2 Timoteo

Ikadwang Surat ni Pablo duꞌun it ki Timoteo

2 Timoteo

Pauꞌnang Sugi-sugid

Itu, ikadwa ngaytung surat ni Pablo duꞌun it ki Timoteo, isiyurat ya iyan pagpipirisuun kanya duꞌut Roma sabap lamang it pangadal yat Magayeng Baritaꞌ (Kapitulu 1:16-17). Baw urut ya na nga adeꞌdeng na nga imatayen kanya (kapitulu 4:6).

Kat surat ngaytu, pagpaksegen ni Pablo i nakem ni Timoteo, nga maat sarungaen yat magayen i katengdanan ya nga manigsirbi it Ampuꞌang Diyus, baw sagkaꞌen yat magayen i nakem i mga magꞌabut nga pakuriꞌ. Ipagbenge-bengel ya nga paꞌalaidan ni Timoteo i mga dadaꞌeg nga sugi-sugid nga egay kapulusan. Sana yay sarungaen ya nga pirmi, pangadal it kamatuudan nga ampang it Ampuꞌang Diyus.

Paribasay urut na ni Pablo nga, ega na maꞌlay, imatayen na kanya, ipagpakiꞌupakat ya gasiꞌ nga paꞌaduꞌun si Timoteo it kanya it madaliꞌ (kapitulu 4:9,21). Taꞌun nga pagsurat ya kaytu, mga 66 A.D.

^1-2Dunguꞌ Timoteo, nga bilang anak ku nga talagang pagmaꞌalen ku, wayan siꞌ i surat ku, aku naga nga si Pablo nga riyumraan ni Cristo Jesus kat pagkaꞌapustul ka yay kaꞌirgan it Ampuꞌang Diyus. Ka ireg ya, mangadal aku pasar it kaꞌgenang egay kaskedan nga isiyanggup ya. Kaꞌgenan ngaytu, maꞌaten sabap it binwat ni Cristo Jesus kat kamataynen ya. Ipagpanalangin ku nga sana asat imu nga pirmi i ildaw, sanguꞌ nga tabang baw kaꞌimbengan it nakem nga ipagbegay it Diyus Amaꞌ baw Ampuꞌan tami nga si Cristo Jesus.

Pasalamat ni Pablo baw pakseg yat nakem ni Timoteo

³Talagang magpasalamat aku duꞌun it Ampuꞌang Diyus nga pagsirbiyan ku uyun kat naꞌrutan ku nga kaꞌirgan ya, nga subung it pagsirbi it mga kagiyaringanan ku. Pagpasalamatan ku ikaw baw delem-aldaw pirmi ku ikaw nga pagsangpiten kat panalangin ku. ⁴Talagang pagꞌildawun aku nang pagꞌildawun it imu. Ireg ku nga makitaan ku siꞌ ikaw isaꞌun sumagya aku nga banar, subraꞌ na in magkademdeman kuy magluwa-luwaꞌ ka ngayan paggaring ku asan. ⁵Talagang ega magkalipatan ku i kamatuudan nga pamayaꞌ mu ngayan, nga subung nagat pamayaꞌ ni Loida nga apuꞌ mu nga babay baw ni Eunice nga inaꞌ mu. Pagsisiguruun ku nga asat imu gasiꞌ kayti i atkayan naga nga pamayaꞌ. ⁶Aypaꞌ ka ipagpademdem kut imu nga gamiten mung pirmi i kakayaan nga ipiyagꞌildaw it imu it Ampuꞌang Diyus, iyan piyanalanginan ku ikaw nga pagtatapalen kuy ulu mu. ⁷Ka iyan Espiritu Santo nga ipiyapasarum it Ampuꞌang Diyus situt bilug ta, simpri ega pagbuwaten ya kita nga talawan, in daꞌga may pagmaꞌiseg it nakem, may raras it masigkataw baw pagsupil it sadili ta.

