1 Timoteo

Uꞌnang Surat ni Pablo duꞌun it ki Timoteo

1 Timoteo

Pauꞌnang Sugi-sugid

Si Timoteo, esang taw nga taga Lystra nga magpamayaꞌ it ki Jesu-Cristo. Inaꞌ ya, Judio. Amaꞌ ya, daꞌga Judio. Iyan duꞌun na Pablo, duwa ni Silas, it Lystra siyagyaan ni Pablo si Timoteo ngaytu. Aypaꞌ, pagpanaw nira siꞌ it magpangadal ngayti it Magayeng Baritaꞌ, piyabayaꞌ ya na (Mga Binwat 16:1-3). Nagbaraꞌ si Timoteo nga iba na ni Pablo nga katabang ya na kat buwaten it Ampuꞌan. Bawnga itiyuduꞌ kanya ni Pablo duꞌun it Efeso ka mamaalaꞌ nat mga magpamayaꞌ duꞌun (kapitulu 1:3).

Kat uꞌna ngaytung surat ni Pablo duꞌun it ki Timoteo, magsasar kanya sabap it mga magpangadal it kamaliꞌ. May munaꞌaw gasiꞌ pasar it pagsamba duꞌun it rugar ngayting Efeso nga ipiyabaalaꞌ yat ki Timoteo. Baw ipagpangadal ni Pablo kat surat ya ngaytu i dapat adaten it esang taw nga mapakay nga mamaalaꞌ it mga magpamayaꞌ. Pagtulduꞌan ya gasiꞌ si Timoteo it in magꞌuꞌunu kanya mamaalaꞌ baw mangadal it pagririkinen nga gurupu it mga magpamayaꞌ duꞌun. Ipagpademdem yay mga dapat adaten ni Timoteo, nga magayeng adat it taawan na it Ampuꞌan. Taꞌun nga pagsurat ya kaytu, mga 63 A.D.

¹Dunguꞌ Timoteo, wayan i surat ku, aku nga si Pablo nga esang apustul ni Cristo Jesus. Pagkaꞌapustul ku ngaytu, ipiyagꞌurdin it Diyus Amaꞌ nga pagpanggaringan it karibriyan ta, baw si Cristo Jesus nga pagsarigan ta na, kanya nga keseg it paniguru ta it karibriyan kat pagdadarapaꞌen. ²Talagang pabetang kut imu, Timoteo, subung nat ipiyagrasyaꞌ ku, ega maat kat pagduguꞌ temed kat pamayaꞌ. Ipagpanalangin ku nga sana asat imu nga pirmi i ildaw, sanguꞌ nga tabang, baw kaꞌimbengan it nakem nga ipagbegay it Diyus Amaꞌ baw Ampuꞌan ta nga si Cristo Jesus.

Ipagsasar ni Pablo nga sardaw-sardawun i mga magpangadal it ega uyun it inaat it Ampuꞌan

³Ireg ku sana nga, subung nat ipiyagꞌaat ku ngayan it imu paggaring ku ngayat nagpaMacedonia, nga asan ka daꞌan it Efeso. Siguru makakaꞌlay ka asan sabap may mga taw na asan nga magpangadal it egay kamatuudan. Kaꞌilangan nga paaren mu sira. ⁴Baw pagtudang-tudangen mu sira nga ega pirming pagpasasawan nira i mga katuturanan nira ngayang egay kamatuudan baw mga magkasagaan nirang ribu-ribu nga paglilistaꞌan it mga kiyaꞌapuꞌ-apuꞌan baw mga tungtung-inapuꞌ nira. Desa yan nga magkapisiꞌan nirat daꞌe-daꞌegen, ega maat magkapisiꞌan it ipagkatabang it kanira kat pagsirbi nirat Ampuꞌan. Talagang pamayaꞌ baw pagsarig lamang it Ampuꞌan i magkapisiꞌan it ipagkatabang kaytu. ⁵Sana yay liꞌwan it pangadal mu it mga taw asan, magsigraras sira it esa may esa. Mabwat ta lamang tu basta naꞌawaꞌ nay kasalaꞌan baw iyan nay pagbuwaten, iyan nga naꞌrutan ta nga magayen kat panleteg it Ampuꞌang Diyus. Baw gasiꞌ nga pamayaꞌ ta, ega na desang kat munung. ⁶Temed iyan beken, nangalaid na sira it mga itu ngaytu. Iyan i igiyanti nira, tuturan-manuturan nga egay kakapulusan. ⁷Ireg nira sana, manigpangadal sirat mga ipiyagꞌurdin it Ampuꞌang Diyus. Temed ta, it ega nasepsepan niray ampang ya ngaytu. Ega natantuwan niray ireg sugiden it ipagpangadal nira ngayan, maski maat ipagpamatuud nirat may pagmaꞌiseg it nakem.

