Colosas

Surat ni Pablo duꞌun it Mga Magpamayaꞌ nga Taga Colosas

Colosas

Pauꞌnang Sugi-sugid

Iyan magpangadal si Pablo duꞌut Efeso seledan it duwang taꞌun, limingkep i Magayeng Baritaꞌ duꞌut muꞌsang prubinsiya it Asia ngayti (Mga Binwat 19:1, 8-10). Sabap it itiꞌen may namayaꞌ na duꞌut Colosas, Hierapolis, baw Laodicea. Kaꞌalaid it Colosas ngayti duꞌut Efeso, mga 175 kilumitru. Kaꞌalaid gasit Colosas duꞌut Hierapolis, mga 17 kilumitru, baw kaꞌalaid it Colosas duꞌut Laodicea, mga 20 kilumitru.

Ega si Pablo i nakapatindeg it mga magpamayaꞌ duꞌut iting mga rugar (kapitulu 1:4 baw 2:1). Siguru si Epafras i nakapatindeg it kanira (kapitulu 1:7 baw 4:12-13).

Iyan mga taga Colosas ngayti, kadaklan nira ega Judio, nga egay pagkilala it Ampuꞌang Diyus. Aypaꞌ muꞌsang kalasit karaꞌe-raꞌetan situt banwa, piyaꞌubasan na nira. Baw pagsamba gasiꞌ it dakel-dakel nga tiyaw-taw i nasulagan nira.

Iyan isiyurat ni Pablo i ituꞌun ngaytu nga surat ya, pagpipirisuun kanya (kapitulu 4:3,18), siguru duꞌut Roma (Mga Binwat 28:16-31). Kat iting timpu (mga 61 A.D.), maat it beken nga mga mapipikir, isiyurat ya gasiꞌ i surat ya duꞌut mga taga Efeso baw mga taga Filipos, baw iyan surat ya duꞌut ki Filemon. Iyan duꞌun kanyat pirisuwan inaduꞌun kanya ni Epafras, ka itiyuturan ya duꞌut ki Pablo i kabetangan nira duꞌut Colosas. Tuturan ya, may magpangadal duꞌun it ega tamaꞌ, ka ipagpaliꞌwan nira nga kurang i karibriyan nga mapisiꞌ kat pagsarig it ki Cristo. Kaꞌilangan kunuꞌ nga sumamba it mga anghil, pagneg it ipiyaꞌrut it kanira kat mga tagaynep nira, baw sumunud it mga urdin nira pasar it pangaꞌen, mga maꞌal nga aldaw, baw dakel-dakel nga pakuriꞌ it bilug.

Ta, pagkaꞌrut ni Pablo it iti ngayti, egay beken, simnurat kanya it itu na ngaytu isaꞌun matubag i pangadal ngayting kamaliꞌ. Maat ya nga si Jesu-Cristo na lamang i mapisiꞌan tat kumplitu nga karibriyan, ka kanyay piyakamataꞌas it muꞌsa, kanyay piyakaꞌulu it muꞌsang magpasakep it kanya, baw may kamatuudang pagkaDiyus ya, subung nagat pagkaDiyus it Ampuꞌang Diyus. Baw si Cristo na lamang ngaytu i dapat ta nga sambaen, ega nay beken.

Ta, pikir ni Pablo, ipataban yay surat ngaytu kat alima ni Tiquico baw paꞌibaan ya gasiꞌ si Onesimo, iyan uripen ni Filemon nga miyalagyu. Paꞌuliꞌen naga ni Pablo si Onesimo ngayti duꞌut agalen ya nga si Filemon duꞌut Colosas. Sabap it iti ngayti siguru, ipiyaꞌuyut ni Pablo kat surat ya ngaytu i panulduꞌ pasar it mga uripen baw mga agalen, baw isiyurat ya nga kaꞌilangan maꞌildaw baw magpasi-pasinsiyaen i taga Colosas ngayti (kapitulu 3:12-13).

^1-2Mga sulsug namen kat pamayaꞌ nga asan it Colosas, wayan i surat namen, aku nga si Pablo nga esang apustul ni Cristo Jesus kat pabetang-betang it Ampuꞌang Diyus, baw si Timoteo nga sulsug ta gasiꞌ kat pamayaꞌ. Pagsuratan namen kamu nga maglalagpit nat ki Cristo, kamu nga mga ipiyapinpin it Ampuꞌang Diyus nga mga taawan ya na, nga magpamayaꞌ nga matuud it ki Cristo ngaytu.

Ipagpanalangin ku nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus nga Amaꞌ tami.

