Филипп

ФИЛИПП ШАГЬРИЪ АЙИ ХЪУГЪРУДАРИЗ КАГЪАЗ

Филипп шагьриз Павел, жара халкьариз Ужувлан хабар рабгъуз кьюбпи ражари сиягьятназ удучІвган, гъафну. Европайин жилариин Исайихъ хъугъдар сифте вуди гьадму шагьриъ ачмиш шулу. Ужувлан хабар рабгъура кІури, гьаддин кІуллан Римдиъ дустагъ дапІнайи Павелихьди гьаму шагьрин хъугърудариз Гирами Рюгьну кагъаз бикІуз мажбур гъапІну. Павел чан суддиз ккилигурайи. Дугъан, учв гьякь дапІну, азад апІур кІури, миж айи. Филипп шагьрин хъугърударин пулин кюмекниинди, чахьан чпихьна гъюз шлу мумкинвализ Павели чухсагъул кІура. Исайин вакилин юкІв, дурар чпиз алахьурайи читинвалариз дилигди, Иса Месигьдикан вуйи Ужувлан хабарниинди яшамиш шулайиган, марцциди шадвали абцІна. Гьаму кагъзин кьюбпи кІулин 6-11-пи цІарари адми гьяйран дапІну дерккру. Душваъ, асккан гъапІу Месигьдикан гьевеслуди ктибтура. Месигьдин табигъ’валикан вуйи му ктибтувал сифте Исайихъ хъугъдарин арайиъ гьеле сабпи шагьидвал ву. Кагъаз, дустагъдиъ дибикІнайивализ дилигди, шадвали абцІна, гьаз гъапиш Павелин Филиппдиъ хъугърударихъди ужудар аьлакьйир а. Фицики дурар чпин хъугъувалиин ижмиди дийигъна, мугагьназси гьамусра дурар жара хъугърудариз кюмек апІуз гьязур ву. Мидлан савайи, Филипп агьлари Месигьдилан улар алдадагъри, Дугъан масанвал, дирбаш’вал ва инсанарин гъуллугънаъ хьувал кІваин алди ккунду, кІура Аллагьдин Рюгьну. Чан шадвал Дугъу гьаму тухъ ва важиблу цІарниинди ухьухьна рубкьура: «Ихь Агъайиъ саб духьну, гьаммишан шадвал хъапІай, хъана кІураза: шадвал хъапІай!» (4:4).

¹ Месигь Исайин гъуллугъчйир вуйи Павелихьанна Тимофейихьан – Филиппдиъ айи Месигь Исайихъди саб вуйи Аллагьдин хъугърудариз, гьадму хъугърударин аьхюдариз ва дурарин кюмекчйириз.

² Уж’вал ва мясляаьт учвуз, ихь Адаш Аллагьдихьан ва Агъа Иса Месигьдихьан!

Павелин миннат

³ Гьар ражари учву кІваин апІури, узу йиз Аллагьдиз баркаллагь кІураза. ⁴ Гьар ражари учвхъан ккарагруган, узу шадвалиинди ккарагури шулза, ⁵ гьаз гъапиш учву Ужувлан хабар рабгъбаъ сифте йигъариланмина гьамусдизкьан иштирак шулачва. ⁶ Учвуъ гьадму ужуб ляхин Ккебгъури Месигь Исайин Йигъазкьан гьадму ляхин гъабхиди ва гьадмуган ккудубкІиди.

⁷ Дугъридан, учвухьна вуйи йиз гьиссар ари гьацдар духьну ккунду! Узу дустагъдиъ айиганси, адруганра – узу Ужувлан хабар, дид’ин алжагърударихьан уьбхюрайиган ва думу дугъри вуйиб тасдикь апІруган, узуси учвура гьадму ужувлан гъуллугънаъ гъахьунчва. ⁸ Месигь Исайин Чан юкІвси йиз юкІв фициб убцру масанвалиинди учвухьна вуйиш, магьа Аллагь шагьид ву! ⁹ Узу, ичв масанвал хъана артухъ аьхю хьпан бадали ва гьякь аьгъюваларина сагъу фагьумлували учву ацІбан бадали, ккарагураза. ¹⁰ Гьаддиз учвхьан учвуз ужубсиб гъядябгъюз хьибдичвухьан; учву Месигь хъадакну гъюру Йигъан марцциди ва саб тахсир ктарди гъуздичва; ¹¹ учвхьан Аллагьдин ад ва тяриф апІуз шлуси, Иса Месигьдин кюмекниинди гьякь’валин бегьер хуз хьибдичвухьан.