⁸Simpri, urut tang muꞌsa nga magayen i mga ipiyagꞌurdin ngaytut Ampuꞌang Diyus. Temed kaꞌilangan, pagsunud ta, magkasunsun i ireg aaten it mga urdin ngaytu. ⁹Dedemdemen ta nga ibinggay it Ampuꞌang Diyus i mga urdin ya, ega sabap it mga mamagbuwat it magayen, in daꞌga sabap it mga mamagbuwat it karaꞌe-raꞌetan. Atkaytu nga mga taw, ega magkilala it urdin, mga masusutil, mga egay pagkilala it Ampuꞌang Diyus baw alaid kat nakem nira i kaꞌirgan ya, baw mga magtibabaꞌ it mga bagay nga ega basta-basta kat panleteg ya. Kaꞌilangan gasiꞌ i mga urdin sabap it mga magꞌimatay it giyaringan baw masigkataw nira, ¹⁰mga mapiyamakun kat ega asawa nira, mga mamagbuwat it maraꞌway kat subung nga lalaki baw subung nga babay, mga mamagdakep it taw ka uripnen, mga maꞌaꞌambut pati mga magpanistigu it kaꞌambutan, baw in unu pay beken nga kuntraꞌ kat tamaꞌ nga pangadal. ¹¹Pangadal ngaytu nga paꞌaaten, kumpur uyun kat mabantug nga Magayeng Baritaꞌ nga ipagpangadal ku, nga ipiyakarguꞌ it aken it Ampuꞌang Diyus, kanya nga kaꞌustuꞌan nga banar i kasagyaan ya.

Kadakulat ildaw it Ampuꞌan it ki Pablo

¹²Magpasalamat akung banar duꞌun it Ampuꞌan ta nga si Cristo Jesus nga nagbegay it aken it keseg kat buwaten ngaytung ituꞌun. Masagya akung banar ka pabetang yat aken, magkasarigan, baw piniliꞌ ya aku nga manigsirbi ya. ¹³Iyan tagnaꞌ, talagang ega basta-bastay panibabaꞌ kut kanya, pagregda-regdaen ku i mga magpamayaꞌ it kanya, baw pagpakuriꞌan ku sira it egay sanguꞌ. Temed lamang atkayti na i binwat ku, inildawan aku ga lamang it Ampuꞌan, ka itiꞌen ngayting mga binwat ku, nabwat ku sabap it egay pamayaꞌ kut kanya. Ega natantuwan ku nga palan kuntraꞌ it kaꞌirgan it Ampuꞌang Diyus. ¹⁴Yay matuud, talagang subray basta i ildaw it aken it Ampuꞌan tami. Inildawan ya akut sumarig baw mamayaꞌ it kanya baw may raras ku na it mga magpamayaꞌ it kanya. Pamayaꞌ baw kararas ngaytu, ildaw yat aken sabap it pakilagpit ku nat kanya nga si Cristo Jesus.

¹⁵Matuud talagay paꞌaaten nga dapat pamayaꞌnen it puꞌsa, nga si Cristo Jesus, naꞌasitu kanya nga matuud it sinirungat langit isaꞌun iribri ya i mga makasalaꞌan, nga talagang aku naytuy gimpuꞌun. ¹⁶Eeꞌ baꞌ, inildawan ya aku ngaytu isaꞌun, kat sanguꞌ ya ngaytut aken nga gimpuꞌun it makasalaꞌan, matantuwan i kadakulat kapalulusan ni Jesu-Cristo ngaytu. Ka binwat ya aku nga esang alimbawa, isaꞌun matantuwan it katataawan nga pati sira, mapakay nga mamayaꞌ it kanya, baw makanira gasiꞌ i kaꞌgenan nga egay kaskedan. ¹⁷Aypaꞌ bantugun baw galangen it egay katupusan i Adiꞌ tami nga egay pinꞌunan, egay kaskedan, kanya nga egay kamataynen, nga ega magkaltegan it mata ta. Kanya lamang i Ampuꞌang Diyus, ega nay beken. Kamatuudan tu.

¹⁸Timoteo, nga bilang anak ku, pagsekaten ku ikaw nga uyun duꞌun it mga inampang it mga taw katꞌesa pasar it imu nga ipiyanakem it Ampuꞌan it kanira. Pagdedemdemen mung pirmi i mga inampang ngayti, ka basta pagsunudun mu, yay magpakseg it imu kat ega basta-bastang pakilaban mu it karaꞌe-raꞌetan. ¹⁹Kaꞌilangan temeꞌteꞌ i pamayaꞌ mu it kamatuudan baw teꞌteꞌan mu gasiꞌ i iyan nga naꞌrutan mu nga uyun it kaꞌirgan it Ampuꞌang Diyus. Ega subuk beken ngayti, nga nangindiꞌ na sirat mga itu ngaytu, aypaꞌ ka naranggaꞌ nay pamayaꞌ nira. ²⁰Paꞌaaten ku ngayti, subuk kana Himeneo duwa ni Alejandro nga riniga ku. Panriga kut kanira, subuk ipiyagꞌuliꞌ ku sira kat pamegbeg ni Satanas, isaꞌun sana, kat malabayan nira, matulduꞌan lamang baꞌ sira nga ega naga panindegan niray mga kamaliꞌ ngayting panulduꞌ nga bilang pagtibabaꞌen i Ampuꞌang Diyus.

