2 Pedro

Ikadwang Surat ni Pedro

2 Pedro

Pauꞌnang Sugi-sugid

Ituy ikadwang kasuratan nga mga pangadal ni Pedro i ibintang nga isiyurat, nga ipiyataban duꞌut kadakel it mga namayaꞌ it Ampuꞌan. Iyan isiyurat ni Pedro i surat ya ngaytu, naꞌrutan ya nga ega na maꞌlay, matay kanya, ka yay ipiyaꞌrut ni Jesu-Cristo it kanya (kapitulu 1:14). Naꞌrutan ya gasiꞌ nga may mga magpaneꞌag-teꞌag it pamayaꞌ nga magpaliꞌwan it talagang kamaliꞌ nga pangadal. Magsari sirat sumbayaꞌ it mga maraꞌe-raꞌet nga kaꞌirgan it bilug nira baw ipagpaguru nira gasit beken i karaꞌe-raꞌetan nira ngayti (kapitulu 2:1-22). Ipagpaliꞌwan nira gasiꞌ nga ega naga paꞌuliꞌ si Jesu-Cristo situt banwa (kapitulu 3:4).

Aypaꞌ parabir inimatay si Pedro, isiyurat ya i surat ya ngaytu nga pagtubagen ya i kamaliꞌ ngayti nga pangadal baw ipagsulag ya it mga magpamayaꞌ. Ipagsasar ya nga dapat talaga nga paꞌresan it muꞌsang magpamayaꞌ i pangaꞌgenan nga uyun kat kaꞌirgan it Ampuꞌang Diyus, nga pagsupilen tami i sadili ta baw magsigtabang-tabangen it maꞌiba ta kat kadakulat raras tat kanira (kapitulu 1:3-11). Sabap talagang mabut i aldaw nga paꞌuliꞌ situt banwa i Ampuꞌan nga betanganan yat ukuman i muꞌsang makasalaꞌan, baw kat iting timpu ranggaꞌen yay langit baw banwa ka baꞌguun ya, nga mga mataldeng lamang i makataꞌid duꞌun (kapitulu 3:8-13).

¹Aku nagang si Simon Pedro, nga manigsirbi baw apustul ni Jesu-Cristo, i garing kaytu. Pagsuratan ku kamung muꞌsa nga kasubung namen nga magpamayaꞌ baw magsarig it ki Jesu-Cristo. Kanyay Ampuꞌang Diyus baw Manriribri tami. Baw paribasay egay pagbidaꞌen ya, surubung tami nga inildawan ya it pamayaꞌ ngaytu. ²Ipagpanalangin ku nga sana, kat keseg it kamatuudang pagkilala mi it Ampuꞌang Diyus baw Ampuꞌan tami nga si Jesus, magbastanti nga pirmi asat imyu i ildaw baw kaꞌimbengan it nakem nga ipagbegay nira.

Kaꞌilangan, paꞌresan nga banar i magagayen nga pagꞌadaten

³Talagang kat keseg it guna it Ampuꞌang Diyus, ibinggay yat aten i kumpur pagkaꞌilanganen tami, isaꞌun mabaꞌgu i pangaꞌgenan ta nga mangaꞌgenan tami uyun kat kaꞌirgan ya. Kaya tami naytu kat keseg it kamatuudang pagkilala ta ngaytut kanya, kanya nga nagpanakem it aten nga pasakep it kanya kat keseg it kabantugan baw guna ya kat pagkaDiyus ya. ⁴Kat kabantugan baw guna ya ngaytu, may ibinggay yat aten nga mga ega babasta-bastaeng mga sanggup, isaꞌun kasbung i adat ta it kanyang adat nga talagang magayen. Sabap nakaꞌalikaꞌsut tami na kat pagkaꞌuripen tami it pagsumbayaꞌ it mga singkadan tami nga kaꞌiꞌirgan nga maraꞌe-raꞌet, nga yay tumaban it taw kat pangaꞌgenan nga maranggaꞌ.