Павели аьгь апІурайи дарвалари Аллагьдин ляхнариз кюмек апІура

¹² Учвуз аьгъяди ккундузуз, гъардшар: узухъди гъахьи гьядисйир Ужувлан хабар рабгъуз кюмек гъахьну. ¹³ Римдин паччагьдин хулан гъулугънаъ айи эскраризра ва вари жарадаризра узу Месигьдин кІуллан дустагъдиъ итнайиваликан аьгъя. ¹⁴ Узу дустагъдиъ итну кІури, Агъайихъди саб вуйи гизаф гъардшар, саб юкІв айиганси, уч гъахьну ва хъана ачухъди ва гучІ ктарди Аллагьдин гафнакан ктибтури гъахьну.

¹⁵ Дюз гъапиш, дурарикан сакьюдари Месигьдикан хабар чпин арайиъ бахилвал, талит ади дебккра, хъа жарадари – ужудар ниятар ади. ¹⁶ Му адмийири мици узу ккунивалиан апІура, дурариз, узу, Ужувлан хабар уьбхюз кІури, Аллагьди дерккнайиваликан аьгъя.

¹⁷ Хъа гьацдарра аки, Месигьдикан хабар чпин хайирнахъди рабгърударра. Дицдари Хабар марцци кІваан рабгъури шулдар, дурари дици, узу йитІнайи зунжрар ижми ва гъагъи апІуз ккунди айидариси апІура. ¹⁸ Фу пухьахъа? Дурари чІуру вая марцци ният ади кІурашра, Месигьдикан кІура – гьаддиз узу гьацибдизра рази вуза.

Узу шадвали ацІдиза, ¹⁹ фицики ичв ккарагбарина, Иса Месигьдин Рюгьнан кюмекнуна ва гьамци хьпу узу азад апІруб, аьгъязуз. ²⁰ Му йиз ижми умударихъдина ккилигурайиваларихъди сабси гъюра. Ва, гьаци вуйиган, узу нач шлуси апІидарза, хъа мугагьназси гьамусра гьаци кІубанди хьидиза, ва, узу чІивиди гъузишра, гъачІишра, йиз бедендиъ Месигь за дапІну хьиди. ²¹ Фицики йиз уьмур Месигь вуйиз, аьжал – узуз гъурубкьу мутму. ²² Хъа эгер узу йиз бедендиинди яшамиш шули гъузиш, узу бегьерлуди лихувал хьибди. Гьаци вуйиган, узу узуз фу ктабгъурушра, аьгъдарзуз. ²³ Йиз ниятназ дилигди, гьадму кьюб рякъкан узу саб рякъ ктабгъну ккунду. Узуз, му дюн’яйиан душну, Месигьдихъди шлу рякъ ктабгъуз ккундузуз, мици гъабхьнийиш, икибаштІан, лап гизаф ужу вуйи. ²⁴ Хъа узу му дюн’яйиин гъузиш, ичв хайирназ хьибди, гьаддиз, мунуб рякъ хъа гизаф ужуб ву. ²⁵ Му гьаци вуйиган, узу гьамушв’ин гъузруб аьгъязуз. Узу, учву хъугъувалиъ улихь гъягъюз ва ичв хъугъували хурайи шадвал артухъ хьуз, учвухъди гъуздиза. ²⁶ Узу хъана учвухьна гъафиган, узлантина Месигь Исайиинди хъа артухъ фурс апІуз хьибдичвухьан.

²⁷ Фицдар гьялариъ ахъишра, Месигьдин Ужувлан хабар ктибтуз лайикьлуди гъузай! Узу учвухьна гъафиган, рябкъруси, хъа гъюз дархьиш, узуз ебхьруси саб хилди, Ужувлан хабар бадали, жафа зигури ва гьич сарихьдира учвуз гучІ ккапІуз гъидритди яшамиш йихьай. Гьамциб ичв дирбаш’вал дурариз чпи тІанкь шлувалин лишан хьибди, хъа учву дюрхну хьиди, мурар вари Аллагьдин ляхнар хьиди. ²⁹ Аллагьди учвуз Месигь бадали хъугъувал ва Месигь бадали аьзабар аьгь апІуб тувна. ³⁰ Фицики узу, учвуз рябкъюри, ичв улихь гъубхубсиб дяви учвура гъабхурачва. Узу думу, учвуз аьгъюганси, гьамусра гъабхураза.