⁸Aypaꞌ ega iꞌyaꞌ mu i magpamatuud pasar it Ampuꞌan ta. Ega gasiꞌ iꞌyaꞌ mu aku maski pirisu aku na sabap it panindeg kut kanya. In daꞌga yay magayen, subuk paꞌuyu-uyut ka nat kakuriꞌan ku ngaytu. Ega iꞌlaman muy pakuriꞌan ka sabap lamang it panindeg mu it Magayeng Baritaꞌ. Ka talagang papaꞌgenen ka it Ampuꞌang Diyus isaꞌun makasagkaꞌ ka. ⁹Dedemdemen mu nga Ampuꞌang Diyus ngaytu i rimnibri it aten, baw ipiyapinpin ya kita nga mga taawan ya na nga magpangaꞌgenan na it alaid kat muꞌsang kasalaꞌan. Ipiyagribri ya kita, ega sabap duꞌun it mga buwat ta nga sadili, in daꞌga uyun duꞌun it ipiyabetang-betang ya nang lagi, baw sabap it kadakulat ildaw ya. Yay matuud, ipiyabetang-betang ya it ega paꞌ naguna yay banwa, nga ildawan ya kita it karibriyan sabap it buwaten ni Cristo Jesus. ¹⁰Temed kayti mana ngaytu natanyag, iyan piyapaꞌasitu ya nat denaꞌ si Cristo Jesus nga Manriribri tami. Natanyag nga diyaꞌeg ya talagay kamataynen, baw ipiyatanyag ya kat Magayen ngaytung Baritaꞌ nga maꞌaten nay kaꞌgenan nga egay kaskedan.

¹¹Ta it isaꞌun makapaꞌyag i Magayen ngaytung Baritaꞌ, esa akung binwat nga apustul baw manigpangadal. ¹²Baw sabap it pagsarunga kut katengdanan ku ngaytu, nakabetang akut kakuriꞌan ngaytung atkaytu. Temed egaytu ipagpabetang ku nga kaꞌeꞌyaꞌan, sabap talagang kilalang-kilala kuy piyamayaꞌ ku ngaytu nga si Cristo Jesus. Baw pagsisiguruun ku nga kaya ya talaga nga tarimaen ya aku nga makateꞌteꞌ, isaꞌun pagꞌabut it aldaw ngayang ipangukuman, maꞌaken i karibriyan nga isiyarig kut kanya.

¹³Sawluun mut magayen i muꞌsang mga ipiyangadal kut imu, ka talagang purus tu kamatuudan i mga itu ngaytu. Yanayan i sunudun mu baw ipangadal mu duꞌut beken. Baw inturun mu nga teꞌteꞌ i pagsarig mut Ampuꞌan baw raras mut mga sulsug mu kat pamayaꞌ, nga yay pagꞌadaten it mga magpakilagpit it ki Cristo Jesus. ¹⁴Ta it ipiyakarguꞌ nat imu i ipagpangadal ngaytu, panindegan mut magayen kat tabang it Espiritu Santo nga magsasarum situt bilug ta. Inturun mu nga ega magantiyan it maski siyu.

¹⁵Siguru ega nataguꞌ it imu, naꞌrutan mu naga nga nangindiꞌ nat aken i kadaklan it mga magpamayaꞌ nga taga Asia, pati na Filego baw si Hermogenes. ¹⁶Takaꞌ si Onesiforo, pirmi ya nga pagpaksegen i nakem ku iyan sini paꞌ kanya, aypaꞌ ipagpanalangin ku nga sana ildawan nga pirmi it Ampuꞌan i pamalay-balay ya. Ka talagang ega maat ipagꞌeyaꞌ aku ni Onesiforo ngayti, maski pirisu aku. ¹⁷In daꞌga, pagꞌabut ya sinit Roma, tiyegel ya akut tulus seked it naparagan ya aku. ¹⁸Sana ildawan kanya it Ampuꞌan, pagꞌabut it aldaw ngayang ipangukuman. Ka urut mu talaga i kadakulat tabang ni Onesiforo ngayan asan it Efeso.

¹Aypaꞌ ikaw, Timoteo, nga bilang anak ku, kaꞌilangan nga magmapaꞌgen kang banar kat tabang ni Cristo Jesus it imu. ²Magayen, iyan mga nagnegan mu sinit aken kat adapan it kadakel nga magdedngeg, ipangadal mu kat mga taw nga magkasarigan, isaꞌun magkakayaan na nira nga ipangadal gasiꞌ duꞌun it beken.

