgenan. Sana subung nat mga taw nga dakulay kasepsep sabap it pangaꞌgenan nga pagsagyaan it Ampuꞌang Diyus. Ayaw kamut patibayaꞌ it mga taw nga elam pat mga itu ngaytu. ¹⁶Magkaꞌrutan ta nga maraꞌe-raꞌet na talaga i palagyu it pagbanwa ta kayti. Aypaꞌ kada begayan tat rugar magayen sagyaan tami nga itanyag kat maꞌiba tami i pagbaꞌgu it pangaꞌgenan nga mapisiꞌ duꞌun it ki Cristo. ¹⁷Ayaw kamu it patibayaꞌ it mga ega magkasepsep, in daꞌga panawun it pikir baw sepsepen mit magayen in unu talagay kaꞌirgan it Ampuꞌan kat muꞌsang pagbuwaten mi.

¹⁸Raꞌwayen mi nay adat nga palangu, ka iyan i magtaban it imyu kat pangaꞌgenang ega nay kaꞌayusan. Kaꞌilangan ega na irimnun i magbebegbeg baw magpanakem it imyu, in daꞌga Espiritu Santo na. ¹⁹Magsigpademdem kamu it esa may esa it mga ampang nga magbebtang duꞌut kasuratan nga pagpangaranan it Mga Awit, baw beken nga mga kantaꞌ nga ipagbantug it Ampuꞌan baw ikseg it pamayaꞌ ta. Makiyantaꞌen kamu it ega desang kaꞌirgan lamang, in daꞌga talagang masagyang-masagyay nakem kat pagbantug mi it kanya. ²⁰Kat keseg it pakilagpit mi it Ampuꞌan ta nga si Jesu-Cristo, ega lipa-lipaten mi nga, kat muꞌsang bagay, pirmi kamu nga magpasalamat duꞌun it Diyus Amaꞌ. ²¹Baw beken gasiꞌ, magpasa-pasakepen kamu, katandaꞌ it may paggalang mi na it ki Cristo.

Magayeng adaten it taw nga nagꞌasawa

²²Ta, kamu nga mga babay, dapat nga pasakep kamu it asawa mi, subung it pagpasakep mi it Ampuꞌan. ²³Sabap lalaki i bilang ulu kat nagꞌasawa. Ladawan tu ni Cristo nga kanyay piyakaꞌulu it muꞌsang magpamayaꞌ, nga kabilangan nira, subuk bilug ya. Baw ega lamang ulu nira kanya in daꞌga Manigribri it kanira.5:23 May mapisiꞌ tang puntuꞌ sikaytu. Maski ulu it asawa ya i lalaki, ega magayen in mapiyanreges kanya baw mapiyasubraꞌ in daꞌga, kaꞌilangan, pabetang yat asawa ya, subung nagat pabetang ni Cristo it bilang asawa ya, nga ipiyagtas yay ginawa ya kat ikagayen ya (birsikulu 25 baw 27 it kapitulu ngaytu). ²⁴Aypaꞌ in magꞌuꞌunu magpasakep i mga magpamayaꞌ kat ulu nira nga si Cristo, atkayan naga i pasakep it mga babay kat kanya-kanyang asawa kat muꞌsang mga bagay.

²⁵Ta, kamu gasiꞌ nga mga lalaki, kaꞌilangan nga rarasan mit kamatuudan i asawa mi it subung it raras ni Cristo it mga magsarig baw magpamayaꞌ it kanya, nga ipiyagsalisi ya i bilug ya sabap it kanira. ²⁶Binwat yaytu isaꞌun mapakay nga tanggapen sirat Ampuꞌang Diyus sabap it nalimpiyuꞌ na sira kat panleteg ya duꞌun it pagbawtis nira baw kat pagneg baw pamayaꞌ nira it ampang ya. ²⁷Baw isaꞌun, in maꞌbut nay ipiyagtirminu nga aldaw, mapakay nga tanggapen ya sira nga bilang mabantug nga asawa ya,5:27 Mga Ipiyalteg 19:7-8 baw 21:2,9. asawa nga subrang kadaraga talaga ka egay maski unu nga rindi u mansaꞌ it bilug ya. Atkaytuy kabilangan ta ka linimpiyuꞌ ya talaga kita kat muꞌsang kasalaꞌan tami. Ega nay maꞌiway yat aten. ²⁸Iyan raras it mga lalaki it kanya-kanyang asawa, kaꞌilangan ipabetang ya nga sadili ya nga bilug i pagrarasan. Ka iyan lalaki nga magraras it asawa ya, pagrarasan yay sadili ya. ²⁹Sabap egay taw nga magdisa it sadili yang bilug, in daꞌga pagpaꞌresan ya nga pagpakaꞌnen baw pagdiyu-diyuun ya, subung it pagbuwaten ni Cristo it mga magpamayaꞌ it kanya, ³⁰ka talagang kita, bilang mga buwat-buwat tami it bilug ya. ³¹Aypaꞌ ka, pagkaꞌasawa it lalaki, tananan ya nay amaꞌ baw inaꞌ ya ka magsagpun na sira magꞌasawa. Ta egay beken, subung na sirat sang kabilu-bilugan.5:31 Genesis 2:24. ³²Ta ituꞌun ngaytu, may matꞌed nga pagpapuntuꞌan ka puntuꞌ ya kaytu, kita nga namayaꞌ baw si Cristo nga piyamayaꞌ ta. ³³Temed maski atkayan, kaꞌilangan ega lipaten tami i malbaw ya nga pagpapuntuꞌan nga, kamung mga lalaki, dapat nga rarasan mi nga banar i kanya-kanyang asawa. Ipabetang mu kanya nga sadili mung bilug. Baw kamu gasiꞌ nga mga babay, kaꞌilangan dakulay galang mi it asawa mi.

