1 Pedro

Uꞌnang Surat ni Pedro

1 Pedro

Pauꞌnang Sugi-sugid

Uꞌna ngaytung surat ni Pedro, ipiyataban ya duꞌun it mga magpamayaꞌ it Ampuꞌan nga si Jesu-Cristo, nga magtataꞌid duꞌut limang kaprubinsiyaan. Kadaklan it mga taw duꞌun it mga rugar ngayti, ega magkilala sirat Ampuꞌang Diyus. Mga magpamayaꞌ ngayti, pagpakuriꞌan sira sabap it pagsunud nirat ki Jesu-Cristo. Aypaꞌ uꞌna-uꞌnang pagpapuntuꞌan it mga sugi-sugid situt itung surat, magpakseg it nakem baw pikir nira, isaꞌun kat keseg it pagsarig baw pamayaꞌ nirat Ampuꞌan, masagkaꞌan niray kakuriꞌan ngayti. Ipagpademdem ni Pedro it kanira i Magayeng Baritaꞌ pasar it Ampuꞌan nga si Jesu-Cristo. Inaat ya nga kamataynen ni Jesu-Cristo, pagkaꞌgen ya it paꞌuliꞌ, baw pamaꞌuliꞌ ya situ, i magbegay it kanira it ega magꞌugad-ugad nga kasiguruwan it kagayenan nga makanira duꞌut langit kat pagdadarapaꞌen. Aypaꞌ, kaꞌilangan, sagkaꞌen niray mga kakuriꞌan ngaytu, nga bilang sukda-sukdan it in talagang kamatuudan i pamayaꞌ nira. Ka simpri basta maneꞌteꞌ, tumbasan sirat kaꞌgenan nga egay kaskedan, in asan nat ipaꞌuliꞌ ni Jesu-Cristo.

Uyut gasiꞌ it sugi-sugid ngaytu nga pakseg it nakem baw pikir kat timpu it kakuriꞌan, pagsekaten ya gasiꞌ sira nga mangaꞌgenan nga pirmi uyun it kabetangan nira, nga mga piniliꞌ it Ampuꞌang Diyus nga mga taawan ya na.

¹Aku nga si Pedro, nga esang apustul ni Jesu-Cristo, i tagsurat kaytu. Mga pagsuratan ku, kamung mga piniliꞌ it Ampuꞌang Diyus nga mga taawan ya, nga subuk tari-tariwanak baw dayuꞌan kat rugar it Ponto, Galacia, Capadocia, Asia baw Bitinia. Sabagay magꞌiꞌistar kamu paꞌ situt sinirungat langit, takaꞌ yay matuud, bilang mga dumadayuꞌ kamu lamang. ²Kamu ngaytu, piniliꞌ it Diyus Amaꞌ uyun naga kat pagnanakmen ya na nga lagi baw nakapabetang-betang ya garing paꞌ it katagnaꞌ-tagnaꞌan. Piniliꞌ ya kamu isaꞌun kat keseg it Espiritu Santo nga magsasarum kat bilug mi, buwaten kamu nga masiyunudun it ki Jesu-Cristo, nga napasinsiya nay mga kasalaꞌan mi sabap it ipiyaturuꞌ nga duguꞌ ya.

Ipagpanalangin ku nga sana magbastanti nga pirmi asat imyu i ildaw baw kaꞌimbengan it nakem nga ipagbegay it Ampuꞌang Diyus.

Bantugun i Ampuꞌang Diyus sabap it ildaw ya nga karibriyan

³Kayti, bantugun tami nga muꞌsa i Ampuꞌang Diyus, nga Amaꞌ it Ampuꞌan tami nga si Jesu-Cristo! Sabap natantuwan ta nga, kat kadakulat ildaw yat aten, bilang ipiyanganak ta kayti it sumaꞌup baw siguradu na talagay pagꞌiꞌinawaren tami nga kagayenan. Ildaw ya ngaytu, siguraduytu sabap duꞌun it pagkaꞌgen ni Jesu-Cristo it paꞌuliꞌ. ⁴Baw kagayenan ngaytu nga pagsisiguruun tami, talagang ega basta-bastaytu, ka egay karanggaꞌan, egay sasat baw egay kakupasan ya. Talagang magꞌaꞌareg naytung lagi it imyu duꞌun it langit. ⁵Ta sabap it pagsarig baw pamayaꞌ mi it kanya, pagtatarimaen kamu nga pirmi kat guna it Ampuꞌang Diyus, mintras pagꞌeꞌlaten mi i karibriyan nga tumanen ya baw itanyag asan it umur nat banwa.

⁶Aypaꞌ ka magkasagya kamung banar. Sabagay may magkasmekan mi naga kayti nga dakel-dakel nga pakuriꞌ, temed egaytu magkaꞌlay. ⁷Ka mga kakuriꞌan ngaytu, bilang sukda-sukdan it pamayaꞌ mi, in unu matuud na nga talaga. Ka pagdedemdemen mi nga pirmi nga maski bulawan, kaꞌilangan nga sukdanan duꞌun it apuy isaꞌun masiguru nga talagang bulawan nga banar, ka simpri maꞌawaꞌ nat apuy i ega naga bulawan. Temed bulawan, maski marga nga bagay, may karanggaꞌan naga, ka pandenaꞌ lamang. Talagang marga pang banar it bulawan i pamayaꞌ mi, aypaꞌ kaꞌilangan naga nga masiguruwan. Bawnga, in nasukdanan na baw mamuyaan nga teꞌteꞌ talaga i pamayaꞌ mi ngaytu, bantugun baw galangen kamu in asan nat ipaꞌuliꞌ ni Jesu-Cristo.

