1 Juan

Surat ni Juan duꞌun it Mga Pagpamaalaꞌan ya nga Mga Magpamayaꞌ (1 Juan)

1 Juan

Pauꞌnang Sugi-sugid

Tagsurat it itung surat, si Juan nga esang alagad ni Jesus. Si Juan ngaytu gasiꞌ i tagsurat it pagpangaranan it “Magayen nga Baritaꞌ Pasar it ki Jesu-Cristo nga Ipagpamatuud ni Juan.” Baw iyan “Mga Ipiyalteg it Ampuꞌan nga si Jesus it ki Juan,” si Juan naga ngaytu i piyasurat.

Iyan gurang na si Juan, duꞌun kanya it Efeso timnaꞌid baw nangadal. Kat iting timpu may mga taw nga, lamang kaꞌuyutan it mga magpamayaꞌ it tagnaꞌ, temed nanadili nat pasepsep baw magpanulduꞌ nat kuntraꞌ kat kamatuudan nga garing duꞌun it Ampuꞌang Diyus. Sabap ipagpaliꞌwan nira nga ega nagbalyung taw nga banar si Jesus, in daꞌga subuk biyete-beteꞌ lamang nga taw kanya. Ipagpaliꞌwan nira gasiꞌ nga sira lamang i may kamatuudang kasepsep, baw maat ega naga kasalaꞌan maski ega supilen i sadili, mapakay naga kunuꞌ nga sumbayaꞌen i maski unu nga sadili ta nga kaꞌiꞌirgan. Ta, it atkayti, isiyurat ni Juan i surat ya ngaytu ka tiyubag ya i kamaliꞌ ngayting ipagpanulduꞌ. Ireg ya nga, mga tumanggap it surat ya ngaytu, maꞌrutan nirang banar in unu talaga i kamatuudan pasar it ki Jesus, pasar it karibriyan, baw pasar it pangaꞌgenan nga magkasagyaan it Ampuꞌang Diyus kat mga taawan ya.

Pasar it Ampang nga magbegay it kaꞌgenan

¹Pagsuratan ku kamu pasar it ki Jesu-Cristo, kanya nga pagpangaranat Ampang nga magbegay it kaꞌgenan nga egay kaskedan. May kanya naytung lagi it tagnaꞌ paꞌ, iyan ega pay banwa. Baw kami nga mga alagad ya, talagang nagnegan namen i mga ampang ya, baw talagang naltegan namen kanya. Naꞌeket-eket namen baw naꞌipuꞌ it alima namen. ²Eeꞌ baꞌ, kanya ngaytung puꞌun it kaꞌgenan, itiyanyag nat amen. Talagang naltegan namen kanya. Aypaꞌ ka ipagpamatuud namen na, baw ipagpangadal namen nat imyu i pasar it kanya ngaytu nga egen it egay kaskedan. Garing it tagnaꞌ paꞌ, duꞌun kanya nga lagi it adapan it Diyus Amaꞌ, baw kayti, itiyanyag na kanya situt amen. ³Ipagpamatuud namen it imyu i naltegan namen baw nagnegan ngaytu, isaꞌun makapakiꞌiba-iba kamu gasit amen. Baw ega lamang iyan, in daꞌga sang tamiyan nay magpakiꞌiba-iba it Diyus Amaꞌ baw Anak ya nga si Jesu-Cristo. ⁴Ipagsurat namen i mga itu ngaytu isaꞌun makasagya tami it kasagyaan nga egay kakurangan.

In magpakiꞌiba-iba ta nat Ampuꞌang Diyus, simpri alaid ta nat kasalaꞌan

⁵Ituytu i ampang ngayan nga nagnegan namen duꞌun it Anak it Ampuꞌang Diyus nga ipagsugid namen it imyu. Iyan Ampuꞌang Diyus, kabilangan ya, maꞌyag nga tidaw. Egay maski unu nga madlem duꞌun it kanya. ⁶In maat ta, magpakiꞌiba-iba ta na it kanya, temed magpangaꞌgenan ta paꞌ kat kadleman, ka magsisigi paꞌ nga magbuwat it kasalaꞌan, magꞌambut ta lamang. Daꞌta magpangaꞌgenan nga uyun kat kamatuudan. ⁷Temed in pirmi ta nga magpangaꞌgenan uyun kat kaꞌyagan, nga alaid kat kasalaꞌan, subung nagat Ampuꞌang Diyus, nga kanya, purus kat kaꞌyagan talaga, magayen talagay pakiꞌiba-iba tami nga magpamayaꞌ it kanya. Baw iyan timnuruꞌ nga duguꞌ ni Jesus nga Anak ya, paglimpiyuꞌun ya kita, ka pagꞌawaꞌen yay muꞌsang kasalaꞌan ta.

