2 Corinto

Ikadwang Surat ni Pablo duꞌun it Mga Magpamayaꞌ nga Taga Corinto

2 Corinto

Pauꞌnang sugi-sugid

Mabasa ta duꞌut 1 Corinto 5:9 nga, parabir isiyurat ni Pablo i surat ya nga pagpangaranan it 1 Corinto, may nakapataban ya na nga lagi nga surat ya duꞌut kanira. Aypaꞌ, 1 Corinto ngayti, ega naga uꞌna nga surat nga ipiyataban ni Pablo duꞌut iting mga taw. Temed pagpangaranan it 1 Corinto sabap, iti, uꞌnang surat ni Pablo duꞌut kanira nga ipiyaꞌuyut kat isiyurat nga ampang it Ampuꞌang Diyus. Baw itung surat, 2 Corinto ngaytu, itu siguru i ikatlu u barang ikaꞌpat nga surat nga ipiyataban ni Pablo duꞌut mga taga Corinto ngayti. Temed pagpangaranan it 2 Corinto sabap ituy ikadwa nga ipiyaꞌuyut kat isiyurat nga ampang it Ampuꞌang Diyus.

Kat pikir it beken nga mapipikir, pagkasurat ni Pablo it surat ya nga pagpangaranan it 1 Corinto, sigi pay panibabaꞌ it beken duꞌun, nga ipagpaliꞌwan nira nga egay pudir ni Pablo ka ega apustul kanya nga banar. Aypaꞌ, maat it beken nga mapipikir, garing duꞌut Efeso naꞌaduꞌun si Pablo it Corinto isaꞌun maꞌadap ya i mga magtibabaꞌ ngayti. Iti nga aduꞌun ya siguru i pagpaꞌiguꞌan ya nga maat dakulang magkasmekan nira i taban ya (kapitulu 2:1), baw siyardaw yay mga nagkasalaꞌan (kapitulu 13:2). Mapakay nga, kat iting timpu, may esang taga Corinto nga miyaat it talagang maraꞌway nga kuntraꞌ it ki Pablo, baw yay pagpaꞌiguꞌan ni Pablo duꞌut 2 Corinto 2:5-8 baw 7:12.

Ta, pagpaꞌuliꞌ ni Pablo duꞌut Efeso, subuk siyuratan ya siꞌ i mga taga Corinto ngayti it surat nga talagang mabeꞌgat nga sugi-sugid. Ipiyataban yay surat ngayti kat alima ni Tito. Bawnga inupakat ya si Tito nga duꞌut Macedonia baw Troas i panawan yat muliꞌ nga garing duꞌut Corinto. Temed, pagkagaring ni Tito, may limniꞌwan nga kaguluwan duꞌut Efeso sabap it pangadal ni Pablo (Mga Binwat kapitulu 19). Aypaꞌ napanaw na si Pablo it kanya nga sumusmu it ki Tito duꞌut Troas baw mangadal gasiꞌ duꞌun. Temed it ega pay si Tito duꞌun, subuk ega magkabaraꞌan ya, aypaꞌ napanaw siꞌ nga nanlangbus duꞌut Macedonia, ka ireg yang ireg nga maꞌrutan ya i baritaꞌ sabap it mga taga Corinto ngayti. Ta, naparagan yang matuud si Tito duꞌut Macedonia baw magayen naga i baritaꞌ sabap it pagtanggap it taga Corinto it ipiyataban ngayti ni Pablo nga surat duꞌut kanira. Ta, pagkabaritaꞌ ya it atkayti isiyurat ya na i surat ngaytu nga pagpangaranan it 2 Corinto. Taꞌun nga pagsurat kaytu, siguru mga 57 A.D..

Uꞌna kat surat ngaytu, ipagpaꞌyag ni Pablo in unuka mabeꞌgat i sugi-sugid yat kanira katꞌesa, baw ipagsugid ya i kadakulat kupakiꞌiba-iba yat kanira baw kasagyaan ya nga, liꞌwan it mabeꞌgat nga sugi-sugid ya, nagsinguliꞌ na sira. Bawnga pagsulagen ya sira nga ipatabus na nira i pagbegay nirat tabang duꞌun it mga makukuriꞌ nga mga sulsug kat pamayaꞌ nga duꞌun it Judea. Ta, kat pangiyaꞌpusan ya na, pagpanindegan ni Pablo i pagkaꞌapustul ya sabap it pamuwat-buwat it beken duꞌun nga magꞌaat nga siray matuud nga apustul, ki Pablo, magpaꞌapu-apustul lamang.

¹Mga taga Corinto nga magsarig baw magpamayaꞌ it Ampuꞌang Diyus, baw beken nga ipiyapinpin it Ampuꞌang Diyus nga mga taawan ya na asan it muꞌsang prubinsiya it Acaya, wayan i surat namen, aku nga si Pablo nga esang apustul ni Cristo Jesus kat pabetang-betang it Ampuꞌang Diyus, baw si Timoteo nga sulsug tami kat pamayaꞌ. ²Ipagpanalangin namen nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus nga Amaꞌ tami baw Ampuꞌan nga si Jesu-Cristo.

Pagtabangen tami nga banar it Ampuꞌang Diyus kat mga kakuriꞌan tami

³Sana pirmi tami nga pagbantugun baw pagpasalamatan i Ampuꞌang Diyus, kanya nga Amaꞌ it Ampuꞌan tami nga si Jesu-Cristo. Baw kanya ngaytu, Amaꞌ tami gasiꞌ nga subrang maꞌildaw, baw pagpanggaringan it ega basta-bastang ipagkasagya it nakem. ⁴Talagang daꞌtami pagpabaya-bayaꞌan ya kat mga kakuriꞌan tami, in daꞌga pagpasagyaen yay nakem tami, isaꞌun magkapasagya tami gasiꞌ it in siyu nga may kakuriꞌan. Ka in unuy ipagkasagya it nakem nga ipagbegay it Ampuꞌang Diyus it aten, iyan nagay ipagpasagya tami it nakem it mga maꞌiba ta nga magkakuriꞌan. ⁵Ka yay matuud, maski sang unu i kadakel it kakuriꞌan nga pagsagkaꞌen tami sabap it pakilagpit tami it ki Cristo, subrang magbastanti i ipagkasagya it nakem nga pagtanggapen tami sabap naga it pakilagpit tat kanya. ⁶Ta it atkayan, maski na maat magkakuriꞌan kami sabap it katengdanan namen ngaytu nga manigpangadal, kat ikagayen baw ikaribri mi tu. Baw paribasay pagpasagyaen kami it Ampuꞌang Diyus, magkapasagya kami gasit imyu isaꞌun masagkaꞌan mi gasiꞌ it magayen i nakem i mga kakuriꞌan nga paglabayen mi, nga subung gasiꞌ it amen. ⁷Aypaꞌ ka mapaꞌgen nay inawar namen sabap it imyu, sabap magkaꞌrutan namen nga maski malabayan mi gasiꞌ i mga kakuriꞌan nga pagsagkaꞌen namen, pasagyaen kamu gasiꞌ it Ampuꞌang Diyus, subung nagat amen.

⁸Mga sulsug kat pamayaꞌ, ipagbaritaꞌ namen it imyu i mga kakuriꞌan nga liyabay namen duꞌun it Asia. Talagang ega basta-basta nga matuud i nalabayan namen. Ega na talagay kasiguruwan namen nga maꞌgen kami paꞌ. ⁹Tanud namen naꞌbut nay amen nga kapaladan. Palan, nakabetang kami lamang it atkayti isaꞌun daꞌkami sumarig it sadili namen nga kakayaan, in daꞌga guna lamang it Ampuꞌang Diyus, kanya nga manigꞌegen it maski miyatay na. ¹⁰Talagang ipiyagribri ya kami mana kat pagleltegan namen na nga kamataynen. Baw pagsisiguruun namen nga banar nga pasigi nga iribri ya kami kat muꞌsa nga magꞌaꞌabut-aꞌabut nga ipagkagtas it ginawa. ¹¹Temed pagꞌangutun namen nga ipasigi mi gasiꞌ i tabang mit amen kat panalangin. Ka in dakel i magpanalangin, pagtubag, simpri dakel na i magbantug baw magpasalamat duꞌun it Ampuꞌang Diyus sabap it tabang yat amen.

Panindeg ni Pablo nga may kasiguruwan naga it pagꞌampangen ya

¹²Ituy magbegay it kasagyaan kat nakem namen nga talagang magkatantuwan namen nga, kat tabang it Ampuꞌang Diyus, purus kamatuudan baw kagayenan i adat namen kat muꞌsang taw, subraꞌ na kamu. Ega maat may maraꞌe-raꞌet nga antap it nakem namen, nga subuk pagꞌadaten it taw situt banwa, in daꞌga magpangaꞌgenan kami kat keseg it tabang it Ampuꞌang Diyus nga ipagꞌildaw yat amen. ^13-14Kat mga surat namen nga ipiyataban asat imyu egay subuk tagu-taguꞌ nga puntuꞌ, in daꞌga iyan nagang magkasepsepan it maski siyu nga magbasa. Kayti kurang paꞌ i pagkilala mi it adat namen, temed pagꞌiꞌinawaren namen nga mabut i aldaw nga kilalaen mi nga banar isaꞌun, pagꞌabut it aldaw nga pamaꞌuliꞌ it Ampuꞌan tami nga si Jesus, mabantug mi kami, subung naga gasiꞌ i imyu, mabantug namen kamu.

¹⁵Ta, paribasay pagsisiguruun ku i kasagyaan mi in magkita-kitaen tami, napikir ku na nga lagi katꞌesa nga paꞌasan aku daꞌan it imyu it ega lamang kaꞌsa, isaꞌun ega lamang kaꞌsa gasiꞌ matabangan ku kamu kat pamayaꞌ mi. ¹⁶Ka rima-rima ku, patuluy aku na asan it magburuꞌ nga paMacedonia, baw panguliꞌ ku, patuluy aku naga isaꞌun matabangan mi aku it panaw ku nga paJudea. ¹⁷Ta kayti, it ega natabus kuy rima-rima ku ngayti, barang pagpikiren mi nga taw aku nga pageba-gebaꞌ. Barang tanud mi pabaꞌgu-baꞌgu i pagpikiren ku, subung it pagbuwaten it mga taw nga sadiling kaꞌirgan lamang i pagpikiren, nga kayti maat “eeꞌ”, mabwa-mabway maat siꞌ “ega”. ¹⁸Temed talagang ega magꞌaꞌatkayan. Ka in magꞌuꞌunu ega maꞌambut i Ampuꞌang Diyus, atkayan nagay amen nga, kamatuudan nga muꞌsa i mga ipiyagꞌaat namen it imyu. ¹⁹Ka iyan si Jesu-Cristo ngaytu nga Anak it Ampuꞌang Diyus, nga ipiyangadal namen nga tulu asat imyu, aku, si Silvano baw si Timoteo, ega maat “eeꞌ” kayti bawnga dedelem “ega” siꞌ. In daꞌga talagang kamatuudan i kanya. ²⁰Yay matuud, muꞌsa nga isiyanggup it Ampuꞌang Diyus, duꞌut ki Jesu-Cristo i katumanan ya. Aypaꞌ, sabap it pagtuman ya ngaytu, pagkilalaen tami baw ipagpamatuud nga kamatuudan talagay kanya, kat ikabantug it Ampuꞌang Diyus. ²¹Ampuꞌang Diyus ngaytu i magpapaꞌgen it amen, pati kamu gasiꞌ, isaꞌun magꞌuꞌunay i pamayaꞌ tami it ki Cristo, baw Ampuꞌang Diyus nagaytu i nagpatindeg it aten nga mga manigsirbi ya. ²²Piyapasaruman ya paꞌ kita it Espiritu Santo nga yay bilang markaꞌ yat aten, nga imandaꞌan it talagang mga taawan ya na kita. Baw Espiritu Santo ngaytu i ipiyauꞌna it Ampuꞌang Diyus isaꞌun masiguru tami nga mabut i aldaw nga kumplituun ya i kagayenan nga magꞌaꞌareg it aten.

²³Ta kayti, ipagpamatuud ku, baw Ampuꞌang Diyus i sistigu ku nga matuud i pagꞌaaten ku ngaytu, nga sabap lamang it ega ireg ku nga madalaꞌan ku kamu ega daꞌan nagpaꞌasan aku. Ka in nagpaꞌasan aku it iting timpu, ega mapakay nga ega diyalaꞌan ku kamung banar. ²⁴Ega maat ipagpatindeg namen nga mga agalen mi kami nga dapat mi nga sunudun kat pamayaꞌ mi. Ka pamayaꞌ mi ngaytu, nakaꞌunay na duꞌun it ki Cristo. Ireg namen lamang talaga nga tumabang it imyu isaꞌun masagya kamung banar kat pangaꞌgenan nga bagay it kamatuudang pamayaꞌ.