Mga munaꞌaw ni Pablo pasar it pagsamba in tingped nay mga magpamayaꞌ

¹Uꞌna-uꞌnang bagay nga ipagtulduꞌ ku ngaytut imu it maseked-seked, kaꞌilangan nga mga magpamayaꞌ, pirmi nga ipagpanalangin nira i masigkataw nira, nga pagpasalamatan nira baw pagꞌangutan it in unu-unu nga tabang it Ampuꞌang Diyus i kaꞌilangan nira. ²Ipanalangin duꞌun it Ampuꞌang Diyus i mga magsasakep it banwa nga punuꞌan baw beken paꞌ nga matataꞌas i katengdanan, isaꞌun makapangaꞌgenan tami it maꞌimbeng, nga masunud tami nga banar i kaꞌirgan it Ampuꞌang Diyus, baw numakman duꞌun it masigkataw ta. ³Magayen i atkaytung panalangin baw pagsagyaan it Ampuꞌang Diyus nga pagpanggaringan it karibriyan tami. ⁴Ka iyan talagay ireg ya, maribri i muꞌsang taw baw matantuwan niray kamatuudan pasar it kanya baw dalan it karibriyan ngaytu. ⁵Sabap esa-esay Ampuꞌang Diyus, ega nay beken. Baw esa-esa gasiꞌ i ipiyasiguru nga magpanindeg it taw duꞌun it Ampuꞌang Diyus, si Cristo Jesus lamang nga nagbalyung taw. ⁶Kanya ngaytu, ipiyagtas yay ginawa ya, nga sikayan tiyanggung yay kasalaꞌan it muꞌsang taw.2:6 Egaytu ireg sugiden maribri i muꞌsang taw, ka talagang ega maribri sira in ega sumarig baw mamayaꞌ it kamataynen ngaytu ni Jesus (Mga Binwat 16:31). Temed maski siyu nga sumarig baw mamayaꞌ nga matuud, siguradu nga maribri sira. Iti, binwat ya ngayting panribri, i magpamatuud kat ipiyabetang-betang nga timpu, nga talagang ireg it Ampuꞌang Diyus nga maribri i katataawan. ⁷Ta, kat pagpangadal it ituꞌun ngaytu, piyaꞌapustul ya aku. Tiyaꞌeg ya aku nga manigpaꞌrut it karibriyan ngaytu duꞌun it mga taw nga ega Judio, ka ipanulduꞌ kut kanira i kamatuudan ya, isaꞌun pamayaꞌnen nira. Matuud tuy pagꞌaaten ku ngaytu. Egaytu maat ambut ku.

⁸Ireg ku sana, mga lalaki duꞌun it kada rugar nga pagtiꞌmesan it mga magpamayaꞌ, magpanalangin sira nga pirmi. Temed kaꞌilangan nga uyun kat kaꞌirgan it Ampuꞌang Diyus i pangaꞌgenan nira, nga egay pagꞌiseg-isegen u daꞌe-daꞌegen.

⁹Baw iyan mga babay gasiꞌ, sana magꞌugaliꞌ sirat magayen, magkaꞌrut magꞌayus it pamakay, magꞌayus it buꞌu-buꞌuk, temed ega padaklen i mga marerga nga rurug it bilug nga subuk bulawan, marerga nga baliꞌeg, baw marerga nga pakayan isaꞌun lamang kapaleteg-leteg baw tuꞌgudun it beken. ¹⁰In daꞌga, iyan i magayen nga ipagtuꞌgud it kanira, iyan mga magagayeng buwat nga bagay kat mga babay nga magpamayaꞌ it Ampuꞌang Diyus.

¹¹Kaꞌilangan gasiꞌ it mga babay, ega makuꞌampang in duꞌun it katiꞌmesan. In daꞌga magpapagneg it magayen it may kapalulusan. ¹²Ega magkapakay aku it pasubraꞌan it babay i pudir it lalaki. Basta may mga lalaki, yanay manulduꞌ, ega babay. ¹³Dedemdemen mi nga iyan i uꞌna nga giyuna, si Adan. Sunud manang giyuna, si Eva. ¹⁴Baw ega si Adan i naꞌakalan ni Satanas, in daꞌga si Eva ngayti. Kanyay uꞌnang nagkasalaꞌan ka nagpasaꞌli it inaat it Ampuꞌang Diyus. ¹⁵Temed maski atkaytu na, nga pagsusumpaan2:15 Genesis 3:16. nay mga babay it Ampuꞌang Diyus, maribri naga sira nga egay kaꞌunuꞌan in manganak, basta teꞌteꞌan niray pamayaꞌ, rarasan niray masigkataw nira baw paꞌalaidan nay muꞌsang kasalaꞌan, ka mangaꞌgenan it pagsupilen i sadili.

Mga munaꞌaw pasar it mga magpamaalaꞌ it mga magpamayaꞌ baw mga katabang nira

¹Matuud tuy itung sugi-sugid, nga in siyuy magꞌireg mamaalaꞌ it mga magpamayaꞌ, talagang magayen baw mataꞌas nga katengdanan i pagꞌabaten ya. ²Temed magpamaalaꞌ ngaytu, kaꞌilangan egay maꞌiway kat mga adat ya, ega magpaꞌugad-ugad it asawa ya, pasasangba-sangbat. Baw magkaꞌrut sumupil it sadili ya, baw pagbebegbegan yat magayen i sadiling kaꞌirgan. Kaꞌilangan gasiꞌ nga purus magayen i adat nga mapakay galangen it beken, pagꞌistimaren yat magayen i mga taw nga magpaꞌabut kat balay ya, baw may kaya naga it magpangadal. ³Baw ega gasiꞌ makuꞌinum it kalalangu, ega maꞌiseg in daꞌga nakman, ega mapiyakibatir baw ega maꞌireg it pagpirak. ⁴Baw kaꞌilangan magkaꞌrut naga kanya padisir it magayen it pamalay-balay ya, ka pagsiguruun ya nga paggalangen kanya baw pagsunudun nga pirmi it mga anak ya. ⁵Ka in beteꞌ ega magkaꞌrut kanya padisir it maski sadili ya nga pamalay-balay, ka ega kaya ya nga supilen, magꞌuꞌunu kapamaalaꞌ it mga magpamayaꞌ it Ampuꞌang Diyus? ⁶Kaꞌilangan iyan i mamaalaꞌ, taw nga naꞌlay nang pamayaꞌ, ka in baꞌgu paꞌ, barang makapatuꞌgud ya. Ta in atkayan, ukumanan kanyat panriga subung it ki Satanas ngayting mapiyatuꞌgud. ⁷Baw kaꞌilangan gasiꞌ nga paggalangen baw pagdaya-dayawun kanya nagat maski mga taw nga ega namayaꞌ. Ka basta ega magayen i adat, sawayen kanyat beken baw maꞌindaꞌeg kanya ni Satanas.