⁸Sabagay ega talaga naltegan mi si Jesu-Cristo ngaytu. Temed lamang ega naltegan mi, pagmaꞌalen mi na kanya. Baw pagpamayaꞌnen mi gasiꞌ, maski ega magkaltegan mi kanya. Aypaꞌ ka maski kayti paꞌ ngaytu, ega na masugid i ega basta-bastang kasagyaan kat nakem mi. ⁹Sabap maꞌimyu na nga maribri kamu duꞌun it langit, nga yay liꞌwan it pagsarig baw pamayaꞌ mi it ki Jesu-Cristo.

¹⁰Mga prupitaꞌ it tagnaꞌ, ipiyagpasugid it kanira i pasar it karibriyan ngaytung ipagꞌildaw it imyu. Talagang giyayen-gayen baw eꞌres i pagꞌadal baw pasepsep nira it karibriyan ngaytu. ¹¹Ka ireg nirang ireg matantuwan in kaꞌnung timpu baw in magꞌuꞌunu-unuytu magꞌabut i mga bagay nga ipiyagpasugid it kanira it Espiritu Santo ni Cristo. Sabap egay beken nga pagpaꞌiguꞌan it mga ipiyagpasugid ngayti, mga malabayan ni Cristo nga kakuriꞌan bawnga kabantugan nga liꞌwan ya. ¹²Temed piyaꞌyagan sirat Ampuꞌang Diyus nga, ega kat kanirang timpu in daꞌga aten mana ngaytung timpu kayti, matuman i mga bagay ngaytu nga ipiyagpasugid it kanira. Itung mga bagay, yanagaytuy ipagpangadal it imyu it mga magpangadal it Magayeng Baritaꞌ kat tabang it Espiritu Santo nga ipiyapasarum it Ampuꞌang Diyus kat bilug ta. Talagang maski mga anghil, pagpasepsepan nirang banar i mga bagay ngaytu.

Kaꞌilangan guruun tay adat it Amaꞌ ta nga Ampuꞌang Diyus nga alaid kat muꞌsang kasalaꞌan

¹³Aypaꞌ kayti, ipaꞌabwatay mi i pikiran mi, nga magꞌaꞌalistu na. Kaꞌilangan pagsupilen mit magayen i sadili mi. Baw tingleden mi i inawar mi kat karibriyan nga iꞌildaw it imyu ni Jesu-Cristo asan it aldaw nga ipaꞌuliꞌ ya situ. ¹⁴Paribasay mga anak tami na it Ampuꞌang Diyus, kaꞌilangan, pasbung tami na it mangaꞌwaꞌ nga masunud nga banar it Amaꞌ nira. Ega na pasegsegen mi i mga maraꞌe-raꞌet nga kaꞌirgan nga pamagsumbayaꞌen mi ngayan katꞌesa nga ega pay uru-urut mi pasar it Ampuꞌang Diyus. ¹⁵Yanay kaꞌilangan, kat muꞌsang pagbuwaten mi mangaꞌgenan kamu na nga alaid kat muꞌsang kasalaꞌan, ka atkayan nagay Ampuꞌang Diyus nga nagpanakem it imyu nga pasakep it kanya. ¹⁶Ka yay magꞌuyun kat magsusurat nga ampang ya nga magꞌaat,

“Kaꞌilangan, mangaꞌgenan kamu nga alaid kat muꞌsang kasalaꞌan, sabap aku, talagang alaid nga alaid kat maski unu nga kasalaꞌan.”1:16 Levitico 11:44b baw 19:2b.

¹⁷Magayen pagdedemdemen mi nga Ampuꞌang Diyus ngaytu nga pagtaꞌwagen mi nga Amaꞌ, betanganan yat ukuman i muꞌsa, uyun kat mga binwatan nira. Egaytuy pagbidaꞌen ya. Aypaꞌ kaꞌilangan nga galangen mi kanyat may iꞌlam, mintras situ kamu pat sinirungat langit. ¹⁸Magkaꞌrutan mi na siguru in unu nga bagay i ikiyaliꞌwan mi kat tagnang pangaꞌgenan mi nga egay kapulusan ka alaid duꞌun it Ampuꞌang Diyus, pangaꞌgenan mi ngayting nasubli mi kat mga kagiyaringanan mi. Demdemen mi nga iyan ikiyaliꞌwan mi, ega bagay nga may karanggaꞌan nga subung it bulawan baw pirak. ¹⁹In daꞌga iyan ega basta-bastang duguꞌ ni Cristo nga ipiyaturuꞌ ya, yay ikiyaliꞌwan mi. Ka kabilangan ya, isiyalisi nga uꞌuybun it tupa nga egay maski unu nga rindi it bilug. ²⁰Talagang garing it ega paꞌ giyuna i banwa, ipiyasiguru kanya naytung lagi it Ampuꞌang Diyus kat itu nga buwaten ya nga panribri. Temed it yapaytung timpu ta na ngaytuy ipiyagꞌabut ya situt banwa kat ikaribri tami. ²¹Ta kayti, sabap it binwat ngaytu ni Cristo nga panribri, pagpakimatuudun baw pagsarigan mi nay Ampuꞌang Diyus, kanya nga minggen it kanya it paꞌuliꞌ baw minggay it kanya it ega basta-bastang kabantugan. Nakasiguru na kayti i pagsarig baw inawar mi, nga duꞌun na it Ampuꞌang Diyus.