⁵Aypaꞌ sabap it kadakulaꞌ it ildaw ya ngaytut aten, kaꞌilangan paꞌres tamit paꞌres banar, isaꞌun kita nga magsarig baw magpamayaꞌ nat Ampuꞌan, talagang magayen i adat ta. Kaꞌilangan paꞌresan ta nga pirmi i kasepsep nga ipagkakilala it magayen baw daꞌga. ⁶Baw ega lamang kasepsep ngaytu i paꞌresan, in daꞌga kaꞌilangan supilen tami i bilug ta, baw talagang teꞌteꞌan i pamayaꞌ ta. Sana yay magdadaꞌeg kat nakem ta nga magpangaꞌgenan tami nga pirmi nga uyun it kaꞌirgan it Ampuꞌang Diyus. ⁷Baw ega matuduꞌ situt aten i adat nga magsigtabang-tabangen nga bilang sang sulsugan, baw pirmi nga may kamatuudang raras it esa may esa. ⁸Ka basta magdudungag-dudungag i atkaytung mga adat mi, makasiguru yan nga daꞌkamu mga taw nga egay kakapulusan. In daꞌga limiꞌwan nga dakulay buwaꞌ1:8 Juan 15:1-8,16. it pamayaꞌ kat pangaꞌgenan mi, nga mga taw kamu nga may kamatuudang pagkilala it Ampuꞌan tami nga si Jesu-Cristo. ⁹Temed ta, yay matuud, in siyu-siyu nga namayaꞌ na nga egay itu nga mga adat, kabilangan ya, beleg. Ega ipagpaꞌabwat yay pikir. Ka ega na pagdemdemen yay linimpiyuꞌ na kanya, sabap pagpamayaꞌ ya it Ampuꞌan, piyasinsiya nay mga kasalaꞌan nga pagbuwaten yat tagnaꞌ.

¹⁰Aypaꞌ kamu nga mga sulsug ku kat pamayaꞌ, sana dungagan mi pay paꞌres mi it muꞌsa ngaytu, isaꞌun masiguru mi kat magayeng pagꞌadaten mi nga kamu, kaꞌuyutan naga it mga piniliꞌ baw ipiyapinpin it Ampuꞌang Diyus nga mga taawan ya na. Ka basta atkayan i buwaten mi, talagang daꞌkamu mangindiꞌ it pamayaꞌ mi ngaytu. ¹¹In daꞌga, talagang tanggapen kamut masagya it Ampuꞌan tami nga Manriribri nga si Jesu-Cristo, ka paꞌistaren ya na kamu duꞌun it egay kaskedan nga kaꞌadiꞌan ya.

Talagang kamatuudan i ipagpangadal ni Pedro baw mga prupitaꞌ it tagnaꞌ ka Ampuꞌang Diyus i garing

¹²Aypaꞌ ka pirmi nga ipagpademdem kut imyu i itung mga bagay, maski na maat magkaꞌrutan mi na, baw mapaꞌgen nay pamayaꞌ mi it kamatuudan nga ipiyangadal nat imyu. ¹³Ka pagsisiguruun ku nga magayen in pirmi ku nga pagsulagen kamu pasar it mga itu ngaytu, mintras ege-egen aku paꞌ. ¹⁴Sabap natantuwan ku nga daꞌku na paꞌlayen, ka ipiyaꞌrut tu it aken it Ampuꞌan tami nga si Jesu-Cristo. ¹⁵Aypaꞌ ersen ku na nga muwat it dalan nga ega ipagkaꞌawaꞌ kat pikiran mi it itung mga bagay,1:15 Kat pasepsep it beken nga mapipikir, dalan ngaytu nga paꞌaaten ni Pedro, itung surat ya baw kasuratan gasiꞌ nga pamatuud nga isiyurat ni Marcos. Ka maat nira, si Pedro i siyuwiꞌ-suwiꞌ ni Marcos it mga bagay pasar it ki Jesus nga isiyurat ya. maski daꞌku na situt banwa.

