1 Corinto

Uꞌnang Surat ni Pablo duꞌun it Mga Magpamayaꞌ nga Taga Corinto

1 Corinto

Pauꞌnang Sugi-sugid

Ituꞌun ngaytu, lamang tu paꞌaaten nga uꞌnang surat ni Pablo duꞌun it mga taga Corinto, ega naytu maat yapay surat ni Pablo duꞌun it kanira. Sabap mabasa ta duꞌun it kapitulu 5:9 nga may uꞌna na nga nakapataban ni Pablo nga surat ya. Temed mataꞌwag tu nga uꞌnang surat ni Pablo duꞌut mga taga Corinto sabap kat mga surat nga ipiyataban ya duꞌut kanira, ituy uꞌnang ipiyaꞌuyut kat isiyurat nga ampang it Ampuꞌang Diyus. Iti, paꞌaaten ngayti nga uꞌna-uꞌnang surat ya nga ipiyataban ya duꞌut kanira, naꞌlam nayti.

Corinto ngaytu, kat timpu ni Pablo, puꞌun nga siyudad it prubinsiya it Acaya kat banwa it mga Griego. Duꞌut tambing it dagat i Corinto ngaytu baw talagang bantug it mga manignigusyuꞌ. Aypaꞌ magꞌaꞌabut-aꞌabut nga pirmi i taga belag nga banwa, nga may kanya-kanyang pagsambaen. Aypaꞌ, yanay nakapnuꞌ it iting siyudad, muꞌsang kalasit buwat nga maraꞌway baw kabubwalan, baw pagsamba it dakel-dakel na nga tiyaw-taw.

Iyan magpanaw-panaw si Pablo nga ipagpanlekep-lekep yay Magayeng Baritaꞌ duꞌun it beken nga banwa, naꞌbut ya nay Corinto ngaytu. Sang taꞌun baw tengaꞌ i kaꞌlay ya duꞌun (Mga Binwat 18:1-18). Sabap it pangadal ya dakel i nagpasakep it ki Jesu-Cristo. Kadakel nira, mga taw nga ega Judio nga, tagnaꞌ, elam talaga kat kamatuudan nga garing duꞌut Ampuꞌang Diyus, baw mamagbuwat it in unu nga karaꞌe-raꞌetan i magꞌabut kat pikiran nira.

Iyan nakapaꞌugad na si Pablo duꞌun it Efeso, piyatabanan yat surat i taga Corinto ngayti, ka tiyulduꞌan ya sira pasar it ega magayeng pagbuwaten it beken duꞌun (kapitulu 5:9). Duꞌun ngayti si Pablo it Efeso, may mga taga Corinto nga miyabut duꞌut kanya (kapitulu 16:17-18). May taban nirang surat nga surat it kabanwa nirang magpamayaꞌ. Pagkatanggap ni Pablo it surat ngayti, isiyurat yay tubag ya nga surat ngaytu nga pagpangaranan it 1 Corinto.

Ta paribasay yay dakulaꞌ kat surat ngaytu, sardaw baw panaldeng, subuk dakulay ega magkapakay ni Pablo kat surat it mga taga Corinto nga tiyanggap ya. Ka namuyaan ni Pablo kat surat nira ngayti nga subuk dakulay pagdaꞌgaen nira nga ampang ya kat uꞌna ngayting surat nga ipiyataban ya duꞌut kanira. Naꞌrutan gasiꞌ ni Pablo nga pagtibabaꞌen nat beken i pudir ya kat pagkaꞌapustul ya. Ipagpadaꞌeg nira gasiꞌ i sadili nira (kapitulu 4:8), nga ipagpaliꞌwan nira nga sira i may kamatuudang kasepsep, baw sira gasiꞌ i pagpadisiran nga banar it Espiritu Santo (kapitulu 14:37). Si Pablo, kunuꞌ, ega (kapitulu 4:10).

Temed yay matuud, kamaliꞌ nga banar i pasepsep nira pasar it dakel-dakel nga bagay. Alimbawa magpakiragiꞌ i beken it mga pagkaraꞌnen duꞌun it papagsambaang balay it mga pagbete-beteꞌen nga diyus. Kamaliꞌ gasiꞌ i buwat it beken in magkaꞌen it pagbuwateng pagdemdem it kamataynen ni Jesus. Baw kurang talaga i kasepsep nira pasar it mga kakayaan nga ipagꞌildaw it Espiritu Santo it aten, maꞌget in kakayaan ngayan nga magkaꞌampang it belag-belag nga ampang nga ega naꞌadalan. Baw may beken paꞌ nga ega talaga magkasepsepan nira.

Aypaꞌ sabap it muꞌsa ngaytu, isiyurat ni Pablo i surat ya ngaytu nga pagtaldengen ya i kamaliꞌ nga pasepsep baw pamagbuwaten nira baw pagtulduꞌan ya sira it kamatuudan. Taꞌun nga pagsurat ya kaytu, siguru mga 56 A.D.

Kapitulu 13 i mabantug nga panulduꞌ ni Pablo pasar it raras tat masigkataw. Sana kararas ngaytu i magpadisir it aten kat muꞌsang pagbuwaten ta.

^1-2Mga taga Corinto nga magsarig baw magpamayaꞌ it Ampuꞌang Diyus, wayan i surat namen, aku nga si Pablo nga riyumraan ni Cristo Jesus nga esang apustul ya kat pabetang-betang it Ampuꞌang Diyus, baw si Sostenes nga sulsug tami kat pamayaꞌ.

Pagsuratan namen, kamu nga ipiyapinpin nat Ampuꞌang Diyus nga mga taawan ya na sabap it pakilagpit mi it ki Cristo Jesus. Eeꞌ baꞌ, ipagpabetang ya na kamu nga ega nay kakasalaꞌan baw ipiyabetang-betang ya nga magpangaꞌgenan kamu nga pirmi uyun kat kaꞌirgan ya. Atkayan naga i muꞌsa kat paꞌari-aring banwa nga nagpasakep na it Ampuꞌan tami nga si Jesu-Cristo nga Ampuꞌan na nira gasiꞌ. ³Ipagpanalangin ku nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus nga Amaꞌ tami baw Ampuꞌan nga si Jesu-Cristo.

⁴Talagang pirmi ku nga pagpasalamatan duꞌun it Ampuꞌang Diyus i kadakulat mga ildaw nga ipiyagꞌatag yat imyu sabap it pakilagpit mi it ki Cristo Jesus. ⁵Ka sabap it pakilagpit mi ngaytut kanya, nagmanggaden kamu na kat muꞌsang ipagbegay it Ampuꞌang Diyus kat mga taawan ya, nga subung it dakulaꞌ nga kasepsep it kamatuudan nga garing duꞌut kanya baw kalasi-kalasing kakayaan nga ituturan duꞌut beken i kamatuudan ngaytu.1:5 Mabasa ta duꞌun it kapitulu 12:8,10, baw 28 in unu may unu i kalasi-kalasi ngaytung kakayaan nga ituturan i ampang it Ampuꞌang Diyus. ⁶Sikayan natantuwan nga banar it nakem mi i kamatuudan ngaytu pasar it ki Cristo. ⁷Aypaꞌ, kayti, daꞌkamu na pagkurangen it maski unu nga ildaw nga ipagbegay it Ampuꞌang Diyus mintras maseked-seked nga magꞌelat kamu it matanyag na i Ampuꞌan tami nga si Jesu-Cristo kat pamaꞌuliꞌ ya. ⁸Baw esa gasing ildaw ya, seked it umur it banwa papaꞌgenen ya kamu kat pamayaꞌ mi isaꞌun egay maꞌiway it imyu in asan nat aldaw nga ipaꞌuliꞌ it Ampuꞌan tami nga si Jesu-Cristo nga mangukuman. ⁹Talagang magkasiguru mi nga buwaten it Ampuꞌang Diyus i muꞌsa ngaytu, kanya nga nagpanakem it imyu nga pakilagpit it Anak ya nga si Jesu-Cristo nga Ampuꞌan tami.

Panulduꞌ sabap it ega magparag-paragen it pagpikiren i mga magpamayaꞌ

¹⁰Ta kayti, mga kasulsugan, paribasa it ituy ipagpaguru it aten it Ampuꞌan tami nga si Jesu-Cristo,1:10 Juan 15:12 baw 17:11,21. pagꞌangutun ku nga banar nga magꞌurunyun kamung muꞌsa kat nakem, pagpikiren, baw pagꞌampangen, isaꞌun maꞌawaꞌ asat imyu i ega pagparag-paragen it pagpikiren. ¹¹Ipagsugid kuytu sabap ipiyagbaritaꞌ sinit aken it mga taawan ni Cloe nga magdaꞌe-daꞌegen na i adat mi asan. ¹²Ituy ireg ku nga sugiden. Naꞌrutan ku nga magkampiꞌ-kampiꞌen kamu asan. Ka maat kunuꞌ yan it sang kataawan, “Aken, pangadal ni Pablo i pagsagyaan ku.” Maat siꞌ yan kunuꞌ it beken, “Aken, ki Apolos.” Ta yan beken, si Pedro kunuꞌ i kanirang pagkampiꞌan, baw si Cristo kunuꞌ i pagkampiꞌan it beken. ¹³Sana ega buwaten mi i atkayan, adimaat nabagiꞌ si Cristo ngaytu! Ka unu baytu, aku nga si Pablo i iriyansang duꞌut krus nga timnanggung it kasalaꞌan mi? Unu, iyan biyawtis kamu, akuy pagpapuntuꞌan nga pagsarigan baw pagpamayaꞌnen mi? Simpri ega. ¹⁴Magpasalamat aku duꞌun it Ampuꞌang Diyus nga ega akuy nagbawtis it imyu asan, magpuyrat ki Crispo1:14 Si Crispo ngaytu, kanyay magpamaalaꞌ it papagsambaan it mga Judio duꞌut Corinto ngayti (Mga Binwat 18:8). baw ki Gayo.1:14 Iyan duꞌun si Pablo it Corinto, duꞌut balay ni Gayo ngaytu i inistaran ya (Roma 16:23). ¹⁵Aypaꞌ egay makaꞌaat nga maski siyu nga akuy sunudun ka akuy nagbawtis it kanira. ¹⁶Baw palan, nademdeman ku, biyawtis ku gasiꞌ si Estefanas, puꞌsa sirang sang anakan. Magpuyrat sira ngaytu ega nay nabawtis ku nga beken nga magkademdeman ku. ¹⁷Sabap ega mamawtis i tiyaꞌgan it aken ni Cristo, in daꞌga mangadal it Magayen ngaytu nga Baritaꞌ. Talagang ipagpangadal ku naytu kat mga taw temed ega uyun kat pasepsep lamang it banwa i ampang ku, isaꞌun ega magnisan i ega basta-bastang keseg it pangadal pasar it kamataynen ni Cristo duꞌun it krus.

Duꞌut binwat ni Cristo magkakilalaan tami i kagayen it ega basta-bastang kasepsep it Ampuꞌang Diyus

¹⁸Sabap kamataynen ngaytu ni Cristo nga ipagpangadal ku, subuk egay kakapulusan kat pasepsep it mga taw nga egay beken nga pagꞌabutun nira in daꞌga kamatayneng panriga nga egay kaskedan. Temed kita nga ipagribri nat Ampuꞌang Diyus, pagkilalaen tami nga kat kamataynen ngaytu ni Cristo i guna it Ampuꞌang Diyus kat ikaribri it taw. ¹⁹Sabap magsusurat nga lagi i ampang it Ampuꞌang Diyus nga magꞌaat,

“Ranggaꞌen kuy pasepsep it mga mapipikir.

Eeꞌ baꞌ, pabaraꞌen ku nga egay kakapulusan it mga pasepsep it maat mga makakaꞌrut.”1:19 Isaias 29:14.

²⁰Ta it atkayan, unuy masugid ta pasar it mga makakaꞌrut situt banwa ngaytu? U iyan mga manigpangadal nga dakulay inadalan pasar it mga urdin ni Moises baw iyan makakaꞌrut mangataldengan? Daꞌga baꞌ ipiyatantu na ngaytut Ampuꞌang Diyus nga kaꞌengel-engelan lamang i pasepsep it banwa ngaytu pasar it in unuy ikaribri it taw?

²¹Sabap uyun kat ega basta-bastang kasepsep ya, ipiyabetang-betang it Ampuꞌang Diyus nga ega makilala kanya it taw in sabap lamang it sadili nira nga pasepsep. Aypaꞌ ipiyabetang-betang ya nga lagi baw ituy kaꞌirgan ya nga sabap lamang it pamayaꞌ it taw it ipagpangadal pasar it ki Cristo, iribri ya sira. Ituꞌun ngaytu, egay kakapulusan kat pasepsep it banwa. ²²Ka iyan mga Judio, mamagꞌangut sira it mga kalililuꞌang bagay nga bilang iyan i kamatuudan it ipagꞌampang. Ta kat mga Griego, mga matꞌed nga pasepsep i pamagtulusun nira. ²³Temed iyan bay ipagpangadal namen ngaytu, si Cristo nga iriyansang ngaytu duꞌun it krus. Kat mga Judio, kakekleban nira i ituꞌun ngaytu. Kat mga ega Judio, ipagpabetang nira nga kaꞌengel-engelan lamang. ²⁴Temed kat mga taw, Judio u daꞌga, nga simnunud nat panakem it Ampuꞌang Diyus it kanira nga pasakep it kanya, natantuwan na nirang banar nga, kat binwat ngaytu ni Cristo, matanyag i guna it Ampuꞌang Diyus baw kagayen it pabetang-betang ya. ²⁵Sabap iyan nga pagpikiren it taw nga kaꞌengel-engelan lamang it Ampuꞌang Diyus, palan ega basta-bastang kasepsep nga subraꞌ pat muꞌsa nga pasepsep it taw. Baw iyan gasiꞌ nga pagpikiren nira nga kalubayan it Ampuꞌang Diyus, palan keseg gasiꞌ nga subraꞌ pat muꞌsang kaksegan it taw.

²⁶Mga sulsug ku kat pamayaꞌ, dedemdemen mi i kabetangan mi iyan piyanakman kamu na it Ampuꞌang Diyus nga pasakep it kanya. Daꞌga baꞌ pira lamang it imyu i pagkilalaen it banwa nga makakaꞌrut? Pira lamang gasiꞌ i may mataꞌas nga katengdanan u duguꞌ. ²⁷Sabap iyan mga ipagpabetang it banwa nga ega magkaꞌrut, iyan i piniliꞌ it Ampuꞌang Diyus isaꞌun eyaꞌen i mga maat makakaꞌrut. Baw iyan mga ipagpabetang it banwa nga malulubay, piniliꞌ ya isaꞌun eyaꞌen i mga maat makekseg. ²⁸Talagang piniliꞌ ya i mga ipagpabetang nga egay karurungguwan baw egay kakapulusan situt banwa ngaytu, isaꞌun nga ipabetang nga egay kuwintaꞌ i mga pagkilalaen nga bantug situt banwa ngaytu. ²⁹Aypaꞌ ka egay mapakay nga ipalandi-landi it maski siyu kat adapan it Ampuꞌang Diyus. ³⁰Maski kita, talagang garing duꞌut Ampuꞌang Diyus i magpakilagpit ta ngaytu it ki Cristo Jesus. Baw si Cristo Jesus ngaytu i binwat it Ampuꞌang Diyus nga ikakilala tami it kamatuudan nga kasepsep, nga kasepsep ngaytu nga paꞌaaten, mataldeng tami na kat panleteg it Ampuꞌang Diyus, ka ipiyagribri ta na kat panguripen it kasalaꞌan it aten, isaꞌun mangaꞌgenan tami na nga alaid kat muꞌsang kasalaꞌan. ³¹Aypaꞌ, subung nat inaat ngayan duꞌun it kasuratan ngayang magꞌaat,

“In siyu nga pabantug-bantug, magayen Ampuꞌang Diyus i ipabantug-bantug ya.”1:31 Jeremias 9:24.

¹Atkayan naga, mga sulsug ku kat pamayaꞌ, iyan naꞌasan aku ngayat imyu nga ipiyangadal ku i ipiyaꞌrut nat Ampuꞌang Diyus nga mga ampang ya, ega ipiyangadal ku kat matꞌed nga sugi-sugid u kat kataꞌas it inadalan. ²Sabap iyan talagay napikir ku, ipabetang ku nga subuk ega nay beken nga magkaꞌrutan ku nga makapangadal in daꞌga si Jesu-Cristo na lamang ngaytu nga iriyansang duꞌun it krus, ka yay uliꞌan-uliꞌan it muꞌsa. ³Iyan asan aku pat imyu, panemdem ku, subuk malubay aku na lamang baw subuk magkeber-keber i seled kut iꞌlam, ka in kat sadili ku nga keseg lamang, ega kaya ku nga sumarunga it katengdanan ku. ⁴Ta kat sugi-sugid baw pangadal ku, ega ipagpaꞌdung ku kamu it magagayen na nga mga sugi-sugid, nga uyun lamang kat pasepsep it banwa. Temed ipiyagpamatuud it guna it Espiritu Santo nga matuud i ipagpangadal ku. ⁵Ka yay kaꞌirgan it Ampuꞌang Diyus nga guna ya i garing it simnarig baw namayaꞌ kamu it ki Cristo, ega maat sabap it inadalan u pasepsep it taw.

Iyan kasepsep it Ampuꞌang Diyus nga ipagpanakem it Espiritu Santo

⁶Temed iyan mga naꞌlay na nga namayaꞌ, nga nakasepsep na nga banar, pagkilalaen nira nga may matꞌed nagang kasepsep namen kat ipagpangadal namen. Egaytu uyun kat inadalan u pasepsep situt banwa ngaytu. Ega gasiꞌ uyun kat pasepsep it mga punuꞌan it banwa ngaytu, ka mabut i aldaw nga maꞌilang i kanirang pasepsep, pati sira gasiꞌ. ⁷In daꞌga, kat ipagpangadal namen ngaytu, ipagtanyag i ega basta-bastang kasepsep it Ampuꞌang Diyus nga ega ipiyaꞌrut ya kat tagnaꞌ nga mga taw, baw maski kayti ega magkasepsepan it kadaklan. Temed maski atkayan, kat keseg it kasepsep ya ngaytu, parabir giyuna ya i banwa, ipiyabetang-betang nga lagi it Ampuꞌang Diyus i miyabut na ngaytu nga binwat ni Cristo isaꞌun mabagiꞌan tami it kabantugan ya kat pagdadarapaꞌen. ⁸Itung mga bagay, talagang ega nasepsepan it maski siyu nga punuꞌan it banwa ngaytu. Ka in beteꞌ nasepsepan nira, simpri ega iriyansang nira duꞌut krus i mabantug nga Ampuꞌan. ⁹Munugat magpanunsun nagaytu duꞌun it isiyurat nga ampang it Ampuꞌang Diyus nga magꞌaat,

“Iyan ega paꞌ nagpasar kat mata u nasibaꞌatan it talinga, ega gasiꞌ nangbit kat pikiran it taw, iyan i miyabut nga ipiyabetang-betang it Ampuꞌang Diyus kat ikagayen it mga magmaꞌal it kanya.”2:9 Isaias 64:4.

¹⁰Temed kita, natantuwan ta na i ituꞌun ngaytu sabap ipiyatantu it aten it Espiritu Santo. Ka talagang egay ipaꞌlam it Espiritu Santo ngaytu nga maski unu nga bagay, maski iyan piyakamatꞌed na nga pabetang-betang it Ampuꞌang Diyus. ¹¹Ka in taw lamang, siyuy magkaꞌrut in unuy pagpikiren it subung ya nga taw, u in unu talagay kat nakem ya? Sadili tang nakem lamang i magkaꞌrut. Ta atkayan naga, Espiritu Santo lamang ngaytu i magkaꞌrut it muꞌsang pabetang-betang it Ampuꞌang Diyus. ¹²Kita nga magpamayaꞌ, egaytu binggayan tami it pasepsep nga subung lamang it pasepsep it mga taw situt banwa nga ega magpamayaꞌ. Kamatuudan talaga i aten nga kasepsep kayti ka Espiritu Santo i ipiyapasarum it Ampuꞌang Diyus situt bilug ta, isaꞌun matantuwan tami nga banar i mga bagay nga ipiyagꞌatag ya it aten.

