АЧМИШ АПІУВАЛ
Аьхиримжи йицІуд йистІан зиина чан уьмур Югьанди Эфесдиъ хъугърударин гъуллугънаъ хьуз бахш гъапІнийи. Думу вахтна Рим вилаятдин паччагь Домициан вуйи. Дугъу учв Аллагь вуза кІурайи, варидари чав Аллагьси гирамиди дисуб ккун апІуйи ва, саб тикикьан язухъ дарапІди, Исайихъ хъугърудар терг апІуйи. Исайин вакил Югьанра гьадму хъергуваларикк ккахънийи. Думу Патмос островдиина алдаънийи. Ари гьадушв’ин дугъаз Аллагьдихьан аьдати дару хабар гъафнийи. Гьадму хабар бикІбалан кьяляхъ дидиз «Ачмиш апІувал» кІуру ччвур тувнийи. Гьадму китабдиъ дебккнайи хабар, сабпи нубатнаъ, БицІи Азияйиъ Исайихъ хъугънайидариз вуйи. Му вари «Ачмиш апІували» хъерграйи ва аьзабар зигурайи йигъари хъугърудариз ижмиди дийигъуз дих апІура. Китабдиъ кучІалди Исайихъ хъугънайи мялимарихьан ихтиятди гъузну ккуниваликанра кІура. Аьзабариъ айидар саб важиблу суалну архаинди гъитрадайи: сацІиб вахтназ хъергбар алахьурайи Исайихъ хъугърударин аьхир фициб хьибдикІан? Китабди думу суалназ жаваб тувра: Иса Месигь Аллагьдиз къаршу гъудужвдариин гьубкІну гъалиб хьиди. Гьадму ву паччгьарин Паччагь ва гьюкумдрарин Агъа. Югьанди гъибикІу китабдин Исайихъ хъугърудариз вуйи важиблувал гьич саб вахтнара дубгруб дар. Дурариз китаб, чпихьинди душмнаризси лигруганра ва хъергруганра, ккарцрубди ва чпин терефкарди гъубзра. Ухьу Югьандиланмина ктикьурайи кІулин хабар Иса Месигь ву. Думу му дюн’яйиз хъана гъиди, му ражари Гъалибчиди. Китаб гьамциб гаф тувбиинди ккудубкІура: «Ав, Узу багарихьди гъидиза!» (22:20).
1Фтикан ву гьаму китаб
1 Иса Месигьдин ачмиш апІувал, Чан гъуллугъчйириз багарихьди хьуз ккайиб вари улупбан бадали, Дугъаз Аллагьди тувнайиб ву. Мидкан хабар дебккбан бадали, Чан гъуллугънаъ айи Югьандихьна Исайи малайик гьаънийи.
2 Югьанди чаз гъябкъюб вари: Аллагьдин Гаф ва Иса Месигьдин шагьидвал – тасдикь апІура.
3 Хушбахтавар ву Аллагьди гьаънайи гьаму пайгъамбарвалин гафар урхурайир, дурарихъ хъпехъурайир ва мушваъ дибикІнайиб тамам апІрур. Гьаз гъапиш вахт хъубкьна.
Хъугънайидарин жямяаьтдихьна вуйи гафар
4 Асия вилаятдиъ айи хъугънайидарин ургуб жямяаьтдиз Югьанди кІура: учвуз гьарган Айирихьан, Гъахьирихьан ва Гъюрурихьан, гьацира Дугъан тахтнахь хьайи ургур рюгьнахьан, 5 Иса Месигьдихьанра – гьякь Шагьид вуйирихьан, гъийихдарик сарпирди чІиви Гъахьирихьан ва дюн’яйин паччгьарин зиин агъавал АпІурайирихьан уж’вал ва мясляаьт ибшричвуз.
Ухьу Ккунириз, Чан ифдиинди ухьу ихь гунгьарихьан азад ГъапІуриз, 6 саб паччагьлугъдиз уч гъапІу ухькан Чан Адашдин – Аллагьдин гъуллугънаъ шлудар Ктауриз зат ккудудукІру аьсрариз ад ва кьудрат ибшри. Амин!
7 Магьа гьамус Думу дифар хъади гъиди ва гьарсариз Думу рякъиди, гьеле Дугъан мурглин тІуларигъянзина жида гъюбччвдаризра кмиди. Дугъан улихь дюн’яйиин али вари миллетари суза зигиди. Ав, дугъриданра гьаци ву! Амин.
8 «Узу вуза, – кІура Агъа Аллагьди, – Эвелра, Аьхирра гьарган Айирра, Гъахьирра, Гъюрурра ва вари хилиъ Дибиснайирра».
9 Узу, Югьан, ичв гъардаш, Месигь Исайиъди саб вуди, учвухъди Дугъан бедбахтвалар, паччагьлугъвал ва сабурлувал пай апІурайир, Аллагьдин Гаф ва Иса Месигьдихъан шагьидвал бадали Патмос кІуру островдиин гъахьунза.
10 Элгьет йигъан узуз, Рюгьнан гьюкмиъ ахънайириз, зурнайианси чІигъ апІури, йиз кьялхъян аьхю дих гъеебхьунзуз. 11 Диди гъапи: «Вари увуз рябкъюрайиб кагъзик бикІ ва Эфесдиъ, Смирнайиъ, Пергамдиъ, Фиатирайиъ, Сардисдиъ, Филаделфияйиъ ва Лаодикияйиъ айи ургбиб жямяаьтариз хъадапІ».
12 Узукди гьаму гафар апІурайи дих шлинуб вуйкІан, кІури, кьяляхъ илдицуриз, гъизилин акв апІру ургуб алат гъябкъюнзуз. 13 Гьадму акв апІрударин арайиъ, ярхи палат алди, мухрилан гъизилин чІул идибтІнайи, Инсаниятдин Бализ ухшар айирсир кас гъяркъюнзуз. 14 Дугъан кІул ва кушар лизи хьаси ва йифси вуйи. Дугъан улар убгурайи цІаси вуйи, 15 хъа ликар пичраъ крабчІури убгурайи рукьси вуйи, Дугъан дихра ягъли гъарзарилан урсрайи штарин гъугъси вуйи.
16 Дугъан арччул хилиъ ургуб хяд айи. Дугъан ушвниан, кьюбиб терефарихъанди мурзар али учІру ханжал удубчІвнайи. Дугъан маш яманди ичІибгнайи ригъси айи.
17 Думу гъяркъиган, дукІнайирси, Дугъан ликарикк дахъунза, хъа Дугъу, Чан арччул хил йиз гъюниин иливну, гъапи:
– ГучІ мапІан! Узу вуза Сарпирра, КкудукІрурра. 18 Яшамиш шулайир Узу вуза. Узу гъакІнийза, хъа магьа Узу хъана аьсрариан-аьсрариз яшамиш шулаза. Узухь хьазухь аьжалин ва жегьеннемдин ачар. 19 Гьаци вуйиган, увуз гъябкъюб бикІ: гьаму ражари шулайиб ва хъасин хьуз ккайиб. 20 Магьа, увуз Йиз арччул хилиъ гъяркъю ургуб хядран ва ургуб чирагъдин сир: ургуб хяд – мурар ургбиб жямяаьтарин малайикар ву, хъа ургуб чирагъ – мурар ургуб жямяаьт ву.
2Эфесдин хъугънайидариз
1 Эфесдин хъугънайидарин малайикдиз бикІ:
«Магьа арччул хилиъ ургуб хяд Дидиснайири ва гъизилин ургуб акв апІру алатаригъ Лицурайири фу кІураш:
2 Яв ляхнар, яв гъагъи жафа ва яв сабурлувал Узуз аьгъязуз. Аьгъязуз, уву нягьякь ва чІуру адмийир аьгь дарапІруб; Исайин вакилар вуча кІурайидар уву ахтармиш гъапІунва ва дурар кучІляхяр вуйиб аьгъю гъабхьунвуз. 3 Уву ижмир вува, Йиз ччвур бадали уву гизаф читинвалариъ ахъунва ва зяифвалиъ кІул ипундарва. 4 Амма, Йиз увуз къаршуди кІуру саб айиз: увуз яв сифтейин масанвал кІваълан гьархнавуз. 5 КІваин апІин, уву фициб ягълишналан ахънуш, швумал йихь, ухдийин ляхнар давам апІин. Эгер уву, швумал духьну, гьаци дарапІиш, Узу увухьна гъидиза ва яв акв туврайиб йишвлан илдипидиза. 6 Хъа саб увуз авуз – Узуз даккни николитарин+ 2:6 Саб кучІлин терефкрар. ляхнар дяркъну ккундарвуз.
7 Шлик хъпехъру ибар каш, гъит хъугънайидарин жямяаьтариз Рюгьну фу кІураш, ебхьри! Гъалиб гъахьириз Узу Аллагьдихь женнетдиъ айи уьмрин гьаргъян йимишар итІуз гъитдиза».
Смирнайин хъугънайидариз
8 Смирнайин хъугънайидарин малайикдиз бикІ:
«Гьамци кІура Сарпири ва КкудукІрури, ГъачІири ва хъана яшамиш Шулайири: 9 Узуз яв аьзабарикан ва касибваликан аьгъязуз, хъа уву девлетлу вува! Аьгъязуз уву беябур апІурайи, жугьдар вуча, кІурайидариканра, хъа дугъридан дурар иблисдин мярака ву. 10 Ув’ин улукьуз ккайи аьзабарихьан гучІ мапІан. Магьа багарихьди иблисди учвкан сакьюдар ахтармиш апІуз, кІури, дустагъдиъ ирчди, ва йицІуд йигъан учву аьзабар зигидичва. ЙикІайизкьан вафалуди гъуз ва Узу увуз уьмрин паччагьвалин таж тувдиза.
11 Шлик хъпехъру ибар каш, гъит хъугънайидарин жямяаьтариз Рюгьну фу кІураш, ебхьри! Гъалиб гъахьириз кьюбпи аьжал айиб дар».
Пергамдин хъугънайидариз
12 Пергамдин хъугънайидарин малайикдиз бикІ:
«Гьамци кІура кьюбиб мурзарра учІру ханжал хьайири: 13 Узуз аьгъязуз, уву иблисдин тахт алишв’ин яшамиш шулайиб. Аммаки уву Йиз ччвурнахъан ижмиди хъичІихнава. Уву Узухъ хъугъувалихьан иблис яшамиш шулайи ичв шагьриъ Йиз дугъри вуйи шагьид Антип гъакІи йигъанра гьудучІвундарва. 14 Гьаци вушра, Узуз увуз къаршу вуйибра азуз: увуъ Балам пайгъамбрин каламарихъди гъярайидар а. Думу каламари чан вахтна Валак паччагьди Израилин халкь гунагьарихъна хуз гъитнийи. Дугъу дурар, идолариз гъурбан гъапІуб ипІуз хъаънийи; дурариз намуссузвалиинди уьмур гьапІуз улупнийи. 15 Увуз гьацира николитарин каламарихъди гъягърударра авуз. 16 Гьаддиз, швумал духьну, хъадакай! Эгер хътадакиш, Узу багарихьди гъидиза ва дурарихъди Йиз ушвнин ханжлихьди дяви гъабхидиза.
17 Шлик хъпехъру ибар каш, гъит хъугънайидарин жямяаьтариз Рюгьну фу кІураш, ебхьри! Гъалиб гъахьириз Узу, гирамиди уьбхюрайи ва сир айи манна+ 2:17 Лизи хюсиб Аллагьди туврайи хураг. тувдиза, гьацира, ччвур кайи лизи гъван тувдиза. Душвак дибикІнайи ччвур, думу гъурубкьурилан гъайри, сарун гьич саризра аьгъю хьибдар».