⁸Ta, in pagꞌaaten ta gasiꞌ nga kita, egay kakasalaꞌan, pagꞌambutan ta lamang i sadili ta, baw alaid it aten i kamatuudan. ⁹Temed in pagꞌaminen tami duꞌun it Ampuꞌang Diyus i mga kasalaꞌan ta, masiguru ta nga ipasinsiya yat aten i mga itu ngaytu, baw limpiyuꞌun ya kita kat muꞌsang karaꞌe-raꞌetan ta, sabap purus kamatuudan i kanya baw talagang mataldeng. ¹⁰In pagꞌaaten tami nga daꞌta magkasalaꞌan, subuk pagpakiꞌambutun tami i Ampuꞌang Diyus. In atkayan, ega paꞌ natantuwan tami i ampang ya.

¹Kamu nga bilang mga anak ku, ipagsurat kuytuy itung mga bagay asat imyu isaꞌun baꞌ daꞌkamu na magkasalaꞌan. Takaꞌ, sumang kaꞌanu, magkabwat ta naga it kasalaꞌan, temed dedemdemen tami nga may magpanindeg it aten duꞌun it Diyus Amaꞌ. Si Jesu-Cristo, nga kanya talagay mataldeng, kanyay magpanindeg ngaytut aten. ²Ka si Jesus ngaytu, binwat kanya nga panalisi, isaꞌun matanggung yay mga kasalaꞌan tami. Tiyanggung ya ngaytu nga kasalaꞌan, ega maat aten lamang, in daꞌga kasalaꞌan it muꞌsang taw situt sinirungat langit.

In kilala tami i Ampuꞌang Diyus, simpri sunudun tami i mga ipiyagꞌurdin ya

³Pagsisiguruun ta naytu nga kilala ta nay Ampuꞌang Diyus, basta pagsunudun tat magayen i mga ipiyagꞌurdin ya. ⁴In may magꞌaat nga, “Kilala ku nayan kanya,” temed ega magsunud it mga urdin ya, ambut ya lamang. Talagang egay uru-urut yat kamatuudan. ⁵Temed in siyuy magkasunud it kaꞌustuꞌan it muꞌsang ampang it Ampuꞌang Diyus, talagang ustuꞌ na i pagmaꞌal yat Ampuꞌang Diyus ngaytu. Kat pagsunud ta ngaytu, masiguru ta nga kita, uyun na talaga duꞌun it Ampuꞌang Diyus, teꞌteꞌ na nga maglalagpit duꞌun it kanya. ⁶Aypaꞌ iyan magꞌaat nga, “Pagteꞌteꞌan ku na si Jesu-Cristo, nga talagang maglalagpit aku nat kanya,” kaꞌilangan mangaꞌgenan kanya it subuk pangaꞌgenan ni Jesu-Cristo ngaytu, iyan situ paꞌ kanyat sinirungat langit.

⁷Kamung mga pagmaꞌalen ku, ega nagaytuy baꞌgung urdin nga ipagsurat ku asat imyu, in daꞌga iti naga, dati ngayting ipiyagꞌurdin it imyu it tagnaꞌ paꞌ. Iyan paꞌaaten ku ngaytung dati nga urdin, iyan nga ipiyangadal ngaytung ampang nga nagnegan mi na nga magsigraras tami it esa may esa. ⁸Temed gasiꞌ, subuk may baꞌgu nga ipagsurat ku nga urdin sabap it raras ngaytu. Ka raras ngaytu, talagang nagmatuud tu duꞌut kaꞌgenan ni Jesus. Baw kamu gasiꞌ, pagꞌadaten mi na kayti i raras ngaytu. Ta it atkayan na, kabilangan ya, subuk magsipat nay kadleman nga kasalaꞌan. Magꞌeyag na kat pikiran mi i matuud nga kaꞌyagan nga garing duꞌut Ampuꞌang Diyus.

⁹Iyan magꞌaat nga, kanya, kat kaꞌyagan na, temed pagpakitabugan ya paꞌ i sulsug ya kat pamayaꞌ, yay matuud, duꞌun paꞌ kanyat kadleman. ¹⁰Temed, taw nga may raras ya nat sulsug ya kat pamayaꞌ, iyan i matuud nga magpangaꞌgenan kat kaꞌyagan. Talagang in atkayan, ega nay asat kanya nga ipagkakursud ya kat kasalaꞌan. ¹¹Temed iyan nga pagpakitabugan ya paꞌ i sulsug ya kat pamayaꞌ, talagang duꞌun paꞌ kanyat kadleman nga kasalaꞌan. Kabilangan ya, subung it magpanaw it madlem baw ega magkaturnuwan ya in ari magayen nga panawan ya, sabap pagbeblegen paꞌ kanya it kadleman ngaytu nga kasalaꞌan.

In matuud nga kilala ta nay Ampuꞌang Diyus, kaꞌilangan ega na pagsumbayaꞌen tami i maski unu nga karaꞌe-raꞌetan

¹²Pagsuratan ku kamu nga bilang mga anak ku sabap it piyasinsiya na i mga kasalaꞌan mi, ka tiyanggung na ni Jesus duꞌun it krus.

¹³Pagsuratan ku kamung magugurang sabap kilala mi naga kanya nga, garing it tagnaꞌ paꞌ nga ega pay banwa, may kanya nang lagi.

Pagsuratan ku kamung mangaꞌwaꞌen sabap, kat pagsarig mit Ampuꞌan, naꞌindaꞌeg mi na si Satanas nga Gimpuꞌun it Karaꞌe-raꞌetan.