⁸Ta yan mga katabang it mga magpamaalaꞌ ngaytu, kaꞌilangan gasiꞌ nga magayen i adat, nga paggalangen sirat beken. Kaꞌilangan nga kamatuudan i muꞌsang pagsugiden, ega uripen it kalalangu, baw ega taw nga magbuwat it maski unu nga ega magayen isaꞌun lamang kapirak. ⁹Kaꞌilangan nga teꞌteꞌan nira i kamatuudan nga ipiyaꞌrut it Ampuꞌan, baw magpangaꞌgenan sira uyun talaga it kamatuudan ngaytu. ¹⁰Aypaꞌ siguruun daꞌan i adat nira. Bawnga basta egay magkamuyaan nga adat nira nga ega ikapakay it kanira, ta mapakay yan sira nga mangatengdanan nga katabang it magpamaalaꞌ.

¹¹Baw ega lamang sira nga mga lalaki in daꞌga pati mga asawa nira, kaꞌilangan magayen i adat nga ipagkagalang it kanira it beken. Ega mapakay nga maguꞌyas sira, in daꞌga magkaꞌrut sumupil it sadili baw magkasarigan kat muꞌsang bagay.

¹²Iyan lalaki nga katabang it magpamaalaꞌ, kaꞌilangan ega magpaꞌugad-ugad it asawa ya, pasasangba-sangbat. Baw magkaꞌrut kanya padisir it mga anak ya baw pamalay-balay ya. ¹³Basta pagsarungaen yat magayen i katengdanan ya ngaytu, dayawun baw galangen kanya it mga kaꞌibaan ya nga magpamayaꞌ, baw magmaꞌiseg i nakem ya pamatuud duꞌut beken pasar it pamayaꞌ ya it ki Cristo Jesus.

^14-15Ireg ku sana kapaꞌasan akut imu it dumaliꞌ, temed barang maꞌatrasu aku. Aypaꞌ ka ipagsurat kuy mga munaꞌaw ngaytu ka ipataban asat imu, isaꞌun maꞌrutan mu in magꞌuꞌunu mabwat muy buwaten it Ampuꞌan nga pamaalaꞌ it mga magpamayaꞌ it kanya asan. Ka iyan kadakel it mga magpamayaꞌ ngaytu it Ampuꞌang Diyus, kanya nga egen it egay kaskedan, kaꞌalimbawaan nira, subuk arigi baw sulay it balay, sabap siray magpanindeg it kamatuudan nga garing duꞌut Ampuꞌang Diyus ngaytu. ¹⁶Eeꞌ baꞌ, talagang matanug it aten nga muꞌsa nga kalililuꞌan baw mabantug i kamatuudan nga kaꞌlay ngaytu subuk tagu-taguꞌ temed ipiyaꞌrut na pasar it ki Cristo.

Ka si Cristo ngaytu, nagbalyung taw kanya.

Kataldengan ya nga talagang Anak kanya it Ampuꞌang Diyus, ipiyagpamatuud tu it Espiritu Santo.

Naltegan kanya it mga anghil.

Baw pasar it kanya i ipagpangadal na kat belag-belag nga bangsa.

Dakel na sira nga namayaꞌ nat kanya situt sinirungat langit.

Baw kanya, nagpatibung siꞌ duꞌun it langit, duꞌun it kabantugan ya.

Mga munaꞌaw baw taꞌeg ni Pablo it ki Timoteo

¹Talagang maꞌyag tuy pagsugiden it Espiritu Santo nga, asan it pagdadarapaꞌen nga mga timpu, mangindiꞌ i beken it pamayaꞌ nirat kamatuudan pasar it ki Jesu-Cristo. Iyan siꞌ i sunudun nira, ipagpangadal nga panluku baw paneꞌag-teꞌag, nga egay beken nga paggaringan in daꞌga mga maraꞌe-raꞌet. ²Iyan mga magpangadal it kaꞌambutan ngaytu nga ipiyanakem it mga maraꞌe-raꞌet, maꞌaꞌambut sira. Kat munung lamang i pamayaꞌ nira. Ta it naꞌlay na nga pagpasngelan nira i padisir it Espiritu Santo baw pagtemden nira nga ega buwaten i magkaꞌrutan kat nakem nira nga magayen, aypaꞌ kayti, kagayenan na i pabetang it nakem nira it maski unu na nga karaꞌe-raꞌetan. ³Ipaliꞌwan nira nga maat ega mapakay i mangasawa, baw may mga pangaꞌen nga ega kunuꞌ mapakay nga kaꞌnen. Arit yay matuud, giyuna it Ampuꞌang Diyus i muꞌsang pangaꞌen. Aypaꞌ kita nga magpamayaꞌ it kanya baw nakatantu nang banar it kamatuudan, mapakay nga kaꞌnen tay muꞌsa ngaytu nga pagpasalamatan duꞌun it kanya. ⁴Talagang muꞌsa nga giyuna it Ampuꞌang Diyus, purus magayen. Aypaꞌ unuka may ipabetang nga maraꞌe-raꞌet nga dapat liꞌyan? Yay magayen, tanggapen baw pasalamatan i muꞌsa ngaytu. ⁵Magkaꞌrutan ta nga mapakay tami nga pagkaꞌnen i muꞌsa ngaytu ka yay inaat it Ampuꞌang Diyus baw yanayan pagpasalamatan ta duꞌut kanya.