Фиатирайин хъугънайидариз
18 Фиатирайин хъугънайидарин малайикдиз бикІ:
«Гьамци кІура Аллагьдин Бали, гъизгъин цІаси улар айири ва крабчІурайи рукьстар ликар ккайири: 19 Узуз аьгъязуз яв ляхнар ва масанвал, хъугъувал, гъуллугънаъ хьувал ва мюгькамвал. Яв аьхиримжи ляхнар сифтейиндартІан гизаф вуйибра аьгъязуз. 20 Хъа магьа увуз къаршуди Йиз фу аш: пайгъамбар вуза, кІурайи Изавел кІуру дишагьли аьгь апІурава. Дугъу Йиз гъуллугънаъ айидар улдугуз гъитра: дурар кьяппавалихъинди илтІикІура ва идолариз багъиш гъапІуб ипІуз улупура. 21 Узу дугъаз чан тІулар дирчуз вахт тувунза, хъа дугъаз чан намуссузвалиин швумал хьуз ккунди адар. 22 Гьаддиз Узу думу уьзрарихь гьахъуз гъитдиза, эгер чпин ляхнариин швумал духьну, хътадакиш, дугъахъди кьяппавал апІури гъашидарра зурба бедбахтвалихь гьирчдиза. 23 Дугъан бицІидарра аьжалихь гьирчдиза. Гьадмуган вари жямяаьтариз аьгъю хьибди: ичв юкІвариъ ва фагьмариъ жиниди уьбхюрайиб вари аьгъюр Узу вуйиб, ва гьарсариз Узу, чан ляхнариз дилигну, тувдиза. 24 Хъа Фиатирайиъ имбудариз, гьадму каламарихъди дяргърудариз ва иблисдин фендигарвалар аьгъю дарапІдариз Узу кІураза: „Узу учв’ин артухъ гъагъ илипдарза“, 25 эгер учву, тап Узу гъяйиз, ичв айибдиинди, гьадму уьбхюри гъузиш. 26 Хъа аьхиризкьан, Узу кІуруб вари тамам апІури, гъалиб гъахьириз, халкьарин зиин Узуз Йиз Адашдихьан гъурубкьганси, гьюкум тувдиза. Гьацири дурарин зиин рукьан чумакъихьди гьюкум гъабхиди ва, ругдин гъабар фици тикйир шулуш, гьаци дурар уьргъиди!
28 Гъалиб гъахьириз Узу гвачІиндин хядра тувдиза. 29 Шлик хъпехъру ибар каш, гъит, хъугънайидарин жямяаьтариз Рюгьну фу кІураш, ебхьри!»
3Сардисдин хъугънайидариз
1 Сардисдиъ айи хъугънайидарин малайикдиз бикІ:
«Гьамци кІура Аллагьдин ургуб рюгь ва ургуб хяд Хьайири: яв ляхнар Узуз аьгъязуз; гьеле уву чІивидарин жергйириъ ашра, уву дукІнайир вуйиб аьгъязуз. 2 Уягъ йихь ва мюгькам апІин уву имбу гьамус-хъа йибкІру гьялнаъ айиб. Яв ляхнар Йиз Аллагьдиз хуш шлударстар вуди гъяркъюндарзуз. 3 Гьаци вуйиган, кІваин апІин, увуз фу гъурубкьнуш ва фу гъеебхьнуш! Гьадму тамам апІин, яв ляхнар гъит ва швумал йихь! Хъа эгер уву уягъ дархьиш, Узу тІафалси хабарсузди гъидиза. Уву, Узу увухьна фуну вахтна гъюруш, аьгъю хьибдарвуз. 4 Аммаки увуз Сардисдиъ чпин палтар ктрацІу сакьюдар адмийир авуз, ва дурар Узухъди лизибдиъди гъягъиди, гьаз гъапиш дурар лайикьлу ву. 5 Гъалиб гъахьирра лизи палтар алахьну хьиди, ва Уьмрин китабдикан Узу дугъан ччвур ктІубшвидарза, Узу думу, Йиз Адашдин ва Дугъан малайикарин улихь кьабул апІидиза. 6 Шлик хъпехъру ибар каш, гъит, хъугънайидарин жямяаьтариз Рюгьну фу кІураш, ебхьри!»
Филаделфияйин хъугънайидариз
7 Филаделфияйин хъугънайидарин малайикдиз бикІ:
«Гьамци кІура Гирамири, Гьякьлури, Давудрин ачар Хьайири – Дугъу абццхъанмина, гьич сарихьанра хъябкьюз хьибдар, Дугъу хъябкьхъанмина, гьич сарихьанра абццуз хьибдар: 8 Узуз яв ляхнар аьгъязуз – магьа яв улихь Узу урчІар арццунза ва гьич сарихьанра дурар хъяркьюз хьибдар, гьаз гъапиш, гьеле яв кьувват цІибди вушра, уву Йиз Гаф гъюбхюнва ва Йиз ччвурнахьан гьудучІвундарва. 9 Гьаддиз магьа, Узу увуз иблисдин мяракайиан жугьдар вуча кІурайидар, амма дугъри дарудар, кучІляхяр тувдизавуз – Узу дурар увухьна гъюруси ва яв ликарикк икрам апІури дахьруганси апІидиза. Хъа дурариз, Узуз уву ккуниб, аьгъю хьибди. 10 Узу увуз, мюгькамди гъуз, гъапиган, уву гьаци гъузунва, гьаддиз вари адмийир ахтармиш апІуз дюн’яйиина гъюру бедбахтваларин вахтна, Узу увура уьрхидизаву.
11 Узу багарихьди гъидиза. Гьич сарихьанра яв паччагьвалин таж тадабгъуз даршлуси, увуз айибдихъан ижмиди хъичІихну гъуз. 12 Гъалиб гъахьирикан Узу Йиз Аллагьдин хулан мурхьул ктаидиза ва думу душваъ аьсрариз гъузди. Узу дугъак Йиз Аллагьдин ччвур, Йиз Аллагьдихьан завариан гъюру Йиз Аллагьдин шагьрин – цІийи Ерусалимдин ччвур, ва Йиз цІийи ччвур бикІидиза. 13 Шлик хъпехъру ибар каш, гъит, хъугънайидарин жямяаьтариз Рюгьну фу кІураш, ебхьри!»
Лаодикияйин хъугънайидариз
14 Лаодикияйин хъугънайидарин малайикдиз бикІ:
«Гьамци кІура Амин ччвур алири, Дугъри ва Гьякь Шагьидди, Аллагьди халкь гъапІу варибдин Аьхюри: 15 Узуз яв ляхнар аьгъязуз, уву я мичІлир, я урцрур дарувалра аьгъязуз. Увуз ужу хьибди, эгер уву я мичІлир, ясана урцрур вуди гъахьнийиш! 16 Хъа уву я мичІлир, я урцрур дарди, хъа анжах мани вуди хьпаз дилигну, Узу уву Йиз ушвниан тутуси идипидизаву! 17 Уву: „узу девлетлу вуза, узу девлетлу гъахьунза, узуз сарун фукІара ккимбуб имдариз“ – кІураш, увуз, уву фукьан бахтсуз, аьжуз, касиб, кур ва гъяцІал вуш, аьгъдарвуз. 18 Узу увуз саб насигьят тувраза: уву девлетлу хьуз, Узхьан цІиъ марцц гъапІу гъизил ва яв гъяцІливалин нач ккебкуз алабхьру лизи палат гъадабгъ. Гьацира увуз уларикан ктатуз ва рябкъюри хьуз ччимра гъадабгъ. 19 Узу Узуз масан вуйи касариз жаза гьадабтІурза ва дурарин жини ляхнар арайиз адагъурза, гьаци вуйиган, юкІв хъип, ва швумал духьну, яв фурсар дирч. 20 Магьа, Узу дийигъназа урчІарихъ ва кучраза. Шлиз Йиз дих ебхьураш, гьадгъу Узуз урчІар арццди, Узу гьадму касдихьна учІвдиза ва учу, сатІиди деъну, хябяхъдин уьл ипІидича.
21 Гъалиб гъахьириз Узу Узухъди тахтниин деуз йишв улупидиза, гьаз гъапиш, Узура гъалиб гъахьунза ва Йиз Адашдин гъвалахъ Дугъан тахтниин деунза. 22 Шлик хъпехъру ибар каш, гъит, хъугънайидарин жямяаьтариз Рюгьну фу кІураш, ебхьри!»
4Югьандиз аьршариъ гъябкъюб
1 Гьамдин кьялхъян узуз завариъ урчІар арццну гъяркъюнзуз ва гьадму сифте гъеебхьу зурнайинсиб дих гъеебхьунзуз. Дих узухъди, гьамци кІури, улхуз хъюбгъю: «Мина удучІв, Узу увуз багарихьди хьуз ккайиб улупурзавуз».
2 Узу гьадму сяаьт Рюгьну ацІунзу. Фу лигурва, аьршариъ тахт дебккна, хъа тахтниин Деънайир ал. 3 Хъа Деънайирилан сердоликна яшма кІуру багьа гъванариланси нур рабгъурайи, ва тахт вуйибси заъланмина изумруддин рангарин дерккучІимирсиб илбицнайи. 4 Гьадму тахтнахъди, илтІикІну, къабна юкьуб тахтсана хъайи. Дурариин кьарна юкьур аьхюр, лизи палат алабхьну, деънайи; дурарин кІулариин гъизилин тажар алийи. 5 КІулинуб тахтнахьан кьюркьлин цІийир, гьарйир ва завар рахрустар сесер гьудучІвуйи. Думу тахтнан улихь цІа алди ургурайи акв тувру ургуб алат хьайи – мурар Аллагьдин ургур рюгь вуйи. 6 Тахтнан гъаншариъ хрусталсиб гюзгдин гьюлиз ухшар вуйи фу-вуш айи. ГьацІна – гьацІ кьялаъ, тахтнан юкьуб тереф вуйибси илтІикІну, улхьандира ва кьялхъяндира кьадар адрубкьан улар айи, гьяйванатарстар юкьур чІивидар айи. 7 Сарпи гьяйванатсир – аслансир вуйи; кьюрпир – жигьил йицсир; шубурпирин маш адмийинсиб вуйи, хъа юкьурпир завуъ уьбхнайи люкьраз ухшар айир вуйи. 8 Гьадму юкьрид гьяйванатарстарик гьарсардик йи-йирхьуб хлинцц кайи. Хлинццар вари терефарихъанди: айтІандира, зиъландира – уларихьди алацІнайи. Юкьрид гьяйванатарстари, зат дийийигъди, йишвнура ва йигънура гьарйир апІурайи:
«Гирами, гирами, гирами ву Агъа Аллагь
вари хилиъ Дибиснайир,
гьарган Айир, Гъахьир ва Гъюрур!»
9 Гьадму юкьрид гьяйванатарстари тахтниин Деънайириз – гьарган яшамиш Шулайириз, чухсагъул кІури имиди, Дугъан ад апІури имиди ва заанвал улупури имиди, 10 къарна юкьур аьхюри тахтниин Деънайирин улихь, ис алахъури, гьарган яшамиш Шулайириз икрам апІуйи ва, тахтнан улихь чпин тажар диври, гьамци кІуйи:
«Уву лайикь вува, Агъа, ич Аллагь,
ад, заанвал ва кьувват кьабул апІуз,
гьаз гъапиш, Уву вува вариб арайиз Гъабхир;
Яв амриинди вари гъабхьну
ва арайиз гъафну!»
5Дибиржнайи кагъаз ва Ччил
1 Тахтниин Деънайирин арччул хилиъ узуз китаб – турбаси дибиржнайи кагъаз гъябкъюнзуз. Дидин айтІандира, зиъландира варишвар алацІну, дибикІнайи, ва думу ургуб печатдиинди хъябкьнайи. 2 Аьхю дихниинди гьамци кІурайи кьудратлу малайикра гъяркъзуз: «Фуж лайикь ву му китаб ачмиш апІуз ва мидлан печатар алдагъуз?»
3 Гьич сарихьанра: я завариин, я жилариин, я жиларикк ккайидарихьан – китаб ачмиш апІуз гъабхьундайи, гьеле дидихьинди лигузкьан дурарихьан удубкьундайи. 4 Китаб ачмиш апІуз ужур, дидихьинди лигузкьан удубкьрур арайиз удудучІвган, узу бегьем гъишза. 5 Хъасин гьадму аьхюдарикан сари гъапизуз: «Мишан! Лиг, Ягьудайин тухмиан Аслан гъалиб гъахьну, Давудрин машгьур вуйи насил! ГьадгъухьантІан шулдар ургуб печать али китаб ачмиш апІуз».
6 Узуз тахтнахь, гьацІ кьялаъ, Ччил гъяркъюнзуз. Думу гъурбан апІуз духнайирси айи. Дугълан гьадму юкьрид гьяйванатарстарна аьхюдар илтІикІнайи. Гъурбан апІуз Духнайириз ургуб кІарчна, ургуб ул айи – мурар Аллагьдин ургуб рюгь вуйи. Дугъан мурар дюн’яйиина гьаърудар вуйи. 7 Дугъу, багахь духьну, тахтниин Деънайирин арччул хилиъ айи дибиржнайи китаб гъибису. 8 Дугъу думу гъибисган, юкьрид гьяйванатарстарна къарна юкьрид аьхюдар Ччилан улихь икрам апІури дахьу. Дурарин гьарсарин хилиъ чюнгюр ва кІулихьди ацІнайи, ицци ниар хъайи ургру ччимар ади, гъизилин гъабар айи – му ччимар Аллагьдин гирами халкьдин ккарагбар ву. 9 Дурари цІийи мяъли апІурайи:
«Уву лайикь вува китаб бисуз
ва дидлан печатар алдагъуз,
гьаз гъапиш, Уву духьну гъурбан,
Яв ифдиинди Уву Аллагьдиз адмийир гъадагъунва
гьарсаб тухмиан ва чІалнаан,
гьар жюре миллетарикан ва халкьарикан.