Pasalamat ni Pablo baw panalangin ya pasar it mga taga Colosas

³Kada ipagpanalangin namen kamu talagang pirmi kaming magpasalamat duꞌun it Ampuꞌang Diyus, kanya nga Amaꞌ it Ampuꞌan ta nga si Jesu-Cristo. ⁴Sabap nabaritaꞌan namen i pamayaꞌ mi it ki Cristo Jesus ngaytu baw raras mi it muꞌsang mga kasulsugan mi kat pamayaꞌ. ⁵Atkaytu i pagsarig baw pagmaꞌal mi ngaytu sabap pagsisiguruun mi i kagayenan nga magꞌaꞌareg it aten duꞌut langit, iyan kagayenan nga nasiguru mi kat Magayeng Baritaꞌ nga kamatuudan nga ipiyangadal it imyu it tagnaꞌ. ⁶Egaytu lamang asat imyu i inabutan it kamatuudan ngaytu in daꞌga maglekep naytu it banwa. Baw paꞌari-ari nga pagꞌabutun ya magbaꞌguy adat it mga magpamayaꞌ, subung nagat imyu garing it uꞌnang pagkagneg mit ildaw ngaytut Ampuꞌang Diyus baw pagkatantu mi nga kamatuudan talagaytu. ⁷Daꞌga baꞌ si Epafras i uꞌnang nanulduꞌ it imyu pasar it itu ngaytu? Kanya i pagmaꞌalen namen nga kaꞌibaan, nga esa gasing manigsirbi ni Cristo. Magkasarigan talaga kanya kat katengdanan ya ngaytu baw kanya i naꞌasat imyu nga bilang ganti namen. ⁸Kanya i naꞌrutan namen it kadakulat raras mi it esa may esa kat tabang it Espiritu Santo.

⁹Aypaꞌ garing it pagkabaritaꞌ namen kaytu, sigi nay panalangin namen pasar it imyu duꞌut Ampuꞌang Diyus nga sana panakman kamung banar it Espiritu Santo nga masepsepan mi talaga in unu may unu i uyun kat kaꞌirgan ya. ¹⁰Ka in atkayan, makapangaꞌgenan kamu nat pangaꞌgenan nga kasasagyaan it Ampuꞌan, pangaꞌgenan nga bagay it mga maglalagpit it kanya, ka subuk magtumbud kat pangaꞌgenan mi i muꞌsang buwat nga magagayen baw magdudungag-dudungag i kasepsep mi it adat baw kaꞌirgan it Ampuꞌang Diyus. ¹¹Ipagpanalangin namen gasiꞌ nga kat keseg it ega basta-bastang guna ya, sana begayan ya kamu nga magbastanting-magbastanti i keseg it pamayaꞌ mi, isaꞌun magkateꞌteꞌ kamu baw magkasagkaꞌ it kakuriꞌan it magayen i nakem. ¹²Baw masasagya kamu nga magpasalamat nga pirmi duꞌut Diyus Amaꞌ. Ka kamu gasiꞌ, binwat ya nga mapakay nga bagiꞌan it mga magagayeng bagay nga areg ya it muꞌsang piniliꞌ baw ipiyapinpin ya nga mga taawan ya na, sira nga magpangaꞌgenan na kat kaꞌyagan ya.1:12-13 Maat it Ampuꞌang Diyus, iyan mga kasalaꞌan nga pagbuwaten it taw, kabilangan nira, kadleman. Temed muꞌsang ipagpanulduꞌ it Ampuꞌan kat taw, kabilangan ya, kaꞌyagan. ¹³Ka ipiyagribri ya na kita kat pagsakep it kadleman, baw ipiyagꞌugad ya na kita kat pagsakep it pagmaꞌa-maꞌalen ya nga Anak. ¹⁴Sabap it kamataynen it Anak ya ngaytu, ribri tami na kat panriga it Ampuꞌang Diyus sabap it kasalaꞌan. Ipiyasinsiya nat aten i muꞌsa.