¹Aypaꞌ, subung nat inaat ku, napikir ku nga ega na daꞌan paꞌasan aku it imyu, nga dakulang masmekan mi i taban ku. ²Sabap in begayan ku siꞌ kamu it masmekan mi, ta siyu paꞌ i pasagya it aken in daꞌga kamu naga ngaytu nga magkasmek na? ³Aypaꞌ ka siyuratan2:3 Egaytu pagpaꞌiguꞌan ya kaytu i surat ya ngaytu nga 2 Corinto. Barang 1 Corinto i pagpaꞌiguꞌan. U kat pasepsep it beken nga mapipikir, barang beken nga surat nga naꞌlam na. ku na lamang daꞌan kamu isaꞌun, pagpaꞌasan ku, ega na kasmek i makabgay mi it aken in daꞌga kasagyaan, ka sana magpasagya kamu nat aken. Sabap pagsisiguruun ku nga kasagyaan ku, kasagyaan mi naga gasiꞌ it imyu. ⁴Iyan isiyurat kuy surat ku ngayti talagang atnat pagꞌukaren i seled ku baw maraꞌe-raꞌet nga banar i nakem ku. Naturuꞌan ti talagat luwaꞌ ku. Temed ega maat siyuratan ku kamu isaꞌun mabgayan ku kamu it masmekan, in daꞌga isaꞌun ipamatuud ku nga banar in sang unuy kadakulaꞌ it pagmaꞌal kut imyu.

Kaꞌilangan na nga pasinsiyaen i nagbuwat it matanug ngayting kasalaꞌan

⁵Ta, pasar it minwat ngayan asan it kasalaꞌan, matuud, nakabgay na it aken it nasmekan ku. Takaꞌ yay uꞌna-uꞌnang nabgayan ya it magkasmekan, subuk kamu asan, maski ega puꞌsa it imyu. Pagꞌaaten ku nga ega puꞌsa ka ega naga ireg ku nga pabeꞌgatan ku na kanya nga banar. ⁶Temed tamaꞌ na i panriga nga ipiyagriga it kanya it kadaklan asan. ⁷Pasinsiyaen mi na kanya baw inu-inuun na, isaꞌun ega subuk malmes kanya kat kadakulat kasmek ya nga subraꞌ na. ⁸Aypaꞌ ipagpakiꞌupakat ku nga ipamatuud mi siꞌ it kanya nga pagrarasan mi naga kanya. ⁹Esa gasiꞌ nga pagꞌabaten ku iyan siyuratan ku kamu katꞌesa, isaꞌun baꞌ maꞌrutan ku in pagsunudun mi it magayen i muꞌsa nga ipiyangadal ku it imyu. ¹⁰Ta kayti, in siyu-siyu nga piyasinsiya mi na, pagpasinsiyaen ku na gasiꞌ. In beteꞌ may taw asan nga kaꞌilangan ku nga pasinsiyaen, piyasinsiya ku na nga bilang pagleltegan aku ni Cristo, ka ituy kat ikagayen mi, ¹¹isaꞌun baꞌ daꞌtami daꞌgen ni Satanas. Sabap maꞌyag na it aten i mga pagꞌantapen it nakem ya nga karaꞌe-raꞌetan.

Ipagpangadal nga Magayeng Baritaꞌ, kagayenan i kat mga magtanggap, baw kakuriꞌan i kat mga magpandaꞌga

¹²Ta, yan naꞌaduꞌun akut Troas nga nangadal duꞌun it Magayeng Baritaꞌ pasar it ki Cristo, talagang binggayan akut Ampuꞌan it rugar, isaꞌun mabwat kuy pagꞌengden ku ngayti. ¹³Temed maski atkayan, kat iting timpu daꞌku naga magkabaraꞌan, ka ega pay si Tito duꞌun, nga sulsug ku kat pamayaꞌ. Aypaꞌ ka namꞌun aku it kanira ka nanlangbus duꞌun it Macedonia.

¹⁴Temed dakulaꞌ nga banar i pasalamat ku duꞌun it Ampuꞌang Diyus sabap ipagtanyag na duꞌut kadakel i pandaꞌeg ni Cristo baw, kami ngaytu nga manigpangadal, subuk ipagpaꞌuyut ya kami kat pandaꞌeg ngaytu ni Cristo, sabap it pakilagpit namen it kanya. Baw in magꞌuꞌunu mapnuꞌ i seled it balay it banglu it pagtutukaban na nga babangluun, atkayan naga, kat pangadal namen, paggamiten kami it Ampuꞌang Diyus nga ipnuꞌun i muꞌsang banwa it banglu it kamatuudang pagkilala it kanya. ¹⁵Ka sabap it pangadal namen it Magayeng Baritaꞌ pasar it ki Cristo, subung kami it piyakamabanglu nga pagsagyaan it Ampuꞌang Diyus, nga magkaꞌarek it mga taw nga may karibriyan na, baw sira nga kamatayneng panriga nga egay kaskedan i abutun. ¹⁶Ta kat mga taw nga ega magꞌintindi it karibriyan, subuk pagringuruꞌan nira nga magkaꞌarek, aypaꞌ yay magtaban it kanira duꞌun it kamatayneng panriga nga egay kaskedan. Temed kat mga maribri, mabanglu, aypaꞌ kaꞌgenang egay kaskedan i abutun nirat kanira. Ta it atkayan, siyu i may kakayaan nga mabwat yat magayen i buwat ngaytung magpangadal it Magayeng Baritaꞌ? ¹⁷Talagang egaytu mabwat it magayen it kadakel ngayti nga ipagpanulus nira lamang i pangadal nirat ampang it Ampuꞌang Diyus. Kami ngaytu, talagang ega atkayan, in daꞌga mga manigsirbi kami ni Cristo nga purus kamatuudan i ipagpangadal namen kat panleteg it Ampuꞌang Diyus, ka Ampuꞌang Diyus naga i nagrumra it amen.

Subraꞌ nga kagayen it baꞌgung pakiꞌupakat it Ampuꞌang Diyus kat katataawan

¹Barang tu tanud mi pagtuꞌgudun namen na lamang i sadili namen isaꞌun tanggapen mi. Unu baꞌ, subung kami it beken nga kaꞌilangan paꞌ i surat nga ipalteg it imyu nga pamatuud it kagayen it adat nira, u surat nga pamatuud mi it adat nira nga ipalteg duꞌun it beken nga pangadalan nira? ²Temed kami ngaytu, ega kaꞌilangan namen i atkayan, ka kamu na i piyakasurat nga pamatuud it amen. Talagang magkatantuwan namen i pagbaꞌgu it pangaꞌgenan mi baw itu gasiꞌ i magpamatuud kat muꞌsang taw it kagayen it buwat namen asat imyu. ³Talagang maꞌyag nga kabilangan mi kayti, subuk surat nga si Cristo i tagsurat, baw kami ngaytu i subuk susurat nga giyamit ya. Baw iyan pagbaꞌgu na it pangaꞌgenan mi, yay subuk isiyurat ya, nga egay beken nga subuk ipiyagseket, Espiritu Santo nga ipiyapasarum it Ampuꞌang Diyus nga egen it egay kaskedan. Baw siyuratan it surat ya ngaytu, ega kat dapiꞌpis nga batu nga subuk mga urdin ni Moises, in daꞌga kat nakem mi.

⁴Kat panleteg it Ampuꞌang Diyus ega magꞌeyaꞌ kami magꞌampang it atkaytu sabap, magayen ngaytung liyapusan it pangadal namen, kat keseg lamang it tabang ni Cristo it amen. ⁵Ka in kat sadi-sadili namen na lamang ega talagay kakayaan namen nga mabwat i itu ngaytu. Ipiyagꞌildaw tu it amen it Ampuꞌang Diyus. ⁶Ampuꞌang Diyus ngaytu i nagpatindeg it amen nga manigpangadal it baꞌgung pakiꞌupakat ya kat katataawan. Baꞌgu ngaytung pakiꞌupakat, ega subuk mga magsusurat nga ipiyagꞌurdin it Ampuꞌang Diyus, nga in kat buwat, pagsunudun naga it mga taw temed, in kat nakem, alaid sira kat kaꞌirgan ya. Talagang in atkayan, kamatayneng panriga nga egay kaskedan i liꞌwan ya. Temed in kamatuudan i pagsunud tami it kaꞌirgan it Ampuꞌang Diyus, nga ega lamang kat buwat in daꞌga kat nakem talaga nga tingled, liꞌwan ya, kaꞌgenang egay kaskedan.

⁷Iyan tagnaꞌ ngayting pakiꞌupakat it Ampuꞌang Diyus, magsugid tu it kamatayneng panriga nga egay kaskedan, ka ega magkasunud it mga taw i mga urdin ya ngayti nga magsusurat kat dapiꞌpis nga batu. Temed maski atkayan, naltegan nagat katataawan i kabantugan it Ampuꞌang Diyus kat pagbegay yat mga urdin ngayti. Ta unu paꞌ it daꞌna magkasarungsung it mga Israelita i magsinggat nga rupa ni Moises maski magkaparaw na.3:7 Exodo 34:29-35. Ta it naltegan i kabantugan it Ampuꞌang Diyus kat dalan ngayti nga kamatayneng panriga nga egay kaskedan i liꞌwan ya, ⁸daꞌga subraꞌ na nga mamuyaan i kabantugan ya kat baꞌgu ngaytung pakiꞌupakat, nga pagsasaruman nat Espiritu Santo i mga piyakiꞌupakatan ya? ⁹Eeꞌ baꞌ, in naltegan i kabantugan it Ampuꞌang Diyus kat dalan ngayti nga magpalbaw it panriga it kasalaꞌan, daꞌga subraꞌ paꞌ nga magkamuyaan i kabantugan it Ampuꞌang Diyus kat dalan ngaytu nga magkabgay it kataldengan kat panleteg ya? ¹⁰Yay matuud, may kabantugan naga it tagnaꞌ ngayting dalan it pagsunud it mga urdin. Temed kayti, subuk ega nay kabantugan ya in ipasbung ta na it subraꞌ paꞌ nga kabantugan it baꞌgu ngaytung pakiꞌupakat. ¹¹Talagang, in binggayan it Ampuꞌang Diyus it kabantugan i tagnaꞌ ngayti nga kat pabetang-betang ya mabut nga maꞌawaꞌ naga, daꞌga subrang-subraꞌ i kabantugan it baꞌgu ngaytu nga egay kaꞌawaꞌan ya?

¹²Ta, sabap it natantuwan nameng banar i kagayen nga daꞌnay kasubraꞌ it baꞌgu ngaytung dalan it karibriyan, ipagrapar namen it may pagmaꞌiseg it nakem. ¹³Egaytu subung it ki Moises nga piyayumyuman yay rupa ya isaꞌun ega maltegan it mga Israelita i magkaparaw na nga singgat kat rupa ya.3:13 Exodo 34:29-35. ¹⁴Temed ta it piyadsen talagay ulu nira. Kamatuudan, seked kayti atkayan naga i mga Judio nga mga tungtung-inapuꞌ nira nga, basta pagbasaen nira i tagnaꞌ ngayting pakiꞌupakat, subuk may ipagpayumyum paꞌ, ka subuk paglingben pat kanira i kamatuudang pagpapuntuꞌan. Ka maꞌawaꞌ lamang i ipaglingeb ngaytu in mamayaꞌ baw pakilagpit sira it ki Cristo. ¹⁵Eeꞌ baꞌ, talagang seked kayti, kada pagbasaen i mga kasuratan nga ipiyasurat it Ampuꞌang Diyus it ki Moises, subuk pagpayumyuman paꞌ i pikir nira. ¹⁶Temed in mamayaꞌ baw pakilagpit sira it Ampuꞌan magkaꞌawaꞌ naytuy ipagpayumyum ngaytu. ¹⁷Ampuꞌan nga pagsangpiten kaytu, sang kagina-ginawaan it Espiritu Santo. Baw basta pagsasaruman tami it Espiritu Santo ngaytu nga ipiyapasarum it Ampuꞌan, liꞌwan ta na kat pamegbeg it kasalaꞌan baw pagkaꞌuripen tat pagsunud it mga urdin ni Moises isaꞌun maribri. ¹⁸Ta, it kayti nga naꞌawaꞌ na i subuk ipiyayumyum it rupa tami, magkamuyaan ta na i kabantugan it Ampuꞌan, temed ega paꞌ subung it kabantugan ya nga maltegan kat pagdadarapaꞌen. Kabilangan it magkamuyaan kayti, subung paꞌ it magkaltegan duꞌut ega maꞌyag nga salamin. Baw paribasay subuk pirmi tami nga magkamuyaan i kabantugan ya, kat guna it Espiritu Santo nga ipiyapasarum it Ampuꞌan, magsisigi na nga magkabaꞌgu i adat tami, nga magpasbung tami nang muꞌsa it kanya kat kabantugan ya ngaytu.