²²Ta kayti, kat pamayaꞌ mi it kamatuudan ngaytung Magayeng Baritaꞌ, bilang nanlimpiyuꞌ kamu na. Ka naꞌawaꞌ nay kasalaꞌan mi, iyan nagpasakep kamu na it ki Cristo. Aypaꞌ mapakay na nga kamatuudan nay raras mi it esa may esa nga subung it sang sulsugan. Aypaꞌ tingleden mi talagay nakem mi kat kamatuudang raras it esa may esa nga ega desang awam. ²³Sabap kayti, subuk ipiyanganak kamu it sumaꞌup, nga ega maat ipiyanganak it taw nga may kamataynen, in daꞌga kat keseg it egay kaꞌawaꞌan nga ampang it Ampuꞌang Diyus nga subuk ilinwak ya kat nakem mi. Ampang ya ngaytu, maneꞌteꞌ seked it kaꞌnu-kaꞌnu, baw subung talagat egen ka dakulay magkabwat ya kat nakem it taw. ²⁴Ka inaat ngayan it kasuratan,

“Muꞌsang taw, kabilangan nira, subung it dikut, baw, kagayen nira, subung lamang it mga bura-burak it dikut ngaytu.

Ka dikut, magpanluyus, baw magkatagar i burak.

²⁵Temed iyan ampang it Ampuꞌang Diyus, talagang maneꞌteꞌ seked it kaꞌnu-kaꞌnu.”1:24-25 Isaias 40:6-8.

Ampang ngaytu nga paꞌaaten, itu naytu, Magayen ngaytung Baritaꞌ nga ipagpangadal asan it imyu.

¹Aypaꞌ indiꞌan mi nay mga adat nga mapiyanggated it masigkataw, mapiyangakal, mapiyasiꞌba-siꞌban, maꞌinggit, baw muꞌsa nga adat nga pagpamuwat-buwatan i masigkataw. ²Panawun it pikiran mi i adat it madaragen nga magkududuꞌ nga pirmi. Ta sana, atkayan nagay imyu, nga magkuꞌadal nga pirmi it ampang it Ampuꞌang Diyus, ampang ya nga purus kamatuudan, isaꞌun kemseg kamu nga mga anak ya, nga magsisigi nga dumakulaꞌ i pamayaꞌ mi, seked it maꞌbut na nga maribri kamu duꞌun it langit. ³Sabap natantuwan mi na nga maꞌildaw talaga i Ampuꞌan.

Kabilangan ni Cristo, piyakapakseg it Templo it Ampuꞌang Diyus, mga magpamayaꞌ i subuk mga buwat-buwat

⁴Si Cristo ngaytu, egen talaga baw kabilangan ya, subuk lininuꞌ nga batu nga ega napakay it mga taw. Temed napakay talaga it Ampuꞌang Diyus ka piniliꞌ baw talagang pagrarasan ya. ⁵Ta it magpasakep kamu na duꞌut kanya, ibinggay yat imyu nga nabaꞌgu i pangaꞌgenan mi, baw kabilangan mi gasit imyu, mga lininuꞌ nagang batu nga paggamiten it Ampuꞌan nga buwat-buwat it ipagpatindeg ya nga papagsambaan nga balay it Ampuꞌang Diyus. Pagbuwaten ya gasiꞌ kamu nga subuk mga sasirduti nga nasiguru na nga kat Ampuꞌang Diyus. Takaꞌ imyu nga ipagsamba, pagsirbi baw pagbantug mi it kanya, nga pagsagyaan ya sabap it binwat ni Jesu-Cristo. ⁶Sabap magꞌaat ngayan i magbebtang duꞌut kasuratan nga ampang it Ampuꞌang Diyus,

“Dedemdemen mi tu. May piniliꞌ ku nga ipagpatindeg ku duꞌut Sion nga bilang ega basta-bastang lininuꞌ nga batu nga piyakapakseg it balay. Talagang ega desang maꞌasaꞌ-asaꞌ i kumpur magsarig it kanya.”2:6 Isaias 28:16. Sion ngaytu, esang pangaran it siyudad it Jerusalem.

⁷Aypaꞌ talagang maꞌal mi na kanya, kamu nga mamagpamayaꞌ nat kanya. Temed kat mga ega magpamayaꞌ it kanya, natuman nayan i inaat ngayan it kasuratan nga,

“Iyan batu nga ega napakay it mga manigpatindeg it balay, palan yanagay giyamit nga piyakapakseg it balay.”2:7 Awit 118:22.

⁸Baw natuman gasiꞌ i inaat nga, kabilangan ya,

“Subuk batu nga pirming magkasampukan baw kakekleban it mga taw.”2:8 Isaias 8:14.

Magkasampuk sira ka iyan i ipiyabetang-betang it Ampuꞌang Diyus, sabap it daꞌsira magpamayaꞌ it ampang ya ngaytu nga Magayeng Baritaꞌ.

⁹Temed kamu, mga taw kamu nga piniliꞌ it Ampuꞌang Diyus. Mga adiꞌ kamu kat kaꞌadiꞌan ya, baw mga sasirduti nga magsirbi it kanya. Subung kamu nat esang bangsat taw nga ipiyasiguru it Ampuꞌang Diyus nga talagang kanya na. Piniliꞌ kamu nga mga taawan ya isaꞌun ipatanyag mi i mga kalililuꞌan nga mga buwat ya. Ka kanya i nagpaliꞌwan it imyu kat kadleman it kasalaꞌan isaꞌun mangaꞌgenan kamu kat kaꞌyagan it ega basta-bastang kagayenan ya. ¹⁰Yay matuud, tagnaꞌ ngayti ega paꞌ taawan kamu it Ampuꞌang Diyus. Temed kayti, mga taawan ya na kamu. Katꞌesa subuk daꞌkamuy imyu pagꞌildawan yat karibriyan, temed kayti naꞌimyu nay ildaw ya ngaytu.