10 Уву гъапІунва дурарикан
ихь Аллагьдиз гирами гъуллугъчйир ва паччгьар –
дурари дюн’яйиинра
паччагьвал апІиди!»
11 Узуз юкьрид гьяйванатарстаринна гьадму аьхюдарин тахтналан илтІикІнайи гизаф малайикар гъяркъзуз ва дурарин дихар гъеерхьзуз. Дурарин кьадар ктухузкьан шлуб дайи – агъзрар-агъзрариинди вуйи. 12 Дурари аьхю дихниинди кІуйи:
«Гъурбан гъахьи Ччил лайикь ву
кьувват, девлет, аькьюл ва кьудрат,
заанвал, ад ва уж’вал
кьабул апІуз!»
13 Узуз гъеебхьунзуз, вари арайиз дубхнайибди – завариинра, жилариинра, жилариккра ва гьюлериъра – варишвариъ варибди фици гьарай апІуйиш:
«Тахтниин Деънайиризна Ччилаз –
уж’вал, заанвал,
ад ва кьудрат
гьаммишандиз!»
14 Ва юкьрид гьяйванатарстарира кІуйи:
«Амин!»+ 5:14 Дугъриданна гьаци ву!
Аьхюдар жилиина ахьуйи ва икрам апІуйи.
6Сабпи йирхьуб печать алдабгъбакан
1 Ччилу ургуб печатдикан саб фици алдабгънуш, гъябкъзуз ва юкьрид гьяйванатарстарикан сари фици: «Мина гъач!» кІури, завун гъугърумаринсиб чІигъ гъапІнушра, гъеебхьунзуз. 2 Хъа лизи гьяйван гъябкъзуз. Дид’ин чІимирра хьайи атлу алийи. Дугъаз таж тувнади шулу, ва думу гъалибвал гъадабгъуз, гъалиб гъахьирси, рякъ’ин шулу.
3 Ччилу кьюбпи печать алдабгъиган, узуз, юкьрид гьяйванатарстарикан кьюрпири, мина гъач, кІури, гъеебхьзуз.
4 Хъа цІаси убгурайи уьру гьяйван удубчІвури гъябкъзуз. Му гьяйвниин али атлуйиз, зурба ханжал тувну, адмийир чиб-чпигъ гъярхьну йихбан бадали, дюн’яйиан мясляаьтвал адабгъуз шлу ихтияр тувнийи.
5 Ччилу шубубпи печать алдабгъиган, узуз юкьрид гьяйванатарстарикан шубурпири: «Мина гъач!» кІури гъеебхьзуз. Хъа хъютси кІару гьяйван гъябкъзуз, дид’ин элеънайирин хилиъ ярчврар айи.
6 Хъасин гьадму юкьрид гьяйванатарстарин арайиъ гьамци кІурайи дихсиб гъеебхьзуз:
«Ярхи йигъан гъилихубдихъ саб сеъ дяхинтІан дяргърубси хьибди, ясана шубуб сеъ мухтІан дяргърубси хьибди! Аммаки я ччимдиз, я чяхриз зарар мутуван!»
7 Дугъу юкьубпи печать алдабгъиган, юкьрид гьяйванатарстарикан юкьурпири кІурайи дих гъеебхьунзуз: «Мина гъач!»
8 Хъа узуз, зяиф-гъатху рангнан гьяйван гъябкъзуз. Дид’ин элеънайирин ччвур Аьжал вуйи, дидихъди вари жегьеннем гъюрайи. Мидиз дюн’яйин юкьубпи пайниин ханжлиинди, гаш’валиинди, уьзрариинди ва юкьбиб вягьши гьяйванатариинди адмийир йихуз шлу гьюкум тувнайи.
9 Дугъу хьубпи печать алдабгъиган, узуз гъурбнар апІрушван кІанакк Аллагьдин Гафналантина ва дурари гъапІу шагьидвалилантина гъийиху адмийирин рюгьяр гъяркъзуз. 10 Дурари зурба гьарай идипу:
«Гирами ва Гьякьлу Гьюкумдар! Уву гьаз гьамусра дюн’яйин адмийирин суд апІурадарва ва дурариз, ич удубзу ифдихъанди, жаза гьаз гьадабтІурадарва?»
11 Гьадмуган дурарикан гьарсариз лизи палат тувнийи ва сацІибсана сабур апІуб ккун гъапІнийи, гьаз гъапиш дурарин кьадар гьуркІну шайиз, чписи, Месигь Аллагьдин гъуллугънаъ айи гъардшарра йихайиз, ккилигну ккундийи.
12 Узуз Дугъу йирхьубпи печать алдабгъури гъябкъзуз. Гьадмуган лап яманди жилар гъутІурччву; ригъ – маллайин чухаси кІару, хъа вари ваз ифиси гъабхьи, 13 гужал микІ хъивну гъядябхъру дурубжу инжирси, хядар, завариан адахьну, жилиина ахьу. 14 Зав кагъазси илбижну дубгу; вари дагъларна островар чпин йишварихьан гьудучІву. 15 Дюн’яйин паччгьарра, гьякимарра, кьушмарин аьхюдарра, девлетлу ва кьудратлу адмийирра, лукІарра ва азадди уьмур хъапІрударра – вари дагълариъ айи гъарзаригъ ва дюрхъяриъ гьитІикІнийи. 16 Хъа дурари дагъларизна гъарзариз кІуйи: «Уч’ина ахьай, тахтниин Деънайирихьан ва Ччилан хъял кайивалихьан учу гьитІикІай. 17 Дурарин хъял алдабгъру Йигъ дуфна. Шлихьан мидккан ккадархьуз хьиди?!»
7Израилиан 144000 кас
1 Хъасин узуз дюн’яйин юкьбиб терефариъ дийигънайи юкьур малайик гъяркъзуз. Дурари, я жилиина, я гьюл’ина, я гьарариина хъивуз гъидритди, дюн’яйиина хъивру юкьуб микІ дидиснайи. 2 Узуз ригъ гьудубчІвру терефнахъан чІиви Аллагьдин печать дибиснайи сарсана малайик за шули гъяркъюнзуз. Дугъу зурба дихниинди жилизна гьюлериз бедбахтвалар хуз гьюкум тувнайи юкьбиб малайикариз гъапи:
3 «Сабан я жилариз, я гьюлериз, я гьарариз, ухьу ихь Аллагьдин гъуллугънаъ айидарин машар печатдиинди жара дарапІкьан гагьди, зарар мутуванай!»
4 Ва узуз, печать йивну жара гъапІдарин кьадар варжна ягъчІвурна юкьуд агъзур кас вуйиб, гъеебхьунзуз. Израилин баярин вари тухмариан печатдихьди жара гъапІдар гьадмукьан вуйи.
5 Ягьудайин тухмиан печатдихьди лишанлу гъапІдар йицІикьюд агъзур кас вуйи;
Рувимдин тухмиан – йицІикьюд агъзур;
Гаддин тухмиан – йицІикьюд агъзур;
6 Ашерайин тухмиан – йицІикьюд агъзур;
Нефталимдин тухмиан – йицІикьюд агъзур;
Манасдин тухмиан – йицІикьюд агъзур;
7 Симеондин тухмиан – йицІикьюд агъзур;
Левийин тухмиан – йицІикьюд агъзур;
Исахардин тухмиан – йицІикьюд агъзур;
8 Забулундин тухмиан – йицІикьюд агъзур;
Юсуфдин тухмиан – йицІикьюд агъзур;
Вениаминдин тухмиан – йицІикьюд агъзур.
9 Хъасин узуз сарихьанкьан ктухуз даршлукьан гьар жюре халкьарикан, миллетарикан, тухмарикан ва чІаларикан вуйи адмийирин зурба гъварч, тахтнан ва Ччилан улихь лизи палтарикди ва пальмайин кюлер хилиъ ади дийигъну, гъяркъзуз. 10 Дурари аьхю дихариинди гьарай ипнайи:
«Уьрхювал тахтниин деънайи ихь Адашдин ва Ччилан хилиъ а!»
11 Хъа тахтналан, аьхюдарилан ва юкьрид гьяйванатарстарилан илтІикІнайи вари малайикари, тахтнан улихь жилиина ахьну, Аллагьдиз икрам гъапІу. 12 Дурари варидари гьамци кІуйи:
«Амин!
Дугъриданна уж’вал ва ад, аькьюл, чухсагъулвал, заанвал, кьувват ва кьудрат гьарсариз аьсрариан аьсрариз ихь Аллагьдихь хьа. Амин».
13 Думу аьхюдарикан сари узхьан гьерхнийи: «Гьаму лизи палат али адмийир фужар ву ва наънан гъафидар ву?»
14 «Йиз аьхюр, думу увуз ужуди аьгъявуз!» – жаваб тувза. Дугъу гъапизуз:
«Мурар зурба бедбахтвалариккан ккудучІвдар ву. Дурари чпин палтар, Ччилан ифдиъ дурччну, лизи гъапІну, 15 гьаддиз дурар Аллагьдин тахтнан улихь хьа ва Дугъан Хулаъ дурар йишвди-йигъди Дугъан гъуллугънаъ а, хъа тахтниин Деънайири дурарин зиин Чан чадур алтІабцциди, 16 ва дурариз гьич зат я къурагьвал, я гаш’вал аьгъю хьибдар, я ригъди дурар ургидар, я пис манишнан ялавну ккагъидар, 17 гьаз гъапиш тахтниин али Ччилу дурар уьрхиди, ва уьмур хру штун булагъарихъна гъахиди. Аллагьди дурарин уларилан гьарсаб нивгънан цІадал марцц апІиди».
8Ургубпи печать алдабгъуб
1 Дугъу ургубпи печать алдабгъиган, гьацІ сяаьтнасикьан аьршариъ сессузвал абхъру. 2 Узуз Аллагьдин улихь ургур малайик дийигъну гъяркъзуз. Дурарихьна ургуб зурна тувну шулу.
3 Жара малайик гъюру. Думу гъурбнар ургрушван гъвалахъ, кум ккапІру гъизилин гъабсибра хьади, дугъужвуру. Дугъахьна, Аллагьдин вари халкьдин ккарагбарихъди, тахтнан улихь хьайи гъизилин гъурбнар ургрушв’ина хпан бадали, бегьемди ицци ниар хъайи, ургру ччимарра тувру. 4 Хъа малайикдин хилиъ айи гъизилин гъабсибдиан Аллагьдин улихь, Дугъан халкьдин ккарагбарихъди сабси, ицци ниъ хъайи кум за шулу. 5 Малайикди кум ккапІру гъабразди, гъурбнар ургрушвлан цІа гъадабгъну, кабхьуз ипру, хъа думу дюн’яйиинди гатІабхьуру, хъасин душв’ин завар рахуру, гьарай утІубччвуру, кьюркьлин цІийир кричуру ва жилар тІурччвуру.
Ургуб зурна
6 Хъа ургуб зурна дидиснайи ургур малайик зурнийир рахуз гьязур духьнайи.
7 Сарпири гъарабху – ва ифдихьди гъибикьнайи мирккна цІа абхьу ва жилиин дабхьу. Дюн’яйин шубубпи пай жилар гъургу, шубубпи пай гьарар ва вари чру укІ гъубгу.
8 Кьюрпи малайикди зурна гъарабху – убгурайи зурба дагъсиб гьюлеризди абхьу. Хъа гьюлерин шубубпи пай шид ифдиз илтІибкІнийи. 9 Гьюлериъ шубубпи пай чІивишин гъирмиш гъабхьнийи ва шубубпи пай гимйир ккахьнийи.
10 Шубурпи малайикди зурна гъарабху – зав’ан чирагъси убгурайи зурба хяд абхъу. Думу шубубпи пай нирариина ва штарин булагъариина абхънийи. 11 Думу хядраз КьутІкьли Кьал кІуйи. Вари штарин шубубпи пай кьалси кьутІкьли гъабхьнийи ва гизаф адмийир гьациб штуан гъийихнийи, гьаз гъапиш штар кьутІкьли гъахьнийи.
12 Юкьурпи малайикди зурна гъиву – ригъдин ва вазлин шубубпи пай ва шубубпи пай хядар пуч гъапІу. Дурарин шу-шубубпи паяр гъидису ва, акв адарди, йишвандин шубубпи пайси, шубубпи пай йигъандинра мучІуди гъабхьи.
13 Узуз аьршарикк тІибхурайи люкь гъябкъюнзуз. Диди зурба дихниинди кІурайиб гъеебхьунзуз:
«Гьамус имбуну шубур малайикди хъаъру зурнайин дихарихьан дюн’яйиин яшамиш шулайидарин язухъийкІана, язухъийкІана, язухъийкІана!»
