ТИТУСКА

ПАУЛДАН ТИТУСКА ХАТ

¹ Аллаһы колы һәм Гайсә Мәсихнең рәсүле Паулдан сәлам. Аллаһы тарафыннан сайлап алынганнарны иманга һәм диндарлыкка илтүче хакыйкатьне танып белүгә китерү ѳчен җибәрелдем мин. ² Безгә бу иман һәм хакыйкатьне танып белү – Аллаһы вакыт башланганчы ук вәгъдә иткән мәңгелек тормышка ѳмет бирә, ә Ул беркайчан да ялганламый. ³ Билгеләнгән вакыт җиткәч, Коткаручыбыз Аллаһы боерыгы буенча миңа ышанып тапшырылган вәгазь аша, Ул Үзенең бу хәбәрен игълан итте. ⁴ Минем белән бер үк иманны уртаклашучы чын улым Титуска Ата Аллаһы вә Коткаручыбыз Мәсих Гайсәдән мәрхәмәт һәм иминлек булсын.

Титусның Крит утравындагы вазифалары

⁵ Тѳгәлләнмәгән эшләрне тәртипкә китерү һәм барлык шәһәрләрдә мин боерганча иман итүчеләр бердәмлекләренең ѳлкәннәрен билгеләү ѳчен, мин сине Критта калдырдым. ⁶ Ѳлкән бер гаепсез, бер генә хатынның ире булырга тиеш. Аның балалары шулай ук иман итүчеләр, акылсызлыкта яки буйсынмаучанлыкта гаепләнмәүчеләр булырга тиеш. ⁷ Чѳнки бердәмлектәге җитәкче, Аллаһы эшләре белән идарә итүче буларак, бер гаепсез булырга тиеш. Ул тәкәббер, ачулы, эчкече, сугыш чукмары, хурлыклы табышка омтылучан түгел, ⁸ бәлки кунакчыл, яхшылык сѳючән, тѳпле, гадел, изге, үз-үзен тота белүче булырга тиеш. ⁹ Башкаларны дѳрес тәгълиматта нәсыйхәтләү һәм аңа каршы кешеләрне фаш та итә алу ѳчен, шул тәгълиматка туры килгән тугры сүзне тотарга тиеш.

Ялган укытучыларны фаш итү

¹⁰ Чѳнки буйсынмаучан, такылдык һәм ялганчылар бигрәк тә мәсихче-яһүдләр арасында күп. ¹¹ Аларны авызларын ябарга мәҗбүр итәргә кирәк, чѳнки алар хурлыклы табыш хакына, тиеш булмаганнарны ѳйрәтеп, бер бѳтен гаиләләрне җимерәләр. ¹² Алар арасыннан берәү, бер акыл иясе: «Критлылар – һәрвакыт алдакчы, явыз ерткычлар, ялкау һәм гуҗлар», – дигән. ¹³ Бу шаһитлек хак.

Шуңа күрә алар хак иманны тотсыннар һәм яһүдләрнең риваятьләренә һәм хакыйкатьне кире кагучыларның кагыйдәләренә таянмасыннар ѳчен, аларны бик нык тәнкыйтьлә. ¹⁵ Сафлар ѳчен барысы да саф, әмма бозык һәм имансыз кешеләр ѳчен бернинди саф нәрсә юк, чѳнки аларның акыллары һәм вѳҗданнары бозык. ¹⁶ Алар, Аллаһыны беләбез, дип ышандыралар, әмма эшләре белән Аннан ваз кичәләр. Алар әшәке, тыңлаусыз һәм һәрбер игелекле эш ѳчен файдасыз.

Иман итүчеләр бердәмлеге ѳчен кагыйдәләр

¹ Әмма син аек тәгълиматка туры килгәннәрне ѳйрәт. ² Ѳлкән яшьтәге ир-атларга әйт: алар тотнаклы, ихтирамга лаек, тѳпле булырга һәм иман, мәхәббәт, түземлектә нык торырга тиеш. ³ Шулай ук ѳлкән яшьтәге хатын-кызларга да әйт: алар үзләрен чын иман итүчеләр кебек тотарга, гайбәт сѳйләшмәскә, эчкечелеккә бирелмәскә һәм башкаларны яхшылыкка ѳйрәтергә тиеш. ⁴ Аллаһы сүзенә карата хурлык килмәсен ѳчен, алар яшь хатыннарны үз ирләрен һәм балаларын яратырга, ⁵ тѳпле, саф, яхшы хуҗабикә булырга һәм ирләренә күндәм булырга ѳйрәтергә тиеш. ⁶ Шул рәвешчә, яшь ир-атларга да тѳпле булырга нәсыйхәт бир. ⁷ Аларга барлык яхшы гамәлләрдә үрнәк күрсәт. Ѳйрәтүләреңдә намуслы һәм җитди бул; ⁸ каршы торучылар безнең турыда һичнинди начар сүз әйтә алмыйча оятка калсын ѳчен, сѳйләмең тәнкыйть итә алмаслык дәрәҗәдә дѳрес булсын. ⁹ Колларга нәсыйхәт бир: алар бар нәрсәдә хуҗаларына буйсынсыннар, ярарга тырышсыннар, бәхәсләшмәсеннәр, ¹⁰ урлашмасыннар, бәлки үзләренең һәрнәрсәдә чыннан да тугры булуларын күрсәтсеннәр. Коткаручыбыз Аллаһының тәгълиматы кешеләрнең игътибарын бар нәрсәдә үзенә җәлеп итә торган булсын ѳчен, аларга боларны эшләү кирәк.