Kaꞌilangan, mangaꞌgenan nga uyun it kaꞌirgan it Ampuꞌang Diyus

¹¹Mga pagmaꞌalen ku, demdemen mi nga bilang mga dumadayuꞌ kamu lamang situt banwa, ka langit i pagpapaꞌbutun mi, nga yanay banwa mi. Aypaꞌ paꞌalaidan mi nay mga maraꞌe-raꞌet nga kaꞌirgan it bilug, ka magꞌindaꞌeg yan it pamayaꞌ mi it Ampuꞌan. ¹²Dapat mi nga inturun i adat mi, ka magkaꞌrutan mi nga maglulubuk-lubuk kamu paꞌ it mga kabanwa mi nga egay pagkilala nira it Ampuꞌang Diyus. Ka maski pagꞌaaten nira nga magbuwat kamu it maraꞌe-raꞌet, matantuwan nira nga magayen palan i adat mi. Aypaꞌ, liꞌwan ya, bantugun niray Ampuꞌang Diyus kat aldaw nga ildawan ya sira it mabaꞌgu i nakem baw pikir nira.

¹³Kat ikabantug gasit Ampuꞌan, adaten mi nga masunud it mga punuꞌan, subraꞌ na i kanya nga piyakamataꞌas nga punuꞌan it banwa. ¹⁴Pasakep kamu gasiꞌ it mga beken nga may katengdanan nga subuk mga gubirnadur mi. Ka sira ngaytu, ipiyamagpaꞌdung it piyakamataꞌas nga punuꞌan nga mga manigbetangan it ukuman kat mga in siyuy mamagbuwat it karaꞌe-raꞌetan baw magdayaw it mga mamagbuwat it magagayen nga pagbuwaten. ¹⁵Sabap iyan talagay kaꞌirgan it Ampuꞌang Diyus nga purus magagayen i pagbuwaten mi, isaꞌun mabwat mi nga subuk tiꞌpekan i mga taw nga mapiyasubraꞌ it pasepsep baw magsugid it ega magkaꞌrutan. ¹⁶Talagang ribri kamu na. Temed ega gamiten mi i karibriyan mi nga kataldengan kat pagbuwat it maraꞌe-raꞌet. In daꞌga mangaꞌgenan kamu uyun it mga kamatuudang manigsirbi it Ampuꞌang Diyus. ¹⁷Begayan mit galang i muꞌsang mga taw baw rarasan mi i mga sulsug mi kat pamayaꞌ. Galangen it may iꞌlam i Ampuꞌang Diyus baw kilalaen i pudir it piyakamataꞌas nga punuꞌan it banwa.

¹⁸Ta kamu nga mga uripen, kaꞌilangan pasakep kamu it may matuud nga galang it mga agalen mi. Maski unuy adat nira, nakman nga magpadisir it magayen, u maꞌigpit, sunudun mi nagat magayen. ¹⁹Ka maski beteꞌ pakuriꞌan kamu it maski egay nabwat nga kasalaꞌan, basta sagkaꞌen mi sabap yay magdadaꞌeg kat nakem mi, pagsunud it kaꞌirgan it Ampuꞌang Diyus, simpri in atkayan, talagang sagyaan ya kamu. ²⁰Ka unu, ikabantug mi i magsagkaꞌ it panriga in sabap it karaꞌe-raꞌetan nga pagbuwaten? Simpri ega. Temed in sagkaꞌen mit magayen i nakem in pagpakuriꞌan kamu maski magayen i pagbuwaten mi, talagang sagyaan kamu it Ampuꞌang Diyus.

²¹Piniliꞌ kamu it Ampuꞌang Diyus baw talagang ipiyabetang-betang ya nga sumagkaꞌ kamu it kakuriꞌan it magayen i nakem. Sabap dakulaꞌ talagay siyagkaꞌ ni Cristo nga kakuriꞌan, isaꞌun lamang maribri kamu, baw sikayan binggayan ya kamu it ladawan nga iyan nagay guruun mi. ²²Ega talagay maski unu nga kasalaꞌan nga binwat ni Cristo. Maski ampang nga aꞌakal, talagang egay namuyaan duꞌut kanya. ²³Ka iyan diniyampaꞌ kanya, piyataꞌnan ya lamang. Iyan piyakuriꞌan na kanya, ega nabngaꞌ i baꞌbaꞌ yat “Sadi na!”. Ipiyataꞌan ya lamang duꞌun it Ampuꞌang Diyus, kanya nga ega basta-bastang Manigꞌukuman nga mataldeng. ²⁴Kanya mismu i timnanggung it muꞌsang kasalaꞌan tami, kat nalabayan yang kamataynen ya duꞌun it krus. Binwat yaytu isaꞌun indiꞌan ta na i muꞌsang ipagkasalaꞌan tami, baw mangaꞌgenan na it purus mataldeng nga pagbuwaten. Yay matuud, sabap lamang it ega teꞌe-teꞌeng nga pasakit nga tiyanggap ni Cristo, naꞌubaꞌubat nay mga kasalaꞌan tami.2:24 Isaias 53:5b. ²⁵Sabap kaꞌalimbawaan mi, subung kamut mga tupa nga namagkatari-tariwanak ka namagkateꞌag-teꞌag na. Temed kayti tiningped kamu siꞌ it Manigꞌeper nga si Cristo, nga magtatarima it imyu it kaꞌustuꞌan nga pagtarima.

