ФИЛИМОНДИЗ КАГЪАЗ
Му кагъаз Павелихьди Гирами Рюгьну Римдиъ дибикІнайиб ву. Филимон Колосс шагьриъ Исайихъ хъугърударикан сар вуйи. Филимондин Онисим кІуру сар лукІ Рим шагьриз гьергну гъушнийи. Гьаму шагьриъ гъабхьи саб гьядисайи лукІран вари уьмур дигиш гъапІнийи: думу Павелихъди таниш гъахьнийи. Павеликан Онисимдиз учв уьрхру Исайин гьякьнаан гъеебхьнийи ва Дугъан терефкар гъахьнийи. Гьергну кІури лап пис жаза гьадабтІбазра дилигди, гьаму гьядисайиинди учв гьергну гъафи эйсийин хликкна кьяляхъ душну, ккунивалин думу гъавриъ ахъру. Павели Филимондиз, чан лукІрахьна гъюдал йихь кІури, тІалаб апІури, бикІуру, фицики, Филимон чавси, думура Аллагьдихъ хъугърур гъахьнийи. Гьеле Павел лукІ’вализ ачухъди къаршу удучІвурадаршра, Гирами Рюгьну Онисимдинна Филимондин арайиъ цІийи аьлакьйир ирчбакан бикІура: «Мумкин ву, саб вахтназ думу увухъди дархьуб, хъасин гьаргандиз увухъди хьиди, амма лукІси ваъ, хъа лукІтІан гизаф заина вуйи ккуни гъардашси, иллагьки, узуз ккуни. Думу увузра гьам инсанси, гьамсана Агъайилантина вуйи гъардашси багьа шулу!» (15, 16).
11 Иса Месигьдихъ хъугъру кІури дустагъ дапІнайи Павелихьанна гъардаш Тимофейихьан – ухьухъди гъуллугънаъ айи, ккуни вуйи Филимондиз 2 ва яв хулаъ уч шулайи вари хъугърудариз, ккуни чи Апфияйиз ва ухьухъди гъуллугънаъ айи Архипдиз.
3 Ихь Адаш Аллагьдихьан ва Агъа Иса Месигьдихьан уж’вал ва мясляаьт ибшричвуз.
Павели саб ляхин тІалаб апІура
4 Йиз ккарагбариъ уву кІваин апІури, увхъан Аллагьдиз гьаммишан чухсагъул кІураза, 5 гьаз гъапиш, узуз Агъа Исайихьна ва вари гирами халкьдихьна вуйи яв хъугъуваликан ва масанваликан ебхьури шулзуз. 6 Учухъди пай апІурайи яв хъугъували, Месигьдихъди учуз айи вари ужубдин увура гъаври ахъбан бадали ккарагураза.
7 Яв масанвали узу гизаф шад гъапІну ва ккаарцну, гьаз гъапиш, уву, гъардаш, Аллагьдин халкьдин юкІвар архаин гъапІунва.
8 Ва гьаддиз, узхьан, Месигьдин вакилихьан, увуз яв буржйир тамам апІин кІури, саб нач-гучІ адарди пуз шулушра, 9 узу увухьна, тІалаб апІури илтІикІуб хъана ужу ву кІури, гьисаб апІураза, фицики узуз уву масанди вузуз. Узу, Павели, Месигь Исайи гьаънайири ва Гьадгъулантина дустагъ дапІнайири, 10 узуз гьаму дустагъдиъ байси гъахьи йиз бай Онисимдихъан тІалаб апІуразавукан. 11 Саб фила-вуш думу узуз гьич саб ляхнизра хай вуйир дайи, хъа гьамус думу гьам увузра, ва гьам узузра хайирлу кас ву. 12 Думу узу увухьна кьяляхъ хътаураза, амма думу узкан ктабтІу йиз пайси вузуз! 13 Думу гьамушваъ, дустагъдиъ узу Ужувлан хабарнан кІуллан итнайишваъ, яв ерина узуз кюмек апІбан бадали, узухъди гъитуз ккундийзуз. 14 Яв разивал дарди, дици апІуз ккун гъабхьундарзуз. Гъит яв ужувлан ляхин яв хушниинди вуйиб ибшри, хъа гуж апІбиинди ваъ. 15 Мумкин ву, саб вахтназ думу увухъди дархьуб, хъасин гьаргандиз увухъди хьиди, 16 амма лукІси ваъ, хъа, лукІтІан гизаф заина вуйи ккуни гъардашси, иллагьки, узуз ккуни. Думу увузра гьам инсанси, гьамсана Агъайилантина вуйи гъардашси багьа шулу!
17 Гьаддиз, ухьу саб ляхин апІурайиган, увухьна гъафи узу кьабул апІруси, думура кьабул апІин. 18 Хъа эгер, думу яв улихь тахсиркар вуш, ясана думу увуз фу-вуш буржлуди гъузнаш, думу бурж узук кайи гьисаб апІин. 19 Магьа узу увуз йиз хилариинди бикІураза: «Узу, Павели, яв зарар ккебкуб кІул’ин гъадабгъураза». Гьеле узу, уву узуз буржлу вуйибдикан гафкьан кІурира адарза. Уву яв ув’инди йиз улихь буржлу вува! 20 Ав, гъардаш, Агъа бадали гьамус узуз увканра хайир дубхьну ккундузуз. Месигьдиланмина уву йиз гъардаш вуйивализ дилигну, йиз юкІв сикин апІин.
21 Уву узухъ хъпехъур кІури, миж кади, увуз бикІураза. Уву йиз тІалаб узу ккун апІурайибтІан артухъра кади, тамам апІруб аьгъязуз. 22 Мидихъди сабси, узуз хялижвувазси, саб халра гьязур апІуб ккун апІураза. Ичв ккарагбарин кюмекниинди Аллагьди узу гьаму багарихьди учвухьна гьаърубдик умуд кайиз.
23 Увуз саламар хътаура узухъди дустагъдиъ айи йиз юлдаш Эпафрасди, думура Месигь Исайин кІуллантина дустагъдиъ айир ву. 24 Гьацира саламар хътаура узухъди гъуллугънаъ айи Маркди, Аристархди, Демасди ва Лукайи. 25 Агъа Иса Месигьдин уж’вал гьарган ичв рюгьнахъди ибшри!