Si Cristo, subray kataꞌasan ya it muꞌsa

¹⁵Duꞌut ki Cristo ngayti ipiyalteg nat aten in magꞌuꞌunu i Ampuꞌang Diyus nga ega magkaltegan. Baw may kataꞌasan ya nga subrat kataꞌasan it muꞌsang mga giyunang bagay nga may ginawa, subung nagat kataꞌasan it panganay nga anak kat mga ariꞌ ya. ¹⁶Sabap si Cristo talagay nagguna it muꞌsa ngaytu nga mga duꞌut langit baw situt banwa, iyan mga magkaltegan ta baw iyan nga, lamang ega magkaltegan, temed may dakulang keseg baw pudir duꞌut kanirang pagsasakpan.1:16 Siguru, pagpaꞌiguꞌan kaytu, mga anghil. Ka ipagpaliꞌwan it mga magpaneꞌag-teꞌag duꞌut Colosas ngayti nga ega lamang si Cristo i kaꞌilangan nga kilalaen baw sambaen it taw in daꞌga mga anghil gasiꞌ (kapitulu 2:18). Talagang muꞌsang-muꞌsa, kanya naga i giyaringan baw kat ikabantug ya sirang muꞌsa. ¹⁷Kanyay uꞌna-uꞌnat muꞌsang bagay baw kat pamegbeg ya magtinir sira it egay pagꞌugadan baw magpanunsun sira it in unuy ipiyabetang-betang ya it kanira. ¹⁸Kanya i piyakaꞌulu it muꞌsang magpamayaꞌ it kanya nga kabilangan nira, sang kabilu-bilugan. Kat pagꞌegen yat paꞌuliꞌ inabriyan ya talaga i dalan it pagꞌegen ngaytut paꞌuliꞌ, baw kanya i puꞌun it kaꞌgenan ngaytu nga egay kaskedan. Aypaꞌ maꞌyag nga, kat muꞌsang-muꞌsa, kanya lamang i egay kasbung nga kataꞌasan. ¹⁹Sabap yay ipiyabetang-betang it Ampuꞌang Diyus nga in magꞌuꞌunu i pagkaDiyus ya, maltegan kat Anak ya nga si Jesus. Aypaꞌ atkayan naga talaga i pagkaDiyus ni Jesus ngaytu. ²⁰Baw ipiyabetang-betang ya gasiꞌ nga kat keseg it kamataynen ni Jesus nga ipiyaturuꞌ yay duguꞌ ya duꞌut krus, papaꞌuliꞌen ya kat sadili ya i muꞌsang-muꞌsa, nga situt banwa baw kat langit gasiꞌ, isaꞌun magkagayen siꞌ.

²¹Ta, kamu ngaytu, kaꞌuyutan gasiꞌ it itu ngaytu. Ka iti tagnaꞌ, talagang alaid kamu kat Ampuꞌang Diyus kat pagkuntraꞌ it kanya it nakem mi baw karaꞌe-raꞌetan nga pamagbuwaten mi. ²²Temed kayti, sabap it kamataynen ni Cristo nga ipiyasalisi yay bilug ya, binwat kamu nat Ampuꞌang Diyus nga mga iba-iba ya isaꞌun makapaꞌadap ya kamu kat adapan ya it egay maꞌiway ya, mga taw nga mataldeng kat panleteg ya ka naꞌiriꞌan it muꞌsang kasalaꞌan. ²³Temed gasiꞌ, kaꞌilangan nga maneꞌteꞌ kamu kat pamayaꞌ mi isaꞌun mapaꞌgen baw magꞌuꞌunay talaga, nga ega magꞌugad it maski sang dekeyeꞌ i kasiguruwan mi it tumbas nga ipagsanggup it Magayeng Baritaꞌ. Magayeng Baritaꞌ ngaytu, yanagay ipiyangadal asat imyu it tagnaꞌ, baw kayti ipiyangadal gasiꞌ kat belag-belag nga bangsa it taw situt sinirungat langit. Kat pabetang-betang it Ampuꞌan binwat ya aku, aku nga si Pablo, nga esang manigsirbi ya kat pangadal it ituꞌun ngaytu.

Manigsirbi si Pablo it muꞌsang mga magpamayaꞌ isaꞌun masepsepan nirang banar i muꞌsa pasar it Manriribri nga si Cristo

²⁴Talagang pagsagyaan ku i mga kakuriꞌan ku ngaytu kayti ka sambatan ku, abir ku nga makuriꞌan aku basta kat ikagayen mi. Sabap, kat mga kakuriꞌan ngaytut bilug ku, pagꞌayawun ku i ipiyabetang-betang ni Cristo nga malabayan ku1:24 Mga Binwat 9:16. kat ikagayen it kumpur magsarig baw magpamayaꞌ it kanya, nga kabilangan nira, bilug ya. ²⁵Aku ngaytu, manigsirbi aku it muꞌsa ngaytung mga magpamayaꞌ ka yay ipiyakarguꞌ it Ampuꞌang Diyus it aken, nga ipangadal ku it egay tataguꞌan i ampang ya kat mga bangsa nga ega Judio. ²⁶Ka kaꞌlay ngaytu it pira-pira nang pagꞌanak-anak it taw, may subuk itiyagu-taguꞌ it Ampuꞌang Diyus nga ega ipiyaꞌrut yang banar. Temed kayti ngaytu, ipiyaꞌrut ya na kat mga piniliꞌ ya nga taawan ya. ²⁷Ituy tagu-taguꞌ nga pabetang-betang nga ipiyaꞌrut ya na, nga mga bangsa it taw nga ega Judio i maꞌildawan ya it daꞌna masugid nga kagayenan. Eeꞌ baꞌ, mapakay na nga kamu na i pagtatakenaꞌan na ni Cristo,1:27 Ireg sugiden it pagtatakenaꞌan ni Cristo, sabap it Espiritu Santo nga ipiyapasarum ni Cristo it mga magpamayaꞌ it kanya, subuk magtatakenaꞌ na kanya kat nakem nira. nga ituy puꞌun-sabap it kasiguruwan mi it kagayenang tumbas kat pagdadarapaꞌen.

