3 Juan

Surat ni Juan duꞌun it Iba-iba ya nga si Gayo (3 Juan)

¹Iba-iba ku nga si Gayo, nga pagmaꞌalen ku nga matuud, wayan i surat ku, aku nga piyakamagurang.

²Maꞌal ku nga iba-iba, ipagpanalangin ku nga sana pirmi nga magayen i kabetangan mu, baw makulaꞌsi i bilug mu, subung it magkabaritaꞌan ku nga kakseg it pamayaꞌ mu. ³Ka talagang masagyang-masagya aku pagꞌabut sinit pirang mga sulsug ta kat pamayaꞌ nga garing asan, sabap itiyuturan nirat aken nga pagteꞌteꞌan muy kamatuudan nga panulduꞌ, baw uyun nga pirmi kat kamatuudan ngaytu i pangaꞌgenan mu. ⁴Ega nay pasubraꞌ it kasagyaan ku basta nabaritaꞌan ku nga uyun kat kamatuudan i pangaꞌgenan it mga bilang anak ku.

⁵Pagmaꞌalen ku nga iba-iba, talagang magayen i adat mu nga matiyabangen ka it mga kasulsugan ta kat pamayaꞌ, maski ega kilala mu. ⁶Ipiyagpamatuud nira sinit magkatingped nga mga magpamayaꞌ i pasar it kararas mu ngaytu. Magayen gasiꞌ in matabangan mu sira kat paranawun nira in gumaring sira asat imu, iyan baꞌ, tabang nga bagay it mga taw nga ipiyatindeg it Ampuꞌang Diyus kat buwaten nira. ⁷Sabap panaw nira, mangadal pasar it ki Jesu-Cristo, baw ega naga magtanggap sirat maski unu nga tabang nga begay it mga taw nga ega magpamayaꞌ it ipagpangadal nira ngaytu. ⁸Aypaꞌ kaꞌilangan nga ipabetang ta nga bilang katengdanan taytu nga asikasuun ta sira, isaꞌun makatabang ta gasit palkep it kamatuudan ngaytu.

⁹Piyatabanan ku nat surat i mga magpamayaꞌ asan, temed daꞌku giyuman-guman ni Diotrefes, ka yay kanget it nakem ya, kanya i kilalaen nga magpanguꞌnaan. ¹⁰Aypaꞌ in kapaꞌasan aku, abigwaren kuytuy muꞌsa ngayang buwat ya, nga talagang paglibaken ya kami. Baw subuk ega paꞌ magkaꞌustuꞌan kanyat itung buwat ya, in daꞌga dungag ya paꞌ, ega pagtanggapen yay mga mamagpangadal ngaytit pasar it ki Jesus. Maꞌunu tanggapen ya isan yan pagpaaren ya paꞌ baw pagꞌawaꞌen ya kat kanirang gurupu nga magpamayaꞌ i iyan mamagꞌireg tumanggap it mamagꞌabut ngayan asan.

¹¹Pagmaꞌaleng iba-iba, ega mu guruun i maraꞌe-raꞌet nga buwat it beken, in daꞌga ari-ari magayen, iyan i imu. Ka iyan magbuwat it magayen, magpakiꞌuyun kanyat Ampuꞌang Diyus. Temed iyan magbuwat ngayat maraꞌe-raꞌet, ega yan nakatantu it in unuy adat it Ampuꞌang Diyus.

¹²Ta, pasar it sulsug ta kat pamayaꞌ nga si Demetrio, muꞌsa nang mga katataawan i magpamatuud pasar it kagayen it buwat ya. Ka maꞌyag kat pangaꞌgenan ya nga talagang pagsunudun yang banar i kamatuudan nga panulduꞌ. Ta pati kami, atkayan nagay amen nga pamatuud pasar it kanya ngaytu, baw urut mu nga matuud i paꞌaaten namen ngaytu.

¹³Dakulaꞌ paꞌ sana nga kuꞌaaten kut imu nga kusurat ku, temed napikir ku nga ega na isurat ku. ¹⁴Pagꞌiꞌinawaren ku sana nga kapaꞌasan aku it imyu it madaliꞌ, isaꞌun kapagsugi-sugid tat nagꞌadap.

¹⁵Ipagpanalangin ku nga sana asat imu nga pirmi i kaꞌimbengan it nakem nga ipagbegay it Ampuꞌang Diyus. Pagkumustaen ka it mga kaꞌiba-iba ta sini. Baw ireg ku sana, kumustaen muy kada esa nga mga iba-iba ku asan.