Сар-сарин гъайгъушнаъ йихьай

¹ Эгер учвуз Месигьдиъ ккарцувал аш, эгер Дугъан масанвал учвуз шадвал вуш, эгер ичв арайиъ Рюгьниинди гаф-чІал аш, эгер ичв арайиъ рягьимлувал ва язухъ зигувал аш, ² йиз юкІв гьубкІну шад шлуси апІинай: вари юкІв хъипну, вари сабси ккун апІинай, саб жанси саб рюгьнаъди йихьай ва сабсдар фагьмар-фикрар ишричвуъ. ³ Жвуван заанвал, ясана тяриф бадали, фукІара мапІанай. Хъа жвувтІан багахь хьайир заанди дисури апІинай. ⁴ Учвкан гьарсари неинки чан, хъа гьацира имбударин хайирнаканра фикир апІри!

Мисал – Месигь

⁵ Месигьди фици фикир апІуйиш ва гьапІри гъахьнийиш, учвура гьаци апІури гъузай.

⁶ Думу учв Аллагь вушра, Аллагьдихъди сабси, Аллагьдихъан хъичІихну гъузундар. ⁷ Хъа, Чаина лукІвал гъадабгъну, Учв асккан гъахьну. Думу адмийириз ухшар айир гъахьну. Думу зиълан адмиси духьну, ⁸ гьациб саягъниин разиди гъузну, тап чан аьжал хьайизкьан, думу, аьжалра фициб аьжал – чавра хачриин, мютІюгъди гъузну имийи! ⁹ Гьаци хьузди Аллагьди Думу варибдин зиина за гъапІну ва ччвурра Дугъаз варидаринтІан заан вуйиб тувну – ¹⁰ Исайин ччвурнан улихь гьарсабди икрам апІбан бадали завариин али, жилариин али ва жиларикк ккайи варибди, ¹¹ гьарсаб мелзну, Иса Месигь Адаш Аллагьдин адлувализ вуйи Агъа ву, кІури, ччвур бисбан бадали.

Аллагьдиз учву фицдар духьну ккундуш, гьацдар йихьай

¹² Йиз ккунидар, узу учвухъди хъайиган, учву, фициб аьшкьниинди узуз мютІюгъ духьну, лихуйиш, гьаци зурба аьшкь кади, гьюрмат ади ва гучІ’вал хьади, узу учвухъди хътруганра, ичв уьрхювал тамамуб хьпан бадали, лихай. ¹³ Фицики иллагьки Аллагьди, Чаз ккуниб апІбан бадали, ичв тямягь арайиз хуру ва ляхнарихъ хъаъру. ¹⁴ Мурмрарна гьюжатар дарапІди, вари апІинай. ¹⁵ Ва гьадмуган учвук гьич саб тахсир хьибдар, марцциди гъуздичва; намусна гъир’ят дудубгнайи ва улдугнайи инсанарин арайиъ Аллагьдин марцци веледар хьидичва. Чиркиндарин арайиъ, йишвандин мучІушнаъ акв туврайи хядарси, йихьай. ¹⁶ Гьациб жюрейиинди уьмур хурайи Гаф гъайибхай! Месигьдин Йигъан узу йиз рякъ давди ккадапІундайза ва давди жафйир гъизигундайза кІури, учв’инди фурс апІидиза!

¹⁷ Аллагь бадали апІурайи ляхнариъ ичв хъугъувалин гъуллугънаъ хьпаъ йиз ифи удубзурушра, узу шад хьидиза, учвухъди сабси шадвал хъапІдиза. ¹⁸ Ари гьамциб жюрейиинди учвура шадвал хъапІну ккунду, ва ичв шадвал узухъдира пай апІуз шлуси гъузай!