¹⁶Iyan ipiyangadal namen it imyu i pasar it guna baw pamaꞌuliꞌ situ it Ampuꞌan tami nga si Jesu-Cristo, egaytu maat tuturan-manuturan nga biyuwat-buwat lamang. Talagang matuud tu, nga nagpasar kat mata namen i kabantug ya. ¹⁷Sabap kaꞌibaan ya naga kami, iyan ipiyalteg it Diyus Amaꞌ i kataꞌasan baw kabantug ni Jesu-Cristo ngaytu. Baw nagnegan namen i ampang yat kanya, nga duꞌun it ega basta-bastang kabantugan ya nga duꞌut langit i garing. Ampang ya ngayting magꞌaat, “Itu i pagmaꞌa-maꞌalen ku nga anak ku, nga talagang kasasagyaan ku.”1:17 Mateo 17:5, Marcos 9:7, baw Lucas 9:35. ¹⁸Nagnegan namen tu i ampang ngaytu nga garing duꞌut langit, iyan duꞌun kami ni Jesus it bukid ngayti nga ipagpabetang kayti nga ega basta-bastang bukid.

¹⁹Kat nagpasar ngayti kat mata namen, subraꞌ na nga pagsisiguruun namen nga talagang kamatuudan i mga kasuratan nga ampang it mga prupitaꞌ. Aypaꞌ idawaꞌ mit magayen kat ulu mi. Ka mga kasuratan ngaytu, kabilangan nira, tidaw nga magꞌeꞌyag it aten mintras delemen paꞌ, seked it magpangeyag-eyag na. Bawnga singkaran tamit Buntatalaꞌ, nga ireg sugiden, kabantugan ni Jesu-Cristo kat pamaꞌuliꞌ ya situ. ²⁰Subrat muꞌsa, kaꞌilangan nga matantuwan mi nga banar nga talagang egay maski unu nga isiyurat it mga prupitaꞌ ngayti, nga kat pasepsep it taw i garing. ²¹Ka talagang ega kat pikiran it taw lamang i piyanggaringan it mga isiyurat ngaytu, in daꞌga mga prupitaꞌ ngayti, piyanakman sirat Ampuꞌang Diyus it in unuy kusugiden ya, kat ipiyapasarum ya nga Espiritu Santo.

Maraꞌe-raꞌet talagay manigpangadal it kaꞌambutan

¹Temed maski tagnaꞌ ngayti, may mga nagpapru-prupitaꞌ duꞌut mga Israelita. Ta kayti, atkayan naga, asat imyu may limiꞌwan gasiꞌ nga maat manigpangadal. Temed pangadal nira, panlibeg it pikiran mi, nga ikaranggaꞌ it pamayaꞌ, ka talagang alaid kat kamatuudan. Talagang pagdaꞌgaen nira i pamegbeg ni Jesu-Cristo, kanya nga subuk miyalang it kanira isaꞌun kanya nang taawan. Ka ega pagkilalaen nira nga Agalen nira nga dapat sirbiyan. Temed ta, talagang egay pagduwa-duwa nga abutun sira it panriga. ²Dakel i kaꞌibaan mi nga magpamayaꞌ nga gumuru it mararaꞌway nga pagbuwaten nira. Aypaꞌ, sabap it buwat nira nga atkaytu, masudi-sudi talaga it mga ega namayaꞌ i ipagpangadal nga kamatuudan pasar it Ampuꞌan. ³Ta it maꞌingarum talagay mga manigpangadal ngayti, kat biyuwat-buwat lamang ngayting sugi-sugid nira nga purus kaꞌambutan, buwaten nira kamu nga desang papanulusan. Temed yay matuud, garing it tagnaꞌ paꞌ magꞌaꞌareg nga lagi i ipiyabetang-betang nga ukuman nga mabeꞌgat. Talagang egay pagduwa-duwa nga daꞌsira abutun it panriga.

