1 Tesalonica

Uꞌnang Surat ni Pablo duꞌun it Mga Magpamayaꞌ nga Taga Tesalonica

1 Tesalonica

Pauꞌnang Sugi-sugid

Iyan Tesalonica ngaytu, puꞌun nga siyudad it prubinsiya it Macedonia nga sakep it Roma. Sikayti nagpatindeg si Pablo it esang gurupu it mga magpamayaꞌ it ki Jesu-Cristo, iyan garing kanya duꞌun it Filipos (Mga Binwat 17:1-4). Kadakel it mga namayaꞌ duꞌun, mga taw nga ega Judio. Ega naꞌlay pagbatiren na kanya it beken nga mga Judio duꞌun ka magꞌinggit sira it liyapusan it pangadal ni Pablo duꞌun it mga taw ngayti nga ega Judio. Ta sabap it iti ngayti, naregesan si Pablo nga magliꞌid duꞌun, nanlangbus kanya duꞌun it Berea (Mga Binwat 17:5-12). Bawnga, sabap it magkagulu-gulu gasiꞌ i duꞌut Berea ngayti, ipiyagtuduꞌ ni Pablo duꞌun i mga katabang ya nga si Silas baw si Timoteo, baw nanlangbus kanya duꞌun it Atenas (Mga Binwat 17:13-15). Iyan duꞌun na kanya it Atenas, itinggun ya nga tumundug nagat kanya si Silas baw si Timoteo. Bawnga, paribasay magkademdeman ya nga banar i kabetangan it mga baꞌgung namayaꞌ duꞌun it Tesalonica, piyapanaw ya na Timoteo it paꞌaduꞌun (kapitulu 3:1-2).

Pagkapangadal ni Pablo duꞌun it Atenas ngayti, nanlangbus na kanya duꞌun it Corinto (Mga Binwat 18:1). Iyan duꞌun na kanya, miyabut na gasiꞌ na Timoteo, duwa ni Silas, nga garing ngayti duꞌut Tesalonica (Mga Binwat 18:5). Magayen naga i baritaꞌ nga taban nira pasar it pamayaꞌ it mga taga Tesalonica ngayti, maski maat pagpakuriꞌan sira sabap it pamayaꞌ nira ngayti. Temed itiyuturan nira gasiꞌ nga magꞌingkut i beken pasar it mga sulsug nira kat pamayaꞌ nga miyatay na, in unu makaꞌuyut naga sira it kagayenan kat pamaꞌuliꞌ ni Cristo.

Aypaꞌ ka siyuratan ni Pablo it itu nga kasuratan, nga bilang pakseg yat nakem baw pamayaꞌ nira. Isiyugid yat kanira i kadakulat kasagyaan ya sabap it pamayaꞌ nira nga nagmapaꞌgen. Isiyurat ya gasiꞌ i tubag ya it ingkut nira sabap it mga kasulsugan kat pamayaꞌ nga miyatay na, baw isiyurat ya gasiꞌ i pangadal yat kanira it beken pang bagay kat ikagayen it pamayaꞌ nira. Taꞌun nga pagsurat ya kaytu, mga 51 A.D.

¹Mga pagmaꞌalen nameng mga sulsug kat pamayaꞌ nga asan it Tesalonica nga mga taawan na it Ampuꞌang Diyus nga Amaꞌ tami, kamu nga maglalagpit nat Ampuꞌan nga si Jesu-Cristo, wayan i surat namen, aku nga si Pablo, si Silas baw si Timoteo. Ipagpanalangin namen nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus.

Pagpasalamatan na Pablo i pamayaꞌ it mga taga Tesalonica

²Talagang pirmi kami nga magpasalamat duꞌun it Ampuꞌang Diyus sabap it imyu, baw pirmi namen kamu gasiꞌ nga pagsangpiten kat panalangin namen. ³Sabap pagdedemdemen namen nga pirmi i buwat mi nga buwaꞌ it pamayaꞌ mi, mga paꞌres mi nga magbayaꞌ it raras mit esa may esa, baw pagsagkaꞌ mit kakuriꞌan it magayen i nakem. Pagsagkaꞌ mi ngaytu, tanaꞌan ya, mapaꞌgen nga paniguru mi. Ka pagsisiguruun mi nga, sabap it pagsarig baw pamayaꞌ mi it Ampuꞌan tami nga si Jesu-Cristo, maribri kamu asan it umur nat banwa, nga duꞌun kamu na it adapan it Ampuꞌang Diyus nga Amaꞌ tami.