⁶Talagang magbaraꞌ ka nga magayeng manigsirbi ni Cristo Jesus basta ipanulduꞌ mut mga sulsug ta kat pamayaꞌ i itu nga mga ipagꞌaat ku ngaytut imu. Baw mintras pagꞌadalan muy muꞌsang itiyulduꞌ it imu nga kamatuudan nga garing duꞌut Ampuꞌang Diyus, nga pagsunudun mut kaꞌlay ngaytu, simpri pagpapaꞌgenen muy sadili mu nga pamayaꞌ. ⁷Ega pasibangayan mu i mga katuturanan nga taw lamang i garing baw egay kakapulusan. In daꞌga, iyan i pagpaꞌresan mu nga pirmi, pagpaksegen i pagsunud mu it kaꞌirgan it Ampuꞌang Diyus. ⁸Sabagay may kapulusan nagat pagpakseg it bilug. Temed dakulaꞌ paꞌ talagay kapulusan it pagpakseg it pagsunud it kaꞌirgan it Ampuꞌang Diyus. Sabap liꞌwan ya, maꞌaten i isiyanggup nga ega basta-bastang kaꞌgenan mintras situ tami pat denaꞌ baw in duꞌun ta nat langit. ⁹Talagang matuud tu i itu nga pagꞌaaten. Aypaꞌ dapat nga pamayaꞌnen it puꞌsa. ¹⁰Aypaꞌ ka pagpaꞌresan baw pagꞌapasen tami i buwaten it Ampuꞌang Diyus nga egen it egay kaskedan, sabap teꞌteꞌ i kasiguruwan ta duꞌun it kanya nga begayan ya kita it karibriyan kat pagdadarapaꞌen. Ka yay kaꞌirgan it Ampuꞌang Diyus, maribri yay muꞌsang taw, baw iribri yang matuud i kumpur mamayaꞌ baw sumarig it kanya.

¹¹Kaꞌilangan nga ibenge-bengel mut ipangadal i muꞌsa ngaytu. ¹²Siguruun mu nga ega palipasen it mga taw ngayan i ampang mu sabap lamang it waꞌwaꞌ ka paꞌ. Iyan i paꞌresan mu, ikaw i maguruwan it mga magpamayaꞌ kat pangangampangan mu, mga adat baw kararas mu, baw sabap it teꞌteꞌ i pamayaꞌ mu, baw uyun kat kaꞌirgan it Ampuꞌang Diyus i muꞌsang pangaꞌgenan mu. ¹³Bawnga mintras daꞌku paꞌ miyabut, yay magayen nga pagsarungaen mu nga pirmi, pagbasaen muy mga kasuratan nga ampang it Ampuꞌang Diyus asat kadaklan baw siging ipagpangadal mu. ¹⁴Magꞌintur nga ega baliwalaꞌen mu i kakayaan nga ipiyagꞌildaw it imu it Espiritu Santo, iyan piyanalanginan ka it mga magpamaalaꞌ nga pagtatapalen i ulu mu. Ildaw ngaytu, ipiyatantu it esang piyaprupitaꞌ nga piyanakman it Espiritu Santo it iting timpu.

¹⁵Sana mga taꞌeg ngaytu i pirmi nga pagpaꞌresan mu, nga yay magdadaꞌeg kat nakem mu nga pirmi. Ta in atkayan, maꞌyag kat muꞌsa nga magdungag-magdungag i kakayaan mu it katengdanan mu ngaytu. ¹⁶Inturun mu nga banar i pangaꞌgenan baw pangadal mu. Buwaten muytu it tingled i nakem isaꞌun liꞌwan ya, ega desang ikaw i maribri, in daꞌga pati mga pagpangadalan mu, maribri sira gasiꞌ.

¹In beteꞌ may maꞌiway mu kat pagpamaalaꞌan mu asan, tulduꞌan mu kanya it may galang. In lalaki nga magurang na, ega dalaꞌan mu kanya, in daꞌga teꞌe-teꞌengen mu kanyat sumugi-sugid nga subung it magpakisugi-sugid kat amaꞌ mu. Iyan mga mangaꞌwaꞌen paꞌ, ipasbung mut mga sulsug mu. ²Ipasbung mut inaꞌ mu i mga matgas na nga mga babay. Iyan mangaꞌwaꞌen paꞌ, pakiꞌiba-ibaan it talagang egay pagꞌantapen it nakem ka subung na gasiꞌ it mga sulsug mu sira.