⁴Dedemdemen mi tu, nga iyan tagnaꞌ paꞌ, may nagkasalaꞌan nga mga anghil, temed daꞌsira piyataꞌnan it Ampuꞌang Diyus. In daꞌga pinirisu ya sira duꞌun it piyakamalgeb nga siwang. Ta duꞌun paꞌ sira it kadleman ngayti, seked mabut i aldaw nga ipangukuman. ⁵Baw beken, dedemdemen mi nga sabap it pirmi nga pagkuntraꞌen it katataawan i kaꞌirgan it Ampuꞌang Diyus it iti, amulaꞌ pay banwa, aypaꞌ ka tiyunaw ya i banwa ngaytu. Talagang egay ipiyagribri ya nga beken, puyrat ki Noe baw pitung kataawan nga maꞌiba ya. Nakabetang i katataawan it atkayti maski ipagpatantu ni Noe it kanira in magꞌuꞌunuy pangaꞌgenan nga pagsagyaan it Ampuꞌang Diyus.2:5 Genesis 6:5 seked it 8:22. ⁶Ta daꞌga basaꞌan, biyetanganan ya gasit ukuman i mga taw duꞌut Sodoma baw Gomorra, sabap gasiꞌ it subraꞌ nay pamagbuwaten nira nga kasalaꞌan? Talagang inanteng it Ampuꞌang Diyus i mga siyudad ngayti. Binwat yaytuy atkaytu isaꞌun mamuyaan it mga taw it kaꞌnu-kaꞌnung timpu i baraꞌan nira, basta iyan nagang ipagpaꞌalaid nira nga pirmi kat nakem nira i kaꞌirgan it Ampuꞌang Diyus. ⁷Temed ipiyagribri ya naga si Lot nga mataldeng kat panleteg ya. Ka masakit nga banar nga magkasmekan ni Lot ngayti i karaꞌe-raꞌetan it mga karugar ya ngayting taga Sodoma, nga magsarit sumbayaꞌ it kaꞌiꞌirgan nga maraꞌe-raꞌet it egay maski unu nga pagsupil it sadili. ⁸Paribasay mataldeng nga taw si Lot ngayti, talagang ega magkapakay ya i magkamuyaan ya ngayting karaꞌe-raꞌetan it aldaw-aldaw garing it pagpakibanwa ya ngayti duꞌun.2:8 Genesis 19:1-29.

⁹Ta kat mga biyaraꞌan ngaytit tagnaꞌ paꞌ, daꞌga maꞌyag nga iyan Ampuꞌang Diyus, magkaꞌrut talaga rimibri it mga magpamayaꞌ it kanya kat mga kakuriꞌan nira. Baw talagang magkaꞌrut kanya gasiꞌ rimiga it mga mamagbuwat it karaꞌe-raꞌetan, mintras ipagꞌareg ya sira kat aldaw ngayti nga ipangukuman nga banar. ¹⁰Subrang ipagꞌareg ya i iyan mga magsumbayaꞌ it mararaꞌway nga kaꞌirgan it bilug baw iyan mga masusutil nga ega magkilala it mga magpupudir.

Ta, mga paꞌaaten ku ngaytu nga manigpangadal it kaꞌambutan, talagang pangaasen sira nga ega magkaꞌrut it eyaꞌ baw ipagpadaꞌeg nira i sadili nga kakayaan. Egay galang nira it maski mga matataꞌas nga banar i kabantugan. Maꞌunu galangen nira, pagtibabaꞌen nira ga. ¹¹Temed maski mga anghil nga subrang dakulay kakayaan baw makseg pat mga manigpangadal ngaytit kaꞌambutan, daꞌsira magpanibabaꞌ baw magpakusalaꞌ it beken kat adapan it Ampuꞌan. ¹²Takaꞌ in itung mga taw, yanay kat baꞌbaꞌ nira, panibabaꞌ. Pati mga bagay nga ega magkasepsepan nira, pagtibabaꞌen na. Kabilangan nira, mga ramu-ramu nga egay nanakem, ka pagsunudun lamang i kaꞌirgan it bilug. Mga ramu-ramu, subuk ipiyanganak sira isaꞌun madakep baw imatayen. Ta itu nga mga taw, atkayan naga. Maꞌilang i mabetangan nira. ¹³Ka it ega magayen i siyari nirat buwat, iyan i tumbas it kanira, betanganan it ega naga magayen.