Тимофейиканна Эпофрадитдикан хабрар

¹⁹ Агъа Исайи, багарихьди Тимофей учвухьна гьауз шул, кІури, умуд тувразуз, дугъу ичв ляхнар фици вуш, узуз аьгъю гъапІган, йиз юкІв архаин шул. ²⁰ Тимофейси, учвхъанди юкІв убгру жара кас адарзуз. ²¹ Вари имбудар чпин хайирнахъ хъа, Иса Месигь бадали вуйир гьич фужкІара дар. ²² Думу фукьан мюгькамур вуш, учвуз аьгъячвуз, думу узухъди, Ужувлан хабар бадали бай адашдихъди фици шулуш, гьаци шула. ²³ Узуз, йиз ляхин фицидарихъинди илтІибкІнуш, аьгъю гъабхьимитІлан думу учвухьна гьауз миж кайиз. ²⁴ Агъайи, багарихьди узхьанра учвухьна гъюз шул, кІури, умуд тувразуз.

²⁵ Узу гьацира, эгер ихь гъардаш Эпофрадитра учвухьна кьяляхъ гьаиш ужу шул, кІури, гьисаб апІураза. Думу, йиз гъайгъу зигбан бадали, учву узухьна гьау йиз гъуллугъчи ва узуси саб гъагънакк ккайи йиз юлдаш вуйиз. ²⁶ Дугъаз учву рякъюз гизаф ккунди а, думу йишв’ин сикинди ктисурадар, гьялак духьна, гьаз гъапиш, учв иццру гъахьну, кІури, учвухьна хабар дубшна, кІура. ²⁷ Думу гьаци хьузра гъабхьну ва даркІиди саб нуфт ими. Аммаки Аллагьди дугъан язухъ гъизигну, неинки дугъан, хъа гьацира йизра язухъ гъизигну – Аллагьдиз йиз дерд артухъ апІуз ккун гъабхьундар. ²⁸ Гьаци вуйиган, Эпофрадит хъа аьхю иштагьниинди учвухьна гьаъдиза. Думу учвухьна гъюб ичв аьхю шадвал хьибди, ва йиз дердра гьаму сабдиинди кам хьибди. ²⁹ Думу Агъайихъди вуйи ичв гъардашси аьхю шадвалиинди кьабул апІинай ва гьацдар адмийириз чпи лайикь вуйибсиб гьюрматра апІури йихьай. ³⁰ Фицики Месигьдин ляхнар бадали дугъан лик аьжалин даргниин алди гъабхьну, дугъу чан уьмур гьяйиф гьапІундайи. Гьаци дугъу учвхьан узуз апІуз дархьи кюмекар гъапІунзуз.

Месигь варидартІан заан ву

¹ Ахирки, йиз гъардшар, учву Месигьдихъди хъайивалихъди учвуз шадвалар ккун апІураза! Узу учвуз гьаммишан сабдикан бикІурашра, эргри шулдарза. Миди учву гизаф бедбахтвалариккан уьрхиди.

² Суннат апІури, бедендиз зиян тувру намуссуз „хуйирихьан“ ихтият йихьай! ³ Гьякь суннат дапІнайидар, ухьу вухьа, гьаз гъапиш, ухьу Аллагьдин Рюгьну хъаъри, Дугъан гьякь гъуллугънаъ ахьа; Месигь Исайин уьмриинди ухьу заан, яни дамахлу вухьа ва му дюн’яйинубдихъан хъичІихнадархьа. ⁴ Узхьан му дюн’яйинуб дибисну гъузузра шуйзухьан. Эгер, шли-вуш му дюн’яйинубдиин гъубзру бин азуз, кІури гъабшиш, дугъазтІан узуз дициб бин хъа ижмиб азуз. ⁵ Йиз суннат бабкан духьну миржидпи йигъан гъапІнийи. Узу Израилин халкьдин арайиан вуйи Вениаминдин тухмиан вуза. Узу жугьдар вуйи абйир-бабарикан духьнайи марцци жугьуд вуза. Эгер Къанундихъди фици вува, кІури, гьерхруш, узу Къанун гьярф-гьярфди тамам апІру фарисей вуза. ⁶ Йиз хъачІаккувал Аллагьдихъ хъугърударихъ хъергуб вуйиз. Къанунди дюз кІурайиб вари тамам апІури гъахьунза, гьаддин гьякьнаан узук гьич саб тахсирра ктарзук.