Ega ipagtaguꞌ na Pablo i kamatuudan pasar it ki Cristo, isaꞌun maꞌyagan i muꞌsa

¹Aypaꞌ, paribasay piyakarguꞌan kami it Ampuꞌang Diyus it buwaten namen ngaytu nga magpangadal, ega magkaꞌawaꞌ i pagmaꞌiseg it nakem namen nga sarungaen it magayen i ipiyagꞌildaw ya ngaytut amen. ²Talagang ipiyaꞌalaid nat amen i mga kaꞌeyaꞌ-eyaꞌ ngayan nga pagꞌantapen it nakem. Ega maat magpanluku kami nga paggantiyan i mga ampang it Ampuꞌang Diyus isaꞌun lamang tanggapen it taw. In daꞌga, in unuy kamatuudan, iyan talagay ipagpangadal namen it egay ipagtaguꞌ. Magkatantuwan talagaytu it nakem it maski siyu, baw magkaꞌrutan gasiꞌ it Ampuꞌang Diyus nga atkaytu talagay pangadal namen. ³In beteꞌ subuk magtataguꞌ paꞌ i paꞌaaten it Magayen ngaytung Baritaꞌ nga ipagpangadal namen, pagsisiguruun ku nga atkaytu lamang kat mga taw nga kamatayneng panriga nga egay kaskedan i abutun. ⁴Itung mga taw, daꞌsira magpamayaꞌ sabap, mga pikir nira, piyadlem ni Satanas, kanya nga magpaDiyu-Diyus situt sinirungat langit ngaytu. Pagpadlemen yay pikir nira isaꞌun ega masepsepan nira i kaꞌyagan it Magayen ngaytung Baritaꞌ sabap it kabantugan ni Cristo, kanya nga ladawan it Ampuꞌang Diyus. ⁵Talagang ega sadi-sadili namen i pagpanindegan namen in daꞌga si Cristo Jesus, kanya nga Ampuꞌan tami nga matuud. Baw ipagpabetang namen nga, kat pagsirbi namen it kanya, mga manigsirbi mi gasiꞌ kami. ⁶Kayti naꞌyagan tami na ka iyan Ampuꞌang Diyus, kanya nga nagguna it eyag kat keseg it ampang ya isaꞌun ega bulun nga kadleman4:6 Genesis 1:3. , kanya nagay minggay it eyag kat pikiran tami isaꞌun makilalaan tami nga banar i kabantugan ya nga magkatantuwan duꞌun it ki Cristo.

Pagpaꞌresan na Pablo i katengdanan nira maski dakulay kakuriꞌan, isaꞌun mabantug i Ampuꞌang Diyus

⁷Talagang piyakamagayen it muꞌsang kamanggadan i Magayen ngaytung Baritaꞌ nga ipiyaskel it Ampuꞌang Diyus it amen nga ipangadal. Temed subuk ibintang i kamanggadan ngaytu duꞌun it piyakabaratu nga mga karebtangan. Sabap kami ngaytu, unu kami lamang nga piyaskelan it atkaytung kagayen it bagay? Temed ituꞌun ngaytu, pabetang-betang it Ampuꞌang Diyus isaꞌun matanyag nga, kagayen it ega basta-bastang kakayaan namen kat pagsarunga it katengdanan namen, garing duꞌut kanya, ega maat sadili namen. ⁸Subuk pagliliputan kami nga pirmi it kakuriꞌan temed ega naga saꞌan pagdaꞌgen. In sumang kaꞌanu dakulaꞌ nay semen-semen namen, temed pirmi nagang pagꞌildawan it ikaparag it magayeng buwaten. ⁹Pagpakuriꞌan kami na, temed ega naga pagpabaya-bayaꞌan it Ampuꞌang Diyus. Talagang kugtasen nang ruyut i ginawa namen temed ega naga saꞌan magkalumsan kami. ¹⁰Maski ari panawan namen pirmi nga pagpakuriꞌan i bilug namen, nga pirmi kami nga subuk magꞌuꞌungaw it kali, subung nagat ki Jesus iyan situ paꞌ kanyat banwa. Temed paribasay subraꞌ nga magkasarunga namen i katengdanan namen maski atkaytuy magkalabayan it bilug namen, matanyag talaga nga inggen it paꞌuliꞌ si Jesus ngaytu, ka situt amen i tabang it guna ya. ¹¹Eeꞌ baꞌ, maski talagang magpangibit-kibit kami mana kat kamataynen sabap it pagsirbi namen it ki Jesus, ega naga ipagpalugut ya nga maꞌimatay kami, isaꞌun matanyag kat bilug namen nga pagtatarimaen kami nat guna ni Jesus ngaytu nga inggen it paꞌuliꞌ. ¹²Temed, maski subuk pagꞌusigen kami nga pirmi it kamataynen, liꞌwan ya, magkaparagan mi na i kaꞌgenang egay kaskedan.

¹³Talagang dakulay pagsarig namen it Ampuꞌang Diyus. Pagsarig namen ngaytu, subung nagat pagsarig ni David ngaytit tagnaꞌ nga simnurat it atkaytu,

“Dakulay pagsarig kut imu, aypaꞌ ka miyampang aku.”4:13 Awit 116:10.

Ta kami, atkayan naga, nga kat kadakulat pagsarig namen gasit Ampuꞌang Diyus ngaytu, egay kapdekan it ampang namen nga ipagpangadal i Magayen ngaytung Baritaꞌ. ¹⁴Sabap magkaꞌrutan namen nga Ampuꞌang Diyus nga minggen it paꞌuliꞌ it Ampuꞌan nga si Jesus, egnen ya gasiꞌ kami sabap it pakilagpit namen it ki Jesus ngaytu, bawnga ipabulun ya kita nga muꞌsa kat adapan ya, nga mga taawan na nga ega nay kakasalaꞌan. ¹⁵Pagsagkaꞌen namen i muꞌsang mga kakuriꞌan nga magꞌabut it amen sabap kat ikagayen mi nagaytu, baw kat ikabantug it Ampuꞌang Diyus. Sabap in dakel na nga makatanggap it ildaw ya ngaytu, subrang dumakel na i magpasalamat baw magbantug it kanya.

Maski unuy kakuriꞌan it mga magpamayaꞌ situt banwa, subrang piyakamagayen i pagꞌiꞌinawaren nga kabetangan duꞌut langit

¹⁶Aypaꞌ ka ega naga magpanlaꞌnus i tuꞌlang namen, ka maski aldaw-aldaw pasigi nga maggurang baw magrupuk i bilug namen, aldaw-aldaw pasigi naga nga pagbegayan kami it Ampuꞌang Diyus nga magmakulaꞌsi in pasar it pamayaꞌ namen baw baꞌgung pangaꞌgenan nga begay it Espiritu Santo. ¹⁷Sabap, kadakulat kakuriꞌan ngaytu nga paglabayen namen kayti, ega naga yan maneꞌteꞌ baw maꞌaat ta nga dekeyeꞌ lamang in panawun it pikiran tami i tumbas ya kat pagdadarapaꞌen, nga subraꞌ nga piyakaꞌega babasta-bastaen nga kabantugan nga ega talagay kaꞌawaꞌan. ¹⁸Aypaꞌ ka ega iyan i ipagpadaꞌeg kat nakem namen, mga bagay situt banwa nga magkaltegan it mata, in daꞌga mga bagay duꞌut langit nga ega paꞌ magkaltegan. Ka mga bagay situt banwa, ega magpaneꞌteꞌ, temed mga bagay duꞌut langit, magpaneꞌteꞌ yan it manupusan.

¹Subung nagaytut bilug ta, ka magkaꞌrutan ta nga maski natay na i pandenaꞌ ngaytung bilug nga bilang pagtataꞌidan ta situt banwa, mabut i aldaw nga begayan tat panlangit nga bilug, nga ega nay kamataynen seked it kaꞌnu-kaꞌnu, nga ega taw i nagbuwat in daꞌga Ampuꞌang Diyus. ²Baw yay matuud, talagang magkakuriꞌan tami mintras situ pat pagtataꞌidan tami ngaytu nga bilug. Aypaꞌ ka pagꞌeꞌlaten ta na nga banar nga magantiyan it mataꞌidan ngaytu duꞌut langit, ³isaꞌun in subuk makapapakay nat aten i itu ngaytu, daꞌna maꞌaat nga subuk maglelbas i kiyarurwa tami ka egay bilug ya. ⁴Ta kayti it situ tami pat banwa subuk daꞌta magkabaraꞌan sabap it mga kalubayan baw kakurangan it pandenaꞌ ngaytung bilug ta. Egaytu maat pagpaꞌbutun tami i kamataynen isaꞌun awaꞌan ta it bilug ta ngaytu, in daꞌga iyan i pagpaꞌbutun tami nga banar, nga magantiyan i bilug ta kayti it ega basta-bastang bilug nga panlangit. Ta sikayan, kaꞌgenan tami ngaytung may kaskedan, magantiyan na it kaꞌgenan nga egay kaskedan. ⁵Ka talagang kita, ipiyasiguru it Ampuꞌang Diyus nga mga taawan ya isaꞌun makatanggap tami it itu ngaytu nga kagayenan. Kanya naga ngaytu nga Ampuꞌang Diyus i garing kaytu. Kamatuudan, piyapasaruman ya kita it Espiritu Santo, nga yay pauꞌna ya.

⁶Aypaꞌ, kami ngaytu, egay kalubayan it nakem namen maski unu nga kakuriꞌan i mabut. Pagpaꞌbutun nameng banar i kagayenan duꞌut langit ka magkaꞌrutan namen nga mintras situ kami pat banwa daꞌkami kasagpun it banwa it Ampuꞌan nga duꞌut langit. ⁷Talagang pagsisiguruun namen nga maꞌaten i kagayenan ngaytu kat pagdadarapaꞌen. Yay ipagpadaꞌeg namen kat nakem namen, maski ega paꞌ magkaltegan it mata namen. ⁸Aypaꞌ maski kamataynen i mabut makseg nagay nakem namen nga tananan i pandenaꞌ ngaytung bilug isaꞌun kasagpun namen nay Ampuꞌan nga duꞌut langit. Baw iyan gasiꞌ i subraꞌ namen nga masagyaan. ⁹Aypaꞌ ka iyan talagay pagpaꞌresan namen, masagyaan ya kami nga pirmi mintras situ kami pat banwa, baw in duꞌun kami nat langit. ¹⁰Sabap, yay matuud, mabut i aldaw nga kada esat aten, talagang ipaꞌadap it ki Cristo nga Manigꞌukuman, isaꞌun matanggap tami i tumbas nga uyun kat in unuy binwat ta, magayen u maraꞌe-raꞌet, situt banwa ngaytu.