Mga taw ngayti, isaꞌun lamang masumbayaꞌ niray maraꞌway ngaytu nga kaꞌirgan nira, kasasagyaan nirang pagbuwaten it maski aldawun i kasagyaan nira ngaytu nga maraꞌway. Talagang dakulaꞌ nga kaꞌeꞌyaꞌan baw sudi-sudi, ka mamagpanragiꞌ sirat pagkaraꞌnen mi nga uyut i pagbuwaten nga Apunan. Pagsagyaan nira talagay makapanluku it imyu. ¹⁴Kada leteg nira, pagrambang mata. Sabap egay beken nga tutulus nira, mga babay nga mapiyarayag-rayag. Talagang egay kaskedan it buwat nirat kasalaꞌan. Mapiyandayaꞌ sira it iyan malubay paꞌ i pamayaꞌ. Talagang pangtasan na sirat pagsumbayaꞌ it kaꞌingarum nira. Atkaytung mga taw, siguradu talaga nga rigaen it Ampuꞌang Diyus. ¹⁵Ta it subuk nagpaski sira, alaid nang alaid sira kat dalan it kamatuudan. Ka yay siyunsun nira nga dalan, gimnuru sirat ki Balaam nga anak ni Beor. Tagnaꞌ paꞌ si Balaam ngayti, siyaꞌa-saꞌang yay taꞌeg nga muwat it maraꞌe-raꞌet sabap talagang yay kanget it nakem ya, kupisiꞌ it tangdan. ¹⁶Temed ega natabus ya, ka siyabar it kabayuꞌ ya nga asno. Ka maski ramu-ramu nga ega magkaꞌampang, piyaꞌampang nat Ampuꞌang Diyus, ka simnabar it kabubwalan ya.2:16 Mga Bilang kapitulu 22 seked it 24.

¹⁷Mga manigtulduꞌ ngaytut kaꞌambutan, taw nga egay kakapulusan. Ka kaꞌalimbawaan nira, naꞌlet na nga tumbud baw kunum nga egay pakinabang ka ipagdedeg it deres. Temed rigaen sirat Ampuꞌang Diyus duꞌun it ipiyagꞌareg yang lagi nga nagpintut nat pandele-delem. ¹⁸Pasubraꞌ i dakulaꞌ kat mga pangangampangan nira. Temed ta, ega yay kapulusan it pamagsugiden nira. In daꞌga pandayaꞌ nira lamang it mga baꞌgung namayaꞌ it Ampuꞌan, nga ega paꞌ nakasepsep nga banar it kaꞌirgan ya. Sabap ipagpakursud nira i mga baꞌgu ngayting namayaꞌ nga paꞌuliꞌan i pangaꞌgenan nga kamaliꞌ, nga sumarit sumbayaꞌ it maraꞌway nga kaꞌiꞌirgan it bilug it egay maski unu nga pagsupil it sadili. ¹⁹Ipagsanggup paꞌ nira nga in siyu-siyuy sumunud it pangadal nira, ribri na talaga nga mapakay nang buwaten i kumpur ireg nirang kubwaten, ka ega na uripen it kaꞌirgan it beken. Temed ta, mga magpaliꞌwan it atkayti ngayti, uripen naga sira mismu it karaꞌe-raꞌetan nga kaꞌiꞌilang. Sabap yay matuud, kitang taw, uripen it in unu-unuy magbebegbeg it aten. ²⁰Dedemdemen mi tu, nga iyan mga taw nga nangindiꞌ na it maraꞌe-raꞌet nga pamagbuwaten it taw situt banwa ka nakakilala na nga matuud it ki Jesu-Cristo, nga kanyay Ampuꞌan baw Manriribri tami, in beteꞌ paꞌuliꞌan nira i karaꞌe-raꞌetan ngaytu nga uripnen siꞌ sira, siguradu nga maraꞌe-raꞌet pat tagnaꞌ i kabetangan nira. ²¹Ka magayen pay ega naꞌrutan niray dalan ngaytut kamatuudan pasar it karibriyan, ega gat iyan mangindiꞌ, lamang nasepsepan nira nay ipiyangadal it kanira nga garing duꞌun it Ampuꞌang Diyus. Talagang subraꞌ nay kitaen nirang panriga. ²²Ta daꞌga in atkayan, siray maꞌiguꞌan it sambatan ngayan nga magꞌaat, “Pagkaꞌnen nagat keꞌdeng i lamang isiyuka ya na.” Baw beken, “Beyeꞌ, lamang mapaꞌyuꞌ na, mangilmug nagat sumaꞌup.”