Mga munaꞌaw pasar it mga magpamayaꞌ nga balu

³Arigraen mut magayen i mga balu nga ega nay kaduguꞌan nga magkasarigan nira. ⁴Takaꞌ in beteꞌ balu ngaytu, may anak baw mga apuꞌ ya, kaꞌilangan siray mepet it giyaringan nira ngaytu. Kaꞌilangan iyan i uꞌna-uꞌnang pagꞌugaliꞌen it mga magpamayaꞌ, pagꞌarigraen it magayen i mga giyaringan nira ka talagang pagsagyaan tu it Ampuꞌan. Ka pagtumbasan niray pagꞌepet ngaytut kanira. ⁵Ta, yan balu nga kaꞌildaw-ildaw na ka ega nay magkasarigan ya, tingled nay pagsarig ya duꞌun it Ampuꞌang Diyus. Aypaꞌ ka delem-aldaw sigi na nga panalangin ya baw pangabang yat kanya. ⁶Temed iyan balu nga alaid na duꞌut Ampuꞌang Diyus i pangaꞌgenan ya ka sadili nang kaꞌirgan i pagsumbayaꞌen ya nga pirmi, kabilangan ya subuk patay maski egen pay bilug, ka egay kanyang uyu-uyut it kaꞌgenan nga egay kaskedan. ⁷Aypaꞌ usayen mut magayen duꞌut mga magpamayaꞌ i itung mga ipiyagꞌurdin isaꞌun daꞌsira masudi-sudi it beken. ⁸Ka iyan taw nga maat magpamayaꞌ it Ampuꞌang Diyus temed ega magkaꞌrut mepet it mga kaduguꞌan ya, subraꞌ nay mga anak baw giyaringan ya, maꞌyag nga pagdaꞌgaen ya na i matuud nga pagsunud it kaꞌirgan it Ampuꞌang Diyus. Ipabetang kanya nga adat ya, maraꞌe-raꞌet pat mga taw nga ega namayaꞌ.

⁹Bawnga pasar it listaꞌ it mga babay nga balu nga may katengdanan kat gurupu ya nga magpamayaꞌ, iyan lamang i ipaꞌuyut mu, mga magugurang na nga magꞌeꞌenem nang puluꞌ i idad, nga ega nagpablag it asawa. ¹⁰Kaꞌilangan gasiꞌ nga matanug i mga adat yang magagayen, nga piyadisiran yat magayen i mga anak ya baw pagꞌistimaren yat magayen i mga taw nga magpaꞌabut duꞌut kanya. Egay pagdaꞌgaen ya nga pagsirbi it mga kaꞌibaan ya nga magpamayaꞌ. Pagtabangen yay mga magkakuriꞌan. Baw kaꞌlay ngaytu, yanay pagragaen ya, muꞌsang mga buwat nga magayen.

¹¹Temed iyan mangaꞌwaꞌen paꞌ nga mga babay nga balu, ega ipaꞌuyut mu sira. Sabap mabut siguru i kumupaꞌasawa naga sira. Ega na ireg nira nga sumarunga it katengdanan nira ngaytu nga isiyanggup nirat ki Cristo. ¹²Ta daꞌga sikayan, makiꞌnaman niray riyanggaꞌ na niray sanggup nira ngaytut kanya. ¹³Baw beken, basta mga mangaꞌwaꞌen i ipaꞌuyut mu, barang gumarus sira. Yanay maꞌrutan, tungbalay duꞌut kabebekenan. Ta wayan baꞌ magꞌadat na sirat maraꞌe-raꞌet nga pagpasilabtan i ega kanira baw maguꞌyas paꞌ. ¹⁴Aypaꞌ in kat aken lamang, iyan mangaꞌwaꞌen paꞌ ngaytu, in may kupangasawa it kanira, magayen paꞌasawa naga, manganak, baw masikasu it pamalay-balay. Simpri in atkayan, egay masudi-sudi it mga ega namayaꞌ. ¹⁵Magkaꞌampang kuytu i atkaytu ka in pira na nga mga balu nga nangindiꞌ na it pamayaꞌ. Ta egay beken, sakep siꞌ sira ni Satanas.

¹⁶Kaꞌilangan epten it mga magpamayaꞌ nga mga babay in may kaduguꞌan nira nga balu, isaꞌun ega mabwat sira nga kasasawan it mga magpamayaꞌ nga kagurupu ya. Daꞌga in atkayan, matabangan it magayen it mga magpamayaꞌ i iyan balu nga egay magkasarigan ka paeꞌesa-esa mana.

Beken nga mga munaꞌaw pasar it mga manigpamaalaꞌ

¹⁷Iyan mga magpamaalaꞌ it mga magpamayaꞌ nga magayen i pamaalaꞌ nira ngaytu, talagang bagay it kanira, galangen it may dakulaꞌ paꞌ nga tangdan, subraꞌ nay mga manigpangadal it ampang it Ampuꞌang Diyus. ¹⁸Sabap maat ngayan i inaat duꞌut kasuratan,

“Ega bangkurungan muy baꞌbaꞌ it bakaꞌ nga pagpagiꞌken mu mintras pagtaꞌad-taꞌadan yay ipagpagiꞌek ngaytu.”5:18 Deuteronomio 25:4.

Inaat gasiꞌ ngayan nga,

“Iyan manigbuwat, may pudir ya nga tumanggap it tangdan ya.”5:18 Lucas 10:7.