Magayen nga ugaliꞌen it mga giyaringan baw anak

¹Ta kamu nga mga mangaꞌwaꞌ, sumunud kamu it mga giyaringan mi, ka ituy tamaꞌ nga pagbuwaten it mga magpamayaꞌ it Ampuꞌan nga si Jesus. ²Dedemdemen mi i urdin ngayan it Ampuꞌang Diyus nga magꞌaat,

“Galangen mu i amaꞌ baw inaꞌ mu.”6:2 Exodo 20:12, Deuteronomio 5:16.

Talagang impurtantiꞌ i itung urdin baw in sunudun ta sakpen ta it magꞌuꞌuyut nga sanggup ya nga magꞌaat,

³“isaꞌun pirming magpanggayen i kabetangan mu baw paꞌlayen ka situt banwa.”6:3 Exodo 20:12, Deuteronomio 5:16.

⁴Ta kamu nga mga giyaringan, subraꞌ na in mga lalaki, inturun mi nga ega kamaliꞌ i padisir mi it mga anak mi, nga magkaskedan na sira baw mandalaꞌ. In daꞌga yay magayen, padakulaꞌen mi sira it pirming pagtulduꞌan it kaꞌirgan it Ampuꞌan, baw pagtaldengen i muꞌsang pagbuwaten nirang kamaliꞌ, uyun naga kat kaꞌirgan it Ampuꞌan ngaytu.

Magayen gasiꞌ nga ugaliꞌen it mga uripen baw mga agalen

⁵Ta kamu gasiꞌ nga mga uripen, kaꞌilangan nga sunudun mit ustuꞌ nga pagsunud i mga agalen mi situt banwa. Sunudun mit may kamatuudang paggalang it kanira, ega bete-beteꞌ lamang, nga subung bat si Cristo i pagsirbiyan mi. ⁶Ega maat paꞌresan mi lamang i pagsunud mi in pagleltegan kamu ga it agalen mi isaꞌun sagyaan nira kamu. Sana may maglelteg it daꞌga, talagang iyan nay ipagpadaꞌeg mi kat nakem mi, ega na lamang agalen mi i pagsirbiyan in daꞌga si Cristo, baw masagyang-masagya kamu na nga magbuwat it kaꞌirgan it Ampuꞌang Diyus. ⁷Talagang iyan i magayen, magsirbi kamu it masagyay nakem mi nga subung it Ampuꞌan i pagsirbiyan mi, ega na taw lamang. ⁸Pagdedemdemen mi nga talagang tumbasan it Ampuꞌan i kada magayen nga pagbuwaten it maski siyu, uripen u daꞌga.

⁹Kamu gasiꞌ nga mga agalen, magayen kamu naga kat mga uripen mi. Ega taa-tatap agumaꞌen mit maraꞌe-raꞌet, sabap magkaꞌrutan mi nga surubung kamu nga uripen it esa-esay agalen mi nga duꞌun it langit nga egay pagbidaꞌen ya.

Iyan ipiyagꞌildaw nga pangabal nga ipagꞌindaꞌeg tami it ki Satanas

¹⁰Ta, mga pangiyaꞌpusang sugi-sugid ku, paꞌresan mi kat pangaꞌgenan mi i egay kalandaw nga guna it Ampuꞌan isaꞌun mapaꞌgen nga pirmi i pamayaꞌ mi. ¹¹Magayen, pirmi nga paggamiten mi i muꞌsang ipiyagꞌildaw it Ampuꞌang Diyus it aten isaꞌun malabanan mit magayen si Satanas kat muꞌsang pangakal yat imyu. In ipasbung tat pangabal it sundaluꞌ, itu nga ipiyagꞌildaw it Ampuꞌang Diyus i subuk pangabal ta. ¹²Ka iyan mga maglaban it aten, ega kasubung tang mga taw lamang, in daꞌga mga ega mabilang nga maraꞌe-raꞌet duꞌut lawang, mga magpanlud baw daꞌga nga may dakulang kiyaꞌrutan baw pudir duꞌut kanya-kanyang pagsasakpan situt banwa. Siray magpamaalaꞌ it kadleman nga duꞌun magpangaꞌgenan i katataawan situt sinirungat langit. ¹³Aypaꞌ kaꞌilangan talaga nga isꞌul mi i muꞌsa ngaytung pangabal nga ipiyagꞌildaw it Ampuꞌang Diyus it aten, isaꞌun in kaꞌnu-kaꞌnu sulungun kamu it kalaban mi ngaytu, malabanan mit kaꞌustuꞌan, tananan kamu nga magtitindeg kamu naga it pagayen-gayen.