Mga munaꞌaw kat mga magpamayaꞌ nga may asawa

¹Kayti, kamu nga mga babay, kaꞌilangan nga pasakep kamut magayen it padisir it asawa mi, ka in atkayan, maski ega magpakimatuud it ampang it Ampuꞌang Diyus i asawa mi, in mamuyaan niray adat mi ngaytu nga magayen, barang yay tumaban it kanira it mamayaꞌ nat Ampuꞌan, maski egay tumuturan it kanira. ²Sabap magkamuyaan niray adat mi nga nakman baw may galang. ³Demdemen mi nga ega iyan i magpadaraga it imyu, pangayus it buꞌuk, panggamit it bulawan nga rurug it bilug baw pamakay it pirmirang pakayan, nga muꞌsa ngaytu desang kat liꞌwan lamang. ⁴In daꞌga, asikasuun mit magayen i kat nakem mi. Ka iyan talagay matuud nga kadaraga nga egay pagꞌumrasan ya, nakman kamu baw mapiyalulus kat muꞌsang pagbuwaten baw pagꞌampangen mi. Yay pandaraga nga pagrarasan talaga it Ampuꞌang Diyus. ⁵Demdemen mi i mga babay it tagnaꞌ nga magpamayaꞌ it Ampuꞌang Diyus, sira nga may pagsarig it kanya. Atkaytu nagay kanira nga pandaraga, nga nagpasakep sirat magayen it padisir it asawa nira. ⁶Subung it ki Sara it tagnaꞌ paꞌ. Masunud kanyang matuud it asawa ya ngayti nga si Abraham, baw panaꞌwag yat kanya, “Agalen ku.” Ta kamu, kabilangan mi, subung nat mga tungtung-inapuꞌ ya basta pagpaꞌresan mi i buwat nga magayen, nga ega pagꞌiꞌlaman mi i barang makuriꞌan kamu sabap it pamayaꞌ mi.

⁷Ta kamu na nga mga lalaki, kaꞌilangan istimaren mit kamatuudan i asawa mi. Arigraen mi sirat magayen, nga pagkilalaen mi nga sira, ega makasbung it keseg it lalaki, baw pagkilalaen mi gasiꞌ nga surubung kamu, babay, lalaki, nga ildawan it Ampuꞌang Diyus it kaꞌgenang egay kaskedan. Aypaꞌ ipabetang mi sirat magayen isaꞌun egay seꞌan in magpanalangin kamu.

Sagkaꞌen lamang i pakuriꞌ

⁸May paꞌugdun ku paꞌ nga panulduꞌ kut imyu nga muꞌsa. Kaꞌilangan talaga nga mangaꞌgenan kamu it may pagꞌurunyun mi. Magmaꞌildaw kamu it esa may esa, baw magsigraras kamu it subung it nagsulsu-sulsugun. Kaꞌilangan magtabang-tabangen baw mapiyababaꞌ kamu. ⁹Ega belsen mit maraꞌe-raꞌet i magbuwat it imyu it karaꞌe-raꞌetan. Ega tubagan mi i magdiyampaꞌ it imyu, in daꞌga buwaten mi, ipanalangin mi nga ildawan kanya. Pabetang-betang it Ampuꞌang Diyus i atkaytung buwat mi, isaꞌun ildawan ya kamu gasiꞌ. ¹⁰Ka subung nayan it magsusurat ngayan duꞌut kasuratan nga magꞌaat,

“Iyan magꞌireg nga pangaꞌgenan ya, masagya baw magayen, kaꞌilangan nga paꞌalaidan yay pangangampangan nga maraꞌe-raꞌet baw aꞌakal.

¹¹Baw iyan mga buwat nga maraꞌe-raꞌet, kaꞌilangan indiꞌan ya na, ka purus magayen nay buwaten ya.

Magayen nga pakiꞌiba-ibat masigkataw ya i kaꞌilangan ya nga pagpaꞌresan nga pirmi.

¹²Sabap talagang ega paglilikatan it mata it Ampuꞌang Diyus i mga mataldeng na kat panleteg ya, baw pagpapagnegan yang pirmi i panalangin nira.

Temed pagkuntraꞌen yay mga mamagbuwat it karaꞌe-raꞌetan.”3:10-12 Awit 34:12-16.

¹³Ta daꞌga in pirming uyun kat kaꞌirgan it Ampuꞌang Diyus i pangaꞌgenan mi, siyuy kabwat it imyu it ikaꞌilang it kiyarurwa mi? Simpri ega. ¹⁴Temed maski beteꞌ pakuriꞌan kamu in sabap duꞌun it pagsunud mi it kaꞌirgan it Ampuꞌang Diyus, magkasagya kamu. Ayaw kamut iꞌlam it kanira. Ega palibegan mi it pikiran mi. ¹⁵In daꞌga, tingleden mi i nakem mi nga kilalaen it may galang si Cristo, nga kanya talagay Ampuꞌan mi. Kaꞌilangan alistu kamu nga pirmi nga magpaꞌyag kat maski siyu nga mingkut it imyu pasar it pagsisiguruun mi ngaytung Magayeng Baritaꞌ. Temed magꞌintur nga luway-luwayen mi i paꞌyag it kanira baw mampang it may galang. ¹⁶Baw yanayan, siguruun mi nga yay pagbuwaten mi nga pirmi, iyan lamang nga magkaꞌrutan mi nga mataldeng, isaꞌun mga mamagsaway it pagsirbi mit ki Cristo, magꞌeyaꞌ-eyaꞌ sira it libak nira ngayat imyu.