¹⁹Ega basta-basta pamayaꞌnen muy ipagpitnaꞌ it beken it esang magpamaalaꞌ, in daꞌga may duwa u tulu nga sistigu nga magpamatuud. ²⁰Bawnga in beteꞌ matuud nga nagkasalaꞌan i magpamaalaꞌ ngayti, kaꞌilangan basulun mu kat adapan it kadakel, isaꞌun miꞌlam nay beken, daꞌna guruun nira.

²¹Kayti Timoteo, kat panleteg it Ampuꞌang Diyus baw si Cristo Jesus baw mga ega basta-bastang anghil nga taraꞌgen ya, ipagsekat ku nga sarungaen mu nga buwaten i mga ipagꞌaat ku ngaytu, nga egay pagbidaꞌen mu nga taw.

²²Magꞌintur ka nga ega basta-basta tapalen muy ulu baw panalanginan i maski siyu nga maat ipaꞌdung mu nga mangatengdanan. In daꞌga pikiren mut magayen in unu bagay it kanya i katengdanan ngaytu. Magꞌintur ka nga pirmi nga daꞌka maduraꞌitan it kasalaꞌan it beken. Siguruun mu nga maneꞌteꞌ ka nga alaid na kat muꞌsang kasalaꞌan. ²³Baw ta, itu gasiꞌ i kuꞌaaten kut imu. Ega naga pagbulunun mu na nga danum i pagꞌimnun mu. Magꞌimun ka nagat sang deke-dekeyeng irimnun nga letes it ubas, ka yay magdeꞌal-deꞌal it pagsintiꞌen mu ngayang pirmi. Ka subuk makusarut kay imu.

²⁴Ta, pasar sit pagpaꞌdung mu it mga mangatengdanan, magꞌintur ka. Sabap yay matuud, may mga taw nga maski ega paꞌ nakaꞌbut it ukuman, temed matanyag nay kasalaꞌan nira. Iyan beken, matanyag mana in usyat-usyaten mut magayen. ²⁵Atkayan naga i magayen nga buwat. May matanyag, may ega. Temed maski ega ngaytu matanyag, mamuyaan nagaytu basta usyat-usyaten mut magayen.

Mga munaꞌaw pasar it mga uripen

¹Iyan talagay magayen it in siyu nga uripen nga magpamayaꞌ nat Ampuꞌang Diyus, paggalangen yat magayen i agalen ya. Ka in daꞌga, simpri ega desang uripen ngaytu i masudi-sudi it beken, in daꞌga pati Ampuꞌang Diyus nga piyamayaꞌ ya. Atkayan i ipagpangadal ta ngaytu, barang masudi-sudi naga. ²Baw iyan mga uripen nga kasubung ya nang magpamayaꞌ it Ampuꞌang Diyus i agalen ya, ega naga pikiren ya nga maski ega galangen yay agalen ya ngayti, tutal nasulsug ya na kat pamayaꞌ. In daꞌga gayen-gayenen ya nang pagsirbi, sabap pagsirbiyan ya ngaytu, subung ya na nga magpamayaꞌ aypaꞌ may raras ya nat kanya. Itulduꞌ muy itu ngaytu baw iꞌaat mut kanira nga kaꞌilangan nga sunudun.

Paꞌyag pasar it manggad nga matuud baw iyan ipagkagated nga pagmanggad

³In siyung taw i magpangadal it kamaliꞌ, nga ega magpakiꞌuyun kanya it kamatuudan nga ipiyangadal it Ampuꞌan tami nga si Jesu-Cristo, baw ega gasiꞌ magpakiꞌuyun kanya it ipagpangadal tami nga pagsunud it kaꞌirgan it Ampuꞌan ngaytu, ⁴ta atkayan nga taw, kurang yan talagay pasepsep ya. Patuꞌgud ya lamang yan. Yay tumaban it kanya kat pikir nga ega na tarunus, ka egay beken nga pagsarungaen, iꞌindaꞌeg pasar it dakel-dakel nga ampang, in unuy pagpapuntuꞌan. Egay beken nga liꞌwan kayan, kaꞌinggit, pakidaꞌeg, panibabaꞌ baw mga pagtande-tandesen. ⁵Mga taw ngaytu, pirmi na nga magpakidaꞌeg ka karaꞌe-raꞌetan nay nakapnuꞌ it pikir nira. Talagang naꞌlam nat kanira i kamatuudan. Pananu-tanud nira, pagsunud nirat Ampuꞌang Diyus, panulus nga ipagmanggad.

⁶Temed yay kamanggadan nga ega basta-basta, in pagsunudun tat magayen i kaꞌirgan it Ampuꞌang Diyus baw magkasagyaan tami i kabetangan ta. ⁷Sabap dedemdemen ta nga pagtaw tami situt banwa, egay maski unu nga taban ta. Atkayan naga yan in limꞌid ta na situ, ega gasiꞌ i taban ta nga maski unu nga betang. ⁸Aypaꞌ basta may magkakaꞌen baw pagpakay, magayen na. ⁹Ka iyan mga taw nga, iyan i dakulaꞌ kat nakem nira, kupagmanggad, simpri makapakursud kat kasalaꞌan baw masigapul it karaꞌe-raꞌetan. Dumakel nay mga ireg nirang sumbayaꞌen nga ipagkagated baw egay kapulusan, nga yanay tumaban it kanira duꞌun it dakulaꞌ ngayting kakuriꞌan nga egay kaskedang panriga. ¹⁰Ka basta yay kanget it nakem, kupadakulat pirak, subung yan it gamut nga pagpanggaringan it muꞌsang kalasit karaꞌe-raꞌetan. Kamatuudan, may mga taw nga kupadakulat pirak nga nangindiꞌ na sirat pamayaꞌ nirat Ampuꞌang Diyus. Ta biyaraꞌan kayan, dakel nay timindek it kanira nga magkasmekan.