Pagsuratan ku kamung mga bilang anak ku sabap kilala mi na talaga i Amaꞌ ta nga Ampuꞌang Diyus.

¹⁴Pagsuratan ku kamung magugurang sabap kilala mi naga kanya ngaytu nga, garing it tagnaꞌ paꞌ nga ega pay banwa, may kanya nang lagi.

Pagsuratan ku kamung mangaꞌwaꞌen sabap makseg i pamayaꞌ mi. Teꞌteꞌ na asat imyu i ampang it Ampuꞌang Diyus, baw ta, naꞌindaꞌeg mi na i Gimpuꞌun ngaytit Karaꞌe-raꞌetan.

¹⁵Asi-asi pat imyu, ega na labiyen mi i mga adat situt sinirungat langit nga kuntraꞌ it kaꞌirgan it Ampuꞌang Diyus, u maski unu situ nga kuntraꞌ it kanya. Ka in siyu pay magkayli it mga itu ngaytu, maꞌyag nga egay pagmaꞌal yat Amaꞌ ta ngaytu. ¹⁶Sabap muꞌsang karaꞌe-raꞌetan situt sinirungat langit, kuntraꞌ talaga it Ampuꞌang Diyus. Subung it adat nga pagsumbayaꞌen i sadiling kaꞌirgan nga maraꞌe-raꞌet, adat nga kupisiꞌen nay muꞌsang bagay nga magkaltegan, baw adat nga ipagpalandi-landi i mga bagay kat pangaꞌgenan ta. Ega yan garing duꞌut Diyus Amaꞌ i itung mga adat, in daꞌga garing situt sinirungat langit. ¹⁷Temed yay matuud, may kaskedan it banwa ngaytu baw muꞌsa nga magkasasawan it taw nga paglabiyen nira. Temed iyan masunud it kaꞌirgan it Ampuꞌang Diyus, iyan i may kaꞌgenan nga egay kaskedan.

May magꞌaꞌabut nga kakuntraꞌ ni Cristo

¹⁸Mga bilang anak ku, adeꞌdeng nay kaskedan ngaytu, nga umur it banwa. Nagnegan mi na nga may mabut nga kakuntraꞌ ni Cristo. Baw maski kayti ngaytu, dakel i magpakikuntraꞌ it ki Cristo ngaytu, aypaꞌ urut tami na nga talagang adeꞌdeng nay umur it banwa. ¹⁹Mga magpakikuntraꞌ ngaytu, maski kaꞌuyutan ta nagat tagnaꞌ, temed daꞌsira magpaꞌuyun it aten it kamatuudan nga paꞌuyun. Ka in talagang magpaꞌuyun sirat aten, simpri maneꞌteꞌ yan sirang kaꞌiba-iba ta. Temed it nagpablag sira, simpri maꞌyag nga ega na kaꞌuyutan tami i maski siyu it kanira.

²⁰Temed kamu, inildawan kamu na nga pagsasaruman kamu nat Espiritu Santo. Aypaꞌ ka magkatantuwan mi na i kamatuudan. ²¹Ega maat pagsuratan ku kamu sabap it ega magkaꞌrutan mi i kamatuudan pasar it ki Cristo, in daꞌga isaꞌun mapasiguru ku kamu kat kamatuudan ngaytu nga magkaꞌrutan mi na. Baw ta, urut mi na gasiꞌ nga iyan mga kaꞌambutan nga panulduꞌ, ega garing kat kamatuudan ngaytu.

²²Siyu i paꞌaaten ngaytung maꞌambut, in daꞌga iyan magpaliꞌwan nga si Jesus, ega kanyay Cristo ngayting Manriribring Adiꞌ nga isiyanggup it Ampuꞌang Diyus? Atkaytu nga taw i paꞌaaten nga kakuntraꞌ ni Cristo ngayti, kanya nga magpandaꞌga it Diyus Amaꞌ baw Anak ya nga si Jesu-Cristo. ²³Ka in siyuy ega magpamatuud nga Anak it Ampuꞌang Diyus si Jesus, ega gasiꞌ mapakay nga pagtanggapen kanya it Diyus Amaꞌ. Temed kanya nga magpamatuud nga Anak talagat Ampuꞌang Diyus si Jesus ngaytu, simpri yay matuud, kanya gasing Amaꞌ i Ampuꞌang Diyus.

²⁴Ta, kamu ngaytu, inturun mit magayen nga maneꞌteꞌ asat imyu i mga ampang ngaytung nagnegan mi garing pat tagnaꞌ. Ka in talagang idawaꞌ mi kat ulu mi i nagnegan mi ngaytu garing pat tagnaꞌ, sikayan magkasiguru mi nga ega maꞌugad-ugad i pakiꞌiba-iba mi it Diyus Anak baw Amaꞌ ya. ²⁵Baw ituy isiyanggup it aten it Ampuꞌang Diyus, kaꞌgenan nga egay kaskedan.