¹³Ta, itung mga bagay i ipagpanulduꞌ namen temed egaytu maat magpanggaring kat pasepsep u inadalan situt banwa, in daꞌga talagang Espiritu Santo ngaytu i garingan. Iyan mga bagay nga ipagpaꞌrut it Espiritu Santo kat mga taw, ipagpanulduꞌ namen kat mga ampang nga ipagpanakem it Espiritu Santo ngaytu it amen. ¹⁴Takaꞌ iyan mga taw nga ega paꞌ nabaꞌgu it Espiritu Santo i nakem nira, ega pagtanggapen nira i mga panulduꞌ nga magpanggaring duꞌut Espiritu Santo ngaytu it Ampuꞌang Diyus. Ka pagꞌaaten ga nira nga kaꞌengel-engelan lamang. Talagang ega magkasepsepan nira, sabap, mga bagay ngaytu, masepsepan lamang kat tabang it Espiritu Santo. ¹⁵Temed iyan taw nga pagsasaruman it Espiritu Santo, magkasepsepan ya i muꞌsang bagay, in magayen u daꞌga. Takaꞌ, mga taw nga ega paꞌ namayaꞌ, nga ega pagsasaruman it Espiritu Santo ngaytu, kurang i kasepsep nira betanganan it ukuman i pangaꞌgenan it mga namayaꞌ na. ¹⁶Ka daꞌga baꞌ maat i inaat duꞌun it kasuratan it tagnaꞌ,

“Siyu talaga i magkataꞌseb it pikir it Ampuꞌang Diyus, nga makapadisir it kanya?”2:16 Isaias 40:13.

Temed kita nga magpamayaꞌ, pagbaꞌguun nay pikiran tami nga ipagpasbung nat pikir ni Cristo.2:16 Egay piyagbelagan it pikir it Ampuꞌang Diyus baw pikir ni Cristo.

Kurang paꞌ talaga i kasepsep it mga taga Corinto pasar it Magayeng Baritaꞌ

¹Mga sulsug ku kat pamayaꞌ, iyan asan aku pat imyu, kat pangadal ku ega mapakay nga ipabetang ku kamu nga mga taw nga magsunud it padisir it Espiritu Santo, in daꞌga mga taw nga magsumbayaꞌ lamang it sadili nga kaꞌirgan it bilug. Maski maat maglalagpit kamu na it ki Cristo, temed adat mi, subuk adat paꞌ it waꞌwaꞌ lamang, ega adat it mga ustuꞌ nay pamayaꞌ. ²Maat mi, iyan ipiyangadal kut imyu it tagnaꞌ, subuk gatas lamang, ega maat madsen nga pangaꞌen. Sabap ega tiyaꞌseb i pikiran mi it in unuy pagpapuntuꞌan. Baw seked kayti, atkayan naga nga kurang i kasepsep mi it ituꞌun ngaytu ³Sabap magdadaꞌeg paꞌ kat nakem mi i maraꞌe-raꞌet nga kaꞌirgan it bilug, ka asan pat imyu i inggi-inggiten baw pakidaꞌeg it esa may esa. Iyang mga adat mi, magpamatuud nga pagsumbayaꞌen mi paꞌ i sadili mi nga kaꞌirgan it bilug, subung nagat mga taw nga ega paꞌ namayaꞌ it ki Cristo. ⁴Ka ungayan, maat it sang kataawan, “Aken, panulduꞌ ni Pablo i magayen ku.” Maat siꞌ it sang kataawan, “Aken ega, ki Apolos.” Daꞌga baꞌ, atkaytung pagbuwaten, uyun lamang kat buwat it mga ega paꞌ namayaꞌ?

⁵Ta, abir kunuꞌ, siyuytu si Apolos baw si Pablo ngaytu? Daꞌga baꞌ mga manigsirbi kami lamang it Ampuꞌan nga giyamit ya isaꞌun mamayaꞌ kamu it kanya? Pagbuwaten namen lamang i buwaten nga ipiyakarguꞌ yat amen. ⁶Ka, kaꞌalimbawaan ya, aku i liminwak, si Apolos i manigbuꞌbuꞌ it danum. Temed Ampuꞌang Diyus i nagpatubuꞌ baw nagpakseg. ⁷Talagang, kat buwat ngaytung magpangadal it Magayeng Baritaꞌ, ega iyan manigluwak baw manigbuꞌbuꞌ i impurtantiꞌ, in daꞌga iyan Ampuꞌang Diyus nga kanya i magpatubuꞌ baw magpakseg. ⁸Ka iyan manigluwak baw iyan manigbuꞌbuꞌ, urunyun sira kat pagbuwaten nira, nga esa-esay pagpaꞌresan. Baw mabut i aldaw nga, kada esat kanira, tumanggap it tumbas sigun kat kanya-kanyang piyaꞌresan. ⁹Kami ngaytung manigpangadal, nagsubung nga mga manigbuwat lamang it Ampuꞌang Diyus. Kamu nga pagtulduꞌan namen, kamu i subuk parangumaen ya. Esa gasing alimbawa, kamu i subuk balay ya nga ipagpabwat yat amen. Talagang kat Ampuꞌang Diyus tami nga muꞌsa. ¹⁰Kat keseg it kakayaan nga ipiyagꞌildaw it Ampuꞌang Diyus it aken, aku i subuk makaꞌrut nga manigpatindeg it balay. Ta, aku i nagbetang it ipagpapaꞌgen it balay, beken mana i lumawaꞌ-lawaꞌ baw meman. Temed, kada manigbuwat ngaytu, kaꞌilangan nga maꞌintur sira kat pamatindeg. ¹¹Sabap ega na talagay beken paꞌ nga ipagpapaꞌgen nga mapakay nga gamiten in daꞌga itu na, nakabtang na ngaytu nga lagi nga si Jesu-Cristo. ¹²Temed ega surubung i mga buwat-buwat nga paggamiten it mga manigpatindeg. May magayen nga banar nga subuk bulawan, pirak, baw marerga nga mga batu. May ega magayen gasiꞌ, nga subuk lampung, dikut u dagami lamang. ¹³Temed in asan nat aldaw na ngayan nga ipangukuman, talagang matantuwan tu it apuy i kalasi it buwat it kada esa, in uyun i pangadal nira u ega uyun kat ipagpapaꞌgen it balay nga si Cristo. Sabap, kat iyan nga aldaw, sukdanan it apuy i buwat it muꞌsa. ¹⁴Ta, in ega maꞌunu-unu it apuy ngaytu i ipiyagꞌeman nira kat ega basta-bastang ipagpapaꞌgen it balay, simpri siguradu nga tumanggap sira it tumbas. ¹⁵Takaꞌ in maꞌanteng, daꞌga dakulaꞌ nga kapirdiyan ya? Sabagay maribri naga kanya, temed kabilangan ya, subung kanya it nanlapas duꞌun it deleg it apuy nga nangibit-kibit manay ginawa ya.

¹⁶Unuytu, ega magkaꞌrutan mi nga, kamu, bilang ega basta-bastang balay nga pagtataꞌidan it Ampuꞌang Diyus, ka magsasarum na asat imyu i Espiritu Santo ya? ¹⁷Egay pagduwa-duwa nga rigaen it Ampuꞌang Diyus i rumanggaꞌ it balay ya ngaytu. Sabap ega basta-basta i balay ngaytu ka balay talaga it Ampuꞌang Diyus, nga egay belag in daꞌga kamu nga mga taawan ya na i paꞌaaten kaytu.

¹⁸Magayen, ega ambutan it maski siyu i sadili ya, ka in beteꞌ pagpikiren ya nga makaꞌrut kanya kayti kat pabetang it banwa ngaytu, magayen ibuntal ya na baw ipabetang i sadili ya nga subuk egay uru-urut kat pabetang it banwa, isaꞌun kumaꞌrut kanya kat kamatuudan nga kasepsep nga garing duꞌun it Ampuꞌang Diyus. ¹⁹Sabap, iyan ipagpabetang it banwa nga magayeng kasepsep, nga ega Ampuꞌang Diyus i pagkilalaen, egay kuwintaꞌ kat panleteg ya. Ka maat i duꞌun it kasuratan it tagnaꞌ paꞌ,

“Iyan mga pangtasan na kat adat nga mapiyandaya-dayaꞌ, ipapanaw it Ampuꞌang Diyus nga pandaya-dayaꞌ nira ngayti i ikasigapul yat kanira.”3:19 Job 5:13.

²⁰Atkayan naga,

“Talagang magkaꞌrutan it Ampuꞌang Diyus i iyan pamagpikiren it mga maat makakaꞌrut, nga egay mga kakapulusan.”3:20 Awit 94:11.

²¹Aypaꞌ ayaw kamu it pataꞌas it taw baw kampiꞌ it kanira. Ka, muꞌsang bagay, ipiyagbegay it imyu kat ikagayen mi nga muꞌsa. ²²Alimbawa mga manigpangadal, nga subuk aku, si Apolos, baw si Pedro, ipiyagbegay it Ampuꞌang Diyus it imyu kat ikagayen mi nga muꞌsa. Atnaga i muꞌsang bagay. Iyan banwa ngaytu, iyan kaꞌgenan, kamataynen, mga bagay kayti baw iyan kat pagdadarapaꞌen, kat ikagayen mi talagay muꞌsa. ²³Ka daꞌga baꞌ, ki Cristo kamu na? Baw si Cristo ngaytu, kat Ampuꞌang Diyus.

Iyan kataldengan pasar it pagsirbi ni Pablo baw beken nga mga apustul

¹Ta, subung nat inaat ku, kaꞌilangan ipabetang mi kami nga mga manigsirbi ni Cristo, nga piyaskelan it Ampuꞌang Diyus it mga subuk tagu-taguꞌ nga pangadal ya nga ipagpaꞌrut ya na kayti it mga taw. ²Aypaꞌ pagsarungaen namen it magayen i katengdanan namen ngaytu, ka yay kaꞌilangan kat mga piyaskelan it buwaten it agalen nira. ³Aypaꞌ ega ipagdawaꞌ ku kat ulu ku i pagꞌaaten mi u pagꞌaaten it maski siyu pasar it pagsirbi ku ngaytu, in magayen u ega. Maski aku na mismu, ega ipabetang ku nga magayen u ega i buwat ku. ⁴Ka maski egay pagtatanudun ku nga kamaliꞌ kat pagsarunga ku ngaytut katengdanan ku, barang may maꞌiway nagat Ampuꞌan. Kanya simpri i magꞌukuman it aken. ⁵Aypaꞌ ega betanganan mit ukuman i maski siyu in magayen u ega i pagsirbi nira. Elaten mi i timpu nga ipangukuman kat pamaꞌuliꞌ it Ampuꞌan. Siguradu yan nga ipalbaw ya i mga bagay nga kayti magtataguꞌ paꞌ kat kadleman. Baw ipalbaw ya gasiꞌ i maski pagꞌantapen it nakem it kada esa. Bawnga tumanggap na i kada esa it kabantugan nga gumaring duꞌun it Ampuꞌang Diyus nga bagay it kanya-kanyang binwatan.

⁶Mga sulsug ku kat pamayaꞌ, kat ikagayen mi piyaꞌalimbawaan ku kami ni Apolos, isaꞌun masepsepan mi kat amen nga pagsunud nga kaꞌilangan ega pasubraꞌan i magsusurat nga ampang it Ampuꞌang Diyus. Sana ega na ipalandi-landi it maski siyu it imyu i in siyu nga manigtulduꞌ baw tibabaꞌen ya na i beken. ⁷Ka unuytu, subraꞌ kamu nga makaꞌrut, subraꞌ pat beken nga taw? Unu nay kakayaan mi nga ega ipiyagꞌildaw it imyu it Ampuꞌang Diyus? Ta, it atkayan, unuka ipagpatuꞌgud mi paꞌ, adimaat ega ipiyagꞌildaw it imyu?

⁸Ka palan kat pikir mi manggaden kamu na, nga pagustuꞌ na it muꞌsang ipagꞌildaw it Ampuꞌang Diyus. Siguru tanud mi, nalandawan mi na kami ka naꞌbut mi nay magꞌadiꞌ kamu na kat kaꞌadiꞌan it Ampuꞌang Diyus. In maat matuud, magayen, ka in atkayan magꞌadiꞌ kami naga nga kaꞌibaan mi, baw ega nay kakuriꞌan namen. ⁹Sabap kat pikir ku lamang, kami nga mga apustul, subuk binwat kami it Ampuꞌang Diyus nga piyakatimawaꞌ kat muꞌsang taw. Kabilangan namen, atnat mga taw nga biyetanganan it ukuman nga imatayen it pagleltegan it kadakel. Yay matuud, kabetangan namen ngaytu, subuk pagleltegan naytu it muꞌsang banwa, mga katataawan, pati mga anghil gasiꞌ. ¹⁰Kat panleteg it banwa mga engel-engel kami kat panindeg namen it ki Cristo. Temed kamu, ipagpaliꞌwan mi nga makaꞌrut kamung banar in pasar it ki Cristo. Kami kunuꞌ, egay kakapulusan, temed kamu, iyan kunuꞌ i mabantug. Pagtibabaꞌen kami temed, kamu, iyan i pagdaya-dayawun. ¹¹Talagang seked it kayti nga timpu, paggetmanan kami baw pagbaꞌnekan. Atnat lebas kami, maglabay it pasakit, baw egay tandaꞌ nga pagꞌistaran. ¹²Ipagpaturuꞌ namen i liꞌnget namen isaꞌun lamang may ibtang it tinaꞌi. Pagdiyampaꞌen kami temed, iyan mga magdiyampaꞌ it amen, ipagpanalangin namen nga sana ildawan sirat Ampuꞌang Diyus. In pagpakuriꞌan kami, pagpataꞌnan namen lamang. ¹³Malulway nga mga sugi-sugid i ipagbeles namen it iyan mga magpanranggaꞌ it amen. Talagang seked kayti, kabetangan namen, subung it basura nga ipagbuntal nga pagsigniꞌan na it katataawan.

¹⁴Egaytu maat ipagsurat kuy itung mga sugi-sugid nga pagpaꞌeyaꞌan ku kamu. Eget naytut panaldeng kut imyu, kamu nga subung nat ipiyagrasyaꞌ ku nga pagmaꞌalen ku nga banar. ¹⁵Sabap maski sang puluꞌ pang ribu i mga magpadisir it imyu in magꞌuꞌunuy magayeng pagsunud it ki Cristo, temed esa-esa lamang i bilang amaꞌ mi kat pamayaꞌ. Ka subuk ipiyanganak ku kamu kat pakilagpit mi it ki Cristo Jesus, sabap piyamayaꞌ mi i Magayeng Baritaꞌ pasar it kanya nga ipiyangadal kut imyu. ¹⁶Aypaꞌ, asi-asi paꞌ sana it imyu, it bilang amaꞌ mi na aku, ega pasyangan mi i namuyaan mi nga adat ku. ¹⁷Ta, sabap it kaꞌirgan ku ngaytu nga maguru mi i adat ku, piyapaꞌasan kut imyu si Timoteo, kanya nga talagang pagmaꞌalen ku nga ipagpabetang ku nga subung nat anak ku gasiꞌ kat pamayaꞌ. Magkasarigan kanya kat pagsunud ya it Ampuꞌan baw kanya i pademdem it imyu it mga pagꞌadaten ku kat aken nga pagsunud it Ampuꞌan. Atkaytung pagsunud i ipagpangadal ku gasiꞌ duꞌun it mga magpamayaꞌ kat paꞌari-aring banwa nga pagpaꞌaduꞌunan ku.

¹⁸Magkaꞌrutan ku nga may beken na nga magpasubraꞌ-subraꞌ asat imyu, ka ipagpaliꞌwan nira nga daꞌku na kunuꞌ kaꞌurum paꞌasan. ¹⁹Temed yay matuud, in kaꞌirgan it Ampuꞌan, paꞌasan aku yan it imyu kat madaliꞌ nga timpu. Sikayan maꞌrutan ku in may guna talaga it Espiritu Santo kat pangaꞌgenan it mga magpasubraꞌ-subraꞌ ngayan, u in ampang lamang nga egay kamatuudan i ipagpaliꞌwan nira. ²⁰Sabap, yay matuud, iyang taw nga may kaꞌuyutan nga matuud it kaꞌadiꞌan it Ampuꞌang Diyus, mamuyaan tu kat keseg it guna it Espiritu Santo duꞌut pangaꞌgenan ya, ega lamang kat ampang. ²¹Aypaꞌ unuy ireg mi? Unu, paꞌasan aku nga subuk titiꞌkul i ampang kut imyu? Sana indiꞌan mi nay kamaliꞌ nga pamagbuwaten mi isaꞌun kapaꞌasan aku it may dakulang kararas baw kapalulusan.

Ega mapakay kat mga magpamayaꞌ i adat nga mapiyamakun duꞌun it ega asawa ya

¹Ta, itu nay esang ega magkapakay ku asat imyu. Ka nanlekep nay baritaꞌ nga maat kunuꞌ may esang magpamayaꞌ it Ampuꞌan asan nga may pagbuwaten nga ega magayen. Pagꞌasa-asawaen ya i asawa it amaꞌ ya. Talagang maraꞌway tu ka maski mga taw nga ega magkilala it Ampuꞌang Diyus, ega magbuwat it atkayang raꞌway it pagbuwaten. ²Temed kamu asan, ipagpatuꞌgud mi i pagsunud mit Ampuꞌan maski pagbaliwalaꞌen mi i yanang raꞌway it pagbuwaten! Sana nasmekan mit ereꞌeret baw inawaꞌ na kat gurupu mi i magbuwat it atkayan ngayan. ³Maski maat ega asan i bilug ku takaꞌ in kat nakem, subung it asan aku naga nga pagbetanganan ku nat ukuman i magbuwat ngayan it atkayan. ⁴Ituy kaꞌilangan mi nga buwaten. Magtingped kamung mga magpamayaꞌ nga pagkilalaen mi nga talagang asan nat imyu i pudir it Ampuꞌan tami nga si Jesu-Cristo. Baw subuk iba mi naga aku gasiꞌ in kat nakem. Bawnga kat keseg it guna it Ampuꞌan nga si Jesu-Cristo, ⁵iyan taw ngayan nga magbuwat it maraꞌway, awaꞌen mi na kat gurupu mi nga iꞌuliꞌ na duꞌut pamegbeg ni Satanas, isaꞌun sana singuliꞌan ya i pagsumbayaꞌ ya it kaꞌiꞌirgan ya nga maraꞌway. Ka in atkayan maribri naga kat aldaw ngayan nga ipangukuman it Ampuꞌan.

⁶Ega magayen i adat mi ngayang magpasubraꞌ-subraꞌ. Unuy ikapatuꞌgud mi it may maraꞌway ngayang pagbuwaten asan? Magayen, awaꞌen mi na, in daꞌga barang lemkep asat imyu. Ka unu, ega magkaꞌrutan mi i sambatan ngayan nga magꞌaat, “Magkapaꞌalsa it dekeyeꞌ lamang nga papaꞌalsa i sang iꞌilutuꞌan nga tinapay”? ⁷Eeꞌ baꞌ, awaꞌen mi na i muꞌsang adat mi nga kuntraꞌ kat kaꞌirgan it Ampuꞌang Diyus isaꞌun mabaꞌgu nay pangaꞌgenan mi. Ka daꞌga baꞌ, pabetang it Ampuꞌang Diyus it imyu, mga taw na nga ega nay kakasalaꞌan? Atkaytu i pabetang yat aten sabap it pamayaꞌ tat ki Cristo, kanya nga ipiyasbung it tupa nga isiyalisi isaꞌun taꞌliban tat panriga it Ampuꞌang Diyus sabap it mga kasalaꞌan tami. Ituꞌun ngaytu, pagtuman it pagpapuntuꞌan ngayan it Pistaꞌ namen nga mga Judio it tagnaꞌ nga pagpangaranan it Tiyaꞌliban. ⁸Aypaꞌ ka paꞌuyut tami gasiꞌ i aten kat pagtuman it Pistaꞌ ngaytu. Binwat it mga Judio it tagnaꞌ, inawaꞌ nira kat balay nira i muꞌsang ipagpaꞌalsa it tinapay, nga yay bilang ladawan it kasalaꞌan kat pangaꞌgenan nira. Ta atkayan naga, awaꞌen ta na kat pangaꞌgenan tami i muꞌsang karaꞌe-raꞌetan baw maraꞌway nga pagbuwaten. Baw yanay magayen nga adaten tami, tingleden i nakem kat pagsunud tat kamatuudan nga garing duꞌut Ampuꞌang Diyus.