Magkagayen nay taw baw Ampuꞌang Diyus sabap it binwat ni Cristo

¹¹Ta, paribasay magkaꞌrutan namen nga kaiꞌlaman talaga i pangukuman ngaytut Ampuꞌan, pagpaꞌresan namen nga kabigen i mga katataawan nga pasakep it kanya. Magkaꞌrutan talaga it Ampuꞌang Diyus nga egay maraꞌe-raꞌet nga antap it nakem namen kat pangadal namen ngaytu, baw pagꞌiꞌinawaren ku nga natantuwan gasiꞌ tu it nakem mi. ¹²Sana ega naga pikiren mi nga pagꞌampangen namen i atkaytu ka magpatuꞌgud kami siꞌ it imyu, in daꞌga isaꞌun mabgayan kamu it kataldengan nga ipanindeg mi it amen baw ikatubag mi it mga taw nga magpanibabaꞌ it amen asan. Iyan nga mga taw, iyan lamang i pagdayawun nira kat taw, mga kat liꞌwan nga magkaltegan. Sana iyan i dayawun nira, magayen nga kat nakem baw adat it taw. ¹³Ka in kat pabetang it beken asan subuk engel-engel kami, ega kat ulu namen yan sabap kat ikabantug it Ampuꞌang Diyus i pagsirbi namen. Baw in tarunus i pikir namen, simpri kat ikagayen mi naga yan. ¹⁴Talagang kat muꞌsang pagbuwaten namen, yay magdadaꞌeg kat nakem namen, iyan nga kadakulat raras ni Cristo it aten. Ka in sangbat nga taw, natay nga biyatuꞌan yay muꞌsang taw5:14 Egaytu maat yay ireg sugiden, ribri na i muꞌsang taw, temed kumpur mamayaꞌ baw sumarig it kamataynen ngaytu ni Jesus, siguradu nga maribri kat panriga it kasalaꞌan (Mga Binwat 16:31). , aypaꞌ kamataynen ya ngayti, ipagpabetang na nga kamataynen it puꞌsa. ¹⁵Ta, natay kanya nga biyatuꞌan yay muꞌsang taw isaꞌun, kita nga subuk iba ya it inggen it paꞌuliꞌ5:15 Roma 6:4. , sana mangaꞌgenan tami na nga ega na sadiling kaꞌirgan i paglabiyen in daꞌga kaꞌirgan na it kanya ngayti nga natay sabap it aten, baw naꞌgen naga it paꞌuliꞌ.

¹⁶Aypaꞌ kayti, ega na ipagpabetang namen nga magayen u ega i maski siyu in sabap lamang it mga kat liꞌwan nga bagay nga magkaltegan. Sabagay tagnaꞌ atkayan naga i pabetang ku it ki Cristo. Temed kayti, talagang ega na atkayan. ¹⁷Ta, atkayan naga, in siyu-siyu nga talagang maglalagpit na it ki Cristo, mabaꞌgu i muꞌsang-muꞌsa ya. Kaꞌalimbawaan ya, giyuna it sumaꞌup, aypaꞌ ega na i tagnaꞌ ngayti nga karaꞌe-raꞌetan kat pangaꞌgenan ya ka nabaꞌgu na. ¹⁸Ampuꞌang Diyus tu talaga i garing it muꞌsa ngaytu, ka sabap it kamataynen ni Cristo ipiyabetang ya na kita nga mga iba-iba ya na, ega na kakuntraꞌ. Bawnga riyumraan ya kami nga mga manigpaꞌuliꞌ it taw duꞌut kanya, isaꞌun sira gasiꞌ i ipabetang nga mga iba-iba it Ampuꞌang Diyus. ¹⁹Ipagpanulduꞌ namen nga, kat kamataynen ni Cristo inabriyan it Ampuꞌang Diyus i dalan it ipagkagayen it taw duꞌut kanya. Ka sabap it kamataynen ngaytu ni Cristo, mapakay na nga ipabetang it Ampuꞌang Diyus i taw nga ega nay kakasalaꞌan nira. Baw ipiyakarguꞌ ya it amen i pangadal it kamatuudan sabap it ituꞌun ngaytu. ²⁰Aypaꞌ kami ngaytu, mga taraꞌgen ni Cristo, nga subung baꞌ it Ampuꞌang Diyus na i magpakiꞌupakat it mga katataawan nga kami i pagsarigan ya nga manigpanuturan it ampang ya. Talagang maseked-seked i ipagpakiꞌupakat namen it mga taw nga pasakep sirat Ampuꞌang Diyus isaꞌun magkagayen na sira duꞌut kanya. ²¹Ka, maski egay kakasalaꞌan ni Cristo, ipiyabetang kanya it Ampuꞌang Diyus nga makasalaꞌan sabap it aten nga mga taw, isaꞌun mapakay nga ipabetang ya kita nga mataldeng kat panleteg ya sabap it kamataynen ni Cristo ngayti.

¹Ta, it kami, mga manigbuwat na kat buwaten ngaytu it Ampuꞌang Diyus, maseked-seked gasiꞌ nga ipagpakiꞌupakat namen it imyu, kamu nga timnanggap na it ildaw it Ampuꞌang Diyus. Ega sana desang kalabtaꞌen mi i ildaw ya ngaytu, ka in atkayan limiꞌwan nga egay kapulusan. ²Ka dedemdemen mi i inaat it Ampuꞌang Diyus duꞌun it isiyurat ngaytit tagnaꞌ nga magꞌaat,

“Kat timpu nga ipiyabetang ku nga tamaꞌ, siyambungan ku na i panalangin mi.

Tiyubag ku kamu kat aldaw nga ipiyagtirminu ku nga aldaw it panribri.”6:2 Isaias 49:8.

Aypaꞌ mandangep kamung matuud duꞌun it kanya ka kayti nay tamaꞌ ngayang timpu nga paꞌaaten ya. Kayti na ngaytu i aldaw nga ipagpanribri yat mga taw.

Kadakulat paꞌres na Pablo it pangadal it Magayeng Baritaꞌ

³Talagang pagꞌinturun namen nga egay mabwat namen nga subuk kakekleban it maski siyu, isaꞌun ega masudi-sudi i pangadal namen it Magayeng Baritaꞌ. ⁴In daꞌga pagsiguruun namen nga iyan adat lamang nga bagay it mga manigsirbi it Ampuꞌang Diyus i magkamuyaan situt amen kat maski unu nga pagbuwaten baw paglabayen namen. Nga magkamuyaan tu kat kadakulaꞌ it paneꞌteꞌ namen, kat mga kakuriꞌan, mga kagipitan, baw mga ega basta-bastang karigaan, ⁵kat mga nalabayan namen nga rinipdasan, pinirisu, baw liniputan it reetat taw nga daꞌna magꞌulibas nga iseg, baw kat buwat namen nga subrang makuriꞌ nga uyut i eꞌlek baw getem. ⁶Makilalaan gasiꞌ nga, kami, matuud nga manigsirbi it Ampuꞌang Diyus kat magayeng pangaꞌgenan namen, kat pagkilala namen it Ampuꞌang Diyus baw kasepsep namen it kamatuudan nga garing duꞌut kanya, baw kat adat namen nga mapiyalulus baw maꞌildaw kat masigkataw namen. Makilalaan gasiꞌ kat keseg it tabang it Espiritu Santo it amen, kat kamatuudang raras namen it muꞌsa, ⁷kat pangadal namen it kamatuudan, baw kat guna it Ampuꞌang Diyus kat pangaꞌgenan namen. Iyan kataldengan namen kat panleteg it Ampuꞌang Diyus, yay bilang ipaglaban namen nga basiꞌ baw iyan na gasiꞌ i ipagsagang namen kat mga kalaban namen. ⁸Talagang nalabayan namen na i pagdayawun baw pagpamuwat-buwatan it panranggaꞌ it amen, paglibaken baw pagtuꞌgudun, pagꞌaaten kami na nga maꞌambut, lamang kamatuudan i pagsugiden namen. ⁹Ipagpabetang kami nat beken nga egay kakapulusan nga mga taw, temed pagkilalaen kaming banar it Ampuꞌang Diyus. Magpanaytay kami manat sang naay nga buꞌuk, temed maski atkayan, egen kami naga seked kayti. Maski na maat pagtaldengen kami it Ampuꞌang Diyus, kat ikagayen namen naga. Ega naga pagꞌimatayen ya. ¹⁰Talagang kasesmekan na nga buwat, takaꞌ daꞌga magꞌuꞌunay i kasagyaan namen? Subuk makuriꞌ kami na nga makuriꞌ temed dakel i magkapamanggad namen it kamanggadan nga egay kaꞌawaꞌan. Situt banwa egay sadili nameng kusas takaꞌ ipiyasiguru nat amen i muꞌsang kagayenan nga duꞌut langit.

¹¹Mga taga Corinto, kat kadakulaꞌ talagat raras namen it imyu, muꞌsa nga kat seled namen, ipagpalbaw namen na. ¹²Talagang pagmaꞌalen namen kamu nga banar temed imyu, maramig i pagmaꞌal mit amen. ¹³Ipagpabetang ku na kamu nga mga anak ku na. Sana, it daꞌku naytu magꞌaliꞌ-aliꞌ it imyu, belsan mi naga aku it pagmaꞌal mi nga ega awam nga pagmaꞌal.

Kaꞌilangan, mga magpamayaꞌ, ega pakikumbiꞌlid it mga ega magpamayaꞌ.

¹⁴Mga kasulsugan, daꞌga baꞌ in duwang karamu-ramuwan i iꞌaradu mu it esa-esay singkaw, ega magkabaraꞌan in sangbat i kabayuꞌ, sangbat i bakaꞌ? Atkayan naga, mga magpamayaꞌ it ki Cristo, ega magkabaraꞌan in pakikumbiꞌlid sira it iyan ega magpamayaꞌ. Ka unu, magbayaꞌ i kataldengan baw karaꞌe-raꞌetan u atnaga i kaꞌyagan baw kadleman? ¹⁵Unu, mapakay nga magꞌuyun si Cristo baw si Belial6:15 Si Belial ngaytu, ireg sugiden, gimpuꞌut karaꞌe-raꞌetan, nga egay beken nga pagpaꞌiguꞌan, si Satanas naga. , u mga magpamayaꞌ it ki Cristo baw mga taw nga magpandaꞌga it kanya? ¹⁶Unuytu, egay piyagbelagan it papagsambaang balay it Ampuꞌang Diyus baw papagsambaang balay it pagbete-beteꞌen nga diyus? Talagang dakulay piyagbelagan ya. Ka kita ngaytu i bilang balay it Ampuꞌang Diyus nga talagang egen it egay kaskedan, ka daꞌga baꞌ kanya naga i nagꞌaat,

“Manaꞌidan aku duꞌut kanira baw mangaꞌgenan aku nga maꞌiba-iba nira nga pirmi.

Aku na i Ampuꞌang Diyus nga sirbiyan nira, baw sira, buwaten ku na nga taawan ku.”6:16 Levitico 26:12, Jeremias 32:38, Ezekiel 37:27.

¹⁷Maat siꞌ it Ampuꞌang Diyus,

“Aypaꞌ ka paꞌalaid kamu nat karaꞌe-raꞌetan it mga taw ngayti. Pablagan mi na sira.

Talagang ayaw kamut paꞌuyu-uyut it mga pagbuwaten nirang maraꞌway kat panleteg ku. Iyan, yan i ikatanggap ku it imyu.6:17 Isaias 52:11.

¹⁸Mabut i aldaw nga, aku, Amaꞌ mi na, baw kamu, babay, lalaki, ipabetang ku nayan nga mga anak ku.”6:18 Isaias 43:6.

Yanay inaat it Ampuꞌang Diyus nga landaw nga guna.

¹Ta kayti, mga pagmaꞌalen ku, it ipiyagsanggup it aten i mga itu ngaytung bagay, kaꞌilangan nga limpiyuꞌun i bilug baw nakem ta kat muꞌsang kasalaꞌan, ka pagraꞌwayen it Ampuꞌang Diyus i mga kasalaꞌan it taw. Sana, paꞌresan tami nga mangaꞌgenan nga paggalangen it may iꞌlam i Ampuꞌang Diyus seked it mataldeng na it kaꞌustuꞌang kataldeng i pangaꞌgenan tami.

Pagsagyaan ni Pablo nga dakulay liyapusan it surat yat tagnaꞌ duꞌut mga taga Corinto

²Subung nat inaat ku, mga kasulsugan, sana pasagyaen mi siꞌ i nakem mi sabap it amen. Ka daꞌga baꞌ egay namuyaan mi it yanaytuy kaꞌlay nga may binwatan namen it maraꞌe-raꞌet, egay ipiyakursud namen kat kasalaꞌan, u liyuku namen? ³Ega maat pagꞌampangen ku i atkaytu nga pagbetanganan kamu it ukuman. Ka subung nat inaat ku, maꞌal namen na nga maꞌal kamu. Matay, maꞌgen, sang tamiyan talaga. ⁴Talagang pagsisiguruun ku nay kagayen it pamayaꞌ mi. Pagdaya-dayawun ku duꞌut beken, baw yay ikinseg it nakem ku. Yay matuud, maski dakulay magkalabayan kung kakuriꞌan, talagang subrang-subraꞌ i kasagyaan kat nakem ku.