²⁸Si Cristo ngaytuy ipagpanadal namen kat muꞌsang taw. Kat kadakulat kasepsep nga ipagbegay it Ampuꞌang Diyus it amen ipagpangadal baw ipagsasar namen i muꞌsa, isaꞌun makapaꞌadap namen sirang muꞌsa kat adapan it Ampuꞌang Diyus it ustuꞌ nang mga taawan ya, nga egay magkaꞌiway yat kanira sabap it pakilagpit nirat ki Cristo. ²⁹Aypaꞌ pagpaꞌresan ku nga banar i katengdanan ku ngaytu kat keseg it ega basta-bastang kakayaan nga ipagbegay ni Cristo it aken.

¹Mga kasulsugan, ireg ku nga maꞌrutan mi in sang unuy kadakulaꞌ it paꞌres ku sabap it imyu baw mga taga Laodicea baw kat muꞌsang taw nga beken nga ega paꞌ nakalteg it mismung bilug ku. ²Atkaytuy paꞌres ku isaꞌun kemseg i nakem mi baw subraꞌ kamu nga urunyun kat raras it esa may esa. Baw isaꞌun sana magmanggaden kamu na it kaꞌustuꞌang kasepsep nga pagtaꞌseben kamung banar it mga bagay pasar it ki Cristo, mga bagay nga ipiyagtagu-taguꞌ it Ampuꞌang Diyus it kaꞌlay ngaytu. ³Talagang si Cristo lamang ngaytu i magkapisiꞌan it ustuꞌ baw kamatuudan nga kasepsep pasar it tagu-taguꞌ ngaytu nga pabetang-betang it Ampuꞌang Diyus. ⁴Pagꞌaaten kuytuy atkaytu isaꞌun daꞌkamu mateꞌag-teꞌag it beken, maski unu pang kagayen it sugi-sugid nira nga paneꞌag-teꞌag it imyu. ⁵Ka yay matuud, maski daꞌku asan it imyu, temed pirmi ku na kamung pagdedemdemen. Masagya akung banar nga magkabaritaꞌan it urunyun kamu nga ega magkaꞌugad-ugad, nga mapaꞌgen i pagsarig baw pamayaꞌ mi it ki Cristo.

Duꞌut ki Cristo lamang i kaꞌustuꞌang karibriyan.

⁶Ta kayti it tiyanggap mi na nga Ampuꞌan mi na si Cristo Jesus, kaꞌilangan mangaꞌgenan kamu uyun kat pangaꞌgenan it mga taw nga maglalagpit nat kanya. ⁷Ka daꞌga baꞌ maggagamut kamu na duꞌut kanya? Aypaꞌ sana pirmi kamung pagsarepsepen it maggaring duꞌut kanya nga ipagpanggayen mi, isaꞌun kemseg kamu nang kemseg kat pagsarig baw pamayaꞌ, subung nat ipiyangadal ngayan it imyu, baw isaꞌun subuk magtumbud nga pirmi i pasalamat mi duꞌun it Ampuꞌang Diyus.

⁸Pirmi kamu nga magtitiyakap nga egay maski siyu it imyu nga marayak it mga manigpangadal it pangambu-ambut nga egay kakapulusan. Itung mga pangadal, tuturan-manuturan lamang it taw, mga malbaw nga pasepsep it banwa. Talagang ega uyun kat kamatuudan pasar it ki Cristo.

⁹Ka si Cristo ngaytu, egay piyagbelagan it pagkaDiyus ya baw pagkaDiyus it Ampuꞌang Diyus, sabap sang kagina-ginawaan sira. Lamang piyabilugan i kanya. ¹⁰Baw kamu, paribasay maglalagpit kamu na duꞌut kanya, kanya nga magbebegbeg kat maski unu nga may dakulang keseg u pudir, talagang ega nay beken nga kaꞌilangan mi. Kumplitu kamu na talaga.2:10 Itung kakumplituwan, pasar it ikaribri nira baw panlangit nga pangaꞌgenan kat pagdadarapaꞌen. Ka si Cristo lamang i magkapisiꞌan tat muꞌsa ngaytu. ¹¹Sabap gasiꞌ it pakilagpit mit kanya tiyuriꞌan kamu na.2:11 Mga taga Colosas ngaytu, ega Judio sira aypaꞌ ega uyut kat urdin it mga Judio nga pagturiꞌ. Temed siguru esang ipagsugid it mga magpaneꞌag-teꞌag it pamayaꞌ nira, daꞌsira maribri puyrat paturiꞌ. Temed ega lamang panuriꞌ nga buwat lamang it taw in daꞌga buwat ni Cristo, nga naꞌiriꞌan kamu na it singkadan mi nga adat nga maraꞌe-raꞌet. ¹²Ka iyan biyawtisan kamu, subuk iba kamu ni Cristo it ilimbeng baw inggen it paꞌuliꞌ sabap it pagsarig baw pamayaꞌ mi it guna it Ampuꞌang Diyus, yanagang guna nga minggen it kanya it paꞌuliꞌ.