²⁶Isiyurat ku nay mga itu ngaytu pasar it mga taw ngayti nga magsarit buwat it ikateꞌag-teꞌag it pamayaꞌ mi. ²⁷Temed kamu, piyapasaruman kamu na ni Cristo it Espiritu Santo. Aypaꞌ it may magsasarum na asat imyu nga Espiritu Santo ngaytu, ega na kaꞌilangan nga tulduꞌan kamu pat beken pasar it in unuy kamatuudan. Ka kanya na ngayan i magtulduꞌ it imyu it muꞌsang bagay, baw egay tulduꞌ ya nga daꞌga matuud. Aypaꞌ sunudun mi i tulduꞌ ngaytu it Espiritu Santo, baw teꞌteꞌan mi si Jesu-Cristo.

²⁸Aypaꞌ, mga bilang anak ku, teꞌteꞌan mi si Jesu-Cristo, isaꞌun, pagpaꞌuliꞌ ya situ, daꞌta na magꞌaliꞌ-aliꞌ u meyaꞌ it kanya in duꞌun nat adapan ya. ²⁹Urut mi na nga talagang mataldeng i Ampuꞌang Diyus. Aypaꞌ sikayan matantuwan mi nga sira nga magbuwat nat mataldeng kat panleteg it Ampuꞌang Diyus ngaytu, sira i ipagpabetang ya nga mga anak ya na.

Kitang magpamayaꞌ it ki Jesu-Cristo, mga anak ta na it Ampuꞌang Diyus

¹Panawun lamang it pikiran mi in sang unuy kadakulat raras it Diyus Amaꞌ it aten. Dakulaꞌ nga banar i raras ya ngaytu, ka ipagpabetang ya na kita nga mga anak ya. Ta kayti, atkayan na nga matuud, nga mga anak tami na it Ampuꞌang Diyus. Temed ta, kadaklan it taw situt banwa, ega magkilala sira it Ampuꞌang Diyus, aypaꞌ ka simpri, ega gasiꞌ pagkilalaen nira kita nga mga inanak ya. ²Mga pagmaꞌalen ku, kayti mga anak tami nang matuud it Ampuꞌang Diyus. Lamang ega paꞌ magkaꞌrutan ta in maꞌunuy pamilug ta duꞌun. Temed ituy pagsisiguruun ta, asan it pamaꞌuliꞌ situ ni Jesu-Cristo, masbungan ta na kanya, ka maltegan ta nat magayen in maꞌunu kanya. ³Aypaꞌ in siyuy may itung kasiguruwan, magpaꞌres kanyang pirmi nga mangaꞌgenan it alaid kat kasalaꞌan, sabap si Jesu-Cristo ngaytu, talagang alaid kat muꞌsang kasalaꞌan.

Ega mapakay nga pasigi paꞌ nga muwat it kasalaꞌan i bilang ipiyanganak nat Ampuꞌang Diyus

⁴Iyan magbuwat it kasalaꞌan, paglabanen yay mga urdin it Ampuꞌang Diyus ngaytu. Sabap yay paꞌaaten nga kasalaꞌan, paglabanen i mga urdin it Ampuꞌang Diyus. ⁵Magkaꞌrutan mi nga piyalampud na pasiꞌ si Jesu-Cristo situt banwa isaꞌun matanggung ya nay mga kasalaꞌan ta. Baw kanya, talagang egay kakasalaꞌan. ⁶Iyan magpangaꞌgenan it teꞌteꞌ nay pamayaꞌ yat ki Jesu-Cristo, ega nayan magpasigi pat muwat it kasalaꞌan. Temed iyan nga magsisigi pay buwat yat kasalaꞌan, ega yan nakatantu in maꞌunu si Jesu-Cristo baw egay tantung pagkilala yat kanya.

⁷Mga bilang anak ku, ayaw kamut pateꞌag-teꞌag it maski siyu. Iyan nga magbuwat it kataldengan, mataldeng nayan kat panleteg it Ampuꞌang Diyus, subung it ki Jesu-Cristo nga talagang mataldeng. ⁸Temed iyan nga magbuwat pat kasalaꞌan, ki Satanas payan, sabap garing paꞌ it tagnaꞌ magsisigi nang magkasalaꞌan si Satanas ngaytu. Aypaꞌ ka piyalampud situt aten i Anak it Ampuꞌang Diyus, isaꞌun ranggaꞌen yay buwat ni Satanas ngaytu. ⁹Ka in siyu-siyuy bilang ipiyanganak nat Ampuꞌang Diyus, ega nayan magpasigi pat muwat it kasalaꞌan. Simpri ega na mamlag kanya it bilang nanganak ngaytut kanya. Ta it Amaꞌ ya nay Ampuꞌang Diyus, ega na mapakay nga pasigi paꞌ kanyat muwat it kasalaꞌan. ¹⁰Sikaytu ta makilalaan in siyu may siyu i bilang anak nat Ampuꞌang Diyus, baw siyu pay bilang anak ni Satanas. Iyan nga ega magpaꞌres it muwat it kataldengan kat panleteg it Ampuꞌang Diyus baw egay raras yat sulsug ya kat pamayaꞌ, siguradung ega yan anak it Ampuꞌang Diyus.