⁹Kat uꞌnang surat nga ipiyataban ku asat imyu talagang ibintang ku i sugi-sugid nga, kaꞌilangan, ega na pakiꞌiba-ibaan mi i mga taw nga magpamakun duꞌun it ega asawa nira. ¹⁰Ega pagpaꞌiguꞌan ku kaytu, mga taw nga ega magkilala it Ampuꞌang Diyus nga magpamakun duꞌun it ega asawa nira, u mga maꞌirak it kusas nga magkapisiꞌ situt banwa, mga mapiyanreges-reges, baw mga mamagsirbi it pagbete-beteꞌen nga diyus. Ka in beteꞌ mga ega magkilala it Ampuꞌang Diyus i pagpaꞌiguꞌan, simpri kaꞌilangan nga limꞌid kamu situt banwa ngaytu isaꞌun lamang mapaꞌalaidan mi sira. ¹¹Iyan talagay pagpaꞌiguꞌan ku kaytu nga ega pakiꞌiba-ibaan mi, iyan mga taw nga maat sulsug mi kat pamayaꞌ, arit mapiyamakun paꞌ duꞌun it ega asawa ya, maꞌirak pat mga kusas nga magkapisiꞌ situt banwa, magsirbi paꞌ it pagbete-beteꞌen nga diyus, mapiyandiyampaꞌ paꞌ, mapiyalangu, baw mapiyanreges-reges. In atkayan pay adat nira, maski kaꞌen ayaw kamut pakikaꞌen duꞌut kanira. ^12-13Sabap egay pudir ku nga betanganan kut ukuman i mga taw nga ega magsarig baw magpamayaꞌ it ki Cristo. Ampuꞌang Diyus nay baalaꞌ mukuman it kanira. Iyan kasubung ta lamang nga magpamayaꞌ i maꞌukumanan tami. Aypaꞌ awaꞌen mi na kat gurupu mi i magbuwat it maraꞌway ngayan, uyun nagat inaat duꞌun it kasuratan.5:12-13 Deuteronomio 17:7, 19:19, 22:21, baw 24:7.

In unuy magayeng buwaten it mga magpamayaꞌ in beteꞌ may masakal kat nakem nira

¹May esa paꞌ gasiꞌ nga iꞌaat kut imyu. Unuy kat pikir mi, in beteꞌ may ipagkupaꞌayus it esa nga namayaꞌ nga ega magkapakay ya duꞌun it sulsug ya kat pamayaꞌ? Unu, magayen nga iꞌapyat ya duꞌun it mga taw nga ega magkilala it Ampuꞌang Diyus? Unuy maꞌrutan nira pasar it kataldengan nga magayen kat panleteg ya? Kaꞌilangan iꞌapyat lamang kat mga kasubung mi nga magpamayaꞌ. ²Ka unu, ega magkaꞌrutan mi nga, mga magpamayaꞌ, uyut it magꞌukuman it banwa ngaytu kat pagdadarapaꞌen? Ta it atkayan, unu, ega kaya mi nga ayusun i atkayan mana ngayang kadedekeyet bagay? ³Sabap maski mga anghil, uyut tami it mukuman it kanira. Ta daꞌga subraꞌ ta nga kaya nga ayusun i mga bagay kat pangaꞌgenan tami? ⁴Aypaꞌ in beteꞌ may masakal kat nakem mi, unu, iꞌapyat mi paꞌ duꞌun it mga taw nga pagkilalaen mi nga belag i nakem ka egay pagkilala nirat Ampuꞌang Diyus? ⁵Beteꞌ ayaw na. Eyaꞌan mi na. Ka unuytu, egay taw asan nga magkaꞌrut mayus it in unuy piyagsasaꞌran it kasubung yang magpamayaꞌ? ⁶Unuka atkayan pay pagbuwaten mi nga magdima-dimandaen kamu nga sang sulsugan kat pamayaꞌ? Bawnga duꞌun paꞌ it mga taw nga ega magpamayaꞌ it ki Cristo i pagꞌapyatan!

⁷Ipagsugid kut imyu nga in ipagdimanda mi i mga sulsug mi kat pamayaꞌ, sikayan subuk diyaꞌeg kamu nga lagi kat panleteg it Ampuꞌang Diyus. Sana yay magayen, palipasen mi na lamang i kamaliꞌ nga pagbuwaten baw panluku it imyu. ⁸Temed ta, it sang kamu-kamuwan naga nga sang sulsugan kat pamayaꞌ i magbuwat it kamaliꞌ baw magpanluku it esa may esa! ⁹Unu ega paꞌ magkaꞌrutan mi nga iyan mga ega magpangindiꞌ it kasalaꞌan nira, talagang egay maski unu nga kabagiꞌan duꞌun it kaꞌadiꞌan it Ampuꞌang Diyus? Ega ambutan mi i sadili mi. Ka iyan mga mapiyamakun duꞌun it ega asawa nira, mga magsirbi it pagbete-beteꞌen nga diyus, mga magbungad it atay it nagꞌasawa, iyan mga magpasbung it babay takaꞌ lalaki naga, baw mamagꞌuꞌunay nay nagsubung nga lalaki, ega talagay kabagiꞌan nira duꞌun it kaꞌadiꞌan it Ampuꞌang Diyus. ¹⁰Atnaga i mga mananakaw, mga maꞌirak it kusas nga magkapisiꞌ situt banwa, mga mapiyalangu, mga mapiyandiyampaꞌ baw mga mapiyanreges-reges. ¹¹Iyan katꞌesa may atkayan naga yan asat imyu. Temed kayti, linimpiyuꞌ kamu na kat mga kasalaꞌan mi, baw ipiyasiguru kamu na duꞌun it Ampuꞌang Diyus nga mga taawan ya na. Ipagpabetang ya na kamu nga ega nay kakasalaꞌan kat panleteg ya. Muꞌsa ngaytu, kat keseg it binwat it Ampuꞌan nga si Jesu-Cristo baw guna it Espiritu Santo it Ampuꞌang Diyus nga ipiyapasarum ya situt bilug ta.

Kaꞌilangan, paꞌalaidan i muꞌsang kalasit pamakun duꞌun it ega asawa mu

¹²Ta, barang may magꞌaat, “Mapakay ta nga buwaten i maski unu, basta ega biyawal it Ampuꞌang Diyus.” Sabagay na, temed ega muꞌsang buwat, kat ikagayen tami. Baw maski matuud nga magkabwat tami i kumpur ireg tami nga buwaten, nga iyan ega biyawal it Ampuꞌan, temed kaꞌilangan magꞌintur nga ega nay adat nga subraꞌ tami nga pagrarasan, nga subung nat magꞌuꞌuripen it aten. ¹³Maat siꞌ it beken, “Iyan pangaꞌen, talagang ipagbetang lamang kat tinaꞌi, baw egay beken nga pagꞌargan it tinaꞌi in daꞌga pagbetangan it pangaꞌen. Aypaꞌ in paggetmanan, simpri kumaꞌen. Tutal, mabut i aldaw nga awaꞌen it Ampuꞌang Diyus i pangaꞌen, pati tinaꞌi ta ka ega nay pagꞌargan. Atkayan naga i bilug ta. Unuka ega sumbayaꞌen tami i kaꞌirgan ya nga manguꞌi-kuꞌit it maski siyu nga magꞌireg gasiꞌ? Tutal, mabut i aldaw nga maꞌawaꞌ gasiꞌ i bilug ta, pati mga kaꞌirgan ya ngaytu.” Temed ega talaga magayen yan. Sabap ega yay pagꞌargan it bilug ta, pamakun duꞌun it ega asawa ta. In daꞌga iyan i pagꞌargan, ikabantug it Ampuꞌan. Baw Ampuꞌan ngaytu i kat ikagayen it bilug ta. ¹⁴Baw bilug ta, talagang egnen it paꞌuliꞌ it Ampuꞌang Diyus kat keseg it guna ya, subung nagat iyan inggen yat paꞌuliꞌ i Ampuꞌan.

¹⁵Unu bayan, ega paꞌ magkaꞌrutan mi nga, kitang mga magpamayaꞌ, bilang sang bagiꞌ na nga bilug ni Cristo i bilug tami? Ta unu, pisiꞌen tami i sang bagiꞌ ngaytu nga bilug ni Cristo, ka buwaten ta nga sang bagiꞌ nga bilug it babay nga ega magayen i pangaꞌgenan ka ipagpanulus yay bilug ya? Talagang ega mapakay yan. ¹⁶Unu, ega magkaꞌrutan mi nga iyan magsalya it atkayang babay, magbaraꞌ nang sang kabilu-bilugan na sira? Sabap magꞌaat ngayan duꞌun it kasuratan,

“Sira nga duwa, sang kabilu-bilugan na sira.”6:16 Genesis 2:24b.

¹⁷Temed iyan magpasakep na it Ampuꞌan, kalagpit ya na baw sang kanake-nakeman na sira.

¹⁸Aypaꞌ paꞌalaidan mi nga pirmi i muꞌsang kalasit pamakun duꞌun it ega asawa mu. Ka itung kasalaꞌan, belag kat muꞌsang kasalaꞌan nga beken nga magkabwat it taw. Sabap kat pamakun ngaytu duꞌun it ega asawa mu, ipagkasalaꞌan mu i bilang sang bagiꞌ it bilug ni Cristo duꞌun it ega bagiꞌ it bilug ya. ¹⁹Unu, ega paꞌ magkaꞌrutan mi nga bilug mi, kabilangan ya, ega basta-bastang balay nga pagtataꞌidan it Espiritu Santo nga ipiyapasarum it Ampuꞌang Diyus? Aypaꞌ talagang ega nayan imyu i bilug mi in daꞌga, kat Ampuꞌang Diyus na. ²⁰Ka subuk inalang ya kamu it ega basta-bastang kantidad isaꞌun mga taawan ya na. Aypaꞌ ka inturun mi i bilug mi, nga kat ikabantug it Ampuꞌang Diyus i muꞌsang pagbuwaten.

Panulduꞌ pasar it pagꞌasawa

¹Ta, itu nay mga ipagtubag ku it mga isiyurat mi nga ingkut. Maat mi, maski nagꞌasawa subuk magayen in ega riꞌnge-riꞌngen it lalaki i bilug it babay.7:1 Maat it Ginirego, “Magayen in ega riꞌnge-riꞌngen it lalaki i bilug it babay.” Temed kat pasepsep it beken nga mapipikir, egaytu ampang ni Pablo in daꞌga pagsangpiten ya lamang i ibintang it mga taga Corinto kat surat nira. Ituꞌun kunuꞌ, kamaliꞌ nga ipagpaliꞌwan it beken nga babay duꞌut Corinto ngayti nga maat, maski nagꞌasawa, magayen in ega riꞌnge-riꞌngen it lalaki i bilug it asawa ya. Aypaꞌ pagtaldengen ni Pablo kat itu nga sugi-sugid ya. ²Temed in yay magkataban it mga lalaki duꞌun it pamakun duꞌut ega asawa nira, kaꞌilangan, kada nagꞌasawa, babay, lalaki, pagsagyaan yay kanya-kanyang asawa. ³Bawnga, in pasar it adat it nagꞌasawa, kaꞌilangan mapiyabayaꞌ-bayaꞌ i lalaki it asawa ya, atkayan naga i babay. ⁴Sabap, kat mga nagꞌasawa, ega maat babay i may pudir kat sadili yang bilug, in daꞌga asawa ya. Atkayan naga i lalaki. Ega gasiꞌ i pudir ya kat sadili yang bilug in daꞌga iyan asawa ya. ⁵Ayaw kamut daꞌga it asawa mi, magpuyrat piyagꞌupakatan mi nga daꞌkamu daꞌan magꞌulid it pirang aldaw isaꞌun kasarunga it magayen it panalangin. Ta in matupus mi na i timpu nga piyagꞌupakatan mi, kaꞌilangan magꞌulid kamu siꞌ. Atkaytuy magayen isaꞌun daꞌkamu marayak ni Satanas nga sumalya kat taw nga ega asawa mu, in beteꞌ ega magkapuꞌgunan mi i sadili mi. ⁶Temed maski itu ngaytu pasar it pandaꞌga it asawa it ega maꞌlay, egaytu maat urdin kut imyu, temed mapakay naga in yay pikir mi nga magayeng buwaten. ⁷Sana, ireg ku, pasbung kamung muꞌsa it aken nga ega kaꞌilangan nga may asawa. Temed egaytu muꞌsa i inildawan it Ampuꞌang Diyus it itung kakayaan. May kanya-kanyang pagtanggapen nga ildaw nga garing duꞌut kanya. Ega siyurubung i muꞌsa.

⁸Ta, ituy iꞌaat ku it mga balu, babay, lalaki.7:8 Kat pasepsep it beken, ituy ireg sugiden it Ginirego, “ituy iꞌaat ku it mga umbay paꞌ baw mga balu.” In beteꞌ mabwat nira, magayen in maneꞌteꞌ sira nga egay aꞌasawa, subung nagat aken. ⁹Temed in ega magkasupil nira i sadili nira, magayen mangasawa u paꞌasawa siꞌ sira. Ka magayen pay atkayan, ega gat magrambang mata.

¹⁰Ta, kamung magpamayaꞌ nga nagꞌasawa, itu i ipagꞌaat ku, baw ega lamang aku in daꞌga Ampuꞌan i nagꞌurdin kaytu. Ega mapakay nga pablag i babay it asawa ya. ¹¹Takaꞌ in pablag kanya, kaꞌilangan nga maneꞌteꞌ na i uꞌumbay ya. In ega magayen yay maneꞌteꞌ nay uꞌumbay ya, kaꞌilangan, muliꞌ naga duꞌun it asawa ya.7:11 Aypaꞌ maꞌyag sikaytu nga in nagpablag kanya it asawa ya, ega mapakay nga paꞌasawa it beken. Baw urdin gasiꞌ kat mga lalaki, ega pablagan mi i asawa mi.

¹²May ipagꞌaat ku gasiꞌ kat mga beken. Ituꞌun ngaytu, ega Ampuꞌan i nagꞌaat, esa-esang aku na. Kayti, in beteꞌ esang lalaki nga magpamayaꞌ, magꞌaꞌasawa it ega magpamayaꞌ, takaꞌ ireg nat ega ngayti magpamayaꞌ nga magteꞌteꞌ sira, magayen ega na pablagan ya. ¹³Ta, atkayan naga, in esang babay nga magpamayaꞌ, pagꞌaꞌasawaen it ega magpamayaꞌ, takaꞌ ireg nat lalaki nga magteꞌteꞌ i pagꞌasawa nira, ega na pablagan it babay. ¹⁴Sabap paribasay namayaꞌ nay asawa ya, maski ega paꞌ magpamayaꞌ i lalaki ngayan, ipagpapinpin na kanya it Ampuꞌang Diyus kat beken nga taw nga ega paꞌ magpamayaꞌ i asawa.7:14 Egaytu maat ipagpabetang it Ampuꞌang Diyus nga taawan ya na i itung taw, ka ega paꞌ namayaꞌ kanya. Temed paribasay magpamayaꞌ i asawa ya, pabetang it Ampuꞌang Diyus it kanya, belag it pabetang ya it mga taw nga egay asawa nga magpamayaꞌ. Sana, kabetangan nira ngaytuy tumaban it kanira it mamayaꞌ na isaꞌun maribri. Ta atkayan naga in beteꞌ babay i ega paꞌ magpamayaꞌ, temed namayaꞌ na i lalaki nga asawa ya.7:14 Pagpaꞌiguꞌan kaytu, mga nagꞌasawa nga ega paꞌ magpamayaꞌ i duwa iyan nagꞌasawa sira. Bawnga, mabut nga mamayaꞌ na i sang kataawan. Ka maꞌyag i inaat ni Pablo duꞌut kapitulu 7:39 nga in namayaꞌ nay sang kataawan, ega magayen in mangasawa kanya u paꞌasawa it taw nga ega paꞌ namayaꞌ. Ka in ega atkayan i pabetang it Ampuꞌang Diyus it mga taw nga may asawa nga namayaꞌ na, simpri ega gasiꞌ atkayan i pabetang ya it mga anak nira. Temed yay matuud, pati mga anak nira, ipagpapinpin gasiꞌ it Ampuꞌang Diyus kat beken nga mangaꞌwaꞌ nga ega magpamayaꞌ i giyaringan nira. ¹⁵Takaꞌ in beteꞌ kupablag it asawa ya i ega ngaytu magpamayaꞌ, paꞌuyunan mi na lamang nga pablag kanya. Ega na kaꞌilangan nga daꞌgaen. Temed dedemdemen mi nga yay pabetang-betang it Ampuꞌang Diyus it aten, maꞌimbeng nga pangaꞌgenan. ¹⁶Ka in ega maranggaꞌ i pagꞌasawa, paribasay magpamayaꞌ i asawa ya, barang yay tumaban it ega paꞌ ngaytu namayaꞌ it mamayaꞌ na isaꞌun maribri.

Teꞌteꞌan ta lamang it masagyay nakem i kabetangan nga ipiyabetang-betang it Ampuꞌang Diyus it aten

¹⁷Iyan bay magayen, in unuy ipiyabetang-betang it Ampuꞌang Diyus nga kabetangan it kada esa pagpanakem yat aten nga sumarig baw mamayaꞌ it ki Cristo, kat kabetangan ngayan, tumanen tami i ipiyabetang-betang ya it aten. Ituytu i ipagpanulduꞌ kut muꞌsa nga mga magpamayaꞌ. ¹⁸In beteꞌ naturiꞌan na nga uyun kat urdin ni Moises i esang taw parabir piyanakman kanya nga mamayaꞌ it ki Cristo, ega na maat awaꞌen ya paꞌ i mga tandaꞌanan nga kanya, naturiꞌan na. U in beteꞌ, taw nga ega naturiꞌan ka ega sakep it iyang urdin, maski ega na paturiꞌ kanya. ¹⁹Ka yay matuud, ega naga impurtantiꞌ in naturiꞌan kanya u ega. In daꞌga iyan talagay impurtantiꞌ, pagsunud it muꞌsang ipagpasunud it Ampuꞌang Diyus nga kaꞌirgan ya. ²⁰Aypaꞌ, magayen in teꞌteꞌan it kada esa i kabetangan ya, iyan piyanakman kanya it Ampuꞌang Diyus nga pasakep it kanya. ²¹In beteꞌ uripen ka iyan piyanakman ka na it Ampuꞌang Diyus, ega maat sasawun mu i pikir mu. Temed in beteꞌ begayan ka nat rugar nga maribri ka kat pagkaꞌuripen, simpri ega na palipasen mu. ²²Ka maski uripen ka, basta namayaꞌ kang matuud it ki Cristo, kat Ampuꞌan ka na nga binggayan ya nat ega basta-bastang karibriyan. Baw iyan taw nga ega uripen iyan piyanakman na kanya it Ampuꞌang Diyus, subuk nagbaraꞌ kanya nga uripen, ka manigsirbi na ni Cristo. ²³Talagang kat ega basta-bastang kantidad subuk inalang kamu it Ampuꞌang Diyus isaꞌun mga taawan ya na. Aypaꞌ, kaꞌilangan, daꞌkamu na paꞌuripen it masigkataw mi7:23 Barang ireg sugiden kaytu, dapat ega paꞌuripen sira it kamaliꞌ nga ipagpangadal it beken duꞌut Corinto. in daꞌga kat Ampuꞌang Diyus na lamang. ²⁴Mga sulsug ku kat pamayaꞌ, in unuy kabetangan mi it iyan piyanakman kamu it Ampuꞌang Diyus nga pasakep it kanya, teꞌteꞌan mi lamang nga pagsunudun i padisir ya.