⁴Mga sulsug namen kat pamayaꞌ, nga pagrarasan it Ampuꞌang Diyus, dakulaꞌ gasiꞌ i pasalamat namen duꞌut kanya sabap urut namen talaga nga piniliꞌ ya kamu nga mataawan ya na. ⁵Kamatuudan, iyan Magayen ngaytung Baritaꞌ pasar it ki Jesu-Cristo nga ipiyangadal namen asan it imyu, egaytu ampang-inampang na lamang, in daꞌga ipiyamatuud tu it guna it Espiritu Santo, aypaꞌ ka piyakimatuud mi. Namuyaan mi in magꞌuꞌunuy pangaꞌgenan namen asan it imyu, nga kat ikagayen mi. ⁶Ta, giyuru mi i amen ngaytu nga adat, ka magpasbung kamu na gasiꞌ it Ampuꞌan. Maski talagang piyakuriꞌan kamu, temed tiyanggap mit masagya i ampang it Ampuꞌang Diyus nga ipiyangadal namen. Eeꞌ baꞌ, tiyanggap mi it may kamatuudang kasagyaan nga begay it Espiritu Santo.

⁷Aypaꞌ sikayan, kamu na i magkaguruwan it muꞌsang mga magpamayaꞌ nga asan it prubinsiya it Macedonia baw duꞌun gasiꞌ it Acaya. ⁸Ka pasigi mi nga ipagpanuturan i ampang ngaytut Ampuꞌan, nga ega lamang desang asan it prubinsiya ngayan nga Macedonia baw Acaya, in daꞌga, duꞌun it paꞌari-aring rugar, nga matanug nay pamayaꞌ mi. Aypaꞌ maski ega na ibaritaꞌ namen duꞌut kanira i pasar it imyu, ⁹sabap sira na mismu i magsugid it in magꞌuꞌunuy pangaꞌgenan baw pangadal namen asan it imyu. Ipagsugid nira gasiꞌ in magꞌuꞌunu inindiꞌan mi na i pamagsambaen mi nga mga pagbete-beteꞌen nga diyus, sabap natantuwan mi na nga iyan talagay dapat nga sirbiyan, matuud ngaytu nga Ampuꞌang Diyus nga talagang egen. ¹⁰Maat paꞌ nira, pagꞌelaten mit maseked-seked i pamaꞌuliꞌ it Anak ya nga si Jesus, kanya ngaytu nga inggen ya it paꞌuliꞌ. Paꞌuliꞌ kanya nga matuud nga garing duꞌun it langit, baw sabap it panribri ya it aten, ega na malabayan tami i magꞌaꞌabut nga iseg it Ampuꞌang Diyus.

Buwat na Pablo duꞌun it Tesalonica baw tiyanaꞌan ya

¹Talagang maꞌyag it imyu, mga sulsug namen kat pamayaꞌ, nga ega desang karigaan i paꞌasan namen ngayan it imyu. ²Ega gasiꞌ nataguꞌ it imyu in magꞌuꞌunu kami piyakuriꞌan baw tinibabaꞌ duꞌun it Filipos.2:2 Mga Binwat 16:16-24. Temed maski atkayan na, ibinggay it amen it Ampuꞌang Diyus i pagmaꞌiseg it nakem, isaꞌun kapangadal naga asan it imyu i Magayen ngaytung Baritaꞌ, maski dakulaꞌ siꞌ nga pakikuntraꞌ it mga kaꞌibaan mi.2:2 Mga Binwat 17:5-10. ³Talagang kamatuudan i ipiyangadal namen ngayan asat imyu. Ega maat may antap it nakem namen nga maraꞌway u aꞌakal lamang. ⁴In daꞌga, yay matuud, siyukdanan baw napakay kami it Ampuꞌang Diyus nga kaꞌuyutan it mga taw nga piyakarguꞌan ya nga manigpangadal it Magayen ngaytung Baritaꞌ. Aypaꞌ ka magpangadal kami, nga ega maat taw i pagpasagyaen namen, in daꞌga Ampuꞌang Diyus, nga egay magkataguꞌ it kanya kat pikir baw nakem ta. ⁵Magkaꞌrutan tu it Ampuꞌang Diyus baw maꞌyag gasiꞌ it imyu nga, pangadal namen, egay uyut nga ampang nga magpaꞌdung it taw baw ega gasiꞌ desang piyaribaran namen it kupamirak kami. ⁶Ega gasiꞌ kanget it nakem namen i tuꞌgudun kami it taw, maski kamu u in siyu pang beken, ⁷maski na maat dakulaꞌ i pudir namen sabap kami, mga piyaꞌapustul naga ni Cristo. In daꞌga, kabilangan namen asat imyu, subung it esang inaꞌ nga madiyu-diyu baw mapiyabayaꞌ-bayaꞌ it mga anak ya.