Talagang paꞌuliꞌ naga situ i Ampuꞌan nga si Jesu-Cristo

¹Mga pagmaꞌalen ku, itu ngaytung surat ku, ikadwa naytu nga surat ku asat imyu. Baw kat duwa na ngaytu nga surat ku, pagpaꞌresan ku nga banar nga ipademdem it imyu i mga in pirang bagay nga sulag kut imyu kat pikir nga magayen. ²Ka iyan bay ireg ku, egen nga pirmi kat nakem mi i mga isiyugid it mga ipiyatindeg it Ampuꞌang Diyus nga mga prupitaꞌ it tagnaꞌ paꞌ, baw iyan mga ipiyagꞌurdin gasiꞌ it Ampuꞌan tami nga si Jesu-Cristo nga Manriribri tami. Kami ngaytu nga mga apustul mi i nangadal it imyu it mga iti ngayti.

³Uꞌnat muꞌsa nga kaꞌilangan mi nga maꞌrutan, in magdadarapaꞌ nay umur it banwa, abutun kamu it mga mamagsumbayaꞌ it sadiling kaꞌirgan nga maraꞌe-raꞌet, baw buwaten nira na kamu nga kasesleman sabap it pamayaꞌ mi. ⁴Ka maat yan i aaten nira, “Daꞌga baꞌ sanggup ni Cristo nga paꞌuliꞌ naga kanya? Ta ari na, ka daꞌga paꞌ kayti? Magkaꞌubus nat matay i mga giyaringan tami, temed ungaytu ega pay kanya. Talagang ega bay piyagbelagan, ka isan bat magpanunsun nagay muꞌsa it pabetang-betang it banwa garing it pagguna.” ⁵Temed iyan pagꞌaaten nira nga egay piyagbelagan, talagang egay matuud ya kayan. Ka paglipaten nira lamang i panriga nga tiyunaw i banwa. Ka daꞌga baꞌ, iyan langit baw banwa, giyuna kat keseg it ampang it Ampuꞌang Diyus? Giyuna yang danum i giyamit ya kat pagguna ya it banwa, baw sabap it danum magpaneꞌteꞌ i muꞌsa ngaytu nga giyuna. ⁶Baw danum nagay giyamit ya iyan tiyunaw yay banwa. ⁷Baw ta, talagang mabut siꞌ nga, kat keseg nagaytut ampang ya, ranggaꞌen ya siꞌ i ega na desang banwa, in daꞌga pati langit gasiꞌ, ka antengen ya na. Magꞌaꞌareg i panranggaꞌ ngaytu kat aldaw nga ipangukuman, nga rigaen ya nat ega makatindeg i mga taw nga pirming pagkuntraꞌen niray kaꞌirgan ya.

⁸Temed ta, mga pagmaꞌalen ku, ega lipa-lipaten mi tu, nga pabetang it Ampuꞌang Diyus it timpu, belag it aten. Sabap kat panemdem it Ampuꞌang Diyus, maski sang aldaw lamang u sang ribu na nga taꞌun, subuk nagsubung nga ega maꞌlay nga timpu. Madaliꞌ tumaꞌlib. ⁹Aypaꞌ it belag i kanya nga pabetang it timpu, ega maꞌaat ta nga subung it patandes it beken, nga sanggup ya ngaytu sabap it pamaꞌuliꞌ situ ni Jesu-Cristo, sanggup lampud na lamang ka ega paꞌ tiyuman ya. Temed yay matuud, ega paꞌ tiyuman ya sabap lamang it kadakulat sanguꞌ yat aten nga muꞌsa. Ka pagbegayan ya pat rugar i kadakel, nga makapagsinguliꞌ baw mangindiꞌ it kasalaꞌan nira. Ka talagang ireg ya nga maribri i muꞌsa, nga egay maski siyu nga kaꞌaduꞌun it egay kaskedan nga kakuriꞌan.

