Титдиз

ТИТДИЗ КАГЪАЗ

Гизаф аьлимари кІурайиси, Гирами Рюгьну Павелихьди му кагъаз, думу йикІайиз улихьна, Римдиъ бикІуз гъитуб ву. Му кагъаз Крит островдиин Аллагьдин гъуллугънаъ айи Титдиз дибикІнайиб ву. Павели му островдиин Тит, чан аьхиримжи сиягьятназ дуфнайиган, гъитну имбур вуйи. Думу мушв’ин Аллагьдихъ хъугънайидарин гъайгъушнаъ духьну ккундийи. Думу дицикьан рягьят ляхин дайи. Крит агьларин хасиятнакан аьгъю Павел, дурариз ачухъди къаршу гъедергуйи. Аллагьдин вакилиз Ужувлан хабар душв’ин ухди дюз дарушвахъинди илтІибкІбакан аьгъю гъабхьнийи. Ужувлан хабарнакан каламар дапІнайи. Хъугърударин арайиъ кьайда, гьюрмат адайи. Аллагьдин халкьдин арайиъ гъалабулугъар гъитІиккуз ккунди, сакьюдар кучІлин хъугърудари, гьубкьу жюрейин мумкинвалар ишлетмиш апІуйи. Гьамциб гьял себеб вуди Гирами Рюгьну Павелихьди Титдиз кагъаз бикІуз мажбур апІуру ва дугъаз Критдиин хъугърудар саб хилди хьуз кюмек апІру буйругъар тувру. Дидихъди сабси, Титдиз каламар ашкар апІбаъ, лазим вуйибкьан ижмишин улуп кІури, насигьятарра тувру. Кагъзиъ гизафси Аллагьдин рягьимлувалин уьрхру кьувватназ фикир тувра.

¹ Узу, Аллагьдин гъуллугънаъ айи ва Иса Месигьдин вакил Павел, Аллагьди кадагънайидар хъугъувалихъна хуз, гьякь’валин кІулиъ тІауз, дюзди Аллагьдиз гьюрмат фици апІуруш улупуз ва ² дурарик гьаргандин уьмрин умуд капІуз гьаънайир вуза. Дициб уж’вал вари дюн’я арайиз хайиз улихьна гьич саб вахтнара кучІал дарапІру Аллагьди тувнайи гаф ву. ³ Чав дебккнайи вахт гъафиган, Дугъу дюн’яйиз Чан Гаф гьаъну. Гьадму Гафнакан вуйи Хабар рабгъувал Аллагьдин, ухьу Уьрхрурин, ниятниинди уз’ина ихтибар дапІна.

⁴ Узухъди саб хъугъувалин йиз дугъри бай Тит, Адаш Аллагьдихьан ва ухьу Уьрхру Иса Месигьдихьан уж’вал ва мясляаьт ибшривуз.

Критдиин Титдин вазифйир

⁵ Узу уву Критдиин гьял дапІну адру вари ляхнар гьял апІбан бадали ва гьарсаб шагьриъ хъугърударин арайиъ аьхюдар дерккбан бадали гъитунзаву. ⁶ Узу гъапиганси, дерккру аьхюдар марцциди яшамиш шулайидар духьну ккунду – саб ражаритІан хпир духну адрударикан; дурарин веледар хъугърудар вуди ккунду, я гьич саб жюрейин хлиан идитнайивал ва хъпебехърувал дурарик кади ккундар. ⁷ Фицики Аллагьдин гъуллугъниин али аьхюр Гьадгъан ляхнар кІули гъахурайир ву ва дицир саб гаф кайир духьну ккундар. Дициб гъуллугъниин, чав кІурубтІан аьгъдрур, я хъял гъюрур, пияниска, элегрур, я пулиъ улар айир духьну ккундар. ⁸ Хъа, гьатци, дицир кас хялар кьабул апІрур, уж’вал апІрур, фикирлур, дюзвал ккунир, намус-гъир’ят айир, учв чан хилиъ дисуз шлур вуди ккунду. ⁹ Думу улупурайи аьгъюваларикк кІул ккиврур, гьякь гафнан терефкар вуди ккунду; хъпехърудариз сагъ насигьятариинди кюмек апІрур, хъа хъпебехърудар, чаз къаршу гъедергрудар ашкар апІуз аьгъюр духьну ккунду.