⁵Ka, iyan duꞌun kami it Macedonia, daꞌkami naga pagpapaꞌnaen it kakuriꞌan. Ka paꞌari-ari banta-bantaen naga, baw pirming pagregnan namen kamu nga barang mangindiꞌ kamu it pamayaꞌ mi. ⁶Temed maski siyu it aten nga magkakuriꞌan, ega naga talaga pagpabaya-bayaꞌan it Ampuꞌang Diyus. Kamatuudan, piyasagya ya kami ka miyabut mana si Tito ngayti nga pagregnan namen. ⁷Baw ega lamang pagꞌabut ngayti ni Tito i nakapasagya it amen, in daꞌga pati ipiyagbaritaꞌ yat amen nga in magꞌuꞌunu simnagya i nakem ya sabap it imyu. Ka itiyuturan ya nga magpaꞌbut kamu nga magpaꞌbut it aken. Itiyuturan ya gasiꞌ nga magkasmekan mi nga banar i mga binwat mi nga ega magayen nga tiyaldeng ku, baw in magꞌuꞌunu pagpanindegan mi aku kat mga magtibabaꞌ it aken asan. Aypaꞌ pagkabaritaꞌ ku, simnagya akung banar.

⁸Ka maski na maat nakabgay it imyu it kasmek i surat ku ngayan nga ipiyataban ku asat imyu, kayti ega pagsinguliꞌen ku i mga isiyurat ku nga mga sugi-sugid. Sabagay sininguliꞌ ku naga i surat ku ngayan, iyan naꞌrutan ku nga nakabgay it imyu it kasmek it maski ega naꞌlay. ⁹Takaꞌ kayti, masagya nay nakem ku. Ega maat pagsagyaan kuy nasmek kamu, in daꞌga iyan i pagsagyaan ku nga, kasmek mi ngayan, iyan i timnaban it imyu nga sininguliꞌan baw inindiꞌan mi i mga kasalaꞌan mi. Kasmek mi ngayan, uyun kat kaꞌirgan it Ampuꞌang Diyus. Aypaꞌ maꞌunu maranggaꞌ i pamayaꞌ mi it surat ku ngayti, isan yan dakulay liyapusan ya. ¹⁰Sabap iyan kasmek nga uyun kat kaꞌirgan it Ampuꞌang Diyus, magtaban it taw it magsinguliꞌ baw magpangindiꞌ it kasalaꞌan nira, nga liꞌwan ya, karibriyan nga ega alang-alang. Temed iyan kasmek nga begay it banwa ngaytu, ipagdesen lamang it ulu aypaꞌ, liꞌwan ya, kamatayneng panriga nga egay kaskedan. ¹¹Ka letganan mi lamang in unuy liyapusan kat kaꞌgenan mi it kasmek mi ngayan nga uyun kat kaꞌirgan it Ampuꞌang Diyus. Daꞌga nagmapaꞌres kamu nga banar nga maꞌukumanan i ega ngayan magayeng binwat asan it imyu nga siyangpit ku kat surat ku, isaꞌun makilalaan nga ega na pagbaliwalaꞌen mi in daꞌga pagraꞌwayen mi na. Talagang riyaꞌway mi i sadili mi, baw iniꞌlaman mi i barang kaꞌuyut kamu gasiꞌ it rigaen. Inawar mi nga banar nga sagyaan ku siꞌ kamu aypaꞌ siyarunga mi it magayen i mga aꞌayusun asan, baw biyetanganan mi it ukuman i iyan dapat nga ukumanan. Talagang ipiyatantu mi na nga ega nay turubagen mi kat kasalaꞌan nga binwat it taw ngayan asan. ¹²Aypaꞌ natanyag na in unuka talaga piyatabanan ku kamu it surat katꞌesa. Ega maat isiyurat ku sabap lamang it kanya ngayti nga nagkasalaꞌan, u iti, nabwatan ya it kasalaꞌan, in daꞌga isaꞌun matantuwan mi kat panleteg it Ampuꞌang Diyus nga dakulaꞌ naga i paggalang baw pagdemdem mi it amen. ¹³Aypaꞌ ka ituy minggay it amen it dakulaꞌ nga kasagyaan.

Baw subraꞌ nga dimnakulaꞌ i kasagyaan namen sabap it kasagyaan ni Tito, ka iyan asan kanyat imyu, talagang piyasagya mi i nakem ya. ¹⁴Iyan ega paꞌ nakagaring sini si Tito, talagang pagdaya-dayawun ku kamu duꞌut kanya. Ta kayti, ega naga saꞌan desang magkaꞌeyaꞌan aku it mga inaat ku ngayan ka tiyuman mi na i muꞌsa. Aypaꞌ in magꞌuꞌunu purus matuud i muꞌsa nga pagsugiden namen it imyu, natanyag na nga matuud gasiꞌ i ipagtuturan ku ngaytit ki Tito nga pagdayaw kut imyu. ¹⁵Kayti, subraꞌ na nga pagmaꞌalen kamu ni Tito, ka magkademdeman ya nga piyagnegan mit magayen baw siyunud mit may dakulang iꞌlam i muꞌsa nga ipiyagsasar yat imyu. ¹⁶Aypaꞌ masagyang-masagya aku na ka nasiguru ku na nga iyan nay magdadaꞌeg kat nakem mi, kubwat it tamaꞌ nga pagbuwaten.

Panulduꞌ sabap it pagbegay it tabang kat mga magkakuriꞌan

¹Kayti, mga sulsug ku kat pamayaꞌ, ireg ku na nga ibaritaꞌ it imyu i kagayen it binwat it mga gurupu it mga magpamayaꞌ nga duꞌun it Macedonia, kat keseg it ildaw it Ampuꞌang Diyus it kanira. ²Ka maski pagsukdanan nga banar i pamayaꞌ nira it ega lulugud-lugudun nga kakuriꞌan, temed palan, subrang kadakulaꞌ it kasagyaan nira, baw subraꞌ na nga kakuriꞌ nira, yay timnaban it kanira kat ega basta-bastang kaꞌatag duꞌut beken. ³Talagang ipagpamatuud ku ngaytu nga ega lamang ipiyagbegay nira i kumpur magkakayaan nira, in daꞌga piyasubraꞌan nira paꞌ. Baw egaytu riyeges sira, talagang sadili niraytu nga ireg. ⁴Kamatuudan, maseked-seked nga inupakat nira kami nga begayan sirat rugar nga makatabang it mga sulsug nira kat pamayaꞌ nga kat kagipitan.8:4 Mga taw ngaytu nga paꞌaaten, mga magpamayaꞌ nga taga Jerusalem, ka subuk pirmi sirang makuriꞌ. Basaen i duꞌut Mga Binwat 11:27-30 baw 24:17, baw duꞌut Roma 15:25-27. ⁵Baw subraꞌ paꞌ kat pagꞌiꞌinawaren namen i binwat nira, ka ega lamang nagbegay it atkayang kadakulat pirak in daꞌga, uyun kat kaꞌirgan it Ampuꞌang Diyus, matuud na nga ipiyasiguru nira daꞌan i sadili nira, uꞌnay duꞌun it Ampuꞌan, bawnga situt amen gasiꞌ.

⁶Ta, it atkayti i binwat it taga Macedonia ngayti, inupakat namen na si Tito nga paꞌuliꞌ kanya asat imyu, nga tumabang it imyu isaꞌun makapatabus mi na i kubgay mi it ildaw. Ka daꞌga baꞌ kanya naga i timnabang it imyu katꞌesa nga papuꞌun it riminut it tabang nga maat ibgay mi? ⁷Talagang pagdaya-dayawun kamu na nga mga taw. Pagdaya-dayawun kamu na kat pamayaꞌ mi, kat kasepsep baw kat paꞌyag mi it ampang it Ampuꞌang Diyus, kat paꞌres, baw iyan nga pagmaꞌal mi it amen. Sana paꞌresan mi naga nga pagdaya-dayawun kamu gasiꞌ kat pagbegay ngaytut kaꞌildawan. ⁸Ega maat pagꞌurdinan ku kamu. Ipagsugid ku lamang it imyu in magꞌuꞌunu-unu i panabang it beken nga mga sulsug mi kat pamayaꞌ isaꞌun, in buwaten mi gasit imyu, sikayan masiguru in sang unu na talaga i kamatuudan it imyu nga kararas. ⁹Ka daꞌga baꞌ magkaꞌrutan mi na in sang unu talaga i kadakulaꞌ it kaꞌildaw it Ampuꞌan tami nga si Jesu-Cristo, nga maski ega babasta-bastaen i kabantugan baw kataꞌasan ya duꞌut langit, nagpabalyu nga subuk timawaꞌ nga miskin isaꞌun, kat pagkamiskin ya ngayti, magmanggaden kamu it kagayenan nga duꞌun it langit.

¹⁰Ta kayti, itu i maꞌaat ku nga, kat aken lamang, kat ikagayen mi nga buwaten. Tabusun mi na i napapuꞌnan mi na ngayan katꞌesang taꞌun. Ka kamu talagay uꞌna-uꞌna nga ega lamang nagpapuꞌun in daꞌga uꞌna-uꞌna gasiꞌ nga minireg it atkaytung pagbuwaten. ¹¹Aypaꞌ, yay magayen, tabusun mi na. Iyan paꞌres mi it pagpapuꞌun mi, sana manupusan. Temed iyan ibgay mi, simpri uyun kat in unuy kaya mi nga kabgay. ¹²Sabap, basta magbegay ta it masagyang-masagyay nakem it kumpur kaya ta nga ibgay, pagsagyaan na it Ampuꞌang Diyus. Ega maat pagtulusun ya paꞌ nga megay it ega na kaya ta.

¹³Egaytu maat ireg ku nga mayaꞌnganan i beken baw mabeꞌgatan kamu nay imyu. ¹⁴Temed ireg ku nga sugiden, it may bastanti mi kayti, magayen talaga, tabangen mi i mga may kakurangan. Ka in beteꞌ kamu siꞌ i may kakurangan, baw sira siꞌ i bastanti, simpri sira siꞌ yan i tumabang it imyu. Ta daꞌga, in atkayan, surubung kamu nga muꞌsa nga ega pagkurangen? ¹⁵Subung tut inaat ngayan duꞌun it isiyurat nga ampang it Ampuꞌang Diyus nga magꞌaat,

“Iyan minsiꞌ it dakulaꞌ, ega naga simnubraꞌ, baw iyan minsiꞌ it dekeyeꞌ, ega naga gasiꞌ kimnurang.”8:15 Exodo 16:18.

Na Tito i paꞌaduꞌunun ni Pablo nga masikasu it pagbegay it tabang nira

¹⁶Talagang magpasalamat aku duꞌun it Ampuꞌang Diyus sabap binggayan ya si Tito it kutabang nga banar it imyu, subung naga it aken nga kutabang. ¹⁷Ka ega lamang desang siyanggupan yat masagya i pakiꞌupakat kut kanya in daꞌga eꞌres talaga i kupaꞌasan yat imyu, beken it kaꞌirgan ya naga gasiꞌ nga paꞌasan. ¹⁸Ipiyabayaꞌ ku gasiꞌ it kanya i esang sulsug kat pamayaꞌ nga kilalang-kilala it muꞌsang mga magpamayaꞌ sabap it panindeg ya it Magayen nga Baritaꞌ. ¹⁹Ega lamang iyanꞌen, piniliꞌ kanya it mga gurupu it magpamayaꞌ nga, kanya, kaꞌibaan namen kat buwaten namen ngaytu nga magpanduꞌlung it tabang duꞌut mga kat kagipitan. Pagsirbi namen ngaytung ituꞌun, kat ikabantug it Ampuꞌan baw magpakilala nga kutabang kami nga kutabang it mga makukuriꞌ. ²⁰Talagang pagꞌinturun namen nga banar nga egay mapatikdan it maski siyu nga masalaꞌan nira it pamaalaꞌ namen it yaytung kadakulat bagay, ipiyamagbegay ngaytu. ²¹Pagpaꞌresan namen talaga nga mabwat namen tu it maꞌayus, nga ega lamang desang kat panleteg it Ampuꞌan, in daꞌga pati kat mga taw gasiꞌ.

²²May ipiyabayaꞌ namen gasiꞌ nga esa pang sulsug kat pamayaꞌ. Namuyaan namen nga, kanya ngaytu, mapaꞌres kat buwaten it Ampuꞌan. Ta kayti, subraꞌ kanya nga magꞌireg paꞌasan it imyu it nasiguru ya nang banar nga kutabang kamu. ²³Ki Tito ngaytu, kanya i kaꞌiba-iba ku baw katabang kat buwaten ku ngaytu nga magsirbi it imyu. Ta, pasar gasiꞌ it mga sulsug tami ngaytu nga mga kaꞌibaan ya, piniliꞌ tu sira it mga gurupu it magpamayaꞌ sini nga bilang ganti nira, baw kat ikabantug ni Cristo i pangaꞌgenan nira. ²⁴Aypaꞌ ipatantu mit kanira i matuud nga kararas mi, isaꞌun mamuyaan it muꞌsang mga magpamayaꞌ nga daꞌkami nagkamaliꞌ it pagdaya-dayawun namen ngaytu kamu.