May kagayenan it ega magꞌaꞌasawa temed ega naga kasalaꞌan in magꞌaꞌasawa

²⁵Ta, sabap gasiꞌ it mga egay aꞌasawa, egay makabgay ku nga urdin nga garing duꞌun it Ampuꞌan. Temed ipaliꞌwan ku i in unuy kat pikir ku. Siguru ega naga yan kamaliꞌ i ipagsugid ku ngaytu sabap inildawan aku it Ampuꞌan it magayeng kasepsep. ²⁶Ka sabap it subraꞌ na ngaytung kakuriꞌan, kayti pagpikiren ku nga magayen in maneꞌteꞌ i lalaki it in unuy kabetangan ya. ²⁷In beteꞌ may upakat mu na nga babay, ega na maat kaꞌilangan pasurut ka. U in beteꞌ egay upakat mu, ega na beteꞌ tumulus ka it babay nga asawaen mu. ²⁸Takaꞌ in mangasawa ka, ega maat nagkasalaꞌan ka. Atkayan naga i babay nga upakat mu, in paꞌasawa kanyat imu ega naga kasalaꞌan ya. Temed subraꞌ pay mga kakuriꞌan baw pagregnan kat pangaꞌgenan it mga magꞌaꞌasawa. In maat beteꞌ ega magꞌaꞌasawa kamu, ega dumungag i mga pagregnan baw kakuriꞌan kat pangaꞌgenan mi.

²⁹Ituy ireg ku nga sugiden, mga sulsug ku kat pamayaꞌ. Piyaꞌababaꞌ nay timpu nga magkasirbi ta it Ampuꞌang Diyus. Aypaꞌ ka, garing kayti, iyan may asawa, sana ega naga buwaten ya nga baer nga yay ega ikasarunga yat magayen it pagsirbi ya it Ampuꞌan. ³⁰Atkayan naga, ega naga ikabaer kat pagsirbi mi it Ampuꞌan i kasmek, kasagyaan u pagngatanan. ³¹Simpri, mga bagay situt banwa ngaytu, mapakinabangan ta. Temed, kaꞌilangan, ega naga yay labiyen tami. Ka mabut i aldaw nga maꞌiriꞌ i banwa ngaytu baw muꞌsang betang ya.

³²Ta, ireg ku baꞌ, alaid it imyu i magkalibegan it pikir kat pangaꞌgenan. Iyan umbay nga lalaki, paribasa it egay asawa ya, magkasarunga ya it magayen i kaꞌirgan it Ampuꞌan, isaꞌun sagyaan it Ampuꞌan i pangaꞌgenan ya. ³³Temed iyan lalaki nga magꞌaꞌasawa na, mga bagay gasiꞌ situt banwa i kaꞌilangan ya nga sarungaen, in magꞌuꞌunu mapasagya ya i asawa ya. ³⁴Aypaꞌ pagbabagiꞌen i paꞌres ya. Atkayan naga i babay nga ega nay asawa baw mga umba-umbay paꞌ.7:34 Kat pasepsep it beken nga mapipikir, ega lamang maski siyu nga babay nga umbay paꞌ i pagpaꞌiguꞌan kaytu, in daꞌga sira nga may upakat na nga lalaki, subung nagat duꞌun it birsikulu 28 it kapitulu ngaytu. Magkasarunga ya i kaꞌirgan it Ampuꞌan, isaꞌun mapasiguru ya i sadili, kat bilug baw kat nakem, nga kat Ampuꞌan talaga. Temed babay nga magꞌaꞌasawa na, mga bagay gasiꞌ situt banwa i kaꞌilangan ya nga sarungaen, in magꞌuꞌunu mapasagya ya i asawa ya.

³⁵Ireg ku sana nga mga naꞌampang ku ngaytu, kat ikagayen mi, ega maat kat ikagipit mi. Ka iyan talagay ireg ku, matabangan ku kamu nga muwat it in unuy bagay it imyu kat panleteg it Ampuꞌan, isaꞌun, magꞌaꞌasawa it daꞌga, makapagsirbi kamu nga banar duꞌun it kanya it egay magkalibegan it pikiran mi.

³⁶Temed in beteꞌ may lalaki nga may upakat na duꞌut esang babay, temed pagpikiren ya nga barang kasalaꞌan ya in ipatabus yay upakat nira, magayen in ipatabus ya naga, maꞌget in makuriꞌ nga supilen yay sadili ya. Ega naga kasalaꞌan ya in magꞌasawa na sira. ³⁷Temed in yay kat nakem it lalaki, ega na asawaen ya i babay ngayti nga inupakat ya, ka maneꞌteꞌ it uꞌumbay ya, magayen gasiꞌ. Basta nasiguru ya nga banar kat nakem ya nga yay magayeng buwaten ya, nga ega magkaregesan lamang, baw inildawan kanya it kakayaan nga supilen i sadili ya. ³⁸Aypaꞌ, mangasawa it daꞌga, magayen naga. Temed subraꞌ nga magayen in ega na asawaen ya.7:38 Egaytu maat magayen pat magꞌaꞌasawa i ega magꞌaꞌasawa i katataawan. Temed, sabap it mga kakuriꞌan nga siyangpit ni Pablo duꞌun it birsikulu 26 it kapitulu ngaytu, in yay napikir it esang magpamayaꞌ nga lalaki nga ega mangasawa, yay magayen pat mangasawa kanya.

³⁹Iyan babay nga may asawa na, ega mauꞌbadan kanya mintras egen pay asawa ya ngayti. Takaꞌ in natay nay asawa ya, subuk nauꞌbadan na. Mapakay na nga paꞌasawa siꞌ it maski siyuy ireg ya, basta gasiꞌ magpamayaꞌ it Ampuꞌan i paꞌasawaen ya. ⁴⁰Temed, kat pikir ku, subraꞌ kanya nga masagya in maneꞌteꞌ kanya it uꞌumbay ya. Baw, pikir ku ngaytu, uyun naga siguru it pikir it Espiritu Santo it Ampuꞌang Diyus.

Panulduꞌ pasar it karniꞌ nga ipiyagsalisi duꞌun it pagbete-beteꞌen nga diyus

¹Ta kayti, tubagen ku nay inaat mi pasar it karniꞌ nga maat ipagsalisi it mga taw duꞌut pagbete-beteꞌen nirang diyus. Matuud i inaat mi nga, magkaꞌrutan tami nga muꞌsa i kamatuudan pasar it mga pagbete-beteꞌen ngaytu. Temed dedemdemen mi tu, iyan mga magkaꞌrutan ta, yay magtaban it taw kat palandi-landi. Temed iyan pagmaꞌal baw kararas, sana yay magpupuꞌgun it aten ka yay magpapaꞌgen it pamayaꞌ it esa may esa. ²In beteꞌ ipagpalandi-landi it esang taw nga ustuꞌ nay kasepsep ya, maꞌyag nga ega paꞌ magkasepsepan ya in unu sana i liꞌwan it kamatuudan nga kasepsep. ³Temed iyan taw nga magraras it masigkataw ya, yay pagkilalaen it Ampuꞌang Diyus nga taw nga may kamatuudan nga kasepsep ngaytu.

⁴Aypaꞌ, in pasar it karniꞌ nga ipagsalisi duꞌun it mga pagbete-beteꞌen nga diyus in unu, makaꞌen it kitang magpamayaꞌ u ega, ituy masugid ku. Magkaꞌrutan tami nga ega kamatuudan nga diyus i mga pagbete-beteꞌen lamang ngaytu. Ka talagang esa-esay Ampuꞌang Diyus. Kanya lamang i kamatuudan nga Ampuꞌan. ⁵Maski na maat pagꞌaaten it taw nga may mga diyus duꞌun it langit u situt banwa, baw maski dakel i mga pagpangaranan nirat diyus baw ampuꞌan ngaytu, ⁶temed in aten, esa-esa lamang talagay kamatuudan nga Ampuꞌang Diyus nga Amaꞌ tami. Kanyay garing it muꞌsa baw magpangaꞌgenan tami kat ikabantug ya baw kat ikasirbi it kanya. Esa-esa lamang gasiꞌ i Ampuꞌan nga si Jesu-Cristo, kanya nga nagguna it muꞌsang bagay, baw kanya nga puꞌun it baꞌgung kaꞌgenan tami.

⁷Temed ega muꞌsang magpamayaꞌ i magkasepsep kaytu. Ka may beken nga, pananu-tanud nira, kamatuudan naga i mga pagbete-beteꞌen nga diyus ngaytu ka yay nasulagan nira. Baw paribasay ubas sirang banar it pagsamba it mga itu ngaytu it tagnaꞌ, aypaꞌ ka seked kayti, in beteꞌ paragiꞌ sira it pagkaraꞌnen duꞌun it papagsambaang balay it pagbete-beteꞌen ngaytu, kat nakem nira, magsamba sira siꞌ it diyus nga may kamatuudan. Aypaꞌ, paribasay ega paꞌ natantuwan it nakem nira nga egay kamatuudan it mga pagbete-beteꞌen ngaytu, marayak sira it sumalya it pagsardawun it nakem nira nga ega dapat buwaten. ⁸Sabagay ega sabap it pangaꞌen pagsagyaan tami it Ampuꞌang Diyus. Ega nagay maꞌilang it aten in ega kumaꞌen tami it atkaytu nga pangaꞌen, baw ega gasiꞌ i kagayenan nga magkabgay it aten in kumaꞌen tami kayan. ⁹Temed magꞌintur kamu, ka maski ega magulu i ulu mu in pakiragiꞌ ka it atkaytung pagkaraꞌnen, temed barang iyan i pasiꞌan-siꞌanan it kakursud kat kasalaꞌan i iyan mga kurang pay kasepsep. ¹⁰Ka in beteꞌ, ikaw nga maat dakulay kasepsep pasar it itung mga bagay, magpanragiꞌ it pagkaraꞌnen duꞌun it balay nga papagsambaan nirat pagbete-beteꞌen nga diyus, baw maltegan ka it esang kurang pay kasepsep, unu yan, daꞌga gumuru na kanya nga kumaꞌen gasiꞌ it iyan ipiyagsalisi kat pagbete-beteꞌen ngaytu nga diyus, nga sikayan, kat nakem ya, bilang magsamba kanya it mga pagbete-beteꞌen ngayti? ¹¹Aypaꞌ subraꞌ ngaytu nga kasepsep mu, yay ipagkaranggaꞌ it pamayaꞌ it sulsug mu nga kurang pay kasepsep, kanya nga esa nagang sana maribri sabap it kamataynen ni Cristo. ¹²Ta, basta atkayan i buwat mu nga magkasalaꞌan ka na duꞌun it sulsug mu kat pamayaꞌ, ka ipiyakursud mu kanya nga muwat it ega tamaꞌ kat nakem ya, egay beken, si Cristo na mismu i piyagkasalaꞌanan mu. ¹³Aypaꞌ ka in sabap it pangaꞌen makapakursud kat kasalaꞌan i sulsug ku kat pamayaꞌ, seked talaga it kaꞌnu-kaꞌnu ega na lamang kumaꞌen aku it karniꞌ nga ipiyagsalisi isaꞌun ega makapakursud ku kanya kat kasalaꞌan.

Maski unu nga pudir ta, yay ipadaꞌeg kat nakem, ikagayen it beken

¹Talagang may pudir ku nga muwat u ega muwat it in unuy ireg ku, basta ega kasalaꞌan. Baw talagang kamatuudan aku nga apustul. Talagang naltegan naga it duwa nga mata ku si Jesus nga Ampuꞌan tami.9:1 Mga Binwat 9:1-7. Baw daꞌga baꞌ, kamu ngaytu, bilang buwaꞌ it pagsirbi kut kanya kat pagkaꞌapustul ku? ²Maski ega pagkilalaen it beken i pagkaꞌapustul ku temed kamu siguru, pagkilalaen mit imyu. Ka pamayaꞌ mi ngaytu it Ampuꞌan i magpamatuud it pagkaꞌapustul ku.

³Ta, itu nay tubag ku kat mga magpakiꞌambut it pagkaꞌapustul ku asan. ⁴Panawun it pikir mi i katengdanan namen. Daꞌga baꞌ may pudir namen nga gastuꞌan it mga pagtulduꞌan namen kat mga pagkaꞌilanganen namen nga subuk mga pagkaꞌnen baw pagꞌimnun? ⁵In ipagpanlekep namen i Magayeng Baritaꞌ, daꞌga baꞌ may pudir namen nga pabayaꞌ it asawa, basta subung nga magpamayaꞌ, nga subung it ki Pedro, iyan beken nga mga apustul, baw iyan mga sulsug it Ampuꞌan? ⁶Maski magpanulus i adat namen ni Bernabe in magpangadal kami, ega pikiren mi nga egay pudir namen nga medek it panulus isaꞌun kasarunga it katengdanan namen. ⁷Ka siyung sundaluꞌ i magsirbi kat sadili yang gastuꞌ? Siyung tagluwak i ega makapakinabang it buwaꞌ it diniyu-diyu yang luwak? Siyuy manigꞌeper it tupa nga ega makapakinabang it gatas it pagꞌeperan ya? Simpri ega.

⁸Pagsugiden ku ngaytu, ega lamang kat pagbuwaten it taw i pagpisiꞌan. Iyan naga i pagsugiden it mga urdin. ⁹Ka magꞌaat duꞌun it mga urdin nga ipiyasurat it Ampuꞌang Diyus it ki Moises,

“Ega bangkurungan muy baꞌbaꞌ it bakaꞌ nga pagpagiꞌken mu mintras pagtaꞌad-taꞌadan yay ipagpagiꞌek ngaytu.”9:9 Deuteronomio 25:4.

Unu baꞌ, ipiyasurat it Ampuꞌang Diyus i atkaytu sabap subray raras yat mga bakaꞌ? ¹⁰Ega, in daꞌga ipiyasurat ya kat ikagayen tami gasiꞌ nga taw. Ka alimbawa, taw nga magꞌaradu baw taw nga maggiꞌek in timpu na, mapakay talaga nga siguruun nira nga bagiꞌan sira it kaygen nga bilang tumbas it karigaan nira. ¹¹Ta, kami ngaytu, subuk liminwak kami asat imyu it ega basta-bastang biꞌni nga yay timnaban it imyu it magsarig baw magpamayaꞌ kamu na it ki Cristo. Aypaꞌ daꞌga baꞌ mapakay na nga bagiꞌan kami it bilang kaygen it karigaan namen ngayan nga gastuꞌan kami lamang kat mga pagkaꞌilanganen namen it aldaw-aldaw? ¹²Ka subuk pagpakinabangan it beken nga mga manigpangadal asan i pudir nira nga pagastuꞌ it imyu it atkaytu. Daꞌga baꞌ subraꞌ kami paꞌ?

Temed iyan asan kami it imyu magpangadal, ega giyamit namen i pudir namen. Talagang ega ireg namen nga bilang palsaan namen i Magayen ngaytung Baritaꞌ pasar it ki Cristo nga ipagpangadal namen. Aypaꞌ talagang pagsagkaꞌen namen lamang i kakuriꞌan namen ngaytu nga magpanulus it sadili. ¹³Unu, ega magkaꞌrutan mi nga iyan mga manigsirbi duꞌun it Templo it mga Judio, mamagtanggap it pangaꞌen nira nga garing duꞌun it Templo? Ka iyan baꞌ, mga manigsirbi duꞌun it papangantengan, may kabagiꞌan nira it mga salisi nga ipagsamba duꞌun it papangantengan ngayti. ¹⁴Atkayan naga nga pabetang-betang, ipiyagꞌurdin it Ampuꞌan nga iyan mga manigpangadal it Magayeng Baritaꞌ, dapat talaga nga ikaꞌgen nira i Magayen ngaytung Baritaꞌ.9:14 Mateo 10:10, Lucas 10:7.

¹⁵Temed maski may pudir ku, seked kayti, ega talaga magꞌangut akut tabang it mga pagtulduꞌan ku. Baw ega maat pagsuratan ku kamu kayti isaꞌun begayan mi lamang aku it tabang mi. Ka ire-ireg ku pay puyangten aku lamang, ega gat mapalsaan i ipagpadayaw ku nga pagbuwaten it Ampuꞌang Diyus kat pagpangadal it Magayeng Baritaꞌ. ¹⁶Ega ireg ku nga sugiden nga pangadal ku ngaytut Magayeng Baritaꞌ i ipagkadayaw it aken, ka yay katengdanan nga ipiyagrumra it aken. Talagang ega magkapakay it nakem ku baw ukuman it Ampuꞌang Diyus i pagꞌangutun ku in ega mangadal aku. ¹⁷In beteꞌ pagbuwaten kuytu kat sadili ku nga kaꞌirgan, mapakay nga paꞌbutun kuy tabang it mga pagtulduꞌan ku kat mga pagkaꞌilanganen ku, nga bilang tumbas it paꞌres ku. Temed it Ampuꞌang Diyus i garing it katengdanan ku ngaytu, pagsarungaen ku lamang i ipiyakarguꞌ yat aken. ¹⁸Ta, it atkayan, unuy tumbas it aken? Itu na, kasasagyaan it nakem ku nga ipagpangadal kuy Magayen ngaytung Baritaꞌ it daꞌku magpagastuꞌ, isaꞌun ega masubraꞌan kuy pudir ku ngaytu nga pagastuꞌun ku i mga pagtulduꞌan ku. ¹⁹Talagang daꞌku uripen it maski siyung taw. Temed kayti subuk nagpaꞌuripen aku it masigkataw ku isaꞌun, kat tabang ku, subrang dakel i sumarig baw mamayaꞌ it ki Cristo. ²⁰Ka in duꞌun akut mga Judio, adat ku, adat it mga Judio isaꞌun makabig ku sira. Maski maat daꞌku na pagsasakpen it mga urdin ni Moises, pagpaꞌuyunan ku naga9:20 Mga Binwat 16:1-3 baw 21:23-26. mintras kaꞌibaan ku sira nga magpasakep paꞌ it mga urdin ngaytu, isaꞌun, subung nat inaat ku, makabig ku sira. ²¹Ta in duꞌun sit mga taw nga ega Judio nga ega pagsasakpan it mga urdin ngaytu nga ipiyaskel it Ampuꞌang Diyus it ki Moises, subung aku gasiꞌ it ega Judio, nga ega pagsasakpan it urdin, isaꞌun makabig ku gasiꞌ sira. Egaytu maat nangangaꞌulugan nga ega pagꞌintindiyen ku i mga urdin it Ampuꞌang Diyus, sabap pagsunudun ku talaga i muꞌsang ipiyagꞌurdin ni Cristo. ²²Ta in iyan siꞌ i pagtulduꞌan ku, mga malulubay paꞌ nga pamayaꞌ, nga dakel pay pagliꞌyan nira, pagpaꞌuyunan ku sira isaꞌun mapakseg ku i pamayaꞌ nira. Basta ega kuntraꞌ kat inaat it Ampuꞌan talagang pagpaꞌuyunan ku i muꞌsang taw kat in unu nga buwat isaꞌun, sana, may makaparibri ku kat panriga it kasalaꞌan nira. ²³Pagbuwaten kuy muꞌsa ngaytu isaꞌun subrang dakel i kaꞌibaan ku nga magpamayaꞌ it Magayeng Baritaꞌ nga mabagiꞌan it kagayenan nga maggaring sikaytu.