Mga anak it Ampuꞌang Diyus, magꞌadat it magsigraras

¹¹Itu nagay nagnegan mi ngayang ipiyangadal it imyu garing pat tagnaꞌ, nga magsigraras tami it esa may esa. ¹²Daꞌtami pasbung it bilang anak ngayti ni Satanas nga si Cain,3:12 Genesis kapitulu 4. kanya nga minimatay it sulsug ya. Ta, unuka inimatay ya? Sabap it maraꞌe-raꞌet i buwat yat kanya, temed mataldeng kat panleteg it Ampuꞌang Diyus i buwat it sulsug ya. Aypaꞌ ka inisgan ni Cain i sulsug ya ngayti.

¹³Mga sulsug ku kat pamayaꞌ, ega mi paliluꞌan in pagꞌisgan kamu it beken nga taw situt sinirungat langit, sira ngayang ega magpamayaꞌ it ki Jesu-Cristo. ¹⁴Temed maꞌyag nat aten nga kita, ega na subuk patay kat panleteg it Ampuꞌang Diyus, in daꞌga, pagbebgayan ta nat kaꞌgenan nga egay kaskedan. Urut ta naytu sabap may raras ta na talaga it mga sulsug ta kat pamayaꞌ. Iyan ega pay raras ngaytu, subuk sakep paꞌ kanyat kamataynen. ¹⁵Ka in siyuy magpakitabug it sulsug ya kat pamayaꞌ, subung paꞌ kanya it mangingimatay it masigkataw ya. Daꞌga baꞌ magkaꞌrutan mi na nga, in siyuy mangingimatay ngaytut masigkataw ya, talagang egay kaꞌgenan yang egay kaskedan?

¹⁶Dedemdemen mi tu, nga si Jesu-Cristo, ibinggay yay pati ginawa ya sabap lamang it aten isaꞌun maribri ta. Sikayan magkatantuwan ta nay paꞌaaten nga kamatuudan nga raras. Aypaꞌ kita, kaꞌilangan ta gasing tumabang it mga sulsug ta kat pamayaꞌ, maski maat ikagtas nat ginawa ta. ¹⁷Temed in beteꞌ pagpabaya-bayaꞌan ta na lamang i mga makukuriꞌ nga kabetangan it mga sulsug ta kat pamayaꞌ, ka maski may kaya ta, pagꞌaligan tami nga itabang it kanira, in atkayan magꞌuꞌunu maꞌaat tami nga may pagmaꞌal ta nat Ampuꞌang Diyus? ¹⁸Kamu nga bilang anak ku, iyan bay magayen, ega desang ipagsugid ta nga magsigraras tami, in daꞌga ipagpalteg ta kat mga pagbuwaten ta nga kamatuudan i raras ta ngaytu.

¹⁹Aypaꞌ sikayan maꞌrutan ta nga kita, sakep nat kamatuudan nga garing duꞌun it Ampuꞌang Diyus. Baw sikayan gasiꞌ, ega na magulu i ulu ta nga madap it kanya. ²⁰Temed in kat nake-nakem ta pagꞌukumanan tay sadili ta, ka urut ta nga ega naga kamatuudan i raras ta, magayen demdemen ta nga subraꞌ pang mataꞌas it aten i Ampuꞌang Diyus baw magkaꞌrutan yay muꞌsa, pati kat nake-nakem ta ngaytu.

²¹Mga pagmaꞌalen ku, in egay pagꞌukumanan it nakem ta kat sadili ta, simpri ega nay iꞌlam ta in madap ta nat Ampuꞌang Diyus. ²²Ta sikayan, unu-unuy angutun ta duꞌun it kanya, siguradung matanggap ta, sabap pagsunudun tay mga urdin ya baw pagbuwaten tay pagsagyaan ya. ²³Ituytu i ipiyagꞌurdin ya, nga mamayaꞌ ta baw sumarig it Anak yang si Jesu-Cristo, baw magsigraras tami it esa may esa nga subung it ipiyagꞌurdin it aten ni Jesu-Cristo ngaytu. ²⁴Ta kanya nga masunud it mga urdin it Ampuꞌang Diyus, talagang teꞌteꞌ duꞌun it Ampuꞌang Diyus i pangaꞌgenan ya, baw Ampuꞌang Diyus ngaytu, teꞌteꞌ naga duꞌun it kanya. Baw tabang ngaytut aten it Espiritu Santo nga ipiyapasarum ya situt bilug tami, iyan i ipagkatantu ta nga teꞌteꞌ na situt aten i Ampuꞌang Diyus.