91 Хьубпи малайикди зурна гъиву, ва узуз зав’ан жилиина хяд абхъри гъябкъзуз. Дидиз кІан ккадру гъуйдин ачар тувнайи. 2 Диди кІан ккадру гъуйдикан жюлгер ктахьу ва душв’ан, зурба пичраанси, кум утІубччву. КІан ккадру гъуйдиан утІубччву кумру ригъ ва гьава ккапІу. 3 Кумруан жилиина елгнагарин гъварчар адахьу. Жилиин аькьрабариз айи гьюкум думу елгнагаризра тувнайи. 4 Елгнагариз, я чру укІаз, я чрушназ, я гьарариз зарар тутрувди, унтІ’ин Аллагьдин печатдин лишан алдру адмийириз зарар тувуз, амур дапІнайи. 5 Елгнагариз думу адмийир йихуз ваъ, хъа хьуб вазлин арайиъ сузайикк гъитуз буйругъ тувнайи. Хъа дурарин сузайин учІврушин, аькьрабари кьацІ гъапІиганси, писуб вуйи. 6 Думу йигъари адмийир аьжал абгури хьиди, хъа бихъури хьибдар, дурар аьжалихъ мягьрум хьиди, хъа аьжал дурарихьан гьебгди.
7 Думу елгнагар дявдиз гьязур духьнайи эскрарин гьяйвнарси рякъюйи. Думу гьяйвнарин кІулариин гъизилин тажарстар алийи, хъа машар адмийинстар, 8 кушар дишагьлийинси ярхидар, сппар асландин кІанччарстар вуйи. 9 Дурариин, гар али гъюбариинси, рукьанстар, фукІа ктидипру палтар алийи. Дурарин хлинццарин дих дявдиз ккажаргъурайи аьхючІве гьяйвнарин аьрабйирин гъугъсиб вуйи. 10 Дурарин галамар айи рижвар аькьрабаринстар вуйи; адмийириз хьуб вазлиъ зарар тувру кьувват дурарин рижвариъ айи. 11 Дурарин паччагь кІан ккадрушван малайик ву; думу паччагьдиз жугьуд чІалниинди Аббадан, хъа грек чІалниинди Аполлион кІуру.
12 Сабпи дерд гьудубчІвуру. Мегьел мидихъди кьюбсана дерд гъюри ими!
13 Йирхьурпи малайикдира зурна гъарабху. Узуз Аллагьдин улихь хьайи, гъизилин гъурбнар ургрушв’ин али юкьуб кІарчнаан гъюрайи дих гъеебхьзуз. 14 Дихну зурна хьайи йирхьурпи малайикдиз гъапи: «Зурба вуйи Ефрат нирихъ дитІнайи юкьрид малайикар дудурч».
15 Юкьрид малайикарра дудурчуру – дурар гьязурди, гьаму сяаьтназ, йигъаз, вазлиз ва йисаз (ккилигури), вари халкьарин шубубпи пай йибхбан бадали, дерккнайидар вуйи. 16 Гьяйвнин къушмарин кьадар кьюдварж миллион вуйи; му кьадар узуз гъеебхьунзуз. 17 Магьа йиз рякъбариан узуз гьяйвнарна дурариин элеънайидар фици гъяркънуш: дурариин али фукІа ктрипру палат цІаси уьруб, укІуб ва гугутси гъатхуб вуйи; кІулар асландин музмузарстар вуйи; дурарин ушвниан цІа, кум ва гугурт утІубччвурайи. 18 Гьаму шубуб бедбахтвали дурарин ушвниан удубчІвурайи цІихьан, кумрухьан ва гугуртдихьан вари адмийирин шубубпи пай гъийибхнийи. 19 Гьаз гъапиш гьяйвнарин кьувват дурарин ушвариъна рижвариъ айи, дурарин рижвар битІариз ухшар вуйи, дурариин кІулар алийи ва гьадму кІуларихьди зарар тувуйи.
20 Гьадму бедбахтвалариккан гъирмиш дархьиди ккудуччву адмийир, чпин хиларин ляхнарихьан, швумал духьну, гьудучІвундайи: дурари шейтІнаризна гъизиликанна, арсраканна, йифриканна, гъвандиканна, гакІвликан дапІнайи ва каънайи, я рябкъюз, я ерхьуз, я гъягъюз даршлу идолариз гьюрмат апІуб дипундайи. 21 Дурар гьацира чпин я йивну йихувалар, я фалчивалар, я кьяппавалар, я тІафалвалар дирчну, швумал гъахьундайи.
10Дибиржнайи китаб хьайи малайик
1 Узуз дифариъди завариансина гъюрайи сарсана кьудратлу малайик гъяркъзуз. Дугъан кІул’ин дерккучІимир алийи, машну ригъдиси нур туврайи, хъа ликар цІин бурузарстар вуйи. 2 Дугъан хилиъ, саб кьадар ачмиш дапІнайи кагъаз айи. Дугъу арччул лик гьюлериин диву, хъа гагул лик – жилариин, 3 ва зурба дихниинди, аслан арабхруганси, гьарай гъапІу! Дугъу гьарай гъапІиган, завар рахрустар, ургуб гъугъруми гафар апІуз хъюгъю. 4 Ургбиб гъугърумари гафар гъапІиган, узу бикІуз гьязур гъахьиза. Аммаки узуз завариан гьамци кІурайи дих гъеебхьзуз: «Ургбиб гъугърумари гъапиб жиниди уьбх. Думу гафар мидикІан!»
5 Узуз гьюл’инна жилиин дийигъну гъяркъю малайикди арччул хил завариз за гъапІу, 6 ва аьсрариан аьсрариз гьарган яшамиш Шулайириинди, завар ва душваъ айиб, жилар ва душв’ин алиб арайиз Гъабхуриинди, сарун вахт имдар кІури, ху гъапІу!
7 Хъа гьадму йигъари, ургурпи малайикдин зурна гъарабхган, Аллагьдин сир, Дугъу Чан гъуллугънаъ гъаши пайгъамбрариз хабар дебккганси, вари тамам хьибди.
8 Узуз завариан гъеебхьу дихну, узухьинди илтІикІну гъапизуз: «Душну, гьюл’инна жилиин дийигънайи малайикдихьан ачмиш дапІнайи китаб бис».
9 Узу, багахь духьну, малайикдихьан гьадму китаб узухьна тувуб ккун гъапІза. Хъа дугъу узуз гъапи: «Ма, му ипІин, фуниъ кьутІкьлишин абхъдияв, хъа ушв йиччвси меъли хьибдияв».
10 Узу думу китаб, малайикдин хил’ан дибисну, гъипІза ва йиз ушвниъ, йиччв гъипІганси, меълишин абхъу, хъа фуниъ – ктирсуз даршлу кьутІкьлишин. 11 Хъа узуз гъапи: «Уву аьхючІвеъ халкьарикан, миллетарикан, чІаларикан, ва паччгьарикан пайгъамбарвалин гафар хъана пуз буржлу вува».
11Кьюр шагьид
1 Узухьна жилар ерцрубсиб маргъ тувнийи ва гъапнийи: «Душну Аллагьдин хал ва гъурбнар ургрушв ебц, хъа гьадму Хулаъ икрам апІрударин кьадар гьисаб апІин. 2 Аммаки Хулахъди хъайи чІатан гьяят гъидип, думу меебцан, гьаз гъапиш душвайишв аллагьсузариз тувна, дурари гирами шагьур ягъчІвурна кьюб вазли ликриккан апІиди. 3 Узу Йиз кьюр шагьид тувдиза: дурар, чІуру ирин палат алабхьну, агъзурна кьюдваржна йирхьцІуд йигъан, пайгъамбрарси, пайгъамбарвалин гафар кІури гъузди». 4 Му пайгъамбрар – жилин Агъайин улихь дийигънайи оливайин кьюб гьарна, акв тувру кьюб алат ву. 5 Эгер шлизкІа дурариз чІуруб апІуз ккун гъабшиш, дурарин ушвниан цІа утІубччвиди ва душмнар ургиди. Дурариз писвал апІуз саризра ккун хьибдар, гъапІиш, гьаци йикІиди. 6 Дурариз зав хъябкьюз гьюкум а; дурарихьан чпин пайгъамбарвалин гъуллугъниин али вахтна мархь дурубгъри гъитуз шулу; дурариз шид ифдиз илтІибкІуз шлу гьюкум тувна; дурарихьан, чпиз фициб ккундуш, гьациб бедбахтвалихьди жил алабцІуз шулу.
7 Дурарин шагьидвал апІру вахт ккудубкІган, кІан ккадрушв’анзина удубчІву вягьши гьяйванат гьадму кьюрид пайгъамбрарихъди дявдиз удубчІвиди, гьяйванат гъалиб хьибди ва дурар йихиди. 8 Дурарин майтар аьхю шагьрин кючейиъ дирчну хьиди. Жара жюрейиинди думу шагьриз, дурарин Агъа хачрак карсу йишваз, Содом ва Египет кІури шулу. 9 Дурарин майтариз, вари халкьаригъян, тухмариан, чІалариан ва миллетаригъян адмийир шубуд йигъанна гьацІаъ лигури гъузди ва дурар кивуз гъитдар. 10 Дюн’яйиин али адмийир шад хьиди, мяракйир ачмиш апІиди, чиб-чпиз пешкешар апІиди, гьаз гъапиш гьадму кьюрид пайгъамбрари дюн’яйин халкьар аьзабнакк ккитнийи. 11 Шубуд йигъна гьацІ улдубчІвган, Аллагьдихьан уьмрин рюгь майтариъ убчІвди, ва пайгъамбрар чпин ликриина гъудужвиди, хъа дурариз лигурайидарик зурба гучІ кабхъди.
12 Пайгъамбрариз завариан чпиз: «Мина удучІвай!» – кІурайи зурба дих гъеебхьнийи. Душмнариз рякъюри, дурар дифриинди завариз за шулу. 13 Гьадму вахтна лап яманди жилар тІурччвуру ва шагьрин йицІубпи пай дарабгъну абхъру. Жилар гъутІурччвган, ургуд агъзур кас гъийихнийи, хъа имбудариз гучІ гъабхьнийи ва дурари Аьршарин Аллагьдин ад за апІуз хъюгънийи.
14 Кьюбпи дерд гьудубчІвнийи. Хъа магьа шубубпи дерд гъюз гьялакди а!
Ургубпи зурна
15 Ургурпи малайикди зурна хъапІу, ва завариъ гьамци кІурайи зурба дихар арайиз гъафи:
«Гьаму дюн’яйин паччагьлугъ ич Агъайин ва Дугъан Месигьдин Паччагьлугъ гъабхьну. Дугъу гьаргандиз, аьсрариан аьсрариз паччагьвал апІиди!»
16 Аллагьдин улихь тахтариин деънайи къарна юкьур аьхюр, жилиина ахьну, Аллагьдиз, вари хилиъ Дибиснайириз, икрам гъапІу. 17 Хъа гьамци кІури, гьарай идипу:
«Чухсагъул Увуз, Агъа Аллагь, вари хилиъ Дибиснайир, гьарган Айир ва Гъахьир,
гьаз гъапиш, Уву Яв зурба вуйи кьувват ва паччагьвал хилиз гъибисунва.
18 Аллагьсузар аргъарди гъадагъна, хъа гьамус Увукра хъял кубчІвнавук:
дийихнайидарин суд апІру ва дюн’я чІур апІурайидар пуч апІру,
ва Яв лукІарди гъахьи пайгъамбрариз,
Яв гирами халкьдиз,
Яв ччвурназ гьюрмат гъапІу бицІи касаризси,
зурба вуйидаризра
лайикьлу пешкешар тувру вахт дуфна».
19 Аьршариъ Аллагьдин хал абццру ва Душваъ Дугъан Йикьрар айи сундух рябкъюри шулу. Хъасин кьюркьлин цІийир кричуру, гьарай абхъру, гъугърумарин гъугъ абхъру, жилар тІурччвуру ва гужли миркк убгъуру.
12Дишагьли ва аждагьа
1 Хъа завариин зурба лишан арайиз гъюру: ригъ алабхьнайи дишагьли, дугъан ликарикк – ваз, хъа кІул’ин – йицІикьюб хядракан вуйи таж. 2 Дишагьлийик бицІир ка ва аьзиятариан чІигъар апІура; думу бицІир апІуз ктІерццуз хъюгънайи.