⁷ Аммаки гьадмуган узу гъазанмиш дапІнайи вари хъуркьувалар Месигь бадали гьамус узхьан гьадахьу мисал апІураза. ⁸ Мидланра гъайри, йиз Агъа Месигь Иса аьгъю хьпан кьяляхъ вари имбуб гьич фукІа дарубси гьисаб апІураза. Думу бадали узу варибдихьан ярхла гъахьунза, гьаму дюн’яйиъ айиб вари гатІахьнайи чІюрхяртІан багьади дарзуз. Йиз мурад-метлеб, гьапІнура, Месигь агуб ва ⁹ узу Гьадгъахъди хьуб вуйиз. Сарун узу, Къанунди улупнайиб тамам апІидиза, кІури, жвуван жафайиинди Аллагьдин улихь гьякь хьуз хьибдизухьан кІури, гьаддихъ хъачІарккну имдарза. Месигьдихъ хъугъигантІан Аллагьдин улихь гьякь хьуз шлуб дар – узу гьаддихъ хъачІарккназа. Гьациб хъугъвал туврайирра Аллагь ву. Узуз ккуниб сабтІан дарзуз: ¹⁰ Иса Месигь аьгъю апІуб, яни Думу чІиви гъапІу кьудрат аьгъю апІуб. Узуз гьацира, Дугъан аьзабар пай апІуз ккундузуз ва, Гьадму гъачІибси дукІну, ¹¹ Гьадму чІиви гъахьиганси, узура чІиви хьидайкІан, кІури, миж кади гъузуз ккундузуз.

Улихь хьайи метлеб тамам апІуз шерик йихьай

¹² Узуз, узу гьадму метлебарихъна гъафунза, пуз, ккунди адарзуз. Аммаки Иса Месигьди узу, гьадму метлебнахъна гъюз кІури, кадагънайир ву. ¹³ Гъардшар, йиз улихь гьамциб къайда дебккназа: сарун гъапІу ляхнарикан фикир дарапІуб ва узуз айи вари кьувватниинди апІуз ккимбу ляхнарихъ хъюгъюб. ¹⁴ Гьаци апІувалин метлебра узу пешкеш рубкьуз лайикь хьувал вуйиз. Думу пешкеш – Иса Месигьдиланмина Аллагьди аьршариз дих дапІнайивал вуйиз.

¹⁵ Узуз учвкан фужар хъуркьнаш, гьаму узуси духьну ккундийзуз. Хъа эгер, саб фициб-вуш месэлайин гьякьнаан учву жараси фикир апІураш, Аллагьди гьадмура ачухъ апІидичвуз. ¹⁶ Фициб жюрейиинди вушра, гъачай, ухьу гьамусдиз хъуркьнайи хъуркьувалар, аьгъювалар гьисабназ гъадагъну, яшамиш шулахьа. ¹⁷ Гъардшар, жарадар гъярайиси, учвура йиз рякъди узухъди дуфну ккунду. Учу учвуз улупганси яшамиш шулайидариз фикир тувай. ¹⁸ Фицики, гизафдар, узу учвуз улихьна гъапиганси (гьамусра улариин нивгъар алди хъана кІураза), Месигьдин хачран душмнарси яшамиш шула. ¹⁹ Дурарин аьхир аьжал хьибди, дурарин аллагь чпин фун ву; чпиз нач дубхьну ккунибдиинди дурари фурсар апІури шулу. Дурари дюн’яйин ляхнарикантІан фикир апІури шулдар. ²⁰ Хъа ихь ватан аьршариъ а. Гьадму ихь Ватандиан гъиди ухьу Уьрхру ихь Агъа Иса Месигь. ²¹ Дугъу, ихь зяиф, аьжал хъайи жанар дигиш дапІну, Чансиб нур тувру Бедендиз илтІикІиди. Дугъу ихь жанар вари дюн’я Чаз мютІюгъ апІуз гъиту кьувватниинди илтІикІуз гъитди.

Аллагь ву умуднан, шадвалин ва мясляаьтнан булагъ

¹ Магьа гьаддиз, йиз ккуни ва дярякъди ктирсуз даршлу гъардшар, ккунидар, йиз шадвал ва гъалибвалин таж, Агъайихъди сатІиди, ижмиди дийигъну гъузай! ² Узу Эводияйиканна Синтихияйикан ккун апІураза: Агъайин ччвур бадали албагну яшамиш йихьай! ³ Узу увканра, йиз дугъри вуйи Сизиг, ккун апІураза: миннат вуйиз, кюмек апІин гьадрариз, фицики дурар кьюридра Ужувлан хабар бадали, узухъди, Клементдихъди ва имбу йиз юлдшарихъди (дурарин ччвурар Уьмрин китабдик ка), гъилихну.