³Sagkaꞌen muy mga kakuriꞌan nga magꞌabut it aten nga magpanindeg it ki Cristo Jesus. Pasbung ka it sundaluꞌ nga magkasarigan. ⁴Ka basta sundaluꞌ, ega pasilabtan yay in unu nga bagay basta ega kat piyagsundaluꞌan ya. In daꞌga iyan talagay pagpaꞌresan ya, masagyaan it nagpasundaluꞌ it kanya. ⁵Ta in ipaꞌalimbawa ta gasit manigkuntis, ega kilalaen kanya nga nandaꞌeg basta ega simnunud it in unu nga kalilꞌiyan. ⁶Ta yan gasiꞌ, manigꞌuma, nga kanyay nagpakariga, simpri kanyay uꞌnang makakaꞌen in mabut nay piyakarigaan ya. ⁷Pagpipikiren muytung pirmi i mga pagꞌaaten ku ngaytu, ka ipasepsep tut Ampuꞌan it imu nga muꞌsa.

⁸Pagdedemdemen mu nga pirmi si Jesu-Cristo, nga inggen it paꞌuliꞌ, kanya ngaytung tungtung-inapuꞌ it adiꞌ nga si David. Itu ngaytuy Magayen ngaytung Baritaꞌ nga ipagpangadal ku. ⁹Baw sabap it pangadal ku ngaytut Magayeng Baritaꞌ, nakalabay akut kakuriꞌan seked it ungaytu na, pagkakadinaan aku na, adimaat taw aku nga barapakun. Temed maski pagkakadinaan aku, iyan ampang it Ampuꞌang Diyus, ega yan magkakadinaan. ¹⁰Aypaꞌ ka pagsagkaꞌen kuy maski unu nga kakuriꞌan it magayen i nakem, sabap kat ikagayen tu it mga napiliꞌ it Ampuꞌang Diyus. Pagsagkaꞌen kuy muꞌsa isaꞌun maribri sira gasiꞌ kat keseg it pakilagpit nirat ki Cristo Jesus, baw makaꞌuyut gasiꞌ sira it egay kaskedan nga kagayenan ya duꞌut langit.

¹¹Kamatuudan tuy pagꞌaaten ngaytu.

Basta teꞌteꞌan tami si Jesu-Cristo, maski maat ikagtas nat ginawa ta, siguradung kasagpun tami naga duꞌun it kaꞌgenan nga egay kaskedan.

¹²Eeꞌ baꞌ, basta teꞌteꞌan ta kanya, siguradung magꞌadiꞌ ta nga iba ya in duꞌun nat kaꞌadiꞌan ya.

Takaꞌ in beteꞌ payluwan ta na kanya kat adapan it mga taw, siguradung payluwan ya kita pagꞌabut it aldaw ngayang ipangukuman.

¹³Baw yay matuud, in beteꞌ kita, pabaꞌgu-baꞌgu, temed kanya, egay pagbaꞌgu yat kanya, ka egay maski unu nga pagꞌugadan it mga adat baw inampang yat kanya.

Kaꞌilangan nga gayen-gayenen ni Timoteo i buwat ya nga magpangadal

¹⁴Kaꞌilangan ipagpademdem mu nga pirmi it mga pagpamaalaꞌan mu ngayan i itu nga mga bagay. Baw ibenge-bengel mut kanira kat panleteg it Ampuꞌang Diyus nga ega na magdaꞌe-daꞌegen sira pasar it dakel-dakel nga ampang, in unuy pagpapuntuꞌan, sabap talagang egay liꞌwan ya nga magayen. Ipagkateꞌag-teꞌag lamang it pamayaꞌ it mga magpagneg. ¹⁵Baw ta yanayan, paꞌresan mu nga magkasagyaan ka nga pirmi it Ampuꞌang Diyus. Kaꞌilangan, manigbuwat ka it buwaten it Ampuꞌang Diyus nga egay magkaꞌyaꞌan mu, baw purus tamaꞌ i pangadal mu it kamatuudan. ¹⁶Paꞌalaidan muy mga egay kapulusan nga mga pagrundingen nga taw lamang i garing. Sabap egay beken nga liꞌwan kayan, ikapaꞌalaid it kaꞌirgan it Ampuꞌang Diyus. ¹⁷Mga pangadal nirat kanira, subung talaga it maꞌget nga sarut nga magpanalakep. Dakel i mabalun nga maꞌakalan. Uyut it mga magpangadal it itu ngaytu, si Himeneo baw si Fileto. ¹⁸Talagang nakapaꞌalaid na sira it kamatuudan, baw pagranggaꞌen nira pay pamayaꞌ it beken. Ka ipagpanulduꞌ nira nga iyan namayaꞌ ta nat Ampuꞌan, yanayan i paꞌaaten nga nagꞌegen ta na it paꞌuliꞌ. Ega na kunuꞌ i pagꞌiꞌinawaren tami nga egnen paꞌ kat pagdadarapaꞌen.