²⁴In ipasubung tat kuntis i pagsunud tat Ampuꞌan, daꞌga baꞌ magkaꞌrutan mi nga iyan mga uyut it malagyu, mamagpalagyu nga muꞌsa, temed simpri iyan mandaꞌeg lamang i katanggap it pirimyuꞌ? Aypaꞌ gayen-gayenen mi nga palagyu isaꞌun mapirimyuꞌan kamu gasiꞌ i imyu. ²⁵Atkayan naga, iyan mga manigkuntis, ereꞌeret i pangigpit nirat sadili nira kat muꞌsa nga mga bagay isaꞌun mandaꞌeg sira. Temed iyan pirimyuꞌ nga matanggap nira, linikaw nga dikut lamang nga ega maꞌlay manluyus.9:25 Itung dikut, magayeng pagletganan. Sumang kaꞌanu may bura-burak. Paglikawun tu nga pagbuwateng kuruna ka ipagpakuruna it in siyu-siyu nga nandaꞌeg. Temed pirimyuꞌ tat aten nga pagsisiguruun tami, egay katupusan ya. Aypaꞌ ega gasiꞌ kalabtaꞌen tami i aten nga pagsirbi it Ampuꞌan, in daꞌga paꞌresan. ²⁶Yanagay buwat kut aken nga pagpaꞌresan kuy aken nga pagsirbi. Subung akut manigpalagyu nga makseg baw diritsu i palagyu ku duꞌun it siguradu nga pagꞌabutun. Kabilangan ku gasiꞌ, subuk manigsuntuk nga magkaꞌiguꞌ yang pirmi i kalaban ya, ega maat magsuntuk lamang it lawang. ²⁷Talagang pagsagkaꞌen ku i maski unu nga kakuriꞌan it bilug ku baw talagang pagbegbegan kuy sadili ku. Ka barang pagkapangadal ku duꞌun it beken in magꞌuꞌunu makaniray pirimyuꞌ, aku siꞌ i ega mabgayan.

Bawal talaga i pakiragiꞌ it pagkaraꞌnen nga belag it Ampuꞌang Diyus i pagsambaen

¹Ka ireg ku, mga sulsug ku kat pamayaꞌ, nga masepsepan mi i kaꞌulugan it nagꞌabut kat mga kasubung tami nga taawan it Ampuꞌang Diyus kat timpu ni Moises. Sira nga muꞌsa, pagꞌulngan it kunum nga ipiyagꞌildaw it Ampuꞌang Diyus it kanira. Sira gasiꞌ nga muꞌsa, kat keseg it guna ya nakadipag it dagat nga pagpangaranan it Dagat nga Madarag. ²Kabilangan ya, subuk nabawtisan sirang muꞌsa duꞌut kunum ngayti baw duꞌun it dagat, tandaꞌ it mga manigsunud sira ni Moises nga magpanguꞌna it kanira. ³Kat keseg it guna it Ampuꞌang Diyus binggayan sirang muꞌsa it makaꞌen nira, iyan duꞌun sirat rugar nga kapupuyangtan. ⁴Atkayan naga i maꞌinum nira. Subung nagat kaꞌsa ngayti nga piyabugasꞌas i danum duꞌun it batu nga duꞌut Horeb.10:4 Exodo 17:6. Batu ngayti, ladawan ni Cristo ngaytu nga bilang keseg nira nga magꞌiba-iba baw magtatarima nga pirmi it kanira. ⁵Takaꞌ maski dakulay nalabayan nira ngaytung ildaw it Ampuꞌang Diyus, kadaklan nira, ega siyagyaan ya. Aypaꞌ ka natariwanak nay mga tuꞌlang nira duꞌut rugar nga kapupuyangtan.

⁶Iyan mga nagꞌabut ngaytu nga atkaytu, paꞌimbandaytu it aten isaꞌun ega ipadaꞌeg kat nakem tami i pagsumbayaꞌ it mga bagay nga maraꞌe-raꞌet, subung it siyari nirat buwat. ⁷Kamu gasiꞌ, paꞌalaidan mi i pagsamba it mga pagbete-beteꞌen nga diyus, nga yay kasalaꞌan it beken nga mga taawan ngaytit Ampuꞌang Diyus it tagnaꞌ. Ka magbebtang duꞌun it kasuratan nga, kat pagsamba nirat pagbete-beteꞌen nga diyus nira,

“Nagkaraꞌnen-karaꞌnen i mga taw baw namagꞌinum-inum, langkuy it nagkasagyaan sirat maraꞌway nga pagkasagyaan.”10:7 Exodo 32:6b. Ituꞌun ngaytu, magꞌiguꞌ it ega magayeng pagbuwaten it beken nga magpamayaꞌ duꞌut Corinto nga magpanragiꞌ it pagkaraꞌnen duꞌun it papagsambaang balay it mga pagbete-beteꞌen nga diyus, nga sikayan ipagpabetang it Ampuꞌang Diyus nga magsamba sira it mga pagbete-beteꞌen ngayti.

⁸Baw gasiꞌ ayaw ta nat pamakun duꞌun it ega asawa ta,10:8 Kat iting timpu atkayting pamakun, magbayaꞌ in magsamba i katataawan duꞌun it papagsambaan it mga pagbete-beteꞌen nga diyus. nga subung it binwat it beken nga mga taw ngayti it tagnaꞌ. Sabap it buwat nira ngayti duwang puluꞌ may tulung ribu i natay it sang aldaw lamang, panriga it Ampuꞌang Diyus it kanira. ⁹Kaꞌilangan gasiꞌ, ega sukda-sukdanan tami i Ampuꞌan, nga subung gasit binwat it beken nga mga kaꞌibaan it mga taw ngayti, nga yay napuꞌnan it simnari sirat patay sabap siyari sirat tundaꞌ it mga dalitan nga dukul.10:9 Mga Bilang 21:4-7. ¹⁰Ega gasiꞌ mamasul kamu, nga subung it binwat gasiꞌ it beken nga mga kaꞌibaan nira, nga egay beken nga liꞌwan ya, piyuuꞌ sira it anghil nga mamumuuꞌ.10:10 Mga Bilang 14:1-38. Siguru siyasaran sira ni Pablo it atkaytu ka pagbasulun nira kanya sabap it panulduꞌ yat kanira it tagnang surat ya, nga biyawal yat kanira i paragiꞌ it mga pagkaraꞌnen duꞌun it papagsambaang balay it mga pagbete-beteꞌen nga diyus.

¹¹Nagꞌabut tu it kanira nga bilang paꞌimbanda it kadakel, baw isiyurat isaꞌun paꞌimbandaan tami gasiꞌ, kita nga mga inabut na it sauryan nga timpu.

¹²Aypaꞌ ka magtitiyakap i maski siyu nga, kat nakem ya, pagsisiguruun nga nakatindeg na kanya kat pamayaꞌ nga magꞌuꞌunay, ka mabwa-mabway barang kanya gasiꞌ i daꞌgen ni Satanas baw maꞌulug kat kasalaꞌan nga dakulaꞌ. ¹³Temed ega pay sukdan nga miyabut it imyu nga daꞌga paglabayen gasiꞌ it masigkataw mi. Temed magkasiguru mi i tabang it Ampuꞌang Diyus nga ega ipaꞌintulut ya nga sukdanan kamu it subraꞌ na it kaya mi. In daꞌga, pagꞌabut it sukdanan kamu, begayan ya kamu it keseg nga ipagkaꞌindaꞌeg it sukdan ngaytu.

In ega Ampuꞌang Diyus i pagsambaen, egay belag, mga maraꞌe-raꞌet

¹⁴Aypaꞌ ka, mga pagmaꞌalen ku, paꞌalaidan mi na i pagsamba it mga pagbete-beteꞌen nga diyus. ¹⁵Mapipikir kamung mga taw. Aypaꞌ pikiren mit magayen in tamaꞌ u ega i pagꞌaaten ku ngaytu. ¹⁶Ka daꞌga baꞌ in magpasalamat tami duꞌun it Ampuꞌang Diyus it pagꞌimnun in magꞌapunan tami, pagpaꞌiguꞌan ya, sang kanake-nakeman tami nga magpakiꞌiba-iba it ki Cristo ka may kaꞌuyutan it kagayenan nga maꞌaten sabap it duguꞌ ya nga ipiyaturuꞌ? Baw in magkaꞌen tami gasiꞌ it tinapay nga pagbagiꞌ-bagiꞌen, subung naga, sang kanake-nakeman tami nga magpakiꞌiba-iba it ki Cristo ka may kaꞌuyutan it kagayenan nga maꞌaten sabap it bilug ya nga ipiyagsalisi. ¹⁷Paribasay sangba-sangbatu i tinapay, lamang dakel tami, kabilangan ta, sang kabilu-bilugan lamang sabap magpakikaꞌen tami it sangba-sangbatu ngaytu nga tinapay.

¹⁸Demdemen mi gasiꞌ i mga Israelita it tagnaꞌ, iyan mga Israelita kat duguꞌ, ega kat pamayaꞌ.10:18 Mga tungtung-inapuꞌ ni Israel, piniliꞌ sirat Ampuꞌang Diyus nga mga taawan ya. Temed iyan egay matuud nga pamayaꞌ it kanya, inindiꞌan ya na. Kayti sira nga may kamatuudang pamayaꞌ it ki Cristo, Judio u daꞌga, esang pangaran it kanira, mga Israelita kat pamayaꞌ. Basaen i duꞌut Roma 9:6 baw 11:7-11 baw 11:15-21, baw Hebreo 8:7-13. Daꞌga baꞌ iyan mamagkaꞌen sira it mga ipagsalisi nga ipagpasalamat duꞌun it papangantengan, magpaꞌuyun sira it pagsamba it Ampuꞌang Diyus nga pagpasalamatan? ¹⁹Ta, barang pagpikiren mi na nga yay pagpapuntuꞌan it pagꞌaaten ku ngaytu, kamatuudan naga i mga pagbete-beteꞌen nga diyus baw ega basta-basta i pangaꞌen nga ipagsamba it mga taw duꞌut kanira. ²⁰Temed ega. Ipagpaꞌyag ku ngaytut imyu nga, iyan mga ipagsamba nira, nga kat pananu-tanud nira, mga diyus i pagsambaen, egay belag, mga mararaꞌe-raꞌet, nga mga taraꞌgen10:20 Mga taraꞌgen ngaytu ni Satanas, muꞌsa nga kimnampiꞌ it ki Satanas, iyan kuꞌagawun ya i kabantugan it Ampuꞌang Diyus. Aypaꞌ, magpanlud baw daꞌga magpanlud, simpri taraꞌgen sira, ka si Satanas ngayti i piyakapagbayaꞌen it muꞌsang mararaꞌe-raꞌet. ni Satanas. Talagang ega ireg ku nga magpaꞌuyun kamu it pagsamba it mga taraꞌgen ni Satanas. ²¹Ka talagang ega mapakay nga paꞌuyut kamu it pagꞌimnun baw pagkaꞌnen nga pagdemdem it ega basta-bastang kamataynen it Ampuꞌan, baw pakiragiꞌ gasiꞌ it pagkaraꞌnen nga ipagsamba nirat mga taraꞌgen ni Satanas. ²²Ta, it maꞌimun i Ampuꞌang Diyus,10:22 Exodo 20:5. unu, ireg tami nga angutun i iseg ya? Unu, subray aten nga kakayaan it kanya?

Maski mga bagay nga ega biyawal it Ampuꞌang Diyus, magayen ega buwaten ta in yay ipagkasalaꞌan it maꞌiba ta

²³Magꞌaat yan i beken, “Mapakay ta nga buwaten i maski unu, basta ega biyawal it Ampuꞌang Diyus.” Sabagay na, temed ega muꞌsa ngaytu, ipagkagayen u ipagkapakseg it pamayaꞌ. ²⁴Sana ega sadiling ikagayen i tulusun ta, in daꞌga in unuy kat ikagayen it maꞌiba ta.

²⁵Aypaꞌ, kaꞌnen mi i maski unu nga magkaꞌalang mi duꞌut tindaꞌan it karniꞌ.10:25 Kat iting timpu, pagkatiwas it pagsamba, ipagpaꞌalang na duꞌut palingkiꞌ i karniꞌ nga ipiyagsalisi duꞌut pagbete-beteꞌen nga diyus, kaꞌuyutan it beken nga karniꞌ nga ega ipiyagsalisi. Aypaꞌ, maski ega pagtemden nga magpakiragiꞌ it pagsamba nira, barang ipiyagsalisi na ngaytu nga karniꞌ i maꞌalang. Ega sasawun mi i nakem mi u mingkut in giyamit kat pagsamba it pagbete-beteꞌen nga diyus u ega. ²⁶Sabap inaat duꞌun it ampang it Ampuꞌang Diyus nga isiyurat,

“Iyan banwa baw muꞌsang mga betang ya, Ampuꞌang Diyus i garing.”10:26 Awit 24:1.

²⁷In beteꞌ imbitaren kamu nga pakikaꞌen duꞌun it balay it esang taw nga ega magpamayaꞌ, baw ireg mi gasiꞌ nga paragiꞌ, kaꞌnen mi i maski unu nga itarakan it imyu. Ega sasawun mi i nakem mi u mingkut in giyamit kat pagsamba it pagbete-beteꞌen nga diyus u ega. ²⁸Temed in may maat it imyu, “Ipiyagsalisi baytu nga ipiyagsamba it pagbete-beteꞌen nga diyus,” ta, ayaw kamut kaꞌen kayan, kat sanguꞌ mi it nagꞌaat ngayan it imyu, isaꞌun egay malibegan it pikir ya. ²⁹Eeꞌ baꞌ, pikiren mit magayen i nakem it beken, ega lamang sadili mi. Ka maski ega malibeg i pikir mi in kaꞌnen mi, unuy kapulusan in malibeg i pikir it maꞌiba mi ngayti?

³⁰Temed barang may magꞌaat, “In talagang pagpasalamatan ku duꞌut Ampuꞌang Diyus i pagkaꞌnen ku, unuka basulun aku paꞌ sabap it iyan piyasalamatan ku na duꞌun it Ampuꞌang Diyus?” ³¹Ega maat magꞌaꞌatkayan. Sana, kat muꞌsang pagbuwaten mi, in magkaꞌen, magꞌinum, u maski unu, magꞌintur nga kat ikabantug nga muꞌsa it Ampuꞌang Diyus. ³²Inturun mi nga egay buwaten mi nga bilang ipagkaꞌarbeng it taw kat pamayaꞌ it ki Cristo, Judio u daꞌga, baw egay buwaten mi nga ipagkaranggaꞌ it pamayaꞌ it mga kasubung mi nga namayaꞌ na. ³³Guruun mi i adat ku, ka aken, iyan i pagpaꞌresan ku, mabgayan it ikasagyat nakem i muꞌsang mga taw kat muꞌsang pagbuwaten ku. Ega maat pagtulusun ku i sadili ku nga ikagayen in daꞌga iyan ikagayen it kadaklan, isaꞌun sana maribri sira kat panriga it Ampuꞌang Diyus sabap it mga kasalaꞌan nira.

¹Eeꞌ baꞌ, guruun mi i aken nga adat ka, aku, pagguruun kuy adat ni Cristo.

Panulduꞌ pasar it in unuy bagay it mga babay kat pagsamba nirat Ampuꞌang Diyus

²Ta kayti, magayen i buwat mi nga, kat muꞌsang mga bagay, pagtulusun mi i ipiyagtulduꞌ kut imyu, baw pagsunudun mi. ³Takaꞌ, itu pay ireg ku nga masepsepan mi nga, piyakaꞌulu it kada lalaki, si Cristo. Piyakaꞌulu gasiꞌ it babay i lalaki, baw Ampuꞌang Diyus, kanyay piyakaꞌulu ni Cristo. ⁴Aypaꞌ iyan lalaki nga magpanalangin kat sarungaan it kadakel, u magpaꞌrut it mga ampang nga ipiyanakem it Ampuꞌang Diyus it kanya, in beteꞌ buwaten ya it may yumyum it rupa, talagang pagtibabaꞌen ya i piyakaꞌulu ya nga si Cristo.11:4 Adat it mga lalaki duꞌut iting mga banwa, in duꞌut adapan it mataꞌas nga taw, pagtungkalen niray tudung nira, nga tandaꞌ it paggalang. ⁵Temed in beteꞌ may esang babay nga magpanalangin u magpaꞌrut gasiꞌ it mga ipiyanakem it Ampuꞌang Diyus it kanya, in buwaten ya it egay yumyum it rupa ya,11:5 Adat it mga babay duꞌun, basta manliꞌwan kat balay, kaꞌilangan nga payumyuman i rupa. Ka in ega atkayan, dakulang kaeꞌyaꞌan, ka magsugid nga magparayag-rayag sira. intuntis nga pagtibabaꞌen ya i lalaki nga piyakaꞌulu ya. Egay piyagbelagan it egay yumyum ya baw tiyales i buꞌlug, subung nagat mga babay nga ega magayen i adat. ⁶Eeꞌ baꞌ, in beteꞌ ega magꞌireg payumyum i esang babay, patales na lamang kanya. Ta, it kaꞌeyaꞌ-eyaꞌ it mga babay i patales u pabuꞌlug it pagpakiyasan na, dapat nga may yumyum it rupa nira in magtingped kamu.11:6 Uliꞌan-uliꞌan it panulduꞌ ngaytu ni Pablo, ega magayen in baliwalaꞌen it mga babay i lalaki nga piyakaꞌulu nira. Duꞌut kanirang banwa, basta duꞌut liꞌwan it balay, pagyuyumyuman i rupa it babay, nga yay kanirang ipagpakilala it piyakaꞌulu nira i lalaki. Temed, kada bangsat taw, may kanya-kanyang adat nga ipagpakilala i ituꞌun ngaytu. Aypaꞌ, egaytu magsugid i panulduꞌ ngaytu ni Pablo nga, maski unu nga bangsat taw, kaꞌilangan pagpalikusan it mga babay i rupa nira, in ega adat nira nga lagi. Temed pagpapuntuꞌan ni Pablo nga, in unu-unuy adat it kada bangsat taw nga ipagpakilala nga mga lalaki i piyakaꞌulu it mga babay, ega mapakay nga indiꞌan nira. Sunudun naga. ⁷Ka simpri ega mapakay nga may yumyum it rupa it lalaki in magtingped kamu sabap, kanya, ladawan it Ampuꞌang Diyus baw duꞌut lalaki matanyag i kabantugan it Ampuꞌang Diyus ngaytu. Temed iyan babay, dapat nga may yumyum it rupa sabap, duꞌut babay, kaꞌilangan matanyag i kabantugan it lalaki. ⁸Ka daꞌga baꞌ, iyan giyuna it Ampuꞌang Diyus i uꞌna ngayting lalaki baw babay, ega garing kat babay i lalaki in daꞌga iyan babay i gimnaring kat lalaki. ⁹Baw ega gasiꞌ kat ikagayen baw ikasagya it babay giyuna it Ampuꞌang Diyus i lalaki, in daꞌga kat ikagayen baw ikasagya it lalaki giyuna ya i babay. ¹⁰Aypaꞌ in magtingped kamu kaꞌilangan may yumyum it rupa it babay, katandaꞌ it pagkilalaen nga piyakaꞌulu ya i lalaki, baw kat ikasagya gasiꞌ it mga anghil. ¹¹Takaꞌ kat pabetang-betang it Ampuꞌan, kaꞌilangan it babay i lalaki, baw kaꞌilangan gasiꞌ it lalaki i babay. ¹²Eeꞌ baꞌ, nga garing nga matuud i uꞌnang babay kat lalaki temed, garing it iting timpu, egay lalaki nga daꞌga ipiyanganak it babay. Temed Ampuꞌang Diyus talaga i garing it muꞌsa.

¹³Aypaꞌ kamu na i mukuman in tamaꞌ nga pagbuwaten u ega in magpanalangin duꞌut Ampuꞌang Diyus i esang babay kat sarungaan it kadakel it egay yumyum it rupa ya. ¹⁴Daꞌga baꞌ singkadan tang lagi nga kaꞌeyaꞌ-eyaꞌ it lalaki i magpaꞌabwatay it buꞌuk, ¹⁵temed in kat babay, kat ikabantug ya? Kasasagyaan it Ampuꞌang Diyus kat mga babay i buꞌuk nga abwatay, ka yay ipiyagbegay yat kanira nga bilang magꞌuꞌunay nga yumyum. Subraꞌ na in magtingped kamu kat adapan ya, kasasagyaan ya i may yumyum it rupa it mga babay. ¹⁶Ta, in beteꞌ may magꞌireg paꞌ pakidaꞌeg, nga baliwalaꞌen i pagyuyumyuman i rupa it babay in magtingped, itu lamang i masugid ku nga, adat ngayang atkayan, belag talaga it ipagpanulduꞌ namen baw belag it pagꞌadaten it muꞌsang mga magpamayaꞌ nga beken, maski ari.

