2 Juan

Ikadwang Surat ni Juan (2 Juan)

2 Juan

Pauꞌnang Sugi-sugid

Iyan surat ngaytung isiyurat ni Juan duꞌun it paꞌaateng babay, siguru yay pagsuratan ya, esang gurupu it mga magpamayaꞌ. Baw kadakel it mga magpamayaꞌ duꞌun, yay paꞌaaten nga mga anak it babay ngayti.

Ababaꞌ lamang tu nga sugi-sugid, nga ipagsulag it mga magpamayaꞌ nga, kaꞌilangan, magsigraras sira it esa may esa. Sasar gasiꞌ kuntraꞌ kat mga ega matuud nga manigpangadal it ampang it Ampuꞌang Diyus.

¹Pagmaꞌaleng babay nga piniliꞌ it Ampuꞌang Diyus, baw mga anak mu, wayan i surat ku, aku nga piyakamagurang. Kamu, talagang pagmaꞌalen ku nga matuud, baw ega lamang aku in daꞌga pati kadakel nga nakakilala nang banar it kamatuudan pasar it Ampuꞌan. ²Pagmaꞌalen namen kamu sabap nakagamut na kat nakem tami i kamatuudan ngaytu, nga egaytu mablag situt aten seked it kaꞌnu-kaꞌnu. ³Baw yay matuud, maꞌaten nga pirmi i ildaw, sanguꞌ nga tabang baw kaꞌimbengan it nakem nga ipagbegay it Diyus Amaꞌ baw Anak ya nga si Jesu-Cristo. Mga itu ngaytu, talagang ibgay it Ampuꞌang Diyus kat mga nakakilala nat kamatuudan ngayti baw may raras na it esa may esa.

Kaꞌilangan mangaꞌgenan tami uyun kat kamatuudan baw may raras na it esa may esa

⁴Talagang masagyang-masagya aku, ka namuyaan ku nga iyan beken nga mga anak mu, magpangaꞌgenan sira uyun kat kamatuudan, subung it ipiyagꞌurdin it aten it Diyus Amaꞌ. ⁵Ta kayti, Bilaꞌ, sana may ipagpakiꞌupakat kut imu. Itu, ega maat baꞌgung urdin i ipagsurat ku ngaytu, in daꞌga dati nagaytung urdin nga situ na nga lagit aten garing paꞌ it tagnaꞌ, itu nga magsigraras tami it esa may esa. ⁶Ituy magpamatuud nga may pagmaꞌal tat Ampuꞌang Diyus, itu nga magpangaꞌgenan tami uyun kat ipiyagꞌurdin ya. Ta ituytu i ipiyagꞌurdin ya ngayan it tagnaꞌ, nga mangaꞌgenan tami it magsigraa-rarasen.

⁷Yay matuud, talagang lekep i banwa ngaytu it mga manigpaneꞌag-teꞌag it pamayaꞌ, iyan mga taw nga ega magpakimatuud nga si Jesu-Cristo, talagang nagbalyu kanya nga taw. Iyan atkayang mga taw, sira na ngayan i mga manigpaneꞌag-teꞌag baw kakuntraꞌ ni Cristo. ⁸Aypaꞌ kaꞌilangan magꞌintur kamu, isaꞌun ega maꞌilang i piyakarigaan mi, in daꞌga matanggap mi i piyakamagayen nga tumbas. ⁹Iyan ega magpaneꞌteꞌ kat panulduꞌ ni Cristo, ka magpasaꞌli ga, talagang alaid kanya duꞌun it Ampuꞌang Diyus. Takaꞌ in siyu-siyuy magpaneꞌteꞌ kat panulduꞌ ngaytu ni Cristo, talagang pagteꞌteꞌan kanya it Diyus Amaꞌ baw Anak. ¹⁰Aypaꞌ maski siyuy mabut asat imyu nga belag it itung ipagpangadal i taban ya, ega paꞌapyaten mi asat balay mi baw ega na lamang kumustaen mi. ¹¹Sabap in siyuy pakiꞌiba-iba it kanya, magpaꞌuyun na it buwat ya ngayting maraꞌe-raꞌet.

Pangiyaꞌpusang sugi-sugid

¹²Sana dakulaꞌ pang kusugiden ku, temed ega na isurat ku. Ka ireg ku baꞌ sana, kapaꞌasan akut imyu. Masugi-sugid ku kamu it nagꞌada-adapen tami isaꞌun makasagya tami it kasagyaan nga egay kakurangan.

¹³Pagkumustaen ka it mga anak it sulsug mu nga babay1:13 Paꞌaaten ngaytung sulsug nga babay, sang gurupu gasing mga magpamayaꞌ. Mga anak ya, ireg sugiden, mga magpamayaꞌ duꞌut iti nga gurupu, nga kabilangan, sang sulsugan na sira it mga pagsuratan ngayti ni Juan sabap duꞌut pamayaꞌ nira ngayti. nga piniliꞌ gasiꞌ it Ampuꞌang Diyus nga subung it imu.