⁸Eeꞌ baꞌ, kat kadakulaꞌ it raras namen it imyu, iyan talagay kasagyaan namen, ega desang ipangadal it imyu i Magayen ngaytung Baritaꞌ nga garing duꞌun it Ampuꞌang Diyus, in daꞌga ipirinda namen i pati ginawa namen sabap lamang it imyu. Ka talagang pagrarasan namen kamu. ⁹Siguru ega payan nalipatan mi, mga sulsug namen kat pamayaꞌ, i namuyaan mi nga delem-aldaw papaꞌres talagay buwat namen, isaꞌun mintras ipagpangadal namen it imyu i Magayen ngaytung Baritaꞌ, magkapanulus kami gasiꞌ it ipagkaꞌgen namen, isaꞌun daꞌkami mabwat nga kasasawan it maski siyu.

¹⁰Kamu i kapamatuud kaytu. Atnagay Ampuꞌang Diyus, magkaꞌrutan ya gasiꞌ in magꞌuꞌunuy pangaꞌgenan baw adat namen asan it imyu nga mamagpamayaꞌ na. Purus magayen baw mataldeng i namuyaan mi, nga egay naꞌiway mi it amen. ¹¹Ka daꞌga baꞌ, iyan i namuyaan mi nga pabetang namen it kada esat imyu, subung nat pabetang it amaꞌ it mga anak ya? ¹²Pagpaksegen namen baw pagpasagyaen i mga nakem mi, baw pagpadisiran namen kamu nga mangaꞌgenan it pangaꞌgenan nga bagay talaga it mga taawan it Ampuꞌang Diyus, kanya nga miniliꞌ it imyu isaꞌun mabagiꞌan kamu duꞌun it kaꞌadiꞌan ya it ega basta-bastang kabantugan.

¹³Itu paꞌ gasiꞌ i pirmi namen nga pagpasalamatan duꞌun it Ampuꞌang Diyus. Iyan ipiyangadal namen ngayan asan it imyu i ampang ya ngaytu, talagang tiyanggap mi baw piyakimatuud mi nga ampang talaga it Ampuꞌang Diyus, ega kat taw lamang. Ka ampang yaytu nga matuud, aypaꞌ ka dakulay paglapusan it ampang ya ngaytu kat pangaꞌgenan mi nga namayaꞌ nat kanya. ¹⁴Ka daꞌga baꞌ, mga sulsug namen kat pamayaꞌ, nakasbung kamu nat mga taga Judea nga mamagpamayaꞌ it Ampuꞌang Diyus, iyan mga nagpakilagpit nga matuud it ki Cristo Jesus? Ka pagpakuriꞌan kamu it mga kabanwa mi sabap it pamayaꞌ mi, subung nagat mga taga Judea ngayti nga piyakuriꞌan it mga kabanwa nira nga mga Judio. ¹⁵Mga Judio naga i minimatay it mga prupitaꞌ it tagnaꞌ, baw kayti, minimatay it pati Ampuꞌan nga si Jesus. Baw mga Judio naga i magpakuriꞌ it amen. Unuka ega atkayan it pagkuntraꞌen nira nga banar i kaꞌirgan it Ampuꞌang Diyus? Subung baꞌ it kalaban sira it muꞌsang katataawan. ¹⁶Kamatuudan, pati pangadal namen ngaytu it Magayeng Baritaꞌ duꞌun it mga taw nga ega Judio isaꞌun makanira gasiꞌ i karibriyan, talagang maseked-seked gasiꞌ nga pagpaaren it mga Judio ngaytu. Talagang karaꞌe-raꞌetan nay nakapnuꞌ, nga kayti subrang-subraꞌ na. Aypaꞌ ka naꞌbut nay miguꞌ na nga banar it bilug nira i iseg it Ampuꞌang Diyus.