3 Завариин жара лишанра арайиз гъюру: зурба цІаси уьру аждагьа, ургуб кІул али, йицІуб кІарч али ва кІулариин ургуб таж али. 4 Дидин рижвну зав’ан шубубпи пай хядар илжикуру ва жилиинди ахьру. Аждагьа, бицІир апІурайи дишагьлийиз къаршуди дугъу бицІир гъапІубси, итІуз ккепІну дийибгънайи. Дугъу бай гъапІу. Думу Бали рукьан чумакъихьди вари халкьариин гьюкум гъабхиди. Дугъан бицІир Аллагьдихьна, Дугъан тахтнахьна гъахуру. 6 Хъа дишагьли ичІи чюлиз гьергру. Душваъ дугъаз Аллагьди йишв ккабалгнайи. Дина дугъаз агъзурна кьюдваржна йирхьцІур йигъан хураг гъабхиди.
7 Хъа завариин Мукаил малайикдина дугъан малайикари аждагьайихъди дяви ккебгъру. Аждагьайи дяви чан малайикар хъади апІурайи, 8 хъа дурарихьан гъалиб хьуз гъабхьундайи ва завариъ дидин йишв гъудубгнийи. 9 Хъасин зурба аждагьа, дегь заманайин битІ, иблис вая Сатана, вари дюн’я улдубгуз гъибтрайиб, завариан жилиина ипнийи. Дидихъди чан малайикарра идирчнийи.
10 Хъа узуз аьршариъ гьамци кІури зурба дих гъеебхьзуз:
«Магьа хъубкьна уьрхювал ва кьувват,
васана ич Аллагьдин Паччагьлугъ, ва Дугъан ччим Кадатнайирин гьюкум,
гьаз гъапиш ихь чвйирин футнакар идипну,
Аллагьдин улихь йишвди-йигъди дурарилан футнийир апІурайиб.
11 Ихь чвйир аждагьайиин,
Ччилан ифдиинди
ва чпин шагьидвалариинди гъалиб гъахьну.
Дурари аьжалин улихь чпин уьмур гьяйиф гъапІундар.
12 Гьаци вуйиган шадвалин сес ипай, аьршар ва душван агьлар!
Язухъ ву жилин ва гьюлин!
Учвухьна яман хъял ади,
чан вахт хъубкьнайиб аьгъяди, иблис дуфна».
13 Аждагьайиз учв жилиина илдипну гъябкъиган, думу бай гъапІу дишагьлийихъ хъебгру. 14 Дишагьлийиз чаз ичІи чюлиъ улупнайи йишваз, аждагьа дяргърушваз ва шубуд йисна гьацІаъ хураг хрушваз тІирхуз, люкьран кьюб аьхю хлинцц тувру. 15 Дишагьлийин кьяляхъди, думу ккахъбан бадали, аждагьайи чан ушвниан зурба нир деебтуру. 16 Хъа жили дишагьлийиз кюмек апІуру: диди чан ушвар арццру ва аждагьайи чан ушвниан деебту нир убхъуру. 17 Аждагьайиз дишагьлийикан яман хъял гъюру ва думу гъитну, дугъан имбу бицІидарихъди, Аллагьдин табшуругъар уьрхрударихъди ва Исайикан шагьидвал апІрударихъди дяви гъабхуз гъябгъюру. [18] Хъа аждагьа гьюлин гъирагъдихъ дугъубжвуру.
13Гьюл’ан гьяйванат
1 Узуз гьюл’ан, йицІуб кІарч али, ургуб кІул али, кІарчариин йицІуб таж али, хъа кІуларик Аллагьдиз люкьнар кайи вягьши гьяйванат удубчІвури гъябкъюнзуз. 2 Узуз гъябкъю вягьши гьяйванат леопарддиз ухшар вуйи, хъа ушв – асландинсиб. Аждагьайи дидиз чан кьувват, тахт ва зурба гьюкум тувнийи. 3 Дидин кІуларикан сабнубдиз йибкІрубсиб зиян дубхьну рябкъюйи, аммаки думу зиян сагъ гъабхьнийи, ва вари дюн’я, мюгьтал дубхьну, гьадму вягьши гьяйванатдихъди гъубшнийи. 4 Хъа адмийири, аждагьайи чан гьюкум вягьши гьяйванатдиз тувиган, дидиз икрам гъапІу, хъасин, гьамци кІури, дурари вягьши гьяйванатдизра икрам апІуру: «Фуж шулу гьаму гьяйванатдихь тевуз, шлихьан шул мидихъди элегуз?»
5 Дидиз, дамагъ кайи ва Аллагьдиз люкьнар апІру гафар пуз, ихтияр тувнайи ва дидиз гьюкумра ягъчІвурна кьюд йигъаз тувнайи. 6 Диди Аллагьдиз люкьнар апІуз чан ушв абццру – люкьнар Дугъан ччвурназ, Думу яшамиш шулайишваз ва Аьршарин агьлариз апІуру. 7 Дидиз Аллагьдин гирами халкьдихъдира дяви гъабхуз ва гъалиб хьуз ихтияр тувнайи. Дидиз гьацира гьарсаб тухмин, халкьдин, чІалнан ва миллетдин зиин гьюкум тувнайи. 8 Дюн’я арайиз хайиз гъурбан апІуз гьязурди айи Ччилахь хьайи уьмрин китабдик ччвурар ктру жилин вари адмийири дидиз икрам апІиди.
9 Шлик ерхьру ибар каш, гъит ебхьри!
10 Шли йисирар дисураш, думу учв йисирди дисиди.
Шли ханжли йикІураш, думу учв ханжлихьан йикІиди.
Гьамдиинди Аллагьдин гирами халкьдиз чпин мюгькамвал ва хъугъувал уьбхюз дих апІура!
Жилиан гьяйванат
11 Хъасин узуз жилиан удубчІвурайи жара вягьши гьяйванат гъябкъзуз. Дид’ин, Ччил’инси, кьюб кІарч алийи, амма диди аждагьайиси гафар апІуйи. 12 Дидиз сабпи вягьши гьяйванатдинсиб гьюкум тувнайи. Диди сабпи вягьши гьяйванатдиз варибдиъ кюмек апІуйи. Диди дюн’яйиин вари адмийирихьди йибкІрубсиб зиян сагъ дубхьнайи сабпи вягьши гьяйванатдиз икрам апІуз гъитуйи. 13 Диди зурба аьламатар улупуйи: адмийирин улихь завариан жилариина цІа гъюз гъитуйи. 14 Сабпи вягьши гьяйванатдин ччвурнахъан аьламатар улупури, диди дюн’яйин адмийир улдугуз гъитуйи. Диди ханжал йивну зиян гъапІу ва, хъана сагъ гъабхьи сабпи вягьши гьяйванатдин гьюрматназ сурат балгуз, буйругъ гъапІу. 15 Гьадму суратну гафар апІбан ва диди чаз икрам дарапІрудар йихбан бадали, вягьши гьяйванатдин суратниин ил алапІнийи; дидиз гьаци ил алапІуз удукьрувал тувнайи. 16 Диди варидариз: гъулугъчйириз ва гъулугънахь хьтрудариз, девлетлуйириз ва касибариз, лукІариз ва азаддариз – арччул хлик, ясана унтІак лишан капІуз гъитуйи. 17 Дициб лишан (вягьши гьяйванатдин ччвур, ясана число) кадрурихьди мутму я гъадабгъуз, я масу тувуз гъитри гъахьундар. 18 Мушваъ аькьюл лазим ву: фикирлу кас гъит, вягьши гьяйванатдин числойиъ айи мянайин гъаври ахъри. Думу число адмийиринуб ву, магьа дидин число: 666.
14Сион дагъдиин цІийи мяъли
1 Хъа узуз гъяркъюнзуз: магьа, Сион дагъдиин Ччил дийигъна, Дугъахъди – гьадму варжна ягъчІвурна юкьуд агъзур, унтІ’ин Исайин ччвур ва Дугъан Адашдин ччвур дидикІнайидар.
2 Хъа узуз завариан, ягъли гъарзарилан убсрайи нирин гъугъсиб ва завар рахбан гъугърумарстар дихар гъеерхьунзуз. Узуз гъеерхьу дихар гьацдар, мукьмар йивурайи чюнгринстар вуйи.
3 Дурари тахтнан улихь ва юкьрид гьяйванатарстаринна къарна юкьур аьхюдарин улихь цІийи мяъли апІурайи. Думу мяъли, дюн’яйин тухмигъян гъядягънайи гьадму варжна ягъчІвурна юкьуд агъзур касдихьантІан гъайри, сарун гьич сарихьанра кІваъланди дубгъуз шулдайи.
4 Дурар дишагьлийирихъди чиркин дархьидар, хъа чпин марццишин гъюбхдар ву; дурар, Ччил наанди гъушиш, Гьадгъахъди гъягърудар ву. Дурар имбу инсаниятдигъян гъядягънайидар ву. Дурар Ччилаз ва Аллагьдиз бин ва ккебгъувал вуди кадагънайидар ву. 5 Дурарин мелзназ кучІал аьгъдайи, дурар кацІдар дар.
Шубур малайик
6 Хъасин узуз, аьршарикк, гьаргандин Ужувлан хабар хьади, жилариин гьарсаб миллетдиз, тухмиз, чІалназ ва халкьдиз дидкан хабар дебккри, тІирхурайи жара малайик гъяркъюнзуз. 7 Дугъу аьхю дихниинди гьарай гъапІу:
«Аллагьдихьан гучІ апІинай ва Дугъан ад за апІинай!
Гьаз гъапиш Дугъу суд апІру сяаьт хъубкьна!
Гьаддиз зав, жил, гьюл ва булагъар яратмиш ГъапІуриз икрам апІинай!»
8 Сарсана, кьюрпи малайикра, сарпирин кьяляхъди тІирхури, гъафи ва гьарай гъапІу:
«Ккадабхъну, ккадабхъну, ккадабхъну Вавилон,
машгьур меркез,
чан кьяппавалин чяхрихьди вари халкьар тухъ гъапІу шагьур!»
9 Сарсана, шубурпи малайикра, кьюрпирин кьяляхъди, зурба дихниинди чІигъар апІури, гъафи:
«Эгер шли вягьши гьяйванатдиз ва дидин суратназ икрам апІураш ва хил’ин, ясана унтІ’ин дидин лишан капІнаш, 10 гьадгъу Аллагьдин хъял айи зах’ан фукІа кпибикьди гьязур гъапІу чяхир убгъиди. Дицирикан, цІиъ ва гугуртдиъ, гирами малайикарин ва Ччилан улихь, зивзивар кчІюкьиди.
11 Дурарикан кчІюкьюрайи зивзиварин кум гьаргандиз аьсрариан аьсрариз завариз удубчІвура. Я йигъну, я йишвну сикинвал адар вягьши гьяйванатдиз, дидин суратназ, ва дидин ччвурнахъ лишан жандиин алапІнайидариз». 12 Гьамдиинди Аллагьдин гирами халкьдиз, Аллагьдин табшуругъар тамам апІурайидариз ва Исайиз аьгьтлу вуйидариз мюгькам хьуз дих апІура.
13 Мидхъан узуз завариан гьамци кІурайи дих гъеебхьзуз:
«БикІ: „Хушбахтаврар ву, Иса Месигьдихъ хъугъну, гъийихдар“, „Ав, думу гьаци ву, – кІура Рюгьну, – дурари, чпин гъагъишнариккан ккудучІвну, рягьятвал гъадабгъура, гьаз гъапиш дурари гъапІу ляхнар гьадрарихъди гъягъиди“».
Хъугъувалин иган
14 Ва магьа узуз лизи диф гъябкъзуз, хъа дифриин фуж-вуш Инсаниятдин Бализ ухшар алир деъна. Дугъан кІул’ин гъизилин таж ал, хъа хилиъ учІру дагьур а. 15 Хъа сарсана малайик Аьршарин хул’ан дифриин деънайириз аьхю дихниинди чІигъ апІури, удучІву:
«Яв дагьур гьапІ ва убг!
Гьаз гъапиш иган убгру вахт хъубкьна –
дюн’яйин мягьсул хъубкьна!»
16 Дифриин деънайири, хил хъапІну, чан дагьур жилиина гатІабхьуру, ва жилин вари иган дубгну шулу.
17 Хъасин Аьршарин Хул’ан жара малайик удучІвуру, дугъахьра учІру дагьур хьайи.
18 Сарсана цІин аьхювал хьайи малайикди, гъурбнар ургрушвлан гъедергну, учІру дагьур хьайи малайикдиз аьхю дихниинди кІуру:
«ГьапІну яв дагьур,
дюн’яйиин али тІумтІарин багъдиан
тІумтІарин кабар ккудутІ,
гьаз гъапиш дурар хъуркьна».