⁴ Агъайихъди саб духьну, гьаммишан шадвал хъапІай! Хъана кІураза: шадвал хъапІай. ⁵ Гъит варидариз ичв фурс ктрувал рябкъри. Агъа магьа багахь хьа! ⁶ Гьич сабдинна гъайгъушнаъ махьанай. Аммаки фицдар гьялариъ ашра, ккарагай, ккуниб ккун апІури, илтІикІай, ясана, чухсагъул кІури, илтІикІай, гъит ичв тІалабар Аллагьдиз аьгъю ишри. ⁷ Хъа Аллагьдихьан гъюрайи, гъавриъ ахъуз даршлу, заан вуйи мясляаьтну, ичв юкІвар ва фикрар Месигь Исайиъ уьрхиди.

⁸ Аьхирки, гъардшар, гьарган гьякь вуйибдикан, лайикь вуйибдикан, дюзваликан, марццибдикан, бегелмишубна гьяйранубдикан, намуслуваликан ва тярифариз лайикьубдикан фикир апІинай. ⁹ Узхъан гъудубгъуб, узхьан гъурубкьуб, узкан гъеебхьуб, узуъ гъябкъюб – вари тамам апІинай, ва гьадмуган мясляаьтнан булагъ вуйи Аллагь учвухъди хьиди.

¹⁰ Учву хъана йиз гъайгъушнаъ учІвну, узухъди илтІикІиган, узу йиз вари юкІв хъипну Агъайихъди сабси шадвали гъадагъунза. ИкибаштІан, учву гьаммишан йиз гъайгъушнаъ ачва, хъа гьамусдизкьан учвуз ичв гъайгъу узуз улупуз мумкинвал адайчвуз. ¹¹ Узу мици, учвкан фу-вуш ккунди айивалиан кІурайиб дариз, фицики, узу фициб гьялнаъ ахънашра, узуз айибдиин разиди гъузуз гъудубгъунза. ¹² Узуз, касибди вушра ва ацІну ашра, яшамиш хьуз аьгъязуз. Уз’ин вариб улубкьунзуин ва варибдихьна гьязурра вуза: тухъвалихьна ва гаш’валихьна, девлетлуварихьна ва касибвалихьна. ¹³ Узуз кьувват Туврайирин кюмекниинди вари шулзухьан.

¹⁴ Хъа вушра, узухъди йиз дердер учвура пай апІуб ужу гъапІунчва. ¹⁵ Учвуз аьгъячвуз, Филиппдин агьлар, узу Македонияйиан удучІвну, Ужувлан хабар рабгъуз хъюгъхъанмина, учвлан гъайри, Аллагьдихъ хъугърударин гьич саб жямяаьтди кюмек гъапІундарзуз. ¹⁶ Учву Фессалоникдиз кмидира швнубсабан йиз яшайишдиз кюмек хътапІури гъахьунчва. ¹⁷ Мици узу, учвхьан хъана гизаф пешкешар гъадагъурза, кІури, ваъ, хъа учвуз ичв пулилантина хъана гизаф хайир хьпан бадали апІурайиб вуйиз. ¹⁸ Хъа узуз вари гьубкІну азуз, гьамус узуз ккунибтІан гизафра кади азуз. Учву хътапІуб вари Эпофрадитди тувунзухьна, гьамус варибдихъди ацІназа. Ичв багъишар Аллагьдин хулаз гъабхи «ицци ниъ хъади убгрубси», «кьабул шлу гъурбан, Аллагьдиз хуш вуйи гъурбанси» гьисаб апІуз шулу. ¹⁹ Ва йиз Аллагьдира Чан зурба вуйи девлетниинди, Месигь Исайилантина вари учвуз ккунди имбубдихьди артухъра кади ацІдичва. ²⁰ Аьсрариан аьсрариз ихь Адашдин, Аллагьдин ад ибшри. Амин. ²¹ Месигьдианмина Аллагьдин гирами халкьдик кидикьнайи варидариз саламар йипай. Узухъди хъайи вари гъардшарира учвуз саламар хътаура. ²² Аллагьдин вари халкьди, иллагьки Римдин паччагьдин хулариъ гъуллугънаъ айидари, учвуз саламар хътаура. ²³ Агъа Иса Месигьдин уж’вал, гъит, гьарган ичв рюгьнахъди ибшри!