Talagang ireg na Pablo nga kapaꞌuliꞌ naga duꞌun it Tesalonica

¹⁷Ta, in amen, mga sulsug kat pamayaꞌ, sabagay daꞌkami na asan it imyu kayti, temed pikir namen, yay matuud ya, subuk asan naga. Baw garing it nakalꞌid kami na ngayan asan it imyu, nga kat nakem namen atnat piyatayan kami, ereꞌeret na talagay iwas namen it imyu, maski maat ega paꞌ naꞌlay. Talagang ega magpepdek i kupaꞌuliꞌ namen asat imyu. ¹⁸Talagang kupaꞌuliꞌ kami nagang kupaꞌuliꞌ asan it imyu. Aken, manu-manu yan maat mapanaw na. Temed matuud nga ega magkatupusan si Satanas it ipagbaer ya nga ega ipagkatabus namen. ¹⁹Simpri, kupakikita kami sit imyu, ka sabap it imyu, dakulaꞌ nga banar nga kasagyaan namen. Baw talagang pagꞌiꞌinawaren namen nga maneꞌteꞌ i pamayaꞌ mi, nga yay kat ikasagya baw ikabantug namen in madap tami na duꞌun it Ampuꞌan tami nga si Jesu-Cristo, kat pamaꞌuliꞌ ya situ. ²⁰Eeꞌ baꞌ, sabap nagat imyu, talagang ega basta-bastang kasagyaan namen, baw dakulaꞌ nga pagbantug namen duꞌun it Ampuꞌang Diyus.

¹Ta it daꞌku na magkabaraꞌan, ka naꞌlay na nga egay baritaꞌ pasar it imyu, napikir ku nga sagkaꞌen ku na lamang i patuduꞌ it esa-esa ku sinit Atenas, ²ka papanawun ku na nga paꞌasat imyu si Timoteo, nga sulsug tami kat pamayaꞌ baw matuud nga manigsirbi it Ampuꞌang Diyus kat pangadal it Magayen ngaytung Baritaꞌ pasar it ki Cristo. Piyapaꞌasan ku kanya isaꞌun papaꞌgenen ya i pamayaꞌ baw pagsarig mi it Ampuꞌang Diyus baw paksegen ya i nakem mi, ³isaꞌun maski pagpakuriꞌan kamu, egay mateꞌag-teꞌag nga kapangindiꞌ it pamayaꞌ ya. Ka magkaꞌrutan mi nga mga pakuriꞌ ngaytu, pabetang-betang nagat Ampuꞌang Diyus it aten. ⁴Ka daꞌga baꞌ, iyan asan kami paꞌ, saꞌup-saꞌup nga ipiyanulduꞌ namen naga ngayan it imyu nga kat pagdadarapaꞌen nga timpu, mabut it aten nga pakuriꞌan tami sabap it pamayaꞌ ta ngaytu? Ta kayti daꞌga miyabut na nga matuud? ⁵Aypaꞌ ka, iyan daꞌku na magkabaraꞌan, piyapanaw ku si Timoteo nga paꞌasan it imyu, isaꞌun masiguru ku nga banar in maꞌunu nay pamayaꞌ mi kayti. Abaa, magregen aku baꞌ ka barang narayak kamu nat manigpaneꞌag-teꞌag nga si Satanas. Ka in beteꞌ atkayan na, daꞌga limiꞌwan nga salaud nay paꞌres namen ngayan asat imyu?