¹⁰Temed ta, maski atkayan i ireg ya, mabut talagay aldaw nga tumanen yay sanggup ya ngaytung ranggaꞌen ya nay banwa. Kaꞌalimbawaan it pamaꞌuliꞌ ngaytut Ampuꞌan, subung it mananakaw nga ega magkaꞌrutan i ipanakaw ya. Temed kat iyan na nga aldaw, iyan langit, biglaꞌ nga maꞌawaꞌ, dengan it dagurdur. Baw maranggaꞌ nga maꞌanteng it talagang magkaꞌansur i muꞌsang paryaman ya. Atkayan naga i banwa, pati muꞌsang betang ya, maꞌansur gasiꞌ.

¹¹Ta it atkaytuy mabetangan it muꞌsa ngaytung mga bagay, kaꞌilangan nga isiguru mi nay pangaꞌgenan mi nga alaid kat muꞌsang kasalaꞌan, baw uyun talaga kat kaꞌirgan it Ampuꞌang Diyus. ¹²Kaꞌilangan paꞌres kamung banar it mga itu ngaytu, mintras pagꞌelaten mi i aldaw ngaytu nga ipiyagtirminu ya. Paꞌres isaꞌun madali-daliꞌ nagay pangabut it iyang aldaw. Sabagay kat aldaw ngayan, maꞌanteng nay langit baw matunaw nay muꞌsang paryaman. ¹³Temed talagang magayen i pagꞌiꞌinawaren tami nga ipiyagsanggup it Ampuꞌang Diyus. Ka pagsisiguruun tami i baꞌgung langit baw baꞌgung banwa nga ega masledan it maski unu nga maraꞌe-raꞌet, in daꞌga purus kataldengan.

¹⁴Aypaꞌ mga pagmaꞌalen ku, mintras pagꞌelaten mi tu, paꞌresan nga mangaꞌgenan uyun talaga it kaꞌirgan it Ampuꞌang Diyus. Paꞌresan nga ega nay bagay nga kamansaꞌ it bilug baw masudi-sudi it beken, isaꞌun maꞌimbeng i nakem ta in madap nat kanya. ¹⁵Dedemdemen mi nga magpalulus lamang i Ampuꞌan, ka isaꞌun dakel i mabgayan it timpu nga ikaribri nira. Daꞌga baꞌ, pagsurat ngayan asat imyu it pagmaꞌaleng sulsug tami kat pamayaꞌ nga si Pablo, siyangpit ya naytu nga lagi, uyun kat kasepsep nga ipiyagbegay it Ampuꞌang Diyus it kanya. ¹⁶Talagang kat muꞌsang mga surat ya, atkaytu nga pirmi i pademdem yat imyu, pasar it itung mga bagay. Sabagay may mga ibintang ya gasiꞌ kat mga surat ya nga makuriꞌ masepsepan. Ta mga itu ngaytu, bela-belag i ipagpapuntuꞌ it mga kurang it kasepsep pasar it kamatuudan baw mga malubay pay pamayaꞌ. Atkayan naga gasiꞌ i mga pagbuwaten nira duꞌut beken nga mga kasuratan nga ampang it Ampuꞌang Diyus. Ta, egay beken nga baraꞌan it buwat nirang atkayan, pagtinggelen niray liꞌeg nira.

¹⁷Ta it kayti, mga pagmaꞌalen ku, nga magkaꞌrutan mi nay itung mga bagay, magayen in magꞌintur kamu isaꞌun daꞌkamu mateꞌag-teꞌag it kamaliꞌ nga pangadal it mga taw ngayting maraꞌe-raꞌet. Isaꞌun daꞌkamu makapangindiꞌ it talagang natantuwan mi nang banar nga kamatuudan. ¹⁸In daꞌga, kaꞌilangan pasigi kamu nga pagpapaꞌgenen mi i pamayaꞌ mi it Ampuꞌan baw Manriribri tami nga si Jesu-Cristo, kat ildaw nga ipagbegay ya. Baw paꞌresan mi i pagkilala mit kanya, isaꞌun dumakulaꞌ i kasepsep mi it kaꞌirgan baw adat ya. Dapat nga bantugun kanya kayti baw seked it kaꞌnu-kaꞌnu. Kamatuudan tu.