¹⁴Aypaꞌ ka pirmi kamu nga magꞌaꞌalistu. Iyan i piyakasambut mi, kamatuudan nga bulun kat muꞌsang pagbuwaten baw pagꞌampangen mi. Iyan pangaꞌgenan nga mataldeng, iyan i bilang kanukal it deꞌgan mi, nga pagkakabitan gasit sambut mi. ¹⁵Iyan ega basta-bastang kaꞌimbengan it nakem nga liꞌwan it pamayaꞌ mi it Magayeng Baritaꞌ, iyan i bilang pansundaluꞌ nga sapatus mi isaꞌun simpan talagay mga aꞌay mi, ega dumarasay. ¹⁶Baw ega matuduꞌ i taming mi nga ituy mapaꞌgen nga pagsarig baw pamayaꞌ mi it Ampuꞌang Diyus baw muꞌsang mga sanggup ya. Kat itu ngaytu, magkapareng mi nay muꞌsang magdedleg nga panaꞌ6:16 Iyan mga taming it mga Romano, kayu nga binwat, nga paglalapisan it kanbas baw kulit it bakaꞌ. Parabir sira sumulung, itaꞌen nira daꞌan i taming nira duꞌut danum isaꞌun, in maꞌiguꞌ it magdedleg nga panaꞌ, mapareng. it Gimpuꞌut Karaꞌe-raꞌetan.6:16 Si Satanas i paꞌaaten. ¹⁷Pagdedemdemen mi nga pirmi i karibriyan mi ka yay piyakakatupung mi. Baw iyan piyakabasiꞌ mi nga iꞌindaꞌeg it mga kalaban mi ngaytu, mga ampang it Ampuꞌang Diyus nga ampangen mi kat tabang it Espiritu Santo. ¹⁸Muꞌsa ngaytu, buwaten mi tu kat keseg it panalangin. Magayen, kat panguꞌna it Espiritu Santo, mapiyanalangin kamu nga pirmi kat muꞌsang kalasit panalangin.6:18 Dakel i kalasit panalangin. Ega lamang pangangut it in unuy kaꞌilangan, in daꞌga may pagsamba it kabantugan it Ampuꞌan, may pagsinguliꞌ it kasalaꞌan, may pasalamat, may pamatuud it keseg it ampang ya kat pangaꞌgenan, baw beken paꞌ. Sarungaen mit magayen i itung buwat, paꞌresan, ega palubay-lubay. Baw sana muꞌsang mga magpamayaꞌ i ipagpanalangin mi.

¹⁹Baw pati aku, sana ipagpanalangin mi naga gasiꞌ nga begayan akut Ampuꞌang Diyus it tamaꞌ nga pagꞌampangen, isaꞌun magmaꞌiseg i nakem ku nga makapaꞌyag ku i tagu-taguꞌ ngaytu nga Magayeng Baritaꞌ nga ipiyaꞌrut nat Ampuꞌang Diyus. ²⁰Sabap kat pangadal it Magayen ngaytung Baritaꞌ, piyakarguꞌan akut Ampuꞌang Diyus it katengdanan ku, baw yay ipiyagkakadina ngaytut aken sinit pirisuwan. Aypaꞌ, kaꞌilangan, ipagpanalangin mi nga makapangadal ku naga it may pagmaꞌiseg it nakem, uyun kat dapat ku nga buwaten.

Pangiyaꞌpusan nga sugi-sugid

²¹Ta, si Tiquico nga pagmaꞌalen tami nga sulsug kat pamayaꞌ baw magkasarigan nga manigsirbi it Ampuꞌan, kanya i tumuturan asat imyu it muꞌsang bagay pasar it kabetangan ku baw magkabwat ku sini. ²²Piyapaꞌasan ku yan kanya it imyu isaꞌun matantuwan mi nga banar i kabetangan namen sini, baw isaꞌun mapakseg ya i nakem mi.

²³Ipagpanalangin ku nga sana ibgay it imyu it Diyus Amaꞌ baw Ampuꞌan nga si Jesu-Cristo i pagꞌurunyun nga kat ikaꞌimbeng it pakiꞌiba-iba mi nga sang sulsugan. Sana padakulaꞌen gasiꞌ i raras mi it esa may esa baw papaꞌgenen i pamayaꞌ mi. ²⁴Ipagpanalangin ku gasiꞌ nga subraꞌ nga begayan it ildaw it Ampuꞌang Diyus i muꞌsa nga may kamatuudang pagmaꞌal it Ampuꞌan tami nga si Jesu-Cristo.