¹³Talagang kamu katꞌesa, kaꞌalimbawaan mi, subuk patay kat panleteg it Ampuꞌang Diyus kat kadakulat kasalaꞌan mi. Egay maski unu nga magpangbit kat nakem mi in pasar it pagkilala it kanya. Pagbebegbegan kamu talaga it mga singkadan mi nga adat nga maraꞌe-raꞌet. Takaꞌ kayti, binggayan kamu nat baꞌgung kaꞌgenan. Kabilangan mi, iba kamu ni Cristo it inggen it paꞌuliꞌ it Ampuꞌang Diyus. Ipiyasinsiya yat imyu i muꞌsang mga kasalaꞌan mi. ¹⁴Iyan kasuratan nga pagsuratan it tagnaꞌ it muꞌsang kaꞌurdinan it Ampuꞌang Diyus, bilang kalaban ta ka ipagpalbaw yay kadakulat pagkuntraꞌ tat kanya. Temed kayti, iniriꞌan nat Ampuꞌang Diyus it keseg ka subuk ipiyaꞌuyut yat ki Cristo nga iriyansang duꞌut krus. ¹⁵Baw sabap gasiꞌ it kamataynen ni Jesu-Cristo duꞌut krus, naꞌiriꞌan gasit keseg i muꞌsang ega magkaltegan nga may dakulang kiyaꞌrutan baw pudir. Napasukuꞌ talaga sira it Ampuꞌang Diyus baw binwat ya sira nga subuk dakepan nga ipiyagparayag-rayag ya, kamatuudan it diyaꞌeg ya sira.

¹⁶Aypaꞌ ega intindiyen mi sira asan nga magꞌukuman it imyu sabap ega pagsunudun mi i mga kaꞌurdinan nira pasar it pagkaꞌnen, pagꞌimnun, baw Aldaw it Kapaꞌnaan. Baw daꞌkamu magparagiꞌ it mga pistaꞌ nirat kada baꞌgung bulan u kada sang taꞌun. ¹⁷Ka muꞌsa ngaytu nga pagꞌaraꞌaramen it tagnaꞌ it mga Judio, subuk ladawan lamang ka yay pagpaꞌiguꞌan, magꞌaꞌabut nga buwaten ni Cristo. Ta kayti miyabut na kanya, aypaꞌ unuka buwaten ta paꞌ i mga itu ngaytu it miyabut nay katumanan nira? ¹⁸Ayaw kamut pabuyug-buyug it mga taw nga magsugid nga daꞌkamu maribri ka daꞌkamuy imyu magsamba it mga anghil baw daꞌkamu mapiyababaꞌ nga subung kunuꞌ it kanira. Ipagpaliꞌwan nira nga subraꞌ paꞌ sira it imyu sabap it dakel-dakel i subuk pagtagaynepen nira kunuꞌ nga mga bagay. Temed egay kamatuudan, magpatuꞌgud lamang sira ka pagpadisiran paꞌ sira it singkadan nirang nakem nga makasalaꞌan. ¹⁹Itung mga taw, ega na magpupꞌun sira duꞌun it ki Cristo nga kanya i piyakaꞌulu it muꞌsang magsarig baw magpamayaꞌ it kanya, nga kabilangan nira, sang kabilu-bilugan. Iyan mga buwat-buwat it bilug ta, magꞌesa-esa sabap it mga lulbudan baw mga ugat nga seget it tuꞌlang. Baw basta magpupꞌun kat ulu, magkeseg baw magpanggayen. Atkayan naga, in magpupꞌun tat piyakaꞌulu ta nga si Cristo, ipabetang-betang it Ampuꞌang Diyus nga magꞌesa-esa tami nga banar baw siging kemseg baw manggayen i pamayaꞌ tami.

²⁰Dedemdemen mi nga subuk miyatay kamu na nga iba ni Cristo. Daꞌkamu kat pamegbeg it mga panulduꞌ nga uyun lamang kat malbaw nga pasepsep it banwa. Ta unuka subuk magpangaꞌgenan kamu siꞌ it tagnaꞌ ngayting pangaꞌgenan mi ka magpasakep kamu siꞌ it mga panulduꞌ ngayang magꞌaat, ²¹“Ega masalyaan muy iyan it kumaꞌen,” u “Itung mga bagay, ega seklen muytu. Maski tapal, ayaw kat tapal.” ²²Itung mga panulduꞌ, tuturan-manuturan lamang it taw. Ega talagay kapulusan, ka itung mga bagay nga pagbawalen nira, basta nakaꞌen u naꞌinum na, yanay seked ipaliꞌwan nat bilug ta. Egay pakinabang nira in pasar it mga bagay nga pagsagyaan it Ampuꞌang Diyus kat pangaꞌgenan ta. ²³In letganan ta lamang, kaꞌaat ka kamatuudan i itung mga pangadal sabap iyan mga magsunud kaytu, kat panleteg it beken, masiyambaen baw mapiyababaꞌ sirang banar, baw pagpakuriꞌan nay pati bilug nira. Takaꞌ ega nagay kapulusan it itung mga bagay ka yanagang magtaban it aten it pagsumbayaꞌ it mga singkadan tang kaꞌiꞌirgan nga maraꞌe-raꞌet.