In magꞌuꞌunu ta masiguru in Espiritu Santo i magpanakem it esang taw it mga ampangen ya

¹Mga pagmaꞌalen ku, ega basta-basta pamayaꞌnen mi i magꞌaat nga, “Ampang ku ngaytu, garing duꞌun it Espiritu Santo, ka ipiyanakem yat aken.” Kaꞌilangan niidan baw ineꞌteꞌen mi daꞌan, isaꞌun masiguru mi nga garing nga matuud duꞌun it Ampuꞌang Diyus i inampang ya ngayan. Sabap kayti, dakel nay mga magpapru-prupitaꞌ nga magpangadal nat katataawan situt sinirungat langit. ²Magꞌaꞌatkaytu yan i ikaꞌrut mi in talagang Espiritu Santo nga piyapasarum it Ampuꞌang Diyus i magpanakem it esang taw. Iyan nga magpamatuud nga si Jesu-Cristo, nagbalyu talaga nga taw nga banar baw limnampud situt banwa, siguradung Espiritu Santo it Ampuꞌang Diyus i magpanakem it kanya. ³Temed iyan magpaliꞌwan nga ega nagbalyung taw nga banar si Jesus, siguradung ega yan Espiritu Santo it Ampuꞌang Diyus i magpanakem it ampangen ya. In daꞌga, yay matuud, panakem yan it kakuntraꞌ ngaytu ni Cristo, kanya nga ipiyagꞌaat ngayan it imyu nga mabut. Baw maski kayti, situ nat banwa ngaytu i atkaytung pakikuntraꞌ it ki Cristo.

⁴Kamu, mga bilang anak ku, mga anak kamu na it Ampuꞌang Diyus. Baw nakaꞌindaꞌeg kamu nat mga maꞌambut ngayang magpapru-prupitaꞌ. Naꞌindaꞌeg mi na sabap subraꞌ pang gunaan i Espiritu Santo nga magsasarum asat bilug mi, subraꞌ pat maraꞌe-raꞌet ngayting si Satanas nga magpanakem it mga taw nga ega nagpasakep it Ampuꞌang Diyus. ⁵Sira ngaytu nga mga magpapru-prupitaꞌ, kaꞌibaan tu sira it mga ega magpamayat ki Jesu-Cristo, aypaꞌ mga ampang nira, uyun nagat mga adat it mga ega magpamayaꞌ ngayti. Ta, mga kasubung nirang ega magpamayaꞌ, iyan i magpagneg it kanira. ⁶Temed kita, sakep ta nat Ampuꞌang Diyus. Baw in siyuy magkilala it Ampuꞌang Diyus, iyan i magpagneg it aten. Iyan ega sakep it Ampuꞌang Diyus, ega magpagneg kanyat aten. Sikayan ta maꞌrutan i kamatuudang ampang nga garing duꞌun it Espiritu Santo baw kaꞌambutang ampang nga garing duꞌun it ki Satanas.

Ampuꞌang Diyus i puꞌun it kararas

⁷Mga pagmaꞌalen ku, siguruun ta nga magsigraras tami it esa may esa, sabap Ampuꞌang Diyus, kanyay puꞌun it kararas ngaytu. Ta kada may raras na ngaytu, maꞌyag nga bilang ipiyanganak na kanya it Ampuꞌang Diyus baw kilalang-kilala ya na kanya. ⁸Temed iyan ega pay raras ngaytu, ega payan magkilala it Ampuꞌang Diyus, sabap Ampuꞌang Diyus talagay puꞌun it raras ngaytu. ⁹Eeꞌ baꞌ, talagang ipiyalteg nat Ampuꞌang Diyus i kadakulat raras yat aten, iyan ipiyalampud ya na ngayan situt denaꞌ i Anak yang paeꞌesa-esa nga egay kasbung, nga tumanggung it kasalaꞌan ta, isaꞌun mabgayan ya kita it kaꞌgenan nga egay kaskedan. ¹⁰Itu naytuy matuud nga pagmaꞌal, ega maat aten nga pagmaꞌal it Ampuꞌang Diyus, in daꞌga kanya ngaytung pagmaꞌal nga may raras it aten. Ka piyapaꞌasitu yat aten i Anak ya nga buwaten nga panalisi, isaꞌun mapasinsiya it aten i mga kasalaꞌan tami. ¹¹Mga pagmaꞌalen ku, ta it atkaytuy kadakulat raras it Ampuꞌang Diyus it aten, kaꞌilangan magsigraras tami gasiꞌ i aten. ¹²Garing it tagnaꞌ paꞌ, egay nakalteg it Ampuꞌang Diyus. Temed in talagang may raras ta nat esa may esa, maꞌyag nga magsasarum na talaga situt aten i Ampuꞌang Diyus ngaytu, baw kiyumplitu ya na i raras ta ngaytu.

¹³Baw magkaꞌrutan tami nga magpaneꞌteꞌ ta na duꞌun it Ampuꞌang Diyus, baw kanya, teꞌteꞌ gasiꞌ situt aten, sabap pirmi ta nga pagtabangen it Espiritu Santo nga piyapasarum ya situt bilug tami. ¹⁴Baw kami ngaytu, talagang naltegan namen i Anak it Ampuꞌang Diyus, baw ipagpamatuud nga tiyaꞌeg it Diyus Amaꞌ i Anak ya ngaytu, nga kanyay Manriribri it muꞌsang taw situt sinirungat langit. ¹⁵Ta kayti, in siyuy magpamatuud nga si Jesus, Anak kanya it Ampuꞌang Diyus, talagang pagteꞌteꞌan kanya it Ampuꞌang Diyus baw kanya, teꞌteꞌ na gasiꞌ duꞌun it Ampuꞌang Diyus ngaytu. ¹⁶Magkaꞌrutan ta na talaga baw pagpamayaꞌnen ta nga kita, pagrarasan nga banar it Ampuꞌang Diyus.