¹⁰ Фицики гизафдар гьич саринра гьюкум кьабул дарапІрудар шулу, лягълягъчйир ва футнакрар-кучІляхяр, гизафна-гизафси дицдар адмийир суннат дапІнайидарин арайиъ а. ¹¹ Дурари кІулди хизанар пуч апІури хъюгъру; чпин ужуз хайирнахъди, аьгъю дубхьну ккуниб улулупди, фукІа дару каламарихъан хъчІихури шлуган, дурарин ушвниъ итІибшвури ккунду. ¹² Дурарин сар пайгъамбри гъапну: «Критдин агьлар – гьарган кучІлар апІрудар, вягьши гьяйванатар, темплар, адрацІру фунар ву!».

¹³ Му дугъридан гьякь ву. Гьаддиз дурарин, саб гьяйифвал ктарди, гьякьяр унтІаъ атІри апІин; гъит, дурар сагъ хъугъувалихьна гъюри; ¹⁴ гъит, жугьдари кадагънайи махъварихьан дурар ярхла ишри ва гьякьналан улдугнайидари кІурайиб дарапІри. ¹⁵ Марццидариз вари марцциб ву, хъа кацІнайидариз ва хътругърудариз марцциб фукІара адар, гьаз гъапиш, дурарин фагьумра, намус-гъир’ятра кацІнайидар ву. ¹⁶ Дурари, чпиз Аллагь аьгъячуз, кІури, гьисаб апІура, хъа чпин ляхнар-тІулариинди Думу ярхла апІура. Гьадрар ву думу намуссузар, мютІюгъ дарудар, гьич саб ляхнизра хай дарудар.

Гьякь аьгъюваларихъди хьуб

¹ Уву, гьякь аьгъювалари фу тІалаб апІураш, дупну ккунду. ² Яшлуйириз чпин кІул’инди фикир апІуз улуп: ужубна-харжиб аьгъю апІури ишри, гьюрматназ лайикьди ишри, фикирлуди ишри, ижми хъугърудар ишри, ккудудубкІру масанвалиъ ишри, мюгькамди сабурлудар ишри. ³ Гьаци улуп яшлу дишагьлийиризра: намуслуди яшамиш шлуганси, футнийир дарагъди, убхърубдиъ улар адрахьруси; гъит, жигьил швушвариз ужувлар апІуз улупри. ⁴ Дурарихьди чпин жилар ккун апІуз гъитри; чпин веледарихъ юкІв хъипри; ⁵ аькьюллуди фикир апІрудар ишри, чІат ул адрударди вердиш ишри, хулан гъайгъу кайидар ишри, уж’вал кайидар ишри, Аллагьдин Хабар аскан даршлуси, чпин жиларихъ хъпехърудар ишри. ⁶ Гьаци жигьиларра ишри: дурариз чпи хилиъ дисуз шлуси улуп. ⁷ Уву дурариз вари яв алдабгъурайи ликдииндина ляхнариинди чешнеди гъуз. Гъит, уву улупурайи аьгъювалар лап кІваантІан ва гьюрматназ лайикь ишри, ⁸ ихь душмнарихьан ухьуз фукІара чІуруб пуз даршлуганси ва дурариз чпиз нач шлуганси, яв гаф-чІал сагъиб ва гьич саб гъалатІ ктруб ибшри.

⁹ ЛукІариз улуп: вари чпин аьхюдарихъ хъпехърудар ишри; кІуруб апІрудар ишри; гафариз къаршу удудучІври, ¹⁰ гьитІибкІрудар ваъ, хъа ухьу Уьрхрурикан – ихь Аллагьдикан вуйи аьгъювалар хъана артухъ уткан ва такабур апІру гьубкІу ихтибар алидар ишри.

¹¹ Фицики Аллагьдин зурба вуйи ужувлу вари инсаният уьрхюз шлу аквнахьди ккапІнийи. ¹² Аллагьдин ужувлу ухьуз гьаму дюн’яйиъ, аллагьсуз уьмрихьан ва му дюн’яйин тямягьярихьан ярхла духьну, жвув хилиъ дидисну, марцциди ва намуслуди яшамиш йихь кІурахьуз. ¹³ Диди ихь умудар тамам шлу хушбахтавар Йигъ гъяйиз ккилигури гъузуз улупурахьуз. Думу Йигъ Чан аднаъди зурба вуйи Аллагь ва ухьу Уьрхрур – Иса Месигь гъюру Йигъ хьибди. ¹⁴ Ухьу законсузваликкан азад апІбан бадали, Чаз дурукьнайи халкь марцц апІбан бадали ва думу халкь, вари юкІв хъипну, уж’вал апІуз улихь гъягъбан бадали, Гьадгъу ухьхъанди Чан жан тувну.