Yanay paꞌresan ta, panlangit nga pangaꞌgenan

¹Ta, it kamu, iba na ni Cristo it inggen it paꞌuliꞌ, aypaꞌ ka iyan i pirming paꞌresan mi, mga panlangit nga bagay nga pagsagyaan ya, kanya nga magꞌaꞌdung na kat iwanang ayun it Diyus Amaꞌ duꞌut langit. ²Eeꞌ baꞌ, pagpipikiren mi nga pirmi i mga panlangit nga bagay, ega na maat mga bagay nga situt banwa. ³Dedemdemen mi nga nakaꞌuyut kamu nat kamataynen ni Cristo baw iyan baꞌgung kaꞌgenan mi, magdadawaꞌ paꞌ nga sekel ni Cristo duꞌut Ampuꞌang Diyus. ⁴Takaꞌ in maꞌbut na nga itanyag na i kabantugan ni Cristo, kanya nga puꞌun it kaꞌgenan ta ngaytu, duꞌun matanyag gasiꞌ i aten nga kabantugan ka mabagiꞌan tami.

⁵Aypaꞌ ipaꞌalaid na asat imyu i muꞌsang maraꞌway nga adat situt banwa nga subuk muꞌsang kalasit pamakun duꞌun it ega asawa mu, baw maski unu nga adat, pagpikiren, u kaꞌiꞌirgan nga maraꞌway. Indiꞌan mi na gasiꞌ i adat nga maꞌingarum, ka in mga kusas situt banwa i pirming pagpipikiren, subuk kusas nay pagsambaen ta, ega na Ampuꞌang Diyus. ⁶Baw magkaꞌrutan ta nga mabut i aldaw nga rigaen it Ampuꞌang Diyus it ega makatindeg i muꞌsang mamagbuwat it mga itu ngaytu. ⁷Ta kamu gasiꞌ, katꞌesa atkayan pay pangaꞌgenan mi ka pagbebegbegan paꞌ it maraꞌway ngaytung pagbuwaten. ⁸Temed kayti ibuntal mi na kat pangaꞌgenan mi i pakitabug baw kaꞌiseg kat masigkataw nga yay pagpanggaringan it kupanggated kamut kanira. Indiꞌan mi na i pangampang-ampang it beken. Ega na dapat regda-regdaen i maꞌiba mi. ⁹Kamung mga namayaꞌ na, ega na ambutan mi i masigkataw mi. Ka in ipasbung tat pakayan, limbas mi na i singkadan mi nga karaꞌe-raꞌetan it tagnaꞌ. ¹⁰Baw kayti magpapakay kamu nat baꞌgu nga ireg sugiden, mga adat mi, pagbaꞌguun it Ampuꞌang Diyus ka pagpadakulaꞌen ya nga banar i kasepsep mi it adat baw kaꞌirgan ya nga iyan i ipagpaꞌadat yat imyu. ¹¹Kat baꞌgu ngaytung pangaꞌgenan ta ega naytuy piyagbelagan, Judio u ega Judio, tiyuriꞌan u ega tiyuriꞌan, mga taga beken nga banwa nga belag i ampang baw adat, mga maꞌiꞌiseg nga mga taw nga egay maski unu nga inadalan, mga uripen baw daꞌga uripen. Ega impurtantiꞌ in unuy duguꞌ it taw u in unuy kabetangan nira. Iyan lamang i impurtantiꞌ, si Cristo, in magpamayaꞌ tami it kanya u ega. Kanya i subrat muꞌsa baw magsasarum kanya kat muꞌsa nga magsarig baw magpamayaꞌ it kanya.

¹²Aypaꞌ kamu nga piniliꞌ it Ampuꞌang Diyus, paribasay pagrarasan ya kamu baw subuk ipiyapinpin ya nga mga taawan ya na, kaꞌilangan masakit kat nakem mi i makuring kabetangan it mga maꞌiba mi baw maꞌildaw kamu it kanira. Baw gasiꞌ mapiyababaꞌ kamu na, nakman kamu nang nakman, baw ega makusked. ¹³Magpasi-pasinsiyaen kamu na it maꞌiba mi, nga pagsagkaꞌen mi it magayen i nakem i kasalaꞌan nira asat imyu. In magꞌuꞌunu piyasinsiya ni Cristo i kasalaꞌan mit imyu, atkayan naga i pasinsiya mi it beken. ¹⁴Subrat muꞌsa magsigraras kamu it esa may esa ka yay bilang pagkakabitan baw ipagkumplitu it muꞌsa ngaytung adat nga magayen.