¹⁷Ka subung nat paꞌaaten ku, subrang magayen i iyan i ikapabetang it imyu it makuriꞌ, sabap it buwat mi nga magayen, in beteꞌ kaꞌirgan it Ampuꞌang Diyus. Ega gat iyan i ikakuriꞌ mi, sabap it buwat nga maraꞌe-raꞌet. ¹⁸Subung it ki Cristo nga, maski egay kakasalaꞌan ya, temed piyakuriꞌan kanya nga inimatay sabap it aten nga makasalaꞌan. Kat kaꞌsa lamang ngayti nga binwat ya tiyanggung yay kasalaꞌan tami isaꞌun makapaꞌuliꞌ ya tami duꞌun it Ampuꞌang Diyus. Natay talagay bilug ya temed inggen naga kanya it guna it Espiritu Santo. ^19-20Kat Espiritu Santo ngaytu, inaduꞌun yay mga taw it tagnaꞌ paꞌ, nga timpu paꞌ ni Noe.3:19-20 Esang puntuꞌ it itung sugi-sugid nga mapakay, atkaytu na. Iyan ipiyagsasar ni Noe it mga kabanwa ya, ipiyanakem it kanya it Espiritu Santo. Baw paribasay sang kagina-ginawaan i Diyus Amaꞌ, si Jesu-Cristo, baw Espiritu Santo ngaytu, aypaꞌ kaꞌaat ka si Jesu-Cristo gasiꞌ i nagsasar ngayti it mga taw kat timpu ni Noe. Tiyulduꞌan sira talaga it kaꞌirgan it Ampuꞌang Diyus, temed ta, ega naga siyunud nira. Aypaꞌ ka kayti, pagpipirisuun nay mga kiyarurwa nira. Sabap kaꞌlay it pagbuwaten paꞌ na Noe i sakayan nga subung it dakulang kaban, pagpataꞌnan lamang it Ampuꞌang Diyus i mga masusutil ngayti. Pagꞌelaten yay singuliꞌan niray kasalaꞌan nira. Temed it ega naga nagsinguliꞌ sira, piyalyud ya nga yay panriga yat kanira. Pira mana daw nga kataawan i bilang binilwat ya duꞌut danum ngayti, walu mana, na Noe ngayti nga duꞌun it sakayan. ²¹Aypaꞌ sikayan may mapisiꞌ ta nga ladawan it karibriyan ta, sabap iyan biyawtisan ta, ladawan yan it bilang binilwat ta gasiꞌ kat panriga. Sabap pagbawtis ngaytu, ega maat magꞌawaꞌ it buring kat bilug ta, in daꞌga, magpamatuud tu nga miyangut tami na it kapasinsiyaan it mga kasalaꞌan tami. Aypaꞌ ega nay pagꞌiꞌlaman tami nga panriga it Ampuꞌang Diyus. Kapasinsiyaan ngaytu, mapakay na talaga sabap it inggen it paꞌuliꞌ si Jesu-Cristo. ²²Miyuliꞌ na si Jesu-Cristo ngaytu duꞌun it langit, nga kayti, duꞌun na kanyat iwanang ayun it Diyus Amaꞌ. Ta muꞌsang mga anghil duꞌut langit, pati mga ega babasta-bastaen i pudir baw keseg, daꞌgay-daꞌga ipiyasakep nat kanya.

Basta magpamayaꞌ nat Ampuꞌan, kaꞌilangan pasbung it kanya

¹Dakulay siyagkaꞌ ni Cristo nga kakuriꞌan, iyan situ paꞌ kanyat banwa. Aypaꞌ kaꞌilangan tingled nay nakem ta nga pasbung it kanya nga masagkaꞌ. Sabap in siyu nga ega magdaꞌga it kakuriꞌan nga magꞌabut it bilug ya, talagang magpamatuud nga ega na pagbebegbegan kanya it kasalaꞌan. ²Ta it atkayan, ega na pagsumbayaꞌen yay mga maraꞌe-raꞌet nga kaꞌirgan it taw. In daꞌga, yanay pagsarungaen yang pagpaꞌresan mintras egen paꞌ kanya, iyan nga kaꞌirgan it Ampuꞌang Diyus. ³Seked na! Talagang ega na mapakay nga ipasigi mi paꞌ i karaꞌe-raꞌetan nga pagsariyen mit buwat it tagnaꞌ ngayti nga ega pay pagkilala mi it Ampuꞌang Diyus. Ka atkaytuy mga adat mi it tagnaꞌ ngayti, pagsumbayaꞌ it kaꞌiꞌirgan nga mararaꞌway it egay maski unu nga pagsupil it sadili, adat nga rambang mata, palangu, mga pagkasagyaan nga pagpanggaringan it ereꞌeret nga palangu, baw maraꞌway nga pagbuwaten nga ipagdengan it pagsamba mi it mga pagbete-beteꞌen nga diyus.

⁴Takaꞌ kayti, naliluꞌ i mga kaꞌibaan mi, ka in unuka daꞌkamu na magpabaya-bayaꞌ it pangaꞌgenan nira nga pagsumbayaꞌen i muꞌsang mararaꞌway nga kaꞌiꞌirgan nira. Aypaꞌ ka pagtibabaꞌen nira na kamu. ⁵Temed yay matuud, turubagen niraytu duꞌun it Ampuꞌang Diyus. Ka alistu kanya talaga nga betanganan it ukuman i muꞌsang mga taw, maski egen paꞌ u patay na. ⁶Sabap iyan mga patay na, tiyulduꞌan sira nga lagi it Magayeng Baritaꞌ, isaꞌun in pakimatuudun nira, mabgayan sirat kaꞌgenan nga egay kaskedan, maski malabayan niray kamataynen it bilug nga siyubli-subli it taw nga esang panriga it Ampuꞌang Diyus it kana Adan pagkasalaꞌan nira ngayti.4:6 Genesis 3:17-19.