Nasagyaan ni Pablo i pamayaꞌ it mga taga Tesalonica ka nakaꞌunay na nga banar

⁶Ta kayti nakaꞌuliꞌ na sini si Timoteo. Magayen talagay taban ya nga baritaꞌ pasar it pamayaꞌ baw raras mit esa may esa. Natuturan ya gasiꞌ nga magkademdeman mi kami nga banar, baw in magꞌuꞌunu kami nga kupaꞌasang-kupaꞌasan it imyu, kamu atkayan naga nga pirmi mi kami nga pagpapaꞌbutun. ⁷Aypaꞌ kayti, mga sulsug kat pamayaꞌ, masagya kami na, maski na maat may paglabayen namen nga kakuriꞌan baw kasasawan. Simnagya kami sabap it nasiguru namen nga mapaꞌgen nga mapaꞌgen i pamayaꞌ mi. ⁸Ka basta magpaneꞌteꞌ i pamayaꞌ mi ngaytu it Ampuꞌan, masagyang-masagya i nakem namen. ⁹Taꞌway in magꞌuꞌunu namen na mapasalamatan i Ampuꞌang Diyus tami kat kasagyaan ngaytu nga subray basta nga ipiyagbegay yat amen sabap it imyu. ¹⁰Yay matuud, delem-aldaw pirmi namen nga ipagpanalangin, nga magpaꞌungaꞌ-ungaꞌ kami nga sana magsinle-sinletegen tami naga, isaꞌun makapasepsep namen nga banar i mga magkakurangan mi paꞌ kat pamayaꞌ mi.

¹¹Sana kaꞌirgan naga it Ampuꞌang Diyus nga Amaꞌ tami baw Ampuꞌan ta nga si Jesus nga ipatabus i panaw namen isaꞌun makapaꞌasan kami naga it imyu. ¹²Baw ipagpanalangin namen gasiꞌ nga talagang subraꞌ na nga padakulaꞌen it Ampuꞌan i raras mi it sulsug mi kat pamayaꞌ baw raras mi gasiꞌ it beken nga masigkataw mi, nga subung it amen nga raras it imyu. ¹³Ka basta dumakulaꞌ nga banar i kararas mi ngaytu, papaꞌgenen it Ampuꞌan i nakem mi nga mangaꞌgenan it alaid na kat kasalaꞌan. Ta basta atkayan, ega nay maꞌiway asat imyu ka mataldeng kamu na kat panleteg it Ampuꞌang Diyus, pagpaꞌuliꞌ it Ampuꞌan tami nga si Jesus, nga kaꞌibaan ya i mga naribri nga duꞌun nat kanya.

Pangaꞌgenan it mga namayaꞌ nga pagsagyaan it Ampuꞌang Diyus

¹Mga sulsug namen kat pamayaꞌ, may esa paꞌ nga ipagbenge-bengel namen it imyu kat ngaran it Ampuꞌan nga si Jesus. Sabagay ega piyasyangan mi i itiyulduꞌ namen it imyu, nga mga dapat adaten mi isaꞌun sagyaan kamu nga banar it Ampuꞌang Diyus. Ta kayti, ipagbenge-bengel namen it imyu nga subraꞌ pang paꞌresan mi i pagsunud mi ngaytu. ²Ka siguru ega payan nalipatan mi i mga ipiyangadal namen ngayan it imyu, nga purus garing duꞌun it Ampuꞌan nga si Jesus. ³Ka iyan talagay kaꞌirgan it Ampuꞌang Diyus nga kamu nga mga taawan ya, magpangaꞌgenan na it alaid kat muꞌsang kasalaꞌan. Aypaꞌ, subung nagat ipiyangadal namen ngayan, paꞌalaidan mi i muꞌsang kalasit pamakun duꞌut ega asawa mi. ⁴Kaꞌilangan, mga lalaki asat imyu, in mangasawa, manunsun it dalan nga mataldeng, nga egay maski unu nga kasalaꞌan. ⁵Ega maat mangasawa kamu nga iyan talagay magdadaꞌeg kat nakem mi, sumbayaꞌen lamang i kaꞌirgan it bilug, nga atkaytu pay adat it mga taw nga egay pagkilala nira it Ampuꞌang Diyus. ⁶Eeꞌ baꞌ, kaꞌilangan nga egay mamungad it atay it beken, subraꞌ na in sulsug ya kat pamayaꞌ. Ega salyaen muy asawa ya. Ka daꞌga baꞌ, ipiyangadal namen baw isiyasar it imyu nga in siyu pay magbuwat it atkaytu, egay pagduwa-duwa nga rigaen kanya it Ampuꞌang Diyus? ⁷Ka ipiyabetang-betang it Ampuꞌang Diyus nga mangaꞌgenan tami it pangaꞌgenan nga mataldeng, ega maat pangaꞌgenan nga pagraꞌwayen ya. ⁸Aypaꞌ in siyuy magpandaꞌga it ipagpangadal namen ngaytu, talagang maꞌyag kat matat aldaw nga ega taw i pagpandaꞌgaan ya, in daꞌga Ampuꞌang Diyus, kanya nga magꞌildaw it aten nga pasaruman tami it Espiritu Santo ya.4:8 Esang puntuꞌ it ampang ngaytu nga “Santo”, “alaid kat kasalaꞌan.” Espiritu Santo i magtabang it aten isaꞌun mangaꞌgenan tami gasiꞌ i aten it egay kasalaꞌan. Aypaꞌ, in pagtemden ta paꞌ nga mangaꞌgenan it pangaꞌgenan nga makasalaꞌan, pagbaliwalaꞌen tami talaga i Ampuꞌang Diyus, ka pagdaꞌgaen tami i ega basta-basta ngaytu nga tabang yat aten.