¹⁵Paꞌresan mi i ipagbegay ni Cristo nga pagꞌurunyun nga kat ikaꞌimbeng it pakiꞌiba-iba mi. Sabap yay pabetang-betang ya, nga magꞌurunyun tami nga banar, nga bilang sang kabilu-bilugan. Baw beken nga adaten mi, mapiyasalamat kamu nga pirmi duꞌun it kanya. ¹⁶Iyan mga ampang ni Cristo, pasigi nga idawaꞌ mit magayen asat ulu mi, isaꞌun masepsepan mi nga banar. Kat kasepsep nga begay it Espiritu Santo it imyu, pirmi kamung magtuldu-tulduꞌun baw magsulag-sulagen it esa may esa. Subung naga i pagkantaꞌ mit mga ampang nga magbebtang duꞌut kasuratan nga pagpangaranan it Mga Awit, baw beken nga mga kantaꞌ nga ipagbantug mi it Ampuꞌan baw ikseg it pamayaꞌ mi. Makiyantaꞌen kamu nga ipagsugid i pagbantug baw pasalamat mi duꞌut kanya. ¹⁷Ta, uliꞌan-uliꞌan it muꞌsa ngaytu, inturun mi nga muꞌsang pagbuwaten baw pagꞌampangen mi, kat ikasagya baw ikabantug it Ampuꞌan nga si Jesus, mga buwat baw ampang nga bagay it mga taw nga maglalagpit nat kanya. Baw pirmi nga pagpasalamatan mi duꞌut Diyus Amaꞌ i kadakulat kagayenan nga naꞌimyu na sabap it binwat ni Jesus ngaytu.

Mga magayen nga sunudun kat pamalay-balay it mga namayaꞌ na

¹⁸Itu paꞌ i beken nga kuꞌaat kut imyu. Uꞌna, iyan mga babay, dapat nga pasakep kamu it asawa mi ka ituy bagay it mga maglalagpit nat Ampuꞌan. ¹⁹Baw kamu nga mga lalaki, kaꞌilangan nga rarasan mit kamatuudan i babay nga inasawa mi, nga nakman kamung pirmi duꞌut kanya.

²⁰Kamu gasiꞌ nga mga mangaꞌwaꞌ, sumunud kamu it mga giyaringan mi kat muꞌsang bagay nga ipagtulduꞌ nira, ka ituy kaꞌirgan it Ampuꞌan nga adaten it mga maglalagpit it kanya. ²¹Kamu gasing mga giyaringan, subraꞌ na in mga lalaki, gayen-gayenen mi nga padisir it mga anak mi, ka in ega, barang manglug na i nakem nira.

²²Kamu gasiꞌ nga mga uripen, kaꞌilangan sunudun mit magayen i muꞌsang taꞌeg it imyu it mga agalen mi situt banwa. Ega maat paꞌresan mi i pagsunud mi in pagleltegan kamu ga it agalen mi isaꞌun sagyaan ya kamu. Yay magayen, sunudun mi sira it masagyay nakem kat kadakulat paggalang mi it Ampuꞌang Diyus. ²³Sana, kat muꞌsang pagsirbi mi, pagsirbi nga ega alang-alang. Ipabetang mi nga Ampuꞌan i pagsirbiyan, ega desang masigkataw mi. ²⁴Ka magkaꞌrutan mi na nga talagang may magayeng tumbas nga ibgay it Ampuꞌan it imyu kat pagdadarapaꞌen. Ituy tumbas nga magꞌaꞌareg ya kat muꞌsang mga anak ya. Ka si Cristo talaga i matuud nga pagsirbiyan mi nga Agalen. ²⁵Takaꞌ in siyu-siyuy magsisigi paꞌ nga magbuwat it karaꞌe-raꞌetan, yay tumbas nga tanggapen ya, panriga. Egay piniliꞌan, rigaen it Ampuꞌang Diyus i muꞌsa.

¹Kamung mga agalen, kaꞌilangan nga mataldeng i muꞌsang pabetang mi it mga uripen mi, nga ega masyadu kamung maꞌigpit. Dedemdemen mi nga, maski agalen kamu na, may piyakaꞌagalen mi paꞌ duꞌun it langit.