¹Ta, in pasar it tabang ngaytu nga itabang it mga sulsug tami kat pamayaꞌ, ega na kaꞌilangan nga isurat ku paꞌ nga sulagen ku kamu. ²Sabap magkaꞌrutan ku na nga siguradu nga kutabang kamu. Talagang pagdaya-dayawun ku kamu sini it Macedonia. Pagꞌaaten ku nga, kamu nga taga Acaya9:2 Sakep nagat prubinsiya ngaytu nga Acaya i siyudad it Corinto. , garing paꞌ it katꞌesa nga taꞌun, alistu kamu nga megay it tabang mi. Aypaꞌ dakel talaga i subuk nasulag kat paꞌres mi ngaytu nga magkutabang gasiꞌ. ³Aypaꞌ ka piyauꞌna ku na asan i mga sulsug tami ngaytu isaꞌun daꞌku maꞌeyaꞌan it pagdaya-dayawun ku ngaytu kamu, baw isaꞌun maꞌitsu na nga lagi i mga itabang mi, nga subung nat inaat ku. ⁴Ka barang desa aku nga maꞌeyaꞌan, ega na aaten ku nga pati kamu, in beteꞌ may mga taga Macedonia ngayni nga mayaꞌ it aken baw mamuyaan nira nga ega paꞌ itsu kamu. ⁵Aypaꞌ ka inupakat ku i mga sulsug tami ngaytu nga muꞌna na sira asan, isaꞌun maꞌitsu mi nga lagi i tabang ngayan nga isiyanggup mi. Ta daꞌga, in atkayan, limiꞌwan nga masasagya kamu i magbegay, ega desang magkaregesan i nakem ka maꞌimet?

Kaꞌirgan it Ampuꞌang Diyus nga itsu tami nga pirmi baw masagyay nakem nga magbegay it kumpur ikabgay ta nga tabang

⁶Kabilangan it pagbegay it tabang, subuk ipagtugdaꞌ, nga in dekeyeꞌ, simpri dekeyeꞌ naga i mapatbasan. Takaꞌ in dakulaꞌ simpri, mapatbasan, dakulaꞌ naga. ⁷Iyan i magayen, in magbegay tat tabang, megay i kada esa it kat sadili ya nga napikir, mayaꞌngan i nakem, baw ega desang magkaregesan lamang. Sabap iyan talagay kaꞌirgan it Ampuꞌang Diyus, begay-matag. ⁸Ka talagang magkabwat it Ampuꞌang Diyus nga pabastantiyan kamu nga pirmi it muꞌsang bagay, nga ega lamang tamaꞌ nga pirmi kat muꞌsang pagkaꞌilanganen mi, in daꞌga bastanti kamu gasiꞌ it magamit mi it muꞌsang pagbuwaten nga magayen. ⁹Ka subung nat inaat ngayan it isiyurat nga ampang it Ampuꞌang Diyus ngayang magꞌaat,

“Masagya kanya nga magbegay it tabang ya duꞌun it mga makukuriꞌ.

Talagang seked it kaꞌnu-kaꞌnu ega malipatan i magayen ngaytu nga pagbuwaten ya.”9:9 Awit 112:9.

¹⁰Ka in magꞌuꞌunu magbegay i Ampuꞌang Diyus it biꞌni nga ipagluwak, baw pagpaksegen ya isaꞌun magbaraꞌ nga magkakaꞌen, atkayan naga pabastantiyan ya kita it ipagkabgay ta duꞌut beken nga may kaꞌilangan. Baw subung it paksegen it Ampuꞌang Diyus i subuk ipagluwak ta ngaytu nga ipagtabang it beken, isaꞌun dakulay paglapusan it kaꞌildaw ta ngaytu it masigkataw ta. ¹¹Aypaꞌ pagsisiguruun ku nga, sabap it tabang ngaytu nga ibgay mi, pabastantiyan kamuy imyu it Ampuꞌang Diyus it muꞌsa nga mga bagay, isaꞌun subraꞌ nga dakel i matabangan mi. Baw limiꞌwan gasiꞌ nga dakel i pasalamat duꞌun it Ampuꞌang Diyus sabap it tabang mi nga tabanen namen duꞌut kanira. ¹²Ka itu, tabang mi ngaytu it mga sulsug tami kat pamayaꞌ, ega lamang tu desang makatabang it kanira kat mga kakurangan nira, in daꞌga magbaraꞌ tu gasiꞌ nga dakulang ikabantug it Ampuꞌang Diyus. ¹³Ka itu, mayaꞌngan ngaytung mayaꞌngan kat nakem mi nga begay mi it tabang, magpamatuud tu nga kamatuudan i pamayaꞌ mi. Aypaꞌ ka, mga tumanggap it tabang mi ngaytu, bantugun niray Ampuꞌang Diyus sabap it magayen ngaytung pagsunud mi it Magayeng Baritaꞌ pasar it ki Cristo, baw sabap it magayen nga pakiꞌiba-iba mi it kanira baw muꞌsang kasulsugan mi kat pamayaꞌ. ¹⁴Baw beken paꞌ, ipagpanalangin nira kamu it maꞌal nga maꞌal nira na kamu sabap it subraꞌ nga kaꞌildaw mi, nga ipiyagꞌildaw nagat imyu it Ampuꞌang Diyus. ¹⁵Temed may ipiyagꞌildaw yat aten nga talagang subraꞌ it muꞌsa.9:15 Siguru, egay beken nga pagpaꞌiguꞌan kaytu, si Jesu-Cristo. Dapat nga dakulaꞌ i pasalamat ta duꞌun it Ampuꞌang Diyus sabap it ipiyagꞌildaw ya ngaytu nga talagang ega masugid i kagayen ya.

¹Ta kayti, may ipagpakiꞌupakat kut imyu, aku nga si Pablo nga pagꞌaaten it beken nga in duꞌun gat alaid maꞌiseg i nakem ya mampang it mga mabeꞌgat nga sugi-sugid, temed in nagꞌada-adapen, ega na magkaꞌurum mampang it atkayan. Sana magpatibayaꞌ tami nga pirmi it ki Cristo, nga mapiyalulus baw nakman. ²Aypaꞌ, asi-asi paꞌ beteꞌ it imyu, ega sana regesen mi aku nga maꞌampangan ku kamut mabeꞌgat in paꞌasan aku. Ka iyan beken asan, magpaliꞌwan it magpangaꞌgenan kami uyun duꞌun it singkadan nga karaꞌe-raꞌetan situt banwa. ³Sabagay taw kami naga situt banwa ngaytu, takaꞌ kat paglaban namen it mga kalaban it buwaten it Ampuꞌang Diyus situt banwa, ega pasarigan namen i sadili nga kakayaan, nga kakayaan it taw lamang. ⁴Ka iyan ipaglaban namen ngaytu, ega subuk mga ipaglaban it taw situt banwa, in daꞌga may guna it Ampuꞌang Diyus nga subuk magkapatibag it maski unu nga kutaꞌ kat linibut it mga kalaban ya. Kat keseg it guna ya ngaytu magkaꞌindaꞌeg namen i mga kamaliꞌ nga runding it pikiran it taw, ⁵baw muꞌsa nga pataꞌas-taꞌas nira nga kuntraꞌ it Ampuꞌang Diyus. Baw muꞌsa nga pikir it taw nga ipagpadaꞌeg nirat Ampuꞌang Diyus, magkapasakep namen isaꞌun sumunud sira it ki Cristo. ⁶Ta, begayan ta daꞌan kamu it rugar isaꞌun matantuwan namen nga sininguliꞌan mi nang matuud baw inindiꞌan mi na i kasalaꞌan mi, temed nakasiguru aku na gasiꞌ nga manriga it muꞌsa ngayan nga magpakikuntraꞌ paꞌ.

⁷Yay salaꞌ it imyu, iyan lamang i sisigmata mi nga pirmi, iyan nga kat liꞌwan nga kabetangan it taw. Yay matuud, in pagsisiguruun it maski siyu nga si Cristo i nagrumra it kanya, magayen pikiren yaytut magayen isaꞌun matantuwan ya nga, kami ngaytu, atkayan naga nga si Cristo talaga i nagrumra it amen nga mga manigsirbi ya. ⁸Ka in beteꞌ subraꞌ pang ipabantug-bantug ku i pudir namen, ega maat desang maꞌeyaꞌan aku. Ka pudir namen ngaytu, ibinggay it amen it Ampuꞌang Diyus, baw kat ikapapaꞌgen it imyu, ega maat kat ikaranggaꞌ mi. ⁹Sana egaytu pikiren mi nga paiꞌlam lamang i mga surat ku asat imyu. ¹⁰Sabap maat nayat beken, “In ipagsurat ya ga, mabeꞌgat talaga i mga sugi-sugid ya, nga kaꞌaat ka in siyu nga may pudir. Temed in kat adapan, magꞌiꞌlam yan mampang it mabeꞌgat. Mga ampang lamang nga egay kakapulusan i ampangen ya.” ¹¹Kaꞌilangan nga maꞌrutan it mga taw ngayan nga magpikir it atkayan, nga in unuy isiyurat ku kayti nga alaid akut imyu, yanagay buwaten ku in nagꞌadap-adapen tami na.

¹²Ega mapakay nga ipaꞌuyut u ipasbung namen i sadili namen it beken nga mamagpataꞌas-taꞌas, ka daꞌga baꞌ, sira ngaytu, egay kasbung? Temed ega yan matuud. Kaꞌengel-engelan nira, sang sira-siraan naga i magpasbu-pasbungun it sadili nira nga pasepsep. ¹³Temed kami ngaytu, in patuꞌgud kami, ega pasaꞌli it kakayaan nga ibinggay it Ampuꞌang Diyus it amen, u buwaten nga ipiyakarguꞌ yat amen. Baw uyut na it buwaten ngaytu nga ipiyagꞌareg yat amen i pangadal namen asat imyu. ¹⁴Aypaꞌ in pagtulduꞌan namen kamu, ega maat pagpasaꞌliyan namen i buwaten nga ipiyakarguꞌ it Ampuꞌang Diyus it amen, adimaat ega uyut kamu it ipiyakarguꞌ ngaytu nga buwaten. Ka yay matuud, kat pagsarunga namen it ipiyakarguꞌ ya ngaytit amen, kami ngaytu i uꞌna-uꞌnang nagpaꞌasan it imyu nga taban namen i Magayen nga Baritaꞌ pasar it ki Cristo. ¹⁵Ega gasiꞌ maat pagꞌambuꞌun namen i magayeng liyapusan it piyaꞌresan it beken, nga magpaliꞌwan it kami naga i garing kayan. Temed pagꞌiꞌinawaren namen nga in magmapaꞌgen na i pamayaꞌ mi, bawnga kat tabang mi, subraꞌ kami nga kapangadal duꞌut beken nga mga rugar nga uyut naga it buwaten nga ipiyakarguꞌ it Ampuꞌang Diyus it amen. ¹⁶Magayen talaga in kapangadal i Magayen ngaytung Baritaꞌ kat mga rugar nga duꞌun it langbus mi. Temed talagang ega mangambuꞌ kami nga ipabantug-bantug i piyaꞌresan it beken. ¹⁷Ka subung nat inaat ngayan duꞌun it isiyurat nga ampang it Ampuꞌang Diyus,

“In siyu nga pabantug-bantug, magayen Ampuꞌang Diyus i ipabantug-bantug ya.”10:17 Jeremias 9:24.

¹⁸Ka ega iyan magbantug it sadili ya i kilalaen nga magayen i adat, in daꞌga iyan pagbantugun it Ampuꞌang Diyus.