¹⁹Temed talagang mapaꞌgeng-mapaꞌgen i kamatuudan nga garing duꞌut Ampuꞌang Diyus baw magꞌuꞌunay sikaytu i pamayaꞌ it mga taawan ya. Binggayan ya paꞌ sirat kariꞌgenan nga magꞌaat, “Magkakilalaan it Ampuꞌang Diyus i kumpur taawan ya nga matuud.” Baw paꞌugdun ya paꞌ, “Kaꞌilangan nga in siyuy magpamatuud nga nagpasakep na kanyat Ampuꞌan, paꞌalaidan yay muꞌsang karaꞌe-raꞌetan.”

²⁰Ka ipaꞌalimbawa ta it esang mabakas nga balay. Ega naga maat bulawan baw pirak nay muꞌsang garamiten duꞌun. May kayu nagay binwat baw dakut. Iyan mga bulawan ngaytu baw pirak i binwat, paggamiten lamang in kat matataꞌas nga mga aldaw. Iyan kayu baw dakut ngaytuy binwat, yay garamiten it aldaw-aldaw. ²¹Ta kayti, iyan mga taw nga magpaꞌalaid na kat muꞌsang karaꞌe-raꞌetan, iyan i subung it garamiten ngaytu nga ega basta-basta. Sabap iyan i nakasiguru nga kat Ampuꞌan ya na, nga magkapakinabangan baw alistu nga pirmi kat in unu nga magayen nga pagbuwaten.

²²Aypaꞌ iyan i magayen, paꞌalaidan muy mga ega magayeng adat baw bisyuꞌ nga kaꞌiꞌirgan it mga kamamangaꞌwaꞌan. Iyan i magayen nga paꞌresan mu, mataldeng i pangaꞌgenan mu, magmapaꞌgen i pagsarig baw pamayaꞌ mu it Ampuꞌan, kamatuudan i raras mu it masigkataw mu, baw maꞌimbeng i pakiꞌiba-iba mu it kumpur magpasakep it Ampuꞌan, nga magpangaꞌgenan uyun kat kamatuudan. ²³Paꞌalaidan muy adat nga mapiyakidaꞌeg it egay kapulusan nga pakidaꞌeg. Urut mu na nga yay magkapꞌunan it babatir. ²⁴Ka yay matuud, ega na magayeng adaten it manigsirbi na it Ampuꞌan i magpakibatir, in daꞌga nakman baw maꞌildaw it masigkataw ya, magkaꞌrut mangadal, baw masagkaꞌ it pakuriꞌ. ²⁵Ireg kung sugiden, ayaw kat pakerat-kerat, in daꞌga luway-luway nga tulduꞌan muy mga magkuntraꞌ it imu. Ka barang ildawan naga sirat Ampuꞌang Diyus it magsinguliꞌ baw mangindiꞌ it kamaliꞌ nga pasepsep nira baw matantuwan na nira i kamatuudan. ²⁶Ta daꞌga in atkayan, meyag nagay pikir nira. Egay beken, makapaꞌalikaꞌsut naga sira kat pamegbeg ni Satanas nga simnakep it kanira isaꞌun buwaten niray kaꞌirgan ya.