19 Малайикди чан дагьур дюн’яйиинди гатІабхьуру ва тІумтІар ккудутІуру, хъасин дурар, Аллагьдин хъял айи кчІюкьрушвазди ахьру. 20 Хъа кабар шагьрин гъирагъдихъ, ликариккан апІури, кчІюкьюру, ва кчІюкьрушван даргарилан ифи улдубзуз хъюбгъру. Удубзу ифди, дийибгънайи гьяйвнин фурийиккнакьан ягъалди, юкьуб аьтраф шубудварж километрин манзилназ жил алабцІуру.
15Ургур малайик ургуб бедбахтвал хьади
1 Хъасин завариин узуз сабсана зурба ва аьжайиб лишан гъябкъюнзуз: ургур малайикдихь ургуб аьхиримжи бедбахтвал хьа. Гьамрариинди Аллагьдин хъял ккудубкІурайи. 2 Узуз цІихьди дибикьнайи гюзгдиз ухшар али гьюл гъябкъзуз. Гьадму гюзгдин гьюлихъ вягьши гьяйванатдиин, дидин суратниин ва дидин ччвурнан числойиин гъалиб гъахьидар дугъужвнайи. Дурар Аллагьдин чюнграр хьади дугъужвнайи. 3 Дурари, Аллагьдин гъуллугъчи Мусайин мяъли ва Ччилан мяъли апІурайи:
«Зурба ва аьжайиб вуяв ляхнар, Агъа Аллагь, вари хилиъ Дибиснайир!
Дугъри ва гьякь вуяв рякъяр, халкьарин Паччагь!
4 Шлиз, Агъа, Увхьан гучІ хьибдар,
ва шли Яв ччвур адлу апІидар?!
Гьаз гъапиш Уву сар вува, Гирамир!
Ва Яв улихь дахьди икрамназ!
Гьаз гъапиш Яв гьякьвал ачухъ гъабхьну!»
5 Хъасин узуз гъябкъюнзуз: завариъ Аллагьдин Хал ачмиш дапІну – Шагьидвалин Чадур, 6 хъа душв’ан, ургуб бедбахтвал хьади, ургур малайик удучІву. Дурариин марцци крабчІру палат алийи ва дурари юкьв’ан гъизилин чІулар идитІнайи. 7 Гьадму юкьрид гьяйванатарстарикан сари ургрид малайикарихьна, аьсрариан аьсрариз яшамиш шулайи Аллагьдин хъюлу ацІнайи ургуб гъизилин гъаб туву. 8 Хъа, Аллагьдин адлувалиан ва Дугъан кьудратнаан кумрахьди Аьршарин Хал абцІру. Душвазди, сабан ургрид малайикарихь хьайи ургуб бедбахтвал ккудудукІкьан гагьди, гьич сарихьанра учІвуз гъабхьундайи.
16Аллагьдин хъял айи зах
1 Хъасин узуз, Аьршарин Хул’ан аьхю дихниинди ургрид малайикариз кІурайи дих гъеебхьунзуз:
«Гъарахай, ургуб гъабраъ айи Аллагьдин хъял дюн’яйиина удубзай!»
2 Сарпир удучІвну, дюн’яйиина чан гъаб удубзуру ва бухь ккайи учІвру ва мурдал зийнар хуру. Дурар вягьши гьяйванатдин лишан кайи ва дидин суратназ икрам апІру адмийириин алаънийи.
3 Кьюрпири чан гъаб гьюлериинди удубзуру, ва шид майтин ифдиз илтІибкІуру – вари гьюлиъ айи чІивишин йибкІуру.
4 Шубурпири чан гъаб нирариинди ва булагъариинди удубзуру, ва дурарра ифдиз илтІикІуру. 5 Хъа штарин малайикди гъапиб гъеебхьзуз:
«Уву гьякь вува,
эй Айир,
Гъахьир
ва Гирамир,
гьамци жаза гьадабтІбаз:
6 дурари гирамидарин ва пайгъамбрарин
ифи удубзну,
гьаддиз Уву
дурариз убхъуз
ифи тувунва –
дурар лайикь ву!»
7 Хъа узуз, гъурбнар ургру йишвура фици кІуйиш гъеебхьзуз:
«Ав,
Агъа Аллагь,
вари хили Дибиснайир,
дугъри ва гьякь ву
Яв адабтІурайи жаза!»
8 Юкьурпири чан гъаб ригъдиинди улубзуру, ва ригъдиз чан цІиинди адмийир ургуз гъитру кьувват тувру. 9 Яман убцрушнаан адмийир ургуйи ва гьацдар бедбахтвалар гьау Аллагьдин ччвурназ агьрар апІуйи. Аммаки дурар, чпин тІулар гъитну, швумал гъахьундайи ва Дугъан ад гъапІундайи.
10 Хьурпири чан гъаб вягьши гьяйванатдин тахтниинди удубзнийи ва дидин паччагьлугъ мучІушнаъ абхънийи. Адмийири, иццрушнаан чпин мелзариин кьацІар алахьуйи, 11 ва бедбахтваларна иццрушнар гьаъну кІури Аьршарин Аллагьдиз агьар апІуйи. Аммаки дурари чпин тІулар дирчундайи, я гардандиъ гъидисундайи.
12 Йирхьурпири чан гъаб машгьур нир Ефратдиинди удубзуру ва дидиъ айи шид, ригъ гьудубчІвру терефариъ айи паччгьариз рякъ ачмиш хьуз, ебццуру. 13 Узуз, аждагьайин ушвниан, вягьши гьяйванатдин ушвниан ва кучІлин пайгъамбрин ушвниан чру гъюбариз ухшар айи шубуб чиркин рюгьяр удучІвури гъяркъзуз. 14 Мурар, аьламатар улупру жинарин рюгьяр ву: дурар, Аллагьдин, вари хилиъ Дибиснайирин зурба гъиямат йигъаз дявдиз гьязур йихьай кІури, дюн’яйин вари паччгьарихьна гъягъюру.
15 «Магьа, Узу тІафалси, хабарсузди гъидиза. Хушбахтавар ву ккилигурайир ва чан палтар уьрхюрайир, дицир гъяцІалди гъягъидар, ва гьич саризра дугъан аьйибнан йишвар рякъидар!»
16 Ва дурари паччгьар жугьуд чІалниинди Армагедон кІуру йишв’ина уч апІуру.
17 Хъа ургурпи малайикди чан гъаб гьавайизди удубзуру. Аьршарин Хулаъ, тахтнахьан гьамци кІурайи зурба дих гъюру: «Тамам гъапІну!»
18 Хъа кьюркьлин цІйир, гьарйир, гъугърумар ва жилар тІурччвувалар шулу. Гьамкьан яманди жилар тІурччвувал дюн’яйиин адми гъахьихъанмина гъахьундайи. 19 Машгьур вуйи шагьур шубуб йишваз гъутІубкІнийи, Аллагь гьясбикк ккадрурарин шагьрар ккадахьнийи. Машгьур вуйи Вавилон кІуру меркез Аллагьди кІваин гъапІнийи ва дидиз Дугъу Чан пис хъял айи чяхрин зах тувнийи. 20 Хъа вари островар гъудургнийи, дагълар дихъури имдайи! 21 Завариан адмийириина йирхьцІур килакьан айи мирккар гъургънийи. Гьамциб миркклин бедбахтвал гьапІу Аллагьдиз адмийири хъа яман агьрар апІуйи, гьаз гъапиш му бедбахтвал гизаф аьхюб вуйи!
17Вавилондин суд
1 Ургуб гъаб хьайи ургур малайикдикан сар узухьна гъафнийи ва узухъди гъулхнийи:
«Лиг, фициб жазайиз ккилигураш гизаф нирариин али Машгьур Кьяппа. 2 Дюн’яйин паччгьари дугъахъди кьяппавал гъапІнийи, ва дугъан кьяппавалин чяхрихьди дюн’яйин адмийир тухъ гъахьнийи».
3 Хъасин узу Гирами Рюгьну ацІнийзу ва ичІи чюлиз гъухнийзу. Узуз душваъ, Аллагьдиз дидикІнайи люкьнарихьди алабцІнайи уьру вягьши гьяйванатдиин деъну, дишагьли гъяркъзуз. Думу вягьши гьяйванатдиин ургуб кІул ва йицІуб кІарч алийи. 4 Дишагьлийиин лап уьру ва ал рангнан палат алийи. Дугъан къашкъамат гъизилиинди, багьа гъванариинди дабалгнайи. Хилиъ дугъу чан кьяппавалин чиркишнари ва аьйибну абцІнайи гъизилин зах дибиснайи. 5 Дугъан унтІ’ин жини сир айи гьамциб ччвур дибикІнайи: «Вавилон – машгьур меркез, дюн’яйин аьйибнанна кьяппаваларин дада».
6 Узуз думу дишагьли, Аллагьдин халкьдин ифи ва Исайикан шагьидвал апІрударин ифи дубгъну, пиян духьну, гъяркъзуз. Узуз думу гъяркъиган, гъах гъахьир, узу йиз фикрихъна гъюрадайза. 7 Малайикди узуз гъапи:
«Уву гьаз мюгьтал гъахьива? Узу увуз дишагьлийикан ва думу элеъну гъягъюрайи, ургуб кІулна йицІуб кІарч али вягьши гьяйванатдикан сир ктибтидизавуз. 8 Увуз гъябкъю вягьши гьяйванат саб вахтна айи, хъа думу сарун имдар. Гьамус, багарихьди думу, кІан ккадрушв’ан аьжал хъудубкьнайиб, удубчІвиди. Дюн’я халкь апІайиз Уьмрин китабдик ччвурар дидикІну адру дюн’яйин вари адмийир, думу вягьши гьяйванат гъябкъиган, мюгьтал хьиди, гьаз гъапиш саб вахтна думу айи, хъа гъудубгнийи, хъа гьамус хъана ачмиш хьибди. 9 Мушваъ гъавриъ ахъуз фагьум ва аькьюл лазим ву. Ургуб кІул – мурар, дишагьли деънайи ургуб тепе ву. 10 Дурар (ургуб кІул) – ургур паччагь ву; гьамусдиз хьур гъийихну, сар ими, хъа имбур мегьел дуфнадар, ва, думу гъафиган, дугъан думукьан йигъар хьидар. 11 Фила-вуш чІивиди айи вягьши гьяйванат, гьам сяаьтна дубкІнайиб – му гьадму ургур паччгьарси миржирпи паччагьра ву, думу чан аьжалнахьна гъяра. 12 Увуз гъяркъю йицІуб кІарч, мегьел паччагьвал ккубкьнадру паччгьар ву, амма дурариз вягьши гьяйванатдихъди сатІиди цІиб вахтназ паччагьвал ккубкьди. 13 Дурарин сабстар метлебар ву, думу паччгьари чпин кьувватна гьюкум вягьши гьяйванатдихьна тувди. 14 Дурари Ччилахъди дяви гъабхиди, Ччил дурариин гъалиб хьиди, гьаз гъапиш Думу агъйирин Агъа ва паччгьарин Паччагь ву. Дугъахъди сатІиди, Чав дих дапІнайидар, Чав кадагънайидар ва Дугъахъ хъугърайидар, аьгьтлу вуйидар хьиди».
15 Хъа малайикди узуз гъапи:
«Увуз рякъюрайи Кьяппа деънайи нирар – мурар халкьар, адмийирин аьхю гъварчар, миллетар ва чІалар ву». 16 Увуз гъябкью йицІуб кІарчназ ва вягьши гьяйванатдиз думу Кьяппа даккун хьиди ва дугъхьан вари девлет тадабгъну, фукІа илимдарди гъяцІал апІиди. Дурари дугъан жандак ипІиди ва цІигъ убгиди. 17 Гьамци дурарихьди апІуз гъитур Аллагь ву. Агъайин ният гьациб вуйи. Аллагьди, Чан гафар тамам хьайизкьан, дидин хилиз гьюкум гъюз гъитнайи. 18 Хъа увуз гъяркъю дишагьли – му вари дюн’яйин паччгьарин зиин паччагьвал гъабхурайи зурба ва машгьур шагьур ву.
18Вавилон ккадабхъуб
1 Хъасинси узуз завариан гъюрайи, хилиъ зурба гьюкум айи жара малайик гъяркъзуз. Дугъан адлувалиан жил нурлу гъабхьнийи. 2 Дугъу кьудратлу дихниинди гъапи:
«Ккадабхъну, ккадабхъну машгьур меркез Вавилон!
Думу шейтІнар диргрушв ва гьар бабат чиркин рюгьярин мугъара,
гьар бабат чиркин жакьварин мукь,
гьар бабат чиркин ва хяви вягьши гьяйванатарин макан ву;
3 гьаз гъапиш думу кьяппайи чан кач’валин яман чяхир вари халкьарихьди убгъуз гъитнийи;
дугъахъди дюн’яйин вари паччгьари кьяппавал гъапІнийи;
дугъан хазнайин кьадар адрувалилантина ариш-веришчйири чпиз девлет уч гъапІнийи».