Ipagpatantu ni Pablo i piyagbelagan nira it mga magpaꞌapu-apustul

¹Sana dakulaꞌ nagay pasinsiya mi it aken in sigi nga pakisugi-sugid kut imyu nga subung aku nat engel-engel. Pataꞌnan mi lamang i isugid ku ngaytu. ²Ipagsugid kuytu kat kadakulat imun ku, nga subung nat imun it Ampuꞌang Diyus. Ka pagꞌimunan kuy mga magpangadal asan nga magpaneꞌag-teꞌag it pamayaꞌ mi. Ka kamu, kaꞌalimbawaan mi, esang umbay paꞌ nga babay nga ipiyakiꞌupakat ku it esang lalaki, nga lalaki ngayti, si Cristo. Ta it atkayan, simpri ega ireg ku nga subuk salyaen kamu it beken. ³Magregen aku talaga nga in magꞌuꞌunu inakalan si Eva it dukul nga piyanakman ni Satanas11:3 Genesis kapitulu 3. , barang maꞌakalan kamu gasiꞌ i imyu it beken asan. Barang paꞌugad kamu nga ega na tingled duꞌut ki Cristo i pamayaꞌ baw pagsarig mi. ⁴Sabap pagtanggapen mi i pangadal it maski siyu nga magꞌabut, maski belag kat ipiyangadal namen i pangadal nira sabap it ki Jesus. Pagpakimatuudun mi maski belag kat Espiritu Santo i ipagpangadal nira nga Espiritu, baw maski paggantiyan nira i Magayeng Baritaꞌ nga ipiyangadal namen it imyu. ⁵Ipagpaliꞌwan it mga magpaꞌapu-apustul asan nga siray mga apustul nga banar nga ega nay kasubraꞌ. Temed maat it pabantug-bantug nat sadili, subung it daꞌku naga tuduꞌ it sang unu kat mga taw ngayan. ⁶Sabagay maꞌaat aku nga daꞌku makaꞌrut mampang, temed talagang magkasepsepan kung banar i ipagpangadal ku. Daꞌga baꞌ ipiyatantu kuytut imyu it ega lamang kaꞌsa?

⁷Ta, paribasay daꞌku naga nagpatangdan pagpangadal ku ngayan asan it imyu it Magayen ngaytung Baritaꞌ, barang ipagpaliꞌwan it beken nga binwat kuy atkayan sabap egay kapulusan it ipagpangadal ku. Temed ega. Nagpatimawaꞌ aku isaꞌun makabetang kamu it mataꞌas ka mga taawan nat Ampuꞌang Diyus. Ta, unu, maꞌaat nga kasalaꞌan kuytu? ⁸Iyan magpangadal aku ngayan asat imyu pagtabangen aku it beken nga mga gurupu it mga magpamayaꞌ kat mga kakurangan ku. Subung bat magkaꞌagawan ku na sira kat panabang ku lamang it imyu. ⁹Ta basaꞌan in pagkurangen aku asan, ega nagay nasasaw ku nga maski siyu, ka tiyabang aku it mga miyabut nga sulsug kat pamayaꞌ nga taga Macedonia. Talagang seked kayti pagꞌinturun ku nga banar nga ega mabwat aku nga kasasawan mi kat in unu nga mga bagay. Sana mapasigi kuy atkaytu naga nga buwat. ¹⁰Paribasay manigsirbi aku ni Cristo baw purus kamatuudan i kanya, matuud i pagꞌaaten ku ngaytu. Eeꞌ baꞌ, talagang ega maꞌawaꞌ situt aken i ipagpatuꞌgud ku ngaytu nga, kat pangadal ku kat muꞌsang mga rugar kat sakep it Acaya, ega magpatangdan aku. ¹¹Ega maat pagbuwaten kuy atkaytu sabap egay raras kut imyu. Talagang magkaꞌrutan tu it Ampuꞌang Diyus nga pagrarasan ku kamu nga banar. ¹²Temed ipasigi kuytuy daꞌku ngaytu magpatangdan isaꞌun matantuwan mi nga ega matuud i ipagpatuꞌgud it beken asan nga, kanirang pagsirbi kunuꞌ, ega nagay piyagbelagan it amen. Sabap kat kanirang pagsirbi, ega matuduꞌ i patangdan.

¹³Mga taw ngayan, kat mga pagꞌaaten baw pagbuwaten nira, ipagpaliꞌwan nira nga mga matuud sira nga apustul ni Cristo. Temed egay kamatuudan ya kayan. Mamagpaꞌapu-apustul lamang yan. ¹⁴Egaytu dapat nga maliluꞌan i panluku nira ngaytu, sabap magpasbung sira naga it pagbayaꞌen nira nga si Satanas. Ka si Satanas ngaytu, maski gimpuꞌun kanya it karaꞌe-raꞌetan, paglukuun yay mga taw isaꞌun ipabetang nira kanya nga esang anghil nga garing duꞌun it kaꞌyagan nga duꞌun it Ampuꞌang Diyus. ¹⁵Aypaꞌ ega maliluꞌan mi i pagꞌaaten it mga magpaꞌapu-apustul asan nga maat, mga manigsirbi sira it Ampuꞌang Diyus nga magtaban it mga taw duꞌut kataldengan, arit mga manigsirbi sira ni Satanas. Iyan talagay baraꞌan nira, rigaen it Ampuꞌang Diyus uyun duꞌun it karaꞌe-raꞌetan ngaytu nga pamagbuwaten nira.

¹⁶Saꞌupun ku siꞌ i inaat ku, ega sana pikiren mi nga engel-engel aku sabap it pabantug-bantug ku it sadili ku. Temed maski atkayan beteꞌ i tandes mi, tanggapen baw pikiren mi i pagꞌaaten ku ngaytu subung it buwat mi duꞌut mga beken ngayti nga pagpagnegan mi. ¹⁷Itu, paꞌaaten ku ngaytu nga pabantug-bantug, egaytu garing duꞌun it Ampuꞌan, in daꞌga bilang landi-landi tu it esa nga engel-engel. ¹⁸Temed eget naytu it pangadal kut imyu. Paribasay dakel i magpabantug-bantug sabap it kabetangan nira situt banwa, pabantug-bantug aku nagay aken isaꞌun pagnegan mi i pangadal ku. ¹⁹Siguru pataꞌnan mi naga i kaꞌengel-engel ku ngaytu nga landi-landi sabap, masagya kamu nga pagpataꞌnan i buwat it mga engel-engel asan, lamang ipagpaliꞌwan mi nga masesepsep kamu na nga mga taw! ²⁰Ka ungaytu, pagtanggapen mi sirat masagya maski pagꞌuripnen kamu, pagꞌubsan kamut kusas, paglukuun kamu, pagregesen nga pasakep it paꞌaaten nira nga pudir nira, baw maski pagtampalingen kamu na. ²¹Temed aku, magꞌeyaꞌ akung banar ka ega atkayan i binwat kut imyu pagpaꞌasan ku! Sayang ka nakman aku lamang, ega maꞌiseg nga subuk kanira!

Takaꞌ, in unuy ipagkapalandi-landi nira, ipagkapalandi-landi ku nagay aken. (Talagang sugi-sugid ku ngaytu, subung naytu it sugi-sugid it esang engel-engel.) ²²Ka unu sira, mga Hebreo? Hebreo aku nagay aken. Unu baꞌ, mga duguꞌ sira ni Israel? Yanagay aken nga duguꞌ. Ta unu, mga tungtung-inapuꞌ sira ni Abraham? Ta, aku, tungtung-inapuꞌ ya naga. ²³Ta mga unu sira, mga manigsirbi ni Cristo? (Sugi-sugid ku ngaytu, sugi-sugid naytu it esa nga magpulpug.) Temed subraꞌ aku nga magayen nga manigsirbi ni Cristo, subraꞌ paꞌ it kanira. Subraꞌ talagay aken nga paꞌres, ka in pira nang bisis aku mapirisu, rinipdasan it ega lamang kaꞌsa, baw talagang pirmi na nga magpangibit-kibit mana kat kamataynen. ²⁴Limang bisis aku na timnanggap it tagtulung puluꞌ may siyam nga mga ripdas kat alima it mga Judio. ²⁵Tulung bisis ku na nga liyabay i panriga nga biyalbag, baw kaꞌsa i panriga nga pagbuntalan it batu. Tulung bisis ku na gasiꞌ malabayan nga nasalsag i barkuꞌ nga pagsasakayan ku, baw kaꞌsa nagꞌapun-naglinag i lutaw-lutaw ku duꞌut tengat laud. ²⁶Kat pirmi ngaytu nga panaw-panaw ku talagang ega esa-esang kagagated i magkaparagan ku, kat mga danum, mga manigpanrangpas, kat mga kaduguꞌ ku nga Judio, baw kat mga ega Judio. Mga kagagated kat siyudad, kat rugar nga kapupuyangtan, kat dagat, baw kat pamuwat-buwat it mga maat sulsug kat pamayaꞌ, arit ega. ²⁷Talagang nalabayan ku gasiꞌ i subraꞌ nga kakuriꞌ baw kalpuꞌ, pirmi nga pagꞌelken, ereꞌeret nga paggetmanan baw kuꞌinum, baw subraꞌ nga maramig ka egay tantung masagmen. ²⁸Ta, dungag paꞌ it muꞌsa ngaytu, talagang pagregnan ku it delem-aldaw i kabetangan it mga magpamayaꞌ kat paꞌari-aring banwa. ²⁹In beteꞌ may maglubay nga pamayaꞌ, subraꞌ nga masakit kat seled ku. Baw in may nakapakursud kat kasalaꞌan, talagang magkaꞌabat i kaꞌiꞌisgan ku.

³⁰Temed in kaꞌilangan ku nga pabantug-bantug, iyan talagay ipabantug-bantug ku, mga bagay nga magpatantu nga, in aken nga sadili, egay kaya ku. ³¹Talagang, daꞌkuytu magꞌambut. Magkaꞌrutan tu it Ampuꞌang Diyus, kanya nga Ampuꞌan baw Amaꞌ it Ampuꞌan tami nga si Jesu-Cristo. Sana bantugun kanya it egay katupusan. ³²Ituy esang magpatantu it kurang i aken nga kakayaan, ka iyan kaꞌsa nga duꞌun akut Damasco, binwat it gubirnadur nga ipiyatindeg it adiꞌ nga si Aretas, piyatandaꞌan yat sundaluꞌ i puwirtaꞌan it siyudad ka ipagpadakep ya aku. ³³Temed iringgud akut mga kaꞌibaan ku duꞌun it supakan bawnga ipiyalapas duꞌun it lalawagan it balay nga pagꞌiꞌistaran ku, ka itiyuꞌnay aku duꞌun it sang balit kutaꞌ. Iyan i ikiyapalagyu ku.11:33 Mga Binwat 9:24-25.

Iyan mga subuk ipiyatagaynep baw ipiyalteg it Ampuꞌang Diyus it ki Pablo

¹Itu paꞌ i isugid ku. Maski egay kapulusan it adat ngaytu nga pabantug-bantug, subuk dapat ku paꞌ nga ituturan it imyu i pasar it mga subuk tiyagaynep lamang magsusulag, baw mga bagay nga ipiyalteg it Ampuꞌan. ²May sang puluꞌ baw epat na kayting taꞌun, may kilala ku nga esang magpamayaꞌ it ki Cristo nga tiyaban duꞌun it langit12:2 Kat pasepsep it bekeng mapipikir si Pablo na mismu i paꞌaaten ya ngaytu. Temed isiyugid yay atkaytu ka ega ireg ya nga subraꞌ nga pataꞌas-taꞌas. , iyan langit nga banar nga pagtataꞌidan it Ampuꞌang Diyus. Ega lamang tu masiguru ku in kiyarurwa ya lamang i tiyaban duꞌun u bilug ya talaga. Ampuꞌang Diyus lamang tu i magkaꞌrut. ³Kilala ku ngaytung taw, talagang tiyaban kanya duꞌun it rugar nga egay kasubraꞌ nga kagayenan. Takaꞌ, subung nat inaat ku, ega lamang tu masiguru ku in kiyarurwa ya lamang u bilug ya i tiyaban ngayti. Ampuꞌang Diyus lamang tu i magkaꞌrut. ⁴Nakagneg kanya duꞌun it mga bagay nga ega kaya nga ituturan in ampang lamang situt denaꞌ. Baw maski beteꞌ mapakay, ega ipagpalugut it Ampuꞌang Diyus nga getaꞌen it maski siyu. ⁵Taw nga nakalabay it atkaytu, talagang ipabantug-bantug ku. Temed ega ipabantug-bantug ku i sadili kung kakayaan, in daꞌga iyan mga bagay nga magpatantu it, aku, egay kaya nga sadili. ⁶Takaꞌ in bete-beteꞌ ireg ku nga pabantug-bantug, ega naga limiꞌwan nga engel-engel aku, sabap matuud nagay ipagsugid ku. Temed ega. Pagpaaren ku i sadili ku, sabap ega ireg ku nga subrang mataꞌas i pabetang it katataawan it aken. Ireg ku nga, in magayen i pabetang nirat aken, sabap lamang it magagayeng buwat ku nga naltegan nira u magayeng pangadal ku nga nagnegan nira.