Kaꞌilangan paꞌalaidan i mga magpangadal it kamaliꞌ

¹Tandaꞌanan muy pagꞌaaten ku ngaytu. In adeꞌdeng nay umur it banwa, dumakel talagay mga kakuriꞌan. ²Sabap dakel nay sadili lamang nga kaꞌirgan i pagsumbayaꞌen nga pirmi. Maꞌireg na sirat pagpirak, mapiyatuꞌgud, mapiyataꞌas-taꞌas, mapiyanibabaꞌ, masutil na it giyaringan, baw talagang alaid duꞌut kanira i adat nga magpasalamat. Baw alaid kat nakem nira i kaꞌirgan it Ampuꞌang Diyus. ³Yay matuud, ega pagbalyen nira i kabetangan it beken. Daꞌsira magpasinsiya, in daꞌga, mapiyamuwat-buwat na, ega magkaꞌrut sumupil it sadili nira, maꞌiseg, pagraꞌwayen niray in unu nga magayen. ⁴Mapiyangilang nayan sira it masigkataw nira, ega talaga magkasabatan, mapiyasubraꞌ-subraꞌ na. Baw ta yanayan, maꞌireg sirang banar it kasasagyaan it bilug, ega na maat Ampuꞌang Diyus i pagkayliyan nira. ⁵Bete-beteꞌ na lamang i pamayaꞌ baw pagsamba nirat Ampuꞌang Diyus ngaytu. Maꞌyag kat pangaꞌgenan nira nga talagang ega nagpasakep sirat pamegbeg ya. Ayaw kat pakiꞌiba-iba it atkaytung mga taw.

⁶May uyut it mga taw ngaytu nga, buwat nirat kanira, magꞌapyat kat mga balay ka inu-inuun niray tagbalay nga babay nga mamayaꞌ nat pangadal nira ngaytung kamaliꞌ. Ta, madaliꞌ daꞌgen niray beken nga kurang it kasepsep, mga lemes na it kasalaꞌan baw mga madali-daliꞌ makapakursud kat pagsumbayaꞌ it kaꞌiꞌirgan nga ega magayen. ⁷Atkaytung mga babay, pirmi sirang kupagneg it pangadal temed, ta, ega magkatantuwan niray kamatuudan. ⁸Baw mga magpangadal ngaytut kanira, buwat nira, magpakikuntraꞌ sira it kamatuudan ngaytu, ka piyaraꞌe-raꞌet na talagay pikiran nira. Egay maski unu nga uru-urut nirat pamayaꞌ nga mapakay it Ampuꞌang Diyus. Subung lamang tu sira it ki Janes baw ki Jambres, nga kimnuntraꞌ it ki Moises it tagnaꞌ paꞌ.3:8 Kat mga siyubli-subli nga katuturanan it mga Judio, si Janes baw si Jambres ngaytu, kaꞌuyutan it mga taga Egipto nga mapipikir nga may kepetan nga piyabwat it adiꞌ it Egipto it mga kalililuꞌan nga subung it ipiyabwat it Ampuꞌang Diyus it ki Aaron, duwa ni Moises (Exodo 7:11,22). ⁹Temed ega nagay liyapusan it duwa ngayti. Ta mga taw ngaytu gasiꞌ, ega talagay lapusan it buwat nira, in daꞌga mabut i matanyag na kat kadakel i kamaliꞌ nira.

Pangiyaꞌpusan nga mga munaꞌaw ni Pablo it ki Timoteo

¹⁰Temed ikaw, Timoteo, natantuwan mut magayen i mga ipagpangadal ku. Urut mu nay adat ku, baw in unuy pagpaꞌresan ku, baw in sang unuy pamayaꞌ ku it Ampuꞌan. Naꞌrutan mu na in magꞌuꞌunu ega magkaskedan aku it kakuriꞌan, baw in sang unuy kadakulat kararas baw paneꞌteꞌ ku. ¹¹Namuyaan mu talaga i pakuriꞌ it aken it masigkataw ku baw muꞌsang mga nalabayan ku nga ega magayen. Naꞌrutan mu nagay nabetangan ku duꞌut Antioquia, Iconio baw Listra, nga talagang piyakuriꞌan aku. Temed maꞌyag nga ipiyagribri akut Ampuꞌan kat muꞌsa ngaytu.

¹²Baw ta, yay matuud, in siyu-siyuy magꞌireg mangaꞌgenan it mataldeng kat panleteg it Ampuꞌang Diyus ka pakilagpit kanyat ki Cristo Jesus, talagang maglabay kanya gasiꞌ it pakuriꞌ it masigkataw. ¹³Ka iyan maraꞌe-raꞌet ngayan nga adat it taw nga maꞌakal, meget nayan it rumaꞌe-raꞌet, nga sumari na sira it paneꞌag-teꞌag it masigkataw nira, baw ta, unupat sira mismu, pagteꞌag-teꞌagen naga.