4 Хъа узуз завариан кІурайи жара дих гъеебхьзуз:
«Йиз халкь,
дугъан гунгьарин иштракчйир учву дархьбан бадали
дугъан бедбахтвалар учвук ктрукІбан бадали,
дугъхьан ярхла йихьай.
5 Гьаз гъапиш дугъан гунгьар завариккна ккудукьна,
ва Аллагьди дугъан алчагъ ляхнар кІваин алаура.
6 Гьаддиз дугъаз,
дугъу учвуз гъапІуб апІинай,
кьюб ражари артухъ дугъан ляхнариз кьимат тувай;
кьюб ражари артухъ ижми чяхир дугъан захаъ убзай!
7 Дугъан фукьан ад ади ва дугъу фукьан кефер апІури гъахьнуш,
гьадмукьан аьзабар ва дерд тувай дугъаз!
Гьаз гъапиш дугъан кІваан гьаму гъябгъюра:
„Узу падишагь-ханумси деъназа,
узу ачІнир дарза ва дерд узуз гъябкъюндарзуз!“
8 Магьа гьаддиз, сабхилди дугъ’ина бедбахтвалар гъиди: аьжал, дерд, гаш’вал,
гьацира думу цІигъ ургиди.
Гьаз гъапиш, дугъан суд гъапІу Агъа Аллагь
кьудратлу ву».
9 Дугъак кабхъну цІана кум гъябкъиган, дугъахъди алчагъ’валариъди ва гъизилиан идиргъури яшамиш гъаши дюн’яйин паччгьар дугъахъ ишиди ва дердер зигиди. 10 Дугъан аьзабариз гъирагъдихъ дийигъну лигури ва гукІнишну гъадагъну, дюн’яйин паччгьари пиди:
«Язухъ вуда, язухъ вуда яв, эй Вавилон,
машгьур вуйи меркез, кьудратлу вуйи меркез.
Саб гагьди ув’ина яв кьазйир гъафида!»
11 Ариш-вериш апІрударра дугъахъ ишуйи ва гъам зигуйи, гьаз гъапиш сарун дурарин мутмйир: гъизилин, арсран, багьа гъванарин ва жемчугдин, назук ирин, къириб-жюржюрин, шелкдин ва ал рангнан парчйирин, лимондин гьарарин гъагъар; флин кІурбин гьаржюре шей’арин ва багьа гакІвликан, бронзайикан, рукькан ва мармардашдикан ктау гъабарин гъагъар; хурагнак кахьру гьарарин гъеерццу галарин, гъеерццу укІарин, ицци ниар хъайи ччимарин, мирра ва ладан аьтрарстар ягъарин; чяхрарин, оливкйирин ва ччимарин, уччвуди гъярягъю хюйин, дяхнарин, йицарин ва марччарин, гьяйвнарин, аьрабйирин, лукІарин гъагъар сарира гъадагъури имдайи.
14 «Яв кІван тямягь хъайи йимишар сарун увуз имдар;
яв нурлувал ва девлет вари пуч гъабхьну.
Сарун гьич зат дурар увухъ хьидар!»
15 Гьамцдар мутмйириинди ариш-вериш апІрудар ва Вавилондин падишагь-ханумдилантина девлетар уч гъапІдар, дугъан аьзабар гъяркъган, мяхъ кивну, гъирагъдихъ дийигъиди ва дурари, ишури, жан гъадабгъури, 16 пиди:
«Язухъ вуда, язухъ вуда, машгьур меркез,
назук ирин палатдиъ убчІвнайиб,
лап уьру ва ал рангнан парчйириъ айиб,
гъизилин, багьа гъванарин ва якьут-мержандин нур туврайи шагьур!
17 Фициб девлет саб гагьди пуч гъабхьундарин!»
Хъа вари гьюлериин гимйир хъаърудар, вари гимйириъ айидар, вари гимйириин ляхин апІурайидар ва вари гьюлериин чпиз девлетнахъ хъайидар гъирагъдихъ дийигънийи, 18 ва дурари, меркездик кабхъу цІин кумрахьинди лигури, ишларин гьарайниинди кІуйи:
«Фу тевуз шул машгьур меркездихь?» 19 Хъасин дурари чпин кІулариин дерднаан рюкъ алабхьуйи, хъа, ишури, гьарай илипуйи:
«Язухъ вуда, язухъ вуда яв, машгьур меркез!
Гьюл’ин гимйир хъаърайидар
вари гьамгъан девлетналан арбаб гъахьну.
Саб гагьди душв ичІи чюлиз илтІибкІну!»
20 «Аммаки уву, зав, шадвал хъапІ!
Шадвал хъапІай, гирамидар, вакилар ва пайгъамбрар,
дугъу учв’ан удубзу ифдилантина
Аллагьди дугъаз завал гъядябхъюз гъитну!»
21 Хъасин кьудратлу малайикди, рягънин ахалсиб зурба гъван гъадабгъну, гьюлизди гатІабхьну, кІуру:
«Гьамциб кьувватниинди илдипну Вавилон,
машгьур меркез!
Думу сарун арайиз гъибдар!
22 Мукьмарин сесер сарун хьидар,
саризра ерхьидар чюнгюр йиврудар,
швутІрам ва зурна йиврудар.
Я шей’ар апІрудар,
я шей’ар апІрушвар
сарун увуъ хьидар.
Рягъярин ахларин сесер
сарун саризра ерхьидар.
23 Шагьриъ акв апІру алатдин акв
сарун саризра рябкъидар.
Швушв хурайиринна швушван сесер
сарун саризра ерхьидар.
Гьаз гъапиш, яв ариш-вериш гъабхрудар дюн’яйиъ зурба касар вуйи;
гьаз гъапиш, вари халкьар уву яв тІилисимдиинди кучІлин рякъюхъна гъахунва;
24 гьаз гъапиш, пайгъамбрарин ва гирами касарин ифи,
дюн’яйиин вари йивну гъийихдарин ифи
гьаму шагьриъ а!»
19Халкьди аьршариъ Аллагьдиз мяълийир апІура
1 Хъасин узуз аьршариъ зурба гъварч адмийирин шадвалин гьарайнан гъугъ гъеебхьунзуз:
«Аллилуя!
Уьрхювал, ад ва кьудрат
ихь Аллагьдихь хьа,
2 гьаз гъапиш, дугъридар ва гьякьлудар ву Дугъан жазйир:
Дугъу Машгьур Кьяппайин, диван гъапІну,
вари дюн’яйиин чан алчагъвал артмиш гъапІиган;
Дугъу дугъаз,
Чан лукІарин ифдиз дилигну,
жаза адабтІну!»
3 Хъанара адмийирин гъварчну гьарай гъапІу:
«Аллилуя!
Думу алчагърин кум аьсрариан аьсрариз завариз удубчІвури хьибди!»
4 Къарна юкьур аьхюр ва юкьрид гьяйванатарстар, Аллагьдиз икрам апІури, тахтниин Деънайирин улихь гьамци кІури, жилиина ис ахьу:
«Амин! Аллилуя!»
5 Ва тахтналан гьамци кІурайи дих гъабши:
«Ихь Аллагьдин тяриф апІинай,
вари Дугъан гъуллугъчйир,
вари Аллагьдиз гьюрмат апІрудар,
цІиб вуйидар ва машгьур вуйидар!»
6 Узуз адмийирин зурба гъварчнан гъугъ, ясана урсрайи штарин гъугъ, ясана кьудратлуди завар рахурайи гъугърумарин гъугъсиб дих гъеебхьунзуз:
«Аллилуя! Агъа, ихь Аллагь,
вари хилиъ Дибиснайир, паччагьди дийигъну!
7 Шад хьидихьа ва шадвалин гьарай ипдихьа,
Дугъан ад за апІидихьа,
гьаз гъапиш Ччилан сумчир а!
Дугъан швушв гьязур духьна:
8 швушваз назук ирин нурлу ва марцци палат тувна!
Назук ир – му Аллагьдин гирами халкьдин гьякь ляхнар ву».
9 Хъасин малайикди узуз кІуру:
«БикІ: „Хушбахтаврар ву Ччилахьна сумчрин гешт хъапІуз дих дапІнайидар!“
Ва, давам апІури, малайикди гъапизуз:
„Магьа Аллагьдин гьякь гафар!“»
10 Узу, му малайикдиз икрам апІарза кІури, дугъан ликариккна ис алахъза, хъа дугъу узуз гъапи:
«Лиг, мици мапІан! Узура, увуси ва яв гъардшарси, Исайикан шагьидвал апІурайи лукІ вуза! Аллагьдиз икрам апІин! Гьаз гъапиш гьаму пайгъамбарвалин гафарин мяна Исайикан шагьидвал апІуб ву».
Лизи гьяйвниин элеънайир
11 Хъасинси узуз зав атІабццну гъябкъзуз: магьа лизи гьяйван ва дид’ин Элеънайир. Дугъаз Дугъри ва Гьякь Кас кІуйи, Дугъу гьякь’валиинди дяви ва суд апІуру. 12 Дугъан улар убгурайи цІаси ву, Дугъан кІул’ин гизаф тажар ал. Дурарик, Дугъаз ЧазтІан гъайри, саризра аьгъдру ччвур дибикІна. 13 Дугъ’ин ифдик кипнайи валжагъ алийи. Дугъан ччвур: «Аллагьдин Гаф» вуйи. 14 Лизи гьяйвнариинди, назук ирин лизи ва марцци палат алди, Дугъахъди аьршариан кьушум хъайи. 15 Аллагьдин Гафнахъ хътругърудар пуч апІуз Дугъан ушвниан учІру ханжал удубчІвурайи. Дугъу дурар рукьан чумакъикк ккаъди: Дугъу чяхир кчІюбкьрушваъ Аллагьдин, вари хили Дибиснайирин, яман хъялнан чяхир кчІюбкьюра. 16 Дугъан валжгъиин ва жвукьриин «паччгьарин Паччагь ва агъйирин Агъа» ччвур дибикІнайи.
17 Узуз, ригъдиин дийигъну, заварикк тІирхурайи вари жакьвариз зурба дихниинди чІигъ апІурайи малайик гъяркъзуз:
«Эй, гьамина, Аллагьдихьна, хябяхъдин машгьур хураг ипІуз уч йихьай! 18 Паччгьарин, кьушмарин аьхюдарин, кьудратлударин, гьяйвнарин ва дурариин элеънайидарин, лукІарин ва азадкрарин, цІиб ва зурба вуйидарин жандкарин йикк ипІидичва».
19 Хъа узуз, лизи гьяйвниин Элеънайирихъдина Дугъан кьушмарихъди дявдиз удубчІвнайи вягьши гьяйванат гъябкъзуз. 20 Вягьши гьяйванатна кучІлин пайгъамбар гъидису. КучІлин пайгъамбри вягьши гьяйванатдин гьюрматназ аьламатар улупуйи. Дугъу гьадму аьламатариинди вягьши гьяйванатдин лишан капІнайидар ва дидин суратназ икрам апІурайидар алдатмиш гъапІнийи. Дурар кьюридра чІивиди имиди убгурайи гугуртдин дагриъ ирчу. 21 Имбудар лизи гьяйвниин Алирин ушвниан удубчІвурайи ханжлихьди гъийихнийи, ва вари жакьвар дурарин майтарин йиккарихьди ацІнийи.
20Агъзур йис
1 Хъа гьадмуган, кІан ккадрушван ачар хьади ва хилиъ аьхю зунжур ади, завариан гъюрайи малайик гъяркъзуз. 2 Дугъу аждагьа, дегь заманайин битІ, яни иблис вая Сатана, дибисну агъзур йисазди йибтІну, 3 кІан ккадрушвазди ипру ва, халкьар алдатмиш дарапІбан бадали, агъзур йис гъябгъяйизкьан, хъябкьну, зиълан печать йивуру. Хъасин думу сацІиб вахтназ деебтуб лазим вуйи.
4 Хъа узуз, суд апІуз гьюкум тувнайидар деънайи тахтар ва, Исайикан шагьидвал дапІну ва Аллагьдин Гафналантина ккахъну, кІулар алдатІу рюгьяр гъяркъзуз. Мурар вягьши гьяйванатдиз, я дидин суратназ икрам дарапІдар ва унтІ’ин, ясана хил’ин дидин лишан капІуз гъидритдар ву. Дурар чІиви гъахьнийи, ва дурари Месигьдихъди агъзур йисан паччагьвал апІиди. 5 Хъа имбу дийихнайидар, агъзур йис гъябгъяйиз, чІиви хьидар. Му сабпи чІиви хьувал ву. 6 Хушбахтаврар ва гирамидар ву сабпидарди чІиви гъашидар! Мурарин зиин кьюбпи аьжализ гьюкум адар. Дурарикан Аллагьдин ва Месигьдин гъуллугъчйир хьиди, ва дурари Гьадрарихъди агъзур йисан паччагьвал апІиди.