Panulduꞌ pasar it tamaꞌ nga pagbuwat it pagdemdem it kamataynen ni Jesus

¹⁷Iyan siꞌ i sangpiten ku kayti. Ega maat mapakay nga tuꞌgudun ku kamu kat ituꞌun ngaytu, ka iyan pagtingped mi nga magsamba, ega maat kat ikagayen in daꞌga kat ikaraꞌe-raꞌet. ¹⁸Ka uꞌna-uꞌna ya, nabaritaꞌan ku nga in magtingped kamu nga magsamba, ega magꞌurunyun kamu ka, buwat it beken, pagbidaꞌen nira i maꞌiba nira. Subuk pagpakimatuudun kuytu nga barang may kamatuudan. ¹⁹Sabagay ega matuduꞌ it kitang taw i atkaytung pagbuwaten. Temed, maski atkayan, may pakinabang ya naga ka matanyag in siyu talaga i may kamatuudan nga pamayaꞌ nga pagsagyaan it Ampuꞌang Diyus.

²⁰Ta, in magtingped kamu nga pagbuwaten mi i pagsamba ngaytung pagdemdem it kamataynen it Ampuꞌan, alaid kat nakem mi i pagpapuntuꞌan ya. Ega kamataynen it Ampuꞌan i kat nakem mi, ²¹in daꞌga sadili mi lamang nga kaꞌirgan i pagpikiren. Sabap iyan beken, magꞌuꞌna-uꞌna nat kumaꞌen baw inum nga daꞌna magdenga-denganen, kaꞌen baw inum nga daꞌna pagpatngen. Aypaꞌ mamaglangu nay beken, iyan beken pamaggetmanan.11:21 Mga manggaden duꞌun, subuk ipagdengan nira it mga dakulang pagkaraꞌnen nira i apunan nga pagdemdem it kamataynen ni Jesus. Subuk ega kamataynen ngayti i kat nakem nira in daꞌga kasasagyaan it magkaꞌen baw magꞌinum it dakulaꞌ. Beken gasiꞌ, ega pagꞌintindiyen nira i mga kaꞌibaan nira nga makukuriꞌ, ka ega magsake-sakepen it pangaꞌen. ²²Unu baꞌ, egay sadili mi nga balay nga duꞌun i kaꞌnan mi baw imnan? Unuytu, pagraꞌwayen mi i mga taawan it Ampuꞌang Diyus? Ka ungayan, pagꞌeyaꞌen mi i mga kaꞌibaan mi nga makukuriꞌ asan nga ega taribunus i magkataban nirang pangaꞌen. Ta, unu yan i buwaten ku kayti, tuꞌgudun ku kamu? Talagang ega. Ega maat tuꞌgudun ku kamu.

²³Saꞌupun ku siꞌ i panulduꞌ garing duꞌun it Ampuꞌan, nga ipiyangadal it aken baw ipiyangadal kut imyu it tagnaꞌ pasar it pagbuwaten nga pagdemdem it kamataynen ya. Iyan delem nga idiyagang na duꞌun it mga kuꞌimatay it kanya i Ampuꞌan nga si Jesus, iyan mamagkaꞌen na sira, kimnuꞌmit kanya it tinapay. ²⁴Pagkakuꞌmit piyasalamatan ya duꞌut Ampuꞌang Diyus, bawnga biyagiꞌ ya. Pagkabagiꞌ maat ya, “Itu ngaytu, bilug kuytu nga buwaten nga salisi kat ikaribri mi. Buwaten mi tu nga pirmi nga pagdemdem mi it kamataynen ku.” ²⁵Pagkatupus it kaꞌen nira singkel ya i iꞌimnan. Maat ya, “Rugud it iꞌimnan ngaytu, keseg it baꞌgung pakiꞌupakat it Ampuꞌang Diyus kat katataawan nga egay beken nga keseg ngaytu in daꞌga sadili ku nga duguꞌ nga ipaturuꞌ ku. Kada imnun mi tu, buwaten mi nga pirmi nga atkaytu nga pagdemdem mi gasit aken.” ²⁶Sabap kada kumaꞌen kamu it tinapay baw minum kamu it atkaytung pamwat, talagang ipagtanyag mi i kamataynen it Ampuꞌan seked it saꞌup siꞌ nga paꞌasitu ya.

²⁷Aypaꞌ ka in siyu-siyu nga gumuru it ega magayeng adat it beken asan11:27 Basaen i paꞌyag duꞌun it birsikulu 21 it kapitulu ngaytu. in magkaꞌen baw magꞌinum it pagdemdem ngaytu, talagang ega bagay it ega basta-bastang pagpapuntuꞌan kaytu. In atkayan i buwat nira, talagang ukuman it kanira, subung nagat ukuman nga ibetangan it mga minimatay it Ampuꞌan. ²⁸Aypaꞌ ka inturun mi in magꞌuꞌunu kumaꞌen it tinapay baw minum it pagꞌimnun nga pagdemdem it kamataynen it Ampuꞌan. ²⁹Sabap in siyuy kumaꞌen baw minum it ega pagꞌintindiyen ya i mga kaꞌibaan ya nga sang kabilu-bilugan, ukuman nga panriga it Ampuꞌang Diyus i pagꞌangutun ya kayan. ³⁰Baw subuk nagpapuꞌun na asat imyu i panriga ngaytu, nga dakel asat imyu i malulubay baw masasarut, baw may miyatay paꞌ nga beken. ³¹Takaꞌ in maat pagꞌintindiyen tat magayen i maꞌiba ta, simpri ega mabetanganan tami it Ampuꞌan it ukuman. ³²Temed in sakaliꞌ nga pagbetanganan tami it Ampuꞌan it ukuman, pagtaldengen ya lamang yan kita, isaꞌun daꞌtami makaꞌuyut it beken nga mga taw nga rigaen asan it ipangukuman it banwa.

³³Aypaꞌ ka, mga sulsug ku kat pamayaꞌ, in magtingped kamu nga pagbuwaten mi i pagdemdem it kamataynen it Ampuꞌan, kaꞌilangan paltegan mit magayeng adat i maꞌiba mi. ³⁴Baw iyan mga pagkaraꞌnen nga dakulay pagkaꞌnen, magayen duꞌun lamang it sadili mi nga balay i buwatan, ega ipagdengan it pagbuwateng pagdemdem it kamataynen it Ampuꞌan, isaꞌun ega ukuman nga panriga i baraꞌan it pagtingped mi ngaytu.

Ta, pasar gasiꞌ it beken nga mga bagay, ayusun ku mana pagꞌabut ku asan.

Panulduꞌ pasar it mga kakayaan nga ipagꞌildaw it Espiritu Santo

¹Ta kayti, mga sulsug ku kat pamayaꞌ, itu siꞌ i ipaꞌyag kut imyu, pasar it mga kakayaan nga ipagꞌildaw it Espiritu Santo. Ka ireg ku nga maꞌyag nga banar it imyu i itu nga mga bagay. ²Daꞌga baꞌ tagnaꞌ, nga daꞌkamu paꞌ magkilala it Ampuꞌang Diyus, narayak kamu baw paglukuun nga magsirbi it maski unu-unu na nga pagbete-beteꞌen nga diyus, mga tiyaw-taw nga ega magkaꞌampang? ³Aypaꞌ, kayti, isaꞌun daꞌkamu maꞌakalan, itulduꞌ ku nat imyu in magꞌuꞌunu matantuwan mi in Espiritu Santo talaga i garing it pagꞌampangen it esang taw u ega. Ipagpaꞌrut kut imyu nga ega maꞌampang it taw nga pagsasaruman it Espiritu Santo i ampang nga magꞌaat, “Sana maꞌiguꞌ si Jesus it panriga nga sumpa it Ampuꞌang Diyus!” Baw ega gasiꞌ maꞌampang it maski siyu i magꞌaat, “Kamatuudang Ampuꞌan si Jesus,” basta ega pagpadisiran kanya it Espiritu Santo.

⁴Talagang dakel-dakel i mga kakayaan nga ipagꞌildaw it Espiritu Santo, temed esa-esa lamang i Espiritu Santo ngaytu nga pagpanggaringan. ⁵Dakel-dakel gasiꞌ nga pabetang-betang it pagsirbi, temed esa-esa lamang talagay Ampuꞌan nga pagsirbiyan. ⁶Belag-belag i liꞌwan it guna it Ampuꞌang Diyus kat pangaꞌgenan it taw, temed esa-esa gasiꞌ i Ampuꞌang Diyus nga pagpanggaringan it guna ngaytu.

⁷Kada esa nga binggayan it kakayaan, katandaꞌ tu it Espiritu Santo i garing kayan. Baw muꞌsa ngaytung kakayaan, kaꞌilangan gamiten tami kat ikagayen it muꞌsang kasubung tami nga magpamayaꞌ. ⁸Ta yan beken, pagꞌildawan it Espiritu Santo nga magkapaꞌyag sira it may ega basta-bastang kasepsep pasar it mga pabetang-betang it Ampuꞌang Diyus. Kat beken gasiꞌ, pagꞌildawan it esang ampangen nira nga ipiyaꞌrut it Espiritu Santo it kanira. ⁹Ta, kat begay nagat Espiritu Santo, iyan beken, pagꞌildawan it subray basta nga pamayaꞌ it guna it Ampuꞌang Diyus, nga ipatantu ya kat mga ipagpabwat yat kanira. Iyan beken, magkapagayen it mga magsarut. ¹⁰May beken gasiꞌ nga binggayan it kakayaan nga magkabwat it mga kalililuꞌang bagay. May pagpanakman gasiꞌ it Espiritu Santo it ampang nga ipagpaꞌrut it Ampuꞌang Diyus duꞌut kadakel, baw may pagꞌildawan gasiꞌ it kakayaan nga magkakilalaan nira in Espiritu Santo talaga i magpanakem it mga ampang nga atkaytu, u in panluku lamang it mga maraꞌe-raꞌet. May pagbegayan paꞌ gasiꞌ it ildaw nga magkaꞌampang it belag-belag nga ampang nga ega naꞌadalan nira. Ta, kat beken gasiꞌ, magkapaꞌyag niray ireg sugiden it mga ampang ngaytu nga ega naꞌadalan. ¹¹Temed ta, yanayan, esa-esa lamang tu i Espiritu Santo nga magpamgay it muꞌsa ngaytu baw magpamagiꞌ-bagiꞌ it namelag-belagen ngaytung kakayaan uyun kat pabetang-betang ya.

Kaꞌalimbawaan it mga magpamayaꞌ, esa-esa nga bilug ni Cristo, lamang dakel i buwat-buwat

¹²Ta, in panawun it pikiran tami i bilug it taw, daꞌga baꞌ maski dakel i buwat-buwat, esa-esa nagang bilug? Baw mga buwat-buwat ngaytu, sang kabilu-bilugan sira. Ta, atkayan naga si Cristo baw muꞌsang magpamayaꞌ it kanya. ¹³Sabap kita nga muꞌsa, Judio u daꞌga, uripen u ega uripen, esa-esa talaga i Espiritu Santo nga subuk ibiyawtis it aten isaꞌun magbaraꞌ tami nga subuk esa-esa lamang nga bilug. Ka talagang esa-esa na ngaytung Espiritu Santo it Ampuꞌang Diyus i ipiyapasarum situt aten nga muꞌsa.

¹⁴Talagang, bilug ta, dakel-dakel nga buwat-buwat ya, ega esa-esa lamang. ¹⁵Temed maski atkayan, sang kabilu-bilugan i muꞌsa ngaytu. Maski beteꞌ aaten it aꞌay, “Daꞌku naga alima aypaꞌ ka daꞌku buwat-buwat it bilug,” daꞌga baꞌ ega matuud? Buwat-buwat naga kanya it bilug maski ega alima kanya. ¹⁶Atkayan naga, in beteꞌ aaten siꞌ it talinga, “Paribasay daꞌku mata, aypaꞌ daꞌku naga buwat-buwat it bilug,” simpri ega gasiꞌ matuud ka kaꞌuyutan nagat buwat-buwat it bilug i talinga ngaytu. ¹⁷Ka in beteꞌ purus mata na lamang i muꞌsang bilug, magꞌuꞌunuytu makagneg? Atkayan naga, in purus talinga na lamang i muꞌsang bilug, magꞌuꞌunu makaꞌarek? ¹⁸Temed talagang ibintang it Ampuꞌang Diyus i kada buwat-buwat it bilug uyun kat naꞌirgan ya nga betangan. ¹⁹Sabap ega mapangaranan it bilug in esa-esa na lamang nga buwat-buwat. ²⁰Temed talagang yay kamatuudan, dakel nga buwat-buwat temed esa-esa nga bilug.

²¹Ta, it atkayan, ega maꞌaat it mata i alima, “Ega bayan kaꞌilangan ku ikaw!” Subung naga, ega maꞌaat it ulu i aꞌay, “Bilaꞌ, ega kaꞌilangan ku kamu!” ²²In daꞌga yay matuud, iyan mga buwat-buwat nga pananu-tanud egay maꞌargan, iyan paꞌ i kaꞌilangan nga banar. ²³Baw iyan mga buwat-buwat it bilug nga ipagpabetang ta nga ega magayeng pagletganan, pagpagayenen ta. Subung naga, iyan mga buwat-buwat nga ipagꞌeyaꞌ ta, pagꞌinturun baw pagtagnepan it magayen. ²⁴Itu ngaytu, ega na dapat buwaten duꞌun it mga buwat-buwat nga ipagpabetang tang lagi nga magayen. Temed iyan giyuna it Ampuꞌang Diyus i bilug it taw, binggayan yat kaꞌimpurtantiꞌan i mga buwat-buwat nga subuk ega impurtantiꞌ. ²⁵Binwat yaytu isaꞌun magꞌesa-esa baw magꞌurunyun i muꞌsang mga buwat-buwat, nga magtabang-tabangen it esa may esa. ²⁶In beteꞌ magkakuriꞌan i esat kanira, ipagpabetang nira nga kakuriꞌan nirang muꞌsa. In pagdayawun i sangbat, masasagya nga muꞌsa.

²⁷Ta kamu ngaytu, kaꞌuyutan it bilug ni Cristo, nga kabilangan it kada esat aten nga magpamayaꞌ, subuk mga buwat-buwat ya. ²⁸Baw magayen i pabetang-betang it Ampuꞌang Diyus kat aten ngaytung muꞌsa nga magpamayaꞌ it ki Cristo. Ka dakel i ipiyaskel ya nga katengdanan u kakayaan. Uꞌnay mga apustul, ikadwa iyan mga prupitaꞌ nga pagpanakman ya it ipagpaꞌrut ya duꞌut kadakel, baw ikatlu, mga manigpangadal it ampang ya. Nagpatindeg gasiꞌ kanya it iyan mga magkabwat it mga kalililuꞌang bagay, mga magkapagayen it mga magsarut, mga magkaꞌrut tumabang it maꞌiba nira it masagyay nakem, mga magkaꞌrut tumaban it maꞌiba nira kat buwaten it Ampuꞌan, baw mga iyan magkaꞌampang it belag-belag nga ampang nga ega naꞌadalan. ²⁹Ega maat muꞌsa, mga apustul na, prupitaꞌ u mga manigpangadal. Ega gasiꞌ muꞌsa, binggayan it kakayaan nga magkabwat it mga kalililuꞌang bagay. ³⁰Baw simpri ega muꞌsa, magkapagayen it mga magsarut, magkaꞌampang it belag-belag nga ampang nga ega naꞌadalan, u magkapaꞌyag it ireg sugiden it pagꞌaaten kat mga ampang ngaytu. ³¹Aypaꞌ ka ersen mi nga banar i piyakamagayen nga mga kakayaan, iyan nga subrang kat ikagayen it muꞌsa.12:31 Ireg sugiden kaytu, mga kakayaan nga talagang kat ikseg it pamayaꞌ it maꞌiba ta. Basaen i duꞌut kapitulu 14:1,3, baw 12. Temed in paggamiten mi i mga kakayaan ngaytu, may dalan nga subraꞌ pang magayen it dalan nga pagsunudun mi kayti.12:31 Dalan nga pagsunudun nira, ega magayen, sabap ega naga kat ikseg it pamayaꞌ it maꞌiba nira, in daꞌga kat ikaranggaꞌ. Ka atkayting pagꞌadaten nira, magꞌinggi-inggiten (kapitulu 3:3), magdima-dimandaan it mga sulsug kat pamayaꞌ (kapitulu 6:6), magpanluku it esa may esa (kapitulu 6:8), baw ega pagꞌintindiyen it mga manggaden i kaꞌibaan nira nga makukuriꞌ (kapitulu 11:22). Itung dalan, kararas it esa may esa. Yanagang dalan i ipaꞌyag kut imyu kayti isaꞌun masepsepan mi nga banar.

Piyakaꞌimpurtantiꞌ kat mga magpamayaꞌ i kamatuudan nga kararas

¹Maski na maat magkaꞌampang aku nat belag-belag nga ampang it taw situt sinirungat langit, it maski ega naꞌadalan ku, u maski ampang na it mga anghil, in talagang ega pay raras ku it masigkataw ku, iyan nga mga ampang ku, egay kapulusan. Subung na lamang it tingeg it mga sarabagen nga pagsabagen it sardak nga sabag. ²Subung naga, maski beteꞌ binggayan aku nat kakayaan nga pagpanakman it ipagpaꞌrut it Ampuꞌang Diyus duꞌut kadakel, baw pagtangkeden ku nay muꞌsang ipiyagtagu-taguꞌ yat tagnaꞌ nga kayti ipiyaꞌrut ya na, maski gasiꞌ magkaꞌrutan ku nay kumpur magkaꞌrutan it taw pasar it Ampuꞌang Diyus, baw subray basta i pamayaꞌ ku nga maski bukid, magkapaꞌugad ku na, temed ega nagay raras kut masigkataw ku, talagang taw aku nga egay kapulusan. ³U in beteꞌ ipamgay ku na i muꞌsang kusas ku nga pakaꞌnen ku i mga makukuriꞌ, baw ibgay ku beteꞌ i bilug ku kat mga kalaban ku nga antengen nira sabap it pamayaꞌ ku, in talagang egay kararas ku ngaytu, ega nagay mapulus ku nga kagayenan.

⁴Ka talagang iyan kararas ngaytu nga paꞌaaten, mapiyalulus baw maꞌildaw. Ega na maꞌinggit, ega na malandi-landi u mapiyasubraꞌ-subraꞌ. ⁵Ega na buwal, ega na sadiling kaꞌirgan lamang i pagpikiren, ega na makuꞌiseg, baw madaliꞌ nga pasinsiyaen i karaꞌe-raꞌetan nga pagbuwaten it beken kuntraꞌ it kanya. ⁶Baw ega na magkasagyaan i buwat nga maraꞌe-raꞌet in daꞌga yanay magkasagyaan, buwat nga magayen nga uyun kat kamatuudan. ⁷Ka in talagang pagrarasan tay maꞌiba ta, ega na abigwaren tay binwat nirang kamaliꞌ, masagyang pakimatuudun i magayen pasar it kanira, baw maseked-seked i pagꞌinawar nga subrang manggayen i adat nira kat pagdadarapaꞌen. Talagang in maratuudan i kararas ta, temeꞌteꞌ seked kaꞌnu-kaꞌnu maski unu nga pagmalasakitan it nakem i mabut.

⁸Talagang egay kaꞌawaꞌan it kararas ngaytu. Ega subuk mga kakayaan ngaytu nga ipagꞌildaw it Espiritu Santo. Ka mabut i aldaw nga maꞌawaꞌ i kakayaan nga pagpanakman it ipagpaꞌrut it Ampuꞌang Diyus duꞌut kadakel. Subung naga i magkaꞌampang it belag-belag nga ampang nga ega naꞌadalan. Maski kakayaan ngayan nga kiyaꞌrutan nga ipagbegay it Ampuꞌang Diyus pasar it mga pabetang-betang ya kat timpu ta ngaytu, mabut i aldaw nga ega na kaꞌilangan. ⁹Sabap mga magkaꞌrutan ta ngaytu, kurang paꞌ. Baw maski pagpanakman ta it ipagpaꞌrut it Ampuꞌang Diyus duꞌut kadakel, ega paꞌ ipiyaꞌrut yay muꞌsa. ¹⁰Temed yay matuud, pagꞌabut it kakumplituwan it muꞌsa ngaytu, maꞌawaꞌ naytu i subuk ega paꞌ ngaytu kumplitu. ¹¹Subung tu it pandakulaꞌ it taw. Ka iyan waꞌwaꞌ tami paꞌ, ampang pat waꞌwaꞌ i ampang ta. Subung naga i pikir ta baw pangataldengan ta. Temed iyan gurang tami na, naꞌawaꞌ nay adat paꞌ it waꞌwaꞌ. ¹²Kayti subung it waꞌwaꞌ tami paꞌ nga ega paꞌ ustuꞌ i magkasepsepan pasar it mga bagay it Ampuꞌang Diyus. Kabilangan ya, subuk magpanalamin ta duꞌun it ega na maꞌyag nga salamin. Temed talagang mabut i aldaw nga meyag tu nga muꞌsa ka maꞌawaꞌ i muꞌsang ipagkalukug it kasepsep. Kat iting timpu maꞌaten i kaꞌustuꞌang kasepsep, subung nagat kasepsep it Ampuꞌang Diyus it aten.