Mga ipagsekat ni Pablo it ki Timoteo

¹¹Temed ikaw, Timoteo, manigsirbi ka nat Ampuꞌang Diyus. Aypaꞌ paꞌalaidan mu naytuy itung mga bagay nga maraꞌe-raꞌet. Iyan i paꞌresan mu, mangaꞌgenan ka kat kataldengan, nga uyun it kaꞌirgan it Ampuꞌang Diyus. Inturun mu nga temeꞌteꞌ i pamayaꞌ baw pagmaꞌal mu it Ampuꞌang Diyus ngaytu baw raras mu it mga sulsug mu kat pamayaꞌ. Iyan gasiꞌ i paꞌresan mu, masagkaꞌ ka nat kakuriꞌan it magayen i nakem baw nakman ka. ¹²Patibayaꞌ ka it taw nga magkuntis, nga in sang unuy paꞌres ya isaꞌun lamang mandaꞌeg kanya, atkayan nagay imu kat pamayaꞌ mu it Ampuꞌang Diyus. Patikesegan muy kaꞌgenan nga egay kaskedan isaꞌun maꞌimu talaga, ka yay pabetang-betang it Ampuꞌang Diyus nga ibgay yat imu. Ka daꞌga baꞌ paniguru mu it kagayenan ngaytu i piyanindegan mu it tagnaꞌ kat adapan it kadakel? ¹³Timoteo, pagsekaten ku siꞌ ikaw kat panleteg it Ampuꞌang Diyus nga magbegay it kaꞌgenan it maski unu nga egen, baw si Cristo Jesus nga nagpamatuud it magayen pasar it kamatuudan duꞌun it adapan ni Poncio Pilato. Ituy ipagsekat kut imu. ¹⁴Sunudun mut magayen i muꞌsang mga ipiyagꞌurdin it imu. Gayen-gayenen mu isaꞌun egay maski unu nga maꞌiway. Baw ipasigi mu seked it ipaꞌuliꞌ situ it Ampuꞌan tami nga si Jesu-Cristo. ¹⁵Ka talagang papaꞌuliꞌen kanya it Ampuꞌang Diyus basta miyabut nay ipiyabetang-betang ya nga timpu. Ka Ampuꞌang Diyus ngaytu, kaꞌustuꞌan nga banar i kasagyaan ya. Kanya lamang i magbebegbeg it muꞌsa, ega nay beken. Kanya i Adiꞌ it muꞌsang mga magꞌadiꞌ baw Ampuꞌan it muꞌsang mga agalen. ¹⁶Baw Ampuꞌang Diyus lamang i egay pinꞌunan, egay kamataynen. Talagang kasisilaw nga banar i pagtataꞌidan ya, nga ega mapatpadan it taw. Baw egay taw nga nakalteg it kanya. Yay matuud, ega magkaltegan kanya it maski siyung taw. Dapat galangen kanya seked it kaꞌnu-kaꞌnu baw kilalaen i keseg it egay kaskedan nga guna ya. Kamatuudan tu!

¹⁷Iyan mga magpamayaꞌ nga manggaden, aaten mu nga daꞌsira pataꞌas-taꞌas. Ayaw sirat sarig it kamanggadan ngayan ka ega yan magpaneꞌteꞌ. Iyan talagay magayen nga sarigan nira, Ampuꞌang Diyus nga ipagbastanti yat mildaw i muꞌsang mga bagay nga pagkaꞌilanganen ta, isaꞌun makasagya tami. ¹⁸Sekaten mu sira nga pasigi nga muwat it mga magagayen nga buwaten, ka kadakel it mga magagayeng pagbuwaten nira ngaytu, iyan i matuud nga manggad, ega yan kadakulat pirak nga magkarinut. Aypaꞌ yay magayen, ega magꞌimet in daꞌga magmaꞌatag sira baw mapiyanabang sirat masigkataw nira. ¹⁹Sabap kat atkaytung buwat nira, subuk pagpadakulaꞌen niray ega magkaranggaꞌ nga tumbas it kanira nga magꞌaꞌareg duꞌut langit. Baw makanira i kaꞌgenan nga dakulaꞌ talagay kapulusan.

²⁰Kayti, ipagbenge-bengel kut imu, Timoteo, nga iyan kamatuudan nga garing duꞌun it Ampuꞌang Diyus, nga ipiyakarguꞌ yat imu nga ipangadal mu, panindegan mut magayen isaꞌun ega magantiyan it maski siyu it belag nga pangadal. Paꞌalaidan mu i mga egay kakapulusan nga pagrundingen baw pagdaꞌe-daꞌegan nga taw lamang i garing, nga ipagpabetang nira nga mga sugi-sugid nat makakaꞌrut arit egay kamatuudan. ²¹May mga taw nga magꞌaat, nakanira nay kiyaꞌrutan ngaytu arit kamaliꞌ na talagay pagragaen nira. Yay matuud, nakapaꞌalaid na sirat kamatuudan.

Ipagpanalangin ku nga sana asat imu nga pirmi i ildaw it Ampuꞌang Diyus.