⁹Ta in pasar ga it pagmaꞌal baw raras it sulsug kat pamayaꞌ, maski ega na suratan namen kamu, ka Ampuꞌang Diyus na i magtulduꞌ it imyu it in magꞌuꞌunuy matuud nga raras it esa may esa. ¹⁰Kamatuudan, maꞌyag naga i raras mi it muꞌsang mga sulsug mi kat pamayaꞌ nga duꞌun it muꞌsang prubinsiya it Macedonia. Temed maski atkayan na, ipagbenge-bengel namen ga lamang it imyu nga subraꞌ pang padakulaꞌen mi i kararas mi ngaytu. ¹¹Baw itu paꞌ gasiꞌ i paꞌubasan mi, pangaꞌgenan nga ega magulu. Ega pasilabtan muy ega imu, in daꞌga paggina-ginawaan i sadili nga panulus. Ka iyan talagay magayen, sadiling paꞌres i ipagkaꞌgen, subung nat ipiyagꞌaat namen ngayan it imyu. ¹²Simpri in atkaytuy magkamuyaan asat imyu, daꞌga yay liꞌwan ya, pagdaya-dayawun kamu it mga ega paꞌ ngayan magkilala it Ampuꞌan? Baw ega na gasiꞌ duꞌun it beken i titingaraꞌ mi it in unu-unu nga pagkaꞌilanganen mi.

Iyan pamaꞌuliꞌ situ it Ampuꞌan

¹³Mga sulsug namen kat pamayaꞌ, ireg namen nga maꞌrutan mi i kamatuudan pasar it iyan mga namayaꞌ nga patay na, isaꞌun daꞌkamu naga masmek it subraꞌ na, nga subung it mga taw nga egay pagsisiguruun nga kagayenan it mga miyatay nira. ¹⁴Ka daꞌga baꞌ, pagpakimatuudun tami nga Ampuꞌan ngaytu nga si Jesus, natay kanya baw naꞌgen naga it paꞌuliꞌ? Aypaꞌ ka siguruun tami nga kumpur patay na nga maglalagpit it ki Jesus ngaytu, talagang egnen it Ampuꞌang Diyus it paꞌuliꞌ baw ipabayaꞌ ya it ki Jesus kat pamaꞌuliꞌ ya situ.