¹³Aypaꞌ kayti, may tulung bagay nga magpaneꞌteꞌ kat mga taawan it Ampuꞌang Diyus. Uꞌna, pamayaꞌ baw pagsarig tat kanya nga iribri ya kita nga matuud. Ikadwa, magꞌuꞌunay nga paniguru tat egay kaskedan nga kagayenan nga maꞌaten duꞌun it langit. Baw ikatlu, kamatuudan nga raras it esa may esa. Temed iyan talagay piyakamataꞌas kat tulu ngaytu, kararas na ngaytu, ka manupusan talagaytu.13:13 In duꞌun ta nat langit, nga natanggap ta nay karibriyan baw kagayenan ngaytu, simpri ega na pagꞌiꞌinawaren tami u sumarig nga begayan paꞌ. Temed kararas ngaytu, yay maneꞌteꞌ it egay kaskedan.

Panulduꞌ pasar it kakayaan nga magkaꞌampang it belag-belag nga ampang nga ega naꞌadalan

¹Impurtantiꞌ talaga nga paꞌresan mi nga pirmi i kararas ngaytu, takaꞌ inawaren mi naga gasiꞌ i mga kakayaan nga ipagꞌildaw it Espiritu Santo, subraꞌ na i pagpanakman it ipagpaꞌrut it Ampuꞌang Diyus duꞌut kadakel.

²Ituꞌun ngaytu, subraꞌ pay pakinabang yat kakayaan ngayang magkaꞌampang it belag-belag nga ampang nga ega naꞌadalan. Ka iyan magkaꞌampang it mga ampang nga ega naꞌadalan, Ampuꞌang Diyus tu i pagpakisugi-sugidan ya, egaytu masigkataw ya. Aypaꞌ ega nagaytu masepsepan nira sabap, kat panakem it Espiritu Santo, pagꞌampangen ya ngaytu i ega magkasepsepan it taw. ³Temed kakayaan ngayan nga pagpanakman it ipagpaꞌrut it Ampuꞌang Diyus, simpri mga taw i pagpakisugi-sugidan ya, bilang kat ikseg it pamayaꞌ nira, baw kat ikseg baw ikasagya it nakem nira. ⁴Iyan magkaꞌampang ngaytu it belag-belag nga ampang, sadili yang pamayaꞌ i pagpaksegen ya, temed iyan pagpanakman ngaytu it ipagpaꞌrut it Ampuꞌang Diyus duꞌut kadakel, pagpaksegen ya i muꞌsang kaꞌibaan ya nga magpamayaꞌ. ⁵Sana ireg ku, magkaꞌampang kamu nga muꞌsa it belag-belag nga ampang nga ega naꞌadalan, takaꞌ iyan i subrang ireg ku, pagpanakman kamu it ipagpaꞌrut it Ampuꞌang Diyus duꞌut kadakel. Sabap subrang magkapakinabangan i magkasugid ngaytu it ampang nga ipagpaꞌrut it Ampuꞌang Diyus, subraꞌ paꞌ it magꞌampang ngaytu it belag-belag nga ampang nga ega magkasepsepan it maski siyu, magpuyra in begayan kanya it magkapaꞌyag ya i pagꞌampangen ya ngaytu isaꞌun makatabang nga ikseg it pamayaꞌ it muꞌsang kaꞌibaan ya nga natingped.

⁶Mga sulsug ku kat pamayaꞌ, pikiren mi tut magayen. In beteꞌ paꞌasan aku it imyu baw mampang aku it belag nga ampang nga ega naꞌadalan ku, ta unuy mapulus mi kayan it aken? Talagang ega. Simpri iyan i may mapulus mi in yay ipaliꞌwan ku, panulduꞌ u pabetang-betang it Ampuꞌang Diyus nga ipiyanakem yat aken, esang magkasepsepan ku pasar it kanya, u esa gasing ipagkapanulduꞌ ku kat ikseg it pamayaꞌ. ⁷Ka subung it, alimbawa, mga turugtugun. In ega ipagpatlaꞌ it paliꞌeg, ega maꞌrutan it maski siyu i pagtugtugan. ⁸Atkayan naga, in ega ipagpabunawar nga banar i pamaꞌrut nga eyep it taburi, ta siyuy magrigen-rigen nga pakibunuꞌ? ⁹Ta, atkayan naga yan, magꞌuꞌunu maꞌrutan it maski siyu i ireg mi nga sugiden in magꞌampang kamu it belag-belag nga ampang nga ega magkasepsepan nira? Subung kamu na lamang it magpakisugi-sugid it lawang. ¹⁰Siguru dakel nga dakel i belag-belag nga ampang situt sinirungat langit, baw kada esa, simpri may pagꞌaaten. ¹¹Temed in daꞌku magkaꞌrut it ampang it kasugi-sugid ku, baw kanya, ega gasiꞌ magkaꞌrut it ampang ku, magꞌuꞌunu kami magsigsepsep? ¹²Aypaꞌ, it pagꞌiꞌinawaren mi nga banar i mga kakayaan nga ipagꞌildaw it Espiritu Santo, ta paꞌresan mi nga magbastanti kamu it kakayaan ngaytu nga magkapakseg it pamayaꞌ it mga kaꞌibaan mi.

¹³Aypaꞌ ka iyan i magayen, iyan binggayan ngaytut kakayaan nga magkaꞌrut kanya mampang it belag-belag nga ampang nga ega naꞌadalan, kaꞌilangan manalangin nga begayan gasiꞌ kanya it kakayaan nga makapaꞌyag yay pagꞌaaten ya kat ampang ngaytu. ¹⁴Ka in magpanalangin aku kat itu nga ampang, magꞌuyun i nakem ku temed in kat pikir ku, egay kapulusan, ka ega magkasepsepan ku. ¹⁵Ta it atkayan na, unuy magayen nga buwaten ku? Buwaten kuy duwa ngaytu, nga manalangin aku kat panakem ngaytu it Espiritu Santo, baw manalangin aku gasiꞌ kat ampang ngaytu nga sadili nga magkasepsepan it kadakel. Atkayan naga in magkantaꞌ it pagbantug kut Ampuꞌang Diyus. ¹⁶Ka in ega atkayan, in beteꞌ magpasalamat ka duꞌun it Ampuꞌang Diyus kat belag nga ampang nga panakem it Espiritu Santo, magꞌuꞌunu paꞌuyunan i pasalamat mu ngayan it mga kaꞌibaan mu it ega naga magkasepsepan nira i pagꞌampangen mu? ¹⁷Maski maat magayen i pasalamat mu ngaytu, temed ega nagaytu makatabang it beken nga ikseg it pamayaꞌ nira.

¹⁸Salamat nga dakulaꞌ duꞌun it Ampuꞌang Diyus nga magkaꞌampang akuy aken it belag-belag nga ampang nga ega naꞌadalan ku. Talagang ega masbungan mi aku kat kakayaan ngaytu. ¹⁹Temed in kat katingpedan it mga magpamayaꞌ, talagang iyan i magayen ku, maski limang tagaꞌ i maꞌampang ku basta magkasepsepan baw ikseg it pamayaꞌ it beken, ega gat rinibu-ribu nga ampang nga ega magkasepsepan it maski siyu.

²⁰Mga sulsug ku kat pamayaꞌ, sana gantiyan mi nay pikir mi pasar it mga itu ngaytu. Ka pikir mi kayti, subung lamang it pikir it waꞌwaꞌ. Sabagay in pasar it kubwat it karaꞌe-raꞌetan, sana yay subung kamu it madaragen nga ega pay kat nakem nira nga itu ngaytu. Temed in pasar it kasepsep it kaꞌirgan it Ampuꞌang Diyus, kaꞌilangan ustuꞌ nay pikir mi. ²¹Dedemdemen mi i isiyurat nga ampang it Ampuꞌang Diyus nga magꞌaat,

“Mabut i aldaw nga, kat ampang it beken nga bangsa it taw, ipaꞌrut kut mga taawan ku ngaytu i kusugiden kut kanira.

Temed maski atkayan, talagang daꞌsira pagneg it aken.”14:21 Duꞌun it Isaias 28:11-12 i pinsiꞌan temed, kat panakem it Espiritu Santo, giyantiyan ni Pablo it dekeyeꞌ isaꞌun mapisiꞌ i ipagpanulduꞌ ya it mga taga Corinto.

²²Garing sikayan matantuwan ta nga, ampang nga ega magkasepsepan i gamiten it Ampuꞌang Diyus nga bagay it mga magbaliwalaꞌ it mga inaat ya, nga tandaꞌanan it daꞌsira magpamayaꞌ. Temed iyan mga taw nga magpamayaꞌ it magayen, ampang nga magkasepsepan nira i ipaꞌrut it Ampuꞌang Diyus it kanira it kusugiden ya, nga ituy tandaꞌanan it magayen naga i pamayaꞌ nira.

²³Ta kayti in beteꞌ mamagtingped i kadakel mi nga magpamayaꞌ baw, kapuꞌsaan mi, magꞌampang it belag-belag nga ampang nga ega magkasepsepan it maski siyu, bawnga sakaliꞌ may mabut nga mga taw nga ega magpamayaꞌ u mga elam kat itung mga bagay, daꞌga aaten nira nga mamagpulpug kamu na! ²⁴Temed imbis nga magꞌampang it belag-belag nga ampang nga ega magkasepsepan, magtuturan kamu it ipagpaꞌrut it Ampuꞌang Diyus kat ampang nga magkasepsepan it muꞌsa, daꞌga matanudan it mga miyabut ngayti nga may turubagen nira duꞌut Ampuꞌang Diyus ka makasalaꞌan sira? ²⁵Ta daꞌga kat pagneg nira makalbaw na i mga tagu-taguꞌ nga kasalaꞌan kat nakem nira? Bawnga limingkuꞌud na sira ka bantugun nay Ampuꞌang Diyus, langkuy aaten nira nga talagang situ nang matuud it imyu i Ampuꞌang Diyus ngaytu.

Kat mga pagtingped it mga magpamayaꞌ, kaꞌilangan buwaten i muꞌsa kat tamaꞌ baw maꞌayus nga pabetang-betang

²⁶Ta it atkaytu na, mga kasulsugan, unuy magayen kat panleteg it Ampuꞌang Diyus? Daꞌga itu na, in magtingped kamu nga magsamba, alistu kamu nga muꞌsa kat kanya-kanyang kakayaan nga ipiyagꞌildaw it Espiritu Santo. Alimbawa barang may kumantaꞌ, may tumulduꞌ, may mampang it ipiyaꞌrut it Ampuꞌang Diyus it kanya. Iyan beken, barang mampang it belag nga ampang nga ega naꞌadalan, u paliꞌwan it paꞌyag it itu ngaytu kat panakem it Espiritu Santo. Temed muꞌsa ngaytu, kaꞌilangan buwaten kat ikseg it pamayaꞌ it muꞌsa. ²⁷Kayti, in beteꞌ may mampang it belag-belag nga ampang nga ega naꞌadalan, tamaꞌ na i duwa u tulu, magsubli-subliyen sira, baw kaꞌilangan nga may paꞌyag it pamagsugiden nira. ²⁸Temed in egay makapaꞌyag, ega na lamang rimiꞌe-riꞌeng. Mampang mana it iti ngayti in esa-esa ya na nga sadili ya i pagpakisugidan ya baw Ampuꞌang Diyus. ²⁹Ta, atkayan naga in ipagtuturan duꞌut kadakel i ipagpaꞌrut it Ampuꞌang Diyus. Duwa u tulu gasiꞌ i mampang, baw timbang-timbangen it beken i kanira nga pagsugiden, in siyuy inildawan it kakayaan nga katimbang. ³⁰Baw in beteꞌ may esa nga magꞌaꞌdung nga sakaling panakman gasiꞌ it Espiritu Santo it beken pang ipagpaꞌrut it Ampuꞌang Diyus duꞌut kadakel, kaꞌilangan medek na i uꞌna ngayting magꞌampang isaꞌun kaꞌampang siꞌ i baꞌgung piyanakman. ³¹Ka in atkaytu makaꞌampang i kumpur pagpanakman it Espiritu Santo, temed kaꞌilangan magsubli-subliyen, isaꞌun matulduꞌan i kumpur natingped kat ikseg it nakem it muꞌsa. ³²Ega maat kaꞌilangan nga magdenga-denganen i magꞌampang i mga pagpanakman ngaytu it Espiritu Santo, ka magkapaaran nira nagay sadili nira. Ega subuk pagpapulpugun. ³³Sabap Ampuꞌang Diyus, ega magpabetang-betang it kaguluwan, in daꞌga kaꞌimbengan baw kaꞌayusan.

³⁴Ta, subung nat pagsunudun it muꞌsang mga taawan it Ampuꞌang Diyus, kaꞌilangan ega timingeg i mga babay ka ega pagpaꞌintulutan sira nga mampang in duꞌut katingpedan it kadakel nga magsamba.14:34 Kat pasepsep it beken nga mapipikir, ireg sugiden kaytu, in pagtimbang-timbangen i ampang it taw nga magpaꞌrut it ipiyanakem it Espiritu Santo it kanya, ega mapakay nga magtimbang i babay it ampang it asawa ya duꞌut sarungaan it kadakel. Ega ireg sugiden nga ega mapakay nga mampang i babay it maski unu nga ampang, ka daꞌga baꞌ magꞌaat i duꞌut kapitulu 11:5 nga mapakay nga manalangin i mga babay duꞌut sarungaan it kadakel, baw mapakay nga mampang it panakem it Espiritu Santo it kanya nga ipagpaꞌrut it Ampuꞌang Diyus duꞌut kadakel? Ka subung na it inaat duꞌun it mga urdin, kat sakep sira it lalaki. ³⁵In beteꞌ may ingkut nira, ingkutun mana duꞌut asawa nira in duꞌun na sirat balay, sabap in mampang kanya kat sarungaan it kadakel nga nagtingped, kaꞌeyaꞌ-eyaꞌ.

³⁶Ayaw kamu nat panadili. Unuytu, kamu i puꞌun it ampang ngaytut Ampuꞌang Diyus? U in daꞌga, unu, kamu lamang i inabut it ampang ya ngaytu? ³⁷In beteꞌ pagpikiren it maski siyu nga inildawan kanya it kakayaan nga pagpanakman it ipagpaꞌrut it Ampuꞌang Diyus duꞌut kadakel, u in pagpikiren ya nga taw kanya nga pagpadisiran it Espiritu Santo, kaꞌilangan nga kilalaen ya nga, ipiyagsurat ku ngaytu, ipagꞌurdin it Ampuꞌan. ³⁸Iyan ega magkilala kaytu, ega gasiꞌ kilalaen kanya.

³⁹Aypaꞌ, mga sulsug ku kat pamayaꞌ, paꞌresan mi nga panakman kamu it ipagpaꞌrut it Ampuꞌang Diyus duꞌut kadakel. Temed ega naga paaren mi i mampang it belag-belag nga ampang nga ega naꞌadalan. ⁴⁰Temed gasiꞌ buwaten mi i muꞌsang bagay kat tamaꞌ baw maꞌayus nga pabetang-betang.

Panulduꞌ pasar it pagꞌegen it paꞌuliꞌ

¹Ta kayti ipagpamatuud ku siꞌ it imyu, mga sulsug ku kat pamayaꞌ, i Magayen ngaytung Baritaꞌ nga ipiyangadal ku asat imyu it tagnaꞌ, nga piyakimatuud mi baw inunayan mi nat pamayaꞌ mi. ²Kat pamayaꞌ mi it Magayen ngaytung Baritaꞌ ipagribri kamu kat panriga it Ampuꞌang Diyus kat mga kasalaꞌan mi, basta teꞌteꞌan mi i ampang ngaytut Ampuꞌang Diyus nga ipiyangadal ku asat imyu, magpuyrat kat munung lamang i pamayaꞌ mi.

³Sabap ipiyangadal kut imyu i talagang piyakaꞌimpurtantiꞌ nga mga ipagpangadal, nga ipiyangadal gasiꞌ it aken. Ipagpangadal ngaytu, natay si Cristo ka tiyanggung yay mga kasalaꞌan tami kat pagtuman it isiyurat nga ampang it Ampuꞌang Diyus. ⁴Kat pagtuman naga it mga isiyurat ngaytu, ilimbeng kanya baw inggen it paꞌuliꞌ pagꞌikatlung aldaw. ⁵Baw nagpakikita kanya it ki Pedro, bawnga iti, beken ngayting mga alagad. ⁶Baw siꞌ nga nagpakikita kanya it subraꞌ it limang gatus i mga magpamayaꞌ nga namagtingped. Dakel paꞌ it kanira i egen seked kayti, temed iyan beken, patay na. ⁷Pagkapakikita ya duꞌun it kadakel ngayti nagpakikita kanya gasiꞌ it ki Santiago, bawnga kapuꞌsaan it mga apustul.

⁸Pangiyaꞌpusang banar nga piyakikitaan ya, aku na, maski na maat subung akut ega sampun nga waꞌwaꞌ nga ega pagꞌinawaren nga maꞌgen. ⁹Ka, sabap it adat ku katꞌesa nga magsarit pakuriꞌ it mga magpamayaꞌ it ki Cristo, siyuy kaꞌinawar nga magbaraꞌ aku nga apustul? Akuy piyakatimawaꞌ kat muꞌsang mga apustul. Talagang ega bagay nga taꞌwagen aku nga apustul ngaytu sabap it buwat ku ngaytit tagnaꞌ. ¹⁰Temed, sabap it subrang kaꞌildaw it Ampuꞌang Diyus, ipiyatindeg ya aku nga apustul, nga kayti, magsirbi nga banar it kanya. Ega naga nagbaraꞌ nga egay kakapulusan i ildaw ya ngaytu it aken. Talagang nagpaꞌres aku it subraꞌ paꞌ it maski siyu nga mga apustul ngaytu. Takaꞌ egaytu maat sadili ku nga kakayaan, in daꞌga tabang tu it Ampuꞌang Diyus it aken. ¹¹Aypaꞌ aku, it sira ngaytu, egay beken nga ipagpangadal namen, Magayen ngaytung Baritaꞌ pasar it kamataynen ni Cristo baw pagꞌegen yat paꞌuliꞌ. Baw itu naga gasiꞌ i piyamayaꞌ mit imyu.