Иблисдиз жаза
7 Агъзур йис гъубшиган, иблис дустагъдиан деебтиди, 8 ва диди, дюн’яйин юкьуб терефназ дубшну, яни Гогдинна Магогдин йишвариз дубшну, халкьар алдатмиш апІури, дурар дявдиз уч апІиди. Дурарин кьадар гьюлихъ гъумкьан ву. 9 Вари жил дибисну дуфну, дурари Аллагьдин гирами халкьар айишв ва Аллагьдин ккуни шагьур кьялаъ тІапІу. Хъа, завариан цІа дубгъну, Иблисдин кьушум вари тІанкь гъапІу. 10 Дурар алдатмиш гъапІу Иблис гугурт убгурайи цІин дагризди – вягьши гьяйванатна кучІлин пайгъамбар айи йишвазди – ипру. Дурарикан йишвди – йигъди, аьсрариан аьсрариз зивзивар кчІюкьюри хьиди.
Гъийихдарин суд
11 Хъа узуз, зурба лизи тахт ва дид’ин Деънайир гъяркъзуз. Дугъан машнахьан вари жил ва зав гьергнийи, дурар дихъури имдайи! 12 Узуз гъийихдар, машгьур ва цІиб вуйидар тахтнан улихь дийигъну гъяркъзуз. Китабар арццу, хъасин сабсана китаб абццу. Му Уьмрин китаб вуйи. Хъасин гъийихдарин суд, китабариъ дибикІнайиси, чпин ляхнариинди гъапІу. 13 Гьюлери чпиъ айи дийихнайидар тувнийи, аьжали ва жегьеннемди чпиъ айи дийихнайидар тувнийи, ва гьарсар касдин, чав гъапІу ляхнариз дилигну, суд гъапІу. 14 Хъасин аьжална жегьеннем цІин дагризди ирчнийи. Ари гьаму кьюбпи аьжал ву – цІа алди, убгурайи дагар. 15 Уьмрин китабдик дидикІну адрудар цІин дагризди гатІахьнийи.
21ЦІийи Ерусалим
1 Хъа узуз цІийи зав ва цІийи жил гъябкъзуз. Гьаз гъапиш сифтейин заварна жилар гьаргандиз гъудургнийи ва гьюлер сарун имдайи. 2 Узуз Гирами Шагьур – цІийи Ерусалим гъябкъзуз. Думу завариан Аллагьдихьан, жилириз ккилигурайи швушвси кабалгну, ис гъабхьнийи. 3 Узуз тахтналан кІурайи аьхю дих гъеебхьзуз:
«Магьа Аллагь дуланмиш шлу йишв,
Думу адмийирихъди сатІиди яшамиш хьиди!
Дурар Гьадгъан халкьди хьиди!
Ва Аллагь гьадрарихъди хьиди, ва гьадрариз Думу Аллагь хьиди.
4 Дугъу дурарин уларилан гьарсаб нивгъ марцц апІиди.
Аьжал сарун хьибдар,
сарун дердер, ишлар, иццрушнар хьидар,
гьаз гъапиш, муганайиздинуб вари гьаргандиз гъубшну».
5 Тахтниин Деънайири гъапи:
«Лиг, Узу вари цІийиб арайиз хураза!» Хъа гъапи:
«БикІ, му гафар вари гьякь ва дугъри ву».
6 Дугъу гъапизуз:
«Тамам гъабхьну! Узу – Альфа ва Омега, Эвел ва Аьхир вуза. Гъах духьнайириз уьмрин булагъдиккан Узу чІанади шид убхъуз гъитдиза. 7 Гъалиб гъахьириз Узхьан гьаму вари ирсди рубкьиди. Гьацириз Узу Аллагь хьидиза, хъа думу Узуз бай хьиди. 8 Хъа гучІбяхярин, масу туврударин, намуссузарин, йивну йихрударин, кьяппйирин, фалчйирин, идолариз икрам апІрударин ва вари кучІляхярин йишв цІииндина гугутдиинди убгурайи дагар ву. Му кьюбпи аьжал ву».
9 Хъасин ккудукІру ургуб бедбахтвалар айи захар хьайи ургур малайикарикан сар малайик гъюру ва узухъди улхуру:
«Лиг, узу увуз швушв улупидизавуз – Ччилан шив!»
10 Хъа дугъу узу, Гирами Рюгьну ацІнайир, зурба ягъли дагъдиина гъурху ва узуз завариан Аллагьдихьан ис шулайи Гирами Шагьур – Ерусалим улупу. 11 Думу Аллагьдин адну нурлу дапІнайи. Шагьрин крабчІурайивал багьа гъванаринсиб, яшмайихъна гъубшубсиб, хрусталси марцциб вуйи. 12 Дидлан, йицІикьюр урар алди, зурба ягъли бару илтІибкІнайи. Хъа урнарихъ – йицІикьюр малайик. Урнариин ччвурар дидикІнайи – му ччвурар Израилин баярин йицІикьюб тухмин ччвурар вуйи. 13 Шубуд урнар ригъ гьудубчІвру терефнахъинди лигурайи, шубуд – кафарийихъинди, шубуд – кьиблайихъинди, шубуд – ригъ алабхъру терефнахъинди. 14 Шагьрин цал йицІикьюб шибритІиин дивнайи. Дурариин Ччилан йицІикьюр марцци вакиларин ччвурар алийи.
15 Узухъди гафар апІурайи малайикдихь, шагьур, дидин урнар ва цалар ерцуз гъизилин маргъ хьайи. 16 Шагьур юкьуб мурччвнануб вуйи, дидин ягълишинна яркьушин саб вуйи. Малайикди маргълихьди шагьур гъеебцу ва ярхишин кьюд агъзур километртІан зиина удубчІву, хъа дидин яркьушинна ягълишин, дидин ярхивалин кьадар айидар вуйи. 17 Дугъу цал гъеебцу, дидин ягъливал, малайикди ктухубси, инсанарин гьисабариинди, йирхьцІур метр удубчІвнийи. 18 Цал яшма кІуру багьа гъвандикан дапІнайи, хъа шагьур – чаантина рябкъру шюшесиб марцци гъизиликан. 19 Шагьрин шибритІар гьамцдар гьар жюре багьа гъванарихьди дабалгнайи: сабпи багьа гъван – яшма, кьюбпиб – сапфир, шубубпиб – халцедон, юкьубпиб – изумруд, 20 хьубпиб – сардоникс, йирхьубпиб – сердолик, ургубпиб – хризолит, миржибпиб – берилл, урчІвубпиб – топаз, йицІубпиб – хризопраз, йицІисабпиб – бирюза, йицІикьюбпиб – аметист. 21 ЙицІикьюд урнар – йицІикьюб жемчугдикан, гьарсар урнар сабди вуйи жемчугдикан дапІнайи. Шагьрин кІулин кюче чаантина рябкъру шюшеси марцци гъизиликан вуйи.
22 Узуз шагьриъ Аллагьдин Хал гъябкъюндарзуз, гьаз гъапиш Учв, Агъа Аллагь, вари хилиъ Дибиснайир ва Ччил – гьадрар Чпи Хал вуйи. 23 Шагьур аку апІуз я ригъдин, я вазлин акв лазим дайи, гьаз гъапиш шагьур Аллагьдин аднахьди аку дубхьнайи, ва Ччил – дидиз акв Туврур вуйи. 24 Халкьар Дугъан аквнаъди гъягъиди ва дюн’яйин паччгьари душваз чпин заанвал хибди. 25 Дидин урнар вари йигъан арццну хьиди, хъяркьну хьидар – душваъ йишв мучІу шлуб дар. 26 Душваз халкьарин заанвал ва гьюрмат хибди. 27 ФукІара чиркинуб душвазди убчІвидар, душвазди алчагъвал ва кучІал апІрур учІвидар. Душваъ анжагъ Ччилахь хьайи Уьмрин китабдиъ дидикІнайидартІан учІвидар.
22Уьмрин нир
1 Хъасин малайикди узуз хрусталси нур туврайи уьмрин штун нир улупзуз. Думу нир Аллагьдинна Ччилан тахтнаккан ккудубчІвурайи 2 ва кІулин кючейиансина гъябгъюрайи. Нирин кьюбиб гъирагъарихъди уьмрин гьар хъайи. Дидигъ йисан йицІикьюб ражари йимишар гъиршру, гьар вазли мейва хуру, дидин кІажар халкьар сагъ апІуз вуйидар ву. 3 Мушваъ агь-суза кайибра гьич фукІара хьибдар. Гьаму Шагьриъ хьибди Аллагьдинна Ччилан тахт, ва Дугъан гъуллугъчйир Гьадгъан гъуллугънаъ хьиди. 4 Дурариз Аллагьдин маш рябкъиди, ва Дугъан ччвур дурарин машниин хьибди. 5 Душваъ сарун мучІу шлуб дар, дурариз сарун акв тувру алатдин акв, я ригъдин акв лазим хьибдар, гьаз гъапиш дурариз акв Агъа Аллагьди апІиди. Дурари паччагьвал аьсрариан аьсрариз апІиди.
6 Малайикди гъапизуз:
«Му гафар дугъридар ва гьякьлудар ву. Чан Рюгь пайгъамбрариз тувру Агъа Аллагьди Чан гъуллугънаъ айидариз багарихьди хьуз ккайиб улупуз Чан малайик гьаъну».
Гъюрур – Иса
7 «Магьа, Узу багарихьди гъидиза!
Хушбахтавар ву гьаму китабдин пайгьамбарвалин гафар тамам апІрур!»
8 Узуз, Югьандиз, гьаму вари гъябкъюнзуз ва гъеебхьунзуз. Узуз гъеебхьиган ва гъябкъиган, узуз гьаму вари улупу малайикдин ликариккна, дугъаз икрам апІуз кІури, ис алахъза. 9 Хъа малайикди гъапизуз:
«Лиг, мици мапІан! Узура гьаму увуси, яв гъардшарси, пайгъамбрарси ва гьаму китабдин гафар тамам апІрударси, лукІ вуза. Аллагьдин улихь икрам апІин!»
10 Хъа дугъу гъапизуз: «Гьаму китабдин пайгъамбарвалин гафар мииликан! Гьаз гъапиш вахт сарун хъудубкьна. 11 Гъит, ахмакь адми чан ахмакь’валар апІури гъузри, гъит, алчагъри чан алчагъвалар апІри, гъит, ужури ужувлар апІри, ва гирами вуйир гирамиди гъузри».
12 «Магьа, Узу багарихьди гъидиза! Ва гьардиз, чав гъапІу ляхнариз дилигну, тувру Йиз кьимат Узухьди хьазухь. 13 Узу вуза Альфа ва Омега, Сарпир ва КкудубкІрур, Эвел ва Аьхир».
14 Хушбахтаврар ву чпин палтар урччурайидар! Дурариз уьмрин гьарихьна ихтияр а, дурарихьан Шагьриъ урнарианмина учІвуз шулу. 15 Амма хуйир, фалчйир, кьяппйир, йивну йихрудар, идолариз икрам апІрудар, кучІал ккунидар ва думу арайиз хрудар вари Шагьрин чІатинди гъузди.
16 «Узу, Исайи, учвуз гьаму шагьидвал тувну, жямяаьтарин улихь ктибтуз Йиз малайик гьаунза. Узу вуза Давудрин Ччив ва Кюл. Узу вуза гвачІиндин аку Хяд».
17 Рюгьнура ва швушвура кІура: гъач!
Хъпехъурайирира, гъит, йипри: гъач!
Дахаргнайирра, гъит, гъюри!
Шлиз ккундуш, гъит, уьмрин шид чІанади гъадабгъри!
18 Гьаму китабдин пайгъамбарвалин гафар ерхьурайидариз узу улихьмиди кІураза: эгер шли гьаму гафариин фукІа-мукІа иливиш, дугъ’ин Аллагьдира гьаму китабдиъ ктитурайи бедбахтвалар иливиди; 19 хъа эгер шли гьаму пайгъамбарвалин китабдикан фукІа-мукІа ктабгъиш, гьаму китабдиъ ктитурайи уьмрин гьаркан ва Гирами Шагьрикан Аллагьди дугъан пай ктабгъиди.
20 Шли гьамдикан шагьидвал апІураш, Дугъу кІура:
«Ав, Узу багарихьди гъидиза!»
Ав гьаци ибшри, гъач, Агъа Иса!
21 Агъа Исайин уж’вал варидариз ибшри!