Mga beken paꞌ nga munaꞌaw

²Itu paꞌ gasiꞌ i beken nga ipagꞌaat kut imyu, mapiyaꞌres kamu kat panalangin, baw in magpanalangin kamu mapiyasalamat kamung mga taw. Pagpipikiren mit magayen i pagꞌampangen mi kat panalangin, ega maat magbasta-basta lamang. ³Baw kada magpanalangin kamu, pagsangpiten mi gasiꞌ kami. Angutun mi nga abriyan kamit Ampuꞌang Diyus it dalan nga makapasigi namen nagat pangadal i ampang ya pasar it karibriyan duꞌut ki Cristo. Tagnaꞌ, madlem paytu, temed kayti ipiyaꞌrut ya nang banar. Sabap it pangadal ku it itung mga bagay pagpipirisuun aku na. ⁴Temed maski atkayan, ipanalangin mi nga makapangadal ku it maꞌyag, uyun kat dapat ku nga buwaten. ⁵Magpakanakman kamu nga iyan baꞌ, egay magkasudi-sudi it mga ega paꞌ magpasakep it ki Cristo. Baw kada pagbegayan kamut Ampuꞌan it rugar, sagyaan mit ipagpanglang i ampang ya duꞌun it kanira. ⁶Pikiren mit magayen in unuy ipagsugid mi isaꞌun dakulay mapulus nira kat ikagayen nira. Ka in atkayan maꞌrutan mi na i magayeng itubag mi kat ingkut it maski siyu.

Mga pangiyaꞌpusang pangumusta

⁷Ta, in pasar it kabetangan ku sini, si Tiquico na ngaytung pagmaꞌalen tami nga sulsug kat pamayaꞌ i tumuturan asat imyu. Kanyay magkasarigan ku nga katabang baw kasubung ku nga manigsirbi it Ampuꞌan. ⁸Piyapaꞌasan ku yan kanya it imyu isaꞌun maꞌrutan mi i amen nga kabetangan sini, isaꞌun ega masyadung maguluy ulu mi sabap it amen. ⁹Iba ya ngaytung si Onesimo, esa gasing pagmaꞌalen tang sulsug kat pamayaꞌ nga magkasarigan, baw taga asan nagat imyu. Sira na ngaytung duwa i tumuturan asat imyu it muꞌsang bagay-bagay sinit amen.

¹⁰Pagkumustaen kamu ni Aristarco nga iba ku sinit pirisuwan, baw si Marcos nga tagsa ni Bernabe. (Pasar it ki Marcos ngaytu may tiyanggap mi nga lagi nga tugun. Istimaren mi kanyat magayen in kaꞌnu-kaꞌnuy iꞌabut ya asat imyu.) ¹¹Pagkumustaen kamu gasiꞌ ni Jesus nga panggetaꞌ it kanya, Justo. Sira lamang ngaytung tulu i mga namayaꞌ nga Judio nga kaꞌibaan ku it magpangadal pasar it kaꞌadiꞌan it Ampuꞌang Diyus. Talagang pagsagyaan kuy tabang nirat aken. ¹²Iyan kabanwa mi ngaytung si Epafras, nga esa gasing manigsirbi ni Cristo Jesus, magkumusta gasit imyu. Talagang papaꞌres nay panalangin yat imyu asan nga magmapaꞌgen i pagsarig mit Ampuꞌan baw magpamayaꞌ kamu it ustung pamayaꞌ, nga magkasepsepan mi nga banar i kaꞌirgan ya. ¹³Ipagpamatuud ku nga talagang dakulay paꞌres ni Epafras ngaytu sabap it imyu baw sabap gasiꞌ it mga taga Laodicea baw taga Hierapolis nga mga magpamayaꞌ. ¹⁴Beken pang magpangumusta it imyu, pagmaꞌalen tang duktur nga si Lucas, baw si Demas gasiꞌ.

¹⁵Iꞌaat mit mga sulsug ta kat pamayaꞌ nga asat Laodicea nga pagkumustaen ku sira, subung naga si Nimfa baw kadakel it namayaꞌ nga asat balay yay pagtingpedan.

¹⁶Pagkabasa mi it surat ngaytu, ipabasa mi gasiꞌ it mga magpamayaꞌ nga asat Laodicea, baw basaen mi gasiꞌ i surat nga ipiyataban ku duꞌut kanira.

¹⁷Baw tugun ku nga iꞌaat mi it ki Arquipo, sarungaen yat magayen i buwaten nga ipiyakarguꞌ it Ampuꞌan it kanya isaꞌun maꞌayaw yay muꞌsa.

¹⁸Talagang aku nga si Pablo i tagsurat kaytu, kamatuudan panunuratan ku na i pangumusta ku ngaytut imyu.4:18 Yay adat ni Pablo in pagsuratan yay mga magpamayaꞌ, ipasurat ya it katabang ya i kusugiden ya. Takaꞌ basta pangiyaꞌpusan na, kanya na mismu i sumurat, nga bilang katandaꞌ it kanya talaga i garing. Dedemdemen mi kat panalangin i kakuriꞌan ku sinit pirisuwan. Ipagpanalangin ku nga sana asat imyu nga pirmi i ildaw it Ampuꞌang Diyus.