⁷Temed, it isaꞌun ega magbaraꞌ aku nga taw nga mapiyalandi-landi sabap it mga kalililuꞌan ngaytung bagay nga ipiyalteg it Ampuꞌang Diyus it aken, baw isaꞌun maꞌindaꞌeg i mga singkadan ku nga kaꞌiꞌirgan nga maraꞌe-raꞌet, ipiyalugut it Ampuꞌang Diyus nga pakuriꞌan aku it esang taraꞌgen ni Satanas, nga kabilangan ya naꞌli nga dugi kat bilug ku, nga subung nat diꞌki-diꞌkit pagpasakitan ya aku. ⁸Tulung bisis ku naytu ipiyanalangin duꞌun it Ampuꞌan nga awaꞌen ya. ⁹Temed maat i tubag ya, “Maski ega awaꞌen ku, temed masiguru mu nga ildawan ku ikaw it tabang ku nga makaꞌustuꞌ nga pirmi kat muꞌsa nga pagkaꞌilanganen mu. Ka in naꞌubsan nat sadiling keseg i esang taw sabap it kakuriꞌan ya, subrang magkatanyag i tabang ku nga ipagpakseg kut kanya.” Aypaꞌ pagsagyaan ku ga i mga kalubayan ku sabap, kada may kalubayan ku pagpaksegen akung pirmi it guna ni Cristo. ¹⁰Eeꞌ baꞌ, pagsagyaan ku ga in malubay aku, tibabaꞌen, igpitan, pakuriꞌan, u ereꞌeret nga pagꞌapisen aku sabap it pagsirbi ku it ki Cristo. Ka in kaꞌnu malubay aku u ega nay kaya ku nga sadili, sakaliꞌ siꞌ nga kumulaꞌsi aku sabap it keseg baw kakayaan nga ipagꞌildaw ni Cristo it aken.

Pagpikiren nga banar ni Pablo i ipagmapaꞌgen it pamayaꞌ it mga taga Corinto

¹¹Maꞌaat na nga miyengel-engel aku na kat palandi-landi ku ngaytu, temed subuk kamu naga i nagsigir it aken nga muwat aku it atkayan. Sana kamu i magpanindeg it aken, iyan pagtibabaꞌen aku it beken asan nga magpaliꞌwan nga sira kunuꞌ i mga apustul nga banar nga ega nay kasubraꞌ. Ka ega naga maꞌaat nga tuduꞌ aku kat mga taw ngayan, maski egay sadili ku nga kakayaan nga masarigan. ¹²Talagang ipagpamatuud ku nga, iyan asan aku ngayat imyu, natantuwan mi nga, aku, apustul nga matuud sabap it mga tandaꞌanan baw mga kalililuꞌang bagay nga ipagpabwat it Ampuꞌang Diyus it aken. Ipiyasigi ku it muwat i muꞌsa ngaytu nga pagsagkaꞌen ku it magayen i nakem i mga kakuriꞌan nga magꞌabut it aken. ¹³Unuy kasalaꞌan kut imyu? Daꞌga baꞌ egay piyagbelagan it tabang kut imyu baw tabang kut mga beken nga gurupu it magpamayaꞌ? Iti na lamang, daꞌku ngayti miyangut it maski unu asat imyu. In beteꞌ ipagpabetang mi nga kasalaꞌan ku i daꞌku ngayti miyangut, ipasinsiya mi nagat aken.

¹⁴Ta kayti, in beteꞌ katabus aku, pangatlu naytu nga paꞌasan kut imyu. Baw, subung nagat tagnaꞌ, ega sasawun ku kamu it mga kaꞌilangan ku. Ka ega kusas mi i kaꞌilangan ku, in daꞌga mismu kamu talaga. Ireg ku nga papaꞌgenen kamu kat ega basta-bastang pamayaꞌ. Ka kabilangan mi, mga anak ku kat pamayaꞌ. Ta daꞌga baꞌ ega mangaꞌwaꞌ i magpaꞌres it ipagtaraꞌna it mga giyaringan, in daꞌga mga giyaringan i magpaꞌres it anak nira? ¹⁵Ka aku ngaytu, subrang ikasagya ku i gamiten ku i muꞌsang-muꞌsa ku baw ibgay kuy pati bilug ku kat ipagmapaꞌgen it pamayaꞌ mi. Ta unu yan, sang dekeyeꞌ lamang baꞌ nga pagmaꞌal mit aken i itumbas mi it kadakulaꞌ ngayan it pagmaꞌal ku it imyu?

¹⁶Temed barang pagꞌaaten it beken asan nga maski daꞌku surubuꞌun it maski siyu it imyu takaꞌ, paribasay taw aku kunuꞌ nga mapiyandaya-dayaꞌ, liyuku ku lamang kamu. ¹⁷Temed magꞌuꞌunu yan? Iyan, mga taw ngayan nga piyapaꞌasan ku it imyu, unu, pagpikiren mi nga tiyaꞌeg ku sira nga manluku it imyu? ¹⁸Inupakat ku talaga si Tito nga paꞌasat imyu baw piyaꞌibaan ku kanya it esang sulsug tami kat pamayaꞌ. Ta unu, nanluku na si Tito asan it imyu? Talagang ega, ka daꞌga baꞌ namuyaan mi nga nakman kanya nga banar? Baw daꞌga baꞌ namuyaan mi nga nagsubung kami nga duwa kat adat baw pangaꞌgenan?

¹⁹Kat mga ampang ku ngaytu, egaytu maat pagpaꞌresan ku nga pagpanindegan ku i sadili ku asat imyu. Simpri ega kamu i mga manigꞌukuman it aken. Ka maglalagpit akut ki Cristo baw duꞌut Ampuꞌang Diyus lamang i kaꞌilangan ku nga panindegan i sadili ku. Ipagpamatuud ku, mga pagmaꞌalen ku, nga muꞌsa nga pagbuwaten ku, kat ipagmapaꞌgen it pamayaꞌ mi. ²⁰Abaa, magregen aku baꞌ nga pagpaꞌasan ku siꞌ it imyu, may mamuyaan ku nga ega masagyaan ku asan. Ta, in atkayan may ega gasiꞌ yan masagyaan mi nga ipaliꞌwan ku, ka betanganan ku kamu it ukuman. Barang iyan i maꞌanuꞌan ku asat imyu, pagdaꞌe-daꞌegen mi, inggi-inggiten, pagꞌiseg-isegen, pagpadaꞌeg it sadili, pagpamuwat-buwatan i masigkataw, kalinibaken, landi-landi, baw kaguluwan nga egay pagꞌurunyun. ²¹Talagang magregen aku baꞌ nga banar nga, pagpaꞌasan ku siꞌ, abutun sit sumaꞌup i nakem ku it dakulang eyaꞌ kat adapan it Ampuꞌang Diyus sabap it imyu. Baw masmekan ku nga banar i mga ega paꞌ nangindiꞌ it mga karaꞌe-raꞌetan nga pamagbuwaten, nga subung it mga pagꞌadaten u pagpikiren nga maraꞌway, muꞌsang kalasit pamakun duꞌun it ega asawa mi, baw pagsumbayaꞌ it kaꞌiꞌirgan nga maraꞌway it egay maski unu nga pagsupil it sadili.

Ega nay pasinsiya ni Pablo in ega indiꞌan it mga taga Corinto i pangaꞌgenan nga makasalaꞌan

¹Ta in beteꞌ katabus aku, itu nay ikatlu nga paꞌasan kut imyu. Baw in may kaꞌilangan nga ukumanan ku asan, simpri iyan i sunudun, magsusurat kat ampang ngayan it Ampuꞌang Diyus nga magꞌaat,

“Iyan muꞌsa nga aꞌayusun, kaꞌilangan makapamatuud it duwa u tulu nga sistigu.”13:1 Deuteronomio 19:15.

²Iyan pangadwa ngayang pagpaꞌasan kut imyu siyardaw ku i mga nagkasalaꞌan. Baw kayti, nga daꞌku paꞌ miyabut asan, pagꞌaaten ku siꞌ sira, baw in siyu pay beken nga nagkasalaꞌan. Ipagsasar kut kanira nga in ega paꞌ nangindiꞌ sira, ega nay pasinsiya in mabut aku. ³Buwaten kuytu i atkaytu isaꞌun kapamatuud it imyu i pagtulusun mi nga, kat katengdanan ku ngaytu, si Cristo i magpaꞌampang it aken. Mamuyaan mi situt aken i keseg it guna ni Cristo, ka egay kurang it guna ya nga rimiga it mga makasalaꞌan. ⁴Iyan iriyansang si Cristo duꞌut krus, kat panleteg it katataawan, taw lamang kanya nga egay kakayaan. Temed pagꞌegen yat paꞌuliꞌ, natanyag na nga duꞌut kanya i guna it Ampuꞌang Diyus. Atkayan gasiꞌ i aken ka, kat pakilagpit kut ki Cristo, iyan asan aku ngayat imyu katꞌesa, kaꞌaat ka egay pudir ku nga mukuman it mga kasalaꞌan mi ka nagpalulus aku lamang. Temed pagꞌabut ku siꞌ asan, in kaꞌilangan ku nga mukuman it imyu, kat keseg it guna it Ampuꞌang Diyus, ega itaguꞌ ku i pudir ku nga ipiyagrumra ni Cristo it aken.

⁵Magayen, paruriyen mi i sadili mi, in kamatuudan i pamayaꞌ mi it ki Cristo. Tanudun mi kat sadili mi. Unu, ega magkatanudan mi nga tiyakenaꞌan kamu na ni Cristo Jesus, magpuyra lamang in daꞌkamu paꞌ namayaꞌ it kamatuudan? ⁶Ta simpri in masiguru mi i imyu nga pamayaꞌ masiguru mi gasiꞌ nga, aku, kamatuudan nga apustul ni Cristo. ⁷Ipagpanalangin ku duꞌun it Ampuꞌang Diyus nga sana iꞌlaman mi na i muwat it karaꞌe-raꞌetan. Ega na maat pagꞌiꞌinawaren ku nga ipasigi mi paꞌ i buwat it karaꞌe-raꞌetan mi isaꞌun begayan akut rugar nga ipakilala kat pangukuman kut imyu i pudir ku kat pagkaꞌapustul. Maski ega kilalaen i pudir ku ngayan, basta mataldeng na i pangaꞌgenan mi. ⁸Sabap ega talaga mapakay nga sagyaan ku nga muwat i maski siyu it ega uyun it kamatuudan. Iyan lamang i sagyaan ku, pagbuwaten nga kagayenan kat panleteg it Ampuꞌang Diyus. ⁹Masagya aku talaga in ega kaꞌilangan ku nga ipakilala i pudir ku nga mangukuman it imyu ka magpanggayen nay adat mi. Baw ipagpanalangin ku nga sana subraꞌ nang manggayen seked it maꞌayus i muꞌsa kat panleteg it Ampuꞌang Diyus. ¹⁰Aypaꞌ ka ipagsurat kuytuy itu nga mga bagay, mintras daꞌku paꞌ asat imyu, isaꞌun, pagꞌabut ku, ega na kaꞌilangan paꞌ nga mampang it mabeꞌgat nga gamiten ku i pudir nga ibinggay it aken it Ampuꞌan, pudir nga kat ikapapaꞌgen it imyu, ega maat kat ikaranggaꞌ mi.

Pangiyaꞌpusan nga sugi-sugid

¹¹Ta, barang seked na lamang sikaytu i sugi-sugid nga makasurat ku. Mga sulsug ku kat pamayaꞌ, pasagyaen mi i nakem mi. Sana ayusun mi na i pagsunud mi it Ampuꞌang Diyus. Tanggapen mit magayen i ipagꞌaat ku. Magꞌurunyun kamu baw mangaꞌgenan kat ikaꞌimbeng it pakiꞌiba-iba mi. In paꞌresan mi i mga itu ngaytu, mamuyaan mi nga asat imyu nga pirmi i Ampuꞌang Diyus, kanya nga puꞌun it kararas baw pagmaꞌal baw kaꞌimbengan it nakem.

¹²Magsigkumu-kumustaen kamu, bilang sang sulsugan nga namayaꞌ na it ki Cristo. Pagkumustaen kamu it muꞌsang mga sulsug mi kat pamayaꞌ sini.

¹³Ipagpanalangin namen nga sana asat imyu nga muꞌsa i ildaw it Ampuꞌan tami nga si Jesu-Cristo, iyan kararas it Ampuꞌang Diyus, baw magayeng pakiꞌiba-iba it esa may esa nga begay it Espiritu Santo.