¹⁵ Магьа гьамцдар аьгъювалар улуп. Яв вари гьюкум улихь гьапІну, дурарик юкІв капІ ва тахсрар улупури гъуз! Ва гъит, гьич сарихьанра увухьинди хъюхъ за дапІну лигуз дарибшри!

Дугъри вуйи уьмрикан

¹ Дурариз гьюкум гъабхрударихъ ва аьхюдарихъ хъебехъну ккунивал кІваин апІури гъуз; гьарсаб ужувлан ляхин апІуз гьязурди ишри, ² гьич затра люкьнар дарапІри, гьюжатар гъитІитІиккри вари адмийирихьна ккунивалиинди ва гъюдливалиинди ишри.

³ Улихьди ухьура ахмакьарди гъахьидар вухьа: кІул’ин зигрудар, алдатмиш дапІнайидар, хьуз мумкин вуйи вари тямягьярин ва ягь адру кьукьарин лукІар вуйхьа, хъюлу ацІну ва гъанихвали ургури яшамиш шули гъахьунхьа, чиб-чпин хъял ади ва чиб-чпи даккунди гъахьунхьа. ⁴ Хъасин дюн’яйиз ухьу Уьрхрур – Аллагьдин уж’вал ва Дугъан инсанарихьна вуйи масанвал гъафну. ⁵ Думу, ухьу апІури гъахьи ихь «гьякь ва дугъри» ляхнариз дилигну, Гъафир дар, хъа Чан уж’валилантина гьаци гъабхьиб ву. Дугъу ухьу гъюрхну, штухьди марцц дапІну, таза алаъну ва Гирами Рюгьнахьди цІийи гъапІну. ⁶ Дугъу Чан Рюгь, ухьу Уьрхруриланмина – Иса Месигьдиланмина ухь’ина, кІюгъялвал адарди, улузну. ⁷ Дугъан зурба вуйи ужувлиинди ухьу, гьякь дапІнайидар, умуд кивнайи гьаммишандин уьмур рубкьру насларди гъуздихьа. ⁸ Мурар дугъри гафар ву.

Узуз уву гьаму гьякьяр дурарин юкІвариъ тІаъри ккундузуз. Гъит, Аллагьдихъ хъугърудар, ужувлар апІури, ацІри. Хъа мици хьуб варидариз успагьи ва мянфяаьтлу ляхин ву. ⁹ Аммаки ахмакь улхбарихьан, архйирикан вуйи гьюжатарихьан, гъярхьуваларихьан ва Къанундин кІуллан кчІихуваларихьан ярхлади гъуз. Мурар ичІи ва хайирсуз ляхнар ву. ¹⁰ Хъа гьюжат гъипуз ккунириз, сабан-кьюбан чан дюз дарувал улуп, хъасин дицирихъди сарун аьлакьа мигъибтан. ¹¹ Аьгъю йибхь, дицир кас чІур гъахьир ва гунагькар ву, дугъу чав чак тахсир кипна.

¹² Узу увухьна Артем ясана Тихик гьаиган, узухьна Никопольдиз гъюз ял апІин; узу душваъ кьюрд адапІуз кьаст гъапІунза. ¹³ Ккун апІуразавукан, законарикан аьгъю Зенасдихьанна Аполоссдихьан чпи гъярайи рякъ давам апІуз кюмек апІин: дурариз фукІа-мукІа ккимиди мигъибтан. ¹⁴ Гъит, ужудар ляхнар апІури, ихьдаризра дарс ибшри ва гьудрубкІрушваъ кюмек апІуз дубгъри, хъа гьадмуган дурарин уьмур бегьер хруб хьибди.

¹⁵ Увуз узухъди гьамшваъ айи варидари саламар хътаура. Ухьу ккуни вари хъугънайидариз саламар йип. Гъит, учвухъди варидарихъди Аллагьдин уж’вал ибшри!