Аллаһының мәрхәмәте

¹¹ Чѳнки Аллаһының һәр кешегә котылу бирүче мәрхәмәте килде. ¹² Бу мәрхәмәт, алласызлыкны һәм дѳньяви нәфесләрне кире кагып, безне бу дѳньяда тѳпле, гадел һәм Аллаһыны хѳрмәт итеп яшәргә ѳйрәтә. ¹³ Шул ук вакытта бѳек Аллаһы һәм Коткаручыбыз Гайсә Мәсихнең шѳһрәте килүенә куанычлы ѳметебез бар. ¹⁴ Мәсих безне һәртѳрле гѳнаһтан йолып алу ѳчен һәм яхшылык кылырга ашкынып торучы үзенчәлекле халкын Үзе ѳчен чистартырга дип, Үзен корбан итте.

¹⁵ Моның барысын һәртѳрле хакимлек белән сѳйлә, нәсыйхәт ит һәм фаш ит. Сиңа беркем дә түбәнсетеп карамасын.

Мәсихченең яхшы гамәлләре

¹ Башлыкларга, хакимлеккә буйсынырга һәм аларны тыңларга, һәртѳрле яхшы эшләргә һәрвакыт әзер торырга кирәклеген иман итүчеләрнең исләренә тѳшер. ² Аларны шулай ук беркемне дә яманламаска, бәлки бар кешеләргә карата һәрнәрсәдә басынкылык күрсәтеп, тыныч һәм игътибарлы булырга ѳйрәт. ³ Чѳнки кайчандыр без дә тинтәк, тыңлаусыз, алданган, тѳрле нәфес һәм ләззәтләр коллыгында идек; без тормышыбызны явызлыкта һәм кѳнчелектә үткәрдек; безгә нәфрәтләнделәр, һәм без дә бер-беребезгә нәфрәтләндек. ⁴ Әмма Коткаручыбыз Аллаһы Үзенең игелеклелеген һәм кешеләргә карата мәхәббәтен күрсәткәндә, ⁵ безне кылган тәкъва эшләребез аркасында түгел, бәлки Үзенең шәфкате буенча, Изге Рух белән яңадан тудыру вә яңарту аркылы, Үзенең юып чистарту гамәле аша коткарды. ⁶ Без Аның мәрхәмәте аркылы акланып, үзебез ѳмет иткән мәңгелек тормышка ия булу ѳчен, Ул бу Рухны Коткаручыбыз Гайсә Мәсих аша безгә мул итеп яудырды. ⁸ Бу сүзләр хак. Синең бу нәрсәләр турында басым ясап әйтүеңне телим, Аллаһыга иман итүчеләр үзләрен яхшы эшләргә багышласын, чѳнки болар әйбәт һәм кешеләргә файдалы. ⁹ Ә тинтәк бәхәс, шәҗәрәләр һәм канун турындагы ызгыш-талаш һәм кычкырышулардан читләш, чѳнки алар файдасыз һәм мәгънәсез. ¹⁰ Бер яки ике тапкыр кисәткәннән соң, бүленешләр китереп чыгара торган кеше белән бернинди уртак эшең булмасын! ¹¹ Син беләсең, андый кеше бозык һәм ул гѳнаһ кыла, шуның белән үз-үзен хѳкемгә дучар итте.

Шәхси киңәшләр һәм үтенечләр

¹² Мин синең янга Әртимәс яки Тухикны җибәрәм. Алар килеп җиткәч, үзең минем янга Никәполискә килү ѳчен бѳтен кѳчеңне куй, чѳнки мин кышны анда чыгарга уйлыйм. ¹³ Канунчы Зинәс һәм Апуллусны, алар бернәрсәгә мохтаҗ булмаслык итеп, бик тырышлык белән юлга әзерлә. ¹⁴ Безнең иман итүчеләр, башкаларның ихтыяҗларын канәгатьләндерә алсын ѳчен, үзләрен игелекле эшләргә багышларга ѳйрәнсеннәр. Аларның тормышлары файдасыз булмасын.

¹⁵ Минем белән булганнарның барысы да сине сәламли. Безне яратучы иман итүчеләрнең барысына да сәлам тапшыр. Мәрхәмәт сезнең барыгыз белән дә булсын. 1