Ampuꞌang Diyus talagay puꞌun it kararas. Ta kanya nga magpaneꞌteꞌ kat raras yat masigkataw ya, pagteꞌteꞌan ya gasiꞌ i Ampuꞌang Diyus, baw Ampuꞌang Diyus, magpaneꞌteꞌ naga duꞌun it kanya. ¹⁷Sikayan magkatantuwan ta na nga nakumplitu na i kararas ta ngaytu. Aypaꞌ ka ega na pagꞌiꞌlaman tami i aldaw ngayan nga ipangukuman. Sabap unu pay maiꞌlaman it magpasbung ta nat ki Jesu-Cristo situt banwa ngaytu? ¹⁸Ka basta kamatuudan i pagmaꞌal tat Ampuꞌang Diyus baw kararas tat masigkataw ta, ega nay iꞌlam tamit panriga. Sabap iyan ustuꞌ nga pagmaꞌal, subuk magkataburan yay iꞌlam ngaytu. Ka iyan talagay pagꞌiꞌlaman it mga taw, rigaen. Aypaꞌ in magꞌiꞌlam ta pat rigaen, maꞌyag nga kurang pay pagmaꞌal baw kararas ta.

¹⁹Yay matuud, may pagmaꞌal baw kararas tami nay aten sabap it pagmaꞌalen baw pagrarasan ta nga lagi it Ampuꞌang Diyus. ²⁰In beteꞌ may magꞌaat nga, “Pagmaꞌalen ku nay Ampuꞌang Diyus,” temed in may sulsug ya paꞌ kat pamayaꞌ nga pagpakitabugan ya, ambut ya lamang i pagmaꞌal ya ngayan. Ka in ega pay raras yat kaꞌibaan ya nga lelete-letegan ya nat kaꞌlay, magꞌuꞌunu maꞌalen yay Ampuꞌang Diyus nga ega magkaltegan ya? ²¹Ka yay ipiyagꞌurdin ya ngaytu it aten, nga in siyuy magmaꞌal it Ampuꞌang Diyus, dapat nga rarasan ya gasiꞌ i sulsug ya kat pamayaꞌ.

Kaꞌilangan pamayaꞌnen i pamatuud nga Anak it Ampuꞌang Diyus si Jesu-Cristo

¹In siyu-siyuy magpamayaꞌ nga si Jesus, kanya nay paꞌaateng Cristo ngayti nga Manriribring Adiꞌ nga isiyanggup, subung na kanyat ipiyanganak it Ampuꞌang Diyus. Baw yay matuud, in pagmaꞌalen ta kanya ngaytu nga bilang nanganak, simpri rarasan ta na i kumpur bilang ipiyanganak ya nga beken. ²Baw ituytu i ikasiguru ta nga pagrarasan tami i kumpur bilang ipiyanganak it Ampuꞌang Diyus, itu nga pagmaꞌalen tami i Ampuꞌang Diyus ngaytu baw pagsunudun tami i kumpur ipiyagꞌurdin ya. ³Ituytu i paꞌaaten nga pagmaꞌal tat Ampuꞌang Diyus, masunud tami it mga urdin ya. Ka mga urdin ya ngaytu, ega nagaytu subraꞌ nga mabeꞌgat. ⁴Sabap kada bilang ipiyanganak nat Ampuꞌang Diyus, magkaꞌindaꞌeg ya na i pagsakep it kanya it karaꞌe-raꞌetan situt banwa ngaytu. Magkaꞌindaꞌeg ta naytu kat keseg it pamayaꞌ baw pagsarig tat ki Jesu-Cristo. ⁵Ta siyu may siyuytu i magkaꞌindaꞌeg it pagsakep ngaytut kanya it karaꞌe-raꞌetan situt banwa ngaytu? Sira lamang nga magpamayaꞌ nga si Jesus, egay beken, Anak talaga kanya it Ampuꞌang Diyus.

⁶Si Jesu-Cristo ngaytu, kanyay limnampud situt denaꞌ. Biyawtis kanya duꞌun it danum. Ipiyaturuꞌ i duguꞌ ya kat kamataynen ya. Talagang ega lamang desang nagpabawtis kanya duꞌun it danum, in daꞌga ipiyaturuꞌ ya naga gasiꞌ i duguꞌ ya. Baw yay magpamatuud kaytu, Espiritu Santo, sabap purus kamatuudan i ipagpaliꞌwan it Espiritu Santo ngaytu. ⁷Yay matuud, tulu talagay magpamatuud kaytu pasar it ki Jesu-Cristo, in siyu talaga kanya. ⁸Tulu ngaytu, Espiritu Santo, danum baw duguꞌ. Baw nagꞌuyu-uyunun i tulu ngaytu. ⁹In pagpamayaꞌnen tami i pamatuud it taw, subrang mapaꞌgen i pamatuud it Ampuꞌang Diyus, aypaꞌ simpri kaꞌilangan pamayaꞌnen tami. Baw iyan ngayan, talagang ipagpamatuud it Ampuꞌang Diyus nga Anak ya talaga si Jesu-Cristo. ¹⁰Aypaꞌ siyu-siyuy magpamayaꞌ baw magsarig it Anak it Ampuꞌang Diyus, pagsisiguruun ya kat nake-nakem ya nga talagang matuud i pamatuud ngaytut Ampuꞌang Diyus. Temed iyan ega magpamayaꞌ it pamatuud ngaytut Ampuꞌang Diyus, egay beken, pagpakiꞌambutun yay Ampuꞌang Diyus ngaytu, ka ega pagpamayaꞌnen yay ipagpamatuud ya pasar it Anak ya. ¹¹Ka ituytu i pamatuud ya ngaytu. Kaꞌgenan nga egay kaskedan i begay it Ampuꞌang Diyus it aten, baw maꞌaten tu sabap duꞌun it pamayaꞌ baw pagsarig tat Anak ya ngaytu. ¹²Iyan nga maglalagpit nat Anak it Ampuꞌang Diyus, iyan i may kaꞌgenan ngayan nga egay kaskedan. Temed iyan ega maglalagpit it Anak ngaytut Ampuꞌang Diyus, talagang daꞌgay kanya.