¹⁵Ka ipagpangadal namen ngaytu it imyu kayti, nga garing nagaytu it Ampuꞌan, nga in siyu it aten nga egen paꞌ kat pamaꞌuliꞌ ya situ, ega talaga mauꞌnaan tami i iyan mga miyatay na. ¹⁶Sabap kat iyan nga aldaw, lumampud i Ampuꞌan nga gumaring duꞌut langit, dengan it magnegan i panggaꞌmaran nga magsekat. Magnegan i panggaꞌmaran it piyakapagbayaꞌen it mga anghil baw tingeg it taburi it Ampuꞌang Diyus. Eeꞌ baꞌ, Ampuꞌan nga si Jesu-Cristo, kanya mismu i lumampud, nga paglampud ya, uꞌnang sekaten ya, mga patay na nga maglalagpit it kanya, ka egnen na i bilug nira. ¹⁷Bawnga pagkaꞌgen nira, kita nga mga egen paꞌ, padibwat ta na nga subung it sibnutun, isaꞌun sang tamiyan nat mga inggen ngaytu i sumusmu it Ampuꞌan duꞌun it lawang. Ta gumaring sikayan, kaꞌiba-iba ta nay Ampuꞌan ngaytu it egay katupusan. ¹⁸Aypaꞌ ka magsigpademdem kamu it itu nga ipagpangadal isaꞌun mapasagya i nakem it esa may esa.

¹Mga sulsug kat pamayaꞌ, in pasar sikayan it pamaꞌuliꞌ ngayan situ it Ampuꞌan in kaꞌnung timpu u uras, ega nay beken nga masugid namen kat surat namen ngaytu. ²Sabap magkaꞌrutan mi na nga pamaꞌuliꞌ ya ngaytu, kaꞌalimbawaan ya subung it ipagꞌabut it mananakaw it delemen, ka ega magkaꞌru-kaꞌrutan tami in kaꞌnu. ³Ka iyan nga aldaw, maamaatan yay kadakel, “Bilaꞌ, maꞌimbeng baytu kayti! Egaytuy kaꞌaribugaran ta.” Temed yay kalgan nira, abutun sira it ega basta-bastang kakuriꞌan. Talagang maski munu-unu sira, ega talagay mapalagyuwan nira, ka abutun sira nga subuk babay nga magbebteng nga biglang sintiꞌen yay saꞌgid.

⁴Temed kamu, mga sulsug kat pamayaꞌ, ega na madlem it imyu i pamaꞌuliꞌ ngaytu it Ampuꞌan. Aypaꞌ ka maski mabut kanya kat aldaw nga ega pagsisiguruun, nga subung it buwat it mananakaw, temed alaid nat imyu i kaꞌirad-iradan. ⁵Ka kamung muꞌsa nga maglalagpit nat ki Cristo, talagang kat kaꞌyagan kamu na. Maꞌyag nat imyu nga subung it aldawun i muꞌsa. Ega na talaga kat kadleman tami paꞌ. Eeꞌ baꞌ, ega na madlem paꞌ it aten nga subung it delemen i muꞌsa ngaytu. ⁶Aypaꞌ ka ega pasbungan tami i beken nga sakep pat kadleman, nga magpangaꞌgenan it egay tiya-tiyakap ka subung sira it magꞌigaꞌ. Kaꞌilangan kita nga sakep nat kaꞌyagan, alistu baw pagsupilen tami nga pirmi i sadili ta. ⁷Ka daꞌga baꞌ in delemen, uras nga ipagꞌigaꞌ it katataawan baw ipagpalangu? ⁸Temed it kita, bilang magpangaꞌgenan nat aldawun, kaꞌilangan pagsupilen ta nay sadili ta. Isꞌul ta nay subuk kanukal it deꞌgan, nga pamayaꞌ baw pagmaꞌal tat Ampuꞌang Diyus i paꞌaaten. Baw isꞌul ta gasiꞌ i subuk piyakakatupung, nga paniguru it karibriyan i paꞌaaten. ⁹Sabap ega iyan i piniliꞌan it Ampuꞌang Diyus it aten, isaꞌun rigaen ya, in daꞌga, isaꞌun matanggap tami i karibriyan nga maꞌaten sabap it Ampuꞌan tami nga si Jesu-Cristo. ¹⁰Natay tu kanya ka nangganti it aten kat panriga ngayti it Ampuꞌang Diyus. Aypaꞌ egen u patay na asan it pamaꞌuliꞌ ya, kasagpun ya na kita duꞌun it kaꞌgenan nga egay kaskedan. ¹¹Aypaꞌ ipasigi mi i pamagbuwaten mi na ngayan kayti, nga pasagya it nakem it esa may esa baw magtabang-tabangen nga pagpaksegen mi i pamayaꞌ it esa may esa gasiꞌ.