¹²Ta kayti, it ipagpangadal namen nga, si Cristo, nagꞌegen it paꞌuliꞌ, ta unuka pagꞌaaten it beken asat imyu nga ega egnen it paꞌuliꞌ kat pagdadarapaꞌen i bilug it mga miyatay? ¹³Ka in beteꞌ matuud tu, daꞌga limiꞌwan nga ega naga inggen it paꞌuliꞌ si Cristo? ¹⁴Baw in beteꞌ si Cristo, ega inggen it paꞌuliꞌ, daꞌga egay kapulusan it mga pangadal namen ngaytu, baw daꞌga ega gasiꞌ i kakapulusan it pamayaꞌ baw pagsarig mi ngaytu? ¹⁵Ta, in atkayan, daꞌga limiꞌwan nga kami, maꞌaꞌambut nga mga apustul ka ipagpamatuud namen nga inggen it paꞌuliꞌ it Ampuꞌang Diyus si Cristo, temed limiꞌwan nga ega naga palan matuud in ega naga egnen it paꞌuliꞌ i mga miyatay. ¹⁶Ka, subung nat inaat ku, in ega egnen it paꞌuliꞌ i mga miyatay, simpri limiꞌwan nga ega inggen it paꞌuliꞌ si Cristo. ¹⁷Ta, in ega inggen it paꞌuliꞌ si Cristo, simpri pagsasakpan kamu paꞌ it panriga it Ampuꞌang Diyus sabap it mga kasalaꞌan mi. Ta, daꞌga in atkayan, limiꞌwan nga egay kakapulusan it pamayaꞌ mi? ¹⁸Ega lamang desang iyanꞌen, limiꞌwan gasiꞌ nga muꞌsang miyatay na nga may pamayaꞌ baw pagsarig it ki Cristo, kat kakuriꞌan naga nga egay kaskedan. ¹⁹Ka in egay kamatuudan it kagayenan nga pagꞌiꞌinawaren ta nga maꞌaten pagpatay tami, kita nay kaꞌildaw-ildaw kat muꞌsa nga mga taw.

²⁰Temed, yay matuud, talagang inggen naga si Cristo it paꞌuliꞌ. Kabilangan ni Cristo ngaytu, tagudaliꞌ nga yay uꞌnang pagkaygen, isunud mana i beken nga paray. Talagang magꞌabut tu kat ipiyagtirminu nga aldaw, nga egnen na i bilug it muꞌsang mga miyatay nga magpamayaꞌ it kanya, nga ituy bilang pangayeg it kanira. ²¹Ka in magꞌuꞌunu sabap it binwat it esang taw, nga si Adan, siyakep it kamataynen i muꞌsang mga tungtung-inapuꞌ ya, atkayan naga, sabap it binwat it esa gasing taw, nga si Cristo, sakpen it pagkaꞌgen ngaytu it paꞌuliꞌ i muꞌsang magsarig baw magpamayaꞌ it kanya. ²²Sabap in magꞌuꞌunu matay i muꞌsa sabap it kabit nira duꞌun it ki Adan, atkayan naga, egnen it paꞌuliꞌ i muꞌsang magpamayaꞌ sabap it kabit nira duꞌun it ki Cristo. ²³Temed gasiꞌ, kada esa, kat kanya-kanya nga ipiyabetang-betang nga timpu. Si Cristo na ngaytu i uꞌna-uꞌna it muꞌsa, nga bilang tagudaliꞌ. Bawnga iyan mga taawan ya, nga egnen in asan nat timpu nga pamaꞌuliꞌ ya situ. ²⁴Pagkatupus kayan, maꞌbut nay umur it banwa nga mapasukuꞌ na ni Cristo i muꞌsa nga mga kalaban ya nga magsasakep, maski unu i pudir u keseg nira. Bawnga iꞌintergaꞌ ya na duꞌun it Diyus Amaꞌ i pamegbeg ya, nga pamegbeg it Mandadaꞌeg nga Manriribri. ²⁵Sabap ipiyabetang-betang it Ampuꞌang Diyus nga magꞌadiꞌ si Cristo seked it mapasukuꞌ ya nang banar i muꞌsang mga kalaban ya. ²⁶Maski kamataynen ngaytu, nga kiyaꞌpusang kalaban, daꞌgen ya talaga kat iting timpu, ka awaꞌen ya situt taw baw egnen yat paꞌuliꞌ i muꞌsa. ²⁷Sabap inaat naga duꞌun it isiyurat nga ampang it Ampuꞌang Diyus nga, muꞌsa nga mga bagay, binwat ya nga gigiꞌek-giꞌeken mana it Manriribri, ka diyaꞌeg ya na.15:27 Awit 8:6. Ega siyangpit duꞌun i Manriribri temed, sabap it ampang ngaytu ni Pablo, maꞌrutan ta nga si Cristo i subuk tagu-taguꞌ nga pagpaꞌiguꞌan it sugi-sugid ngayti duꞌut iting Awit. Temed kat ampang ngaytu nga “muꞌsa nga mga bagay,” egaytu maat uyut i Ampuꞌang Diyus, ka kanya i nagpabetang-betang nga pamegbegan ni Cristo i muꞌsa ngaytu. ²⁸Ta in atkaytu nga ipiyabegbeg nat ki Cristo i muꞌsang bagay, kanya siꞌ mismu nga Diyus Anak i pasakep it Diyus Amaꞌ, isaꞌun Ampuꞌang Diyus ngaytu nga nagpabetang-betang it muꞌsa ngaytu, matanyag nga Ampuꞌan kanyang matuud nga magbebegbeg it muꞌsang-muꞌsa.

²⁹Ta, paꞌuliꞌan kuy pagꞌegen ngaytut paꞌuliꞌ it mga miyatay. Maski iyan mga taw asat imyu nga magpabawtis nga pagbatuꞌan nira kunuꞌ i mga natay na,15:29 Siguru, mga pagbatuꞌan ngayti, ega nagpabawtis parabir sira natay. Aypaꞌ pagbatuꞌan it beken nga egen paꞌ isaꞌun, kunuꞌ, in egnen nat paꞌuliꞌ i mga miyatay ngayti, may kaꞌuyutan na nira it kagayenan ni Cristo. Ega maat pagꞌaaten ni Pablo nga tamaꞌ i atkaytung buwat. Paggamiten ya lamang kat dalan it sugi-sugid ya. pagsiguruun nira nga mabut i aldaw nga egnen siꞌ i mga pagbatuꞌan nira ngayti. Simpri in ega atkayan i kat pikir nira, unuka buwaten niray atkayti? ³⁰Baw kami, unuka ipirinda namen nay ginawa namen it uras-uras in egay kasiguruwan nga egnen kami naga it paꞌuliꞌ asat pagdadarapaꞌen? ³¹Ka egay aldaw nga daꞌga subung aku na it magꞌuꞌungaw it kali. Kamatuudan tu. In magꞌuꞌunu magkasiguruwan mi i kasagyaan ku it pakilagpit mi it Ampuꞌan tami nga si Jesu-Cristo, magkasiguruwan mi nga matuud i pagꞌaaten ku ngaytu. ³²Ka in subung aku lamang it katataawan nga ega pagpamayaꞌnen nira nga egnen sira it paꞌuliꞌ kat pagdadarapaꞌen, ta unuy mapulus ku it pakilaban ku it mga magpakidaꞌeg it pangadal ku sinit Efeso, mga taw nga atnat kumakaꞌen nga ramu-ramu kat paglaban nira? Daꞌga in matuud nga ega naga egnen it paꞌuliꞌ i mga miyatay, sunudun tami na lamang i sambatan ngayan nga magꞌaat, “Paꞌayaw-ayaw tami it kaꞌen baw inum, tutal dedelem matay tami naga lamang.”

³³Ega ambutan mi i sadili mi. In pakiꞌiba-ibaan tami i mga taw nga maraꞌe-raꞌet i adat baw kamaliꞌ i pamagpikiren, mabwa-mabway rumanggaꞌ gasiꞌ i aten nga adat baw pagpikiren. ³⁴Ipatarunus mi na i pikiran mi baw indiꞌan mi na i buwat it kasalaꞌan. Ka iyan beken asat imyu, egay kamatuudan nga pagkilala it Ampuꞌang Diyus. Ikaꞌeyaꞌ mi talagaytu.

In magꞌuꞌunu i pagꞌegen ngaytut paꞌuliꞌ

³⁵Ta, barang may magpakiꞌambut nga magꞌaat, “Magꞌuꞌunu egnen it paꞌuliꞌ i bilug it mga miyatay? Magꞌuꞌunu-unu na i pamataw nira it narunut na i bilug?” ³⁶Mingkut it atkayan, subung kanyat engel-engel. Ka panawun it pikir mi i biꞌni. Ega talaga maꞌgen i biꞌni seked it ega paꞌ rumunut duꞌut lugtaꞌ. ³⁷Baw iyan ipagluwak, belag talaga kat in unuy baraꞌan ya. Ka biꞌni lamang i ipagluwak, nga subung it legas it tirigu u beken paꞌ nga biꞌni. ³⁸Temed, kada biꞌni, pagpabilugan it Ampuꞌang Diyus it kanya-kanyang baraꞌan nga begtek, uyun kat pabetang-betang ya.

³⁹Ta, atkayan naga, ega siyurubung i bilug u isi it giyuna nga may ginawa. Belag i bilug baw isi it taw, belag i pamimilugan baw pangingsiyan it ramu-ramu. Belag i kat manu-manuk, baw belag i kat mga sedaꞌ. ⁴⁰May bilug gasiꞌ nga panlangit, baw may bilug nga pandenaꞌ. Belag i kabantugan it pandenaꞌ, baw belag i kabantugan it panlangit. ⁴¹Baw duꞌut langit belag i kagayen it aldaw nga pagletganan, belag gasiꞌ i kat bulan baw mga bituꞌun. Baw maski mga bituꞌun, ega surubung ka may kanya-kanyang kagayen.

⁴²Ta, atkayan naga, belag talaga i bilug nga ipaglebeng kat bilug nga pagꞌegnen it paꞌuliꞌ. Iyan bilug it taw kayti, matay baw marunut. Temed iyan bilug nga egnen it paꞌuliꞌ, ega nay kamataynen ya seked it kaꞌnu-kaꞌnu. ⁴³Ega na magayen nga pagletganan baw ega nay kakayaan it bilug nga ipaglebeng, temed in egnen nat paꞌuliꞌ ega babasta-bastaen i kagayenan baw kakayaan ya. ⁴⁴Bilug ngaytu nga magpatay, pandenaꞌ nga bilug. Temed in egnen it paꞌuliꞌ, panlangit na nga bilug. Ka in may bilug nga pandenaꞌ, may bilug naga nga panlangit. ⁴⁵Ka magsusurat duꞌut kasuratan nga iyan uꞌna nga taw nga si Adan, giyuna baw binggayan it ginawa.15:45 Genesis 2:7. Temed subraꞌ kaytu si Cristo, nga pangaran it kanya, sauryan nga Adan. Ka giyantiyan i bilug ya it panlangit nga bilug baw nagbaraꞌ kanya nga manigbegay it panlangit nga kaꞌgenan nga egay kaskedan. ⁴⁶Temed ega mapakay nga makauꞌnay panlangit in daꞌga pandenaꞌ ngaytu. Bawnga sumunud i panlangit. ⁴⁷Iyan uꞌnang taw nga si Adan, pandenaꞌ i bilug ya sabap lugtaꞌ i binwat. Temed bilug ni Cristo nga pasbungan ta, panlangit. ⁴⁸Ta, paribasay mga tungtung-inapuꞌ tami nga muꞌsa ni Adan ngaytu nga gimnaring kat lugtaꞌ, mga pandenaꞌ tami nga mga taw. Temed kumpur kaꞌbut duꞌun it langit kat pagdadarapaꞌen, baraꞌan nira, mga panlangit nga mga taw, subung nagat ki Cristo nga gimnaring duꞌut langit. ⁴⁹Ta, in magꞌuꞌunu kaꞌlay ngaytu nangaꞌgenan tami it adat it taw nga pandenaꞌ, kaꞌilangan ipasbung nay adat tami it taw nga panlangit nga si Cristo.

⁵⁰Ituytu i ireg ku nga sugiden, mga sulsug ku kat pamayaꞌ, iyan bilug ngaytu nga may isi baw duguꞌ, in ega baꞌguun ega talaga mapakay duꞌun it kaꞌadiꞌan it Ampuꞌang Diyus nga duꞌut langit. Ka pandenaꞌ nga bilug ta ngaytu nga magpatay, ega bagay it kanya i langit ngayti, ka egay kamataynen duꞌun. ⁵¹Pagnegan mi i kalililuꞌan ngaytu nga sugi-sugid nga ipiyaꞌrut nat Ampuꞌang Diyus it aken pasar it aten nga magpamayaꞌ. Ega maat matay nga muꞌsa parabir mabut i Ampuꞌan, temed muꞌsa ta, baꞌguun. ⁵²Egaytu magkaꞌlay ka, miyabut nay timpu, mabwat kat sang taꞌlib lamang u sang pamirek, kadengan it tingeg it taburi nga katandaꞌ it miyabut nay umur it banwa. Pagtingeg it taburi ngaytu, iyan mga miyatay na, egnen na it paꞌuliꞌ i bilug nira baw ega na mata-matay paꞌ seked it kaꞌnu-kaꞌnu. Baw iyan ega paꞌ natay kat iting timpu, baꞌguun gasiꞌ i kanira nga bilug. Talagang, kita ngaytu, baꞌguun nga muꞌsa. ⁵³Sabap itu nga bilug nga magkaranggaꞌ, kaꞌilangan nga magantiyan it ega magkaranggaꞌ, baw iyan magpatay ngaytu nga bilug, magantiyan it ega magpatay. ⁵⁴Ta, basta nagantiyan nat egay karanggaꞌan i magkaranggaꞌ ngaytu, baw nagantiyan na it egay kamataynen i magpatay ngaytung bilug, matuman na i inaat duꞌun it isiyurat nga ampang it Ampuꞌang Diyus nga magꞌaat,

“Naꞌawaꞌ na i kamataynen. Kumplitu na i pandaꞌeg it kanya.”15:54 Isaias 25:8.

⁵⁵“Ta ari na, kamataynen, i pandaꞌeg mu?

Ari na, kamataynen, i dalit mu?”15:55 Oseas 13:14.

⁵⁶Dalit ngaytu nga paꞌaaten, kasalaꞌan, ka yay magtaban it taw duꞌut kamataynen. Baw, sabap it mga urdin it Ampuꞌang Diyus, subraꞌ nga matanyag i kasalaꞌan it katataawan ka pirmi nirang pagranggaꞌen. ⁵⁷Aypaꞌ, kayti, magpasalamat tami duꞌun it Ampuꞌang Diyus ka magbegay kanyang pirmi it aten it pandaꞌeg ta kat kasalaꞌan baw kamataynen ngaytu, sabap it binwat it Ampuꞌan tami nga si Jesu-Cristo. ⁵⁸Aypaꞌ, mga pagmaꞌaleng sulsug ku kat pamayaꞌ, magmapaꞌgen kamu nga banar nga ega magꞌugad-ugad i pamayaꞌ, baw paꞌresan mi nga pirmi i buwaten it Ampuꞌan. Tutal magkaꞌrutan mi na nga ega salaud i maski unu nga paꞌres mi sabap it kanya.

Magayeng buwaten nira isaꞌun may ikatabang it mga kaꞌibaan nira nga magpamayaꞌ

¹Ta, pasar gasiꞌ it tabang mi it mga sulsug tami nga magpamayaꞌ duꞌun it Jerusalem,16:1 Roma 15:25-28. magayen in buwaten mi i subung it inaat ku duꞌun it mga magpamayaꞌ nga taga Galacia. ²Kada aldaw it Linggo magayen dumawaꞌ nay kada esa it sang unu-unu na, uyun kat in sang unuy napisiꞌ yang pirak it iyang lingguꞌ. In atkaytu i buwaten, ega na kaꞌilangan paꞌ nga pabgay pagpaꞌasan ku. ³Pagꞌabut ku yan asan, in siyuy napiliꞌ mi nga masarigan, begayan kut kariꞌgenan nga tumaban it tabang mi duꞌun it Jerusalem ngayti. ⁴Temed in limiꞌwan nga aku i kaꞌilangan nga tumaban, pabayaꞌen ku naga sira.

Mga rima-rima ni Pablo nga paranawun

⁵Talagang lumangbus aku yan asan garing duꞌut Macedonia, ka pagrima-rimaen ku nga baꞌnawun i mga gurupu it magpamayaꞌ duꞌun. ⁶Kumaꞌla-kaꞌlay aku yan asan it imyu. Barang asan nay elatan ku it magtaꞌlib nay panagramig, isaꞌun makapatabang akut imyu kat sunud nga panaw ku, in ari aduꞌunan ku. ⁷Ega ireg ku nga desang patuluy asan. Ireg ku kapakaꞌla-kaꞌlay aku in kaꞌirgan it Ampuꞌan. ⁸Temed pagpikiren ku nga sini aku daꞌan it Efeso seked it Aldaw it Pentecostes. ⁹Ka dakel i kupagneg it panulduꞌ ku sini, baw talagang dakulay paglapusan ya. Temed dakel gasiꞌ i kalaban.

¹⁰In kaꞌnu-kaꞌnu mabut asan si Timoteo istimaren mi kanyat magayen, isaꞌun egay keber-keber it seled ya. Sabap, kanya, kasubung ku nga manigbuwat it buwaten it Ampuꞌan. ¹¹Ega tibabaꞌen mi kanya, isan yan tabangen mi isaꞌun masagya kanya pagkaꞌuliꞌ ya sini. Sabap pagꞌeꞌlaten ku na kanya, baw mga kaꞌibaan ya nga sulsug kat pamayaꞌ.

¹²Ta, pasar gasiꞌ it sulsug ta kat pamayaꞌ nga si Apolos, maseked-seked ku kanya nga pagꞌupakaten nga mamaꞌnaw asan it imyu, kaꞌibaan it beken nga mga sulsug kat pamayaꞌ nga paꞌasan. Temed, kat pikir ya, ega paꞌ magayen in paꞌasan it imyu kayti. Asan manat malangbu-langbusan i ipaꞌasan ya.

Mga pangiyaꞌpusan nga sugi-sugid

¹³Magtitiyakap kamu nga pirmi baw papaꞌgenen i pagsarig baw pamayaꞌ mi it Ampuꞌan. Pakalalaki kamu baw timindeg kamu it egay kaꞌugadan. ¹⁴Kaꞌilangan, muꞌsa nga pagbuwaten mi, buwaten it may kamatuudan nga raras it maꞌiba mi.

¹⁵Mga kasulsugan, magkaꞌrutan mi nga si Estefanas baw mga kaꞌanakan ya i uꞌnang namayaꞌ asan it Acaya,16:15 Sakep it Acaya ngayti i siyudad it Corinto. baw ipiyasiguru nira i sadili nira kat pagsirbi it mga taawan it Ampuꞌang Diyus. ¹⁶Ipagpakiꞌupakat kut imyu nga dapat kamu nga pasakep it kanira baw muꞌsang mga kasubung nira nga magpaꞌres it atkaytung buwat.

¹⁷Masagya akung banar pagꞌabut na Estefanas, baw kaꞌibaan ya nga si Fortunato baw si Acaico. Sabap iyan ega nabwat mi ka daꞌta magkita-kitaen, nabwat na nirat aken. ¹⁸Ka piyasagya nira i nakem ku, atkayan naga i imyu. Istimaren mit magayen i atkaytu nga mga taw.

¹⁹Pagkumustaen kamu it mga magpamayaꞌ kat muꞌsang rugar sinit prubinsiya it Asia. Si Aquila baw si Priscila, pagkumustaen nira gasiꞌ kamu nga banar it pangumusta it mga sulsug kat pamayaꞌ it Ampuꞌan. Atkayan naga i mga magpamayaꞌ nga magpakitingped kat balay nira. ²⁰Pagkumustaen kamu gasiꞌ it muꞌsang sulsug ta kat pamayaꞌ sini. Pati kamu nga muꞌsa asan, magsigkumu-kumustaen kamu, bilang sang sulsugan nga namayaꞌ na it ki Cristo.

²¹Ta, pangumusta kut aken, baw mga pangiyaꞌpusan ku ngaytung ampang, aku na mismu i magsurat.16:21 Yay adat ni Pablo in pagsuratan yay mga magpamayaꞌ, ipasurat ya it katabang ya i kusugiden ya. Takaꞌ basta pangiyaꞌpusan na, kanya na mismu i sumurat, nga bilang katandaꞌ it kanya talaga i garing.

²²Rigaen it Ampuꞌang Diyus it ega pateng nga panriga i maski siyu nga egay kamatuudan nga pagmaꞌal ya it Ampuꞌan. Mabut ka na sana, Ampuꞌan namen!

²³Ipagpanalangin ku nga sana asat imyu nga pirmi i ildaw it Ampuꞌan tami nga si Jesus.

²⁴Yay matuud, asan it imyu nga muꞌsa i raras ku, kamu nga maglalagpit na it ki Cristo Jesus.