Pangiyaꞌpusang sugi-sugid ni Juan

¹³Itung mga bagay, ipagsurat kuytu asat imyu nga mga magpamayaꞌ baw magsarig it Anak it Ampuꞌang Diyus, isaꞌun masiguru mi nga kamu, may kaꞌgenan na nga egay kaskedan. ¹⁴Baw ega na kaꞌilangan magꞌaliꞌ-aliꞌ ta pat madap duꞌun it kanya ka pagsisiguruun ta nga, maski unuy angutun ta nga uyun kat kaꞌirgan ya, talagang sumambung kanya. ¹⁵Ta it magkaꞌrutan ta na nga magsambung na kanyat aten, magkaꞌrutan ta na gasiꞌ nga ipagbegay ya nat aten i unu-unu nga pagꞌangutun ta ngaytu duꞌun it kanya.

¹⁶Itu paꞌ gasiꞌ i ireg ku nga iꞌaat it imyu. In beteꞌ maltegan muy esang sulsug mu kat pamayaꞌ nga nakabwat it kasalaꞌan nga mapasinsiya nagat Ampuꞌang Diyus, kaꞌilangan ipanalangin mu kanya, isaꞌun ildawan kanyat Ampuꞌang Diyus nga makaꞌuliꞌnang kemseg i pamayaꞌ ya. Temed may kalasit kasalaꞌan nga ega na pasinsiyaen it Ampuꞌang Diyus, kasalaꞌan nga ikataban it magbuwat kaytu duꞌun it panriga nga egay kaskedan. Iyan magbuwat it itu ngaytung kasalaꞌan, ega maꞌaat ku nga mapanalanginan.5:16 Kat pasepsep it beken nga mapipikir, ega kasalaꞌan nga nabwat it kaꞌsa lamang i paꞌaaten ngaytu, in daꞌga adat nga makasalaꞌan, ka pagtemden yang ipasigi i buwat ya ngayti, u ipagpaliꞌwan ya nga egay kanyang kakasalaꞌan. Ta in atkayan, egay beken nga pagꞌangutun ya, panriga nga egay kaskedan. Atkayan nagay nagpasakep nat Ampuꞌang Diyus bawnga temden yang mangindiꞌ (Hebreo 6:1-6). Baw beken, kasalaꞌan nga mangarampangen kuntraꞌ it Espiritu Santo (Mateo 12:31-32). ¹⁷Yay matuud, kada mabwat ta nga kuntraꞌ it kaꞌirgan it Ampuꞌang Diyus, kasalaꞌan nayan. Temed magpuyrat iyan ngayang siyangpit ku, may kapasinsiyaan naga.

¹⁸Talagang magkaꞌrutan ta na nga iyan mga bilang ipiyanganak nat Ampuꞌang Diyus, ega na maat magpasigi pat muwat it kasalaꞌan, sabap pagtatarimaen na sira ni Jesu-Cristo ngayting Anak it Ampuꞌang Diyus. Ega na mapakay nga sakpen siꞌ ni Satanas. ¹⁹Magkaꞌrutan ta nga kita, mga anak nat Ampuꞌang Diyus. Temed si Satanas pay magsasakep situt sinirungat langit. ²⁰Baw talagang magkaꞌrutan ta nga limnampud na situt aten i Anak it Ampuꞌang Diyus, baw binggayan ya na kita it ipagkasepsep, isaꞌun makilalaan tami nga banar i matuud nga Ampuꞌang Diyus. Kayti magpakiꞌuyun tami na it Ampuꞌang Diyus sabap maglalagpit ta nat Anak ya nga si Jesu-Cristo. Yay matuud, si Jesu-Cristo ngaytu, kanya talagay matuud nga Ampuꞌang Diyus nga puꞌun it kaꞌgenang egay kaskedan.

²¹Mga bilang anak ku, magꞌintur kamu in unuy pagpamayaꞌnen baw pagsirbiyan mi. Siguruun mi nga egay maski unu nga iganti mi it matuud ngaytu nga Ampuꞌang Diyus.