¹⁴Temed ikaw, teꞌteꞌan muy nasawlu mu baw talagang piyamayaꞌ mu na nga kamatuudan, sabap kilalang-kilala mu baw urut mu nay adat it mga nangadal it imu it itu ngaytu. ¹⁵Ka daꞌga baꞌ garing it dekeyeꞌ ka paꞌ, urut mu nay nakasurat nga mga ampang it Ampuꞌang Diyus, nga ituy magtulduꞌ it dalan it karibriyan nga maꞌaten kat pagsarig tat ki Cristo Jesus? ¹⁶Yay matuud, talagang muꞌsa nga magsusurat nga ampang it Ampuꞌang Diyus, Ampuꞌang Diyus naga ngaytuy nagpasurat ka piyanakman yay simnurat. Aypaꞌ ka magkapakinabangan nga muꞌsa. Ipagpangadal nira in unuy kamatuudan, pagsurarawun baw pagtaldengen nira i muꞌsang buwat nga kamaliꞌ, baw ipagpatantu nira i pangaꞌgenan nga mataldeng kat panleteg it Ampuꞌang Diyus. ¹⁷Aypaꞌ ampang ya ngaytu, pabetang-betang it Ampuꞌang Diyus isaꞌun ega na maat lugmas tami nga magsirbi it kanya, in daꞌga kumplitu na kat muꞌsang pagkaꞌilanganen tami kat muꞌsang mga magagayen nga buwat.

¹Kayti, pagsekaten ku ikaw kat panleteg it Ampuꞌang Diyus baw si Cristo Jesus, kanya nga mukuman it muꞌsa, maski patay na u egen paꞌ, in asan nat umur it banwa. Sabap talagang kanya, paꞌuliꞌ naga situ ka magꞌadiꞌ na. ²Ipagsekat ku nga, maski unu nga timpu, ipangadal mu nga pirmi i ampang ngaytu nga kamatuudan. Ipalbaw mut mga pagpangadalan mu i mga kamaliꞌ nira, sardawun mu baw paksegen muy nakem nira nga muwat sirat mataldeng. Buwaten muy muꞌsa ngaytu it may dakulang kapalulusan baw luway-luway nga tulduꞌ. ³Sabap mabut i timpu nga ega na pagnegan it kadaklan i kamatuudan ngaytu nga ipagpangadal ta. In daꞌga yanayan, yan i paglabiyen nira, kalasi-kalasing pangadal nga siyang. Aypaꞌ ka dakel i kunkunun nira nga manigpangadal nga mampang uyun na lamang it pagsagyaan nira ngayti. ⁴Iyan siꞌ talagay magaye-gayen nirang pagpagnegan, mga singkadan nga katuturanan nga egay kamatuudan. Benglen nayan niray mga talinga nira kat pangadal nga kamatuudan nga banar. ⁵Temed ikaw, kaꞌilangan maꞌintur ka, nga pagsupilen mu nga pirmi i sadili mu. Sagkaꞌen mu lamang i muꞌsang kakuriꞌan nga magꞌabut it imu. Kaꞌilangan sarungaen mut magayen i katengdanan mu nga manigpangadal it Magayen ngaytung Baritaꞌ baw manigsirbi it Ampuꞌang Diyus.

⁶Temed aku, subuk magꞌadeꞌdeng nay kapaladan kut aken, nga getasen nay ginawa ku. ⁷Talagang eꞌres i pagsunud kut Ampuꞌan it kaꞌlay ngaytu. Kaꞌalimbawaan ku, subuk magpakilungbaꞌ. Imbu-imbus ku nay keseg ku. Ta kayti subuk naꞌbut ku nay pagꞌabutun. Talagang nateꞌteꞌan kuy pagsarig baw pamayaꞌ nga kamatuudan. ⁸Aypaꞌ kayti, sabap it pandaꞌeg ku ngaytu, may magꞌaꞌareg na nga tumbas4:8 Maat it Ginirego, kuruna it kataldengan i tumbas ngaytu. Ireg sugiden, sabap it paꞌres yat pangaꞌgenan nga mataldeng, yay tumbas it kanya, buwaten na kanyang mataldeng nga banar. Mapakay tu sabap it binwat ni Jesu-Cristo nga karibriyan. nga ibgay it aken it Ampuꞌan kat aldaw ngayting ipangukuman ya. Ka kanya, mataldeng talaga nga manigꞌukuman. Baw ega lamang maat aku i begayan yat tumbas ngaytu, in daꞌga kat puꞌsaytu nga maꞌlat nga banar it pamaꞌuliꞌ ya ngayan situ.