⁷Magꞌadeꞌdeng nay umur it banwa. Aypaꞌ kaꞌilangan, magpakanakem kamu baw pagsupilen mi i sadili mi, isaꞌun kapaꞌres kamu kat panalangin mi. ⁸Subraꞌ it muꞌsa, magsigraras kamu nga banar it esa may esa. Ka basta pagrarasan tay mga maꞌiba ta, mapiyasinsiya tami it mga kamaliꞌ nira. ⁹Ega sana mabeꞌgat kat nakem mi i paꞌabutan it mga sulsug mi kat pamayaꞌ i balay mi, in daꞌga istimaren mi sirat magayen. ¹⁰Dedemdemen mi nga kada esat imyu, binggayan it Ampuꞌang Diyus it kakayaan. Aypaꞌ gayen-gayenen mi i panggamit mi it in unu-unu nga kalasit kakayaan nga ipiyagꞌildaw yat imyu. Kaꞌilangan gamiten mi tu nga ipagtabang it mga sulsug mi kat pamayaꞌ. ¹¹In beteꞌ ipiyagꞌildaw it imu nga esang manigpangadal ka, kaꞌilangan gayen-gayenen mu nga ipangadal i ampang it Ampuꞌang Diyus, ega desang panggeꞌad-geꞌad lamang. In beteꞌ inildawan ka it kakayaan nga manigtabang it beken, sarungaen mut magayen kat keseg it kakayaan ngayan nga ipagꞌildaw it Ampuꞌang Diyus it imu. Sabap muꞌsa ngaytu nga buwaten mi kat tabang ni Jesu-Cristo, ipagkabantug talagaytu it Ampuꞌang Diyus. Talagang ega basta-basta i guna baw kabantugan ya nga egay kaskedan. Kamatuudan tu.

Kaꞌilangan, ega paliluꞌan tami i mga kakuriꞌan nga magꞌabut it aten

¹²Mga pagmaꞌalen ku, ega paliluꞌan mi nga in unuka atkaytu, nga pagpakuriꞌan kamu it maꞌingget, adimaat kalililuꞌan i lumabay tat kakuriꞌan. Atkayan yan ka pagsukda-sukdanan baw pagpaksegen i pamayaꞌ mi. ¹³Ega paliluꞌan, in daꞌga sagyaan mi. Ka sikayan nakaꞌuyut kamu nat mga kakuriꞌan nga nalabayan ni Cristo. Baw basta atkayan, makasagya kamu nga banar in asan nat ipaꞌuliꞌ ya ngayan situ, nga ipatanyag nay kabantugan ya. ¹⁴Magkasagya kamu naga in pagtibabaꞌen kamu sabap it pamayaꞌ mi it ki Cristo, sabap magpamatuud nga pagsasaruman kamu na it mabantug nga Espiritu Santo it Ampuꞌang Diyus. ¹⁵Sana egay maski siyu it imyu nga dapat nga mabetanganan it ukuman sabap it mangingimatay kanyat masigkataw ya, u sabap it mananakaw kanya, mapiyasilabet it ega dapat pasilabtan nga bagay, u magbuwat it maski unu nga buwat nga karaꞌe-raꞌetan. ¹⁶Temed ega naga eyaꞌan mi in beteꞌ mabetanganan kamut ukuman sabap it magpasakep kamu it ki Cristo. In daꞌga pasalamat kamu ga duꞌun it Ampuꞌang Diyus, sabap pagkilalaen kamu nga kaꞌuyutan na it mga taawan ya.

¹⁷Magꞌadeꞌdeng nay aldaw nga ipangukuman nat Ampuꞌang Diyus it mga katataawan. Baw yay matuud, kayti ngaytu pagꞌuꞌnaen ya kita nga mga taawan ya, nga subuk pagꞌukumanan ya na, ka pagsukda-sukdanan yat mga kakuriꞌan i pamayaꞌ tami. Ta it kita, nga may nasiguru nga karibriyan, magkalabay nagat kakuriꞌan, unu sadaw i baraꞌan it mga katataawan nga ega namayaꞌ it Magayeng Baritaꞌ garing duꞌut Ampuꞌang Diyus in abutun nat pangukumanan na sira, ka egay karibriyan nirat kanira? ¹⁸Ka subung nat magbebtang ngayan duꞌut kasuratan nga magꞌaat,

“Maski iyan mga mataldeng kat panleteg it Ampuꞌang Diyus, nga begayan yat karibriyan, may kanira naga kayti nga magkalabayan nga kakuriꞌan.

Aypaꞌ ega talaga masugid i kadakulat kakuriꞌan nga malabayan it mga makasalaꞌan, sira nga alaid talaga kat nakem nira i kaꞌirgan it Ampuꞌang Diyus.”4:18 Kawikaan 11:31.

¹⁹Aypaꞌ in pagꞌabutun kamu it ipiyabetang-betang it Ampuꞌang Diyus nga pakuriꞌ, ipasigi mi lamang i magagayen nga buwat mi. Baw isarig mit kanya i ginawa mi, sabap talagang daꞌtami pagpabaya-bayaꞌan it Ampuꞌang Diyus, kanya nga gimnuna it aten.