Pangiyaꞌpusang panulduꞌ

¹²Pangiyaꞌpusang makatulduꞌ namen it imyu, mga sulsug kat pamayaꞌ, nga beteꞌ kilalaen mit magayen i mga binggayat pudir nga magpaꞌres it buwaten it Ampuꞌan asan. Ka sira ngaytu, simpri Ampuꞌan i miniliꞌ baw nagpatindeg it kanira nga mamaalaꞌ baw manulduꞌ it imyu. ¹³Aypaꞌ subraꞌ nga galangen mi sira baw rarasan sabap it katengdanan nira ngaytu. Baw ta, yanayan, iyan bay magayen, magꞌurunyun kamu kat ikaꞌimbeng it pakiꞌiba-iba mi.

¹⁴Baw asi-asi pat imyu, mga sulsug namen kat pamayaꞌ, padisiran mit magayen i iyan mga maggarus it panulus. Paksegen i nakem it iyan mga magkalibeg i pikir. Tabangen mi i iyan mga malulubay kat pamayaꞌ isaꞌun magmapaꞌgen. Magayen talaga nga paꞌresan mi tu sira nga muꞌsa it may kapalulusan mi naga. ¹⁵Inturun mi nga ega na kat nakem mi i magbeles-belesen in buwatan kamu it maꞌiba mi it maraꞌe-raꞌet. In daꞌga, in ari magayen, iyan i buwaten mi nga pirmi kat masigkataw mi, namayaꞌ u ega namayaꞌ.

¹⁶Magmasagya kamu nga pirmi, ¹⁷baw mapiyanalangin kamu gasiꞌ nga pirmi. ¹⁸Baw maski unuy kabetangan mi, pirmi kamu gasiꞌ nga magpasalamat. Sabap mga itu ngaytu, kaꞌirgan talaga it Ampuꞌang Diyus kat pangaꞌgenan mi kat pakilagpit mi it ki Cristo Jesus.

¹⁹Ega subuk parngen mi i Espiritu Santo. ²⁰Ega tibabaꞌen mi i ipagpaꞌrut u ipagpanulduꞌ it esang taw nga pagpanakman it Espiritu Santo ngaytu. ²¹Temed yanayan, kaꞌilangan niidan baw ineꞌteꞌen mi daꞌan. Eeꞌ baꞌ, ega desang mga pagꞌampangen ngaytu, in daꞌga muꞌsang mga bagay, niidan baw ineꞌteꞌen isaꞌun masiguru mi in uyun kat kaꞌirgan it Ampuꞌang Diyus u daꞌga. Iyan mga pagsisiguruun mi nga magayen, pakimatuudun baw teꞌteꞌan mi. ²²Takaꞌ paꞌalaidan mi talaga i muꞌsang kalasit karaꞌe-raꞌetan.

²³Ipagpanalangin namen nga sana tabangen kamu it Ampuꞌang Diyus, kanya nga puꞌun it kaꞌimbengat nakem, isaꞌun mapaꞌalaidan mi nga banar i kasalaꞌan. Sana paksegen yay nakem mi, pikiran baw pati bilug mi, nga mangaꞌgenan it uyun talaga kat kaꞌirgan ya, isaꞌun ega nay maꞌiway yat imyu in asan it pamaꞌuliꞌ it Ampuꞌan tami nga si Jesu-Cristo. ²⁴Baw pagsisiguruun namen nga Ampuꞌang Diyus nga nagpanakem it imyu nga pasakep it kanya, tumanen ya nagay pagꞌangutun namen ngaytu sabap talagang kamatuudan i kanya.

²⁵Mga sulsug namen kat pamayaꞌ, magayen ipagpanalangin mi naga kami nga pirmi. ²⁶Baw magsigkumu-kumustaen kamu, bilang sang sulsugan nga namayaꞌ na it ki Cristo.

²⁷Kat pudir nga ibinggay it Ampuꞌan it aken, ipagsekat kut imyu nga basaen mi i surat ngaytu kat muꞌsang mga sulsug ta kat pamayaꞌ asan it imyu.

²⁸Ipagpanalangin namen nga sana asat imyu nga pirmi i ildaw it Ampuꞌan tami nga si Jesu-Cristo.