Pangiyaꞌpusang sugi-sugid, nga pasar it sadili ya

⁹Asi-asi pat imu, in may rugar mu ireg ku kaꞌasini ka nagat madaliꞌ. ¹⁰Ka tiyananan aku na ni Demas, sabap it nalabi siꞌ it mga sadili nga pagsagyaan it bilug. Kayti duꞌun kanya it Tesalonica. Ki Cresente, nagpaGalacia na. Ki Tito, duꞌun it Dalmacia. ¹¹Kayti, yamanay iba ku sini, si Lucas. Ireg ku sana, upakaten mu si Marcos ka pabayaꞌen mu in paꞌasini ka. Sabap pagsisiguruun ku nga dakulay makatabang yat aken kat pagsirbi kut Ampuꞌan. ¹²Ki Tiquico, piyapaꞌasan kut Efeso. ¹³Baw in paꞌasini ka na, patuluy ka daꞌan duꞌut kana Carpo nga duꞌut Troas, ka parigaan mut tumaban i natuduꞌ duꞌun nga gulamen ku. Tabanen mu gasiꞌ i mga kasuratan ku, subraꞌ nay iyan mga anit ngayay binwat.

¹⁴Talagang maraꞌe-raꞌet nga banar i binwat it aken ni Alejandro ngayting mananalsal. Ampuꞌan nay baalaꞌ tumumbas it kanya uyun kat binwat ya ngayti. ¹⁵Iyan magtitiyakap ka gasiꞌ it kanya, sabap talagang nagpakikuntraꞌ kanyat pamatuud ku.

¹⁶Talagang egay kimnampiꞌ it aken, iyan uꞌnang adap ku duꞌun it ukuman. Ipiyaꞌesa-esa nira aku. Sana pasinsiyaen naga sirat Ampuꞌan. ¹⁷Temed maski atkayan nga tiyananan nira aku, Ampuꞌan nagay nangibat aken. Baw binggayan ya aku it pagmaꞌiseg it nakem, isaꞌun makaꞌusay ku duꞌut kadakel ngayting ega Judio i kamatuudan ngaytung ampang it Ampuꞌang Diyus. Baw ipiyagribri ya naga aku nga ega imatayen it semkad. ¹⁸Talagang pagsisiguruun ku nga ipasigi it Ampuꞌan i panribri yat aken kat maski unu nga kaꞌiꞌilang nga buwat it mga maraꞌe-raꞌet, baw siguradung tarimaen ya aku nga kaꞌbut duꞌun it kaꞌadiꞌan ya nga duꞌut langit. Bantugun kanya it egay katupusan. Kamatuudan tu.

Mga pangiyaꞌpusang pangumusta

¹⁹Ikumusta mu aku kat duwa ngayang magꞌasawa, si Priscila baw si Aquila, baw muꞌsang kat pamalay-balay ni Onesiforo. ²⁰Palan ki Erasto, nagpatuduꞌ naga duꞌut Corinto. Si Trofimo, itiyuduꞌ ku kanya duꞌun it Melito ka magsarut. ²¹Ta yanayan in beteꞌ may rugar mu, magayen makapaꞌasini kang lagi, parabir timpu it panagramig. Pagkumustaen ka na Eubulo, si Pudente, si Lino, si Claudia baw beken sini nga kasulsugan ta kat pamayaꞌ.

²²Ipagpanalangin ku nga sana paksegen it Ampuꞌan i nakem mu, Timoteo. Baw ipagpanalangin ku gasiꞌ nga sana asat imyu nga muꞌsa i ildaw it Ampuꞌang Diyus.