Mga munaꞌaw kat magpamaalaꞌ it mga magpamayaꞌ

¹Ta kayti, kamu nga mga magpamaalaꞌ it mga magpamayaꞌ asan it imyung rugar, may ireg ku nga sugiden it imyu. Ka aku, esa gasing manigpamaalaꞌ, baw manigpamatuud sabap it mga kakuriꞌan nga nalabayan ni Cristo nga nagpasar kat mata ku. Esa aku nagang may kaꞌuyutan it kagayenan ya nga ipatanyag ya kat pagdadarapaꞌen. ²Ituy ipagkusugid kut imyu, asi-asi pat imyu, eperan mit magayen i mga nagpasakep it Ampuꞌang Diyus nga ipiyakarguꞌ yat imyu. Siray bilang tupa ya, kamuy manigꞌeper. Mamaalaꞌ kamu it masagyay nakem mi, ega desang magkaregesan lamang. Sabap iyan talagay pagsagyaan it Ampuꞌang Diyus. Talagang sarungaen mit magayen i katengdanan mi, it egay antap it nakem nga kupamirak, in daꞌga kat pagsirbi nga masagya. ³Ega mapakay nga mapiyataꞌas-taꞌas kamu u mapiyanreges kat pagpamaalaꞌ mit mga taw, in daꞌga pamaalaꞌan mi sira kat keseg it magayeng adat mi nga ipaguru it kanira. ⁴Bawnga basta mamaalaꞌ kamu it magayen, pagꞌabut ni Cristo nga bilang Piyakamataꞌas nga Manigꞌeper it kitang mga magpamaalaꞌ, tumbasan kamu it ega basta-bastang kabantugan nga egay katupusan.

Beken nga mga munaꞌaw kat muꞌsang magpamayaꞌ nga ipagpakseg it nakem

⁵Ta kamu gasiꞌ nga mga kamangaꞌwaꞌan, pasakep kamut magayen it padisir it mga magugurang nga magpamaalaꞌ it imyu. Baw kaꞌilangan nga mapiyababaꞌ kamu nga muꞌsa, nga magsigsirbi it esa may esa. Sabap inaat ngayan duꞌun it kasuratan,

“Talagang pagkuntraꞌen it Ampuꞌang Diyus i mga mapiyataꞌas-taꞌas, temed dakulay ildaw nga ipagbegay ya kat mga mapiyababaꞌ.”5:5 Kawikaan 3:34.

⁶Aypaꞌ pababaꞌ kamu nga pasakep it kamatuudan kat gunaan nga Ampuꞌang Diyus nga magpabetang-betang it muꞌsa. Ka in atkayan, ipataꞌas ya kamu in naꞌbut nay ipiyabetang-betang ya nga timpu. ⁷Isarig mit kanya i in unu-unu nga magkademdeman nga pagregnan mi. Sabap tumabang kanya nga matuud, ka pagdedemdemen ya i kabetangan mi.

⁸Kaꞌilangan nga pagsupilen mi i sadili mi baw magtitiyakap kamu nga pirmi. Sabap kalaban mi nga si Satanas, kaꞌalimbawaan ya subuk leon nga magngarawngaw, nga magsuliꞌ-suliꞌ ka magtulus it agden ya. ⁹Ega pasaleꞌsegen mi, in daꞌga labanen mi kanya. Papaꞌgenen mi i pamayaꞌ baw pagsarig mit Ampuꞌan. Ka urut mi na nga ega lamang kamu i maglabay it atkaytung mga kakuriꞌan, in daꞌga muꞌsang mga sulsug mi kat pamayaꞌ situt sinirungat langit.

¹⁰Dedemdemen mi nga, iyan Ampuꞌang Diyus nga pagpanggaringan it muꞌsang ildaw, piniliꞌ ya kamu nga makaꞌistar duꞌun it ega basta-bastang kabantugan ya nga egay katupusan, sabap it pakilagpit mit ki Cristo. Aypaꞌ pagkalabay mit mga kakuriꞌan ngaytu nga situt banwa it ega naga maꞌlay nga timpu, buwaten ya na kamu nga mga taw nga ustuꞌ nay pamayaꞌ, ka mapaꞌgen baw magꞌuꞌunay talaga. Baw paksegen ya kamu kat pagsirbi mit kanya. ¹¹Gunaan kanya talaga, baw magpamegbeg kanya it egay katupusan. Kamatuudan tu.

Pangiyaꞌpusang sugi-sugid

¹²Kat tabang ni Silas5:12 Esa gasing pangaran it kanya, si Silvanus. nakasurat kuy surat ku ngaytu nga pataban ku asat imyu. Si Silas ngaytu, esang sulsug tami kat pamayaꞌ nga talagang magkasarigan kung banar. Sana maski pira lamang ngaytu nga tagaꞌ i mga sugi-sugid ku kat surat ku ngaytu, ireg ku talaga nga kemseg i nakem mi kat pagsunud mit ki Cristo. Baw ipagpamatuud ku nga kamatuudan talagay muꞌsang paꞌyag ku ngaytu pasar it ildaw it Ampuꞌang Diyus. Aypaꞌ maneꞌteꞌ kamu kat ildaw ya ngaytu.

¹³Pagkumustaen kamu it kadakel it mga magpamayaꞌ nga mamagtingped na sinit Roma,5:13 Maat it Ginirego, “Pagkumustaen kamu it babay nga asat Babilonia.” Babay ngaytu nga paꞌaaten, gurupu it mga magpamayaꞌ. Baw Babilonia i panaꞌwag nirat siyudad it Roma, sabap maraꞌe-raꞌet i pagbuwaten it mga taga duꞌun, nga subung it pagbuwaten it mga taga Babilonia it tagnaꞌ paꞌ. Basaen i Daniel kapitulu 5 baw Mga Ipiyalteg kapitulu 17 baw kapitulu 18. sira nga piniliꞌ it Ampuꞌang Diyus nga subuk imyu, nga mga taawan ya na. Pagkumustaen kamu gasiꞌ ni Marcos nga bilang anak ku. ¹⁴Magsigkumu-kumustaen kamu, bilang sang sulsugan kat pamayaꞌ nga magsigraras it esa may esa.

Ipagpanalangin ku kamu nga magpakilagpit it ki Cristo, nga sana maꞌimyu nga muꞌsa i kaꞌimbengan it nakem.